معلاباليش وش صرى بيناتهم هذيك ليلة أنا برك دخلت للشمبرة مسلم غلقت على روحي الباب كالميت روحي بحبات تاع دوا وبقيت نستنى غير في شمس تطلع نروح لدار بابا مبقاليش قعاد هنا . غير وصلت 8 وسمعتهم ناضو خرجت ديراكت لشمبرتي دخلت لقيت مسلم راقد فوق الفوتاي جمعت حوايجي في الكابة ونوضتوا يوصلني قالي نبدل حوايجي ونوصلك. خرج لحقتوا لقيتوا واقف معاه في الكوار يقولوا انت مدخلش روحك بيني بينها . مسلم قالوا علاه مندخلش روحي راك منيتك لبارح جبدتك من فوقها وانت شارب اصيل راك منيتك علاه راك متزوج بيها وانا معلاباليش مشها رجلة هادي فهمت إذا راك تستقوى عليها أنا راني قدامك لي تقيسها تقيسني . قالوا اخطي *** على الصباح راني علابالي بروحي وش راني ندير . قالوا مسلم من آخر متزيدش دور جيهتها قاتلي قولوا يخطيني فرات صاي كثرتلها مهيش مرتك هادي حتى تحمل هبالك فهمت . قدمت قتلوا مسلم راني واجدة لكان نروحوا قالي هو وين تروحي رجعي حوايجك لبلاصتهم معندك حتى بلاصة تروحيلها . شغل مسمعتوش أصلا كملت رايحة نهبط حكمني قالي راني نقولك رجعي وش في يدك معندكشً خرجة من دار . نطرت يدي منو قتلوا ما عندك حتى دخل فيا ان شاء الله نروح للقبر مدخلكش فهمت منيش حابة حتى نسمع صوتك قدملي بعدت لصقت في مسلم تخبيت وراه قتلوا أخطيني فهمت أخطيني متزيدش تخرج في طريقي عفتك تفهم . جا قدم معول يجبدني من ورا مسلم دزو مسلم قالوا بعد عليها تمسها منتفاهمش معاك .غير سمع هكدا هبل ديراكت تلاح عليه ضربوا ومسلم رجعلوا ما فهمت والوا لقيتهم يتقاتلوا بالدبازي والركالي جيت ندخل بيناتهم مقدرتش وليت نعيط على خالي ولا واحد من ولاد يجي يحزهم . طلعلهم خالي صغير لقاهم هكاك ما جا فكهم بسيف . ناض يعيط عليهم علاه هكدا صغار انتم حتى تتعاركوا هكا متحشموش رجال بلحيكم تتقاتلوا في دار . من بعد دار على مسلم قالوا كيفاه تمد يدك على خوك كبير عليك قالوا شوف هو من ليوم مهوش خويا لي يحقر وليا مهوش خويا .عاود رجلوا اصيل يحوس يضربوا وقف بيناتهم خالي قالوا وش هدرة هادي مسلم وش كاين وانا معلاباليش من بعد دار عندي قالي وش كاين جوليا وش دارلك اصيل اهدري ضربك ولا وا قتلوا لالا ما دارلي والوا برك مخلانيش نروح عند بابا قالي معليش روحي اغسلي وجهك واهبطي دوك نوصلك أنا . رجعت لشمبرتي غسلت وجهي لقيت مسلم دخل قالي علاه مقولتيلوش كلشي علاه راكي تخبي عليه قتلوا يخي انت لبارح متقوليش قالي كنت نحسب فيه نادم وشارب سيد يقولي مدخلكش ندخل عندها كيما نحب ، دارها قبل معاك اهدري قتلوا لالا وشبيك مسلم كون دارلي حاجة ولا قربلي راني هدرت مش راح نخبي عليه . قدم مسحلي دموعي قالي معليش راني نخلفها منو الطحان . قتلوا خلاص مسلم أنا أصلا منزيدش نجي هنا صاي منيش باغية حتى مشكل . قالي تجي بسيف عليك هادي دارك ولي يقيسك يقيسني فهمتي . عنقتوا قتلوا ربي يخليك ، خلاص مسلم منيش باغية مشاكل درك راني باغية برك نرتاح من كلشي باغية نعيش حياتي كيما قاع لبنات مسلم . قالي معليش لي تساعدك هذيك هيا المهم عندي نشوفك مرتاحة وفرحانة قالي راني هابط الحقيني . هو هبط وانا مسحت وجهي وعدلت شعريي وخرجت هبطت لقيتوا واقف مع خالي الصغير قارن حواجبنا وجّهوا احمر مفهمتش وليت نشوفو يخوف تقول مش نفس الوجه لي كنت نحبوا ونعشقوا ولا كي وليت نخاف منوا يبانلي تبدل . خرجت مع مسلم وصلني لدار بابا وراح .قعدت مع بابا هداك النهار كان زل عليه شوي تعب .في ليل على العشرة دخلتني ابال من عندو محبيتش نهز . بقا يعاود من بعد بعثلي ميساج هزي عليا ولا نجيك لدار . هزيت عليه قالي اخرجي راني نستنى فيك حدا الباب قتلوا وين نخرج في هاد ليل أخطيني اصيل وش مزال تحوس عندي قالي منعاودش الهدرة خمس دقايق نلقاك عندي سينو راني نجي نخرجك من الشعر راكي تعرفيني . كوبا عليا خفت لا ما نروحش صح يجي يديرها علابالي بيه مفهمتش علاه راه هابل هكا لبست صباطي وخرجت لقيت مرت بابا في الكوزينة قاتلي وين رايحة قتلها راني رايحة عند خالي راه مريض نروح نشوفوا قاتلي كون خليتي للصباح وروحتي شكون راح يوصلك .قتلها راه جا اصيل يوصلني .قاتلي وانا نقول وش كاين ايه روحي ربي يسهل وش دخلني فيك . خليتها منعرف وش تمتم وخرجت لقيت طموبيلتوا حدا الباب فتحت الباب وركبت قتلوا وش كاين سكت عليا مرجعليش وديمارا قتلوا وين رانا رايحين وين مديني بقا ساكت .حتى أنا سكتت لي كاينة دوك تبان بقا يسوق حتى وصلنا لبلاصة لي موالف يديني ليها قارا شاف معايا دورت وجهي قالي راكي دوري في وجهك عليا . كي مرجعتش عليه تنهد ورجع راسوا تكا وجبد قارو شعلوا قالي تسما صح كرهتيني كيما قلتي لبارح .بقيت ساكتة قالي علابالك كل ما نجي ننسى نتفكر وش صرى معاك ، منيش قادر نشوفك كيما قبل كل ما نشوفك نتفكر منيش قادر نسامحك . قتلوا علاش لازم تسامحني وأنا أصلا منيش غالطة مزالني جوليا نفسها . ضحك قالي علاه لازم نسامحك على خاطر خبيتي عليا وخليتيهم لعبوا بيك وضيعوك وضعتي مني جوليا . راكي تشوفي في روحك كيما قبل كون راكي كيما قبل كون راكي دافعتي على روحك لبارح ولي قبلوا كون راكي وقفتي في وجهي ومخليتينيش نمس شعرة منك . قتلوا مفهمتش وش قصدك وش حاب من لخر . قدم عندي حط رأسوا على راسي قالي راني حابك ترجعيلي جوليا لي حبيتها لي متخليش حقها يروح حابك ترجعي للحياة راني حاسك ميتة جوليا حابك ترجعي تتعلقي بيا وترجعيني أنا هو محور حياتك كيما قبل حاسك تبدلتي عليا مراكيش تحبيني كيما قبل علابالي بروحي غلطت معاك بصح غشي كان عاميني جرحتيني بزاف وستغبيتيني بصح مزالني نحبك ونعشقك . حابك تنسيني في كلشي فات ونرجعوا نبداو من حبسنا حابك ترجعي جوليا بنتي وحبيبتي لي حبيتها . بعدت عليه قتلوا منقدرش نرجع كيما قبل مدامني مزالني نشرب في دوا مستحيل نرجع كيما قبل ، متنساش بلي انت لي تخليت عليا وقت كنت محتاجاتك وكنت راح تبعتني للسبيطار . قالي متخليتش عليك ومستحيل نتخلى عليك كنت نخمم في مصلحتك وصحتكً . ضحكت قتلوا مزال تبرر لروحك بلي تخمم في مصلحتي .قالي ايه نخمم في مصلحتك وكان عندي حق شوفي روحك راكي تتمشي بالدوا ومستحيل تقدري تحبسيه مدام مدخلتيش للسبيطار راح تبقاي هكا . قتلوا معليش أنا قابلة روحي هكا . قالي وانا منيش قابل جوليا منيش قابل تبقاي هكدا . عيطت عليه قتلوا وانت وش دخلك فيا . قدملي حكملي وجهي قالي دخلني فيك جوليا راني باغي نديرك مرتي جوليا حابك في داري وفي فراشي وأم ولادي جوليا ومنقدرش نخليك هكا ضايعة بين دوايات . قتلوا وانا مش حابة نولي مرتك بسيف قالي ايه بسيف علابالي بيك تحبيني وتعشقي فيا مهما تنكري علابالي تحبيني ومستحيل تكرهيني . سكتت شوي من بعد قتلوا ايه ولحل وش هو . حكملي يديا قالي الحل هو تروحي للسبيطار مع ريان تقعدي حتى ترتاحي من بعد ترجعي للدار معانا نسجلك ترجعي تقراي في جامعة نتزوجو نجيبوا ولاد . جبدت يديا من يديه قتلوا أنا ميساعدنيش هاذ الحل مزالني حابة نعيش مع بابا وموحال ندخل للسبيطار أنا عاجبتني حياتي هكا . تنهد قالي ما لقيت معاك حتى حل علابالك تعبتيني جوليا . قتلوا حتى أنا تعبت راني نقاوم وخايفة يجي نهار ونتعب ونحبس ما نقاوم . بقا يشوف معايا حسيتوا صح مالقا حتى حل من بعد قدم عنقني قالي صاي ديري لي تحبيها واسمحيلي على لبارح نوعدك مستحيل نزيد نقربلك إلا وانتي مرتي وفي فراشي ، راح نستناك حتى ترجعي جوليا لي حبيتها ونتزوجو ونديرلك عرس لي يليق بيك .
