تبسمت معاه برك قالي وقتاه تجي للدار قتلوا يخرج بابا من سبيطار ونحي نقعد ايامات توحشت الدار قالي معليش قوليلي نجي نديك من بعد راح خرج أنا رجعت عند مرت بابا قتلها علاه تهدري قداموا هكا ياك راني خاطياتك وعلابالك بيا كنت خايفة على هاذي عيطتلوا قاتلي أنا ميهمنيش فيك بنتي جامي تزيدي دخلي عليها راجل للدار راكي باغيه تتلاقايه روحي ليه . قتلها معليش غير يخرج بابا منزيدش نبقى هنا قاعدة كي الهم القعدة معاك متنطاقش نهار كامل ونتي تهدري وتشكي وتنقرشي كرهتيني . قاتلي نهار السعد تروحي ونتهنا منك . الغدوة خرج بابا مسكين كان في حالة غير يقولي أبقاي قدامي راني حاب نسمعك كل دقيقة تقوليلي راني سامحتلك . كنت نديرلوا خاطرو نبقى معاه حتى يرقد نحكيلو على حياتي وعلى ماما نضحكوا نفرحوا ساعات أنا نطيبلوا وتوكلوا الحمد الله عشت معاه ايامات يقعدوا في بالي عوضت شوي لفراق لي كان . فاتت سمانة قالي اصيل نجي نديك للدار لبنات قالولي جيبها . وجدت حوايجي ورحت قلت لبابا تخيلوا قريب يبكي يقولي متروحش بالك نرقد ما نصبحش حي مدابيا نرقد على وجهك وصوتك ونوض عليهم بقيت نحاول فيه بيسك مرتوا صح هبلتني حبيت نبعد شوي عليها قتلوا نهارين منزيدش فوقهم كانوا ويكاند بسيف ما رضى جا ليا اصيل خرجتلوا سلم عليا من بعد عنقني قالي توحشتك علابالك . قتلوا حتى أنا قالي حتى انتي واش قتلوا راك علابالك حتى نزيد نقولها ضحك قالي زعما حشمتي ؟؟ ركبت معاه بقا غير يسقسي راكي مليحة وكيفاش فاتوا اياماتك وياك متقلقيش وتشربي في دوا حتى وصلنا هبطت دخلت لقيتهم كامل يستناو فيا شحال فرحت بيهم قدموا يسلمو ويعاودوا كي وصلت لمسلم هزني معنقني ويقولي هكا سمحتي في خوك نقولك أرواحي تقوليلي منقدرش حتى عيط عليه اصيل باه طلقني هذاك النهار فات غير ضحك وحكايات لمأكلة لي نبغيها طيبوهالي سهرو معايا حتى للوحدة باه كل وحدة راحت لشمبرتها . غير خرجوا قعدت تبسمت وحدي سبحان الله مغير الأحوال قبل كنت نقول راني وحدي كون نموت مكانش لي يدفني ودرك عندي زوج عايلات عندي زوج ديار عندي بزاف خوات وخيات شكون لي راه كيفي الحمد الله تنهدت ووقفت جعت قلت نهبط للكوزينة ناكل الفراز بالسكر كيما بكري شراهولي مروان . لبست في رجلي وخرجت كنت لابسة بيجامة تاع ستيتش في الغوز شعري بدأ يطوال شوي . خرجت لقيت الظلمة كانوا مطفئين الضو محبيتش نشعلوا دخلت كيف كيف قلت مكان لاه نشعل الضو نجبد برك البورت مونجي تاع الفراز ونرش عليه السكر ونطلع لشمبرتي ناكل . جبت البورت مونجي من الفريجيدار حطيتوا فوق البوتاجي وجبدت البواط من الخزانة على أساس سكر طاحتلي فوق البوتاجي ساحت كي شفتوا لقيتوا ملح بقيت نلم فيه بيدي حتى بقا طرف خلاص فوق البوتاجي أنا هكاك نلم فيه بصباعي شعل الضو تخلعت دورت لقيتوا اصيل واقف لابس شورت برك شاف معايا قالي وش راكي ديري في ظلمة . أنا تألموا خلعني بقيت ساكتة بقا يشوف مع البوتاجي ويديا كانوا خامجين بالملح قدم ديراكت حكمني من شعري قالي راني نهدر معاك وش كنتي ديري قتلوا وشبيك اطلقني ماكنت ندير في والوا أطلق شعري وجعتني . أنا نهدر وهو يثبت مع وجهي ما جيت نكمل هدرة خبطني بزوز كفوف وجبدني من شعري قالي راكي تستنيفي في الملح يا حيوانة وصلت بيك هكا . اقسم بالله ما فهمت والوا تحسب راه يهدر بالشنوية وشنوا هدا تكوني في أمان الله راح تأكلي فراز تلقاي روحك تضربتي بالكفوف وتسبيتي بالحيوانة قتلوا وشبيك تضرب فيا وش درت أنا . قالي وش هذا الملح لي في يدك وفي خشمك ومسح خشمي بيدو بوهالي أنا تلعبي في روحك معلابالكش وش راني نهدر . هنا وين بديت نستوعب وش قصدو هبطوا دموعي علابالي راح يبقاهكا في اي حاجة يشك فيا خلاص . جبدت يدي من يدو وجيت ماشية حبسني قالي راني نهدر معاك قتلوا اطلقني . عاود جبدني قالي من تعلمتي تسنيفي الملح اهدري شكون علمك . مسحت دموعي بيدي شاورتلوا على بواط تاع الفراز قتلوا كنت راح ندير الفراز بالسكر وغلط في بواط تاع الملح ساحت ومسحتها درك اطلقني . تنهد وطلقني مسح وجّهوا كملت مشيت عاود حبسني قالي علابالك كان تغلطي تسنيفي الملح وقت المونك وتكثري وش يصرى فيك قادر تموتي جوليا على هادي خفت برك كنت وحسابك راكي تستنيفي فيه . عيطت عليه قتلوا انت ديما هكدا تدير فيا لي تحب من بعد تقولي راني خايف عليك مبقيتش تخاف عليا خلاص راني نعرف صلاحي من لي عرفتك وانت تأذي فيا من بعد تقولي خايف عليك صاي أنا كرهت منك كل مرة نقول نعطيك فرصة وتبيني العكس صاي متزيدش دور بيا فهمت كرهتك كرهتك .قدم راح يعنقني بعدتوا قتلوا متزيدش تمسني أصلا كل ما تمسني نتفكر هذيك ليلة كرهتني فيك من فعالك معايا أخطيني . طلعت لشمبرتي دخلت في فراشي نبكي شوي واحد الساعة شفتوا فتح الباب تاع شمبرتي ودخل عندي تقعدت وقفت قتلوا علاه جيت قالي وش الهدرة لي قلتيها قبيل كيفاش كرهتي مني ياك فهمتك خفت عليك . كانت ريحتوا كاملة دخان هكا وريحة شراب حاشاكم قتلوا ايه كرهتك وكرهت منك تفهم ولا نبقا نعاود فيها لي هنا في دار هادي كامل يحبوني اكثر منك انت الوحيد لي ديما تأذيني وتجرحني نفكرك قول نفكرك وش درت شوف غير وجهي كيفاه عاد مشوه منك انت . وهي صح قعدتلي شوي لي سيكاتريس تاع ضربة لي خيطتها في شواربي وفوقهم . أنا نهدر وهو يشوف معايا غير كملت تلاح عليا ندمت على الساعة لي هدرت فيها كي علابالي بيه شارب علاه نحل في فمي ونهدر ونزيد نهيج فيه ما فهمت والوا حاب يقربلي بسيف ويقولي مالا كرهتيني دوك نشوف إلا كرهتيني صح ولا غير هدرة برك ياك أنا علابالك بيا نحبك ون## الدنيا ونحرقها علجالك وانتي تكرهيني وليت ندز فيه ونعيط بعد عليا وشبيك هبلت اصيل راني نقولك بعد عليا خلاص غلطت إسمحلي ما نكرهك مالوا راني نهدر برك يا اصيل أنا خيتك بعد خلاص . بقا عقابي هو أصلا يجي مني زوج مرات مقدرتلوش حتى طحت فوق سرير هنا خوف وتحط على قلبي عدت نرعش منيش حابة يزيد يدير فيا حاجة ولا يمسني حنا هكاك ونشوف في مسلم دخل جبدو من فوقي بسيف . جبدت على روحي الكوات وانا نرجف ونشوف فيهم حكموا مسلم طاح يخبط فيه بالدبازي ويعيط عليه هبلت وش كنت راح دير يا ر## ليوم ندير فيك وفيك وهذاك دايخ خلاص يشوف معايا وفرات حتى خرجوا مسلم يكركر فيه . شوي ورجعلي مسلم لقاني كيما راني قعد قدامي حكملي يدي كانت ترجف قالي مدارلك والوا اهدري جوليا كشما دارلك درتلوا براسي لا قالي خلاص امسحيها فيا متحكي لحتى واحد راه مش صاحي شارب ياك شفتيه درك روحي ارقدي في شمبرتي واغلقي الباب درك غدوة نحكي معاه نلقا حل معاه . شفت معاه قتلوا غدوة ترجعني عند بابا منحبش نزيد نشوف وجّهوا في حياتي كامل صاي ياك وصل لي كان حابوا قولوا ميزيدش يدور بيا ولا نقول كلشي لخالي . قالي وش قصدك وصل لي كان حابوا كشما دارلك اهدري درك اقسم بالله متفراش معاه لا خويا لا والوا .قتلوا والوا منزيدش نحب نشوفوا مسلم تعيش قولوا بخطيني . قدم باسني من راسي قالي لي تقوليها تكون متخميش وكيماقتلك متحكي لحتى واحد وش صرى فهمتي درك روحي لشمبرتي ارقدي .
