كما عنقني شوي وبعدتوا عليا خفت لا يزيد فيها قتلوا ادا كملت هدرتك رجعني للدار ، قالي لالا نقعدو هنا كي يطلع الصباح نرجعك راني متوحشك وحاب نقعد معاك . قتلوا لالا علابالي مرت بابا تروح تقولو يلي ليل كامل مبتش في الدار قالي نورمال خلي تقول ياك راكي معايا وديجا كون ترجعيلها في هاد الوقت وين تتوسوس .سكتت قالي نهبطو نقعدو برة خير متساعدنيش نبقا معاك في بلاصة مغلوقة نخاف ندير حاجة ونندم . شفت معاه ضحك قالي والله سيريو منحكم في روحي معاك علابالك بروحك تفشليني . هبط راح جبد زوج كراسي من طنوبيل حطهم قالي اهبطي نقعدو هنا . هبطت قابلنا البحر وقعدنا كالعادة هو جبد الدخان يتكيف شوي وراح للطنوبيل جاب قرعة مغلفة بالجوغنال قعد قتلوا وشنو هادا لي في يدك اصيل .قالي باينة وشنو علاه تسقسي . وقفت قتلوا رجعني للدار ، شاف معايا علاه نرجعك ياك قتلك الصباح وروحي . قتلوا راك منيتك ولا تتمهبل عليا علاه قالولك عليا مهبولة انت تشرب وانا قاعدة بجنبك مش شايف روحك كل ما تسكر تجي دير رايك فيا اهدر وانا نقول علاه راك جايبني لي مكملتوش لبارح تكملوا ليوم . وقف قالي وشبيك انتي تخلطي وش راح نديرلك ، لبارح علابالي بروحي غلطت مش كل دقيقة تجبديلي على لبارح وديجا منيش عمري 12 سنة نسكر من قرعة . قتلوا علابالك راني حايرة فيك تهدر عليا وتقولي لازم تحبسي دوا وانت تمشي ورافد القرع تاع الشراب معاك . قالي مش كيف كيف أنا راجل ونقدر نحكم في روحي . قتلوا ايه شفنا كيفاش تحكم في روحك تجي تفرغ هبالك فيا قالي علاه سبابي شكون أنا باه رجعت للشراب انتي هيا سبابي شحال سنين وانا منحطوش في فمي ملي دخلتي انتي لحياتي رجعتلوا . قتلوا تسما راك ترجع في لوم عليا أنا قالي منيش نرجع في لوم عليك راني نقولك برك صاي حبسي علينا هاد السوجي خلينا قاعدين راكحين ومتخافيش ياك حلفت منزيدش نتوشيك .قتلوا منحبسش يا ترمي عليا هاد القرعة تاع الخماج يا دوك رجعني للدار . هز القرعة رماها قالي هاه بردتي صاي يا &&&تموتي على المشاكل والعياط . رجعت قعدت قتلوا ايه بردت ادا صح تحبني حبس الخماج هذا . حتى هو قعد قالي مش كي قتلك نحبك صاي راح تحكمي فيا. سكتنا لزوج نتفرجوا على البحر حتى نعست قتلوا نعست قالي روحي للطنوبيل وارقدي . رحنا لطنوبيل فتحلي لباب ريقلي الكورسي رقدت وجبد شال طويل حطو فوقي ، قالي علابالي بيك متحبيش ترقدي بلا غطا وراح لجيهتوا ركب بقيت نفتح في عينا بالسيف خفت لا نرقد يرجع لهبالو كيما قال هو ولا ما يحكمش في روحو بقيت نعس فيه حتى فاقلي قالي ارقدي علاه راكي تعسي فيا منيش راح نأكلك قتلوا خايفة تقربلي قالي من لي جيتي عدنا وانا كل ليلة ندخل نتفرج فيك وانتي راقدة وجامي قربتلك ولا مسيتك متحاسبينيش على غلطة وحدة غلطت فيها ، تبسمت معاه وسكتت قدم باسني على راسي ورجع عدل قعدتوا قتلوا وانت مترقدش قالي لالا . غمضت عينيا ورقدت حتى نضت على الشمس ضاربة فيا شفت الساعة 9 تاع الصباح شفت جيهتوا لقيتوا حتى هو راقد عدلت روحي ونوضتوا فتح عينيه قتلوا راهي 9 هداك هو نروحوا قالي متعرفيش تقولي صباح الخير . قتلوا صباح النور قدم باسني على شعري قالي صباح النور على لوزة تاعي . ديمارا يسوق صونا التلفون تاعي جيت راح نهز خطفهولي من يدي قالي شكون يعيط على صباح شاف من بعد قالي علاه راه يعيطلك قتلوا شكون قالي مسلم .قتلوا باين راه يسقسي عليا برك هات نهز عليه . حكموا كوبا قتلوا علاه كوبيت عليه قالي متزيديش تحكي معاه قتلوا علاه بصح قالي هكدا أنا متساعدنيش هكا كل يوم وانتي تهدري عليه وتحكي معاه قتلوا تساعدك ولا متساعدكش مسلم مستحيل نبعد عليه كون تحط الموس على رقبتي . قالي هكدا صار قوليها بلي تحبيه اكثر مني قوليها عرفتها . قتلوا وشبيك اصيل هو وانت مش كيف كيف . قالي كيفاش هادي قتلوا هو خويا وانت سكتت . قالي كملي وش أنا قتلوا حبيبي راح تولي راجلي وأب ولادي باين مش كيف كيف .شاف معايا وتبسم الفرحة خرجت من عينيه .حكم يدي باسها ورجعلي التلفون قالي خلاص هاكي عليه شوفيه وش يستحق .ضحكت وهزيت عليه بقا يسقسي عليا ويحكي شوي وكوبا وصلني للدار قالي صاي من بعد راني نعيطلك هزي عليا . هبطت دخلت للدار ديراكت عند بابا بقيت معاه بصح النهار هدا كان تاعب بزاف وصل العصر بدأ يزيد عليه الحال حببنا ندوه للسبيطار محبش غير حاكملي يدي. ويقولي أبقاي معايا بقيت معاه غير نشوف ملقيتش كيفاش نخفف عليه خاوتي لوخرين كيف كيف قاعدين مساكن غير يشوفو مرتوا تبكي وكل دقيقة تجي تحملوا يدو وتقولو شهد كان في حالة فكرتني في ماما نهار لي ماتت ربي يرحمها بقيت نكذب في روحي نقول مستحيل بابا يموت راه مريض برك درك يبرا حتى للمغرب صاي طلعت روحو قدامنا من صدمة معلاباليش وش صرى تقول راني منيش في الدنيا بقيت في بلاصتي بعد حتى جاو نسا خوالي وبناتهم تالمو كنت في شوك معلاباليش لا شكون لي قالهم لا كيفاش سمعوا دمعة ما هبطت من عيني غير نشوف وشاردة بعدوني عليه يصبرو فيا خرجوني حطوني في شمبرتي وانا ما راني حاسة بوالوا وكل وحدة تواسي فيا من جيهة وانا غير شاردة دمعة مقدرت نهبطها من عيني .حتى جات ريمة قالت لطاطا راه قالي اصيل راني حاب نشوف جوليا قتلها معليش قولو يدخل برك .شفتوا دخل جا عندي كنت قاعدة في سريري معنقة ركابيا وشاردة قعد قدامي قالي جوليا ربي يصبّرك هم سابقون ونحن لاحقون .شفت معاه قتلوا شفت زاد راح وخلاني وحدي .حط يدو على شعري قالي سنة الله في خلقوا الموت مكتوبا علينا كامل ليوم هو غدوا احنا .قتلوا بصح أنا مزال مشبعتش منو مزال باغية نعيش معاه كنت باغياتوا يشوفني عروسة ونخرج تحت جناحوا . هبطوا دموعي قتلوا أنا لي نحس لي نقرب ليه يروح راحت ماما وزاد راح هو . قربلي عنقني قالي اششش متقوليش هكا ربي مكتب هكدا .قتلوا بصح أنا صاي اصيل طاقتي فضت صاي عييت بزاف عليا حاسة روحي منيش قادرة نزيد نعيش اكثر يا ريت متت نهار لي ماتت ماما . قالي بعيد الشر متقوليش هكا بعدني وحكم وجهي أنا راني معاك كامل رانا معاك جوليا . درتلوا براسي ايه فاتت جنازة بابا ربي يرحموا ما شفيتلها والوا غير شاردة حكمني وحد اليأس والقنطة ربي يسامحني ويغفرلي كنت في حالة اكتآب حاد كي كانوا يشوفوني ساكتة وراكحة يقولوا راهي تقبلت موتوا بصح أنا كان في داخلي بزاف حوايج . منقدرش نقول كيفاش كنت نخمم هذاك الوقت بصح اكتشفتً روحي بلي كنت نحتاج لطبيب يعاوني وبلي محتاجة نتعالج بلي أنا صح كيما قال اصيل لازم واحد يعاوني وحالتي مش تاع وحدة طبيعية . كي فاتوا 5 ايام قاتلي مرت بابا أنا راح نروح نكمل العدة تاعي في دار بابا عند خاوتي وانتي قولي لخوالك يجو يدوك عندهم ، مستنتنيش حتى نروح ديراكت جمعت حوايجها هيا وولادها وجا خوها داها . قعدت وحدي هذاك الوقت كانت 2 تاع العشية . كنت محتاجة حاجة تنسيني الله غالب نفسي تغلبت عليا تفكرت الطفلة هذيك لي جابتلي اللكيد عيطلها قتلها ادا تقدري تجيبيلي للدار راني محتاجة بزاف . قاتلي منقدرش نجيك للدار ديجا انتي عندك بزاف مديتيش من عندي . قتلها هاد المرة برك ارواحيلي للدار ونخلصك راني محتاجة بزاف . قاتلي معليش ابعثيلي لادراس دوك نجي عندك . كوبيت واحد الساعة وجاتني جابتلي مكانش عندي دراهم نخلصها عطيتها قرومات تاع ذهب . هيّا راح تخرج وباب طبطب كان اصيل فتحت عليه دخل ديراكت يعيط عليا قالي انتي خاوتك ومرت باباك راحو معيطيش بقيتي وحدك هنا قتلوا كنت نجمع في حوايجي وراح نعيطلك من بعد شاف طفلة قالي شكون هادي قتلوا صحبتي جات تعظملي الاجر وراهي رايحة ديجا . بقا يشوف معاها بشك هيا خرجت ديراكت وهو قالي جيبي حوايجك وهيا نروحوا
