# طوبى "شارع القهوة"
#جمان_فريد
#الجزء_العاشر"بدايات"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
شاف جهاز قياس الضغط وقال...
إياد:100ع 60..
سدرة بخوف:حي عليا!..
اياد وهو يلم في حاجاته:لازم تمشي مستشفى ضروري تبي تحاليل..
سدرة بقلق:المشكله مافيش من يرفعنا..
اياد مرر نظره عليهم وقال؛نرفعكم اني عادي.
سدرة حركت راسها بالنفي وقالت؛لاصحيت دكتور مانقدرش نركبها سيارة راجل غريب بدون علم راجلها..
اياد:تمام..بس تبي مستشفى..
سدرة؛ربي يجيبكم يابوي ويايوسف..
صفيه بضيق:خسارة يوسف اليوم يروح مأخر..
سدرة:وبوي تبيله..
وحسين واقف في وسطهم يتفرج عليهم وهو ساكت..
سدرة خبطت ايديها في بعض وقالت:كان نعرف نسوق بس!
ابتسم اياد وهو يشوفلها ابتسامه جانبيه...
فجأة انفتح باب الحوش الخارجي..
خشت طوبى تجري وهي تقول:بابا جي...
سدرة تنفست براحه وقالت:الحمد لله..
وطول طلعت لبوها ووراها اياد ومعاهم حسين..
وصفيه قعدت حدا فايزة..
🌻برا..
استغرب لطفي وين شاف اياد طالع وخاف في نفس الوقت..
وصلوا فيه واياد قال:السلام عليكم.
لطفي بقلق:وعليكم السلام شن في ان شاء الله خير!..
حكتله سدرة ع اللي صار مع فايزة وهو طول قال:جيبوها جيبوها فيسع...
سدرة :هي شويه بس..
ومشت خشت طول للحوش...
اياد؛تبي تحاليل ضروريه غادي بنمشي وراكم بش نشوف وضعها..
هز لطفي راسه وقال:حسين سلم ولدي برا شوف احمد راجلها بالك جي..
حسين؛حاضر .
ومشي بسرعة طلع من الحوش..
وتوجه للدكان ولقاه قاعد مسكر وسيارة احمد مهناش...
ولى طول للحوش وخبرهم..
وهما انجبروا يرفعوا فايزة للمستشفى...
لما وصلوا بيها غادي...
وصى عليها اياد..ودارولها كل الفحوصات اللازمه والتحاليل....
☘☘☘☘☘
في كراسي الانتظار...
سدرة؛بوي..
لطفي شبحلها وقال:نعم..
شبحتله وقالت؛نبي نسوق..
رفع حواجبه تعجبا..
سدرة؛شوف الموقف اللي صار اليوم لو عندي سيارة راني قداش ليا جايبتها هني..باهي تخيل انت عطلت وماجيتش كيف صار فيها هالمسكينه وهي مراة متزوجه مانقدرش نرفعها في سيارات الرجاله من غير علم راجلها..
شبح لطفي القدام وقعد يفكر...
سدرة:السيارة نبيها نبيها..نبي نقضي عليها مشاويري ومشاوير خواتي من غير مانوحلوك انت..بروحك عندك ماشاغلك ع قداش بتفرق روحك..
شبحلها شويه بعدين قال:حاضر تو ندخلك مدرسة تعليم قياده..
ابتسمت سدرة وهي ساكته..
ع جية الدكتورة...
شافوها ناضولها الزوز...
الدكتورة:بنسألك متزوجه هي؟
سدرة؛ايه دكتورة خيرها!؟
الدكتورة بإبتسامه:حامل..
ضحكت سدرة تلقائيا بمفاجئه وفرحه..
وبوها ابتسم..
الدكتورة:هي توا حالها باهي تقدروا تروحوا بيها بس قبلها حنكتبلها وصفه لازم تاخد كل اللي فيها بإنتظام..
سدرة وهي تحرك في راسها ايجابا قالت بضحكه:حاضر..
🌻🌻🌻🌻🌻
وروحوا بفايزة للحوش...
وغادي بلغتها سدرة بخبر حملها..تحسابها بتفرح...
بس ردة فعلها صدمتها...
سدرة بصدمه:خيرك!
فايزة ببكي؛خيرني! فرقة خيري ياسدرة..مانيش مرتاحه ياوخيتي والله ماني مرتاحه متبهدله وايامي سود..لالقيتها من ام لامن خوت لامن راجل..حاسه روحي نبي نموت ونرتاح من هالدنيا اللي ماعندي فيها شي...
سدرة وجعها قلبها عليهاوهي تقوللها؛غير شن صار معاك ياشرادة قولي...
وبدت فايزة تحكي اللي صار بالتفصيل بحرقة قلب..
وعمها لطفي اللي كان مقعمز في الجنان حدا الكوجينه يسمع فيها شن تقول وقلبه يتقطع عليها..
جي بين عيونه جاره صبري الخويلدي ..قداش كان انسان طيب وخدوم ومدلل بنته الوحيده...
البنت اللي انكسرت وانقطعت وتيمت بعد بوها.
فايزة ببكي:جناحي مكسور ياسدرة ماعندي من يوقف معاي ويحميني ماعنديش من ياخدلي حقي من يسندني ويديرلي قدر قدام راجل وقدام عيلته...ايييه..راح عزي ودلالي وعزوتي راح..من بعده خلاص فايزة ولت ولاحاجه ياسدرة...
سدرة قعدت شاده ايديها وهي تمسح عليهم وتقول:لاحول ولاقوة الابالله...الحق احمد صدمني فيه..
فايزة ببكي:طلعت من غير اذنه من العمل..اكيد لما يعرف يطلقني هو اصلا خلاص معاش طايقني..
فجأة..
سمعوا باب الحوش الخارجي يدق بقوة..
انفجعوا الزوز...
وسدرة قالت:هذا منو؟
فايزة بخوف:حاساته أحمد..
ولطفي ناض ومشي للباب بش يفتحه..
لما وصل فيه فتحه طول..
لقي قدامه احمد واقف..ويبان عليه خايف وملهوف ومعصب قال:وين فايزة..
لطفي وهو عاقد حواجبه قال بكل هدوء:تفضل خش...
~~~~~~~~~
في المربوعه...
لطفي؛اني مانعرفش تفاصيل المشكله بس اللي نعرفه كويس ان بنتي فايزة مش مرتاحه بكل الحاله اللي شفتها بيها اليوم وسامحني ياولدي اكدتلي انك مش محافظ ع الأمانه صح..
احمد بإحراج؛لا والله ياعمي لطفي حاطها في عيوني..هو سوء تفاهم وصار مرة فهالسنه اللي جمعت بيني وبينها..
لطفي:نقولك البنت مش مرتاحه ياولدي مش مرتاحه مش قصة سوء تفاهم هادي..نبيك تعرف حاجه وحده..مش كان تشبح فيها بروحها تقول ماوراها حد خل ندير فيها مانبي..
لاياولدي فايزة هادي بنتي مربيها مع بناتي..بوها مات اني حي..وبروحها والله ماني مخليها...
احمد:ظالمني ياعمي لطفي والله ظالمني..يعلم الله اني نحاول ندير اللي نقدر عليه بش نعيشها معززة مكرمة وعمري ماحسستها اني موطي حيطها بكل..اقسم بالله نخدم ليل نهار بش نتم حق الشقه ونطلع نستقل اني وياها..
لطفي:ربي يعاونك ويعطيك صحتك..بس بنقولك حاجه..فايزة خشت حوشي توا وجتني لما مالقت حد يوقف معاها قدام الظلم اللي نازل بيها..وهي بنتي مش حتطلع من هني الا برضاها..
احمد تنهد وقعد ساكت وهو مضايق..
لطفي:تو ناديهالك تهدرز انت وياها وشن ماتبي هي يصير ياولدي..
احمد شبحله وهز راسه بإيجاب..
ناض لطفي وهو يقول:ياالله..
ومشي طلع من المربوعه ووقف في المستراح وقال:فايزة..فايزة بنتي..
🌻في دار سدرة..
سدرة؛هي تعالي..
خدتها من يدها وطلعت هي وياها وفايزة خايفه هلبه..
وصلوا في لطفي..
شبح لحالتها وقال؛بنتي شوفي فيا زي بوك ولالا؟
فايزة ودموعها في عيونها؛اكيد زي بوي وبنفس المعزة..
لطفي:خلاص معناها مانكش بروحك ماتخافيش..
ابتسمت سدرة وطبطبت ع ظهر صاحبتها..
وفايزة رشفت وهي تبتسم وهزت راسها بإيجاب..
لطفي:هي تعالي بنتي..
مشي لطفي...وفايزة وراه..
وسدرة تشوفلهم تنهدت من قلبها وقالت:ربي يهدي سركم...
🌻في المربوعه...
وصلوا لطفي وفايزة في المربوعه..
لطفي قال:هي خشي بنتي..
خشت فايزة وراسها لوطا..
واحمد يشوفلها..
ولطفي بعد مامرر نظره عليهم مشي وخلاهم برواحهم..
فايزة قعمزت بعيده عن أحمد وعيونها لوطا..
هو تنهد وناض قعمز جنبها وقال:هكي ديري فيا!!؟ تطلعي من الخدمه قبل لنجيك وتجي هني من غير ماتقولي يعلم الله باللي صار فيا لما مالقتيكش روحت للحوش وقالوا ماجتش قريب انجنيت لولا حسين جاني وكلمني مش عارف شن درت..
فايزة:نهمك هلبه هدا علاش امس خليتني نبكي في الدار بروحي..
احمد؛كانت طايرتلي امس خفت نزيد نجرحك بالكلام يافايزة..
فايزة ودموعها نزلوا:اني اللي قهرني انك ماسمعتش مني طول حكمت عليا وهزبت ونزلت فيا وماعطتنيش فرصه ندافع عن روحي..
احمد؛انتي يافايزة اللي ماتحكيش وديما ساكته اكثر من مرة نقولك شن دايرة مع امي وخواتي تقولي الامور تمام كل شي ماشي كويس..
فايزة؛وشن تبيني نحكيلك ونقولك..شن بدير انت بعدين..مش حتصير مشاكل بسببي بينك وبين ماليك..ومرات يلزونا حتى اللز..
احمد:مستحيل..
فايزة:هذا كلامهم ديما يقولوا فيها هذا حوشنا هذا حوش العيله...
سكت احمد وقعد يفكر..
وهي تشوفله..
بعدين شبحلها وقال:نقولك..اقعدي هني الاسبوع هذا وبعدين يصير خير..
فايزة؛شن بدير؟
احمد؛ماتشغليش بالك..
فايزة؛لالازم نشغل بالي في حاجه ماتعرفهاش احمد اني بروحي عرفتها اليوم بس..اني حامل..
ارتسمت ع وجه احمد ملامح الفرح وهو يقول:قولي والله!
ضحكت فايزة وهي تمسح في دموعها قالت:والله قبل حتى مايتم العام متاع العلاج..
ضحك احمد بفرح وقال:خير خير ونعمه من ربي اني توا وليت متفائل هلبه..
فايزة بضحكه:لهالدرجه فرحت!
احمد:بنفرح مالاشنو وفوق ماتتصوري هادي نعمة من ربي وهدا خير جي منه..مش يقولوا العيل يجي برزقه...!
فايزة هزت راسها وهي مبتسمه..
احمد قرب منها وباس ع جبهتها وقال:مبروك حبيبتي..مبروك علينا..وقعد يضحك..
وهي تضحك معاه..
احمد:خل نمشي نجيب الزردة..
فايزة:وماتنساش تجيبلي حوايج..
احمد ابتسم بضيق وقال:حاضر...
وناض وهي ناضت معاه...
سقداته بعدين ولت خشت داخل..
قابلها عمها لطفي وقال:هاه ع شن اتفقتوا...
فايزة؛كان مانثقلش عليكم عمي لطفي بنقعد هني اسبوع مش اكثر..
لطفي:اقعدي حتى عام بنتي هذا حوش بوك..
فايزة عيونها تعبوا دموع قالت:ربي يبارك فيك ويطول في عمرك عمي لطفي..
لطفي:تسلمي بنتي...المهم تفاهمتوا..
فايزة :ايه الحمد لله..
لطفي؛كويس كويس..هي خشي لصاحبتك..
ابتسمت فايزة ومشت خشت داخل وهو مشي للمطحن..ف
🌻خشت فايزة لسدرة وقالت:ماطيبوش غدي احمد بيجيب من برا..
سدرة بضحكه:زردة
فايزة هزت راسها وهي تضحك وجت ضمت سدرة وسدرة ضمتها وهي تضحك...
وجابلهم احمد غدي مبحبح زي مانقولوا عزموا عليه حتى حوش عمهم وبعتوا منه للحاج علي..
وسبحان من اضحك وابكى..كيف غير الحال من حال إلى حال...وكان هذا اليوم من احلى الايام اللي تمر عليهم بعد فترة من الحزن والقهر والبكي...
☘من جهة تانيه..
صار نقاش طويل بين احمد واهله كانت نتيجته اتخاذ قرار منه انه يطلع من الحوش...
ومع الأسف هكي زاد حقدهم ع فايزة أكثر واكثر...
🍀🍀🍀🍀🍀
وتمر الأيام...
ويطلعوا فايزة واحمد لشقه بروحهم احمد خداها من صاحبها واتفقوا يعطيه حقها ع دفعات..
الشقه كانت ع الزليز ويدوب فرشوا فيها بس دار النوم ووحده من الديار ودارو حاجات بسيطه للكوجينه...
قرر احمد انه يخدم خدمة تانيه مع خدمته في الدكان ..
وفايزة تعاونه بخدمتها...وفي نفس الوقت يدور في بالها دور خدمة في مزين بس خايفه من احمد رفض احمد...
🌻وسدرة...
بدت تتعلم في السواقه...وفي نفس الوقت مشغوله في خدمة المطحن اللي ولى واخد جزء كبير من وقتها مع تربية خواتها...
وبدي الاستعداد للعودة للدراسه..
هالعام اخر عام فالثانويه بالنسبه للجالي وحسين...
واخر عام في الابتدائيه لأميمه وغرفه ونضال...
واول عام في الاعدادي لعمر...
والكل كان يستعد للعام الدراسي الجديد..
بس...
🌻صفيه:البنت كبرت ع قرمبيولها ياراجل..
عبدالمطلب:هو كله هالعام العام الجاي بتخش الاعدادي مش تبيله بدله وهم حتى هو!..
صفيه برجاء:بالله عليك ياراجل هالعام بس..
عبدالمطلب؛اطلعي من دماغي خيرلك ..ومشي طلع من حداها...
صفيه بحسرة:حسبي الله ونعم الوكيل ..
ومشت خشت داخل..
قابلتها اميمه وقالت بلهفه:شن بيطلعنا امي..
تنهدت وقالت؛لا..ومشت بسرعه وخلتها ماتبيش تشوف ملامح الخيبه ع وجهها..
وهي مسكينه فوق الخيبه والاحباط مشت طول لدارها..
وين مافي دولابها القديم هلبه اللي بيبانه شبه بايده..
فتحاته وطلعت منه قرمبيولها القديم وقعدت تشوف فيه..
قديم هلبه وقصير وهي طولت عليه كيف بيجي عليها كيف بيطلع شكلها..!
وقعدت تتفكر في القرمبيول اللي شراته غرفه والشنطه والسروايل والتوكات...وفي قلبها الصغير الف حسرة وحسرة...
☘وفي حوش عمها..
مطيرة:سادها البنيه وهي ديما محرومه دون البنات...
سدرة؛ان شاء الله ماتتحسسش خالتي صفيه..
مطيره؛وعلاش بتحسس اللطف عمتها راني..
خدت شكايرها وقالت؛مش مطوله سويعه وجايه..
هزت سدرة راسها وهي ساكته..
طلعت عمتها وهي مشت لوسط الحوش..
لقت طوبى مقعمزة ع الكراسه وترسم..
سدرة:طوبى..
شبحتلها..
سدرة:تخشي روضه..
طوبى وعيونها يلمعوا بفرح:ايه ايه زي أريج ايه.
ضحكت نص ضحكه وقالت؛باهي ياحنه كان تبي..
طوبى:باهي ارفعوني السوق نشري حاجات للروضه..
سدرة:الوي ياليلى علوي..!
طوبى ابتسمت ابتسامة خجوله..
سدرة:باهي ياحنه تو نطلعوك ياهانم...
~~~~~~~
"غير علاش متعبه روحك هكي يامطيرة"
مطيرة:بالله عليك اسكتي تعب شني هذا اللي تحكي عنه! اني ربك مارادليش ندير الصغار وصغار خوتي نشوف فيهم صغاري...قد مانديرلهم مش خسارة فيهم بالذات هالزينه هادي.
ضمت اميمه عمتها وهي فرحانه وقالت؛صحيتي عمتي..
مطيرة ضمتها وهي تقول؛ماعنديش فيه جميل ياعيون عمتك..
صفيه وهي تشوف للحاجات اللي واخدتهم مطيره..
قرمبيول..ع زوز سروايل..ع توكات...وشنطه...
قالت بضيق:خايفه عمي يعاركك..
مطيره؛مايعاركنيش مادوريش انتي...
ع خشة الحاج علي شافت الحاجات قال وهو يأشر عليهم بعكوزه؛انتي خديتهم ولاراجلك..
ومطيرة:لاوالله وحق ربي اني من فلوسي من حر مالي..
علي الواعر؛مش مسامحك كان طلعوا من راجلك..
مطيره:بوي العفو حلفت بالله راهو!
هز راسه ومشي طلع من حداهم..
شبحت مطيرة لصفيه لقتها مضايقه قالت؛مادوريش ..هي نوضي ديريلي حاجه تبل ريقي من بكري واني نمص فيه..
ضحكت صفيه بإحراج وقالت؛سامحيني هي شويه وجايه..
ناضت ومشت للكوجينه..
ومطيرة شبحت لأميمه وقالت؛عجبوك الحاجات..
اميمه:هلبه..
باستها عمتها من خدها وقالت:نجيها ياربي..
🌻🌻🌻🌻🌻🌻
فهالوقت..
في شارع القهوة..
درست سيارة المهدي قدام الحوش مباشرة..
نزل منها..وبعدين نزلت عائشه..
هو طول مشي فتحلها باب الحوش..
عائشه؛نزل معاك حاجه؟
المهدي؛لالاا خشي بس..
هزت راسها وقالت؛حاضر..
ومشت خشت للحوش...
وهو مشي للكوفني فتحه...وبدي ينزل فالشناطي....
"بتعطلوا هلبه"
سمع صوت ولد في عمر خوه نضال..
شبحله طول..
شافه هو وبوه واقفين قدام حوش الواعر..
قعد شاد غطا الكوفني بيده وهو يشوفلهم..
اياد؛بعد العصر نجي نروح بيك..رد بالك ضايقهم هاه وخالتك سدرة بالذات تعبها نوريك..
ضحك مهند وقال:لا مش متعبها ماتخافش..
ضحك اياد..
ووقفوا قدام الباب..وبدي اياد يدق...
لحظات وانسمع صوت سدرة وهي تقول:مني!؟
اياد بهمس لولده:رد عليها!؟
مهند:اني خالتي سدرة..
فتحت سدرة الباب وقالت بضحكه:اهلا..لما شافت اياد حطت يدها ع فمها وهي متحشمه..بعدين نزلت راسها..
اياد بإبتسامه؛سامحيني اليوم بنخليه عندكم امي عندها مراجعات لبعد العصر واني لازم نكون معاها..
سدرة شبحت لمهند بإبتسامه قالت؛ولايهمك. امتى ماتفضى تعال خوده..
اياد بإبتسامه:بارك الله فيك..
سدرة؛هي خش مهند...
اياد اشرله براسه يخش..
خش مهند..
اياد؛سلم ع الوالد وعمي علي والشباب..
سدرة بإبتسامه؛يوصل..
وخشت وسكرت الباب...
واياد بعد ماتسكر الباب تنهد ..
والتفت بيمشي...جو عيونه في عيون المهدي..
ابتسم ورفع يده وقال:حمد لله ع السلامه جار..
المهدي وهو يسكر في الكوفني بقوة قال وهو ضاغط ع الكلمات:الله..يسلمك..
مشي اياد وع وجهه ابتسامة استفزت المهدي اللي كانت والعه فيه النار..
خدي الشناطي قامهم بعصبيه ومشي خش للحوش..
حطهم وخبط الباب بقوة..
انفجعت عائشه اللي كانت واقفه فالجنان..
هو لما شافها قال:خيرك ماخشتيش؟
عائشه:قلت نراجيك نخش اني وياك..
هو غير عيونه وهز راسه وقال:خشي جاي وراك
هي خشت قبله..
وهو خش بعدها بالشناطي..
قابلتهم امه اللي اول ماشافتهم طلقتها زغاريد..
مغليه؛مرحبتين مرحبتين..
وسلمت ع عائشه بالأحضان وهي تقول:حمد لله ع سلامتكم..
عائشه بإبتسامه:الله يسلمك عمتي.
طلقتها بعدين سلمت ع المهدي وقالت:حمد لله ع السلامه..
المهدي ووجهه مقلوب:الله يسلمك..هيا عايشة اركبي ..
مغليه:ايه اركبوا اركبوا تريحوا وامتى ماتبوا انزلوا ...
هز المهدي راسه ومشي وهو يقول:مانبوش غدي بنرقدوا طول..
مغليه وهي مستغربه في حالته؛حاضر..
وعائشه ماشيه وراه بتلحقه شدتها مغليه وقالت؛خيره!؟
عائشه؛ماخيره شي..بس ممكن تاعب من الطريق..
مغليه هزت راسها وقالت؛ايه صح..مايحبش يسوق مسافات طويله..باهي بري انتي توا..
هزت عائشه راسها وقالت:بالسلامه توا..
ومشت لحقت راجلها...
ومغليه واقفه تشوف للجهه اللي مشوا منها وقالت:زعمه خيره!!
🌻وهو ركب الشقه..
طول خش للحمام بش يدير دوش..
فتح ع المية المصقعه برغم الجو خريفي..
كان حاس روحه يتوهج من السخونيه اللي فيه...
تنزل عليه الميه المصقعه ومش حاس بيها...
يشوف فيها بين عيونه كيف تهدرز مع الدكتور وهو شن يقوللها...
وولده اللي يبان حابها وواخد عليها..
وابتسامة اياد اللي معناها واضح هلبه...
نار...نار قاعده تاكل فيه....مش قادر يتحمل..
اصلا الشهر اللي قعد مسافر فيه...كان وين يقعد بروحه من غير عائشه يقعد يفكر فيها.
يفكر شن صاير فيها وشن دايره...
وعقله يقوله توا هي خلاص ولت حرة كل من كان يتمناها وكاتم في قلبه..بيتشجع ويقدملها...
يقعد يطمن في روحه ويقول..
"هي قالت بتقعد لخواتها بتقعد بروحها ع خاطر وصية امها "
بس شن ضمنه...!؟
كله ع النصيب...
واه منك ياكلمة نصيب..
واه من الغضب وساعة الغضب وعواقب الغضب اللي ماتخلف وراها كان الشعور بالندم...
هو ياريته فارقها بالمعروف..
لا..هو حرقها وقهرها...وطلع في الآخر مايحرق ويقهر الا في روحه..
باهي..
كان صار وتزوجت سدرة يالمهدي!؟
كور قبضة يده بقوة وقعد يخبط بيها ع مكان قلبه بقوة...
بعدين خبطها ع الحيط..
"مهدي"
هو غمض عيونه بشده وقال؛مافي شي شويه وطالع..
"نجيبلك حوايجك"
المهدي مسح بإيديه ع راسه للخلف والميه تصب عليه وقال:لا..
سكت صوت عائشه..
وهو كمل الدوش متاعه..
بعدين طلع وهو لابس الديشمبر..
وهي خشت بعده....
لبس حوايجه وطول تلوح ع السرير..
وهو موجه وجهه اتجاه الروشن...
جي بين عيونه الموقف..
غمضهم بقوة..وحول المخده من تحت راسه وحطها عليه...
دقايق..وطلعت عائشه..
لقاته راقد...
مشت بتسكر سيرانتي الروشن..
جاها صوته من تحت المخده وهو يقول:خليه..
شبحتله شويه بعدين قالت؛حاضر...
مشتله...وغطاته...
هو حول شويه من الغطا وقال؛ارقدي وارتاحي..
عائشه:حاضر...
ومشت عائشه قعمزت ورا الزيانه مشطت شعرها..ودهنت ايديها..وحطت عطر..
بعدين مشت خشت السرير ورقدت وهي مش حاسه بشي من التعب..
وهو بصعوبه شديده جاه النوم وقدر يرقد...
🌻🌻🌻🌻🌻🌻
فهالوقت..
في جامعة الفاتح..كلية الهندسه..
نسرين؛روعه مكياجك.
نجاة بضحكه؛برغم ان خوك يعارك فيا عليه بس مطنشاته نحب نطرح ونلبس ونكون انيقه لواه نجي للجامعه متشردة مافيا ماينشبح..
نسرين:هو مايبيكش تنشبحي ياماما خوي يغار..
نجاة بضحكه:ع اساس اني نقدر نشوف لغيره العبيط هذا..
ضحكت نسرين وقالت؛ربي يعقد عسلكم..هي توا عطلت لازم نروح كان شفتيه سلمي عليه..
نجاة:اوكي...باي..
نسرين بضحكه:باي..
ولفت ومشت نسرين..
ونجاه بعد مامشت انقلبت ابتسامته لملامح الازدراء وقالت:مبرد دمك ومرزنك..
شويه فات من حداها واحد قال:ااه ياقلبي عليك عيون.
هي مشت بغرور وشاده ابتسامتها....
🍀ونسرين اللي طلعت من الجامعه كلها..
قعدت واقفه تراجي في افيكو بس مافيش افيكو خطم من هديكا الجهة...
نسرين:مش كان دارو سيارة للجالي راهو يرفع ويجيب توا..خل نشوف تاكسي وامري لله..
وقعدت تراجي تشوف تاكسي خاطم...
وكل ماتخطم سيارة تأشرلها ماتوقفش..
نسرين؛خزي الحيوانات..
وهي واقفه تشوف لجهة وحده من الطريق..
وفي واحد واقف بتاكسيه من الجهة التانيه يمسح في كندرته وهو يشوفلها...
ابتسم ومشي ركب سيارته..
وقعد يشبحلها من المرايه..
بعدين وخر بالسيارة للخلف لين جي قدامها مباشرة..
"تفضلي ياأبله"
هي شبحت للسيارة وقالت:واخيرا..
ومشت فتحت الباب الخلفي وركبت..
هو تحرك وقعد يشوفلها من المرايه..
وهي تفتش في الشنطه تشوف في فلوسها بعدين قالت بإبتسامه؛باهي الحمد لله..
"وين ياأبله"
قامت عيونه وشافتله من المرايه انصدمت..
كان شاب غاية في الوسامه...
هو بإبتسامه:وين طريقك..
هي ابتسمت بإحراج وقالت:ل********
هو بإبتسامه قال:تمام...
سكت شويه وهي شبحت للروشن ووجهها احمر...
هو قال:تقري انتي؟
شبحتله وقالت بإبتسامه:لامتخرجه..
:معناها تقري في الجامعه..
نسرين:لاهني جايه زيارة لصديقه..
:اها...تخدمي ولا؟
هي ابتسمت بإستغراب وقالت؛نخدم..
شبحلها بعدين قال بضحكه:اني هدراز بطبعي ومانحبش طريق طويله تفوت والدنيا ساكته..سامحيني..
ضحكت بإحراج وقالت؛مش مشكله..
هو قال:مدام مافيش مشكله نقدر نسألك وين تسكني بالزبط في ******
نسرين بضحكه:ايه ماهو لما توصلني حتعرف..في شارع القهوة..
هو بمفاجأة قال:شارع القهوة!..اغلب صحابي من غادي
والقهوة ناخدوا فيها من غادي...الحاجه تحب قوة الجنه..
نسرين:هادي قهوة حوش جيرانا..
هو قال:مقابلتهم قهوة تانيه ماخدبتش منها قبل..
نسرين:قهوة الزعيم...مطحنا هدا..
تفاجئ اكثر وقال:انتي اخت المهدي شنيبه!؟
نسرين بضحكه استغراب:ايه تعرفه؟
هو قال:مش معرفه شخصيه بس سامع عليه مشهور هلبه في الجهة هديكا..
نسرين بإبتسامه:ايه...
وكملوا الطريق وهما يهدرزوا وهي عجبها الجو وعجبها الشاب هلبه ولأول مرة تحس قلبها مال لحد بمعنى الكلمه..
وصل في بداية شارع القهوة قال:تبي نوصلك مرة تانيه ماعندكش مشكله..كلميني بس..وكتب رقمه في ورقه..ومدهولها..
خدت الورقه وقالت:عندك نقال!؟
طلعه وراهالولها والتفتلها وهو مبتسم..
نسرين في نفسها"ياويلي محلاه"
هو بإبتسامه قال؛فؤاد..اسمي..
هي ابتسمت...
فؤاد:عادي نعرف الاسم الكريم؟
نسرين بإبتسامة خجوله:نسرين..
ابتسم وقال:عاشت الأسامي...
نسرين:تعيش..
مدتله الفلوس قاللها...
فؤاد:خليها عليا هالمرة..
نسرين:لاكيف مايجيش نهاري!
فؤاد:لايجي ونص..هي انزلي..
هي انحرجت هلبه..دست الفلوس والرقم ونزلت من السيارة..
شبحتله..لقاته يشوفلها وهو مبتسم..
وهي ردتله الابتسامه..وسكرت الباب ومشت بسرعه..
هو راجاها لين ادرقت..بعدين ابتسم وتحرك طول...
هي قعدت تمشي وماوصلت في الحوش لين حست قلبها بيفر ..
اول مرة يقابلها واحد زي فؤاد ويهتم بيها هالإهتمام ويحسسها بإعجابه..
خشت لحوشهم ومشت طول لدارها بدون ماتلاحظ ان خوها روح...
🌻في الحوش اللي في جنبهم..
كان في جنان الجيران ولدهم واقف يهدرز هو وخوه...
محي الدين:اني كان نحصل من يمول هالمشروع بس تشوف كيف ينجح ..
خوه بضحكه:مافيش قدامك غير انك تناسب راجل بحبوح..
ضحك محي وقال:تي غير وينه هدا بس..
خوه:تلقاه..هي خليني بنخش داخل جعان بنتغدا عواصف واجتياح شن دارو اليوم..
محي:عركه حزيناها اني وامي..
:قصدك مافيش غدي!!!؟
محي بضحكه:امك دارت بكبوكي ع السريع..
:يللا خير وبركه...ومشي خش داخل..
ومحي مشي بيطلع من الحوش...
☘فهالوقت..
كانت خديجه مروحه من المدرسه وهي مش طايقه روحها وتراجي امتى توصل للحوش..
شافت سيارة المهدي قالت:واخيرا شرفوا..
ع طلعة محي من الحوش...شبح جهة حوشهم..
جو عيونه عليها..
عقد حواجبه وقعد مركز معاها..
وهي ماشيه طاحت من شنطتها المساحه..
هو مشي طول...وصل في المساحه طبس خداها وهو يقول:ياأبله..
هي وقفت والتفتت..
هو جاها وقال بإبتسامه:طاحت منك..
خدتها منه وهي تقول في نفسها "هذا منو!!؟"
محي الدين:انتي خديجه ع الغالب صح؟
خديجه وهي متفاجئة:تعرفني!؟
محي الدين بضحكه:كيف مانعرفكش..اني ولد جيرانكم محي الدين الصيد...
...واشر على حوشهم..
انصدمت خديجه..
محي الدين:عندك حق ماتعرفنيش لينا هلبه ع بعض من حني صغار...
خديجه ابتسمت بإحراج وقالت:ايه صح..ع العموم صحيت..
محي الدين:ماعندكش مشكله...هي نستأذن..
ومشي لسيارته وهي قعدت واقفه تشبحله..
لما ركب السيارة...وخرت ولفت ومشت للباب..
فتحاته وخشت وهي عاضه ع شاربها بإبتسامه..
وهو لما فات قدام حوشهم وشبحله جت في وذانه كلمة خوه..
" مافيش قدامك غير انك تناسب راجل بحبوح."
ضحك وقال:والله جبتها يابن الذين...وحتى هي مش خاطيه...
🌻🌻🌻🌻🌻🌻
الساعه 7:00مساءا..
في الكوجينه...
نسرين؛وخيره ماحد قال؟
مغليه:روحتي انتي واختك تلوحتوا في داركم طول حتى غدي ماتغديتوا..
خطر ع نسرين فؤاد..ابتسمت وقالت..خل نركب نشوفها..
مغليه:قبلها قولي شن صار في الموضوع اللي قتلك عليه!؟
نسرين؛قتلك يام فوتيه ماناخدش واحد مانعرفاش..
ومشت طلعت من حداها..
مغليه:ايه تجعدي تجعدي لين تقعدي قعدة اختك خديجه..
ع خشة خديجه اللي سمعت اسمها بس قالت؛خيرها خديجه..
مغليه:خيرها!! اليوم روحت طول تلوحت في الدار مش عادتك.
ابتسمت وقعمزت ع الكرسي وقالت:تعب بس..ايه وين غدانا..
مغليه:هونا قدامك عري وكولي..
وبدت خديجه تتغدى وهي تشوف لأمها كيف ترتب في الكوجينه..
شويه قالتلها:يام!؟
مغليه؛نعم..
خديجه؛يام جارتنا نجمه كم عندها ولد؟
مغليه:معاش لقيتي ع من تدوي..
خديجه:غير جاوبيني يام..
مغليه:5..
خديجه؛محي الدين اكبرهم.؟!
مغليه التفتت وضيقت عيونها وهي تقول:لا في اكبر منه...اشبحيلي هني شن في؟!
خديجه ابتسمت بخجل بعدين حكت لأمها ع الموقف..
مغليه رفعت حاجبها وقعدت ساكته وهي تفكر بعدين قالت..تغدي توا تغدي..
ضحكت خديجه وقعدت تاكل وهي عارفه امها كويس في شن تفكر..
🌻زيها زي هلبه امهات المهم يزوجوا بناتهم ويرتاحوا من همهم...🌻
☘فوق..
في شقة عائشة والمهدي...
كانت عائشه مقعمزة بروحها تتفرج ع التلفزيون..
فجأة سمعت باب الشقه دق..
ناضت لبست حجابها..
ومشت طول للباب وفتحاته..
نسرين بضحكه:عويشه...وضمتها...الحمد لله ع السلامه..
ضمت عائشه نسرين وهي تضحك قالت:الله يسلمك..
خشي...
خشت نسرين وعائشه سكرت باب الشقه..
نسرين:ليك وحشه..
عائشه:انتي اكثر..
نسرين:امتى روحتوا..
عائشه:بعد الظهر بشويه..
نسرين مشت وخلتها وخشت للكوجينه وهي تقول؛شن جبتوا من غادي..
شبحت للغاز قالت:حي مطيبه!؟
عائشه:المهدي قال يبي عشي..
مشت نسرين عرت الطناجر..لقت رز بلاو..وبازلياء..وطاجين دجاج. وطاجين فيه قلايه..
نسرين:ماشاء الله درتي هدا كله؟!
عائشه:هو خاطره فيهم..
نسرين؛ياقعاد مداير كرشة قدامه بعد كان سمباتيك..تعرفي جعانه بنموت..
مشت طول خدت صونيه وساقم وهي تقول:ماتغدتيش..
وقعدت تغرف من كل شي..
وعائشه تشبحلها وهي تضبط في اعصابها بالزور..
نسرين:خل ناخدوا دبوسه من هني مايصير شي..وقعدت تضحك..
وعائشه حاشه روحها بتنفجر..
خدت الصونيه بعدين خدت كاشيك وقعمزت وبدت تاكل..
شويه وقالت:تعالي عويشه خيرك واقفه غادي..
مشتلها عائشه وقعمزت وهي تساير فيها..
وقعدت نسرين تاكل وتهدرز ع كل شي صار معاها ..
وعائشه تساير فيها بالسيف..
مش متحمله تصرفات نسرين الباردة..صاحبتها صح بس في حاجات ليها حدود..
عارفتها لو فتحتلها توا حتاخد راحتها وتتجاوز حدودها بزايد..
كملت نسرين وقالت:عطيك الصحة نفسك يهبل..
عائشه بإبتسامة مجامله؛صحتين..
ناضت حطت الصونيه في اللاوندينو وغسلت ايديها وقالت:زعمه شن جبتولنا..
ومسحت ايديها ومشت طول لدار النوم..وفتحتها..
بس..
مابتش تنفتح...
رفعت نسرين حواجبها وعاودت تفتح فيها مابتش تنفتح..
"المهدي قال بعد مانطلع سكريها بالمفتاح"
قعدت تشبح نسرين لمقبض الباب وهي رافعه حواجبها وع وجهها ابتسامه بعدين شبحت لعائشه وقالت:المهدي قال..
عائشه وهي واقفه حداها ومربعه ايديها:ايه..زي ماتعرفي الرجاله يعتبروا في دار النوم منطقه محرمه..
نسرين؛لامازال ماتزوجتش بش نعرف..
عائشه بإبتسامه:تو تتزوجي وتعرفي..
شبحتلها نسرين شويه بعدين هزت راسها وقالت؛تمام..اليوم خودي راحه انتي وراجلك لكن من غدوة بتبدي تنزلي لازم تبدي تمارسي مهامك ككنه..
عائشه بإبتسامة:بإذن الله..
نسرين ابتسمت وقدمتلها طبطب ع كتفها شويه وهي تشوفلها بعدين قالت؛تصبحي ع خير..
عائشه؛قدامك كل خير..
طلقتها نسرين ومشت فتحت الباب وطلعت من الشقه وسكراته بقوة..
عائشه:الحق ماينزعلش منه...
ومشت ولت للصاله...
اما نسرين نزلت من فوق وهي حامقه.
ومشت طول للصاله..
لقت امها واختها فيها..
نسرين:من غدوة يام بتبدا تنزل عيشه..سلميها مفاتيح الكوجينه فالحه وتهني راهو .
خديجه:ايه سادتها البوبه شهر لتوا..
مغليه:ايه خلاص هداكا هو البرنامج متاعها موتياته في راسي من قداش ليا..
نسرين:تمام..ومشت طلعت من حداهم..
خديجه:نازله حامقه..
مغليه:عيشة مش ساهله..
خديجه:لاواضح مش ساهله بكل اللي نست المهدي في بنت الواعر..
مغليه:نساته والله في الفري..
خديجه:كيف!؟
مغليه:هونا مدرس في المطحن مقابلها..
خديجه:خدمته يام..
مغليه؛قداش ليه فايته المطحن ومخليه لخوه توا خطر عليه قال للجالي قعمز اقرا واني تو نلهى بيه..وفهالوقت سدرة في المطحن ..
خديجه:عليك قصة!
مغليه تنهدت وقالت:ربي يهديه وخلاص ويصرفه عمها هالسد ة هادي..
خديجه:آمين...باهي يام بنقولك...شن رايك غدوة تعزمي خالتي نجمه تجي تهدرز..
ابتسمت مغليه وقالت:في بالي...في بالي..
ابتسمت خديجه وهي تلعب بشناشيب المخده متاع الصاله خجلا...
☘☘☘☘☘☘
في مطحن حوش الواعر..
داخل..
كانوا اميمه وغرفه مقعمزات يكتبوا في واجباتهم..
ومعاهم طوبى زعيمتها حتى هي تكتب في واجبها اللي عطهولها فالروضه وحسين معاها باللقطه وهو يضحك..
غرفه كانت تشوف في اهتمامه بطوبى والغيرة واكله قلبها.
كانت تبي تلفت انتباهه ليها قالتله؛حسين في مسأله مافهمتهاش تحلهالي..
حسين:وريها لأميمه مايصعب عليها شي..
اميمه؛ترا وينها..
غرفه قلبت عيونها وقالت؛خلاص معاش نبي..
استغربت اميمه..
وحسين مش معاهم بكل..
طوبى:هكي اربعه صح..
حسين بضحكه وهو يقلد في اللذغه؛ايه اربعه..
طوبى بزعل:معاش تقول هكي..
قعد حسين وهو يقول:الله يبارك عليك تكبري بسرعه ياطوبى...
برا....
كانت اختها الكبيره واقفه بشخصية شامخه وهي لابسه عباية مستورة وانيقه وعليها وشاح وتتكلم مع واحد من الزباين..
سدرة:في شهر رمضان كذا محل تفاهمنا معاهم ياخدوا من قهوتنا ويبيعوا والحق الكميه تمت..
الراجل؛الغلط منا حني حني اللي عطنا وعارفين ع القهوة متاعكم في طلب..
ضمت سدرة شورابها لداخل وهي مبتسمه بأسف..
وعيونها مرة مرة يشوفوا لخوها يوسف وهو واقف يتناقش مع جماعه وحاسه ان النقاش مش حتكون نهايته خير..
وعيون جماعة المطحن المقابل عليها هي مش قادر ينزلهم عنها...
يبيع للزباين ويتفاهم معاهم ونص عقله معاهم والباقي معاها...
وهي متجاهله وجوده وكأنه مطحنهم مش موجود..حوشهم من اصله مهناش..هكي كانت تتصرف سدرة..
وخلت هالإحساس يوصله وهذا اللي زاد جننه...
هو مش قادر ينساها للحظه ع قد مادار ...
وفي عز هيوماه بيها...
استاقظ ع اصوات عاليه..
طلع من المطحن..
لقت طحنه كيف باديه بين يوسف اللي معاه...
مشاله يجري بش يحز..
والشارع كله التم..
سدرة؛نهار احرش!..
سيبت الراجل وخشت تجري خدت الهراوة وقالت لحسين؛في جماعه يضربوا في يوسف..
ناض حسين يجري..
وهي وراه واقفه تشوف..
تشبح للمهدي كيف يحاول يفك الدنيا عن بعضها..
والعركه كل مالها مشتده..
وخش فيها حسين وقعدوا يضربوا فيه حتى هو..
وسدرة تتفرج وهي خايفه ع ولاد عمها...وللأسف حتى المهدي معاهم..
سدرة؛ياحليلي هييه!..
والبنات طلعوا بيتفرجوا ..
رفعت عليهم الهراوة وقالت:خشوا داخل..
خشوا يجروا..
الراجل:مفروض نبلغوا المركز ..
سدرة وهي تشوف للعركه :مركز شنو انت تاني لالا تو تنحز..
ومن جهة حوش شنيبه..
طلعوا الولاد من الرواشن..
الجالي ونضال وعمر وشافوا العركه وقعدوا يتفرجوا لكن مالاحظوش خوهم فيها..
وفي حوش نجمه..
عواطف ونجاح يتفرجوا من الروشن وهما مستمعات..
وفي عز العركه..
من يمين الطريق تجي سيارة احمد جايب فايزة لسدرة..
وع يسارها تجي سيارة مصطفى جايب فردوس لأهلها..
شافوا العركه..
احمد؛ياساتر ياساتر..
~مصطفى؛ولاد عمك ولا..
فردوس بقلق:ايه هما...
وفهاللحظه يجي واحد يرفع رشاده بيضرب بيها حسين ع راسه..
تشوفه سدرة تطلعله تجري بهرواتها وهي ماتشوف في شي..
تخبطه خبطه ع راسه..تجيبه طايح من طوله ع وجهه..
وكانت هادي اول اصابه تسقط ع ارض المعركه...
العركه في لحظه وقفت...وفي من هرب منها والباقي كلهم قعدوا يشبحولها..
وهي تشوف للولد اللي طايح وهي مصدومه...
وفايزة وفردوس شهقوا بصوت عالي وين شافوها شن دارت..
ونجاح وعواطف انصدموا...
اما ولاد مغليه اللي اتفاجئوا في سدرة عبر واحد فيهم بس عن ردة فعله..
نضال؛حي ع امها!!؟
يوسف ووجهه دموات قال بصدمه:سدرة شن درتي!؟
هي شبحتله ومش عارفه شن تقول..
ماحستش الا والهرواة انجبدت من يدها..
وسمعت صوت ينهر فيها وهو يقول:بري للحوش تحركي..
سدرة شبحتله وقالت:لا..
المهدي:تحركي اقلبي وجهك..
سدرة؛ماتعليش صوتك عليا..
المهدي:سكري فمك..
سدرة؛سكر فمك انت...
"سدرة"..
التفتت سدرة وشبحت لجدها شافت نظرات عيونه تخوف..
طول نزلت راسها ومشت طول بسرعه وخشت للمطحن..
ع جية سيارات شرطه للشارع....
التفت المهدي وشافلهم وهو يشد ع الهرواة في يده بقوة..
والكل يتفرج عليه....
الجيران...وخوته....
ومعاهم سدرة....
(مش مسامحه اي وحده تقرا وماتتفاعلش حتى بلايك)
#بدايات
#طوبى
....يتبع....
