#طوبى "جنة طوبى"
#جمان_فريد
#الجزء_الخامس_والسبعين"اقاوم3"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار..
"إستغفار الإنسان اهم من جميع الأدعيه"...ابن تيميه
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃كلما إحترقت روحك .. نَضجت أكثر !🍃
_________________________________________
" ولد محي الدين..يعني ولد اختك..."
قعد يشوفله وملامح الصدمه باديه ع وجهه..
الصدمه عقد لسانه ماقدرش يتكلم..جمداته ماقدرش يدير اي ردة فعل..
ومختار مكمل يقول..
/هادي اعترافاتهم اللي اني بالحباب وبالكباب خليتها تموت في مكانها..مش راضيلكم الفضيحه..مش راضيها ليك انت ماتستاهلش..وفي نفس الوقت ولد اختك مازال صغير..مش راكز عقله صغير مش ناضج وارد جدا يغلط غلط زي هدا والحق حرام يتحاسب ع صغر سنه وممكن يدمر مستقبله نهائيا..
ومازال المهدي ع حاله مصدوم ومش مستوعب..
تنهد مختار وقال:المهم توا انت لازم تسافر لتونس في اقرب وقت بش تشوف الموضوع بروحك..ناض وهو يقول..
تمنيت نخدمك في حاجه احسن من هكي..اسف جدا..السلام عليكم..
وكيف جي بيمشي وقفه المهدي لما قال..
/مختار..بيناتنا..بيناتنا اني وياك بس..
مختار؛اكيد يامهدي كانهدا علاش نجيك ونبلغك بروحك !
هز المهدي راسه وهو محرج قال..
/بارك الله فيك..
مختار:فيك بارك الله..حني خوت وعشرة عمر ولبعض يامهدي تبي أي حاجه تفضل مايحشمك شي..
المهدي؛مشكور..
مختار هز راسه وقال..
/السلام عليكم ..
ولف ومشي وبدت ع وجهه ابتسامة نصر خفيفه..طلع من المحل لقي السواق يراجي فيه..
فتحله الباب السحاب..ركب..بعدين سكره ومشي ركب في كرسي السواق وتحرك طول...
وخلا المهدي في حالة صدمه وعدم استيعاب للي عرفه منه..
🍃🍃🍃🍃🍃🍃
وفي جنان حوش لطفي الواعر..
الجو حتى فهاليوم كان لطيف..
وغرفه وعبد الرؤوف كانوا منسجميم فيه وهما يهدرزوا ويشربوا في القهوة والعصير..
العصير ليها...والقهوة لراجلها..
عبد الرؤوف:قالي حسين المدة الجايه عنده مهمه في سرت ولازم يمشي...
غرفه بعد شربت من العصير قالت..
/اممم فكرتني طوبى اختي تبيك في موضوع..
هو قال بإهتمام وقلق..
/إن شاء الله خير!
غرفه؛ياسيدي في ابله معاها طالبه الطلاق من راجلها وهو مايبيش يطلقها وقاعد يهدد فيها..قالت اخر مرة هددها يخش عليها الحوش بكتيبه..
عبد الرؤوف:كاترين النماذج هادم..
غرفه:ايه..المهم طوبى تبيك تساعد المراة..
عبد الرؤوف؛تعطيني اسمه بس واني نتصرف..
غرفه وهي تقيم فتليفونها قالت..
/شويه بس..ورنت ع طوبى بعدين حطت التليفون ع الطاوله وقالت..
/الجو يهبل..
عبد الرؤوف وهو يمرر في نظره حواليه..
/ايه برودة..شبحلها وقال..قالوا الحاج علي بيروح الجمعه..
غرفه؛ايه..اخر مرة كلمناه حسيت صوته كويس شاد روحه..
هز عبد الرؤوف راسه وهو ساكت..
شويه سمعوا دقة باب الكوجينه..
غرفه؛تعالي طوبى..
طلعت طوبى وهي لابسه عبايه سوداء واسعه وشاربه رماديه
قالت:السلام عليكم..
عبد الرؤوف؛وعليكم السلام..كيف حالك..
طوبى:الحمد لله..كيف حالك انت؟
عبد الرؤوف:الحمد لله..
طوبى:حكتلك غرفه؟
هو مركز بنظره ع مرته قال:ايه حكتلي عطيني اسمه نجيبه الصرصري "السرسري" هدا من تحت الوطا..
طوبى:اني نقول لو فيها كيف تحط ناس حدا حوش المراة يعني زي الحراسه..لأن مرات طولوا وانتم دوروا عليه وهو يستغل الفرصه ويدير حاجه..
عبد الرؤوف:تمام حاضر..غير عطيني اسمه..
طوبى؛تو نتصل بيها ونسألها..شويه بس..
ومشت طوبى خشت داخل..
شويه وقال عبد الرؤوف..
/مافيش اخبار عن التافه هداكا ؟.
غرفه بإزدراء:لالا شكله قاعد هاج..
☘وشويه وجت طوبى وعطت لعبد الرؤوف الاسم..
وهو بعد خداه منها طلع من حوش نساباته قاصد الجامع ع قرب آذان المغرب...
🍃وصلى المهدي المغرب في الجامع..
وماباش يحتك بحد لين روح لشقته..حبس روحه في دار النوم معاش طلع منها وخلا ولاده في حالة قلق عليه..
☘يزن بخوف؛دبر اي سبله وخش عليه شوفه..
محمد المهدي بقلق؛ياراجل راقيتله خايف نخش عليه يحط غله كله فيا..
يزن؛ومن امتى تخاف انت مش تحب تواجه!
شبحله بطرف عينه امتعاضا..
بعدين غير نظره عنه وقرب لدار النوم..
بتردد دق الباب..ويجيه الجواب..
"مانبي ندوي مع حد ولانشوف حد الهوا بقرايتكم انت وياه"
التفت محمد لخوه وهو يشوفله بضيق..
ويزن اللي كان مضايق اكثر منه مشي طول لداره..
اما محمد وهو يفكر في حالة بوه بقلق ولى للصاله اللي كان يقرا فيها..
🍃وتعدي الساعات..ويليل الليل ويوصل لنصه..
والمهدي مازال ع نفس الحال..ملتزم الصمت عازل روحه في داره ويفكر بدون انقطاع...وكل اللي قدر يغمض عيونه فيهم ساعتين بعد الفجر..
ناض من بعدهم وهو مفجوع..
طلع من الدار بش يشوف ولاده..لقي الشقه فاضيه الا منه هو ..
شاف لساعه الممر وعرف انهم في المدرسه من ساعه..
🍃🍃🍃🍃🍃
وحتى اليوم..
طوبى دار امتحانها..بعدين مشي للمدرسه تشوف سير الامتحانات..وتلاقت مع ابله زهره..
زهرة؛الله يريح بالك ريحتي بالي امس اول ليله نرقد فيها واني مرتاحه..
طوبى؛دوم يارب..وان شاء الله يشدوه ويأدبوه ويخلوه يطلقك زي الراجل الطيب وكان مازال جي في طريقك بعدها..
زهره:يارب..
وعيون قريبه عليهم تراقب فيهم وهي تخفي ورا نظراتها العاديه حقد كبير..
🍃وبعيد عنهم...
في مكان تاني..
تحديدا مخبر التحاليل اللي دير فيه صابرين..
كانت لاهيه بشغلها..
لين خش عليها رضا..
لما شافاته قلبها غاص في احشائها من الخوف..
بنظرة عينه طلب منها تلحقه..
لف ومشي..وهي بخوف لحقاته...
وصل قرب باب المخبر ووقف..
وهي جت واقفه قدامه وقالت..
/خيرك جاي!؟
رضا؛معروف سبب جيتي..الاستاذ يبي يشوفك..
صابرين بخوف:شن يبي فيا!؟
شافلها رضا بنظرة حاده من غير مايتكلم..
صابرين بإستسلام:شويه وجايه..
ومشت طول خشت وقلبها يرتعد من الخوف..
وهو مشي طلع من المخبر...
🍃🍃🍃🍃🍃🍃🍃
"وتعالى..تعالى..تعالى...خلي الدنيا تشوف فرحتنا..
خلي الدنيا تشوف حكايتنا"
مقعمز في صالونه وهو يسمع في اغاني فنانه المفضل ويدندن معاه بكل احساس..
خشت عليه وهي مرتبكه ومتوتره..
لقاته مقعمز يغني وهو هايم..
نست الارتباك والتوتر وقعدت تتأمل فيه وكانت حاسه اتجاهه بشوق كبير..
فجأة..قطع انسجامه وشافلها..
هي هني رجعت خافت..
خدي الريموت ونقص الصوت..بعدين حطه وشافلها وهو يقول..
/تعالي قعمزي تعالي..
قدمت بخطوات كلها خوف وقعمزت قريبه عليه..
هو قال..
/وينك..لاعاد اتصلتي لاسألتي لادورتي..
هي بتوتر قالت..
/انت حاطني في الحظر..
ضحك ضحكه خفيفه وقال..
/صح صح..نسيت..باهي شن امورك شن اخبارك؟
صابرين؛اكيد تعرفها كلها..
مختار بإبتسامه؛اني لما نسأل انتي تجاوبي ع قد السؤال..
تنهدت صابرين بتوتر وقالت..
/حولت من شقة نجاة وسكنت مع اختي مروة..
مختار:علاش!؟
صابرين؛نجاة مشت بصغارها وسكنت مع شيابينها..
مختار؛هما توا مش شيابنيها ولدهم الاول مات ورملها..والتاني طلقها وهجلها ع اي اساس شيابينها..
قعدت صابرين ساكته ماعرفتش شن ترد..
مختار؛مفروض مانسألش زي اختك زيهم هما هالعيله طنجره ولقت مغطاها اللي هي اختك طبعا..ماعلينا مش هدا المهم..المهم واللي نبي نعرفه علاش توا ومن صاحب الفكرة هادي من الأصل؟
صابرين؛اللي فهمته ان محمد شنيبه وصلاته دوة خلاته يسكنها حداه هي وصغارها..
مختار؛اها لما كانت مصاحبه هداكا..ايه ايه صح..حك صدغ راسه الايسر وقال..في وسط العيله هديكا من داخل شن صاير بالزبط؟
صابرين بتوتر:طوبى طالبه الطلاق من الجالي وهو مسكر راسه ومايبيش يطلقها وماليه لازينه ع خاطر هكي..
عقد حواجبه وقال؛ماليه يبوه يطلقها!
صابرين؛ ايه..لأنهم كلهم عرفوا السبب..
مختار برفعة حواجب؛معناها مش عارفين ان اختك السبب؟
صابرين بلعت ريقها بخوف وقالت..
/امه وخوته كلهم يعرفوا ماعدا المهدي ومحمد شنيبه..
سكت مختار وهو يمسح ع لحيته ويفكر ..
وهي تشوفله بخوف..
نزل يده وقال:اممم...باهي خليهم كلهم ع تركينه وخبريني عنك انتي تقيدتي في حوش اختك صح..
صابرين؛ايه..راجلها حاط مواعيد لخشتي وطلعتي واني الحق محترماته هلبه..
ابتسم وقال:اشيه ماشاء الله! واخيرا شفت فيك حاجه محترمه..
قعدت تشوفله بنظرة وجع..
هو ضحك وقال..
/الحق يستاهل الاحترام راجل باهي..
صابرين ودموعها معبيات عيونها..
/في ناس خطبوني لولدهم ويراجو في ردي..
مختار:واخيرا سعدك وقف بعد ماكان طايح..تبيني نسألك عليه..
نزلوا دموع صابرين..
هو بإبتسامه قال؛تأثرتي هلبه..غير خل يولد ويسموه..
صابرين بألم؛خلاص بالله عليك كلامك يقهر فيا..
ضيق عيونه وهو مبتسم..
صابرين ودموعها ينزلوا..
/اني نحبك وعمري ماحبيت راجل غيرك كلامك هدا ونظرتك هادي ليا تحرق في قلبي حتى كان ماحبتنيش ماديرش فيا هكي..وقعدت تبكي..
وهو يشوفلها بنفس الابتسامه..
بعدين هي هدت بكي وقعدت تمسح في دموعها وتقول.
/معاش تبي مني شي خلاص!؟
حك حاجبه وقال؛-لا خلاص..تقدري تروحي..
ناضت وهي موجوعه ومنقهره ومشت طلعت من حداه..
وهو بعدين خدي الريموت وعلا الصوت ورجع يغني..
🍃🍃🍃🍃🍃
الساعه 6:30مساءا..
خشت طوبى للمطحن من الباب الفاصل اللي بينه وبين الحوش...
شافت فيه زباين..
قعمزت ع الكرسي وهي داخل وتشوف العمال كيف يبيعولهم..
بعدين ماخدوا اللي يبوه وطلعوه..
ناضت ومشتلهم وهي تقول..
/السلام عليكم..
الزوز وعيونهم في الارض..
/وعليكم السلام..
طوبى:كيف ماشيه الامور؟
واحد منهم قال:الحمد لله حركة البيع كل يوم احسن من اليوم اللي قبله..
وهي تمرر في نظرها ع ترتيب الحاجات في المطحن قالت..
/كويس..كويس..
بعدين شافتلهم وقالت..
/ترا وروني شن بعتوا المده اللي فاتت..
مدلها واحد فيهم دفتر حسابات وقال..
/كله مسجل بالساعه..
خداته منه وفتحاته وقعدت تشوف..
🍃برا المطحن..
في قهوة نضال..
كان عبد القيوم مقعمز وسط الزباين اللي جايه تتفرج ع المبارايات..
هما في عالم..وهو في عالم تاني..
يشوف فيها كيف واقفه تشوف في دفتر الحسابات..
وكان مضايق هلبه ومش عاجبه الوضع..
🍃وهي..
قاعده تراجع في الدفتر بالدقه..
فجأه..حست بالدنيا ظلمت..
رفعت راسها وشافت للباب..
انصدمت..
🍃وعبد القيوم ناض من كرسي ومشي طلع من القهوة وقعد واقف حداها وهو يشوف في الجالي كيف خاش للمطحن..
ركز بنظره عليها..لاحظ انها تحاول تخفي خوفها قدامه..
معاش عرف شن يدير..
قاعد مكتف..مش قادر يتصرف....
كان ياكل في الحصرم وكل كريه من كريات دمه والعه فيها النار..وكان متشنج من العصبيه..
🍃الجالي؛شن الاخبار..
طوبى نزلت الدفتر وقعدت تشوف للعمال اللي يمرروا في نظرهم بيناتهم..
مشت خشت داخل المطحن وهو لحقها..
وعبد القيوم قريب يتلفوا اعصابه اللي قاعد يمسك فيهم..
🍃طوبى بغضب مكتوم وصوت منخفض..
/ طلع المسدس طلعه وحطه في راسي وطلعني معاك..
الجالي تنهد وقال بهدوء..
/اول شي شن حالك وحال بنتنا؟
طوبى بحده:بكري شويه كان حالنا باهي..
الجالي بضيق..
/طوبى..ولو لمرة وحده اعطيني فرصه ارجوك فرصة وحده نحكيلك اللي صار فيها من الاول بكل وبعدين نتفاهموا..
طوبى بعصبيه مكتومه:
/ انت من شني مخلوق! من شني!؟ ناسي اللي درته ناسي الكلام اللي حطيته!؟ ع اي اساس جاي تقولي عطيني فرصه!!؟
الجالي:رب العالمين ياطوبى..الله سبحانه وتعالى يعطي في فرص..
طوبى:هداكا ربي اللي مازيه حد..واني بني آدم مانعطيش فرص للي زيك ولانسامحهم بكل لو شن يديروا..اطلع برا ياجالي اطلع توا وماتخلنيش نلم عليك الناس..
حط ايديه في نصه وقعد يشوفلها بحده..
وهي تشوفلخ بغضب وقوة مصطنعه ومن داخل كانت خايفه..
غيرت عيونها عنه وشافت برا..
لقت عبد القيوم واقف بعيد ويشوفلها بقلق..
هي في لحظتها نظرات عيونها ولوا نظرات استنجاد هو فهمهم طول..
لكن مايقدرش يتصرف..
معروف شكل علاقته بالجالي..
لو ادخل شن حتكون عواقب تدخله..
اساسا هو بصفة مني يخش بيناتهم!!؟
قعد يشد ع يده اليسار بقوة وهو يراقب فيهم وبس..
🍃هي شافت للجالي وقالت..
/اطلع قتلك..
هو قال؛نطلع لكن رجلك ع رجلي..
عقدت حواجبها بكره وضمت شفايفها شويه بغضب..
🍃وعبد القيوم يسمع باب حوش عبد الرؤوف ينفتح..
شبحله لقاه طالع..
حط صوابعه في فمه وصفر..
شافله عبد.الرؤوف ووقف..
عبد القيوم قعد يأشر براسه ع المطحن..
شبح عبد.الرؤوف جيهته.شاف سيارة الجالي مدرسه بين المطحن والحلاق التونسي اللي كان مقعمز قدامه فراس ويشوف في كل شي..
مشي عبد الرؤوف قص الطريق وتوجه للمطحن..
وصل فيه وشاف الجالي داخل مع طوبى واقفين مع بعض وكان واضح ع وجه طوبى الغضب مع الخوف.
خش عبد الرؤوف وقال..
/السلام عليكم..
التفتله الجالي وطوبى شبحتله وحست بروحها قويت فجأه وارتاحت..
الجالي بضيق؛وعليك السلام..
وصل فيهم عبد الرؤوف وقال..
/بالله طوبى خشي قولي لأختك هيا.
هي قالت؛حاضر..
ومشت طلعت من الباب الفاصل وسكراته وراها..
عبد الرؤوف:عاش من شافك..
الجالي:تعيش..
عبد الرؤوف:قداش لينا ماتلاقيناش ولاهدرزنا والحق نبي نهدرز عليك..
الجالي:حتى اني وضروري كان مافي حد منهم العيله يبي يسمعني غيرك ..
عبد الرؤوف:خلاص غدوة الصبحيات كانك فاضي طبعا تعالى لحوشي توا عندي مشوار وبنعطل فيه..
الجالي:مش مشكله نكون عندك غدوة الساعه 11..
عبد الرؤوف؛إن شاء الله..
الجالي هز راسه وقال:السلام عليكم.
ومشي طلع وعبد الرؤوف وراه وهو يقول..
/وعليك السلام..
وقف عبد الرؤوف في الباب وهو يشوف لعبد القيوم..
وعبد القيوم يشوف للجالي وهو يركب بسيارته..
وولي خش للقهوة مرة تانيه..
وبعد مامشت سيارة الجالي..
مشي عبد الرؤوف لسيارته بس بيقربها لحوش عمه لطفي..
🍃🍃🍃🍃🍃
بعد المغرب...
المهدي كان مقعمز قدام المطحن متاعه وهو يشوف يمين ويسار..
ثبت نظره جهة اليسار وهو يشوف في ولد اخته جاي...
وصل فيه وقال:السلام عليكم خال..
ناض المهدي وهو يقول..
/وعليكم السلام..الحقني..
ومشي المهدي لباب الحوش..
ومحمد مشي لحقه وهو مستغرب..
خش المهدي ومحمد خش وراه وهو يقول.
/نعم خالي..
المهدي:خليك وراي..
محمد بدي يخاف...
لحق خاله لين ركبوا لشقته..
دخله المهدي وخش بعده وسكر الباب..
المهدي مشي للصاله وهو يقول..
/تعالى..
مشي محمد اللي كان بادي الخوف يسيطر عليه للصاله مع خاله..
خشوا الزوز..
قعمز المهدي ودل ولد اخته ع المكان اللي بيقعمز فيه..
قعمز محمد وهو يقول..
/خوخمتني خالي شن في؟
تنهد المهدي وقال..
/بوك منقص عليك حاجه طلبت منه شي ومجاباش..
محمد اللي بدي يحس بالخطر مع الحوف:لا.
المهدي بأسف وحيرة:مالا علاش تسرق في خلق ربي لين وصلت بيك تخنب خالك!
اختفي اللون من وجهه وجحظوا عيونه من الخوف وهو يشوف لخاله..
المهدي بحرقه:معقوله يامحمد توصل بيك لهني!! تخش مع عصابه وتقعد تخنب في الناس! علاش يامحمد علاش!؟ انت اصلا شن خلطك عليهم هالنماذج لاهم من جيلك ولايصلحوا بيك..
محمد وهو يرعش:خالي راني مش فاهم شي..
المهدي بغضب:ماتكذبش..الكلاب اللي مخلط عليهم شدوهم في تونس الشرطه التونسيه شدتهم وحققت معاهم وجابوا اسمك في التحقيق..
هو بخوف شديد قال بإنكار..
/من هما هادم مانعرفهمش مانعرفش..
قاطعه المهدي وهو يقول بصوت عالي..
/اسكت ياكذاب..
ناض محمد يجري لخاله وجي راكع قدامه وهو شاد رجليه ويترجى فيه وهو يبكي..
/غروني ياخالي والله غروني وخوفوني ياخالي..بالله عليك ياخالي سامحني والله نادم ياخالي..والله حتى الليل معاش نرقد فيه والله ياخالي..
المهدي وهو يشوفله برغم غضبه الشديد منه قلبه رقله وحن عليه..
صغير في السن ومازال مش واعي واهمال بوه وامه ليه سبب كبير للي وصله..
مد يده وحطها ع شعره وقعد يمسح عليه وهو يقول..
/نوض قعمز..
شد محمد يد خاله وباسها بعدين قال..
/بالله عليك ياخالي ماتخليهم يحبسوني بالله عليك..
المهدي:باهي نوض نوض قعمز هني..
واشرله جنبه..
ناض وقعمز جنب خاله وهو يبكي بالعبره..
مسح المهدي ع ظهره وقال..
/خلاص خلاص..
وناض من حداه وطلع للكوجينه..
مجرد ماطلع..
وقف محمد بكي وبدت ع وجهه ملامح الغضب وهو بتنفس بسرعه من الخوف...
شويه وخش المهدي وفي يده طاسة ميه..
ومحمد يبكي وهو يقول..
/ضعت اني ياخالي ضعت خلاص ولا..
قعمز جنبه وقال:اشرب ميه اشرب..اشرب وبعدين كل شي بالتفصيل من لما بديتوا تنخبوا لليوم..
خدي محمد الطاسه وهو داهش وبدي يشرب..
وخاله يشوفله بأسف...
🍃🍃🍃🍃🍃
"في حاجه قاعده تصير عندهم وهما يدسدسوا فيها"
مغليه بتهكم؛راهم يطلعوا بيعرسوا لولدهم توا..
نسرين؛لالا مستحيل اول شي البنت شارطه الشهاده قبل الزواج وتاني شي فايزه ماخشتش افراح بعد موت عيشه الله يرحمها تبيها دير عرس بنتها وعمي لطفي الله يرحمه ماطقش اربعين يوم.
خديجه؛حتى اني ماستبعدتها لكن شاكة في حاجه تانيه نجاح باين عليهاحامل.
مغليه؛زعمه تقدر تحمل وهي فهالعمر!؟
خديجه؛يصير يام مازال عندها امل وشكلهم داسين مايبوش يطلعوها خوف من العين..
نسرين:عندهم حق..
مغليه؛حتى الحيوانات يفرخوا ويضنوا..
خديجه؛حاجه زي هادي ماتندسش سيورها تبان اني اول ماعرفت روحي حامل قلت لمحي خبر ماليك رغم ان العين عليا كيف حملت بعد 11 سنه لكن مش مدورة مخليتها ع الله..
مغليه:هو هدا البنادم المؤمن يخليها ديما على ربي..
احتفظت نسرين بصمتها وهي تشوف لراما كيف شاده ولدها يحيى وتلعب فيه..
شويه قالتلها امها..
/شن حال عيت الباني..
نسرين؛زي قبل..
خديجه؛حمواتك وسلفاتك امورهم تمام معاك؟
نسرين؛الحمد لله ناس طيبه من زمان نعرفوهم بنات الباني والسلفات لتوا كويسات..وبضيق كملت تقول..اني مشغوله ع وضع ربيع..
الزوز بقلق...
"خيره؟!"
نسرين:صايرتله مشاكل في الخدمه في السويد وقالي بنسافر نشوف شن صاير..
مغليه بضيق:لاحول ولاقوة الا بالله..
خديجه بقلق:امتى مسافر؟
نسرين:الاسبوع الجاي..
مغليه:بتمشوا معاه؟
حركت نسرين راسها بالنفي..
خديجه:اكيد بيلهى في مشاكله غادي ماعنده علاش رافعهم..
سمعوا باب الحوش تسكر..
مغليه:شكله بوكم..
وشويه ويخش محمد شنيبه وهو مبتسم قال..
/السلام عليكم..
ردوا عليه السلام ونسرين قالت..
/كيف حالك بوي؟
محمد شنيبه:الحمد لله رب العالمين فرج ع المهدي ولقوا العصابه اللي خنبت الذهب..
كلهم اندهشوا بفرح ومغليه قالت.
/بالله عليك!
هو قال بإبتسامه:والله..توا تلاقيت اني وياه كان معاه ولدك ياخديجه قال خبرته هو اول واحد وولدك شكله من فرحته قعد يبكي..
خديجه بدموع وهي متأثره:ياروحي وليدي والله من هداكا النهار وهو مهبي ومضايق..
نسرين:باهي لقوه الذهب؟!
محمد؛لقوه كله....
كلهم باصوات متقطعه قالوا..
/الحمد لله..
محمد؛شدوهم في تونس غادي وهو موصي جماعه بلغوه لما لقوهم..المهم غدوة بإذن الله ماشي لتونس بش يشوف الموضوع بروحه..
مغليه؛قول لواحد من خوته يمشي معاه ولاانت رافقه ياحاج..
محمد؛ايه ان شاء الله غدوة بنتسقد معاه..الحمد لله غمة وانزاحت..
مغليه بحزن؛والله مابطلت ندعيله الحمد ليك ياربي استجبت دعائي..
خديجه شافتلها بإبتسامة تعاطف..
محمد هز راسه وقال:الحمد لله..الحمد لله..
🍃والمهدي هالوقت خش المطحن وبلغ محمود اللي قاله..
/امتى جاك الخبر؟
المهدي:امس..
محمود؛وعلاش قلت اليوم؟
المهدي تنهد وقال:كنت نبي نتأكد قبل..
محمود سكت وهو يشوفله بشك بعدين قال..
/شفت محمد محي فايت من هني باين عليه كاين يبكي..
المهدي:ماهو خبرته حتى هو وانفعل شويه..
هز محمود راسه وهو يدس في الشك اللي عبا قلبه..
والمهدي لاإراديا سرح وهو يفكر في اللي صار..
اختار انه يدس عملة ولد اخته ويخليها بيناتهم تعاطفا معاه حتى لبوه وامه مش ناوي يقول وعطاه وعد بالشي هدا..
فكر المهدي ان اللي داره هدا احتواء لولد اخته..وان الاحتواء للي في سنه هو افضل حل..
بس في شي فداخله ماكانش راضي ع اللي داره واختار يتجاهله..ع خاطر ولد اخته..واخته..وسمعة عيلته..
🍃🍃🍃🍃🍃
مقعمزات في الجنان تحت ضي اللمبة الخارجيه وصوت المولد قالب الدنيا..
طوبى واريج كانوا يقروا..
لكن آلاء لاهيه بتليفونها تتصفح في الانستقرام..
فجأه شهقت وحطت يدها ع فمها..
الزوز انفجعوا وشافولها..
اريج؛خيرك!
نزلوا دموع آلاء..
اريج معاش تحملت جبدت التليفون وشافت اللي فيه..
بدت ع وجهها ملامح الضيق والإزدراء..
طوبى بقلق:شن في يااريج طيحتولي قلبي..
اريج:لايطيح قلبك ولاتخافي..اللي اسمه مهند خطب البنيه اللي معاه فالراديو..
شافت طوبى لآلاء بحزن..
الاء بنبرة باكيه..
/تعرفوا اني شن اللي صدمني!؟..انه دار نفس الشي بيلعب بمشاعر حد مالاش ذنب بش ينتقم..مررت نظرها بيناتهم وقالت..شفتوا شن درت!؟
اريج؛انتي مادرتي شي هو اللي مش مزبوط كان حق راجل وقلبه نظيف مايديرش حركة زي هادي..تعرفي الاء باهي اللي صار هكي بش عرفتيه ع حقيقته..
الاء بحزن؛لاهادي مش حقيقته هدا اللي اني درت فيه مش حنبرر لروحي يااريج اني جنيت ع مهند ياريته ماجي في طريقي..
طوبى؛البنت هادي عندها علم باللي صار بينك وبينه ولا؟
الاء ودموعها ينزلوا:مش عارفه بس شهدت ع مواقف اكيد تعرف..
طوبى؛معناها ماخطبهاش بش يغيضك ولاينتقم ولاغيره..خطبها بش ينسى اللي صار معاه وهي اكيد تبي تساعده..هدا الواضح..
اريج قعدت تفكر في كلام طوبى..
الاء وهي تفكر:ايه صح كلامك منطقي..
طوبى:حطي في بالك الكلام هدا ومعاش تحملي روحك ذنوب مش ذنوبك اهم شي تعلمتي من غلطتي وحاولتي تصلحيه وهدا اللي عليك ودرتيه..
مسحت دموعها وهي تهز في راسها بإقتناع..
اريج وهي تشوف للفراغ ودموعها في عيونها..
/رجع زي ماكان من بنت لبنت..
شبحولها بضيق..
اريج؛يحساب روحه هكي يقهر فيا مايحسابش انه قاعد يطيح من عيني..
تنهدت طوبى بضيق ونزلت عيونها للشيت..
والاء قعدت تشوف لأختها بحزن..
اريج:كويس اللي صار هكي بش عرفت انه مالاش امان..
رفعت حاجبها وشدت دموعها وظاهرت بالقوة..
ورفعت الشيت متاعها وقعدت تشوفله...
تنهدت آلاء وقربت منها وخدت التليفون..
وخشت ع التعليقات ع بوست مهند في الانستقرام..
🍃🍃🍃🍃🍃
"سايرته مسايره ياخالد الولد قريب خش في حالة نفسيه"
خالد؛اكبر غلط اللي درته..علاش تساير فيه عيل صغير! وعلاش يخش حالة نفسيه ع خاطر فشل في تجربه عاطفيه! كنت متوقع مهند راجل مقنط مش منعنع وسايح..
إياد؛ماتهزاش وانت مبتلى ياخالد...
خالد؛مبتلى بشني!؟
اياد:خالد فوتها الطروح هادي عارف كل شي..
غير خالد عيونه عنه وقعد يوزع في نظره ع المكان..
شويه اياد قاله..
/ايه تعالى هني شن قصة الدوة اللي طالعه عليك انت واميمه..
خالد؛دوة فاضيه مش عارف من مطلعها وقاعد يدور بيها البنت عندي زي اختي الصغيره معجب بطموحها وقوة شخصيتها لكن اعجاب مالاش علاقه بالعواطف بكل..توا انت تقولي مبتلى مامبتلى وعارف طروحي..
ضحك إياد..
حرك خالد راسه يمين ويسار وهو يقول..
/حاله والله حاله...
🍃🍃🍃🍃🍃
الساعه 11:30ليلا..
فوق سطوح حوش شنيبه.
كانوا مفرشين المهدي وولاده وراقدين وهما يهدرزوا..
محمد؛باهي علاش نحس فيك قاعد متكدر..
المهدي:علاش بنتكدر!؟ الحمد لله بالي ارتاح..
يزن:حتى اني..
حط المهدي يده ع راس ولده ومسح عليه..
بعدين قعدوا ساكتين التلاته وهما يشوفوا للسمي ويفكروا..
يزن..يتأمل في النجوم ويتخيل في احلى واحب وجه ع قلبه...امه..
ومحمد يفكر في مروة وعلاقتها بمالك...
اما المهدي..عقله كله مع ولد اخته..
يفكر كيف يحاول يحتوي المصيبه اللي داره ويخليه معاش يكررها..يفكر في اخته اللي اتصلت بيه وباركتله وهي فرحانه بطير من الفرح اللي رجعله الذهب وتجنب خسارة كبيرة..
مهما صار بينهم تقعد اخته مايتحملش يشوفها مقهورة ع ولدها...
شويه قال؛علاش علاقتكم بمحمد ولد عمتكم خديجه مش قويه؟
يزن؛مانحباش مانقبلاش..
محمد المهدي:جوه مايركبش ع جونا..
المهدي:حاولوا تتقربوله وتتصاحبوا ولد عمتكم هدا..
محمد المهدي؛حاولت يابوي لكن مانفعش..الولد هدا لسانه طويل ومايحترم في حد واخلاقه مش تمام..
المهدي؛مازال صغير يامحمد..
قاله؛اهو يزن من عمره خيره مش زيه؟
يزن؛ماتقارنيش بيه اني امي ربتني وتعبت عليا..
شبحله المهدي وقال:قصدك ولد عمتك مش متربي!
شبح يزن للسمي بدون مايرد..
محمد:سامحني فيها بوي ايه..
غير المهدي عيونه للسمي والتزم الصمت..
والثلاته قعدوا ساكتين والنسمه البارده تهف عليهم لين رقدوا يزن ومحمد..
وقعد المهدي سهران ويخمم...
🍃ويطلع نهار يوم جديد...
يوم يحمل في طياته احداث تحبس الأنفاس...
بدي هاليوم بطلعة المهدي مع بوه بالسيارة للمطار بس بيسافروا لتونس جوا...
🍃وبنات فردوس طلعوا للجامعه بخالتهم..
حطوها في كليتها ومشوا...
دارت طوبى امتحانها بكري..بعدين طلعت بيها عبير للمدرسه..
حطتها ومشت...
🍃في نفس الوقت..
جي الجالي لحوش عبد الرؤوف..
استقبله ودخله مربوعته..
واول ماخش تفاجأ الجالي باللي شافه مقعمز للمربوعه..
🍃الجالي:-ياعبد الرؤوف حني مش تفاهمنا الكلام يكون بيني اني وياك بس!؟
عبد الرؤوف:انت قلت مافي حد يبي يسمعلك غيري وحسين طلع يبي يسمعك حتى هو..
شبح الجالي لحسين بإمتعاض..
وحسين بادله نفس النظره..
وكمل عبد الرؤوف يقول:بعدين ياجالي حسين خوها الكبير لازم يكون حاضر في اي كلام يخصها..
الجالي وهو يشوف لحسين قال..
/باهي..اني نبي نروح بمرتي..
حسين؛وهي طالبه الطلاق علاش!؟
الجالي وهو رافع حاجبه:شيطان..شيطان خش بيني وبينها ويبي يخربلها حوشها زي ماخرب ع روحه..
حسين ضيق عيونه وقال:شن قصدك!؟
الجالي وهو مبتسم تهكما:نقصد الشيطان نفسه لما خرب ع روحه وطلع من الجنه..
عبد الرؤوف:والله اني شايف الدوة الكلام هدا يمشي ع كل واحد مش حامد ربي ع نعمة الزوجه بنت الناس والأصل وقعد يدور بعيونه برا..
الجالي بإبتسامه متكبره:للأسف الفكرة نفسها وصلاتك وانت اقتنعت بيها طول وماقلتش لازم نسمع من الطرف التاني بش نحكم بالحق..
عبد الرؤوف:ياجالي طوبى اني نعرفها كويس تتفكر اللي الحادث اللي صار قبل وانت انصبت فيه ع خاطرها..
استغرب حسين اللي يسمع فيه..
عبد الرؤوف:ياما صار فيها مسكينه ركبت روحها ذنب وطلبت مني نحميك لين نشدوا اللي ضرب عليك..وحده زي هادي ياجالي لايمكن نصدق انها ممكن تكذب وتتبلى..
الجالي:اني ماقلتش تكذب وتتبلى..
قاطعه عبد الرؤوف وقال..
/قلت ياعزيزي قلت..وقلت هالكلام قدام بوها رحمة الله عليه ومش هكي وبس افتريت وكذبت عليها..
الجالي:والله ماصارها باهي..
حسين بإنفعال:شن دايرلها انت شن قلت عليها!!؟
عبد الرؤوف:استهدا يالله ياحسين استهدا بالله..
🍃وبرا للحوش..
في الشارع..
كانت سيارة عبد القيوم واصله قدام حوش المهدي..
درسها ونزل ومشي خش للحوش بيركب يجيب من شقته حاجه..
🍃وفي مدرسة اجيال..
بعد مادارت طوبى جولتها ع الفصول اللي يديروا فيها امتحاناتهم..
نزلت للمطبخ ومعاها نائبه متاعها وابله زينب..
خشت علي الابلات وهي تقول..
/الله ع ريحة القهوة نشم فيها من فوق..
وحده منهم قالت؛اني دايرتها استاذه..
طوبى بإبتسامه؛صبي فنجان صبي رغم اني موقفتها من اول ماحملت لكن جي خاطري في هادي..
الابله:من عيوني استاذه..
زينب؛احسبينا.
بضحكه قالت:حاضر..
ابله زهره فتحت حافظه معمول وحطتها ع الطاوله وقالت..
/ذوقوا خدمة معملنا..
طوبى وهي تشوف للمعمول..
/يسهف الله يبارك..
🍃ومن عندهم..لبرا المدرسه..
قدامها تحديدا درسوا زوز سيارات فيهم مسلحين تابعيم لجهة ما..
نزل منها واحد وهو شاد في يده كلاشن وقال..
/خليكم هني لما نبيكم ناديكم..
ومشي خش للمدرسه..
والغفير يشوفله وهو يرعش من الخوف...
🍃طوبى:الله يبارك اول مرة نذوق قهوة زي هادي..
الابله؛-صحتين..
زينب:فعلا البنه الله يبارك..
طوبى خدت طرف المعمول وقالت:ماظني نقدر نكملها.
وفجأه..
سمعوا صوت ضرب رصاص في الساحه..
كلهم انفجعوا..
وبين اللي عيطت..واللي جمدت في مكانها..
زينب بفجعه؛ياحفيظ! هدا شنو!؟
"زهره"
شهقت زهرة بصدمه وطوبى تشوفلها وهي مصدومه..
"اطلعي توا خير ماطيح روس يازهره اطلعي"
والطلبه والابلات في الفصول كانوا مفجوعين ومرعوبين..
"اني يازهرة تبلغي عليا اني توقفيلي كلاب قدام حوش بش يشدوني..منين تعرفيهم يا...وقال لفظ نابي..منين تعرفيهم.."
🍃زهره وهي مرعوبه :الحقير الوسخ طلع يهدد من جده!..
"تي اطلعي يا...وقعد يسب في الدين والجلاله والعياذ بالله"
طوبى بصدمه:الله يسخطه الله يخرس لسانه..
زهرة في لحظه قالت:هالكلب مش حيهني روحه لين يدير مصيبه..
وجت بتمشي تطلع..
شدتها طوبى من ذراعها وقالت..
/سكروا الباب..
مشت تجري وحده من الابله وسكرت باب الحديد بالقفل..
زهره وهي مرعوبه:خليتي نطلعله راهو هدا بيدير فالطه للمدرسه بيضرها ياطوبى..
طوبى:مافيش طلوع اقعدي هني مايقدر يدير شي..
وشدتها بيدها التانيه وطلع تليفونها من جيب عبايتها وهي ترعش
قعدت دور ع رقم عبد الرؤوف..
وراجل زهره برا يضرب بالكلاشن في الهوا..
الابلات كشوا في بعضهم..
وطوبى غمضت عيونها بشده بعدين فتحتهم وهي تقول..
/حسبنا الله ونعم الوكيل..
واتصلت براجل اختها..
🍃اللي كان يهدي في الوضع بين حسين والجالي وهو يقول..
عبد الرؤوف:ياجالي ياحبيبي فوت وجع الراس واشري راحة بالك..فإمساك بمعروف او تسريح بإحسان وانت مامسكتها بالمعروف لهدا سرحها بمعروف ويادار مادخلك شر..
الجالي:تهدد فيا ولاكيف!..
ضحك عبد الرؤوف وقال:اني مانهددش بالكلام ياغالي..اني قاعد ننصح ونبي مصلحتك..
وحسين ماسك اعصابه باالزور وهو يشوف للجالي بحقد..
وفجأة..
يرن تليفون عبد الرؤوف..
خداه وهو يقول؛فكر لبين ماكملت المكالمه..
ورفع التليفون وشاف المتصل..
الجالي:ماعندي شي نفكر فيه.طوبى قاعده ع ذمتي ولو ماولتش لحوشها بالطيب نردها غصب عنها..
حسين بغضب؛لما تبدا بروحها مافي.وراها حد ياتافه قول هكي.
الجالي:احترم نفسك ماطلعنيش عن طوبى..
وعبد الرؤوف رد ع مكالمة طوبى وهو قلق وقال بعصبيه..
/اسكت انت وياه..ايوه طوبى..
الزوز قعدوا يشبحوله..
ناض عبد الرؤوف وهو يقول..
/كيف!؟
جو الزوز واقفين والجالي يقول.
/خيرها!؟
عبد الرؤوف؛ردوا بالكم تطلعوا تو نوريه الكلب هدا ماتخافيش ماتخافوش مش صاير شي بإذن الله..
وسكر..
حسين:شن في !!؟
عبد الرؤوف بقلق وغضب..
/واحد كلب مسلح هاجم ع المدرسه
ويطلع الجالي بسرعه البرق من المربوعه ويلحقه حسين..
وعبد الرؤوف يلحقهم وهو يدير في اتصال..
🍃طلع عبد القيوم من الحوش وهو متوجه لسيارته..
وقف لما شاف الجالي طالع بسيارته وهو يحرق في العجل وطلع يجري من الشارع استغرب.
ع جية حسين يجري وهو ملهوف بخوف..
/تارقي ارفعني لمدرسة بنت عمي في واحد مسلح هاجم عليهم وهي غادي..
عبد القيوم طيح اللي في وجري ركب سيارته..
وحسين ركب معاه..
وطلعت السيارة وكأنها صاروخ من سرعتها..
وبعيد شويه..
يركب عبد الرؤوف سيارته وهويقول...
/ايوه غادي يااسكندر فيسع..
وسكر بعدين شغل سيارته وطلع يجري حتى هو من شارع القهوة....
#أقاوم
#طوبى
....يتبع....
