#طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا8"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
الجالي:السلام عليكم..تارقي...
ضيق عيونه شويه ورد عليه وهو يقول:وعليكم السلام..تفضل..
الجالي بنفس الابتسامه المتكبره:شكرا..
وخش..
وعبد القيوم اللي كان مش طايقه سكر الباب..وقال..
تفضل..خش جوا..المكان مكانك..
ضحك ضحكه خفيفه وشبحله وهو يقول:مستعجل عندي ماندير..
عبد القيوم وهو يتكلم بنبرة فيها شي من التهكم:عيب عاد هذي اول مرة تجيني..
الجالي حك عظمة أنفه وقال:اني جايك في خدمه
استغرب وقال:خدمه!؟
الجالي:ايه..بس مالهاش علاقه بتخصصك..
عقد حواجبه بإستغراب..
الجالي:انت خطاط مافيش منك زوز ومتقن..اللوحتين اللي عندي في الفيلا والمكتب خير دليل..
عبد القيوم:شكرا..
الجالي:المهم..في جماعه لوحده من الوزارات كانوا عندي في المكتب اليوم..شافوا اللوحه متاعك عجبتهم وقعدوا يسألوا فيا من وين واخدها...وطبعا قلتلهم انها هديه من زوجتي اصروا عليا نسألها من وين ونرد عليهم ولما سألتها قالت انت دير فيه..وبعدين عرفت انك داير قريب للشارع كله واول قهوة خوي...
هو يتكلم بأسلوب متعالي ونظراته نظرات تكبر واضح..
وعبد القيوم يسمع فيه بالغصب وكان باين في وجهه..
هو يدوي وعبد القيوم يتخايل في روحه نازل فيه ضرب..
الجالي:فا..كنت نبيك ديرهم لو ماعندكش مانع..
عبد القيوم:ماعنديش مانع..كم لوحه؟
الجالي اشر بيده وهو يحرك في صوابعه وهويقول:4..
عبدالقيوم؛تمام..شن يبوني نكتب؟
الجالي:آيه"والذين هم لأماناتهم وعهدهم راعون"
ابتسم بتهكم وقال:حاضر..اخر الاسبوع تلقاهن واتيات..
هز الجالي راسه وقال:تمام..بعدين التفت شبح لطاولة قال..وهادي دفعة ع الحساب..
وطلع 500 من جيبه وحطها ع الطاوله..
التفت وشبحله وهو يقول.. التانيه توصلك بعد تسلمهم..
ابتسم وهو مضيق عيونه وقال:من قالك دايرها تجارة؟
الجالي:ايه عارفك مش دايرها تجارة بس اني نبيك تستفيد..ينفعوك..
قعد يشبحله الجالي وهو مضيق عيونه من غير مايرد..
الجالي:لازم يكون عندك مصدر دخل تاني وضع البلاد توا هكي يبي..
رفع عبد القيوم حواجبه وهو ساكت..
الجالي:فكر ديره مشروع..
ومازال عبد القيوم يشوفله بنفس النظرات وهو محتفظ بصمته...
ابتسم الجالي وحط يده في جيب جاكيته وقال:تستاهل والله تستاهل..
وطلع 500تانيه وحطها ع الطاوله وهو يقول..هادي بش نشجعك تنفذ فكرة المشروع..
شبحله وقال:والدفعه التانيه حتكون زيها بالزبط..
ابتسم عبد القيوم ابتسامه خفيفه جدا وقال:تمام...
الجالي بإبتسامه؛تمام..ربي يعاونك..السلام عليكم..
وفتح باب الشقه وطلع..
وعبد القيوم رد؛وعليك السلام..وسكر وراه الباب..
بعدين شبح للفلوس اللي ع الطاوله...
☘☘☘☘☘
"لا وضع الجنين كويس نبضه كويس امورها كلها تمام مافي شي يخوف مدام نسرين"
نسرين بنبرة حزن:الحمد لله..
🍃وبعد مااطمنت ع جنينها طلعت لعمة حامد وكنتها..
طمنتهم ع حال الجنين..
والعمة قالت:الحمد لله..المهم توا ردي بالك تقعدي معاه لاتقولي صغاري لاغيره..راجل زي هدا شرعا حرام تقعدي معاه..
نسرين:وكان سكر راسه وماباش يطلقني؟..
:ارفعي دعوة طلاق..
نسرين:مشوارهم طويل ويبوا ادله وشهود وقصص
:اني نشهد معاك اني..
نسرين؛بتشهدي ع ولد خوك؟
؛نشهد ع ولدي مش ولد خوي بالذات لو طلع نج.س وف.اجر معاد نعرفه بكل..
نسرين قعدت تشبح للطريق ومن داخل ارتاحت ع الخر..
:والله ماتستاهلي يابنتي..واحد زيه كيف صبرتي عليه السنين هادي كلها..
نسرين:ع خاطر الصغار وخوف من كلام الناس..ماكنتش نبي نفضحه ولانحكي ع عمايله لحد..لكن ربي فضحه قدامي ووراني سكاتي عنه وين وصله..
:الناس تسكت ع حاجات تانيه ع قلة الفلوس ع المشاكل لكن من حاجه زي هادي يابنتي..ماودر النساوين كان السكات..
ونسرين تسمع فيها وهي تمسح في دموعها..
☘وزي مافي نساوين في مجتمعنا ودرهم السكات..
في هلبه ودرهم الغش...
🍃نزلت طوبى من جناحها بعد ماصلت العصر..
صلاة مش عارفه هي شن قرت فيها ولاكيف أدتها..
ذهنها كان شارد وعقلها مابطلش تفكير..
وتبي تعرف..
شن جاب عطر الجالي لنجاة!..
زعمه ياطوبى طلعتي غالطه لما فكرت ان نجاة بس اللي في منها مشاعر اتجاه الجالي!؟.
طوبى وهي تفكر الكتمه اللي ع صدرها زادت..
حطت يدها عليه وقعدت وقالت بصوت هامس..
يارب يكون وسواس..
وصلت لوطا..
سمعت باب الحوش انفتح..
