# طوبى "شارع القهوة"
#جمان_فريد
#الجزء_الثامن_عشر"مقوى ناره"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
الساعه 5:30عصرا
خش لشارع القهوة بسيارته..
كان يسمع في صوت طقة النوبه استغرب فيها هو ماعنداش معلومه ان في مناسبه في الشارع..
وين خش شاف زحمه..
وهالزحمه كانت قدام حوش الواعر..
القلب بدي يدق بقوة...
وبخوف...
خلاص وصل فيهم وقعد يشوفلهم..
مايبيش يفهم شي...مايبيش..
درس قدام المطحن..
وخوته واقفين فم الباب يتفرجوا ع النوبه..ولما جي قعدوا يشوفوله...
طاهر...الجالي...عمر..نضال..
نزل من السيارة وهو يشوف للتجمع اللي قدام حوش الواعر..
يسمع في دقة النوبه...فالغني..
قعد يمشي لين وقف قدام حوشهم وقعد يتفرج..
وخوته يشبحوله...
شاف الفاندي اللي كان لابس عربي واقف يصفق ويغني معاهم..
شاف يوسف وحسين..شاف احمد راجل فايزة ومعاه مصطفى راجل فردوس..
شاف الشامس راجل مطيرة واقف يتفرج مع لطفي وعبدالمطلب..
شاف الحاج علي الواعر مقعمز ع كرسي وشاد عكوزه ويتفرج...
"الله وحد...صمد...ربي ماكيفه حد"
والنساوين داخل يغنوا معاهم ويهيجوا حتى هما..
وسدرة واقفه وحاطه ايديها في نصها وتتفرج عليهم وتضحك..
سكتوا شويه الشباب صاحت مطيرة تقول..
"ايهاب ولى نسيبنا يرفعنا ويجيبنا"
كلهم ضحكوا..
وسدرة عضت ع شاربها وهي تفنص بضحكه..
وبرا يوسف قعد يغني في مقطع عمته والشباب يردوا وراه..
ولطفي يضحك..
وايهاب كان مبتسم وخلاص...
شويه جو رفعوه بدي يضحك..
وبدوا يطيروا فيه فوق..
وهما يقولوا..
"اووووه...هيييه"
سدرة؛هادم شن يديروا..
فايزة؛يطيرولك فيه ياحنه!؟
سدرة حطت يدها ع خدها وقالت:حي عليا!..
قعدوا يضحكوا عليها..
وفي وسط هالاجواء الحلوة..
كان في عيون تشوف لهدا كله بقهر..
ومازال صاحبهم مش مستوعب..
المهدي:شن عندهم؟
شبحوله الجالي وطاهر...
الجالي؛انقرت فاتحة سدرة..
قعد طاهر يشوف لخوه وبس..
والمهدي حس قلبه غاص في احشائه...
شويه والتفت وخش للحوش..
لحقه طاهر..
بعدين لحقوه باقي خوته..
ونضال سكر الباب..
هو خش ركب الدرجات بسرعه وخش للحوش..
وخوته وهما متوترين وراه..
رمي كندرته..
ومشي خش للصاله..
لقي امه مقعمزة ورابطه راسها بوشاح وجرتها باكيه..
واخته خديجه مقعمزة حداها..
المهدي:خديجه..
شبحوله الزوز وهما منفجعات..
وامه تشوفله بألم وخوف..
خديجه؛نعم!
المهدي:اركبي وتي دبش لعايشه..
خديجه ناضت وهي تقول:حاضر..
وخوته واقفين وراه يشبحوله..
هو بعد قال اللي قاله لخديجه..لف بيمشي..
فجأة..
كان حيطيح غير شد في الحيط..
امه واخته عيطوا..
وخوته تلاقوا عليه وهما يقولوا:مهدي..مهدي خيرك!
شدوه وقعدوا يمشوا فيه..
وهو كان يمشي بشي من التعب وعيونه مفنصات..
قلبه كانت نبضاته متسارعه بشكل مش طبيعي.
وصلوه للكنبه ورقدوه عليها..وحطوا تحت رجليه مخاد..
وراسه ع جهة مسطحه..
مغليه وهي تبكي:وليدي..
المهدي بتعب:مافيا شي..
وجهه ولى شاحب ..
طاهر؛خديجه بالله ميه وسكر وملح.
خديجه وهي تبكي:حاضر..
ومشت تجري للكوجينه..
الجالي مسح ع شعر المهدي وقاله؛شن تحس!؟
ابتسم المهدي بتهكم وقعد ساكت..
طاهر؛مهدي..
المهدي غمض عيونه وحط يده عليهم وقال:مافيا شي..
ع جية خديجه تجري بطاسة الميه؛هاك طاهر..
خداها طاهر وقاله:نوض اشرب..
تنهد المهدي وناض قعمز..خدي الطاسه من خوه..
وبدي يشرب فيها وخوته يشبحوله..
مافي حد من الموجودين تجرأ يقول شي..
اصلا مافي حد عنده شي يقوله..
مد المهدي الطاسه لخديجه وحط يده ع قلبه..
كلهم قالوا؛مهدي خيرك..
ومغليه وهي تبكي؛ياحليلي..
المهدي؛يدق بقوة..
طاهر؛ولي ارقد ولي..
رجع رقد المهدي بنفس الوضعيه..
وطاهر جي عند قلبه وقعد يدلك فيه..
وخوته يشوفوله..
طاهر؛هاه شن تحس توا؟
المهدي هز راسه وقال؛احسن..
الجالي:لازم تمشي تعاين..
طاهر؛مزبوط كلام الجالي..خليك شويه توا..بعدين نوض معاي..
والمهدي ساكت ولاكلمه يسمع فيهم وخلاص..
بعد عشرة دقايق..
ناض المهدي بالسيف عليه ومشي مع طاهر بش يرفعه يعاينه..
وخلا امه تبكي عليه..
مغليه ببكي:ناري عليك ماممرداتك هالسدره..ياريتنا ماعرفناهم ولاعرفونا ياريتنا ماجينا لهالشارع...
☘☘☘☘☘☘
في وحده من العيادات..
في حجرة اخصائي قلب واوعيه دمويه..
بعد مادار للمهدي الفحوصات اللازمه قعمز ورا كرسيه وقال..
الدكتور:بشكل عام الوضع Normal مافي شي يخوف..
بس..واضح ان صارلك انفعال تعب قلبك..وهني القلب عطاك انذار انه بدي يتعب..من الضغوطات..او الانفعالات او مشاكل نفسية..يعني مستقبلا ممكن تصير فيه مشكله..
طاهر كان يسمع في الدكتور بقلق..
اما المهدي ضحك نص ضحكة ساخرة وقال:باهي يادكتور..عندكم دوا ولاحل يخلي الواحد يقدر يطلع حد تاني من قلبه!؟
الدكتور شبح لطاهر..
وطاهر قعد يشوف للمهدي..
ضحك المهدي سخريه وقال؛ومسمي روحك بروفيسور قلب ومش عارف شني..كان مش قادرين تلقوا حل للمرض هو شهايدكم نقعوها واشربوا ميتها..
وناض من مكانه ومشي طلع من حجرة الدكتور.. طاهر وهومحرج:اسف اسف جدا دكتور.
ابتسم الدكتور وهو يهز في راسه وقال؛متفهم متفهم..
☘وطلع طاهر بالمهدي من العيادة..
قاله المهدي
"دير بيا دورة ماتروحش بيا للحوش"
وطاهر دار مايبي خوه وماخلا وين دار بيه..
حتى نجاة اللي اتصلت بيه عشرات المرات ماردش عليها..
وقعد ع هالحال لين قاله المهدي..
"روح بيا"
روح بيه للحوش..
درس طاهر قدام الحوش
والمهدي عيونه طول علقهم في حوش الواعر وقال:كنا صغار..صغار هلبه لما عرفنا بعض..هما كانوا هني قبلنا
جيت هني وعمري سته سنين...وهي تلاته سنين
كنت نشوف فيها ديما مع خوها وبوها والاكثر تكون عند جدها..ديما يقعمز فيها في حجره
كانت فيها حاجه مخليتني وين نشوفها نقعد نشبحلها وخلاص..
وقعدت هالحال تكبر قدامي واني نكبر معاها وكل مالها تزيد تشدني ليها..
كانت بنت مش زي بنات جيلها بروحها في كل شي..
ماكنتش نبي حد من الاولاد يلعب معاها غيري اني واللي نشوفه يقرب منها نضربه..
اي حاجه تبيها نلقى روحي نمشي جري بش نجيبهالها..
وكان في يوم ماطلعتش للشارع نسأل عنها خوها يقولي مريضه..يمشي يومي اخييي عليه..
اول مرة دقلها قلبي بالحق وفهمت اللي نحس بيه ناحياتها كان عمري وقتها 15سنه..اول مرة تلبس فيها حجاب..
طلعت فيه حلوة هلبه..هلبه...وزادت شدتني ليها هلبه..
وحسيت ان حتى هي فيها شي من ناحيتي..
وقعدنا اني وياها نهدرزوا بلغة العيون سنين..خلاص كبرنا معاش نقدروا نلعبوا مع بعض ولانهدرزوا..
ضحك وقال...بس الشارع كله وقتها عارف..ان المهدي وسدرة يحبوا بعض...
تنهد وقال...خشت الثانوي..واني هني خلاص قررت نصارحها..
جتنا في حوشنا مرة..وقلت لنسرين ديرلي لقطه بش نوقف عليها ونكلمها
🌻وصار..في الممر اللي يرفع لدروج الريفودجي...
كانت متحشمه وخاشه في بعضها وعيونها ماقامتهمش فيا بكل..
"سدرة اشبحيلي..
هي بخجل قالت؛في شن تبيني..
ضحك وقال:مش قايل لين تشبحيلي..
قامت عيونها وشافتله ووجهها محمر من الخجل..
هو بنبرة حلوة قال:نحبك..
نزلت عيونها وهي بذوب من الخجل..
هو قاللها:عارفه زي مالدنيا كلها عارفه ولا؟!
هزت راسها وهي مبتسمه بخجل..
ابتسم وقال:وانتي؟
هزت راسها وقالت:حتى اني..ولفت ومشت بسرعه..
وهو يضحك عليها"
المهدي بإبتسامه ألم؛هداكا اليوم لايمكن ننساه..احلى يوم يمر عليا في حياتي...
ومن يومها واني كل مالي نزيد نغرق فيها...
من سته سنين لعند الاربعه وتلاتين سنه ياطاهر..
واني نحب فهالبنادمه ومش عارف لاننساها ولانكرهها..
ولانبي ننساها ولانبي نكرهها..
سدرة لاتنكره ولاتنتسى..
طاهر:ماعندي مانقول كان ربي يكون في عونك وخلاص..
المهدي تنهد من وسط قلبه التعبان..بعدين فتح باب السيارة ونزل..وطاهر نزل معاه..
مشي طول المهدي ركب لشقته وخش للدار...
وانطرح ع السرير..وغمض عيونه....وهو متألم لأبعد حد..
☘☘☘☘☘☘
"واو شن هالحب!؟"
طاهر:زي قصص العشق الاسطوريه..
"بصراحه حسدتها سدرة هادي"
طاهررفع حاجبه وقال:شن قصدك !؟
ضحكت وقالت..
"نبصر عليك نشوف فيك شن بتقول"
طاهر:تشبحي فيا كيف قاعد نحارب بش ناخدك..
"ماتزعلش حبيبي والله بصارة ..المهم توا بنمشي غدوة نزور مرت خوك وبالمرة نتعرف ع سلفتي المستقبليه.."
ضحك طاهر وقال:اما انتي عليك حركات!
☘حركات انت مش عارف شن الهدف من وراها ياطاهر او ممكن حاط في بالك ان في هدف بريء وعادي تبي توصله☘
🌻وفعلا..
تاني يوم كانت نجاة عند عائشه..
خشت عليها بباقة ورد وباكو شكولاته...وقعدت تعرف بنفسها وتهدرز عليها..
نجاة:ماشاء الله مايبانش عليك عمرك بكل تباني اصغر مني..
ابتسمت عائشه وقالت:تسلمي يارب..الحق الله يبارك عليك احلى من الوصف..
نجاة ابتسمت وقالت:شكرا..امتى تطلعي بالزبط..
عائشه:بعد اسبوع ان شاء الله..
نجاه:ع خير ان شاء الله..ناضت وقالت..مانطولش عليك ان شاء الله لاباس..ومشت حطت فلوس تحت مخدتها بياض البنت..
عائشه:غير علاش هكي بس!
نجاة بإبتسامه؛مفروض نخش بهديه تستاهل بس الله غالب مافي اليد حيلة..
عائشه:جيتك بروحها ساده.
نجاه:تسلمي يارب..هي ان شاء الله لاباس عليك..بالسلامه..
عائشه:بالسلامه..صحيتي..
نجاة:ماعنديش فيه جميل..
ومشت طلعت من الحجره..
سكرت الباب وقالت في نفسها"مش ساهله هادي وحلوة هلبه فوقها..بس مع هكي هو مش معبرها..خاطري نشوفها سدرة هادي"
وكملت طريقها.
ع جية المهدي بشنطه في يده.
شافاته عرفاته قعدت تبع فيه بعيونها..
نجاه في نفسها..
"عليك شخصية!! خسارة فاتك ياصابرين..لكن زعمه تقدر عليه!؟..تقدر وعلاش ماتقدرش صابرين صغيره ودلوعه واحلى من مرته..تجيبه للطريق نعرفها"
وابتسمت بمكر ابتسامه خفيفه وكملت طريقها برا المستشفى..
~~~~~~~~
"شن حالك اليوم"
عائشه:الحمد لله..
حطلها الساكو وقال:امك روحت؟
عائشه ؛ايه بدير دورة ع الحوش وتولي..
المهدي:مش مشكله تو نساعدك اني..
وقعد يطلع في حوايجها من الشنطه ..
وهي تشوفله..لاحظت شحوب وجهه..وملامح التعب باديات عليه..
عرفت السبب..تألمت..بس قعدت ساكته...
🍀🍀🍀🍀🍀🍀
وتمر الايام..
يوم ورا يوم...
وتطلع عائشه من المستشفى ومعاها بنتها.. وتكمل باقي العلاج في حوشها..
وكان الكل يساعد فيها وع راسهم راجلها اللي كان راد باله منها ومن الصغار ع قدر استطاعته..
وخديجه ماقصرتش بكل اتجاه صغار خوها اللي كانت تخلي فيهم عندها يوم كامل زيهم زي صغارها..
عائشه كانت تتحسن بسرعه..لأن نفسيتها ولت افضل..
حست روحها كانت قايمه جبل ع قلبها وزاحاته...
ومافاتش شهر ونص الاوهي باديه تنوض وتتحرك..
وهني قرروا عيت شنيبه يديروا لمه حفيدتهم الاولى
سدرة المنتهى شنيبه..
وكانت مغليه تبي ديرها لمة كبيرة...
وبدت تعزم عليها من بداية الاسبوع...
🌻🌻🌻🌻🌻
"هيا طوبى خفي روحك."
طوبى:شويه بس..
حسين بضحكه:غير شن تبي بس!؟
طوبى:نبي منك فلوس..
حسين:ادللي كم تبي.
طوبى:مش ليا راهو..لميمو..
حسين بإستغراب؛علاش!؟
طوبى:انت غير هات بس..
ضحك وقال:مانقدرش نقولك لا..وطلع تزدانه وعطاها مبلغ كويس ومدهولها..
خداته طوبى وهي تقول:ياماما اول مرة نشد فلوس هلبه هكي!!
قعد يضحك حسين..
حطتهم طوبى في شنطتها وقالت؛سلام..
ومشت تجري..
حط حسين ايديه في جيوبه وهو يشوفلها بإبتسامه..
هي وصلت في سيارة سدرة.
فتحتها وركبت من الخلف..
سدرة؛وين هدا كله..
طوبى:كنت ناخد من حسين في حاجه..
غرفه:شن هي ؟!
طوبى:امانه..
سدرة:امانة شني..
طوبى:تو نقولك بعدين..
شبحت سدرة لطوبى بحده من المرايا..
طوبى:والله لما نقولك.
هزت سدرة راسها وتحركت طلعت بالسيارة من الباب..
نزلت طوبى سكرت الباب وولت للسيارة..
وتحركت سدرة للسوق..
غرفه وهي تبكبك من الغضب:كم التاريخ اليوم؟
سدرة:تلاتين واحد الفين وتسعه...
غرفه بضحكه:تلاتين واحد ساده عارفه ان حني في 2009..
وقعدت تعدل في التاريخ في تليفونها..
وبعد طول مسافه وصلوا للسوق..
درست سدرة ونزلوا وبدوا جولتهم..
كانوا يشروا في لبس للمه وبيان سدرة..
حطت غرفه ع لبس غالي كعادتها وخداته خداته..
وطوبى خدت قفطان ولبسه تركيب حلوات..
بعدين..
طوبى:سدرة..
سدرة:هاه تفكرتي تقولي توا؟!
طوبى:خديت فلوس من حسين بش نشروا لأميمه حوايج..
سدرة:مرات تضايق..
طوبى:بفلوس خوها سدرة...وبعدين بنقولك حاجه وياربي مانكون فتانه..هداكا اليوم جت اميمه بتطلب من غرفه لبسه للمه قالتلها ماعنديش حاجه تناسبك جسمك مش حلو وهلبه لبس مايمشيش معاه..واميمه بعدين قالت مش ماشيه وبتقعد تقرا..
سدرة بصدمه:اميمه جسمها مش حلو! ؟اريييته جسمي..
ضحكت طوبى وقالت:غرفة هكي تقوللها..
سدرة بغيظ؛غرفه هادي تبي التقريض..
طوبى:بالله عليك ماتقوليلها حاجه فكيني منها..خلينا ناخدوا حوايج لميمو..
سدرة تنهدت وقالت:باهي..
وغرفه لاهيه تدهور بروحها..
هما كانوا يدوروا ع لبس حلو لأميمه.
لين لقوا لبسة قونه لونها عنابي منظرها حلو بالمرة متاع مناسبه..
سدرة:الله هدا يطلع لون بشرتها محلاه..
سدرة بإبتسامه؛صح..
وسألوا عن حقها لقوه مناسب للي عندهم وخدوها..
بعدين قعدوا يدوروا ع قفطان قنين..
وبعد بحت لقولها قفطان ناعم وحلو لونه اسود يطلعها حتى هو حلوة بالمرة..
خدوه وكملوا الفلوس عليه..
ناضت سدرة منها هي خدت كندره مناسبه للبستين..
طبت عليهم غرفه وقالت:لمنو هدا كله..
طوبى:لسدرة..تاخد في بتات من توا..
غرفه؛يطيح موضته بعدين..
سدرة:ماندورش في الموضى..
ومشت وطوبى لحقتها هربا من غرفه..
وغرفه لحقتهم وهي مستغربه..
☘☘☘☘☘
وبعد كملوا دورتهم في السوق..
روحوا ودسوا اللي خدوه لأميمه ليوم اللمة..
🍀يوم اللمه...
الصبح...
كانت اميمه في الكليه مش عابيه تمشي للمه..
ماشيه تقرا للإمتحانات اللي قربت.
"راك تعيي من القرايه"
ابتسمت وقالت:مستقبلي فيها..
قعمز عمر جنبها بمسافه وقال:مستقبلك في القرايه بس!
ابتسمت بخجل..
عمر ابتسم وقال؛بتجي لحوشنا اليوم؟
هزت اميمه راسها بالنفي وهي مبتسمه..
عمر:علاش.
رفعت الشيتات وقالت؛نقرا.
عمر ابتسم وقال:موفقه...هو شكله ماعندكش وقت ليا نوض وخلاص..
اميمه بضحكه:لو تجي بعد ساعه تاخد الوقت كله..
عمر:بعد ساعه عندي محاضرة..
اميمه؛خلاص يوم تاني.
عمر ضيق عيونه وقال:شن رايك نفوتها المحاضرة!؟
اميمه:لاالالا ماتفوتش قرايتك ع خاطري..
عمر بضحكه؛من قالك ع خاطرك بنشوف جماعة صحابي بيتلاقوا بعد ساعه..
انحرجت اميمه ع الآخر حكت جبهتها وقالت بإبتسامه مرتبكه:اسفه فهمت غلط...بس مع هكي ماتفوتش قرايتك ع خاطر حد..
قعد يشوفلها بإبتسامه وهو ساكت...
وهي نزلت عيونها للشيتات وبان انها مضايقه.
عمر:هي خل ناخدوا بنصيحتك ونشوفوا لوين بترفعنا نصيحة اميمه العبيطه..
شبحتله وقالت:عبيطه!
عمر بضحكه:نبصر عليك اضحكي خيرك..
شبحت اميمه القدام وقالت؛ماقدرتش نضحك عليها زمان ولانقدر نضحك عليها توا..
هو خفت ضحكته وهو يشوف لعيونها كيف لونهم تبدل من الأخضر للأزرق..فهم انها في حالة حزن توا..
وخطر عليه ايام زمان وكيف كان يعامل فيها.
حس اتجاه نفسه بالكره..
بس كابر كعادته وناض وهو يقول:مالا نخليك تقري..موفقه
ابتسمت بحزن وقالت؛في أمان الله..
هو هز راسه ومشي..
نتهدت بحزن ورجعت شافت لشيتاتها...
🌻🌻🌻🌻🌻
الساعه 5:00عصرا..
في الحوش وتحديدا في دارها..
كانت تقرا وهي لابسه ملايتها..بعد ماصلت طول انكبت ع شيتاتها وقعدت تقرا...
فجأة دق الباب..
اميمه:خش..
انفتح الباب وسمعت صوت يقول..
"هي نوضي نوضي مش وقت قرايه"
التفتت واندهشت..
وين شافت فايزة جايه ومعاها طوبى واريج كل وحده فيهم شاده كيسه..
وفايزة عندها عدة المكياج...
اميمه وهي مصدومه:شن في!؟
فايزة:هي نوضي سقدي روحك لودي ع روحك وخليني نبدا فيك حتى اني بنوتي روحي وقت ع اللمه..
ضحكت اميمه بإستغراب وقالت:اني مش ماشيه فايزة..ماعنديش لبس.
طوبى:لاعندك...
وطلعت من الكيسه البدله..
فتحت اميمه عيونها ع وسعهم بدهشه وقالت:من وين؟
طوبى بضحكه:من حسين..
اميمه بإندهاش:حسين..!
اريج:هادي الكندرة متاعها تجنن تجنن ..
وطلعتها اريج..
قعدت تضحك اميمه وهي مش مصدقه عيونها..
فايزة؛هيا ياسندريلا هيا لمي شيتاتك هي..
اميمه بضحكه؛مش مهيأة نفسي بكل..
فايزة بنرفزة:هي سقديني..
ضحكت اميمه وهي فرحانه..
لمت شيتاتها..
و بعدين مشت دوشت وجتهم...
وبدت فيها فايزة..
اول شي استشوار شعر...
طوبى:حني مروحين بعدين نجو نشوفوها..
اميمه:ان شاء الله نطلع حاجه تستاهل تنشاف..
شهقت فايزة وقالت؛نهار احرش ع راس اليهود..كان انتي ماتستاهليش تنشافي مالا منو تنشاف..عليك طول وعليك قد..
طوبى:زي عارضات الازياء..
فايزة:وعليك نقيش وعليك لون وعليك عيون..شن فيك مايتلوح يابنتي قمر قمر..
اميمه وعيونها مليانات دموع:بالله تقولوا في الحق مش تجاملوا فيا..
طوبى:بعدين تشوفي روحك بروحك..وماتسمعيش كلام حد مرة تانيه..
اميمه قعدت تشوفله..
طوبى ابتسمتلها وقالت لأريج:هيا روجه..
اريج؛هيا..
وطلعوا الزوز من الدار وسكروها..
فايزة:ربي يحفظك ياأميمه ماخلا ربي ماعطاك يابخته اللي بياخدك
الدفعة المعنويه اللي عطاهولها كانت رهيبه اول مرة تسمع كلام حلو وفيه مدح ليها ولشكلها وجمالها..
لأول مرة اميمه تحس انها انثى فعلا..
☘☘☘☘☘☘
بعد ساعة ونصف..
فايزة بإبتسامة انبهار؛الله يبارك الله يبارك..شوفي روحك في المرايه..
مشت اميمه وهي متوتره وخايفه للمرايه..
وقفت قدامها..
فتحت عيونها ع وسعهم وهي مش مصدقه اللي تشوف فيه قدامها وكأنها وحده ماتعرفهاش..
فايزة:شن رايك!؟
اميمه وهي مندهشه:مش عارفه شن نقولك..مش مصدقه هادي اني !؟
ضحكت فايزة..
ومشت فتحت الباب ونادت:خالتي صفيه..
شويه وجت صفيه وكانت لابسه حتى هي..
وين خشت وشافت بنتها ابتسمت من قلبها وعيونها تعبوا دموع:الله يبارك الله يبارك.
اميمه بإبتسامه:حق حلوة..
صفيه:مش حلوة وبس تهبلي ياعيون امك..
"ووواووو"
شبحوا لمصدر الصوت..
شافوا طوبى واريج وهما لابسات ومتأنقات بما يناسب عمرهم ..واقفان يشوفوا لأميمه بإعجاب شديد..
واميمه تشبحلهم وتضحك..
☘☘☘☘☘☘☘☘
"وينهم هادم"
فردوس:اهم جو..
غرفه:شن عندكم غادي نبي نعرف!؟
طوبى:شي..هيا نمشوا..
فردوس:هيا قدامي هيا..
ومشوا طلعوا لحوش شنيبه..طبعا ماعدا سدرة معاش تقدر تمشي غادي خلاص..
وين وصلوا غادي خشوا للحوش لقوة زحمه..
سمعت غرفه صوت المنظومه قالت:شكلها لمة رابحه..
فردوس:اكيد ياحنه.
استقبلتهم نسرين وهي تقول بإبتسامه؛اهلا...
وسلموا ع بعض سلام حار ورحبت بيهم وبعد ماحولوا عبايتهم دخلتهم للصاله..
🌻فهالوقت..
كان عمر حاصل فوق..
راحت عليه نومه وماقدرش يطلع من الحوش..
عمر:عليك حالة وخلاص...لكن تو يشوف نضال الكلب هدا غير وصيته..
قعد يفكر شويه بعدين قال:خل نحاول..
فتح باب الدار ومشي بإتجاه الدروج بخطوات خفيفه..
ع خشة صفيه وفايزة واميمه للحوش..
استقبلتهم خديجه..
سلمت عليهم وقعدوا عيونها ع اميمه وهي تقول:حولوا عباياتكم ترا..
حولوا عبايتهم..
فتحت عيونها وسعهم بإنبهار لما شافت اميمه..
ماقدرتش تخفي اعجابها بيها وقالت:الله يبارك اميمه!
شبحوا لأميمه بإبتسامه..
وهي ابتسمت بخجل وقالت:تسلمي..ضيقت عيونها وقالت..عندكم مراية..
خديجه بإبتسامه اعجاب:متاع المدخل غادي..واشرتلها عليها..
اميمه:شكرا..
ومشت وين مااشرتلها خديجه..
خشوا امها وفايزة داخل..
وهي قعدت واقفه ع مراية المدخل تشوف لروحها تبي تشبع من شوفة شكلها الجديد..تبي ترسخ في راسها هالصورة ومعاش تحولها..
☘فهاللحظه..
نزل عمر زي السارق من الدروج ومشي طلع من الحوش بدون مايلاحظها..
وين وصل في باب الحوش الخارجي..
غمض عيونه بشده وقال:التليفون..
وخبط رجله ع الأرض..ولف بيولي يجيبه..
وهو خاش..عيونه جو ع مراية المدخل..
وقف جامد في مكانه...
عيونه المبهورات بيها زادو انبهار...
قلبه اللي بدي وين يشوفها معاش يعرف يسيطر ع دقاته..
كاد ينخلع من مكانه..
يعني هي مازال اجمل من هكي مازال!!؟
ياربي لطفك بهالقلب معاش عندي عليه سلطه ولاارادة..
اميمه حولت من ع المرايه ومشت..
هو طول ادرق..
وهي كملت طريقها للصاله..
بين راسه شويه مالقهاش..
تنهد من قلبه بعدين ابتسم..
☘اما هي..
بشي من التوتر خشت للصاله..
والعيون كلها توجهت ليها..
الحاضرات فتحوا عيونهم وفامهم فيها..
الكل كان مبهور..
اما غرفه انسمطت سمطه مش عاديه..
اميمه بدت تسلم ع النساوين والعيون تتمقل فيها.. لين وصلت في مغليه..
مغليه:الله يبارك الله يبارك...ربي يحفظك ياأميمه..
اميمه بإبتسامه خجوله:تسلمي خالتي..وكملت سلامها ع الباقي وقعمزت حدا امها..
وعيون الكل عليها..
وغرفه قريب تموت من الغيره..
مغليه:ريتيها اميمه!؟
خديجه؛ملكة جمال..
مغليه:مش حتطلع من هني .
خديجه بضحكه:من اول ماريتها جي في بالي الجالي..
مغليه ابتسمت وقعدت تتفرج ع اميمه...
شويه..
وخشوا زوز..
حولوا الانتباه شويه عن اميمه..
كانوا غريبات وماحد يعرفهم..
نسرين:تفضلوا نجاة صابرين تفضلوا..
مشوا الزوز طول لمغليه..
والعيون عليهم وعلى لبسهم الجريء..
سلموا ع مغليه..
مغليه:انستوا انستوا..
نجاة:الله يآنسك عمتي..
صابرين:الله يآنسك..
بعدين سلموا ع خديجه..
وخدتهم نسرين وقعمزت هي وياهم في مكان وبدوا يهدرزوا..
والكل يشبحولهم بإستغراب.
قعدت نجاة توزع في نظرها ع الحوش بعدين غيراته عنه وقعدت تشبح في الحاضرات..
ثبتت نظرها ع اميمه عجبتها هلبه..
بعدين غيرتهم عنها وقعدت دور بيهم..
لين جو ع طوبى...
طوبى لقتها تشبحلها...
ابتسمت مجامله..
نجاة يدوب ابتسمت ورجعت تشوف لنسرين
وطوبى قعدت تشبح لنجاه..
حست بشعور غريب ومخيف هلبه في نفس الوقت..
حولت عيونها عنها وحاولت تلهى مع بنات اختها والشعور مازال ملازمها..
#مقوى_ناره
#طوبى
....يتبع...
