#طوبى "جنة طوبى"
#جمان_فريد
#الجزء_الخامس_والستين"إستنزاف"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🍃 يَسْعى الانْسان دائِماً إِلى الانتِقام لأنه يرى أن ذلِك من باب العَدل و الإِنْصاف🍃
___________________________________________
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
برفقة حسين..
مشوا لطفي وعبد القيوم لمقر الكتيبه اللي اعتقلت عبد الرؤوف بش يعرفوا الاسباب اللي ادت لهالإعتقال..
🍃ونساوين العيله في حوشه..
يهدوا في غرفه اللي لما عرفت ولت في حالة يرثى لها..
غرفه ببكي:ياربي انت عارفه ياربي عمره ماضر حد رزقه كله حلال ياربي..رؤوف كويس ياربي علاش يصير فيه هكي..
طوبى وهي حاضنه يدها بإيديها الزوز وتقول بحزن وخوف..
غرفه ياروحي حاولي تهدي روحك ع خاطر صغارك..
غرفه ببكي؛صغاري..صغاري شن يصير فيهم كانوا جي للدنيا وبوهم مش معاهم..غمضت عيونها بشده وقالت..لاياربي لا ماديرش فينا هكي..
مطيره ودموعها في عيونها:تعوذي من الشيطان بنتي وتفائلي خير مرات ملخبطين مرات في غلط..
الاء بدموع:ايه صح مرات مجرد سوء تفاهم ويروحوا..
غرفه رفعت عيونها وقعدت تدعي بتوسل :يارب..يارب..ربي يسمع منكم..
وفردوس مقعمزة تبكي بصمت وهي تشوف لأختها بألم..
وجي بين عيونها كل شي عاشاته لما فقدت مصطفى..
🍃برا الدار اللي قاعده فيها غرفه..
في الصالون..
كانت اريج تتكلم بالتليفون وهي تبكي..
والله ماعارفين حاجه لتوا ماكلمنا حد..
"ان شاء الله خير ان شاء الله خير..ان شاء الله مشكله تافهه وتنحل"
اريج ببكي:يسمع منك ربي..حطت يدها ع جبهتها وقالت بوجع..اااه ياربي..نزلتها وقالت..والله مانا ناقصين والله..
"هدي حبيبتي هدي قلبي..مافي حد ماعنداش مشاكل هدا حال الدنيا"
اريج بحزن؛تعبنا والله تعبنا..معاش في حد فينا يقدر فينا قادر يتحمل خلاص..
"لاحول ولاقوة الا بالله"
وهي قعدت تبكي...
🍃ويجوا اميمه وامها بعد ماروحت من المستشفى..
وصلوا في اللحظه اللي انصابت فيها غرفه بحالة إغماء..
اسعفتها اميمه بمساعدتهم..
وبعدين رقدوها في السرير وقعدوا حواليها..
يراجو في أي خبر عن عبد الرؤوف..
🍃🍃🍃🍃🍃
وفي حوش شنيبه..
كانوا مدايرات جلسة تحليل وتوقعات للي صار..
خديجه؛يطلع مداير مقبرة جماعيه ايامات الحرب وتوا بس زبطوه..
نسرين بعدم اقتناع:لالا ماأعتقدش..
مغليه:مرات يكون في بينه وبين حد مشكله وحفرله وطيحه..
نسرين وهي تفكر:مرات..
خديجه بشي من التهكم؛حظ اخته مسكينه قاعده عروسه البارح بس تزوجت..
مغليه مطت شواربها بإزدراء...
نسرين بحزن:والله كلهم يوجعوا غرفه وعمي لطفي مسكين ربي يكون في عونهم..
🍃وبرا الحوش..
قدام المطحن..
المهدي:الكتيبه هادي معروفه تابعه للحكومه شكلها قصته كبيره..
ربيع بقلق:يستر الله..شكلها تصفيه حسابات..
المهدي بضيق:شكلها..
ربيع؛ماعندك حد تقدر تكلمه عليه؟
المهدي:اتصلت بكذا واحد وقالولي نشوفوا الموضوع ونردوا عليك..
ربيع هز راسه بضيق وهو ساكت...
🍃🍃🍃🍃🍃🍃
"ياحسين القصه كبيره راهو اختلاس من وزارة الداخليه ومبلغ كبير عليه"
حسين بتهكم؛مااختلس الاهو..
:تمام معاك..بس الموضوع هدا محركينه ناس كبار واضح مش عارفه اذا كان حق دايرها ولا افتراء المهم انها قضيه كبيره هلبه مايطلعش منها بسهوله..
حسين بضيق:لاحول ولاقوة الابالله..باهي نقدر تشوفه عشرة دقايق مش مطول..
؛خمسه دقايق فقط لاغير ..
هز راسه بقلة حيله وقال؛باهي...
🍃🍃🍃🍃
وجمعوا حسين مع عبد الرؤوف في المكان اللي احتجزوه فيه...
عبدالرؤوف وهو مضيق عيونه بعدم استيعاب:اختلاس!؟
حسين؛ايه..والمبلغ كبير عليه حسب مامذكور في مذكرة الاستدعاء انك مختلس فوق 5مليون دينار سنة 2015 لما كنت تخدن في الوزارة وقتها..
ضحك بصدمه وقال:اني مااستملتش فيها مسؤوليه بكل اني كنت امر في كتيبه تابعه للوزاره بس..
حسين؛الصفه هادي بروحها ساده..
عبد الرؤوف عقد حواجبه وقال:كأنك مصدق؟
حسين؛شن تقول انت اكيد لا..صح مانقبلكش لكن نعرف اخلاقك كويس ماديرهاش..
عبد الرؤوف نزل عيونه وهو يهز في راسه ويقول..
بارك الله فيك..
حسين؛المهم توا انت تقعمز مع روحك وتفكر كان في عندك عداوات قديمه..مشاكل مع حد..ثار قديم لحد عليك..اي شي يكون سبب في اللي صارلك..
عبد الرؤوف وهو يفكر:مافيش بكل والله مافي..
دق باب الحجره اللي هما فيها..
وخش الشخص اللي دخل حسين وقال..
افندي حسين تم الوقت..
حسين شبحله وهز راسه بعدين شاف لعبد الرؤوف:تو نزيد نشوف الموضوع ونقعد وراه لين نعرفوا شن صاير بالزبط..
عبد الرؤوف؛حسين ماتوصلوا لأختي وراجلها شي بكل..
حسين؛حاضر
عبد الرؤوف:وقول لعمي والعيله عبروف يوصيكم ع عياله..
هز حسين راسه وهو يقول؛مانتوصوش عليهم...تونجيك مرة تانيه ان شاء الله..
عبد الرؤوف:بارك الله فيك
حسين ؛السلام عليكم..
ومشي طلع مع الراجل..
وتسكر ع عبد الرؤوف الباب وقعد بروحه وبدي يفكر في اللي قالهوله حسين..
الموضوع كله افتراء مليون في الميه..
بس السؤال هني من وراه!؟
🍃🍃🍃🍃🍃
في الطريق..
وعبد القيوم مروح بلطفي وحسين في سيارته..
لطفي بعدم استيعاب:اختلاس!.
حسين؛ومبلغ كبير هلبه..
عبد القيوم؛مستحيل عبد الرؤوف مش من النوعيه هذي عاشرنا الراجل وعرفناه كويس..
حسين؛مزبوط..عبد الرؤوف مايديرش حاجه زي هادي..
لطفي وهو مضايق لأبعد حد؛تبي تقول ان التهمه هادي افتراء..
حسين؛من غير نقاش..
عبد القيوم قعد يفكر في اللي فكر فيه الجميع ان الحكايه فيها تصفية حسابات بس ماباش يقول الكلام هدا قدام لطفي بش مايزيداش على مابيه...
اما لطفي اللي التزم الصمت عقله رفعه لأبعد من اللي فكروا فيه كلهم والوحيد اللي وصل للنتيجه الصحيحه..
☘وصل بيهم عبد القيوم للشارع..
وكانوا في انتظارهم رجاله من جيران الشارع وع راسهم محمد شنيبه والمهدي والصيد وزوز تانيين من كبار الشارع...
قبل لينزلوا من السيارة لطفي قال..
ردوا بالكم تقولوا لحد عن السبب الحقاني قولوا بسبب مشكله صارت بينه وبين واحد من جماعة الكتيبه وهو حطه في راسه..
شبحوا حسين وعبد القيوم لبعض بعدين قالوا بأصوات متقطعه..
"حاضر..تم.."
🍃🍃🍃🍃🍃
ونفس الكلام وصل لنساوين حوش الواعر لكن ماوصلش غرفه الابصيغه خفيفه بعض الشي..
طوبى:مشكله وحتنحل بإذن الله هكي قال حسين..
غرفه ودموعها في عيونها:لكن عبد الرؤوف ماكانش عنده مشاكل مع حد!
مطيره؛من قالك!؟ هو!؟..راهو يابنتي مش كل شي يقولوه الرجاله لنساوينهم..
طوبى:صح..بعدين ياما صارت مع ناس تانيه مشاكل زي وبالتفاهم انحلت..
غرفه بنبرة باكيه؛باهي علاش مش من الأول !؟
مطيره؛خلاص توا صار اللي صار..انتي معاش تحرقي روحك راك حامل..حسين قالي راجلك وصى عليك..
حطت غرفه يدها ع فمها وقعدت تبكي..
قعمزت جنبها طوبى وضمتها لحضنها من غير ماتتكلم..
ومطيره تشوفلها بحزن وهي تدعي:ياربي فرج...
🍃وبرا..
كانت فايزة مع الباقي مقعمزين في الصالون..
فايزة بضيق:قلبي واجعني ع عمي لطفي بالذات..
فردوس بألم؛هدا اللي مخوفني بوي خلاص معاش يقدر يتحمل..
اريج بقلق:بالله عليكم معاش تقولوا هكي..حني معاه يقوى بينا حني وبإذن الله ربي حيفرجها..
آلاء بتذمر:كل مانقولوا تزيد تتعقد..
اريج؛فلما استحكمت حلقاتها فرجت..مابعد الضيق الا الفرج..
صفيه بحزن:ايه والله مابعد الضيق الا الفرج ان شاء الله..
اميمه:باهي كيف بيصير توا بتروحوا بغرفه ولابتقعدوا معاها هني..
فردوس:من رأيي تروح معانا والحوش يتسكر كويس وخلاص..
صفيه؛شوفوها هي شن تبي قبل...
🍃وسألوا غرفه اللي رفضت تقعد في الحوش وعبد الرؤوف مش فيه..
لمتلها طوبى شويه من حوايجها وحاجاتها في شنطة صغيره..
ومطيره دارت ع الحوش كله وسكراته كويس...
بعدين طلعوا منه لحوش لطفي...
~~~~~~~
لطفي بضيق واضح ع وجهه؛كان تبي معاينه نرفعوها توا..
مطيره بضيق:لالاحالها باهي مش مستحقه..
هز راسه وقال:اني برا..
مطيره؛بتبات في المربوعه اللي برا!؟ لاوخيي خش داخل..
لطفي:بنقعمز شويه بعدين خش..
وهي تتفحص في ملامح وجهه بقلق قالت؛كان هكي باهي..
لف ومشي طلع وهي تشوفله بحزن..
والدموع فروا من عيونها غصب عنها..
واجعها ومقطع قلبها حال خوها وحظه وحظ بناته..
وزايد خوفها عليه وقلقها اكثر من الأول..
مشت بتشوف غرفه شن صار فيها..
خشت لدار المعيشه..
لقتها راقده وحواليها خواتها..
فردوس بقلق؛شن حال بوي؟
مطيره؛شن بيكون حاله كان الله في عونه..
طوبى واثر الدموع واضح في عيونها؛وينه؟
مطيره قعمزت وهي تقول؛قال بنقعمز برا شويه..
هزت راسها بعدين ناضت وهي تقول؛خل بنمشي نبدل حوايجي ونجي..
ومشت طلعت من حداهم..
وخلتهم الزوز يشوفوا بألم لغرفه كيف راقده وملامح الحزن باينه ع وجهها..
🍃وهي مشت خشت للدار..
لقت البنات راقدات في الأسرة وكل وحده لاهيه في تليفونها..
اريج تكلم في نضال..
وآلاء دور ع دعاء تنزله في بوست..
ماكلمتهمش قعدت تسمع في اريج وهي طلع في حوايج ليها من الدولاب..
اريج:خايفه يديروله حاجه..
"لالا ع كلام المهدي مش حيديروله شي راهم حاطينه في مكان كويس ماقالش عمي؟"
اريج:كيف مكان كويس مافهمتش؟
ركزت معاها حتى آلاء وهي تسمع فيها..
"يعني مش حاطينه في الحبس حاجزينه في المقر وحاطينه في دار فيها كل شي"
اريج شبحت لطوبى وقالت؛معناها موصيين عليه!
"ايه اني نتوقع انهم يبوا منه يدير حاجه بعدين يطلقوه"
اريج:زي شني!؟
"يعطيهم معلومات مثلا حاجه زي هكي"
قعدت تفكر اريج وهي ساكته..
وطوبى وهي شاده حوايجها في يدها مشت قعمزت ع سرير آلاء والزوز قعدوا يستنوا فيها تكمل مكالمتها معاه..
هي فهمت عليهم واستعجلت انهاء المكالمه..
قعمزت وهي تقوللهم..
اريج؛نضال قالي المهدي سأل جماعه يعرفهم عن اللي صار لعبد الرؤوف وقاله ان الوضع معقد وصعب..
طوبى بخوف:كيف معقد وصعب؟
اريج:اللي فهمته منه ان في حاجه يبوها منه وشدوه ع خاطرها معلومات ولامش عارفه ماندري..المهم انهم مخليينه في دار في المقر ومهتمين بيه..
آلاء:مرات في حد موصي عليه..
اريج بقلق؛مرات..تعرفوا كلام نضال زاد خوفني..
طوبى وهي تفكر قالت:يستر الله...بعدين ناضت ومشت طلعت من حداهم للحمام..
آلاء شافت لأريج وقالت؛كيف تصالحتوا؟
ابتسمت اريج وسط ملامح القلق الباديه ع وجهها وقالت..
بعد ماصار اللي صار من خوفي اتصلت بيه كنت نبي حد يطمني وهو طول رد عليا وقعد يطمن فيا..
آلاء ابتسمت ابتسامه خفيفه فيها مسحت حزن وتفكرت لما كانوا متزاعلين هي ومهند وبعد مرضة سدرة كلماته طول لنفس السبب اللي كلمت اريج ع خاطره نضال وطمنها..
عطت اختها ظهرها ورقدت وغطت راسها..
واريج فهمتها ولت تمددت ع السرير وحطت ع رقم نضال بتكلمه..بس تراجعت بعدين ع خاطر اختها...
🍃وفي من قاعده تراجي في اتصال من اللي قلبها معلق بيه..
بعد اللي داره امس في الليل خدي ماقعد من عقلها وخلاها يومها كله تفكر فيه..خلاها تراجي امتى يليل الليل..
بش يتصل بيها ويدير مادار الليله اللي قبلها..
وقعدت تراجي..وتراجي..وتراجي...
لين آيست من اتصاله..
حطت السماعات في وذانها وشغلت الاغنيه اللي غنهالها
ونزلت راسها ع المخده وهي تسمع فيها ودموعها تنزل..
🍃🍃🍃🍃
طلعت من الحمام..
ومشت طول للشماعه خدت الملايه..وتوجهت للصاله..
لبستها..بعدين اسقبلت القبله..
ورفعت ايديها قالت...
الله أكبر..
سرحت فيها...كلمة ياما رددتها في كل صلاة مرات ومرات..
بس ماحستهاش حق الا توا...
الله أكبر..
من كل شي قاعده تمري بيه ياطوبى..
الله اكبر من كل شده ومحنه وهم مهما كان كبير..
الله اكبر من كل بني آدم طاغي متجبر داير في خلق الله مايبي وناسي ان في رب يشوف ويسجل ويحاسب ع كل صغيره وكبيره..وعقابه شديد...
وهي تصلي كان تفكر في هالمعاني وتحس بيها..
وتحس ان تفكيرها في معنى..
الله اكبر..
مواساة ربانيه..قاعده تخفف عنها وتقويها وتعطيها أمل..
كملت الصلاة...
وبعد ماكملت قعدت مقعمزة في مصلاها وهي تتفكر في كلام نجاح..
وفي نصائحها هي لنجاح...
وقالت في نفسها..
"شن مازال تراجي يصير اكثر من هكي ياطوبى بش تفهمي الرسايل اللي يبعتلك فيهم ربي !؟"
قامت عيونها وقعدت دور بيهم لين جو ع مصحف محطوط ع رف لاصق في الحيط..
ناضت ومشتله خداته من ع الرف..
ومشت قعمزت حدا الروشن..
وفتحت المصحف ع سورة الفاتحه..
وقعدت تقرا..
لين خشت ع سورة البقرة..
ولما بدت تقرا فيها..بدت الافكار السودا تجيها..
ومش عارفه علاش توا خطر عليها الجالي...
وبدت تجي قدامها مواقفه الاخيره معاها ونفوره منها واعراضه عنها..
ضاق صدرها لين انكتم ع نفسها..ووقفت قرايه..
قعدت تشوف للصفحه المصحف قدامها بنظرات ضيق لين نزلوا دموعها..
سكراته وحطاته ع تركينه..
بعدين ناضت ومشت تشوف للدار اللي فيها البنات.
خشتلها..
لقتهم راقدات..
شافت للزيانه لقت تليفونها محطوط عليها...
خداته وولت طلعت تاني من الدار وسكرت الباب بهدوء..
بعدين مشت بتولي للصاله..
بس غيرت طريقها ومشت للكوجينه بش تشوف بوها من الروشن..
وقفت وراه وشافت برا..
لقت بوها مقعمز في نفس المكان..
مربع ايديه وهو سرحان..
ياوجع قلبها وين تشوفه بهالحاله..
وين تشوفه تبدا متمنيه لو دير المستحيل بش طلعه منها..
بس هي مابيدها شي غير انها تواسيه هالمره..
لكن كيف!؟
فكرت شويه لعند ماوصلت لشي وقررت تنفذه..
🍃وهو برا قاعد يحاول يبعد عن راسه فكرة ان اللي صار في عبد الرؤوف وراه ولده مختار..
لأن لو كان هكي فعلا ممكن ع خاطر بنته يجبر نفسه ع التنازل عن موقفه ويدير اللي يبيه بش يطلعه..
والموت..اهون ع لطفي من انه يدير حاجه زي هادي..
"بابا"
قام عيونها وجو ع مق في يدها تفوح منه ريحة البابنوج..
وين شم الريحه..بعدين شافلها هي كيف تشوفله بإبتسامه مطمئنه..
حس براحه...
مدتهاله وقالت:درت فيها شويه عسل..
خداها منه وقال:صحيتي..
طوبى بإبتسامه؛عادي نقعمز..
ضحك وقال؛قعمزي..
قعمزت جنبه وقال؛تعرف ضحكتك تهبل..
ضحك تاني وقال؛عارف قالوهالي هلبه..
طوبى:حي طلع جكتوري الحاج لطفي!..
ضحك تاني وطبطب ع ظهرها..
وهي تشوفله بإبتسامه..
بعدين هدا ضحك وشرب من البابونج..
سكتوا الزوز..
وهي تشوفله كيف يشرب ويفكر..
قالت؛اشتدي ياأزمة تنفرجي..
ابتسم وقال؛قد آذن ليلك بالبلج..
وهي قالت؛وظلام الليل له سرج..
شبحلها وقال:حتى يغشاه ابو السرج..
طوبى:ماتفكرش هلبه بابا سلم الأمر لله وقول حسبي الله ونعم الوكيل..
تنهد من قلبه وقال:حسبي الله ونعم الوكيل..
طوبى:وحني معاك بابا باهي..ماتكمدش في قلبك اللي تحس بيه فضفض بيه..لعمتي لجدي..ليا اني..اني مازال صغيره نتحمل معاك ونقويك..
كلامها خلا الدموع تتجمع في عيون بوها..
نظرات بوها ليها وقتها اول مرة تشوفهم حستهم ياما يقولوا..
وكانت تبيه كلام عيونه يقوله لسانه بالك يطلع اللي كامده..
شويه وابتسم وقاللها:بابا تبي تريحيني؟
طوبى:اكيد بابا..
مسح ع راسها وقال؛تردي بالك ع روحك وع حوشك
وراجلك وتنجحي في قرايتك انتي هكي يابنتي تريحيني وبالزايد..
🍃ياه ياعم لطفي شن درت فيها بكلامك هدا..زدت ثقلت حملها اكثر واكثر..وزدت كبرت احساسها بالمسؤوليه اتجاهك انت بالدرجه الأولى 🍃
اغتصبت ابتسامه ع وجهها وقالت..حاضر..
لطفي:خلاص نوضي خشي اني نكمل طاسه الفليه ونخش..
ناضت وهي تقول..
باهي..تصبح ع خير بابا..
لطفي؛قدامك كل خير بنتي..
ومشت من حداه وهي حاسه برغبة شديده في البكاء..
اما هو بعد ماخشت تنهد بألم..وقعد يشرب في البابونج..
🍃خشت للصاله..وولت لمكانها اللي كانت مقعمزة فيه..
حطت جنبها مخده انكت عليها بمرفقها..
وقامت تليفونها..خشت ع الفيس..
وقعدت تقلب في المنشورات لين جي قدامها منشور لراجلها فيه صور للمؤتمر..
كانت مكتوب فوقهم كلام عن المؤتمر وابرز الحضور فيه..
خشت شافت الصور متاعه..
وقعدت تمشي صورة ورا التانيه..
قبل كم شهر لو شافت هالصور كانت نظراتها ليهم حتكون نظرات اعجاب وفخر..
بس توا هي مش حاسه بولا حاجه..وعيونها فاضيات تماما..
وين شافت للصورة الاخيره اللي كانت جماعيه..
لقت فيها نجاه..
حطت عليها..وقربتها..
وشافت نجاة كيف واقفه بعيده عنه وهي مبتسمه..
الصورة كانت طبيعيه مافيها اي شي مثير للشك..
بس شوفتها ليهم مع بعض تخلي مجموعه مشاعر سيئة تتحرك مع بعض في لحظه..
طلعت من المنشور من غير ماتتفاعل معاه..
تعداته وقعدت تقلب في مناشير تانيه غيره..
لين جي قدامها منشور لنجاة..
كان عبارة عن صورة لوحده راقده ودموعها ع خدها..
وفوق الصورة مكتوب..
"وكأن للذكريات قلباً لا ينبض إلا ليلاً ."
ركزت في الكلام وفي الصورة...
بعدين خشت شافت التعليقات..
مالقتش في تعليق مهم توقف عنده غير تعليق واحد كان لأختها صابرين..
"الأنثى تستحق رجلاً يُنافس أباها في تدليلها، وليس رجلاً يُنافس الحياة في تذليلها."
ضيقت عيونها وهي تفكر في القصد من ورا تعليق صابرين..
علاش تعلق لأختها في تعليق زي هدا ومن تقصد بيه!؟
الخوف اللي زاد في قلبها..
خلاها تطلع من المنشور وتتعداه بسرعه لغيره..
وكان بعده ع طول منشور لأميمه..
"ارجعي..
لقراءة سورة البقرة..والله بفضل بركتها سيصلح الله كل شيء
حتى ماأفسده الآخرون في قلبك،حتى ماأفسدته أنت"
رساله واضحه مش محتاجه تفكير بش تنعرف انها رساله الهيه مباشرة جتها..
ارجعي..ارجعي..
ضروري جدا ترجعي..
لأن بركة السورة حدير فيك هلبه حاجات..وممكن تكون سبب لحدوث نقطة تحول كبيره في حياتك..
طول طوبى استجابت..
طلعت من الفيس وحطت التليفون جنبها..
وشافت المصحف..
خداته وفتحاته وين ماوقفت وبدت تقرا..
ورجعت هجمت عليها نفس الافكار..وهي قعدت تحارب فيها بكل آية تقراها..لين لقت روحها خاشعه في القراءة..
ونفسيتها بدت ترتاح...لين كملتها...
بعد ماكلمتها..سكرت المصحف...وغمضت عيونها ومن قلبها دعت...
"ياحي ياقيوم برحمتك أستغيث..اصلح لي شأني كله ولاتكلني إلى نفسي طرفة عين"
🍃🍃🍃🍃🍃
وتعدي هالليله الصعبه..
الصعبه جدا ع عبد الرؤوف اللي مارقدش فيه ولا لحظه وهو يفكر بش يوصل للي دار فيه هكي ويعرف السبب..
وع قد مافكر هديكا الليله ماخطرش على باله اللي خطر ع بال نسيبه نهائيا...
🍃🍃🍃🍃
ويطل اليوم التاني..
وحال غرفه في اليوم اللي بعده كان اصعب..
بكت بكي لدرجة انها تعبت ورفعوها طول لمصحة القدس..
وغادي شدوها عندهم لأن وضعها استدعى هالشي..
🍃الدكتورة؛الحمد لله وضع الاجنه كويس بس لازم تقعد ع الاقل ثلاته ايام بش نطمنوا عليها..
طوبى وهي ترشف وتمسح في دموعها:هي يادكتوره حالها باهي!؟
الدكتورة؛حبيبتي اطمني خالها باهي النزيف ماكانش قوي..
اميمه ودموعها في عيونها:باهي توا ماتبي شي لحالتها؟
الدكتورة:كله متوفر عندنا وحني هني قايمين بالواجب واكثر..
اميمه:ربي يعاونكم..
الدكتورة:شكرا..في مرافق يقعد معاها؟
كيف جت طوبى بتتكلم سبقتها اميمه وقالت:اني قاعده معاها..
:تمام..ان شاء الله لاباس عليها..
اميمه؛لايوريك باس..
ومشت الدكتورة من حداهم..
اميمه مشت لطوبى وقالت؛انزلي روحي معاهم..
طوبى بضيق:نبي نقعد معاها..
اميمه بحزم؛قتلك انزلي روحي..وجهك اصفر وباين عليك تاعبه..
هي خافت وقالت:زعمه حتى اني تصيرلي حاجه؟
اميمه؛لو قعدتي هني لاقدر الله تصيرلك حاجه وحني مش ناقصين انزلي طمني عمي وروحي معاهم اني قاعده معاها..
طوبى بإستسلام؛حاضر..لو صار شي خبريني طول بالله عليك..
اميمه؛ان شاء الله مايصير شي..هي بري طوبى..
التفتت طوبى للكراسي وهي تمسح في دموعها..
ومشت خدت شنطه..
لما جت بتمشي شبحت لأميمه..
اميمه فهمت عليها وقالت؛ماتخافيش طوبى في عيوني..
هزت راسها ومشت..
واميمه معاها بعيونها..تشوف فيها كيف تمشي..
كانت خطواتها ثقيله بعض الشي..
اميمه كانت عارفه ان طوبى تعاني من هلبه حاجات ماتبيش تحكي عنهم وهما معروفين جدا بالنسبه ليها..اصلا هي عرفتهم قبلها..
تنهدت بخوف وقالت في نفسها..
"سترك يارب من اللي جاي"
🍃🍃🍃🍃🍃
"مستحيل نكد العيله هادي مايتمش"
مغليه؛شن تقول انت!؟ المشاكل تصير للناس كلها مني المرتاح قولي؟!
"يام فاهم وعارف..بس نكد حوش الواعر مالاش نهايه والمشكله كله يولي عليا اني"
مغليه؛كيف؟
"شن كيف يام..غير شن بنحكي ونقول توا بس..ع العموم خلاص اني مروح غدوة..سلام"
مغليه بضيق؛بالسلامه..
ونزلت التليفون وسكرت..
كان حداها محمد حفيدها يشرب في القهوة ونسرين دير في العصيده وهي تشوفلها قالت؛شن قالك؟
مغليه بضيق؛طايرتله من الوضع..
نسرين؛كيف طايرتله هادي!؟..
مغليه؛صراحه عنده الحق هي من غير شي منكده وتوا بتزيد تنكد عليه عيشته..هو ماكثروا سفراته الا هروب من وضعه..
محمد؛بدل مايقعد معاها يهرب منها.!؟
شبحوله الزوز..
محمد:ماتشبحوليش هكي..اللي نعرفه واللي شفت بوي بعيني داره ان فوق مرضه وتعبه قعد مع امي وعاناها وقعد يدور بيها من بلاد لبلاد ورعاها لدرجة اني نفسي ماتوقعتهاش..لاقدر الله كان طوبى مرضت بمرض امي عمي يطلقها طول..
مغليه بحده؛ انت من وليت بش تقيم عمك وتتكلم عليه هكي!؟انت اصلا كيف تدوي في حاجات اكبر منك من وين متعلمها قلة الأدب هادي!؟
نسرين تلافيا لحدوث مشكله ممكن تكبر وتوصل لمواصيل معاش منها رجوع قالت؛محمد ولدي نوض اطلع..
ناض محمد وقال وهو يشوف لحناه بحده؛حتي اني طالع..
ولف ومشي طلع من الكوجينه وهو معصب..
مغليه؛ريتي ريتي!... تقول حني اللي قتلنا امه..
نسرين برجاء؛بالله عليك يما وطي صوتك وانهي الموضوع خلوا اليوم يعدي ع خير..
مغليه وهي معصبه؛اني ماشيه نقعد في داري مش طالعه منها بكل..ومشت وهي تقول..عقابها نقعد ملطشه للمفرخ..
وطلعت من الكوجينه..
تأففت نسرين بضيق وقالت..
لاحول ولاقوة الا بالله....
ورجعت تكمل تجهيز الفطور...
🍃🍃🍃🍃🍃
"قعدت معاها اميمه"
فردوس؛وعلاش تقعد معاها اميمه اني نمشي نقعد معاها..
طوبى بشي من التعب؛خلاص كلميها وتفاهمي انتي وياها..
مطيره وهي تتفحص في وجه طوبى:انتي شكلك رعشتي وجهك اصفر زي الليمه..بري سلم بنتي خشي تريحي..
وافقت طول ومشت للدار..
وعيون فردوس معاها..
مطيره بألم وتوسل؛ياربي الطف بينا يارب ارفع علينا..
شبحتلها بحزن وقالت؛آمين...
🍃🍃🍃🍃🍃
في المصحه..
اميمه خلت غرفه في الجناح متاع راقده..
ومشت طلعت دور ع الدكتورة المسؤوله عن حالتها بش تزيد تفهم منها اكثر..
وهي ماشيه..
شافت شخص تفاجئت بيه هلبه..
وهو لما شافها استغرب..
قدملها وهي مشتله..
وصلت فيه وقالت؛صباح الخير دكتور..
هو قال؛صباح الخير..شن لاحقتيني لهني بش تحصلي التزكيه؟!
هي ابتسمت بملل وقالت؛ومن قال مش انت اللي لاحقني لهني بش تقيمني تقييم يرفع المعنويات زي عادتك..
ضحك نص ضحكه وقال؛جديات شن ديري هني!؟؟
اختفت ابتسامتها وقالت بضيق:قريبتي راقده هني؟
هو قال:في اما قسم؟
اميمه؛نساء وولاده..
هو قال:اها..عندي زملاء غادي علاقتي بيهم قويه تو نوصي عليها..
هي قالت؛شكرا دكتور بس عندنا من متوصي بينا هني معارفنا اكثر من معارفك..
رفع حواجبه وقال؛افف..زي مني ترى قصدك دكتور قصي!؟
اميمه؛ودكتور اياد..
قال بشي من الدهشه؛اياد بن زايد؟
اميمه؛ايه جارنا القديم وبينا زي القرابه..وغيره مش غير هو بس..المصحه هادي في المنطقه اللي نسكن فيها دكتور.
هو قال؛قولي هكي من الأول حتوفري عليا هلبه حاجات القدام..
هي شبحتله بإستغراب..
ابتسم ع جنب وقال؛بعدين تفهمي..
وفجأة...تلاشت ابتسامته لما ثبت نظره ع شي وراها..
هي استغربت اللي صارله..والتفتت..
شافت طبيبه شاده في يدها ملف..
وواقفه تشبحله هو بنظرات حاده..
بعدين غيرت نظرها عنه ومشت في طريق بعيد عنهم.
زادت اميمه استغربت وشبحتله هو..
وهو مازال بعيونه يتبع في اللي مشت ويقول..
لاباس ع قريبتك..
ومشي من نفس الطريق اللي مشت منها الدكتورة..
مط اميمه شواربها استغرابا للأسفل..
بعدين مشت كملت طريقها...
🍃🍃🍃🍃🍃
"اني سألت جماعة نعرفهم وقالولي ان مشكلته مش زي ماقالوا لحسين"
عقد عبد القيوم حواجبه وقال؛شن قالولك..
المهدي وهو ضام ايديه لبعض قال..
داروا ضده مذكرة اعتقال بعد مااكتشفوا انه مختلش من الدوله مبلغ يوصلي الاجمالي متاعه 5مليون و650 الف دينار ليبي من ميزانيه وزارة الداخليه..
عبد القيوم قعد ساكت ماعلقش..
المهدي بعد ايديه عن بعض وهو يتكلم بيهم؛شوف اني مش مصدق ومستبعد شي زي هدا ع عبد الرؤوف بس في شي يدور في عقلي من امس نفكر فيه..
عبد القيوم؛شني؟
المهدي؛في حد مدبر مكيده لعبد الرؤوف اما انه يبي يضغط عليه او ينتقم منه..
عبد القيوم وهو يفكر في كلام المهدي:وارد..
المهدي؛اني حنقعد ورا الموضوع واللي نقدر عليه بنديره بس ماندرقش عليك الموضوع كبير هلبه يبي حد ليه ثقله يدخل فيه..نقصد نسيبه..
عبد القيوم؛هو امس وصى حسين مايعطوش علم لاخته..
المهدي:توقعت..
عبد القيوم؛مهدي الدوة اللي قتلي عليها توا لمن حكيتها قبلي؟
المهدي:حكيت لنضال شويه بس السبب الحقاني ماقلتش هكي..
عبد القيوم؛كويس بكل..وماتقولش لحد غيري عارف الموضوع فيه سمعه وحرام تخرب سمعة الراجل وهو مظلوم عارف الناس ماليها الا الظاهر..
المهدي؛واني هدا علاش جيت حكيتلك..
تنهد عبد القيوم وقال؛ان شاء الله مايطولش ويطلع بسرعه قبل مايطلع الموضوع...
المهدي:إن شاء الله...
🍃ومن شقة عبد القيوم...
لحوش الصيد..
اللي جتهم بنت العروسه اليوم لأول مرة تتغدا عنهم..
نجمه وهي تشوفلها بإبتسامه فرح كيف تبان نايره ومرتاحه؛وروحتي طول لشقتك ولالحوش شيابينك..
نجاح؛لا لحوش شيابيني كانوا ملتمين غادي الحموات والسلاف ومدايرين عشي..
نجمه؛الله يبارك.
نجاح؛وعطوني الهدايا متاعي تعرفي يام كلهم دايرينلي هدايا ..
عواطف وهي تشوف للبس اختها والذهب اللي لابساته والحنه اللي في ايديها والزينه اللي حاطتها قالت..
عطيتهم انتي هداياهم؟
نجاح بإبتسامه؛ايه اللي درتهولهم واللي جبناهم من تونس وحتى انتم جبتلكم..
نجمه بضحكه؛تي غير ليش بس مكلفين ع ارواحكم..
نجاح وهي تشوف لأمها؛شن تقولي يام مافي شي من قيمتكم..
ناضت عواطف وهي تقول؛باهي نوضي وريني شن خدتيلي..
نجاح ناضت وقالت؛باهي..
نجمه؛خل اني نوض ندير فطور..
نجاخ؛لايام فاطرين الحمد لله ديري قهوه بس حفيظ ماشربش قهوة الصبح..
نجمه بإبتسامه؛باهي..
ومشت وهي فرحانه للكوجينه..
اما عواطف خدت شنطة اختها بعدين خدتها من يدها وقالت..
تعالي..
ومشوا الزوز لدارهم..
🍃🍃🍃🍃🍃
"بنديرلك حظر لو عاودتيها"
صابرين بضحكه: جت منك ياجامع لأنك مدرهتيلي كبدي..
نجاة برفعة حاجب؛ع اساس اني بس اللي ندره في الكبد..!
تجاهلتها صابرين وهي توتي في الفطور..
ونجاة من كثر ماأستفزتها قالت:يكون في علمك يتصل بيا هلبه وكل يوم يروح وراي لهني واني ولا عبرته..
صابرين شبحتلها بإبتسامه ساخره وقالت؛والله ماك مطوله بيهم طروحك هادم اختي ونعرفك..
نجاة:اشبحيلي هني..
صابرين؛هاني نشبحلك قولي..
بتحدي قالت؛كان ماخليتاش يندم ومن ندمه يعلن زواجنا ويثبته في المحكمه مانبداش نجاة المعلول..
صابرين:في حالتين بس تصير الحاجه هادي..
رفعت يدها وهي مسكرتها.بعدين طلعت الابهام وقالت..
لو سيباته طوبى..
وطلعت السبابه وقالت..
او ماتت طوبى.. وادعي ربي انها تكون التانيه..
نجاة ضيقت عيونها وقالت؛تو نوريك ياصابرين انه هو اللي حيسيبها ع خاطري تو تشوفي..
صابرين؛تمام تو نشوفوا كلام مني فينا حيطلع صح..
وابتسمت استفزاز بعدين قعدت تنادي.
حمزة..جوري..ميدو تعالوا افطروا عيوناتي.
ونجاه تشوفلها من فوق لتحت بآمتعاض..
🍃🍃🍃🍃🍃
"تخيلتك بيه القفطان هدا يطلع عليك طلعة ماصارتش"
عواطف؛صحيتي نجوحه..
نجاح بإبتسامه؛سلمك عطوفه..
عواطف؛باهي خليني من الهدايا واحكيلي شن جوكم مع بعض..
نجاح ردت رد مقتضب وهي تقول؛عادي..
عواطف؛باهي احكيلي شن درتوا في شهر العسل كيف كان معاك هو؟
نجاح؛عادي عواطف مافيشي حاجه زايده زي خوتك هكي..
عواطف بإبتسامه متهكمه؛قصدك زي محي اللي رفع خديج للمالديف..
نجاح؛ايه حقه شفت الصور اللي منزلتهم ع الفيس شن صاير في الدنيا!؟
عواطف؛يدلع فيها ياحنه..كلا مرت خوك هادي رغم اني مانطيقهاش لكن عجبتني كيف قعدت ورا خوك لين حطاته تحت باطها وولى مش قادر يعيش من غيرها..
نجاح؛يللا ربي يهني..
عواطف؛باهي خلينا منهم وهدرزيلي ع عبد الحفيظ كيف يعامل فيك؟
نجاح؛باهي معاملته كويسه..
عواطف؛خيرك تدوي هكي وين نسألك عنه خايفتيني نحسدك!؟
نجاح بصدمه؛لا والله العظيم ماهكي ياعواطف الله..بس مافي شي نحكيه صدقيني اصلا اغلب السفره مشت كلام ع ولده وبس..
عواطف؛معقوله!؟
نجاح؛علاش هو ع اي اساس واخدني ياعواطف مش ع خاطر ولده..هو كان يبي ياخد راهو جابها صغيره بش يتمتع بحياته لكن هو يبي مراة تعاني ولده هدا علاش اختارني اني..
عواطف؛وانتي عارفه ورضيتي بيه..
نجاح؛لأنه كويس ياعواطف مش حيظلمني معاه..
عواطف تنهدت وقالت؛الله غالب هدا حظنا..
نجاح:الحمد لله ع كل حال..
🍃🍃🍃🍃🍃
وتعدي الساعات..
لبعد آذان العصر..
بدوا جيران الشارع يجوا لحوش لطفي..
ومافي حد غاب منهم ماعدا حوش واحد..
حوش محمد شنيبه...
واكثر من ضايقه الموقف هدا طوبى...
🍃نجاح بحزن؛ياروحي عليها ربي يفرج ان شاء الله ..
طوبى بحزن؛يارب...
نجاح شدت ع يد طوبى بيدها اللي مغطيتها بالقفازات وقالت؛خليك قويه باهي وماتنسيش اللي قلته قبل..
ابتسمت طوبى ابتسامه خفيفه وقالت؛ان شاء الله..
وبعيد عن زحمة الناس ودوشتهم..
🍃في الكوجينه..
اريج وهي معصبه؛شن قصدهم بيها حركتهم هادي!
آلاء؛اصبري مازال الوقت مرات يخشوا في أي لحظه..
اريج؛امتى ان شاء الله والدنيا ليلت!؟ اصلا هما مفروض جو قبل الناس واستقبلوهم معانا..
آلاء:باهي اسمعي ماتتعاركيش انتي ونضال ع خاطرهم الراجل من بكري هني ماشي جاي مع حسين وهو يرفع في الضيافه..
تأففت اريج بعصبيه وقعدت ساكته..
🍃🍃🍃🍃
ويآذن المغرب..
وحوش لطفي الواعر يفضى الرجاله والنساوين..
وحسين يطلع هو عمه ومعاهم فردوس بش يرفعوها لغرفه في المصحه وتبدل ع اميمه..
وفي الحوش..
🍃طوبى خشت ع اريج الدار وقالتلها..
ماقالكش نضال علاش ماليه ماجوش؟
اريج بضيق؛لا وماسألتاش..انتي اتصلي بنسرين وشوفيهم..
عقدت طوبى حواجبها بعصبيه وقالت..
مش مكلمه حد..
ومشت طلعت من حداها..
واريج زادت ضايقت اكثر وقاعده تمنع في نفسها بقوة انها تسأل نضال عنهم...
🍃ونضال..
نسرين بضيق؛والله متحشمه ماقدرتش نمشي بروحي ماعرفتش بشن بنرد كان سألوني ع امك واختك..
نضال بغضب:وهما علاش يديروا في الحركات البايخه هادي ويحطوا فينا في مواقف زي الزفت..
نسرين؛بعد اخر مشكله صارت امك واختك حالفين ع حياش عيت الواعر..
توسعوا عيونه بصدمه وقال:نعم!..
نسرين بخوف:غير بالشويه نضال..
مشي طلع من حداها وهو يقول بعصبيه:شن العبيتر اللي يديرولي في أمه هدا لوين يبوا يوصلوا..
ونسرين ماشيه وراه وهي تنادي بخوف؛نضال!..
خش الصاله ع امه ومشي سكر الشاشه..
هي انصدمت وقعدت تشبحله بعدم فهم..
اما هو شبحلها وقال.بكل جديه وغضب:تعرفي يام..قسما بربي لو فرقتوا بيني وبين اريج بفعايلكم هادي نلحق عمر ومعاش تشوفولي وجه لين نموت..
مغليه بفجعه؛شن تقول انت!؟.
هو قال:اللي سمعتيه يام..
ومشي بيطلع ومن غضبه دف نسرين من قدام الباب وطلع..
مغليه وهي مصدومه؛خيره هدا شن جاه!..
نسرين حط يدها ع ذراعها وقالت..من فعايلكم يام من فعايلكم شن بيصير كان مشيتي بينتي وجهك!.
مغليه برفعة حاجب؛والله تبيني نمشي ونشوف وجه صفيه الشلافطيه والجربه بنتها بعد اللي صار!؟
نسرين؛شن دخلك فيهم انتي..انتي ماشيه لنساباتك يام عيب والله عيب يام..
عكرشت وجهها بنرفزة وناضت ومشت للشاشه بش تفتحها..
اما نسرين تأففت بغضب ومشت طلعت وخلتها...
🍃🍃🍃🍃🍃
"هي بالسلامه تصبحوا ع خير"
نجمه وعواطف:قدامك كل خير بنتي..
ومشت نجاح ومعاها اشرف يسقد فيها وهو يقول؛مرات نطب عليك الايام.الجايه..
نجاح بإبتسامه؛مرحبتين ييك في أي وقت..
ابتسم وهو ساكت..
طلعت نجاح من الحوش..وهو وراها..
حط شنطتها في السيارة وقال؛تصبح ع خير بونسيب..
عبد الحفيظ بإبتسامه؛تصبح ع خير..
سكر اشرف الباب..
وعبد الحفيظ تحرك طول...
شبح لنجاح بإبتسامه وقال:استاحشتك..
هي ابتسمت بخجل وشافت القدام..
شد يدها فجأه..وهي ضحكت..
وهو قعد مبتسم وهو يسوق..
🍃اما اشرف بعد مامشت سيارة عبد الحفيظ..
رفع عيونه لشقة فايزة ابتسم ابتسامه خفيفه بعدين مشي خش للحوش...
🍃🍃🍃🍃
في المقر المحجوز فيه عبد الرؤوف..
كان جايه واحد من اصدقائه امر في الكتيبه اللي كان فيها..
وعطاه معلومات عرفها بعد ماتحرى كويس عن الموضوع..
:الموضوع وراه ناس مش واضحه..
عبد الرؤوف بحيره؛اني مش عارف من هو اللي ضاره لدرجة يدير فيا هكي انتم تعرفوني اني ماعنديش عداوات مع حد ومن لما سيبت معاش ليا علاقه لا بالكتايب ولابالوزارة نفسها..
:حتى اني احترت زيك تعرف لو نقولك ع الناس اللي كلمتني بعد عرفوا باللي صار معاك كلهم قالولي شن مايبي قوللنا وحني نفدوا..
عبد الرؤوف رفع يده وقال؛لالا دوة زي هادي مانبيش..نزل يده وقال..اللي دار فيا هكي تو يبان كان يبي مني شي تو يطلع بروحه..
؛وحني قاعدين ورا الموضوع لين نعرفوا من ورا الليله دي كلها ع قولة المصاروة..اسمع..الزيارة تو بيمنعوها عليك تمام لكن اني بنقعد نمشي عليك ونجي..
عبد الرؤوف؛خلاص خليك بيني وبين ماليا..قصدي نساباتي..
بنوصلك بواحد اسمه حسين الواعر اللي ماسك المقر يعرفه تو يدلك عليه تمام..
؛ان شاء الله..ضرب ركبة عبد الرؤوف وحط يده عليها وقال..خليك اسد زي مانعرفك..
ابتسم وقال:مادورشي..
🍃🍃🍃🍃🍃
وفي المصحه..
كانت غرفه مقعمزه ع السرير وهي سرحانه في الفراغ ودموعها تنزل بصمت..
وفردوس طلعلها في حوايج بش تغيرلها وهي تهدرز..
قالوا مايطولش بالكثير اسبوع ويطلع..
وغرفه ساكته ولاكلمه..
التفتت شبحتلها بحزن بعدين قالت..هي خل نبدلك..
شبحتلها بصمت لقتها جايتها..
وقعدت تغيرلها فردوس..وهي اللي تحرك فيها..
غرفه كانت حاسه روحها منهارة تماما وفاقده الرغبه في كل شي..
بعد مالبستها قالت..شويه وبيجبوا العشي وبتاكلي ياغرفه راك تنسي عندك روحين داخل..
شافت لبطنها وحطت يدها عليها وهي تبكي..
وفردوس جتها وضمتها وقعدت تبوس في راسها..
🍃وشويه وجابوا العشي..
وكلت غرفه غصب عنها ع خاطر اجنتها...
وبعد ماتعشت..اتكت في سريرها وحداها فردوس حاطه يدها ع راسها وتقرا عليها...
لين رقدت..
🍃🍃🍃🍃🍃
وفي جنان حوش جدهم علي الواعر..
لطفي؛نبدا مانفهمش يابوي لو ماكانش هو وراها..
علي وهو عاقد حواجبه قال:لشن يبي يوصل يعني! يبيك تمشيله وتطلب منه يساعد عبد الرؤوف!؟.
لطفي؛قول يذلني..يبي يذلني تعرف لو مشيتله وطلبت منه يطلعه شن بيقول وشن بيدير..
علي هز راسه بضيق وهو ساكت..
بانت في عيون لطفي لمعة الدمعه وهو يقول..
معقوله يابوي..معقوله الواحد يجيب من صلبه عدوه!؟..
شبحله وقال؛ناسي خوك عبد المطلب شن دار في امك..ناسي كيف عذبها وقهرها ناسي كيف وصلت بيه انه يكيد لأمه مع حناه بش يخليني نطلقها!؟ امك لما عرفت قالتلي نفس الكلام اللي قلته انت توا..معقوله ياعلي عدوي يكون ولدي اللي حملت بيه تسعة شهور!؟
نزل لطفي عيونه للأرض ونظراتهم كلها ألم..
علي:ابتلاء ياولدي نزل بالانبياء قبلك فوض امرك لله وقوي روحك ع خاطر ع هالبنيات..
لطفي بألم؛واني شن كاسر ظهري غيرهم هالبنيات..
قالها والعبره خنقاته..حط يده ع فمه بش ماتطلعش وقعد منزل راسه ودموعه غلبوه..
بوه حط يده ورا رقبته وضمه لصدره وقال..ابكي ابكي...مافيها شي كان بكيت قدام بوك..ابكي..
🍃🍃🍃🍃🍃
وفي ظلمة الليل الدامس..
في الحوش اللي سكنت اصواته..
كانت صوتها الهامس يقرا في ايات قرآنيه..
وتعاود وتردد فيها وكأنها تقول لقلبها..
"اثبت قلب"
ماتخليش الابتلاءات والشدائد تنقص من ايمانك وتيأسك من رحمة المولى..
" وبشر الصابرين ○الذين إذا أصابتهم مصيبة قالوا إنا لله وإنا إليه راجعون○ أولئك عليهم صلوات من ربهم ورحمة وأولئك هم المهتدون"
🍃🍃🍃🍃🍃
وفي عالم تاني..
كان راجلها..شريك حياتها..رفيق دربها..نصها التاني..
يمارس في هوايته المفضله..ارضاء غروره...
وهو يبعت في مقطع صوتي لنفس الاغنيه لضرتها..
اللي لما استقبلت الرساله وفتحتها وسمعت المقطع ذاب قلبها..
وهو لما شاف انها استملت الرساله..رقد وهو مرتاح اللي مخططله قاعد يمشي زي مايبي..
🍃🍃🍃🍃🍃
تاني يوم...
الساعه 11:15صباحا..
في المصحه..
كانت فردوس تمشط في شعر غرفه..
بعد ماكلمت ضماته..
ولبستها الوشاح..
وساعدتها تقعمز..
فردوس:شويه تانيه جايه طوبى..
غرفه هز راسها وهي ساكته..
تنهدت فردوس ومشت قعمزت ع الكرسي بعدين قالت..
تبي نحطلك ع قناة معينه..
حركت غرفه راسها بالرفض..
هزت فردوس راسها بضيق وهي ساكته..
دق باب الحجره..
فردوس؛طوبى شكلها..خشي خشي..
انفتح الباب..
فردوس وهي تشوفله..بدت ع وجهها ملامح الصدمه..
اما غرفه كانت تشبح في الفراغ وهي ساكته..
غيرت عيونها للباب لما سمعاته قال..
"السلام عليكم"
ناضت فردوس وشبحت لغرفه وقالت؛اني قاعده برا..
ومشت طلعت من حداه من غير ماتشوفله وسكرت الباب..
هو تنهد..
بعدين قدم لغرفه وقال..
لاباس حبيبتي..وطبس ع راسه وباسه..
بعدين قعمز ع السرير جنبها ومقابلها..وخدي يدها وحضنها بإيديه وهو يقول..
سمعت باللي صار..والحق صدمني وزعلني هلبه..وزعلت اكثر لما عرفت باللي صارلك..كيف حالك انتي توا..وكيف حال حبايب خالو..
غرفه بصوت مبحوح:الحمد لله..الحمد لله ع كل حال..
طبطب ع يدها وقال:باهي قوليلي شن نقدر نديرلك واني حاضر عارفتيني مانقدر نردلك طلب..
قعدت تشبحله وهي ساكته..
هو ابتسم وقال؛قولي حبييتي ماتتحشميش ولاتخافي..
هي قعدت تشوفله بصمت..
مختار:لو خايفه من بوك نطمنك مش حنخليه يعرف ان وقفت معاك وساعدتك..رغم ان من المؤسف نقول حاجه زي هادي..بس الدنيا ولت هكي شن بديري هي..
جبدت يدها من ايديه..
هو قعد يشبح ليدها ورفع حواجبه..
غرفه ودموعها ينزلوا وبنبرة مخنوقه؛وكان تنوض وتروح لما نبوس ع راسها وايديها ورجليها بس تسامحني..ونقوللها ياوخيتي كان عندك حق..ياعزوتي كان عندك حق جيت لكلامك ووقفت عليه وياريتك كنتي جنبي وتغمرتيني وانتي تقولي..مش قتلك ياغرفه..الضربه مش حتجيك كان منه هو..
بدت ع وجهه ملامح باردة مخيفه وهو يشوفلها..
غرفه مسحت دموعها وقالت..مافيش غيرك انت..وراهو مااحتجتش نفكر هلبه بش عرفت انك وراها..وعارفه انت لشن تبي توصل وواضح انك خططلتله كويس..بس في حاجه غابت عليك..انك واضح قدامي ونعرفك كويس زي نفسي تعرف علاش..لأننا للأسف نشبهوا بعض.
عقد حواجبه وعيونه نظراته ولت نظرات غضب..
غرفه؛تعرف..مستعده نترمل ونقعد ع صغاري عمري كله ولانخلي توطي راس بوي وذله..سمعتني..وتوا نوض اطلع من حداي ومعاش تخليني نشوف وجهك ولانسمع صوتك.
وكان سدرة قبل مش قابلتك مرة اني توا مش قابلاتك الف مرة..
ناض وقف وهو يشوفلها بغضب وقال..
ظلمتيني..هلبه..وجعتيني هلبه...هلبه..
ولف ومشي فتح باب الحجرة بغضب..
شاف فردوس..
اللي كانت تشوفله بكره واضح..
شبحلها بنظرة غضب وازدراء..
بعدين مشي من قدامها..
كان يمشي وهو مكور ايديه بغضب وشاد عليهم..
وكلام غرفه يتردد في عقله..
《وكان تنوض وتروح لما نبوس ع راسها وايديها ورجليها بس تسامحني..ونقوللها ياوخيتي كان عندك حق..ياعزوتي كان عندك حق جيت لكلامك ووقفت عليه》
غز ع اسنانه بقوة من الغضب وهو مسكر فمه..
ومتابع مشيه بغضب وهو يشد ع ايديه بقوة..
لعند ما وقف فجأة..
لما شافها قدامه..
هي وين شافاته انصدمت..
بس بعدين تبدلت ملامح وجهها للكره..
غيرت عيونها عنه وتجاهلت وجوده ومشت من حداه...
وهو قعد يتبع فيها بعيونه لين تباعدت..
كان يشوف فيها نسختها المصغره..
هي في كل شي..
مشيتها..نظرتها..حركاتها...
ولأنها شبهها..كانت مشاعر حقده عليها اكبر من غيرها اكبر حتى من سدرة نفسها..
لف وكمل طريقه وهو يقول في نفسه..
"اخرتكم حتجوني توا ولا بعدين بالطيب ولا بالقهر"
🍃🍃🍃🍃🍃
الساعه 7:00مساءا..
قدام مطحن الزعيم..
عبد القيوم:خود حقك..
المهدي وهو يشوف لظرف الفلوس؛كان محتاجهم خليهم عندك..
ضحك عبد القيوم وقال؛لا الحمد لله..خودهم هيا..
خداهم المهدي وقال؛تارقي نبي تمشي للخلا..
عبد القيوم بضحكه؛قول البر.
المهدي؛كانك عليا نبي الصحرا..
عبد القيوم؛لاهذي صعبه شوي تبي تنسيق وقصه طويله عريضه كان تستنى عادي تو نسعالك فيها..
المهدي؛مالا خلينا ع البر وبعدين نفكروا في الصحرا..
عبد القيوم؛ ان شاء الله..
وينفتح باب حوش محمد شنيبه..
ويطلع منه الجالي..
شبحوله الزوز..
وهو شبح جيهتهم وين جو عيونه في عيون التارقي..
شبحله بنظره كلها كبر بعدين نادى..
مهدي..واشرله يجيه..
المهدي؛نستأذن حبيب..
عبد القيوم؛خود راحتك..
ومشي عبد القيوم للقهوة خشلها وقعمز فيها.
والمهدي مشي للجالي..
المهدي:شني..
الجالي:نبيك تحكيلي ع اللي صاير لعبد الرؤوف بإختصار..
🍃وعبد القيوم قعد يشوف للجالي والمهدي واقف يحكيله..
وكبده عليه دم..يبي يضربه زايد ناقص..ولت عنده امنيه من امنيات حياته ان ربي يهيئله موقف يخليه يعطيه طريحه يفش فيها قلبه...
🍃الجالي؛تمام تمام..خلاص اني ماشي ماتبي شي..
المهدي:سلامتك..
رفع الجالي يده وحياه..ومشي بإتجاه القهوة..
والمهدي مشي بيخش المطحن وهو يشوفله..
وقف الجالي حدا القهوة وين مامقعمز عبد القيوم..
حط ايديه في جيوبه وهو يشوفله بإبتسامه جانبيه كلها كبر..
عبد القيوم ناض وقف ومشي طلعله..
وقعد يمشي لين وقف قدامه وقال..
عبد القيوم؛خير بشن نقدر نخدمك؟
الجالي:انت تقدر تخدمني بحاجه وحده بس انك تروح لوين ماجيت..
عبد القيوم:معناها مش حنقدر نخدمك عمري كله سامحني..
الجالي ضيق عيونه وقال؛شن تبي من بكري وانت تشبح!؟
عبد القيوم ابتسم بإستفزاز وقال؛قصدك انت كنت هنا من بدري سامحني هذى وين حقيتك..
الجالي:بطل شغل الاستفزاز هدا وماتخلنيش نحطك في راسي..
عبد القيوم بضحكه؛قديش مشقي روحك بيا..مخليني محور حياتك..متعبك واجد شكلي..
الجالي شبحله بإزدراء من فوق لتحت بعدين قال..
ماتشريش معاي المشاكل بش ماتندمش.بعدين..
عبد القيوم؛لا ريح بالك..ماليش في ال.. ورفع حاجبه وكمل يقول بالتشديد ع الحروف..الرخيص..
هز الجالي راسه وقاله بوعيد..
تو نفضالك يا....تارقي..
وابتسم تهكما ولف ومشي لحوش لطفي..
وعبد القيوم يشوفله بإبتسامه ظاهرها هادي..
بس من داخله قاعد يفور ويغلي..
وفي عيون قاعده تراقب في هدا كله بتركيز غير عيون المهدي..
🍃🍃🍃🍃🍃
وخش الجالي مربوعة حوش نساباته..
وقعمز معاهم جاملهم مجامله..
وكان بادي الحاج علي يعصب عنه ومعاش متقبله زي قبل بس قاعد يكتم في هالمشاعر داخله..
الجالي:باهي ان شاء الله ربي يفرج عليه..
لطفي:ان شاء الله..
الجالي؛أ..معليشي عمي لو تشوف طوبى كان تبي تروح معاي ولاتقعد تبات..
لطفي؛لحظه شويه..
وناض ومشي طلع من المربوعه..
وقعد الجالي مع الحاج علي بروحهم..
شبحله لقاه يشوفله.بنظرة غريبه خوفاته..
ابتسم بريبه وقاله..كيف حالك ياحاج..
هز علي راسه وقال وهو يشوفله بنفس النظرات..
الحمد لله...
~~~~~~~~~
لطفي؛بنتي راجلك يراجي فيك برا يبيك تروحي معاه..
طوبى شبحتله للحظات بعدين قالت..
حاضر..
ومشت خشت داخل بش توتي روحها ولطفي ولى للمربوعه..
🍃🍃🍃
شويه وطلعت طوبى..
ركبت السياره وهي تقول..
السلام عليكم..
هو اللي كان يشبح القدام رد من فوق نفسه..
وعليكم السلام..
وتحرك بالسيارة طول..
والزوز كانوا ملتزمين الصمت..
شويه هو شغل مسجل السيارة..
وعلي صوت مغني مصري شعبي..
زاد الصوت شويه وقعد يغني معاه..
وهي تشوفله بطرف عينها بنظرات امتعاض..بعدين غيرتهم القدام ومازال ملتزمه الصمت..
🍃وصلوا للفيلا..
وبعد خشولها ركبوا لدار النوم..
اول ماخشولها هو قال..
الجالي؛في حوايج في الشنطه اغسليهم وجفيفهم واكويهم نبيهم الاسبوع هدا..ولبين ماندوش ديريلي عشي ع السريع جعان اليوم ماتغديش..وايه طلعيلي التوته الزرقا..
ومشي للحمام بس قبل ما يوصل فيه وقف لما قالت..
"جالي"..
التفتلها وهو رافع حاجبه اليسار..
طوبى:انت كنت في حوش ماليك قبل ماتجينا..
هوقال؛ايه..
طوبى؛ماعرفتش علاش ماجوش يسالوا فينا زي مادارو جيرانا كلهم في الشارع..
الجالي:عندك رقم امي ولا..اتصلي واسأليها..
طوبى؛يعني انت تصرف زي هدا عادي عندك!؟
هو انفعل وقال؛اسمعي اني راجل مروح تاعب وايامي سود وربي عالم باللي فيا بتنكدي عليا من توا قولي بش نردك لحوش ماليك تقعدي غادي...
طوبى وهي عاقده حواجبها؛تلز فيا يعني!؟
غمض عيونه وقال:استغفر الله العظيم..بعدين فتحهم وقال.
مانبيش نعصب عليك مانبيش نفش غلي من الخدمه فيك فهمتي توا..
هزت راسها وهي ساكته وكانت واضحه ملامح الضيق ع وجهها..
وهو بعد ماقال اللي عنده مشي خش للحمام وخبط الباب وراه بقوة..
هي انفجعت...وبعدين غمضت عيونها وهي تحاول تهدي نفسها وفتحتهم..ومشت طلع حوايجها من الدولاب بش تبدل..
وبعد مابدلت..
اللي طلبه منها كله داراته..
طلعتله التوته اللي قال عليها..
بعدين نزلت وبدت توتي في العشي..
وبعد مانزل يتعشي ركبت لدار خدت حوايجه وحطتهم في الغساله..
ولت نزلت مرة تانيه بعد ماركب ضمت الكوجينه وغسلت الماعين..
بعدين بخرت الدور الاول..وركبت بالبخور للدور التاني..
وهي تبخر فيه..
سمعاته وهو يتكلم بالتليفون في حجرة المكتب ويقول..
"تي ياراجل دارهه كبدي وين مانمشي نكد كان نلقى ناخد وجهي ونخلي البلاد باللي فيها"
شدت دموعها بقوة..وحاولت تتجاهل اللي سمعاته..
مافيش قدامها غير هكي..
🍃وكملت باقي هاليوم وهي تجري ع طلباته..
لين رقد...
بعد مارقد..
حسنت بخنقه لوجودها معاه في الدار..
مشت طلعت منها..وتوجهت لدار المرسم..
خشتلها وخدت منها شنطة اللاب توب متاعها وطلعت من الدار..ونزلت للدور الاول..
قعمزت في اكثر جهة تحب تقعمز فيها..
حدا الفيرندا..
طلعت اللاب توب من الشنطه..
وفتحاته.بش تخدم عليه..
بس لقت روحها ماشيات لملفات مالهاش علاقه بالمدرسه..
ملفات فيديوهات عرسها..
فتحت علي اول واحد فيهم..
زفتها هي والجالي..
كانت تشوف لروحها كيف كانت فرحانه..
ضحكتها..ابتسامتها..السعاده اللي كانت فيها..
حطت يدها ع فمها..وقعدت تبكي..
بعدين سكرت اللاب توب وحطاته ع تركينه..
ورقدت ع وحده من الوسايد وحطت يدها ع بطنها وهي تبكي بكتمان...وألم...وعجز...
وهو راقد في سابع نومه ومش داري بحاجه...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
يوم الأحد..
9 من شهر ابريل..سنة 2018..
الساعه 10:30 صباحا..
في المكتب اللي كانت تخدم فيه نجاة..
خش عليها الموظف اللي يدير في المشاريب عندهم وقال..
باش مهندسه..
شبحتله...
؛في واحد جي وقاعد واقف برا قال يبيك ضروري..
هي قالت؛تو نطلع نشوفه..
مشي الراجل...
وهي.ابتسمت بمكر بعدين طلعت مرايتها من الشنطه والروج..
دكنت الروج..بعدين دستهم ومشت طلعت بيها من المكتب..
وصلت برا..
شافاته واقف وهو حاط ايديه في جيوبه ويهز في رجله بعصبيه..
شافها من ورا نظاراته...واشرله تجيه..
هي مشتله وقفت قدامه وقالت..
شن جابك شن تبي!؟
الجالي بغضب؛شن التخريف اللي بعتيه هدا..
نجاه؛مش تخريف..قتلك تقدر طلقني توا..طلقني وخليني نشوف نصيبي..
الجالي:نجاة ماطلعنيش عن طوري..
نجاه:قتلك من البدايه انت بالنسبه ليا خلاص ماضي راح غير مؤسوف عليه..طلقني بإرادتك خير مانديرهالك بفضيحه.
وجت بتمشي..
ماحستش بيه الا وهو جابدها من مرفقها وقعد يكركر فيها..
وهي بصدمه تقول؛هييه شن دير انت اطلقني..
وهو ولامعبر حد..
وصل بيها السيارة وركبها وسكر الباب..
ومشي ركب السيارة..
نجاة؛يامجنون شن دير انت!؟
الجالي وهو يشغل في السياره:مش اني اللي تسيبيه يانجاه..
وتحرك بالسيارة..
نجاه:انت اللي سيبتني انت ع خاطر هديكا الفرخه..
الجالي؛اني ماسيبتكش اللي درتيني سيبتك من راسك..
نجاة ودموعها ينزلوا؛وانت سلمت فيا لما خيرتك متفكر ماردتيش بكلمه ماقليش اقعدي..
الجالي؛سكتت لأني كنت عارف حالتك النفسيه واللي تمري بيه خليتك براحتك لين تهدي..
نجاه ببكي:انت تلعب بيا جالي تلعب بيا يوم تقولي بنطلق طوبى وبنعلن زواجنا وتقعدي انتي بس مرتي ويوم تاني تغير رايك..يوم تبيني ويوم تفوتني..تعبتني معاك عذبتني قهرتني واني نحبك ونموت فيك وانت عارفني كويس مانقدرش نعيش من غيرك.
وقف السيارة ع جنب..
وخداها في حضنه..
نجاه قعدت تضرب فيه ع صدره وهي تقوله؛خليني معاش نبيك خلاص..نبي نعيش حياتي نبي ناخد راجل يحترمني ومايخافش يعرفوا الناس اني مرته..
بعدها وشد وجهها بإيديه وقال وهو مركز ع عيونها..
انتي ليا اني وبس من بعدي مافيش يانجاه مافيش..
نجاه بضعف؛نحبك..
الجالي ضحك وقال؛عارفك..
هي استجمعت شجاعتها وقالت بقوة..
ارفعني للفيلا..
قعد يشبح لعيونها وهو ساكت..
نجاه بقوة واصرار..
نبي الفيلا.
هو هز راسه وقال:باهي.
وخر عنها ورجع شغل السياره وتحرك طول للفيلا..
🍃🍃🍃🍃🍃
في المدرسه..
تحديدا في الساحه..
كانت طوبى واقفه هي والمدرسات ينسقوا لنهائيات دوري كرة طائرة في المدرسه..
ومرة مرة تشوف للساعه خايفه تتأخر ع موعد زياره غرفه...
🍃🍃🍃🍃
وفي هالوقت..
وصل الجالي بنجاة للفيلا..
خش بيها داخل..وركب بيها للدار النوم..
كانت تمشي للخلف وهو قدامها..
نجاه بضحكه؛مش مصدقه انك درتها تعرف!..
الجالي وهو يشوفلها بإبتسامه رغبه قال..
هدا حوشي كانك ناسيه اني صاحبه ندخل فيه ونطلع منه اللي نبي..
طلع تليفونه حطه ع الزيانه وحول جاكيته وهو يقول..
محلوة هلبه هلبه...فوق الحد...
ومشالها...
وصوت ضحكاتها صدح في الفيلا كلها..
🍃🍃🍃🍃🍃
"ان شاء الله الاسبوع الجاي نبدوا"
طوبى؛بإذن الله..
رن تليفونها بنغمة رساله..
قاماته وهي تقول..
لحظة شويه..
فتحت الرساله..
(ماتبيش تصدقي لين تشوفي بعينك ولا..
خلاص تعالي توا للفيلا وشوفي بعينك راجلك اللي صنيته واللي قعد مستغفله شهور يامسكينه شن قاعد يدير)
حست بقشعريره رهيبه..
وقلبها انقبض قبضه قويه...وعيونها دمعوا وهي تقرا في الرساله لين ولت معاش تشوف في الكلام...
《:بابا تبي تريحيني؟
:اكيد بابا..
؛تردي بالك ع روحك وع حوشك
وراجلك وتنجحي في قرايتك انتي هكي يابنتي تريحيني وبالزايد》
🍃🍃🍃🍃🍃🍃
"نحبك"
هو ؛عارف..
هي؛وانت؟
هو؛شن رايك انتي بعد اللي درته توا مازال تسألي..
هي؛يعني مش حتندم..
هو؛علاش ببندم..
فجأة رن تليفونه..
الجالي؛نسيت نسكر امه بكل..
ناض ومشاله..
وصل في الزيانه..
خدي التليفون وين شاف المتصل..
انصدم..
التفت لنجاه وحط سبابته ع فمه..
هو عقدت حواجبها وناضت قعمزت..
فتح الخط ورد..
ايوه..
"ايوه جالي ان شاء الله ماعطلتك ع شي"
هو حرك راسه بالنفي وقال؛لا..خيرك شن تبي..
"لاشي غير جيت بنقولك اني مروحه توا للفيلا ماصارش من الزياره"
قلبه قريب وقف من الخوف التفت للمرايه وقال؛في الطريق انتي؟
"لامازال ماطلعتش شويه ونطلع..بنسألك شن تبي غدي"
هو بلع ريقه وقال:اللي تبيه ديريه..هي بنسكر توا عندي خدمه..سلام..
"سلام"..
سكر وحط التليفون ع الزيانه وبخوف قعد يقول..
نوضي نوضي تحركي بسرعه..
هي قالت؛خيرك شن في..
هو بتوتر بالغ؛قتلك نوضي نوضي..
وقعد يلبس بسرعه وهو يرعش...
وهي تشوفله بغضب شديد..
بعد ماكمل شبحلها وقال؛هيا هيا خل نمشوا للشقه تحركي..
ومشي للسرير وقعد يرتب فيه وهو يرعش..
هي لما شافت حالته هادي وصلت لأقصى مراحل الغضب..
مشت للطاولة خدت المالقي المحطوط عليها وطيحاته كسراته..
هو بصدمه؛شن درتي يامهبوله شن درتي..
ومشالها خداها من ذراعها وقعد يكركر فيها برا الدار.
نجاه بغضب؛حول خليني حول..
رفعها وحطها ع كتفه..
ومشي نزل بيها من الدروج وهي تخبط فيه ع ظهره وتقول..
ياجبان ياجبان..
وصل بيها لوطا وقعد يكر فيها..
لين وصل للكنبه اللي عليها وشاحها..
خداها وحطه ع راسه وهي تشوفله وتبكي..
بعد مالفه ع رقبتها طلعها برا الفيلا..
ومشي بيها للسياره..
ركبها وركب..
وطلع بيها وهو يشوف حواليه..
نجاه قعدت تضرب فيه ع ذراعه وهي تقول..
ياجبان ياخواف..تخاف من فرخه ياجنان..
شد يدها وعوجها وهو يقول؛فمك ضميه خير مانكسرها.
سكتت وهي تبكي
طلقها...
وطول انطلق بالسيارة زي الصاروخ..
وصل بيها للعمارة اللي فيها شقتها هي وصغارها..
الجالي بعصبيه:انزلي..انزلي..
فتحت باب السيارة ونزلت وهي تبكي.
مشت خشت للعمارة.
وهو بنفس السرعه انطلق للفيلا مرة تانيه بش يخفي اثار اللي داراته نجاه..
🍃نجاه لما وصلت لدروج العمارة رن تليفونها..
فتحت الشنطه وطلعاته لقاته هو يتصل..
فتحت الخط وردت عليه وهي تهزب..
شن مازال تبي ياخواف ياجبان ياللي ماتجيش راجل شن مازال تبي..من اليوم تنساني انساني انسى نجاة يالجالي لاخر عمرك..
سكر في وجهها الخط..
وهي ركبت للشقه تبكي..
🍃وهو وصل للفيلا..
خش بالسيارة داخل.
نزل منها يجري وخش للفيلا.
ركب للدروج كل درجتين بدرجه لين وصل لدار النوم..
خشلها..ومشي طول للمالقي.
قعد يلم في المرش وهو يقول..جت ع الميه عادي تلقالها الف تفسير..
وقف ومشي للزيانه بفتح الدرج بس ياخد كيسه ويحط فيها المرش..
شاف للمرايه بنظرة عابره..
بعدين ثبت نظره عليها وهو مستغرب..
التفت شاف لكسور المالقي..
بعدين رجع شاف للمرايه..
حرك عيونه للتليفون..
خداه..وحط ع رقم نجاة..
"أحمد حميدا"
واتصل بيها..
قعد ينادي لين فصل..
عاود مرة تانيه ..
فتحت الخط وهي تقول..
"شن مازال تبي ياحقير"
هو قال:نجاه اسكتي واسمعيني.
"مانبيش..
قاطعها بصوت عالي وهو يقول..
قتلك اسكتي واسمعي.
"شن تبي"
شبح للمرايه وقال..
انتي حدفتي المالقي لوطا وع المرايه!؟
"هدا علاش متصل بيا ياصحيح الوجه ياتافه"
قعد يمرر في نظره ع الزيانه..
لين جو عيونه ع حاجه لما شافها..
جمد الدم في عروقه..
حس الدنيا كلها وقفت..
حل الوانها كلها اختفت في لحظه وماقعدش منه الا الابيض والاسود..
حس بحاجه قاعد تسحب منه في الروح سحب..
"ان شاء الله تموت يالجالي نكرهك نكرهك"
شن ماتقول نجاة مايسمعش فيه..
معاش يسمع في شي..
لأنه تليفونه طاح منه وارتطم بالأرض..
حس روحه مش قادر يوقف..
انسند بإيديه ع الزيانه وهو قاعد يشوف للحاجه اللي تسببت في هدا كله..
اللي خلاته بعرف...
ان نقطه النهايه انكتب في قصته مع طوبى..
لما شاف عقد طوبى..
اللي هداهولها اول ليلة زواج..
واللي عطاته وعد ماتحولاش من رقبتها ..
واللي فعلا كانت فيه قد وعدها وماحولتاش نهائي...
شافه هالمرة مقطع وهو محطوط ع الزيانه..
امتلوا عيونه بالدموع...
وطاحت منهم وحده وجت ع اسمها....
اسم اكبر خسارة خسرها الجالي في حياته....
#طوبى
#استنزاف
#طوبى
....يتبع....
