(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الخامس_والثلاثين" بعترفلك2" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ "قداش بتقعد غادي" الجالي؛اسبوع بالكثير.. مغليه:باهي ولدي ربي يردك سالم غانم ونفرحوا بيك زي الليله يارب.. ابتسم لأمه وجاها باس راسها وقال:طالعه طرف.. ضحكت ومشت طلعت من داره.. وهو بعد طلعت قام تليفونه وكتب رساله لنجاة (حبيبي شن صار فيك) لحظات ووصلاته رساله.. (الصغار بيقعدوا عن صابرين بس معاذ بيقعد عند مروة) بعتلها.. (زدتوا نبهتوا ع رجالة خوتك) ردت عليه.. (ايه اطمن) بعتلها (غير امتى يجي غدوة بس) ردت عليه.. (ارقد وتو تنوض تلقاه جي) قعد يضحك وبعتلها. (لولاك ماصبحش عليا صبح) بعتتله ضحكه.. ☘وتحت.. طلعوا امه وخواته مع بعض وتوجهوا لحوش الواعر.. اللي سهرية الكسوة.. ماداروش حوش الواعر الكسوة لأنها تبي مصاريف وناسهم هلبه. فأقتصروا ع سهريه بس.. اساسا العرس كله يومين.. معاش يلايم الحال الواحد يدير عراس زمان سبعة بلياليهم.. اساسا..الناس معاش زي قبل تحب جو اللمات في الافراح والعواله متاعهم..خلاص كل شي تغير... اول ماخشت مغليه.. جتها اميمه طول سلمت عليها وباست راسها.. مغليه:الله يبارك ع كنتي الله يبارك رقيتي روحك ياغزيله.. اميمه بإبتسامه:ايه عمتي.. نسرين بضحكه؛يابختك بعزوزتك.. اميمه:ربي يحفظها..شن حالكم.. كلهم بأصوات متقطعه:الحمد لله.. شويه جت سدرة رحبت بيهم.. لاحظتها خديجه متغيره وزنها زايد بشكل ملحوظ.. خششتهم داخل.. وقالت سدرة لنسرين؛مافيش امل تجي عيشه.. نسرين؛لا مع المنظومه انسي.. هزت راسها ومشت.. خديجه؛سدرة سامنه هلبه.. مغليه:من الراحه النفسيه لاتعاني في راجل ولاصغار.. الزوز قعدوا يشبحوا لسدرة بنظرة غبطه تمنوا لو كانوا في مكانها..وياليتهم يعلموا... ☘☘☘☘ طلعوا البنات بعد مالبسوا وتأنقوا.. سلموا ع الجيران.. وبعدين بدوا يهيجوا ع المنظومه.. ماعدا طوبى اللي كانت تشرف ع الوضع في السهريه والتنسيق كله عليها.. نجاح؛تقتل طوبى تقتل.. عواطف:القفطان متاعها مش عادي.. ~~~ مغليه؛طوبى كم عمرها توا؟ خديجه:بتخش العشرين.. مغليه:الله يبارك.. خديجه:عليك زين زينها اناقتها وطلتها احلى خواتها من جميع النواحي.. نسرين؛اناقتها حكايه.. وطوبى واقفه توجه في البنات اللي يفرقوا في الضيافه والعيون عليها.. والكلام كله عنها.. وبدي نجم طوبى يسطع وبريقه يجذب ليها الانتباه.. ومغليه تفصل فيها تفصيل..وتتخيل فيها ولت كنتها حتى هي.. تنهدت وقالت في نفسها"كان ربي يهدي الجالي بس" ☘☘☘☘ وسط هالاجواء.. كانت عيون فايزة تهرب عن نسرين.. ونسرين تتجاهل في وجودها.. وسدرة تشوف لحالهم وقلبها واجعها مش عام ولااتنين سبعه سنين لتوا متقاطعات.. سدرة بهمس:الله لايربحه ايه والله.. غيرت عيونها عنهم وجو في عيون صفاء.. لقتها تشبحلها بنظرة تخوف بعدين قلبت عيونها وبعدتهم عنها.. تنهدت سدرة بضيق وانسحبت من المكان.. وهدا كله.. وغرفه مقعمزة وسط الحاضرات باالبودري وصاحباتها بحداها.. :والله يابنت صبرتي ونلتي حاسداتك الحق.. غرفه:ومن شر حاسد اذا حسد.. ؛سعدودك جيتي حدا ماليك مش زيني في قطع الرقبه كان فاض بيا ونبي نشكي ولانحكي مانلقاش كيف نجيهم.. غرفه:ربي يفرج حبيبتي..وبعدين مرات السكنه قريبه هدي زي حالتي فيها حاجات مش حلوة مرات تبي امور تقعد اسرار وماحد يعرف بيها من اهلك.. :صح.. :مانقول كان ربي يهنيك حبيبتي.. غرفه بإبتسامه:آمين.. شويه وعلت اريج المنظومه.. وجتها ونوضتها.. ناضت غرفه وقعدت ترقص..وناضوا صاحباتها معاها... وحواليهم اختها وبنات اختها ودارو عليها دائرة وهي ترقص.. كانت غرفه فرحانه...فرحانه...فرحه تسد العالم ومازال تبد.. ☘وهو كان واقف في وسط الشقه.. يسمع في اصوات الاهازيج والاغاني وهويتخيل في شكلها كيف عايشه فرحتها.. وكل مايتخيل..كل مايفرح حتى هو اكثر لأنه حيوصل للي يبيه بكل سهوله.. ☘☘☘☘☘ وقت الحنه... مغليه:الدور الثاني ع كبر الحوش معناها شقه سياحه نياحه مفرشه كلها؟ مطيرة :الله يبارك من الطقه للطقه مافيش حاجه قاعده ع الزليز وكله جايبه من برا مافي شي من هني.. خديجه؛شفتيها خالتي مطيره؟ مطيره:ايه مال شنو لما رفعنا دبشها امس.. مغليه؛ان شاء الله بهناها.. مطيرة:آمين يارب.. فاتت من قدامهم طوبى وفيدها لصقة جرح جت بيها لصفيه وقالت:كويسه هادي.. خدتها صفيه وقالت:ايه هادي احسن.. وعيون خديجه ومغليه ع طوبى وخلاص.. ☘غنوا ع غرفه اغاني بوطويل.. وفي من كلام فهموه البنات وخلا دموعهم تنزل.. بالذات سدرة.. الكل وهما يشوفوا فيها تبكي وجعتهم.. وجعهم شبابها وجمالها وعمرها اللي راح.. زي مانوجعوا عواطف ونجاح ع حظهم هالدنيا.. غرفه كانت تبكي لما جت سيرة الام في غناهم.. وغلبوا فردوس دموعها.. وطوبى ناضت من حداهم بكل معاش قدرت تشد روحها.. وهديكا ليله كانت ليلة فرح ممزوج بحزن.. خالط افراحنا السنوات الاخيره..وكأن حزن البلاد طغى ع كل شي فيها حتى افراح ناسها... ☘☘☘☘☘ تاني يوم... كان يوم الحفله... رفعت اريج غرفه للمزين متاع فايزة وكانوا ماشيات معاها الاء وطوبى.. خطمت السيارة قدام حوش اياد اللي طلع منه مهند.. جو عيونه ع الاء قلبه فر فران ليه هلبه ماشافهاش.. شبح بعدين جهة حوش الواعر.. شاف مروة جايه من حوشهم وبتخشله.. قدم وقعد ينادي؛مروة..مروة.. ومحمد المهدي كان في قهوة عمه شافهم طلع من القهوة وقعد يتفرج عليهم.. مهند:شن جو.. مروة جاته وقالت:الحمد لله مهند شن جوك انت.. مهند:تمام..مروة نطلب منك طلب هكي خدمه لو درتيها حتفرحيني هلبه.. مروة:ترا شن هي.. هو طبس عند وذنها وبدي يحكيلها.. ومحمد المهدي كان يلقى ينقز عليه يكسر ظهره.. مروة بدهشه:آلاء! مهند بإبتسامه:ايه.. مروة بضحكه:حاضر الليله نكلمها.. مهند:منورة بالهلبه.. مروة مشت للحوش وهي تقول:بوجودك.. وصلت فيه وخشت وسكرت الباب.. ومهند ابتسم ومشي لسيارته.. اما محمد وهو معصب ولى للقهوة مرة تانيه.. ☘☘☘☘☘ الساعه 4:30عصرا.. كان الجالي مع نجاة عند مأذون شرعي ومعاهم رجالة خواتها بش يشهدوا على عقد النكاح.. كتب الشيخ كتابهم وشهدوا الشهود عليه.. وولت نجاة مرت الجالي.. وطول خداها من غادي وركبوا سيارته وتوجهوا طول للحدود الليبيه التونسيه.. زواج بعيد عن الانظار تماما... ☘ومن زواج في السر.. لزواج في العلن... مع الساعه تمانيه كانت الصاله معبيه... بس العروس مازال ماخشتش.. ☘في دار العروس.. سدرة؛نشطي روحك خليك قد المسؤوليه ماتخلي حد يعيب عليك وعلينا ياغرفه.. غرفه ودموعها في عيونها؛ان شاء الله.. سدرة؛خليك لراجلك زي ماكانت امي لبوي ياغرفه.. هزت راسها وهي مبتسمه.. تنهدت سدرة وقربت منها وباست جبينها بعد قالت؛ربي يسعدك ويهنيك.. غرفه؛ويفرحني بيكم انتي وطوبى يارب.. سدرة؛يارب نطمن ع طوبى عن قريب يارب.. غرفه:آمين.. سدرة وهي شاده دموعها بقوة:هيا بتطلعي توا.. خدت نفس.. وسدرة مشت فتحت الباب نادت ع المصورة.. والمصورة خشتلها وبدت تفهم فيها شن دير.. وشويه وطلعت غرفه من دار العروس متوجهه لداخل القاعه.. والناس تراجي فيها كانوا يشوفوا في الفيلو متاعها بس من الشاشات.. لين طلت عليهم في القاعه.. كانت طالعه جميله...ووجهها جدا لطيف مابتش تكثر مكياج.. طلتها كانت بسيطه وحلوة هلبه.. وصلوها للكوشه.. وقعمزت وبدت المصوره تاخدلها في لقطات.. ☘وزي اي حفلة عرس مش هالحفله بنفس النظام والاجواء الحلوة.. وكانت سعاده غرفه لاتوصف ..طول الوقت كانت حاسه روحها طايرة في السمي... 🌻ويجي العرس ووراه موكب سيارات فخمه بش يزفوه... خش طلع عروسته وركبها السيارة.. وركب هو وقال:فله شن جو يافله.. غرفه وهي متحشمه:تمام.. عبد الرؤوف:نبيك تتحملي توا باهي.. غرفه قعدت ساكته وهي خايفه.. وتحرك عبد الرؤوف والموكب وراه.. وداروا استعراضات طول الطريق.. وهو كان يسطرب ويدير في حركات.. وغرفه تترجى فيه يوقف وهو يضحك.. لعب بنفسيتها لعب.. ☘وفي بلاد شقيقه.. كانوا عرسان تانيين راكبين موطو يهيجوا بيه في شوارعها.. نجاه وهي شاده في الجالي:ووووه .. الجالي:شدي كويس.. شدت فيه بقوة وهو وزاد السرعه.. وهي تقول بحماس:وووووه..يؤبرني جوك اني.. والجالي يضحك بصوت عالي... ☘☘☘☘☘☘ وصلت سيارة عبد الرؤوف للحوش.. ووراه نبيله بسيارتها.. نزلت وساعدته وهو ينزل في غرفه... لين وصلوها للباب. وبوها من روشن المخزن اللي كان في الدور التاني يشوفلهم ويقول:ربي يهنيك يابنتي ويطمني عليك.. ☘خشوا للحوش.. وقعدوا يمشوا بيها للدروج.. عبد الرؤوف:هي تصبحي ع خير نبيله.. غرفه:تصبحي ع خير.. نبيله بإبتسامه؛قدامكم كل خير... وخش بيها لدار الدروج وسكر الباب.. بعدين قال؛وقفي ترا.. غرفه؛شني.. جاها حول من عليها الكاب.. لما شافها كيف طالعه...للحظه نسي نفسه..مش بس ثاره اللي بياخده.. بس كانت لحظه وعدت ع حالها.. طلع من جيبه شريط نستروا لونه اسود وجي وراها.. غرفه بضحكه؛شكله في مفاجاة.. عبد الرؤوف وهو يغطي في عيونها؛تي مش مفاجأة هي لاقبلها ولابعدها مفاجأة.. جي قدامها وتأكد انها ماتشبحش. بعدين خداها من يدها وقعد يركب فيها درجه درجه لين وصلوا لباب الشقه.. غرفه:دقات قلبي في الالف.. عبد الرؤوف؛بعد شويه يولوا في المليون.. غرفه:وووه حماس للمليون.. فتح الباب بعدين دخلها.. سكره برجله وقال:هي تعالي.. غرفه وهي تمشي:مازال؟ عبد الرؤوف:ايه مازال.. قعدت تسمع في الصوت بالصدى متاعه استغربت وغير هكي حست روحها صقعانه هلبه.. غرفه؛مافيش دفايه؟ عبد الرؤوف:لا في غير خل نوصلوا مكانا.. وصلوا لدار النوم... دخلها.. بعدين خش بعدها وسكر الباب.. غرفه:مازال بيدو مليت! عبد الرؤوف:هي شويه بس.. خداها من يدها وقعمزها ع السرير وقال:ثواني ونقولك حولي اللي علي عيونك تمام! غرفه:تمام.. شبحلها بنظرة حاده بعدين مشي لدولابه فتحه.. وطبع منه صورة مبروزة وجاها بيها.. وقف قدامها..وجهها ليها وقال.. حولي اللي علي عيونك.. هي فكت شريط النسترو..ونزلاته وحواجبها معقوده.. وعيونها جو ع الصورة.. قعدت مركزة فيها كويس.. هو بنظرات كبر وحقد؛تعرفيه هدا؟. توسعوا عيونها ع الآخر..وبدوا الدموع يعبوهم قالت بصوت يدوب طالع:انت..تعرفه؟ عبد الرؤوف:اني اللي نسأل هني وانتي تجاوبي. قامت عيونها وقالت بخوف:علاقه عابره اصلا كانت بالجو كساد مش اكثر والله لاعمري حبيته ولادورته ولاعنالي حاجه اساسا تفكرته توا بس..يعني انت شوفله متوقع ان اني نحب واحد زي هدا! هو كان يشبحلها بصدمه.. وكلامها كان زي البنزين اللي انصبت ع النار.. نزل عليها وشدها من ذراعها بقوة وقال بصوت مخيف من الغضب والانفعال:انتي شني قوليلي شني بشن معجونه ياخسيسه يانذله..بشن يامعجونه ياكلبه... غرفه وهي ترعش من الخوف:جاك كلمك قولي شن قالك قولي.. شدها بقوة من ذراعها غرس اضافره فيه وهي تتوجع... حط الصورة جنب وجهه وقال:شوفي ياحقيره ياشوفي يااوسخ من خلق ربي ياواطيه.. هي فتحت عيونها ع وسعهم.. صاعقه ونزلت عليها... عبد الرؤوف.. شن جاب لجاب..شن جاب لجاب يابنتي حسين ضابط الجيش اللي كتافه معبيات نجوم..طول وعرض وهيبه..وسماحه ماريتهاش عند حد..وشخصيه يما نار يفنص فيك تموتي في مكانك..هدا الراجل اللي تتمنى الوحده تكمل حياتها معاه..مش مبروك الفقمه كلامك حافظه بالحرف مانسيتاش طول السنين اللي فاتت هادي كلها..ضحك وقال..مصدومه! مستغربه كيف عرفت من وين سمعت...ربك طيحك في شر اعمالك وخلاني نسمع كل كلمه قلتيها بلسانك الزفر ياكلبه الكلاب.. وهو يحرك في الصورة قال..خلتيني نكرهه خلتيني نشوفه كيف ماانتي شفتيه طلعته من حياتي زي ماانتي طلعتيه من حياتك وعشتي بعدين عادي وكأنك مادرتي شي... وكأن كسر القلوب عند منحطه زيك هوايه تتسلى بيها وقت فضوتها.. وقف ع حيله وقال:خلتيني نعيب في تربيتك نعيب في امك اللي في دار الحق وبوك الراجل المحترم كنت نقول ماعرفش يربي لكن انتي طلعتي وحده ماتنفعش معاها الربايه ولاتثمر.. وحده تافهه مستهتره وضيعه سخيفه ماتسوى شي وتقيم في الناس وتهزا عليهم.. طبس عليها وقال مني انتي مني قوليلي..انتي ولاتجيبي حاجه لوجو يببعوك لو يعطوا عليك فلوس ماحد ياخدك.. وقف ع حيله وقال:لكن اني خديتك بش ندير معاك اللي ماقدروش يديروه ماليك.. "نربيك" نربيك صح من اول وجديد.. كانت طول الوقت تبكي وهي مصدومه وخايفه حاسه روحها زي اللي فاق من حلم حلوهلبه ع كابوس مفجع وبشع.. حط صورته ع الكامدينو وجاها جبدها بقوة.. عيطت.. شد ع ذراعها بقوة وهو يقول:حسك مانبيش نسمعه.. سكرت فمها بقوة وهي تبكي.. مشي بيها للباب فتحه.. ودفها برا.. بعدين لوحلها بيجامه وشرشاف.. ووقف وقال؛استمتعي بوقتك في حوشك اللي فرشتيه ع ذوقك يا..عروسه.. وخبطها في وجهها الباب.. هي قعدت تبكي بالصوت لين طاحت ع ركابها قدام الباب.. ضمت بيجامتها والشرشاف وهي تبكي بإنهيار عند بابه.. وطاحت غرفه مااعلى السماء لأعلي الارض وكان السقوط مدوي وقاتل... قعدت تبكي وتبكي... تبكي بالصوت من صدمه عمرها والكف القوي اللي خداته.. ومازال مش مستوعبه ولامصدقه.. وصوت بكاها وهي ترعش من الصقع كان داير صدى في الشقه كلها اللي كانت ع الزليز...
#بعترفلك2 #طوبى...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
