#طوبى "جنة طوبى"
#جمان_فريد
#الجزء_الرابع_والستين"رسالة أخيرة1"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🍃 ثمّة لحظاتٌ تكونُ فيها الروحُ جاثيةً
على ركبتَيها مهما كان وضعُ الجسد🍃
_________________________________________
اغلبنا هكي..
الحياة تعطيه ضربات تجيه ع غفله وبعلم ينهد ويطيح يحس روحه معاش يقدر يكمل خلاص..
لكن مجرد مايرقد وينوض تاني يوم يلقى روحه زي اللي كان يجري في سباق وعتر وطاح وركابه ينزفوا الدم ومع هدا رجع وقف ع رجليه وكمل جري..
🍃وهادي طوبى..
اللي مشت لمدرسة "أجيال" مدرسة اختها سدرة..
وكانت عندها طاقه وحماس وشوق لحضور الاحتفال بيوم الطفل..
كان هالاحتفال..
لأطفال الروضه..وطلاب المرحلة الابتدائيه من الأول للثالث ابتدائي..
اللي يميز هالاحتفال هالعام انه حيكون بالزي الوطني..
وكل طفل وطفله يلبسوا الزي المعروفين بيه اهل مدينته الأصل...
الاحتفال داروه في قاعة المسرح متاع المدرسه..
اللي كانوا يجهزوا فيه طيلة ساعات الدوام تحت اشراف ابلة زهرة ومعاها طوبى...
وبعد ماتم الدوام لباقي الطلاب وانصرفوا..
بدت الإحتفاليه...
اللي حضروها اغلب الابلات ومعاهم اولياء أمور..
وجو لطوبى أريج..وصاحبتها عبير بش يحضروا...
☘طوبى كانت مبتهجه..
اشكال الاطفال وضحكاتهم وكلامهم وحركاتهم بثت فيها البهجه والسعاده ونستها كل شي كان واجعها ومضايقها..
اما اريج وعبير كانوا مستمتعات هلبه وهما يتفرجوا ع نشاطات الاحتفال وكل مايلقوا وليد او بنيه مميزين في طلتهم ياخدوا اذن امهاتهم ويصوروا معاهم...
وفي عز انسجام طوبى مع الاطفال...
جتها عبير تجري وهي تقول:تعالي بيبو شوفي..
طوبى:شني!؟
عبير بضحكه؛بنوته ووليد لابسين تارقي يهبلللوا..
طوبى وهي متفاجئة:الله! وينهم؟
خدتها من يدها وقالت:تعالي..
ومشوا الزوز مع بعض لين وصلوا فيهم..
ولما شافتهم قالت وهي مبتسمه بإعجاب وحب:ياعمري الله يبارك..
الأم بإبتسامه؛تسلمي..
شبحولها..
طوبى بإبتسامه؛ابله ساميه ماكنتش نعرف انك تارقيه..
:لااني مش تارقيه اني جباليه زوجي تارقي..
عبير وهي تشوف للصغار:هدا جمال صغارك تحسيه مزيج ربي يحفظهم..
بإبتسامه ردت عليها..
ويحفظك..
طوبى بإبتسامه؛عادي ناخدلهم صورة نزلها ع الصفحه متاعي؟
الام؛ماعندكش مشكله..
طوبى؛رقيتهم ولا؟
:اكيد..
ابتسمت طوبى وقامت تليفونها وخدتلهم صورة..
وجنبها عبير تتأمل فيهم..
وللحظه تخيلت روحها في عرسهم هي وعبد القيوم وهما لابسين الزي التارقي..
لما تخيلت عبد القيوم طار عقلها...
🍃وعبد القيوم في مكان عمله كان يؤدي ع أكمل وجه ويوم عن يوم زملائه والرؤوساء اللي يخدم تحتهم يزيد احترامهم وتقديرهم ليه..
هو ماكانش بس موظف متفاني..كان خدوم هلبه وفزاع وفي نفس الوقت كانت ليه هيبته يعني مش مخلي حد متمادي معاه ولامستوطي حيطه...
ولهالاسباب زملائه اطلقوا عليه لقب..
"سبعيناتي" لأنه بشخصيته ومواصفاته واخلاقه زي رجالة هداكا الزمان الوقورين المحترمين والمهيوبين..
برغم ان عمره مافاتش 31 عام....
🍃🍃🍃🍃🍃
"ديريلي حل طوبى بالله عليك"
طوبى بضحكه؛شن تبيني نمشي نخطبهولك؟
عبير بضيق:مش قلتي بتكلمي بنت عمته؟
تنهدت طوبى وقالت؛ايه..بس ع عينك ياعبير اللي صار والله لهيت ونسيت بس حاضر اليوم ان شاء الله نكلمها..
عبير:وقوليلها تبي تاخد رقمك..
طوبى:ارزني شويه عبورة مش هكي!..
عبير:شن ارزني ماأرزني بعد اللي داره ع خاطري مازال تبني نثقل روحي عليه!؟ بيبو اني مش غبيه بش نضيع واحد زيه مرة تانيه..
ابتسمت بإستسلام وقالت؛تمام تو نقوللها..
ضحكت بفرحت وطبعت قبلتين ع وجنات طوبى وهي تقول..
ياوخيتي سلمها..
وطوبى تضحك عليها...
🍃وتمت هالساعات الجميله...وكانت من اجمل الساعات اللي عاشتهم طوبى الفترة الاخيره..
بعد ماروحوا الاطفال وامهاتهم والمدرسات..
وبعدين عبير..
خدت طوبى معاها اريج وتوجهت للمنطقه اللي تسكن فيها..
☘درست سيارتها قدام فيلا الجارة جميله وهي تقول..
هي انزلي..
نزلوا الزوز...
وطوبى مشت طول للباب ورنت جرس الانترفون..
اما اريج كانت توزع في نظرها ع واجهة فيلا الجارة جميلة..
ثبتت عيونها ع وحده من الشجره اللي اطول من السور بشويه كان فيها تحتها كاميرا تبي تدقيق وتركيز بش تنشاف.
انفتح باب الفيلا وكانت بنتها طبيبة الأسنان في إستقبالهم بإبتسامه حلوة..
:اهلا طوبى..
الزوز شبحولها وهما يردوا في الابتسامه وقالوا..
اهلا بيك...
~~~~~~~~~~
منية؛خلاص من غدوة ابدي دوام..
اريج:ان شاء الله..
منية؛بالنسبه للراتب مبدئيا تاخدي 450..
اريج هزت راسها وقالت:كويس..
منيه:وطبعا ع حسب المجهود اللي تبذليه و اتقانك اكيد حيزيد.
اريج وهي تهز في راسها بإيجاب:تمام..
وطوبى تسمع فيهم وهي تمرر في نظرها عليهم..
ع جية جميله بسفرة الضيافه وهي تقول..
مرحبتين مرحبتين بالجارة القنينه وبنية اختها..
ابتسموا وطوبى قالت؛بارك الله فيك..
ضيفتهم وقعمزت وهي تقول:ردي بالك عليها يامنيوه ماتحشموناش معاهم..
منيه بضحكه:ماتخافيش ماما في عيوني..
جميله شافت لأريج بإبتسامه وقالت؛قداش يعجبوني البنيات اللي زيك اللي في عمرك تلقيهم يجروا ورا التفتف الفارغ اما انتي ماشاء الله بنيه عصاميه..
اريج بإيتسامه خجل؛بارك الله فيك..
منيه؛والله ياماما هي اريج هي خالتها طالبه جامعيه وشاده ادارة مدرسه مش عارفه كيف قدرتي عليها هادي..
طوبى:مش بالساهل والله لو مافيش من وقف معاي ووراني راحت عليا ليل..
جميله ؛ربي يسخرلك الناس الطيبه بنتي ويفتحها عليك..
طوبى بإبتسامه:آمين...
🍃🍃🍃
وشويه وطلعوا من عندهم...
وطوبى روحت بأريج للشارع بعدين ولت للفيلا..
من بعد مابدلت حوايجها وصلت العصر..
نزلت للكوجينه وقعدت توتي في العشي لأن راجلها كان عنده غداء عمل...
دارت العشي موالح ومعاهم رز مخلط..
وكانت كل ماطيب من حاجه تاكل منها..
ومتجاهله صوت عقلها اللي قاعد يفكر فيها بكلام الجالي..
مش حتحرم عيلها من شي يطلبها مهما كلفها الثمن..
☘كملت وقعد بس الرز تراجي فيه يطيب..
مشت طلعت للصالون وشدت شيتاتها وقعدت تقرا..
سمعت صوت بوابة الفيلا انفتح..
حست بشعور ضيق شديد..لكن تجاهلاته وحاولت تلهى بقرايتها..
شويه وانفتح الباب وخش..
سكر الباب ومشي طول للدروج..
هي تبعاته بعيونها لين ركب فوق من غير مايلاحظ وجودها..
تنهدت..بعدين ناضت ومشت للكوجينه..
شافت رز..لقاته طايب..حطتله حاجاته وخلطاته وغطاته..
بعدين ولت طلعت لشيتاتها..
قرت شويه لين آذن المغرب..
خدتهم ومشت ركبت فوق..
وين خشت للدار..
لقاته راقد ع السرير بعمق...
شبحتله شويه بنظرات ضيق..بعدين مشت حطت شيتاتها ع الطاوله..ومشت خشت للحمام...
🍃🍃🍃🍃🍃
"انتي تتبلي عليها"
وهي مقعمزه ع مكينه الخياطه لابسه قفطان حوش لونه ازرق غامق وفيه زخارف لونها بني..وقايمه كمامها للمرفق ولابسه محرمه وعاصبتها فوق راسها قالت..
ايييه عليا منك يالطفيه كسرتلي راسي راك..اسمعي وخيتي اني اللي ريته قتلك عليه تبي تصدقي باهي ماتبيش تصدقي سلاامتك..
لطفيه؛اني قداش ليا وراهم وخلتيني ندفع لحد بش يراقبها هي ومالقي عليها شي بكل..
سكينه"مرت أب نجاة":خليك وراها الا ما تشدي عليها حاجه..
لطفيه رفعت حاجبها وقالت؛تو مش ولادك يخدموا مع ****** قوليلهم يدوروا ورا خواتهم..
سكينه؛لالالامانيش مدخله ولادي فيهم بكل هال...وقالت لفظ نابي...خليهم بعاد عنهم..
لطفيه:خواتهم في وجوههم كان داروا عار يلحقهم..
سكينه؛ماهمش معترفين بيهم خواتهم ولايبوهم بعد اللي داروه فيهم..
لطفيه تنهدت بيأس وقالت؛باهي اني نبي ناخد صغار ولدي منها الوسخه هادي..
سكينه سكتت شويه وهي تفكر بعدين قالت؛ماليك غير انك تخليك وراها لين تشديها بالثابت..
ناضت لطفيه وقالت؛ع العموم كان سمعتي ولاعرفتي حاجه خبريني طول..
سكينه هزت وقال بالتشديد ع الحروف؛حاضر..
ومشت لطفيه طلعت من المشغل اللي ديراته سكينه في الدور الاول اللي كانوا يسكنوا فيه نجاة وصابرين..
بعد ماطلعت..
قعدت تفكر وهي مضيقه عيونها للحظات بعدين تنفست بعصبيه وقالت..
حتى بنت شنيبه معاش ترد..اييه اني بنقعد وراهم لين نعرف شن في..
وشغلت الماكينه....
🍀🍀🍀🍀🍀🍀
وتمر الأيام وتتوالى...
وحال اريج ونضال كما هو عليه هي تحاول تعيش حياتها وتخدم وتبان قويه وهي من داخل من تاعبها فقده...
اما هو وراها وين ماتمشي وعارف كل خطوة قاعده تخطي فيها..
🍃اما آلاء..كانت مكمله في الخدمه اللي بدت بيها اريج لكنها ماكانتش بشوشه ومرحه مع المراة اللي توصل فيها تعاملها معاها كان سطحي جدا والمراة تعاملت معاها بالمثل..
وبرغم انها تبان عايشه حياتها عادي لكن ولالحظه غاب مهند عن تفكيرها..
🍃واميمه قاعده تتحدا وماشيه بطريقها لهدفه بخطوات قويه وثابته وبدي تعامل خالد معاها يتغير شويه شويه وهدا اللي زاد ريح وزاد ثقتها اما بنفسها..
لكن وسام كان قارفها بمحاولاته التقرب منها وكل ماتتجاهله هو يزيد اصراره عليها واعجابا بيها..
وهالشي مخلي امل زمليتها تزيد تنغاظ منها ومش معروف لعند امتى حتقعد كاتمه مشاعر غيرتها...
☘من جهة تانيه..
كانت حسناء تحاول جاهده التقرب من حسين اللي كان يتعامل معاها معامله جافه بعض الشي ومخلي بينه وبينها حاجز هي تحاول تكسره..بس ياترى لو عرفت ان هالحاجز هو حب قديم لازال حي وموجود في قلبه كيف ممكن تكون ردة فعلها!؟..
🍃وحب جديد قاعد يكبر...
وبتبدا كتابة سطور قصته قريبا....
نسرين...ربيع...
🌿🌿🌿🌿🌿🌿
يوم السبت
24من شهر مارس..سنة 2018..
الساعه 12:00قبل الظهر..
درست سيارة نسرين قدام حوش اهلها..
اول ماشافها ربيع..
طلع وقف قدام المطعم متاعه وهو يشوفلها بطريقه غير ملحوظه..
هي نزلت ونزلت معاها حاجات..
ولما سكرت باب السيارة..
شبحت جهة المطعم..
لقاته يشبحلها بعدين غير عيونه ببطئ بسيط..
هي غيرته عيونها عنه ومشت للباب..
ولما وصلت فيه ابتسمت ابتسامة خفيفه..وفتحاته وخشت سكراته وراها...
ومشت خشت داخل وابتسامتها قاعده ع وجهها وهي حاسه بشعور حلو بالمرة..
وصلت في الصاله وهي تقول..
حبيب ماما راقد ولانايض؟
مغليه بإبتسامه؛راقد ياروحي..
جاته وشافاته كيف راقد ابتسمت بحب بعدين قالت..
جت طوبى؟
مغليه؛ايه وركبت لجناحها قالت بنجبد شعري..
نسرين؛جبت واتي من برا مش لازم طيبوا..
مغليه؛احسن شي..ايه صغار خوك بيقعدوا في حوش جدهم جويده اليوم..
نسرين بشي من الضيق:احسن..خل نمشي نبدل ونجي..
مغليه؛ماتبيش تغيري رايك؟
نسرين:خيرك يام ولدي لمن نخليه؟
مغليه:خليه لفايزة مش قلتي ماتبيش تمشي..
نسرين بضيق:غير شن تقولي بس يام..
ومشت طلعت من حداها..
مغليه رفعت حواجبها ونزلتهم تهكما وقعدت تتفرج ع التلفزيون..
شويه سمعت باب الحوش انفتح..
قعدت تشوف لباب الصاله..
شويه وخشت نجاه وهي تقول:السلام عليكم..
مغليه بإبتسامه؛مرحبتين مرحبتين..
ابتسمت نجاه ومشتلها حطت كيسة قفطانها وسلمت عليها سلام حار..
مغليه؛باهي اللي ريناك..
ضحكت نجاه وقالت؛كيف حالك عمتي؟
مغليه؛الحمد لله..
وتباعدوا عن بعض ومغليه تقول:كيف حالك انتي وحال وخياتك؟
نجاة:تمام...الحمدلله..
وقعمزت..
ع خشة نسرين قالت؛اهلا نجاه..
ناضت تاني وهي تقول؛اهلين..
سلموا ع بعض..وقعمزوا مقابلات بعض..
ومغليه في صدر المكان..
حولت نجاه وشاحها وقالت:شن حال صغار المهدي؟
مغليه؛اهو عايشين يوم هكي ويوم هكي..
نجاة :ربي يصبرهم..
نسرين بإعجاب:صبغة شعرك المرة هادي فازت..
ضحكت نجاه وقالت؛جديات؟
مغليه بإبتسامه؛حتى اني عجبتني..
نجاه بإبتسامه؛تسلمي يارب..
نسرين؛اما نوع؟
نجاة؛نفس النوع اللي ديما ناخد فيه بس اللون غيرته هالمره..
نسرين؛فضاعه صراحه..بنقلدك راهو..
نجاه بضحكه؛قلدي..
مغليه:الله يبارك عليك باين حالك باهي هلبه..
ابتسمت وقالت؛الحمد لله..حتى بديت في الخدمه..
نسرين؛بالله! مش واعر..
نجاه؛قريب نسكر شهر خلاص وبعدين خدمتي الفترة هادي في الشقه بس..
ع خشة طوبى..وين شافتها تكدرت وحست بالضيق..
بس دارت روحها عاديه وقالت:السلام عليكم..
مشاعر الحقد والغيره في قلب نجاة تأججت..
بس الظاهر متاعها كان يبان لطيف ومسالم..
ناضت وقفت وهي تقول:وعليكم السلام..
جتها طوبى وسلموا ع بعض بعدين مشت قعمزت جنب عزوزتها..
طوبى؛كيف حال صحتك؟
نجاة بإبتسامه؛الحمد لله..انتي شن حالك..مررت عليها نظرها وقالت..تباني زايده ماشاء الله..
ابتسمت بالغصب..
مغليه؛مشناه السمن مانجبه شوفيني اني وهدا عمري كيف شاده لروحي..
طوبى شبحت لعزوزتها بنظرات ضيق..
نجاه شبحتلها وحست ان مغليه قاصدة طوبى..
ونسرين لاحظت نظرات طوبى وقالت؛كل حد وجسمه هاه شوفيني اني كيف وليت..
مغليه:انتي جايبه 4صغار راك..شبحت لطوبى وقالت..فكك من السمن سلم بنتي وشدي لروحك خير ماتقعدي تكركري في الشحم بعدين والدنيا مشرتعه..
نجاه قعدت مركزة ع وطوبى وهي تشوفلها بنظرات مكر..
اما طوبى اللي عدت للعشره قبل لترد قالت..
إن شاء الله..
نسرين غيرت الموضوع وهي تقول؛ايه نجاه قوليلي كيف خدمتك ولت في الحوش؟
ركزت معاها طوبى..
نجاه وهي تشوف لنسرين:استقلت من الشركه ووليت نخدم في الخاص..
تفاجئوا بالذات نسرين اللي قالت؛استقلتي؟
نجاه بإبتسامه؛ايه خلاص هداكا هو ليا فيها فوق السنه خدمت فيها بش نرجع نتفكر حاجات نسيتها لما قعمزت في الحوش وتوا خلاص لازم يكون ليا شغلي الخاص..
مغليه؛كيف بتخدمي في مكان تاني؟
نجاة بإبتسامه؛خشيت شراكه مع مجموعه مهندسين في مكتب..قريبا حنبدا نداوم فيه..
مغليه؛مش كان قعدتي في شركة الجالي خيرلك يساعدك ويسهل عليك..
نجاه بضحكه؛هو بروحه يبي يفتك مني قال نبي الساحه تخلالي توكلي..
مغليه بإبتسامه؛باهي مرات تفتحلك بيبان تانيه ومرات تلقي نصيب كويس..
طوبى قعدت مركزه ع نجاه..
ونجاه بضحكه وقالت؛مرات..نقولوا ان شاء الله..
ونسرين تشوفلها وهي مستغربه هلبه..
اما طوبى..
اللي سمعاته توا خلاها تقول في نفسها..
"هاه ريتي ياطوبى كيف اللي فكرتي فيه كله كان وهم وسواس تخيلي روحي تصرفتي بغباء وتهورتي وواجهتيه باللي كان في عقلك قداش منظرك حيولي بايخ وقتها هلبه ياطوبى..استغفر الله العظيم وخلاص"
نسرين رفعت حواجبها وقالت؛خيرك ماجبتي معاذ؟
نجاه؛فكيني منه سلامته مش حيريحني نعرفه خليته لمروة..
مغليه؛كلا اختك مروة هادي ربي يحفظهالكم..
نجاه بإبتسامه؛آمين..حتى راجلها طيب هلبه ومساعدها ومساعدنا معاها..
نسرين؛ربي يخليهم لبعض..اللي في الكيسه القفطان اللي بتلبسيه؟
نجاة؛ايه..خدت الكيسه وطلعاته منها وطرحاته..
كلهم قعدوا يشبحوله بنظرات اعجاب..
نسرين؛عطيك دعوة في ذوقك..بس يمشي مع جسمك ؟..
وقفت وشدت بلوزتها من الظهر وقالت..
شني؟
قعدت طوبى مركزه.ع جسمها..
نسرين:ايه عادي قعدي فتره ماتاكليش طبيعي بيولي جسمك هادي..
مغليه؛حافظي حافظي..
نجاة بضحكه:حاضر..وقعمزت..
وعيون طوبى ع الفستان اللي كان موديله حلو ومميز..بس يبي جسم طوبى زمان...مش توا...
شافتلها نجاه بطرف عينها بنظره ماكره وشبه فهمت اللي قاعده تمر بيه طوبى..
بعدين لفت فستانها وحطاته في الكيسه وقالت؛امتى تبدا الحفله؟
مغليه؛قالوا السبعه..
نجاة؛اها..شافت لطوبى وبنظرات فيها شي الرجاء:نطلب منك طلب طوبى؟
شبحوا مغليه ونسرين لطوبى..
وطوبى شافت لنجاه وقالت؛تفضلي..
نجاه:نبيك زي هديكا المرة ديريلي شعري وتمكيجيني عادي؟
مغليه؛مازال في وقت هلبه ديرلك ودير لروحها..
وطبعا طوبى لايمكن تخالف كلام مغليه وماتقدرش..
ابتسمت لنجاة مجامله وقالت:باهي بعد الغدي نبدا بيك..
نجاة بإبتسامه؛صحيتي حبيبتي..
ونسرين تشوف لنجاة بشك وحست ان في قصد من ورا هالطلب...
🍃🍃🍃🍃🍃
"عارفه يانجوحه مايوصوكش لكن كليمات في قلبي ليهم سنين نبي نقولهم لبناتي لما يطلعوا من حوشهم لحياش رجالاتهم"
نجاح وهي مبتسمه ودموعها في عيونها..
قولي يام..
نجمه ولمعة الدمعه واضحه في عيونها:ارفعي روسنا قدام راجلك وناسك وريهم انتي كيف تربيتي احسن تربيه وانك بنت اصل ومفصل..ديري واجبك لافوق منه لاتحت منه يابنتي وقدري روحك وردي بالك تخلي حد يحسسك انك ناقصه ولاماصدقتي تزوجتي ايوه خليهم كلهم يعرفوا من غير ماتقولي انه قطع كنادره ع بوك وخوتك بش رضيتي بيه من قبل مايتزوج..وهاليتيم وليده ديريه ولدك يابنتي وعامليه لله يابنتي ردي بالك هدا ليه الله لو في نهار ظلمتيه ياويلك منه...
نجاح ابتسمت وقالت؛ماتخافيش يام والله ماتخافي..
نجمه؛عارفاتك بنتي عارفاتك..وضمتها وهي تقول..ربي يهنيك ويباركلك ويبارك فيك بنيتي...
ضمت نجاح امها بقوة وباستها من خدها وبعدين من راسها..
نجمه مسحت دموعها وهي تقول؛هي اطلعي بسرعه خوك يراجي..
نجاح وهي ترشف؛بالسلامه..
ومشت طلعت من دار النوم..
وامه قعدت داخل تبكي بروحها..
☘تلاقت نجاح مع نساوين خوتها سلمت عليهم كلهم..
وسلمت ع الصغار..
ومشت طلعت مع عواطف واصوات زغاريدهم مراقفتهم...
☘☘☘☘☘☘
الساعه 3:30بعد الظهر..
ماشيه نجاة لجناحها وطوبى وراها..
فتحت الباب وخشت والتفتت لطوبى وقالت؛خشي حبيبتي..
خشت طوبى وهي تحاول ع قد ماتقدر تبان عاديه..
سكرت نجاة الباب وهي تشبحلها من وراها بنظرات كلها غل..
فيسع بدلتهم وقالت؛شن حال اختك سدره؟
طوبى وقفت حدا الزيانه وقال؛حالها هو هو ماتغير فيه شي..
حطت نجاة الاستشوار والفرشه ع الزيانه وهي تقول..
ربي يشفيها وينوضها عن قريب..
طوبى:آمين..
قعمزت ع الكرسي..وطلقت شعرها وهي تقول..
طوبى نبيك اليوم طلعيني اليوم طلعه تخليتي واثقه من روحي..
ركزت طوبى بنظرها ع عيونها..
نجاه وهي تشوف لروحها في المرايه..
نبي ننسى اني وليت ناقصه..
كلامها وجع قلب طوبى اللي قالت..
ماتقوليش هكي..ماهو كلنا حتجينا مرحله نعيشوا فيها اللي عايشتيه توا ومش حينقص فينا ولافي انوثتنا غرام...
احمدي ربك انك ام وعندك صغار شن مازال تبي تاني خلاص..
نجاة شبحتلها من المرايه وقالت:كلامك صح..
طوبى:حندير جهدي بش نطلعك طلعة ترضي عليها..
نجاه ابتسمت وقالت؛باهي ابدي الوقت يفوت..
طوبى:تمام..
ومشت تشغل في الاستشوار ونظرات نجاة الخبيثه ملاحقتها..
التفتت طوبى وخدت توكات ومشط..
وجت لنجاة وقسمتلها شعرها..بعدين بدت تجبد فيه..
ونجاه خدت تليفونها وخشت ع الفيس ولهت روحها بيه..
بانت المشهد..
وكأن نجاه مقعمزة في مزين وطوبى تخدم فيها...
طوبى حسنة النيه اللي اشفق قلبها ع نجاة من حديثها كانت تخدم فيها فعلا بس تجبر بخاطرها..
معروفه المراة مهما كانت قادره وقويه لو يصير فيها اللي صار لنجاة اكيد حتنكسر كسر قوي وتتألم..
وطوبى مراعيه الحاجه هادي هلبه لأنها مراة زيها وحاسه بيها..
🍃ونقص نجاة هدا كان مخليها تزيد تحقد ع طوبى اكثر من قبل وتترصدلها وتنتقم منها ع البارد بدون ماتجيب الشبهه لنفسها بش طيح طوبى في افخاخها...
وهدا كله بس لأنها تشوف فيها سرقت منها الراجل اللي تحبه..
الراجل اللي بايعها ومطلعها من حياته وولاسائل فيها...
كملت طوبى شعر نجاة ولماته..
وبدتلها في الزينه...
وهني بدت نجاة الشغل الخبيث..
بعد ماقطعت مشوار في حط المكياج..
نجاة:شويه بس طوبى..
وشافت للمرايه:لالامش هكي نبيه مكياج العين..شوفي للقفطان وركزي عليه طوبى..
شافتله وقالت؛يمشي معاه..
نجاه؛لاماعجبنيش مابرزش جمال عيوني..نبيه لونه يكون ماشي صح مع القفطان..وكبري عيني بينيها..
طوبى وسعت بالها زياده وقالت:باهي اما لون تبيه..
وورتها الوان الظلال..
نجاه؛تبي هدا..
طوبى:تمام..
حطت اللي فيديها ع الزيانه..وبدت تمسح في مكياج العين كله..
ونجاة تقول في نفسها..
"مازال ماريتي شي"
مسحت طوبى وعاودت من جديد..
وهي تفكر في الوقت اللي قاعد يفوت وهي مازال ماجهزتش نفسها..
ومع هدا اتقنت مكياج العيون..
نجاه وهي تشوف للمرايه؛ايوه هكي احلا..
طوبى:تمام..شن تبي لون الروج..
نجاة:مثير..
طوبى:تمام...
وقعدت دور ع النوع اللي تبيه نجاه وحطتهولها..
وبعدين حطت اخر لمساتها..
طوبى:صحه صحه
نجاة بإبتسامه؛ سلمك حبيبتي يحط ايدياتك في الجنه..
طوبى:شعرك بعدين ارفعيه من هني شويه..وقعدت توريلها شن دير..وحطيها الهيدبيس..
نجاة:ok
طوبى بضحكه:حتروحي بعريس الليله..
ابتسمت نجاة في وجهها ابتسامه كاذبه وقالت..
زعمه؟!
طوبى:اكيد...هي خل نمشي نوتي روحي..
نجاه؛سامحيني ضيعت عليك الوقت..
ابتسمت ابتسامه واسعه وقالت..
مانحتاجش وقت..سلام..
ولفت ومشت..
ونجاه قالت؛سلام..
وبعد ماسمعت باب الجناح تسكر..
شافت للمرايه وقالت..
كانت ماخليتك يالجالي تموت ندم معاش نتسمى..
🍃🍃🍃🍃🍃
وركبت طوبى..
لما شافت الساعه لقت الوقت داهمها خلاص معاش تلحق..
فقررت دير لروحها مكياج ناعم الوانه ماشيه مع القفطان المغربي..
بعد ماكملت لبساته...
وشافت لروحها في المرايه..
ربطت الحزام وهي مركزه ع بطنها..
طوبى؛مش واضحه..بعدين ابتسمت تهكما وقالت..
كرشة ع قولته..
بعد كملت..رفعت شعرها ذيل حصان..
ومشت عليها بإيديها..
لما حولتهم ..جي شويه من شعرها في يدها..
شافتله بضيق وقالت..
بدي يطيح هلبه..
كمكماته فيدها ومشت بتلوحه في سلة الحمام..
وهي بترميه في السله..
انتبهت لحاجه غريبه في شعرها..
زادت ركزت فيها وقالت..
ايه والله لشعره بيضا!..
حولتها من بين الشعر وقعدت مركزة وهي مصدومه..
قطع عليها صوت رنة تلبفونها..
لوحت الشعر كله في السله..
وطلعت تجري بش ترد ع تليفونها..
خداته من الزيانه..وفتحت الخط طول..
"هيا طوبى انزلي نضال يراجي.."
طوبى:هيا عمتي نازله نازله..
"سقدي روحك"
وسكرت..
وطوبى مشت بسرعه خدت عبايتها لبستها..
وخدت الشنطه..ولبست كندره حاطيه خدتها للقفطان..
ومشت طلعت من الدار..
ونست طقم الفضه اللي خداته من اختها وجت بتلبسه ع الزيانه....
🍃🍃🍃🍃🍃🍃
في مكتبه..
مقعمز يستنى في أي اتصال يجيبله خير يسره ع ولده...
شويه خشت عليه السكرتيره وقالت..
استاذ بشير..
شبحلها..
:استاذ مختار جي وطالب يشوفك..
هو باستغراب..
دخليه..
مشت طلعت...
ولحظات خش مختار وقال..
السلام عليكم..
ناضله بشير اب وليد..ومشاله سلم عليك..
بشير:اهلا وسهلا..اهلا..كيف الحال..
مختار؛تمام..كيف حالك انت..
بشير تباعد عنه وقال بضيق:الحمد لله ع كل حال..
تفضل..تفضل..
وقعمزه ع الكنبه وقعمز جنبه..
مختار؛في الحقيقة يابشير جيتي هادي جية لوم وعتب..
بشير:علاش؟!
مختار؛معقوله ياراجل يصير فيك ماصاير واني اخر من يعلم!؟ مش قبل قايلك حتى لو الشغل بينا تم لما تحتاجتي تلقاني راهو ماكانش مجرد كلام..
بشير بضيق؛شن بنقولك..ماخطرش في بالي بعد المشاكل اللي صارت انك ممكن تساعدني.
مختار:حياتي الشخصيه والخدمه مالهمش علاقة ببعض..وتبادل المصالح اهم اساس اسس الخدمه متاعنا..
يوم نخدمك..يوم تاني انت تخدمني ولا..
هز راسه بإيجاب وقال؛مزبوط..
مختار:مادام عارف انه مزبوط علاش ماكلمتنيش اول ماصارت معاك هالمشاكل..
بضيق قاله؛والله معاد قعد فيا عقل شغلي قاعد ينهار لقيت روحي مديون بين يوم وليله ولدي معاش نعرف مكانه ماقعدش منه كان سيارته اللي خانبين كل شي فيها..معقوله يكونوا قتلوه ولوحوه ولاشن داروله..
وحط راسه بين ايديه وهو ع وشك البكاء..
مختار رفع حواجبه ونزلهم..بعدين حط يده ع كتف بشير وقاله؛شد حيلك بشير وقوي عزمك وخلي موضوع ولدك عليا..
بشير؛ماخلينا من كلمنا ماخلينا وين شفنا مالاش اثر..
مختار:قتلك خليه عليا ومادخلكش بشي ..
نزل ايديه وشبحله وقال:زعمه قاعد حي..
مختار:بإذن الله..نعطيك وعد حندير جهدي ونلقاه سليم معافى..
بشير:يارب.
مختار؛وبعدين نشوفوا المواضيع الثانيه...
بشير:والله ماعارف شن نقولك..
مختار ابتسم وقال:نقعدوا اهل يابشير..
نزل بشير عيونه وهز راسه وهو في قمة الضيق..
ومختار يشبحله بإبتسامه باردة خبيثه وهو يطبطب ع ظهره..
#رسالة_اخيرة
#طوبى
....يتبع....
(نعتذر عن قصر الجزء بديت فيه متأخر)
