# طوبى "شارع القهوة"
#جمان_فريد
#الجزء_التاسع_عشر"كسروا قلبي"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"ابله نسرين نبي الحمام"
نسرين؛بري حبيبتي بري تعرفي مكانه..
ابتسمت اريج ولفت ومشت طلعت من الصاله بإتجاه الحمام..
وصلت فيه وخشت..
وبعد لحظات طلعت منه...
اريج كان عندها عيب اوميزة..وممكن يكونوا عيب وميزة في نفس الوقت..
حب الفضول والاستطلاع..
المكان اللي تمشيله لازم تسطلع كل ركن فيه..
بعد ماطلعت من الحمام..
قعدت تمشي وتشوف في الحوش..
شبحت لباب الكوجينه..
ابتسمت بفضول ومشت خشتلها..
لقت فيها الشغالات المغربيات يوتوا في الضيافه..
ارتبكت من نظراتهم ليها..
بس هي فاتتهم ومشت طلعت من الباب الخارجي..
ضمت روحها وقالت؛يييي صقع صقع..
ومع هذا مافكرتش تولي كملت باقي جولة الاستطلاع متاعها..
عجبها الجنان هلبه..مرتب ونظيف..والزرع اللي فيه حلو..
وهي تمشي وتتفرج..
سمعت باب الحوش الخارجي انفتح وتسكر..
بعدين سمعت صوت يقول..
"وراسك ياعزيزة الراس الا كنت نكلم في واحد صاحبي عند موضوع وقعدت نحل فيه معاه"
هي قربت من مصدر الصوت..قعدت تمشي جنب حيط للحوش..
لين وصلت في اخره وبينت راسها..
شافت نضال واقف يتكلم بالتليفون..
اريج:هو انت ياطولان!
نضال:ياحبي مش عارف علاش ماتبيش تصدقي ان ماعنديش غيرك في حياتي ............سهى ياعمري راهو كان بتقعدي شكاكه هي بتخليني نفوتك.......................................
خلاص معاش تعاوديها قلبي خلي بينا ثقة..................لالا خلاص مش زعلان............هاه نحبك نحبك نحبك وضحك.....تمام تمام..يللا باي عيوني توا بعد نفضى نهدرزوا يللا...سلام...سلام...وسكر منها وقال...عليك حصله...مش عارف شن ندير بش نسلك منها...فوتها توا خليني في البنيه متاع الفنون اللي تعرفت عليها اليوم..
اتصل برقمها وهي طول ردت..
نضال بإبتسامه ونبرة صوت ساحرة:ياهلا بالحلو
ضيقت اريج عيونها وقالت:ااه ياملعب يابناوتي ااه..
نضال:ياعسل والله في بالي من لما خليتك ماغبتيش عن عقلي بكل..
سمع حركه جهة باب الحوش..
يحساب مراة برانيه بتطلع.
فيسع هرب يجري لين وصل في اريج..
وهي كانت واقفه تشوفله من فوق لتحت..
نضال:لاحبيبتي كنت نجري في مكاني الجو صقع برا نسخن في جسمي..
شاف نسرين طالعه برا تتكلم بالتليفون..
مط شواربه بملل..بعدين لف بيمشي وهو يتكلم..
فجأة..
يتنطر من مكانه مفجوع وهو يقول:ياربي!
اريج كانت واقفه تشبحله وهي مضيقه عيونها وضامه شواربها القدام بإزدراء..
نضال بفجعه:شن ديري هني انتي!؟..........لالا مش عليك مش عليك.....غير واني نتمشى في جنان الحوش طلعت في وجهي بنت اختي..
رفع اريج حواجبها...
نضال بضحكه ارتباك؛عمر هكي في حدود 11سنه....رفع حواجبه وقال...تبي تكلميها!؟
رجعت اميمه ضيقت عيونها.
نضال هز راسه وقال:باهي لحظه بس..
غم التليفون بإيديه وطبس ع اريج وقال:معليشي سايريني بالله عليك..كلميها..وكان سألاتك عليا قولي كلام حلو بش تاخدي عشرة جني.
اريج وهي تقلب في عيونها وتفكر بعدين شبحتله وقالت:20
نضال:تمام عشرين غير قولي اللي قتلك عليه..
اريج مد يدها وقالت:العشرين قبل..
نضال:وااك منك يادريه انتي..
حط يده في جيبه وقعد يطلع في الفلوس...طلع في الاول عشرة بعدين زادهم عشرة تانيه ومدهولها..
هي خدتهم وقالت:هات التليفون..
نضال:زي مااتفقنا باهي وكان درتي اللي قلت عليه نزيدك 10تانيه..
اريج:ok..
رجع نضال كلم صاحبته وقال:سامحيني حبي عطلت غير كنت نقنع فيها هي حشوميه شويه......اهي معاك..
مدلها التليفون وهو يمسح في ذقنه ويترجى فيها بهمس.
هي ابتسمت بثقة وهزت راسها بإيجاب وخدت التليفون..
وقالت:آلو.....الحمد لله....انتي شن جوك.....اسمي اريج...تقرا اولى اعدادي....ايه خاشه قبل عمري.......شكرا شكرا.....خالو..وشبحت لنضال ..
وهو يشوفلها بإبتسامه ارتياب.
اريج:خالو يهبل خالو مش عادي عندي احسن خال في خوالي كلهم..
ابتسم نضال بفرح..
اريج:حنينه تحبه اكثر واحد وماما وخالاتي وبناويت خالاتي اصلا البنات كلهم يحبوه هو يحبهم..
فنص عيونه..
اريج:ايه يحب البنات عنده قريب رقم عشرة خمسطاشر بنت وكلهم مصاحبهم..قبلك انتي كان يكلم في بنيه اسمها سهى ويقوللها حبي...وانتي توا يقولك حبيبتي مش قتلك يحب البنات كلهم..
نضال حط يده ع قلبه وهو يشوف لأريج بصدمه..
اريج:باهي تو نقوله..باهي..
وسكرت مدتله التليفون وقالت؛قالتلي قولي لخالك معاش يتصل برقم هدا..
خدي التليفون وقال:صدق من قال اقربهم للأرض اكثرهم فسادا..
اريج:ياصالح انت ياصالح !
نضال:جيبي جاي الفلوس خيرلك جيبي!؟
اريج ضحكت بإستفزاز وقالت:إنلاا...
ولفت تجري للكوجينه وهو قعد يجري وراها وكان حيلحق عليها..بس هي كانت اسرع وخشت للكوجينه..
نضال:هالدريه شيطانة الرجيم!..خبط جبهته وقال..حتى اني مضحكه..
ولف ومشي وهو معصب..بعدين مشي قعمز في تركينه في الجنان ...
☘☘☘☘☘
فهالوقت..
داخل..
شغلوا المنظومه وبدوا البنات يرقصوا..
نجاة نخصت صابرين تنوض..
ناضت صابرين وخدت وشاح ومشت في نص الصاله..
الكل كان يتفرج ع اللي يرقصوا..
بس صابرين خطفت منهم كل الاضواء وخلت العيون عليها..
اميمه بإبتسامه؛محلاها!
فايزة:بس لبسها اوفر شن هدا..
صفيه:تبي الحق ماخشتليش راس كيف قاعده مخطوبه بس وتجي تحضر مناسبه لعيلة خطيبها لاوجايبه اختها معاها!
فايزة:عندك حق..
اميمه تسمع فيهم ومركزة مع صابرين وعاجبتها..
وعيون غرفه عليها..نظراتها كانت كلها حسد وغيره..
قريب طق من الغيره..
شويه ركزت ع صابرين كيف مشت نوضت اختها وجابتها معاها وقعدوا يرقصوا الزوز..
فردوس:حلوات هلبه الزوز..
غرفه:الكبيره بالذات..
وطوبى تشوف لنجاة ومازال نفس الاحساس مرافقها ومش عارفه ليش..
وقفوا هما الزوز رقيص وولوا قعمزوا..
قعدوا يقولوهم يعطيكم الصحه..
هي كانوا يردوا بالإبتسامات فقط لاغير...
ع خشة عائشه ومعاها امها رافعه سدرة المهدي في غمرها..
كانت تمشي كويس نوعا ما..
وصلت في الكرسي المخصص ليها وقعمزت عليها وحطوا بنتها في السرير اللي جنبها..
وناضوا المعازيم وبدوا يسلموا عليها..
صابرين:حلوة هلبه..
نجاة:هادي مرت المهدي..
صابرين:واني نموت ونشوفه هالمهدي هدا..
☘بعد ماالناس سلموا ع عائشه وحطوا للبنيه النحيله...
جوها صاحباتها وقعمزوا حداها وقعدوا يهدرزوا مع بعض..
والمنظومه مازال شغاله..
شويه ناضت اميمه وهي شادة في ايديها الزوز حاجه ومشت بإتجاه عائشه..
وين تنوض اميمه وتتحرك العيون تحاصرها لهدا كانت تمشي بخجل..
وصلت فيهم وقالت:عائشه..
شبحولها البنات..
عائشه ضيقت عيونها وقالت:ميمو هادي الله يبارك!
ابتسمت اميمه بخجل..
فايزة:ريتي الجمال ريتي!
نسرين:من لما كانت صغيرة وهي عسل مش جديد عليا اللي شفته..
عائشه:صح تتفكروا في عرس فردوس اخت سدرة لما لبست القفطان اللي فصلاته الخياطه اللي كانت هني..طلعت زي الأميره..
نسرين:متفكرتها صح..
اميمه بإبتسامه خجل:خلاص ياجماعه حاسه روحي بندوخ..
ضحكوا..
وقالت فايزة:ماقلنا الا الحق..
ضحكت بعدين مدت جوارب صوف لونهم وردي حلوات هلبه وقالت:هادم مني لبنتك درتهم بإيديها..
تفاجئوا وقالت نسرين:قصدك ديري بهديكا اللي نشوفوا فيها فالرسوم متاع حياكة الصوف..
ضحكوا البنات..
اميمه وهي تضحك:ايه..اول ماخش الشتي شريت وحده وقعدت نتعلم عليها عندي مجله زمان كان واخدتهالي سدرة فيها عن التفصيل والخياطه والحياكه..ضربت في راسي وقلت نتعلم عليها لما نكون فاضيه وهادي اول حاجه نديرها..
خدتهم عائشه وقالت:والله احلى من غير مجامله..
اميمه بإبتسامه:تبيدها بالهني ياربي.
عائشه:تسلمي حبيبتي..
هزت راسها وقالت وهي تضحك:مالا نخليكم...
عائشه:ربي يحفظك..
اميمه:ويحفظك..
ولفت بتمشي لمكانها..
ماحستها الا وفي حد جبد يدها وقعد يقوللها:ارقصي هي..
تفاجئت وين شافت خديجه وبعدين قالت:مانعرفش..
خديجه؛عادي هزي شويه حتى بكتافك..
ضحكت اميمه بإحراج وقالت؛بنحشم روحي.
"اميمه اميمه اميمه"
شبحت لمصدر الصوت لقت طوبى واريج يشجعوا فيها..
وفردوس تضحك عليهم..
وغرفه تمرر في نظرها عليهم بغيظ..
بعدين سمعت هتافات التشجيع نفسها من فايزة..
قعدت تضحك..
خديجه؛هي جامليهم..
اميمه غمضت عيونها بعدين فتحهم وهزت راسها وقالت:نحاول...
خديجه:هيا واني معاك..
وبدت ترقص هي وياها..
اميمه في الاول كانت متحشمه بس وين سمعت صوت التصفيق تشجعت..
وبدت ترقص..ورقيصها حلو..
طلقتها خديجه وقعدت تتفرج عليها..
وهي منسجمه مع الاغنيه وترقص..
الكل كان مبهور...
ومتسائل وين كانت داسه بنت عبد المطلب الواعر هالانوثه والجمال!؟
ماكانش مدسوس..
بل كان مدفون..تحت ركام نفس محرومه ماديا وعاطفيا..
نفس مكسورة...فاقدة العمود الاساسي اللي يقدر يقيمها من جديد...هو الثقه..
الانثى لما تفقد الثقه بنفسها..تذبل وكل شي حلو فيها يندفن..
بس في روح بريئه حبت طلع كل الكنوز المدفونه عند اميمه..
وفعلا كان لها ماارادت..
وكانت فرحانه هلبه باللي شافاته عليها اليوم...
بنيه جميله كلها انوثه..وحيويه...عجبتها روحها لأول مرة..
وفي الوقت اللي كانت فيه اميمه عايشه احلا لحظتها..
في من كان في وسط زحمه وهدرزة واجواء صاخبه..
عايش برا هالجو كله...عايش معاها هي..
بين عيونه كانت في كل حالاتها..اللي شافها بيهم قبل واللي شافها بيه الليله..
خلاص معاش يقدر يكابر قدام نفسه اكثر من هكي..
وقع في المحظور وكان اللي كان..
وهو اصلا طايح في حبها ليه زمان..
صح مش بعيد مايفوتش الشهور..
بس قدرت فهالشهور دير فيه اللي ماقدر غيرها يديره في سنين...
"عمر ياهوو"
استاقظ وشبح لصحابه..
لقاهم يشبحوله..
وواحد منهم تسائل بغمزة عين:وين ديار عقلك؟
عمر:هني ماعندي وين نرفعهم...مرر نظره ع القهوة وقال..وين باقي الولاد لتوا ماجوش..
:في الطريق قالوا..
وهو رجع لهي مع صحابه في الهدرزة..
بس قلبه قاعد يدق بقوة وكأنه قاعد يشوف في اميمه قدامه...
🌻🌻🌻🌻🌻🌻
مقعمزات الحاضرات وكل وحده عندها صونيه عشاها وتتعشى..
واميمه تاكل وهي تسمع في هدرزة نسرين وفايزة وعائشه...
نسرين:والله نفكر نديروه عيد ميلاد كبير نغيروا جو..
عائشه:مرات كان ديريه هني عزوزتك ديرلك مشكله..
نسرين:تمشي تملح..
فايزة:باهي اعزموني..
نسرين بضحكه:تعالي من غير عزومه كان احمد خلاك لأن عيد ميلاد عمر مع فرح تو بيدك خشمه حتى هو عمر مافاتله عيد ميلاد ومااحتفلش بيه..
ضحكوا..
وفايزة قالت؛جو عليه خوك هدا كيف يحب روحه..
نسرين؛اكثر حاجه يحبها في الدنيا عمر وبعدين بوي وامي..
قعدوا يضحكوا البنات..
واميمه تسمع فيهم وهي مبتسمه..
لكن ضايقها شويه كلامهم عن عمر وحساته ظالم..
هي شايفاته كويس لما عرفاته عن قرب مش زي ماهما يحكوا عنه..
☘انتي اللي شايفتيه هكي ياأميمه☘
عائشه؛فكريني هو امتى بالزبط..
نسرين:حي عليك مش حافظه عيد ميلاد بنتي..
عائشه:نتفكر عيد ميلاد سدرة بس هدا بس اللي لوميني عليه كان نسيته
نسرين بضحكه:صح..ياستي 17_2
عائشه؛اها ايه تفكرت بنتك جاتك في الشتي وولدك جي في الصيف..
اميمه لقطت التاريخ ابتسمت وقلبها يدق بقوة..
وقامت تليفونها سجلاته في المذكرة بعدين حطاته وقعدت تفكر وهي مبتسمه بحب..
وعيون غرفه وهي تاكل معاها..
مابتش تمشي تقعمز حداها ولاتهدرز عليها ماكانتش طايقتها ولاقادرة حتى تمارس هوايتها المفضله..
تحطيم معنوياتها..
واميمه وكأنها كانت متحاشيتها..
متحاشية تسمع صراحتها زي ماهي تقول..
تبي تقعد عايشه في سعاده المجاملات..تبي تحب نفسها وتحب حياتها حتى لو لساعتين بس...ماتبي شي ينغص عليها..
🌻ومن جهة تانيه...
كانوا نجاة وصابرين يتعشوا ويراقبو في الوضع..
شويه صابرين قالت؛نبي نمشي نشوف مكياجي..
نجاة؛استني...ونادت..نسرين...يانسرين..
التفتت نسرين شبحتلهم..
بعدين حطت صونيتها ع الطاوله وناضتهم..
مشتلهم ووين وصلت فيهم قالت..
نسرين:تبوا حاجه..
نجاة:صابرين تبي تساوي مكياجها..
نسرين شبحت لصابرين وقالت:نوضي معاي حبيبتي..
ناضت صابرين ومشت ورا نسرين..
طلعوا من الصاله ووصلتها للمدخل وقالت:اهو هني..
ابتسمت صابرين وقالت؛شكرا..
نسرين؛العفو..
ومشت وخلتها..
صابرين دارت روحها تشوف في مكياجها..
لين تأكدت ان نسرين تباعدت..
رفعت حاجبها وقعدت تمشي في الحوش ودور..
وتشوف فيه بالحاجه..
لين قابلتها مكتبه صغيره...فوقها تحف وكاتروات صور..
قعدت تشوف للصور..
وحده فيهم صورة جماعيه للعيله كلها واخدينها مؤخرا..
قعدت مركزة في الولاد..ماعجبها حد منهم الا واحد بس..
المهدي..
ابتسمت وهي تتفرج عليه...
حطت الكاترو هدا...وقامت التاني...
كانت صورة للمهدي في حفل تخرجه..
زادت شعور الاعجاب في لحظات...
شبحت للصورة التانيه خدتها وقعدت تقارن بينهم..
يبان كبر هلبه..بس مازال جذاب...
لكن اللي منغص عليها جمال الصورة هو وجود عائشه معاه فيها...
صابرين؛مش ليه بكل..
وردت الكاتروات في مكانهم..
وقعدت تشبح لصورة ابتسمت..
بعدين لفت ومشت بسرعه..ولت للصاله..
خشتلها وشبحت لعائشه حست بشي من الغيرة..
ومشت قعمزت جنب اختها..
صابرين؛مش هيا نجاة الوقت تأخر..
نجاة شبحت لساعتها وقالت:ايه هداكا هو..
وناضوا هما الزوز.
شافتهم نسرين مشتلهم وقالت:خيركم؟
نجاة بإبتسامه:بنروحوا خلاص هداكا هو..
نسرين؛كان تزيدوا ربع ساعة تانيه..
نجاة:والله مافيها كيف الوقت تأخر هلبه..
نسرين بإبتسامه:ع راحتكم..
صابرين:العبايات معليشي.
نسرين:لحظه بس...
ومشت..
ونجاة قامت تليفونها واتصلت بالطاهر بتقوله انهم مروحين بش يلحقهم بالسيارة..
بعدين جتهم نسرين بالعبايات والبونبونيرات..
وسقدتهم هي وامها...
وين جو طالعين كان في زعمه..
بكل جرأة صابرين قامت عيونها دور ع المهدي..
بس جو في عيون محي راجل خديجه..
لما شافها..انخبط فيها..
وهي طول غيرت عيونها عنه دور في المهدي مالقتاش.
وصلوا في السيارة وركبوا..
شويه وبان عليهم طاهر جاي ومعاه المهدي رافع ولده يزن في حضنه..
صابرين لما شافاته ماتت فيه..ع الطبيعه مازال احلى وجذاب أكثر..
نجاة:هو هدا المهدي..
صابرين؛ياجعنه مهديا اني..
شبحتلها نجاة وضحكت بتعجب..
لقتها هايمه فيه..
شويه ومشي بولده وصابرين معاه بعيونها..
ومحي الدين مش قادر يحول عيونه عنها..
وطاهر مشي بسيارته..
شغلت نجاة سيارتها وتحركت..
وطاهر طول تحرك وراها...
ومازال عيون محي يلحقوا في صابرين لين اختفت السيارة..
☘☘☘☘☘☘
وفي حوش الواعر..
مقعمزين سدرة وبوها يتفرجوا ع التلفزيون...
سدرة:راحت العراق خلاص...ااه الله يرحمه ويجعله من اهل الجنه يارب العالمين..
لطفي تنهد وقال:كنا في فلسطين وتوا العراق والله اعلم من مازال تاني..
سدرة:ربي يكفينا شر الحروب يارب..
لطفي:آمين..امين..بنتي..
شبحتله..
لطفي:مرتاحه؟
ابتسمت وقالت:والله مرتاحه قداش ليا ماعشتهاش هالراحه..
لطفي بإبتسامه:ان شاء الله دوم..حتى الفاندي راجل كويس..
سدرة قعدت ساكته وهي مبتسمه..
شبحلها بوها شويه بعدين قال:بس في حاجه نبي ندوي معاك فيها..
سدرة:عارفه شن هي..اني حالفه بوي وواخدة عهد ع روحي قدام ربي...
لطفي قعد يشبحلها وهو ساكت..
سدرة؛بوي..ريح بالك من الناحيه هادي بوي معاش تفكر بكل.. تنهد لطفي وهز راسه وهو يشوف للتلفزيون.
وسدرة تشوفله بضيق..
فجأة..سمعوا الباب انفتح...
سدرة:شكلهم روحوا..
لحظات وخشوا عليهم..
فردوس:السلام عليكم..
لطفي وسدرة:وعليكم السلام..
وخرت فردوس لما شافت بوها وفنصت عيونها وهربت خشت داخل..
وسدرة شاده ضحكتها..
بعدين شافت فايزة وسدرة خاشات يجروا..حتى هما..
اما طوبى واريج وآلاء..
خشوا عليهم الصاله..
طوبى:قاعد فايق بابا..
ابتسم وقال:ايه ياعيوني ترا تعالي..
مشتله طول قعمزت جنبه وهو خداها في حضنه وقال:انتي بنخليك عندي مش عاطيك بكل..
طوبى بضحكه:احسن حاجه..
قعدت تضحك سدرة..
آلاء مشت قعمزت جنب جدها ورفعت يده وخشت في حضنه وغمضت عيونها..
هو ضمها وقعد يضحك..
اريج:اني مش جاياتك جدو مانحبش الزحمه.
الاء وهي شبه راقده ضحكت بسخريه..
طوبى:اصلا معانا انتي ماعندكش مكان اني حبيبة بابا وهي حبيبة جدها .
الاء:وكتموتوا كتموتوا...
ضحكوا لطفي وسدرة..
اريج:يامسكينات...اني مكاني وسط قلب جدو من داخل..
لطفي بضحكه:صحه ليك..
سدرة بضحكه:اااه من هالجيل ااه...
🌻🌻🌻🌻🌻🌻
وفي الحوش اللي في جنبهم..
كانت اميمه واقفه ع المراية ومازال قاعدة تتفرج ع روحها..
ابتسمت بعدين قالت؛حتى ع الطبيعه حلوة...كلهم قالوا هكي..
وخدي كلينكس معطر..وبدت تمسح في المكياج..
عانت هلبه ع مامسحاته مسحة كويسه..
اميمه:واك وجهي كان رزين وخف...شبحت لوجهها في المرايه..
وتفكرت نظرات مغليه وبناتها ليها..
قلبها طار من الفرح..
ضحكت..بعدين مشت بتاخد حوايجها بش تغير..
☘فهالوقت..
روح عمر للحوش بعد ماعرف ان اللمه تمت..
خش للحوش..
فات من حدا المدخل..وقف قعد يشبحله بإبتسامه..
بعدين مشي للدروج وركب بسرعه لدارهم هو ونضال.
خشلها ومشي للروشن..
حول الستار..وشاف لحوش عبد المطلب..
كان وهو بعيد عن شارع القهوة..
المكان اللي فيه اميمه...كأن طالع من بلاد كلها..
وحس بشوق رهيب للشارع..
وماصدق عرف ان اللمه تمت بش يروح ويقعد في مكان اميمه فيه..
"روحت!"
التفت وقال:ياتافه اني شن موصيك بكري!؟
نضال:اقسم بالله نوضتك بكل طرق وشتى الوسائل وانت ميت مش راقد...والله جيت بنصب عليك خفت من العار اللي ديره بعدها..
عمر:وين كنت..
نضال:دهواري مع الولاد وليا وقت مروح غير قعدت في المربوعه..
عمر مشي لدولابه فتحه وطلع حوايجه ومشي للحمام..
ونضال لوح الفوطى من فوق راسها ع السرير وقعد يغني..
بعد العمر سنين اه ياويلا...ياناس قلبي حزين ع فراق الزينه..
ووقف ع المرايه وقعد يمشط في شعره..
"نضال"
نضال:تعالي نانسي شنيبه..
خشت نسرين وهي تضحك وقالت:هاك..ومدتله فلوس..
هو جاها وخدي الفلوس وقال:هذا هان عليك!!؟راجل تشبحي فيا بطولي بعرضي بشنابي بلحيتي تعطيني عشرين جني..
نسرين وهي تضحك:ياراجل طول وعرض وشناب ولحيه هادوا الفلوس اللي ضحكت عليك فيهم اريج بنت فردوس..
وجهه تغير من الاحراج وقال:قصدك حكتلكم..
نسرين بضحكه؛ومتنا ضحك...تستاهل تستاهل..
نضال؛والله ماتجي اخت باهي..اطلعي يابنت امي وبوي وبوي..
وقعد يدف فيها وطلعها من الدار وهي ميته من الضحك..
بعدين سكر الباب وشبح للفلوس وقال:تو نوريها البطشه هادي تو تشوف..
🌻🌻🌻🌻🌻
"حي مايطلع منها هالفرخه!"
فردوس؛ريتيها ريتي..
سدرة:ردي بالك فردوس خوفيها ومعاش تخليها تعاودها..
فايزة:واك سدرة راهو مقلب بريء وعادي..
سدرة؛لامش بريء ولاعادي الحاجات التافهه هادي تكبر معاهم بعدين..راهو كل وقت احرف من اللي سبقه ..
فردوس:صدقتي..
وفايزة قعدت ساكته ماعلقتش..
ع خشة غرفه وهي تاكل في نص دحي:ريتوا اميمه..
فردوس:الله يبارك عليك جمال جمالها يكذبوك منين تقولي ليبيه.
فايزة:والله صح..وحده سألت عنها مش مصدقه انها ليبيه صافيه..
ابتسمت سدرة..
قعمزت غرفه وقالت؛امتى طلعت وخدت دبش وكيف تطلع وماتقوليش..
طوبى وهي متكيه قعدت تشبح لغرفه..
سدرة:لواه امها انتي!؟
غرفه:مش قصدي..اللي نقصده انها عمرها مامشت لمكان من غير ماتقولي بس..
سدرة:مش واجب عليها..
غرفه:اوكي بس اني كلامي كلها ع الجو اللي دير فيه يومها جت تطلب مني واليوم نشوفها طارحه بلبسه تجنن وجديده واضح مش واخدتها من حد..
فايزة:بالصحه عليها مسكينه من كثر لبسها وطلوعها هي..
فردوس:صدقتي..والله حرام وحده زيها تدفن روحها في الحوش..
سدرة:لا ان شاء الله بعد ماخشت الطب تو بتولي دكتورة تو تشوفيها كيف تولي..
غرفه وهي تاكل:ايه ماهو الطب ساهل هلبه..
التفتت عليها سدرة وقالت:ماتعشتيش غادي..
فردوس:مسحت الصونيه.
سدرة:سادك ماكله وزنك زاد هلبه..اني عارفاتك حتى في الجامعه ترصي بس..
غرفه ضايقت من سدرة وناضت ومشت طلعت من الدار..
سدرة:طبعا قلت الحق ماعجبكش..غدوة جسمها يفسد تقعد تبكي وتندب ودير مناحه وتقولي نبي نضعف ياسدرة دبريلي..
ورقدت سدرة وتغطت..
فردوس وفايزة شبحوا لبعض..
بعدين اللي هادي مشت رقدت حدا صغارها ورقدت..
وطوبى قعدت تغمض في عيونها شويه شويه لين رقدت...
🌻🌻🌻🌻🌻🌻
تاني يوم..
الصبح..
في حوش شنيبه..
ناض محمد بكري زي عادته ومعاه مغليه فطروا الصبح بكري
وبعد كم ساعه بدوا يفيقوا الباقي..
اولهم طاهر...بعدين الجالي...
وفاقت خديجه غسلت لصغارها وجوههم ورتبتهم بعدين
مشت للكوجينه..
لقت امها طيب في قهوة للولاد..
خديجه:صباح الخير يام..
مغليه:صباح الخيرات..ديري لخوتك فطورهم..
خديجه:من فاق كله..
مغليه:طاهر والجالي.
خديجه:باهي..
ودارت خديجه لخوتها فطورهم..
ورفعاته لدار المعيشه لقتهم الزوز يهدرزوا مع بعض وهما منسجمين.
صبحت عليهم وحطت الفطور وطلعت..
نادت ع صغارها فطرتهم..بعدين مشت للكوجينه..
قعمزت هي وامها يشربوا في القهوة ويهدرزوا ع اللمه..
☘وعمر..
فاق ونزل من فوق..
ومشي طول للكوجينه..
خش وقال:صباح الخير.
امه واخته:صباح الورد..صباح الخيرات..
مغليه:لحق ع الفطور مع خوتك الجالي وطاهر..
فتح عمر الثلاجه وقال:نبي نفطر بروحي..
خديجه:خليه براحته يام..المهم توا كمليلي القصه.
مغليه:ايه هو هدا ردوها ياحنه وشرطت عليها وهو يرد فيها شروط وكأنها متقدم من اول وجديد..تبي مهر..وتبي تخدم وتسوق..
خديجه:ودارو ماتبي..
مغليه:ايه كله...
خديجه:صحه ليها..
سكتوا الزوز وهما يشربوا في القهوة..
وعمر يدير في فطوره..
مغليه:امم..اليوم نبيك تاخدي الجالي ع تركينه وتكلميه..
خديجه بإبتسامه:على اميمه..
حط عمر اللي في يده وقعد يسمع فيهم بخوف وصدمه..
مغليه:ايه..والله البنت من امس ماراحت عن بالي..الله يبارك بيها..زين..ادب..وبتولي دكتورة ونعرفوها كويس..وحده زي هادي يابخت من ديرها كنه..
خديجه:ان شاء الله ويعوضنا بيها ربي عن الكبه الاولى..
مغليه:ان شاء الله...المهم كلمي بعد الغدي خير البر عاجله..
التفت عمر وشبح لأمه واخته وقلبه يدق بقوة..
خوف وغيره.
خديجه:باهي..
سيب الفطور اللي داره ومشي طلع من الكوجينه..
مغليه؛وين ماشي ومخلي فطورك!؟
☘هو مشي طول لدار المعيشه بينادي الجالي..
الجالي طلع من الحمام اللي قريب ع دار المعيشه.
عمر:صباح الخير..
الجالي:صباح النور.
عمر:ترا تعالى نبيك في موضوع ضروري.
ومشي عمر والجالي وراه وهو مستغرب..
خشوا الزوز للصاله..
سكر عمر بابها وقال..
عمر:امي وخديجه ناويلك ع نيه..
الجالي بضحكه:ياساتر!
عمر:يبوا يخطبولك..
الجالي بضحكه:طموح كبير..
عمر:هما قالوا..ع اساس بعدين بتكلمك خديجه ع اميمه بنت الواعر..
الجالي:اميمه بنت عبدالمطلب!؟
عمر:ايه.د
ضحك الجالي وقال:مستحيل..اميمه زي نسرين وخديجه بالزبط زيها زيهم زي بنات الشارع كلهم..اني شارع القهوة مش حناخد...كان جيت بنتزوج بنطلع برا..
عمر وع وجهها ملامح ابتسامه فرح خفيفه جدا:يعني بتسكره!؟
الجالي:الزواج بشكل عام مش مفكر فيه الا بعد تسعه عشرة سنين جايات..اني ماليش عام متخرج وكيف بادي خدمه..مازال نبي نخدم..نأسس نفسي..نكون روحي..وبعدين يجي دور الزواج..
عمر اشر عليه بسبابته وقال:تفكر صح..خليك هكي..استمر..
ولف ومشي وهو يأشرله بإبهامه..
وفتح باب الصاله وطلع.
وخلا الجالي وهو يضحك بإستغراب يحلل في اللي داره توا...
🌻🌻🌻🌻🌻
التكمله تنزل ان شاء الله بعد ساعتين😙
