(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الخمسون"الماجدة الاخير "
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
في الكوجينه..
مطيرة وبنت خوها يحوسوا ع الغدي وهما يهدرزوا
مطيرة:وجدك حلف مايخشوله الشرطه حوش...وحلف ع صفيه تولي قالها كان ماولتيش نطلع منه..وولت ع خاطر بوي
فردوس بصدمه:وعمي!؟
مطيره:بوي عطي قلة السماح لأي حد فينا اني ولطفي لو مازال دورناه ولانشدنا عنه..بس قبلها بوك دور وراه عرف انه قاعد في حوش كان مأجره
فردوس:عمي عنده حوش ومأجره!!؟
مطيره:ريتي..وماوال ياما يطلع منه ياكبدي
فردوس وهي مش مستوعبه:معقوله هدا كله يصير وماتخبروش!؟
مطيره:هاك جيتي وعرفتي..تنهدت بقلق ووقفت حدا الطاوله وهي تقول..هدا كله مش هامني..همي كله في اختك..وضعها متأزم..
فردوس بقلق:خيرها!؟
مطيره:كل يوم اللتالي ماكلتها بالهون ديما حابسه روحها في الدار..
فردوس؛ياهمي وخلاص..اني مافهمتش خيرها وكان مسحورة اهي تشرب في مية الرقيه وتدهن بالزيت وماصار شي..
مطيره:نفسي اللي هي فيه نفسي نبي دكتور نفسي..
فردوس:مافيش غير بوي يقنعها تمشي تعاين عند دكتور نفسي..
مطيره هزت راسها بعدين قالت:ربي يفرج عليها..
فردوس بحزن:آمين..ااه لو بس تعرف غرفه شن دايره..
بغضب عمتها قالت:تفي عليها الكلبه الحقيرة..
☘☘☘☘☘
"مرحبتين حبيبي انست ونورت"
مختار وهو حاضن غرفه؛النور نورك روفي..
ضحكت وبعدت عنه وهي تقول:من قالك عليها؟
مختار بإبتسامه:تقرا في التعليقات ع حسابك..
وهي تضحك تاني:اها..باهي قعمز ماتقعدش واقف..
قعمز مختار وهي قعمزت جنبه.
مختار:وين عبد الرؤوف؟
غرفه بإبتسامه:عشرة دقايق يوصل..
بإبتسامه قال:خليه يطول زياده نبي نهدرز مع اختي ع انفراد..
ضحكت غرفه..
وبرا..
نبيله في الكوجينه توتي في سفرة ضيافه لمختار وهي تفكر فهالزياره وتبعاتها..
☘☘☘☘☘
"هاك جولي"
الجالي:ياعيون جولي..
طوبى بإبتسامه:علقها هي..
الجالي خدي اللوحه اللي مكتوب عليها آيه..
¤الذين ءامنوا وعملوا الصالحات طوبى لهم وحسن مئاب¤
وعلقها ع حيط متوسط الدور الاول..
يبان ع الصاله كلها....
وجهة الدروج..وين تجي طالعه من الكوجينه.
يعني من اي مكان تطلع منه او توقف فيه يفتح ع الصاله حتشوف منه اللوحه..
نزل الجالي عن الكرسي وهو يشوف للوحه قال:ابداع..كان نحصل وحده زيها في المكتب..
طوبى:شن تبي يكون مكتوب عليها .
الجالي بإبتسامه:نفس الآيه..
طوبى بآبتسامه:تو نوصي بابا..
الجالي:لاخليني اني نقوله..
طوبى خافت يعرف انها من التارقي مايقبلهاش في حوشه لأنه مايحباش..
شدت يده وقالت:خليني اني نقوله جالي نبي نحس بشعور الوحده لما تطلب حاجه لراجلها من ماليها..
ضحك وقال:مش مخليها في خاطرك..جربي ياحنه..
طوبى وهي تقرص في خده:سلملي راجلي اللي مامخلي في خاطري شي..
ضحك بعدين قال:تعرفي الحنه مخليه شعرك خيال..
طوبى:حضرتك كنت تتهزا لما شفتني محنياته..
الجالي بضحكه:نضحك ياشفشه...لكن خاطري في حاجه..
طوبى:شن هي؟
الجالي:نمشطه..
طوبى بإبتسامه:باهي تعالى..
وخداته من يده ومشوا الزوز للدروج وركبوا وهما يهدرزوا..
🌸🌸🌸
قعمز ع السرير وهي قعمزت قدامه وعطاته المشط..
وبدي يمشط في شعرها..
كان حلو هلبه..ناعم..لامع...وطويل..
ولون الحنه زايده جمال..
الجالي:غنيلي..
ابتسمت وقالت:باهي...
تنحنحت وبدت تغني في اغنيه..
ماكانتش مجرد اغنيه والسلام..
بل رساله دستها طوبى وسط كلماتها وبعتتهاله..
🍃عندي ثقة فيك عندي أمل فيك
بيكفي شو بدك يعني أكتر بعد فيك
عندي حلم فيك عندي ولع فيك
بيكفي شو بدك أنو يعني موت فيك
