#طوبى "جنة طوبى"
#جمان_فريد
#الجزء_الثامن_والستين"رقعة شطرنج الاخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن أنس بن مالك رضي الله عنه قال: قال رسول الله ﷺ: قَالَ اللهُ تَعَالَى: {يَا ابْنَ آَدَمَ إِنَّكَ مَا دَعَوتَنِيْ وَرَجَوتَنِيْ غَفَرْتُ لَكَ عَلَى مَا كَانَ مِنْكَ وَلا أُبَالِيْ، يَا ابْنَ آَدَمَ لَو بَلَغَتْ ذُنُوبُكَ عَنَانَ السَّمَاءِ ثُمَّ استَغْفَرْتَنِيْ غَفَرْتُ لَكَ، يَا ابْنَ آَدَمَ إِنَّكَ لَو أَتَيْتَنِيْ بِقِرَابِ الأَرْضِ خَطَايَا ثُمَّ لقِيْتَنِيْ لاَتُشْرِك بِيْ شَيْئَاً لأَتَيْتُكَ بِقِرَابِهَا مَغفِرَةً}.
رَوَاهُ التِّرْمِذِيُّ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 إنّ الحياة تشبه الصدى، ما تقدّمه يعود إليك، وما تزرعه تحصده🍃
_________________________________________
"مع مني تعاركت وعلاش؟"
محمد المهدي بضيق؛واحد تافه غلط في الدوة وخدي حسابه..
المهدي وهو عاقد حواجبه بغضب قال:جو البلطجيه مانبيكش تاخد عليه..يدك مرة تانيه ارفعها ع اللي يمد يده عليك واللي يغلط معاك في الدوة رد عليه بلسانك ولاترفع عنه..
محمد هز راسه بصمت وهو مضايق..
المهدي:توكل..
مشي محمد طلع من الشقه بش بيمشي لعمله..
وبوه بعد ماطلع قال بإستياء...
خصايلي الزفته...
🍃🍃🍃🍃
"بالله عليك ماما بالله عليك والله متسهفه نمشي"
خديجه؛مانقدرش نطلقك بروحك..
راما؛خيرك ياماما قلتلك مش بعيد والله اقل من عشرة دقايق بالسيارة..
تاففت خديجه بضجر..
راما برجاء؛بالله عليك ماما..
تنهدت خديجه وقالت؛نرفعك بعد العصر نروح بيك بعد صلاة العشاء.
راما بفرح؛كويس..خل نمشي نوتي حاجاتي..
ومشت تجري لدارها..
وامها ابتسمت بعدين شافت للتلفزيون وانسجمت مع احداث مسلسلها..
🍃🍃🍃🍃🍃
"فندق شني؟"
آلاء؛فندق ******..
مختار:عرفته..بس حبيبتي صدقيني ماليش علاقه بالموضوع لو فعلا اني اللي داير هكي نقولك علاش بندرق عليك..
سكتت آلاء وقعدت تفكر بحيره..
ومختار يشوفلها بإبتسامه..
الاء بحيره؛يعني هما حقه عجبهم شغلي وخدوه منهم ليهم؟
مختار:وانتي علاش مستهينه بيه؟ اني جربته وبصراحه ومن غير مجاملات لإني مانحبهاش..Nice..
ابتسمت الاء وقالت:شكرا خالو..
ابتسم بعدين قال؛شن حال اللي قاعده معاهم؟
آلاء؛مافيش جديد..
مختار:خالتك طوبى شن حالها؟
الاء فكرت تقوله اللي صار لطوبى امس لكن في اخر لحظه تراجعت..
باهي ولت كويسه واليوم قالت بتمشي للمدرسه..
مختار؛ماروحتش لحوشها بكل؟.
الاء:لا بس راجلها يجيها ويجيبلها في مصروف وفلوس..
مختار؛تطلع تشوفه عادي؟
الاء ماارتاحتش لأسئلته لهدا جاوباته وهي تقول..
ايه عادي..
سرح مختار بتفكيره في اللي يعرفه ويحاول يربط الاحداث ببعض بش يوصل لنتيجه..لكن عبث..
الاء لاحظت سرحانه وقالت؛خالو..
شبحلها بعدين ابتسم وقال؛نعم..
ابتسمت الاء مجامله وقالت؛مروحه..
مختار؛كان ماعندك شي ضروري اقعدي تغدي؟
الاء ناضت وهي تقول؛مرة تانيه خالو..
ناض معاها وهو يقول؛براحتك..طوبى عارفه انك جايه؟
الاء هزت راسها بإيجاب..
مختار بإبتسامه؛كويس،ماتغيبيش..
ابتسمت وقالت؛إن شاء الله...سلام..
مختار؛سلام حبيبتي..
ومشت آلاء وهو مشي وراها
سقدها...وبعد سكر وراها الباب..
قعد واقف قدامه وهو عاطيه بالوجه وقال بغضب..
شن اللي صار بينه وبينها شني!؟..
وخبط الباب بقبضه يده..بعدين لف ومشي خش داخل...
~~~~~~~~~
آلاء؛خفت نقوله يدير معاه مشكله..
طوبى؛باهي اللي ماقلتيش وفي الجديد اي حاجه تصير مع حد في الحوش ماتقوليلاش عليها احكي اللي يخصك بس..
آلاء هزت راسها وقالت؛حاضر..باهي توا قوليلي شن قالتلك الدكتورة؟
طوبى؛ طمنتني ع وضعي وعطتني نصايح بس..
انفتح باب الدار وخشت اريج..
لما شافتهم ضيقت عيونها وقالت..
كثرت اجتماعتكم السريه ياخاينات..
الكلمه قالتها اريج مازحه..
بس ضايقت طوبى هلبه..
وآلاء ردت ع اختها تقول؛يانغاره كنت نحكيلها ع خدمتي مع المطعم طلع اللي في بالي مالاش علاقه..
وبدت ع وجهها ملامح الحزن..
اريج تسائلت بخيبه امل؛حقه!؟
الاء بحزن؛تأملت ع الفاضي..
اريج؛ماتزعليش روحك خلاص فوتي وانسي ومعاش تفكري فيه راهو مافي حد يموت ع حد..
طوبى:هي هادي مافي حد يموت ع حد الحياة ماشيه، ماتتعلقوش بحد غير ربي هو بس اللي مايغيبش ولايموت ويسامح ديما...
كانت تقول في هالكلام لروحها قبلهم هما...
وكانت تبي توصل رساله لأريج آلاء هي اللي فهمتها..
ع خشة مطيره وهي تقول بإبتسامة حلوة؛زعيمة المعارضه نوضي بوك يبيك..
هي ناضت وقفت وكانت تقول..
تو بتمشي في لساناتكم ربي يهديه بوي طلعني شلولح..
قعدوا يضحكوا عليها..
وهي مشت طلعت وملامح الابتسامه مخالطه ملامح العصبيه ع وجهها..
وصلت في الصاله وهي تسمع في اصوات الهدرزة..
وخشت عليهم..
فردوس لما شافتها قالت؛اهي جت..
طوبى مشت قعمزت جنب فردوس وهي تقول..خيركم شن في؟
لطفي وهو يشوفلها:اسبوع ونفتحوا المطحن مرة تانيه..
قلب طوبى فرفح..
واشرق وجهها بإبتسامه حلوة ليها وقت مفارقه وجهها وقالت متعجبه..
اسبوع!؟
لطفي؛ايه اسبوع بيندار فيه صيانه للمطحن كله ونوتوا فيهم كميات كويسه وبعدين بنديروا افتتاح..
الاء بإبتسامه؛احلى حاجه الافتتاح ديروله بث مباشر وجيبوا مصور ياخدله صور وينزلهم في صفحته
اريج؛ضروري من التبهبير..
طوبى؛لا بالعكس دعاية هادي..
الاء شبحت لاريج وهي ترقص في حواجبها بإستفزاز..
واريج طلعت سنونها من فوق وقعدت تحرك فيهم وهي تعجب عليها..
مطيره:عندي اقتراح صغيرون..هكي صغره..وضمت سبابتها وابهامها لبعض..
لطفي؛كثرت اقتراحتكم..هاتيه جاي..
هما شدوا ضحكاتهم..
وهي قالت؛وكان دخلوا البسيسه مع القهوة زي ايام زمان
فردوس؛خير وخير وعاد رمضان قريب خلاص
مطيره وهي تشوف لخوها؛هاه شن رايك لطوفه
هز راسه بالموافقه وقال:هكي خيرلك حتى انتي خلاص ندخلوا البسيسه..
طوبى؛وفي حاجه تانيه..
لطفي شبحلها بإبتسامه..
طوبى:بابا نبوا نطوروا ونغيروا وندخلوا حاجات جديده..
لطفي؛زي شني؟
طوبى بحماس؛نبوا نديروا انواع جديده للقهوة..
☘وقعدت تحكي عن خطتها لتطوير المطحن كلامها كان واضح عن بحث ودراسه مش مجرد كلام وخلاص..
طوبى زمان كان ماتعرف شي عن المطحن غير القهوة اللي تشرب فيها كل صبح وتتكيف بريحتها..
وتوا تعرف انواعها وطرق تحميسها وطحنها والنكهات متاعها...
وبوها يسمع فيها وهو متفاجئ..
للحظة عيونه شافوا سدرة اللي مقعمزة قدامه وتتكلم..
بعد ماكلمت كلامها قال؛وين ماشيه بيه هدا كله؟
طوبى:قول لشريكك يضرب ع جيبه..
فنصوا خواتها وهما شادين ضحكتهم..
ومطيره قعدت تضحك..
طوبى وهي تمرر في نظره عليهم؛ماقلت شي غريب مش هو خاش معانا شريك بفلوسه خلاص يحط وحني نتصرفوا وعطيه وعد بابا بإذن الله يرجعله اضعاف اللي حطه..
فردوس؛تفائلي خير لكن مش لهالدرجه..
طوبى؛لابنتفائل اكثر من هكي وعلاش لا..ربي قال اني عند ظن عبدي بي..
فردوس؛ونعم بالله..
ابتسم لطفي وقال؛حاضر تو بنقعمز اني وياه تقعميزة طويله نتفاهموا فيها ع كل شي..
غرفه؛بابا كان تبي شي القدام قول..
طوبى:اكيد بيقول مادام قعد ياخد راينا في كل شي يخص المطحن..
رفع حواجبه وهو يشوفلها..
طوبى بشي من الارتباك قالت؛صح ولا؟
هو ضحك وهز راسه بالموافقه..
وهي ابتسمت من قلبها..
مطيره وهي تمرر في نظرها عليهم قالت..
تعرفوا من فرحتي حاسه ربي حيفرجها من كل تركينه؛وقريب هلبه..
كلهم بأصوات متقطعه قالوا..
يارب..يسمع منك ربي..
تنهد لطفي ومرر نظره ع بناته وقال..
ارتحتوا توا؟
مطيره؛ولوى مايرتاحوا وانت بوهم ربي يطول في عمرك ويخليك فوق روسهم..
كلهم بأصوات متقطعه ومن وسط القلوب طلعت دعواتهم..
"آمين..اللهم آمين"
وهو يهز في راسه وع وجهه باديه ابتسامه حب..
شويه وبدت مطيره تغني..
لاتغيبك ع العين يابو العيله يابو العيله..
لاتغيبك ع العين يابو العيله يابو العيله..
يوم ماتغيب مطول..مطول علينا ليله..
لاتغيبك ع العين يابوالعيله..
وقعدوا يردوا وراها ويغنوا..
وهو يمرر في نظره عليكم ويدندن معاهم...
وكلهم وقتها كانوا حاسين بشعور حلو دافي سكن جروح قلوبهم الظاهره والمخفيه...
وحده بس هي اللي كانت تسمع في الأغنيه بدون ماتردد منها كلمه...
اريج...
اللي مش حتقدر تتغطى وجع غياب بوها...
وجع كل يوم يتجدد..
ويتجدد معاه امل متواضع يقول..
لعله يروح..ومرات يروح غدوة...
🍃كان الله في عون قلوب الناس اللي عندها مفقود بالسنين لاتعرفه مع الاحياء ولا في عداد الموتى🍃
🍃🍃🍃🍃🍃
بعد العصر..
كانت راما واقفه قدام المرايه تحط في لمساتها الاخيره ع اطلالتها لعيد ميلاد صاحبتها..
كانت لابس قصير ومكشوف..وحاطه زينه ومصففه شعرها بطريقه حلوة..
اللي يشوفها يقول في اواخر سنين المراهقه مش طفله عمرها ماتعداش13سنه..
مشت خدت عباية ولبسها..وحطت الوشاح حط ع راسها..
وطلعت من الدار بالشنطه متاعها وهي تقول..
ماما واتيه اني..
طلعت خديجه من دارها وهي جاهزة حتى هي..
شبحتلها وقال؛ترا نشوف طرحتك؟
فتحت راما العبايه وورت امها شن لابسه..
خديجه بضحكه؛زي العسل طالعه لأمك..وجتها قرصتها من خدها وقالت..كبرتي بسرعه يافصعونه..
سكرت راما عبايتها وقالت لامها بإبتسامه..
شكرا ماما..
خديجه؛هيا هيا بسرعه اطلعي قبل ليجي بوك ويديرلك قصة ع المكياج..
ومشوا الزوز مع بعض بسرعه وطلعوا من الشقه...
🍃وبعد نزلوا لوطا..
ركبوا السيارة وطلعوا طول...
☘وفي حوش اهلها...
كانت امها مقعمزه مع خوها الكبير في الكوجينه..
ياكلوا في الزميته ويشربوا فى الشاهي الأخضر وهما يهدرزوا..
مغليه وهي تستجدي في تعاطف ولدها..
حرام وليد وخيتك مسكينه والله ديما تخمم فيه وفي مستقبله وتقولي مش عارفه شن بيصير فيه..
المهدي ويعبد في الزميته قال؛وعلاش مايخدمش في محل جده..وكلي العبود..
مغليه؛نقولك اختك تبي تأمن ع مستقبل ولدها وينه المستقبل اللي بيلقاه في محل ماعين!؟
المهدي؛وخيرهم محلات الماعين من شني يشكوا..
وشرب من الشاهي..
مغليه:يامهدي وخيتك تبي ولدها يولي زي خواله بالذات انت..وبعدين الوليد بروحه قال نبي نخدم عند خالي المهدي ونولي تاجر ذهب زيه..
المهدي قعد ياكل وهو ساكت..
مغليه؛وليدي ربي يرضى عليك دنيا وآخره خدمه عندك في محل الذهب خير مايضيع..
شبحلها شويه بعدين قال:تو نهدرز عليه اليوم..
مغليه؛برا وليدي الله يعطيك لين يرضيك ويفرحك بصغارك ويهدي سرك..
ناض المهدي ومشي بيغسل يده وهو قال؛هدا كله ع خاطر ولد خديجه..
مغليه:العفو! عمري مادعيتلك؟!
المهدي وهو يغسل في ايديه قال..
ياودي آمين وخلاص...
وسكر الشيشمه وخدي فوطه مسح ايديه..
مغليه وهي تشوفله قالت:ماتكسرش بخاطر وخيتك..
حط الفوطه وقال؛حاضر حاضر يام حاضر..
ومشي طلع من حداها وهي بعد طلع تنهدت وقعدت تاكل في الزميته..
☘وهو مشي طول لدار المعيشه بش يشوف بنته..
خش عليها..لقاها تقرا وتشرح لروحها..
ابتسم وقال؛تبي شي؟
شبحتله وقالت:كراسه الرسم اللي قتلك عليها..
المهدي؛هدا بس؟
سدرة؛بس بس..
المهدي؛حاضر..
سدرة؛في امان الله بابا..
هو ابتسمها بعدين مشي وهي رجعت تقرا...
🍃🍃🍃🍃🍃
طلع المهدي من الحوش وين جي بيمشي للمطحن لقي قدامه عبد القيوم اللي كان باين عليه انه جايه..
عبد القيوم بإبتسامه:اها..السلام عليكم..
المهدي:وعليك السلام..شن جو..
عبد القيوم هز راسه وهو يمرر في نظره القدام وقال بإبتسامه:تمام..شبحله وقال..اليوم بندير بورديم ع قولتكم في جنان الحوش ماعندكش مشكله؟
المهدي؛في حاله وحده تعزمني..
هو بضحكه قال؛انت وربيع ونضال وحسين وحتى محمود عزمته..
المهدي:تمام..
عبد القيوم:خلاص بعد المغرب تعال..
ولف بيمشي وقفه المهدي لما قال..
تارقي!
التفتله وهو يقول:نعم؟
المهدي؛بلال اموره تمام؟
عبد القيوم؛الحمد لله جاهز من مجاميعه ع قولت المصريه ويوم الخميس ان شاء الله عقد القران..
المهدي بإبتسامه؛ع بركة ان شاء الله عقبالك..
ابتسم عبد القيوم ابتسامه جانبيه وهز راسه بعدين لف ومشي للحوش...
🍃🍃🍃🍃🍃
الساعه 7:00مساءا..
في وحده من قاعات الافراح في ضاحية من ضواحي العاصمه..
كانت باديه حفلة الكسوة لقريبه بنات المعلول..
وهما مقعمزات ع طاوله وحده..
اختهم الكبيره قالت؛الصدارات يسهفوك تصدري ياريتني خدت بدله بالإيجار وصدرت..
مافيش وحده فيهم علقت ع كلامها..
شبحتلهم..لقتهم الزوز سرحانات وملامح وجوههم متجهمه..
مروة؛مش جايات لعزي العفو!..
نجاه بضيق:جايه بالسيف عليا راهو..
مروة؛باهي انتي عارفين خيرك..هديكا خير دعوتها؟
صابرين بإنزعاج:بالله خلوني في حالي..
نجاه شبحتلها شويه وهي تفكر بعدين غيرت عيونها عنها..
ومروة تنهدت وقالت؛ربي يهدي سركم وخلاص..
🍃🍃🍃🍃🍃
"هيا بنات تعالوا ناخدوا سليفي"
هادي صديقة راما اللي كانت دايرة حفلة العيد ميلاد..
وهالصديقه مشتركه بين راما واسماء اللي اكيد كانت ع راس الحاضرات..
اجتمعوا كلهم وخدوا صور" سيلفي"
وبعدين شغلوا الاغاني وهاموا معاها..
🍃وفي حوش جدها..
كانت خديجه مقعمزة مع عزوزتها وجارتين جايين زيارة..
منهم الجاره اللي تمشي ولسانها يمشي...
:عطيهم قطيعه ياكبدي كتروا هالنماذج..
نجمه؛حتى المالي ليهم دور راهو كيف يطلقوا بنتهم بعد مايموت راجلها ويخلوها تمشي وتجي ع حوش ماليه بأي حق؟!
خديجه وجهها تغير لونه..
:مايصدقوا ياماما يبوا يفتكوا من مسؤوليتها ومسؤولية صغارها..
جاره تانيه قال؛حتى مالي الراجل مساهمين مفروض يقصولهم علاقتهم بصغارهم بس المراة معاش يربطهم بيها شي..
نجمه:في اللي يقولك عادي وشن فيها وام صغارنا..لين تلف ع واحد من خوته وتخرب حوشه ويخلوه يقزن صغاره..
؛هدا اللي مبغددني ياكبدي يقولك بنربي صغار خوه ويلوح صغاره هو.!
نجمه؛الفجي وخلاص ربي يجيرنا.
:ياودي مافيها شي تشوف نصيبها وتتزوج عارفين الحياة صعبه وكان عندها صغار تبي راجل معاها يعاونها عليهم؛لكن تاخده بطوله لاوراه ولاقدامه..
نجمه؛صدقتي..اني الحق عاجبتني فايزة الخويلدي ليها قريب عشرة سنين ارمله ياما عانت وياما صار فيها وقعدت واقفه ع رجليها وخدمت ع هالبنيات وربتهم احسن تربيه بروحها..
خديجه هدا وين فتحت وتكلمت:لالالا ياعمتي كذب عليك والله فهالوقت البنات من غير رجاله فوق روسهم ماينشدوا وهي عاد النهار بطوله في هداكا المزين ماتندري عليهم شن يديروا..
الجارات استغربوا..
والحشريه والنمامه سألتها؛شايفه عليهم حاجه!؟
خديجه؛بنتي تقرا مع بناتها في المدرسه..ياودي شن بنقول ربي يستر على ولايانا وخلاص مانبيش ندوي في اعراض الناس..
نجمه؛نجاح شاده المدرسه اللي يقروا فيها ولامرة قالتلي عليهم حاجه..
خديجه:شن بتقولك ياعمتي كان ماسألتيها اسأليها تو نحكيلك..
وحده من الجارات قالت؛ياوخيتي البنيات يبانوا عاقلات ومحترمات..
خديجه؛المظاهر خداعه ياخالتي والسكوتي تحته كوتي..
نجمه:خلاص غيروا السيره عندنا ولايا...
:احسن شي..قولي نجمه شن دايرات فيك فقراتك..
نجمه؛مرة هكي ومرة هكي.
خديجه؛سلامتك ياعمتي ماتحبيش التقعميز ديما تحوسي وضمي.
نجمه:شن بندير يابنتي الحوش معاش قعد فيه حد كان اني عواطف لاهيه في خدمتها..
رقيه الحشريه؛شورك ياخديجه ماتنزليش بكل..
ارتبكت خديجه وقالت..لاننزل والله..وحتى انشدي عمتي..
نجمه" تحلفي بالله كذب ياكذابه":ايه ماهيش مقصرة معاي غير ع قولتها اني مانهنيش في روحي..
ابتسمت خديجه بربكه وهي تشوف لرقيه بريبه..
🍃بعد ماتمت الزياره..
سقدتهم خديجه..راجت لين الجارة التانيه تروح وشدت رقيه..
خديجه:شن صار بنتك حصلت تعيين؟
بإستياء قالت؛لاوالله لتوا..
خديجه:من اليوم معاش تخممي فيا تو نقول لبوي يشوف موضوعها..
بفرح قالت؛بارك الله فيك..بالله عليك ماتعطليش علينا رقمي عندك كان صار شي كلميني..
خديجه بإبتسامه؛بإذن الله نبشرك..
سلمت عليها رقيه بالخد وقالت؛بارك الله فيك ياخديج صحيتي..
خديجه وهي مبتسمه بتصنع:مادرت شي انتي جارتنا والرسول وصى بالجار..
رقيه:تسلمي ياربي تسلمي..هي بالسلامه..
خديجه؛بالسلامه بالسلامه..
وطلعت رقيه وسكرت
خديجه وراها الباب وهي تقلب في عيونها بآزدراء وتقول..
مثقل طينتك..
بعدين مشت خشت داخل..
🍃وقريب عليهم..
في مطحن بوها..كان ولدها مقعمز مع خاله...
المهدي:شوف يامحمد اني بنجربك اسبوع كان ماعجبتنيش دور وين تخدم..
محمد وهو يبين في حماسه لخاله؛والله ماتكون الا راضي ياخالي..
المهدي؛راك بتكون راجل يخدم في المحل كلمته كلمتي واخد مكاني في غيابي قلة ادب مانبيش..
محمد 🍃
وهو مبتسم بإرتباك:ربي يسامحك خال واخد عني فكرة غلط..
المهدي؛اثبت العكس وخليني نصلح الفكرة اللي واخدها عنك..
ضحك وهو متوتر بعض الشي بعدين قال..
ان شاء الله..
المهدي:من غدوة تبدا بعد ماتروح من المدرسه اني نرفعك ونروح وبيك..
محمد هز راسه وقال؛تم..
هز المهدي راسه ووجهه نظره لباب المطحن..
ومحمد يشوفله من تحت لتحت بنظرات مريبه..
المهدي:كان بتطلع اطلع..
ناض محمد وقال..نشوفك غدوة خالي..السلام عليكم..
المهدي؛وعليكم السلام..
ومشي محمد محي طلع من المطحن وعيون محمود معاه..
🍃🍃🍃🍃
في الجنان..
والنسمات البارده تهب عليهم وتجيبلهم في روايح الفل والياسمين..
كانوا مقعمزات ع الطاوله يهدرزوا..
طوبى وهي شاده في يدها شيشه ميه تتكلم بيها..
/نشوف فيها فرصه ليك ميمو تكسبك خبره وفي نفس الوقت دخل..
اميمه؛حتى جدي قالي هكي واني في عقلي قلت هكي..ضحكت بعدين قالت..وفي نفس الوقت نحصلها فرصه بش نبرز روحي اكثر قدام الدكتور خالد ويعطيني التزكيه..
طوبى ابتسمت بخبث وهي تهز في راسها قالت..
اي اي؛صح..
وشربت من الميه..
اميمه؛طوبى فكينا من البراده متاعك..
نزلت طوبى الشيشه وقالت..اممم واني شن قلت!؟
اميمه وهي تشوفلها بنص عين:طوبى ندوي جديات..
طوبى بضحكه؛باهي خلاص اسفه..
ابتسمت اميمه وحركت راسها يمين ويسار..
وسكتوا هما الزوز..
طوبى ولت تشرب..
واميمه توزع في نظرها ع الشجر بعدين ابتسمت بشفقه وشافت لطوبى وهي تقول:لكن امس اثر فيا ولده بالذات لما قاله..ماعنديش معاك وقت هلبه..يوجع كيف قالها..
طوبى:قداش عمره؟
اميمه؛تقريبا عشرة ولا11سنه
ابتسمت طوبى بحزن وقالت؛هكي خيرله..يشوف بوه كم ساعه خير مايشوفه كل يوم بحالات تخليه يخاف منه ويكرهه..حطت يدها ع بطنها وقالت..العيل يتأثر هلبه بمواقف وحالات بوه وامه،يكونوا منفصلين ومتفاهمين خير مايقعدوا مع بعض ديما في مشاكل هو شاهد عليها..
اميمه قعدت تسمع فيها وهي حزينه ع حالها..
وبعدين تفكرت حياتهم هي وخوتها مع امها وبوها كيف كانت وقداش أثر الوضع اللي كانوا عايشين فيه..
ولأن الحزن ساد التقعميزة متاعهم غيرت اميمه الموضوع وقالت..
لكن تعرفي ولده نسخه منه..اشقر نقشه نقش بوه يختلفوا بس في لون العيون دكتور خالد عيونه خضر وولده عسليات..
طوبى بإبتسامه خبيثه:صار عيونه خضر وولده عسليات..
شبحت لفم الشيشه وقالت وهي تهز في راسها..
/باهي باهي..
اميمه كان في قدامها طاسه فيها شويه ميه خدتها وبخت بيها طوبى جت ع وجهها..
وطوبى تضحك وهي تقول :شن قلت اني ياربي!..
واميمه تشوفلها وهي مضيقه عيونها بمكر..
طوبى بضحكه؛ع فكره خدودك الحلوات تفتحتوا فيهم وريدات حمر..
اميمه بإمتعاض:طرطريات مش حمر..
وطوبى تضحك عليها..
🍃🍃🍃🍃🍃
قبل صلاة العشاء..
كانت خديجه في شقتها توتي في روحها بش تمشي تروح ببنتها..
ومحمد ولدها فم باب كان يقوللها..
/الجو هو معاش نبيه لاعيد ميلاد لا لمه جياب...
فتحت الباب وطلعت وهي تقول:بوها يحكم فيها بس..
ومشت وهو وراها يقول..
/واني خوها يام خوها بنتك في وجهي راهو..
وقفت والتفتتله وهي تقول:شن شفتها دايره تدهور في الشوارع!؟ ماشيه لحوش صاحبتها بنات في بعضهم والحوش قريب هلبه ماخداش مني عشرة دقايق مشي..
محمد؛ان شاء الله في الشارع نفسه ماتطلع من هني الا لحوش جدي شنيبه بس..
خديجه:سلم وليدي الراجل اللي حازر ع وخيته..شدت ذقتها وقالت..لكن نعاود نقولك بوك بس اللي يحكم في اختك..
ولفت ومشت بتطلع من الشقه..
محمد بصوت غير مسموع:ع اساس بوي حاكم فيك بش يحكم فيها هو مش قادر يحكم في روحك..
لما شاف باب الشقه تسكر لحقها يجري وهو يقول..تي تعالي وين طالعه بروحك!..
وفتح الباب لحقها وسكره وراه..
🍃ومشي بيها بش يروحوا براما..
سيارتهم وهما ماشيين فاتت من قدام القهوة..
اللي كان فيها يزن يهدرز مع عمه نضال..
نضال:حاضر الجمعه هادي بإذن الله نرفعكم..
يزن بضيق:معليشي عمي كل مانقول لبوي يرفعني يفوت فيا نحس فيه يتهرب هدا علاش كلمتك..
نضال؛شن تقول انت اني عمك ياولد انت وين ماتبي نرفعك،وكان حسيت بوك يتهرب حق مش بقصده راهو..
يزن بحزن؛عارف..بوي كل مايتفكر امي الله يرحمهايتعب..
تنهد نضال وقال بأسف:الله يرحمها ويغفرلها..
🍃🍃🍃🍃🍃
"واك رجليا طاحوا وكبدي درهت"
عواطف:احرف منك ومازال بنقعدوا عالقين للصبح..
:اففف وخلاص..صبيلي قهوة صبي راسي بيتفجر..
صبت عواطف قهوة لزميلتها ومدتلها الطاسه وهي تقول..
بالله نائله وينها معاش ليا وقت معاش ريتها..
:حيي قصدك ماسمعتيش نائله واخده اجازة تزوجت العقبال عندك
اندهشت عواطف وهي تقول؛قولي والله..
:والله
عواطف بصدمه؛مني خداها!؟
:واحد يمشي ع الفلوس مشي ياحنه..
عواطف بدهشه؛ياكبدي عليك حظوظ..واني اللي كنت هازيه عليها وع لبسها ونقول متصابيه وتبي تجيب عريس بالسيف..
ضحكت صاحبتها وقالت:خدمت ع راسها لين جاباته..
عواطف وهي مازال مصدومه قالت في نفسها
"واني اللي لبست الملايه وسورة البقرة حفظتها حفظ وليل نهار شادة السبحه مافي حد شبح فيا حتى الشبح"
؛تعرفي وين لقاته لكن بيني وبينك عطوفه بالله عليك..
عواطف بفضول؛مايطلع مني شي..قولي..
:في الفيس..
عواطف وهي متسغربه؛فالفيس!؟
؛ايه ياحنه خشت لقروب تعارف ومع التعليقات المعسله والمناشير متاع الاشعار وصور الخليجيات جاباته وتعرفوا وحكوا مع بعض فتره بعدين قاللها نبي نشوفك وحددت معاه موعد وجاها هني شافها عجباته وخداها..
عواطف بإندهاش اكثر:مش مستوعبه تعرفت عليه في الفيس وخداها!؟
؛ايه ياحنه..لكن راهو من الدواخل ومتزوج قبل..
عواطف؛قصدك نائله رضت تولي ضرة!؟
؛قالت كل وحده في حالها وبيعدل بينا ماعندي علاش نقول لا..الصراحه اللي فعمرنا معاش عندهم خيارات ياعطوفه مدام راجل كويس ومادياته مرتاحه نتوكلوا ع ربي..
عواطف بقهر:اااخ..غير يجي قبل!..
بضحكه ردت عليها؛القروب خشيتله ليا اسبوع وتعرفت ع واحد وجونا مليح ونحس فيه بيجي للطريق ونلحق نائله..نديرلك دعوة؟
سكتت عواطف وهي تشوفلها بتفكير بعدين قالت؛لالافكيني من الجو هدا..ناضت وهي تقول..خل نمشي نخدم ع حالي خيرلي..
ومشت طلعت..
بعد ماطلعت صاحبتها قالت..خليك في جو التدين الزايداللي مدايرتيه والله ماك محصله منه حاجه..
🍃🍃🍃🍃🍃🍃
وبعيد ع الرفقه الكذابه..
للرفقه صافية الود..
مجتمعين الشباب في جنان حوش المهدي من الخلف..
مفرشين حصيره عليها شلتات مقعمزين عليهم وهما يراجوا في البورديم يطيب..
ربيع:زواق واضحه فوتها فوت طوبو راهو..
محمود وهو يشوف لصورة السيارة في تليفونه قال..
خسارة عجبتني..
عبد القيوم؛نعرف مكان يبيع في مستعملات لكن حاجه اصليه..
محمود؛وين؟
عبد القيوم؛في ******..
محمود؛حق في غادي؟
عبدالقيوم؛شن رايك بكرا ان شاء الله نشيلك غادي وتحق بعيونك..
محمود؛ان شاء الله نشوف روحي ونقولك..
المهدي؛حسين مافيش جديد ع المطحن ماغيرتوش رايكم؟
حسين بإبتسامه؛اسبوع بالكثير عشرة ايام ونفتحوه ان شاء الله..
كلهم تفاجئوا وعبد القيوم ابتسم وهو يشوف لحسين..
المهدي؛كيف صار!؟
حسين؛حصلنا شريك..
ربيع؛شريك..فكره كويسه..
المهدي؛تعرفوه كويس؟
حسين؛هلبه..
المهدي؛المهم ضامنين رواحكم .
حسين؛الامور كلها تمام اطمن..
نضال؛ياسيدي مبروك عليكم وعلينا..
حسين بإبتسامه جانبيه؛مبروك عليكم!؟؟
المهدي؛نحبوا نخدموا في جو فيه منافسه..
عبد القيوم؛صح المنافسه اللي تخليك تتحمس للخدمه واجد..
حسين شبح للتارقي بإبتسامه..
ربيع:عودة ميمونه ياعيت جنه..
هز حسين راسه وهو مبتسم..
محمود؛في مطحن ثالث بيخش ع الخط اللي ع الطريق..
ربيع؛ايه الامبراطور باين كبير هلبه..
المهدي؛كبير ولاصغير المهم الجوده والخبرة..
حسين:تي المطاحن توا زي الرز عد واغلط ..
المهدي:لكن من بين الف مطحن زوز ولاتلاته اللي تلقى عندهم بن ممتاز وحاجه صح وحني طبعا رقم واحد..ورفع طاسة الشاهي اللي قدامه وشرب منها..
ربيع؛اووو نبوا رد قاتل حارق عيت جنه سمعنا ياحسين..
ونضال ومحمود يشبحوا لحسين يراجوا في رده..
هو شاف لعبد القيوم وقال:تقدر ترد عليه بأبيات نيابه عني؟
تنهد عبد القيوم بإبتسامه وشاف للمهدي لقاه يشبحله بنظرات تحدي..
رفع التارقي حاجبه وقال..
ما تنغر..
راهو الغرور يتعبك تنظر....
نصيحة لوجه الله...
تواضع ديمة...
وخليك كيفما عرفناك عندك قيمة...
راهو الغرور مافيه حاجة سقيمه...
ولا يجيب حاجة ف الحياة تسر...
أمفيت المواجع زايدة وظليمه...
وكلام تسمعه حنظل وطعمه مر..
وخليك ديمة ف الحياة كي الغيمه...
تروي الأرض ولونها يخضر ....
وما تنغر ...
ربيع صاح:وووه..خارق حارق..
ومحمود يضحك..
حسين بإبتسامة تحدي؛وصلك؟
المهدي بملامح هاديه جدا كالعاده رد ع عبد القيوم وهو يقول.
وَنَحـــنُ أُناسٌ لا تَوَسُّــــطَ عِــنـدَنا لَنا الصَـــدرُ دونَ العالَمينَ أَوِ القَبـــرُ
