طوبى "شارع القهوة"
#جمان_فريد
#الجزء_الرابع "بنغازي1"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
وفي يوم جديد...
بس هالمرة في جامعة الفاتح تحديدا كلية الهندسه..
كانت في الباحه متاعه..
مجموعه طالبات مقعمزات ومعاهم بنيه مش في عمرهم مازال اصغر منهم..
وهما مقعمزات يهدرزوا...
جاهم زميل يقرا معاهم طلق السلام...
طاهر:السلام عليكم صباح الخير..
كلهم شبحولها بما فيهم البنيه هادي وخدودها طول توردوا خجلا لما شافت نظراته ليها..
البنات ردوا:صباح النور..
مروة؛كيف حالك طاهر..
طاهر بإبتسامه؛الحمد لله..كان تسجليها هني بنت اختك خير..
هي كانت المقصودة نزلت عيونها خجلا وضحكت..
مروة بضحكه:مستعجله ع الجامعه ديما تقولي امتى نكمل الثانوي ياخالتي ونقرا هني..
طاهر:شني يانجاة خاطرك في الهندسه؟
شبحتله وهي مبتسمه وقالت؛ايه زي خالتي.
طاهر بإبتسامة اعجاب؛احسن مااخترتي.
وهي ردتله الابتسامه ونزلت عيونها..
والبنات مركزين عليها بما فيهم خالتها..
"طاهر"..
التفت طاهر لمصدر الصوت وقال:خوي..واشرله بيده..بعدين شبحلهم وقال..خلونا نشوفكم مرة تانيه..
مروة بإبتسامه:ان شاء الله..
نجاه قامت عيونها وشبحت لطاهر..
ابتسملها وهي ردتهاله بعدين قال؛هي سلامات..
ولف ومشي لخوه..
البنات قعدوا يتغامزوا ويشبحوا لنجاة..
وهي مازال تشبح لطاهر..
وحده منهم قالت؛شخصيه خو طاهر..
مروة؛ايه وقنين احلا منه..
نجاة تلقائيا قالت:طاهر احلا..
مروة:اشي!!؟
والبنات يضحكوا وهي تحشمت ع الآخر..
🌻طاهر؛شن جو ..ومد يده..
صافحه المهدي وقال:الحمد لله..خيرك ماجيتش في العيد الكبير..
طاهر بإبتسامه متهكمه ؛ومن بيستقبلني..
المهدي:انت جاي لحوش بوك ومافي حد فينا يقدر يلزك ولايبي..
تنهد طاهر وقال:امي مابتش..
المهدي؛امك ماتخليهاش تتحكم فيك ياطاهر وتمنعك من مواصلة بوك..
طاهر؛ماليش عين نعارضها ع خاطره وهو اللي لوحني ونساني وهي اللي تعتب عليا وربتني وكبرتني..!
تنهد المهدي وقال؛عندك حق بس خلاص بوي عرف غلطه وولى يواصل فيك ياطاهر..
طاهر:بعد ماكبرت واشتد عودي يامهدي بشن ينفعني رجوعه!
المهدي؛ينفعك بالبر..
طاهر بأسف؛هدا اللي مخليني عاجز ومش عارف من نرضي فيهم..
المهدي؛حرام عليها تمنعك تواصل بوك ولو مشيت من وراها ماعليك شي ياطاهر...
طاهر قعد ساكت وهو يفكر في كلام المهدي..
المهدي؛تأكد.ان حتى امي مرحبه بيك وماعندهاش مشكله تجي زيارة امتى ماتبي..امي مشكلتها مع امك مش معاك انت..
طاهر:امك اللي خلت بوي يطلق امي!
المهدي؛بوي غافلها ودارها من وراها ولما عرفت طلبت الطلاق وهو اختار يطلق امك امي ماليها علاقه بشي..
تنهد طاهر وقال؛مانبيش نكثر دوة في الموضوع خلاص...تو بالك الايام الجايه نجي..
المهدي؛ياريت حتى خواتك يبوا يشوفوك ويتعرفوا عليك..
ابتسم وقال:إن شاء الله..
حس بشعور حلو بالمرة لما انجابت سيرة خواته..هو من عنداش خوت اشقاء الولد الوحيد وكان يتمنى لو يكون عنده خوات بنات دون الذكور...لأنه يبي منهم الحن اللي حرماته منه امه...ايه امه كانت تعامل فيه بشده كانت ديما تشوف في بوه فيه..هدا علاش لو غلبتها عاطفة الأمومه وحنت مرة تقسى مرات ومرات..وهو متحمل وصابر...تقعد امه ماعنده مايدير..
🌻تساير هو وخوه وهدرزوا شويه..
بعدين المهدي مشي لكليته وطاهر مشي لمحاضرته...
🌱🌱🌱🌱🌱🌱
"مواليد كم هو"
نسرين؛نديد خديجه مواليد 77..
فايزة وهي تحدد في بلوزتها:اها يعني بوك كان واخد ع امك هداكا الوقت..
نسرين:ايه...تعرفوا خاطري نشوفه خاطري نعرفع نعرف شخصيته زي مني بالزبط زعمه فيه المهدي..ولازي بوي..
عائشه؛وباقي خوتك زيك هكي خاطرهم يغرفوه؟
نسرين؛الحق ماحسيتش ان في حد غيري يبي يعرفه..
ع خشة مطيره؛هاه شن كملوا..
عائشه؛ايه ستفنا كل شي في السوابيت..الكنيكس والحلوات..
مطيرة؛عطيكم الصحه...ايه فيزة..نبيك تمكيجيني بعدين باهي..
فايزة بضحكه:حاضر...
عائشه ناضت وهي تقول:سدرة وين
مطيرة:داكه راسها مع النساوين اللي يطيبوا تبي تتعلم تطيبب الكوازين..
عائشه بضحكه؛خل نمشي نشوفها..وطلعت من حداهم..
مطيره:نسرين:خيرها خديجه مريضه!؟
نسرين بإستغراب:مريضه!
مطيره؛ايه تجي وتقعمز ماتقولش نوض نقيم كاغط وامك مش مدورتها كان لقحت ماتزعلوش ايوه..
ومشت طلعت..
نسرين بضيق؛خديجه الباردة وتصرفاتها اللي تمرض..
فايزة؛مبردها جديات اختك هادي..
🌱🌱🌱🌱🌱
وخديجه مقعمزة في وسط الحوش وهي تشوف لفردوس كيف مقعمزة مع صحباتها وتهدرز هي وياهم وتضحك وقريب اطق من الغيره..
شويه جابولهم سفرة غدي وقعمزوا مع بعضهم وبدوا يتغدوا..
عواطف:شن حني مايجيش علينا الغدي ولاشنو..
كلهم شبحولها بصدمه..
وحده من خوات وردة قالت؛غير كان صبرتي وخيتي هانا جايبينه..ومشت من حداهم وهو مصدومه..
عواطف؛مخليينا من بكري مقعمزين ماحسبوناش في طاسة شاهي..
فردوس؛مش برانيه انتم ياعواطف بنات جيرانا انتم مفروض تكونوا من العواله..
نجاح؛والله بكري تحركنا وحوسنا وتوا بس قعمزنا..
فردوس فتحت شيشة مشروب مرادة وقالت:الكلام مش ليكم بس..
خديجه طول ناضت ومشت طلعت من حداهم..
فردوس:صحيحة وجه..
نجاح؛صح من اول ماجت وهي مقعمزة ماقامت قشه..
عواطف:تقول دايرتها بالمكر..
فردوس:كل واحد تخدمه نيته..هي تغدوا يابنات..
قعدت تاكل هي وصاحبتها..
وشويه وجت سفرة لعواطف ونجاح طاحوا فيها بإيديهم الزوز...
🌻🌻🌻🌻
وعدت ساعات النهار..
ومغرب المغرب...
وفايزة من مطيرة لقت روحها حاصله في اكثر من وحده تبيها تمكيجها..
وهالشي ماضايقهاش بالعكس كنت مستمتعه ع الآخر بالذات بكلمات الاعجاب والمدح في شغلها..
اخر من مكيجت صاحباتها...بس تفننت وهي دير لسدرة في المكياج اكثر شي..
نسرين؛تهبلي ياسدرة كيف طلع فيك المكياج..
فايزة بإبتسامه؛سدرة اصلا حلوة والمكياج طلعها..
سدرة وهي مبتسمه بتعجب:لهالدرجه..
عائشه بإبتسامه؛بري شوفي في المرايه..
مشت سدرة طلعت طول للمرايه وقفت قدامها...
وشافت روحها كيف طالعه وعجبها شكلها هلبه..
بس ماتعودتش تشوف روحها بمنظر البنت الناعمه اللي كلها انوثه لهدا حست روحها وكأنها مش هي وهي تتفرج ع شكلها مع الفستان الصيفي اللي كانت لابساته...
شويه وطلعت مع صحباتها للخيمه والعيون عليها كانت مختلفه هلبه..
وفي مراة شكلها غريب وملامحها غريبة فيها شي مش لينا كانت تشبحلها وخلاص..
فايزة؛من هي هديكا؟
سدرة:اول مرة نشوفها..
عائشه؛تقريبا هادي المراة السوريه اللي جت سكنت في الشارع هي وولدها..
البنات:سوريه؟
عائشه:ايه..يومها بوي يحكي عليهم جايه هي وولدها وحفيدها ممكن من عمر نضال ارمل هو...
سدرة:وشن جابهم لليبيا معاش لقوا وين يعيشوا؟
عائشه بضحكه:راجلها ليبي يابنتي سنين من عمرها عاشتهم هني..
فايزة؛قولي هكي من الاول..فنصت وقالت..حي بنات شكله ولدها هو نفسه اللي ريناه طالع من حوش الباني..
نسرين؛صح تفكرت توا .
عائشه:ايه هما في حوش الباني توا وهو دكتور ع فكرة .
نسرين بإبتسامة حماس:شكله نصيبي يابنات!؟
فايزة:نسيتي ياهبله اول ماشاف سدرة شن دار..
نسرين؛تو لما يعرف بقصتها مع المهدي يفوتها..
سدرة؛عليك جو جوكم هي شبحه عاديه راهو غير حني فهمناها غلط وقتها..
فايزة:ياودي مظني..
سدرة:خلاص غيروا الشريط..
فايزة:خطرتي عليا خل نوض نولع المسجل..
وناضت تجري ولعت المسجل ع اغاني الزمزامات...
والحاضرين بدوا يصفقوا..
🌻في خيمة الرجاله..
كان صبري مقعمز ع عالة الشاهي يدير فيها..
والرجاله حواليه يهدرزوا..
علي؛قاطع بكل يامحمد..
محمد بإبتسامة احراج:حقك عليا ياعمي علي غير والله مشاغل وظروف وموال توا قاعد فيه..
لطفي:سمعت قالوا بتخش في تجارة مواد البناء .
محمد؛ايه وان شاء الله خير..
علي؛وهي ولت التجارة ولا شنو مش كان مانعها هداكا المريض..
فنص لطفي وقال؛بوي!؟
محمد بضحكه:الله يربحك ياحاج علي فكنا والله يلموا اللي في الخيمه كلهم بعدين ويرفعوهم ورا الشمس..
هز راسه علي وهو عاقد حواجبه وقال:هانا سكتنا هو هدا اللي نقدروا عليه السكات..
لطفي غير الموضوع وقال:بالله شن حال خوك اللي في تونس..
محمد؛ماقتلكش سافر لمصر بيقعد غادي خلاص قال غادي المستقبل مش هني..
علي:عنده الحق..
لطفي بضحكه وهو يفنص:بوي!
محمد بضحكه؛اني بنحكلها عميتها...
قعد.يضحك لطفي..
وعلي الواعر يوزع في نظره ع المكان وهو عاقد حواجبه..
🌱🌱🌱🌱🌱
"عيني ياعيني هيا نرحلوا...وقولوا محمد وعليه نصلوا"
واستمرت السهريات الحلوة اللي قاعده تتسجل ذكريات في العقول والقلوب..
زهي وطرب وفرحه وضحك..والقلوب مفرفحه...
واللي يجري ويعول واللي يفرق...وكله يخدم من قلبه جيران وصحاب وكأنه العرس ليهم هما ...
وتعدي ليلة هالسهريه ويجي يوم الحمام..
وعاد زمان الناس ماكانتش واعيه لهلبه حاجات..
منها حرمة الحمام النسائي اللي يمشولها العروسه وناس من اهلها وصاحبتها..
وفردوس منهم..مشت مع صاحباتها وصاحبات اختها نسرين وفايزة..
لكن سدرة قعدت بش تعاون امها..وعائشه معاها اللي تكون بنت شيخ واكيد مش حترافقهم..
كانوا في الحوش النساوين يوتوا في رشدة البرمه"المقطع"..
وكانت كميه كبيره لأن المعازيم هلبه...
اول ماطابت الرشدة وبدوا يصبوا فيها..
سمعوا صوت الكلاكسات...فردوس روحت من الحمام...
امها طول ولعت الوشق ومشت مع باقي النساوين بش يستقبلوها..
وكانوا البنات رافعات الدربوكه نزلوا من الباص اللي كان رافعهم فيه يوسف وهما يدربكوا ويغنوا..
"لبست بو خطين توامه....وعروستنا تقول حمامه"..
وردة لما شافت بنتها بالبودري خنقتها العبره وهدا حست انها حتفارقها خلاص..
بس شدت روحها وقعدت تغني وتلود وتبخر...
بعد مادارو شوط حلو ...
خشوا وبدوا يتغدوا...
🌻وفي الجنان..
مغليه:كيف ماتغديتوش؟
نضال؛والله ماكلينا حاجه يما..
ع جية وردة؛خير مغليه شن في..
مغليه؛يبوا يتغدوا..
وردة؛هي شويه نصبلكم قعمزوا ع الفراشات غادي..
مغليه:هيا برا انت وياه..
ومشوا هما الزوز قعمزوا ع الفراشات..
شويه وجت ورده بسفرة فيها رشده وشيش مشروب..
عمر:مانحبهاش هيا
فنصت فيه امه وقالت:كل من غير دلع..
وردة؛خليه يامغليه ..تاكل مكرونه مسقيه..
عمر:ايه ناكلها..
وردة؛باهي راجي.
ومشت خش داخل..
مغليه حطت يدها ع رقبتها وقالت بهنس؛تو نوريك..ومشت خشت داخل..
ونضال ياكل في الرشده ومش مدور..
وعمر يراجي في المكرونه..
ع جية بنات الجيران الصغار وهما يجروا كانوا يلعبوا في غميضه وكل وحده درقت في تركينه..
ماعدا اميمه ماعرفتش وين تدرق..
عمربضحكه:عبيطه ورا الفوسي ياعبيطه..
اميمه:صح..ومشت تجري وادرقت ورا الفوسي..
شويه وجت غرفه هي دور شافت نضال ياكل..
غرفه؛ماعندكمش ماكله في حوشكم..
عمر:عندنا وبناكلوا عندكم بش نكملوا عليك الماكله يابقرة..
غرفه وعيونها معبيات دموع:معاش تقول بقرة..
عمر:لابقرة وبمبلة غاز زي ماقالت اميمه..
طلعت اميمه من ورا الفوسي وقالت:كذاب!
غرفه؛بري يامتشردة يلي تاخدي في حوايجي وتلبسي فيهم...
عمر:حقه تلبس في حوايجك..
غرفه؛وتاخد في العابي ماهو بوها مايشريلهاش..
عمر بضحكه اشر على اميمه وقال:يناري ماعندها شي ياناري...
ونضال يضحك..
واميمه كانت تشبحلهم وهي تقاوم في البكي...وتحاول تسقم فمها اللي ينزل لأنها بتبكي.بس معاش قدرت لما شافت بنات الجيران كلهم يشبحولها ويضحكوا..
خشت طول تجري للكوجينه..
عمر وهو يضحك؛وحده.عبيطه..
و اميمه مشت خشت لدار سدرة سكرتها عليها وقعدت ومشت خشت في الزاويه اللي حدا الباب وقعدت تبكي بالعبره...
لحظات وانفتح الباب وخشت سدرة لدارها..
سمعت صوت بكي استغربت..قعدت دور لين لقتها..
سدرة؛اميمه..
واميمه ع نفسه وضعها تبكي بعبرتها..
جتها سدرة وطبست خدتها ورفعتها فوق وهي دفنت وجهها في رقبة سدرة وقعدت تبكي بالعبرة...
وسدرة بضيق قالت؛خيرك حبيبتي من بكاك...!
🌱🌱🌱🌱🌱
فهالوقت..
طلعوا سوابيت بتات فردوس لوسط الحوش...
ماكانش في دبش هلبه بحكم الغلاء وقلة اللبس الباهي...
بس الحاجات في البتات خلوة ومنها قفطان المحضر...
اللي هلبه سألوا عن سعره وتفاجئوا بيه لأنه غالي هلبه..
مشتده؛وكان فصلتوا تفصيل خير..
فردوس:مش حيجي زي هدا ياخالتي..
نجمه:حطيتوا فيه ميزانيه ياكبدي ان شاء الله تلبسيه هلبه يابنتي ومايقعدلك..
مطيره؛ اللطف وليش بيقعد اكيد ياما بيجيها مناسبات تلبسهم فيه..
عتيقه؛هو كل شي قنين ماشاء الله ربي يهنيك يافردوس..
فردوس بإبتسامه؛تسلمي خالتي وعقبال عيشه .
عتيقه بإبتسامه؛آمين..
خديجه؛هدا هو ذهبك بس!..
مطيرة:بس!!!!!؟ ماريتش عروس دايرة ربعه توا...
فردوس برفعة حاجب وهي مبتسمه؛ان شاء الله يجيك نصيبك وديري خير منه...
خديجه انطمست مرة وحده ولون وجهها تغير رسمت وجهها ابتسامه مزيفه وقالت؛لامازال نخدم قبل وندير مرتب في يدي بش ندير الحاجه الباهيه..
عواطف؛صدقتي ياخديجه اللي تبدا توتي في روحها ع أقل من مهلها ووين يجي نصيبها تلقى روحها ماناقصتها حاجه..
فردوس بلعت ريقها وقعدت ساكته ماعرفتش ترد..
ومطيره رقتلها لكن قدام الناس مجبوره تسكت..
مررت نظرها ع الموجودات وقالت:عقبال بنياتكم ان شاء الله..
~~~~~~
سدرة؛غدوة تو تلبسي احلى قفطان ونقول لفايزة ديرلك احلى تسريحه وتلبسي الكندرة اللي شريتهالك عمتي وتطلعي احلى منهم كلهم ..
اميمه وهي تمسح في دموعها؛حقه؟!
سدرة بإبتسامه؛والله..نقولك سر قفطانك احلى من قفطان غرفه بهلبه..
ضحكت اميمه..
سدرة بضحكه وهي تقرص في خدودها؛محلاها الضحكه اللي من غير سنون هادي..
🌱🌱🌱🌱🌱
الساعه 9:00ليلا..
"مش عارفه كيف نقصوا"
صفيه؛زحمه يابنتي وهلبه الناس اللي جو..غير بري بسرعه ضبحي ع يوسف..
سدرة؛باهي..
وحطت شاربتها ع راسها ومشي جهة حوش عمها..
ووقفت حدا الباب الفاصل وقعدت تنادي؛يوسف...يايوسف...يوسف..
والمناداة ليوسف واللي جي..
المهدي؛خيرك تنادي شن تبي..
سدرة وقلبها يدق بقوة؛نبي يوسف..
المهدي؛مش فاضي يوسف شن تبي..
سدرة؛اني قلت نبي يوسف..
المهدي بنفاذ صبر؛سدرة الجو متاعك هدا فكيني منه وقولي شن تبي..
سدرة:ماتعيطش عليا..
ضحك وقال بهدوء:ياودي باهي قولي شن تبي..
شدت ابتسامتها وقالت؛نقص علينا المشروب نبوه لغدوة..مدتله الفلوس وقالت ..قول ليوسف يجيب زوز صناديق..
المهدي؛زوز..
سدرة:ايه..
المهدي؛باهي بري..
سدرة:خود الفلوس..
المهدي شد يد باب الحديد وقال؛قتلك خشي..
وجبد الباب وهي تقوله؛مهدي مايجيش هكي راهو..
المهدي بدون مايرد عليها سكر الباب ومشي..
هي تنهدت بإبتسامه بعدين مشت لحوشهم..
"شن كنتي ديري"
شهقت وحطت يدها ع قلبها وهي تقول؛خلعتوني..
فايزة بضحكه؛دايرة موعد..
سدرة ووجهها احمر:دايرة عينك ..
نسرين بضحكه؛باهي شن وقفك ع خوي!؟
سدرة وهي محرجه؛والله مرت عمي صفيه قالت المشروب مايسدش لغدوة وبعتتني نعطي ليوسف يشري ولما ناديته طلعلي خوك..
نسرين؛وعلاش الفلوس قاعدات عندك..
سدرة بأبتسامه؛خوك ياحنه يبي يشري بروحه.
نسرين بضحكه مغرورة:يانجي خويا القبضاي..
ضحكت سدرة..
فايزة شبحت لنسرين ونسرين شبحتلها وبدوا يصفقوا الزوز ويغنوا..
صلح صلوحي..نبيه بروحي...فوق العمارة...لابس نظارة..
هي ضحكت عليهم وهما خشوا وراها ومازال يغنوا فيها...
🌱🌱🌱🌱🌱
وجي يوم الكسوة..
وكان يوم كبير .. وهو اهم يوم في العرس زمان...
من الصبح ناضوا يجروا ع الغدي والعشي متاع عرب الكسوة..
وفي من نساوين كانوا يجهزوا في رواحهم للبس الصدرة..
بدلة كبيرة وصغيره...
فايزة كانت واقفه ع وحده من خالات سدرة وهي تمكيج في وحده من الصدارات كانت فالحه في المكياج حتى هي..
قعدت تراكب فيها بالخطوة وتتعلم....
وتشوف فيهم كيف يلبسوا فيهم فالعربي وتساعد فيهم وتتعلم في نفس الوقت..
والعمليه تكررت قدامها اكثر من مرة لين رسخت في عقلها...
🌻🌻🌻🌻
انقرت الفاتحه بعد العصر...
ودارو عليها شوط ناشط بالزغاريد....بس كان سريع
بس يلحقوا يوتوا ارواحهم.....
اخر من شقي بروحه وردة...لبستها مطيره تركيبه ومكيجتها..
ومجرد هي كملت المكياج عرب الكسوة جو..
واستقبلوهم بالأغاني..
"العين قالت يامرحب بيه اللي جانا وجاب كساويه"
"اهو جي اللي يبيها...اهو جي جاب كساويها"...
وقعدوا النساوين من اهل العريس يدخلوا فب سوابيت الكسوة...
بدله كبيره...وبدله صغيرة..وقفطان كبير..وبدله كان واضح انها مش من البلاد..وفجرة اصليه وذهب وسبات احذية..وسبات مكياج...
مغليه:شكله في حاجات جايبينهم من برا..
مطيرة؛ايه واضح..لكن ماشاء الله كسوة مقومه..
مغليه:ايه ماشاء الله..
مطيره:العقبه لبنياتك..
مغليه بإبتسامه؛آمين..
وبنتك يامغليه تشوف وقريب تبكي من الغيظ من القهرة...
🌻🌻🌻🌻🌻
ودارو السبر لفردوس..
لبسوها حولي البدله الكبيره وغموها بيه وسكروا عليها بخلال الحوته...
وهما يلالوا..
بعدين طلعوا زوز صدارات وحده شادتها من اليمين ووحده شادتها من اليسار...وقدامها زوز شادات المرايه...
وسدرة شادة صونيه الحنه بالشماعه...
وفايزة تخبط ع الدربوكه...
لين وصلوها وسطوا الخيمه وقعدوا يدوروا بيها...
ويغنوا....
دوروا بيها دوروا بيها وان شاء الله السعد بواتيها..
واهل العريس مقعمزين يتفرجوا..
كملوا دورتهم بيها سبعه دورات..
بعدين جتها عمتها مطيره قعدت ترفع فيها وتنزل وهما يعدوا..
من الواحد للسبعه...
وبعد قعمزوها ع كرسي كبير لونه احمر...
وجوها وقعدوا يغنوا عليها...
اهلها واهل العريس...
بعدين قعدت تغني عليها عمتها مطيرة البوطويل...
وكلمات الغني كله عن وداع لعروسه لأهلها...
قعدت سدرة تبكي بصمت..
ووردة تبكي حتى هي..
وفردوس من تحت الحولي تبكي..
لين طبست عليها مغليه فتحت شويه من الحولي ولقتها تبكي..
ولت غطتها بعدين قالت؛صفيه..
هزت صفيه راسها...وخدوا الزوز فردوس ودخلوها داخل...
وشويه وحطوا العشي...للرجاله والنساوين...
وبعد العشي والحلاوات والشاهي روحوا اهل العريس..
وبدوا يجهزوا لحنة فردوس...
وكانت ليلة الحنه من احلى الليالي اللي قعدت ذكرى جميله لاتنسى من هداكا الزمن الجميل...
🌻قبل الفجر بساعه..
والكل راقدين...
بأصوات هامسه كانوا يهدرزوا..
سدرة؛خلاص بتمشي وتخلينا..
فردوس ودموعها في عيونها؛وبنفتك منكم ومن تنقريزكم..
سدرة ودموعها بينزلوا؛تحسابي الزواج يامهبوله..
فردوس؛علاش كم تزوجتي من قبل..!
ضحكت فردوس ومسحت دموعها وهي تقول:فردوس...ارفعي راس بوك وامك خليهم يقولوا ارحم من رباها بالله عليك دوسه..
فردوس ودموعها نزلوا؛راهو اني مش بايرة ولاتنباله..اني كنت حاسه بكآبه لأني قاعده هكي عايشه ماندير في شي وماقدرتش نفلح في شي..لكن بعد نتزوج كل شي يتغير..
مسحت سدرة دموع اختها وقالت؛ان شاء الله...هي خلاص ارقدي وراك مزينه غدوة..
فردوس هزت راسها وغمضت عيونها...وسدرة رقدت جنبها وعطتها بالظهر وقعدت تبكي بصمت...
🌱🌱🌱🌱🌱
وطلعتها اليوم الثاني حتى هي كانت بالدموع ...
طلعة البنت واعرة وبالذات الاولى..
ووردة اللي قاعد قلبها مجروح من غياب ولدها الكبير زادها توا فراق بنتها الكبيرة...اللي بتسكن بعيد عنهم ...
🌻🌻🌻🌻🌻
"اطلعوا يابنات شوفوا الكوشه"..
طلعوا كلهم للخيمه وقعدوا يتفرجوا عليها.
وكل وحده تراجي في اليوم اللي تقعمز فيه عليها..
هادي وحده من اهم احلام اي بنت في الدنيا..
وتكابر وتكذب اللي تقول عمري ماتمنيت الحاجه هادي...
هادي وكأنها في فطرتها حني الإناث...زي غريزة الامومه بالزبط...
واكيد مش كل الحياة الزواج..بس هو من اساسياتها وسننها وربي يرزق كل بنيه بالزوج الصالح...
🌱🌱🌱🌱🌱
كان اخر يوم في العرس..
هو الابسط...
مافيشي هداكا العواله والجري...
لهدا اللي هادي قعدت تهتم بنفسها وطلتها وخلاص..
ماكانش في بهرجة زي توا...
كله بسيط وعادي...بس حلو في نفس الوقت...
🌻🌻🌻🌻🌻
"الله يبارك عليها اميمه طالعه زي الغزاله"
صفيه بإبتسامه؛تسلمي..
مغليه:قفطانها تفصيل ولا؟
صفيه؛ايه..
مغليه؛الصراحه قنين وهي ماشاء الله عليها...
صفيه بإبتسامه؛تسلمي يامغليه..
واميمه ترقص مع غرفه على اغاني المسجل..
وكانت جدا ملفته للإنتباه..بشقوريتها ونقشها الحلو وعيونها المحير لونهم لامعروفات زرق ولاخضر ولاسماويات..
يذبل جمال الانثى لما تفقد الاهتمام...
ويحيا لما ترتوى بالأهتمام والحب..
صغيرة كانت او كبيره...
🌻🌻🌻🌻🌻
"قولوا ياالله عليها..ياماشاء الله عليها"
وخشت فردوس للخيمه وهي عروس كانت في غاية الجمال...
واحبابها خافوا عليها من العين وقعدوا يبخروا فيها..
ع ايام زمان كان هادي الماشي والمعروف بسبب قلة الوعي الديني..
"توحد لما تشوف الزين...توحد ماتاخد بالعين"
وقعدوا يدرجوا فيها وهما يغنوا عليها لين وصلوها للكوشه...
وقعمزوها وقعدوا يساووا في الفيلو متاعها...
ويغنوا...
مطيرة..
يامبروك على البنيه..وين نجيها تفرح بيا...
وردة..
يامبروك على غاليتي حطيتك وين تهنيتي...
سدرة
ياسلم بوها رباها للناس الزينين عطاها...
مطيرة
ياسلم بوجرد كبير امريبهم ربه ع الكيف...
سدرة
إن شاء الله سالم يابونا اللي بيك ناس يعزونا..
وردة..
وإن شاء الله تسلم ياغالي مطراحك مايشده والي..
سدرة
ان شاء الله ماتشتاقه عين يخش يقول بناتي وين..
فردوس وهما يغنوا ع بوها عيونها تعبوا دموع بس شدتهم بقوة..
ماشافاتاش طول ايام العرس لأن في هديكا الايام كان في حشم بين البنت وبوها مايشوفها ولاتشوف طول اسبوع العرس وحتى بعد ماتجي عروسه للحوش....
واستمرت ليلة الحفلات لمدة تلاته ساعات..
وزعوا فيهم البيتي لوز والروزاطه...
وبعدين الحلاوات والشاهي...
وبعدها جو اهل العريس...
وهني وردة خشت داخل ومعاش طلعت....
والنساوين من اهل العريس بعد ماخشوا للخيمه استقبلوهم العمه الخالات...
ضيفوهم...بعدين ناضوا غنوا عليها شويه...
وطلعوها معاهم...ولحقوها النساوين الكبار من عيلتها...
وبعد طلعت..
انهارت سدرة بالبكي وصاحباتها تأثروا وقعدوا يبكوا معاها...
ع جية وحده من العوالات تجري..
:ام العروسه اغمى عليها داخل..
ناضت سدرة تجري وخشت داخل ووراها صاحباتها والجيران..
لقوا وردة طايحه في الجنان..
سدرة وهي تعيط؛جيبولي ريحه جيبوا...
خشت فايزة تجري جابت عطرها وجتهم وعطاته لسدره..
اللي بخت العطر ع يدها وقعدت تشمم في امها والجيران يمسحولها في وجهها لين فاقت..
وببكاء قالت؛مشت فردوس..
سدرة وهي تحاول تبان قويه:ايه يام مشت لحوش راجلها عروسه افرحي ..
خشت وردة في حضن بنتها وسدرة قعدت تمسح عليها وهي شاده دموعها بالسيف والجارات يهدوا فيها...
~~~~~~~
في الجنان ..
في تركينه مستخطيه ومكان هادي..
لطفي بإبتسامه؛يامهبوله بنتك تزوجت خلاص وتهنيتي عليها علاش تبكي...
وردة وهي تمسح في دموعها؛مكانها بيولي فاضي يالطفي..
لطفي؛تو تجيك وتمشيلها ودير صغويرة يمشوا عليك ويجوا يفسدوا الغرس يكسروا الحوش يحوسوا في الدنيا يهبلوك هبال..
ضحكت وردة من بين دموعها...
لطفي؛مالا كان نقولك ان اليوم محمد والمهدي كلموني ع سدرة شن تقولي..
وردة وهي متفاجئه؛حق!
لطفي:فاجئوني حتى اني لكن اني رديت عليه وقتله يأجل الموضوع لين البنت تخش الجامعه وتقرا فيها عامين وهو يدير حوش ع روحه..
وردة؛عنده شقة فوق حوش بوه..
لطفي:مازال ياما تبي..اني ياوردة سدرة بالذات مازال ماشبعتش منها نبيها طول عندي..
ضحكت وردة بعدين قالت؛حتى اني زيك..خليه يراجي مش هاربه اهي قدامه تقرا وتكمل جامعتها وبعدين ياخدها..
لطفي؛قولك هكي..
وردة هزت راسها بإيجاب..
لطفي تنهد براحه وقال:ريحتي قلبي..
قعدت تضحك وردة...
~~~~~~~~~
"معاش تفتحه الموضوع خلاص لين البنت تم قرايتها"
المهدي بصدمه؛ لين تم قرايتها !!؟
محمد؛ايه مافهمتش ان كلام بوها وجدها واضح هدا قصدهم..وبعدين اني حسيت الحاج علي مش مرحب بالموضوع..
المهدي:مادخليش بيه جدها عليا فيها وبوها..هز راسه وقال..باهي اني معاش بنفتحه الموضوع لين نكمل الشقه وبعدين لكل حادث حديث..تصبح ع خير..
ومشي ركب الدروج..
بوه حرك راسه يمين ويسار ومشي...
🌻🌻🌻🌻🌻🌻
وطل صبح اليوم التاني..
والجيران والاقارب اللي كانوا بايتين فحوش العرس..
ناضوا بكري وبعد مافطروا فطرة سمحه..
بدوا يضموا في الحوسه..
قسموا رواحهم..
دين يغسلوا البساطات..
ودين شدوا الكوجينه..
ودين شدوا باقي الحوش يسيقوا ويغسلوا..
وبرا جايبين رجاله يفكوا في الخيمه بعد ماسقدوا صاحب البوطي...
وكملوا حوستهم قيس المغرب...
وخلاص بعدين كل حد وتى روحه بيروح ومنهم المستاذنات..
سقدت وردة الكل بكيسه فيها حلوات ولوقا ومشروب...
وروحوا وفضي الحوش...
سدرة؛يام بنمشي نرقد ماتنوضيش الا للصلاه بس...
وردة؛باهي بري تريحي بنتي...
مشت سدرة خشت دارها وسكرت عليها..
ووردة مشت دارت قهوة وقعمزت في الجنان وتشرب فيها..
ورجعت تخمم من جديد..
وهي الأم امتى تبطل تخميم...
🌱🌱🌱🌱🌱
"بري لخوك قوليله ينزل يتعشى"
خديجه بملل؛باهي..
ومشت للدروج وركبت للدور التاني وين مافي ديار خوتها..
مشت لدار المهدي ودقت الباب..
خديجه؛مهدي انزل تعشى..
"مانبيش"
هي انفجعت من رده اللي كان بصوت عالي..
مطت شواربها للأسفل بعدم فهم..
بعدين مشت نزلت...
وين وصلت لدار المعيشه وخشت..
خديجه؛قال مانبيش..وعيط عياط..
تنهدت مغليه وقالت؛طايرتله من عيت الواعر اللي ردوه..
فتحت عيونها ع وسعهم وقالت؛ردوه؟!
مغليه؛اللي فهمته من بوك انهم قالوا مش عاطيينها قبل تكمل قرايتها..
ابتسمت وهي متعجبه وفرحانه في نفس الوقت..
مغليه؛ربي يكون معانا الايام الجايه غله كله بيفشه فينا. خديجه في نفسها "عادي المهم مايتزوجش توا"
ع خشة الجالي ووراه خوته...
مغليه:نظفت المخزن وليدي..
قعمز الجالي وقال؛ايه يام..
مغليه؛ربي يرضى عليك دنيا وآخره الوحيد اللي مريحني في خوتك..
ابتسم الجالي وعجبه هلبه مدحه امه ليه قدام خوته..
خديجه وهي تشوف؛عندك الحق يام..كلهم يقولوا فيها الجالي هادي وخدوم ومش متاع مشاكل حتى مع الصغار..
عمر:حتى حني كويسين..
مغليه شبحتلهم وقالت؛انتم كولوا واسكتوا..
ضحكوا خديجه والجالي..
وهما قعدوا ياكلوا بعصبيه..
الجالي:وين نسرين؟
مغليه؛راقده...
🌻وحتى فايزة كانت راقده بعد تعب اليوم ...
اما عائشه..
كانت تحدد في دبش خوتها..
وبعد كملت بوت كنادرهم..
واللي روح منهم متأخر دارتله عشاه..
والماعين وهي تغسل فيهم بترقد وهي واقفه..
بعد كملت..
مشت بتخش لدارها..
"عايشة اغسليلي رقبة سوريتي وانشريها فيسع فيسع"
تبي تعيط..تبي تقول لا..تبي تقول تعبت ارحموني..
بس ماتقدرش لإنها ماتعودتش ع الإعتراض..
التفتت وقالت بهدوء:هات ترا..
عطهالها وقال؛نبيها بيضا غدوة بسرعه..
عائشه؛حاضر..
ومشي من قدامها..
وهي مشت للحمام....
وكدت رقبة السوريه بالصابون التايد...بعدين الصابون الاخضر الكبير..
وبعد مصمصتها وتأكدت انها نظافت...مشت نشرتها..
بعدين خشت لدارها...وانطرحت ورقدت طول من التعب..
🍀🍀🍀🍀🍀
بعد يومين...
في مطحن بن عيت الواعر..
كان لطفي مقعمز يبيع..
شويه خش عليه واحد وقال..
"السلام عليكم"
لطفي ناض وقف وهو مبتسم بمفاجآه؛اووووو جبريل...
جبريل بضحكه؛اها جبريل اللي لك مده مقاطعه..
جاه وحضنه وهو يقول؛لا والله مشاغل وتلاهي الدنيا وانت ادرى..
جبريل؛عارف عارف...المهم ايش حالك وحال الحاج علي والعيلة كلها..
لطفي بعد وقال:الحمدلله...تفضل قعمز تفضل..
جبريل قعمز وهو يقول؛يزيد فضلك...
لطفي؛شنوحالكم انتم عرب بنغازي..
جبريل؛والله الحمد لله اهو ماشيين فهالحياة وندفوا..
لطفي قعمز وهو يقول؛والله كلنا هكي..
هز راسه وقال:الحمد لله ع كل حال..بس انت كام طاوعني ع مشروع اللي نبي نشاركك فيه غادي..
لطفي؛الموضوع يبي مشي وجي غادي ياجبريل وعارف الظروف..
جبريل:وانا قتلك جيب هلك وتعال اقعد غادي عامين صدقني حدير فيهم شغل كبير قهوتكم مرغوبه غادي..
لطفي؛صعب هلبه..
جبريل؛ع راحتك بنغصب عليك..المهم صل ع رسول الله يالطفي..
لطفي بإستغراب:اللهم صل على محمد...ان شاء الله خير..
جبريل:انا جايك وعارفك مش حتردني عارف قدري عندك كبير..
لطفي:اكيد..
جبريل:مال اسمع..ولد مختار..
وجه لطفي تغير..
جبريل؛مغير اسمعني ياراجل قبل..
لطفي تنهد وقال؛احكي نسمع فيك..
جبريل؛ولدك مختار بعتلي رسالع مع واحد معرفه كان في مالطا وروح الايام اللي فاتن ..الرساله انا قريتها باهي..
وعندك تاخد منه موقف قوي اللي داره مش ساهل..لكن اهو عدن سنتين ياما صار فيهن...وراهو نادم قد شعر راسه وقال اللي يبيه باني انا فيه المهم يسامحني ويردني..
لطفي قاطعه وقال:قال انه حول فكرة الهجرة من راسه؟
جبريل:اصبر جايك بالكلام..هوقال يبيك تفهم انه مش شايف مستقبله هنا مايقدر يدير شي ينفعه هنا..
لطفي:مدام قاعد مسكر راسه ع حكاية الهجره معناها مش حيتغير شي..
جبريل؛ولدك من حقه يختار طريقه وانت مش من حقك تمنعه..
لطفي بشي من الانفعال:لا من حقي ..اني وراي ولايا يبوا راجل يسندهم كان درقت عيني..نبي من يساعدني ويشد معاي مسؤولية الخدمه هو الولد الوحيد ماعنديش غيره..
هو البكر ياجبريل عباي كله عليه بعد ربي..
جبريل بحيره؛والله ماني شن نقولك عندك الحق..
لطفي:معليشي جبريل موضوع مختار معاش نبي نفتحه بكل..بعد اللي داره والكسرة اللي كسرهالي وخلاني في موقف مخزي معاش قادر نقبله..تعرف حتى في طلبه للسماح مانيش مصدقه..اني متأكد انه فلوسه ومولي بش ياخد فلوس بس..
جبريل:لايالطفي راه من كلامه مايبانش هك بكل..
ابتسم بأسف وقال؛هدا ولدي ونعرفه ياجبريل زين ماتعبش روحك ودافع عنه..
تنهد جبريل وقال؛معاد عندي كلام نقوله غير ربي يصلح الحال..
هز لطفي راسه وقال:آمين..تنهد وابتسم بعدين قال..اليوم عندي راهو..
جبريل؛لالا ياغالي انا حاجز في فندق من البارح..
لطفي:عيب عليك ياراجل حوشي موجود وتمشي تقعد في فندق!! تعرف ياجبريل كان ماجيت قعدت عندي لين روحت تنسى انك تعرف واحد اسمه لطفي..
ضحك جبريل:لا الا هذي..خلاص خلاص قعدنا عندك..
🌻🌻🌻🌻🌻
في المدرسه..
كان الاسبوع الثقافي وقتها..
ماكانش في قراية...
محاضرات ونشاطات بس...
والبنات ممشيات اغلب الوقت في الهدرزة..
سدرة بضيق:وشن ذنبي اني ياخد مني موقف..
نسرين:المهدي وتعرفيه ياسدرة كان طارتله من حد يلم الدنيا كلها ويحطها معاه..
سدرة؛ياريته مااستعجل ياريته شاورني..
نسرين؛اهو هدا اللي صار..
فايزة؛تنحل ان شاء الله..والمهدي بعدين يومين يرجع زي قبل..خلوكم توا معايا اني..
عائشه:خيرك انتي..
فايزة؛انتي بالذات صكري وذانك وماتسمعيش..
عائشه؛معناها حاجه غلط زي العاده..
فايزة؛سكتوها خير مانريشها..
سدرة بضحكه؛باهي قولي شنو في..
فايزة بإبتسامه:اني معجبه بواحد..
عائشه:معليشي شويه سدرة...الوي ياليلى علوي...
سدرة ونسرين قعدوا يضحكوا من جدهم عرفوا عائشه طلعت من طورها..
فايزة؛وخيرني مش من حقي اهي سدرة تحب..
عائشه؛ولواني مش راضيه ع العلاقه اللي بينها وبين مهدي وهي تعرف لكن تقعد سدرة عاقله مش زيك مطفوشه..
جت فايزة لعائشه وسكرتلها فمها وكملت تقول:المهم معجبه بأحمد هداكا جارنا..
نتشتها عائشه..
هي طلقت وقالت بوجع؛اي..
عائشه؛احمد ولد خالتي خيريه.؟!
فايزة وهي تتحسس في يدها؛ايه هو..
سدرة؛هدا اللي قداش ليه يجري في جرتك..
فايزة ابتسمت وقالت:اممم..
نسرين؛وشن غيرك توا..
فايزة:هو اللي خلاني نتحجب..
كلهم بصوت واحد؛حقه!
فايزة هزت راسها وهي تضحك..
عائشه:الحق هو راجل كويس وخوتي ديما يشكروا فيه ان شاء الله يطلع صادق معاك ويجيك من الباب..
فايزة؛نحس فيه هكي..غير يراجي فيا نكمل الثانوي..واني كان جاني خطبني نقول باهي طول ماعندي علاش قاعده فالحوش مدام مش قاريه جامعه..
نسرين؛لا ماتقوليهاش بتتزوجي بكري وبننحرموا منك..
سدرة؛صدقت نسرين..
فايزة:لاوين يحرمني منكم بنشرطكم عليه شرط ونخليهم يكتبوا في العقد صاحبتها تقعد معاهم لين تموت..
ضحكوا..
فايزة:كله الا روحاتي ايوه..
هما الثلاته جوها حضنوها..وهي ضمتهم وقالت بضحكه:اللي يشوفكم يقول بنتزوج غدوة...!
🌱🌱🌱🌱🌱
"فيسع فيسع جيبوا خبزة وتعالوا وقت عليكم"
نضال وعمر طلعوا يجروا من للحوش للدكان..
وصلوا غادي خدوا خبزة وولوا مروحين..
وهما مروحين فاتوا من قدام حوش نجمه..
وقف عمر؛قداش نكرها المراة هادي..
نضال؛حتى اني..اسمع تعالى نرنوا ع الجرس وندقوا بابهم بقوة..
عمر:لا بنحدف رشاده عليهم خل تجي في واحد من رواسنهم تكسره..
نضال؛فكرة مليحه..
وعمر طبس خدي رشاده ...
وفي حوش نجمه..
كانت واقفه في الجنان تكنس فيه..
لابيها لا غليها تفوت من فوقها رشاده تجي ع روشن الصاله تكسره..
عيطت ع طول رقبتها وقال؛وووه عليا شن هدا!
ومشت طول تجري للباب فتحاته..
شافت عمر ونضال يجروا..
نجمه وين عرفتهم صغار مغليه وكأنها حصلتها فرصه:هو انتم ياكلاب ياحيوان ياقليلين الادب يلي مش لاقيين من يريبكم..
وتفتح مغليه الباب لولادها ويطب في ودانها كلام نجمه كله..
ماقالتش نسأل ولادي شن دايرين لا..
حتى هي حصلتها فرصه وبدت تلعلع:من هما اللي مش لاقيين من يريبهم..
نجمه:ولادك ياللا..
مغليه؛مربيين خير من ربايتك يارداحه ياشوارعيه..
نجمه وهي تفنص في عيونها:شوارعيه! اني شوارعيه مغليه شباشب اللي عرايكك وعارك شاهدين عليها شارع القهوة كله من سلم من شرك انتي يامحراك الشر..
مغليه؛اني محراك شر ياسوسه يافتانه محسديه..
نجمه:اللي قلتيه عليا كله فيك ياوجه الشوم تي من سمك قزنتي ولد راجلك وبوه حي..
مغليه وصلت عندها للشيطان الرجيم؛سكتلك هلبه هلبه..
ومشتلها تجري..
وشدتها وطاحوا في بعض ضرب..
نضال؛من يغلب امي ولانجمه..
عمر؛نحس فيها نجمه سمينه هلبه كان تقعمز ع امي تقتلها..
وحس عراكهم الشارع سمعه..
طلعوا وردة وصفيه من حياشهم يجروا..
وصفيه تقول؛حي ع العار!.
وردة؛مغليه نجمه هبلتوا في الشارع قدام الناس..
وكل وحده.فيهم شحت وحده عن التانيه ووقفوا بيناتهم..
مغليه:خلوني عليها خلوني هالمبكبكه هالمدرهبه..
صفيه وهي دف فيها؛خليك انتي الكبيره يامغليه..
نجمه ووردة شادتها؛تي بري طويله ياخايبه..كانك مش خايبه راهو محمد ماخداش عليك..
صفيه ووردة؛نجمه..
عيطت مغليه بغيظ ودفت صفيه وكرت نجمه من ورده وقعدوا تضرب فيها ونجمه تضرب...
ع مرواحة عواطف ونجاح من الجامعه..
وخديجه اللي كانت ماشيه لمدرسه حصلت فيها تعيين...
شافوا اللي صاير..
خديجه؛حي ع العار يام!..
ومشتلها تجري..
وعواطف ونجاح وراها..
جوهم وجبدوهم عن بعضهم ومع وردة وصفيه لين فكوهم..
خديجه؛يام الناس تتفرجي معقوله هكي عار راهو..
مغليه:هالكلبه استفزتني..
خديجه؛وانتي ضروري تنزلي نفسك لمستواها..
عواطف؛ريت هالمستوى من يومه هابط..
ع طلعة الحاج الواعر اللي كان يسمع في العار..
علي بصوت مرعب؛تحشمي ع وجهك.انتي وياها تحشمي نساوين طالعات يتعايطوا في الشارع مافيش فيكم وحده تسوى..
مغليه تحشمت ومشت طول خشت للحوش وبنتها وراها..
ونجمه انحرجت ومشت طول لحوشها وبناتها وراها وسكروا بيبانهم..
ووردة حركت راسها يمين ويسار وهي تقول:حشمونا قدام الشرقاوي...ومشت طول لحوشها..
وصفيه حتى هي مشت لحوشها..
علي:خزي سفتولات..
وخش وسكر الباب...
🌻في مربوعه لطفي..
لطفي بإحراج؛سامحنا بالله..
جبريل بضحكه؛ياما يسير عندنا غادي من هالجو واخذ عليه مادورش..
🌻🌻🌻🌻🌻
الساعه 1:00ظهرا..
مروحات البنات مع بعض في الطريق..
وهما يهدرزوا كالعاده..
فاتوا من قدام حوش السوريه...
طلع منه ولد صغير يجري بيمشي للمدرسه عثر طاح..
كلهم سموا بالله..
وسدرة طبست عليه رفعاته وهي تقول:بسيطه بسيطه ماصار شي..وقعدت تنفضله في حوايجه..
ع طلعة بوه شافهم..
وجو عيونه ع سدرة ابتسم وقدم وهو يقول:مساء الخير..
بعدت عائشه...
سدرة وقفت وهي تقول:عتر طاح..
بإبتسامه؛تاخر ع المدرسه..
هي هزت راسها وجت بتمشي..
هو قال:انت سدرة الواعر صح؟
البنات تفاجئوا وهي اكثر منهم..
ابتسم وقال:اني الدكتور اياد جاركم هنايا كان احتجتوا اي شي اني موجود..
سدرة مشت بدون ماترد وصاحباتها وراها.
وهو قعد يشبحلها بإبتسامه..بعدين خدي ولده وقال؛هيا عطلت..
وقعد يمشي وولده يمشي وهو يتلفت ويشوف لسدرة...
#بنغازي
#طوبى
....يتبع....
