# طوبى "شارع القهوة"
#جمان_فريد
#الجزء_السابع_والعشرين"قطعة من جهنم3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"شن بدير راقد هني"
حامد:راجل مروح تاعب نبي نرتاح في حوشي وبعدين اني جيت رقدت في المربوعه بش تاخدي راحتك انتي وياهم المربوعه مكان مستخطي وبعيد عليكم..بري اطلعي بري وخليني نرقد..
خدي جهاز المكيف عدله..
بعدين رقد وتغطى بشرشاف..
هي شبحتله بحده للحظات..
بعدين مشت طلعت من حداه وسكرت الباب وهي تقول همسا:حقير..
شويه رن جرس الحوش..
رسمت ع وجهها ابتسامه ومشت للباب وفتحاته..
لقت فايزة وعائشه والسدرة والتلاته قال؛نانسي..
هي ضحكت وقالت؛ياهلا ياهلا خشوا خشوا..
خشوا الثلاته وكل جايبه معاها حاجه..
سلموا عليها بالوحده وسألوا عن احوال بعض بعدين هي قالت..
نسرين؛علاش هدا كله..
سدرة:حاجه بسيطه..
فايزة؛حاجه تحبيها يارب تعجبك..
عائشه:ان شاء الله تمشي مع ذوقك..
نسرين بإبتسامه؛باهي حطوهم ع الطاوله غادي بعدين نشوفهم..
مشوا حطوهم..
بعدين خشوا معاها داخل وهما يحولوا في عباياتهم..
عائشه:ماجي حد قبلنا..
نسرين:لا..
وقعدت تاخد منهم في العبايات والأوشحه..
سدرة:صغارك مهناش؟
نسرين؛سقدتهم مع حناهم لحوش خوتها..
ضحكوا..
ومافيش وحده سألت عن حامد اذا قاعد اولا لأنه بديهيا مفروض يكون مش موجود..
خشوا قعمزوا في صالون كبير وفخم..
وقعمزت نسرين..
وشويه وجت الخدامه..
تفاجئوا البنات وين شافوها..
نسرين:العصير والشكولاته..
:حاضر مدام..
ومشت...
سدرة؛من امتى..
نسرين؛ليها فترة جابها حامد بش تساعدنا تشوفي في الحوش كيف كبير والصغار مش مهنيين روحهم واني وامه مش ملحقين..
فايزة:صح الحوش كبير يهد الحيل..
نسرين؛حاولت نقنعه نحولوا لأصغر منه يسدنا..سكر راسه..او بالأحرى امه مسكرة راسها..
شويه رن الجرس..
ناضت وهي تقول؛شويه بنات..
ومشت طلعت من حداهم..
عائشه:اكيده هديكا..
سدرة وفايزة شبحولها من غير مايعلقوا..
شويه خشوا نسرين وخديجه..
خديجه:السلام عليكم..
مشتلهم سلمت عليهم وقعمزت..ع خشة الخدامه بالعصير والشكولاته..
نسرين:كويس حسبتي خديجه..
؛شفتها وهي نازله من السيارة..
نسرين بضحكه:صح روشن المطبخ مقابل الجنان..
سدرة؛ماشاء الله فالحه.
:تسلمي..
وبعد فرقت عليهم مشت خشت داخل..
خديجه؛صغارك وعزوزتك رحلتيهم..
نسرين بضحكه:ايه..
وقعدوا يهدرزوا في الاول بهدوء بعدين بدي تصاعد الحماس في الهدرزة..اصوات عاليه وضحك..ونقاشات..
هما واخدات راحتهم ماعندهمش علم بالمحترم اللي قاعد في الحوش يتنصت عليهم..وكل مايسمع صوت فايزة ولاضحكتها يبتسم ابتسامه عريضه ..
فجأة رن الجرس من جديد..
هو طول درق...
فتحت نسرين الباب..
وكانوا نجاة وصابرين قدامها..
نسرين بإبتسامه:اهلا تفضلوا..
خشوا هما الزوز وقالوا:يزيد فضلك.
سلموا ع بعض..
بعدين رموا عباياتهم..
لبسة نجاة كانت مقبوله..
بس صابرين جريئة نوعا ما...
نسرين خدت عليها معاش مدورتها..
وهي تمشي وتوزع في نظرها ع الحوش اللي كان فيلا في الاصل..وتشوف في اثاثه.
شبحت لنسرين وقالت"حرام فهالمنظر"
ونجاة خدي عقلها كل شي تشوف فيه وهي تقول..
"عليك عز عايشة فيه البليده هادي حظ القبايح"
وخشوا للصاله..
ركزوا نجاة واختها ع سدرة لأنها كانت الاجمل والاقوى حضورا..
صابرين طول عرفتها من وصف اختها..
وسدرة تشوفلهم مابتش تحكم عليهم من ظاهرهم ولامن رأي عائشه فيهم لازم تعرفهم عن قرب بعدين تحكم..
هما قعدوا يسلموا لين وصلوا فيها..
نسرين؛هادي سدرة صاحبتي ماتلاقيتوش قبل..
نجاة بإبتسامه؛لاشفتها قبل.
سدرة؛صح وين جت تعزي..فرصة سعيده..
نجاة:اني اسعد..
ومشت نجاة تسلم ع عائشه وهما مش طايقين بعض..
صابرين؛اني هادي اول مرة نشوفك فيها..
سلموا ع بعض وقالت سدرة:فرصة سعيده..
صابرين:اني اسعد..
ومشت من حداها وقالت في نفسها"عندها الحق نجاة"
ومشت سلمت ع عائشه بعدين خديجه سلام جاف وقعمزت حدا اختها..
فايزة:شن حالك نجاه شن دايرة مع الحمل..
نجاة بإبتسامه:الحمد لله مرة هكي ومرة هكي..
نسرين؛بطنك طلعت شويه..
نجاة:ايه خلاص بنخش الخامس..
فايزة:تحلي عويناتك ع خير .
نجاة بإبتسامه:آمين..
وقعدوا يتجاذبوا في اطراف الحديث..
ووسط الحديث..
كانت خديجه تهدرز مع الكل بس تتجاهل في نجاة وين تكلمها..
نجاة كانت تنحرج وتنقهر بس دير في روحها عاديه..
اما صابرين فكانت ملامح الكره لخديجه باينه في وجهها..
والكل كان ملاحظ بس متجاهلين..
وقعدت تتوالى سفر الضيافه وحده ورا التانيه..
وصابرين ونجاة مدققين في كل شي التقديم الماعين..
الخدامه..كل شي كل شي..
وحامد وهو يبيت بانوا عليه نجاة واختها قال بهمس..
صاحباتها طروف نساوين خوتها طروف واللي يقربولهم طروف..الا هي وجه النعجه هادي..تنهد بعدين بس مافيش وحده فيهم زي فايزة..فايزة بروحها..خلتني معاش نشوف معاه مراة بكل..
شويه وناضت نسرين..
نسرين؛ترا نوضوا حبيباتي..
ناضوا كلهم..
نسرين:تفضلوا من غادي..
مشوا كلهم..
وفايزة بانت ع حامد كانت لابسه قفطان صيفي طويل ضيق من فوق وواسع من تحت..ابيض وفيه ورد احمر كبير..ودايرة شعرها بطريقه حلوة ومكياجها كان خفيف..
قلبه قعد يدق بقوة بشكل رهيب..
يشوفلها زي المسحور وكأن عمره ماشاف مراة..
ادرقت من قدام عيونه ومعاش شبح بعدها حد..
حامد:الزفت نسيتها الحكايه هادي بكل..
🌻رفعتهم نسرين لغرفة طاولة الاكل..
هما وين خشوا ..
نجاة وصابرين قريب داخو من اللي شافوه..
وكانت في انفسهم مايخلوا من يقولوا من حسدهم..
قعمزتهم كلهم..
وقعمزت هي وكملوا هدرزتهم لين خشت الخدامه بالعشي..
وكان صواني في اصناف لذيذه..
نجاة؛حجز..
سدرة:اكيد مالا تنباله هادي بدير هدا كله..
كلهم ضحكوا..ماعدا خديجه ماعجبهاش كلام سدرة اللي قالاته قدام نجاه..
صابرين؛من وين؟
نسرين:من ******
صابرين؛صاحبتي عرسي قريب ولتوا مادبرتش العشي والمزين..
سدرة؛اهو عندكم احسن مزينه والله طلعها طلعه ماصارتش..
ابتسمت فايزة..
صابرين؛ايه شفت شن دارت في نجاة وعجبني هلبه بس سمعت انها تخدم في الحوش..
فايزة:لا قريب نفتح مزين ان شاء الله غير كان ربي يهدي سدرة وتخلي طوبى تخدم معاي..
خديجه:طوبى! شن تعرف دير!؟
فايزة:الله يبارك عليها يومها دارتلي مكياج عيون فضيع..يعني اني لامركبه رموش لامنقيه حواجب وقتها كبرتلي عيني وطلعتها حلوة بزياده لأنها حلوة من قبل طبعا..
ضحكوا..
نسرين بإبتسامه:طوبى فالحه هلبه الله يبارك عليها وتكبر بسرعه..
سدرة:ياريتها تقعد صغيره وين تكبر هكي بسرعه نخاف عليها..
فايزة:ميه مرة نقولك انتي هكي بتعقدي البنت خليها براحتها شويه .
صابرين:صح..وقعدت تتكلم بيدها وتقول..لما تخليها تخالط وتعتمد ع نفسها تقوى شخصيتها..
هي تتكلم وخديجه نشوفلها كبير..
لفت نظرها شي في يد صابرين قعد مركزة عليه هلبه..
انسيال..شايفه خوه..لاهو نفسه..اصلا من وين ليها حقه!؟
هني عقلها جابلها حاجات لاحظتها بس ماوقفتش عندها..
والعقل خزنها..
لما شدت محي الدين يكلم في وحده..
قال في اخر المكالمه..
"صابرين"..
وهي وقتها مادورتش الاسم..
بعدين تفكرت وين خشت هي وياه الحوش وكانوا نجاة واختها واقفات في الجنان..
لاحظت نظرات محي ليها..ونظراتها هي كيف تفاجئت بس مادققتش هلبه..
لكن توا خلاص..ولى كل شي عندها واضح.
بس صدمتها كانت قويه...واللي زاد صدمها حاجتين..
ان محي كان يضحك عليها مرة تانيه وهي زي الغبيه مالاحظت عليه شي..
وتاني حاجه انها طلعت وحده في العيله..
حاولت ع ماتقدر انها تتمالك نفسها وماتفقدش اعصابها..
هبت وانطفت فجأة..
وماحد لاحظها ولاركز عليها..
سدرة:عمتي قررت تفتح مشروع تطييب حار بس بوي وجدي معارضين..
نجاة:سمعت بقصتها وعجبتني هلبه صحه عليها مراة قويه..
سدرة:عمتي هادي الله يبارك عليها ياجبل مايهزك ريح..
فايزة:اصلا انتي طالعتيلها..
سدرة ضحكت..
خديجه؛فعلا صحه ليها..بس اني لو كنت منها كنت ماطلقتش وربيته هو وبنت الحرام اللي خاني معاها..
وجه صابرين تغير وقعدت تبلع في ريقها..
ونزلت يدها بش درق الإنسيال..
فايزة:صراحة تعجبني طريقة تفكيرك خديجه..
خديجه وهي من داخل صايرة فيها عاصفه بس كلامها كان بهدوء وهي تقول:اها مال شني نخليهم ياخدوا راحتهم ويعيشوا حياتهم مستحيل..نكرههم في عيشتهم ندمهم ع الساعه اللي جو فيها للدنيا..
نجاة:فيه وجهة نظر كلامك..
خديجه مابتش تشبح جيهتهم لأنها مش ضامنه روحها كان شافت صابرين مرة تانيه شن ممكن دير..
بعد العشي...
فايزة:معليشي نانسي نبي الحمام مشيت للهني لقيته مسكر
نسرين:اها بنصينوه هدا..خشي للغادي..
فايزة:تمام..ومشت وين ماقالتلها نسرين..
وهي وباقي الحاضرات ولوا قعمزوا في الصالون..
خشت فايزة للحمام وشافها حامد وهو مدرق حدا باب دار الكوي..
وهادي فرصته وجاته لعنده...
•••في الصالون
رن تليفون صابرين..
شبحتلها خديجه طول..
هي قاماته شافت المتصل..كان هو محي..
قامت عيونها وشبحت لخديجه..
لقتها تشبحلها في شبحه تخوف..
غيرت طول عيونها عنها وبلعت ريقها..
نجاة:منو؟
صابرين وهي تحاول تخفي ارتباكها:رقم غريب..
وداراته صامت..
وخديجه مازال تشوفلها بنفس النظرات..
بعدين نجاة شبحت لنسرين وقالت:نبي نساوي مكياجي..
نسرين وهي تأشرلها ع المكان:اهو هني في مرايه وطاوله..
ناضت نجاه بشنطتها وهي تقول في "انتي بس تخشي ديار النوم!..والله لما نردهالها وندور في حوشها "
ومشت فاتت المكان اللي قالتلها عليه..
وقعدت دور..
☘فهالوقت..
طلعت فايزة من الحمام لقت قدامها حامد..
انصدمت وقعدت ترعش..
حامد بلهفه:فايزة شن حالك قلبي وعقلي مشغولين عليك ديما..
هي قعدت دف فيه وتقول بصوت واطي:حول خير مانعيط ونفضحك قدام مرتك..
حامد:افضحيني بالله عليك نبي نفتك منها اني نبيك انتي قريب نموت عليك فايزة..
دفاته بكل قوتها ومشت بتهرب..
شدها من ذراعها بقوة وهو يقول:بنتزوجك اني نبي نتزوجك وناخدك ببناتك ونهاجروا بكل حبيبتي.
فايزة وهي تبكي:حول ياحقير حول يانجس مانبدل احمد برجال الدنيا ولانبدل ظفر صاحبتي بواحد مسخ زيك..
حامد جي بيمسح دموعها وهو يقول:خلاص معاش تبكي..
ضربت يده بقوة وهي تقول:والله بنعيط الله..
🕸ونجاة تسمع وهي مصدومه...
بعدين قعدت تفكر..وتذكرت الكلام اللي قالتهولها نسرين وهي دافع عن فايزة..
ابتسمت بمكر وقالت:تو نشوفوا رايك توا يا...نانسي..!
ومشت طول وهي دايرة روحها عاديه..
خشت عليهم وقالت :نسرين تقريبا فايزة تنادي فيك..
ناضت وهي تقول:اشبح خيرها..
ومشت طلعت من حداهم..
ونجاه قعمزت حدا اختها وهي تشوف لنسرين بنظرات شماته..
🍃وصلت نسرين في الباب اللي يطلع للممر اللي فيه الحمام..
وقفت جامده في مكانها..
لما شافت حامد شد ذراع فايزة وهو يترجى فيها ويقول:اقسم بالله نحبك راهو مش نزوة والله مانزوه مستعد ندير ع خاطرك كل شي..نعيشك ملكه يافايزة غير طاوعني بس..
فايزة ضرباته ع رجله بصندلها الكعب وهو توجع وطلقها..
فايزة بحقد؛حرام فيك ظفر نسرين ياقذر..
ولفت بتمشي هربا..
وقفت قدامها وين شافت نسرين..
وهو قعد شاد رجلها ويشوفلها..
فايزة خافت هلبه من نسرين وردة فعلها..
طول هربت من حداها وكأنها فعلا غالطه..
مشت تجري للشماعه..خدت عبايتها ووشاحها ولبتسهم..
وطلعت هاربه بشنطتها من الحوش..
طول ركبت سيارتها شغلتها وتحركت..
ونسرين فهالوقت واقفه تشوف لحامد بنظرات كره والدموع في عيونها..
بعدين لفت ومشت من قدام..وصلت في الصالون..
تنهدت وقالت؛معليشي ياجماعه راجلي روح مريض ويبي من يعانيه..
رفعت نجاة حاجبها..
خديجه:علاش خيره؟
نسرين وهي تتمالك في نفسها بقوة:شكله واخد برده..
ناضوا وسدرة تقول:لاباس عليه ان شاء الله..
نسرين مشت بتعطيهم عباياتهم ..
سدرة؛وين فايزة..
نسرين؛طلعت قبلكم..
سدرة؛غريبه كيف تطلع بروحها!؟
نسرين قعدت ساكته وماعلقتش..
سقدت صاحباتها ومرت خوها واختها..
وبعد طلعوا وسكرت وراهم الباب...
سدرة:غريبه فايزه كيف تروح بروحها!؟
عائشه:بالك كلمتها زبونه وقالت بتجي وهي طلعت مستعجله..
سدرة؛وارد..
وركبوا الزوز سيارتها..
سدرة؛بس اني حاسه ان في شي نسرين مش عارفه كيف وجهها متغير وجوها انقلب فجأة..
عائشه؛حتى اني لاحظت يستر الله..
وشغلت سدرة سيارتها وتحركت..
وخديجه جنبهم ركبت سيارتها وهي تشبح لنجاة واختها كيف يهدرزوا بعدين ركبوا سيارة نجاة..
نجاة:توا بتتقلع داخل..
صابرين:علاش شن في ان حسيت ان صارت حاجه..
ضحكت نجاه وقالت:تو نحكيلك..
وشبحت للمرايه لقت سيارة خديجه طالعه ووراها سدره..
وهي لحقتهم..
••وداخل••
نسرين كانت قاعده واقفه في الباب تتفكر في اللي صار..
وتفكر..هلبه..
شويه سمعت صوت خطوات كندرته..
التفتت لقاته لابس وبيطلع..
نسرين ودموعها ينزلوا؛ماعندك شي تبي تشرحه!
حامد ببرود؛لا كل شي واضح وضوح الشمس مااعتقدش انك غبيه للدرجه هادي..
وفتح الباب وطلع عادي جدا ولاكأنه داير حاجه..
هي هني برودها اللي عاشت بيه معاه السنين اللي فاتوا تحول لجحيم..
وصلت بيه لهني..يوصل في صاحبتها قدام عيونها ولايتحشم ولايخاف ولامهتم اصلا لردة فعلها!...
حست روحها مش قادرة تمشي خطوة..
مش قادرة توقف..
قعمزت ع ركابها ع الارض..وهي مازال مصدومه..
مش هادي الحياة اللي تبي تعيشها نسرين.
اللي خاطرها تحب تنحب..
عمرها الفلوس ماكانت تغني ع الكرامه..
عن احساس المراة ان عندها قيمه في قلب زوجها..
ان ليها قدر واحترام حتى وان كان من غير حب..
كل اللي عندها وكل ماتملك وكل ماتحت ايديها..
ماقدرش يجبر ولوشويه من الكسر اللي في داخلها..
يقولوا في نساوين عايشات مع رجاله الخيانه تجري في دمهم..عايشين علاقات بالحرام وكل يوم مع وحده ولاهمها
كل همها ان تصرف وتعيش تتمتع خيره من وجهه..
هادي بالذات مهما بينت انها سعيده ولامباليه اعرفوا ان في داخلها حطام لايمكن يتخيله عقل..
وكل ماتبان سعيده اكثر..كل ماتزيد من داخل تتحطم اكثر واكثر..
🍃وخديجه كانت متحطمه من داخل..
متهشمه...هي عارفه ان محي الدين عمره ماحبها..
عارفه سبب زواجه منها.
بس تغاظت المهم تزوجت واستقرت ودارت عيله..
لكن لما خشت حياتها معاه في مرحله الخيانه..
هني حست ان العفس ع كرامتها زاد ووجعها بقوة..
وكبريائها او ماقعد منه..انهار تماما...
خشت لحوش شيابينها بش بتركب لصغارها..
مظهرها من برا يبان هادي..
وفي داخلها العاصفه مازالت قائمه..
شافت عزوزتها وحماتها مقعمزات..
والصغار يلعبوا..
خديجه:السلام عليكم..
هما ردوا؛وعليكم السلام..
خديجه؛هيا ماما..
عواطف؛اسمعي جاي صغارك مرة تانيه دوري وين تخليهم حني معاش عندنا ليهم جهد خلاص..ولاشديهم وقعمزي وياسرك من النسرفه وانتي من نهار درتي هالسيارة معاش قعدتي في حوش..
تجاهلتها مابتش ترد عليها..
الصغار مشوا قدامها وهي لحقتهم..
هما قعدوا يشبحولها بإستغراب..
اما عواطف ناضت وهي تقول:نكلم فيك هني ماتمشيش وتخليني..
وقفت خديجه وهي شاده ع قبضتي ايديها بقوة..
عواطف؛صغارك انتي تحملي مسؤليتهم معاش تنزليهم ومعاش تخليهم وتمشي تهدرزي عند امك زي ماهي مراة كبيرة وماتتحملش الدوشه حتى امي مراة كبيرة وماتتحملش الدوشه..ولاحني نتحملوها تحشمي ع وجهك ومعاش تنزليهم ع الفاضيه والمليانه.
مشت خديجه بعد سمعتها شن قالك..
عواطف:ريتوها كيف مشت وخلتني مستحقرتني بنت شنيبه.!
نجمه:خلاص عواطف..
عواطف:لا مش خلاص يام لازم تعرف حدودها..
خديجه معاش تحملت خلاص حست بيها تضغط ع اعصابها..
وخلاص انفلتوا..
وقفت حدا تحفه كبيره خدتها ولوحتها لوطا انسكرت وهي تقول بعصبيه وصوت عالي:خلاص سكري فمك..سكري فمك..
هما انفجعوا وانصدموا..
والصغار خافوا..
عواطف:حي عليا تحفتي واخدتها بميه ياخسارة فلوسي..
وجتها تجري وهي تقول:شن درتي يامكلوبه شن درتي..
وجبدتها مع حوايجها وقالت..نبي حقها كامل سامعه..
خديجه التفتت عليها بكف صوتها صدح في الحوش كلها..
شهقت نجاح بصدمه..
وامها نخصتها وهي خايفه:نجاح نجاح..
مشت نجاح تجري بش توقف الاعصار قبل يبدا..
وقبل توصل..
تلفت عواطف ع خديجه وتردلها الكف..
وخديجه تشدها من شعرها..
ويبدوا يضاربوا .
وخديجه تقول؛مريضه متخلفه..
عواطف تضرب ودف في نجاح وهي تقول:انتي المريضه يامريضه..
خديجه وهي تضرب:مابعده اللي بياخده مسكين دارها في عمره غير شن لمك عليه ولاشرتيه بفلوسك!
عواطف حست بصفعه جتها من خديجه بس جت ع قلبها هالمرة..
ونجاح قعدت تشبح لخديجه بحده..
تعبوا عيون عواطف دموع ووقفت ضرب وقالت وهي داهشه؛ضحكتيني...شوف من يتكلم..ع اساس خوي واخدك محبه في وجهك يكون في علمك راهو محي تزوجك ع خاطر فلوس بوك ومكانته تزوجك بش يستفيد من وراك..يشوف فيك صفقه راهو..لايحبك ولامعبرك..
وكان يحبك مش قاعد يجري في جرت ممرضه اصغر منك بعشرة سنين اصغر واحلى منك بوين..وخل نزيدك من الشعر بيت الممرضه هادي تكون اخت كنتكم الجديده..
نجمه قريب اغمى عليها وهي تسمع في كلام عواطف..
ونجاح كانت مصدومه ع الآخر.
عواطف:اصحي لروحك ياماما واعرفي انتي شنو بالزبط..الحوش من مرش يابنت شنيبه مايحدفش الناس بالرشاد..
خديجه كانت حتبكي خلاص بس مابتش تنزل دموعها قدامهم..
التفتت ع صغارها اللي لقتهم يرعشوا من الخوف.
خدتهم وخشت بيهم للباب الفاصل..
وسكرت الباب..
وركبت هي وياهم تجري.
وصلت لشقتها فتحت الباب وهي ترعش مع بعضها...
شدت الباب..وقعدت تشبح للأرض وهي مازال تسمع في كلام عواطف يتردد في ودنها بدت تبكي..
وتبكي..لين انهارت بالبكي وصغارها يشبحولها وهما يدمعوا..
🍃لوطا...
نجمة؛فرخة عواطف اللي قلتيه حق ولاكذب..
عواطف وهي تمسح في خدها المجروح بقطنه:حق يام حق وليه وقت ولدك راهو مش جديد..
نجمه:ياغبارتي غبارة بيدخل العيلتين في بعض..
ياريتها من برا لا اخت كنتهم نهار احرش عليك يانجمه ..
نجاح:علاش ماقلتيش من الاول ياعواطف رانا درنا حل..
عواطف:حل شني اللي بديريه خوك مش صغير..
نجمه:رانا كلمنا خوتك تفاهموا معاه يانهاري الاسود..حي شن بيصير توا حي ياحي..
عواطف تأففت بتذمر وقعدت تمسح في جرحها..
ونجاح واقفه حداها وهي تفكر في اللي بيصير بخوف..
🍃🍃🍃🍃
ومن جهة تانيه..
كانت فايزة مدرسه في تركينه مستخطيه..ومسكره عليها السيارة..وتبكي بقهر..
كان موقف صعب هلبه..
حقير هلبه...
وغير هكي كانت خايفه هلبه من انتقام نسرين..
ايه نسرين حتعاملها معامله الخاينه مش حتصدق في راجلها..
وحتصدقه هو اللي اكيد الف قصص وروايات بش يقنعها ان فايزة هي اللي تغوي فيه..
واكيد نسرين حتشوه سمعتها..
والناس لو ماصدقتش قصة الجالي ..حتصدق هادي وحيقولوا..
مافيش دخان من غير نار..
☘وطبعا مجتمعنا الحضاري فيسع مايصدق ع المراة .
بس الراجل لازم يشوفوا بعيونهم ويتأكدوا من نيته قبل بعدين يصدقوا...ومرات يبدوا يدوروله في المبررات..!☘
حداها التليفون يرن..
كانت سدرة تتصل بس هي ماتبيش ترد..
وشويه واتصلت بيها مطيرة وماردتش..
هي هني خطروا عليها بناتها...هدت بكي ..
ومسحت دموعها بعدين قالت من قلبها..
"حسبي الله ونعم الوكيل"
وشغلت سيارتها وتحركت للحوش..
~~~~~~~~~~~
"كيف!!؟"
فايزة ببكي:اني كنت نتجنب في نسرين بسببه هو وكل ماتقول تعالي حوشي نقول لا..حسيتها بدت تشك قلت خل نمشي هالمرة وخلاص وحطيت في راسي انه مستحيل يكون قاعد كيف طلع في وجهي فجأة مش عارفه..
سدرة وهي مصدومه:عطيه ماينزعه هالحقير معقوله توصل بيه لهني!
وفايزة تبكي وهي منهاره..
فجأة دق باب الحوش..
ناضت سدرة وهي تقول:من جاي توا؟
فايزة بنبرة باكيه:بالك طوبى جايبه البنات..
سدرة:قلتلها ماتروحش بيهم لين نقوللها..
ومشت اتجاه الباب وهي قول :مني؟
"افتحي"
رفعت سدرة حواجبها بعدين نزلتهم وفتحت الباب..
وكانت واقفه قدامه نسرين وع وجهها ملامح غير مريحه ابدا....
قطعه_من_جهنم
#طوبى
...يتبع..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
