# طوبى "شارع القهوة"
#جمان_فريد
#الجزء_الحادي_عشر"خليها فالقلب تجرح"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
وقفوا سيارات الشرطه في الشارع..
ونزلوا منها العناصر والضابط المسؤول عنهم..
مرر نظره ع الشارع..وع الموجودين بعدين شبح للشاب اللي طايح لحظات...
وغير عيونه عنه ووجههم للمهدي وثبتهم ع الهراوة اللي في يده والشارع يتفرج..
الضابط؛انت ضربته..
كلهم عيونهم ع المهدي..
وسدرة بقلبها وعيونها معاه...
المهدي بدون تردد ولاإرتباك قال:ايه..
غمضت سدرة عيونها بشده..
ويوسف وحسين واحمد ومصطفى راجل اختها قعدوا يشبحولها هي..
الضابط هز راسه وشبح ليوسف وحسين اللي قعدوا من اطراف العركه بعد ماهربوا الباقي..
الضابط:بلغوا الاسعاف يجوا يرفعوا هذا..
واشر ع حسين ويوسف والمهدي وقال:خودوهم..
مشوا العناصر شدوا حسين ويوسف..
وامهم تشبحلهم من ورا الباب وهي تندب ودموعها ينزلوا...
وجو للمهدي خدوا منه الهراوة ورفعوه..
وعيون خوته وهما مصدومين تلحق فيه...
مع عيون سدرة اللي كانت مضايقه ع الآخر..
ركبوهم السيارات وتحركوا بيهم طول...
سكرت سدرة باب المطحن ومشت خشت للحوش مع البنات من جيهتها..
والشارع فض...
وشويه وجت سيارة الاسعاف رفعت المصاب اللي لقوه المسعفين قاعد حي غير فاقد الوعي...
🌻فهالوقت..
نزلوا ولاد مغليه يجروا لأمهم..
خشوا عليهم الصاله لقوها هي وخديجه يتفرجوا ع التلفزيون ومايجيبوا نبي حاجه..
نضال بإندفاع وحماس:المهدي شداته الشرطه..
شهقت مغليه شهقه قريب طلعت معاها روحها..
والجالي ضرب نضال ع قفاه...وهوقعد يتحسس في الضربه..
خديجه بصدمه:شرطه شني شن دار!!؟
مغليه وهي ترعش:تكلموا راني بنموت!
جاها الجالي وضمها وقال:ماتخافيش يام شدوه في عركه عاديه..
شويه سمعوا الباب الفاصل يدق..
وسمعوا صوت عائشه وهي تقول..
"عمتي"
خديجه؛خشي ياعيشه..
خشت عليهم عائشه وهي تقول بقلق:سمع صوت سيارات شرطه بعدين اسعاف صايرة حاجه في الشارع!؟
عمر:كانت في عركه بين ولاد عيت الواعر وجماعه وخش فيها المهدي يحز زي العاده..وفي واحد في العركه جي بيدمغ حسين جاته سدرة عطاته بالهراوة ع راسه الراجل طاح معاش ناض..
حطت عائشه يدها ع فمها بصدمه..
مغليه:وشن دخل المهدي!!؟
عمر ابتسم ع جنب وقال:خدي هو الهراوة اللي ضربت بيها سدرة وقال اني اللي ضربت..
وخشت نسرين للصاله ع الجمله الاخيره اللي قالها عمر وقعدت تشبح لعائشه..
وخديجه كذلك شبحتلها..
مغليه وهي مش حاسه بروحها من خوفها ع ولدها:وووك عليا وووك شن دخلها بيها هو شن دخله بيها امتى ربي بيفكنا منها هالسدرة اللي بتودره...اتصلوا ببوكم اتصلوا طلعوه من تحت الارض..
وناضت وهي نقول:تعالى يالجالي..
الجالي:حاضر..
وناض ومشي طلع وراها..
عمر:خل نطلع نشوف شن صار بالزبط..
ومشي..ونضال قال...جاي معاك..ومشي وراه طول...
خديجه:ياعليك هم وخلاص وينك يامشكله داك خشمه فيها امتى بيحط عقله في راسه بس!..
ومشت طلعت حتى هي...
نسرين قعدت تشوف لعائشه كيف تشبح فالفراغ ودموعها في عيونها..
قدمتلها وقالت:عادي عويشه راهو بنت شارعه طبيعي بيدير معاها هكي..
ابتسمت عائشه بألم وقالت:ماتضحكيش عليا بالكلام هذا يانسرين..عارفاته مش حينساها بسرعه هكي راهو لينا مع بعض شهر بس..
نسرين:ايوه خليك هكي...هو راجلك انتي في النهايه ملكك انتي بس ومع الوقت صدقيني ماحيلقى خير منك ليه..
ابتسمت عائشه وهي تشوفلها..
خدتها نسرين من يدها وقالت:تعالي معاي للدار...
هزت عائشه راسها ومشت مع نسرين..
🌻🌻🌻🌻🌻🌻
"خلاص كملوا تريسنا بش يخشوا بناتنا العرايك ويقعدوا يضربوا!؟"
سدرة وعيونها لوطا قالت بضيق:اني خشيت بالسيف عليا جدي راهو قريب قتلوا حسين شن تبيني نشوفهم بيقتلوه ونقعد نتفرج...
علي بتهكم:لا خودي هراوة وافتخي بيها الراجل ع راسه ودخلي روحك المراكز..كان مش من المهدي راك توا في المركز..حني اللي عمرنا ماعرفنا طريق المراكز اول من يخش المركز فينا بناتنا!
سدرة قعدت منزله راسها لوطا ومش قادرة تتكلم..
علي وهو يأشر عليها بعكوزه؛تحركي من قدامي خشي داخل تو يروح بوك ونتفاهم اني وياه..
سدرة خشت من سكات وهي معصبه...
تلقوها داخل فايزة وفردوس..
وقفت وقالت؛مش فايقتلكم اها فوتوني..
فايزة بضحكه:غير كيف درتيها بس..
شدت سدرة ضحكتها وقالت؛اني بروحي مش عارفه كيف..
فردوس:تضحكوا تو هذا شي يضحك!..كان مش المهدي خداها عنك راك توا في المركز وريني كيف تضحكي بعدين..
سدرة بتذمر:ياسر من هالموسيقى اللي شديتوهالي كان مش المهدي شدها عنك لولا المهدي...درهتولي كبدي..
ومشت وهي تقول:ماقاله حد يدير روحه رانبو وياخدها عني..وبعدين يستاهل ان شاء الله يخش معاش يطلع..
وخش دارها وسكرتها بقوة..
فايزة بضحكه:ووه عليا وين مانذكر الموقف نضحك..
فردوس غلبتها الضحكه وقالت؛مخالطتها للتريس خلتها زيهم..
وفايزة قعدت تضحك..
🌻وهي في دارها..
حولت الوشاح لوحاته ع السرير..
وقعدت تساوي في شعرها بعدين وقفت ع الروشن..
وشدت بيدها اليمين فردة منها..ويدها اليسار في نصها..
وتشوف للجنان وهي معصبه..
فجأة دق باب دارها..
سدرة؛مانبي حد يخش..
"حتى اني"
ابتسمت والتفتت للباب وقالت:خشي يارتيله..
انفتح الباب بشي من الصعوبه..
وخشت طوبى بعدين سكرت الباب وجت لسدرة وقالت وملامح تساؤل طفوليه ع وجهها:انتي كيف ضربتي الراجل هكي!؟
سدرة:قصدك طلعتي تفرجتي ع العركه؟!
طوبى بإبتسامة ارتباك:طلعت راسي شويه مش هلبه شويه بس..
سدرة:معاش طلعيه بكل مرة تانيه خير مانقصه..
طوبى:باهي..توا عمو مهدي علاش قال اني ضربته كذب هكي ولا!؟
قعمزت سدرة ع السرير وقالت:تعالي..
جتها طوبى..
رفعتها سدرة وقعمزتها ع رجليها وضمتها وقالت:عمو مهدي هذا واحد غبي..
طوبى:باهي اني نبي لما نكبر نولي زيك نضرب بالعصا السمينه..
سدرة بضحكه:نجيلي هاللسان..لالا لما تكبري مانبيكش تكوني هكي بكل..بعدين كان ديري هكي تشدك الشرطه..
طوبى:لاالا تو يقول عمو مهدي اني درتها..
ضحكت سدرة وضمتها وقالت:اااه ياعيوني علاش تكبري فيسع هكي ياطوبى علاش تخوفي فيا عليك..
طوبى:نبي نكبر بش نساعدك..
سدرة:ياعمري مانبي منك شي غير انك تولي شاطرة وناجحه زي اميمه هكي ديما من الأوائل..
طوبى:اميمه تبي تولي دكتورة..واني نبي نولي ابله زي ابلاتي فالروضه..
سدرة:حلوة الابله..وحتولي احلى ابله غير اقعدي عاقله بس..
طوبى:باهي..
باستها سدرة ع راسها وزادت ضمتها بقوة وقالت؛ااه قداش نحبك..
☘☘☘☘☘
"المشكله ع خاطر خدمه ياافندي ماتفاهمناش"
الضابط؛ماتتفاهموش تضاربوا..
يوسف وهو مضايق؛هذا اللي صار ياأفندي..
الضابط:واللي معاكم برا هذا خاش يحز يدير هكي!!؟
يوسف قعد ساكت ماباش يعلق..
الضابط؛خليه يدعي ربي ان الراجل ينوض منها ع خير..
☘وقعدوا يحققوا معاهم بالواحد..
والمهدي مازال مصر ع اقواله..وفي الاخير حطوهم كلهم في الحجز...
فهالوقت جي محمد شنيبه للمركز يجري لقي احمد ومصطفى..
فهم منهم اللي صار بالزبط..وطبعا الزوز غطوا ع سدرة..
وبعدين خش محمد للضابط يتفاهم معاه...
🍀في المستشفى...
فتح عيونه شويه شويه ..عقد حواجبه لما حس بشوية ألم..
غمض عيونه..بعدين رجع فتحهم..
جاه صوت الممرضه وهي تقول:حمدلله ع سلامتك..
شبحلها ع جنب بعدين قال؛من جابني هني؟
الممرضه:الاسعاف..شن تحس توا..
:عادي مانحس بشي..
الممرضه:في برا زوز شباب قالوا خوتك ندخلهم..
يدوب هز راسه وهو ساكت..
الممرضة مشت طلعت...
وشويه وخشوا خوته..
:إيهاب! خير دعوتك..
ناض قعمز وهو يتوجع شويه قال:عركه عادي..
خوه التاني قاله؛خليك راقد..
ايهاب:لالا مانبيش نبي نطلع توا..
:شن تطلع توا خليك الليله وغدوة اطلع..
ايهاب مرر نظره عليهم وقال:اموري تمام ولا الضربه مادارتش مشاكل!؟
:لالا صوروا راسك امورك كلها تمام..الضربه دوخاتك بس..
ايهاب:جتني غدرة ونبي نعرف من هو هذا اللي تجرأ ودارها للفاندي..
شبحوا لبعض بعدين واحد فيهم شبحله وقال:قالوا بنت..
فنص عيونه بصدمه..
:وولد شارعها خداها عنها...يعني قال هو اللي ضربك..
قعد ايهاب ساكت وخلاص..هو ماتعودش تبات فيه حاجه فيها ظلم ولااهانه ليه..
بس هالمرة الخصم بنت..وكيف الراجل يمد يده ع مراة..!؟
:علاش المشكله وبينك انت ومنو؟
ايهاب وهو معصب:ترا اطلع من راسي انت وياه توا..
سكتوا الزوز..
ايهاب:حتى الكلاب اللي كانوا معاي هربوا...لكن باهي سيورهم يحصلوا...شبح لخوته وقال..توا نبي نطلع..
:خل يشوف الدكتور قبل..
ايهاب:لادكتور لاعينك..توا بنطلع..
ونزل من السرير وقعد يدور في السبيدرو متاعه وهو يقول:وين فية امه!؟
جابهوله خوه وهو يقول:اهوا...
خداه وقعد يلبس وهو يقول:ولد شارعها هذا اللي خداها عنها شدوه؟
:ايه..
ناض وقف وحس بشويه وجع ودوخه لكن مادورش..
لبس سبيدروه وقال:ماشي غادي..
:للمركز!
ايهاب:مال وين..هيا..
ومشي طلع وهما وراه...
وبرا دار الف عركه مع الدكاترة..
انتهت بكلمة وحده من الدكاترة..
"ع مسؤوليتك"
وهو مطنشهم..
وطلع من المستشفى وركب سيارة خوه..
ورفعوه طول للمركز...
🌻🌻🌻🌻🌻
"عبيت عليك وصار اللي صار ياسدرة"
سدرة بضيق:والله مادرت حاجه غلط يابوي..
قاطعها وقال؛مانبيش نسمع صوتك بكل..اني الغالط اني اللي خليتك تخدمي في المطحن...من اليوم تنسيه المطحن..
شبحت لبوها بصدمه..
لطفي:نزلي عيونك لوطا..
نزلتهم طول وهي تقول:بوي!
لطفي بصوت عالي:اني قلت اسكتي!
سكتت بكل..
لطفي؛تو ندبرلك في تعيين في وحده من المدارس غادي مكانك الطبيعي هذا اللي قرتيه انتي هذا تخصصك...مفروض معاش ننساها الحاجه هادي..
قعدت ساكته وهي شاده دموعها بالسيف..
لطفي:وبعدين من امتى عندك الهراوة انتي!؟
سدرة؛ليها مدة بس داستها ليوم زي هاليوم..
لطفي:شوف كيف تتكلم!!؟ راك بنت بنت استاقظي لروحك!..لكن نرجع ونقول اني الغالط..والغلط اللي غلطته تو نصلحه..وتوا بري من قدام وجهي...
مشت سدرة وهي شاده دموعها اول مرة يصير بينها وبين بوها موقف زي هذا ويزعل منها ويهزبها
طول خشت لدارها وسكرت عليها...
فايزة بضيق؛عليك ليله معاش تبي تم..
فردوس:ايه والله جيت بنوسع خاطري شوفي شن صار..
فايزة:ربي يفوت هالليله على خير...
فجأة سمعوا باب الحوش انفتح وتسكر..
فردوس:بوي طلع...اكيده ماشي للمركز..
فايزة؛مليون في الميه..
فردوس:تعرفي في شن نفكر فايزة؟
فايزة:في شني!؟
فردوس شبحتلها وقالت؛في ردة فعل عيشة من الموقف..
تنهدت فايزة وقالت:مافي حد فينا مقتنع ان اللي بين المهدي وسدرة تم خلاص..بالله عليك حب سنين من الصغر بينتسى!؟وفوق قدام بعض يوميا...هو ربي يسامحه داره فيه وفيهم هما الزوز وظلمهم معاه..
فردوس:صدقتي غلطته هو..كان هدا من بنات الدنيا كلها مالقاش الا صاحبتها ياخدها!..
☘☘☘وهما يهدرزوا على عائشه..
وهي راقده ع سرير نسرين بعد ماكانت تبكي ونسرين تشوفلها...
وجعتها صاحبتها هلبه برغم كل شي يصير تقعد صاحبة عمرها..
وفي نفس الوقت تفكر في حال خوها...
كيف بيكمل حياته مدامه مش ناوي يحول سدرة من راسه!؟
مش حيعيش مرتاح بكل..
حيقعد عايش بين نارين..نار قلبه..ونار واجبه ...
☘وفي المركز...
كان ايهاب الفاندي واصل غادي..
وخش وقال اللي صار وانه متنازل عن حقه اللي عند المهدي..
وبمعارف محمد شنيبه طلع المهدي من المركز...
وبالتعهد طلعوا حسين ويوسف ومعاهم الفاندي اللي كان طرف في المشكله...
وهما طالعين من المركز..
محمد والمهدي...لطفي وعبدالمطلب ويوسف وحسين واحمد ومصطفى..
والفاندي ومعاه خوته..
الفاندي:يوسف مازال الحساب ماتصفاش..
لطفي:حسابك عندي اني
الفاندي:عند اللي عنده فلوسي نبيهم..
لطفي حط يده ع صدره:عندي خلاص..غدوة تعالى امتى ماتبي وخودهم..
هز الفاندي راسه وركب مع خوته السيارة..
والمهدي وهو راكب سيارة بوه قعد يشبحوله..
"سامحنا يامهدي بالله"
التفتوا المهدي وبوه للطفي..وقال المهدي؛ماصار شي ياعمي لطفي..
لطفي هز راسه وقال:بارك الله فيك..
وركب السيارة مع خوه وصغار خوه..
شويه وتحرك..ووراهم احمد ومصطفى..
ووراهم محمد والمهدي..
~~~~~~~
في الطريق..
محمد:تو انت مالك ومالها بنت الواعر مش تزوجت!
المهدي شبحله وقال بإنفعال:شن دخل هذا في هذا!!؟ اني درت هكي لبنت شارعي وبس سوا كانت هي ولاغيرها فهالموقف حندير نفس الشي..ولاتبيني نشوف بنات شارعي يخشوا مراكز ونقعد نتفرج!
محمد:لاخش انت واحصل داخل!
المهدي:لاحصلت ولاهم يحزنون ماصار شي معليشي بوي الموضوع هذا سكره خلاص...
محمد:بنسكره توا وبنسكت بس قبل لنسكت بنقولك كلمتين...الهى في حوشك...
المهدي شبح لبوه وهو يحاول يتمالك اعصابه..
وبوه يشبح القدام وهو معصب..
بعدين غير عيونه عنه وهز راسه وشبح للروشن...
🌻وفي سيارة لطفي..
كان لطفي يهدرز ع يوسف وينصح فيه..
وبوه يشوفله وكبده عليه دم...
قعد ساكت لين وصلوا للحوش..
وفي الحوش فتح فمه...اللي مايطلعش الا فالكلام الباهي طبعا!...
عبدالمطلب؛ع اخر الوقت نخش المراكز اني دخلني مراكز!!؟ اني بس نبي نفهم حاجه وحده شي مش قده علاش تخش فيه مالك ومال التجارة والصفقات والسيارات من وين ليك بش تخش في حاجات اكبر منك زي هادي!؟
يوسف بحرقه؛نبي ندير فلوس..نبي نبني مستقبلي نبي ندير لروحي حاجه عشت عمري كله محروم نخدم من صغري ونتعب مع قرايتي بش نكفي نفسي بش مانمدش يدي ليك وترجع فاضيه مكسوفه...
عبدالمطلب:ايوه حطه في راسي اني هذا اللي فالحين فيه انتم..
يوسف بعصبيه؛ايه كله منك انت كله منك..ع قلبك داس فلوس اكوام اكوام رصيدك في المصرف لما عرفته لين شهقت...عندك هذا كله ومعيشنا فهالذل وهالفقر..راك والله ماك رافع منه حاجه بالله..
صفيه تسمع في كلام يوسف وهي تبكي وخايفه..خايفه من بوه ياخد موقف ضده..
والجد علي يسمع ومايبيش يدخل..
عبدالمطلب:صار اني هكي!؟علاش قاعد عندي لتوا..برا اقلب وجهك امشي اطلع..
يوسف:والله ماقاتل روحي ع العيشه فهالخرابه..
جاه دفه وهو يلز فيه ويقول:اطلع هي اطلع..
صفيه ببكي:لاياراجل لاحرام عليك ساد هكي ياسر..
عبدالمطلب:تبيه اطلعي انتلفي معاه..
يوسف وقلبه موجوع ع امه:خلاص يام اسكتي..
صفيه ببكي؛ماتطلعش سلم ولدي..
عبدالمطلب:والله ماهو قاعد في حوش بعد اللي قاله..
شبحله يوسف بغل..بعدين مشي طلع..
صفيه ببكي:لاياولدي بالله عليك...تكلم ياعمي قول حاجه..
علي الواعر قعد ساكت وماباش يدخل..
عبدالمطلب:تبيه انتلفي اطلعي وراه..
مشت طلعت صفيه وهي تبكي..
لقت يوسف خلاص طلع وسكر الباب.
قعدت تبكي بالعبره وهي تقول..
"حسبي الله ونعم الوكيل"..
وحسين مقعمز في الجنان يشوفلها ودموعه في عيونه...
داخل...
علي:مابيتش ندخل بش مانطيحش قدرك قدام صغارك اكثر ماهو طايح لكن حط في راسك انك قاعد تجبر ندير شي مانبيش نديره!
عبدالمطلب بخوف:شي زي شني.!؟
مشي علي بدون مايرد عليه وخش لداره..
وخلاه يفكر في كلامه..
ع خشة صفيه هي تبكي وتتحسب وتقول.
"ربي ياخد الحق"..
هو شبحلها بإزدراء وقال:امشي عفريت...
وهي خشت لدار بنتها وسكرتها عليها لقت اميمه مقعمزة تبكي..
قعمزت حداها وضمتها وقعدت تبكي هي وياها..
🌻🌻🌻🌻🌻🌻
واقف ع الدولاب بيطلع حوايج بش يخش يدوش..
وهي واقفه وراه تشبحله وهي تفكر بصمت...
وبعد مادام هالصمت لدقائق قالت. "شن اللي خلاك دير هكي"
هو وقف وقال:واضح..
عائشه:شن اللي واضح؟!
التفت وقال؛قبل قتلك هي توا بنت شارعي واللي درته معاها نديره مع غيرها عادي..
هي قعدت تشبحله بنظرات طويله في صمت تام..
وهو يشبحلها بنظرات متصنعه للثقه فيما قال...
شويه هي ابتسمت وقالت:مزبوط صح..
هو تنهد وقدملها واحتواها احتواء الزوج لزوجته..
غمض عيونه وقال:معاش تنسي الكلام اللي قلته قبل..
عائشه هزت راسها وقالت؛حاضر...
المهدي فتح عيونه وقال؛هي بري سخنيلي اللي طيبتيه بنطيح من الجوع..
هي بعدت وشبحتله بإبتسامه وقالت؛حاضر..تطلع من الحمام تلقاه واتي...
مسح ع شعرها وهو مبتسم..بعدين طلقها ومشي للحمام..
هي راجاته لين يخش..
شبحت لحوايجه كيف محطوطات ع السرير...
بعدين مشت خدت عطره وعطر ليها هي..
وجت لحوايجه وبخت منهم عليهم..وفيسع ولت حطتهم ع الزيانه..
بعدين مشت طلعت حوايج ليها هي..
وفيسع غيرت...ومشت ساوت شعرها ع المرايه..وحطت من العطر وبعدين طلعت للكوجينه...
🌻🌻🌻🌻🌻
فهالوقت..
كانت سدرة راقده وطارحه شعرها ع المخده..
وطوبى تلعب بيه..
هي كانت سرحانه وتتفكر في الموقف اللي داره المهدي..
وقلبها يدق بقوة..حطت يدها عليه وتنهدت..
طوبى:خيرك سدرة؟
سدرة؛شي ياعيوني..ارقدي ياقلبي غدوة وراك روضه..
طوبى:مش ماشيه..
سدرة:علاش!..
طوبى وهي معصبه؛زعلانه من بابا..
حركت سدرة راسها ناحيتها وقالت:علاش!!؟
طوبى:ماهو كشخ عليك..
ضحكت سدرة وقالت:عادي بابايا حتى اني عادي يعاركني ويكشخ عليا..
طوبى:لكن انتي ولا قعدتي تبكي..
سدرة:عادي ياعيوني عادي بعدين هو عاركني لأنه يحبني..
طوبى:وكيف يحبك ويعاركك!؟
سدرة بضحكه؛اللي يحب مش ديما يضحك مع اللي يحبه مرات يعاركه اهو اني نعارك فيك..
طوبى ابتسمت بإكتشاف وقالت؛ايه صح..
سدرة ضحكت وقالت؛تي تعالي هني تعالي..
جتها طوبى وخشت في حضنها..
وسدرة ضم فيها بقوة وهي تقول:مش عارفه لولاك انتي شن صار فيا.. تنهدت وقالت..الحمد لله..
☘☘☘☘☘☘
وطلع صبح تاني يوم...
لطفي وصل بناته للمدرسه..
وسدرة مشت لمدرسة تعلم القياده بالافيكو بعد ماتعاركت هي وبوها...
ونسرين طلعت من الحوش بتمشي للمدرسه...
وين وصلت في بداية الشارع...
كانت تمشي عادي وعابيه بتوقف افيكو..
فجأة..سمعت صوت كلاكس سيارة .
لحظات ودرست قدامها..
وين شافاته ابتسمت وهي متفاجئه..
فؤاد بإبتسامه:صباح الورد..اركبي..
هي مررت نظرها ع الشارع..بعدين ركبت السيارة من الخلف..
نسرين؛صباح الخيرات..
فؤاد:شن جوك..
نسرين:الحمد لله..
فؤاد:وين طريقك..!؟
نسرين؛لمدرسة******..
فؤاد؛تمام..
وقعدوا يهدرزوا طول الطريق..
لين وصلها للمدرسه..
فؤاد؛جايك في المرواح..
نسرين بضحكه؛بتولي السواق متاعي ع هكي..
التفتلها وقال:واني نطول!؟
هي ضحكت ونزلت من السيارة...
ومشت طول خشت للمدرسه..
وهو راجاها لين خشت وكالعاده ابتسم وكمل طريقه...
☘☘☘☘☘☘
الساعه 1:00ظهرا..
في رابش كبير للسيارات...
فيه ورش تصليح سيارات وبيع قطع غيار..
وحده من ورش قطع الغيار..كانت لاولاد الفاندي.
وماسكها ولدهم ايهاب..
كان مقعمز يراجي في حاجه..
شويه وجاه اللي يراجي فيه..
قعمز قدامه وقاله:اللي ضرباتك ع راسك تكون بنت عم يوسف..قالوا شافاتك وانت جاي بتضرب واحد من ولاد عمها هجمت عليك بالهراوة..
رفع حواجبه وقال:هراوة!؟
:ايه..
هز راسه وقال:بنت مانقدروا نديرولها شي...لكن ع هكي تكون بنت الراجل اللي قالي حقك عندي...خلاص..ناخد حقه ولد خوه وبنته منه..
:بدبل المبلغ..
هز الفاندي راسه وهو ساكت..
بعدين شبح للساعه وقال:شويه تانيه ماشيلهم..
🌻🌻🌻🌻🌻
"ماشاء الله ماشاء الله ريحة تطييبك تجيب من وين وين"
عائشه وهي مبتسمه؛تسلمي عمتي..
مغليه بإبتسامه؛كتري باهي في صونيه نبوها ع تركينه..
عائشه؛حاضر..
مغليه:ايه وماتنسيش اليوم امك جايه وفي من ماحضرش العرس جاي يبارك اليوم..
عائشه:باهي..
مغليه؛يبهي ايامك..
ومشت طلعت من حداها..
ع خشة عمر..
عمر:مرت خوي شن حالك..
عائشه شبحتله وقالت بإبتسامه؛اللهم لك الحمد بخير..
عمر:باهي مالا ديريلي ماناكل بالله عليك جيعان..
عائشه هزت راسها وقالت؛حاضر..
عمر بإبتسامه:منورة..
ومشي طلع من حداها..
وهي تنهدت وقعدت تفكر ديرله شن ياكل...
ع خشة نضال:اوو مرت خوي شن جو..
التفتت شبحتله وقالت:الحمد لله..
نضال:بالله شكشوكه جعان..
عائشه:خلاص تو نديرلك انت وعمر..
نضال:لاعمر مايحبش الشكشوكه ديريله دحيه بس..
عائشه هزت راسها وقالت:باهي..
نضال:منورة..
ومشي طلع من حداها..
هي بعد طلع قالت بهمس:تو قريب يروح حتى الجالي ويقولي ديريلي ماناكل..عليك بخت بختك ياعيشه..
اللهم لااعتراض..
ع خشة الجالي..
الجالي:عيشه نورتي..
عائشه بدون ماتشوفله:تسلم..
الجالي خش وقال:سامحيني بالله..
مشي فتح التلاجه طلع دحيتين..ومشي خدي طنجرة صغيرع عباها ميه وحط فيها الدحيتين
وجي للغاز:سامحيني معليشي شويه..
بعدت عائشه..
وهو خدي ولاعه ولع الغاز وحط عليه الطنجره..وهويقول:سامحينا..
عائشه:مش مشكله..
ومشي طلع من حداها..
ابتسمت وقالت؛سبحان الله ماتقولش خوهم...
🌻🌻🌻🌻🌻🌻
"خوديها اليوم روحي بيها المهم ردي بالك"
سدرة وهي مبتسمه بحماس:ماتخافيش عليها..
لبست نظاراتها الشمسيه وقالت:هي بالسلامه..
مدربة القيادة وهي مبتسمه:في أمان الله...
وركبت سدرة سيارة تعليم القيادة..
وشغلتها وتحركت..
وقعدت تسوق بكل ثقه ومافيش في قلبها ذرة رهبه..
كانت متمكنه وكأن ليها سنين تسوق..
لعند ماخشت الشارع بيها..
واللي يشوفها من اهل الشارع يقعد مركز عليها
اول مرة في الشارع تسوق سيارة..
درست بيها قدام حوشهم..ونزلت بكل شموخ كعادتها..
ومشت خشت للحوش..
هي سكرت الباب من هني..
جت سيارة الفاندي لحوشهم من جهة تانيه من هني..
درس قدام سيارة تعليم القياده..
شبحلها وهو مستغرب..
بعدين نزل من السيارات وهو لابس نظارات ماحولهمش..
وقف قدام الباب وبدي يدق...
لحظات وسمع صوت يقول..
"مني"
رفع حاجبه وقال:لطفي الواعر قاعد.
"من نقوله"
الفاندي؛واحد يبي منه امانه..
انفتح الباب...
وهو كان منزل راسه يشوف لسبيدروه وهو يتكلم..
"من تكون معليشي"
قام عيونه وشبحلها...
قعد يمرر في نظره عليها من فوق لتحت..
لبسها مستور ومحتشم بش شخصيتها بارزة هلبه..
بالذات وهي مازال حاطه النظارات ع عيونها.
سدرة وهي تمرر في نظرها ع لبسه وشكله قالت في خاطرها..
"من وين يعرف بوي النماذج هادي!؟"
ماركزتش علي تفاصيله في العركه هذا علاش ماعرفتاش..
حركت راسها وهي متسائله..
هو حول نظاراته وقعد يحك فيهم بلحيته وقال بإبتسامه:انتي خشي قولي للوالد الفاندي جي بس..
حول سدرة نظاراتها ورجعت شافتلها من فوق لتحت وهي تقول:باهي..
وردت في وجهه الباب..
هو ضحك وقال:والله الاهي!!...ابتسم وقال..ماتضربك كان وحده زيها يافاندي...
🌻داخل..
خشت سدرة ع بوها المربوعه وقالت:بوي في واحد قال اسمه الفاندي يبيك..
بوها حط الجريده وناض من غير مايشوفلها ومشي طلع من حداها..
سدرة بضيق:اااخ ياربي وخلاص..
ومشت طول خشت داخل...
🍀وفي حوش الجيران المقابلين...
من الكوجينه طلعت مغليه بسفرة فيها قصعه مغطيه وحداها صواني مسلفرات..
ومدتها لخديجه:هاك واعرفي كيف تتكلمي وكيف تعزميها..
خديجه بإبتسامه:ماتخافيش عليا نهني..
مغليه:باهي بري وريني هي..
ومشت خديجه وقفت قدام المدخل وهي تشوف في وشاحها...
بعدين مشت طلعت من الحوش...
مغليه؛يارب يصير منه وتنفك عقدتك يارب..ماني عارفه شن ناقصك يابنتي بش نصيبك يولي بالهون هكي..
🌻وخديجه..
ماشيه بإتجاه حوش نجمه وهي تدعي وتقول:يارب يفتحلي هو يارب يارب يارب..
وقعدت تقول" يارب"...لين وصلت في باب الحوش..
ساوت وشاحها..ودقت ع الباب..
شويه وانفتح..
واللي فتحه....
محي الدين...
اشرق وجه خديجه بإبتسامه عمرها ماابتسمت زيها في حياتها..
محي الدين بإبتسامه:اهلا وسهلا..
خديجه بإبتسامه خجوله:اهلين بيك..خالتي نجمه قاعده .
محي الدين:ايه..هي لحظه ناديهالك..
خديجه برقة:تفضل..
ومشي محي خش داخل..
خديجه؛ووك عليا..من امتى عندهم انت بس واني رايحه عنك وين بس!..
ع طلعة نجمه..
كانت تمشي وتشوف لخديجه وهي مستغربه..
وصلت فيها وقالت:اهلا خديجه تفضلي..
خشت خديجه وقالت؛يزيد فضلك خالتي..مدتلها السفرة وقالت..هادي حصتكم من غدانا الحق طيبت وخطرتوا ع بالي قلت نذوقكم..
نجمه وهي متعجبه:بارك الله فيك..
وخدت السفره..
خديجه:كيف حالك انتي خالتي وكيف حال عواص..غمضت عيونها وقالت..عواطف ونجاح..
نجمه وهي متعجبه ع الآخر:الحمد لله..كيف حال امك واختك والكنه..
خديجه:الحمد لله كلنا كويسين..امي تسلم عليك هلبه وقالت بش تتفضلي العشيه..
نجمه:علاش!؟
خديجه:نبوك تجي تهدرزي في ناس اليوم بيجوا يباركوا ماحضروش العرس نبوك تآنسينا معاهم..
نجمه:حتى باقي الجيران ناديتوهم..
خديجه؛ايه..
نجمه:باهي تو نجي..
ابتسمت خديجه وقالت:نستنوا فيك..هي بالسلامه توا..
نجمه:بالسلامه...
وطلعت خديجه ..ونجمه سكرت الباب وراها..
بعدين شبحت للسفرة وقالت؛اشبح شن في وراها هالمغليه اشبح شن واخده من حاجه جديده تبي تغيظني بيها..
وخشت بالسفرة داخل وهي تقول:لكن غريبه ماكله من عندهم وريحتها فايحه..!
ومشت للكوجينه..
خشت على نجاح وعواطف وهما يغسلوا في الماعين..
التفتت عواطف وقالت؛هذا شنو؟
نجمه:غدي من حوش شنيبه..
التفتت نجاح وهي متعجبه..
ع خشة محي وهو يقول:ترا شن باعتين..
عرى الصونيه فاحت عليه ريحة رشدة الكسكاس..
قعمز ع الطاوله وبدي ياكل طول..
عواطف:شن جاهم عيت شنيبه..
نجمه:ماندري ياحنه لاوجايبه الغدي خديجه وجايه تعزمني نمشيلهم العشيه..
الزوز قالوا:خديجه!..
محي الدين وهو ياكل:ماشاء الله عليها خديجه مانحسبهاش ولت هكي..
شبحوله شويه بعدين شبحوا لبعض..
ونجمه قالت:انت اللي فتحتلها ولا؟
محي هز راسه وهو ياكل...
نجمه شبحت لبناتها..
والزوز قعدوا يشبحولها..
بعدين قالت نجاح؛ع قولت سدرة..
الزوز مع بعض قالوا؛الوي ياليلى علوي!..
ومحي ياكل وهو يشبحلهم بإستعباط..
وامه تشوفله وهي مضيقه عيونها وتفكر...
🌻🌻🌻🌻🌻
"لالالا اني والله مايرضيني اللي صار بكل"
لطفي:انت ياريت جيت تفاهمت معاي اني طول راهو حقك خديته كامل..
الفاندي وهو يمسح ع لحيته:خلاص ياعمي ماصار شي..والحق اللي ليا عند يوسف معاش نبيه خلاص..
لطفي:لالا تاخده وانت راضي..
الفاندي؛وحق المعظم ماني واخد فيها قرش..
لطفي وهو متفاجئ:غير علاش هكي بس!
الفاندي بإبتسامه؛المهم كسبنا معرفة الوجوه الطيبه..وبالنسبه ليوسف مادوراش..حط يده ع صدره وقال..اني نرده ونخليه يتصافى مع بوه..راهو نخش في مشاكل ونحل فيها مايغركش المنظر..
ضحك لطفي وقال:خيره منظرك ماشاء الله عليك..
الفاندي بإحراج؛بارك الله فيك..
شويه دق باب المربوعه..
ناض لطفي وقال:عن اذنك..
الفاندي؛تفضل تفضل...
مشي لطفي بياخد الضيافه من سدرة..
والفاندي يفكر فيها ويتخيل فيها وهي تعطي فيه السفرة..
ضحك وهو يحك في لحيته..
ع جية لطفي جاه وقاله؛تفضل..
تفاجئ لما لقاها سفرة غدي متكمه..
الفاندي؛غير علاش متعبين ارواحكم..وخدي من لطفي السفرة وحطها..
قعمز لطفي وقال:مافيش تعب..هادي بش يبدا بينا مية وملح..
الفاندي بإبتسامه:نتشرف والله..
لطفي:هي سمي وكول..
خدي الفاندي كشيك وسمى بالله وكلي...
وطعم الماكله خداه الى هناك...
تطييب سدرة حتى هو تطييب امها اللي مافيش زيه في شارع القهوة كله...
وقعد عمنا الفاندي لعند آذان العصر..وماروحش الا وهو مكلم عبدالمطلب وملينه ناحية ولده...
وبعد العصر طلع من الحوش..وماكانش متمني يطلع...
وهو طالع..
سدرة وهي تسقي فالغرس..
شافت بوها كيف يسقد فيه...لقاته وهو عاطي بظهره..
راسه من الخلف فيه عليه لصقة جرح..
انصدمت..
وعضت ع شاربها وخشت جري للكوجينه وقالت؛حي هدا معناها عرف اني اني ضربته وجاي ياخد من بوي فلوس بش يسكت!!
ياعليك مصيبه جبتيها ع راس بوك ياسدرة..!
☘وبرا..
بوها ودع الفاندي وهو ممنون..
وع وجهه الفاندي ابتسامه واسعه...
شافها المهدي وهو في المطحن..
استغرب..وكان عنده فضول يعرف شن صار بيناتهم بالزبط...
تحرك الفاندي بسيارته..
ولطفي قبل مايخش شبح للمهدي حياه بحركة اليد..والمهدي رد عليه..
خش بعدين لطفي وسكر الباب..
والمهدي قعدوا عيونه مع سيارة تعليم القياده..
🌻🌻🌻🌻🌻
وفي حوش محمد شنيبه..
كانوا النساوين معبيات الصاله..
وبيناتهم مقعمزة عائشه اللي كانت قمة فالأناقه والجمال..
والنساوين معجبات بيها هلبه..
مغليه؛شن حالك يانجمه؟
نجمه:الحمد لله في خيار خيري..شن دايرة انتي مع الكنه..
مغليه:لتوا ماشاء الله عليها ربي يحفظها كنينه نودها لكل حبيب..
ابتسمت عتيقه بفرح وقالت:تسلمي..
عائشه:تسلمي عمتي..
مغليه:عقبالك حتى انتي يانجمه ديري كنه زيها..
نجمه شبحت لخديجه وقالت:إن شاء الله..
وخديجه ابتسمت بخجل.
قعدت نجمه تشوف لخديجه وهي تتفكر في كلام ولدها..
《محي الدين؛تعرفي كان ناسبناهم حني الكاسبين يام خدمتنا تزيد تمشي ومعارفهم يولوا معارفنا..وشوق خير بنشوفوه من وراهم》
ابتسمت نجمه وهي ساكته..
شويه ناضت مغليه ومشت لطاوله محطوطه ع جنب..
خدت من عليها علبة مجوهرات..
ومشت بيها لعائشه وقالت:وهادي هديه شيبانيك ليك ياعويشه جت متأخره قالك سامحينا..
هي وامها تفاجئوا هلبه..
فتحت مغليه العلبه..لقوا فيها طقم ثقيل وحلو بالمرة...
خداته عائشه وهي تقول:ربي يطول في عمره..
مغليه:نوضي وريهم عمك شن خدالك..
ومشت مغليه قعمزت..
وناضت عائشه وقعدت دور ع الموجودات وتوري فيهم الطقم..
وامها بطير من الفرحه...
~~~~~~~
في شقة المهدي وعائشه..
عتيقه:شفتي العز والخير اللي عايشه فيه توا..حافظي عليه كويس واللي تخاف منه يخرب عليك بعديه عنك سلم بنتي..
عائشه وهي تصب لأمها في العصير قالت؛ماتخافيش عليا نعرف نتصرف..
عتيقه:باهي شني مافيش حويجع ليك فوق الشهر متزوجه..
قعمزت حدا امها وقالت:حاسه ان في شي بس راجي لين نتأكد..
عتيقه وهي تشرب في العصير:امم..تأكدي وقوليلي طول..
هزت عائشة راسها وهي ساكته وتفكر..
🌻🌻🌻🌻🌻
"سواق تاكسي!!؟"
نسرين:وخيره سواق التاكسي شن ناقصه!؟
خديجه:ناقصه هلبه ياماما ومافي حد يرضالك بيه..
نسرين بضيق:ماحد ليه دخل بحياتي لو طلع يبيني جديات مش حنعدل ع حد..
خديجه:باهي ردي بالك منه اني الموضوع خوفني راهو..
نسرين:ماتخافيش الشاب محترم ع الآخر..
خديجه:ان شاء الله يكون هكي..المهم ردي بالك وتفكري خوتك وماتاخديش راحتك هلبه..
نسرين بنرفزة:تي باهي اسكتي وانتي تغمي القلب..
وناضت طلعت من حداها..
خديجه بإزدراء:الحق فيا اني اللي ننصح فيك لمصلحتك..هبله وعبيطه...
🌻🌻🌻🌻🌻🌻
"اميمه بنتي كملتي واجبك"
اميمه؛ايه ماما..
صفيه:باهي بري ارقدي سلم بنتي..
اميمه:حاضر..
ولمت حاجاتها ومشت خشت دارها..
وقعدت امها بروحها مهمومه تفكر في ولدها..
فجأة..
انفتح الباب وخش عليها عبدالمطلب ووراه يوسف..
ناضت وهي ملهوفه من الفرحة وجاته وخداته في حضنها وهي تقول:هكي دير فيا حرام عليك!
باس يوسف ع راسها وقال:سامحيني يام.
وعبدالمطلب مشي وخلاهم يبي يرقد بكري بش يمشي لخدمته..
وصفيه قعمزت بولدها وقعدت تهدرز عليه وهو يهدرز عليها تقول ليها سنين ماراته..
وحسين سمع دوشتهم ناض من نومه..
وطلعلهم..فرح وين شاف خوه..وقعمز حداه وكمل ليلهم هدرزة مع امهم..
~~~~~~
"الحمد لله اللي روحلهم"
لطفي:الراجل اللي عطتيه ع راسه بالهراوة هو اللي رده للحوش .
سدرة وهي متفاجئه:بالله !
لطفي:تنازل ع الدين اللي يبيه منه وتفاهم هو وعمك وعرف يوسف وين قاعد وجابه..
سدرة ؛قصدك مش عارف إني اني اللي ضربته!!؟
لطفي تهكما:لاياست الحسن..
انحرجت سدرة من بوها..
لطفي:ملفك حطيته وان شاء الله قريب يطلع تعيينك..
سدرة:امتى يعني في رمضان!؟ خل نعرف راسي من رجليا..
لطفي:مش عارف الناس اللي كلمتهم عليك قالوا تبي وقت..
سدرة؛باهي نبي سيارة!..
لطفي انتي غير كملي تدريب وخودي رخصه نعطيك سيارتي واني بناخد غيرها..
سدرة؛باهي مش مشكله المهم حاجه نتحرك بيها..
لطفي:عاد سوقي بعقل مش تقعدي تفني بيها!
سدرة وهي رافعه حواجبها قالت:هي مرة وحده تهورت في عمري بتشد عليا !؟
لطفي رفع حواجبه ونزلهم وقال:غلطة الشاطر بألف..
ومشي وخلاها..
هي قعدت تبع فيه بعيونها وهي تشوفله بإمتعاض بعدين قالت؛ايه ماهو سدرة مش بنادمه مفروض ماتغلطش..
ومشت خشت لدارها وسكرت عليها...
🍀🍀🍀🍀🍀
وتمر الايام..
ورمضان خلاص ع الابواب جاي وجايب الشتي معاه..
واجواء رمضان لهداكا الوقت كانت شتويه مميزة مافيش منها...
بس في هلبه حاجات تغيرت رمضان هدا..
هلبه ناس تغيرت اوضاعهم واحوالهم...
وبيعيشوا رمضان بجو مختلف هالعام...
وأولهم عائشه...اللي عرفت اهم خبر ممكن تعرفه عن نفسها في حياتها..
🌻في المستشفى...
"مبروك ياعائشة انتي حامل"
ابتسمت عائشه بفرح وقالت:الله يبارك فيك دكتورة..
☘وطلعت للمهدي وهي بطير من فرحتها بالخبر..
ركبت السيارة وقالت؛زي ماتوقعت..
المهدي ابتسم ع جنب وقال:حامل!
عائشه هزت راسها وهي مبتسمه بفرح..
المهدي شد يدها وتحرك طول بالسيارة...
كان فرحان..بس فرحته كانت باهته..
فرحان انه بيولي اب...بس مش يتقبل ان العيل اللي بيجيه مش حيكون من سدرة..
حاول ع قد مايقدر يبين انه فرحان من وسط قلبه..
كانت فرحة كذابه للي يشوف في وسط عيونه يكشف انها فرحة كذابه...
طلبت منه عائشه يحطها في حوش اهلها بس تبشر امها الاولى..
حطها..ومشي للمطحن..
درس قدامه ونزل...وشبح جيهة حوش الواعر..
وينفتح الباب..
وياريته ماانفتح...
طلع منه اياد ومعاه سدره اللي كانت لافه روحها بشال غليظ عن الصقع..
اياد؛ماتخافيش الحاج علي اصح مني ومنك..بردة وتعدي..
سدرة بقلق:هالمرة خفت عليه هلبه حسيته تعب زياده..
اياد؛طبيعي بحكم العمر..المهم خودي الوصفه هادي ولما يروحول الولاد قوليلهم ياخدوا اليوم ضروري..
هي خدت الوصفه..فكت الشال شويه يدوب طاح عن كتفها..
اياد بتلقائيه رفعه..
المهدي عيونه قريب طلعوا...والعرق اللي في جبهته قريب تفجر!..
هي وخرت وقاماته بروحها وبدي ع وجهها ملامح الضيق..
اياد بإحراج؛اسف سامحيني...
سدرة هزت راسها ومشت خشت داخل وسكرت الباب..
اياد غمض عيونه وضم شواربه لداخل بأسف بعدين فتحهم ولف ومشي وهو مضايق..
ولحقه المهدي طول...
لما قرب يوصل في حوشه سمع المهدي ينادي فيه..
"دكتور"
ابتسم تهكما والتفتله..
جاه وقف قدامه وقال:عندي كلمتين نبي نقولهم ونبيك تحطهم زي الخراص في وذانك..تبي تعيش فالشارع هدا امشي باللي ماشيين بيه الناس هني بعاداتهم بأخلاقهم فاهم..ولانزيد نشرح!
اياد؛واني عايش باللي عايشين بيه الناس هني واخلاقي هي اخلاقهم وعاداتهم عاداتي..
المهدي مسح خشمه بيده ورشف واشر بسبابته وهو يحرك فيها نفيا ويقول:لامش باين هكي..حط يده ع كتفه وقال..ع العموم اني اللي عندي قلته ثق وتأكد اني مرة تانيه مش حنتكلم..
ولف ومشي...
بس وقف فجاة لما سمع اياد قال..
"الهى بعيالك وخليها تشوف نصيبها."
غمض عيونه بنفاذ صبر..
بعدين فتحهم وفي لحظه التفتله..
ضربه بقبضة يده ع فمه..
اياد شد فمه وغمض عيونه بشده من قوة الالم...
والمهدي لف ومشي وهو مبرد ع قلبه...
اياد وفمه ينزل منه الدم قال بصوت مكتوم:متخلف..
☘بعد مارجع المهدي للمطحن قعمز في سيارته وهو يشوف لحوش الواعر ويتفكر في حركة اياد وكل مالها نار تزيد تولع وتمنى لو حصل عليه مرة تانيه ومااكتفاش باللكمه اللي عطهاله...
لحظات..
ومشي روح بعائشه...
وهما خاشين للحوش..
عائشه:نبيك تجيبلي بكلاوة مايسد ناس الشارع نبي نفرق عليهم كلهم..
المهدي بإستغراب:قصدك تبي الشارع كله يعرف!؟
عائشه:وعلاش لامش هدا اول حفيد لعيت شنيبه!؟
رفع المهدي حواجبه بعدين قال:شوفي امي قبل..
عائشه شدت يده وقالت:تعالى ننشدوها جميع..
ومشت خشت بيه للحوش..
لقت حمواتها وعزوزتها مقعمزات مع بعض بشرتهم..
ومغليه قلبت الحوش بالزغاريد
ونسرين ركزت ع المهدي حست انه مش فرحان من قلبه تنهدت بضيق وقعدت ساكته..
شويه عائشه قال فكرتها لعزوزتها..
مغليه:وعلاش لا..بكلاوة وكنافه...مش بكلاوة بس...
ابتسمت عائشه وشبحت للمهدي..
المهدي هز راسه وهو مبتسم مجامله قال:حاضر...
وعيون نسرين عليه...
🌻🌻🌻🌻🌻🌻
"خلاص نزلت حرارته"
صفيه:ايه الحمد لله..
سدرة؛هاكي هادي الوصفه لما يجي واحد من الولاد عطيهاله يجيب الدوا. صفيه خدت الوصفه وقالت:باهي...
وفي المربوعه اللي راقد فيها الحاج علي..
كان في خربوشه صغيرة دور عليه ...
حاطه يد ع جبهتها واليد التانيه ع جبهته..
طوبى:معاش في حرارة جدو انت صحيت..
علي وهو يضحك:حقه يادكتورة!؟
طوبى:لالا اني مش دكتورة..لكن نعرف اني.
علي:ماشاء الله ماشاء الله..
طوبى وهي تأشر عليه بسبابتها:معاش تطلع في الصقع..معاش تلبس حوايج شويه..معاش تشرب مية مصقعه..باهي جدو..
علي وهو يضحك؛حاضر حاضر..
ع خشة سدرة قالت:شن ديري يارتيله غادي خلي جدك مريض..
علي:لا والله حسيت هدرزتها خلتني نبرا.
طوبى اشرت ع جدها وقالت:هاه سمعتي..
قعد يضحك علي من جده لين قعد يكح..
وسدرة خشت وهي تضحك خدت سدرة رفعتها في غمرها وقالت:لسانها اطول منها..
علي هدا ضحك وقال:ربي يحفظها..
سدرة:ويطول في عمرك جدي..هي تصبح ع خير..
علي:قدامك كل خير بنتي..
ومشت سدرة..
وطوبى وهي ضامتها قعدت تحي في جدها بيدها وهو يرد عليها ويضحك..
🌻طلعت سدرة من حوش عمها بخواتها...
ولما قرب توصل في باب حوشهم الدخلاني دق الخارجي..
نزلت طوبى وقالت؛خشوا..
خشت غرفه..
بس طوبى قعدت واقفه ماتبيش تخش من غير سدرة .
وصلت سدرة في الباب وقالت:منو..
"افتحي اني"
تعجبت سدرة وفتحت باب الحوش وقال:حمار مني بيموت اليوم؟
ضحكت نسرين وخشت وهي تقول:ليك وحشه..
مابتش تعاتبها سدرة...سكرت الباب وسلمت عليها بالخد وقالت..
سدرة؛شن حالك..
نسرين:معبيه هلبه كلام نتلاقوا مرة تانيه ونحكيلك..وتوا تفضلي..مدتلها صونيه مسلفرة..
سدرة بإستغراب:هذا شنو؟
بلعت نسرين ريقها وهي مبتسمه بإرتباك قالت:زردة حمل عائشه..
وكأن في صاعقه نزلت ع قلب سدرة..
البنت انصمتت ومعاش قدرت ترمش ولاتحول عيونها عن الصونيه...
تعبوا عيون نسرين دموع وهي تقول؛مش تقولي من وين جاها قلب تجيني بيها...لو ماجيتش اني كان حيجبهالك غيري..سدرة كله نصيب حبيبتي...
قامت عيونها فيها وخدت منها وهي تشوفلها..
وهي تشوفلها حولت السلفر..وخدت منه طرف بكلاوة وكلت منها وقالت وهي تشوفلها؛يجيكم ع خير ان شاء الله..
نسرين ودموعها في عيونها؛عقبالك..
ضحكت سدرة ضحكة غريبه وكلت من البكلاوة تاني..
نسرين وهي مش قادره تشد دموعها:تصبحي ع خير..
ومشت طول طلعت من الحوش..
وين فتحت الباب شافت المهدي واقف ع سيارته يشوف لحوش الواعر..
شافاته حتى سدرة..
شدت الباب ووقفت قدامه...وحطت طرف البكلاوة كله في فم واحد..بعدين لحقاته بطرف كنافه ومازال فمها معبي..
وهي تشبحله..
نسرين تشوفلها وتشوفله ومعاش قدرت تتحكم في دموعها..
وهو يشوف لسدرة بألم وقلبه يتقطع..
سدرة خلاص دموعها ع حواف عيونها لكن مش حتخليه يشوفهم..
طول خبطت الباب بقوة..
وقعمزت ع رووس صوابعها وقعدت تاكل وتاكل وهي تهمهم..
ودموعها سيل..
جتها طوبى وقالت؛سدرة...
انفجرت سدرة بالبكي وطاحت منها الصونيه انسكرت وطاح اللي فيها..
وطوبى تشوفلها بحزن لين دموعها نزلوا معاها..
بعدين قربتلها ولفت عليها بإيديها وضمتها..
وسدرة شدت فيها وهي تبكي بالصوت..
وايدين اختها الصغار يطبطبوا عليها..
هالايدين الصغار.. هالحضن الصغير..
حاول يحتوي ألم عشرينيه فقدت حضن امها بكري..
ومالقتش زي حنيته غير فهالحضن....
(مش مسامحه اي وحده تقرا وماتتفاعلش حتى بلايك)
#خليها_في_القلب_تجرح
#طوبى
...يتبع...
