(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_التاسع_والثلاثين"قلوب محطمه" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 ☕☕☕☕☕☕☕☕☕☕☕☕☕☕☕☕☕ "السلام عليكم" طلع من المطحن وجاه وهو يقول:اووو..وسلموا ع بعض بالخد.. المهدي:خلاص استقريت ربيع:وأخيرا.. المهدي:ع خير إن شاء الله..تفضل للقهوة شويه وجايك.. ربيع:تمام.. ومشي ربيع للقهوة..وخش المهدي للمطحن... ☘☘☘☘☘ "دكتور إياد" شبح لمصدر الصوت تفاجأ.. ولون وجهه تبدل للأحمر وقال بإبتسامه:اهلا.. سدرة وطوبى:كيف حالك دكتور؟ اياد بضحكه:الحمد لله..خيركم هني لاباس.. سدرة:جبت طوبى نعاين فيها ع ركبتها طاحت عليها امس.. اياد:لاباس ياطوبى لاباس..تعالوا معاي.. سدرة:تمام.. مشي هو..وهما وراه.. فتح مكتبه وقال:تفضلوا.. خشوا الزوز..وهو خش بعدهم...مشي قعمز ورا مكتبه. اياد:تفضلوا علاش واقفات.. قعمزوا الزوز... اياد؛هاه ياطوبى كيف صارلك بالزبط؟ طوبى:مش عارفه في شن عثرت دكتور جيت طايحه ع ركبتي بعدين وجهي كانت طيحه قويه هلبه.. اياد؛توجع فيك توا.. طوبى:ايه بس مش هلبه وفي شويه نفخه.. اياد:تبي صورة هادي.. قام تليفونه واتصل بالممرضه:تعالي توا...وسكر عليها.. اياد:ماتخافيش ان شاء الله الامور تمام.. طوبى بإبتسامه:إن شاء الله.. وسدرة تمرر عليهم في نظرها وهي ساكته.. خشت الممرضه وقالت:نعم دكتور.. اياد؛ارفعي الآنسه طوبى للتصوير خل يصوروا ركبتها. الممرضه:حاضر دكتور..هي تقضلي. ناضت ومشت مع الممرضه طلعوا من حجرة المكتب.. بعد ماطلعوا.. سدرة قالت:علاش سيبت شارع زي مايقولوا في ليله من غير ضي قمر.. ضحك وقال:بالعكس سيبته الصبح.. سدرة:دكتور شن صار معاك شن اللي خلاك تطلع من الشارع بدون ماتعطي لحد علم.. اياد بإبتسامه:ياريت تعفيني من الاجابه.. سدرة:باهي لو قتلك اني نعرف السبب.. اياد بإستغراب:تعرفيه! سدرة:ايه..صفاء بنت فايزة.. غمض عيونه بشده وابتسم بأسف.. سدرة:اني من وجهة نظري ان اللي درته صح.. اياد؛شن صار بعدين.. سدرة؛يام صار.. اياد؛عرفت امها.. سدرة:ايه... اياد؛لازم تعرض بنتها ع دكتور نفسي اللي صارلها معاي ممكن جدا يصير مع غيري مش الكل حيشوف صفاء زي بنته.. سدرة؛صح عندك حق.. اياد؛ماتمنتيش يصير هكي بكل ماتوقعتش المعامله اللي كنت نعامل فيهم بيها تفهمها صفاء غلط..هي في سن حرج وحساس وفاقدة بوها الاحساس هدا لو كبر معاها مستقبلا حيخليها تاخد قرارات هلبه غلط..وممكن تجني ع نفسها.. سدرة؛مزبوط..وامها قاعده في هالفترة تكون قريبه عليهم وتسد الفجوة اللي ولت بينهم بينها..مسكينه الهموم تلاقت عليها في مرة. اياد:لاباس شن صار معاها تاني؟! سدرة؛جابت امها مريضه زهايمر عندها للحوش قاعده تعاني فيها.. اياد بأسف:لاحول ولاقوة إلا بالله... تنهدت وقالت:ربي يكون في عونها.. اياد هز راسه وقال:آمين... ☘☘☘☘☘ "والله ياغالي اني في السويد فتحت سلسله مطاعم اكل ليبي للجايات وحتى اهل البلاد نفسها ترددوا عليهم وحبوا الماكله غادي..والحمد لله نجحت" المهدي:وسيبتها كلها غادي وجيت هني؟! ربيع بضحكه:طبعا لافي ناس معاي من بداية المشروع شاركوني فيه وهما توا المسؤولين عنه واتي بنقعد بين الفترة والتانيه نمشي ندير طله.. المهدي:برضو مافهمتش شن اللي ردك هني فهالوقت تحديدا؟ ربيع:تصدقني لو قتلك حنيت لكل شي في البلاد وبالذات شارعنا..شارع القهوة..صح ظروف البلاد صعبه هلبه والناس ولت تهرب منها هروب..بس اني صار معاي العكس.. المهدي بإبتسامه:غريبه والله.. ربيع بضحكه:غريبه هلبه...المهم اني نبي ندير مشروع في الشارع نفسه.. المهدي:راك تقول مطعم!.. ربيع بإبتسامه؛ايه بس مطعم وجبات سريعه..الشارع ناقصاته الحاجه هادي.. المهدي:وين بديره هدا؟ ربيع:مش عارف اني نبيك انت تشوفلي مكان.. المهدي مر نظره يمينه بعدين قدامه ع اليمين.. ضيق عيونه وقال:عندي مكان.. ربيع:وين..؟ اشر المهدي بسباته ع الحوش اللي في جنب القهوة.. التفت ربيع وشافه.. المهدي نزل يده وقال:ياسيدي الحوش هدا شريته من فتره وكنت نبي نأجره....وانت اولى من غيرك..خود اجر الدور الأول ونفد فيه مشروعك..اما الدور التاني بنأجره للسكن.. ربيع شبحله وقال بضحكه؛شبحان الله قبل بنشري الحوش هدا وربك ماارادش نكون فيه ساكن لكن رادلي نفذ فيه مشروعي.. المهدي:كنت ناوي تشريه؟ ربيع؛ايه..بعدين سمعت انه انباع.. المهدي:باهي قولي كيف وليت لحوشكم الأول؟ تنهد ربيع وقال:ياسيدي في يوم رفعت اني تعاين في وحده من المصحات........ ☘☘☘☘☘☘ اياد وهو يشوف في الصورة:مافيش كسور اللحمد لله كدمه بسيطه ماتخوفش.. طوبى:الحمد لله.. اياد؛تو نعطيك دوا تمشي عليه بش تخف الكدمه.. طوبى:تمام..ها سدرة تريحتي توا.. سدرة بإبتسامه:هدا وين.. ابتسم اياد وهو يشوف لسدرة.. طوبى:دكتور.. شبحلها.. طوبى:دكتور نبي منك خدمة وان شاء الله مانثقلش عليك.. سدرة استغربت.. وهو قال:نخدمك بعيوني بنتي.. ابتسمت طوبى وقالت:تسلم دكتور...المهم الخدمه تخص بنت اختي فردوس..اريج..زي ماتعرفش عي واخده كورس تمريض وعندها خبرة سنه ونص تقريبا وتبي تخدم في مكان ترتاح فيك..فلو عندكم ليها مكان في المصحه؟ اياد:تخدم لتخصص معين؟ طوبى:ايه اسنان.. اياد:تقريبا محتاجين ممرضه للتخصص هدا.. طوبى:كويس وياريت تكون فترة صباحيه تعرف هي وين تسكن.. اياد:انتي قولليها تجيب ملفها وبعدين نتفاهموا.. طوبى بإبتسامه:بارك الله فيك دكتور.. إياد بإبتسامه؛فيك بارك الله بنتي..وخلي توا نكتبلك وصفه وتجيتي تراجعي عندي الاسبوع الجاي في نفس اليوم.. سدرة وطوبى:إن شاء الله.. هو ضحك وقعد يكتب في الوصفه. وطوبى وسدرة شبحوا لبعض وابتسموا.. ☘☘☘☘☘ الساعه7:00مساءا... درس عبد الرؤوف بسيارته قدام حوشه.. نزل منها وسمع حد ينادي فيه.. "عبد الرؤوف" التفت وشافه سكر الباب ومشاله طول.. عبد الرؤوف مد يده وهو يقول:عمي شن حالك.. صافحه لطفي وهو يقول:الحمدلله كيف حالك تاني.. صافحه عبد الرؤوف بإيديه الزوز وهو يقول:للحمد لله..هي تفضل عمي.. لطفي:مش حنقول لا لإني استاحشت بنتي.. عبد الرؤوف:في كل الاحوال بنشدك ومش طالقك..هي تفضل عمي تفضل.. شده من يده ومشي هو وياه للحوش.. فتح الباب وقال:آنستنا.. لطفي:الله يآنسك.. وخش..وخش بعده عبد الرؤوف وسكر الباب.. فتحله باب المربوعه البراني ودخله.. وشغل المكيف وهو يقول:شن امورك عمي شن داير.. لطفي:الحمد لله كل شي ماشي تمام.. عبد الرؤوف:الحمد لله الحمد لله.. فتحله التلفزيون وحطله ع قناة ليبيه بعدين قال:شويه وجايك.. لطفي بإبتسامه:خود راحتك.. ومشي عبد الرؤوف خش داخل.. لقي غرفه ونبيله مقعمزات في الصالون ويتفرجوا ع التلفزيون.. عبد الرؤوف:اطلعي لبوك في المربوعه جي يشوفك.. غرفة قريب طارت من الفرحه ناضت تجري.. عبد الرؤوف:ديري عصير وشكلاطه والجو هدا.. نبيله بضحكه:حاضر.. عبد الرؤوف:وفكري في العشي.. ومشي بسرعه لحق غرفه.. ونبيله مشت للكوجينه وهي مبتسمه.. ☘غرفه وين وصلت للمربوعه وشافت بوها حست الروح رجعتلها.. جاته بسرعه وهي تقول:بابا.. ع خشة عبد الرؤوف وراها.. شافله كيف ناضله وشد راسها وكب عليه.. وهي كبت ع راسه وايديه..وضماته.. لطفي ودموعه في عيونه؛شن حالك يابابا.. غرفه ودموعها ينزلوا:كويسه الحمد لله.. بعدت عنه وقالت..قعمز بابا قعمز.. قعمز لطفي وهي قعمزت جنبه وقالت:شن امورك بابا شن داير.. لطفي:زي قبل يابنتي..لكن فاقدك في الحوش مكانك باين هلبه.. مسحت دموعها وقالت:حتى اني فاقدتكم.. بوها ركز فيها وقال بعقدة حواجب:خيرك ضاعفه هكي؟...شبح لعبد الرؤف وقال ماعطيتكش البنت هكي ياعبد الرؤوف.. هو انحرج وكيف جاي بيرد.. هي سبقاته؛لا والله مامنقص عليا حاجه بس اني هكي معاش ناكل زي قبل حاسه روحي فقدتكم هلبه ومازال ماتعودتش ع حياتي الجديده. عبد الرؤوف قعد يشبحلها وبس.. لطفي:لامايجيش هكي يابنتي غلط..تنكدي ع روحك وع الراجل وبعدين اهو حني هني قدامك بنتي في اي وقت تستاحشينا فيه تعالي..ونسيبنا هش حيقول لا.. ابتسم عبد الرؤوف وقال:اكيد.. غرفه ابتسمت وقالت:إن شاء الله.. دق الباب.. ناض عبد الرؤوف طلع.. وشويه وخش بالعصير والشكولاته.. لطفي:تي غير علاش هالتعب.. عبد الرؤوف:تعب شني بتقعد تتعشى راهو.. لطفي:لامااتفقناش هكي قلت بنخش نشوف بنتي.. غرفه:وتتعشى في حوش بنتك اول مرة تخشله نهاري.. ابتسم لطفي وقال؛خلاص براحتكم.. عبد الرؤوف:تفضل.. لطفي:يزيد فضلك... بعدين مد لغرفه هي خدت منه وع وجهها ابتسامه حلوة بوها لاحظها.. بعدين حط السفرة ع الطاوله خدي منها طاسة العصير وقعمز .. وغرفه ركزت عليه كيف ماخداش من للشكولاته.. وهادي مشكله معتمد اكثر شي في ماكلته ع وجبات الصحيه ومرتين في الاسبوع ياخد في وجبه سريعه واضح انه ماشي ع نظام غذائي صارم.. هدرزوا شويه..بعدين ناضت غرفه وخدت السفرة وخشت بيها داخل.. لطفي:ايه يانسيبي شن تخبرنا؟ ☘☘☘☘☘ "نشوفك غدوة ان شاء الله ونزيدوا نتفاهموا." المهدي:تمام..تصبح ع خير.. ربيع؛قدامك كل خير.. ومشي طلع من القهوة.. ع جية سدرة بالسيارة.. قعدوا هو والمهدي يشبحولها.. نزلت سدرة من السيارة وفتحت الباب.. ربيع"زي ماهي مع شويه تغيير بسيطه" شويه ولت وخشت بالسيارة.. "ربيع تصبح ع خير" التفت ربيع وشاف للمهدي ضحك وقال:قدامك كل خير.. حط ايديه في جيوب سرواله ومشي لحوشه.. عيونه ع السيارة لين خشت..بعدين نزلت سدرة وسكرت الباب.. تنهد وبعدها مشي يشوف المطحن.. ☘☘☘☘☘ "شوف ياولدي اني ماتعبتش عليها في قرايتها هكي بش تشد الحوش وتقعمز حتى كان برغبتها لازم تغصب عليها وتخليها تكمل واعتقد انت بروحك ماكانش عندك مانع.." عبد الرؤوف هز راسه وقال:حاضر ياعمي حاضر تو نزيد نكلمها لطفي:الحق ياولدي ومانكذبش اول ماجيت خطبتها كنت رافض بيني وبين نفسي وانت عارف السبب بعدين انت طمنتني واني توا مطمئن عليها معاك ع الآخر..غير هي ان شاء الله قايمه بواجبها؟ عبد الرؤوف:وبزياده ياعمي بنت طالعه من حوش طيب زي حوشكم كيف بتكون.. لطفي بإبتسامه:الطيب يدور في بعضه ياولدي.. عبد الرؤوف بإبتسامه:بارك الله فيك.. 🌸وداروا نبيله وغرفه العشي وكان عشي يليق بجية لطفى الواعر.. ع هداكا العشي زادت توطدت العلاقه بين النسابه وعبد الرؤوف يحمد في ربي من داخله اللي طيحه فيهم حتى وان كانت البدايه سيئة... ☘☘☘☘☘ خشت بأمها للحوش.. وتوجهت بيها للدروج قعدت تركب فيها بالشويه بالشويه.. "فايزة.." التفتوا فايزة وامها لمصدر الصوت.. نزلت مشتده بسرعه لمطيره وحضنتها وهي تقول:يما يما.. ضحكت مطيره وهي تحضن في مشتده وتقول؛هي تعالي نركبوا للحوش.. مشتده؛تعالي يما تعالي معاي ومعاش تخليني مع هادي.. ركبوا الزوز.. وفايزة تشوفلهم ودموعها طاحوا من عيونها.. ركبوا الثلاته للشقه..ومشتده شاده في مطيره وكأنها فعلا طفله صغيرة شاده في امها.. فتحت فايزة الباب وهي ترشف وتمسح في دموعها قالت:تفضلي.. خشوا مطيره ومشتده للحوش.. مشتده؛نبي نرقد يما تعالي رقديني.. مطيره:حاضر.. ومشوا للدار.. ومروة وتاله يشبحولها.. فايزة شبحتلهم وقالت؛تعشيتوا.. مروة:لا.. هزت راسها وقالت:بروا لداركم.. الزوز قالوا:حاضر..ومشوا طول لدارهم.. وفايزة مشت لدار صفاء فتحت عليها الباب ولقتها مقعمزة ع الكرسي قدام الطاوله وتبكي.. فايزة؛شن يبكي فيك؟ صفاء شبحتلها وقالت ببكي؛مجنونه اني مجنونه بش ترفعيني لدكتورة نفسيه.. فايزة؛ومن قالك الدكاترة النفسيين يمشولهم المجننه بس؟ صفاء:علاش رفعتيني غادي؟ فايزة؛مافي حد فينا مايبيش الدكتوب النفسي الدكتور النفسي زيه زي دكتور الاسنان والجراحه والاطفال وغيرهم وزي مالجسم يتعب حتى النفسيه تتعب وتبي دكتور وعلاج..وبعدين دكتورتك هادي عاينت عندها قبل اكثر من مرة.. ☘ماكانتش صادقه في كلامها كذبت بش ترغب بنتها في العلاج النفسي☘ صفاء:علاش عاينتي عندها؟ فايزة؛ع كل شي واولهم فقد بوك.. شبحت صفاء لصورة بوها ودموعها ينزلوا.. قربت من بنتها وقعدت تمسح ع شعرها وهي تقول:صدقيني بعدين حتولي احسن وترتاحي من كل شي يوجعك.. وضمتها ليها ..وصفاء شدت في امها ومازالوا عيونها ع صورة بوها.. ☘شويه وطلعت فايزة.. ماشيه للكوجينه بدير عشي... شبحت لدار امها..مشتلها.. كان الباب مردود.. شبحت من الفتحه متاعه لقت مطيره ترقد في مشتده وكأنها ام ترقد في بنتها.. معاش قدرت تتحمل فايزة ومشت للكوجينه طول وهي تبكي.. وتتفكر في كلام الدكتور.. 《الحاله النفسيه اللي تعيش فيها الوالده هي اللي ساهمت في تطور المرض بسرعه..واضح جدا ان والدتك متعرضه لصدمة نفسيه شديده》 فايزة وهي تبكي:الله يربحهم.. ع خشة مطيرة وهي تقول:فايزة.. التفتت فايزة وشبحتلها.. مطيرة بأسى:ربي يلطف بيها مسكينه..لكن بالله عليك ماتحرميني اجر رعايتها يابنتي خليني بعيده عن مشاكلك انتي وصاحبتك..وخليلي اجر امك.. مسحت فايزة دموعها وقال؛حاضر... مطيرة؛ربي يقويك ويهون عليك..هي خل بننزل نسكر المعمل ونروح.. فايزة؛تصبحي ع خير..وصحيتي.. ابتسمت مغليه وقالت؛قدامك كل خير.. ☘☘☘☘☘ "خلاص حبيبتي بري اركبي شقتك اني تو تشف الأرضيه" غرفه بإبتسامه:قدامك كل خير.. ومشت طلعت من الكوجينه وتوجهت للباب الفاصل.. خشتله وركبت لشقتها وهي تتفكر في بوها وكلامه.. قداش اشتاقتله...قداش اشتاقت لحوشهم..ولأيامها فيه.. للآن مش حاسه بالإنتماء للمكان اللي هي فيه.. وصلت في شقتها لقت بابها مردود.. فتحاته وخشت وسكرت الباب. وهي ماشيه بطريقها لدارها.. هو طلع من داره وقال:تعالي.. شبحتله شويه بعدين مشتله.. وقفت قدامه وقالت:نعم.. هو تنهد وقال:الراجل الطيب بوك..خلاني نتراجع عن حاجه من الحاجات اللي فرضتهم عليك.. عقدت غرفة حواجبها بإستغراب.. عبد الرؤوف:بنردك لقرايتك.. ارتسمت ع وجهها ملامح الدهشه.. عبد الرؤوف:ع خاطر بوك والله ع خاطره اني نتحشم من الناس الطيبه هلبه.. غرفه بضحكه:شكرا رؤوف شكرا هلبه.. عبد الرؤوف:بري اشكري بوك..لولاه ماحلمتيش توليلها.. ابتسمت وهزت راسها بإيجاب.. رفع سبابته وقال:بس ع شرط.. غرفه:شن هو.. خش للدار وقال:تعالي.. خشت وراه وهي تفكر في شرطه.. وصل في الدولاب وفتحه وطلع منه ملايه لونها اسود شبحلها وقال؛من غيرها مش حتطلعي من الحوش.. قعدت تشبح للملايه شويه بعدين قالت:حاضر.. هو بتعجب:مافيش اعتراض!؟ غرفه؛همي كله تردني لقرايتي..بس في مشكله اني لماسيبت القرايه مادرت شي يعني ماوقفتش قيدي.. عبد الرؤوف:كلمت موظفه نعرفها غادي وقفاته.. غرفه عقدت حواجبها وقالت؛شن شكلها هادي!؟ عبد الرؤوف:وانتي شن دخلك.. رفعت حاجبها وقالت:ع قولتك..ع العموم شكرا وتصبح ع خير.. ومشت طلعت وخلاته وهويشوفلها بغضب ع كلمة الاخيرة اللي قالتها.. رد الملايه للدولاب..وسكره بقوة.. بعدين سكر ع روحه باب الدار.. ومشي انطرح ع سريره وقام تليفونه وفتح الفيس.. جوه هلبه اشعارات.. وكل كانت راده فيهم غرفه ع تعليقات بنات عنده في الصفحه.. ومش هكي وبس.. دارت خاصيه متزوجه من عبد الرؤوف بن موسى.. هو عض شاربه وقعد يضحك.. شويه جاته رساله من غرفه ع الماسنجر.. (عرفتها كلثوم ولا؟) رد عليها وقال.. (مادخلكش) شويه وسمع خبطه جايه من الحيط اللي وراه.. ناض قعمز ورد نفس الخبطه.. بعتتله.. (اني نفش في غلي انت مادخلكش) رد عليها.. (كيف مادخليش هدا شقتي ياهانم) غرفه معاش ردت عليه ولاعاد دقت ع الحيط.. وهو قعد يراجي فيها تبعت اي حاجه.. لكن معاش بعتت شي.. تنهد..بعدين رقد ع السرير.. وخش ع صفحتها يشوف فيها.. لقاها منزله منشور الآن.. وبيني وبين قلبه اسأله.. أتحبني بعد الذي كانا.. رد قلبه.. إني احبك رغم ماكانا.. قلبه قعد يدق بقوة..قري المنشور اكثر من مرة.. وكل مالها نبضات قلبه تزيد تقوى.. طلع من الفيس وحط التليفون ع الصامت وداره ع الكامدينو.. ورقد وهو حاط راسه تحت المخده... 🍀🍀🍀🍀🍀 وتمر الأيام.. وماتغيرش الحال بين عبد الرؤوف وغرفه بل زاد سوء.. هو بعد عنها اكثر من قبل كان خايف من الاستسلام.. وهي هالبعد كان واجعلها قلبها ما تقرب خطوة هو يبعد عشرة.. ونبيله بدت تلاحظ ان علاقتهم مش طبيعيه وبدت تشك في شي ورا اللي قاعد يصير بيناتهم.. ☘وأريج مشت للمصحه اللي يخدم فيها الدكتور إياد وهو بمساعده منه ساهم في تعيينها فترة صباحيه مع مراعاة محاضراتها في الكليه.. وكانت فرحانه عليه انها خدمت في مكان محترم.. واختها آلاء قاعد تشوف يوميا لشغلها ع الانستقرام.. وماكانش عندها علم الشخص اللي يتابع في حسابها عن بعد واليوم قرر يدير خطوة لعلها تكون سبب القرب.. مهند..اللي سوق لشغلها في صفحته.. وبدت الطلبيات تنزل عليها بالهبل.. اما امهم فكانت قاعده تخدم ليل مع نهار بعد مازادت عليهم الطلبيات والمبلغ اللي تاخد دس فيه ع تركينه بش تشري اللاب توب لمعتز... ومن جهة اخرى.. كانت سدرة موتيه مفاجئه كبيره هي وبوها ويراجو في الوقت المناسب بش يعلنوا عنها.. بش مش حتكون اكبر من المفاجآة اللي قاعده تستنى في آلاء... ☘روحت للحوش بالأفيكو.. وكانت طول الوقت تتذمر من الوضع.. آلاء:ياربي امتى بتوب عليا وندير سيارة امتى يارب.. وخشت لدارها وسكرت عليها.. ع مرواحة امها للحوش بعد مالفت ع محلات الاكترونيات ومالقتش لاب توب ع قد فلوسها المستعمل الصحيح اقل شي ب800 اما الجديد مافاتتش من ركنه بكل.. وهي ماشيه لدارها تخمم...جاها اتصال.. خشت لدارها وردت عليه.. فردوس:ايوه ثريا.. "عاش من سمع صوتك" فردوس:معليشي مافضيتش.. "ايه ربي يكون في عونك..المهم اتصلت بيك بش نعزمك الخميس الجاي ع فاتحه وبيان وليد" فردوس:مبارك عليه وربي يهنيه.. "قصدك مش جايه" فردوس:مش عارفه ع حسب فضوتي. "لالا نهاري انتي مرت عمه ولازم تحضري يافردوس وتجيبي معاك البنات وعزو" فردوس:خلاص تو نشوف نشوف..سامحيني مش فاضيه مضطرة نسكر..بالسلامه.. سكرت عليها وحطاته ع الزيانه.. بعدها طلعت حوايجها وخشت للحمام..وبعدين طلعت وهي تنشف في شعرها.. "وين الغدي وين معقوله لتوا" تأففت فردوس وقعدت تمشط في شعرها..بعدين لماته ومشت طلعت من الدار.. فردوس:شن بيصيرلك كان سخنتيه.. وآلاء في الكوجينه تشرب في الميه ومابتش ترد ع امها.. وامها حركت راسها يمين ويسار ومشت ولعت تحت الغدي.. فهالوقت.. خشوا أريج ومعتز... اريج:ارمي سبيدروك هني كم مرة بنعلموك.. رمي السبيدرو وهو يتأفف بعدين قعد ينادي:يام..يما.. فردوس في الكوجينه بضيق قالت؛في الكوجينه.. مشي خش الكوجينه وخشت بعده أريج.. معتز:شن صار في اللاب توب يام انتي قلتي اليوم بتجبيه.. فردوس؛ماحصلتش حاجه باهيه.. معتز بنرفزة؛من الاخير انتي تمشي فيا وخلاص.. اريج:تكلم كويس خيرلك.. طلع وهو متنرفز يقول؛فوتوني ترا... اريج قعدت تبع فيه بعيونها وهي تقول:قليل أدب.. آلاء؛حق ماما انتي مالقتيش حاجه باهيه!؟ فردوس:قسما بالله مالقيت حاجه مستعمله باهيه بالفلوس اللي عندي.. اريج:من جدك يام تحلفيلها الحيوانه هادي.. آلاء قلبت عيونها ومشت للثلاجه بتاخد منها عصير.. فردوس تنهدت بضيق:والله ماني عارفه كيف بندير..بكري شويه اتصلت بيا مرت عمكم ثريا.. سكرت آلاء الثلاجه والتفتت لأمها وقلبها يدق بقوة.. اريج؛شن تبي دراه الكبد هادي؟ تنهدت وقالت؛عزمتنا ع فاتحة وليد وبيانه.. اريج طول شافت لآلاء..شافت ملامح الصدمه باديه ع وجهها.. فردوس:اني نفكر مانمشيش بروا انتم وخلاص.. آلاء وهي ترجف مشت طلعت من حداهم وأريج تبع فيها بعيونها.. فردوس لما شافتها طالعه قالت؛اكيد ماشيه تشوف شن بتلبس.. اريج شبحت لأمهاوقالت؛خل نمشي نشوف معاها.. ومشت طول طلعت من الكوجينه.. وامهم تنهدت بضيق والتفتت ع الغدي.. ☘اما أريج خشت ع الاء الدار لقتها حاطه تليفونها ع وذنها وتمشي وتجي في الدار ودموعها ينزلوا سيل.. سكرت اريج الباب وهي تشوفلها بحزن.. شافتها ابتسمت ابتسامه سخريه وقالت؛شن الاخبار الحلوة اللي وصلتنا ياولد عمي.. ضحك وقال "عقبالك يابنت عمي" آلاء:آمين..مبروك عليك وربي يتمم ع خير وان شاء الله حنجيبلكم احلى هديه..بس قبلها نبي نعرف من هي اللي خديتها.. "من العيله مش برانيه ابتهال بنت عمتي" عرفاته اختار من العيله قصدا بش يقهرها بزياده.. هي ضحكت وقالت؛اها فلونه تموت ع فكرة احسن مااخترت.. "شكرا...ماتبي شي بنسكر خشت عليا انتظار" آلاء:لا شكرا..سلملي عليها باهي.. "يوصل..سلام" وسكر عليها.. وآلاء قعدت تضحك ودموعها ينزلوا.. اريج بحزن:باهي علاش سيبتيه مادام تبيه فهميني.. شبحتلها وقالت ومازالت الضحكه الساخره ع وجهها والدموع ينزلوا من عيونها؛سيبته لإني مش مستواه..لأن امه قالتلي نبي لولدي الكبير وحده من مستواه..لإنها هددتني لو ماخليتاش بتكلم امي وبتحصلها فيها فرصه.. اريج بصدمه:الحقيرة! آلاء بألم وهي تبكي:مقهورة يااريج مقهورة حاسه روحي بنموت ياأريج..علاش جينا للدنيا علاش مادام بننهانوا ونتمرمدوا هكي وكل حد واخد فينا حصة...يارب نموت يارب.. اريج وجعتها اختها ع الآخر..جتها ضمتها ودموعها ينزلوا من عيونها.. والاء حاضنه اختها وهي تقول:علاش يابابا خليتنا علاش..علاش خليت كل من هب ودب يعفس علينا ويهينا.. اريج والعبرة خانقتها:خلاص اسكتي.. والاء تبكي وبس.. بعدت اريج وقالت؛مش هما يبوا يقهروك..انتي اقهريهم اكثر منهم.. ومشت فتحت دولابها وطلعت فلوسها من تحت حوايجها وجتها بيهم وقالت؛خوديهم وزيدهم ع فلوسك واشري بيهم احلى قفطان واحلى كندره..واحلى هديه..خلي امه تشوفك تتحسر..خلي اللي يحضروا كلهم يهبلوا عليك وينسوا العروسه.. خليه يموت ندم لأن تصرف تصرف زي هدا بش يقهرك بيه من غير مايدور ويعرف السبب اللي خلاك تسيبيه فجأة. اريج كانت تتكلم وهي ترعش ودموعها تنزل.. والاء تشوفلها وهي مصدومه فيها وفكلامها.. أريج ؛كان يحبك حق يحارب ع خاطرك مايديرش فيك هكي.. الاء دفت ايدين اريج اللي فيهم الفلوس وقالت؛عندي فلوس وتو ندير كل اللي قلتي عليه..ومن بعد هداكا اليوم حنقلب صفحة وليد بكل.. اريج هزت راسها وهي ساكته ودموعها مازال ينزلوا.. "هيا يابنات اطلعوا تغدوا" اريج تنحنحت وقالت:شويه يام شويه.. مسحت الاء دموعها بقوة وقالت؛لحقي.. ومشت طلعت من الدار.. اريج بكره؛الحقيرة ثريا وولدها التافه.. ☘☘☘☘☘ "اسمع كان مازال ماتقدرش تعفس ع رجلك أجلها" الجالي وهو حاط سماعة البلوثوث في وذنه ويحط في عطر ويشوف للمرايه:لاحبيبي رجلي امورها تمام ليا شهر قاعد في الحوش وراد بالي منها ومهتمين بيا اخر اهتمام الجرح ماقعدش كان اثره.. "باهي مدام حاس روحك كويس حبيبي خلاص نراجي فيك" الجالي بإبتسامه:نص ساعه ونكون غادي.. "تمام..نحط الصغار عند صابرين ونمشي غادي طول" الجالي:تمام سلام حبي.. "سلام ياروحي".. وسكر..وخدي نظاراته ومفاتيحه والتليفون بعدين فتح درج الزيانه.. قعد يشبح لحاجه في وسطها.. عيونه تعبوا دموع وعقد حواجبه بغضب.. بعدين سكر الدرج بقوة ومشي طول طلع من داره.. ☘☘☘☘☘ الساعه 8:30مساءا.. كانت تاله بنت فايزة مقعمزة في وسط الحوش.. تقرا وفي جنبها لعبة قطنيه ترافق فيها وين ماتكون هديه من بوها وع صغر سنها لما جابهالها ماقدرتش تنسى اليوم اللي جابها فيه... اختها صفاء في الدار تقرا.. ومروة تساعد في امها في الكوجينه.. اما حناهم.. طلعت من دارها..وهي ماشيه زي العيل اللي يدور ع حاجه يلهى بيها.. لين وصلت في مكان تاله... وشافت اللعبه اللي في جنبها.. فرحت بيها ومشت بتاخدها.. شافتها تالة جايه ناحيتها.. خدت لعبتها وطول مشت بيها تجري لدارها.. وهي لحقتها بتاخدها منها.. البنت خشت وسكرت الباب.. بدت تبكي وهي تقول؛نبي لعبتي نبيها.. وماكان في حد يسمع فيها.. كل حد لاهي بهمه.. ماعدا تاله اللي في الدار حاضنه لعبتها وهي خايفه.. قعدت مشتده تمشي في الشقه وتقول:نبي لعبتي.. لين شافت باب الشقه.. مشتله..وصلت فيه..وفتحاته.. بعدين طلعت.. ☘في الكوجينه.. فايزة:المولد مايخلي فيا نسمع في شي.. مروة؛شن تبي تسمعي ماما.. فايزة؛كان حناك تبي حاجه ولاطلعت من الدار.. مروة؛تجي هني تعرفيها انتي... ☘ومشتده نزلت مع الدروج.. لين وصلت في الباب البراني.. فتحاته وطلعت.. وقفت وشبحت حواليها... المهدي كان في الحوش اللي واخده واجر دوره الاول لربيع.. الزوز كانوا فيه مع بعض يهدرزوا وماركزوش عليها.. ونضال واقف ع واحد من الزباين وعاطي بالظهر . اما محمد المهدي.. كان في المطحن لاهي مع واحد من العمال.. هي بعدت مامررت نظرها ع الشرع..اختارت تمشي يمين ومش عارفه وين ماشيه ولاوين بتاخدها الطريق.. قعدت تمشي وتمشي بدون ماحد يشوفها لين طلعت من شارع القهوة.. ☘وفايزة.. طلعت من الكوجينه لداى صفاء.. دارت عليها طلة هي الاولى...لقتها لاهيه بالقرايه وفرحانه ان وضعها بادي يتحسن وان الدكتورة النفسيه قدرت تتقدم معاها في العلاج.. فايزة؛شويه واطلعي تعشي ماما.. صفاء وهي لاهيه بكتابها:حاضر ماما.. ابتسمت فايزة وسكرت الباب ومشت لدار امها.. لقتها مفتوحه..خشتلها..لقتها فاضيه.. عقدت حواجبها بخوف وطلعت من الدار وقعدت دور فيها..مالقتهاش فولا مكان من الشقه.. فايزة بخوف:حي عليا وين مشت!؟ وصلت في باب الشقه وين لقاته مفتوح قالت بفجعه:ووه عليا!! ولت خشت تجري لدارها.. لبست عبايه ووشاح وفي ترعش مع بعضها.. بعدين طلعت من دارها تجري.. لاقتها مروة وقالت بخوف:خيرك ماما! فايزة بخوف:حناك طلعت من الشقه مش عارفه وين مشت.. وطلعت تجري من الشقه.. ع طلعة صفاء اللي سمعت الدوشه قالت؛شن في مروة!؟ مروة ودموعها في عيونها:حناي طلعت من الشقه ياصفاء.. عقدت صفاء حواجبها بخوف وهي ساكته.. ☘وصلت فايزة لوطا.. وبدون وعي منها مشت لحوش لطفي وقعدت تخبط ع بابهم بإيديها الزوز وهي تقول:افتحي ياسدرة افتحي.. المهدي اللي كان طالع هو وربيع من الحوش شافوها وهي تخبط في الباب بس مايسمعوش فيها شن تقول من قوة صوت المولدات.. ربيع:إن شاء الله خير! والمهدي يشوف لفايزة بقلق.. شاف الباب انفتح وسدرة طلعت وهي لابسه قفطان باصمه كم وطويل وع راسها شاربه رابطتها ربط لما سمعت صوت فايزة تنادي معاش شافت شي ولافكرت في شي.. سدرة وهي مخلوعه:خيرك فايزة شن في!؟ فايزة وهي ترعش:امي ياسدره طلعت ومش عارفه وين مشت.. سدرة؛طلعت.. فايزة:ايه ياسدره طلعت يانهاري الاحرف وين مشت كان ماضربتها سيارة.. سدرة:اسكتي توا ومعاش تفكري في شي.. فتحت الباب.. وخشت تجري للحوش.. خدت المفاتيح من ع المدخل ومطيرة وطوبى وراها وهما يقولوا "شن في ياسدرة..شن صاير" سدرة وهي تجري لسيارتها:خالتي مشتده خدت وجهها.. خبطت مطيره بإيديها ع وجهها وقالت:نهار احرش.. ركبت سدرة السيارة وشغلتها وطلعت بيها من للحوش.. لقت المهدي مع ربيع واقفين ع فايزة.. سدرة:فايزة تعالي اركبي.. المهدي وهو عاقد حواجبه:وين ماشيه.. سدرة؛وين ماشيه يعني بندور المراة وين خدت وجهها..تعالي يافايزة.. فايزة مشت تجري ركبت معاها وهي تبكي.. المهدي:اقعدوا تو ندوروها حني.. وسدرة تحركت طول بالسيارة.. المهدي بنفاد صبر:عناد في عناد في عناد..ماركه في العناد.. ومشي يجري لسيارته.. ربيع :جاي معاك.. ومشي جري ركب مع المهدي.. والمهدي طلع وراهم بالسيارة.. ☘☘☘☘☘☘ راقدين الزوز وغارقين في النوم... هي كانت مرتاحه في نومها.. لكن هو لا.... وكأنه كان يشوف في كابوس.. "خلي الضي يوصل لراسه لين راسه يولع زي اللامبه" "من انت ياكلب اللي تمد ايدك عليا وتضربني اني يا#### اسلخه اسلخه" وانحط ع ظهره سيخ حديد مكوي بالنار.. ومن قوة الألم قعد يصرخ لين صوته راح... فاق مفزوع من النوم وهو يرعش ويقول:اني وين اني وين.. هي ناضت مفجوعه وقالت:بسم الله جالي خيرك! شبحلها بنظرات عيونها بياضها ولى احمر زي الدم وهو يقوللها:انتي مني! انصدمت نجاه وقالت؛جالي خيرك! وهو يتصبب عرق مع بعضه قاللهها بصوت عالي ومرعب:انتي مني!!؟ نجاة وهي ترعش؛جالي..اني نجاة خيرك شن جاك..!.. فجأة.. انهار بالبكي زي الطفل وهو يقول:نادولي امي تقرا عليا نادولي امي.. نجاة ناضت طول ومشت تجري طلعت من الدار للكوجينه.. صبت في طاسه ميه.. وجاته بيها تجري.. وقفت قدامه وهو مازال يبكي ويقول:جيبوهم يقروا عليا.. نجاة قعدت تصب في الميه ع يدها وتمسح في وجهه وهي تقول:خلاص حبيبي خلاص..كنت تحلم حبيبي مافي شي.. شويه شويه هدي.. ونجاه قعمزت قدامه وهي تشوفله ودموعها ينزلوا.. هو هني رجع لوعيه.. شافلها بنظرة ضيق... بعدين قال:شن صار توا؟ نجاة وهي تمسح في دموعها:شي حبيبي كنت تشوف في كابوس شكلك.. هو بلع ريقه وناض من حداها.. بدل حوايجه.. نجاة:جالي وين ماشي!؟ الجالي وهو يلبس في سوريته:بري روحي لحوشك.. ومشي طول طلع من حداها.. وهي لحقاته وقعدت تقول:جالي خليك جالي..عارفه كل شي اني..جالي.. هو فتح باب الشقه وطلع وسكرها وراه.. وهي وقفت ع الباب وقعدت تبكي.. ☘هو وصل تحت ركب سيارته وطلع من العمارة وتوجه لأقرب صيدليه.. وصل فيها..فتح درج السيارة طلع منها وصفة طبيه ونزل من السيارة وخش طول للصيدليه.. دقايق وطلع منه وفي يده دوا.. ركب السيارة.. فتحه وطلع شريط خدي منه حبه..وخدي شيشة ميه قاعده في السيارة.. خدي الحبه وبلعها وشرب وراها ميه.. بعدين غمض عيونه واتكي الكرسي.. ودموعه تنزل ورا بعضها.....
#قلوب_محطمه #طوبى
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
