#طوبى "جنة طوبى"
#جمان_فريد
#الجزء_الخامس_والخمسين"خلتني بروحي"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
🍃 قاللها: ﻏﻴﺮ ﻭﻳﺶ ﻳﻮﺟﻊ ﻓﻴﻚ ﻳﺎﻏﺎﻟﻴﺘﻲ .. ﻗﻠﺒﻲ ﻓﺪﺍﻙ ﻭﺻﺤﺘﻲ ﻭﻋﺎفيتي .
ﺭﺩﺕ ﻋﻠﻴﻪ وﻗﺎﻟﺘﻠﻪ :ﻣﺎﻋﺎﺩ ﻓﻴــــﺎ ﺣﻴــــــــﻞ ﻳﺎﻏﺎﻟﻴﺎ .. ﻇﻬﺮﻱ ﻭﺭﺍﺳﻲ ﻭﻛﺒﺪﺗﻲ ﻭﺭﺟﻠﻴﺎ .
ﻛﺒﺪﺗﻲ ﻭﻋﻴﻮﻧﻲ .. ﻭﺍﺻﺤﻚ ﻋﻠﻴﺎ ﺗﺨﺎﻑ ﻳﺎﻣﺠﻨﻮﻧﻲ .. ﻭﻧﺂ ﻋﺎﺭﻓﺎﺗﻪ ﺭﺍﺡ ﺍﺻﻔﺮ ﻟﻮﻧﻲ .. ﺭﺍﻧﻲ ﻣﺮﻳﻀﻪ ﻭﻓﺎﺷﻼﺕ ﺍﻳﺪﻳﺎ .. ﻭﻣﻦ ﻛﺜﺮ ﻣﺮﺿﻲ ﺫﺍﺑﻼﺕ ﺟﻔﻮﻧﻲ .. ﻭﻧﺤﺲ ﻓﻲ ﺍﻟﺪﻧﻴﺎ ﺍﺿﻴﺎﻗﺖ ﺑﻴﺎ .. ﻧﺒﻴﻚ ﺗﺼﺒﺮ ﻓﻲ ﺍﻟﺤﻴﺎﺓ ﻣﻦ ﺩﻭﻧﻲ .. ﻭﺍﻧﻜﺎﻥ ﻣﺘﺖ ﺍﻧﺮﻳﺪ ﺗﺪﻋﻲ ﻟﻴﺎ .. ﻭﺭﺍﻧﻲ ﺍﻧﺤﺒﻚ ﻣﻮﺕ ﻳﺎﻣﺮﻫﻮﻧﻲ .. ﻭﻧﺎ ﻧﻌﺸﻘﻚ ﻻﺧﺮ ﺍﻧﺒﻴﻀﻪ ﻓﻴﺎ .🍃
🍃🍃🍃🍃🍃🍃
وهما الزوز..
غايبين عن الدنيا غياب مش معروف ان كان مؤقت ولادائم كله في علم الغيب..
الزوز..
تحت ايدين الاطباء..وبين ايدين الله...
بين الحياة والموت..
والناس اللي تحبهم عايشه في حالة يرثى لها...
☘طوبى واميمه وغرفه..وحسين...
حسين في حالة من التوتر العالي
يراجي يسمع خبر يطمنه ع اخته الكبيره...
وفي نفس الوقت يراقب في حالة طوبى..
طوبى اللي كانت خاشة في حالة صدمه..
اللي صار كله قاعد بين عيونها..
شكل سدرة وهي طايحه ودمها سايل ع الأرض بحداها..
شن بينسيها..شن بيخليها تفيق من صدمتها..!؟
اذا فقدان امها مداير في قلبها جرح عميق إلى الآن يوجع فيها بقوة...
امها اللي لاعرفتها ولاعاشت معاها؟
كيف بفقدان سدرة امها التانيه مش بس اختها..
اللي ربتها وكبرتها وعاشت معاها كل لحظات حياتها الحلو والمر!؟
سدرة لطوبى..كانت بيت...ساكنه فيه ومحتميه بيه وعايشه فيه..
لو هالبيت انهد حتقعد طوبى في العراء..
مش حتسلم لا من صقع لامن نو...لامن ريح..لامن سيل مية جارف...
وفي الحقيقه..
سدرة ماكانتش بين طوبى بروحها..
بل لعيلتها كلها..وأولهم..لطفي الواعر..بوها..
🍃في شارع القهوة..
اللي كان مزدحم وكله دوشه..
خش لطفي بسيارته اللي معاه فيها بوه..
كان يراقب بعيونه في الزحمه اللي في الشارع...
سأل بوه بقلق؛زعمه شن صاير؟!
علي وهو يوزع في نظره ع الشارع قال بقلق:ان شاء الله خير!
وقف بسيارته..
لما شاف مطيره اللي جايه من اخر الشارع من الجهه التانيه بعد ماحطتها تاكسي جايبها من حوش صديقه ليها..
شافها تجري..ومذعورة..
وصلت في الحوش..دفت الباب وخشت تجري..
هني الزوز فهموا ان اللي صاير..صاير عندهم..
لطفي طول فتح باب السيارة ونزل ..
سمع صوت بكي وعياط..
رجليه ثقلوا..قعد يمشي بخطوات خايفه..
لين وصل في الباب ودفه وخش..وبوه وراه..
🍃فهالوقت..
مطيره بصدمة؛وينها سدرة..سدرة وينها!؟
وفايزة ونبيله وصفيه واريج بنات فايزة والجارات..
بين اللي يبكي بالعبره واللي متأثر..
بصوت عالي؛شن طرشتوا!؟ نكلم فيكم سدرة وين تكلموا!!؟
وحده من الجارات قالت بأسف؛في مصحة القدس يامطيره..
خبطت بآيديها ع رجليها وقالت؛معناها حق!!..حق اللي سمعته في التليفون..حق اللي قالاته صفيه ماتخترفش!
باهي كيف طاحت كيف!؟..كيف ياناس.!..
ومشت لدار الدروج..وكلهم يشبحولها بألم..
لما خشت لدار الدروج..الدم اخر الدروج..
بصدمه وهي ترعش:وووه عليا وووه..هدا دم سدرة!..
ولت طالعه وهي تقول؛تي هادي ماتت..ماتت..ياحي عليا..بنيتي اللي ماجابتها بطني ماتت..حي عليا اني حي عليا..
صفيه ببكي؛يامطيره معاش تفاولي عليها...
:حرام عليك يامطيره..مايجيش هكي..
وهو قعدوا يشدوا فيها ويحاولوا يهدوها..
والنار اللي والعه خلتها بتفر...
🍃وهدا كله كان ع عيون لطفي..
لطفي اللي تفكر تفاصيل موت وردة..
تفكر كيف ماتت وهو مش موجود..
وردة اللي بعد موتها..ماتت فيه هلبه حاجات..
ولولا الله..ثم وجود سدرة في حياته كان لحقها من زمان..
سدرة..اللي ولت من بعدها..مش بنته..اخته وامه وصديقته..
وسنده وعزوته...
بالمعنى الحرفي للكلمه..
ظلمت...
الدنيا كلها ظلمت في عيون لطفي..
حس ان كل شي انتهي..حس انه انهد هدة وحده..
بوه اللي واقف جنبه وشاف كل شي..
واللي عرفه صدمه ووجعله قلبه لأبعد حد..
كان شعور الأبوة فيه غالب عن كل المشاعر..
عارف حفيدته هادي شن تعني لبوها اللي هو ولده..
حط يده ع كتفه وشده بقوة وقال:لطفي..
ولطفي مايسمع في شي..ولاحاس بشي..
واقف جامد في مكانه..وكل شي فيه جمد..
خش في حالة صدمه حتى هو..
بوه جي قدامه..
لوح العكوز..
وشد وجه ولده بإيديه وهو يضرب ع خدوده بشي من القوة ويقول؛لطفي..لطفي..لاإله إلا الله ولدي لاإله إلا الله..قوي روحك شد حيلك..لطفي..لطفي..
استاقظوا النساوين وشبحولهم..
اريج بخوف؛جدو!؟
مطيره لما شافت حالة خوها حاولت تستجمع نفسها وقالت:خشي جيبي ميه بسرعه..ومشت لخوها تجري..
واريج خشت تجري وهي تبكي..
فايزة ببكي:ياربي..ياربي رحمتك يارب!..
🍃مطيره وصلت في خوها شدت ذراعه بقوة وهي تقول:لطفي..وخيي
دموعه عبوا عيونه وقعدوا يطيحوا..
لكن ماحركش ساكن..
علي بخوف شديد؛لاإله الا الله..لاإله إلا الله..حسبي الله ونعم الوكيل..
ع جية اريج تجري بطاسه الميه وصلت فيهم وقالت بنبرة باكيه؛هاك عمتي..
خدت مطيره الطاسه وصبت منها شويه ع يدها..
وغسلت بيها وجه خوها وهي تقول:لطفي وخيي لطفي..
اريج بنبرة باكيه؛جدو خالتي في سدرة في العمليات قاعده حية راهو وبإذن الله تنوض منها مافيها سو..
هو شبح لأريج ..
واريج تشوفله وهي تقول؛والله مانكذب عليك تبي نتصلك بعمي اياد بش تسمع بروحك!؟
هني تكلم بصوت مخنوق وقال:كيف طاحت؟
اريج تفكرت الموضوع اللي كلمتها عليه..
حست ان الموضوع هدا هو السبب ..
قالت في نفسها اكيد تعب نفسيتها...
بلعت ريقها وقالت لجدها؛مش عارفه ياجدي..اني سمعت حاجه طاحت بقوة وكانت معاي طوبى ..لما سمعنا الصوت مشينا نجروا لدار الدروج لقيناها طايحه..
لطفي بصدمه اكبر؛طوبى كانت هني!؟
اريج هزت راسها ودموعها ينزلوا:ولحقتها لما رفعوها..
ع خشة فردوس ومعاها آلاء ومعتز..
فردوس بعياط:شن صار في سدرة خيرها سدره..!؟ وينها..
ومشت حتى هي تجري لدار الدروج..
فتحت الباب وشافت الدم..
هدا دمها!..دم سدرة...!
ماتحملتش اللي شافاته..وطول فقدت الوعي..
🍃🍃🍃🍃🍃
وفي حوش شنيبه..
اللي كانوا عايشين مصاب جلل حتى هما..
ومعاهم الجيران يواسو فيهم..
:ادعيله يامغليه ماينفعه كان الدعاء ياوخيتي..
مغليه ببكي:ياربي..ياربي سلملي ولدي..رده لصغويرته ياربي..
شبحت لسدرة اللي كانت حاضنه امها وتبكي قعدت تقول..تو يولي حاله باهي بابا ياروحي معاش تبكي خلاص..
تتكلم وهي تبكي والعبرة خانقتها..
وحداها نسرين وخديجه يبكوا حتى هما..
وعائشه ضامة بنتها وهي تشبح في الفراغ ودموعها سيل..
عائشه في هديكا اللحظه مافكرتش فسبب اللي صار راجلها..
عائشه وقتها تفكيره كله في لو راجلها صارتله حاجه وهي مريضه وواضح جدا ان مرضها خطير..
صغارهم كيف بيصير فيهم!؟
🍃ايه عائشه ماهمهاش السبب...
عائشه توا حاسه روحها ع مشارف النهايه..
يعني الموت والرحيل عن الدنيا بما فيها..هالاحساس ماكانش وهم..ولا وسواس...
وهي ماكانتش خايفه منه..كانت خايفه ع صغارها وبس تفكيرها محصور في صغارها وبس..
لأن اي شي غيرهم فقد اهميته عندها خلاص..
هدا مايعنيش ان المهدي معاش يعنيلها شي بالعكس لازالت تحبه وبقوة..بس معاش عندها سبب يخليها تحارب بش تملك قلبه حتى بينها وبين نفسها🍃
☘وقلب المهدي..
قاعد يقاوم..مأمور انه يكمل بيه ماقعدله من عمره..
تحت ايدين الاطباء..
وهما يديروله في عملية قسطرة جديده...
وبرا...
خوته نضال والجالي..ولده محمد..
ربيع وعبد الرؤوف جيرانه..
محي الدين نسيبه...
وعبد القيوم...
عبد القيوم!...
ايه عبد القيوم اللي لما طاح المهدي من طوله نسي اللي صار كله..
ومع الجيران رفع المهدي بسيارته وطلع بيه يجري للمصحه..
هو توا في حالة قاعدة اسوأ من حالة المهدي..
واقف جنب الكرسي اللي مقعمز عليه ربيع..
يشبح في الفراغ ويتفكر في اللي صار ويعاود وعقله قاعده يكرر في المشهد نفسه..مع مشاهد تانيه قديمه..
وقعد يربط في الاحداث في بعض..
والنتيجه اللي يوصللها تخلي عقلها قريب يطير من راسه..
..معقوله!..
حب حياته ام العيون الحايرة..
هي نفسها طوبى بنت لطفي..مرت الجالي اسوأ خلق ربي اللي عرفهم لتوا..!
اللي داير علاقة مع أرملة خوه..اللي من غيرتها وحقدها عليها قتلت روح بريئة قدام عينه بدون مايرفلها جفن!..
طوبى...!
اللي الكل يحكوا عنها في احلى كلام..
وشاف محبتها واحترامها في عيون كل اللي يحكوا عنها..
هي نفسها معشوقته اللي ياما تمناها تكون من نصيبه!..
صدمة عبد القيوم خلاته يعيش حالة يصعب وصفها..
حالة اللي انطعن في قلبه طعنة موت..
لكنه مازال على قيد الحياة...
☘☘☘☘☘
"يهبلوا نجوته من وين خديتهم؟"
نجاه وهي توتي في شنطتها:حجز من النت..تونديرلك دعوة للقروب بضاعتهم كلها أصليه..ضيقت عيونها وشبحتلها وهي تقول..تعالي جاي علاش تسألي عليهم شن عندك بديري بيهم!؟
صابرين رفعت حواجبها وقالت؛حلوة شن عندي بندير بيهم! معاش بنتزوج يعني بنترهبن!؟
نجاة؛غير يجي قبل..
صابرين؛تو يجي وحياتك ياعيوني لما نجيبه..
نجاة شبحتلها بطرف عينها بعدين مشت للزيانه بتاخد تليفونها بش تكلم راجلها..
وصابرين قعدت تشوف في حوايجها وهي ترفع وتحط..
اتصلت نجاه بالجالي وهي تقول:في حاجات ليه عجبوني نفكر ناخدهمله..
صابرين؛تكلمي فيه؟
نجاة؛ايه..بنتأكد من موعد الرحله قالي اليوم نأكدلك ولتوا مااتصلش..
☘☘☘☘
في المصحه..
في وحده من الممرات اللي موجودين فيها الرجاله يستنوا وسط صمت طويل..
قطعه فجأه اتصال نجاة..
هني..
عبد القيوم قام عيونه وشبحله..
شاف لما طلع التليفون وهو يشوف في المتصل..
بعدين انسحب من حداهم وتباعد..وهو معاه بعيونه ونظراتهم حاده مليانه كره..
🍃الجالي:ايوه..
"ايوه حبيبي شن جو توا'
تنهد بحرقه وقال؛شن بنقولك بس!
"خير حبيبي شن صاير!؟"
الجالي:المهدي خوي قلبه تعب مرة تانيه وتوا هو في العمليات..
☘غمضت نجاة عيونها بأسف وقهر بعدين فتحتهم وقالت؛لاحول ولاقوة الابالله
"بنسكر توا "
نجاة؛طمني بعد يطلع من العمليه..
"تمام"
وسكر..
وهي نزلت التليفون وقالت بغضب:تفي ع الحظ الأسود..
صابرين وهي تشوفلها بإستغراب؛شن صار!؟
نجاة:المهدي الزفت خطر عليه قلبه يتعب توا..
صابرين:خير بلاه!؟
نجاه:وين نندري ع جده اني..!احظ اسود وخلاص..
صابرين قعدت تشبحلها بضيق وهي ساكته..
تأففت وهي تمسح بيدها عينها اليمين بعدين قالت؛لبسي الصغار ووتي روحك حتى انتي بنمشوا غادي..
تنهدت وقالت؛باهي..
ومشت طلعت من حدا اختها..
ونجاة بعد ماطلعت..
مشت للشنطته بغيظ سكرتها ورفعتها ولوحتها تحت السرير ماتبيش تشوفها..
بعدين مشت لدولابها وطلعت منه حوايج وهي تقول بقهر:تفي عليا وع حظي..
☘☘☘☘☘
خشوا للمصحه وقلوبهم المرتجفه خوف تسبق خطواتهم..
مشوا طول وين ماموجودين..
غرفه وطوبى واميمه وحسين..
وصلوا فيهم..
لطفي بنبرة مرتعشه؛شن صار في اختك !؟
حسين شد ذراع عمه وهو يقوله:قاعده في العمليه..
فردوس ببكي:شن قالوا عن حالتها باهي؟
حسين؛الطيحه تسببتلها في نزيف هما توا بيوقفوه..
علي:قداش ليهم في العمليه؟
حسين؛والله ماعارف ياجدي ممكن فوق الساعه لتوا..
حطت فردوس يدها ع فمها وهي تبكي بعدين شبحت يسارها..
شافت اميمه وغرفه يشبحولهم وهما يبكوا..
مشتلهم..
ناضت غرفه وجتها طول وضمتها..
قعدوا الزوز يضموا في بعض وهما يبكوا من غير ماينطقوا بكلمة..
واميمه تشوفلهم وهي متأثرة ع الآخر ودموعها ماوقفوش..
علي:خلاص انتي وياها اسكتوا..
هما الزوز تباعدوا عن بعض وقعدوا يهدوا في ارواحهم..
جت اميمه لفردوس وضمتها وهي تقول:معاها احسن الدكاترة يافردوس ادعيلها بس..
وتباعدت عنها وهي تشوفلها..
وفردوس ترشف وهي تمسح في انفها بكلينكس وتقول:يارب طلعها منها لا سو لاسوية يارب..
غرفه بنبرة باكيه؛يارب..
اميمه ؛تعالي قعمزي..
فردوس وين جت بتشبح للكرسي جو عيونها ع طوبى ..
وين شافت حالتها استغربت..
كانت مقعمزة..تشبح في الفراغ..
ملامح وجهها جامد والدموع ينزلوا بس..
قالت بقلق:خيرها!؟
غرفه بألم؛مصدومه..
فردوس:حي عليا ومخلينها هكي كان ماتصير فيها حاجه!
لطفي سمعهم وانتبه لطوبى اللي كانت بعيده عن نظره..
مشالها طول..
واميمه تقول؛ مادام تنزل في دموعها ماتخافيش عليها..
قعمز لطفي جنب طوبى..
حط يده ع راسها وقال؛بابا طوبى؟!
كلهم كانوا يشبحولها..
هي لما سمعت صوت بوها شبحتله شويه..
وبدون ماتهمس ببنة شفه...خشت في حضن بوها..
وشداته بقوة..
وجعت قلبه اكثر ماهو موجوع..
حط ايديه عليها وتمنى لو يقدر يدخلها في قلبه..
حسها ضعيفه هلبه..شافها طوبى الطفله اللي كان عمرها عام لما فارقتها امها..
وتوا وهي في عمر العشرين تعاني الخوف من فقدان امها التانيه..
زيه هو بالزبط..
اللي حواليهم كانوا يشوفولهم بنظرات ألم..
عارفين مدى تعلقهم بيها..ومدى خوفهم من فقدانها...
🍃وهي داخل..
مش عارفه شي..
هي اللي كانت حريصه في صرف الأذى والحزن عن قلوبهم..
ورهنت عمرها لهالشي..
توا بسببها عايشين في عذاب لايوصف..
تحت مشارط الجراحين وايديهم سدرة..
اللي قاعد اياد يتفرج عليهم وهما يديرولها في العمليه..
وقلبه ينعصر عصر من الالم..والدموع محبوسات فيهم..
قبل ساعة..
كانت في قمة السعادة لأن موعد ارتباطه بيها قرب خلاص..
وفي لحظه وقف وتغير كل شي...
🍃🍃🍃🍃🍃
بعد ماعدى الوقت المحدد للعمليه...
جاهم الدكتور يبلغهم بنتيجتها..
وهما لما شافوه جاي..
المقعمز فيهم وقف..
واللي كان واقف فيهم حط انتباهه كله ليه..
الجالي بقلق؛بشر دكتور؟
الدكتور؛الحمد لله العمليه ناجحه ووضعه مستقر..
كلهم ماعدا عبد القيوم قالوا بأصوات متقطعه:الحمد لله..
محمد ودموعه في عيونه؛دكتور معليشي فصل نبي نعرف شن صايرله بالزبط..
الدكتور:بعد ربع ساعه تعالالي لمكتبي يامحمد تعرفه..وشبح لعمامه وقال..واكيد حضوركم مهم..
هز روسهم ونضال قال:ان شاء الله..خل نمشي نكلم العيله نطمنهم..
ومشي من حداهم ..
الدكتور شبح للجالي وقال؛بعد ربع ساعة نشوفكم..الحمد لله ع سلامته..
هما بأصوات متقطعه؛الله يسلمك..
مشي من حداهم..
عبد الرؤوف بقلق؛مدام اطمنا ع المهدي خل نمشي نشوف نسيبتي شن صار فيها..
الجالي:جاي معاي..
مشي عبد الرؤوف والجالي معاه..
وعيون عبد القيوم معاهم..
محي الدين؛حمد لله ع سلامة بوك يامحمد..
ربيع حط يده ع كتف محمد وقال؛الحمد لله ع سلامته..
محمد هز راسه وقال؛الله يسلمكم..
عبد القيوم شبحله وقال؛حمد لله ع سلامته..
محمد شبحله وقال؛الله يسلمك..
عبد القيوم هز راسه ومشي طول...
في مشيته كان واضح شي غريب بالنسبه لربيع..
غضب..عصبيه...حالة مالهاش علاقة بالوضع اللي صاير..
🍃وهو مشي وين ماموجودين اهل سدرة..
رجليه رفعوه وين ماهما موجودين..
كان يبي يتأكد..لعند هاللحظه عقله رافض يصدق اللي شافوه عيونه..
☘وغادي..
وصلوا الجالي وعبد الرؤوف فيهم..
شافوا علي ولطفي..
الجالي قال لحسين؛شن صار!؟
حسين حرك راسه يمين ويسار..
بمعنى مازال مانعرفوا شي..
فهمه الجالي ومشي طول للجد علي وقاله؛ان شاء الله تنوض منها سالمه جدي علي..
هز راسه وقاله؛ان شاء الله..
الجالي شبح للطفي كيف حاضن طوبى مشالهم وقاله؛ربي يبشرك بسلامتها عمي لطفي..
لطفي هز راسه من غير يتكلم..
الجالي شبح لطوبى وقال؛طوبى..
وطوبى تشبح للفراغ وماردتش عليه..
عبد الرؤوف بحزن؛خليها براحتها..
الجالي قعد يشبح لطوبى بقلق..
كانت باينه عليه وكأنها في عالم تاني..
علي:وين كنتوا؟
الجالي شبحله وقال؛عند خوي المهدي..
لطفي استغرب..
وعلي قال بآستغراب؛خيره المهدي!؟
عبد الرؤوف وغرفه شبحوا لبعض..
واميمه وفردوس شافوا لبعض..
اما حسين..
زاد ضايق وتباعد عنهم شويه ..
الجالي:المهدي قلبه تعب جابوه هني..وداروله عملية قسطرة تانيه..
لطفي عيونه عن الجالي وقعد يطبطب ع طوبى..
اما علي قال ؛حمد لله ع سلامته..
الجالي:الله يسلمك..
ع جية قصي من بعيد ومعاه اياد..
اميمه شافتهم وقفت وهي تقول؛اهم جو..!
ناضوا المقعمزين...والباقي قدمولهم ..
والقلق مسيطر عليهم..
وفي قلوب دقاته تسارعت من الخوف..
زي طوبى اللي حاطت ايديها ع فمها وهي تترقب بخوف شديد شن بيقولوا..
لطفي بنبرة مرتعشه؛شني يااياد..!
اياد كانت ملامح وجهه ماتتفسرش..
بس قصي قال؛حني درنا اللي علينا ووقفنا النزيف..وحاليا حتقعد تحت المراقبه24 ساعه..حنعرفوا كل شي بعد ماتعدي 24ساعه..
علي بخوف؛كيف يادكتور..فهمنا كيف مانفهموا شن وضع البنت!؟.
قصي:ياعمي وضعها يتحدد بعد 24ساعه..
غرفه بنبرة باكيه؛قصدك اختي مرات تموت.!
هالكلمه اللي قالتها غرفه كان وقعها قوي ع قلوبهم..
بس كان قوي جدا ع قلب طوبى..
لدرجة انها التفتت لأختها وقال بغضب غير معهود عليها؛سكري فمك..ياقولي كلمة باهيه يااسكتي..
كلهم انصدموا في ردة فعلها..
واولهم الجالي..
قصي وهو يحرك في ايديه من فوق للوطاوهو يقول:هدوء ياجماعه اهدوا..اني مقدر اللي انتم فيه..نبيكم تكونوا مؤمنين اكثر من هكي وتدعولها..وبإذن الله تعدي هالمرحله ع خير..قول حاجه دكتور اياد..
اياد وهو يحاول يكون قوي وثابت: زي ماقال الدكتور..بإذن الله حتعدي هالمرحله بدعواتكم..
حسين؛من الاخير نطلعوها برا؟
قصي:ياخوي برا مش حيديرولها اكثر من اللي حني درناه..وع العموم في 24 مفروض ماتتحركش من هني بكل خلوا عندكم ثقة فينا واسألوا الدكتورة اميمه علينا..
تنحنحت اميمه وقالت؛دكتور قصي من اهم دكاترة جراحة المخ والاعصاب في البلاد وخش ع هلبه حالات صعبه ونجح في علاجها..
قصي بإبتسامه؛وبإذن الله حتعدي الاخت سدرة مرحلة الخطر بعد 24ساعه..
كلهم قالوا:ان شاء الله..
ماعدا طوبى اللي قلبها ماكانش مرتاح نهائي..
قصي:عن إذنكم..
ومشي..
واياد طبطت ع كتف لطفي وقال؛ادعولها..هي بأمس الحاجه للدعاء..
ومشي من حداهم ولحق قصي..
اياد:علاش تعطي فيهم امل؟
قصي:ماعطيتهمش امل هديتهم بس..
اياد؛خليتني حتى اني نتأمل..
قصي:خليك متأمل لعل وعسى تصير معجزة..
وقف اياد وقصي كمل طريقه..
كان حاس بروحه غارق في حزن شديد يبي يطلع منه ولو شويه..
مشي طول لمكتبه..
وهو مشي..
وعبد القيوم وصل للممر اللي هما فيه وخشله..
وكان قلبه يدق بقوة من الخوف..
خوف اللي بيشوفه توا..
🍃وهي..بعد مامشوا الدكاترة انهارت بالبكي..
جاها الجالي وضمها وقعد يطبطب عليها..
اما بوها ماقدرش يوقف ع رجليه قعمز وهو يدعي؛يارب لطفك بيها وبينا يارب..
وبوه جاه..حط يده ع راسه وقعد يمسح ع شعره بدون مايتكلم..
تنهد عبد الرؤوف وقال:لاحول ولاقوة الا بالله..وهو يشوف لغرفه كيف تبكي بصمت..
حسين وهو يفور ويغلي من داخل من منظر الجالي وطوبى تباعد عنهم..
واميمه ركزت عليه وقعدت تبع فيه بعيونها..
🍃في اللحظه اللي وصل فيها التارقي..
عيونه جو عليهم طول..
وكأنهم هاه ريت اللي شفته ماكانش تهيؤات...
كان واقع انت تبي تهرب منه...
في لحظتها..
الممر فضي..وماقعد فيه حد..
غير هو..والجالي وطوبى في حضنه..
وهو يطبطب عليها ويبوس في راسها..
وهي شاده في ذراعه بقوة وحاطه جبهتها ع صدره وتبكي بحرقه..
وجع..وجع قاسي...
ألم..ألم مش طبيعي..
قلبه كان يتوجع وجع قاسي ويتألم ألم مش طبيعي..
ومع هدا قاعد واقف يشبح فيهم وخلاص..
وكأنه قاعد مكذب عيونه...
وعيونه يبوا يقنعوه ان اللي يشوف فيه واقع...
"تارقي"
رجع كل شي زي ماكان..
تعبا الممر بالناس اللي فيه..
وهو استاقظ..
وشبح للي ناداه..وياريته مااستاقظ..
حسين بإستغراب؛كنت عند المهدي؟
قعد يشبحله وهو يفكر..
او يتفكر...
اللي قدامه توا يعشقها حتى هو..
ولد عمها اللي هو نفسه يوم من الايام تحسر ان ماخداهاش..
تفكر كيف يحكيله عنها..
لما كان يحكيله..كان متعاطف معاه هلبه..
بس توا حس روحه كارهه..كارهه هلبه ومش طايق يشوفه..
حسين بإستغراب اكبر:تارقي خيرك!؟
عقد حواجبه وشبحله من فوق لتحت بعدين قال؛شن صار فيها؟
تنهد حسين وقال؛قالوا وقفوا النزيف وحطوها تحت المراقبه 24ساعه بعد 24ساعة يبان كل شي..
غير عيونه عنه وشبح للجالي وهو يكلم في طوبى وحاط يده ع ذراعها قال:الطيحه جتها ع راسها..مرات تخش غيبوبه..
هو يتكلم ومش عارف روحه شن قاعد يقول كلام يطلع منه وخلاص..
حسين صدمه الكلام قعد يفكر فيه وهو يقول؛غيبوبه..
عبد القيوم قال في نفسه وهو يشوفلهم..
"ياريتني مكانها"
حسين ركز عليه انه يشبح لنقطه معينه..
شبح وين مايشبح..
شاف عبد الرؤوف واقف لطفي وهو يكلم فيه..
كان مدرق ع طوبى والجالي بعد ماقعمزوا الزوز..
شبحله وقال؛عبد القيوم..
شافله وقاله؛ربي يرفع عنها...السلام عليكم..
ولف ومشي طول..
وحسين يشوفله وهو مستغرب في حالته..
ماكأناش التارقي اللي يعرفه..
🍃وهو وقتها..
كان اشبه ببركان حممه مكموده...
يمشي وهو شاد ع قبضة يده اليسار بقوة..
في داخله تعصف مشاعر..كلها موجعه..
كلها تجمعت ع صدره..وقعدت ع قلبه وكتمت انفاسه..
طلع من المصحه وهو مخنوق...
ع خشة يوسف وهو يجري مالاحظاش لما طلع..
كان مفجوع ومذعور..
مشي يجري جري للمكان اللي هما فيه..
وصل فيهم شاف حسين جاه بسرعه وهو يقول بصدمه:شن صار فيها!؟
حسين تنهد بألم وقال:ادعي ربي يلطف بيها..
قعد يشبحله وهو مصدوم ودموعه عبوا عيونه..
بعدين غير عيونه وشبح للعيله...
ودمعه من عينه اليسار طاحت..
☘☘☘☘☘
"الحمد لله ياربي اهو طمنتوا عليه"
مغليه بألم؛ياناري عليه وليدي صغير عالمرض وتمرميده..
نجمه:قضاء الله وقدره يامغليه..
مغليه وهي دور بعيونها ع بناتها شافت نسرين خاشه للصاله ضيف في الناس شبحتلها وقالت:شن صار في صاحبتك يابنتي..
كل الموجودين ركزوا بالنظر ع مغليه..
ومنهم عتيقه ام عائشه ونجاة وصابرين.
نسرين بضيق:والله مانعرف يام..
وحده من الجارات قالت:كنت عندهم توا قالوا عمليتها نجحت لكن بتقعد تحت الملاحظة 24 ساعه لين تعدي مرحلة الخطر..
عائشه ونسرين بان في عيونهم الألم ع حال صاحبتهم..
ومغليه قالت:ياربي خليها تعديها ياربي بش يسلم وليدي..
وهادي مغليه لما الامر يتعلق بسلامة صغارها معاش تهتم لحد..
تقعد تتكلم وتتصرف بدون ماتحسب حساب لأي شي..
حطت عائشه في اصعب موقف ممكن تنحطه أي مراة في الدنيا..
النظرات اللي حاصرت عائشه خلتها تنوض من مكانها وتنسحب بهدوء والعيون تراقب فيها..
تنهدت خديجه وهي تشوف لأمها..
اما نسرين ضايقها الموقف اللي انحطت فيه صاحبتها..
ورجعت تفرق ع الناس بس تشتت انتباههم..
وعتيقه اللي كانت مقهورة ع بنتها مابتش تنوض وتلحقها بس ماتزيدش الطين بله..
🍃ومن جهة تانيه..
صابرين؛مش عارفه كيف تتحمل في هدا كله كاني منها قداش ليا مسيبتهالهم..
نجاة؛ماتستغربيش تشبحي فيا قدامك قداش نعاني وقداش كامده ومتحمله والله اللي اني نشوف فيه عيشه مارت ربعه.
وتعبوا عيونها بالدموع..
واختها قعدت تشبحلها بحزن..
🍃عواطف:مابعدها عيشه..الفجي فيها مسكينه..
نجاح بحزن:حظها ونصيبها..الله غالب..
عواطف:لامش حظ ولانصيب هادي جناية المهدي عليها اصلا اللي صاير فيه هدا كله ذنب هالمسكينه..
نجاح وهي تمرر في نظرها ع الموجودات؛باهي اسكتي فكينا..
وعواطف سكتت وكبدها دم ع الرجاله كلهم مش غير المهدي..
☘وفي جنان الكوجينه..
كانت عائشه مقعمزة...ضامه ايديها لبعض وهي تشوفلهم..
وتبكي بدون صوت وهي تردد..
انما اشكوا بثي وحزني إلى الله..
صبر جميل والله المستعان...
☘والله المستعان☘
🍃🍃🍃🍃🍃🍃
حطت يدها ع مكان معين في بطنها لما حست بألم بسيط..
شكت في حاجه خلتها تقول..
طوبى وهي تشوف للجالي:روح بيا لحوش بوي .
الجالي:حتى اني نقول هكي خير..
علي:كلهم يروحوا..عبد الرؤوف روح بمرتك..فردوس روحي مع وحده فيهم..حسين روح بأختك..
فردوس وهي تشوف لبوها بقلق:بوي تنوض تروح معانا..
حرك راسه بالرفض..
وطوبى تشبحله بقلق..
علي:خليه بوك قعاده هني اريحله..
عبد الرؤوف:اني بنحط غرفه في الحوش ومولي..هيا نوضي..
ناضت غرفه ومشت لبوها..
طبست باست ع راسه..
وعبد الرؤوف يشوفلها بتعاطف..
بعدين جاته وقالت؛هيا..
شد يدها وقال؛السلام عليكم..ومشي هو وياها..
الجالي: هيا طوبى..
ناضت طوبى وقالت لفردوس:هيا فردوس..
ناضت فردوس ومشت لبوها وباست ع راسها..
بعدين بعدت عنه وهي تشوفله بحزن وقلق..
جاته طوبى وباست ع راسه وهي تقول؛ادعيلها بابا وسلم الامر لله..
شبحلها وقال؛ردي بالك ع روحك..
الجالي؛في عيوني ياعمي ماتخافش عليها..هيا طوبى..
طوبى شبحت لبوها شويه..بعدين مشت وسيباته بالسيف..
ترافقوا هي وفردوس والجالي وراهم..
فاتوا من قدام حسين اللي قال لأميمه:هيا..والضيق باين في وجهه..
اميمه لجدها؛جدي لازم تروح الليله..
علي:مادورنيش روحي انتي وارتاحي..
حسين؛هيا اميمه هيا..
تنهدت بضيق ومشت مع خوها..
وعلي مشي قعمز حدا ولده..حط يده ع يده ولده وقعد يطبطب عليها..
لطفي بنبرة ألم...
"خلتني بروحي"
علي؛واني وين مشيت..
لطفي بنبرة مخنوقه:سدرة يابوي هادي سدره..
علي:ادعي ربك يرفع عنها ويشفيها ويردهالنا كلنا..
لطفي بألم؛يارب..يارب...
🍃🍃🍃🍃🍃
"مش معروف مانقدر نقولك شي يايوسف"
يوسف ودموعه في عيونه:واضح وضعها خطير..لازم تطلع برا ماتقعدش هني..
اياد بضيق شديد:يايوسف والله ماحتستفيد حاجه انت هكي ضرها اكثر..هما 24ساعه بعد يعدوا ليكم حرية التصرف ديروا اللي تشوفوه مناسب.
يوسف؛وكان ماتت ؟
اياد بنفاد بصبر:خيركم تبوها تموت انتم!..علاش تجيبوا في سيرة الموت..حولوه الموت من روسكم حولوه ماتحطوش في الاحتمالات بكل..
يوسف:باهي شن اسوأ شي ممكن يصيرلها؟
تنهد وغمض عيونه بشده..بعدين فتحهم وقال..ممكن خشت غيبوبه..
يوسف بصدمه؛كيف!
اياد بشي من العصبيه؛اني قلت ممكن..ممكن..رد بالك طلع الكلام هدا لحد رد بالك..مازال مش اكيد بعد 24 ساعه يوضح كل شي..
قعد يوسف مصدوم وهو يفكر في كلامه ..
اياد؛خلاص اني طالع مروح..زي ماقتلك يايوسف رد بالك طلع الكلام اللي سمعته مني لحد..
رد بالك..
ومشي وخلاه وهو يلحق فيه بعيونه الغارقات بالدموع..
☘☘☘☘☘
وفي حوش عمه..
بعد ماروحوا البنات لقوا ناس قاعدين..
حكولهم بالتفصيله اللي عرفوه عن حالة اختهم..
ماعدا طوبى لأول ماخشت..
مشت للدار..
سكرتها عليها..ومشت لدولاب سدره فتحاته..
فاحت عليها ريحة الياسمين..
دموعها نزلوا...
مررت نظرها عليهم بالحاجه..لعند ماثبتوا عيونها ع توته لونها فوشيا سدرة تحبها هلبه بس ماتلبسش فيها الا مرات معدودة..
خدتها..
وبعدين مشت فتحت رف دولابها هي طلعت منه بعض الحاجات..
ومشت طلعت من الدار للحمام...
قبل لتطلع...الناس روحت..
وماقعدش في الحوش..
غير خواتها وصغار اختها وعمتها ومرت عمها وبنت عمها اللي لحقت بعدين..
🍃شويه وطلعت من الحمام وهي تفكر في حاجه بإستغراب..
مشت بطريقها للدار..
بس ماخشتش لما سمعت صوت نقاش جاي من الصاله..
🍃فردوس:امتى جاك وعلاش ماقلتيش؟
اريج ببكي؛ماعرفتش نتصرف يام..ياريتني فوته ومادورتاش ياريتني...
مطيره؛البلي كله نزل علينا من ورا راسه هالمصيبه امه وقتلها وبيلحق سدرة..
غرفه؛معليشي عمتي اني نبي نفهم شن دار بش تقولوا هكي شن الجريمه اللي دارها لما طلب يشوف اخته..
فردوس؛ومازال دافعي عليه..مازال تدوي انتي..اصلا نص البلي اللي فيه سدره من تحت راسك..من الكلام اللي زي السم اللي حطتيه يومها ومن مقاطعتك ليها ع خاطر واحد زي مختار..
غرفه؛زي العاده كل شي بتحطوه في راسي اني!..وبعدين زي ماسدرة اختي مختار خوي..
مطيره؛وانتي تقارني مختار بسدرة!..تحطيهم في كفة وحده وتقولي زيه زيها..!!؟تي اني يابنت انتي كبدي عليك دم شن روح بيك هني نبي نفهم..
غرفه بحده؛هدا حوش اولا..تانيا..اني مانبي ندير الفرق بين خوتي زي ماانتوا درتوا وقاعدين ديروا مختار زيه زي سدرة ويخي هو خونا الكبير ويجي بعد بوي..
"مختار!"
كلهم شبحوا لمدخل الصاله..
منهم اللي انصدم..ومنهم اللي زاد ضايق..وفي اللي خاف..
طوبى وهي تحاول تستوعب:مختار..قصدكم روح هو؟!..
مافيش وحده ردت عليها..
قعدوا مركزين ع التوته االي لابستها والفوطه اللي لافه بيها شعرها..
هي مررت نظرها عليهم بعدين ركزت ع غرفه وقالت؛قصدك هدا علاش قاطعتي سدرة انتي!؟
غرفه:هي اللي قاطعتني بعد ماشفته..
فردوس بحده؛ماتكذبيش..انتي اللي قاطعتيها...
غرفه بإنفعال؛مانكذبش اني هي اللي ماكانتش تبينا نواصلوه..
آلاء؛لا مش هكي بكل خالتي معليشي قالت اللي يبي يتواصل معاه حر..
غرفه؛ماتتكلميش ع حاجه ماتعرفيهاش ماخلت ماقالت يومها وامك شاهده..
مطيره؛شن قالت..هاه قولي شن قالت..وقولي انتي شن قلتي..اني ماكنتش حاضرة بس كلامك وصلني كلامك يومها ياما دار فيها حرم عليها النوم من قهرتها مسحتي اللي داراته كله ع خاطر واحد زي مختار مالقوا فيه خير لاأمه ولابوه..
ناضت غرفه وقالت؛اني الظالمه اللي روحت هني اصلا..
طوبى؛خليك مكانك..
شبحتلها وكلهم قعدوا يشبحوا لطوبى..
طوبى:شن قلتي لسدرة؟!
غرفه بإنزعاج؛ترا فوتيني انتي تانيه..
ومشت بتطلع شدها من ذراعها بقوة وقالت:شن قلتي لسدره!؟
غرفه وجعها ذراعها بس نظرات طوبى ونبرتها خوفوها..
طوبى:انتي امتى تولي بشر قوليلي امتى تولي بنادمه عندك احساس تفكري في غيرك وماتفكريش في نفسك!؟
جبدت ذراعها وقالت:طبعا اني الحيوانه اللي مانحسش والاخت الجاحده الانانيه وانتي الباهيه اللي مافيش منك..اسمعي..اني ماغلطت في حد ولاقلت غلط ولا درت حرام ولاعيب..خوي هدا خوي..الخو اللي قعدتي عمرك كله تراجي فيه وهو من بعد روح قعد يدور غير فيك يبي يشوفك ويعرفك وياريتك غير تستاهلي..
اميمه قعدت تشوف لغرفه بإزدراء..
واريج تشوفلها بنفس النظرة..
طوبى؛انتي اللي ماتستاهليش كل شي داراته ع خاطرك سدرة وقعدت دير فيه لاخر لحظه لما كلمتني وطلبت مني نردكم لبعض يوم فضاينتها ما تبيش ديرها من غيرك..
كلهم تأثروا وغرفه نزلوا دموعها..
طوبى:مش عارفه كيف جاك قلب وقاطعتيها ووجعتيها وحدفتيها وراك وكأنها ماتعنيلك شي..
سدرة عمرها ماكانتلنا اخت اني وياك..سدرة كانت امي وامك..
والام ماتتقارنش مع حد..وانتي قارنتيها بواحد مايعرف عنك شي..لايعرف قداش مرة مرضتي..قداش مرة احتجتي..
قداش مرة بكيتي..وقداش مرة ضحكتي..
مايعرفش كيف كبرتي...كيف قريتي وكيف نجحتي ..
مايعرفش امتى تزعلي وامتى ترضي..
وعمره ماسيب الدنيا كلها ع خاطرك ولحقك في مدرسه لما تصيرلك مشكله ولافي مستشفى لما تمرضي..
اني متأكده ان كل شي حكيت عنه مرة قدام عيونه..
وتوا قوليلي..مني سدرة وشن يكون مختار هدا اللي فضلتيه عليها!!؟
كلهم ابكاهم كلامها اللي خش قلوبهم ووجعها..
بس الكبر وآه من داء الكبر..
داء مايتعالج بالساهل..
ردت بكبر ووقاحه:لو هي عطاته فرصه كنتي شفتي منه اكثر من اللي هي داراته..
هني غرفه وصلت لأقصى مراحل الغضب اللي عمرها في حياتها ماوصلتها..
شدتها من ذراعها بقوة وقالت بغضب شديد؛امشي اطلعي اقلبي وجهك اطلعي..
غرفه؛حوش بوي هدا ماتلزنيش منه..
قعدت دف فيها وهي تقول:وبوي مايبيكش فيه ..بوي اللي مايبيش سدرة مايبيشي..امشي اطلعي اقلبي وجهك..
ناضولهم..
اميمه واريج شدوا طوبى عنها.
وفردوس دفتها وقعدت تقول:مش تبي تروحي بري انتلفي روحي..
غرفه وهي تبكي قالت بغضب:طالعه طالعه..بس بعدين تو نشوفوا من اللي يطلع من هني ومن اللي يخش ويقعد..
الجملة اللي قالتها كان معناها واضح..
وصادم..
لدرجة ان الكل ماصدقوش وذانهم لما سمعوه..
اما طوبى..
معاش تحملت غرفه اكثر من هكي..
في لحظة كرهتها كره العمى..
فكت الفوطة من على شعرها وبعدت اميمه واريج عنها ومشتلها وقعدت تضرب فيها بيها وهي تقول:حقيره..يه.وديه..منحطه..اطلعي..اطلعي يايهو..ديه..
وطلعت غرفه اللي كانت تتلقى في ضربها...وسكرت وراها الباب وقعدت تعيط وهي تبكي وتقول..
هادي مش اخت هادي..هادي عدوة..
واللي معاها في الحوش بكاهم الموقف اللي صار..
كان اول مرة يصير زيه في عيلتهم..
🍃وغرفه برا..
نزلت الخمار ع وجهها وقعدت تبكي..
مشت طلعت من الحوش وتوجهت لحوشها وهي تبكي بندم ع الكلام اللي قالاته ومش عارفه كيف طلع منها..
خشت لحوشها..
ومشت طول ركبت لشقتها بدون ماتحس عليها نبيله اللي كانت في دارها تصلي..
🍃وفي حوش المهدي..
تحديدا الشقه اللي قاعد فيها التارقي..
في الدار...المقابله لدار الجالي.
كان مقعمز ع الأرض..
وحاط راسه بين ايديه..
زي اللي نزلت عليه مصيبه هداته هد..
وهو اللي صارله مش اقل من هكي..
قام راسه وشبح للفيرندا..
وتفكر الورد اللي كان مزروع في فيراندا دار االجالي..
ناض من مكانه..
ومشي لليد اللي تفتح في السيرانتي وتسكر.
قعد يلوي فيها لين رفع السيرانتي فوق..
بعدين جي للباب وفتحه..
وشبح لفيراندتها..
مالقي شي..
بعد موتهم..حولت محابس الغرس وماخلت شي..
وهو واقف يشوف للسياج..
قعد يتخيل فيها واقفه تزرع فيهم وتسقي فيهم..
وتتأمل فيهم..
وقعد يتخيل في حالتها بعد موتهم كيف كانت...
في لحظه..
قطع تخيله وتفكيره فيها حديق دار بينه وبين ولد عمها..
تفكر لما قاله..
مادام طلعت متزوجه انساها ومعاش تفكر فيها لأنها ع ذمة راجل تاني..
يعني هو توا مايحقلاش يفكر فيها حتى التفكير..
وفي لحظه تانيه.
قرر..
قرار لابد انه ياخده..
سكر باب الفيرندا..
ومشي طول طلع من الدار..
خدي شناطيه اللي كانوا محطوطات حدا الباب..
وفتح الباب وطلع من الشقه بعدين سكره وراه.
ونزل يجري بالشناطي..
وكأنه هارب..
لاهو هارب فعلا..
وصل لوطا حط شناطيه في السيارة..
بعدين مشي بيركب..
شبح لحوش لطفي.. وصدره كان ضايق لين حس روحه انه مش قادر يتنفس..
غير عيونه وركب السيارة..
وشغلها وتحرك طول وطلع من شارع القهوة...
( يقولون انوِ أن تنسى هواها
وهل يَنسى ابن آدم حين ينوي!)
#خلتني_بروحي
#طوبى
....يتبع...
