#طوبى "جنة طوبى"
#جمان_فريد
#الجزء_الستون"فلاش باك6"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
في دارها الزوز متكيات ع السرير..
وحواليهم الصغار مفرشين وراقدين..
وفي منهم راقد في الدار التانيه..
كلهم رقدوا...
الا هما الزوز كان شاغلهم حد ويحكوا عنه..
صابرين؛كله بالسرقه والكذب..
مروة بضيق؛باهي لعند امتى بتقعد هكي اهي حملت منه شن مازال يراجي مايقولش لماليه!؟ياخوفي غدوة ينكر ان خداها بكل لو سمعوا ماليه من هني ولامن هني..
صابرين:يديرها ويدير اكبر وياما قلته هالكلام لأختك لكن هي معميه فيه ومصدقه كذبة انه يحبها ومايقدرش يعيش من غيرها..
مروة؛باهي بالك حق يحبها ياصابرين..
صابرين؛ضحكي يامورا...والله مايحبها ولاتهمه في حاجه المهمه عنده مرته بس..
مروة؛حتى نجاة مرته..
صابرين:عشيقة بعقد..هدا حال اختك مع الجالي لما تفوته مرته يجي لاختك يجري ولما تبدا مهتمه بيه ينسى اختك بكل وكأنه مايعرفهاش والله غدوة لو انفضح تشوفي شن يدير بش مايخسرهاش..
مروة بقهر؛علاش درتي في روحك هكي يانجاه ياوخيتي..مش عارفه كيف حبت واحد زي هدا بعد طاهر والله مايجي في ظفره..
صابرين تنهدت وقالت؛نجاة عمرها ماحبت طاهر..كان عاجبها حبه ليها واهتمامه بيها بس..
مروة؛وهدا اللي مش دايرلها قيمه ميته فيه..
صابرين؛مقيوله..القط مايحب كان خانقه..
☘ فعلا...وانتي ادرى ياصابرين!☘
مروة:هو يحسابها سايبه ماوراها حد لو حارت وبارت ندخلوا خوتي..
صابرين بشي من الانفعال والخوف؛من خوتك!؟ ولاد سكينه مالا..تي والله يذبحوها ويشربوا من دمها..
مروة سكتت وهي مضايقه ع الآخر..
وخلت صابرين ترجف من الخوف...
☘☘☘
واختهم في هالوقت..
في سيارة اجرة واقفه في احدى شوارع انطاليا..
وراجلها نازل لسوبر ماركت يجيب منه حاجه..
استغلت الفرصه وخشت ع حساب الجالي..
لقت طوبى باعته رسايل..
هالمرة ردت عليها..
(وصلت تاعب ارتحت بعدين بديت نخدم معاش دوريني الايام هادي مشغول هلبه ومش لاهي نرد ع التليفون)
بعتتها وشافت من مرش السيارة للسوبر ماركت..
شويه وسمعت نغمة الرساله..
شافت للتليفون لقت طوبى باعته..
(باهي ربي يعاونك ويفتح عليك..غير بنقولك غدوة ماشيه لحوش عمي نتغدا عندهم..تصبح ع خير)
نجاة بسخريه؛ياباهيه انتي ياللي مافيش منك..
ردت عليها بعلامه اعجبني "لايك"
وراجت شويه وهي تشوف من المرش..
معاش بعتت طوبى شي..
هي طول حدفت المحادثه..
وطلعت منه الماسنجر..
انفتح باب السيارة وركب الجالي..
وهي قالت بإبتسامة ارتباك؛حصلت؟
هو قال: ايه...بعدين كلم السواق بش يتحرك.
وتحرك طول متوجه بيهم للفندق اللي قاعدين فيه..
🍃وطوبى في هالوقت..
سكرت النت..
وحطت تليفونها ع المخده وناضت بتطلع من الدار..
طلعت منها ومشت خشت للكوجينه..
كانت جيعانه وتبي دير حاجه تاكلها..
فتحت التلاجه وطلعت منها اجبان وحليب..
وحطتهم الطاوله..
بعدين خدت طاسه وخبزة وقعمزت..
صبت الحليب وبدت تاكل..
كلت بشهيه مفتوحه والجوع كان مسيطر عليها..
بعد مااكتفت..
لما الحوسه..وطلعت بتلوح حاجات في سطل القمامه..
وهي طالعه..
مررت نظرها حواليها..
ثبتوا عيونها..عليه..
بوها..اللي كان مقعمز ع كرسي حدا الفاسكينه..
وباين ع وجهه الهم...سرحان..ويخمم..
عيونها تعبوا دموع..
كانت متمنيه لو تقدر دير زي سدرة تمسح دموعه وحزنه وتنسيه همومه وتقويه..
لكن ماتقدرش..ماتقدرش تكون سدرة في كل شي صعب هلبه..
كل اللي تقدر عليه حاليا انها تجنب بوها وجع زياده ع اوجاعه...
غيرت عيونها عنه وبهدوء لوحت الحاجات في سطل القمامه..
بعدين مشت خشت ودموعها ع خدها قعدت مقعمزة في الكوجينه تراجيه يخش...
وقعدت تراجي لين سمعت صوت باب المربوعه تسكر..
ناضت من مكانها وطلعت شافت للمكان اللي كان فيه لقاته فاضي..تنهدت بألم..بعدين مشت خشت داخل..
🍃وفي حوش جارهم التارقي...
كانت بنت عمته مقعمزة تتفرج ع بدالي اللي خيطتهم لعروسة ولد خالها..
تشوفلهم بحزن وقلبها موجوع عليه..وموجوع اضعاف مضاعفه على طوبى بعد عرفت كل شي عنها..
اما امها..برغم شفقتها ع طوبى..
كان خوفها ع ولد خوها اكبر..خافت عليه ينزل ع روحه مصيبه مايقدرش يطلع منها في جرت حبه لأم العيون الحايره..
🍃وهو ياويل قلبه وعذابه..
من اللي عرفه الليله....
قعد يخمم ويتخيل في مصيرها بعد مازادت انربطت في الجالي اكثر...
جي بين عيونه مشهد تسميم نجاة للقطوسه وفكر فالسبب اللي دفعها لإرتكاب هالجريمه..
وقعد يفكر شن ممكن دير وحده زي هادي في طوبى!
انقبض قلبه وقتها وحس ان اللي حتشوفه طوبى القدام حيكون صعب لدرجة هو مايقدرش يتخيلها...
☘وفي زحمة هالليله الطويله..
صار شي مع أميمه ماكانتش متوقعاته..
وهي متكيه في سريرها تقرا في سورة البقره من التليفون..
جتها رساله واتساب..
اجلت فتحها لبعد ماتكمل قرايه..
ولما كملت..
فتحتها..كانت رساله صوتيه من رقم دولي..
استغربت..وترددت تفتحها..
لين وصلتها وحده تانيه بعدها..
الفضول خلاها تفتحهم...
وين فتحت اول رساله..
جاها صوت مترنح ومش طبيعي..
صاحبه يقول...
"اميمه..حبيبتي..ياعمري..تعبان...اني تعبان من غيرك بنموت علاش خلتيني"
هي حست روحها سامعه الصوت من قبل..
عقدت حواجبها بخوف وناضت قعمزت..
فتحت التسجيل التاني وحطت التليفون ع وذنها..
ويجيها نفس الصوت يغني..
"انا مش قادر انسى غيابك..وانسى احلى غرام
انا بيعز علي بعادك..مهما طالوا الأيام...
دمعاتي بتشهد ع غيابك..وعيوني مابتنام..
انا من دونك عمري دايب وغيابك..والله حرام"
وانتهي التسجيل بالعبرة اللي خنقاته..
هي قعدت حاطه التليفون ع وذنها..
من لما سمعت الأغنيه عرفت من يكون اللي يغني..
دموعها نزلوا..وقعدت تبكي..
حطت يدها ع فمها بش مايطلعش صوتها..
بس من داخل كان قلبها يبكي دموعه دم ويوجع فيها هلبه..
نزلت التليفون ودارت للرقم حظر وهي تبكي..
🍃وهو في هديكا البلاد البعيده..
كان راكب دروج العمارة اللي ساكن فيها وهو يغني في نفس الاغنيه..
ماكانش في وعيه ايه..كان شارب...
وليه فتره..من لما طلقها وهرب برا البلاد من وجع فراقها اللي لقاه ملازمه..
ضعفه خلاه يلجأ للخمر بش ينسى..لكن اللي صار العكس تماما..
وصل في باب شقته..
طلع المفتاح وبصعوبه فتح بيه الشقه وخش...
وداخل..
دنيا كانت زي اي زوجه هيأت نفسها لزوجها ودارتله اجواء حلوة في الشقه..
بش تتقرب منه اكثر وتخليه يتقبلها ويرضى تكون زوجه ليه...
وماكانتش هادي المحاولة الأولى..
كل المحاولات اللي قبلها بائت بالفشل..
بس في هالليله...ولأول مرة يروحلها وهو مش بوعيه..
بعد ماقعد اسبوع كامل فايت المشروب رجعله في هالليله..
هي وين طلعت تستقبله..شافت حالته انصدمت وماصدقتش عيونها..
عمر..سكران!!؟
هو لما شافها وهو في هديكا الحاله...
عيونه تخيلوها حبيبة قلبه...اميمه...
قعد يشوفلها بنظرات خلوا دنيا تخاف..
طول لفت ومشت وهي تقول بصوت منخفض وخوف..
حي عليا هدا سكران!؟
هو لحقها وقعد يقول؛وين ماشيه!؟..ماتمشيش وتخليني حبيبتي..
هي لما سمعت كلامه زادت خافت..
خشت الدار وجت بتسكر الباب..
هو دفه بقوة وقال؛علاش تهربي ياقلبي..ياعمري استاحشتك موت..
وجاها شدها من يدها جبدتها وهي تقول بخوف؛حول خليني..حول..
هو رجع شدها وقال ودموعه ينزلوا؛ميمو حبيبتي..عارفك تحبيني ماتقدريش تخليني..
دنيا دموعها نزلوا وهي تحاول تهرب منه؛حول خليني حول..حول..
حط يده ع فمها وهو يقول ودموعه زي السيل:اصص حبيبتي اصص معاش تقولي خليني..
وهي بدت تبكي بصوت مكتوم..
ومن داخل قعدت تصرخ صرخه مكتومه..صرخه وجع وقهرة وحسرة..صرخة وجع يصعب وصفه...
☘مسكينه يادنيا انتي واللي زيك..تطلعي من تجربة زواج فاشله بقلب مكسور وخيبة امل..وتخوضي غيرها ظنا منك انها حتجبر قلبك وتكون العوض الجميل ليك وماتطلعش الا جناية تانيه كملت ع ماقعد منك...
جنايه الجاني متاعها مايفكر في شي تاني غير مصالحه وارضاء غروره وبس ☘
وياه ياعيلة شنيبه ذنب قداش وليه رفعتوا في رقبتكم!!
كله كوم..
وذنب المسكينه طوبى كوم بروحه..
🍃🍃🍃🍃
طالع راجلها لفيرندا الجناح اللي قاعد فيه..
كان يشوف تليفونه..
خاش ع الماسنجر..يدور ع رساله منها..
اتفاجئ..وانقهر..
لما مالقي منها شي..وفوق هكي حسابها كان نشط منذ ساعه.
وضرتها كانت واقفه وراه تشوف في حالته..
وطول بدت في بخ سمها لعقله..
قربت منه وقالت؛كنت تكلم في عمتي؟
هو التفت وقال؛لا..قوليلي انتي سكرتي الواي فاي في تليفوني؟
هي بإستغراب مصطنع؛لالا وعلاش بنسكره؟
رجع شاف لتليفونه وقال وهو متسائل:معقوله اني سكرته وناسي!. لاإله الا الله.
نجاة؛عادي حبيبي تصير بالغلط..رفعت حاجبها وقالت..لقيت لعبتك متصله بيك؟
ضايقه السؤال هلبه..نزل تليفونه وشبح للمنظر اللي قدامه وقال؛تؤ..
هي قالت؛جديات!.. ولاحتى بعتت رساله..
هو زاد ضايق وماباش يرد..
ابتسمت تهكما وقالت؛شورها ماصدقت..
التفت وشبحلها وهو عاقد حواجبه قال؛شن قصدك؟
هي قالت:ماقصدي شي بس نفكر في روحي كيف لما تروح لحوشك وانت معاي في نفس البلاد نتصل بيك في كل وقت..لو كنت مكانها هبلتك بالاتصالات بش نطمن عليك كل دقيقه..
غير وجهه عنها ورجع يشوف للمنظر وهو معصب..
هي تنهدت وقالت؛ماأبرد قلبها راجلها مسافر وهي ولا دوراته ولاعبراته ولاقالت نكلمه نشوفه شن داير بروحه شن صاير فيه..
التفتلها وقالت بعصبيه:خلاص سكري فمك واسكتي..
هي قالت بتحدي؛لامش ساكته..
شدت يده بقوة وقالت..نبيك تعرف من اللي تحبك حق اللي ماتتمنى شي من الدنيا غير انها تكمل عمرها معاك..اللي انت عندها بالدنيا ومافيها..جالي اني الوحيده اللي تحبك وراضيه بيك
بكل شي فيك وراضيه باللي يجيها منك...معاي ماتخاف شي تكون ع طبيعتك مافي شي مقيدك ماتقعدش تختار في الكلام اللي بتقوله ماتقعدش دس في حاجه وخايف تنكشف..اني رضيت تشاركني وحده تانيه فيك من حبي ليك وخوفي عليك..رضيت نقعد مرتك في الظلام ونصدق وعودك ليا لأني نحبك ونموت فيك وعندي فيك ثقه..واثقه انك تحبني وماتقدرش تفرط فيا..قولي طوبى هكي معاك؟
معاش عرف شن يرد..
هو من كلامها كله ماهماش الا جملة وحده بس.
"عندي ثقه فيك"
وقعد عقله تلقائيا يطلع من ذاكرته في صوتها وصورتها وهي تغني...
"عندي امل فيك..عندي ثقه فيك.."
رجع حس بهداكا الشعور الغريب الموجع..
نجاة ودموعها ينزلوا؛والله ماك لاقي مراة تحبك زيي والله...
وضماته وتمسكت بيه بقوة..
وتملك..
وهو حط يده ع ظهرها وقعد يطبطب عليها ويقول؛خشي داخل صقع..
هي قالت؛نخشوا مع بعض..
تنهد وقال؛حاضر...
بعدت عنه وقعدت تشوفله..
هو هرب بعيونه عنها وحاوط كتفها وقال؛هي خشي..
وخش بيها داخل..
وسكر باب الفيرندا...
☘☘☘☘☘
تاني يوم..
الجمعه...
23فبراير...سنة 2018..
الساعه 9:30صباحا..
في الجنان..
مقعمزين حوالين الطاوله الخشبيه..
لطفي ومطيره وفردوس وطوبى..
وهما يشربوا في قهوة مع طريفات حلويات..
ماعدا طوبى اللي كانت تشرب في طاسة حليب دافيه..
وكانوا يهدرزوا في موضوع شيق..
مطيره؛قعد الصيد بس ماخطبهاش..
ضحكوا..
لطفي بضحكه؛المهم اليوم افتحوا معاها الموضوع ع قولت الشراقه سكنلي المحجوب من صبح ربي وهو يتصل ويسأل..
ابتسمت طوبى وهي تشرب في الحليب..
فردوس بإبتسامه؛ان شاء الله يصير منهم..
مطيره؛لايصير يصير..
لطفي بإستغراب؛وعلاش متأكده هكي انتي!؟
هي شبحت لطوبى وفردوس..
والزوز هربوا بعيونهم عنها وهما شادين ضحكتهم..
رجعت شافت لخوها وقالت؛هكي حسيت..
هو شبحلها شويه بعدين قعد يشرب في القهوة..
ع جية الجد علي واميمه معاه وهي متعنقه ذراعه والزوز قالوا..
صباح الخير...
ناض لطفي ورد معاهم بنبرة بهجه..
صباح الخير..صباح الورد..
قدموا الزوز واميمه طلقت جدها ومشت قعمزت جنب طوبى..
وهو قعمز مكان لطفي وقال؛جيبوا قهوة تحركوا..
ناضت مطيره وقالت؛هي شويه بس..
ومشت خشت داخل..
علي اشر ع كرسي مطيره وقال:برا قعمز..
ضحك لطفي ومشي قعمز مكان مطيره..
والبنات يضحكوا..
ع طلعة مطيره بالفنجان جاته بيه وهي تقول؛تفضل بوي..
خداه وهو يقول؛يعطيك الصحه.. راهو عارفاتك نوضتني بش تقعمز لطفي حركاتك زمان..
فردوس؛غريبه انتي كنتي دلوعة جدي..
مطيره؛ومازلت..لكن بوك يداعك فيا..
ضحط لطفي وهو يحرك في راسه يمين ويسار..
ناضت طوبى بطاستها وقالت؛تعالي قعمزي عمتي..
مطيره بإبتسامه؛لاخليك بنتي اني نبصر ونضحك مع بوك..
طوبى بإبتسامه؛اني خاشه داخل اصلا بنوتي الفطور..
التفتت ع اميمه وقالت؛تعالي معاي..
ناضت اميمه وقالت؛هيا..
ومشت طوبى خشت واميمه وراها..
ومطيره مشت بتقعمز وهي تقول؛نبوا عجة ياطوبى..
جاها صوتها من الكوجينه وهي تقول..
"حاضر"
🍃في الكوجينه..
حطت طوبى الطاسه في اللاوندينو وقالت؛اميمه نبيك في موضوع..
اميمه؛حتى اني نبيك في موضوع قولي اللي عندك قبل..
تنهدت طوبى وقالت؛في مدرسه معانا ظروفها صعبه شويه وعرس اختها بعد شهر ولتوا ماقدرت دير شي اني قلتلها البتات عليا ونبيك تساعديني..
اميمه؛تمام..بس شن تبي ناخدولها بالزبط..
طوبى بضيق:الحق ماعنديش باش ناخدلها..بش بنعطيها حاجات جديده من بتاتي قاعدات سفار وبباكواتهم ماقربتهمش بكل..
اميمه؛فهمت عليك..حتى اني عندي حاجات جدد هلبه ومالقيتش وقت بس نتصرف فيهم..
طوبى:كويس..شن رايك نديرولها شناطي وتغليفه حلوة..
اميمه؛حلو هلبه...تمام..
طوبى؛وحتى عندي قفاطين ولبسات مازال مالبستهمش وماظنيش مازال يجوني شوفي كيف وليت..
اميمه بإبتسامه؛زدتي حلاوة بعد كلبزتي..
قرصت طوبى خدودها وهي تضحك بخجل بعدين قالت؛المهم بنعطيهولها..
اميمه؛قبلها لازم تعرفي مقاس البنت وطولها..
عقدت حواجبها وقالت؛راحت عليا..تو نسألها..وحاجه اخيره المزين..اني قلتلها نشوف فايزة تعطيها سعر خاص والحق مش عارفه كان توافق ولالا..
اميمه؛توافق طول وحتخليها هديه منها انتي تعرفي فايزة اكثر مني..
طوبى:ايه نعرفها..بس كل ياخد منها جهد ومواد والدنيا غاليه والمواد اللي تاخد فيهم من اغلى الماركات..
اميمه؛حني بعدين نكلموها ونشوفوا شن تقول..
تنهدت وقالت؛باهي..ان شاء الله مانتحشمش مع المراة..
اميمه؛لالا بإذن الله كل شي يمشي تمام..
طوبى؛يارب..ايه انتي قوليلي شن موضوعك..
بدي ع وجه اميمه الضيق وبدت تحكي لطوبى...
☘☘☘☘☘
فتح باب الدار..
لقاه قاعد راقد استغرب..
في العاده حتى يوم الجمعه ينوض بكري..
مشاله ووقف حداه في السرير وقعد ينوض فيه..
مهند..مهند..مهند...الساعه عشرة ولدي...
هو قال بصوت ناعس؛بالله خليني راقد ..
اياد بتعجب؛قولي الحمد لله ع السلامه ياسيدي روحت امس وخشيت دارك طول ولاعبرتني..
مهند تنهد وقال؛بوي بالله عليك اطلع وسكر الدار..
اياد حس ان ولده صايرة معاه حاجه مكدراته وهاربه منها بالنوم..
ماباش يضغط عليه برغم قلقه ومشي طلع من الدار وسكرها...
🍃وحالة كان حالة آلاء اللي مابتش تتحرك من فراشها..
كانت مصدعه ومش طايقه حد ولاتبي تكلم حد..
امها مااهتمتش لأمرها شايفه انها تستاهل شن مايصير فيها..
وكذلك اريج..
بس طوبى ماقدرتش تحمل عليها في قلبها هلبه..
رق لحالها وانوجع عليها...
☘☘☘☘
بعد الفطور...
كانوا باديات يضموا في الحوش..
وطوبى توتي في روحها بتمشي لحوش شيابينها..
قبل لتطلع قالت..
موليه بعد العصر بالله شدوهم لين نجي...
هما هزوا روسهم وفي من قاللها..باهي..
لفت ومشت بتطلع لحقت عليها بنت عمها وقالت..
اميمه؛ماشيه غادي؟
ردت عليها وهي تلبس في كندرتها وقالت بتهكم؛ماشيه نأدي في فروض الولاء والطاعه...
ومشت طلعت..
واميمه قعدت واقفه في الباب تشوفلها بقلق...
🍃طلعت طوبى من حوش بوها..
سكرت الباب وشافت للطريق..
جو عيونها ع عبد القيوم وعمه وراجل بنت عمته..
الزوز كانوا لابسين الزي التارقي ماعدا عبد القيوم..
غيرت عيونها عنهم وكملت طريقها وجي قدامها مشهد بعيد هلبه..
شافت فيه زوز كانوا لابسين نفس الزي..
تفكرت لما سألت سدره عنهم..
وتفكرت اجابتها..
ابتسمت بحزن..
🍃عبد الله؛ناديه خل نتعرفوا عليه..
عبد القيوم؛الراجل مسافر من فتره..
عبد الله؛اها..شبح لحوش شنيبه وقال..الحوش هذى لهله؟
عبد القيوم شبح جهة الحوش..
جو عيونه ع طوبى وهي واقفه ع الباب تفتح فيه..
غير طول عيونه عنها وقال؛ايه..
معمر راجل صفيه؛لاقوة الا بالله قصر هذى مش حوش..
عبد القيوم؛ناس ربك عاطيهم..
شبحله عبد الله وقال؛ان شاء الله عامر من جوا كيف ماهو عامر من برا..
شبح عبد القيوم لعمه وقال في نفسه..
"عمار من برا خراب من جوا ياعمي وهي أسيرة فيه"
🍃والاسيره ..
خشت لهالحوش غصب عنها..
بش تأدي واجبها اللي مولي ثقيل ع قلبها..
ولت طوبى مجبره تجامل وتبتسم بتصنع وتضحك بالكذب في وجوه معاش قادره تقبلها...
بس وهي خاشه..
استقبلها وجه لطيف وبريء بإبتسامه حلوة بالمره..
سدرة؛ابله طوبى!..
طوبى بإبتسامه من القلب؛سوسو ياقلبي..
جتها سدرة وطبست سلمت عليها طوبى بالخد..
طوبى:شن جو؟.
سدرة؛تمام..
وقفت ع حيلها وقالت؛كلهم فايقين؟
سدره؛ايه كلهم وفي الصاله مقعمزين جدو وحنينه وعمتو نسرين وعمو نضال..
هي هزت راسها وقالت؛تعالي نمشولهم..
مشوا بعض وطوبى قالت؛محمد ويزن شن جوهم..
سدرة؛تمام..يفطروا في الكوجينه..
ابتسمت طوبى بدون ماتعلق..
وصلت في الصاله مع سدره وخشوا الزوز مع بعض وهي تقول بإبتسامه مصطنعه؛صباح الخير..
كلهم ردوا عليها ردوا عليها ماعدا مغليه من فوق نفسها..
محمد شنيبه؛عاش من شافك ياطوبى..
هي ابتسمت بإحراج..
ومشت سلمت عليه وكبت ع راسه..
بعدين سلمت ع عزوزتها وكبت ع راسها وحست عليها حرجانه منها..
وبعدها سلمت ع نسرين ونضال وقعمزت وحداها سدره..
هدرزوا عليها عمها وحماتها...
وسلفها مرة مرة يشارك بكلمه..
ومغليه اللي كانت تراقب في راجلها بصمت دام لمده..
خرجت عن صمتها لما قالت؛من كان عندكم كله؟
طوبى:العيله بس..
مغليه؛غرفه جت؟.
طوبى:اكيد بتجي..
مغليه وهي تشوف لمحمد شنيبه؛وحماتها؟
وجه محمد شنيبه انخطف لونه..
ونسرين ونضال يشبحوله بطرف العين..
طوبى:ايه جت حتى هي..
شافت مغليه لطوبى وقالت؛سمعت قالوا انخطبت حق..
الشيباني بدي يتوتر..وبنته تشبحله..
طوبى بضحكه تعجب؛مسرع!
نسرين؛كيف مسرع؟
طوبى؛قصدي اليوم بس تكلموا في موضوعها ومازال ماصار شي رسمي..
استغربوا محمد ومغليه ونسرين..
مغليه:حق زي ماقالوا حد من الشارع؟.
راجلها حرك عيونه ليها..
طوبى:لالا..خالي..
شبحت مغليه لراجلهاوهي مستغربه هلبه..
ونسرين زادت استغربت وهي تقول:خالك المحجوب؟
طوبى:ايه..وان شاء الله خير..
نضال وهو يشبح لبوه قال في نفسه..
"لغيري شالتهن الاقسام..عزاز علي"
هو ناض وقال؛حدديلي البدله العربيه..
ومشي طلع من حداهم..
ومغليه وصغارها معاه بعيونهم...
ابتسمت مغليه بمكر وهي تقول؛ربي يكمل ع خير..
طوبى:ان شاء الله..
نضال ناض وهو يقول:آنستينا نسيبتي مرت خوي..
ضحكت طوبى و قالت:بوجودك..
نضال؛ماتبوا شي..
مغليه؛جيب المشروب نبوا نعدوا بيه بازين طوبى..
بلعت طوبى ريقها..
هو قال:حاضر..السلام عليكم..
ومشي طلع حتى هو..
مغليه؛استاحشنا تطييبك قداش لينا عليه وعليك..
طوبى بتهرب :خل نوض نطلع اللحم..
مغليه:اللحم ذايب في الثلاجه..بري قلبي المربوعه وضميها واكنسيها نسرين ماتقدرش عليها..
نسرين:سامحيني بيبو بس زي ماتشوفي حركتي بحسابها..
رسمت ع وجهها ابتسامه مصطنعه وقالت؛مش مشكله عادي..
ناضت وهي تقول؛خل نمشي نبدا فيها..
مغليه؛اغسلي ماعين فطور الولاد بعدين بريلها..
بلعتها طوبى وقالت؛حاضر..
بعدين لفت ومشت وهي تحاول تتمالك اعصابها وتتغاظى..
طلعت من حداهم وسدرة مشت لحقتها..
نسرين؛كترتيها عليها..
مغليه؛لاكثرتها لاسو..حوش شيابينها زي حوش ماليها بالزبط تحوس فيه زي ماتحوس وتجري غادي..
تنهدت نسرين بضيق وسكتت..
🍃خشت طوبى للكوجينه..
لقت ماعين فطور الولاد ع الطاوله..
بدت تلم فيهم..
سدرة:نساعدك ابله طوبى؟
ابتسمت وقالت؛ياريت بش نكملوا فيسع...
🍃وتساعدوا الزوز ع غسل الماعين وضمان الكوجينه..
وهما يهدرزوا ع القرايه..وعن تربيه القطط...
بعد كملوا..
مشوا الزوز للمربوعه..
قلبتها وسدرة تساعد فيها..
وكانت حريصه لاتحرك طاوله ولاترفع حاجه ثقيله...
كنستها
وسدره قعدت تمسح وتلمع وطوبى عاودت ورا شغلها..
ولما مشوا ولوا للكوجينه بش تبدا طيب الغدي..
هدا كله ونسرين قدام التلفزيون..
🍃سدرة:استاحشتها هلبه طولت المرة هادي..
طوبى:في الحج طولت اكثر..
سدرة بحزن؛ايه صح بس توا حسيتها طولت اكثر مش عارفه علاش..
شافتلها طوبى شويه بعدين قالت؛تو تروح بالسلامه قريب ان شاء الله..
سدرة؛يارب..
غيرت طوبى عيونها عنها وهي متأثرة بكلام سدرة لين دمعوا عيونها..
قعدت طيب وحداها سدرة ساكته..
غطت الطنجرة والتفتت ع سدرة وهي تقول:خيرك سكتي؟
لقتها حاطه راسها ع الطاوله ويدها ع بطنها..
بقلق قالت؛خيرك سدره حبيبتي تحسي في حاجه؟
سدرة رفعت راسها وقالت؛مغص ابله طوبى من امس يمشي ويجي..
طوبى؛من امس؟ قلتي لحناك ولاعمتك؟
سدرة؛ايه قلت لحنينه دارتلي نعناع..
طوبى ؛هفت عليك شويه؟
سدرة:شويه..
طوبى؛باهي بري ارقدي في الدار تو نديرلك بابونج..
سدره ناضت وهي تقول؛باهي..
ومشت طلعت من الكوجينه..
وطوبى معاها بعيونها وهي تشوفلها بحزن..بعدين قعدت دور كان في بابونج مالقتش..دارتلها كمون..
☘☘☘☘☘
مشوا الرجاله لصلاة الجمعه..
وغادي تلاقوا اهل التارقي مع محمد شنيبه وسلموا عليه ..
وهو كان موطي عينه ع عيت الواعر...
لطفي لاحظه لكن اتغاضى لأنه عارف السبب..
🍃كملوا الصلاة..
وروحوا عبد القيوم واهله مع لطفي وحسين وعلي وعبد الرؤوف لحوش الواعر..
اللي كانوا فيه عمته وبنت عمته..
جوهم اليوم كان عكس اليوم اللي قبله.
بالذات صفيه اللي كلامه كان قليل..
وهما استغربوا فيهم وحسوا ان في شي ...
🍃🍃🍃🍃
حطوا الغدي بازين..
وبدوا يتغدوا..
وغرفه والاء داروا ارواحهم مايبوش ياكلوا بازين صبولهم في صونيه بروحهم طبيخه..
وهما هدا اللي يبوه مايشاركوش مع سليمه وصفيه في صونيه وحده...
🍃وفي حوش شنيبه..
دارتلهم طوبى البازين..
وتغدت منه مغليه لين عرفاته بازين..
وبعد كملت:مش زي بازينك الاول..
نسرين؛بالعكس يام نفس البنه..
مغليه؛اني ماعجبنيش زي قبل..
وناضت وهي تقول؛ديري شاهي اخضر..
نسرين بضيق:حاضر..
طوبى؛عمتي..
شبحولها..
طوبى:بعد العصر بنولي لحوش ماليا بش نسلم ع الناس..
مغليه؛مش قلتي بيروحوا الاحد؟.
طوبى:ايه مروحين الاحد لكن اليوم بيمشوا للخمس وبيباتوا غادي ويروحوا منها طول..
مغليه؛باهي لكن ولي ماشبعناش منك..
ومشت طلعت من حداهم..
طوبى غيرت عيونها لنسرين وقالت بضيق؛عمتي حرجانه مني؟
ابتسمت نسرين وقالت؛من حبها ليك حرجت لما معاش جيتيها ولانشدتي عليها هي ديما تشكر فيك وتقول مادرتش كنه خير منها..
طوبى بضيق قالت؛عندها حق قصرت الايام اللي فاتوا بس مش بقصد مني يانسرين وانتي عارفه الوضع..
نسرين؛مش مشكله حبيبتي اهو جيتي وتغديتي والليله ان شاء الله تباتي هني باهي؟
طوبى هزت راسها وقالت؛ان شاء الله..
نسرين؛ماتحطيش في بالك حبيبتي..
وناضت نسرين رفعت السفره ومشت بيها للكوجينه..
وطوبى مشت تشوف سدره لقتها قاعده راقده مابتش تنوضها خلتها ترقد براحه..
وولت للكوجينه بس تغسل الماعين...
🍃🍃🍃🍃🍃
الساعه 5:00عصرا...
في حوش لطفي الواعر...
كانت مطيره دايره عالة الشاهي والكل حداها يهدرزوا..
ومعاهم فايزة اللي جت هي وبناويتها..
فايزة:عندي مركز في ****** بعيد شويه ع الشارع..
صفيه؛عندك صفحه ع الفيس؟
فايزة؛ع الفيس والانستا اسمها فايزة الخويلدي بالانجليزي..
صفيه؛تمام تو نشوفها..
ابتسمت فايزة وغيرت عيونها لفم الصاله شافت اميمه واقفه تأشرلها..
ناضت ومشتلها..وعيون غرفه عليهم...
☘فايزة؛خيرك؟
خدتها اميمه من يدها وقالت؛نبيك في موضوع..
ورفعتها للكوجينه..
🍃وخشت طوبى للحوش..
وهي تسمع في اصوات الهدرزة.
خشت عليهم الصاله وهي مبتسمه ببهجه؛السلام عليكم..صفصف..
هما ردوا السلام...
سليمه لما شافتها ضايقت بس اخفت الضيق بإبتسامه..
لكن صفيه اللي ناضتلها وهي تضحك
كانت تحبس في دموعها بقوة
جتها طوبى سلمت عليها بالخد وقالت؛شن جو
صفيه؛تمام..شن جوك انتي؟
طوبى؛مليح..جبتي اللي قتلك عليه
صفيه بإبتسامه؛اها جبتها
طوبى بفرح؛حلو
بعدين مشت سلمت ع سليمه ونبيله وبنات فايزة وولت قعمزت جنب صفيه..
مطيره:شن حالهم عيالك؟
طوبى:الحمد لله يسلموا عليكم..
مطيره؛سلمهم وسلم من جاب سلامهم..
وسليمه تشبح لطوبى بضيق..
طوبى:وينها اللبسه..
خدت صفيه الكيسة اللي في جنبها متاع هدايا وهي تقول؛هذي هيا..
وطلعتها منها وهي تقول؛مخيطات من قماش غالي واجد اسمه البازان او القزنر الطرف هذى ينحط ع الراس واسمه ألشو...
كلهم كانوا مركزين معاها..
وهي قالت:مازال هذين...
وقعدت طلع بالحاجه..
السلسال.. تاكضا
الأساور.. الكزن
الخواتم.. تيصندارت
الاخراص..تيظبوتين
فردوس:شن هدا؟
صفيه بإبتسامه؛لبس العروس عندنا جا في خاطر طوبى وين شافاته في الصور امس..شبحتلها وقالت..البسيه توا خل نشوفوه عليك..
شبحت طوبى للموجودات لقتهم يشوفولها بنظرات تشجيع ابتسمت وقالت:باهي..
ردتهم صفيه للكيسه ومدتها لطوبى..
وطوبى خدتها وناضت وهي تقول؛مش مطوله..
ومشت طلعت من حداهم..
صفيه شافت لأمها..
لقتها تشبحلها..الزوز تبادلوا نظرات الضيق سريعا..
بعدين رجعوا لهوا مع الباقي..
🍃وفي الكوجينه..
فايزة؛هديه مني والله ماواخده قرش جبر خواطر هدا...
اميمه بإبتسامه؛توقعتها منك..عالعموم تو بعدين تجي طوبى وتزيدي تفهمي منها..
فايزة:تمام خل نمشوا للصاله..
اميمه؛بري لاحقاتك..
فايزة مشت طلعت..
واميمه كملت تجهيز سفرة الحلوات وطلعت بيها للصاله..
🍃وفي الصاله..
كانت غرفه مقعمزة ع اعصابها تبي تنوض وتراجي في نبيله اءمتى تقول هيا..
لكن نبيله كانت منسجمه في الهدرزة ومش في بالها مرواح..
وآلاء معاهم جثه لكن العقل في مكان غير المكان..
تنهدت بحزن بعدين قامت عيونها وشافت لمدخل الصاله..
بدت ع وجهها ملامح ابتسامه الاعجاب وقالت؛الله يبارك!..
لما سمعوها شن قالت..
ابصارهم توجهت لفم الصاله..
وين ماكانت تشبح آلاء..
وتخش ام العيون الحايره..
وع وجهها ابتسامه خجل زادتها جمال وجاذبيه وهي لابسه
الزي التارقي اللي كان طاغي عليه اللون الابيض..
اتقان وابداع صفيه في الخياطه امتزج بجاذبيه وقوة طلة طوبى اللي كانت ولازالت ميزتها رغم كل اللي تمر بيه..
سحرت عيونهم كلهم..عجبتهم كلهم دون استثناء..
بس سليمه وصفيه فوق اعجابهم بيها كانوا منذهلات في طلتها بالزي متاعهم..
واطراف شعرها الطويل اللي مغطي بعض منه ألشو..نازلات ع كتافها ومنسابات وواصلات للخصر..
سليمه وهي تتأمل فيها..
قعدت تفكر في ولد خوها...
لومها وعتبها عليه امتسحوا..وحل محلهم شعور الشفقه ع حاله وهي تقول في نفسها..
"يصبر الله قلبك ياولد خويا "
اما صفيه وهي تشوف لطوبى..
ماقدرتش تشد دموعها نزلوا منها غصب عنها ومسحتهم وهي مبتسمه..
الدمعه نزلت ع خاطره وخاطرها..بس ع خاطرها هي اكثر شي بعد عرفت كل شي عنها..
ودعت في نفسها وهي تقول..
"هالوردة ياربي حرام يصير فيها هكي نجيها ياربي وخلي المستحيل واقع يارب"
طوبى بتساؤل خجول:هاه شن رايكم؟
اميمه؛الله يبارك تجنني..
مطيره؛القالب غالب ياعيوني..
فردوس بآبتسامه؛طلعت عليك طلعه مش عاديه..
نبيله:طوبى ماشاء الله عليها شن ماتلبس يطلع عليها يابال لبسه حلوة زي هادي..
فايزة بإبتسامه اعجاب:فوق الروعه...
طوبى بضحكه خجوله:تسلموا يارب..
اريج؛اصبري نصورك..
وقعدت تصور فيها بتليفونها..
طوبى:وانتم خالتي سليمه صفيه شن رايكم..
سليمه؛ماعندي مانقول فيك كان الله يحفظك ويحميك..
هي بإبتسامه ردت؛تسلمي يارب ويحفظك..
صفيه بإبتسامه ودموعها في عيونها؛زي ماقالوا القالب غالب ياطوبى ربي يحفظك ومايوريك مكروه..وراهي اللبسه بحاجاتها هديه مني لكي..
طوبى بضحكه فرح:تسلمي ياربي فرحتيني هلبه..
صفيه؛ان شاء الله دوم فرحانه..
هي بإبتسامه؛خل نمشي ندسها ونجي..
ومشت طلعت بسرعه..
كانت زي الطفله الصغيره الفرحانه بلبس العيد..
وهي في الحاله..قطعت قلوب سليمه وصفيه...
☘مصعبها ع الواحد لما يعرف انسان كويس ويحبه وبعدين يعرف انه مستغفل وعايش في كذبه كبيره ومش قادره يوقظه ولايلمحله حتى التلميح..يقعد وين مايشوفه يوجعه قلبه عليه وجع مكتوم مش قادر يبينه☘
ووسط هدا كله..
غرفه تحركت داخلها مشاعر الغيره من طوبى اللي مهما قعدت خامده تجيها لحظات تتحرك وتهيج..
عيونهة لحقوها وهي خاشه بعد مابدلت اللبسه..
ومشت قعمزت جنب صفيه وقعدوا يهدرزوا..
وهي معاهم بالحركه والسكنه والكلمه..
اريج؛راجلي بالتارقي كيف؟
صفيه؛اهالسين
اريج:باهي حبيبي..
صفيه بضحكه؛ترهانين..
اريج؛اهالسين ترهانين..باهي نحبك؟
صفيه بضحكه:ارهيقم..قوليله ارهيقي هولان..
طوبى:ارهيقي هولان.
اريج؛شن معناها هولان..
"هلبه"
شبحوا لغرفه..
غرفه وهي مبتسمه بعقده حواجب:هلبه صح؟ شافت لنبيله وقالت..بلبله..
شبحتلها نبيله..
غرفه؛كلمة هولان اللي يقولوا فيها البنات التارقيات اللي جبتيهم يضموا الحوش معناها هلبه صح..؟
كلهم انصدموا في اللي قالاته..
وانحرجوا ع الاخر..
اميمه وفايزة قعدوا يشوفوا لوجوه الضيوف اللي تغير لونها..
اما الباقي كانوا يشبحوا لغرفه بحده..
ماعدا آلاء اللي تفاجئت..
غرفه؛صح نبيله معناها هلبه؟
صفيه ابتسمت بإعتزاز وقالت؛ايه معناها واجد..هلبه..
شبحتلها غرفه وقالت؛كويس طلعت نعرف كليمه..
طوبى كورت قبضة يدها اليمين وشدت عليها بقوة من الغضب اللي حاولت تكبته..
هني سليمه خلاص شافت انهم مرواحهم احسن شي يصير توا..
ناضت وهي تقول؛هي مالا حني بنعدوا..
مطيره؛وين مازال بكري..!
سليمه؛لاخلاص هداك هو بعد المغرب بنعدوا للخمس لازم نروحوا تو نوتوا ارواحنا..بالله عبايتنا..
ناضت اريج وهي مضايقه وقالت:شويه بس..
ومشت طلعت تجيب العبايات..
ناضت صفيه وهي تقول:بارك الله فيكم شقيناكم معانا...
🍃وطلعوا الضيوف والزعل باين في وجوههم..
طلعوا وهما محصلين اهانه ماقدروش يردوا عليها ..
والعيبه هني تلحق المضيف مش الضيف..
بعد ماسقدوهم مطيره وصفيه وطوبى...
ولوا خشوا داخل..
صفيه بغضب:قلة ادب غرفه ماني عارفه منين جايبتها
مطيره؛ياريت نبيله ماكانت معاها..
وصلوا الصاله وخشوا..
اما طوبى مشت خشت الدار وسكرت عليها لانها مش ضامنه روحها تقدر تكبت غضبها...
🍃وهما في الصاله
قعدوا ساكتين ماقدروش يديروا ردة فعل قدام نبيله..
ونبيله فهمت عليهم..
شافت لغرفه وهي تقول بكل برود:شن بديرولنا عشانا..
كلهم قعدوا يشبحولها بغضب..
ونبيله ناضت وقفت وهي تقول:نتعشوا في الحوش..
غرفه لاحظت ملامح وجه نبيله تبان معصبه..
خافت..خوفها ماكانش منها كان من عبد الرؤوف..
ناضت وقفت وهي تقول؛تمام..خل نمشي نجيبلك بالطوك ووشاحك..
نبيله؛تو نطلع ناخدهم بروحي..هي تصبحوا ع خير ياعيله..
كلهم ردوا عليها بأصوات منقطعه؛قدامك كل خير..
مشت غرفه طلعت وهي متوتره من غير ماتسلم ونبيله وراها..
مشوا للشماعه خدوا منها حوايجهم..
والصمت سائد..
مشت نبيله طلعت..وهي لحقتها وكان القلق مسيطر عليها...
طلعوا من الحوش بكل..
وبرا في الشارع..
كان المحجوب واقف ع لطفي يهدرز ع موضوعه..
لما سمع الباب انفتح شبحله طول..
شافها وهي ماشيه تقص الطريق..
وتبان معصبه..حافظ ملامحها وطريقة مشيتها لما تعصب..
خطر في باله وقتها انهم فتحوا معاها الموضوع وهي رفضاته..
لطفي:شن في محجوب غير عيونك ياراجل خوها في للقهوة!
المحجوب شبحله وقال؛برا اسألهم واعرفلي شن صار...
لطفي؛نصلوا المغرب قبل هيا..ومشي...
تنهد المحجوب بنفاد صبر ومشي معاه...
☘ونبيله وغرفه وصلوا للحوش..
وقعدوا ساكتين لين خشوا داخل..
🍃حولت وشاحها بعصبيه والتفتت عليها وهي تقول؛ماتقولليش انتي شن تحسي؟
غرفه قعدت تشبحلها وهي مصدومه..
ونبيله تابعت تقول؛طول اللسان والتكبر ع خلق ربي مش حاجه باهيه راهو ولاديرلك برستيج بالعكس هادي وقاحه وقلة ادب..
غرفه بآنفعال؛علاش ع خاطر شني!؟ في شن غلطت اني !؟ كذبت ماكذبتش الخدامات اللي جبتيهم يومها تارقيات ولالا..
نبيله:وجبت وحده قبلهم عربيه..تعرفي من وين ترهونيه..
واللي جبتها يومها غسلت البساطات جارتنا في سوق الجمعه طرابلسيه..
قعدت غرفه تشبحلها بنظرات منفعله وماقدرتش ترد عليها..
نبيله:اني نبي نعرف انتي من تحسابي روحك شن وليتي بش تشوفي روحك خير من غيرك..راك ولاحاجه ولاحاجه لووصلتي للقمر وانتي بأخلاقك هادي ماتسوي شي..
دمعوا عيون غرفه..
ونبيله مكمله تقول:مشيت وتغاضيت وقعدت نخلقلك في الاعذار ولقيت روحي نغلط في غلط كبير لما نساير فيك ونعطي فيك مبررات مفروض كنت صريحه معاك من الاول..
🍃ويخش عبد الرؤوف للحوش وهو يسمع صوت نبيله عالي..
"لو استمريتي هكي مش حيقعد معاك حد "
هو خش عليهم وقال؛خيركم شن في !؟؟
انفجعوا الزوز وقعدوا يشبحوله..
هو بملامح كلها غضب؛خيرك نبيله شن قالتلك هادي شن دارتلك قولي؟.
وقعد يفنص في غرفه..
نبيله حطت شعرها ورا وذانها وحاولت تهدي نفسها وهي تقول؛حاجه بيني وبينها مادخلكش انت..
شبح لنبيله وقال؛نبيله قولي..
هي بنرفزة؛قتلك حاجه بيني وبينها..افف..
ولفت ومشت لدارها...
هو رجع شاف لغرفه..
هي هربت منه وكانت تمسح في دموعها ومشت خشت لدارها وسكرت عليها الباب..
هو بعد ماتبعها بعيونه هز راسه بعصبيه..بعدين مشي طلع من الحوش مرة تانيه متوجه للجامع..
☘☘☘☘☘
وفي حوش لطفي الواعر..
تحديدا في دار بناته..
فايزة؛انتي قوليلها تدفع العربون اللي هو 200 وخلي الباقي عليا..
طوبى:تسلمي فايزة ربي يكتب اجرك..
فايزة؛اجرنا كلنا..بس ع حكاية البتات لازم تاخد حاجه صيفيه..
طوبى عقدت حواجبها وقالت؛والله صح دماغي الفترة مش مزبوط..
اميمه؛من كثر الضغط النفسي والتعب يصير هكي بس نقولك شدي البقرة اقريها كل ماتفضي سبحان الله تحول ستريس ومع الوقت تحسي ذاكرتك نشطت وامورك مترتبه..
طوبى بضيق؛ليا فترة مسيبتها..
فايزة؛اني نقرا فيها ونسيب وتوا الحمد لله مواظبه عليها والله امور هلبه تعدلت في خدمتي..بالذات بعد سيبت تنقاية الحواجب والتوصيل وتركيب الرموش..
طوبى بآبتسامه؛كويس بكل..بس بنقولك حاجه ع تركيب الرموش من مده شفت فتوى تقول ان تركيب الرموش من الزينه زي الزمالطوا بالزبط مافيش باس لو لبستهم المراة في اوقات معينه خارج اوقات الصلاة تلبسهم العروسه ليله عرسها او يلتبسوا في المناسبات عادي المهم ماتطلعش بيهم للشارع وتقابل بيهم الرجاله..
فايزة بتساؤل:متأكده منها؟ قالوا في حكم الوصل..
طوبى:هديكا الدائمه لأنها تمنع وصل الميه وقت الوضوء تو نبعتلك الرابط متاع فيديو الفتوى..
فايزة؛تمام..
اميمه وهي مبتسمه؛اني عجبتني لما لغيتي حكاية المودل هادي وتصوير الزباين وقعدت تديري في دعاية لشغلك ع المجسمات..
فايزة بآبتسامه؛تعرفوا يابنات بعد درت التغييرات هادي تريحت ع الاخر نحس في نفسيتي منشرحه وضميري مرتاح الحق..
طوبى بإبتسامه؛ان شاء الله دوم..
فايزة؛آمين..اني بس عندي مشكله وحده مع صفاء..
طوبى واميمه بقلق:خيرها؟!
فايزة بقلق:موليه بكل مدمنه قرايه هلكت روحها وهي تقرا يومها نفسيتها تعبت ع خاطر جابك 14ونص ع 15في امتحان الفيزيا طوبى عقدت حواجبها وقالت بضحكه:مش عارفه بمني فكرتني..
اميمه ضربت طوبى ع ذراعها ضربه خفيفه وهي تضحك..
فايزة بضيق؛يابنات ندوي جد..ماتشبحوش فيها كيف ناقصه ووجهها اصفر...
اميمه بإبتسامه؛خليها عليا اني تو نهدرز عليها..
فايزة؛ايه بالله عليك اميمه تسمع منكم انتي وطوبى..
طوبى:اميمه تعرف تنصح اكثر مني..وناضت وهي تقول..هي خل نمشي لحوش عمي بنبات غادي..
اميمه؛راجلك مهناش شن بديري بايته غادي؟
فايزة؛وشن فيها كان باتت غادي خل تبات مش ديما في حوش اماليها..
اميمه:اماليها معروف ظرفهم مش بايته عندهم كساد..
فايزة:اهو يعزموا ويستقبلوا الضيوف وجوهم عادي..
اميمه رفعت حواجبها بتعجب في كلام فايزة..
فايزة؛هما هكي يقولوا يااميمه..
طوبى بضيق:كلام فايزة حق ياأميمه..واني الحق مانبيش مشاكل الحكايه مش ناقصه..
شبحتلها فايزة وقالت؛بري حبيبتي بري ديري واجبك..
طوبى ابتسمت مجامله وقالت؛تصبحوا ع خير..
اميمه وفايزة؛قدامك كل خير..
ومشت طلعت وهي مضايقه هلبه..
بعد طلعت..
فايزة قالت لأميمه؛معليشي اميمه الوضع مش متحمل تشوفي في حال عمي لطفي الراجل بيطيح ع وجهه..
اميمه بضيق:عندك حق..
فايزة تنهدت بعدين قالت؛هيا نوضي نطلعولهم وبالمرة شدي صفاء كلميها..
اميمه بإبتسامه؛باهي..
ومشوا الزوز طلعوا مع بعض للصاله..
خشولها سمعوا مطيره تقول..
معاش بنسايرها الفرخه هادي.خلاص..
فردوس بقلق:غير بالله عليك ماتخليش بوي يسمع والله يرقى عليه الضغط بعدين..
قعمزت فايزة وهي تقول:ايه عمتي عمي لطفي ماتخلوشي يسمع..
اريج؛لكن تبيها التهزيبه وحده فيكم لما تسمعها كلمتين في جنابها..
ضربت الاء اريج وهي تقول؛بلاتمحيش..
اريج ردتلها الضربه وقالت؛ماتخلنيش نفشي غلي فيك نراجيلك فيها..
صفيه؛خلاص انتي وياها..
الزوز قلبوا وجوههم عن بعض..
واميمه بعد ماكانت تشوفلهم غيرت عيونها عنهم وقالت؛صفاء..
شبحتلها..
اميمه بإبتسامه:تعالي شويه..
شافولها مروة وتاله..
وهي ناضت ومشت لاميمه خدتها من يدها ورفعتها لدار بنات عمها..
☘☘☘☘☘
"روحوا اليوم؟"
طوبى:ماشيين للخمس..
خديجه؛عندهم اقارب غادي؟
طوبى:لاماشيين يزردوا في حوازة صاحب ولدهم..
خديجه؛اممم..طوبى الجالي كلمك اليوم؟
شبحولها نسرين ومغليه..
هي اربكها السؤال ولقت روحها تكذب تلقائيا؛ع النت مع بعض مشغول هلبه قال..
مغليه:ربي يعاونه..
وخديجه رفعت حاجبها وهي تفكر..
طوبى غيرت الموضوع وقالت؛سدرة وين؟
نسرين؛راقده في الدار؟
طوبى وهي متفاجئة؛لتوا؟
نسرين؛بكري مشتيلها نوضتها بس تاكل قالتلي نبي نرقد..
طوبى بقلق:شكلها قاعده مريضه..
نسرين بتعاطف:البنيه مستاحشة امها بس..
خديجه تهكما؛وهي مسافره تسرح وتمرح ولاعليها في صغار ولاسحنتي..
طوبى ضايقها الكلام وقالت:خل نمشي نشوفها..
ناضت ومشت طول طلعت..
توجهت لدار المعيشه..
وصلت فيها وخشتلها..
لقت سدرة راقده في مكانها..
مشتلها..قعمزت جنبها وقعدت تنوض فيها وتمشي باطراف اصابعها ع خدها:سوسو..سدرة ..سدرة حبيبتي نوضي..
فاقت سدره وشافت لطوبى ابتسمت بنعس وقالت؛روحتي؟
ابتسمت طوبى وقالت؛ايه..علاش راقده لتوا سدرة قاعده مريضه؟
سدرة:مش هلبه..
طوبى؛باهي نوضي حبيبتي توضي وصلي خل ندير حاجه وناكلوها مع بعض بعد ماتصلي..
هي ناضت قعمزت وقالت:باهي..
طوبى بإبتسامه؛بتباتي معاي في الجناح اليوم..
بانت الفرحه ع وجه سدره الناعس..
وطوبى قالتلها:هيا صحصحي ونوضي للحمام..
سدرة؛باهي..
وحولت الغطا..وناضت..
وطوبى جت بتاخد البطانيه بش طبقها..
بس وقفت..جمدت عن الحركه وهي تشوف لفراش سدره بصدمه..
وبسرعه قالت؛سدرة راجي..
البنت التفتت جو عيونها ع الفراش خافت وانصدمت وهي تقول؛هدا شني!؟
وقفت طوبى وقالت وهي مصدومه؛مافي شي حبيبتي ماتخافيش..
وضمتها...
سدره من الخوف وبدت تبكي وهي تقول:دم هدا دم..
بعدتها طوبى وشدت وجهها وهي تقول:ماتخافيش ياعمري ماتخافيش..خليك شويه هني تو نجيك..
سدرة قعدت تشبحلها وهي تبكي..
طوبى باست راسها وكانت ترجف ومشت بسرعه طلعت من الدار وسكرت الباب ومشت للصاله وهي تقول بصدمه...
ياروحي مازال صغيره..!
وصلت في الصاله وقفت في بابها..
شافتهم يهدرزوا قالت:خديجه..
شبحولها..
طوبى:ترا شويه..
خديجه توترت واستغربت..وناضت طول ومشت طلعتلها..
وامها واختها معاها بعيونهم وهما مستغربات.
🍃طلعت خديجه لطوبى وهي تقول..
شن في..!؟
طوبى وع وجهها ملامح الضيق؛تعالي..
مشت وخديجه مشت معاها وهي تقول:قولي شن خوفتيني..
وصلوا في الدار وقفوا قدامها..
طوبى ودموعها في عيونها؛سدرة..شكلها جاها العذر..
حطت خديجه يدها ع صدرها وهي مصدومه وقالت:شن تقولي انتي!..
وفتحت الباب وطول خشتلها..
لقتها واقفه حدا الفراش وهي تبكي..
شافت بنت خوها اللي قاعدع ملامح وجهها ملامح طفله بريئة تبكي بخوف وذعر وهي مش عارفه شن صاير معاها..
مشتلها طول وهي تقول؛سدوره قلبي مافي شي ياماما ماتخافيش..
وصلت فيها وضمتها وشافت لفراشها نزلت دمعتها ومسحتها طول..
سدرة ببكي:شن هدا عمتي..
خديجه مسحت دموعها وبعدتها وهي تقول:تو نقولك حبيبتي..
طوبى:اني ماشيه ندورلها حوايج..
خديجه:تلقيهم في دارنا والحاجات الخاصه في الدولاب الفوقاني..
طوبى هزت راسها ومشت طلعت وسكرت الباب..
وتوجهت لدار حمواتها ودموعها تنزل وهي تمسح فيهم..
حست بسدرة توا محتاجه لوجود شخص واحد بس..
مافي حد يقدر يعبي مكانه...
عائشه...امها..
🍃🍃🍃🍃🍃
اللي كانت مقعمزه ع سريرها في الحجره اللي قاعده فيها..
تشوف لوجهها في المرايه وهي فرحانه..شافت اصح واجمل من قبل...
وهو خش عليها لما شافها مبتسمه ابتسم وقال:جونا حلو اليوم..
شبحتله وقالت؛وليت زي قبل ولا..
هو سكر الباب ومشالها قعمز مقابلها وقال؛لا..احلى من قبل..
ابتسمت بخجل..
قرص خدها وقال؛معاش تنزلي عيونك نبي نشوفهم فازوات العسل هادم..
شبحتله وضحكت بعدين قالت؛شن صار في اللي قتلك عليه؟
هو قال:قالولي استنى اسبوعين تانيه لين تاخد الجرعه الجايه بعدين سافر بيها..
عائشه بضيق؛نبيها قريب يامهدي بعيد هلبه بعد اسبوعين..
حضن يدها وقال:انتي مش قلتي شفتي رؤيه انك ماشتيلها معناها ربك كاتب تزوريها..
هي قالت؛حاسه روحي غادي حنشفى يامهدي..
المهدي بإبتسامه؛بإذن الله..المهم انتي خليك هكي متفائله واملك بربي كبير..
عائشه:هدا اللي خلاني وصلت هني اليوم..
هو قعد يشوفلها بإبتسامه تخفي وجع الدنيا كلها وهو يتفكر في كلام الدكتور..
《التحاليل تثبت ان العلاج لم ينفع لحالتها..وماهي عليه الآن هو محاوله مقاومه نفسيه لهدا المرض ولكنها للاسف لن تجدي نفعا..لاادري متى ولكنها سترحل قريبا جدا..انا اسف..اسف حقا》
🍃🍃🍃🍃🍃🍃🍃🍃🍃
في الكوجينه دير في القهوة وهي تقول..
مروة بقلق:شن فكرها بيهم توا؟..
صابرين وهي تفكر:مش عارفه..شبحتلها وقالت..المهم انتي خليك عاديه قدامها بش ماتشك في شي..
هزت مروة راسها وخدت سفرة القهوة وطلعت وصابرين وراها..
مشوا للصاله اللي فيها لطفيه ام الطاهر مقعمزه..
وفي حجرها معاذ..ومقعمزين ع يمينها ويسارها جوري وحمزة..
جتها مروة بالسفره وهي تقول؛تفضلي..
خدت الفنجان وقالت؛صحيتي..
ومشت مروة حطت السفره ع الطاوله وقعمزت..
وصابرين قعمزت حداها..
لطفيه برفعة حاجب؛وخيرك انتي مامشتيش معاها لاوراك ولاقدامك..
صابرين؛خالتي شدت فيها قالت نجاة تمشي معاي..
رفعت حواجبها ونزلتهم وهي مش مقتنعه..
مروة:هي نجاة بروحها ماشيه تعاين ع المسالك..
لطفيه؛قولوا هكي من الاول هدا كلام يخش العقل..
صابرين؛مافهمتش انتي لشن تبي توصلي من لما خشيتي وانتي تلقحي..
لطفيه:اني ندوي عادي انتي اللي منخوصه..
صابرين جت بترد عليها ..
سبقتها مروة وقالت؛مش قصدها خالتي لطفيه المهم عرفتي انها مسافره تعالج وكان هدا ماتفارقش صغارها..انتي شن حالك وحال صحتك..
لطفيه تنهدت وقالت؛الحمد لله..
☘وقعدت صابرين ساكته وهي تسحن من داخل..
ومروة تساير في لطفيه ومتحمله كلامها..
ولطفيه مهناك ماطولت..مع اذان العشي جاها ولد خوها وروح بيها...
🍃صابرين بغيظ؛ياريتك خلتيني عليها..
مروة بقلق؛هادي مش جايه تشوف الصغار في شي تاني جايه ع خاطره..
صابرين؛حتى اني حسيت هكي..
وقعدت تفكر لو ان في حد وصللها حاجه خلاها طب عليهم في وقت زي هدا بش تشوف بعيونها وتتأكد..
🍃🍃🍃🍃🍃
واللي قالوا عليها مسافرة تعالج..
قاعده تقضي في احلى الاوقات مع راجلها في انطاليا...
وفي سهره خاصه ليها هي وياه ع البحر...
كانوا يتبادلوا في كلمات الحب ويضحكوا ومرات تقعد تتأمل فيه للحظات..وهو يحاول ع قد مايقدر يكون معاها بعقله وقلبه وكل مافيه...
🍃🍃🍃🍃🍃
الساعه 12:00ليلا..
قدام دار بنات شنيبه..
نسرين وهي ترشف وتمسح في دموعها؛ياروحي حتى 9سنين مازالت ماسكرتهم..
طوبى؛صح مازال قاعده صغيره..لكن في النهايه طبيعي في بنات في سنها يبلغوا بسرعه..
تنهدت نسرين وقالت؛هي قاعده طفله والله مافهمت علينا اني وخديجه الا بعدماشرحنالها اكثر من مرة..
تنهدت طوبى بضيق وقعدت ساكته..
نسرين:مفروض عيشه تروح خلاص ساد ..
طوبى:كلميها واحكيلها اللي صار..
نسرين؛لانكلمها لاتكلمني فكيني من لسان المهدي..
طوبى:وشن دخل عمي مهدي..انتي بتحكيلها اللي صار مع بنتها..
نسرين:من الاخير ماخاطريش نكلمها من لما سافرت ولامرة اتصلت بيا ودورتني..
سكتت طوبى ومابتش تناقش..
نسرين؛كان ماهي بروحها حست صغارها اني بنخليها تحسهم..يللا تصبحي ع خير..
ومشت خشت الدار وسكرت الباب..
طوبى غمضت عيونها وهي تحاول تهدي نفسها وتسيطر ع اعصابها..
بعدين لفت ومشت ركبت للجناح..
🍃🍃🍃
خشت وسكراته عليها بالمفتاح..
بدلت حواجيها..بعدين توضت وصلت الوتر...
قرت وردها من القرآن..
بعدين مشت خشت لسريرها وفي يدها تليفونها..
خشت ع الماسنجر وجت بتكلم الجالي..
بس وين عاودت قرت رسالته..تراجعت...
طلعت من الماسنجر وخشت ع الفيس..
لقت طلب اضافه جديد..
كان من صفيه فرحت لما شافاته..وقبلتها طول...
ويطلعلها ستوري صفيه..
كان لصور من مزرعة الفرواله...عجبوها هلبه وتفاعلت معاهم..
بعدين جي في خاطرها تكتب منشور وتنزله ليها فتره طويله معاش نزلت شي ع صفحتها...
وكتبت اقتباس ونزلاته...
🍃"أنتَ أعلمُ بالأَرْوَاحِ وحِملها
فاللهمَّ : لا تُحمِّلنا ما لا طاقة لنا به" 🍃
وكان اول من قراه...
صفيه....
اللي تأثرت بيه هلبه..وعلقتلها..
ربي يفرح قلبك ويحفظك ياأم العيون الحايره..
لما شافاته طوبى ابتسمت من قلبها وتفاعلت عليه...
وبعدين طلعت من الفيس وخشت ع تطبيق القرآن..
وبدت تقرا في سورة البقره...
☘☘☘☘☘
تاني يوم...
الساعه 9:00صباحا..
في المستشفى..
كانت اميمه في الحجرة اللي تجمع دكاتره القسم..
تحديدا الاطباء الجدد في مجموعة الدكتور خالد..
خالد كان معاه طبيب مساعد اسمه وسام..
هدا وين جي وخش للحجره..
وشاف اميمه مقعمزة ولاهيه بتليفونها..
وقف في مكانه وقعد يشوفلها..
ابتسم وهو يتأمل في ملامحها وقال:صباح الخير..
رفع عيونها وشبحتله وقالت؛صباح الخير..
هو خشلها وقال؛جديده معانا انتي؟
اميمه؛ايه..جيت من مجموعة دكتور قصي..
هو حط تليفونه ع الطاوله واتكي عليها بيده وقال:زبطتك..شن اسمك؟
هي قالت؛اميمه الواعر..
ابتسم وقال:واني وسام الحاج مساعد الدكتور خالد..
اميمه بإبتسامه جاده؛اهلا..
هو قال؛قبل كل شي فطرتي؟
اميمه؛ايه..
هو بإبتسامه؛باهي تسايريني وتشربي معاي قهوة؟
هي قالت؛لاشربت قبل لنجي..
ضحك بعدين هز راسه وقال؛تمام ماشي نجيب لروحي وجاي..عن اذنك..
ومشي طلع..
وهي معاه بعيونه لين درق..
ارتسمت ع وجهها ابتسامة ازدراء بعدين قالت؛القروب باين من عنوانه يااميمه..
🍃ودقايق وولى وسام ومعاه القهوة متاعه..
وقعمز مع اميمه وبدي يشرحلها عن وضع القروب..
بس اكثر كلامه كان عن نفسه وهو شن دار وهو وين مشي ومنين جي..واميمه كانت تساير فيه بكل صبر...
لين خشت عليهم وحده من القروب...
اسمها امل وين شافتهم بدت ع وجهها ملامح الحده وهي تقول؛صباح الخير دكتور وسام..
هو التفت عليها وقال؛صباح النور..دكتورة امل نعرفك الدكتورة اميمه اللي جتنا من مجموعه الدكتور قصي..
اميمه ابتسمتلها..
وهي ردتها بالغصب وقال؛مش بعقلك انتي تسيبي الدكتور قصي وتجي للدكتور خالد..
اميمه بإبتسامه؛لااكيد بعقلي زيك بالزبط..
رفعت حاجبها..
ووسام قال بضحكه؛من هي اللي بعقلها امل..وقعد يضحك..
هي قالت؛مش وقته دكتور..
اميمه غيرت عيونها عنها وهي شاده ضحكتها..
🍃وبدي المكان يتعبا..
وبدت اميمه تخدم ووسام وزملائها حاولوا يساعدوها بس ماكانتش محتاجه بانت مجتهده وجاده اكثر منهم..
وزادت لفتت انتباه وسام وامل مركزه معاه...
وماان جت الساعه 12 خش عليهم الدكتور خالد..
فجأة الصمت ساد المكان..
ووجوه انخطف لونها..
هو قال؛ماتوقعتوش نجوا توا؟
وسام؛اني متوقعك في كل وقت..
هوقال؛لاعاد انت حافظني..بعدين شاف لأميمه..
وين شبحلها..اميمه حست برهبه عجيبه..
قدملها ووقف قدامها وقال:انتي الطبيبه الجديده..
هي اللي جاها جاها ارتبكت وقالت؛ايه..
هوقال؛علاش سيبتي مجموعه قصي.
هي من التوتر والارتباك بدت تتلعثم في الكلام؛ااه.ماهو دكتور..الدكتور..
هو قاطعها وقال؛خدمتي عمليات قبل؟
هي قالت؛ااه..شار..
قاطعها وقال:اااه..اييه.اوووه..ان شاء الله خدمتك مش زي طريقتك في الكلام بس..
ولف بظهره عنها وقال؛امل ووسام تعالوا معاي..
ومشي بيطلع وهما مشوا وراه..
وين جي طالع قال:انتي اللي تأتئي تعالي معاهم..
اميمه طول مشت لحقتهم وهي متوتره ع الاخر..
وقعدت تقول في نفسها..
"شن صارلك يااميمه قوي روحك ماتخليشي يربكك ولايوترك انتي شاطره وقدها"
وقالت بهمس..
لاحول ولاقوة الا بالله..
🍃خشوا ع حجره في حالات..
وبدوا يمروا عليهم بالحاله...
خالد؛اووو فوزيه صلي يامصلي ع الزين حويته وخميسه وقرين..
ضحكت المريضه..
وهما ابتسموا..
خالد؛شن جوك اليوم..
:الحمد لله دكتور..
هو قال:دوم حمدك..غدوة بإذن الله تطلعي تمام ويوم الاحد الجاي ان شاء الله تعاليلي في العيادات الخارجيه مراجعه تمام..
هي قالت؛ان شاء الله..
شبح لوسام وقال؛اليوم ينظفولها ع الجرح في نفس الوقت تمام..
هو قال؛تم..
وقعد يدور من مريض لمريض وهو يهدرز عليهم ويسأل عن حالاتهم ويجاوب فيهم بكل رحابة صدر ..
لعند ماوصلوا في مريضه تكلم عن حالتها وسأل سؤال كان موجه لوسام..
بس اميمه لأنها تبي تثبت نفسها لخالد جاوبت عليه..
شبحولها..
ووسام ابتسم وهو يشوفلها..
خالد رفع حاجبه وقال؛تمام...
وبدي يسأل فيها اسئله تانيه وهي تجاوب بسرعه واجابات نموذجيه..اجابات حد مطالع بتوسع مش مجرد اجابات عادي..
هو قال؛كويس كويس..
ومشي طلع..
وهما طلعوا وراه واميمه فرحانه ومتحمسه...
~~~~~~~
اميمه؛قداش يحبوا يبالغوا هو صح شديد ومش متاع هدرزة وضحك معانا بس الله يبارك عليه مش خسارة فيه المكانه اللي وصللها توا..
حسناء؛باهي المهم انسجمتي..
اميمه؛هلبه..
حسناء بضحكه؛باهي من هو هدا اللي ماباش يطلقك..
اميمه بإزدراء؛هدا واحد بارد وصامت فكيني منه مانبيش ندوي عليه وخلينا ندووا في موضوع اهم..
وقعمزوا ع مقعد ..
حسناء؛خير ان شاء الله موضوع شنو؟
اميمه بآبتسامه؛موضوع خطوبه..
وبدي قلب حسناء يدق بقوة ووجه يحمر...
وبدت اميمه تحكيلها...
☘☘☘☘☘
وبعيد عنهم في احد المطاعم في العاصمه..
كانت صابرين تتغدا مع مختار بصمت..
بس هو كسر هالصمت لما قال..
مختار؛اختك مسافره مع هداكا الوغد..
بلعت صابرين لقمتها بتوتر وهزت راسها بإيجاب..
مختار حط الكاشيك وقال؛اختك وحده معتوهه..
هي تسمع وتبلع في ريقها وبس..
وهو مكمل يقول:وحده زي هدا كيف تدفن روحها تحت رجلين واحد تافه زي هدا..دفنت معاها حتى امكانياتها وحده زي اختك لو استغلت دماغها وامكانايتها راهو اللي مستلمه ادارة الشركه مش هو..
صابرين؛شايف خدمة نجاه؟.
هز راسه بآيجاب..
صابرين؛ديما نقوللها انتي خير منه بالف مرة..
هو قال؛ نبيك تجمعيني بأختك عندي مشروع ونبي نعرض عليها تخدم معاي فيه..
ابتسمت بفرح وقالت؛فرصة عمرها..
هو قال؛ان شاء الله مايسيطرش عليها العته متاعه وضيعها من يدها..
هي قالت؛لالا اني نعرف نقنعها غير تروح بس..
هو قال؛امتى مروحه..
صابرين؛غدوة الظهر..
هو هز راسه وع وجهه ابتسامه خفيفه وقال؛تغدي ياحلوة..
ابتسمت صابرين وولت تتغدا..
وهو كذلك لكن عقله شغال يفكر ويخطط وماهداش ولاحيهدا لين يوصل للي يبيه...
#فلاش_باك
#طوبى
....يتبع....
