#طوبى "جنة طوبى"
#جمان_فريد
#الجزء_الرابع_والسبعين"تحول الاخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
¤رب اشرح لي صدري○ويسر لي أمري○واحلل عقدة من لساني¤
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لا أخفي حقيقة أن المقاومة مُرّة المذاق، لكن الاستسلام أمرّ ....
فالطريق عبر المقاومة به أشواك، ومع الاستسلام لا طريق ولا حياة.
لذا أُقاوم. 🌸🍃
_________________________________________
الساعه 3:30 بعد الظهر..
فتحت الباب وطلعت من الدار وهي تساوي فوشاحها..
فاتت من قدام الصاله شافوها امها وخالاتها...
نظرات خالتها طوبى ليها كانت نظرات بؤس..
اما امها من خوفها ناضت طول طلعت وراها..
🍃فردوس بقلق:اريج وين ماشيه؟
اريج وهي تلبس في حذائها؛للمركز..
فردوس:ضروري تمشي اليوم..
اريج؛ليها شهر اجازه يام مانقدرش نطولها اكثر من هكي نخسرها الخدمه بعدين..
فردوس:ارتاحي اليوم وغدوة امشي..
اريج؛زي اليوم زي غدوة يام مافيش فرق..
قرصت خد امها بعدين قالت؛نجيبلك معاي بسبوسه واني مروحه؟
هزت امها راسها بالموافقه..
اريج؛تمام..سلام ..ومشت طلعت..
وهي لحقتها تقول..
/في أمان الله بنتي..
وقفت في مكانها وهي تشوفلها كيف ركبت للسيارة وشغلتها وشويه وطلعت بيها من الحوش...
🍃داخل..
مطيره:خل تطلع تغير جوها وتنسى..
غرفه؛لكن الكبت يخوف ياعمتي..
طوبى:اريج قويه ياغرفه تتجاوز بسرعه..
غرفه؛حاجه زي ماتتعداش بسرعه ياطوبى.
طوبى:صح..بس اريج تكره الحاجه اللي تخليها ضعيفه تلقيها فيسع تعديها بش تستمر في حياتها..
ع خشة امها اللي سمعت اخر كلام طوبى وقالت..
/صح اريج هدا طبعها...وين تزعلها حاجه تشوفيها تبكي عليها لين تمرض تقولي هادي بتموت خلاص وبين يوم ليله ينقلب حالها وتولي زي ماكانت واقوى من قبل لين تقولي اللي صار فيها قبلها كذب..
مطيره؛تربيتي بنتك هادي تقول اني اللي جايبتها..
ابتسمت فردوس وقالت؛والله ديما نقول فيها لروحي فيها منك هلبه..
طوبى:حتى سدرة خدت هلبه من طبع عمتي..
مطيره؛جينات الواعر مالا شنو..
غرفه بإبتسامه؛استاحشت جدي هلبه..
مطيره:بعد يكمل السقادات غادي يروح ان شاء الله..
طوبى بإبتسامه خفيفه ع وجه قالت..
/يروح سالم غانم ان شاء الله..
كلهم بأصوات متقطعه قالوا..
/آمين..
بعدين قالت فردوس؛خالتي سالمين مخليه مكانها..
مطيره؛هلبه..
طوبى:جيت بنشد فيها لكن تحشمت..
غرفه؛قالت ع جيابي بتجي ان شاء الله..
طوبى:انتي قريب تكملي الثامن ولا؟
غرفه:اخر سته نخش التاسع..
مطيره؛ويجوا الفرافيط الزوز..
ابتسموا وهما يشوفوا لغرفه..
غرفه بإبتسامه؛حقه نسيت نقوللكم اتفقنا ع الاسماء واخيرا..
طوبى: ترا قوليهم؟
غرفه وهي تشوف لطوبى: خديت بخاطرك وبنسمي واحد منهم اواب زي مااقترحتي والتاني بوه اختارله ع نفس الوزن مهاب..
طوبى بإبتسامه؛يسلم خاطرك روفي..
ابتسمت غرفه لأختها..
مطيره:اواب ومهاب حلوين..
فردوس:يجوا صحيحين وانتي صحيحه يارب..
غرفه:آمين..
🍃وبرا من حوش لطفي الواعر...
لحوش الجيران المقابلين..محمد شنيبه..
اغلب نساوين الشارع كانوا ملتمات عند مغليه..
وماكانش في حد حاضر معاها..لابناويتها ولانجاة..
وطبعا محور حديثهم كان..
🍃:ياوخيتي رعشت مع بعضي يومها لما شفتها كيف نطت زي الغوله ولزتكم ولادارت اعتبار لعزي بوها ولادورت كبير ولاصغير..
مغليه بحسرة مصطنعه؛والله ماعارفه شن نقول والله ماعارفه..ريتوني كيف طلعت اني وبنتي طول ولابيت ناقشها ولانكلمها لأني محترمه المناسبه اللي خاشتها والحق عذرتها كانت مفجوعه ع بوها..
:المفجوعه دير هكي ياوخيتي! الدعي اللي دعاته رعشني!
تنهدت مغليه وقالت:لاحول ولاقوة الا بالله العلي العظيم وخلاص..تو شن بنقول بس..لاحول ولاقوة الابالله..والله لما خطبناها ماكنا نعرفوا عنها غير انها بنيه مؤدبه محترمه وبنت عيله كويسه عشرة عمر حني وياهم وراهو سوا هي سوا بنت عمها هادي كانت فكرتنا عنهم..لكن عاشرتنا وعاشرناها اللي ماطلعش قبل طلع بعدين
تبادلوا الجارات نظرات الريبه والاستغراب بعدين وحده فيهم قالت..
/وشن طلع ياوخيتي!؟
مغليه بضيق مصطنع:طلعت احرف من بنت عمها بوين...وطلع فيها اللي ماكناش نشوفوا فيه..طول اللسان..وقلة الاحترام..هامله راجلها..وهامله روحها
تصدقوا حتى شعرها مرات تقعد بالايام ماتخلص فيه..
انصدموا النساوين من اللي سمعوه..
ومازال مغليه مكمله؛وياناري وليدي يومتها قعد يشكيلي منها ويقولي يما مش مدورتني نخدم طول النهار نروح نلقى غداي نفاص وهي طيب وتاكل لروحها وماتحسبش فيه..
:معقوله!!؟
مغليه؛ايه ياوخيتي ايه...ويومك وتاليك في حوش بوها وتبات غادي باليومين بالتلاته تصدقوا تقعد في حوش ماليها بالقداش مادق عليا الباب ولاتقول نجي نشوف عمتي حية ولاميته..
:وكيف ولدك سكت ع وضع زي هدا!؟
مغليه؛ياناري عليه ولدي قلبه طيب لين مفسد قالي كنت عاذرها ع الظروف اللي يمروا بيها غيبوبة اختها وبعدين حبس راجل اختها التانيه..
:لاظروف لاعيني بنتي متابتعهم ع الفيس قالت ينزلوا في صور قهاويهم وعزايمهم وداروا حتى العراس..
مغليه؛ماهو قتلك ولدي قلبه طيب لين مفسد..راهو ساكت ع هم مايلتم خلوني ساكته تربحوا..
:لاحول ولاقوة الا بالله..ماكانش باين عليها بكل..
وحده تانيه قالت:وين ماكانش باين عليها نسيتي اللي دارته لأم عيشه في عزي بنتها.
مغليه وهي تحرك في يدها يمين ويسار؛ووك عليا معاش تفكروني في هداكا اليوم قشرت وجهي قدام الناس..
:والله اني من يومها حطيت تحتها خط..
مغليه؛تو شن بنقول ولاشن نحكي..تنهدت وقالت..فيها حاجه مش مزبوطه..
:كيف قصدك مسحوره زي اختها!؟
مغليه؛يامسحوره يافي دماغها وشه ولدي قالي تعبت معاها هلبه يام...
:نهار احرف..معقوله عطوهالكم وهي هكي غشوكم فيها !؟
مغليه غمضت عيونها بأسف وقالت؛صايمه ومانبيش نكثر دوة...
قعدوا النساوين يحوقلوا بعدين الجاره الحشريه اللي كانت مستمعه بس تكلمت..
:باهي توا وضعها مع ولدك شن شكله بيطلقها!؟
مغليه ابتسمت تهكما وقالت؛ماهو هني البلي..الجالي ولدي مرات نحسه دوريش من طيبته الزايده قال لبوه اني مازال نبيها ومش راخي بيها ومستعد نتحملها ع خاطر العيل رغم انها...وقعدت تعدد ع اصابعها..تطلع من حوش بوها لوين ماتبي من غير ماترد عليه الشيره...توقف في المطحن بين التريس ومش دايرتله اعتبار..تخلي في ولد عمها يرفع فيها ويجيب لمواعيدها متاع حملها..وخودوا هادي..عندكم علم انها كانت مدرقه ع ولدي انها حامل..
تعالت اصوات الشهقات والحاضرات تبادلوا نظرات الصدمه..
ووحده منهم قالت؛علاش اللطف؟
مغليه؛دارت زي مادارت بنت عمها بالزبط حملت ودست ودارت دوايرها بش خلت الحمل يطيح وبعدين سكرت راسها ع الطلاق..لكن هادي لا دست حملها وماقالتش الا بعد ماحرجت في حوش بوها..
الجارة الحشريه:معقوله ولدك ماحسش بيها!؟
مغليه:ماهو قتلكم ديما وهي في حوش بوها وين يشوف فيها هو تي حتى حقه الشرعي ماياخدش فيه..ووه منك تخلي فيا نطلع في دوة مفروض مانقولهاش..
والنساوين يسمعوا وهما في حالة ذهول..
وحده منهم قالت؛لامعليشي سامحيني يامغليه ولدك درويش هلبه كيف صبر ع هدا كله وكيف مازال شاد في مراة زي هادي كانش عاد دايرتله خطيطين!..
مغليه؛والله مانستبعد ع هالعيله بعد عرفتهم زين..
:ووك عليا ياكبدي..شكله حتى كلام عتيقه اللي تقول فيه ع سدرة حق..
:اني الحق مصدقتها عتيقه من الاول..
مغليه ابتسمت بتهكم وقالت؛مابتجيبه من راسها عتيقه ..
؛معناها حق سدرة كانت تلحق في ولدك المهدي وتحاول تفرق بينه وبين عيشه الله يرحمها..
مغليه؛وشن اللي سحن عيشه وجابلها المرض..
:قالتها عتيقه قال المرض ماجي لبنتي الا من تحتها..
مغليه؛الله يرحمها ويسامحها عيشه بنت الاصل المدينه اللي تخاف ربي والله مادرت كنه غيرها شن جابهم ليها فرق السمي ع الوطا..عيشه طلعت من حوش فيه رجاله الحكومه حكومتهم والكلمه كلمتهم مش زي اللي مش لاقييات من يحكم فيهم..تي بوهم مات مقهور من بلاويهم..
:مابعده مسكين اللي بدي بيه الولد كملوه البنات..
وحده تانيه قالت؛مالا باهي اللي نضال ولدك طلق بنت فردوس..
مغليه؛لانضال لما عرف اللي فيها قال ابدا ماتقعد ع ذمتي يام ولاعاد نرضى بيها مع عمايل خالتها طول طلقها ماراجاش..
؛مالا بري اشقي بالجالي راهو مش بلاش..
مغليه وهي تشوفلها بنظرات قلق مصطنع..
/زعمه!؟
:مازال تسألي..!؟
مغليه غمضت عيونها ومسحت ع وجهها بعدين قالت بقهر مصطنع..
/حسبي الله ونعم الوكيل..جيناهم بنية طيبه ودرناهم كناينا وعمرنا ماقصرنا عليهم بحاجه والناس شهود وشوفوا بش كافونا..ياربي خود الحق هدا اللي عندي...
سكتوا شويه وهما مازالوا تحت تأثير الصدمه من اللي عرفوه .
ومغليه تمرر في نظرها عليهم من تحت لتحت...
شويه الجارة الحشريه سألتها؛حقه يامغليه قوليلي..نجاة ساكنه معاكم ولا علاش مارينهاش بكل؟
مغليه؛ شاده شقتها دابها داب صغارها بس...
:معليشي ع السؤال علاش جبتوها تسكن هني؟
الحشريه قالت؛الحق يامغليه سمعنا انكم بتردوها للمهدي..
مغليه:الحق كانت في حاجه زي هادي بس المراة مابتش..هي اصلا اللي خلاها تجي تسكن هني الحاج محمد بعد الحادث اللي داراته واللي صار لولدها تبهدلت هلبه هلبه ووخيتها اللي كانت قاعده معاها جاها موضوع زواج وبتمشي ع حالها يعني بتقعد بروحها ومافيش معاها راجل لاخوت لاعزوة مسكينه وعمكم محمد حال زي هدا مايرضاش بيه ام احفاده في النهايه مالقاش قدامه غير انه يسكنها حداه..
:وهي علاش ماتبيش تتزوج؟
مغليه؛قالت نبي نربي صغاري مانبيش نتزوج..وبعدين بيني وبينكم مسكينه بعد نحت الرحم نفسيتها تعبت هلبه..
:ياروحي ماتعذبت في حياتها..
مغليه:مش غير تعذبت وبختها بالهون لكن ماشاء الله مقويه روحها وتخدم وتصرف ع صغارها حتى الفلوس اللي يعطيلها فيهم الحاج حاطتهم وديعه في المصرف لصغارها عندها عزة نفس مش عاديه..
:ربي يعاونها ويعوضها خير في صغارها...
مغليه:آمين...
الحشريه؛لكن معليشي ياوخيتي تحسيها رزينه سكنتها حداكم والحوش معبي تريس..
مغليه؛وينهم هما..الجالي شاد الفيلا متاعه واهو توا مسافر سلامته..وعمر ساكن برا وكل اسبوعين مسافر..والمهدي ديما برا ووين يروح يشد شقته ونضال زيه..
وهي مسكينه ماتطلع من شقتها كان لخدمتها بس ولاكان اني اتصلت بيها قتلها تعالي..وتوا ماناديتش عليها شفتوها خاشه هي ولاحد من الصغار!؟
:ايه والله عندك حق..
مغليه؛وضع وانجبرنا عليه حني وياها الله غالب..
:لا اول ولاواخر ناس يديروا هكي يامغليه هلبه داروها قبلكم والحاج محمد ربي يكثر من امثاله مايبيش لأم احفاده البهدله معقوله بيرضالها السكنه بروحها!
مغليه؛هو هدا ياوخيتي..وان شاء الله ربي يديرلها طريق مسكينه..
كلهم بأصوات متقطعه؛ان شاء الله..
:شن دايرة مع عزوزتها..
مغليه؛اهو تجامل فيها وخلاص وتبعتلها في الصغار يقعدوا معاها وراهو مش دايره فيها طيب لكن تعامل فيها تقول امها..
:بارك الله فيها..
مغليه:ايه والله بارك الله فيها...
🍃🍃🍃🍃🍃
¤وَإِذْ نَادَى رَبُّكَ مُوسَى أَنِ ائْتِ الْقَوْمَ الظَّالِمِينَ (10) قَوْمَ فِرْعَوْنَ أَلَا يَتَّقُونَ (11) قَالَ رَبِّ إِنِّي أَخَافُ أَنْ يُكَذِّبُونِ (12) وَيَضِيقُ صَدْرِي وَلَا يَنْطَلِقُ لِسَانِي فَأَرْسِلْ إِلَى هَارُونَ (13) وَلَهُمْ عَلَيَّ ذَنْبٌ فَأَخَافُ أَنْ يَقْتُلُونِ (14) قَالَ كَلَّا فَاذْهَبَا بِآيَاتِنَا إِنَّا مَعَكُمْ مُسْتَمِعُونَ (15) فَأْتِيَا فِرْعَوْنَ فَقُولَا إِنَّا رَسُولُ رَبِّ الْعَالَمِينَ (16) أَنْ أَرْسِلْ مَعَنَا بَنِي إِسْرَائِيلَ (17) قَالَ أَلَمْ نُرَبِّكَ فِينَا وَلِيدًا وَلَبِثْتَ فِينَا مِنْ عُمُرِكَ سِنِينَ (18) وَفَعَلْتَ فَعْلَتَكَ الَّتِي فَعَلْتَ وَأَنْتَ مِنَ الْكَافِرِينَ (19) قَالَ فَعَلْتُهَا إِذًا وَأَنَا مِنَ الضَّالِّينَ (20) فَفَرَرْتُ مِنْكُمْ لَمَّا خِفْتُكُمْ فَوَهَبَ لِي رَبِّي حُكْمًا وَجَعَلَنِي مِنَ الْمُرْسَلِينَ (21) وَتِلْكَ نِعْمَةٌ تَمُنُّهَا عَلَيَّ أَنْ عَبَّدْتَ بَنِي إِسْرَائِيلَ (22) ¤
وقفت قراية لسورة الشعراء لما سمعت الآذان..
سكرت المصحف وحطاته ع تركينه وقالت:اذن المغرب عمتي..
طلعت مطيرة بسفرة الفطور برا وهي تنادي؛تعالي يافردوس..
طلعت فردوس بسرعه وعليه اثر ميه الوضوء وقعمزت حداهم..
وبدوا يفطروا الثلاثه...
ع خشة سيارة اريج للحوش..
فردوس وهي تاكل؛باهي اللي جت خل تفتحلنا المولد..
مطيرة؛بنقوللها تعلمني مابنقعدوا ديما نراجو فيها هي ولاحسين بش يفتحوه..
نزلت اريج من السياره وهي نشوفلهم وقالت من بعيد..
/تو نفتح المولد شويه بس...
ومشت طول..
فردوس بدت ع وجهها ملامح الحزن ودموعها نزلوا..
شدت طوبى ع يدها وقالت:فردوس ماديرش هكي..
مطيره؛قويها ماتزيدش وجع قلبها..
مسحت فردوس دموعها وهي تهز في راسها بإيجاب..
شويه سمعوا صوت المولد اشتغل وضي الجنان انفتح...
بعدين طلت عليهم من فوق وقالت..
/وسعوا خل بنقز..
ضحكوا ورفعوا عيونهم ليها..
اريج بإبتسامه:جبت مع البسبوسه جيلاطي..
طوبى:انزلي فرحي غرفه بيه من بكري تقول خاطري في جيلاطي ورؤوف برا طرابلس من بيجيبهولي..
اريج بضحكه؛بعتتلي رساله وصتني عليه..ومشت...
هما نزلوا روسهم وقعدوا يضحكوا..
🍃ضحكه مدرقة وراها غصايص ياغصايص...🍃
🍃🍃🍃🍃🍃
الساعه 9:30ليلا..
طلعت اميمه للجنان بعد مادوشت بش تنشر الفوطه متاعها..
لقت امها مقعمزة ع كرسي نايلو وسرحانه...
نشرت الفوطه..بعدين مشتلها وهي تقول..
/خيرك مقعمزة بروحك؟
صفيه؛مع مني تبيني نقعمز الحوش فاضي وانتي ماليكش هلبه مروحه..
اميمه؛علاش مامشتيش لحوش عمي؟
صفيه بضيق:اميمه ليا ايام نفكر في حاجه مخوفتني..
اميمه؛ شني اللطف!؟
صفيه؛خوك حسين يااميمه من لما عرف باللي صار لطوبى وحاله منقلب..
اميمه؛طبيعي يام..
صفيه؛لالا مش طبيعي..خايفه منه يعاود صنعة خوه..
اميمه؛لايام مستحيله حوليها من راسك الحاجه هادي مايديرها حسين..
صفيه؛لايديرها يديرها بكري نشدته ع خطيبته قالي مانندريش عليها وطلع من حداي..
اميمه سكتت وهي مضايقه..
صفيه؛والله كان يدير مادار خوه لاعاد ولدي ولانعرفه..
اميمه؛وسعي بالك يام ومعاش تسبقي الاحداث..
صفيه؛لا ياحنه ماسبقت شي كله واضح يرفع فيها ويجيب وشن ماتبي يمشي جري يجيبه ومايروحش يرقد لين يشوفها مانيش عميه راني ولادرويشه..
اميمه؛يام حسين يرفع في الكل ويجيب لما يحتاجوه مش غير طوبى ومايروحش الا لما يطمن ع
النساوين اللي قاعدات بروحهم غادي..عيب يام كلامك راهو عيب هلبه..
صفيه؛اني ماغلطت في حد..اني مانبيش عشم بنت ناس تانيه ياخدنا يابنتي افهمي..
اميمه؛باهي انتي شن تبي من حسين يدير؟
صفيه؛نبيه يسكر الباب اللي يجيه منه الريح ويريحنا..وطوبى هونا عندها راجل اختها تبي تمشي لأي مكان يرفعها هو ومعاهم اختها وتمت..
اميمه؛ولما يطلع الراجل برا طرابلس زي توا من بيشوف حالهم؟
صفيه؛هما يشوفوا حالهم برواحهم كلهم عندهم سيارات وطلعاتهم كلها قبل لظلم الدنيا يقدروا يرفعوها ويجيبوها..وبعدين ساده بزعقة فلوس عليها مستخسر في روحه يشري سيارة وهي يحط عليها هداكا المبلغ اصلا هادي مش مسؤوليته هو قاعده ع ذمة راجل هو اللي يتحمل مسؤوليتها..
اميمه بضيق:كلامك غملي قلبي يام..
صفيه ناضت وهي تقول؛ياحمارة اني مانبيش مشاكل فوق مشاكلنا ونبي نفرح بحد فيكم نبي حد فيكم يتسقم حاله سادني ماجاني من خيبات فيكم ساد..
ومشت خشت وهي معصبه ودموعها ينزلوا..
وخلت اميمه مضايقه ع الآخر لين نزلت دمعتها...
🍃🍃🍃🍃
وتعدي ساعات الليل الأولى لين يوصل لنصه..وتحت الظلام الدامس رقدوا النساوين في حوش لطفي الواعر بعد ماطفوا المولد وهما متوقعين يجي في أي لحظه وهما راقدين..
درجات الحرارة في هديكا الايام عالية جدا وساعات طرح الأحمال زادت وزي كل صيف من سبعه سنين فاتوا الناس تعاني وتشوف في الضيم...
في الوقت اللي كانوا فيه ملتمات تحت المروحه متاع الشحن وراقدات..
هي كانت فايقه..
مقعمزه في الصاله بروحها حدا الروشن..
تحوقل..وهي سرحانه ودموعها ينزلوا...
الليل مايرحمش يجي ويجيب معاه الذكريات اللي توجع القلب..
وهي كل ليله من بعد وفاة بوها لازم تعيش بروحها مع ذكرياته..بالذات اخر موقف جمع بينها وبينه..
وين تتفكر ان مات حداها وهي ماتندريش عليه قلبها يتقطع من الألم...
الدنيا في عيون طوبى بعد اللي صار ولت باهته..
وبعد موت بوها ظلمت الا من بصيص نور كان يربط بينها وبين الله اللي كان يمد فيهل بالقوة والصبر...
جي الضي..
غمضت عيونها بعدين فتحتهم وهي مضيقتهم..مسحت دموعها..
وشافت حواليها...كان الضي يحرق في عيونها اللي ورمهم البكي..
بعدين ناضت وهي تقول..
"ياحي ياقيوم لاإله الاانت"
ومشت طفت ضي الصاله..
بعدين طلعت منها ومشت للديار...
خشت للدار اللي راقدين فيها..
شغلت المكيف..بعدين مشت طفت المروحه وحطتها في الشحن..وقبل لتطلع منها طفت عليهم الضي..
بعدين طلعت دارت دوره في الحوش طفت الضي اللي مايلزمش..وخشت للكوجينه وشغلت الثلاجه والفريز...
بعد ماشغلتهم..صبت طاستين ميه وشربتهم..
ومشت طلعت من الكوجينه للحمام بش تتوضا وتصلي القيام...
🍃في هالوقت...
كان عبد القيوم في شقته سهران يراجع في حسابات المطحن..كانت الارباح كويسه الي لحد ما بس هو طامح في الاكثر..قعد يعصر في دماغه بش يطلع بأفكار تزيد المربح اكثر لعند ماتعب دماغه من التفكير..
خلا كل شي..وناض ومشي طلع من داره بإتجاه الحمام يش يتوضا ويصلي القيام...
🍃🍃🍃🍃🍃
ويجي تاني يوم...
21يونيو...سنة 2018..
قبل الظهر بالساعه..
كان المحجوب في مكتبه لاهي بشغله وهو يشوف في بعض الملفات..
جاه اتصال من السكرتيره متاعه قطع عليه..
رد طول..
/نعم..
"سيادة المستشار في واحد اسمه مختار الواعر طالب يشوفك"
مرر نظره قدامه وقال:خليه يجيني..
وسكر السماعه وهو يفكر بقلق..
شاف للباب لما سمعه دق وقال..
/تفضل..
انفتح الباب وخش مختار وبأبتسامه واسعه وتنغيمه في الصوت قال..
/السلام عليكم...
وقف المحجوب وقال بإبتسامه مجامله:وعليكم السلام..
سكر مختار الباب ومشاله صافحه وهو يقول..
/كيف الحال ياخال..
المحجوب:الحمد لله...بعدين اشرله ع الكرسي وقال.. تفضل ..قعمز..
فتح مختار زر جاكيته وقعمز وهو حاط رجل ع رجل ويقول..
/يزيد فضلك..
قعمز المحجوب وقال:شن تبي تشرب سخون ولابارد..
بإبتسامه وهو يحرك في يده قال:ولاحاجه..
المحجوب؛اول مرة تجي لازم نضيفك حاجه..
مختار:مش رادك..ونزل رجله وخدي شيشه الميه المحطوطه قدامه ع الطاوله وقال..هادي ساده..
فتحها وشرب منها والمحجوب يشوفله بتوتر..
نزل الشيشه وسكرها وردها لمكانها ورد رجله فوق رجله التانيه وقال؛ايه خال شن امور الخدمه معاك ماشيه تمام؟
هو قال:تمام الحمد لله..
مختار:الحمد لله الحمد لله..نعرف هلبه ناس في الوسط متاعكم لو احتجت لخدمه عيوني ليك كلمني بس..
المحجوب:مشكور جدا ان شاء الله مانحتاج لحد..
ابتسم مختار وقال:ان شاء الله..باهي شن حال العيله..
المحجوب:اهو عايشين والحمد لله..
تنهد وشاف لكندرته وهو يقول..
/امم..بعدين شافله وقال...غدوة نبي ندير زيارة لخواتي نبي نحكي معاهم في موضوع بيني وبينهم..
المحجوب قعد يشوفله وهو ساكت..
القلق متاعه زاد بس ماباش يبينه..
ضحك مختار وقال:راك تقولي محرمه خشة الحوش!
المحجوب:تو نبلغهم ونرد عليك..
هز راسه وقال:لاضير..لاضير..المهم انت شد حيلك معاي واقنعهم تمام ونبي نكون اني وياهم بس مانبي حد تاني معانا..
هز المحجوب راسه وقال؛إن شاء الله..
تنهد مختار بالصوت بعدين ناض وهو يقول..
/خلاص نستنى في اتصالك..اه ايه رقمي مش عندك..
طلع تليفونه من جيب جاكيته بعدين ضرب ع رقم خاله..
اتفاجئ محجوب وين رن تليفونه..
مختار بإبتسامه واسعه:هدا رقمي خزنه عندك..وسامحنا عطلناك عن اشغالك..
ناض وقف وقاله..
/مش مشكله...
تصافحوا وقال مختار:نلتقي..السلام عليكم..
طلقه ومشي بيطلع..
والمحجوب رد عليه وهو معاه بعيونه..
وين جي مختار طلع شبحله بنفس الابتسامه بعدين طلع وسكر الباب..
والمحجوب قعمز وهو يفكر بقلق...
~~~~~~~~~~
المحجوب:قال يبي يجيكم غدوة ويحكي معاكم في موضوع..
غرفه:شن هي المواضيع اللي بينا وبينه..
المحجوب مط شفايفه للأسفل بعدم معرفه..
فردوس بقلق:مش عارفه شن مازال يبي هالبنادم..
المحجوب قعد ساكت وهو يشوف لطوبى بعدين قال..
/شن قولكم..
فردوس وغرفه شافوا لطوبى يستنوا في ردها..
وهي بعد ماتنهدت قالت..
/قوله يجي وانت بتحضر معانا خالي..
المحجوب:حاضر بنتي حاضر..
غيرت طوبى نظرها للفراغ وسرحت وهي تفكر في اللي يبيه مختار..
وخواتها كانوا في حالة من القلق...
🍃وعدت الساعات اللي تفصلهم عن اللقاء بيه وهما مابطلوش تفكير في سبب جيته...
وبعد مايعدي هاليوم..وجي اليوم اللي بعده...
مع تمام الساعه السبعه مساءا كان مختار عندهم..
مقعمز هو وياهم في المربوعه الخارجيه..
🍃داخل الحوش..
الاء بضيق؛يقعد خوهم في النهايه معليشي يعني..
اريج بنرفزة:مش عاحبك كلامنا ومشت متحمله فيه اطلعي من حدانا..
ناضت آلاء وهي معصبه وطلعت من الصاله..
مطيره بإزدراء:عفنه..
اريج تنهدت بقلق وقالت..
/زعمه شن يبي منهم..
مطيره بضيق:العلم عند الله...الله يكفينا شره...
🍃🍃🍃🍃🍃
"اني مانبي منكم شي غير اني نشوفوكم مرتاحات ماناقصكم الشي"
والثلاته كانوا يشوفوله ويسمعوا فيه شن يقول ونظراتهم كلها امتعاض..
اما المحجوب كان يشوفله بشك..
وهو مكمل يقول..
/برغم انكم ظلمتوني هلبه لكن تقعدوا خواتي اللي مالياش غيرهم ومالهمش غيري..ايه..تبوا ولاماتبوش مالكمش غيري واني ملزوم ندير واجبي ناحيتكم لاجميل مني ولابطوله في النهايه انتم خواتي...خواتي ياغرفه..اللي لما جيتك المصحه بش نواسيك ونوقف معاه سمعتني كلام قاسي ظلمتيني هلبه وطلعتيني من عندك مكسور الخاطر بس مع هذا وقفت معاك وطلعت راجلك بطلب من بوك..
الثلاته شبحوله بإستغراب..
مختار:ايه جاني وطلب مني نطلعه وقالي بالحرف الواحد خواتك محتاجينك يامختار رد بالك تعطيهم ظهرك..ولو كنتوا مش مصدقين توريكم تسجيلات كاميرا المكتب متاعي في اليوم اللي جاني فيه..قالي بالحرف الواحد كان تبيني نرضى عليك طلع راجل اختك..واني بعد ماطلع من عندي درت جهدي كله..بثقلي كله خشيت في الوقت وماخليت من ترجيت وماخليت مادفعت بش طلعته..واحمدي ربك ان الدوله اللي حني فيها مهبوكه لاقانون ولاسياده كان هدا مايطلعش لو دفعت ع خاطره كل مااملك..وطبعا هدا كله درته ع خاطر مني ع خاطرك انتي بالدرجه الأولى ولااريد منك لاجزاء ولاشكورا...
قعدت تشوفله غرفه بإمتعاض وهي رافعه حاجبها ومابتش ترد عليه..
غير عيونه عنها لفردوس وقال..
/ولى انتي يافردوس بش نردلك كرامتك واعتبارك جبتلك عيلة راجلك كلهم يعتذروا منك..ماتتصوريش شن درت بش خليت سلفك النذل يجيك مذلول ويعتذر منكم كلكم...ومع هدا مانراجيش منك لاجزاء ولاشكورا...
فردوس قعدت تشوفله بنفس نظرات غرفه بالزبط بدون ماترد عليه..
غير عيونه عنها لطوبى وقال..
/وانتي ياطوبى رغم انك كاسرتيلي قلبي لكن ماتهونيش عليا بس موضوعك مش حندخل فيه لين تطلبي مني انتي الشي هدا..بش نتبتلك اني مانحبش نستعرض عضلاتي..وصدقيني لو طلبت منك نساعدك..مستعد ندير فيهم العبيتر ونخليهم يجوك لعندك يبوسوا ايديك ويطلبوا السماح والله ماتراجي مقابل ع هدا كله..لانبي جزاء ولاشكورا
طوبى بنظرات عدم تقبل كانت تشوف في الفراغ وهي محوله عيونها عنه..
تنهد بعدين مرر نظره عليكم وقال..
/همي كله نعوضكم ع السنين اللي راحت واني مش فيها عايش في تشتت بعيد عنهم نحلم بيوم من ايامي معاكم..
نبي جو العيله..تبي لمتنا..نبي نكون حواليكم خوكم الكبير اللي يحميكم بكل ماعنده المهم مايضركم شي..
والثلاثه محتفظات بصمتهم ونظراتهم ليه زي ماهي..
والمحجوب ينصت انصات لكلامه..
ربع ايديه بعدين قال..
/ع العموم اني جاي نعرض عليكم عرض..اسألوني وقولوا عرض شني؟
غرفه بتهكم:عرض شني!؟
مرر نظره عليهم وهو يقول..
/زي ماتعرفوا الحوش هدا بسيط ومتواضع..
لوا جبتوا باش كل وحده تاخد حصتها من الورث مش حتكسب الا دراهم معدوده...
لهدا اني فكرت وقررت نشريه منكم ونعطي كل وحد فيكم فوق حصتها تلانه اضعاف..يجيبوا حوش والباقي تصرفوا فيهم ديروا مشروع باهي تستسرزفوا منه..
اكيد يافردوس مش حتخلي ولدك يتربى بعيد عنك..وانتي ياطوبى..وراك مصاريف ومسؤوليات وكله ياما يبي..ماتعبوش ع المطحن لأنه وصدقوني مش حيسد حاجتكم وماتنسوش في من مشاركم فيه..جدكم..وشاف للمحجوب وقال..وخالكم..
شافت طوبى للمحجوب وهو شافلها. بعدين شافوله وهو يقول..
/وحتى محل المواد في نفس الوضع...
فكروا كويس قبل لتقرروا وردوا بالكم تفكروا بالعاطفه شغلوا عقولكم بس...
فردوس تنهدت وقال:هو عرض مغري زي مايقولوا وعجبني هلبه بس للأسف الحوش مش ورث الحوش ملك لحد تاني..
ضيق عيونه وهو يشوفلها بإستغراب وقال..
/كيف!
غرفه:ايه باع الحوش قبل ليموت الله يرحمه..
هو بصدمه وجع نظره للمحجوب وقال:..
/انت شريته؟
المحجوب:لا..
مختار:معناها الحاجز علي الواعر..
فردوس:لامش لجدي..
ابتسم تهكما وقال..
/ياأنتم تتسهوكوا عليا بقصد حرق اعصابي ياإما ان بوكم كان كارهني لدرجه يبيع الحوش لحد براني ويخليكم تقعدوا فيهم بش يقهرني..
فردوس:الحوش ماانباعش لحد براني..
قعد يشوفلها بإستغراب كبير...
فردوس:بوي الله يرحمه باع لحد قريب هلبه..
هو شاف للمحجوب وقال:شن قاعده تقول هادي؟
المحجوب:قالت الحق..الحوش هدا مش لحد براني..
"الحوش هدا ملك طوبى"
صدمه كبيره صابت مختار خلاته مذهول..
غير نظره عن المحجوب وشاف لفردوس..بعدين لغرفه...واستقر بنظره لطوبى...
وقعد يشوفلها وهو مش مستوعب..
وهي تشوفله بنظره امتعاض فيها قوة واضحه...
#طوبى
#تحول
....يتبع....
