# طوبى "شارع القهوة"
#جمان_فريد
#الجزء_السابع_والعشرين"قطعة من جهنم2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
وتاني يوم..
من بعد الفجر جي مصطفى نوض فردوس وهو يهز فيها ويقول:نوضي هيا نوضي..
ناضت مفجوعه وهي تقول:خيرك!
مصطفى بقسوة:نوضي تحركي نوضي لمي حوايجك هيا..
فردوس قعمزت وهي تقول:مصطفى صل ع النبي خلاص غلطه ومعاش تتكرر..
مصطفى يشوف فيها تتكلم ببرود وكأنها ماخدتش كلامه ع محمل الجد..بغضب شديد قال؛تي نوضي تحركي لمي حوايجك خير ماقسما بالله نرفعك هكي..
فردوس قعدت تشبحله شويه بعدين ناضت وهي تقول بعصبيه:نايضه هاني نايضه..اصلا اني الكاسبه اللي بنفتك من العيشه معاك..
وطلعت شنطه من الدولاب وحطتها ع الارض وقعدت تحط في حوايجها فيها وهي تقول..عيشة القله والفقر والقهرة..
هو طلع من حداها بسرعه بش ماتستفزاش ويلقى روحه يرمي عليها في اليمين..بعد ماكملت.
لبست عبايه ووشاح وخدت شنطتها وهي تقول؛مفروض اني اللي درت هكي وخديت وجهي من زمان..
وقعدت تمشي بالشنطه..ومن الغضب مافكرتش في صغارها..
طلعت من الحوش وركبت الشنطه من الخلف وركبت من القدام بعد ماخبطت الباب بقوة..
وهو طول تحرك..
قعدوا ساكتين طول الطريق..
لين وصلوا لحوش بوها..
درس ونزل..وهي نزلت..
فتحت الباب الخلفي وخدت الشنطه..
وهو قعد يدق ع الباب..
واللي فتحه...لطفي..
وين شافهم..وجو عيونه ع شنطة بنته..بعدين ع نظرات الخوف في عيونها..ولاحظ ان الصغار مش معاها..
فهم كل شي..
لطفي:خشوا..
خشت فردوس بعدين مصطفى..
هو سكر الباب من هني..
وهي بدت من هني: اني معاش نقدر نتحمل العيشه مع..
لطفي بحده:سكري فمك..
هي انصمتت..وسكتت بكل..وخافت..
لطفي:شن في يامصطفى..
مصطفى؛سامحني ياعمي بس والله خلاص اني لهني حد قدرة تحملي معاش نقدر اكثر من هكي..
لطفي؛شن صار بالزبط..
كيف جت فردوس تتكلم قال لطفي:ياتقعدي ساكته ياتخشي داخل..
هي شدت ع قبضه يدها بقوة وقالت:حاضر..
ع طلعة مطيرة من الكوجينه وبعدها سدرة والزوز قعدوا يشبحوا جيهتهم بقلق..
مطيره؛دارتها في روحها..
سدرة؛قداش ليا نراجي فيه اليوم هدا..
••مصطفى:عمي اني من زمان تفاهمت اني وياها ان مهما يصير فينا لااني نطلب من اماليا ولاهي تطلب منكم...وهالشي كنت مشدد عليه وحالف عليه..لكن بنتك..كسرت كلمتي وحنثث قسمي وجاتك خدت منك..
لطفي شبحلها بنظرة واعرة هي طول نزلت عيونها..
مصطفى:عارف انها كاذبه عليك واني والله مانلومك في حاجه لو كنت مكانك درت زيك...لكن لومي كله ع المراة اللي عشت سنين واني نعامل فيها زي العيل ونداري فيه ونفني في روحي بش نرضيها ومالقيتش منها مقابل هدا لااحترام ولاتقدير..سامحني ياعمي اني لاهني وخلاص وهادي بنتك عندك..وبالنسبه للصغار تنساهم بالمرة مستحيل نخليهم مع مراة زيها لاتعرف تتحمل المسؤوليه ولاتقدر تفكر في غيرها..
ومشي طلع من الحوش وسكر وراه الباب..
نزلوا دموع فردوس وهي تشوف للباب حست ان الموضوع جدي من مزح ولاتهويش زي مايقولوا..
بوها وهو يشوفلها؛تبكي!
هي حطت يدها ع فمها وقعدت تبكي بالصوت..
لطفي:خشي داخل..
خلت شنطتها ومشت خشت داخل..
وبوها خش وراها..
وامها وعمتها خشوا من الجهة التانيه..
وين قربت توصل للدار..
لطفي:اوقفي مكانك..
وقفت والتفتت لبوها..
لطفي:لأمتى بتقعدي هكي انتي فهميني لأمتى..حتى بعد وليتي ام وبناتك ولوا طولك قاعد عقلك صغير وتفكيرك تافه..
سدرة ومطيرة يسمعوا فيه شن يقول وهما مضايقات..
ع طلعة طوبى من الحمام كانت دوش...
خافت هلبه وقعدت تسمع في بوها شن يقول..
لطفي:تعرفي اكبر غلطه درتها اني زوجتك قبل نربيك كويس ونخليك انسانه ناضجه قد مسؤولية الزواج وان يكون عندها عيلة وصغار..وعنده الحق مايخليش صغاره عندك لأنك وانتي هكي مش حتعرفي تربيهم صح..
تسمع فيه وهي تبكي ومش قادرة دافع عن نفسها ولاقادرة ترفع عيونها في بوها..
لطفي:امشي انتلفي خشي داخل..واني هني مانبيش نشبح وجهك بكل..
هي لفت ومشت لدار المعيشه ومطيرة مشت وراها..
لطفي شبح لطوبى..
لقاها تشوفله بحزن وخوف..
غير عيونه عنها جو في عيون سدرة...
كانت تشوفله بنظرات شفقة وقلق..حست بوها معاش زي قبل بدي يبان عليه التعب..
سدرة:خديت دواك..
هز راسه بعدين مشي طلع من حداهم..
ع جية طوبى لسدرة قالت:شن في؟
سدرة شبحتلها وقالت:اختك زنت ع خراب عشها واهو خرب..
طوبى:واريج وآلاء وعزو وين؟
سدرة:قتلك خربت حوشها..ومشت خشت للكوجينه ماعندهاش نية تتكلم مع فردوس ولاتعرف شن صار معاها كله واضح...
☘وصغارها اول ماناضوا مالقوش امهم..
معتز قعد يبكي والاء كذلك..بس اريج كانت موجوعه هلبه وهي تتكلم مع بوها..
اريج؛قصدك خلاص يابابا ماما معاش بتعيش معانا..
مصطفى:بنتي الامور هادي انتم مادخلكمش بيها..
اريج؛مالا مني دخله يابابا كان حني مادخلناش!؟
هو قعد يشوفلها كلمتها وجعاته هلبه ماعرفش يرد عليها..
بعدين قال:باهي بري قولي لاختك تبدل حوايجها وبدلوا لخوكم اليوم بتقعدوا مع مع عماتكم..
اريج ودموعها في عيونها:حاضر..
وناضت ومشت طلعت حداه..
وهو قعد سرحان يفكر في اللي بيصير بعدين..
مشكلته انه يحب فردوس مايقدرش ع فراقها بس لازم يأدبها لازم يدير معاها اللي تأخر عنه 11سنه..
☘☘☘☘☘☘
الساعه 11:00صباحا..
خديجه؛الله يسامحك يابوي حني تخلينا نمشوا نعتذوا لهديكا..
نسرين؛مش ليها هي لخونا..
مغليه طلعت وقالت؛عمر برا..
خديجه؛من بكري يراجي..
مغليه:هيا اطلعوا..
مشوا طلعوا مع بعض من الحوش..
وركبوا مع عمر السيارة..
مغليه:هي تحرك ولدي..
وهو مش معاهم يكل..
يشوف لأميمه كيف طالعه من حوشهم وهي لابسه عبايه مغربيه سودا ووشاح ابيض مخربش بالاسود..وفي يدها حاجه متوجهه ليها لحوش عمها لطفي..
خواته ركزوا عليه..
خديجه؛عمر!
عمر ولايسمع في حاجه..
نسرين ضرباته ع كتفه وهي تضحك قالت؛عمر..
هو شافها خشت والباب تسكر..
مغليه؛خيرها جايتهم من برا مش عندهم باب فاصل..
عمر:هي حره يام دير اللي بديره تجيهم من برا من داخل تنقز من سطوحها لسطوحهم حره..
خديجه قعدت تشبحله برفعة حواجب..
ونسرين تضحك بصمت..
امه وهي تشوفله بإمتعاض؛باهي تحرك تحرك..
هو لبس نظاراته وشغل سيارته وتحرك...
☘☘☘☘☘
خش الكوجينه وقال..
طاهر وهو متعجب؛شن الدنيا المغطيه هادي كلها..تي امتى نايضه انتي..
نجاة بضحكه؛من الصبح..
هو قعد يعري في الحاجات..
شاف محاشي..وطاجين فيه لحم طابب..وطاجين معبي مبطن..وطاجين مليان شيش..
وجي للطنجرة والكسكاس..عراها لقي رشدة كسكاس..
وحداهم طنجره طبيخه بصله..
شبح جيهتها لقاها كيف اطفي ع المسير..
شبحلها وقال:طلعتي من وراي امس!؟
نجاة؛لاشكاك بعتت صابرين تجيبلي..
طاهر:وعلاش ماقلتليش..
نجاة:حضرتك قالب وجهك عليا وماتبيش تكلمني وبعدين توقعتك مش حتجيب شي..طايرتلك منهم..انت كان طارتلك من حد تمسحه من الخريطه..
طاهر؛ظالمه انتي..كان اني حق هكي راهو قداش ليا ماسحك..
نجاة؛يوم جمعه واهلك شويه وجايين مانبيش نعكر مزاجي..
ريشها من شعرها وطلع..
هي عيطت وقالت:علاش يابارد..!
🌻وكملت نجاة تجهيز كل شي..
ومشت خشت للحمام دوشت وطلعت..لبست وتأنقت..
وطلعت من دارها ومشت دارت بخور وبخرت الحوش كله..
وطاهر حتى هو جهز نفسه للصلاة وجاي بيطلع..
نجاة:راجي لين تمشي مع خوتك..
طاهر:الخطبه بتفوت..
ومشي طلع من الحوش..
نجاة؛مكسح راسه...
☘وشويه ووصل عمر..
نزلوا هو وامه وخواته وخشوا للعمارة وركبوا الشقه..
وكانوا جايات يهزوا بإيديهم..
عكس ماكانت متوقعه نجاه..
توقعت يجوها حاملين محملين بالهدايا والحلو..
استقبلتهم بحرارة وفي خاطرها تقول..
"يالطيف حتى باكو عصير ريحان ماهانش عليهم يجيبوه"
عمر؛مالا وين طاهر..
نجاة؛مشي للجامع بحدانا هني
عمر:ايه عرفته..هي السلام عليكم..
ومشي طلع..
هو طلع وهي حولت شاربتها وجتهم وهي تقول بإبتسامة ود مصطنعه؛مرحبتين مرحبتين..
☘☘☘☘
...بعد صلاة الجمعه...
"علاش مامشيتش"
المهدي وهو يشوف للتلفزيون؛بوي يبي المشيه هادي للنساوين..وانتي علاش مامشتيش..
عائشه:تعرف علاش..
المهدي:شن قلتي لأمي؟
عائشه:الصغار عندهم امتحانات يبوا من يقريهم..وفعلا هدا اللي صاير..
المهدي هز راسه وقعد ساكت...
عائشه؛اممم..باهي انت شن رايك في اللي صار؟
المهدي:مشاكل عاديه تصير في كل حوش..
عائشه؛باهي..بنقولك ع حاجه..عندي صاحبتي مدرسه تبي لخوها عروسه وعنده مواصفات معينه والحق كلهم لقيتهم في اخت نجاة الصغيره..
شبحلها وعيونه متوسعات ع الاخر..
عائشه؛خيرك!..
غير عيونه عنها وقال؛فوتيها.
عائشه؛وعلاش..
المهدي؛فوتيها وخلاص ماتخشيش في المواضيع هادي نصيحه..
بعدين شبحلها وقال..هيا وين غدانا ولاننزل نتغدا لوطا..وابتسم ع جنب..
عائشه؛علاش جايب حد لوطا يديرلك غداك..
ناضلها وجاهاوهو يقول:لو مانضتيش توا وتيتي غدي..
شد قصتها وقال..نجيب هني من يديرلي غداي..
عائشه:بارده ع فكرة ماضحكش..
هو ضحك نص ضحكه بعدين دارها قصتها ع جبهتها وقال:هي نوضي نوضي..
ناضت ومشت من حداه..
وهو جاته رساله ع تليفونه..
طلعه من جيبه وفتح الرساله..قراها.
ابتسم..بعدين مشي للكوجينه..
☘☘☘☘☘☘
"علاش متعبه روحك ودايرة هدا كله!"
نجاة بإبتسامه:اول مرة تخشولي حوش نهاري وبعدين مافي شي من قيمتكم..
مغليه؛يعطيك الصحه بنتي..
نسرين:تسلمي نجوته..
نجاة:سلمكم يارب..هي تغدوا تغدوا..
مغليه ونسرين كانوا ياكلوا غادي..
بس خديجه تنقش تنقيش وكأنها متعيفه..
ونجاة دايرة روحها مش مركزه عليها..
••في المربوعه••
عمر:اني بطبيعتي نحكم ع الناس من اول مرة نشوفهم فيها بس لما نعاشرهم غالبا تتغير نظرتي..اكيد لاحظت في البدايه اني ماكنتش متقبلك بس بعد تقربت منك وعرفتك كويس نظرتي فيك تغيرت واحترمتك هلبه زي مانحترم في المهدي خوتي الكبار..
طاهر:شوف اني عاذركم في البدايه لاني كنت ولد المراة التانيه ضرة امكم طبيعي جدا مش حتتقبلوني.بس اللي اني مش قادر نفهمه الجالي..اني كنت متوقع ان اني وياه اقرب اتنين لبعض..صدمني والله صدمني..
عمر تنهد وقال:نقولك حاجه..الجالي قلبه طيب هلبه..بس ليع فلسفه في الحياة ماشي بيها صعب تفهمها..وعنده عيب ان لو خدي موقف من حد يدير تحديد الكل ويبدا يخرط..
طاهر:فهم نجاة غلط..او في حد وصله الفكرة غلط..
عمر:وارد..
طاهر:تمام مستعد نمشيله ونفهمه..
عمر:لا ماتمشيلاش خليها تجي هكي احسن..نصيحه..
طاهر:علاش!
عمر:الجالي نوعيته صعبه شويه..لومشيت تبررله شي يكبره هلبه فخليه لين يهدا ويطيب خاطره بروحه..
طاهر مااقتنعش بكلام عمر..من غلاوة الجالي عنده ماكانش يبيه يقعد زعلان منه..وكان ناوي يتفاهم معاه ويراضيه..
ابتسم لخوه وقال:تغدا تغدا قبل يبرد ومعاش تولي عليه بنه..
ابتسم عمر وقال:درتوا اكثر حاجه نحبها..
ضحك طاهر وقال:بالحظ والله..
عمر:ياريت كل شي نحبه يجيني هكي..
طاهر بضحكه:تغدا تغدا..
وعمر تنهد ورجع ياكل...
☘☘☘☘☘☘
تغدوا غداهم اللي كان دايراته نجاة بقلب ونيه طبعا لمصلحتها..
بعدين ناضت تغسل الماعين وحلفت مايخش معاه حد..
وهدا كله كان عاجب مغليه هلبه..
وحتى نسرين..بس خديجه ولاعبرتها..
كملت غسل ماعين وسخنت الشاهي الاخضر وصباته للرجاله ومشت عطتهم..بعدين طلعت للنساوين..
فرقت عليهم وقالت وهي مستغربه:نسرين في الحمام؟
خديجه؛لاتدهور في الشقه..
مغليه:قالت ماشفتهاش كويس اول مرة..
نجاه:اها..خل نمشي نشوفها..
ومشت..
خديجه:مثقل دمك..
امها عضت ع شاربها وفنصت فيها..
وهي حركت يدها بإنزعاج بمعنى.."فكيني ترا"
☘ومشت نجاة دور ع نسرين لقتها تفتح في دواليب دار النوم وتفتش..
طارتلها منها بس سايرتها..
لدرجة ان نسرين طلبت منها لبسه عطتهالها..
ومشت طلعت هي وهيا للصاله ونجاة مش طايقتها..
قعمزوا شربوا مع بعض الشاهي..
بعدين مغليه نادت ع طاهر يجي..
طلعوا هو وعمر وقعمزوا معاهم...
مغليه؛ولدي..مش اول مرة نقول هالكلام وياريت هادي تكون الاخيره..هداكا الحوش حوش بوك..واي شي لبوك انت عندك فيه حق غصب عن اللي يبي ومايبيش..هدا علاش مهما صار ماتقطعش بوك..وبعدين عيب عليك بوك يتصل بيك وماتردش عليه معقوله هكي! هدا غيراني اللي نقول عليك عاقل ومحترم!؟..بوك هدا بوك مهما يصير ماتقطعاش..هو مستعد يعطيك عيونه مايستاهلش منك هالمعامله..
طاهر:عندك حق ..
مغليه:عارفه عندي حق..هدا علاش توا وحني مروحين بتجوا معانا انت ونجاة وتستسمح من بوك..
نجاة قعدت تشبحله بترقب..
طاهر؛حاضر..لكن مش بايت غادي سامحيني..
مغليه؛ع راحتك..همي كله ان بوك يرتاح باله بس..
هو هز راسه وقعد ساكت..
والكل يشبحوله واولهم مرته...
☘☘☘☘☘☘☘
ومشي طاهر مع مرته لحوش بوه..
وقدامهم سيارة خوه عمر..
وصلوا للحوش..
ونزلوا كلهم وخشوا للحوش...
☘في المربوعه..
كان طاهر مع بوه ومرته بوه..
محمد:اللي يضايقك تجيني طول تقولي عليك مش تقطعنا هكي..
طاهر بإبتسامه:سامحني اني تصرفت غلط..
محمد:كويس انك عارف غلطك ومعترف بيه..
طاهر باس يده وقال:وان شاء الله مايصيرش مرة تانيه..
بوه قربله وباس راسه وطاهر يقول؛حاشاك بوه حاشاك..
ومغليه مركزة معاهم والشيطان يلعب بعقلها...
شن الغلا هدا كله اللي طاح في طاهر!؟
☘قدام الصاله..
نجاة:ندير قهوة؟
نسرين:ايه ديري ديري..
خديجه برفعة حاجب؛اني مرة مرار الحنضل..
نجاة هزت راسها وقالت؛تمام..
ومشت وابتسامتها اختفت وحلت محلها ملامح الحقد..
نسرين؛خفي عليها شويه..
قلبت خديجه عيونها بملل وقعدت تشبح للتلفزيون..
☘☘☘
مشت نجاة بإتجاه الكوجينه وكان تلقى ترقص لأن تبيه وصلتله..
وين وصلت فم الكوجينه سمعت حد نازل من الدروج..
وقفت وشبحت فوق..
ع نزلة الجالي..وقف في المستراح اللي بين دروجين..
قعدت تشبحله وبس ومن داخل تقول..
"قاعدين ع قلبك"..
هو شبحلها شويه..بعدين قعد ينزل..
وصل لوطا ومشي بإتجاه الباب..
نجاة بنبرة مستفزة:كيف حالك يالجالي..
وقف..رشف..وشبحلها..
وهي تشوفله بإبتسامه جانبيه ورفعة حواجب تساؤلا..
هو قال:يقولوا زمان كانت نصيحه بجمل..واني تول نعطيهالك بلاش..العبي ع من تبي هني..بس ردي بالك..شبح لوطا واشر ع المسافه اللي فاصله بين وبينه وهو يقول..تعدي هالمسافه..
ورجع شافلها بعدين لبس نظاراته..ومشي من حداها.
وهي تبعاته بعيونها وكانت تشوفله بحده..بعدين قالت..
نجاة:اني وياك يالجالي..ياأني ياانت..
ومشت خشت للكوجينه ودمها محروق...
🍀🍀🍀🍀🍀🍀
وتمر الايام..
وعلاقة طاهر بأهله كانت علاقه رسميه..يجي مرة في الاسبوع ومايباتش خصوصا بعد ماحاول يوصل في الجالي هلبه بش يعتذر منه بس الجالي ماكانش عاطيه مجال..
ونجاة ماكانش عاجبها الوضع بس ماقدرتش تعارضه..
هدا غير اللي مدايره فيها حابسها في الحوش لاطلعه ولاخشه الامعاه هو..ولما يطول يخلي في صابرين تجي تقعد معاها..
وفي فترة قعاد صابرين مع اختها لاحظت عليها تصرفات غريبه وكإن في شي دايراته ودرق فيه..وهي مابتش تسألها لإنها مش رايقتلها بالها في حاجات تانيه..
☘والمهدي مولي باله في حاجات تانيه وكل ماله يدير تصرفات مخليه عقل عائشه بيطير من راسها..
وخافت تواجهه خافت هلبه..خافت يصدمها وهي مش حمل صدماته اكثر من هكي..
☘اما فردوس فكانت تاكل في الحصرم من الندم..خصوصا ان مصطفى لاكلمها ولاعبرها..بس ماقدرش يحرمها من صغارها قعد يجيب فيهم الخميس يباتوا غادي للسبت العشيه ويروح بيهم..
واهله ياما عاركوه ع خاطرها وكانوا حيدخلوا بس هو رفض رفض قاطع وقال انه مايبيش حد يدخل في حياته..
بس بوه مشي لصديقه مصطفى واعتذر منه وقاله انه مش حيخلي الوضع يوصل لمواصيل مايبيها حد..
ووقعدت الحياة ماشيه ع حاله مع
فايزة..ونجاح وعواطف..وباقي اهالي شارع القهوة...
ومع مرور الايام..
تم عدة سدرة..وترميها زي مانقولوا...
وكان اول يوم ليها بعد العده مع صاحباتها في نفس المنتزه اللي تعودوا يتلاقوا فيه..
بعد عن فايزة ونسرين..
سدرة:لامادخليش نسرين تقعد حماتك في النهايه ونعرفها اني مش حترضى في المهدي..
عائشه:باهي كيف ندير حاسه روحي بننجن ياسدرة والله قريب نتبعه وين مايمشي بش نعرف هو مع مني يخون فيا.
سدرة:لاردي بالك ديريها مرات يطلع ما يخونش فيك ويطلع كله وهم ويشدك وانتي تلحقي فيه متوقعه تصرف المهدي بعدين!
عائشه خافت..
سدرة:هدي شويه وتو نفكرلك بطريقه تعرفي بيها كل شي..هي خل نولوا للبنات قبل يزيدوا يشكوا..
عائشه هزت راسها وهي مضايقه..
والزوز مشوا ولوا للطاوله متاعهم..
نسرين؛كان نعرف شن في بينكم اسرار..
سدرة:وهاك قلتي اسرار يابليده علاش تحشري في خشمك اللي يبي القص..
فايزة:علينا ياسوسو..
سدرة؛ايه عليكم يافوفو..
ضحكوا البنات حتى عائشه..
نسرين بضحكه؛هييه انتي وياها دايرة عزومه في حوشي الخميس هدا ونبيكم تجوا كلكم..
عائشه؛عازمه هديكا..
نسرين؛يس..
عائشه:استغفر الله وخلاص
سدرة:خاطري نتعرف عليها اكثر..
نسرين:هي كويسه بس لسانها طويل شويه.
فايزة؛بالعكس تهبل محلاها اسلوبها حلو..
نسرين في خاطرها"مطيب قلبك يافايزة"
سدرة:يللا الخميس ان شاء الله نشوفوها ونعرفوا من فيكم الصح..
وكملوا هدرزتهم وجوهم كان حلو..ماعدا عائشه اللي كانت في عالم تاني وسدرة حاسه بيها..
☘وقعدت طول ليله هداكا اليوم تفكر..
وماكانتش عارفه اذا كانت تفكر ليها هي ولالصاحبتها...
وبعد طول تفكير قررت دير شي....
ونفداته اليوم التاني ع طول..
☘☘☘☘☘
في الطريق..
المهدي وهو يتكلم بالتليفون:حرجت وبترضيني ماليش علاقه بيك..لاخلاص تعودت ع الدلع......ضحك وقال...خلاص وصلت فيك..
وخش للمستشفى..
ودرس سيارته ونزل منها ومشي خش داخل..
ع خشة سيارة سدرة..
درستها..ونزلت حتى هي ولحقاته..
سدرة:شكلها عيشه عندها حق..حي يامهدي يامهدي..عليك صدمه!
وقعدت تلحق فيه من بعيد بالخطوه..
هو يركب مصعد..هي تشوف وين ماشي..وتجري تركب دروج..
لين قريب نفسها انقطع..
سدرة وهي داهشه:يرزيني في الهم..كان لقيته معاها ماضاله الا خابطه روسهم في بعض مانتعبش التعب هدا كله ع الفاضي لازم ندير حاجه..
وين قربت توصل في المكان اللي هو فيه..
قرت اللافته اللي ترفع للممر اللي خشله انصدمت!
"قسم اورام الاطفال"
نزلت عيونها وقعدت تشبح للممر بصدمه وألم في نفس الوقت..
⚘في وحده من الغرف..
المهدي:لاخلاص مادام خداك النوم مش زعلان..
طفله صغيره اسمها امينه في عمر 7سنوات مريضه بورم في المخ:مرة تانيه كان بنرقد تو نقولك باهي بش ماتسهرش ع الفاضي..
المهدي:تم ياعسل..وقعد يهدرز عليها شويه بعدين ناض وخلاها ترتاح..
ومشي طلع من قسم الاورام..
هو طلع..سدرة مشت خشت تبي تفهم وتستفسر..
ممرضه؛اها المهدي شنيبه متكفل بحالة مريضه هني اسمها امنيه ليه فوق 4شهور..
سدرة ودموعها في عيونها:عنده بيها صلة قرابه؟
الممرضه؛لا اللي فهمته ان في من دل اهلها عليه قالوا متكفل بعلاج مرضى تانيين حالاتهم مختلفه..
سدرة؛باهي بارك الله فيك..
الممرضه؛فيك بارك الله..
ومشت سدرة وهي تفكر وتقول في نفسها..
"عارفاته مش هكي المهدي..بس زعمه حتى اني نقدر ندير زيه ونتكفل بواحد منهم ونصرف ع علاجه من فلوس الفاندي ونخليها صدقه جاريه ليه"
وقفت في مكانها..بعدين ولت ومشت بش تسأل..
وفعلا دلوها ع حاله اهلها مش قادرين ع مصاريف علاجها وقررت تتكفل بيها..
وطلعت من غادي وهي حاسه بشعور حلو بالمرة لسببين.
اولهم انها قدرت دير حاجه للفاندي توصله في قبره..
وتانيهم ان المهدي طلع عند ظنها بيه..
وصلت لسيارتها وفتحت الباب تسكر فجأة.
انفجعت وشبحت قدامها...
هو ؛تلحقي فيا علاش!؟
سدرة ووجهها احمر قالت بإرتباك:مانلحقش فيك وعلاش بنلحقك ان شاء الله اني جايه هني زياره..
المهدي حول نظاراته وقال:علاش من في عندك في قسم اورام الاطفال!
سدرة بخوف:لاقدر الله..ماعندي حد..
المهدي رفع حاجبه اليسار..
هي زادت ارتبكت وقالت:حتى اني جاية ندير خير مش انت بس اللي تعرف دير خير ع فكرة!
المهدي ابتسم ع جنب وقال:مقصقصه وعارفه كل شي ماشاء الله..
سدرة تنرفزت وقالت:اييه..اووف منك ومن عيشه معاك..ايه ياسيدي كنت نلحق فيك من ورا تصرفاتك العجيبه واتصالاتك وطلعاتك وطرحاتك المراة مسكينه قريب هبلت تحسابك بتطلع الشامس 2..ويقولوا فرخ البط عوام يعني مش بعيده عليك...لكن باهي الحمد لله صار خير..وانت مرة تانيه شارك مرتك اللي دير فيه ماتعاملهاش زي الغريبه..
المهدي وهي تهدرز كان مركز عليها بالحركه وبالتفصيل في ملامحها حتى نبرة الصوت..هي هي زي ماهي مستحيل تتغير..
المهدي:والله اني درت هكي بلعاني نبيها تجي تسألني.
سدرة:ايوه في كل شي راجوا المراة هي اللي تبادر..حتى لو تبوا تهتموا بيها تبوها هي اللي تبادر!.
المهدي:ماهو لما يجي منا حني الاهتمام مانحصلوا من وراه شي كان العذاب وعلل القلب .
شبحتله وهو قعد يشبحلها للحظات بعدين هي قالت:ع كل شكرا..
المهدي:ع شني..
سدرة غيرت عيونها عنه وقالت؛بسببك اندليت ع عمل خير ندير للفاندي يلحقه اجره ويونسه في قبره..
المهدي برغم انه ضايق هلبه بس قال:الله يرحمه يستاهل..
شبحتله وهي متفاجئه..لقاته يشبح القدام .. ارتسمت ع وجهه ابتسامه وقالت:وحتى انت ربي يجعل اللي دير فيه في ميزان حسناتك..
شبحلها وابتسم بعدين قال:آمين..
سدرة:ممكن..واشرتله بعيونها ع الباب.
ضحك ووخر عنه..
وهي ركبت للسيارة..
وعيونه عليها..لبس نظارته وقعد يشبحلها..
وهي بعدت تحرك شبحتله..ويدوب ابتسمت بعدين مشت طلعت من المستشفى..
وهو ضحك بعدين قال:هالمختشه هو اللي ينبلي بوحده زيها مازال يقدر يدور غيرها..
تنهد من قلبه..بعدين مشي وين مادرس سيارته..
☘☘☘☘☘
"نبيك تعطيني وقت حياتي لين نظم اموري وبعدين ناخدك ونطلعوا من البلاد بكل"
صابرين؛ياريت ميدو والله حتى اني خلاص البلاد بكبرها معاش طايقتها.
محي الدين:خلاص ياعمري وعد مني غير نرتب اموري امس..
صابرين:تمام..ميدو شن صار في اللي قتلي عليه..
محي الدين ضحك وطلع من جيبه عليه طويله طول متاع مجوهرات وفتحها قدامها..كان فيها انسيال ثقيل وغالي..
هي طارت من الفرحه وقالت؛واخيرا.
عطاهولها وقال؛تلبسيه بالهني..
خداته وقالت وهي تضحك بفرح:نجيلي حبيبي ياناس..
هو ضحك..
وهي قعدت تغني:شوفوا حبيبي ياناس شوفوا شوفوا..
وهو يضحك وعاجبه الجو اللي عايشه معاه اللي منسيه خديجه وبلاها..
☘☘☘☘☘☘
الساعه 2:00ظهرا..
"بالله عليك سدرة حق"
سدرة وهي تحرك في السلاطه:والله حق ياعيشه الله..اللي جابلي المعلومه واثق ومتأكد منها..انتي اليوم قوي قلبك واسأليه باهي..
"الله يطمن قلبك طمنتي قلبي"
ابتسمت سدرة وقالت:ربي يخليكم لبعض..
دعت هالدعوه وحست بشعور موجع هلبه..
"آمين يارب..صحيتي سديرة ان شاء الله مانفقدك..
سدرة:ولانفقدك حبيبتي..هي بالسلامه..
"بالسلامه"
سكرت وحطت التليفون ع تركينه وقعدت تفرق في السلاطه..
☘☘☘☘☘☘
"خيره"
عواطف:معاش يكلم فيا هلبه زي قبل..
نجاح؛عواطف الراجل مش فاضي يخدم ع راسه ووراه بني شن تحسابيه ساهل!؟
عواطف:باهي خيرك تكشخي.
نجاح؛مانكشخش نتكلم عادي!
عواطف سكتت وهي مضايقه بعدين قالت:ايه حقه ولد خالته قالي شكله بيخطب خلاص.
نجاح؛حق! باهي ربي يطيحه في بنية الحلال..
عواطف:لاحسب مافهمت انه لقاها..
نجاح:باهي ربي يهنيه..
عواطف:ضيعتيه ع روحك ياهبله..
نجاح:لاضيعته لاشي كله ع النصيب..هي بسرعه نشفى الغاز خل نلحقوا نكملوا..
عواطف:باهي..ايه حقه مرت خوك من امس ماليهاش حس..
نجاح:هي هكي ديما بمزاجها..
☘وخديجه..
كانت في دار نومها تفتش في حوايج راجلها ع باكو حديدة الذهب لأنها شافتها قبل صدفه وهي دور في حاجه..
لما مالقتهاش ضربها الشك..
وراجاته لين روح وطول تلاقاته وسألاته عنها..
هو جاوب بثقه:هديه المرت الراجل اللي خاشلي في المشروع..عزمنا لحوشه رفعتها معاي..
خديجه؛والله معاك كلهم هدوه نفس الهديه..
محي الدين؛واكثر من هكي..خليني ساكت..
خديجه بفضول؛لاغير قولي قول..
وقعد يكذب عليها ويحط وهي تصدق فيه وماشيه..
☘☘☘☘☘
ومن الجهة التانيه كانت اختها تتكلم بالتليفون وراجلها اللي داير روحه راقد يتسمع عليها..
نسرين؛عادي حبيبتي اعزميها اختك مافيش مشكله..
"خليها تجي منك احلى"
نسرين بمسايرة؛حاضر..
"هو من بيجي كله"
نسرين؛صاحباتي واختي خديجه..
"تمام..سلام توا"
نسرين؛سلام..
وسكرت بعدين تأففت ومشت طلعت من الدار..
وخلاته هو يفكر في يوم العزومه اللي حتضر فيه فايزة بلاشك..
🍀وتمر الايام تباعا..
لين يجي يوم الخميس...
يوم العزومه...
قطعه_من_جهنم
#طوبى
...يتبع..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
