(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الحادي_والخمسين"اهرجو يناير6" 《معظم أحداث هذه الرواية حقيقيه》 لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 🌟🌟ابيات الشعر للشاعر حسام أبوكرش🌟🌟🌟 ☕☕☕☕☕☕☕☕☕☕☕☕☕☕☕☕☕ الساعه 11:15صباحا.. درس السيارة قدام الكليه وهو متشوق.. ودقات قلبه عدادها في الألف... احساسه قوي انه حيشوفها اليوم لامحاله.. نزل من السيارة.. بعدين سكرها كويس ومشي خش داخل.. مشي طول للمكان اللي لقاها فيه اول مرة... زي مادار امس... وصل فيه ووقف في مكانه.. وكل شي فيه تحرك في داخله بقوة ودار عصف مشاعر هائل... بس قلبه اعتصر ألم.. لما شاف دموع عيونها ينزلوا منها.. كانت تشبح في الفراغ وملامح وجهها بادي فيهم الهم.. قعد يقول لنفسه وهو يشوفلها بألم.. "غير من هان عليه ينزل دموعك!..كيف عيون كيف العيون يهون علي حد عنده قلب يبكيهن!.." شافها حطت قفا يدها ع فمها ووجهها باديه فيه ملامح البكاء وكأنها تشد فيه.. وقلبه يزيد ينعصر.. "غير شن صاير معاك بس..!؟" التفت لما سمع واحد يقول لزميله. "هاه شن جو الامتحان اليوم!" رجع شافلها وقال في نفسه.. "زعم هذى اللي بكاها..يعدي في داهيه الامتحان لين يدير فيك هك..المهم ناجحه في قلبي" ضحك ضحكه خفيفه ع الكلام اللي قاله لنفسه.. بعدين قال بلسانه:هذا وقتك..خدي نفس وقال..يارب.. وجي بيمشيلها.. بس وقف لما شافها طلعت تليفونها اللي كان يرن.. هي وين شافت المتصل غمضت عيونها شويه بعدين فتحتهم.. تنحنحت..وخدت نفس..بعدين فتحت الخط وردت.. طوبى:السلام عليكم.. "وعليكم السلام حبيبي هاه طمنيني شن درتي في امتحانك" رسمت ع وجهها ابتسامه وقالت:الحمد لله الزوز تمام التمام.. "باهي باهي بالنجاح يارب" طوبى:اللهم آمين.. "هاه نجيك توا" طوبى:لا راجي نص ساعه نبي نشوف البنات شن داروا ونقعمزوا نهدرزوا شويه اخر يوم هدا.. "حاضر ياقلبي حاضر..الساعه 12 مزبوطه نجيك تمام؟' طوبى بإبتسامه؛تمام.. "نشوفك قلبي سلام" طوبى:في امان الله... نزلت التليفون وسكرت وهي تشوفله بحزن.. وهو بعيد عليها يشوفلها.. لاحظ ان المكالمه اللي ماسمع منها شي زادت ضايقتها.. استأنف اللي جي بيدير ومشي خطوة ووراها التانيه.. بس وقف لما سمع وحده تقول.. "بيبو" كانوا صاحباتها.. هي لما شافتهم ابتسمت من قلبها.. وصلوا فيها وقعدوا يسألوا فيها كلهم.. "شن درتي..شن صار فيك" طوبى وهي تمرر في نظرها عليهم:تمام الحمد لله انتم شن درتوا؟ هما بأصوات منقطعه:باهي..مشي حالك..الحمد لله جاوبت. ناضت وقفت وهي تقوللهم:ربي يسترها معانا. هما مع بعض:يارب..آمين. وحده فيهم قالت؛جعانه.. طوبى:حتى اني هي بسرعه خل نمشوا ناخدوا حاجه ونقعمزوا نهدرزوا شويه الجالي بيجيني 12.. :تمام هي.. ومشت هي وصاحباتها.. وهو معاهم بعيونه وع وجهه ابتسامة اسف وفي نفسه يقول.. "حتى بعد لقيتك بنتعب على مانوصل فيك..معليش ياعبدو الحاجه غاليه مش بالساهل يحوزوها " مشي لمقعد تاني جنب مقعدها وقعمز عليه وهو يشوف لمقعدها بإبتسامه.. مشاعره حلت حسها الشعري يتحرك والكلمات تترتب من قلبه في عقله... وبدي يقول... 🌼يامختلف عالناس زينك بدعه.. ماريت كيفك ياعسل حقاني.. جميل الوصايف ياشبيه الودعه.. كي الورد زينك ياقمر ربااني.. وتفاصيل زولك كي فرس مرتدعه.. عقلي خديته ياااربيع أوطاني.. وديما عليك القلب داير صدعه.. أمرار الحياه عشقك اللي نساني.. وزينك بلا مكياج ماهو خدعه.. ومن غير حتى كحل ريتك راني.. خلخلت قلبي من منابت جدعه.. وكل يوم زايد في غلاك إدماني.. قبلك الخاطر فيه كانت فدعه.. رادعتها وصوووبك اللي زهاني.. وعشقك احتل قلبي ويصعب ردعه.. وعشقك علي كل الإيناث غناني.. ☘☘☘☘☘ خشت سيارة سدرة لتاجوراء .. متوجهة بيها لحوش اختها فردوس هي وعمتها مطيره.. مطيره:احسن حاجه خديجه مش حاضرة كان هدا بتمشي الهدرزة كلها في شن عندهم وشن دايرين.. سدرة؛مغليه تكفي وتوفي.. مطيره:نقدر نسكتها مغليه لكن هديكا الشلولح شن يسكتها كان تكلمت.. وصلوا للسانيه اللي فيها حياش عيلة مصطفى.. ومشوا طول لحوش فردوس.. ~~~~~~~~~~ فردوس:من الفجر نايضه طلعت منادير الصاله وكنستها ومسحت الثريات والحيوط .... بعدين طلعت للجنان درت عليه كله كنسته وضميته.. سدرة:كان غير خليتلنا في شن نعاونوك.. فردوس:نبيكم معاي بس.. مطيرة بإبتسامه:خل مالا نخش ندير الغدي..شن غداكم امس.. فردوس:كسكسي.. سدرة؛ديري مكرونه بالبصله خاطري فيها.. مطيره؛باهي.. ومشت خشت للكوجينه.. سدرة شبحت لفردوس وقالت بشي من الضيق:كلمتي غرفه؟ تنهدت وقالت:ايه كلمتها.. سدرة؛بتجي؟ فردوس؛قالت الحركه اللي دارتهالي بنتك في حوش عمي تخليني نحلف حتى ع عرسها.. سدرة؛يعني تعاركتوا تاني؟ فردوس:وتعاركت حتى مع اريج.. سدرة بضيق:ربي يهديها الشي بين امها وخالتها هي شن علاقتها! فردوس:اريج وتعرفيها كان طق فيا حد معاش تعرفه.. سدرة؛اي حد تاني غيرنا حني..حني خوات سيورنا موليين لبعض هي بتقعد السيه في وجهها.. فردوس:نفس الكلام قلتهولها .. تنهدت سدرة بضيق وقالت:كله من تحت راسي اني. فردوس بإنزعاج:بالله عليك ياسدرة ماترجعي لنفس الاسطوانه..خلاص غيري الموضوع وقوليلي..شن حال خالتي مشتده.. سدرة؛رقدت في المصحه لبارح.. فردوس بقلق:ربي يلطف بيها مسكينه.. سدرة:آمين.. ☘☘☘☘☘ "بالله دكتور اياد قولي الحق شن قالك الدكتور عن حالتها مادرق عليا شي" اياد بضحكه:والله ماقالي اكتر من اللي قالهولك بردة عاديه طبيعي في جو زي هدا تمرض زيها زينا عادي.. فايزة بدموع القلق:بس حسيتها تعباته هلبه.. اياد؛بحكم العمر يافايزة طبيعي تو تقعد هني وتاخد الكورس متاعها وهني التمريض ممتاز يديروا معاها الواجب وزياده واني موجود..ابتسم لما قال كلامه الأخير.. هي ابتسمت بإمتنان وقالت:بارك الله فيك.. اياد:فيك بارك الله..بعدين قال..فايزة..عقد حواجبه..شن حال سدرة المنتهى.. فايزة بضيق:والله ماعارفه شن نقولك شاغلتيلي بالي زي امي بالزبط..تبان عاديه ومافيها شي وهي من داخل تعاني.. اياد بقلق:باهي انتي شن ملاحظه عليها؟ فايزة:قاعده تذبل يادكتور يوم عن يوم..ضاعفه ووجهها ديما شاحب ومعاش عندها ع الطلوع والمخالطه من المدرسه تروح تحبس روحها في دارها اغلب الوقت..كم مرة كلمتها واقترحت عليها نطلعوا وهي تقول لا.. اياد:سكاتهم عن وضعها هدا اكبر غلط.. فايزة:مافي حد سكت يادكتور..المعاينه رفعوها وعاينوها مية الرقيه وجابهولها حتى الطب النفسي اني سعيتلها ودورت ع اخصائيه كويسه مشتلها مرتين بعدين فاتتها.. سكت اياد وهو يمرر في نظره قدامه بقلق بعدين شبح لفايزة وقال:ان شاء الله خير..لاباس ع والده.. فايزة:لايوريك باس دكتور.. قعدت معاه بعيونها وهو ماشي بعدين قالت بأسف:وكان ربي يهديك ياسدرة.. ☘☘☘☘☘ وفي هالوقت.. اخت سدرة الصغيره كانت مقعمزة مع صاحباتها وهما ياكلوا ويهدرزوا.. تغير جو طوبى مع صاحباتها ..انشغلت بيهم وانسجمت مع هدرزتهم ونست في وجودها معاهم همها.. وهو في مكانه اللي كان قريب عليهم. يراقب فيها كيف تهدرز.. تضحك.. تستغرب.. تتعجب.. تنصت.. هدا كله وهي توكل في القطوسه اللي تعودت عليها ووين تشوفها تقعد تحوم حواليها وكان لقتها تاكل تشاركها.. تفكر اول مرة شافها فيها كيف نزلت من سيارة بوها وعطت للك.لب يشرب.. كبرت وماتغير فيها شي.. بالعكس كل شي حلو فيها زاد جمال.. ماكانش بوده يمشي ويفارقها.. بس خلاص..الساعه تمت... وماوقظه عليها غير زميله في العمل لما اتصل بيه كالعاده.. ناض وهو يشوفلها ويملي في عيونه منها ع أمل انه يرجع يشوفها الاسبوع الجاي وتكون الظروف ملائمة اكثر بش يكلمها..ومش عارف مسكين انه مش حيشوفها اسبوعين ع بعض..عطلة نص السنه...! مشي وخلا قلبه عندها .. وليه سنين هالقلب عندها لم يبغى عنها حولا..☘ طلع من الكليه ومشي ركب سيارته.. شغلها وتحرك طول.. بعده بدقيقه.. تجي سيارة الجالي ويدرس قدام الكليه.. طلع تليفونه واتصل بيها.. ☘الجالي:ايوه حبيبي اني برا.. "شويه وطالعه" الجالي:تمام.. سكر وقعد يراجي فيها.. شويه وطلعت وهو يشوف فيها كيف طالعه بالجلابيه اللي كانت اشبه بالفستان لونها بنفسجي فاتح. كان يحب اللون هدا عليها هلبه.. وصلت في السيارة فتحت الباب وركبت وهي تقول:السلام عليكم.. الجالي:وعليكم السلام..شن جو.. طوبى بإبتسامه:تمام التمام الحمد لله..واخيرا كملت وتريحت.. هو ابتسم وقال:موفقه ان شاء الله.. طوبى:يارب... تحرك بالسيارة وهو يقول:قبل نروحوا بنديروا مشوار صغير.. طوبى؛وين؟.. الجالي:تو تعرفي.. سكتت وماكانش عندها فضول اتجاه هالمشوار ولاعندها رغبه في أي شي.. قاعده تكابر مكابرة وتمثل تمثيل انها عاديه وكأن ماصار معاها شي.. واللي صار معاها مش شي بسيط بش تقدر تتجاهله وننساه.. صدمه وصدمه كبيره...مش بالساهل تتخطاها.. بس شفقتها عليه هي اللي خلتها تتحامل ع نفسها وتكتم اوجاعها وتظاهر بعكسهم تماما.. هو كان فاهمها وحاس بيها..برغم ابتسامته اللي كانت مرسومه ع وجهه بس كان متخوف من اي كلمه تقولها او تصرف ديره... الجالي:شن تبي ترفعي معاك هديه لبنت اختك.. طوبى:لما يصير شي رسمي ان شاء الله ناخدلها حاجه.. الجالي بضحكه:لانضال ناوي يقرا الفاتحه في العطله بش يكون عندك علم.. طوبى بإبتسامه:عندي علم قال لأريج.. ضحك الجالي وهو يقول:ويوصي فيا اني رد بالك طلعها.. ضحكت طوبى.. خش لشارع محلات ملابس.. درس قدام واحد منهم... الجالي:هي انزلي . طوبى بإبتسامة استغراب:تمام.. ونزلت معاه.. ومشوا الزوز لمحل فساتين سهرة.. وقفوا قدام المرش متاعه والجالي يقول:شفتيه القفطان هدا.... هي طول شافت بدون مايأشرلها جو عيونها ع فستان مستور لونه موقف جميل للغاليه بكل تفاصيله.. قلبها دقله لما شافاته.. عقلها طار من مكانه.. الجالي؛عرفتيه؟ طوبى وهي مذهوله:الموف؟ ضحك وقال:عرفته بيعجبك لما شفته تخايلته عليك. هو حلو بس عليك يزيد حلاوة.. ابتسمت وقالت:ذوقك ديما حلو.. الجالي:واضح وانتي اكبر دليل.. شبحتله بإبتسامه.. الجالي:نبيك تلبسيه في عرس اخت صاحبي وبيان بنت اختك.. طوبى رجعت شافت للفستان وقالت بإبتسامه:إن شاء الله ☘☘☘☘☘ "انت يابستاشيو" هي تمشي وهي مبتسمه ماتبيش تلتفت.. هو سرع خطواته لين وصل لف وقعد يمشي للخلف وهو يقول:اليوم جاينكم بنتموا فيك وننقلوا الملكيه.. اريج:غير نقول باهي وبعدين احلم براحتك. نضال:بتقولي باهي وانتي فرحانه زي توا زي مانشوف في عيونك.. غيرت عيونها عنه وقالت بإبتسامه؛باهي برا بلاعار الطلبه مركزين فيك.. نضال:ع اساس مش عارفين توا فوتيهم.. وقف قدامها ووقفها وهو يقول:ماتخلي يعفس في موضوع الفاتحه تمام؟ اريج:حط في بطنك بطيخه صيفي كلهم موافقين بالذات جدي بو بوي يبي يطمن علينا اني وآلاء.. نضال:قوليله اني ياجدي كان عطتيني لنضال معاش تفكر فيا بكل في عيونه يحطني وفي قلبه يسكني ويديرني تاج ع راسه.. اريج:اسمع الكلام اللي تقوله توا بنشده عليك راهو.. نضال بإبتسامه ثقه ؛تمام شديه حتلقي خير منه.. ابتسمت وقالت:تو نشوفوا..سلام.. ومشت وخلاته وهو معاها بعيونه بعدين قال؛قصدها الفرخه هادي بتولي خطيبتي وبعد اسبوع مرتي ..! ضحك بعدين قال..آااه ياقلبي وخلاص.. ☘☘☘ وبعد العصر.. طلعت السلطانه مغليه من حوشها.. ومعاها كناينها وبنتها نسرين.. ركبت مغليه مع الجالي وطوبى.. وعائشه ركبت مع نسرين.. واميمه مامشتش لأنها تخدم لوقت متأخر فهاليوم.. تحركوا السيارات من قدام المهدي اللي كان واقف قدام المطحن.. تنهد وقال؛تقول ربي يعاقب فيا..استغفر الله العظيم.. شبح للقهوة لقي نضال واقف قدام القهوة وهو لاهي بتليفونه ومبتسم.. واضح من يكلم.. ابتسم ابتسامه خفيفه وقال؛ع البركه ان شاء الله.. ☘وفي حوش فردوس.. كانت اريج واقفه ع المرايه وهي تشوف في الرسايل اللي يبعت فيهم نضال.. وآلاء تساويلها في شعرها بعد كملت قالت:خلاص.. اريج؛صحيتي.. آلاء:سلمك.. وخدت تليفونها من ع الزيانه ومشت طلعت وهي توخر في شعرها ورا ظهرها.. كانت طالعه حلوة وطلتها ناعمه.. خشت للصاله وين مافي عماتها وحناها ومعاهم مطيره تهدرز عليهم.. ركزت بنظرها ع عمتها ام خطيبة وليد كانت مش طايقتها وناقمه عليها بس لأنها ام خطيبة الراجل اللي تحبه.. فجأة.. رن تليفونها بنغمة رساله.. لفت وطلعت من حداهم وهي تفتح فيها.. وبدت تقرا.. (راك تنسي حلقة اليوم) تأففت بضيق.. بعدين كتبت رساله وبعتتله.. (تمام).. وجت بتمشي للكوجينه سمعت دقة الباب.. طلعت امها من الكوجينه وهي تقول؛جو.. وسدرة طلعت وراها.. بش يستقبلوهم.. وهي مشت ولت للدار وخشتلها وهي تقول:جو ياحنه.. اريج خدت ابتسمت وبدت تكتب في رساله.. الاء:اول بأول.. اريج:حني هكي متفقين نخبروا بعض باللي يصير اول بأول.. آلاء وهي مبتسمه بإستغراب:وافق شن طبقه.. ومشت طلعت.. اريج دارت حوله بعيونها وقالت وهي تعجب ع اختها:وافق شن طبقه... ☘☘☘☘ واستقبلوا سدرة وفردوس مغليه واللي معاها.. وطوبى اللي كانت جايه مع اهل عريس ياما سمعت من تعليقات بالذات من سدرة.. وكانوا يضحكوا عليها.. وهي تتأمل في سدرة كيف تهدرز وتنكت.. تضحك بس كانت بعيونها تخبر فيها ان حالها مش باهي.. انها موجوعه..ومتأذيه..وان حياتها مش زي ماهي تشوف فيها.. بس وين يجوا عيون سدرة في عيونها.. الكلام اللي فيهم كله يتبخر وتحل محله نظرات ضاحكة كذابه..فيسع تنخدع بيهم سدرة وتصدقهم... ☘☘☘☘ عرفت فردوس عيلة اهل راجلها ع عيلة شنيبه.. والعكس.. وهما بدوا يتعارفوا... كانت الاجواء لطيفه بعيده عنها التوتر.. ضيفوهم.. وبعد الضيافه فتحت مغليه الموضوع.. مغليه:حني ناسبنا عيلة الواعر مرتين وهما يخلوك تطمعي في الثالثه صح اريج مش لعيت الواعر لكن جدودها.. وحتى انتم عيلة الله يبارك تشرفوا اللي يناسبكم.. كلهم بأصوات متقطعه:تسلمي..بارك الله فيك.. مغليه:ربي يحفظكم...صلوا ع النبي.. كلهم بأصوات متقطعه:عليه الصلاة والسلام..اللهم صل وسلم عليه.. مغليه:اللهم صل على محمد..ولدي نضال راغب البنيه وقاللنا اني وبوه ماتمشوش لغيرها نبيها هي بس.. ابتسموا مغليه:ووين قاللنا اني وبوه فرحنا الحق وقلنا احسن ماأختار...البنت الله يبارك عليها ماعندنا مانقولوا فيها.. فردوس:تسلمي خالتي مغليه.. مغليه:سلمك بنتي..وولدي مابنشكره انتم تعرفوه كويس ومتربي قدامكم.. 🍃ومغليه تحكي على نضال.. وطوبى تشوفلها وفي وذانها تردد صرخات الجالي وهو يقول 《 جيبولي امي تقرا عليا جيبولي امي..》 وتفكرت كلامه لما قاللها.. 《 عارف شن قلتي في عقلك..متأكد قلتي غشونا عيت شنيبه وضحكوا علينا..بس صدقيني ماليا يحسابوني بريت..مايحسابونيش قاعد ماشي بالدوا..مافي حد كان يعرف غير طاهر ومرته..》 كذب عليها الجالي وهي عارفه..اهله يعرفوا وبالأكيد امه مش خافي عنها.. واضح انها هي اللي كانت تهدي فيه لما تجيه الحاله هدا علاش قعد يصرخ بإسمها ويقول جيبوها تقرا عليا.. هني طوبى طاحت من عينها مغليه وحست روحها مش طايقه تشوف في وجهها.. غيرت عيونها وهي تتسائل في نفسها.. علاش هي يديروها هكي! علاش يضحكوا عليها هي وعيلتها ويغشوهم علاش!؟ مش عارفين ان اللي داروه حيتحاسبوا عليه دنيا وآخره؟! مش عارفين ان العشم اللي تعشماته في الجالي لما خاب حطمها من داخل..! واجعتها روحها هلبه..وواجعينها اهلها اللي انضحك عليهم.. بس وين تتفكر منظر الجالي والقصه اللي حكاها.. يوجعها هو اكثر وتقول لروحها.. هذا مرض..ابتلاء من الله..مش بيده... ولو هي فكرت تسيبه بسببه حتزيد دمره وممكن تقضي عليه وحاجه زي هادي ماتقدرش تتحملها... لو وقفتي معاه ياطوبى وساعدتيه يشفى حتكسبي اجره. وحتعيشي معاه الحياة الحلوة اللي تمنيتها.. الجالي راجل كويس..راجل بكل معنى الكلمه ياطوبى.. ردي بالك تنسي انه كان حيضحي بروحه ع خاطرك.. راجل زي هدا المفروض توقفي معاه وماتتخليش عنه.. فجأة.. سمعت صوت نغمة الرساله جاي من هاتفها... قاماته وفتحتها.. كانت صورة.. يبان منها مدخل الصاله كله ورد... ابتسمت بآستغراب.. جتها بعدها رساله.. "الليله هادي مش حتنسيها العمر كله" ابتسمت.. وهالابتسامه شافتها سدره وابتسمت معاها بعدين رجعت لهت بكلام مغليه مع جدة اريج وعماتها.. الجده:اهم شي عندي تاخد شهادتها وبعدين تتزوج.. مغليه:ايه ياحاجه بنقروا فاتحه بس العرس ان شاء الله بعد تتخرج.. فردوس:اريج شاده في الحاجه هادي هلبه قالت تكمل قرايتها قبل. نسرين:وخوي ماعنداش مشكله..يخي بالعكس هو يقري فيها فالجامعه وتو يساعدها.. عمة اريج:خلاص مادام هكي كويس.. مغليه؛شن ياحاجه راضيه؟ الجده هزت راسها وقالت؛راضيه راضيه ربي يكمل ع خير.. بإبتسامه قالت مغليه: آمين. نسرين؛وينها اريج مابانتش بكل.. فردوس:آلاء بري نادي اختك.. ناضت آلاء ومشت طلعت من حداهم.. 🍃خشت ع اختها الدار وقالت:هيا اطلعي.. اريج تهكما:طيب فيا والله.. ضحكت الاء وطلعت.. وهي بعدت تكتب في رساله وبعتتها.. (بنطلع توا) (اسمعي صوري ودسيها الصورة نبي نشوفها بعد الفاتحه) ضحكت وبدت تكتب بعدين بعتتها.. (باهي ياطرشوق) وحطت تليفونها ع السرير. بعدين ناضت ومشت دارت طله ع شكلها في المرايه.. بعتت قبله لنفسها وقالت:عسل تهبلي يابنت انتي.. غيرت عيونها للباب ومشت وهي تقول:خل نطلعوا نسلموا ع السلطانه الأم.. 🍃وطلعت اريج.. لما شافتها طوبى ابتسمت من قلبها.. ومغليه عجبتها هلبه.. جتها اريج وطبست سلم عليها وهي تقول:كيف حالك وحال صحتك.. مغليه:الحمد لله.. اريج:دوم يارب.. بعدين سلمت ع نسرين وعائشه.. واخر وحده خالتها طوبى.. بعد سلمت عليها مشت قعمزت قريبة ع خالتها سدرة.. نسرين؛شن جو الامتحانات يااريج .. اريج:الحمد لله تمينا وعدوا ع خير.. مغليه:ان شاء الله بالنجاح.. 🌼وهدرزوا شويه هما وياها..بعدين امها اشرتلها تخش.. بعد خشت بلحظات هما ناضوا بيروحوا.. وطوبى كان لازم تروح معاهم.. اريج:خير جده الجالي هدا قوليله بنت اختي استاحشتني.. طوبى بضحكه؛ والله مانقدر يااريج.. ع جية سدرة؛بري روحي بري.. ضحكت طوبى وقالت:تصبحوا ع خير.. سدرة:قدامك كل خير.. ومشت طوبى طلعت بسرعه.. اريج؛شن هدا معقوله يخليها تجي معاهم وتروح معاهم زي البرانيه! وهي ماعندهاش شخصية قدامه بكل ماتعرفش تقول لا.. سدرة؛مش هكي ياهبله هدا راجلها واجب عليها تسمع كلامه وحتى انتي بعد مايعقد عليك نضال لازم تسمع كلامه ولو جيتي تعارضيه اعرفي كيف تعارضيه وتقنعيه باللي تبيه مش تمشيها عناد مناطحه..الزواج اللي مايكونش فيه احترام مايستمرش راهو.. اريج وهي محرجه؛حاضر.. سدرة؛هي خشي داخل صقع.. اريج مشت خشت داخل.. وهي بعد خشت اريج مررت نظرها ع الجنان. بعدين شافت لسمي لونها احمر لون الغروب.. للحظه.. حست بإحساس غريب وكأنها انفصلت عن الدنيا وكأنها مش فيها.. الشعور هدا خوفها..وخلاها لفت بتخش.. فجأة بدت تشوف في صور الحاجات اللي قدامها خشت في بعض.. حست انها بدوخ..بس شدت في الباب .. وهي شاده فيه قعمزت ع ركابه قدامه.. وقعدت تتنفس بسرعه وتسمع في دقات قلبها.. وشويه شويه.. بدت ترجع لما كانت عليه..بس الخوف قعد مرافقها.. سمعت صوت الآذان.. تلقائيا فزت من الخوف وقفت ومشت خشت داخل وسكرت وراها الباب.. 🍃🍃🍃🍃 وطوبى في الطريق مع راجلها وامه.. يهدرزوا ع موضوع نضال واريج.. هي كانت تشارك بكلمات بسيطه فقط... وقعدوا هكي لين وصلوا للحوش.. الجالي:غدوة بإذن الله جايين ع الغدي.. مغليه:براحتكم..تصبحوا ع خير.. هما ردوا عليها:قدامك كل خير.. وتحرك طول الجالي.. وسيارته فاتت من قدام ربيع اللي كان مقعمز قدام المطعم متاعه وهو يشوف لسيارة نسرين.. نزلوا منها هي وعائشه.. نسرين صدفه جو عيونها عليه لقاته يشبحلها.. توترت وغيرت عيونها عنه ومشت مع مرت خوها وخشوا للحوش.. وهو تنهد بضيق... شاف نضال وهو ماشي بسرعه وخش وراهم ضحك ضحكه خفيفة.. ع طلعة عبد القيوم من الحوش وفي يده لوحه مغلفه.. ومشي طول لحوش لطفي الواعر.. قعد يلحق فيه ربيع بعيونه لين وقف قدام الحوش ودق الباب.. طلعله لطفي وهو يقول:اهلا اهلا..اهلا وسهلا.. هو بإبتسامه قال:وبيك عمي لطفي شنو حالك اليوم؟. لطفي:الحمد لله بخير شن حالك انت.. عبدالقيوم:في نعمه الحمد لله..مدله اللوحه وقال..تفضل امانتك.. خداها لطفي وقال:يعطيك الصحه وبارك الله فيك.. عبد القيوم:فيك بارك الله..بتعدي للجامع؟ لطفي:شويه خل ندخلها داخل ونجيك.. ومشي لطفي خش داخل باللوحه حطها في داره.. بعدين ولى طلع.. لطفي:هيا.. عبد القيوم:هي.. وسكر لطفي باب حوشه وتسايروا هو وعبد القيوم للجامع.. ☘☘☘☘☘ مررت نظرها ع اللي دايره في الحوش من زينه .. شموع وورد منثور .. وطاوله عشي مزينه.. ضحكت وقالت:تغلبني في الحاجات هادي.. الجالي:في هادي بس. ابتسمت وهي تقول:منظر الحوش يجنن.. الجالي؛جديات عجبك.! طوبى وهي تشوفله بإبتسامه حلوة:هلبه.. شد يدها وقال:باهي اركبي البسي حاجه اخترتهالك من بين حوايجك عجبتني وبعدين انزلي.. طوبى بإبتسامه:تمام.. طلقت يده اللي هو خلاها يالسيف.. ومشت طول للدروج وركبت فوق. وهي راكبه كانت حاسه بوجع قلب ع حاله.. يحاول يرقع اللي انشق بينه وبينها امس كأنه يبي يرضيها ويملى عيونها.. كانت حتبكي من كثر ماوجعها.. بس شدت روحها..ومشت خشت للجناح. مشت لدار الملابس متاعها.. شافت ع الطاوله فستان لونه خمري تفصيله حلو وعليه يطلع احلى.. ابتسمت بتنهيده مكتومه.. بعدين مشت خداته.. وبدت تجهز في نفسها.. 🍃وهو لوطا مقعمز يراجي فيها. شاد في يده هلبة مجوهرات صغيره فيها خاتم ناعم وحلو.. كان يبي يفاجئها بيه.. يشوف للخاتم بنظرات يائسه.. مهما يدير مش حيقدر يرجع شي زي ماكان خلاص.. شويه سمع صوت كعب الكندرة هي نازله ع الدروج.. شبحلها.. وناض وقف في مكانه وقلبه طار بين ضلوعه.. جميله..جذابه..مبهره...مش قادر يحول عيونه عنها.. وصلت لوطا ومشتله وذيل الفستان ينجر جر مع خطواتها.. وصلت فيه وقالت بضحكه:علاش اخترت هدا بالذات.. الجالي وهو يتأمل فيها:ع قد ماتخيلتك بيه ماتوقعتش تخليه حلو لهالدرجه..! ضحكت بخجل.. شد يدها وحطها ع كتفه وهي تشوفله.. الجالي:مرة حطيت يدك ع كتفي واني في عز انسجامي مع الخدمه.. قطعتيني عن العالم ورفعتيني للعالم متاعك وخليتي عصبيتي في لحظه تختفي.. حط يده ع يدها وقال: يــدك الـتـي حـطـت عـلى كـتفي كـحـمامة . . نـزلـت لـكـي تـشرب عــنــدي تــسـاوي ألـــف مـمـلـكة يــــا لـيـتـهـا تــبـقـى ولا تــذهـب ماقالش كلام تاني بلسانه.. خلا عيونه هي اللي تتكلم.. عيونه اللي ماقدرش يحبس دموعهم وطاحوا.. قلبها ماتحملش دموعه.. دموع الراجل واعره.. واعره ع المراة لما تشوفها.. بالذات لو كانت دموع توسل.. مسحتهم بإيديها الحنونات.. بعدين احتواته وهي طبطت عليه وتقول:جالي حياتي من غيرك معاش تولي فيها روح تموت...مستحيل نخليك.. وهو شد فيها بقوة بدون مايتكلم.. بدون مايقول شي في فاهماته وعارفه بشن يحس.. وشعور التعاطف مع حالته زاد كبر في داخلها اكثر.. وهالشي خلاها تاخد وعد ع نفسها الليله انها ماتتخلاش عنه لو شن يصير وتحاول تساعده بكل اللي تقدر عليه بش طلعه من الحالة اللي هو عايشها.. 🍃وبعيد عنهم.. كانت سره الأعظم..عايشه في حالة غضب مخليتها مش متقبله حتى صغارها.. حمزة:امي تعالي شوفيها بالك تقدري تصلحيها؟ نجاة بغضب وعيونها يدمعوا:حمزة اطلع من قدامي.. حمزة بإلحاح:امي بالله عليك.. سكتاته لما صرخت في وجهه بطريقه ركباته الرع.ب وخلاته يطلع يجري وهي تقول:اطلع ياح.يوان..ياحي.وان اطلع.. الصغار ارتعبوا منها.. جتهم خالتهم دختلهم دارهم وسكرت عليهم. ومشت تجري لنجاة خشتلها.. لقتها تخبط وتكسر في الدار وهي تعيط.. قعدت تشبحلها وهي متألمه.. مابتش تدخل تبيها طلع غضبه كله.. ماتعرفش شن صار معاها بالزبط مابتش تحكيلها.. بس متأكده ان اللي هي فيه من ورا الجالي.. بعد ماتعبت من التكسير والتخبيط.. قعمزت ع السرير..وحطت راسها بين ايديها وغمضت عيونها بشده.. جي بين عيونها الكف اللي خداته من خديجه.. وهزايب المهدي وطرده ليها من الحوش. واخر شي الكفوف اللي خدتهم من الجالي.. الاهانات هادي.. خلتها تتفكر ضرب مرت بوها واهاناتها.. وعجزها عن الرد عليها.. نفس الحالة قاعده تعيش فيها.. بس بسبب مني هالمرة بسبب طوبى واللي يخصوا طوبى.. مر قدام عيونها كل موقف جمع الجالي وطوبى.. وكل موقف شافت فيه طوبى مبتهجه وسعيده.. فتحت عيونها وهي تفكر.. كيف تخليها تعيش نفس اللي هي عايشاته توا.. تبي تح.رق قلبها وتقهرها بأي طريقه كانت.. تمددت ع السرير وعطت اختها بظهرها وقعدت تفكر.. وصابرين قعمزت حداها في الدار وقعدت تراقب فيها.. خوفا منها دير في روحها حاجه... ☘☘☘☘☘ روحت اميمه من المستشفى مع حسين.. ولأن عمر مسافر.. منها ليها قررت تبات في حوش اهلها بدون ماتعطي علم لأي حد من حوش اهل زوجها.. هي مش شايفه روحها ملزمه تخبر اي حد بشي عايشه في شقه بروحها ومستقله عنهم مش مجبوره تخبرهم بتحركاتها.. 🍃صفيه؛احسن ماديري بش تونسيني.. ابتسمت وهي تساوي في كم التوته وقالت؛ماصار شي جديد.. صفيه؛يوسف جي العشيه.. ضيقت عيونهاوقالت؛روحوا هو ومرته. صفيه؛هو بروحه مرته قعدت عند ماليها قال امها مريضه هلبه ماقدرتش تخليها..خوك مش عاجبني شكله صار بينه وبينها مشاكل نحس فيها تبي تقعد مع اماليها ماتبيش تروح.. تنهدت وقالت؛وارد..ان شاء الله خير..هي خلينا منهم بالله معاش نبي نفكر في حد..خل نمشوا الكوجينه نديروا عشوة حلوة ليا اني وياك.. ابتسمت صفيه وقالت ؛باهي.. ع جية حسين بسفرة عشي بوه.. فات من حداهم ومشي للكوجينه.. حط السفرة وطلع وهو يقول؛رقد.. صفيه؛باهي.. مشي حسين من حداهم لدار واميمه تبعاته بعيونها بعدين قالت؛تعرفي في بنيه معاي في المستشفى تهبل تهبل ماما واسم ع مسمى حسناء..بنيه محترمه وراقيه كل مانشوفها نتخايلها لحسين.. صفيه بحماس:احلى من طوبى؟ اميمه بضحكه؛كل وحده جمالها بروحها..بعدين مش مهم من الاحلى..المهم حسين يطلع من الحالة اللي هو فيها ويفكر في حياته.. صفيه:ياريت..باهي اوصفيهالي ترا... ضحكت اميمه وقالت؛تعالي للكوجينه باهي.. ومشوا مع بعض وخشوا للكوجينه.. ☘وفي حوش اهل راجلها.. عزوزتها كانت جايبه سيرتها هي وبنت ع التليفون.. مغليه:المشي مابتش تمشي معاها برغم ماشيين لحوش بنت عمها..وروحي في الليل من الخدمه ع حوش ماليك طول من غير ماتخبري ولاتعطي علم كان مش يزن شافها ماعرفت.. "هادي من تحساب روحها!!...رافعه خشمها ع شني نبي نعرف!! ناسيه روحها الجربا بنت القفاص اللي كانت تلبس في هرابيد الناس المعفنه هادي" مغليه:خلاص عاد ولت دكتوره من يقدر يكلمها ولايحاسبها.. "وكان في وراها راجل صح راهو مادارتش هكي..هادي بتعوم ع عوم بنت جويده وبتجبد عمر كيف مالمهدي جبداته بنت جويده.." مغليه:والله ماهي صايرة واني عايشه نتنفس.. اني نعرف شغلي معاها هادي اللي مش محترمه حد..خزي رباية مس.خه.. "سح.يقه...باهي بنت عمها شن جوها" مغليه؛هاديكا عاقله هلبه ومحترمه..واهم شي حاجه عندي انها مريحه خوك الجالي.. "اشبج بنت اختها تجي زيها ولالا" مغليه:زيها وخير منها طوبى مش مطلوقه زي اريج اريج ناشطه وهدرازة وتعرف كيف تتكلم ودمها خفيف.. "اشيه اشيه شكلها بتولي دلوعتك هادي" مغليه بضحكه:كان هنتني ع ولدي نحطها في عيوني.. ☘☘☘☘☘ (ايه وشن قالت تاني) (قالت ماعندهاش مشكله كان درت العرس توا) (ياقعادك تحلم) (لئيمه.) (باهي بنسكر توا البرنامج بيبدا) (تعرفي كان نخش الاذاعه وندير برنامج مهند يعتزل) (ناقص بلي انت..انت هكي ومش قادره عليك تبي تولي مذيع ومشهور فوقها..ترا قعمز وهني روحك وماتخلنيش نفركشها) (خير دعوتك يامختشه اني قاعد نتخيل) (ماتتخيلش) (حاضر) (برا خلاص) (حاضر) (يحضرلك الخير) (حاضر) قعدت تضحك.. شويه سمعت موسيقى البرنامج.. علت صوت الراديو.. 🌟مستمعينا من كل مكان فيك ياطرابلس..مرحبتين بيكم في ليلة حلوة شتويه بإمتياز..صقع..والمطر تصب والضي هارب.. ضحك وكمل يقول..لازم تطلع حاجه في نص تفسد.. هادي ليبيا يا ساده..خودوا ولاخلوا... ضحكت اريج.. جتها رساله شافتها.. (تعرفي كان نشده البرنامج نقلبها) (هدا برنامج للناس العاقله) ( وعلاش تسمعي فيه انتي) ضحكت وقالت:متخلف.. 🌟موضوع حلقتنا الليله.. "القناعه" كلمة كلنا نعرفوها..بس معناها مش اي حد يعرفه.. واللي قال القناعه كنز لايفنى قال عبارة من اكثر العبارات صدقا قالها بشر.. القناعه نعمه اغنى الناس هو اللي يملكها.. 🍃كلام الحلقه.. كان لآء اللي مش مهمته بيها.. مقعمزة تتفرج ع مقاطع انستقرام يخصوا صاحباتها وهما ماشيات يزوروا في بوتيك ام أكابر وكانوا يتكلموا ع اللبس اللي فيه اللي كان كله ماركات عالميه.. وفساتين لمصممين من برا البلاد.. تغار لدرجة القهر وهي تشوف فيهم كيف يحكوا عن لبسهم من وين خدوه ويذكروا في اسعاره.. خطر ع بالها ايام زمان كيف كان وليد ياخدلها اللي يجي في خاطرها ويخلي فيها تتباهى قدام صحاباتها وماتحسش بروحها اقل منهم في شي بحقد قالت؛كله من امه الوا.طيه ان شاء الله تم.وت ☘☘☘☘☘ تاني يوم.. الجمعه... فطرت اميمه مع امها وجدها... وقعدت تقلب مع امها في الحوش لين جي وقت الغدي.. جهزت نفسها ومشت لحوش شنيبه.. هداكا الوقت كانوا طوبى وعائشه في الكوجينه يوتوا في الغدي.. ومغليه مقعمزة حداهم تقرا في سورة الكهف.. ع خشة اميمه عليهم من الباب الخارجي وهي تقول:السلام عليكم.. شبحولها الزوز بضيق وردوا:وعليكم السلام.. اميمه حست من وجوههم ان في شي.. شبحت لمغليه لقتها وهي لابسه نظارات وتقرا في القرآن .. عاقده حواجبها بغضب.. بلعت اميمه ريقها بخوف بس حاولت تبان عاديه.. قالت لسلفاتها:في شن نقدر نعاونكم؟. "في شن بتعاوينهم ماقعد شي..!" شبحولها التلاته.. وهي سكرت المصحف وحطاته ع الطاوله.. بعدين حولت نظاراتها وقالت؛نعرف امك كويس عشرة عمر اني وياها مراة تعرف الاصول..لكن شكلها نست تربيك عليها.. طوبى ضايقت هلبه.. اميمه بشي من الح.ده؛معليشي عمتي طلعي امي من الدوة هادي لوسمحتي.. مغليه:لامانيش مطلعتها لأن كل شي يوقف عليها هي لو عرفت تربيك صح راهي ماخلاتكش تباتي عندها من غير ماتخبري اميمه:اللي مفروض عليا ناخد اذنه عنده علم.. مغليه:من اللي قالك خودي اذن اني قلت اعطي علم.. اميمه:وحتى هادي مش ملزمه بيها.. عائشه في نفسها"لامش هكي بااميمه غلط غلط" طوبى "شن قاعده تقولي ياأميمه بس..! خبطت مغليه بيدها ع الطاوله ناضت وقفت وهي تقول بغضب:ملزومه تقولي غصب عنك مادام تروحي من خدمتك في عز الليل بش نعرفوا وين ديارك ومانقولوش واخده راحتها لما يسافر راجلها.. طوبى:عمتي.. مغليه بصوت عالي؛عيشه خودي طوبى واطلعوا من هني.. عائشه شدت يد طوبى وخدتها معاها.. وطوبى تشبحلها بقلق..لين طلعت من الكوجينه.. 🍃والقلق عليك انتي ياطوبى.. من اللي قاعده دور في حسابك ع الفيس وتفتش بالمنشور بالصورة بالتعليق ع اي شي يخليها تشفي غليلها منك... ولقاته....
#اهرجو_يناير #طوبى
....يتبع.....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
