#تكملة_الجزء_الثاني_عشر "بنت الريح2" #طوبى #جمان_فريد ومن سنه 2002...لسنة 2003... الجالي هادي تاني سنه ليه في كلية الهندسه... وحسين هادي تاني سنه ليه في الكليه العكسريه... هالشابين ولو ملفتين هلبه في شارع القهوة.. وسمعتهم في الشارع زي المسك... بالذات الجالي..اللي كان اجتماعي هلبه وخدوم وعاقل والشارع كله يحبه... عكس عمر خوه..اللي كل مايكبر يزيد غرور وعجرفه.. وقاعد مكره اميمه في شبح عمرها زي مانقولوا.. اميمه اللي كل ماتكبر تزيد تتعقد وتفقد ثقتها بنفسها برغم انها في قرايتها كانت شاطرة هلبه.. عكس غرفه اللي كانت نسخة من عمر في الشخصيه..لكن في قرايتها كانت تمشي بالدف.. عقلها ماشي مع حاجات تانيه..الاغاني الكليبات المسلسلات..والحب اللي بدت تفكر فيه وهي في سن صغير.. وفارس احلامها كان ولد عمها حسين... اما اللي واكله الجو في شارع القهوة كله كانت طوبى.. دارت اصحاب في كل حوش في الشارع.. تصرفاتها كانت بريئه هلبه طيبه هلبه..حنونه هلبه... تحب تتشارك مع الصغار اللعب وحتى الحوايج عادي.. كانت مهمته ببنت فايزة زي الكبار بالزبط... مصاحبه بنات اختها اريج وآلاء بس اريج كانت قريبه عليها اكثر... اريج اللي كانت ماطيق مخلوق اسمه نضال... كان ديما حاط راسه براسها يناشب فيها وشادها على قصر قامتها.. وهي كانت تاكل فيه بلسانها اللي كان اطول منها لين مرات مايعرفش يرد عليها... عكسها آلاء اللي كانت هاديه وماتحبش تحتك بهلبه صغار.. دابها وداب خالتها واختها وبس.. وهكي كانت اخر تطورات شارع القهوة في ثالت سنه من الالفيه الثالثه... وقعد ماشيه الحياة ع هالمنوال.. لين جي شهر عرس خديجه ومحي الدين اللي صارت فيه مفاجأة غير متوقعه... 🌻مغليه:قالوا كسوته واتيه واموره كله تمام لكن ماتفاهمش هو وخطيبته فسخوا... خديجه:عليك ناس هما معروفين في بلاد العز كله..شن قلتي نسرين.. نسرين قعدت تشبحلهم شويه وهي تفكر بعدين قالت:خلاص موافقه.... تعرفوا على شن وافقت نسرين.. ع عريس جاها عن طريق ناس معارف قعدوا يدوروله بعد مافسخ خطبته وكان يبيها من عيلة متسميه ودلوه عليهم.. وافقت نسرين انها دير عرسها مع اختها.. يعني تجهز نفسها في ظرف اسبوعين.. وسبحان الله كأنها كانت حاسه لما قعدت تشري في بتات ليها ع مهلها من قبل مايجيها اي موضوع خطبه.. لقت روحها مدايرة حتى الذهب..يعني واتيه... ~~~~~~~~~~ مطيرة:سبحان الله ع النصيب.. فايزة:ايه...تصدقوا شافها امس بس.. سدرة:كلمتني امس قالت ارتحتله... فايزة:ايه قالتلي...ربي يهنيها ويسعدها.. مطيرة وسدرة:آمين... سدرة:امس بعتتلي الكروت مع نضال..حتى كرتك عمتي واتي..ماتخشيش الصاله الا بيه.. مطيرة:بنمشي بش نحضر عرس في الصاله ونشوف شن شكله العرس في الصاله.. سدرة:اني قلتلها بنجيك نهار الصاله بس..وحتى فردوس قالت هكي بدير.. فايزة:احسن..اني بنمشي غادي من اول مايبدا..عادي نخلي صفو عندك!؟ سدرة:عليك سؤال بايخ.. ضحكت فايزة.... ومطيرة قعدت تشبح لسدرة بإبتسامة حزن... 🌻🌻🌻🌻🌻🌻🌻🌻🌻🌻🌻🌻🌻🌻🌻🌻🌻 في اسبوع العرس... كان عرس كبير كامل... حتى من النوبه داروها فيه..والزمزامات... خديجه ونسرين كانوا فرحانات هلبه وعاشوا فرحتهم كامله ماناقصها شي... يوم الكسوة كان اقوى يوم انقلب فيه شارع القهوة قلب.. واللي يشوف عواطف ونجاح وهما يرقصوا وفرحانات يقول هادم يموتوا في خديجه.. لكن هدا كله كان من القهر...بنات الشارع شبه كلهم تزوجوا وماقعدش كان هما.. هديكا الليله كانت ليلة النجمه... سهروا فيها للفجر مع النوبه..وخلوا خديجه ونسرين يطلعوا يدوروا في الشارع حوالين حوشهم كجزء من العادات والتقاليد فهديكا الليله... كان عرس بكل معنى الكلمه..وفرح بمعنى كلمة فرح... 🌻🌻🌻🌻🌻🌻 يوم الحفله... الساعه 8:00مساءا... نزلوا سدرة وفردوس والبنات الصغار من سيارة لطفي في الصاله... ونزلوا من سيارة يوسف..مطيره وصفيه واميمه. وخشوا كلهم مع بعض للصاله... توجهوا طول للحمامات بعد مادلوهم عليهم.. حولوا عباياتهم وساووا مكياجهم...وبعدين مشوا للقاعه... وين خشوا.. عيون سدره جو ع عائشه اللي كانت لابسه قفطان مستور لكن كبير وكانت طالعه جميله جدا..وولدها شاد في يدها يجبد فيها يبيها تركز عليه..وهي تهدرز مع وحده... شبحتهم مغليه جايين... مشتلهم ورحبت بيهم ترحيب رسمي ودلتهم ع طاولتهم.. ومشوا قعمزوا عليها وكأنهم مش جيران وعشرة عمر ويعرفوا بعض من سنين... سدرة بعد قعمزت ماقدرتش تحول عيونها عن ولد المهدي.. الولد كان حلو هلبه ودمه خفيف.. كان خاطرها تشده وتبوسه وتهدرز عليه وتركز ع ملامحه وتشوف من يشبه اكثر... مطيرة:ابهه الصاله.. فردوس:هادي غاليه هلبه... مطيرة؛حتى هما عيلة شنيبه ياحنه.. صفيه؛مغليه متغيره هلبه لبسها وشكلها تغيروا هلبه.. مطيره:ذكرتني بالممثلات اللي في التلفزيون.. صفيه بضحكه:صح.. فردوس:فلوس ياماما فلوس... هما يهدرزوا وسدرة في عالم تاني مش معاهم... شويه وفتحوا في الصاله اغاني ناشطه.. والدنيا ناضت ترقص... بالذات البنات الصغار..ماعدا اميمه اللي كانت متحشمه في لبستها... صح كانت حلوة..بس ماتتقارنش بلبس قريناتها واولهم بنت عمها.. قعدت سدرة تتفرج ع طوبى كيف كانت ترقص.. وكانت هايمه معاها وتضحك بعدين قالت..ربي يحفظك ياعيوني... وفاتت نص ساعه.. بعدها جي دور خشة العرايس... ومغليه تجري ومعاها عائشه..اللي مشت لبست حجابها.. شويه والمسؤوله ع المنظومه قالت؛المتحجبه تلبس.. بدوا النساوين يلبسوا في الحجاب... وماهي الا لحظات.. واستغلت انشودة اسماء الله الحسنى لهشام عباس.. وبدوا يخشوا العرايس ومعاهم خوتهم.. الجالي مدخل خديجه.. وعمر مدخل نسرين.. خديجه ونسرين كانوا طالعات احلى من بعض.. والجالي وعمر كانوا جذابين هلبه... عيون اميمه بروحهم قعدوا يلحقوا في عمر.. زهي في عينها هلبه..اول مرة تشوفله بهالنظره.. اماالعرايس.. فكانوا يوزعوا في نظرهم ع الحاضرات ويحيوا فيهم.. نسرين وين شافت سدرة حيتها بحرارة... وسدرة ردت عليها بنفس الحرارة وبعتتلها بوسه طايرة... وكانوا وراهم فايزة وعايشه يقيموا في الطرحه.. ومحمد ولد المهدي يتبع في امه..وعيون سدرة معاه.. مطيرة:عجبتني خديجه اكثر.. فردوس:حتى اني...نسرين مخربه عليها التسريحه.. سدرة؛تهبل نسرين ريحوا رواحكم.. ضحكوا.. وصلوا العرايس للكوشه فتحولهم اغاني.. "عرايس ارقصوا مع خوتكم" خديجه ونسرين ماصدقوا قعدوا يرقصوا مع الجالي وعمر.. والجالي وعمر كانوا متحشمين شويه بعدين انطلقوا.. والكاميرا تصور... وعائشه وفايزة يصفقوا.. بعدين جتهم مغليه وقعدت ترقص معاهم حتى هي.. "ماشاء الله عليكم ماشاء الله عيلة شنيبه" وقعدت مغليه تزغرد وتخمس ع صغارها... شويه وطلعوا الولاد.. والنساوين تنفسوا وحولوا عباياتهم.. وبدي الجو ينشط فالصاله... والعرايس شدتهم المصورة وبدت تصور فيهم... شويه.. وركبت سدرة ع المسرح ومشت بتبارك للعرايس... نسرين بضحكه:سديره..وحضنوا بعض.. سدرة:ان شاء الله بهناك ياربي.. نسرين:تسلمي ياعمري الفال ليك.. يدوب ابتسمت سدرة ووخرت عنها ومشت لخديجه وسلمت عليها باليد؛مبروك.. خديجه بمجامله:الله يبارك فيك..طلقت يدها وقالت..عيوش تعالي ساويلي الطرحه.. عائشه:لحظه بس..ومشت فاتت من قدام سدرة وكأنها ماتعرفهاش.. وجت لحماتها وقعدت تساويلها طرحتها.. فايزة:سدرة وين طاولتكم.. سدرة التفتت واشرت عليها وقالت:غادي.. نسرين؛معليشي سدرة انتي بتقعمزي هني مع نسرين وعائشه صحباتي نبيهم قدامي ونبي ننزل نقعمز معاكم ونتعشى.. فايزة شبحت لسدرة بتوسل.. غيرت سدرة عيونها عنها وشبحت لنسرين بإبتسامه وقالت:باهي.. بعتتلها نسرين بوسه ابتسمت سدرة.. ونزلت مع فايزة وقعمزوا في طاوله مخصصة.. واستمرت اجواء الحفله حلوة بالمرة... وطبعا لما ناضوا رقصوا العرايس الجو زاد ولع.. رقصوا خديجه ونسرين وهما فرحانات ع الاخر.. ومعاهم البنات.. ومن ضمنهم سدرة وفايزة وعائشه.. كانت سدرة تشوف لعائشه وحنة ايديها..وتفاصيلها.. كانت تبان عائشه مرتاحه هلبه وسعيده.. غصب عنها كان قلبها يوجع فيها... وزادت لما شغلوا اغنيه ع مرت الخو.. وقعدوا خديجه ونسرين يرقصوا هما وياها.. وسدرة تصفق وتشوف فيهم كيف يرقصوا ويضحكوا.. كانوا سعداء هلبه...وهي تعيسه... لاحسدت ولاحقدت..لكن غارت..ووجعتها روحها...وجعتها هلبه.. اللي مش قادرة لتوا تطلع من سجن عشق المهدي وتعيش حرة طليقه...سعيده... انسحبت من حداهم ومشت للحمام.. خشت وسكرت ع روحها.. وقعدت تمروح ع عيونها بش دموعها ماينزلوش.. وتاخد في نفس وطلع فيه..وتاخد في نفس واطلع فيه.. لين هدت..وقدرت تتمالك نفسها.. غمضت عيونها بعدين فتحتهم وفتحت الباب وطلعت.. وهي ماشيه بإتجاه القاعه.. وقفت في مكانها وين شافت ولد المهدي.. ابتسمت وعيونها تعبوا دموع ومشتلها. قاماته في غمرها وقعدت تشبح لشكله وقالت:ياربي بوك بوك...نقش بوك..حتى نظرة العيون نفسها.. محمد قال:بابا..مهدي.. سدرة:ايه بابا المهدي اللي ان شاء الله ربي يسامحه ياحبيبي .ولايسامح اللي وقف بيني وبينه..كان هذا راك انت توا ولدي اني... والولد يشبحلها وخلاص.. خدت منه بوسه ع خده وقالت؛ربي يحفظك.. "ميدو...ميدو" طول سدرة نزلاته لما سمعت صوت عائشه وهربت وادرقت.. ع جية عائشه:ميدو ياماما شن دير هني وقفتلي قلبي.. محمد؛بابا.. جاته وقاماته وقالت:باهي تو نكلموا بابا.. قامت تليفونها واتصلت بالمهدي.. عائشه:ايوه مهدي ميدو من بكري يزن ع راسي نبي بابا نبي بابا...................باهي تعالى قدام الباب.......لا شن نطلع هكي هبلت مالا..!..ضحكت وقالت...هي شويه ونطلعهولك....سلام.. وسكرت وقالت:هي خل نمشي نلبس عبايتي بش نطلعك لبابا.. وخشت عائشه داخل.. وطلعت من سدرة من المكان اللي كانت مدرقه فيه وهي تمسح في دموعها.. بعدين خشت للقاعه وولت للطاوله اللي فيها فايزة.. وعيونها يلحقوا في عائشه وين ماتمشي.. 🌻واستمرت اجواء الحفله جميله للغايه... وهيجوا فيها كل الحاضرات... ونسرين نزلت قعمزت تعشت مع صاحباتها وقعدوا يهدرزوا مع بعض ويسترجعوا في الذكريات.. فايزة وعائشه كانوا يحكوا بحماس.. بس سدرة شبه مطفيه كانت تساير مسايرة.. ومافيش كلمة جت بينها وبين عائشه حتى لما كانت تنجبد مواقف تجمعهم.. فجأة.. رن محمول عائشه.. قاماته وقالت:المهدي.. فايزة شبحت لسدرة لقتها تشبح للصونيه وبس.. عائشه:ايوه مهدي............تمام تمام..تو نخبرهم....وسكرت منه وقالت..العرسان جو.. نسرين:ووك عليا بطني وجعتني.. ضحكوا.. عائشه بضحكه؛خلاص الليله بتودعي العزوبيه وتنضمي لقافله المتزوجات.. نسرين؛يالهوي.. فايزة بضحكه:هي نوضي نوضي...حامد يراجي.. ناضت نسرين وهي تضحك. سدرة ناضت شدت يدها وقالت؛مبروك حبيبتي.. نسرين:الله يبارك فيك ياعمري.. طلقوا ايدين بعض.. وركبوا عائشه وفايزة نسرين للكوشه.. وسدرة مشت ولت لطاولة عيلتها... لحظات.. وطلعوا العرايس وحدة ورا الثانيه... من غير ماتودعهم امهم...اللي بعد طلعتهم انهارت والحاضرات قعدوا فيها... شويه وطلعوا المعازيم يروحوا.. من بينهم عيلة الواعر... سدره كانت لافه عليها الوشاح وهي ماشيه وتمشي في طوبى اللي مدروخها النوم.. سدرة:هيا ياطوبى عاد صححي.. طوبى:بنرقد.. سدرة؛ووك عليا ربي يجيبك يايوسف.. وهي تعاند في طوبى انفك وشاحها.. وبان شعرها.. سدرة؛حي عليا حي.. "استري روحك هيييه" شبحت لمصدر الصوت.. لقاته هو يكلم فيها ويشبحلها بحده.. هي برغم الحالة اللي كانت فيها قلبها.. لفت الوشاح ع وجهها وقالت:هاه.. هو جي طول لطوبى قامها وقال:خفي روحك ... مشت سدرة بسرعه وبعدت عنه وهي تقول:يرزيني في الهم ضروري يطلع في وجهي الليله!!.. ولحقت ع عيلتها .. فردوس:وين رحتي.. سكتت لما شافت المهدي جاي بطوبى.. طول مشي لسيارة لطفي وقال:كيف حالك عمي لطفي.. وحط طوبى في السيارة من الخلف.. لطفي:الحمد لله..بارك الله فيك.. المهدي:ماعنديش فيه جميل.. ووخر ومشي وهو يقول:تصبحوا ع خير.. سدرة قعدت تشبحله ع جنب وهو ماشي وهي مغطيه وجهها بالوشاح.. وهو بعد مافات من جنبها.. ضحك وحرك راسه يمين ويسار... لطفي:بتباتوا هني ولاشنو!؟؟ فردوس:هيا هي هانا راكبين.. وركبوا كلهم السيارة.. وتوكل بيهم لطفي للحوش.... 🍀🍀🍀🍀🍀🍀🍀🍀🍀🍀🍀🍀🍀🍀🍀🍀 سنه 2003..ماكانتش سنه فرح ع حوش شنيبه بس.. بل ع ليبيا كلها... بتاريخ 2003/9/12... انرفع الحصار عن البلاد...ونفرجت ع البلاد والعباد بعد عشر سنوات او يزيد من الحصار الاقتصادي والجوي... 🍀وتعدي سنه ورا سنه.. سنه ورا سنه....سنه ورا سنه... لين جت سنة 2008.... يوم2008/10/28 .... في طريق السفر اللي ترفع لبنغازي برا... عند وحده من محطات الراحه.. كانت في قهوة واقفين عليها زوز لابسين الزي التارقي... واحد فيهم في العشرين من عمره.. والتاني في منتصف العشرينات... كانوا يشربوا في الشاهي حدا سيارتهم.. وحواليهم كلب يحوم...يبان عطشان... وهما يحكوا بلغتهم... اللي في منتصف العشرينات قال للعشريني:عبدالقيوم...اديري تيداود إيس بنغازي ميغ اتقلد الكفره "بتمشي معاي لبنغازي ولابتولي للكفرة" عبدالقيوم رشف من الشاهي وقال:كليش ادقل الكفره ايمراونين اقلناهي.. "لابنولي للكفرة العيله يراجو فيا" رد عليه رفيقه وقاله؛ايكنا ايكنا..."باهي باهي" 🌻شويه ودرست حداهم سيارة ... اللي يسوق قال.. لطفي:هاه شن تبوا؟ سدرة؛شاهي بس... طوبى:اني جيبلي حاجه حلوة بابا اي حاجه.. لطفي:من عيوني... ونزل ومشي للقهوة.. سدرة:حيجيب معاه نفاص ويجي.. ضحكت طوبى. سدرة؛يي نسيت ماقتلاش ع السكر.. طوبى:تو نقوله اني.. نزلت مرش الباب متاعه. وطلعت راسها بعد ماوخرت خصلات شعرها اللي كانت رافعاته ذيل حصان ورا وذنها وقالت:بابا.. شبحولها التارقيه الزوز... واحد منهم كانت نظرته نظره اعجاب عاديه بجمال بنيه عمرها ماتعداش 11 سنه... اما التاني... اللي جاه جاه ..وين طاحوا عيونه عليها.. عيونها اللي لونهم محير....ابتسامتها الحلوة.. ملامح البراءة الواضحه...الحيويه اللي تشع من وجهها.. اللي يشوفها ينشرح صدره دون ادنى مبالغه... التفت لطفي لطوبى... طوبى اشرتله برقم اربعه وقال:سكر.. ضحك وهز راسه بإيجاب... خششت طوبى راسها ومررت نظرها ع المكان.. جو عيونها في عيون التارقي...عبدالقيوم... استغربت شكله ولبسه.. غيرت عيونها عنه وقالت:سدرة.. سدرة:هممم.. طوبى:هادم اللي واقفين ع السيارة بحدانا ليبين.. سدرة يدوب شبحتلهم وقالت:ايه...يقولولهم الطوارق.. طوبى:غريب لبسهم.. سدرة:هذا ثراتهم.. طوبى:تعرفي سدرة يعني سبحان الله ليبيا زي القارة فيها ناس اشكال الوان..زي ناس بنغازي دوتهم مش زينا بكل..غير عربيه بس.. سدرة؛وياما تشوفي فيها ليبيا زي ماقلتي عالم بروحها.. تنهدت طوبى وسكتت بعدين شبحت للروشن.. شافت للكلب كيف مطلع لسانه قالت:عطشان ياناري.. سدرة:من هو؟ طوبى:الكلب.. سدرة؛هني جمالك ايوه.. طوبى بتوسل:والله حرام سدرة يصخف..وبعدين الرسول قال في كل ذات كبد رطبه اجر..انتي سامعه بقصة البغي اللي سقت كلب وخشت الجنه. سدرة؛شن بيخلصني من لسانك توا..باهي ياحلوة كيف بيشرب بتحطيله الشيشه في فمه وتخليه يقرطع.. ضحكت طوبى وقالت؛دايرة حسابي..وطلعت حكة شاميه فارغه من الشنطه.. سدرة التفتت شافتها وقالت:وي منك وي..هي انزلي بسرعه صبيله وولي اركبي.. طوبى:منورة ياعسل.. وخدت شيشة الميه وفتحت الباب ونزلت.. وعبد القيوم معاها بعيونه... هي حطت صونيه الشاميه وصبت فيها ميه وقالت؛هي تعالى.. ودفتها...قربتها منه.. ومشت ركبت السيارة.. بوها كان يتفرج عليها وهو مبتسم.. سدرة:هاه تريحتي.. ضحكت طوبى.. وقعدت تشوف للكلب كيف قرب وقعد يشرب.. ابتسمت.. وعبدالقيوم مش قادر يحول عيونه من عليها.. شويه وجي لطفي وعطاها طاسة الشاهي... خدتها.. بعدين مشي خدي الشكاير..وركب السيارة.. سدرة:درت مافي راسك.. لطفي :طريقنا طويله تجوعوا.. طوبى:والله صح.. مدلها بوها كيكه.. خدتها وقالت؛شكرا بابا.. لطفي:العفو ياعيوني.. وشغل السيارة وتحرك.. وعيون عبد القيوم معاهم شويه وقال... تهوساي ان تيطاوين ماشاء الله تبارك الرحمن.. "عليك عيون ماشاء الله تبارك الرحمن" صاحبه قال بضحكه:ماشاء الله ماشاء الله... ابتسم عبدالقيوم بإحراج وشرب طاسة الشاهي في مرة....
#بنت_الريح #طوبى
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
