#طوبى "جنة طوبى"
#جمان_فريد
#الجزء_السادس_والستين"إنتفاضة الأقحوان1"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
🍃 كبير قدرهن ماهن اللي ينعافن
شديد عزمهن لنظار ياما شافن
--------------------------------------------------------------------------
🍀بالعودة للوراء.....
بعيد عن فيلا الجالي بمسافه لابأس بيها..
اخر الطريق اللي دخل للشارع من جهه تانيه..
كانت طوبى واقفه ورا شجرة وسيارتها مدرسه بعيده عنها بمسافه بسيطه..
رفعت تليفونها..
حطت ع رقم الجالي...واتصلت بيه..
نادى كم مرة...بعدين انفتح الخط..
"ايوه.."
طوبى وهي تشوف للفيلا:ايوه جالي ان شاء الله ماعطلتك ع شي؟
"لا..خيرك شن تبي.."
طوبى:لاشي غير جيت بنقولك اني مروحه توا للفيلا ماصارش من الزياره...
"في الطريق انتي؟"
طوبى: لامازال ماطلعتش شويه ونطلع..بنسألك شن تبي غدي؟
"اللي تبيه ديريه..هي بنسكر توا عندي خدمه..سلام.."
طوبى:سلام..
ونزلت التليفون بعدين سكرت.
وعيونها المليانات دموع ونظرات خوف ع الفيلا..
ومن قلبها تدعي..
"يارب..يارب..يارب..لا..يارب"
وقعدت تراقب في الفيلا..وفي نفس الوقت تراقب في الوضع حواليها..
كانت الدنيا فاضيه ومافيش حركه..
بعيد عمها زوز سيارات مدرسات..وموطو مدرس في الجهة التانيه من الطريق..
كانت كل شي تلتفت تشوفلهم..
وهي بتموت من الخوف..التوتر..القلق..
وتدعي في نفسها..
"يارب لطفك ورحمتك"
فجأة..
سمعت باب الفيلا الخارجي السحاب انفتح..
غمضت عيونها بشده....
بعدين خدت نفس..وفتحت عيونها..
والتفتت...
شافتها...شافت سيارة راجلها طالعه..
درقت وقعدت تراقب بعيونها وهي ترجف..
بان عليها من بعيد معاه وحده في السيارة..
وكأنهم يتناقشوا او يتعاركوا..
حطت يدها ع صدرها..وشدت ياقة جاكيتها بقوة من الألم اللي حست بيه وقتها.
الم طعنة..طعنة خيانه قاعده تحفر في قلبها المتعب حفر..
مشت السيارة..
وتباعدت..
طلقت ياقة الجاكيت...ولقت رجليها يرفعوا فيها للفيلا وهي مصدومه وموجوعه للموت...
وقفت قدام الباب..
وبيدها اليمين اللي ترجف..
طلعت المفتاح من جيب جاكيتها وفتحت الباب وخشت..
رداته وراه..وقعدت تمشي خطوة ورا التانيه وكأنها تساق للموت وهي تشوف فيه..
وين وصلت للباب الدخلاني..
لقاته مردود ردان مش مسكر..
دفاته بيدها..وخطت فيها خطوتها..اللي فكرتها بأول خطوة خطتها في هالفيلا الفخمه...
الخوف اللي حسة بيه وقتها..قبضة القلب كانت هي نفسها اللي حستهم توا..لكن توا بزايد..
قعدت تمشي..وهي تشوف حواليها..كان الحال في الدور الأول كما هو عليه..
بس لما شافت الفرشه اللي ترفعه للدروج متحركه من مكانها
تمعنت النظر فيها للحظات..
بعدين..اندفعت بسرعه للدروج..
ركبت بسرعه وفي صدرها نار والعه...
وصلت فوق..
شافت لدار النوم..كانت مفتوحه...
مشتلها طول وخشت ..
ووقفت في الباب..
مررت نظرها عليها...
شافت االمالقي المكسور والميه المسكوبه..
وشافت السرير اللي مالقتاش قاعد ع وضعه اللي خلاته عليه..
انهيارات..في داخلها قاعده تصير انهيارات..
وانهيارات النفس ياموعرها..
مشت للسرير وهي تشوفله...
وصلت فيه..وقفت حداه...
مدت يدها اللي ترجف ع الورغان..
خداته ورفعاته بش تشمه..فاحت عليها ريحة عطر مش ليها..
غمضت عيونها بألم وطاحوا دموعها..
طلقت الورغان..وحست بحاجه طاحت منه...
فتحت عيونها ونزلتهم...
وتشوف مايزيد صدمتها اضعاف مضاعفه..
طبست وهي تدقق بالنظر..
وزادت تأكدت.
ملامح الصدمه ع وجهها تكاد تنطق..
خدتها..ورفعتها وهي تشوفلها..
نفسها..هي نفسها..
التوكه "التايقر" متاع نجاة...
جي قدامها الموقف اللي شافتها اول مرة في شنطة السفر متاعه...
اللي تخيلاته طوبى وقتها خلاها تحس بالتقزز والغثيان..
مشت تجري للحمام..
وقعدت ترجع...ترجع وهي تبكي..تبكي بالصوت..
تبكي بقهر والم ووجع...
حطت يدها ع السيفون وضغطت عليه..
بعدين مشت للاوندينو وهي تبكي وتغسل في فمها..
وعقلها مابطلش وهو يتخيل في اللي صار في دار نومها وع سريرها...
لهالدرجه هي عنده رخيصه وماتسوى شي..
معقوله مايكنلهاش ع اقل حتى شويه احترام!؟
قوق الاستغفال والخيانه..اهانه.!!
من قهرتها وهي تغسل في فمها قعدت قعدت تخبط فيه وهي تبكي..
وبكي القهر اللي جربه يعرف قداش واعر..واعر للموت..
مشت طلعت من الحمام وفي يدها توكة نجاة..
خشت للدار وهي تتجنب تشوف للسرير بش ماتحسش بالغثيان مرة تانيه..
تعداته ومشت تشوف للمالقي المكسور..
وتفكرت لما كان طالع بالسياره من الحوش مع نجاة كيف يبان يتعارك هو وياها..
غيرت عيونها الحمر المدمعات للزيانه..
جو ع تليفونه...
فكرت للحظات..بعدين مشتله وخداته وهي ترعش وتبكي..
فتحت الرمز اللي كانت تعرفه..
وخشت ع المكالمات لقت اخر مكالمه كانت صادره..
لرقم..احمد حميدا...
خدت نفس وطلعاته وكان صوت الزفير مرتعش..
بعدين بسرعه ضربت ع الرقم وحطت التليفون ع وذنها..
نادى مرتين..وانفتح الخط..
ويجيها صوتها...صوت نجاه وهي تبكي وتقول..
" شن مازال تبي ياخواف ياجبان ياللي ماتجيش راجل شن مازال تبي..من اليوم تنساني انساني انسى نجاة يالجالي لاخر عمرك.."
كله انهد..
كل شي انهد..
كل شي حلو فيها..كل شي حلو فيها كان عايش مات...
نزلت التليفون..وسكرت الخط..
وحطت التليفون في مكانه..
كانت تمرر في نظرها ع الزيانه وهي تحس بروحها حتفقد الوعي..
جي بين عيونها..العطر..
عطره...وتفكرت الموقف اللي يخصه..
قالت بنبرة قهر وانفعال متصاعد؛الله ياطوبى قداش كنتي نيه..كل شي كان يصير قدام عيونك وانتي تكذبي فيهم..قعدتي تكذبي وتفوتي وتتجاهلي خليتيهم يشوفوك ساذجه وغبيه..خليتهم يهنيوك ويضحكوا عليك..خلتيهم يمسحوا بكرامتك الارض..
وخدت العطر متاعه..
وحذفاته بكل قوتها ع المرايه..
انشقت لآكثر من شق...وهي تشوف لروحها فيها..
كيف كانت صورتها فيها مقسمه لأجزاء..حست روحها لأول مرة ومن فترة تشوف صورتها صح...
صورة انسانه ضعيفه ومكسورة..وهي تكره تشوف روحها هكي كره شديد..
دخلتها يدها تحت الشاربه..شدت العقد بيدها..
وهي تتفكر في الليله اللي هداهولها فيها..
تفكر الكلام اللي دار بينهم والوعد اللي عطاته...
تبدلت ملامح وجهها لكره وهي تقول..
خلف وعد ينعطى لواحد زيك...شرف...
وجبدت العقد بقوة من رقبتها وقطعاته..
طلعاته من تحت الشاربه..
وحطاته بالتدريج ع الزيانه لنهايته اللي كانت إسمها..
بعدين وخرت وهي تشوف للعقد بحقد..
ومشت بسرعه طلعت من الدار..
نزلت بسرعه من الدروج وهي شاده روحها بقوة عن البكي..
وصلت لوطا وقعدت تمشي بقوة وهي تمسح في دموعها..
لين طلعت برا منها للباب الخارجي..
سكراته وراها وشافت لحوش جميله..
ركزت ع الشجر اللي في مدخل الحوش..
بعدين مشتلهم..وقفت قدام الباب وضربت جرس الانترفون..
"مني"
طوبى وهي تحاول تخلي صوتها طبيعي؛اني طوبى خالتي جميله..
"مرحبتين مرحبتين..تفضل"
وانفتح الباب..
دفاته طوبى وخشت وسكرت وراها..
ع جية سيارة الجالي...
انفتح الباب السحاب قدامها وخشت طول للحوش...
~~~~~~~~
طوبى وهي تحاول تتماسك؛خالتي نعرف ان عندك كاميرات مراقبه طل ع الشارع معليشي..نبي نشوف منهم حاجه ضروري..
جميله وهي تتفحص في ملامح وجهها بقلق قالت:ايه حبيبتي ماعنديش مشكله..لكن قوليلي خيرك خيره وجهك هكي!؟
طوبى برجاء:ياريت نشوف توا بسرعه خالتي..
جميله هزت راسها وهي تشوفلها بقلق وقالت؛باهي بنتي باهي..تعالي..
ومشت وطوبى وراها وهي شادة ع قبضتي ايديها بقوة...
🍃وصلت بيها للغرفه اللي فيها شاشات المراقبه متاع الكاميرات اللي كانوا متوزعات ع جنان الحوش..
طوبى بشي من التعب:معليشي نقعمز..
جميله :ايه بنتي قعمزي قعمزي..
قعمزت طوبى ع الكرسي وهي تشوف للشاشه..
جميله؛شن تبي تشوفي بالزبط..
طوبى بلعت ريقها وقالت؛تبي نشوف المقاطع متاع الكاميرا اللي طل ع الشارع اللي بينا وبينكم..
جميله:باهي..وحطت ع الكاميرا اللي قالتلها عليها طوبى..
طوبى؛تقدري ترجعي للخلف يعني المشاهد اللي من هكي حوالي ساعه تقريبا..
جميله؛ايه..شويه بس..
وبدت جميله تهدرز وهي تقول؛نفخت راس منيه على ماتعلمت قلتلها مش حنقعد عابيه عليك في كل شي علميني..
وطوبى مش معاها بكل تشوف فيه شن دير وبس..
جميله؛اهو شوفي..
وقعدت طوبى تشوف للساعه وتتفكر في الوقت اللي جتها فيه الرساله..
وهي تشوف ومعاها جميله..
بانت سيارة الجالي جايه..وين قربت من الباب..
بان فيها هو بالجنب وفي جنبه وحده مش واضحه كويس..
جميله وين شافتها شبحت لطوبى بأسف وضيق...
طوبى وهي تشد في دموعها بقوة؛ترا سرعي شويه..
جميله بضيق:باهي.
وقعدت تسرع في المشاهد..
لين شافت طوبى السيارة طالعه قالت..
وقفي وقفي..
وقفت جميله..
وقعدت طوبى تشوف في السيارة وهي طالعه..
وهني بانت عليها نجاه وهو معاها..
كانت تضرب فيه ع ذراعه وهو يشوف حواليه في الشارع..
بعدين شد يدها بقوة وهو يكلم فيها بغضب..
وطلق يدها بالقوة وتحرك بالسيارة..
حطت جميله يدها ع فمها وهي مصدومه وقعدت تشوف لطوبى..
لقتها مغمضة عيونها وباديه ع وجهها ملامح الألم..بعدين فتحتهم وشبحتلها..وطلبت منها تجيبلها مشاهد يوم جتها اول رساله..عطتها التاريخ لأنها مش ناسياته وقعد راسخ في عقلها..
وجميله اللي كانت مصدومه من اللي شافاته..
لبت طلب طوبى ورجعت للمشاهد بتاريخ هداكا
اليوم وطلعتهم..
طوبى وهي تشوفلها بعيونها الحمر المتورمة من البكي قالت:هكي جو بعد الظهر..
جميله بحزن ع حالها؛باهي..هي..
وحطت ع المقطع المطلوب..
طوبى:ايوه هو هدا...
وشافوا الزوز سيارة طوبى وهي خاشه..
وبعد تسكر الباب..
شافوا واحد جي للباب وهو يشوف حواليه..
كان لابس كبوط جلد لونه بني..رافع الياقه متاعه فوق مدرقه نص الوجه..ولابس ع راسه طاقيه وعيونه خافيهم بنظارات..
بان ع جنب بس..بعدين عطي بالظهر وهو يحط في الورقه..
ودق الباب..وهرب..
حطت طوبى يدها ع جبهتها وهي تفرك فيها بحيره..
وجميله تشوفلها بحزن..
شويه ناضت طوبى وهي تقول..
صحيتي خالتي جميله..بارك الله فيك..
جميله بحزن ع حالها:والله مايستاهل ظفرك والحق لما ريتك معاه يومها قلتها حتى لبنتي مش ليه بكل..
جميله كان قصدها تواسي طوبى..
بس في الحقيقه هي كانت تزيد في وجعها اكثر واكثر..
شبحتلها برجاء وقالت؛خالتي اللي شفتيه توا نسألك بالله ماطلعيه لحد حتى لبنتك بالله عليك..
جميله بألم؛حاضر بنتي حاضر اللي صار توا دفنته في مكانه..غير انتي ماتقهريش روحك ربي يبدلك باللي يسوى مية من امثاله..
طوبى بنظرات كلها ألم قالت:ارجوك خالتي ماطلعي شي مهما صار..
حطت يدها ع فمها بعدين قالت؛والله ماطالعه مني حاجه اني لاريت ولاسمعت..
طوبى نزلت عيونها بحزن وقالت؛بارك الله فيك..معليشي بنتعبك بالله طاسة عصير..
جميله هزت راسها وقالت؛حاضر بنتي حاضر.
🍃وجابتلها كوباية عصير طبيعي..شربتها طوبى كلها لأنها حست ان سكرها او ضغطها هابطين..
وين حست وضعها ولى احسن..مشت طلعت من حوش جميله..
وجميله سقدتها وكلها قلق عليها..
🍃لما طلعت تجنبت تشوف للفيلا..
اي شي يعنيه ويفكرها بيه بدت تحس اتجاهه بكره شديد..
وصلت في السيارة..قعدت تشوفلها شويه وهي تفكر للحظات..
بعدين مشت ركبتها..
شغلتها...وتحركت طول...
ومشت السياره وفي عيون كان تلحق فيها..
عيون الشخص اللي ماقدرتش تعرفه طوبى وين شافاته حط الرساله ع الباب..
الشخص اللي كان عنده اصرار كبير في فضح خيانة الجالي لطوبى..
واللي كان حاس انها مسؤوليه كبيره عليه ماقدرش يتنصل منها..
وهدا كله كان رد منه ع معروف وجمايل العيله اللي عاملته وكأنه فرد منهم..مش مجرد جار...
ع قد ماعاش من حياته متغرب في ليبيا..عمره ماحسه انه ينتمي ليها الا لما سكن في شارع القهوة وجاور عيلة الواعر..
...صاحب محل الحسانه...فراس التونسي...
اللي كان ماشي بإتجاه الموطو وهو يفكر في اللي بيصير بعد هاليوم...
ركب الموطو..
وشغله بعدين تحرك طول من طريق تانيه...
🍃وفي الفيلا..
كان الجالي مقعمز ع حافة السرير وحاط راسه بين ايديه..
مستفردين بيه الصدمه والأفكار السودا...
فكرة ان طوبى خلاص طلعت من حياته لغير رجعة فكرة لايمكن يتقبلها لايمكن..
قعد يتخيل في حياته من غيرها..ويتفكر في حياته بيها..
كانت هالمقارنه شبيهه بمقارنه الموت مع الحياة..
نزل ايديه وناض وقف وهو يمسح في دموعها بقوة..
مشي للتليفون..
طبس وخداه....شافله شويه..بعدين فتح الشاشه..
وخش ع جهات الاتصال..وحط ع رقم محدد..
واتصل بصاحبه..
مسح وجهه بيده التانيه بعدين حطها في نصه وهو يسمع في الخط ينادي..
وينفتح الخط..
"ايوه."
رشف وقال:حكيم ضروري نشوف توا..
"خيرك شن في"
الجالي؛نتلاقوا ونحكيلك..
"تمام تمام..تو ناخد اذن ونمشي للقهوة اللي نتلاقوا فيها"
الجالي؛ok..سلام..
وسكر..ومشي طلع من الدار..
🍃🍃🍃🍃🍃
من اصعب اللحظات اللي يعيشها الانسان المخدوع..
هي تذكره لمواقف كانت توضحله في كل شي وهو يهرب منها..مواقف..حركات..كلام...كذب عيونه وودانه لما شافهم وسمعهم...
وكان يخلقلهم في المبررات بش يهرب من المواجهه..
الصعب هني لما يكتشف ان هروبه هدا كان يعطي في فرصه للي طيحوه في شراك خداعهم انهم يتمادوا معاه ويحطوه تحت رجليهم ويقعدوا يدوسوا عليه...
بس طوبى توا طايحه بين نارين...
بين نار الخيانه...ونار الظروف الصعبه اللي قاعدين يمروا بيها اهلها بالذات بوها اللي انهكاته المصايب..
وهي تسوق كانت تفكر في هدا كله..
وتلقى روحها في نهاية تفكيرها توصل لطريق مسدود..
وياقداش بكت طوبى ع نفسها في هاللحظات
قداش وجعتها روحها
وقعدت تتسائل في نفسها
"في ذنب مني قاعد نخلص ياربي!؟
ولابالك درت في حياتي حاجه غلط قاعد تحاسب فيا عليها!؟
باهي كان مش هكي علاش يصير فيا هدا كله!؟
علاش نشوف هدا كله في بداية عمري..العمر اللي يسموا فيه زهرة الشباب علاش زهرة شبابي اني قاعده تذبل وتموت قبل وقتها"
وقفت السيارة ع تركينه وحطت راسها ع الدومان وقعدت تبكي بالعبره
وفي راسها تتردد جمل متداخله..
لبوها...لراجلها...لعزوزتها..وحمواتها...لنجاة...واختها صابرين..
لأميمه...
لكل من قاللها شي اثر فيها او عناها بيه حتى لو ماقالاش مباشرة..
وفي لحظه..
وسط هالزحمه..تفكرت اهم شي...
حطت يدها ع بطنها ودموعها ينزلوا..
بعدين قالت..
أسفه ياماما..اسفه ياعمري..تعبتك معاي ووجعتك ياقلبي..
اسفه لأني نسيتك مش بيدي ياماما..اللي صار مع امك ياعمري قريب ينسيها حتى اسمها..سامحيني ياماما..سامحيني يابنتي..ماعرفتش نختار..وغلطي في اختياري لبوك حتدفعي ثمنه حتى انتي معاي..سامحيني ياماما..لكن والله ياماما لو نموت مانسلم فيك ولانخليك ليهم والله لو نموت انتي بنتي اني بس..
بنتي اني بس..انتي..
"جنة طوبى"...وبس...نفرط في روحي ولانفرط فيك ياعمري..
سكتت..بعدين خدت نفس عميق وطلعاته..
مسحت دموعها...
خطر ع بالها الكلام اللي قالاته في نفسها قبل شويه وندمت عليه اشد الندم..
غمضت عيونها بقوة وقعدت تردد
استغفر الله..استغفر الله..استغفر الله..استغفر الله العظيم واتوب اليه..
فتحت عيونها..بعدين شغلت السيارة..
رن تليفونها..
طلعاته من جيب البالطو..
شافت المتصل..كانت اريج..
راجت لين فصلت المكالمه..
بعدين كتبت رساله وبعتتها..
وحطت التليفون جنبها..
شغلت راديو السيارة كان محطوط ع قناة للقرآن الكريم..
وتسمع آية من آيات سورة يوسف..
¤قال إنما أشكوا بثي وحزني إلى الله وأعلم من الله مالاتعلمون¤
ويابخته من تجيه الرسائل الربانيه مباشرة تقويه وتوعيه وتواسيه..
طوبى لما سمعتها حست بأن الله عز وجل يبي يوصللها..
انها مفروض تلجأله وتشكيله كل اللي قاعده تمر بيه وتكون ع يقين تام...انه حياخد حقها ويعوضها في الدنيا والآخره..
لاتتسخط ع قدر ولاتسأل علاش هكي قاعد يصير..
تسلم وتأمن وحسن ظنها بيه لازم يكون حاضر في كل وقت وشن ماكانت الظروف...
زي مادار ابراهيم عليه السلام لما حاوطاته النار من كل تركينه..
وهو قعد يردد بإيمان قوي وحسن ظن عظيم..
"حسبي الله ونعم الوكيل"
وكيف كان الاستجابه؟!..
الله ماطفاش النار..ولانزل عليها مطر لا..
دار ماهو اعظم..خلا النار نفسها تتغير ع خاطره لما امرها
تكون بردا وسلاما عليه...
نار هي قعدت نار..بس خلاها بردا وسلاما لعبد من عباده وصل بيه حسن الظن بالله لأعظم درجه..
وماكانتش هالقصه مجرد قصة وانذكرت في سورة وبس..
"لقد كان في قصصهم عبرة لأولى الألباب"
🍃🍃🍃🍃🍃🍃
"خلاص طلقها"
قعد يشبحله وهو حاط يده ع ذقنه..
حكيم؛ماتشبحليش هكي..من البدايه زواجك بيها كان غلط فغلط الزواج اللي مبني ع غش مايدومش باجالي مابني ع باطل فهو باطل..
عقد حواجبه وقال؛اني جايك نبيك تعطيني حل..نبي نطلع من هالمصيبه ومانسخرهاش..
حكيم بضحكه تعجب:تي انت خسرتها خلاص وانتهي الموضوع..
نزل يده ع الطاوله وقعد يشوفله بغضب وهو يقول من تحت سنونه..
طوبى مانخسرهاش الا بالموت فاهم..بالموت بس..
حكيم لاحظ ان عيون الجالي بدوا يحمروا من الغضب وبادي يعرق
غير طريقته في الكلام وقاله؛باهي تمام ماتبيش تخسرها بس الموقف صعب كيف بتسامحك عليه وتفوتلك قولي بتحكيلها كل شي..بتقوللها اني واخدها قبلك وماليا جبروني عليك جبر!..
حرك راسه بالرفض:اكيد لا..مستحيل..نعرف شن نقوللها نعرف كيف نوضحلها الصورة وهي تو تتفهم..انت ماتعرفهاش زي مااني نعرفها طيبه هلبه..هلبه..نعرفها كويس..
كان حكيم يراقب في وضع صاحبه اللي كان واضح انه مش طبيعي..
هزالجالي راسه وقاله؛تو نتصرف نعرف كيف نتصرف..
حكيم؛ok..هدي شويه توا وقولي..خديت دواك؟
الجالي قعد يشوفله بضيق شديد بعدين قال..
ايه..بس الحبه اللي تخفف التوتر قاعده في السياره..نبيها..
حكيم ناض وقال؛هات المفتاح..
مدله الجالي المفتاح ويده ترجف..
هو خدا منه ومشي من حداه..
والجالي خدي شيشه ميه محطوطه ع الطاولة قدامه فتحها وقعد يشرب منها...
🍃🍃🍃🍃🍃
وصل لشارع القهوة بعد ماحطه التاكسي في بدايته..
مشي طول للمحل متاعه..
فتح الباب وخش وسكره وراه..وماغيرش من مغلق لمفتوح..
لأنه كان يبي يدير مكالمه مهمه..
حول الطاقيه..وحطها ع طاوله قدامه وقعمز..
واتصل بشخص مقرب ليه جدا..
زوجته اللي طول فتحت الخط..
"هاه فيرو سافا"
هو قال؛سافا بيا..شن الاخبار..
"الحمد لله..هاه خبرني ماصار شي جديد"
فراس:عرفت كل شي..
"احلف!"
فراس بضيق:والله موقف صعيب برشة ياآمنه..
"صح صعيب..لكن تو ترتاح بعده..راك كسبتي ثواب في هالمسكينه طفله صغيره ماتستاهلش تعيش مخدوعه مع واحد حيوان زي هدا"
فراس:ان شاء الله بعد هدا كله تخليه..اشك..
"ولوى!؟ ع خاطر باباها والمشاكل اللي صايره معاهم؟"
فراس بضيق:والله اني خايف عليه اكثر من العيله متاعوا..
"ربي يحفظوا ويطول في عمروا ماتقلقش روحك انتي وخليها ع الله..فكر انك ماقعدتش شيطان اخرس يافراس"
هو تنهد بعدين قال:ان شاء الله نكون فاعل خير مش فاعل شر...
"فاعل خير وملاك حارس زادا"
ضحك وقال؛واني شن اللي خلا دمي يفور غير كلامك هدا..
🍃ايه..زوجته كانت المحرك الاول والاساسي ليه بش يدير اللي داره ويرد لعيلة الواعر معروفهم..ومعروف طوبى بالذات معاهم...
القصه بدت لما صارت مع فراس مشكله في المصرف اللي حاط فيه فلوسه ومعاش قدر يطلعهم..
تزامن مع حدوث هالمشكله مرض بنته مرض شديد تطلب علاج مكلف جدا..حاول يدبر كيف يطلع الفلوس لكن ماقدرش وصابه الهم من ورا هالقصه...
وفي مرة مطيره كانت جاياته بسفرة الغدي..
لاحظت انه مضايق ومهموم..ماخلتاش في حاله لين عرفت خيره وعطاته كلمه انها تحاول دورله حل لموضوعه..
وتحكي مطيره اللي صاير معاه في هدرزة..
وطوبى وين سمعتها رق قلبها لبنته ووجعتها هلبه ومعروف عن طوبى الاطفال نقطة ضعفها..
دبرت في مبلغ ع قد ماتقدر وعطاته لمطيره بش تعطيهوله يبعته لعيلته وقالتله تقوله يشوف الجالي لأن عنده معارف في المصرف نفسه تو يساعدوه..
الفلوس اللي عطتهوله طوبى فرجوا عليه همه بعتهم مع خوه اللي يجي مرة مرة لليبيا وانحلت مشكله العلاج..
ومن يومها هو وزوجته حسوا رواحهم مدنين ليها بهالمعروف لدرجة ان مرته طلبت تاخد رقم طوبى وتكلمها بش تشكرها وصار فعلا..
وقعد فراس متردد يفتح مع الجالي موضوع فلوسه اللي في المصرف ومتحشم منه...
لعند ماجاه في يوم يحلق عنده..وعرض عليه الجالي خدماته وهو طول استغل الفرصه وحكاله...
وبسبب الجالي ومعارفه انحلت قصة الفلوس وطلعوا..
وهو يومها من فرحته مشاله الشركه بش يشكره..
وين سأل عنه قالوله طلع توا ودلوه ع البركيدجو متاع السيارات بش يلحق عليه..
وهو طول مشي غادي..
وقعد يدور فيه...لين لقاه.
بس ماكانش بروحه..كانت معاه نجاه واقفين في تركينه وشافهم في وضع غير لائق صدمه ع الاخر..
الراجل طول هرب ع الهسي ع قولة الشوام...
ومن صدمته فيه كان يبي يحكي لحد مالقاش غير مرته..
وطبعا النساوين في الحالات اللي زي هادي يضامنوا مع بعض بقوة..
بس تضامن مرت فراس مع طوبى كان قوي بزياده..
🍃"الله يعطيه كيه تكوي كبدوا ياربي الحيوان يخون فيها مع ارملة خوه هال...غير شن بنخرج من فمي عليه هالمنجوه"
فراس بحيرة؛مش عارف وين عقلوا عندوا مراة كيف الوردة ويخونها!؟
"الله ياخذوا هدا حلوف كبير ماينسكتش عليه يافراس لازم المراة تعرف باللي قاعد يصير من وراها"
فراس؛مانجمش ندخل في الحاجه هاذي راهو مهما كنت بينهم نقعد غريب..
"باهي كيف المراة تقعد هكا غافله ومضحوك عليها ياناري!"
فراس بضيق؛ربي يكون معاها مافي يدي شي نجم نعملوا..
"تقعد شيطان اخرس يافراس تحط عيونك في عيونهم وتاكل وتشرب منهم ويودوا فيك ويساعدوا فيك ويسألوا عليك ويعاملوا فيك كأنك ولدهم وانت عارف ان بنتهم مستغفله ومضحوك عليها وساكت"
🍃كلام مرته اثر فيه لدرجه كبيره قعد ليالي يفكر فيه
وفي مرة قرر انه يراقب الجالي بش يعرف لين واصله علاقته بنجاه
وعرف بالشقه اللي يتلاقوا فيها وشافهم مشولها مع بعض..
وطبعا ماكانش شاك فيهم انهم متزوجين..في باله انها علاقه غير شرعيه بس
وقعد من بعدها وين يقابله حد من عيلة الواعر ولايشوف طوبى نفسها ضميره يأنبه ويلح عليه بش يدير موقف..
فكر هلبه انه يحكي لحد من الشارع بس مني اللي يقدر يحكيله وعليه منه أمان؟
قعد يراقب فيهم بالواحد..ويشوف من اللي تربطه علاقه قويه بعيلة الواعر ويقدر يحكيله بدون مايضره ويجيبه في الدوة..فكر اكثر شي في عبد القيوم وكان حيقوله فعلا بس تراجع...
🍃"اسمع عندي اقتراح مانبيكش تضحك عليا باهي؟"
فراس؛نسمع
"من مدة شفت فيلم كان البطل متاعوا متعرض للخطر وهو مايعرفش في من حب ينبهوا بدون مايبان في الصوره وقعد يبعتلوا في رسائل تحذير"
فراس:امشي ارقد حبيبي وليتي تاخدي وتعطي شن الاقتراح الخايب هذا؟!
"انت غير اسمعني بس..انت تبعتلها رسائل مطبوعه طباعه يعني ماينكشفش الخط ويكون الكلام فيها زي الألغاز دير فيها الشك وتخليها دور ورا راجلها بروحها وتشده بالجرم المشهود ووقتها مافي حد حيدور من بعت هالرسايل لأن مافي شي يدل ع صاحبها شكون يكون..وهكا تكون انقدتها مسكينه من غير ماتبان في الصورة..هاه شن رايك؟
فراس:رايي انك تمشي ترقد ايعيش مرتي ويزيك من الافلام اللي ضربت راسك..
🍃بس اقتراحها اللي هزي عليه قعد يفكر فيه طول الليل لأن اقتنع بيه وخدي قرار انه ينفده...
في الرساله الاولى مااستجابتش طوبى..
وحكي لمرته اللي صار..هي زادت شجاعته اقترحت عليه يقربلها..وفعلا قربلها في الرساله التانيه..
لكن استفزاته لأبعد حد لما شافها مزقتها ولوحتها من روشن السيارة..
زاد اصراره انه يخليها تعرف بأي شكل..
خطط انه يقعد يراقب الجالي ولو شافه مرة ماشي للشقه مع نجاة يخبرها وتجي تشوفهم بالجرم مشهود..
لكن اللي صار كان مفاجأة بالنسبه ليه..
خلاته ينقم ع الجالي ويزدريه اكثر ويصر بزياده ان طوبى تعرف حقيقته...
خدي رقمها من مرته وبعتلها رساله..
وبعدها طول طلع الشفره وكسرها..
وقعد واقف في مكان قريب ع الفيلا يراجي فيها تجي وكان مقرر وقتها انها حتكون اخر محاوله..
وكانت الثالته تابته..وجت طوبى وشافت كل شي بعينها...
والمطلوب تم اثباته..
لكن تقعد عند فراس حاجه اخيره بيديرها بس وقتها مازال ماجاش....
🍃🍃🍃🍃🍃
وصلت في المنطقه اللي فيها شارع القهوة..
وين قربت توصل للشارع..
كانت سيارة جارهم التارقي جايه من الجهة التانيه..
بطئ في السرعه متاعه بس يخليها تخش هي الأولى..
خشت..
وهو خش وراها...
هي لما كانت ماشيه بالسيارة لحوش بوها كانت تتجنب تشوف للجهة اللي فيها حوش شنيبه..
درست السيارة قدام الباب قصدها ونزلت منها...
ع مرواح بنات فايزة من المدرسه..
صفاء ومروة وتاله...
شافوها وتوجهولها طول...
وعبد القيوم درس السيارة قدام حوش المهدي ونزل..
شاف من ورا نظاراته بنات فايزة وهما جايات ناحيتها...
فاتوا من قدام محل فراس اللي طلع منه ووقف قدامه وهو يشوف لطوبى..
شافها نزلت وسكرت باب السيارة..
ولما جت بتمشي للباب..
حست بدوخه وكانت حطيح لولا انها شدت في السيارة..
عبد القيوم وين شافها انفجع مشالها طول..
وبنات فايزة جوها يجروا..
شدتها صفاء وهي تقول بخوف؛طوبى خيرك طوبى!؟
وطوبى تشوف لغطا السيارة وهي تحاول تستعيد وعيها وتشد روحها..
عبد القيوم وقف في اخر السيارة وهو يشوفلها بخوف..
وفراس كان مضايق وقلق ع الآخر..
عبد القيوم؛مروة عدي جيبيلها حاجه من المحل عصير حاجه حلوة اي شي بسرعه..
مروة؛حاضر..ومشت تجري
طوبى بشي من التعب؛مافيا شي..
صفاء بقلق:وجهك اصفر..
وتاله وهي شاده يدها قالت..وايدك مصقعه..
عبد القيوم قريب يخش في عقله ويطلع..
بعد عنهم وهو مش عارف شن يدير..عاجز مايقدر يديرلها شي..
ع جية مروة تجري وهي واخده عصير..
قعد معاها بعيونه لين جت لطوبى فتحاته وعطت لصفاء بش تشربها..
وشربت منه طوبى.
وعبد القيوم واقف حدا محل التونسي وهو يشوفلها بقلق بالغ...وباهي اللي لابس نظارات بش مايفضحوشي عيونه..
حست روحها ولت احسن وقالت؛نحس في روحي احسن يابنت..بروا روحوا حبيباتي..
صفاء:لالا بنخشوا معاك الحوش واضح مافي حد..
طوبى هزت راسها وقالت؛ايه..
ومشت للباب والبنات حواليها..
وين وصلت في الباب بش تفتحه..
خدت منها صفاء المفتاح وفتحاته هي..
ودخلوها مروة وتاله للحوش وسكروا الباب..
🍃بعد ماخشت تنهد عبد القيوم تنهيده لاحظها فراس..
قعد يشبحله..
اما هو لأن عقله قعد ماطوبى ماانتبهش لوجود فراس..
مشي طول بإتجاه الحوش..
اما فراس ولى خش للمحل وهو يفكر بقلق..
🍃🍃🍃🍃🍃
وفي الحوش..
قعدوا بنات فايزة مع طوبى..
دارولها ماتاكل..وهي اصرت عليهم بعدين يروحوا..
روحوا البنات..
وهي قعدت بروحها..
تاكل وتفكر..تاكل وتفكر...
لين كملت اللي في السفرة كله..
بعدين ناضت بيها للكوجينه..
غسلت الماعين..
وبعدها طلعت للدار..
خشتلها ومشت للدولاب..
فتحاته وقعد دور وسط الدولاب..لين طلعت قفطان شكله حلو وطوله لتحت الركبه وكمه تلاته ارباع لونه أبيض كريمي...
ومشت للحمام...
دارت دوش..وبعد كملت طلعت وهي لابساته ولابسه المنشف ع راسها..
خشت للدار..
ومشت طلعت من دولاب عمتها مطيره شنطة المكياج..
خدتها وحطتها ع الزيانه..
فكت الفوطه ونشفت شعرها..
بعدين علقت الاستشوار وبدت تجفف فيه بعدين جبداته..
بعد ماكلمت..
رفعت شعرها ذيل حصان وساواته...
وطلعت بعدها المكياج من الشنطه..وحطت حطة بسيطه..
بس ركزت ع رسمة العين تفننت فيها زادت بيها من جمال عيونها وحدتهم...
بانت نظرتهم غير...
واكتفت بمرطب الشفاه ع شفايفها..
وختاما خدت عطر لوحده من بنات اختها حطت منه..
بعد ماكملت..ضمت الحوسة وردت كل شي في مكانه..
ومشت بعدها خشت الكوجينه..
لبست المريله..
وبدت تعجن في الدونات...
اللي يراقب حركاتها الهاديه والمتناسقه وهي طلع في الحاجات وتجهز في العجينه..
يقول انها في قمة الرواق والسكينه والهدوء...
كانت غريبه جدا..غريبه ع حالة وحده ليها ماعدتش الساعتين كاشفه خيانة راجلها ليها..
ماكأنهاش نفسها اللي كانت منهارة قبل شويه ومش قادرة توقف ع رجليها...!
كملت عجن وغطت الصونيه ولفتها بمفرش وحطتها في الكوشه متاع الغاز بش تخمر..
وهي دارت لروحها كوب يانسون..حلاته بالعسل..
وقعمزت في الكوجينه وهي تشرب فيه...
فجأه..
سمعت صوت باب الحوش انفتح..بعدين سمعت اصوات هدرزة..
رشفت من كوب اليانسون وحطاته ع الطاوله وهي تشوفله..
شويه وخشت عليها فردوس وهي تقول..
طوبى انتي هني!؟
التفتت شبحتلها وقالت؛من روح بيك؟
فردوس حطنى حسين في بدايه الشارع ومشي خيرك ماجيتيش الزيارة؟
طوبى:انشغلت شويه في المدرسه
فردوس:قالتها عمتي..ايه بنقولك راجلك جي في المربوعه يبيك..
غيرت عيونها عن اختها..
وقعدت تشرب في اليانسون كأنها ماسمعت شي..
فردوس:سمعتيني شن قتلك؟
هزت طوبى راسها من غير ماترد..
بإستغراب قالت:باهي اني خاشه ندوش..
هزت راسها تاني بصمت..
قعدت تشوفلها فردوس بإستغراب شديد بعدين طلعت...
وهي كملت شراب اليانسون ع أقل من مهلها...
اما فردوس خدت حوايج وطول مشت خشت للحمام..
🍃وقعدت تشرب طوبى في اليانسون لين كملاته..
ناضت ومشت للاندينو وغسلت الطاسه ع اقل من مهلها..
بعدين حطتها في الشباك..
مسحت ايديها بفوطه..
بعدين حولت المريله..ومشت علقتها..
طلعت بعدها من الكوجينه ومشت للدار..
وقفت ع الزيانه وهي تشوف في شكلها..
ساوت شعرها..بعدين خدت العطر وحطت منه وكثرت..
وين جت بترده شافت روج خمري محطوط ع الزيانه..
حطت العطر وخداته...
فتحاته وحطت منه وهي تشوف للمرايه...
رداته لمكانه..وقعدت تتأمل في شكل ملامحها...
وفي عقلها تتردد جمله سمعتها منها اثرث فيها هلبه..
《 عينك...مافيهاش عيب واحد..تنهد بحسره وقال..هناك اللي ريح تحطبله..》
تنهيده الحسرة متاعه وقتها اثرث فيها اكثر من الكلام نفسه..
رفعت حاجبها رفعه بسيطه وهي تشوف لروحها في المرايه..
ركزت بنظرها ع بطنها..خدت نفس..
بعدها مشت طلعت من الدار..متوجهه للمربوعه...
خطواتها كانت هاديه وراكزه وهي تمشي..حالتها للي يعرف شن صاير معاها قبل شويه محيره لأبعد..
وصلت لباب المربوعه الخارجيه الدخلاني..
كان مسكر...غمضت عيونها وبلعت ريقها..
بعدين همست...يارب..
فتحت عيونها..وفتحت الباب بشي من البطئ المقصود..
وخشت...
🍃هو كان مقعمز شاد بيده اليمين يده اليسار..
ومتكي بمرافقه ع ركابه وهو يهز في رجله اليسار بتوتر بالغ..
وكان سرحان في الفراغ..
وين سمع الباب انفتح..
شبحله...قلبه قعد يدق بسرعه وهو يشوف فيه كيف ينفتح بالشويه وزاد توتره...
لعند مابانت عليه...
وين شافها...قلبه فر فران..وناض وقف...
نظرات الانبهار في عيونه ليها امتزجت بنظرات الحيره...
هي ماشافتلاش نهائي..
مشت طول...وقعمزت مقابلاته...
مسحت بإيديها ع رجليها بعدين شافتله..
رفعت حواجبها شويه وقالت..قعمز..
طول قعمز وهو يشوفلها..
كان مركز ع عيونها الحايره في لونها..الحلوة..اللي كانت تبان بشكل مختلف هالمرة..حتى نظراتهم غير..
هي قعدت تشوفله بنظرات لامبالاة وبرود وساكته..
وصمتها كان مخيف جدا..
زاد وتره...وتره هلبه..
بلع ريقه وبدي الكلام بإرتباك واضح وهو يفرك في ايديه ببعض:طوبى..شوفي..اسمعيني..خل نشرحلك...هي قصدي..نجاة كانت تبي مني فلوس..فلوس لعلاج حمزة..عارفه وضعه انتي..المهم..اني..وقتها كنت مروح للحوش بنجيب ملف نسيته في المكتب..
مسح جبهته اللي باديه تعرق ورجع يفرك في ايديه ببعض وهو يقول بتوتر وارتباك..هي اتصلت بيا لما اني في الحوش..واني رديت عليها قالتلي تبي فلوس مافلوس وهكي..المهم..تنحنح وكمل يقول..قالتلي اني طالعه توا نجيك للشركه ناخدهم منك..قلتلها اني في الحوش توا قالتلي خلاص..بلع ريقه وقال..نجيك الحوش ناخدهم ونمشي..هي كانت مستعجله..المهم هي جت ولما جت..انتي اتصلتي وقلتي مروحه ماقدرتش نقولك اني في الحوش ماعرفتش شن نقول اضطريت نقولك اني قاعد في الخدمه...المهم هي خدت فلوسها ولانها كانت جاية في تاكسي اني وصلتها ورفعتهم بعدين هي وحمزة للمركز..وهو هدا راهو مش اكثر من هكي..يعني..ضحك بإرتباك وقال..مش زي ماانتي فهمتي..
وسكت وهو يشوفلها كيف تشبحله بنفس النظرات ماغيرتهمش..ومانطقتش بحرف..
شد ع ايديه بقوة وقال:خيرك ساكته؟
هي قالت..كملت خلاص؟
هز راسه وهو يبلع في ريقه..
تنهدت بعدين قالت..حاليا حني نمروا بظروف انت عارفها كويس..الوضع مش متحمل مشاكل ودوشه زياده..لهدا..
قلبه قعد يدق بسرعه من الخوف وهو يراجي فيها تكمل..
تنهدت تاني وقالت..اللي صار يقعد بيني وبينك لعند مايطلع راجل اختي واني حاسه انه مش حيطول..بعد مايطلع..
طلقني بهدوء..
قلبه قريب وقف..
قاطعها وقال..طوبى..
هي سكتاته لما علت صوتها وهي تقول:انت تسمع بس وماتتكلمش عطيتك فرصه كذبت فيها لين دهشت..
بدت ع وجهه ملامح الصدمه وهو يشوفلها وانفاسه بدت تتسارع لأنه وصل لأقصى مراحل التوتر..
وهي كملت تقول..طلقني بهدوء..من غير شوشرة ودوشه وفضايح..اشرت عليه بسبابتها وقالت..وانت عارف كويس لو عندت الدوشه اللي بتصير بعدين مش لصالحك..خلينا نطلقوا بعقل وهكي انت تحافظ ع صورتك قدام الناس..شوف هاه قاعده نتعامل معاك بأصل لأخر لحظه رغم انك ماتستاهلش..
الجالي يسمع فيها ويشوف فيها وكان حاس روحه كأنه في حلم..او وهم من اوهامه اللي يشوف فيهم لما تجيه الحاله..
اللي قدامه مش طوبى..!!
مش هي بكل..!!
هادي وحده تانيه..!!
خلاته مصدوم فيها ومش قادر يرد..
وهي كملت كلامها تقول..وفي حاجه لازم تعرفها..
"أني حامل..."
اللي قالاته نزل عليه زي الصاعقه...
توسعوا عيونه ع الاخر من قوة الصدمه وهو يشوفلها..
وهي بعد ماسكتت شويه كملت تقول..
ماتخافش مش حرماتك منه اكيد حتشوفه بعد يجي ان شاء الله وحتقدر تمارس ابوتك ببساطه ومن غير تعقيدات..طبعا هدا في حالة طلقت بهدوء بعيد عن المحاكم وحكم المحاكم والفضايح والمشاكل..خود بنصيحتي واقعد بإحترامك ع اقل ع خاطر العيل اللي بيجي..
عقد حواجبه بضيق وعيونه يشوفولها بضيق وألم..
وهي قعدت ساكته تشوفله بنظرة بارده وتراجي في رده عليها..
غير عيونه عنها ورمي نظره للأرض..
بعدين خدي نظاراته اللي كانوا جنبه و ناض وقف ومشي للباب وهي تشوفله..
فتح الباب..فرد نظاراته ولبسهم..
وين جي بيطلع شبحلها وقال..
بنخليك براحتك تهدي وتروقي بعدين نحكوا..سلام..
طلع وسكر الباب وراه..
وهي ناضت..ومشت للروشن وقفت عليه..
شافاته وهو ماشي للباب الخارجي..
وصل فيه فتحه..ولما جي بيطلع شبحها واقفه ع الروشن..
رفع يده وحياها..
بعدين طلع وسكر الباب..
تبدلت ملامح وجهها ونظرات عيونها الباردة للألم..
حست رجليها ثقلوا معاش تقدر توقف عليهم..
قعمزت تحت الروشن..وحطت ايديها ع وجهها وانهارت بالبكي..
"طوبى.."
وقفت بكي وحولت ايديها وشافت لباب المربوعه.
لقت فردوس واقفه قدامه وهي تشوفلها بصدمه والدموع مغرقات عيونها
قدمتلها وهي تقول؛شن اللي سمعته هدا!؟ طلاق شني ومحاكم شني!!؟
طوبى قعدت تشوفلها بنظرات ألم بعدين حطت يدها ع عيونها وقعدت تبكي..
قعمزت جنبها فردوس وهي ترعش..
حطت يدها ع كتفها وقالت بخوف..
شن في ياطوبى!؟
ارتمت طوبى في حضن اختها وضمتها بقوة وقعدت تبكي بالعبره..
عبراتها كانت تطلع بشهقه تفتت القلب..
خلت اختها تبكي معاها وهي مازال مش عارفه شي..
ضمتها ليها وهي تقول بنبرة باكيه..
خيرك ياعمري خيرك..شن دارلك بش خلاك تبكي هكي..
شن دار..
وطوبى تزيد تبكي بوجع..بقهر..
ومن قهرتها طلعت "آه" من وسط قلبها حرقت قلب اختها عليها..
فردوس بوجع؛ووك عليا ياروحي ووك عليا..شن دار فيك شن دار فيك الله لايربحه..
🍃وهو لما طلع برا.
كان في حالة يرثى لها من داخله..عكس ماكان مبين..
فراس وهو مقعمز قدام المحل كان يشوفله بتركيز..
لاحظ انه مش ع بعضه بس يحاول يبين العكس..
ركب سيارته..وشغلها..وتحرك وهو يحرق في العجل..
فات من جنب فراس اللي قعد مع السيارة بعيونه ونظراته كلها ازدراء...
🍃🍃🍃🍃
وفي الحوش اللي مقابله..
تحديدا شقة عبد القيوم...
كان في الكوجينه..بادي يدير في غداه..
واقف ع الرخامه وقدامه اللوح فوقه بصلة..
قاعد يقطع فيها بعصبيه...
سيبها فجأة..
ومشي للاوندينو وغسل ايديه..
بعدين مسحهم في فوطه ومشي طلع من الكوجينه..
لطاولة الممر..خدي تليفونه اللي كان محطوط عليها..
خش ع سجل الاسماء..دور ع اسمها لقاه..اتصل بيها طول..
نادى مرة..اتنين...تلاته..
بعدين انفتخ الخط..
"يااهلا وسهلا بولد خالي"
عبد القيوم؛شن حالكم؟
"الحمدلله شن حالك انت"
عبد القيوم؛الحمد لله..صفيه نبيك في خدمه..
"ولو اني زعلانه منك واجد لأنك حاذفني في الفيس بس مش مشكله نخدمك عادي"
عقد حواجبه وقال؛صفيه ركزي معاي قبل شويه ونا مروح من العمل شفت بنت الواعر جايه لحوش هلها وين نزلت من سيارتها صارتلها دوخه..
قاطعاته وقالت..
"ياغبيني كنها"
عبد القيوم: لو نعرف كنها ليش متصل بيك!؟
"باهي سكر سكر خل نكلمها ونشوفها"
عبد القيوم؛ارجي هنا شويه كان كلمتيها شن بتقوليلها؟!
"بنقوللها ولد خالي شافك وانتي دايخه قالي اتصلي بيها شوفيها..كنك عبد القيوم شن السؤال العبيط هذى!؟"
هو غمض عيونه وفرك بيده المنطقه اللي بين عيونه وقال:تمام تمام
"نشوفها وبعدين نعاودلك نبي نحكي معاك في موضوع مهم"
حط يده ع رقبته من الخلف وقال:تمام..
سلام...وسكر عليها ونزل التليفون وهو مضايق ع الآخر.
تصرفه مش عاجبه ومش راضي عنه..بس مش قادر يحكم في قلبه المليان خوف عليها...
🍃🍃🍃🍃🍃
مقعمزة جنب اختها وهي تشوفلها وتسمع فيها شن تقول بذهول وصدمه..
طوبى وهي تبكي؛كنت نشوف ونكذب في عيوني..في قلبي كان في شك بس قعدت نقول وسواس وهم تهيؤات..من خوفي يافردوس..من خوفي نروح لبوي مطلقه وهو اللي كان يقولي نبي نطمن عليك..ع خاطره بلعت وغصيت مشيت وفوتت وقعدت عميه وطرشه وبكوشه رضيت ع روحي شي عمري وحياتي ماتخيلت اني ممكن نرضاه لروحي..خفت حتى من كلام الناس خفت من بعد اللي صار لأميمه والدوة اللي طلعت عليها خفت حد يعيب في رباية بوي وسدرة تحملت في روحي تحملت هلبه يافردوس وكنت مستعده نتحمل..لكن الخيانه لو شن يصير لايمكن نقبلها ع روحي..لايمكن نقبل ع روحي نكون مضحكه..سكوتي وهروبي يافردوس خلاهم يتمادوا خلاهم يعفسوا عليا يافردوس..خلاه هو..هالحق.ير النذل..يجيب هديكا الحيوانه لحوشي .. وقعدت تخبط بيدها ع صدرها وهي تقول...وفي وسط دار نومي..وع سريري..خنقتها العبرة
وغمضت عيونها بألم وقعدت تبكي..
وفردوس بصدمه ودموعها ينزلوا؛اني مش قادرة نصدق اللي نسمع فيه ياطوبى ياربي شن هدا!؟ معقوله الجالي..الجالي الرزين العاقل المحترم يطلع منه هدا كله!!؟
ابتسمت تهكما وهي تبكي..
فردوس وهي تفكر؛معقوله ماليه عارفين هدا علاش خطبوله وزوجوه بسرعه!؟
طوبى بنبرة ألم باكيه؛حاستهم عارفين..حاسه..اصلا لو تتفكري كيف جو خطبوني طول من غير مقدمات..اساسا اني قبل عمري ماحسيت انه معجب بيا ولامهتم بيا ولامدورني يعامل فيا عادي عمري ماريت منه حاجه غريبه...اني كنت حاسه يافردوس والمراة تعرف وتحس براجلها لوكان قلبه معاها ولا!؟ واني من لما تزوجته كنت حاسه ان قلبه مع غيري..
قالت الجمله الاخيره بنبرة وجع وقعدت تبكي..
نزلت دموع فردوس اللي قعدت تقول:الله لايسامحهم..الله لايربحهم مالقوش غيرك من بين بنات الدنيا مااختاروا الا انتي..مالقوش غيرنا حني يديروا فينا هكي..حسبي الله ونعم الوكيل فيهم..
وطوبى تسمع فيها وهي تبكي بقهر وحسرة..
رشفت فردوس وشبحت لبطنها وقالت؛قداش ليك حامل؟
بنبرة باكيه ردت:بنخش الخامس
قالتلها:معناها اللي في بالي صح ليك مده حامل ودرقي لما سألتك وقتها ونكرتي كنتي تكذبي صح؟
هزت راسها وهي منزلاته تحت..
فردوس؛علاش درقتي علينا حتى حني؟
طوبى بنبرة باكيه؛في الاول ع خاطر مدرسة سدرة..بس بعدين كل ماجيت بنقوله هو بالذات تصير حاجه تمنعني وتوا بس عرفت علاش..
فردوس:لما قلتيله مادارش ردة فعل بكل..
طوبى بكره؛الواطي عارف روحه شن داير..عارف ان في الف سبب يخليني ندرق ومانقولش..
بإستفهام قالت فردوس:في سبب تاني قصدك؟
طوبى غيرت عيونها عن فردوس وحركت راسها بالنفي وقالت..قصدي ان حني مش متفاهمين وحياتنا مش ماشيه كويس..
فردوس:طوبى لو في حاجه تانيه قولي..
طوبى بضيق؛مافي شي غير هكي يافردوس راهو اني حياتي جحيم معاه ومع ماليه..هالناس طلعوا مايعرفوش ربي يافردوس..بالذات مغليه وخديجه متجبرات ومتغطرسات اعوذ بالله..
فردوس:من قبل معروفات مغليه وخديجه وحتى سدرة كانت خايفه عليك منهم لكن متهنيه بالجالي..بتهكم قالتها..
طوبى تنهدت من قلبها بحسره وقالت؛آه ياسدرة عينك تشوف اللي صار فينا ياوخيتي..
فردوس بألم؛حسبنا الله ونعم الوكيل دنيا وآخره..
شافت طوبى لفردوس شويه بعدين شدت يدها وهي تقول..
اللي عرفتيه مانبيشي يطلع منك توا لأي حد..
فردوس بقهر؛كيف ماتبيشي يطلع مني!؟ تي اني نبي نخلص بنتي منهم هالعيله الواطيه..
طوبى؛حتخلصيها ان شاء الله..حتخلصيها بس مش توا..يطلع عبد الرؤوف ونطمنوا عليه وعلى غرفه وبعدين لكل حادث حديث..
فردوس:باهي انتي بقعدتك هني مش حتخلي بوي يشك ياطوبى؟
طوبى رشفت ومسحت دموعها وهي تقول:هو لازم يعرف اني حامل وقاعده هني لأني نتوحم وكارهه الحوش..
فردوس؛وهداكا الحق.ير لما يشوفه معاش جاك ولادورك ولادورنا وحني فهالظروف حيشك ياطوبى..
طوبى شبحت للفراغ وقالت؛لو كنت نعرف الجالي ولو واحد في الميه حيدير المستحيل بش مايخليش بوي يشك في شي..
فردوس شبحتلها بإستغراب وعدم فهم..
فجأة..
سمعوا صوت تليفون يرن..
طوبى وهي تسمع قالت:تليفوني..
فردوس:خليك اني نمشي نجيبه..
وناضت ومشت طلعت من حداها..
بعد ماطلعت فردوس..
طوبى مسحت ع وجهها..بعدين خدت نفس وطلعاته وقالت..
حسبي الله ونعم الوكيل..
ع خشة فردوس وفي يدها التليفون وهي تقول؛فصل..
طوبى؛ شفتي مني؟
فردوس:صفيه التارقيه...ومدتلها التليفون...
خداته طوبى وهي مستغربه...
قعمزت فردوس جنبها وهي تقول..
تقول كابوس مش مصدقه!!
طوبى بحزن؛مالا اني شن نقول يافردوس..
وغطت عيونها بيدها ورجعت تبكي..
وفردوس خدتها في حضنها وهي تقول بنبرة ألم..
الله يحرق قلوبهم على اعز ماعندهم ياربي....
🍃🍃🍃🍃🍃
"مش قتلك من الاول اني.."
نجاه وهي تتكلم بغيظ ودموعها ينزلوا:الجبان الساف.ل..
صابرين؛خلاص توا وخيتي نبوس ايديك صفحه هالمخلوق مزقيها من حياتك..
نجاه بحقد؛خلاص بعد اليوم بالنسبه ليا الجالي خلاص لكن مش حنخليه من بعدي يعيش متهني مع غيري..
صابرين:لوحيهم ورا ظهرك فوتيهم سحيقة تسحقهم..
نجاه بمكر؛لاياعمري اني اللي نسحقهم مش السحيقه..اصلا اليوم درت هكي بش نخليه يرفعني للفيلا هكي ولاهكي ماكنتش ناويه نطلع منها الا واني كاتبه اخر سطر في قصة زواجه من هديكا اللعبه..
صابرين بإستغراب:شن درتي!؟
نجاه رفعت حاجبها بمكر وقالت؛تتفكري توكات التايقر اللي خدتهم مروة لجوري وقعدت نلبس فيهم معاها؟
صابرين؛ايه!
نجاة؛قبل لنروحوا من تركيا اني رتبتله الشنطه متاعه ودسيت وحده منهم فيها..
صابرين بدهشه؛قصدك شافتها وماصار شي بعدها!؟
نجاه:لاشافتها بس هو شكله ضحك عليها بكلمتين وصدقت تعرفيها درويشه شويه..
صابرين؛ايه باهي وبعدين؟
نجاه؛شافت التوكه نفسها ع راس جوري حكتلي جوري شن دارتلهم لما قعدوا في حوش العيله وقالتلي ان التوكه عجبتها وسألتها عليها.
صابرين بإبتسامه ساخره:وتقوليلي درويشه!..
تنهدت نجاه وقالت؛المهم تتفكري في المشيه متاعنا لحوش العيله بعد ماطلعنا من المصحه..خليتها تشوفها ع راسي وركزت عليها كيف انتبهتلها..
صابرين؛ومادارت شي..
نجاة؛كان مادارت شي قبل اليوم حدير..
صابرين:علاش!؟
نجاه وهي تتفكر:هداكا السافل بعد ماكلماته خش في عقله وطلع ومعاش ركز ع شي اني حولتها من شعري حطيتها تحت المخده..
🍃هي كانت حاطتها بين الورغان والمخده لما جي الجالي بيرتب السرير وهو متوتر جبدها بالورغان من تحت المخده..
وطوبى لما جت بعدهم ورفعت الورغان من غير ماتلاحظها طاحت منه🍃
صابرين وهي تفكر؛تعرفي كان بعد هادي ماصار شي اعرفي انه دايرلها خطين زي مادايرلك انتي..
نجاة حركت راسها بالنفي؛لالا مش حتعدي ع خير واني مش حنخليها تعدي ع خير..
صابرين بقلق:نجاه ماديريش تصرف اهبل يولي عليك..
نجاه:ماتخافيش اللي في بالك مانديراش عارفه لو ماليه سمعوا مني اني حياخدوا مني الصغار..
صابرين بخوف؛في كل الحالات لو عرفوا حيصير هكي يانجاه..
نجاه؛تؤ..طوبى طيبه هلبه وماتحبش دير مشاكل لحد متأكده انها حتطلب الطلاق من غير ماطلع السبب عارفتها كويس كيف تفكر..
صابرين؛ان شاء الله يكون هكي يارب..
نجاة؛ع العموم اني غدوة ماشيه غادي بش نحط النقاط ع الحروف..
صابرين؛شن بديري!؟
نجاه وهي تفكر باللي حديره؛غدوة ان شاء الله بعد نروح من عندهم نحكيلك...
🍃🍃🍃🍃🍃🍃
وفي المقر اللي قاعد فيه عبد الرؤوف..
كان متكي ع السرير في الحجرة اللي قاعد فيها ويتفرج ع التلفزيون..
فجأه انفتح الباب بقوة..
وخشوا افراد من الكتيبه وقالوله..
هيا نوض تحرك..
عبد الرؤوف عقد حواجبه وهو يشوفلهم وقال..
شن تبوا..
واحد منهم بصوت عالي قال..
نوض..فز..هيا..
ناض..وخدي معاه الكاط متاع الزبون وهو يمرر في نظره عليهم بإمتعاض.
وهما خدوه وطلعوه من الحجره ومنها برا المقر بكل..
🍃وهالمعلومه وصلت لحسين من صديقه اللي في الكتيبه..
ووقتها حسين كان مع عمه وجده ماشيين لواحد من صحاب الحاج علي عنده ولده شخصيه واصله في البلاد وعنده معارف ع نطاق واسع..
كانوا يبوا منه يكلم ولده يخدمهم في موضوع عبد الرؤوف..
والراجل عطاهم وعد يكلم ولده ويرد عليهم..
بعد ماجي الاتصال لحسين ماباش يبين لعمه لشي..
روح بيهم للحوش وتحرك طول لمقر الكتيبه..
🍃"رحلوه للحبس طول"
حسين؛من غير مايحاكموه؟.
:قريبك ياحسين خادمينهاله صح داروا محاكمه ولا ماداروش مش متغير شي..
حسين وهو عاقد حواجبه بقلق قال:شن قصدك؟
؛والله شن بنقولك..الباين موضوعه مطول وهلبه مش شويه وان شاء الله أخره خير...
🍃هالكلام خوف حسين هلبه..وخلاه يمشي طول للسجن اللي حطوا فيه عبد الرؤوف..
وع قد ماحاول يحصل فرصه بش يشوفه ماقدرش..
مانعين عليه الزياره منعا باتا والاوامر كانت من جهات ليها ثقلها في الدوله..
🍃من جهة تانيه صديق عبد الرؤوف الكتيبه..
واللي كان معروف بإسم"اسكندر" قاعد يدور في اللي صار لصاحبه وكل وصله للآن معلومات مش مهمه ومانفعاته في شي..
ولما عرف بانهم نقلوه للحبس..مشي طول لمكان السجن وحاول زي ماحاول حسين قبله وكانت النتيجه وحده..
🍃🍃🍃🍃🍃
"عندي سفره غدوة اجلها للأسبوع الجاي"
اب فاتن؛تمام ع خاطرك نأجلوها بس خليك حريص يكون عندك وقت بش تحضرها حيكون فيها ناس ثقال يهمك تعرفهم..
مختار:تو نشوف..
شويه جاه اتصال..
قام تليفونه..ضيق عيونه وهو يشوف في الرقم..
بعدين رخاهم وفتح الخط ورد..
امم.......تمام...وسكر...
:شكلها مزة ماتبيش تكلمها قدامي..وغمزله..
مختار:لو كانت مزه نمشيلها طول ماعندي علاش قاعد معاك..
ضحك...
وهو ناض وقاله بإبتسامه؛نشوفك الاسبوع الجاي..
:تمام..رحله موفقه..
مشي مختار وهو يقول..
Danke..."شكرا بالألماني"
🍃وكمل طريقه برا فيلا شريكه وهو يقول بصوت مسموع ليه هو وبس..
ماكنتش نبي نضره لغرفه لكن انتي اللي جبرتيني..
وصل في السياره فتحله السواق الباب السحاب..
ركب....بعدين سكره ومشي ركب هو وتحرك بالسيارة طول..
🍃🍃🍃🍃🍃
في جامعه طرابلس..
قاطع_ب..
تحديدا كليه اللغات..
كانت آلاء مقعمزة بروحها تراجي امتى تبدا المحاضرة الأخيره..
حاطه السماعات وتسمع في الأغاني وسارحه في عالم تاني..
ومن بعيد شويه..
اكابر ومعاها وحده تانيه مقعمزات يشبحولها ويتكلموا عليها..
:معقوله طول دار وحده تانيه بعدها بسرعه هكي!
اكابر؛مالاشني ياروحي ان شاء الله صدقتي انه يحبها حق..شن بيحب فيها وحده زي هادي..
قعدت البنت اللي معاها تشبح لآلاء وهي مستغربه في الكلام اللي سمعاته من اكابر..
تنهدت اكابر وهي تقول؛المهم عندي كسرتلها خشمها وطبقتها وفشيت نفختها الكذابه وخليتها تعرف حجمها كويس..
:هي هادي تعرف حجمها ومستواها وماتعيشيش الدور..
سكتوا الزوز..
لهت اكابر بتليفونها..
اما صاحبتها كانت تمرر في نظرها ع المكان بملل..
لعند ماجو عيونها ع واحد..
هيئته وشكله مافيش زيهم في المكان اللي هي فيه ونادرا ماتشوف زيه..
كاريزما واناقه وجاذبيه ووسامه..
؛كوبي شوفي هالشوفه!..
شبحت اكابر وين ماتشبح صاحبتها ابتسمت بإعجاب وقالت..
WOW..
وقعدوا معاه بعيونهم وهما يشوفوله بإبتسامة اعجاب..
بدت تتلاشى شويه شويه لما شافوه وين ماشي..
:اكابر تشوفي في اللي نشوف فيه!..
اكابر وهي مصدومه:عطيها موت.!
🍃كان ماشي لآلاء..
وقف عليها وهو يشوفلها كيف سرحانه وتشبح لجهة وحده..
ابتسم...وقعد واقف في مكانه..
مش عارف كيف يكلمها ويلفت نظرها..
هي فجأه حركت راسها ومررت نظرها حواليها وشافته استغربت..
هو بآبتسامه قال:السلام عليكم..
حطت يدها تحت الوشاح وحولت السماعات وهي تقول..
تفضل.
بإبتسامه قال:شكلي مش مألوف؟
عقدت حواجبها بإستغراب وقال:اول مرة نشوفك..تفضل شن تبي؟
حول نظاراته وقال:لامش اول مرة تبي نفكرك اول مرة وين كانت ومع مني..
هي خدت شنطتها والدوسي متاعها وبيدها التانيه شدت التليفون وناضت وقفت وهي تقول؛وين؟
هوقال؛في العمارة اللي يسكن فيها خالك..وتاني مره كانت وانتي طالعه من مكتبه
رفعت حاجبها وقالت؛مش متفكره كويس..المهم حضرتك شن تبي مني؟
بإبتسامه ثقه قال:شي غير اني نتعرف عليك بس
رفعت حواجبها وقالت تعجبا؛بس!
هو عقد حواجبه رغم ابتسامته بعدم فهم لردة فعلها..
آلاء بشي من الحده:معليش اني مش للتعارف..وبعدين عيب تبدا في معرفه بينك وبين خالي ومن وراه دير هكي..
هو قال مسح ع حواجبه وقال بضحكه:اها..فهمتيني غلط..
التعارف اللي نقصده اني غير اللي انتي فهمتيه..اني انسان جدي ماعنديش وقت نضيعه ولاعندي في اللف والدوران وتأليف المقدمات..صدقا وبكل صراحه من اول مرة شفتك فيها عجبتيني وشدتيني ليك هلبه ونبي نتعرف عليك كبداية ومتأكد القدام حتكوني معاي العمر كله..
استقبلت كلامه ببرود شديد ماحرك فيها ذرة شعور وحده..
ردت عليه وقالت؛انت صريح هلبه واني نعطيهالك بصراحه اني كنت مخطوبه لواحد نحبه وقاعده نحبه ومانقدرش نشوف لحد لغيره ومعنديش استعداد لهدا كله اصلا..ماتعبش روحك معاي..
ولفت ومشت وخلاته..
متسمر في مكانه وهو يشوفلها بصدمه..
اللي صدمه مش رفضها ليه لأنه كان احتمال وارد عنده..
اللي صدمه الكلام اللي قالاته...
ضايقه هلبه..وحس بشي وجعه منه..
وخلا عنده فضول شديد يعرف الشخص اللي تكلمت عنه والحسرة كانت واضحه في عيونها..
لبس نظاراته وهو مازال يشوفلها كيف قعمزت بعيد بروحها..
بانت تلبس في السماعات..بعدين رجعت تشبح للفراغ وهي سرحانه..
زاد ضايق..وحس بشعور مزعج تحرك في داخله..
لف ومشي وناوي يرجع مش جديد..لأنه مش متعود ع الاستسلام من اول محاوله...
🍃أكابر بغيظ؛تي غير وين تلقى فيهم بس..
؛اني مش عارفه شن شايفين فيها..شن فيها زايد ع غيرها!؟
اكابر بغيره:مقيوله حظ القبايح ياماما...
:صدقتي..
🍃🍃🍃🍃🍃
الساعه 4:30قبل العصر..
في حوش لطفي الواعر..
قدام الصاله..
كان فردوس واقفه مع فايزه وهما يهدرزوا..
فردوس:بدلت عليا عمتي بتبات معاها الليله وغدوة بإذن الله بيروحوا الزوز..
فايزة؛باهي الحمد لله ع سلامتها وربي يفرج عليها وعلى راجلها يارب..
فردوس:يارب..
فايزة:اني جيت نشوف طوبى البنات بكري قالولي داخت..
فردوس ابتسمت وهي تقول؛طلعت حامل ياحنه..
ابتسمت فايزة بتصنع وقالت؛الله يبارك الله يبارك..وينها هي؟
فردوس:في الكوجينه..
فايزة؛تو نمشي نشوفها..
ومشتلها فايزة وفردوس معاها..
خشوا عليها لقوها تحط في كعك الدونات في بوكس حلو..
فايزة بإبتسامه؛يميي تسهفت..
طوبى يدوب ابتسمت وقالت:في منهم دسيته في الثلاجه ديروا قهوة فردوس وكسدوا عليهم..
فردوس بإبتسامه؛ان شاء الله..
فايزة وهي تنفص في طوبى:مبارك قالولي حامل..
فهمت عليها طوبى وهزت راسها وهي تقول؛الله يبارك فيك..
فهمت فايزة ايماءة طوبى..
بمعنى"خبرته"
وارتاحت..
طوبى غطت البوكس وقالت؛روجه وين؟
فردوس؛في الدار..
طوبى:معليشي فايزة بنمشي نوتي روحي..
فايزة: ولايهمك حبيبتي خودي راحتك..
ومشت طوبى طلعت من حداها للدار..
وعيون فايزة وفردوس ومعاها..
وكل وحده فيهم نظرات عيونها يحكوا عن قلق حسوه عليها..
🍃اما هي دقت الباب وخشت..
لقت اريج تلبس في الوشاح..
طوبى؛علاش غيرتي لبستك كانت كويسه؟
اريج؛نضال بيمشي المصحه وبنتلاقوا غادي..
بدت ع وجه طوبى ملامح الازدراء تلقائيا بدون ماتلاحظ اريج..
ومشت للدولاب طلعت منه شن تلبس..
اريج:اني برا بيبو..
طوبى:تمام..
ومشت طلعت اريج...
وخلت طوبى بروحها تبدل في حوايجها..
وطوبى وين تقعد بروحها تتفكر اللي صار..
وتحس بمرار فضيع..وتبدا تبكي بصمت..
🍃واريج طلعت برا لسيارتها..
ع جية سيارة "تندرا" لونها اسود..
فاتت من قدامها ودرست قدام حوش علي الواعر..
نزل منها صاحبها..والتفت شبحلها وهي ماشيه تركب للسياره..
ونضال اللي كان يراقب فيها وهي طالعه..شافه...
وبدي يغلي..
ركب اريج للسيارة بدون ماتلاحظ شي..
وصاحب التندرا غير عيونه عنها وابتسم ابتسامه خفيفه ومشي لباب حوش علي الواعر..
وقف قدامه وبدي بدق..
انتبهت اريج وشبحتله..لبسه ونوع السيارة خوفوها..
وقالت؛ياربي هدا مني!!؟ شكله جاي يطب جدي علي مايهنيش في لسانه حتى هو...
ع طلعة طوبى وفي يدها بوكس الدونات..
فتحت الباب وركبت وشافت لصاحب التندرا خافت حتى هي..
انفتح باب الحوش وطلع حسين..
والزوز يتفرجوا بترقب وخوف..
شافوهم هدرزوا شويه بعدين حسين رحب بيه ودخله للحوش وسكر الباب..
اريج خبطت ظهر يدها اليمين براحة يدها اليسار وقالت:ااه..هدا صاحب عبد الرؤوف اللي قال عليه خالي حسين يومها..
طوبى:من هو؟
اريج:قال هو بس اللي يقدر يشوف عبد الرؤوف يعني بيولي حلقة وصل بينا وبينه..
طوبى هزت راسها وهي ساكته..
اريج وهي تشوفلها قالت:بيبو خيرك اليوم نشوف مطفيه ومهبيه..
طوبى:طبيعي اريج من الحمل وحم وهكي..
اريج:طوبى انت قداش ليك حامل؟
طوبى:تحركي بسرعه بيفوت علينا وقت الزيارة الطريق زحمه توا.
استغربت فيها كيف هربت من الاجابه..
شغلت السيارة وتحركت طول..
وشويه ومشي نضال ركب سيارته ولحقتهم..
🍃🍃🍃🍃🍃
"عاودتلي وباين عليها من صوتها كويسه"
هو كان يشوف لمراية المدخل ويلبس في السيبدرو متاعه ويقول..
تمام..
"عبدو نبي نحكي في موضوع هي حكت معاي فيه"
عقد حواجبه بإستغراب وقال:يخصني!؟
"ايه يخصك..فاضي تسمع"
هو قال بإستغراب شديد:احكي..
🍃🍃🍃🍃🍃
"الله يبارك زي النشافه"
طوبى بإبتسامه مجامله؛صحتين..شنو روفي عجباتك؟
غرفه بإبتسامه؛يسلموا..
طوبى اكتفت بالابتسامه ردا عليها..
مطيره؛طويبه..خيره وجهك اصفر هكي !؟
غرفه:حتى اني لاحظتك..
تنهدت وهي محتفظه بالابتسامه المصطنعه اللي علي وجهها وقالت..
اني حامل..
ابتسمت غرفه ببهجه..
ومطيره ناضتلها وهي تقول:الله يبارك الله يبارك..
وجتها ضمتها..وطوبى قاعده تشد في دموعها بقوة..
🍃🍃🍃
وتحت..في باحة المصحه..
اريج؛عمري ماشفته يانضال ولاعرفته في حياتي..
نضال بضيق:اني ماقلتش تعرفيه قتلك شبحاته ماعجبتنيش..
اريج :انت تتوهم نضال الراجل ماشفت منه شي غلط..
نضال؛اضربيني ع خاطره وخلاص..
اريج بضحكه:عليك غيره عندك..
نضال مرر نظره عليها وقال:لبستك بكري خير مفروض قعدتي بيها..
اريج؛قصدك مش حلوه هادي؟
نضال:لا هي حلوة وانتي عارفتيها حلوة هدا علاش معاش نبيك تلبسيها بكل..
هي بضحكه قالت:تأمر أمر ياتؤبرني..
ضحك ضحكة خفيفه وقال:شمطاء..خلتيني نحرم روحي منك ونستاحشك..
اريج؛انت مابيتش تفهمني خديت مني موقف طول..
نضال:تو اللي درتيه يااريج يتفوت؟
اريج بإحراج؛هو مايتفوتش عارفه وحقك تزعل والله حقك..بس مش لهالدرجه نضال طلعت جافي هلبه..
نضال؛يقولوا الزعل ع قد المحبه وانتي عارفه روحك شني عندي..ماتوقعتش الحاجه اللي توجعني تجي منك انتي..
اريج بضيق:اسفه والله اسفه والله معاد تتعاود..
ابتسم وهو يشوفلها قال؛شمطاء مشفشفه منظرك امس خيال شديت ضحكتي شد..
اريج؛خزي..اني نشكي ونبكي واني تتسهوك..
نضال بضحكه:شفاشفيك خربوا عليا لحظات التأثر..
اريج؛حسستني..بابا شفاشيفي انعم من شفشوفتك اللي تتجكتر بيها..
نضال:لا معليشي ياعيوني وسعت منك شعري اني شعر هنود مافيش كيف تطعني فيه بكل..
اريج؛تي غير لا ياشاهيد كابور.!
نضال؛ صقع عليك وعليه احلى واجذب منه مليون مره..
اريج:اجذب!!...
🍃🍃🍃🍃🍃
وفي المصحه..
طلعت طوبى من حجرة اختها بعد ماقالتلهم هي وعمتها بتشوف دكتورة في المصحه تابع معاها..
وبعد ماسألت وصلوها لدكتورة في قسم النساء الولاده..
🍃الدكتورة؛خشيتي الخامس؟
طوبى:ايه..
الدكتورة؛تمام تفضلي معاي..
وناضوا الزوز ومشوا لجهاز الايكو..
رقدت طوبى ع السرير بمساعدتها الممرضه..
جهزتها للفحص..
بعدين جتها الدكتورة وبدت تفحص فيها وتشوف ع الشاشه..
وطوبى حاسه بشي من التوتر..
شبحتلها الدكتورة بإبتسامه وقالت؛انتي شن تبي؟
طوبى:مانبي شي غير الصحه الكويسه والخلقه التامه..
الدكتورة؛غير بصراحه شن خاطرك يكون اول بيبي..
طوبى:والله مامدورة..لكن احساسي يقول انها بنت..
الدكتورة بإبتسامه؛واحساسك في محله..
ابتسمت طوبى بفرح وعيونها دمعوا وهي تقول..
حسيت والله حسيت..
🍃وخدت حتى هالمرة صور الايكو لبنتها..
كانت كبيره هالمره ومعالمها بدت توضح شويه..
وهي تتأمل في الصورة بعيون مليانه حزن...
قعدت تقول في نفسها..
"ياعمري..ربي يقدرني ونربيك كيف ماربتني اختي..مانقدرش نحرمك من بوك مهما كان وحنقعد محافظه ع صورته حلوة في عيونك لين نموت"
مسحت دموعها..ودست الصور في الشنطه ومشت بتطلع من المصحه..
🍃وهي طالعه رنت ع اريج تجيها..
شويه جوها هي ونضال..
نضال بإبتسامه:شن جو مرت خوي؟..
طوبى ردت عليه بهزة راسه بدون ماتشوفله وقالت؛هيا اريج الدنيا بظلم والطريق الزحمه..ومشت قبلها وسبقتها..
نضال تبعها بعيونه وهو مستغرب فيها..
واريج كانت مستغربه اكثر منه..شبحتله وقالت..حبيبي نهدرزوا بعدين سلام..
ومشت بسرعه ورا خالتها..
ونضال رد السلام..
ومشي لسيارته وهو مازال يفكر في تعامل طوبى الغريب..
🍃في سيارة اريج..
طوبى:رديت عليه..هزيت راسي..
اريج بضيق؛مازال ماتبيش تحكيلي خيرك؟
طوبى تنهدت وقالت؛معاش تسأليني سؤال جاوبتك عليه قبل..
وشبحت للروشن..
وزادت حيره اريج في حالة خالتها وحست ان في شي قوي صاير معاها..
🍃🍃🍃🍃🍃
الساعه 7:15مساءا..
في كوجينة حوش لطفي الواعر...
كانت فردوس طيب في العشي واريج معاها في الكوجينه..
فردوس:عادي فترة الوحم يتغير فيها المزاج..
اريج:باهي بنقنع روحي بكلامك هدا..لكن نبي نعرف هي حامل في اما شهر؟
فردوس:خشت الخامس..
اريج بصدمه؛كيف وهدا وين عرفت!؟
فردوس؛ تعرف من قبل لكن راجلها قاللها ماتقولش توا لين يثبت..
هزت اريج راسها ودارت روحها مصدقه كلام امها..
🍃اما طوبى..
كانت مقعمزه بروحها في الجنان تحت شجرة الياسمين..
حاطه السماعات في وذانها وهي تسمع في القرإن..
ودموعها حبوا رفقة خدودها ومعاش يبوا يفارقوها..
شويه انبتهت..
لباب الحوش الخارجي اللي فتحه بوها..
كيف خش منه الجالي وهو يكركر في الاكياس ويحط..
خضرا وفواكه حاجات فطور..سقيطة لحم..
وثلاثه بوكسات حلو.
🍃لطفي؛غير علاش هدا كله ياولدي علاش مكلف ع روحك الخير في وبزايد؟
الجالي:عارف وان شاء الله ديما لكن هدا واجبي جهة مرتي والعيل اللي بيجي..
لطفي؛يجي ع خير ان شاء الله..
الجالي:ان شاء الله..بنقولك عمي ومش محتاج نوصيك عليها بسبب الحمل نفسيتها تاعبه بزياده سايروها ع قد ماتقدروا..
لطفي بضحكه:مانتوصاش ع بنتي ياجالي..
الجالي بضحكه؛عارف والله عارف..غير اني مشغول عليها هلبه..
لطفي بآبتسامه؛تبي ناديهالك؟
الجالي:لالاخليها براحتها هي جايتها عليا مانبيش نزيدها عليها..
لطفي:معليشي سايرها ياما سايرنا حني زمان..
الجالي بإبتسامه:اكيد مرتي هادي...
🍃وطوبى تشبحله من بعيد بنظرات كلها كره..
وقعدت تفكر فيه شن قاعد يقول لبوها...
شويه وشافاته مشي طلع وبوها سقده..
سكر بوها وراه الباب..
وولى للحاجات قعد يرفع منهم وينادي ع فردوس..
وطوبى ناضت ومشت وقفت حدا الطاوله بش تشوف عن قرب..
شافت فردوس واريج طالعات يرفعوا في باقي الحاجات..
تمنت وقتها لو تمنعهم لو تاخد كل شي جابه وترميه برا وراه وهو طالع...ماتبي منه شي حتى شربة المية لو فيها نجاتها لايمكن تقبلها منه..
🍃وداخل كانت فردوس دخل في الحاجات وهي مضايقه ع الآخر..
وتسمع في بوها يقول..
لطفي:والله ماليه لزوم اللي جابه هدا كله..
فردوس قعدت ساكته وماردتش عليه...
دخلوا الحاجات للكوجينه..
وهو قال:طلعي المواس والشيته بش نقطع السقيطه..
فردوس :حاضر..
لطفي:طلعيهملي برا..
ومشي طلع من حداها..
ع خشة اريج ببوكسات الحلو..
حطتهم الطاوله..
وطوبى تخش من الباب الخارجي ويجوا عيونها عليهم..
فتحتهم اريج وقالت بضحكه:تتوحمي ع الدونات بيبو..
شافت فردوس لطوبى..
لقتها تقدم وهي تشوف للبوكس..وين وصلت فيه شافاته معبي دونات بالشوكلاته شكله يسهف ويشهي..
فتحت اريج البوكس التاني..
لقت فيه دونات حتى هو بس بصوص فرواله وكريمه..
اريج بضحكه؛راجلك فرحان بالحمل اكثر منك..
فردوس قدمت للبوكسات سكرتهم وقالت لأريج:طلعت لجدك مواس الذبح من القجر اللي غادي..واشرتلها عليه..
اريج:باهي لكن بعدين بنولي وناخد طرف بيبو راهو..
ومشت فتحت الدرج..وطلعت منه مجموعة المواس والشيته.
ومشت طلعت بيهم من الكوجينه..
بعد ماطلعت شبحت فردوس لطوبى وقالت..
فهمت قصدك من كلامك بكري
وطوبى تشوف لبوكسات الدونات بنظرات كلها كره..
وهي تتفكر في موقف يخصهم سمعت فيه كلام وجعها واثر فيها هلبه...
فجأة..
رن تليفونها بنغمة رساله...
شبحتله اختها..وهي رفعت تليفونها
وفتحت الرساله...
(نعترف بغبائي مفروض من الاول لاحظت لكن نعطيك وعد من اليوم وبرا غادي نقعد مركز معاك في ادق التفاصيل..راجلك اللي مايقدر يعيش من غيركم..جولي)
....يتبع....
