#طوبى "شارع القهوة"
#جمان_فريد
#الجزء_الثاني "خطبة فردوس"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها ..
وصلوا على الحبيب🌼
بسم الله توكلت ع الله...اللهم اجعل كل حرف فيها شاهد لي لاعلي..واجعلني انفع ولاأضر...
☕☕☕☕☕☕☕☕☕☕☕☕☕☕☕☕☕
ومشوا السلفات مع صغارهم يلودوا ع حياش الجيران ويعيدوا...
ورفعوا معاهم في طريقهم لحوش شنيبه..
مشتدة وبنتها فايزة...وعتيقة وبنتها عائشة بش يعيدوا مع بعض على مغليه...
🌻مغليه؛والله حاسه راسي مصدعه وحاسه روحي اشبح كيف...
خديجه؛ماك مارقدتيش بكل من يام من الناس اللي خاشه واللي طالعه..
مغليه؛ايه والله من بعد صلاة والحوش يملا ويفرغ لقبل ماتجوا بشويه بش معاش جي حد..
مشتده؛حتى انتم معارفكم هلبه ماشاء الله..
مغليه بإبتسامه؛ايه...بتمشوا للبلاد..
مشتده؛غدوة ان شاء الله..
صفيه؛حتى اني غدوة ان شاء الله متسقدة للجبل...
عتيقه بضحكه:وحني كان ربك سخر ماشيين لزليطن..
مغليه؛سعدودكم اني ماعندي لمن نمشي ولاني الكبيره في خواتي غدوة كلهم بيلتموا عندي..
ووردة تسمع فيهم وعقلها عند ولدها مختار اللي مش متمنيه كان شوفته...
مغليه؛وردة زي حالاتي ماليها هني..
وردة ماردتش عليها..
صفيه نخصتها وقالت؛وردة..
استاقظت وشبحتلها..
مغليه؛نسأل فيه ياوريده..
شبحت وردة لمغليه وابتسمت وهي تقول:سامحيني سرحت..
شبحت مغليه لصفيه والزوز تبادلوا نظرات الحزن...
فهاللحظه..
خشت عليهم ضيقه..
مطيره؛جيت طول هني عارفتكم بتلتموا عند الشلولح..
مغليه ناضت وهي تضحك:مقبوله منك ياعنقروفه...
والكل شادين ضحكتهم..
وخديجه تشبح لمطيرة من فوق لتحت..
سلموا مطيرة ومغليه ع بعض وعيدوا...وعيدت مطيره ع الباقي وقعمزت..
مطيرة:ايه شن حالكم يانساوين شارع القهوة؟
كلهم بأصوات متقطعه الحمد لله..
مطيره وهي تمرر في نظرها عليهم قالت؛غريبه وين نجمه؟
وجه مغليه انقلب..
صفيه؛ خطمنا عليها كان عندها ناس..
رفعت مطيره حاجبها وقالت؛اها...
وخديجه تشبح لمطيره بحده..
مطيره؛وين بناويت خوي..لفت وجهها وقعدت تنادي...سدرة..فردوس..غرفه...اميمه...
🌻والبنات سمعوها وهما مقعمزات في دار نسرين..
وناضوا كلهم سلموا عليها...
مطيرة وين شافت اميمه ولبسها اضايقت هلبه بس مابينتش..
وهي تبوس فيها تقول؛نجيها هالعسل ياربي..
غرفه؛واني عمتي ..
ضمتها وقالت؛حتى انتي عسل...
قعمزوا البنات مع النساوين الكبار..
والبنات الصغار قعدوا حداهم يلعبوا...
اميمه؛خليني نشد بمبلتك شويه..
غرفه؛لا هادي متاعي قولي لبوك يشريلك..
اميمه عبوا الدموع عيونها وقعدت مقعمزة تتفرج ع غرفه كيف تلعب وهي متشوقه..
بعدين قالت؛بنمشي للحمام..
وناضت لأمها ومشت وشوشتلها بطلبها..
مغليه؛خيرها شن تبي..
صفيه بإبتسامه احراج؛الحمام..
ناضت خديجه وقالت؛هي تعالي معاي..
صفيه؛بري مع خديجه.
مشت اميمه لخديجه خدتها من يدها ومشوا للحمام...
طبعا صالة الحوش كانت مفصوله عن الدروج اللي يرفع للديار..
جنب هالدروج فيه ممر في دار نسرين وخديجه ودار محمد ومغليه...وفي اخره حمام...
دخلت خديجه اميمه وقعدت تراجي فيها..
ع نزلت عمر مش من الدروج لا..
كان يتزحلق ع السياج وهو ينزل وفي الاخير يجي منقز تحت..
شافاته خديجه وقالت؛مش طلعتوا..
عمر شبحلها وقالها؛ركبت حطيت فلوس العيد فوق..اسمعي خديجه جيبلي قرينات..
خديجه؛نجيبلك عينك..
ع طلعة اميمه من الحمام..
شافها عمر وقال بضحكه؛العبيطه الشينه هني..
اميمه اضايقت ع الاخر...
عمر:حي ع ام سروالك بالله خديجه مش زي سروال نضال.
خديجه بضحكه؛بلا برادة وبرا اطلع العب..
عمر قعد يضحك ع اميمه وهو يقول:وين بنت عمك البقرة هديكا..
اميمه قعدت تأشر بيده اللي فيها الزر اللي دايرته زي الخاتم وهي تقول؛معاش تقول بقرة..
شافت خديجه صبعها وقالت؛حي شن هدا خاتم..
انحرجت وارتبكت اميمه ووجهها ولى احمر..
شدت خديجه يدها وقالت:ترا نشوفه..
وجت بتحوله اكتشفت انه مش خاتم...ضحكت وهي مصدومه وقالت؛حيي...وقعدت تضحك..
عمر بضحكه؛خيره خيره..
فكاته خديجه وهي تضحك وقالت؛شوف بطمه متاع بدله شوره دايراته خاتم..
عمر:وووو....وقعد يضحك عليها..
واميمه محرجه هلبه ودموعها نزلوا بروحهم...
شدت خديجه يدها ومشت بيها للصاله وتقول:غير تعالي تعالي..
وعمر مشي بيطلع وهو مازال يضحك ع اميمه..
خشت خديجه وهي تضحك وتقول؛شكله عيت عمي عبدالمطلب الواعر ماعندهم شي يتلوح.
كلهم قعدوا يشبحولها.
وصفيه ركزت ع بنتها كيف تبكي وهي مستغربه
خديجه رفعت يدها اللي فيها الزر:نشبح فيه فيدها واستغربته نحسابه خاتم حق طلع بطمه من بدله شوره ربطاته بخيط في صبعها ع اساس خاتم..
خديجه تتكلم وتضحك وكأنها تقول في نكته...
والبنيه جنبها تبكي ومنحرجه..وامها تشوفلها وهي مصدومه وواجعتها بنتها ع الاخر ومنحرجه من الموقف قدام الجيران..
زي ماصاير لوردة ومطيره..
لكن سدرة عصبت ع الاخر وناضت ومشت لبنت عمها ..
ودفت خديجه دفه خفيفه وهي تقول:والله ماتتحشمي..
ضمت اميمه لحضنها ورفعتها...
ومشت بيها وهي في قمة عصبيه وصفيه ناضت وراها تجري ووراهم مطيره...
خديجه وهي رافعه حواجبها:خيرها هادي اني نبصر عادي!
نسرين بحده؛مش بصارة هادي..
ومغليه تشبح لبنتها بحده لأنها تصرفت تصرف قدام الجيران يخلي الحق عليها..
🌻وسدرة طالعه ببنت عمها وهي ماتشبح في شي من الغضب...
وين وصلت في الباب بتفتحه انفتح وخش المهدي..
قالت بعصبيه؛حول ترا..
هو استغرب ووسعلها وهي طلعت طول..
ووراها صفيه وهي تمسح في دموعها ومطيره يمشوا..
وهو قعد واقف في الباب يشوفلهم..
الشارع وقتها كان معبي..
صغار يلعبوا..
والشباب مقعمزين برا...
وسدرة بتقص الكياس ماركزتش ع السيارة اللي جايه...
شهقت مرت عمها بصوت عالي..
والمهدي صاح بأعلى صوته...
"سدرة"...
وقفت فجأه...والسيارة دارت فرينو ووقفت في جنبها بالزبط..
والشارع كله يتفرج..
بما فيهم ..
يوسف واحمد ومعاهم شباب..
وحسين والجالي وعمر ونضال ومعاهم ولاد الشارع يلعبوا بطش..
كلهم جمدوا في مكانهم من الموقف...
سدرة خافت هلبه...بس بعدين كملت طريقها وهي تسمع في صاحب السيارة يقول .
"ربي يهديك.."
وفات طول.. ومطيرة وصفيه في جرتها...
والمهدي اللي قلبه قريب وقف...قعد يشبحلها كيف فتحت الباب وخشت للحوش وخشوا وراها صفيه ومطيرة وسكرت الباب..
هو لف بيخش بش يعرف شن صار..
لقي وردة طالعه بسرعه حتى هي..
لما شاف الحال هدا كاد ينجن وقال في باله ان امه لبزتها مع حوش الواعر..وع هكي حتخرب عليه...
عصب ع الآخر..
ومشي خش داخل...
🌻مشتده؛ربي يهديها خديجه حتى هي..
مغليه؛هي تبصر مش قصدها..
عتيقه؛مش هكي البصارة ياوخيتي يعني كلنا عارفين حالهم وعبدالمطلب معروف في الشارع بقفاصته ..
فردوس بحمق:بنتك خديجه ماعندهاش اسلوب معليشي خالتي مغليه بس من قبل وهي هكي..
نسرين كانت مضايقه ع الاخر ومش قادره ترد..
ناضت فردوس وقالت؛عيب والله عيب...هيا غرفه..
ومشت وغرفه مشت معاها...
لاقوا المهدي وهما طالعين..
المهدي :شن في يافردوس؟
فردوس وهي معصبه؛انشد اختك خديجه...
وفاتت من حداه..
هي وصلت عنده حدها ونادى بصوت عالي:يام...
في الصاله..
فزت مغليه وهي تقول:المهدي..
ومشت طلعتله طول...
عتيقه؛بقولي كان نوضوا خير..
عائشه بضيق:ايه يام..
مشتده؛هيا نوضي فايزة...
ناضت وهي تقول؛حاضر..
ومشوا مع بعض طلعوا...
ونسرين تقوللهم "بالسلامه"وهي محرجه ع الاخر..
طلعوا النساوين وهما يسمعوا في اصوات نقاش المهدي وامه...
المهدي:بنتك هادي من يومها لسانها معفن واسلوبها زفت وماتتحشمش بكل..
مغليه وهي خايفه؛باهي غير اهدا انت سلم ولدي...
المهدي بنرفزة؛خليتوا فيها هدوء انتم..
ومشي من حداها وطلع من الحوش بكل..
مغليه غمضت عيونها وهي تقول؛اف منك اف ياخديجه...
وفتحت عيونها ومشت خشتلها...
🌱🌱🌱🌱🌱
في حوش عبدالمطلب...
صارت دوشه كبيره...وصفيه الموقف خلاها تنفجر وطلع القديم والجديد..
صفيه وهي تبكي؛قداش بلعت وغصيت قداش انقهرت ع صغويرتي اللي حارمهم من كل شي بالذات هالبنيه..
مطيره؛هي راس هالبنيه عندك معقوله هكي لالبس زي الناس لاماكله زي الناس في عيونها تشوفه الحرمان مسكينه..
عبدالمطلب:اللي يسمع يقول مخليهم جيعانين وياكلوا في الرشاد..
صفيه خبطت ع رجلها وقالت :لاحول ولاقوة الا بالله العلي العظيم..
مطيرة؛مش كل شي ماكله وشراب..برا شوف الفرق بينها وبين بنت لطفي..
عبدالمطلب؛لطفي مستهتر ومايحسبش فيها القدام اللي يجي في يده يصرفه...
صفيه؛مافيش فايده يامطيره مهما تحكي مافيش فايده..
ومشت وخلتهم..
عبدالمطلب بعصبيه؛بري جدري يفصلك مراة حرفه ومصيبه طحت فيها..
مطيرة؛والله انت المصيبه اللي طاحت فيها هالمسكينه..
عبدالمطلب؛جايه لحوشي وطولي في لسانك انتي...توكلي ع الله توكلي بري لحوش خوك الكويس...
مطيره؛ع اساس مقطعه شلاكتي ع حوشك طز فيك..
ومشت وطلعت من حداه..
لقت الولاد واقفين فالجنان قالت؛ربي يكون في عونكم..
وهما الزوز كانت باديه ع وجوههم ملامح الضيق والحسرة..
~~~~~~
علي وهو حاضن حفيدته؛خلاص ياجدي خلاص بري العبي مع غرفه..
اميمه؛ماتبيش تعطيني لعبتها..
لطفي بإبتسامه؛بري لسدرة تو تعطيك وحده تانيه..
هي بحماس قالت؛باهي..
ومشت طلعت تجري من حداهم..
وعيون مطيره بنظرات الحسرة معاها بعدين شبحت لبوها وقالت؛خيرك ماخديلتها انت يابوي..
علي بصرامه؛ماناخدلهاش..ماناخدلهاش...الملزم هو بعيلته هو اللي لازم يصرف يامطيره...نسيتي زمان لما كنت اني نصرف شن دار معاش حط عليهم قرش واللي نجيبه اني هو يتحكم فيه والفلوس اللي نحطهم في يد صفيه ياخدهم منها...
لطفي؛ربي يهديه مش عارف هالطبع المعفن من وين جايبه..
علي:الله يرحمها جداك كانت هكي شاده يدها هلبه تعبنا وحني صغار وجدك الله يرحمه مالاش معاها سلطه...
مطيره؛تو الواحد شن بيقول بس الله يرحمهم وخلاص...
🌻داخل...
فردوس بغيظ؛ااه كان حصلت فيها فرصه هالحقيرة راني ريشتها ترييش..
سدرة وهي دير فالقهوة قالت بغضب؛وحده تافهه ...
ع خشة غرفه للكوجينه وهي تقول؛سدرة علاش عطيتي اميمه لعبتي..
سدرة؛عندك غيرها ..
غرفه بإعتراض؛لكن هادي متاعي اني..
شبحتلها وقالت؛اللعبه هادي قديمه مش جديده شن فيها كان عطيتهالها وبعدين تعلمي تشاركي غيرك في حاجات تقدري تعطيها اهو نعطي في صاحباتي كنادري وحوايجي والشناطي متاعي..
فردوس؛حرام ياغرفه اميمه تصخف ...
غرفه تأففت بضجر ومشت طلعت من حداهم..
سدرة؛دلع بوي ليها مخليها انانيه..
تنهدت فردوس وقالت؛تعرفي ماخاطريش في حوش خوالك وبناتهم دراهات الكبد..
سدرة؛والله ولا اني مايدوا كان بالصرف والماكله والشراب ماعندهم كان النفخه الكذابه..
فردوس؛نروح من غادي مقهورة وخلاص..
سدرة بدت تصب في القهوة وهي تقول:لاتنقهري ولاغيره عايشين والحمد لله..
فردوس عكرشت وجهها بعدم تقبل لكلام اختها ومشت طلعت من حداها من غير ماتدوي..
وسدرة زبطتها ماعجبهاش الكلام..
🌱🌱🌱🌱🌱
ومشوا تاني يوم لحوش خوالهم..
وهما ناس ساكنين في منطقه تعتبر راقيه هداكا الوقت..
ومرتاحين ماديا رغم ظروف البلاد الصعبه انذاك..
الدوة كلها كانت ع لبسهم وشن خدوا وشن حطوا وع سفرتهم بالباخرة لمالطا اللي شرو منها الدبش قبل رمضان..
وكلام في كلام وكله عن الماديات..
سدرة زهقت كبدها منهم...لكن فردوس كانت منقهره..
تتمنى تعيش مستواهم واللي عندهم يكون عندها منه...
هدا علاش من لما روحوا وهي ماتحكي كان عنهم وذم فيهم وواضح من كلامها انها حاسدتهم..
وسدرة تسمع فيها بدون ماترد..لانها تعودت ع حالها هدا وين يمشولهم...
🌱🌱🌱🌱
ثالث يوم العيد...
كان في واحد من صحاب لطفي يسكن في تاجوراء جي عيد عليه ومعاه ولده....
وشدهم لطفي ع الغدي...وبدوا البنات وامهم يعولوا عليه..
فردوس:علاش تكثري يام يعني الناس طالعه من رمضان مازال بتاكل!
سدرة؛وشن هو اللي درناه ع كسكسي وطشة محشي!
فردوس وهي تلف في البراك؛الكسكسي بروحه ساد..
وردة؛فردوس اشتغلي وانتي ساكته..
فردوس:همم..سكتت..
🌻في المربوعه..
لطفي:شن داير في الخدمه يامصطفى..
ابتسم وقال؛الحمد لله كل شي ماشي كويس..
لطفي؛حتى هي خدمة في المصرف مش ساهله..
مصطفى بضحكه؛لاوالله عاديه زيها زي غيرها ..
بو مصطفى:المهم حصل خدمة في الدوله..
لطفي:مزبوط هادي أهم حاجه...
🌱وبعد نص ساعه جابولهم الغدي....
وكملوا هدرزتهم عن احوال البلاد وهما يتغدوا..
بعد الغدي..
لطفي؛هي تفضلوا للحمام الخارجي..
مصطفى؛نوض بوي..
ناض بو مصطفى ومشي للحمام...
🌻في الكوجينه..
فردوس وفي تكنس في الكوجينه قالت بتذمر؛الواحد مايرتاح لافي رمضان ولافي غيره..
بعد كملت...لمت الوسخ في الباله بعدين خدت المفرش الملفوف وطلعت بيهم للجنان..
فهالوقت...
طلع مصطفى للحمام الخارجي..
خلا الباب المفتوح وهو يغسل في ايديه..
"ضروري تجوا تتغدوا يعني ضروري نقعدوا نكردوا عمرنا كله"
شبح يساره..
شاف بنيه لابسه قفطان شتوي ولافه ع راسها محرمه شتويه..وهي تنشر في المفرش وتتكلم بتذمر..
الغريب ان كلامه ضحكه ماضيقاش...
وهي لما جت بتمشي تخش..عيونها جو ع الحمام شافاته كيف واقف يشبحلها وهو يغسل في ايديه..
انصدمت...وطول خشت تجري..
وهو يضحك عليها..
كمل غسل ايديه..ونشفهم بالفوطه..ومشي طلع من الحمام...
🌻داخل..
خشن فردوس تجري لمراية الممر..
وقفت وقعدت تشوف لروحها وهي تقول؛حي عليك منظر يحشم حي ع العار!
ع طلعة سدرة من الدار شافتها استغربت..
مشتلها وقالت؛خيرك!؟
شبحتلها وقالت؛شافني هكي!
سدرة بإستغراب:من هو؟
فردوس وهي مصدومه؛ولد صاحب بوي ياحبيني! يهبل ياسدره يهبل ..ومن طياح سعدي شافني بهالمنظر..
سدرة بضحكه:اللي يسمع يقول جاي بيخطبك.
فردوس شبحت لروحها في المرايه وقالت؛وكان طلعتله بمنظر غير هدا كان خطب طول ياماما..
ضحكت سدرة تهكما ومشت خشت للكوجينه..
وهي مازال واقفه تشوف لروحها في المرايه وهي تفكر فالموقف...
🍀🍀🍀🍀🍀
وعدت عطلة العيد..
وولت القرايه...
وبدت امتحانات الفترة التانيه...
والبنات في قمة التوتر..
عائشه وهي تفرك في ايديها ببعض؛خايفه يابنات ينموت..
سدرة؛ماتوترنيش عويشه والله ماناقصه..
فايزة وهي تمضع في المستكه قالت ببرود؛امتحان ياجماعه راهو مش حرب..
عائشه ؛ياريتني زيك مش معدله ولاهامني..
نسرين؛اهو طلع المدير هي نوضوا وانتي لوحي المستكه..
لوحت فايزة المستكه..
ومشوا مع بعضهم للطابور....
🌱🌱🌱🌱🌱
"لاعلى بال لاعلى خاطر لاحول ولاقوة الابالله"
لطفي:امر الله وكلنا لهالطريق..هي سقدي روحك وقت ع الجنازة..
ساوت وردة شاربتها وهي تقول:اطلع اني لاحقاتك..
لطفي مشي طلع من الدار..
وهي طلعت بعده ومشت لوسط الحوش اللي كانت فيه فردوس تتفرج ع التلفزيون..
وردة؛مش تقعدي مقعمزة ع التلفزيون وتنسي مدرسة اختك..
فردوس بملل؛باهي..
وردة؛وحطي الغدي ع النار..
فردوس:بندير مبكبكه راهو..
وردة؛ديري اللي بديريه...المهم راك تنسي مدرسة اختك..
فردوس:باهي يام باهي..توكلي على الله..
وهدا كله وهي تكلم في امها بدون ماتشوفلها وعيونها في التلفزيون..
حركت امها راسها يمين ويسار ومشت ...
بعد ماطلعوا لطفي ووردة لعزي يخص ناس يعرفوهم..
جت غرفه لفردوس وقالتلها:وقت عليا فردوس ..
ناضت فردوس وهي تقول؛وووك منك..
وجبدتها من يدها ورفعت للحمام وغسلتلها وجهها بعدين طلعتها للدار..
لبستها حوايج المدرسه..ومشطتلها شعرها بقوة لين قريب قلعاته من جذوره وغرفه تعيط من الالم..
بعدين طلعتها وقالت:هي تحركي طول ...
غرفه ودموعها في عيونها؛والله نخبر بابا والله تو تشوفي..
فردوس وهي تفنص فيها؛بري خيرلك..
مشت طلعت من غرفه من الحوش وهي تبكي..
لاقتها اميمه وقالت؛خيرك..
غرفه؛مادخلكش..ومشت..
واميمه مشت وراها...
🌻في الحوش..
بعد ماسقدت فردوس اختها خشت للحمام...
ووقت خشتها..
الهاتف الأرضي في المربوعه رن...
وفردوس في الحمام ماتسمعش فيه..
وهو قعد يرن لين وقف...
ع طلعة فردوس من الحمام ومشت طول للكوجينه بش طيب الغدي...
🌱🌱🌱🌱🌱
"حاسه روحي عكيت هلبه"
سدرة؛الحق المعادلات جو صعبات شويه..
نسرين؛قولي سم..وهادي كل شي تنخص فيا وتقولي عطيني الاجابه قريب شافاتك الابله..
فايزة:اني خديت منك وعارفاته غلط المهم نخلي الورقه معبيه..
سدرة:خاطري نفتح دماغك ونشوف شن فوسطه..
عائشه:مكياج..
ضحكوا..
فايزة:ع سيرة المكياج نبي نخطم ع صيدليه تركيه جايبه مكياج جديد..
نسرين:غالي مكياجها..
فايزة بإبتسامه وهي ترقص في حواجبها؛لميت تفتوفه باهيه في العيد..
نسرين؛عاد البنت الوحيده اكيد بيدلعوك..
فايزة بغرور؛طبعا...هي تعالوا نمشوا..
عائشه:تعرفوني اني مانقدرش بنروح طول..
سدرة؛اسمعي العشيه بنجوك نقروا في الكيمياء..
عائشه بإبتسامه؛مرحبتين بيكم...هي السلام عليكم..ومشت..
وهما ردوا عليها السلام...
ومشوا للصيدليه..
خشولها..
لقوا فيها مراة اربيعنيه هي صيدلانيه بس في نفس الوقت تبيع في انواع الزينه الطبي منها والماركه الغاليه...
تركيه مش اسمها...هي اسمها عصمت اصولها تركيه هدا علاش ينادوا فيها تركيه ومشي فيها الاسم..
فايزة؛تركيه..
؛اووه فايزة في بالي والله..
فايزة بإبتسامه؛كل سنه انتي طيبه..
:كل عام وانتم بخير..
سدرة؛شن حالك تركيه..
:الحمد لله شن حالك انتي وحال القبضاي..
ضحكوا البنات..
سدرة بضحكه؛متعاركين..
:هدا حالكم انتم..
فايزة ونسرين؛صدقتي..
بعدين قالت فايزة؛شن عندك جديد تركيه..
ناضت وهي تقول؛حاجات ممتازة وحلوة...
ومشت جابتلها مواد الزينه وقعدت تشرحلها عن كل حاجه.
بودره..كريمة اساس..اقلام ...ارواج..
وفايزة قريب تهبل عليهم وهي تجرب ..
والبنات كانت عاجبتهم البضاعه عليها وتسهفوا عليها..
بس لما عرفوا السعر..
سدرة؛هدا يبي عيشة بنت معمر..
نسرين؛اسكتي فكينا..
سدرة؛شن قلت!
ضحكت عصمت وقالت؛يابنات اني نجيب فيها من برا وبستين الف واسطه بسبب الحصار..
فايزة بضيق؛ع اللي عندي مانقدرش نشري الاالبودرة والقلم بس..
سدرة؛تي باهي كان قدرتي عليهم..
فايزة؛بنحط فلوس العيد كلهم فيهم..
نسرين؛خلاص فوتي..
شبحت هلبه للمكياج بعدين حركت راسها بالنفي وقالت:بنشري...
وهما يضحكوا عليها...
🌻وطلعوا البنات من الصيدليه..
وكملوا طريقهم وهما يهدرزوا..
صدفه وهما ماشيين شافوا واحد طالع من حوش ليه فترة مسكر..
سدرة:شكلهم باعوا حوشهم عيت باني..
نسرين؛عطيه دعوه اللي طلع تقول ممثل سوري..
هو سمعهم لما فات من حداهم وجو عيونه ع سدره ابتسملها..
هي طول غيرت عيونها وقالت:مصح وجهه!..
فايزة بضحكه؛عجبتيه شكلك..
نسرين؛يحلم بيها سدرة معروف صاحبها مش حتكون لغيره..
سدرة بضحكه:من قالك..
نسرين؛حي عليك! والله بعدين المهدي يحرق الشارع كله..
فايزة بضحكه؛لاان شاء الله مافيش حرائق هي اصلا ماتشوفش لغيره..
سدرة:باهي خلاص معاش تدووا مطيرهالي..
ضحكوا البنات..
وين قربوا يوصلوا لحوش سدره..
لقو المهدي مقعمز في السيارة واقف قدام المطحن يشوف في ورقه..
حس بيهم..شبح جيهتهم..جو عيونه في عيونها..
غيرت عيونها وتجاهلاته..
هو عصب منها وضرب كلاكس بقوة ومعاش حول يده..
فنصوا البنات..
وسدرة قالت؛ان شاء الله يكلب..
ومشت فتحت الباب وخشت وهي تقول للبنات؛بالسلامه..
وسكرت الباب..
وهو طلعله واحد من الجيران وقال:ان شاء الله خير يامهدي شن في..
المهدي وهو مش طايق روحه؛نجرب فيه..
جارهم قصر الشر وخش للحوش..
فايزة وهي تضحك؛جو عليه المهدي لما يتكنطى..
نسرين؛جو عليه من بعيد مش من قريب والله معيشنا ايام سود بالذات خديجه كرهها في عمرها..
فايزة بضحكه؛تستاهل..
نسرين:مالاهي بالسلامه توا..
فايزة؛بالسلامه..
ومشت كل وحده في جهة...
وكملت فايزة طريقها لحوشهم وفاتت من قدام دكان احمد..
هو قعد يشوفلها وهي ولامعبراته..
وصلت في باب حوشهم فتحاته وخشت..
وهو تنهد من وسط قلبه...
🌱🌱🌱🌱🌱
بعد العصر..
طلعت سدرة من الحوش بتمشي لحوش عائشه...
لاقاها جدها حتى هو طالع من حوش عمها...
سدرة بإبتسامه؛جدي..
علي ابتسم وملامح الوعاره ع وجهه اللي ولت من تقاسيمه قاللها؛وين ماشيه..
سدرة:لحوش الشيخ جويده نقرا مع بنته..
علي:مشواري ع طريقك نبي نمشي لحوش الحاج اسماعيل نطير عليه السو..
سدرة بضحكه:معناها بنتسايروا...
فهالوقت المهدي طلع من الحوش..
شاف الحاج علي....لقاه فرصة واستغلها طول..
سوا كبوطه ومشالهم؛جدي علي شن حالك..
وسدرة قلبت وجهها عنه رغم ان قلبها صايره فيه حاله..
سلم عليه علي وقال:خير من حالك..
بلع ريقه وهو مبتسم بإحراج وقال:كويس..
وسدرة شاده ضحكتها..
حك المهدي رقبته وقال:عندكم مشوار هني ولاهني نوصلكم..
علي:كان نبي نمشي في السيارة عندي بدال الوحده تلاته..
انحرج المهدي اكثر وقال؛باهي نسايركم في الطريق..
علي:علاش صغار صغيرين خايفينا نريحوا..
وسدرة خلاص بتضحك..
المهدي وجهها ولى احمر من الاحراج وقال:باهي براحتك ياجدي..السلام عليكم..
علي:سلم ع بوك القاطع ..
المهدي هز راسه وهو محرج وقال:يوصل..
علي:هيا بنتي هي..
وشدت سدرة في جدها وهي شاده ضحكتها..
علي:ماحاسب في روحه ..
سدرة:نحس فيك ماتحباش ياجدي..
علي:مش مانحباش لكن عنده عيب مخليني مداير منه..
سدرة؛شن هو جدي؟
علي؛متهور وعصاب وديما دمه فاير وهدا مش باهي ليه ولا اللي يعاشره...
سدرة حست ان جدها يوصللها في رساله...قبضها قلبها منها..
هي تحب المهدي هلبه ولايمكن ترضى بغيره ومهما ينقال عنه تلوح ورا ظهره ومادورش..بس كلام جدها خوفها..
وصلاته لحوش صاحبه..
بعدين مشت لحوش عائشه..
لقت البنات سابقاتها...وبدوا طول يقروا لما جت..
🌻عتيقه؛جيرانا هادم ياولدي وعشرة عمر..
:ماقلت شي يام لكن البنت بكل فوق انها مش متحجبه لبسها ماينفعش سراويل مشحطه ولبس ضيق..ولافي العيد شن كانت لابسه ولاد الشارع كلهم يدووا بيها يام..
عتيقه:حرام عليهم..
:المهم يام فهمي بنتك دير حد لعلاقتها بالبنت هادي راهي بنت شيخ والحوش هدا حوش شيخ..
ومشي طلع من بحداها..
وعتيقه تنهدت بضيق وولت توتي في الشاهي والباسطي للبنات..
ونفس المشكله قائمه...
في حوش فايزة نفسه..
:يابوي بنتك مكثرة على ماوصوها راهو خلاص كبرت معاش صغيره بش تطلع من غير حجاب ولبسها يحشم..
صبري؛اختك متربيه واخلاقها عاليه واللي يدوي عليها مفروض تعطيه بوني تكسرله سنونه..
مشتده:لكن من ناحية الحجاب واللبس عنده الحق..
صبري:مافي حد يدخل فيها امتى تبي تتحجب تتحجب مانيش جابرها ع شي ولاعندي مشكله في لبسها..
ناض خوها وقال:مدام هكي انت يابوي اني الحوش معاش عافسه بكل..
مشتده؛حي عليا!..
صبري؛برا مشية الحصان لفزان..
مشتده:شن تقول ياراجل!.
:باهي يابوي باهي..
ومشي طلع وامه ناضت لحقاته...
🌱كان في هلبه من العم صبري زمان متساهلين في هلبه امور تخص الدين...هداكا الوقت ماكانش في وعي ديني زي توا...وفي هلبه امور الناس ماتعرفهاش او مش مدورتها هلبه..
مع اواخر التسعينات بدي الوعي الديني يزيد والمجتمع ولى محافظ اكثر من الثمانينات وبداية التسعينات🌱
وروحت فايزة للحوش ولقت امها قالبه عليها وجهها وماتبيش تكلمها..
فايزة؛خيرني يام شن درت بش تطفري عليا هكي!؟
مشتده؛اليوم من وراك انتي بوك لز خوك الكبير..
فايزة بصدمه؛واني شن دخلي!؟
مشتده؛من عنادك وكساحة راسك خوتك يقولوا تحجبي وانتي ماتبيش..
فايزة بعناد؛ايه مانبيش ومش مقتنعه بيه..
مشتده؛ماك ماترتبتيش هدا علاش..
فايزة بصدمه؛توا طلعت مش متربيه يام!؟...
مشتده؛ايه..كان بوك شادلك راك مش دايره ع حل شعرك هكي..
فايزة صدمها بقوة وقهرها كلام امها معاش قدرت تتكلم ولاترد عليها طول مشت لدارها وسكرت عليها وبدت تبكي.
وامها قالت:دلع فرخات...
🌱🌱🌱🌱🌱
تاني يوم في المدرسه..
فايزة وهي تبكي:مانبيش اني مش مقتنعه ياناس..
عائشه؛مش بالقناعات هدا يافايزة فرض زيه زي الصلاة والصيام بالزبط..
قعدت تبكي وهي ساكته..
سدرة؛خوتك صح دراهات كبد لكن في هادي عندهم حق يافايزة..
مسحت فايزة دموعها وهي تقول؛مانيش لبساته كلمتهم عليا مش حيمشوها..
عائشه بضيق:عنادك هدا بيخيلني نخسرك يافايزة..
كلهم شبحولها بصدمه..
عائشه ودموعها في عيونها؛خوتي قالولي معاش تحاديها..
فايزه وهي تشوفلها بصدمه ودموعها ينزلوا:وانتي تسمعي كلامهم!؟
عائشه بقلة حيلة؛تعرفيني ماعنديش كلمه مع خوتي يافايزة..
فايزة:توا طلعت صاحبه مانشرفش! نقوللكم حاجه معاش نبيكم كلكم باهي معاش نبي حد..
ومشت وخلتهم...
سدرة بضيق:معانديه هلبه..
نسرين؛ماتحبش من يسيطر عليها.
عائشه بدموع؛ربي يهديها والله وخيتي واعز لكن مش بيدي..
طبطت سدره ع ظهر عائشه وهي تقول:عارفين حبيبتي عارفين..
🌻وكان هداكا اليوم اصعب يوم يمر ع سدرة وصاحباتها..
اول مرة يصير بينهم مشكله وماتنحلش في نفس الوقت..
اول مرة وحده تاخد موقف وتقاطع الكل...
🌱🌱🌱🌱🌱
الساعه 5:00عصرا...
المطر برا تصب...
وفي حوش لطفي وسط الحوش..
ملتمات السلفات ومعاهم حماتهم يهدرزوا..
وهما يشربوا في السحلب...
وردة؛فتح معاي الموضوع بكري بس..
مطيره؛وباهي قلتيلها؟
وردة:لتوا لا هي من غير شي بتكلب ع الزواج..
صفيه؛تتزوج خير من قعدتها هكي ياوردة..
وردة بضيق؛فردوس ماينعباش عليها تفتح حوش وتتحمل مسؤوليه..
مطيره؛المراة تتربى مرتين ياوردة تو تشوفي لما ياخدها راجل ويحمرلها عينه تو تتسقهم وتولي مراة وقولي مطيره قالت..
وردة؛وكان تحشمنا مع الراجل ومع الناس يامطيره؟
صفيه؛قولولهم اللي هناك ياوردة من الاول رضوا بيها باهي مارضوا اللي جابهم يجيب غيرهم..
~~~~~~
لطفي:اني بنزوجها زايد ناقص ياوردة مش لاني مال منها ولاقاعده على قلبي..لكن حالها مش عاجبني قاعده في الحوش وراقده وخلاص مايجيش منه هدا..بالك كان تزوجت ولقت روحها وسط مسؤوليه يتغير حالها..
وردة هزت راسها وقالت:عندك حق....باهي هما ماقالوش امتى العرس؟
لطفي:كان سخر ربي بعد العيد الكبيره..
~~~~~~
"احلفي يام!!"
وردة ضربتها ع رجلها وقالت؛تحشمي..
فردوس بضحكه؛هو نفسه هو نفسه ولد صاحب بوي اللي تغدا عندنا في العيد..
وردة؛ايه هو..
حطت يدها ع فمها وقالت:حي ع الجو..
سدرة وكتابها في يدها قالت بضحكه؛شوره لبستك يومها ستايل يجيب العرسان..
قعدت تضحك فردوس..
وردة؛لبسة شني فهموني؟!..
حكوا البنات لأمهم شن صار بالزبط..وهي ضحكت متعجبه وقالت..
وردة؛الله ع النصيب!
فردوس وهي تضحك بغرور قالت؛مالا كان شافني واني متكمه تراهو خطفني طول..
سدرة؛الوي ياليلى علوي..
ووردة تضحك بعدين هدت ضحك وقالت:وتوا سلم بنتي حطي عقلك في راسك الزواج مش لعبه راهو مسؤوليه كبيره..
فردوس؛عارفه والله عارفه...وقعدت ترقص بإيديها وهي تقول:يادبله الخطوبه عقبالنا كلنا..
سدرة تهكما؛لاواضح عارفه هلبه..
وامها تضحك عليها..
🌻🌻🌻🌻
وانتشر خبر خطوبة فردوس في شارع القهوة...
واكثر من قهره الخبر ثلاثه..
اولهم....
🌱مغليه؛تو يجيك سيد سيدها راك بنت محمد شنيبه..
خديجه بقهر:غير يجي هو سيد ولاعبد..
نضال؛قصدك وليتي عانس!؟
عمر:زي ابلتنا..
فنصوا فيهم الزوز....
خديجه بعصبيه؛نوضوا ياحيوان انت وياه نوضوا..
الزوز مع بعض قالوا؛بناكلوا..
خديجه بصوت عالي:نوضوا ولانقتلكم..
"من اللي تعيط هادي خل نجي نعدم اصلها"
ماتت خديجه مرة وحده...
وخوتها قعدت يضحكوا عليها..
مغليه؛كول انت وياه كول ولانوضوا..
نضال؛ناكلوا..
ومغليه طبطب ع ظهر خديجه وهي تقول:تو يجيك سعد زي الرعد وقولي امي قالت...
🌻اما الزوز التانيات...
عواصف واجتياج...او عواطف ونجاح بنات الجارة نجمه.
اللي يكونوا في عمر المهدي...
عواطف؛وحده فاشله راقده في الحوش طبيعي تتزوج بكري..
نجاح؛ياريتها غير فالحه..بايرة وتنباله وديما راقده..
نجمه:ماهو هادم اللي سعدهم ديما واقف..
عواطف؛اصلا اني اخر همي الزواج..
نجاح؛ولاحتى نفكر فيه في حياتي..
وناضوا الزوز بيمشوا لدارهم...
وين وصلوا فيها..
خشت نجاح وفتحت الدولاب بطلع دبشها بش دوش الخبر حرقها..
فجأة شهقت بصوت عالي وقالت؛وين صابوني اللوكس!؟
عواطف؛غسلت بيه بكري صابوني تم..
نجاح؛تي علاش تمسي فيه ياحقيره نمس في حاجاتك اني..
عواطف:ايه زي مايومها خدت البيرو الاحمر متاعي تحسابيني ماريتكش..
نجاح؛زي البيرو زي الصابون اللي غسلتي بيه خليقتك المعفنه..
عواطف:قاعده انطف منك يامعمشه..
نجاح؛اني معمشه يامدودة..
عواطف؛وخامره..
جتها وشدتها من شعرها والتانيه تضرب فيها وقعدوا يضاربوا وكل وحده تجي فوق التانيه وتخبط فيها..
وامهم خشت تحز حصلت ضربه حتى هي..
نجمه وهي قريب دوخ؛يرزيني فيكم..
وماانحزتش هالعركه لين جو خوتهم حزوهم عن بعض..
وطبعا صوت عراكم كله في حوش مغليه..
نسرين بضحكه:تمت المعركه..
خديجه؛عيلة دردنو...
مغليه؛زيدك منه يانجمه...
🌱🌱🌱🌱
في يوم المقابلة الشرعيه...
درس مصطفى بسيارته قدام حوش لطفي ومعاه امه واخته..
ونزلوا وهما جايبين معاهم سفرة باسطي..وصندوق يوقا...
ومصطفى في يدع باقة ورده..
ولاد الشارع مقعمزين قدام مطحنة الواعر مع يوسف وهما يشبحولهم..
:جو وورد شكله عيله هاي وباي..
يوسف بضحكه؛لا والله ناس عاديين لكن هو شكله عاطفي..
ومن طحن عيت شنيبه كان المهدي مقعمز يتفرج ومعاس طايقه صبر كان يلقى يخطب سدرة توا قبل بعدين..
🌻🌻🌻🌻
رحبت وردة بأم واخت العريس ودخلتهم لوسط الحوش..
ولطفي قعمز مع مصطفى في المربوعه...
وفردوس في دارها قدام المرايه كل شي تشوف في روحها وتساوي في روحها..
وسدرة تعول ع ضيافة النساوين..
شويه وطلعت فردوس وسلمت عليهم..
وقعمزت هدرزت شويه...
بعدين وردة ناضت قالت لراجلها يطلع بش تخش فردوس...
طلع لطفي..
وخشت فردوس مع اخت مصطفى..
هو اول ماشافها شد ضحكته خطر عليه كلامها يومها..
وهي كانت متحشمه ومرتبكه ع الاخر..
مصطفى:شن حالك يافردوس..
فردوس بصوت يدوب طالع؛الحمد لله..
مصطفى:ماكانش هكي صوتك يومها... ضروري تجوا تتغدوا يعني ضروري نقعدوا نكردوا عمرنا كله...قال كلامها وهو يقلد فيها واخته تضحك..
وفردوس بعفويه حطت يدها ع خدها وقالت:ان شاء الله سمعتني!..
هو قعد يضحك ويقول؛سمعتك تي حتى جيرانكم لو ننشديهم يطلعوا سامعين..
اخت مصطفى؛مادوريش يافردوس يبصر عليك...بعدين كلنا هكي كان نلقوا مانتحركوش..
ضحكت فردوس بإحراج..
ابتسم وقال:ايه يافردوس قولي شن عندك من شروط..
فردوس؛نبي حوش بروحي بس...
اخته؛وحوشك بروحك لكنا مجاورينك راهو..
فردوس:احسن جيره..
:ريتها وخيتي سلمها..
وابتسمت فردوس بخجل ..
ومصطفى يشوفلها بإبتسامة اعجاب...
🌻وردة:بش يكون كل شي واضح قدامك ياوخيتي.
ام مصطفى:تو تتعلم عندنا حتى حني بنولوا ماليها بعدين..
وردة؛تسلمي هي والله تعرف طيب بس مشكلتها ماتحبش تتحرك..
ام مصطفى:تتغير المراة بعدين في حوش راجلها وانشديني اني..المهم عندي اخلاقها وتربيتها والباقي كله يجي بعدين..
وردة:تعرفونا كويس انتوا..
:وهدا علاش فرحنا لما اختار مصطفى منكم...
🌻🌻🌻🌻
واتفقوا ع كل شي..
وتحدد العرس الاسبوع الاول بعد عيد الأضحى...
وتوا لازم تبدا توتي...
وفردوس عينها واسعه ماتبي شي ينقصها..
سدرة بغضب:شن تحسابي بوك راقد ع كنز؟!
فردوس:مادخليش نبي زيي زي البنات بتاتي كامل وعرسي ماينقصه شي..
سدرة:ع قد بساطك مد رجليك يافردوس..
فردوس بنرفزة؛اسمعي سدرة اطلعي من راسي ترا..
سدرة:والله ماعندك احساس باهي..
ومشت طلعت من حداها وخبطت الباب ..
وامهم في دارها تسمع في نقاشهم كله...
#خطبة_فردوس
#طوبى
...يتبع....
