(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثامن_والأربعين"في الداخل2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
ناض عبد الرؤوف ومد يده وقال:اهلا وسهلا..
صافحه وقال:عبد الرؤوف بن موسى..
عبد الرؤوف بإبتسامه:وراجل اختك غرفه
ابتسم وقاله؛فرصة سعيده..
عبد الرؤوف:اني اسعد..تفضل..
وخر مختار الكرسي وقعمز حط نظاراته وقال:شن حال غرفه توا؟
ابتسم عبد الرؤوف ع جنب وقال:شكلها الاخبار توصلك اول بأول..
مختار:عندي عيون في الشارع وبرا منه ..
حرك عبد الرؤوف فنجانه وهو يشوفله وهز راسه بإيجاب وع وجهه ابتسامه..
وخر مختار وسند ظهره ع الكرسي..
وحط يده اليمين ع نظاراته ويده اليسار في نصه وقال وهو عاقد حواجبه:صدقا تفاجئت لما عرفت انك دور عليا..
وولى عندي فضول كبير نعرف درت هالشي من كيفك ولافي من طلب منك..
تنهد وقاله:الزوز مع بعض؟
تسائل بملامح وجهه وهو مبتسم بإستغراب..
ابتسم عبد الرؤوف وقال؛لما سألت عنك غرفه مانقدرش نوصفلك كيف كانت ردة فعلها..ضم شواربه لداخل بعدين قال...اللي عرفته من ردة فعلها وقتها..انها موجوعه منك وفي نفس الوقت مستاحشاتك هلبه..
تعبوا عيون مختار دموع وهو يشوف لعبد الرؤوف وعقدة الحواجب مازال موجوده..
عبد الرؤوف:ممكن اني مايكونش عندي حق نخش في موضوع زي هدا..واني عارف قداش هو حساس وصعب..من ناحية عمي لطفي..بوك..ومن ناحية خواتك..وبالأخص سدرة..
ضحك ضحكه خفيفه متهكمه..
عبد الرؤوف:اكيد عارف انها مريضه؟
مختار؛من سواد قلبها..
عبد الرؤوف وهو متعجب:سواد قلب سدرة!؟
مختار:ماتستغربش..اختي هادي ياما حاولت فيها تخش بيني وبين بوي ورفضت رفض قاطع..وقاعده للآن تحمل فيا ذنوب حاجات صارت اني بريء منها..اللي فيها توا من سواد قلبها..من سعيها لقطع صلة الرحم..
عبد الرؤوف وهو يسمع في كلام مختار ويشوف لملامحه وهو يحكي..انصدم..وندم...
صح علاقة بسدرة شبه متكهربه..بس هو عارفها كويس من تصرفاتها وكلام غرفه عنها لايمكن تكون زي مايقول مختار..
وفهم بعد هدا كله علاش فضلوا يخلوا مختار بعيد عن حياتهم..
واحد يحكي ع اخته هكي قدام نسيبه شن مازال يراجي منه!؟
وهالشي خلاه يندم انه سعي في اجتماع مختار بخواته..
عبد الرؤوف:ع العموم اني مش جاي نشوفك بش ندوي في المواضيع هادي..كل اللي نبيه اني نجمعك بغرفه..من يوم قلتلها انك جيت لشارع القهوة السنه اللي فاتت وهي ديما تحكي عليك وتقول خاطري نشوفه..
مختار قدم بجسمه للطاوله وقال بلهفه؛حتى اني نبي نشوفها هي وفردوس والصغيره طوبى..
عبد الرؤوف:حاليا خلينا فيك انت وغرفه والباقي حيترتب لقائك بيهم بناءا ع اجتماعك بغرفه...
ابتسم وهز راسه وهو يقول:تمام متفقين..بس امتى حيكون؟
عبد الرؤوف:تقدر تقعد يومين تانيات في البلاد؟
مختار؛اسبوع..
عبد الرؤوف:كويس بكل ع الاقل نكون مهدت لغرفه الوضع كويس..عطيني رقمك..
طلع مختار تليفونه مت جيبه وفتح الرمز بالبصمه..بعدين مد التليفون لعبد الرؤوف وقال؛سجل رقمك ..
خدي عبد الرؤوف تليفون مختار وسجل رقمه واتصل..رن تليفونه فصل المكالمه..وسجل اسمه وحفظ الرقم..بعدين مده لمختار وهو يقول:استنى مني تليفون..
وناض..
خدي تليفونه وقال:سامحني مشغول هلبه مضطر نمشي..
مختار بإبتسامه؛ولايهمك..مربوحه..
عبد الرؤوف؛السلام عليكم..
مختار؛وعليكم السلام..
ومشي عبد الرؤوف طلع من المطعم توجه لسيارته..
ركب فيها ..سكر الباب بقوة..وقعد يفكر بضيق بعدين قال:ماأرتحتلاش..
خدي نفس وزفر..بعدين شغل السيارة وتحرك..
☘☘☘☘☘
الساعه 5:00عصرا..
مقعمز عبد القيوم في القهوة ومعاه ربيع..
والزوز يشوفوا للمهدي ونضال وهما واقفين قدام حوش لطفي الواعر ياخدوا منه في باقي حاجات طوبى بش يرفعوهم لحوشها..
المهدي:خلاص هدا هو؟
لطفي هز راسه وقال:خلاص..
المهدي:تمام..هي السلام عليكم..
لطفي:وعليكم السلام..
ومشي المهدي ركب سيارته..
ونضال حتى هو سلم ع لطفي وركب سيارته..
بعدين توجهوا الزوز لفيلا الجالي..
عبد القيوم كانوا عيونه ع لطفي واجعه هلبه..
متمني لو يقدر يقوله ويعطيه خبر باللي صاير..
بس مش كل الانسان يقدر يدخل فيه..
☘في أحيان كثيرة التدخل في حياة الغير بقصدالخير تكون عواقبه وخيمه☘
ربيع؛مرتاح في الشقه؟
شبحله وقال:الحمد لله..
ربيع؛مش عارف علاش الايام هادي ملاحظ انك مش ع بعضك..
ابتسم مجامله وقاله؛شوية مواضيع مكدراتني شوي..بس تنحل ان شاء الله..تنحل
ربيع:كان تبي خدمه..مساعده خوك حاضر مش حنقصر معاك ان عبد القيوم بإبتسامه؛للآن لا..وكان احتجت القدام حاضر تو نقولك..وبارك الله فيك..
قام فنجان الاكسبريسو وهو يقول؛فيك بارك الله..وشرب منه...
☘وفي اقرب حوش للقهوة..
حوش اصحاب القهوة...
تحديدا دار المعيشه اللي يحبوا يقعمزوا فيها وين تصقع الدنيا..
مغليه؛هلبه اللي ماجوش في العرس ع خاطر ظروفهم..كلهم بإذن الله نهار الجمعه يجوا..
نسرين:غير وكان اجلتيها يام لاخر الاسبوع..
مغليه:لالا هدا وقته ماعندي علاش نماطل..
نسرين:العرايس عندهم علم؟
مغليه:ايه خبرت رجالتهم يقولولهم..
هزت نسرين راسها وهي ساكته..
مغليه:سيارتك مازال ماتصلحتش اللي جايه انتي وصغار في تاكسي..
نسرين كذبا:لاالا بنفوتها خلاص بادت بناخد غيرها..
مغليه؛محلها بادت اللطف..ليك عام واخدتيها!؟
نسرين:معاش عندي ليها خلوق..
مغليه:بنتي البنادم كان ربي عاطيه مايقعدش يسرف ويصرف في الفلوس ع الدوة الفاضيه..راهو مرات اليوم في غدوة مافيش..
تنهدت وقالت مسايرة؛عندك حق..بس خلاص توا اللي صار صار..غيرت الموضوع وهي تقول..خديجه ماقالتش تجي..
مغليه بضيق:حالفه ماهي خاشه الحوش..وانتي قولي لصاحبتك ماتنزلش مدام بنتي مش حاضرة..
نسرين هزت راسها وهي مضايقه..
مغليه وهي تسحن ع عائشه؛تقول ماصدقت قاللها راجلها شدي شقتك..بارك الله فيها نجاه جتني مرتين وقلبت الحوش وضماته..
نسرين بتعجب:الواحد معاش يعرفلكم يام مش هادي اللي كنتي تبي تقطعي رجلها من الحوش..
مغليه:من الاخير اني نشوف في المراة عاديه وتجي للحوش بنية صافيه مش حاطه في بالها شي..وفوق هكي وين تشوف الجالي تهدرز معاه عادي وكان في بينها وبينه حاجه دير هكي!؟..حتى عرسه حضراته وعولت فيه ورقصت تقول عرس وخيها..وخوك واضح عليه طاح في بنت الواعر وحولها من باله..خلاص مشكله وانحلت..
و نسرين قعدت تسمع وساكته وتشوف لأمها بتعجب...
☘☘☘☘☘
"ألو"
آلاء وهي تغلف في التورته قالت:نعم؟
:هداكا المذيع يراجي فيك برا..
الاء:تكملي عليا؟!
:ايه هاتي مافيش مشكله المهم ماتخليش هالطرف يستنى هلبه..
ضحكت الاء ومشت بتطلع وين جت بتوصل في الباب كانت في مرايه شافت فيها هيئتها تأكدت انها مرتبه..
فتحت الباب وطلعت...
لقاته واقف تحت شجرة قريبه ع المعمل وهو يشوفلها بإبتسامه..
ابتسمت ومشتله..
وصلت فيه ووقفت عليه وهي تقول:اهلا مهند شن جو..
مهند بإبتسامه؛تمام الحمد لله..شن جوك انتي؟
آلاء بإبتسامه:تمام..
مهند:شن دايرة في القرايه والخدمه..
آلاء:أهو ندف وماشيه..
ابتسم وقال؛ربي يعاونك..
آلاء:آمين..
شبحلها شويه بعدين قال:شن صار في موضوعنا؟
آلاء؛فتحته مع جدي وعمامي وقالوا قوليله يجب اهله ومرحبتين بيه..
مهند بإبتسامه فرح؛حلو حلو..باهي نبي موعد تحدديه توا..
آلاء:تقدر تاخد اجازة الخميس الجاي..
ضحك وقال؛ناخدها وعلاش لا..
آلاء بضحكه؛خلاص..الخميس الجاي ان شاء الله..
مهند بإبتسامه؛ان شاء الله..يافرحة بوي..
آلاء وهي مبتسمه بتساؤل؛بوك بس!؟
ضحك وقال:بوي والعيله كلها..تصدقي يراجو فيا امتى نخطب بفارغ الصبر ومتشوقين يشوفوك من كثر مابوي يحكي عنك..
آلاء؛صار بوك هو اللي يحكي عني!
مهند هز راسه بإيجاب وهو مبتسم بإستفزاز.
آلاء؛مغرور انت شي!؟
مهند:اللي نبيها مغرورة وعاجبتها روحها هلبه..
آلاء بنظرة غرور:مش ع الفاضي..
ضحك مهند وهو يحرك في راسه يمين ويسار..
هدرزوا شويه بعدين مهند مشي..
وهي وين جت بتولي لمكان عملها وقفت في مكانها لما لقت ولد عمها واقف حدا المعمل..
ماتفاجئتش عارفاته وراها ويتبع فيها وين ماتمشي..
تجاهلاته ومشت بتخش...
هو بسرعه جي قدامها واعترض طريقها..
وليد بحده؛قعدوا ع حل شعركم بنات عمي مش حاسبين الرجاله اللي وراكم.
قعدت تشبحله ببرود ونظراتها مستفزة..
هز راسه وهويقول:نعرف شن ندير بش نحطلك حد..وتفكري اني حذرتك هلبه لكن انتي ماتسمعيش في الكلام..ومشي وخلاها وهو معصب..
وهي تبعاته بعيونها لين ركب السيارة..
شبحلها..
ابتسمت بسخريه..
زاد حرقت اعصابه..وخلاته يطلع جري بالسيارة..
تبعت السيارة بعيونها اللي تعبوا دموع فجأة لين اختفت من قدامها..
بعدين تماسكت وقوت روحها ولبست قناع اللامبالاة ورجعت خشت لمكان عملها..
☘وفي مكان عمل اختها..
كانت في الحجره مع الدكتور اللي قاعد يدير في عملية تنظيف اسنان..
وهي معاه تساعد فيه..
بعد ماكملوا شغلهم مع المريض..
طلع..
واريج قعدت ترتب في المكان وتحط في الاجهزة المستخدمه وسط آلة التعقيم...
هدا كله والدكتور يراقب فيها..
التفتت عليه وقالت:نستأذن دكتور..
هو حول الكمامه وقال:نبي نخطبك..
هي تنحت تماما....
الدكتور:اريج.
اريج؛نعم؟
الدكتور:سمعتي شن قلت؟!
اريج حركت راسها بالنفي..
ضحك الدكتور وقال؛نبي نخطبك سمعتيني كويس توا..
اريج وهي مصدومه:لا..لاماسمعتش..ضحكت بإرتباك وقالت..قصدي مافهمتش..كيف بتخطبني يعني معليشي!؟
الدكتور بضحكه؛زي ماهالعالم يخطبوا نبعت ماليا لحوشكم ويتكلموا فيك..
ضحكت اريج وقالت؛قصدك انت تدوي جديات ماتبصرش!
الدكتور:الامور هادي مافيهاش بصارة اريج..
ضمت اريج شواربها لداخل ورفعت حواجبها بأسف
بعدين قالت؛سامحني دكتور..لا..
الدكتور:علاش!؟
اريج؛يعني اني توا مش في بالي الزواج الحق..مازال بكري عليا..
الدكتور:شن مازال بكري...!؟هدا وقتك ياأريج ...
اريج:اني قاعده نشوف في روحي صغيره ومش قد مسؤوليه اسفه وسامحني مرة تانيه..
هو مرر نظره للأسفا وزفر بعدين شبحلها وابتسم مجامله وهو يقول؛تمام براحتك..لكن حيقعد العرض قائم..لو فكرتي وغيرتي رايك تعالي طول..
اريج وهي مبتسمه مجامله؛امم..تمام دكتور..وتوا نستأذن لازم نروح توا..
هو بنفس الابتسامه قال:اذنك معاك..
مشت طول اريج طلعت من حداه وعيونه معاها..
سكرت الباب وقعدت تمشي وهي تقول في نفسها..
اريج"الصعلوك عنده الحق هدا طلع حاط عينه عليا وهو زابطه..عاد شباب ويعرفوا بعضهم كويس..ووك عليك موقف مش عارفه كيف مازال بنخدم معاه!؟"
~~~~~~~~~~
آلاء؛ خليك عاديه معاه وكأنه مافتحش معاك الموضوع بكل..
اريج؛مش عارفه كيف حاستها بايخه..
الاء؛لابايخه لاشي...شن يعني بتسيبي الخدمه ع خاطره!؟
غرفه:شويه بس ألو... فهميني روجة انتي علاش رافضه فرصه حلوة هادي ماضيعيهاش..
احمر وجه اريج وهي تقول:مانبيشي..
الاء بضحكه؛القلب مش فاضي خويله..
غرفه قعدت تضحك بعدين قالت:قصدك خلاص شدت مع نضال.!؟
ضحكت آلاء..
اريج وقلبها يدق بقوة قالت بإنزعاج:بلاش برداة انتي وياها..اني مانبي حد..
غرفه:باهي خيره وجهك ولى احمر هكي!؟
الاء:الخدود بالذات..
اريج ناضت وهي منحرجه وقالت بعصبيه:حمارة اللي مقعمزة معاكم تحكيلكم...ومشت طلعت من حداهم..
وهما يضحكوا عليها..
وهي مشت طلعت برا الحوش وركبت الدروج وهي تقول؛ياربي معقوله باين عليا لهالدرجه!..حي عليك ياأريج..
وصلت فوق..
وخشت للمخزن..وقفت ع البرسيانه اللي كانت مردوده وقعدت تشوف منها..
شافاته وهو واقف مع واحد قدام القهوة يهدرزوا ويضحكوا..
قعدت مركزة عليه وع حركاته وهو يهدرز بحماس..
واللي معاه يضحك..
بدت ع وجهها ابتسامه وهي تتفكر في اخر حوار دار بينهم..
《 خلاص منك خديتها الكلمه..قلبك حيقعد عندي للأبد..سلام يافستق..》
اريج بهمس:فستق..اول مرة مايقولش شمطاء..ضحكت بعدين قعدت تتفرج عليه..
ودقات قلبها كل وحده فيهم تسابق الثانيه..
🍀وتحت..
في دار جدها..
كانت سدرة راقده ومتغطيه...
شويه فاقت لقت روحها بروحها والدنيا ظلام..
نزلت من السرير ومشت فتحت الباب وطلعت..
سمعت اصوات الهدرزة والتلفزيون ارتاحت..
جت بتمشي للكوجينه بعدين تفكرت انها ماصلتش المغرب..
كانت تبي تصلي بس في شي في داخلها يبي يمنعها..
قاوماته بقوة وغلباته ومشت للحمام..
☘في الكوجينه..
مطيرة:حس باب الحمام انفتح وتسكر شكلها ناضت..
فردوس بقلق:بندوي معاها في موضوع الدكتور النفسي لازم..حالتها تخوف ياعمتي..
مطيرة بضيق:ان شاء الله تتفهم وماتزعلش..
☘وطلعت سدرة من الحمام وهي مازال قاعده تقاوم في الشي اللي في داخلها..اللي قاعد يهمس في عقلها بافكار كفريه صريحه.. من كثر ماتقاوم ضغطت هلبه ع اعصابها..وحست روحها تبي تعيط..
بس شدت روحها بقوة..
لين لبست ملايتها وفرشت الصلايه وهي مستقبله القبله وبدت تصلي..
ووسط الصلاة زادت قوة هالافكار الكفريه لدرجة انها كانت
حتطلع منها..
من اللي قاعده تعيش فيه حست انها منهارة وعاجزة ومش قادرة تقاوم اكثر ...
بدت تبكي بضعف شديد..
وماصدقت انها سجدت..
بش تطلق نداء الاستغاثه..وتطلب النجده الإلهيه..
سدرة بألم وبكاء بصوت منخفض...
...يارب ساعدني يارب..ارفع عني يارب...نتحمل كل شي عادي ولانتحمل نموت كافرة ياربي..يارب احفظ لي ديني يارب ولوخسرت كل شي ماتخلنيش نخسر ايماني بيك ياربي..يارب..يارب ساعدني يارب ساعدني واشفيني يارب...
وماطلعتش من هديكا الصلاة الا وهي حاسه روحها ولت احسن..
بعدين خدت المصحف وقعمزت تقرا..
لما بدت تقرا..
بدت تحس بتعب..وبطنها قعدت توجع فيها..
وحست ان في شي قاعد يركب معاها لين يوصل لراسها وتبدا تتخيل فيه بيتفجر...
سكرت المصحف وحطاته ع تركينه وهي تفكر في اللي حست بيه كله..
بعدين طلعت وحكاته للباقي..
مطيرة:عين يابنتي هادي عين..
فردوس:صح والله عين الاعراض تقول هكي..
غرفه:مزبوط في العرس يما نقوا عليها ماتكبرش مايبانش عليها عمرها تبان اصغر من خواتها..!
سدرة وهي تسمعلهم بحيره:زعمه!
فردوس:اسمعيني شويه هو مرات اللي فيك نفسي ومرات عين..العين دخل القبر بعيد السو عليك..انتي شن ديري شوفي اخصائيه نفسيه كويسه عايني عندها وفي نفس الوقت ارقي روحك...
مطيره:وتهتم بصحتها مرات هدا كله الغده السبب فيه تخليها تخش في وسواس..
وسدرة تسمع وقعدت في دوامه مش عارفه اللي فيها..
مرض عضوي..
ولانفسي..
ولاروحي..!!؟
☘☘☘☘☘
"مش معقوله فاتوا اسبوعين لتوا ماصار فيها شي"
صابرين:متأكده انك درتي اللي قتلك عليه بالخطوه..
نجاة:بالخطوه وبدقه يخي..
صابرين بتعجب:غريبه..
نجاة:لاغريبه لاعيني ضحكت عليك الدجاله..
صابرين؛مستحيل مجربتها قبل وشفت شغلها بعيني اني متأكده في حاجه صارت غلط..ومرات يكون في تخطاه قبلها يانجاة وانتي مش مركزه..
قعدت تتفكر نجاة في يوم حفله الكسوة..
لما طلعت تكلم في صابرين بعد مارشت السحر..
ممكن يكون وقتها صار شي هي مش حاسبه حسابه..
صابرين وهي مركزة ع ملامح وجه اختها؛واضح في حاجه غلط صارت..
شبحتلها نجاة بقلق وقالت:باهي كيف ندير توا..
صابرين ضحكت وقالت؛عمك الجالي قاعدين قلبه وعقله هني..ونوعيته اني زبطتها ماتشداش هلبه الشخصيه الملائكيه لأن مافيش بينهم توافق..حتلقيه ديما يدور ع الجراة والهبال والطيش والشطانه..يدور عليك انتي..
نجاة؛اني مهبوله وطايشه وشيطانه!؟
صابرين بضحكه؛بالمعنى الحلو ياختشه...كيف بنفهمهالك يابنتي!..ايوه المراة المثيره..هي اللي ينشدلها الجالي..
ابتسمت نجاة وقعدت تفكر في كلامها..
ناضت صابرين وهي تقول:عندي ليك سوربرايز خيال..
نجاه ابتسمت بإستغراب وقال:ياستار!
مشت صابرين وهي مبتسمه لدارها..
ونجاة قعدت معاها بعيونها لين ادرقت عنها بعدين قعدت تشبح لصغارها كيف مقعمزين يتفرجوا ع الرسوم وجنبهم خوهم الصغير راقد..
ابتسمت..
ع جية صابرين وفي يدها كيسة ملابس لونها اسود لإحدي المحلات الشهيرة وهي تقول؛نوجا..
شبحتلها نجاه عيونها جو ع الكيسه قالت بإستغراب؛شني!؟
قعمزت قدامها وحطت الكيسه بينهم وقالت:نبيك تلبسيه في الحفله اللي بديرها عزوزتك..
نجاة بفضول وحماس فتحت الكيسه وطلعت منها القفطان..
بدهشة قالت؛شن هدا!!؟ وين طحتي فيه!؟..
صابرين بإبتسامه:امس طلعت لجرابه بناخد حوايج..جي للمحل هدا قدامي خدوا عقلي قفطاينه جيت بتاخد لروحي واحد بس وين شفت هدا تخيلتك بيه وطول شريتهولك..
نجاة:قصدك انتي ماخديتي شي؟
صابرين:مرة تانيه ان شاء الله..المهم انتي تمسحيهم كلهم بعد غدوة..
ابتسمت بإمتنان وعيونها تعبوا دموع...ضمت اختها بقوة..
وصابرين ضمتها وهي مبتسمه بحب..
☘☘☘☘☘
طلعت بشنطة ظهر صغيره فيهم حوايج ليها من دارها..
فاتت ع امها في الكوجينه وقالت؛ماما اني طالعه..
خديجه وهي نطرح في الفطيرة:سلمي ع حناك وخالتك..
راما:يوصل..سلام..
خديجه:سلام..
مشت راما لبست في رجليها حذاء ارضي..
وطلعت من الشقه..
نزلت لوطا وتوجهت لباب الحوش الخارجي..
وعمتها عواطف اللي كانت ضم في المربوعه شافتها من الروشن..
بدت تلاحظ انها قاعده تكبر فيسع..
والبنيه كانت جميله وناعمه وملفته للإنتباه...
بعد ماطلعت من الحوش لوحت المخده متاع الجلسه ومشت طلعت من المربوعه بطريقها للصاله..
لقت امها مقعمزة فيها قالت بعصبيه؛مرت ولدك هادي ماتعرفش تربي..
نجمه شبحتلها وقالت:اين منهم؟
عواطف؛اللي ساكنه فوقك بنت شنيبه..طالقه بنتها طالعه للشارع فهالليل باللبس المشحوط والشعر المطلوق!..
نجمه بتهكم:ان شاء الله راما!؟..قاعده بيبي البنت..
عواطف:لاوين بيبي يام البنت كبرت خلاص..مدام بلغت مفروض تحجبها ومعاش تخليها تمشي هلبه لحوش بوها معبي ولده..
نجمه:بالله سلم بنتي بري ديري حاجه مفيده الهي بيها وخلي بنت خوك في حالها..
عواطف بإنفعال شديد:شن قصدك حاطتها في راسي!؟ ندور فيها!!؟ اني نتكلم من خوفي عليها!!
نجمه وهي تشبحلهابصدمه؛خيرك ولعتي هكي شن قلنالك!
ع جية نجاح تجري:خير دعوتك تعيطي.!؟
عواطف وهي منفعله:اني كلبه وحقيرة اللي مازال ندور في هادي وهداكا ونخاف ع غيري...حمارة ماتربيتش..
ومشت من حداهم بعصبيه..
نجاح:خير دعوتها هادي!!
نجمه وهي تتكلم بصوت منخفض:حاطه راسها براس راما..
حطت نجاح ايديها الزوز في نصها والتفتت شبحت لطريق دارهم بنظرات ضيق..
☘☘☘☘☘
بخت دار بنتها بمعطر ريحته فل..
بعدين طلعت منها وسكرتها..
لاقاها حسين وهو يقول:الدلع هدا كله لأميمه..
صفيه بإبتسامه؛بنيتي الوحيده ربي مايوريني فيها سو..
حسين بإبتسامه:آمين..طالع لحوش التارقي يام بنتعشى عنده..
صفيه:اصبر خليتله حصته من الحلاوات اللي درتهم الراجل ديما حاسبنا في خبزة الفرن..
ومشت خشت داخل..
هو قعد واقف يراجي فيها لين جاته بصونية الحلو..
صفيه:خود وسلملي عليه..
حسين بإبتسامه؛يوصل..
ومشي طلع من حداها وهي ولت للكوجينه..
☘حسين وهو طالع من الحوش تلاقى مع جده مروح..
علي:وين باللي فيدك؟
حسين؛لحوش التارقي...
علي:اها..سلملي عليه..
حسين :يوصل..
خش علي للحوش وحسين سكر الباب..
وتوجه بطريقه للحوش اللي فيه شقة عبد القيوم..
وهو ماشي سلم ع نضال وربيع وكم واحد من شباب الشارع من بعيد..
وصل في الحوش خشله وركب الدروج..
وقف قدام الشقه ودق الباب..
☘وعبد القيوم داخل يطيب في عشاه..
مكرونه مبكبكه بالدجاج...
عبد القيوم وهو يشوف للمكرونه كيف تطبخ:اااه ياربي بناكلها قبل طيب..
دق الباب..
عبد القيوم:مني هذى اللي حظه من السما...
ومشي طلع من الكوجينه للباب فتحه...
عبد القيوم وبإبتسامه مفاجآة:افندي!؟
حسين بإبتسامه؛ان شاء الله جيت في وقت مناسب ..
عبدالقيوم:مناسب واجد اخر..خش خش تفضل..
خش حسين وعبد القيوم سكر باب الشقه وهو يقول:نصيبك تتعشى معاي..لكن مش تجله..
حسين:مرة تانيه ناكلوها التجله اللي نشم فيه توا حاجه ماتتفوتش..
عبدالقيوم:ولما تاكلها حتقول عمري في حياتي ماكليت كيفها..
ضحك حسين ومدله الصونيه وقال:من الوالده..وصلتلك معاي سلامها..
خدي منه الصونيه وقال بإبتسامه:ربي يحفظها لكي..تقضل خش جوا..خش..
مشي حسين وعبد القيوم للدار متاعه كانت دافيه...
حسين وهو يمشي في الشقه لاحظ قداش مرتبه ونظيفه هلبه..
والدار وين خشلها تفاجىء بريحتها الحلوة وترتيبها ونظامها..
عبد القيوم:خود راحتك..شويه وجاي..
ومشي طلع من الدار .
وحسين قعمز وهو يدور بعيونه في الدار..
ثبتوا ع اللوحات اللي كانوا مسندات ع الحيط..
بانت غليها وحده مكتوب عليها كلمة مطحن..
بالخط العثماني..
لاحظها ناقصه...وكأن في كلمه في جنبها مازال ماكتبهاش..
شويه وخش عليه عبد القيوم وقال:غازي ولاعصير.
حسين؛لاعصير القولون متعبني شويه..
عبدالقيوم مشي وهو يقول:كلنا والله..
حسين:ربك يفرج..
وقعد ساكت وهو يراجي في عبد القيوم..
لحظات وخش عليه بسفرة العشي..
حطها قدامه..
تبسي لوح كبير معبي مكرونه جاريه وفايحه بالتوابل والثومه والحبق..
وحداها فردتين خبزة فرن كبار..
وكشيك وحكة مشروب وحكة عصير..
عبد القيوم:هي اقرب..
حسين بضحكه؛من غير مانقول..
قعمز عبدالقيوم هو يضحك بعدين قال؛نبيك تسامحني الماكله الجاريه ناكل فيها بيدي..
حسين بإبتسامه؛وين المشكله اصلا الجاري حلاوته ماكلته باليد..
ورفع كمامه شويه وبدي ياكل..
كسرله عبد القيوم من الخبزة وحطها قدامه وقال:صحتين..
حسين وهو ياكل؛سلمك..
وقعدوا يتعشوا هما الزوز ويهدرزوا في مواضيع من هني وهني.
لين كملوا العشي..
ناض عبد القيوم غسل الماعين ع السريع بعدين دار سفرة براد شاهي اخضر وزوز طواسي وجاه بيه..
حسين:في وقتها..
حط قدامه عبد القيوم السفرة وقعمز..بدي يصب في الشاهي وهو يقول:وليش لعند توا مازوجت؟
ومدله طاسه الشاهي..
خداها حسين وع وجهه ملامح ضيق واضحه..
عقد عبد القيوم حواجبه:شكله فتحت جروحك..اسف..
شرب حسين شويه من الشاهي بعدين شبح لعبد القيوم بإبتسامة الم وقال:اني اساسا جايك نفضفض...بتقول امتى عرفني!؟..بنقولك..اشعارك خلتني نعرفك...وافعالك..حسيت انك حتفهم عليا وتحفظ سري وممكن تدلني ع طريقه ننسى بيها ونتعافى..
عبد القيوم وهو عاقد حواجبه بضيق قال:احكي نسمع فيك..
☘☘☘☘☘
صوت ضحكتها وصيحاتها وهي مبتهجه كانوا يخلوا فيه يضحك معاها وفرحان لفرحتها..
الجالي:هاه شفتي الحكايه كيف ساهله..تحدي وجازفي واكسري الحواجز..
طوبى وهي تسوق :ساهله مادام حني هني في مكان فاضي مافيشي سيارات ..
الجالي:المهم انك قعمزتي ع كرسي السواق وشديتي الدومان وتحركتي بيه هدا بروحه انجاز..القدام تقدري ديري كل شي..
طوبى وقفت السيارة وشبحتله بإبتسامه وقالت:خليك معاي ديما واني حندير كل شي..
الجالي :معاك ديما يافكرونه لمن بنخليك خلاص انتي حصلتي في الطربيقه .
ضحكت وقالت؛واحلى حصله..
الجالي؛خفي عليا شويه انتي من غير ماتقولي شي مطيره عقلي يابال وانتي تقولي فكلام حلو..
طوبى ضحكت ورجعت شغلت السيارة وقعدت تسوق وهي تصيح:ووووه..وتضحك..
وهو يضحك عليها..
☘حسين بألم:مابتش تشوفني غير بصورة الاخ مابتش اطلعني من بروازها ع قد مادرت...بس مع هكي كان عندي امل ان هالنظرة حتتغير بعدين لو صار بينا ارتباط رسمي يخليني نعرف نعبر عن مشاعري..
سافرت واني متعشم بعد نروح ندير اللي مخططله كله..واني الغافل قاعده برا نحلم باليوم اللي يجمعني بيها هي انخطب لغيري وتسمت عليه..
عبد القيوم وهو يسمع في حسين كان مصدوم وواجعه حسين وضايق هلبه اللي بنت لطفي الواعر ماكانتش من نصيبه..
عبد القيوم؛لو منك حجرتها وقلت بنت سيدي انا اولى بيها..بس انتم هنا ماعندكم الحاجه هذي..
حسين بإبتسامه الم؛والله فكرت نديرها بس ع قولتك ماعندناش الحاجه هادي وياريتها كانت عندنا..
عبد القيوم في نفسه"ياريت ولاطاحت هالطيحه":بحت ياحسين..توا خلاص رد الفايت محال وهي الله يستر عليها ولت من قسم ونصيب راجل غيرك فكر في الحلال والحرام امنع نفسك من التفكير فيها...هذي حاجه..الحاجه الاخرى تو انت مفروض تقعدلها اخ..هي توا بعد مازوجت محتاجه خوت يصبوا وراها يحسسوا راجلها وهله ان وراها تريس ويديرولها مليون حساب..
حسين:هدا اللي صاير توا..
عبد القيوم:كويس بكل....وادعي ربك ليل نهار يطلعها من قلبك ويعوضك باللي تنسيك..بحب كامل...مش ناقص طرف واحد هو بس اللي يتعذب ويستنزف في طاقته وصحته ع الفاضي..
حسين شرب باقي طاسة الشاهي بعدين هز راسه وقال:ان شاء الله..
ابتسم عبد القيوم بأسف وهو يشوفله عارفه من داخل قاعد يقول..."مستحيل نحب غيرها"
🍃وروح حسين وخلا عبد القيوم سهران مع نفسه وهو يفكر في قصة بنت لطفي الواعر..
شن ممكن يصير فيها القدام؟
وكيف حتكون نهايتها؟!..
تنهد وقال:كان الله في عونها وعون هلها اللي خشت عليه صعب واجد وماظني عندهم بيه علم..لطفي الواعر اللي عرفته فهالكم يوم بناته عنده حاجه كبيره لايمكن يرضى يحط من قدرهن....
ربي يجعل اخر خير وخلاص...
☘☘☘
وفي حوش شنيبه..
كان محمد شنيه في داره هو ومرته يهدد ويتوعد فيها..
محمد بغضب؛والله العظيم يامغليه لو نسمع انك وجعتي المراة ولاضايقتيها بكلمه اني معاش نخشله الحوش هدي مش بس المهدي..
مغليه بشي من الخوف؛باهي خلاص فهمت اهدا تو يرقى عليك الضغط..
محمد:والله كانك خايفه عليا حق ماديريشي العبيتر متاعك..
مغليه بضجر:وواك...بعدين هزت راسها وقالت بسرعه وعصبيه..تصبح ع خير تصبح ع خير..
ورقدت وعطاته بالظهر..
هو شبحلها بإزدراء..بعدين عطاها بالظهر وقعد يدعي في نفسه..
"عليك العوض ياالله"..
☘☘☘☘☘☘
وتعدي هالليله ويجي اليوم التاني..
وكل من ليه علاقه بالحدث اللي بيصير يتجهزله بطريقته..
واهمهم..
حوش شنيبه اللي كانت ريحه الوشق اللي طالعه منه واصله لناس الشارع في حياشهم..
كان الوقت بعد المغرب..
الوقت اللي وصلوا فيه العرسان لمطار معتيقه..
استقبلهم نضال..
سلم عليهم وباركلهم بعدين طلع بيهم لسيارة العيله اللي دايرها محمد شنيبه للمشاوير العائليه..
كانت كبيره وواسعه واشبه بالباص..
سودا ومرشها مظلم..
ركبوا العرسان وكل واحد قعمز مع عروسته..
نضال:اني كان ماتزوجتش بنقعد مرمطون وكارطون العيله...
ضحكوا..
وعمر قال:ديريها من شادك..
نضال:بوك ياكابتن..قال مازال عليك قاعد يشوف من طور حمزة..
الجالي:انت كان تعقل ونفوت السريب متاعك يرضى يزوجك..
نضال:لو هادي مشكلته قولوله اني بطلت ليا وقت..
عمر:ياودي هادي تبي الحلف ع المصحف ياغالي بش نصدقك..
شبحت اميمه ولعمر وضحكت ضحكه خفيفه..
نضال:نحلف ماعنديش مشكله وربي شاهد اني صادق..
الجالي:خلاص خلاص..خليها عليا انت تو نحاول معاه..
نضال:ربي يخليهولك الراجل اللي حداك ياطوبى..
هي ضحكت بخجل وماردتش..
والجالي يشوفلها بإبتسامه وهو شاد يدها بقوة قرب منها وقال بصوت منخفض:قولي امين..
طوبى شبحتله وقالت بهمس:آمين..
نضال؛بتبدوا من توا في الوشوشه والاسرار مايمشيش الحال هدا عند مغليه نقوللكم من توا..
ضحكوا اميمه وطوبى..
وعمر قال؛ياراجل سوق وانت ساكت..
الجالي:تربح فينا اجر..
نضال هز راسه وقال:غير نساوينكم حداكم..
وفتح الراديو وعلا الصوت...
وكان في اغنيه كلماتها تقول..
وافترقنا..ويوم اللي بعدنا احترقنا..
وافترقنا..
وكان الليل بحضنوا سارقنا..
الجالي بضيق:غير الغم..
عمر:طفيه بكل..
ونساوينهم قعدوا يشبحولهم بملامح ضيق..
الجالي:قلبتلي وجه المراة ونكدت عليها..
عمر:اني خلالي وجهها اصفر!
ضحكوا اميمه وطوبى...
نضال:لا والله ماصارت نساوين خوتي..
وقعد يبربش في تليفونه..
الجالي؛ركز في الطريق يابنادم!
عمر:باعتيه بش يرزينا في عمرنا..
نضال نزل التليفون وقال:هديه مني ليكم...
واشتغلت اغنيه..
يامحلا الدنيا لما تجمع بينهم..
عمر والجالي ابتسم..
واميمه وطوبى يضحكوا ع نضال كيف ييصفق ويغني مع الاغنيه ويقلب في كلامها...
☘وفي شارع القهوة..
كان عبدالقيوم واقف ع حيط القهوة من برا وه يكتب بالخط العثماني..
(قهوة الزعيم)
والزباين بتفرجوا عليه..
فجأة..
علي صوت كلاكس سيارة عيت شنيبه وهي خاشه شارع القهوة..
عبد القيوم ماباش يتلفت ويشوفلها لين جت فايته يدوب سرقلها النظر ورجع يشوف للحيط وهو يكتب..
☘في جنان حوش لطفي الواعر..
سدرة وهي متشوقه:وكان يجيبوهم هني شويه بس!
صفيه:ياريت..
اريج؛خيي ع الدنيا كيف خلتني معاش نشوف توأم روحي الا بالزيارات..
فردوس:سيورك تتزوجي حتى انتي ويصيرلك نفس الشي..
قربت غرفه من وذن آلاء وقالت:وقتها امتى ماتبي تشوف طوبى .
شدت الاء ضحكتها..
وهي شبحتلهم بربع عين وهي مصغرة عيونها وعرفت شن كانوا يقولوا..
☘وتعالت زغاريد مغليه ونسرين وهمايستقبلوا في العرسان..
سبقوهم الصغار في السلام..
بعدين سلموا عليهم ودخلوهم داخل..
خشت مغليه وهي تقول:خشوا خشوا..
خشوا العرسان بعرايسهم..
وشافوا عائشه ونجاه مقعمزات فيها..
الجالي توتر وتجاهل نجاة تماما وهي تمرر في نظرها عليهم وقلبها محروق من داخل..
طوبى لما شافتها تعكر جوها بس دارت روحها عاديه..
قدموا هي واميمه..وسلموا عليهم..
طوبى وهي تسلم نجاة الجالي كان يسرقلهم في النظر وهو متوتر...ونسرين بس اللي ركزت عليه..
نجاة بإبتسامه:الحمد لله ع السلامه ياعروس سامنه ومزيانه الله يبارك..
طوبى بإبتسامة مجامله:الله يسلمك..شكرا..
ومشت سلمت ع عائشه..
واميمه جت لنجاة تسلم عليها..
وبعد السلام..
قعمزوا طوبى و اميمه حدا بعض..
ورجالتهم قدموا بش يسلموا ع نجاة وعائشه..
عائشه:حمد لله ع سلامتكم..
الزوز قالوا مع بعض:الله يسلمك..
عمر جي لنجاه وصافحها وهي تقول:حمد لله ع سلامة ومبروك عليك..
عمر:الله يبارك فيك..جبنالك اني واميمه هديه مميزة..
ابتسمت وهي تشوف لأميمه وقالت؛هديتي اني شفتكم مع بعض في يوم زي هدا..
ابتسمت اميمه مجامله وقالت؛تسلمي..
وطوبى تشبحلها كيف شافت للجالي ومدت يدها وهي تقول:مديرنا حمد لله ع سلامتك..
صافحه وهو مبتسم غصبا وقال:الله يسلمك..
وطوبى تشبح لإيديهم بنظرات عدم رضا..
هو طلق يدها وهي تقول؛يسلموا عليك جماعة الشركه ويباركولك..
الجالي بدون مايشبحلها:الله يبارك فيهم..
والتفت لأمه وهو يقول:وين بوي والمهدي..
مغليه:في المربوعه..
مشي الجالي وهو يقول:هيا عمر..
عمر مشي وراه وطلعوا من الصاله...
نسرين بآبتسامه؛ايه احكولنا عن جو ايطاليا
