# طوبى "شارع القهوة" #جمان_فريد #الجزء_الثالث_والعشرين"الناس أجناس2" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ "فايزة تسمعي فيا" يدوب فتحت عيونها وهي راقده ع المندار.. قعدت دور ع مصدر الصوت لين شافت صاحبتها قدامها.. قالت بصوت متعب:سدرة! سدرة بقلق ولوم:معقوله هكي يافايزة معقوله تقطعي الماكله والشراب خيرك!!؟ مش اتفقنا تقوي روحك ع خاطر بناتك يافايزة!!؟ فايزة حاولت تنوض تقعمز.. سدرة:خليك زي ماانتي..خليك.. فايزة شافت لرجليها لقتهم محطوطات فوق بطاطين كبار مطبقات.. بعدين شبحت لسدرة وقالت:من كلمك؟ سدرة:اني اتصلت بيك ردت عليا صفاء سألتها عنك قعدت دور عليك لين لقاتك طايحه مغمى عليك هني تحسابك متي قطعتلي قلبي وهي تبكي.. فايزة بنبرة باكيه:ياروحي بنتي..بالله ناديها.. سدرة:رقدتها طوبى في الدار.. فايزة:حتى طوبى جت فهالليل! سامحوني ديما متعبتكم.. سدرة:ماتخلنيش نحرج منك يافايزة الكلام اللي يكسر الكرايم هدا معاش تقوليه..مش حني وخيات وحوش لطفي الواعر حوش اماليك!! حطت فايزة يدها ع وجهها وقعدت تبكي. سدرة بقلق شديد؛شكلها صايرة حاجه! لما جيت ومالقيتش امك عرفت ان في شي صاير..تكلمي فايزة قولي.. هدت فايزة شويه..نزلت يده ع خشمها وشداته شويه وهي تشوف للسقف..بعدين حولتها وشبحت لسدرة.. وبدت تحكيلها.. ~~~~~~~~~ سدرة:معاش نقدر نخليهم هني برواحهم يابوي شفت شن صار... لطفي قعد يفكر شويه وهو مضايق بعدين قال:نقولك حاجه..الليله باتي هني انتي وطوبى واني نبات لوطا في السيارة.. سدرة:علاش يابوي تعب عليك. لطفي:ماتقاطعنيش يابنتي خليني نكمل كلامي..جت ع الليله تمشي كيف ماتمشي..اني غدوة ان شاء الله ماشي لحوش اهل احمد وبنحاول معاهم مرات نلقى حل طلوعها من حوشها قبل لنحاولوا معاهم غلط ... تنهدت سدرة وقالت:باهي..ولو اني عارفه شن اخر هالمحاوله بس نقولوا ربي قادر على كل شي.. لطفي:تفائلي خير بنتي..تفائلي خير.. سدرة:يارب... ~~~~~~~~ فايزة:نعرفهم كويس ياسدرة تي هادو واحمد حي ماسيبوا عليه قرش واي حاجه تخش عليا جديده يستخسروها فيا..حتى الشقه قعدوا يسحنوا في كبدي عليها شايفينها هلبه عليا..هادو احقر من خلق ربي هما وخوتي طينه وحده.. سدرة:نقولوا يارب وخلاص..اللي فيها خيرة ليك ربي يجيبها.. فايزة ودموعها نزلوا:نفكر كيف بيصير فينا لو طلعنا من هني وين بنمشي كيف بندير..الحقير اللي ينقاله خوي الكبير مايبيش يعطيني حقي من الورث قبل بيهم نقدر ندير حل لكن توا ماعندي شي مافي يدي شي.. وقعدت تبكي بعجز والم وضعف.. وسدرة تشوفلها بوجع ودموعها ينزلوا... ☘☘☘☘☘☘ وعدت هالليله الصعبه... وجي اليوم اللي بعده... بعد الغدي... مشي لطفي لحوش محمد شنيبه.. استقبله ودخله مربوعته وفتح معاه موضوع فايزة. الراجل ماكانش عنده علم باللي داروه اهل احمد مغليه ماخبرتاش.. محمد بتعجب:لا والله ماعندي علم.. لطفي بإستغراب:غريبه! عيالك هي اللي مشت لفايزة وخبرتها! حس محمد بالإحراج وطارتله هلبه من مغليه.. لطفي لاحظه غير خط الكلام وقال:اني نبيك تمشي معاي لحوشهم نتفاهموا معاهم اني وياك وبوي والصيد والحاج مخلوف.. محمد شنيبه:قلتلهم الجيران..؟ لطفي:بعد مانطلع من عندك... هز محمد شنيبه راسه وقال:بعد العصر.. لطفي:ان شاء الله نصلوا العصر ونمشولهم.. محمد:إن شاء الله.. 🌻🌻🌻🌻🌻 "هدا شنو؟" مراد:وردة شني ماشفتيش الورد قبل ولاشكله ماعندكمش مراية في حوشكم! خدتها وهي مبتسمه بخجل وقالت:لاعندنا بس يعني كنت نشوف في روحي مانشوفش في ورده.. مراد بنظرات ساحرة؛بس اني نشوف فيك وردة.. هي تحشمت وارتبكت هلبه وقالت:مراد مش هكي عاد! مراد:لا هكي ونص من الاخير عواطف اني حبيتك.. انصدمت..وقعدت مسهمه في الوردة وهي مش مصدقه.. في راجل قاللها حبيتك! مراد؛اسف ع صراحتي بس والله خلاص معاش نقدر ندس يابنت الناس خشيتي خاطري وقلبي وفي بالي ليل نهار..الحكايه هكي فايته الاعجاب معاي لقيت روحي حبيتك من غير مانحس.. شبحتله وهي مصدومه قالت:باهي شن اخرها يامراد قولي راك اصغر مني بتلاته سنين مايجيش.. مراد:بالك تحساب العمر يهمني ولانشوف فيه!! همي كله انتي اني نبيك بجديات وحنخطبك غصب عن اللي يبي ومايبيش.. عواطف ضحكت وقالت؛لااصبر شويه..حني ماليناش هلبه نعرفوا بعض مايجيش خطوبة طول .. مراد في نفسه"اياااح توا هادي صدقت روحها الزفت" وبعدين قال بملامح صدمه مصطنعه:كيف قصدك انتي مازال مش حاسه جيهتي بشي!!؟ عواطف:مش هدا القصد..بس نبي نزيد نعرفك وتعرفني قبل ليصير اي شي رسمي.. مراد؛باهي لأمتى بنقعد نصبر روحي!؟ عواطف بضحكه:مش هلبه شهرين تلاته تانيات.. مراد"الزفت عارف ع وجهي اني بيسكروا القروض كيف بندير معاها هادي بس" عواطف:خيرك! حرجت؟ مراد بضيق :حسيتك زي اللي مش واثقه فيا مش عارف علاش رغم ان قصدي معاك شريف واني واضح.. عواطف:لايامراد مش حكاية ثقه..سكتت شويه وهي مضايقه بعدين قالت..خلاص خل نزيدوا شهر بس..شن قلت!؟ تنهد بعدين شبحلها وقال بإبتسامه:شهر..ولايوم زيادة بعد هالشهر بنخطبك طول.. عواطف ضحكت بخجل وقعدت تشم في الوردة.. وهو يشوفلها بإبتسامه الانتهازي الخبيث.. ☘☘☘☘☘☘ فهالوقت.. كانت اختها نجاح في الكوجينه تغسل في الماعين.. خشت عليها امها وقالت؛تو مش عواطف مفروض تروح بكري اليوم.. نجاح بغل؛وين نندري على دعوتها اني.. نجمه:خير بلاك انتي!؟. نجاح:اليوم كله ع دماغي غدي وماعين واني مروحه من المدرسه مهدوده.. نجمه:حتى مرت خوك مانزلتش اليوم اشبح خير دعوتها! نجاح:هي شاده شقتها وطالقه فروخها للمربيات اللي هني لكن غير تبان تو نوريها.. نجمه ماعلقتش لانها راضيه على كلام نجاح..لفت طول وطلعت من الكوجينه.. وفي الدور التاني.. شقة محي الدين تحديدا.. كانت خديجه مقعمزة تتفرج ع التلفزيون بس عقلها مش معاه.. فجأة انفتح باب الشقة.. رفعت حاجبها وشدت ع قبضة يدها.. "خديجه..خديج" ابتسمت تهكما.. خش عليها دار المعيشه وقال؛نادي فيك خيرك ماترديش!؟ خديجه؛ماسمعتكش صوت التلفزيون عالي..خيرك وجهك اصفر هكي وداهش.. محي الدين بتوتر:مش عارف شن بنقولك ياخديجه..اليوم مر عليا زي الزفت..المشروع الراجل اللي دعمني فيه رفع يده فجأة..والراجل اللي عطيته فلوس يخدمهم جاني وردهم اليوم..والبضاعه اللي جيت بنستلمها اليوم حجزوها في الميناء.. خديجه رفعت حواجبها وقالت:يالطيف! محي الدين:اتصلت ببوك وبخوك المهدي مافي حد رد جيتهم هني مالقيت حد..كلمتك انتي بش نكلميهم حتى انتي ماترديش..وينه تليفونك؟ خبطت جبهتها بخفه وقالت:يييه! حطيت في الدولاب ونسيته.. محي الدين تنهد وقال:صار خير نبيك بعد العصر تمشي تكلميهم.. خديجه؛وعلاش!؟ ضحك بتعجب وقال؛شن علاش نسيتي انهم خشولي في المواضيع هادي وهما اللي يعرفوا الجماعه هادم!؟. خديجه:لامانسيتش بس مش ماشيه ولامكلمه حد.. هو استغرب هلبه وقال؛كيف!؟ خديجه:واضح كلامي.. محي:وعلاش!؟ خديجه حطت سبابتها ع صدغها وقالت؛هكي مزاج.. ضحك وقال؛خديجه الموضوع مش متحمل بصارة راهو هادي خساير بمئات الألوف.. خديجه:برا لهديكا اللي مستعد طلقني ع خاطرها بالك عندها معارف يقدروا يساعدوك!... هو انصدم بقوة وقعد ساكت.. يشوفلها بنظرات المصدوم والخايف في نفس الوقت... ناضت خديجه وقالت؛ناسي ان رقبتك في يدي يابابا!. ناسي انت شن كنت وشن اصبحت بعد خديتني.. ناسي انك واخد خديجه شنيه اللي معاها ريت العز والخير.. مش اني اللي تبدلني ببنت شوارع يامحي الصيد.. هو ناض وقال؛راك فاهمه غلط.. خديجه؛لافاهمتك صح وصح الصح..مش عبيطه..ومش حنكون عبيطه ونحرج ونقعد عند ماليا ولانطلب الطلاق..لالا حنقعد معاك ع قلبك وتقعد رقبتك في يدي يامحي.. ومشت من قدامه وهي قاعده تتمالك في اعصابها بقوة.. هو قعمز وقعد يشبح للمكان اللي طلعت منه وهو مصدوم ومش مصدق...وخايف هلبه.. هني محي ندم ع الساعه اللي شاف فيها صابرين... ☘☘☘☘☘ بعد العصر.. طلعوا لطفي وبوه علي ومعاهم محمد شنيبه وباقي الجيران اللي اتفق معاهم وتوجهوا لحوش اهل احمد.. استقبلوهم استقبال كويس.. واستضافوهم في المربوعه... كانت الهدرزة في بدايتها عاديه جدا ع مواضيع عامه.. بعدين ضيفوهم.. بعد الضيافه فتح لطفي الموضوع.. والوجوه اللي كانت بشوشه قبل شوي انقلبت لوجوه غاضبه حتى من لونها تغير.. لطفي:في النهايه هادم بناتكم مابتخلوهم في الشارع اكيد مش حترضوها ع ارواحكم... واحد من خوته؛بناتنا يجونا يعيشوا عندنا هني... محمد:تبوا تفرقوهم عن امهم مش سادهم بوهم اللي فقدوه! واحد تاني قال:بوهم فقدوه من عمايل امهم..قعدت وراه لين فرقت بينا وبينه والراجل معاش تحمل ودارها في روحه. لطفي ضيق عيونه وقال:نعم!؟ الصيد جارهم:قصدك تقول انتحر.. :مش كلامنا حني بس هلبه ناس قالوا هكي موته مش طبيعيه بكل.. لطفي بضحكه:لابارك الله فيكم والله اللي مادرتوهاش هي قتلاته.. :هازي ع الكلام ياعمي لطفي!؟ لطفي:مايخشش العقل ياولدي مايخشش العقل...ولدي تعوذوا من الشيطان وخلوا عليكم الكلام الفاضي راهو والله الواحد ماهو رافع منها حاجه كان اعماله..يوم غدوة والله ماعندك وين تهرب ع كل صغيرة وكبيرة تتحاسب..اتقوا يوما ترجعون فيه إلى الله ياولدي... :طلعتنا مانخافوش ربي! محمد:مش هدا قصده..هو يذكر فيكم بالم ناسيين..راهو كلنا ننسوا ونغفلوا ونفرحوا وين يجي يذكرنا بإن اخرتها موت وبعدها حساب.. "لالا حني عارفين ان اخرتها موت وبعدها حساب..لكن هي اللي ماتعرفش ياحاج محمد" تفاجئوا وين سمعوا صوت فتحيه.. كانت واقفه حدا الباب تتصنت ولماحست ان ولادها ساكتين خافت يكونوا تأثروا بكلام لطفي ومحمد.. لطفي:ياحاجه نبوا نهدوا النفوس ياحاجه مانبوش بنات ولدك وامهم يتشردوا.. "بناتنا يجونا هني فالنهايه بناتنا...وهي تمشي تنتلف تلفه اللي تفرق بين الام وضناها لايمكن نسلموها في حاجه حرام فيها..قطعاته عن اماليه قهراته وسحناته ومش بعيد تكون هي اللي قتلاته مش هو اللي انتحر..." قعدوا يقولوا بأصوات متقطعه:لالالا..ياحاجه..ماتقوليش هكي "لانقول ونقول انتم شن تعرفوا عنها رانا حني اللي عاشرناها وعرفناها كويس ماشفتوش منها اللي حني شفناه" لطفي بحده:اني مربيها فايزة واني نعرفها اكثر منكم كلكم مافي حد يقدر يشكك في بنت من بناتي.. "واللي يقولوا فيه الناس واللي نسمعوا فيه يالطفي...تي عدتها قاعده ماتمتش قاعده دور في راجل ولا ياحاج شنيبه" شنيبه استغرب وقعد يشبح للموجودين.. هني الحاج علي اللي قاعد ساكت طول القعدة ويسمع بس وحط الحاجه فوق الحاجه انفجر مرة وحده وقال:ضمي فمك واسكتي..ناض وقف وهو يقول بعصبيه..عندك ولايا اللي قلتيه عليها تلقيه فيهم.. واحد من ولادها:حاج علي راك في حوشنا.. نش عليه بعكوزه وهويقول بعصبيه:ااسكت اسكت اسكت...وضم فمك..اشر عليهم وقال..ولا واحد فيكم يجي راجل اللي يمشوا فيكم النساوين..حوش زي هادو تريسه ماينخشلاش.. ومشي بيطلع.. وقف واحد وقال:غير جيت راجل كبير.. التفتله علي وفنص فيه.. ولطفي جاه وشده من ذراعه وقال:ماتقولش كلام اكبر منك تندم هلبه بعدين.. الولد وخوته خافوا وقعدوا ساكتين.. علي:خليه يالطفي خليه شكالات زي هادم مايستاهلوش. ولف ومشي طلع.. ولطفي طلق ذراع الولد ومشت طلع وراه بوه.. ولحقوه باقي الرجاله... واحد منهم مشي طلع لأمه.. خش عليها وقال:علاش تطلعي تتكلمي يام علاش!! فتحيه؛حرقولي دمي بيطلعونا غالطين ع خاطر طالبنا بحقنا والله حقنا مانا متنازلين عنه والله مانخلولها حاجه.. وحده من بناتها:حتى فرخاتها يقعدوا عندها مانبوا منها شي هالشيطانه... ☘☘☘☘ برا.. الحاج علي:قول لسدرة تجيبهم يقعدوا هني لين نديروا حل.. لطفي:كان هدا اني نجي نقعد عندكم المراة في العده مايجيش نقعد في الحوش معاهم... علي:ايوه مزبوط.. الصيد:-مانحسابش في ناس ساهل عليهم هكي يفرطوا في لحمهم.. جارهم:ربي يجيرنا ياحاج ربي يجيرنا.. ومحمد طول الطريق ساكت يفكر في كلمة فتحيه.. لين قرب يوصل في حوشه.. سلم ع جيرانه..بعدين مشي لحوشه طول.. خشله وهو معصب وقعد ينادي:مغليه..مغليه.. جت مغليه من اخر الممر اللي يرفع لدارهم وهي تقول.. مغليه وهي مخلوعه؛خيرك خيرك!!؟ محمد بغضب:شن مدرقه عليا تاني!!؟ مغليه:مافي شي تاني!؟ محمد؛فتحيه قالت ان فايزة دور في راجل قبل تكمل عدتها ولاشنو ياحاج شنيبه شن قصدها!؟ مغليه مطت شواربها بملل..وشداته من يده وخشت بيه للصاله وسكرت الباب.. محمد:تي شن في!؟ مغليه:هدا الجالي ولدك بعادته هكي يصخف هلبه ع الصغار وجعه حال فايزة وبناتها وقعد مرة مرة ياخدلهم في حاجه مرة مرة يطلع في البنيات والناس عاد اعوذ بالله منهم ومن لساناتهم غزلوا قصه وقعدوا يحكوا فيها لين حرموا عليه يدير الخير.. محمد شبحلها شويه بعدين قال:مرات ولدك حق حطها في راسه ويبيها. مغليه ضحكت بتعجب وقالت؛محمد مش عارف الفرق بينها وبين ولدك في العمر مستحيل..وبعدين خيره هبل ياخد ارمله بصغارها.. محمد:نتبرا منه بعدين قوليهاله..هدا اللي ناقص ع اخر عمري يقعدوا الناس يعيبوا عليا ويديروني مستكه في فامهم!!؟ مغليه:ولااني نرضاها..ولاهو... محمد؛اسمعي يامغليه لو نعرف ان ولدك ناوي ع حاجه زي هادي حق ندير مادار لطفي ووالله معاد نعرفه لين نموت.. ومشي فتح الباب بقوة وطلع.. مغليه بهمس وهي شاده ع سنونها:عطيك سحيقه يافتحيه.. ☘☘☘☘☘☘ الساعه 7:00مساءا.. في دار بنات فايزة.. طوبى:ماتبوش تقعدوا معانا!؟ صفاء:لانبوا لكن قصدي معاش بنجوا هني بكل؟ طوبى سكتت شويه بعدين ابتسمت وقالت:بيولي عندكم حوش جديد!؟ مروة:حوشكم مش حوشنا! طوبى:لا مش على حوشنا انتم يتقعدوا عندنا شويه بعدين تمشوا لحوش جديد.. صفاء ومروة:ااااهااا.. ضحكت طوبى وقالت:هي بسرعه بسرعه ساعدوني بش نكملوا بسرعه.. وصفاءومروة قعدوا يطلعوا في حوايجهم لطوبى... وهي طبق وتحط في الشناطي... وفي دار النوم.. سدرة وهي ضم في حوايج فايزة:بوي بيجيب حتى كناتر ترفعوا بيهم الاثاث كله.. فايزة وهي مقعمزة وضامه تاله اللي راقده في حضنها:خايفه يديرولي عليهم مشكله.. سدرة:يديروا عينهم..هما يبوا الشقه بش يبيعوها وياخدوا الورث اللي ان شاء الله يقعد بعدهم..ماعندهم مايديروا بالأثاث.. فايزة بضيق:باهي سدرة عمي لطفي..قصدي يعني والله واجعني بسببي اني بينحرم من الخشه لحوشه.. سدرة:يابنتي بوي بيقعد في الحوش اللي جنبنا حوش جدي حوش بوه..وحني نمشوا نشوفوه ونهدرزوا عليه كان نبوه.. فايزة قعدت ساكته هي حابسه دموعها في عيونها.. حاسه روحها حتكون عبء عليهم وحضايقهم في عيشتهم.. وهي ماتبيش تكون عبء على حد لاهي لابناتها.. التفتت سدرة شافتها كيف سرحانه وقالت؛شراده معاش تفكري في شي يامراة خيرك..رانا اماليك ولانسيتي مش انتي كنتي تقولي هكي زمان.. شبحتلها فايزة وقالت:نبي نصيبي من الورث ياسدرة من ورث بوي نقصد..يديرولي حل.. سدرة هزت راسها وقالت:غير توا تجي معانا للحوش وبعدين ساهل... ومشت ضملها في باقي حاجاتها وخلتها سرحانه تفكر في حالها... ☘☘☘☘ وكملوا ضمان الحاجات كلها مع الليل.. ووصلوا الكانتر... وركبوا العمال ينزلوا في الاثاث ماخلوا شي حتى حتى من السخانه متاع الحمام قضوها ورفعوها... وركبت فايزة وبناتها مع وطوبى وسدرة في سيارتها وتوجهوا للحوش.. ☘وفي الحوش.. غرفه بتذمر:اف ياربي افف..الواحد كيف مازال بيعيش ع راحته في حوشه الهم...زحمه وضيق ومفرخ ودوشه ووواك ياربي.. وقعدت تاكل في طروف بسوسه اميمه ورا بعض وهي منغاضة بتنفجر... ☘☘☘☘☘ وصلوا الكناتر للحوش.. وطلعوا العمال لبضاعه لفوق سطح حوش لطفي جزء منها.. وجزء انحط في المخزن.. وبعد وصلت سدرة باللي معاها.. ركبت مع طوبى وتعاونوا ع تغطيه الحاجات بشراشيف كبير وثبتوها كويس..وكان متقي عليهم من فوق سقف زينقو.. بعدين نزلوا للمخزن وغطوا باقي الحاجات وسكروه وطلعوا... 🍀🍀🍀🍀🍀 وتعدي الايام... وفي كل يوم كان محي الدين يطلب في رضي خديجه وهي ولامعبراته..ومخليه حاله واقف ومش عارف كيف يتصرف وكل يوم يندم ع عملته اكثر من اليوم اللي قبله... وعواطف اخته قاعده تغرق كل يوم في غريق مراد اللي مش ناوي معاها خير نهائي..وقعد يتقن اللعب بمشاعرها..واستغل حاجتها الشديده للحب والاهتمام بالذات حاجتها للإحساس بأنها انثى تنحب ويتغزلوا فيها... ونجاح اختها بتموت وتعرف شن مغير اختها هكي..وعواطف مازال متكتمه وخايفه انها تحسدها... من جهة تانيه... لطفي اللي قاعد حاط في راسه موضوع بنت فردوس مشالها للحوش غادي وهدرز هو وياها في الموضوع.. فردوس بضيق:اني نطلب في حاجات ضروريه.. لطفي:لامش ضروريه يابنتي اني اللي نعرفك كويس يافردوش عينك واسعه ومش اي شي يعجبك.. نصيحه خوديها وان شاء الله مايجي يوم وتتفكيرها وتقولي ياريتني سمعت لبوي.. يابنتي اقنعي باللي عندك توا وقولي الحمد لله خيرمايجيك يوم وتفقديه..تفقدي هالحوش اللي الالاف يتمنوا منه دار..تفقدي استقرارك فيه..تفقدي الراجل..اللي قاعد يساير فيك وشاريك بمعنى الكلمه..صدقيني يابنتي راجل تاني راهو من زمان مطلقك..ماتخربيش ع روحك بإيديك يابنتي.. فردوس سكتت وهي مضايقه هلبه.. سايرت بوها لين روح.. وبعدين قعدت تراجي في مصطفى يروح.. ~~~~~~~~ مصطفى؛بوك مش حد براني.. فردوس بعصبيه:انت صغرتني في عينه خلتيني مانسواش علاش هكي يامصطفى..مش حني متفقين نخلوا مشاكلنا بينا.. مصطفى:انتي اللي جبرتيني نطلعها يافردوس..وراهو قاعد نقولك هادي اخر محاوله ليا معاك.. فردوس:شن قصدك!؟ طلع من حداها وهو يقول:فاهمه قصدي كويس.. هي قعدت واقفه تفكر وخافت هلبه... وبناتها اللي كالعاده يسمعوا في النقاش خافوا اكثر... ☘☘☘☘☘ "اوووف..اف..اف..الزفت من اللي بزغ الزيت متاعي مني" طلعت غرفه من دارها ومشت للصاله وقالت:من اللي بزعه هدا؟! طوبى:اني نشته... غرفه:انتي نشتيه!؟ وبنات فايزة يسمعولها وهما خايفات.. طوبى:ايه اني.. غرفه مطت شواربها لداخل بغضب بعدين مشت وهي تقول:عيشه تقصر العمر تقصر العمر . وخشت للدار وخبطت الباب بقوة. وفايزة اللي كانت في الحمام تغسل في حوايج بناتها تسمع فيها ومجبورة تسكت لأنها عاطيتها العذر بناتها حركيات هلبه ولازم يديروا الفوضى.. بس الشي زاد مع مرور الايام... •••غرفه؛قصدي نبي نتفرج حتى اني مش معقوله ليل مع نهار رسوم.. سدرة:بري شدي الراديو متاعك.. غرفه:مليت نبي التلفزيون ياسر عاد.. خدت فايزة الريموت وعطاته لطوبى .. وقالت:لبناتها هي نوضوا ماما نرقدوا.. سدرة:بترقدوا من توا.. فايزة:هداكا هو ياسدرة ونبي نعودهم ع النوم بكري.. وناضوا بناتها ومشوا كلهم لداى المعيشه وين مايرقدوا.. جبدت سدرة الريموت من طوبى وطفت الريسفر وقالت:انتلفي للدار.. غرفه:سدرة بالله عليك فكيني منه الجو اللي ديري فيه.. سدرة وهي تغز ع سنونها:قلت انتلفي للدار.. ناضت بغضب وهي تمشي وتخبط في الارض برجليها.. وخشت لدارها وخبطت الباب بقوة.. سدرة:بنذبحها يوم من الايام.. وطوبى ساكته وهي مضايقه.. اما فايزة فكانت نرقد في بناتها وهي تبكي بصمت.. ☘وزادت المشاكل.. وغرفه زادت وقاحتها.. ••غرفه وهي قمة الغضب؛تي جيبي جاي يافرخه جيبي.. جبدت من تاله خيط الشحن لقاته مقطع.. فنصت عيونها لين قريت طلعوا.. طلعت من الدار وهي تعيط:لالالا خلاص لهني وخلاص اني كبدي درهت من هالعيشه شن هدا ياربي شن هدا.. طلعوا فايزة وسدرة يجروا من الكوجينه... وطوبى جت خاشه تجري من باب الحوش والبنات وراها... سدرة؛خير بلاك تعيطي؟! غرفه وهي تحرك في يدها خيط الشحن:شوفوا الفرخه شن دارت شوفوا شن ندير اني توا شن ندير.. فايزة وهي مرتبكه ومحرجه؛تو نعطيك شحني.. غرفه بغضب:مانبي منك غير تشدي بناتك بس شدي بناتك بس.. مشتلها سدرة بغضب ضربتها كف وخدت منها خيط الشحن لوحاته ودخلتها للدار وهي تقول:خشي ياحيوانه خشي.. غرفه وهي تبكي بعياط؛ ماديريلش هكي هيي معاش تضربيني قدام حد مش صغيرة ياسدرة اني معاش صغيره.. سكرت الباب وخلتها تعيط بروحها.. بعدين شافت فايزة ماشيه مع بناتها لدار المعيشه.. طوبى بحزن وضيق:قالت لبناتها تعالوا نلموا حوايجنا.. سدرة اللي كانت مضايقه ع الاخر مشت خشت لفايزة.. لقتها فاتحه شنطه بتلم حوايجها.. سدرة؛تي غير وين بتمشي بس.. فايزة وهي تبكي؛ليا ربي ياسدرة.. سدرة شدتها وقالت؛-ماتعدليش عليها غرفه راهو هدا حالها معانا حتى اني. فايزة ببكي:عندها الحق عندها الحق..وحتى اني تعبت من الضغط النفسي ياسدرة كل يوم عايشه ع اعصابي معاش قادرة نتحمل..نبي نطلع خلاص معاش نبي نكره فيا حد ساد الناس اللي كارهتني بدون مانوصل فيهم بغلط وربي شاهد عليا...وقعدت تبكي. وسدرة وبناتها يشبحولها بحزن.. رشفت فايزة وقالت:اني بس نبي منكم حاجه وحده..لو...بكت شويه وقالت..لو تأجرولي استديو صغيرة نقعدوا فيه اني وبناتي وربي يجعله في ميزان حسناتكم يارب..وخنقتها العبرة اخر الكلام.. ضمتها سدرة وقعدت تهدي فيها وهي تقول:خلاص خلاص بناتك يشوفوا فيك.. وفايزة لما سمعتها زادت انهارت بالبكي.. حست وقتها انها اضعف خلق ربي اعجزهم لاحيلة لها... وطوبى واقفه في الباب تشوفلها وهي تمسح في دموعها اللي ينزلوا حزنا على حالها... ☘☘☘☘☘☘ مقعمز فوق سطح حوش خالته مع ولد خالته وهما ياكلوا في الدلاع " البطيخ".. ويهدرزوا في موضوع.. مراد:قالك شن جابرك ع المر قال الامر منه..مافيش قدامي غير هكي..اني مدابيا نقرا الفاتحه بش تولي مرتي وتكفلني في حكاية القرض وناخده ونبدا نبني.. عبد الحفيظ؛وبعدين.. مراد كلي طرف وقال:نخلوه..لبعدين.. سكت عبد الحفيظ وهو ياكل.. شويه قاله مراد:عندها اخت راهو.. شبحله عبد الحفيظ.. مراد:مدرسة ليها سنين حتى هي...غمزله وقاله..فكر في الموضوع.. عبد الحفيظ ماكانش متقبل اللي يدير فيه مراد..بس في نفس الوقت كان يبي يدير لروحه حل حتى هو... شبح لمراد وقال بشي من تردد؛-تقدر تعرفني عليها؟ ضحك مراد وهز راسه وهو ياكل.. عبد الحفيظ هز راسه ورجع ياكل مرة تانيه وهو منزعج من داخل.. 🌻🌻🌻🌻🌻 تاني يوم... الساعه 9:00صباحا.. طلعت سدرة من الحوش بسيارتها.. شافت بوها واقف من بعيد شوي مع الدكتور.. ابتسمت وقالت:هدا وين روح! طلعت السيارة ونزلت منها.. واياد شافها سرقلها النظر بعدين رجع لهي مع لطفي.. ليهم 3سنين غايبين ع البلاد.. ☘كانوا في سوريا..بس لما امه تعبت رفعوها لدوله اوروبيه تتعالج وقعدوا معاها لين توفت..☘ سدرة وهي تسكر في باب الحوش.. شافت جيهتهم لقت شاب صغير واقف عليهم ويهدرز.. تمعنت فيه وهي مستغربه.. بعدين ركبت سيارتها وزادت ركزت فيه.. سدرة ؛مهند! تي هادم يكبروا بسرعه هكي! وشغلت سيارتها وتحركت وهي تقول؛كبروا وكبرونا.. ووفاتت من حداهم... لطفي:اي شي تبوه قولوا ماتتحشموش حني هني في شارع القهوة عيله وحده.. اياد بإبتسامه:اكيد وانت عارفني مش نتحشمش.. مهند؛نبوا القهوة هادي اول حاجه.. اياد:ولى عاشق للقهوة حتى هو بالذات جنه..معاش بدي يستطعم في قهوة تانيه غيرها.. مهند؛تحرم من بعدها القهوة. لطفي بضحكه:خلاص بإذن الله اليوم تكون عندكم وغداكم وعشاكم علينا.. اياد بإبتسامه؛سبقوكم حوش شنيبه.. رفع لطفي حواجبه وهو مبتسم.. اياد؛تلاقيت اني والحاج محمد الصبح.. لطفي:خلاص مالا خل اني نسبق الباقي ونقولك غداك وعشاك غدوة إن شاء الله.. ضحك اياد وربت ع كتف لطفي وقال:ان شاء الله.. لطفي بإبتسامه:هي نستأذكم توا..السلام عليكم.. إياد ومهند:وعليكم السلام.. مشي لطفي... ومهند قال لإياد؛كان خطيت عليهم عيلة شنيبه اليوم.. اياد بضحكه استغراب:علاش.. مهند:استاحشنا ماكلة خالتي سدرة.. اياد ابتسم وقال:ماتاخدش عليها بتولي لغير شارع القهوة.. مهند تنهد بإبتسامه وضرب ذراع بوه بقبضة يده .. كان القصد منها المواساة.. بوه ابتسم بأسف وحاوطه من كتفه وقاله:شن رايك اليوم نفطروا في مكان قنين.. مهند:البحر مافيش غيره.. إياد بإبتسامه:تم... 🌻🌻🌻🌻🌻 وقدام البحر.. كانوا مقعمزين سدرة والفاندي وهما يفطروا ويهدرزوا.. الفاندي بعصبيه؛والله لتوا مامستوعب معقوله في رجاله تفرط في اعراضها هكي..تفي.. بعدين استاقظ لسدرة وقال:سامحيني.. سدرة:معذور ياما دفلت حتى اني.. ضحك الفاندي.. سدرة شبحت للبحر بعدين شبحتله وقالت؛ايهاب... الفاندي:عيوني.. ابتسمت سدرة وقالت:بنستأذنك..نعطي الحوش لفايزة تقعد فيه هالسنه ونص.. الفاندي:الحوش حوشك علاش تاخدي في اذني.. سدرة:حوشنا مش حوشي بروحي.. ابتسم وقال:ياستي عاطيك الاذن.. سدرة وهي مبتسمه بإمتنان:والله عارفاتك حتقول باهي شهامتك ونخوتك مانشكش فيهم حتى شويه.. الفاندي بضحكه:اااه ياقلبي اني وخلاص.. قعدت تضحك سدرة بعدين رجعت تشوف للبحر وتاكل في سندويتشها وايهاب يتأمل فيها.. وكل يوم يزيد يحبها اكثر من اليوم اللي قبله... ☘☘☘☘☘☘ "هدا شنو" سدرة بإبتسامه:مفتاح حوشك.. فايزة بإستغراب:حوشي!؟ سدرة:الحوش اللي جنب حوش جدي.. فايزة بصدمه:قصدك حوشك اللي بتتزوجي فيه بعدين..لالالا سدرة لا.. سدرة:تي خودي واسكتي يامراة..حوشي مش ساكنه فيه كان بعد عام ونص..وفالعام ونص ربك يفرجها عليك من اوسع ابوابه.. فايزة:راجلك يعرف.. سدرة:تي هو يبي اكثر مني وقالي كان تبي اي حاجه تانيه حاضر.. ابتسمت فايزة بحب وقالت:زيك انتي زي راجلك ياسدرة الطيبون للطيبات.. ابتمست سدرة وقالت:طبعا هو يبي تسييقه باهي..ونفشوا فيه اثاثك اللي جيتيه.. فايزة هزت راسها وهي فرحانه..بعدين ضمت سدرة بقوة.. وسدرة قعدت طبطب ع ظهرها وهي مبتسمه.. ☘☘☘☘☘ "اختي" مراد؛ايه..شافني كيف مرتاح معاك قالي شوفلي كان عندها اخت قريبه الراجل حتى هو يبي يخش من الباب.. فرحت عواطف هلبه..واكثر شي فرحها انها واخيرا تقدر تحكي لأختها من غير ماتخاف انها تحسدها.. مراد:شن قلتي؟ عواطف:هو مواليد كم؟ مراد:اكبر من بعامين.. عواطف:اكبر من نجاح... باهي..تو نشوفها ونرد عليك.. مراد:مادابيك تستعجلي.. عواطف بإبتسامه:باهي باهي... ~~~~~~~~~ شهقت بصوت عالي.. جتها شدتلها فمها بيدها وقعمزت حداها وقالت:فضحتيني فضحتيني ياحمارة.. حولت نجاح يد عواطف وقالت:هدا كله صاير من وراي واني مش عارفه!؟ عواطف:خفت نحكيلك.. نجاح:علاش!؟ عواطف:خفت وخلاص..المهم توا قوليلي شن رايك.. نجاح:رايي في شني؟ عواطف:في موضوع ولد خالته.. نجاح:مش عارفه مش خاشلي راس جو العلاقات والتعارف.. عواطف:يبي يخطب ياحمارة مش تضييع وقت هو يوم تمشي معاي فيه وتتعارفوا عجبك باهي ماعجبكش فوتي. نجاح قعدت تفكر بعدين قالت؛هي فرصه وبعد شوق مراجاة جتني...خل نجرب حظي وخلاص.. ضحكت عواطف وقالت:خل نمشي نكلمه.. شبحتلها نجاح كيف مشت وهي متحمسه بش تكلم مراد.. مش عاجبها الجو هدا من زمان وضده تماما.. بس للأسف..انجبرت دير شي ضد مبادئها بسبب الظروف.. ☘وهو اكيد مافيش مبرر للحاجات هادي...بس في نفوس ضعيفه تنجبر انها تمشي في طريق غلط بش توصل للي تتمناه..وناسيين ان النصيب والقسم على الله☘ 🌻وفعلا تحدد موعد اللقاء.. وفي حديقه عامه بعيده عن المنطقه.. كان مراد مقعمز مع عبد الحفيظ... يراجو في عواطف ونجاح.. اللي كانوا جايات ووحده تجر في التانيه.. عواطف؛مش واكلك ياحمارة.. نجاح بقلق:لالا خلاص معاش نبي.. عواطف:يابنت ماضيعيش عليك الفرصه خل نتزوجوا بالله عليك ونديروا حياش ع حالنا ونخدموا رجالتنا..ملينا من خدمة خوتك ونساوينهم ومفرخهم.. تشجعت نجاح وقالت:باهي اطلقيني.. طلقتها عواطف وهي تقول:ايوه سلم وخيتي.. قعدوا يمشوا لين بانوا عليهم.. عبد الحفيظ؛هدا شنو!؟ مراد:خيرك!؟ عبد الحفيظ:شن ماتشبحش ولاكيف شوف لبسهم ومناظرهم والله تقول نداد امي وامك.. مراد:تي شن بدير بيها انت عندك مصلحه من وراها ديرها وبعدين قول ربي يعطيك خير مني.. سكت عبد الحفيظ وهو مضايق.. وصلوا فيهم.. عواطف بإبتسامه عريضه:شن جو.. مراد:بشوفتك حلو. شبحت نجاح لمراد من فوق لتحت.. وعبد الحفيظ يشبحلها بربع عين.. مراد:اختك؟ عواطف:ايه نجاح.. عبد الحفيظ ابتسم وقال:اهلا وسهلا ابله نجاح.. نجاح:اهلا.. مراد:ترا تعالي عواطف.. عواطف شبحت لأختها وعبد الحفيظ بإبتسامه بعدين مشت مع مراد وهي تقول:باهي.. نجاح فنصت فيه وجبدتها من بلوزتها من تحت:وين ماشيه.. جبدت عواطف بلوزتها وفاتتها.. نجاح:عواطف..هييي..بس..يابنت.. وعواطف تباعدت هي ومراد.. شبحت نجاح ع جنب لقت عبد الحفيظ يشبحلهاوهو شاد ضحكته.. غير نظرها عنه ومشت قعمزت.. هو تنهد بعدين مشي قعمز جنبها بمسافه.. هي حطت شنطتها في حجرها وضمتها وقعدت تشوف لعواطف كيف تضحك وتهدرز مع مراد.. وهي يوزع في نظره ع المكان بعدين شبحلها وقال:شن حالك.. نجاح شبحتله وقالت؛ولد خالتك هدا كويس.. عبد الحفيظ صدمه السؤال.. نجاح:خايفه منه الحق يكون يضحك على اختي.. حس بالضيق وزاد لما انجبر يكذب وهو يقول:كويس هلبه مراد ويبي اختك بجديات.. نجاح تنهدت وقالت؛ان شاء الله.. هو قال:باهي شن حالك.. نجاح:اهو ماشية والحمدلله.. عبد الحفيظ ابتسم بالسيف وقال:غ فكرة لفتي انتباهي هلبه لما جيتي..قنينه وانيقه هلبه ربي يحفظك.. نجاح ضحكت وقالت:لا عاد فكنا منه الجو هدا..اني لاقنينه ولاانيقه ولبسي صح مرتب لكن مش ع الموضة..فوفر ع نفسك من توا.. انصدم عبد الحفيظ وقال:مش واثقه من نفسك لهالدرجه!؟ نجاح:في فرق بين اللي واثق من روحه وعارف روحه..واني انسانه متصالحه مع نفسي وعارفه روحي لاني جميله ولاانيقه..لكن مدرسة ممتازة وست بيت ممتازة وعندي لغة والحمد لله..يعني اني خير من هلبه يدوروا هني ملكات جميلات ويلبسوا اخر موضة.. عبد الحفيظ:عندك لغه؟! نجاح:ايه انجليزيه.. عبد الحفيظ:ماشاء الله.. نجاح؛باهي انت شن وضعك في الحياة... عبد الحفيظ بتردد:اني واخد شهادة في هندسة الدكيور لكن ماحصلتش خدمه بشهادتي....وتوا نخدم في صالة ملابس.. نجاح قعدت تفكر بعدين قالت:عندي حد معرفه يقدر يخدمك في الموضوع.. هو تفاجئ.. نجاح:صاحبتي راجلها واصل متأكده حينفعك في موضوعك..اسمع انت تعالالي المدرسه اني نقري في مدرسة******وجيب معاك ملفك وخلي الباقي عليا. عبد الحفيظ:جديات.! نجاح بضحكه:مالا بصارة..اهو حتى كان ماصارش نصيب نتفكرني بحاجه باهيه.. عبد الحفيظ؛وعلاش مايصيرش نصيب؟! نجاح:الصراحه الصراحه وخيي اني اختي جايبتني بالسيف عليا مش مقتنعه الحق بجو العلاقات والتعارف هدا علاش بنقولك بننهي الموضوع قبل يبدا.. عبد الحفيظ قعد ساكت وهو متفاجئ ومش عارف شن يقول.. نجاح؛ووعد مني نتملك موضوع انت غير تعالى للمدرسه تعالى حتى غدوة..اني موجوده طول الدوام.. وناضت وقالت..فرصه سعيده وان شاء الله تلقى خير مني.. ومشت طول.. وهو يشوفلها بعدم استيعاب.. بعدين قعد يردد في اسم المدرسه اكثر من مرة بش يحفظه وهو يشوفله.. خدت نجاح عواطف غصب عنها وروحوا.. ومراد جي لعبد الحفيظ قعمز جنبه وقاله:دارت فيا معروف وفكتني منها...شبحله وقال..هاه شن صار معاك.. شبحله عبد الحفيظ وقال بإبتسامه:كله ماشي تمام.. ☘☘☘☘☘ تاخد في حوايجه من ع الشماعه وهي تقول.. مطيرة:شامس.. الشامس وهو يقرا في كتاب:نعم.. قعمزت ع السرير وقالت:اشبحلي.. نزل نظاراته والكتاب وشبحلها بإبتسامه وقال:نعم.. مطيرة بإبتسامه:في بالي موضوع ليا مده نفكر فيه ونبي نا رايك.. الشامس:اللي هو.. مطيرة؛ياسيدي الدكتور اياد تعرفه.. الشامس:ايه خيره.. مطيرة:بعد توفت اميمته ياناري قعد هو ووليده برواحهم ماعندهم من يطيب ولايضم ولايونس..فقلت هكي نبي نلقاله بنية حلال هو الحق في بالي وحده بس بناخد رايك.. الشامس بإستغراب:نعرفها!؟ مطيره:ايه ناديه.. الشامس:من ناديه!؟ مطيرة:ناديه اخت ميلود.. انصدم الشامس.. مطيرة:خيره عيونك قريب طلعوا..عندهم مشكله العيله!!؟ الشامس وهو مرتبك قال:لافاجئتيني بس..ع حسب مانعرف ان امها ماتعطيهاش لبراني.. مطيرة:نعرف لين خلتها قعدت في رقبتها مسكينه..لكن اني بنجرب نحكيلها.. قاطعها وهو يقول:لالالا.. استغربت مطيرة هلبه وقالت:علاش!!؟ الشامس وهو يحاول يخفي ارتباكه؛خل نكلم خوها قبل يقنع امه..مرات كان تقوليلها دير مشاكل مع امها.. قعدت تفكر مطيرة بعدين قالت:عندك حق..خلاص كلمه فيسع ورد عليا.. ابتسم بإرتباك وقال:باهي.. ورجع لبس نظاراته ورفع الكتاب.. وهي ابتسمت وناضت تغني.. يانجيلي زول الخمسي.. شبحتله وضحكت.. وهو ضحك بالسيف.. بعدين طلعت.. هو غمض عيونه بشده بعدين فتحهم وهو في قمة الخوف والقلق.. وجاه احساس قوي ان اللي سعي جاهدا يخفيه خلال 11 سنه حيطلع عن قريب... ☘☘☘☘☘ ...بعد اربعة ايام..... فتحت باب الحوش وقالت.. "بسم الله" وابتسمت ابتسامه راحه وين شافت للحوش من داخل بعدين شبحت لبناتها وقالت؛هي خشوا ماما.. خشوا البنات يجروا وهما يقولوا بفرح؛حوشنا الجديد.. وهي ابتسمت وخشت بعدهم وسكرت الباب.. وقعدت تمشي وهي تقول:وين مشيتوا...صفاء مروة...تولي... يابنات وينكم.. وين وصلت في الصاله انخلعت وحطت يدها ع قلبها... لما سمعتهم قالوا... "سور برايز" بعدين ضحكت وقالت؛خلعتوني ياعطيكم الهني... كان في الصاله طاوله طويله.. عليها تورته وكل مالذ وطاب... وحواليها صاحباتها..وفردوس..واميمه وطوبى وبنات فردوس معاهم بناتها... جوها صاحباتها بالوحده وقعدوا يسلموا عليها ويهنوا فيها.. عائشه..وسدرة..ونسرين.. اللي سيقوا معاها الحوش ونظفوه.. وفرشوه مع بعض.. واليوم حبوا يديرولها شي حلو يفرحها ويمسح شويه من الحزن عن قلبها..واهم شي يحسسوها انها مش بروحها.. بعدين جتها اميمه وسلمت عليها وعطتها هديه بمناسبة الخشة للحوش.. وطوبى وباقي البنات سلموا عليها حتى هما. هي بعدين حولت لبس الحداد.. وخشت معاهم وقعدت تضحك معاهم وتبصر.. بس ماكانتش زي فايزة الاولى ضحكتها ناقصه.. وابتسامتها باهته..ونكتها تنقال بنبرة فيها حزن... ☘☘☘☘☘ وفي يوم تاني.. جي عبد الحفيظ للمدرسه اللي تخدم فيها نجاح ومعاه ملفه.. سأل عليها..ووحده من الابلات مشت تناديهاله.. هو قعد واقف يراجي فيها... لين بانت عليه وهي جايه ومعاها الابله اشترلها عليه. شبحاته..هزت راسها ومشتله.. هو لما شافها جايه...حس بشعور سعاده ماعرفش سببه.. وصلت فيه وقالت بابتسامه:اهلا.. عبد الحفيظ بإبتسامه:اهلا بيك..كيف حالك.. نجاح؛حال امتحانات االدور التاني والمراقبه نراجي في شهر 8بفارغ الصبر.. عبدالحفيظ؛عطلتكم .. نجاح بضحكه؛ايه..شبحت الملف وقالت..ملفك.. هو شبحله وقال بإبتسامة احراج؛ايه.. نجاح مدت يدها وقالت:هات.. هو مده وهي خداته وقالت:خل نمشي نلحق على الابله ونعطيها الملف كلمتها ع موضوعك قالتلي جيبي الملف وكوني هانيه.. عبد الحفيظ بإبتسامه؛بارك الله فيك.. نجاح:المهم ماتزعلش مني لاني صكرت الموضوع خيرها في غيرها ان شاء الله.. يدوب ابتسم وهز راسه.. نجاح بإبتسامة:نستأذن.. عبد الحفيظ:لحظه... شبحتله وهي ساكته.. عبد الحفيظ:كيف بنعرف شن صار.. نجاح:عن طريق اختي هي توصل لولد خالتك وهو يقولك.. كان يبي ياخد رقمها وهي قطعت رقبة هالفرصه.. ابتسم وقال:تمام..سلام.. ولف بيمشي.. مشي كم خطوة بعدين وقف والتفت... لقاها واصله اخر الممر وطالعه منه.. تنهد بضيق..بعدين لف ومشي..... ☘☘☘☘☘☘ وفي نفس اليوم طلعت نتائج امتحانات الكليات... وكانوا اميمه وغرفه يراجو في نتايجهم بخوف.. بالذات غرفه..
#الناس_اجناس #طوبى
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
