#طوبى "جنة طوبى"
#جمان_فريد
#الجزء_الرابع_والستين"رسالة أخيرة4"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃البغض هو انتقام الجبان.🍃
____________________________________________
الساعه 7:00مساءا..
كانت فايزة تحط في لمساتها الاخيره ع طوبى..
كملت وقالت؛صحه..
طوبى بإبتسامه مجامله؛سلمك..
ناضت وقفت وشبحت لفايزة وهي تقول..
فايزة..اني مانبي حد من العيله يعرف قبل لنقوللهم تمام؟
هزت فايزة راسها وقالت؛تمام..وانتي الليله لازم تقولي لراجلك الليله..
طوبى:اكيد صدقيني خلاص معاش نقدر نأجل أكثر من هكي بنخش الخامس..
شافت فايزة لبطنها وقالت؛تعرفي مش واضحه بكل شكلها جاية مربعه مش باينه مع زياده وزنك..الباين والله اعلم..
طوبى بقلق:شني؟
فايزة؛هو الكلام اللي بنقوله توا مش قاعده بس غالبا لما يكون شكل البطن هكي الجنين يكون بنت..
ارتسمت ع وجه طوبى ابتسامه حلوة..
حطت يدها ع بطنها وقالت..
زعمه!؟
فايزة بإبتسامه؛اني هكي كنت لما حملت ببناتي وع العموم زي ماقتلك مش قاعده..
طوبى بإبتسامه أمل؛ان شاء الله تجيني جنه..
فايزة؛بتسميها جنه؟
وهي مبتسمه قالت؛بوها يبي يسميها جنه..
ابتسمت فايزة وقالت:ان شاء الله تجيكم جنه وتخلي حياتكم كلها جنه..
طوبى:يارب تكون حياتها هي جنه..
فايزة قعدت تشوف لملامح وجهها واستشفت منهم ان طوبى مش مرتاحه في زواجها..
ولأنها خصوصيات ماتقدرش تسألها عن الشي هدا الا اذا هي حكت..
طوبى:خلاص وقت الدنيا ليلت..
ومشت خدت العبايه متاعها وقعدت تلبس فيها..
فايزة؛شويه وجايه..
ومشت دير في دورة ع المركز..
وطوبى تلبس في عبايتها..
بعد كملت..لبست الكندرة الحاطيه اللي خدتها للقفطان المغربي اللي كانت لابساته حتى هو..
شويه جتها رنه من اريج..عرفت ان حسين جي ويراجي فيها لوطا...
خدت شنطة في حوايجها..وشنطه يد متاع مناسبات للقفطان حطت فيها التليفون..وقالت..
تصبحوا ع خير..
ردوا عليها العاملات..وفايزة جتها بسرعه...
مدتلها كيسه وقالت؛هادي الهديه متاعي ليها اعطيهالها انتي مرات معاش نحصلها..
طوبى خدت الكيسه وقالت:تمام..هي السلام عليكم..
ومشت..
وفايزة مشت وراها وهي تقول:وعليكم السلام..
طلعت طوبى من المركز ونزلت تحت..
لقت السيارة قدامها..
نزل حسين بسرعه ومشالها خدي من الشنطه..
هي انحرجت ومشت طول لباب السيارة الخلفي..
فتحتلها آلاء الباب..
وركبت جنبها..دخلت العبايه داخل وسكرت الباب..
حسين بعد ما حطت شنطتها في الكوفني..
مشي ركب..
اميمه:شن جو بيبو؟
طوبى:تمام الحمد لله..شن جوك انتي..
اميمه بإبتسامه؛تمام..
تحرك بيهم حسين وهو يقول؛ان شاء الله نوصلوا بكري مع الزحمه..
اميمه:صح الوقت هدا زحمه بشكل بالذات في الطريق اللي ترفع للصاله..
نخصت الاء طوبى وقالتلها بصوت منخفض..
وريني مكياجك..
نخصتها اريج وقالتلها..
ريحي جمالك بلا عار..
وطوبى وهي مدرقه وجهها بالخمار كانت تضحك..
وبعدين ساد الصمت..
ووسط هالصمت..شغل حسين الراديو..
والقناه اللي كان عليها..
كانت جايبه اغنيه..
"ماأقدرش أنساك"
حسين علا الصوت شويه وخلاها..
اميمه شبحتله بإستغراب شديد..
اول مرة يديرها ويسمع اغاني عاطفيه في حضورها هي والبنات..
وهو سارح مع الأغنيه..
ومع الأسف..سارح مع اللي كلمات الاغنيه تعنيها هي..
بدت ع وجه اميمه ملامح الضيق..
غيرت عيونها عنه وشافت القدام..
☘وفي الخلف..
كانت اريج تسمع في الاغنيه وهي منسجمه معاها وتفكر في نضال وأيامها الحلوة معاه..
تنهدت وهي مبتسمه بعدين رفعت تليفونها وحاطته تحت الخمار...
وقعدت دور ع الأغنيه..وبعتت مقطع منها لنضال..
🍃هو وقتها كان موجود في القهوة..
مقعمز يتفرج ع الشاشه المعلقه قريب من السقف ع قناة رياضيه..
جاته رساله..نزل عيونه لتليفونه وخداه من ع الطاوله..
لقي رسالة ماستجر وصلاته منها..
طول فتحها..لقاه مقطع صوتي..
حط السماعة وفتح المقطع..
وقعد يسمع في الاغنيه..
بدت ع وجهه ابتسامه حب واضحه وسرح بخياله فيها وهو يسمع...
🍃وآلاء في السيارة..
كانت تسمع فيها...وبين عيونها ذكرياتها مع مهند..
حاولت بكل قوة تمنع دموعها من النزول لكن ماقدرتش..
نزلوا غصب عنها...
🍃واحيانا تتحرك في قلوبنا مشاعر حنين لأشخاص طلعاتهم من حياتنا ورجوعهم امر مستحيل..
لكن تجينا ذكريات الايام الحلوة تخلينا نتفكروهم ..
زي ماصاير لأميمه توا..
واللي قاعده لهاللحظه متمنيه لو ماكانتش لقصتها هي وعمر نهاية سيئة تخليها تكره قلبها اللي حبه وقاعد يحن ليه..
بس..طوبى..
وهي تسمع في كلمات الأغنيه..
خطر عليها شخص واحد بس..حنتله اشتاقتله وماقدرتش تحب حد زيه في حياتها كلها...
هالشخص هو..او هي..اختها سدرة...
🍃تبعد وتغيب..ألاقيك عايش جوايا ودايما مني قريب
تبعد وتغيب مايحنش قلبي لغيرك ولايتمنى حبيب
ده انت حياتي وعمري فداك..ياللي عرفت الدنبا معاك
عمري حعيشوا لمن غير ليك..ياحبيبي ياأحلى ملاك🍃
واحلى ذكريات العمر من الطفوله لأخر لحظاتهم مع بعض..
مروا قدام عيونها...
دموعها غلبوها وهي تقول في قلبها..
"قداش استاحشتك..قداش محتاجاتك..قداش حياتي موليه ظلام دامس من غيرك ياريت اني اللي غبت ولاأنتي"
فاقت من تفكيرها في اختها..
لما حست بتليفونها يهز في شنطتها..
فتحتها وطلعاته..
حطاته تحت الخمار و شافت رساله وصلتها من الجالي..
فتحتها طول..
(اني طلعت برا طرابلس شغل روحي مع ماليك)
صوت حاجه انكسرت..
ماسمعه حد غيرها....
لأنه كان صوت كسر الاحلام اللي رسمها خيالها عن هالليله اللي توقعت تكون ليلة مختلفه في حياتها...
احباط رهيب حست بيه لحظتها...وثقل رهيب انحط ع صدرها..
وقعدت تتسائل بحيره وخوف..
"علاش قاعد يصير هكي ياربي..علاش"
🍃🍃🍃🍃🍃
وفي حوش محمد شنيبه..
كانت خديجه عند ماليها تحكيلهم عن سفرتها للمالديف وتوريلهم في الصور..
راما:مادخليش ماما بعد تم المدرسه بتسفرونا..
خديجه بضحكه:إن شاء الله..
مغليه وهي تشوف في الصور في تليفون بنتها:هدا الراجل المقوم اللي يدور ع راحة مرته وهناها..
ابتسمت خديجه..
ع خشة نسرين وهي تقول..
رموشه حطي ع قناة***** خالك الجالي فيها..
نزلت مغليه التليفون وقالت وهي متفاجئه وملهوفه..
حطي بسرعه بنتي حطي..
وحطت راما ع القناه..
وجي قدام لقاء الجالي..
مغليه:الله يبارك ع وليدي الله يبارك..
وقعدوا يسمعوله ويشوفوا فيه كيف يتكلم..
خديجه بفخر؛الصلاة ع النبي..
بعد ماتم اللقاء قعدوا يوروا في لقطات للمؤتمر..
جت لقطه فيها نجاة..الكاميرا كانت مركزه عليها..
نسرين التفت وشافت لخديجه..لفتها تشوف للتلفزيون ببغض..
مغليه؛نجاه هادي ولا؟
نسرين:ايه يام هي..
مغليه:مش معاش تخدم معاه؟
نسرين:ايه يام لكن المؤتمر هدا للمهندسين في طرابلس كلها .
مغليه وهي تتفرج:اها..ابتسمت بفخر وهي تقول..شوفوا الجالي شوفوا..الله يبارك ع وليدي ديما رافع راسي ومشرفني..
تم التقرير...
ونسرين مشت قعمزت وهي تقول:الله يبارك عليه اكثر شي عاجبني فيه انه يحب يطور من روحه ويحتك بالناس اللي تكبر منه..
خديجه:في الخدمه ديما دماغه يخدم صح..
مغليه بضيق: لكن الباهي ماتكملش معاه نحساب روحي وين زوجته تهنيت عليه لكن حظه ماطلعش خير من حظ خوته..
نسرين بضيق:وخيره حظه يام..عنده مراة زي الورده قايماته وحطاته في عيونها مامنقصه عليه شي..
خديجه؛لا منقصه عليه وهلبه..مش شايفه شكلها كيف مولي ريتيها في حفلة نجاح كيف طالعه غير مابيتش نكبرها راهو وصلت الدوة لراجلها..
نسرين؛خيرها كيف طالعه!؟ زي الغزاله..وكانك ع السمن ع الدسكه اللي شادينها كلنا مرينا بنفس الحالي بعد ماتزوجنا ولاناسيه روحك كيف كنتي!؟
خديجه؛اني حملت طول ماتزوجت حبيبتي هدا علاش سمنت لكن هي شن اللي خلاها هكي غير الاهمال ..
مغليه:الحق الحق يانسرين طوبى ماكانتش هكي المده الاخيره ولت مهمله وواضح مش مريحه خوك..
نسرين:كلكم عارفين شن صاير فيهم..
مغليه بنرفزة:هالغناوة اللي شادتيها..اهم اليوم عندهم وماشيين الصاله يهيجوا..
خديجه؛اللي مغير طوبى حد قاعد يلعب بدماغها..
مغليه؛عليك نور..هدا اللي في عقلي..
عقدت حواجبها وقالت بتساؤل:قصدكم اميمه؟
مغليه؛مافيش غيرها هالعقرب خربت ع روحها وتبي تخرب ع غيرها..
نسرين سكتت وهي تفكر في كلامهم..
خديجه رفعت حاجبها وقالت؛لكن قعدت هكي بتخرب ع روحها..
مغليه بقلق:لاان شاء الله لا..سادتني قهايري في الاولين اني كان تأكدت ان في حد قاعد يلعب في راسها تو نشدها ونعقلها وانتي ياخديجه كان تبي رضاي يابنتي اطلعي منها راهو بوك ع شعره منك..
خديجه؛عارفه كيف حاطين الهم كله فيا اني واني المرة مش حندخل بكل ونشوف شن يصير...
مغليه:ان شاء الله مايصير كان الخير ياربي..
نسرين قالت؛يارب..
وهالحديث هدا كله كان ع سمع راما اللي مركزه ع كل شي..
🍃🍃🍃🍃🍃
وفي صالة حفلة زفاف نبيله..
ماكانش في عدد كبير من الحضور..
الاقارب بس..
خالات بنات الواعر ونساوين خوالهم وبنات العيله..
وعيلة نبيله وعبد الرؤوف وع راسهم عمتها وبناتها..
لما تلاقوا بنات الواعر مع عيلة امهم كان اللقاء جدا بارد..
وكأنهم برانيه ع بعض..
وهدا كله ع عيون عمة نبيله اللي تأكدت ان علاقتهم ببعض مش قويه..
ووسط هدا كله..
كانت "لميس" بنت عمة رؤوف ونبيله تستعرض بروحها...
وغرفه قريب طق غيره منها...
☘آلاء:روفتي انتي احلى منها بمليون مرة راهو ماتعبريهاش..
غرفه بغيرة:اني عارفتها ترسم ع شوفته السفتوله هادي..
اريج بضحكه:لااطمني مادام روفا فاتها واختارك مستحيل يشبحلها..
رفعت غرفه حاجبها وقالت؛شن قصدك!؟
ضحكت اريج..
والاء فنصت في اختها...
🍃وفي الطاوله اللي في جنبهم..
كانوا صفيه ومطيره وفردوس مقعمزات مع بعض ويهدرزوا..
فردوس بتهكم؛عروق الام يالحنونات..عليا ديما نشادات..
الله يرحمك ياإميمتي..
مطيره؛ماتقهريش روحك يادوسه مش جديد عليكم من حياة امك وهما هكي..
صفيه؛شوفيهم مع بعض كيف تقول برانيات ع بعض ماتقولش خوات بكل مش عارفه وردة الله يرحمها والمحجوب لمن طالعين..
فردوس ودموعها في عيونها؛الله يرحمها كانت تربي فينا حب بعض كانت تقوللنا خلوا قلوبكم وحسوا من بعض ماكانتش تبينا نولوا زيهم..
مطيره:الله يرحمها..خلاص بنتي سكري ع هالسيرة مش جايين نتنكدوا حني...
هزت فردوس راسها موافقه لكلام عمتها ودست حسرتها في قلبها...
🍃وبعيد عنهم..
في زاويه من زوايا القاعه..
كانوا اميمه وطوبى واقفات ع بعض يتكلموا..
طوبى بضيق شديد؛مش عارفه علاش يصير هكي والله ماعارفه..حطت يدها ع صدرها وقالت..حاسه بشي مش عارفه كيف..لكن يخوف ياأميمه..
حطت اميمه يدها ع كتفها وقالت:هدي حبيبتي هدي..حتى الحمل ليه دور يلخبط هرموناتك ويخليك تبالغي في كل شي..
طوبى وهي تشوفلها بتساؤل قلق؛تقولي هكي؟
اميمه؛مش اني العلم ياطوبى..
نزلت يدها وقالت بتنهيده قلق:ان شاء الله خير..
اميمه؛هي خلاص تعالي نقعمزوا..
طوبى هزت راسها بعدين مشت هي وياها وقعمزوا ع الطاوله حدا البنات...
شويه وناضت غرفه من حداهم..
والبنات يتبعوا فيها بعيونهم وهما يراقبوا في بنت عمة رؤوف كيف تشبح لغرفه..
آلاء:كان نوضلها نفقصلها عيونها..
اريج؛هدي ياوحش..
شبحتلها آلاء بطرف عينها..
أميمه وهي تشوف للبنت قالت:اني مش عارفه النوعيه هادي كيف يفكروا الراجل متزوج ويحب مرته وحامل بصغارهم شن تبي منهم!؟
آلاء؛خرابات البيوت خطافات الرجاله..ياتلقيها بنت في العيله ياوحده تخدم معاه..يابنت جيرانهم ياصاحبة اخته والموضه جديده توا ارملة الخو..
شبحت اميمه لطوبى..
لقتها سرحانه وتبان مش معاهم بكل..
اريج:اني النوعيه هادي بالذات واكلين ع كبدي وشاربين من حقارتهم يتسغلوا في صغارهم بش يوصلوا اللي يبوه..تفي..
اميمه؛هو مافيش مشكله لو حبت تقعد في العيله تحط عينها ع واحد عزابي مش متزوج..
الاء؛تريح عظامها وتربي صغارها بلاقرف..ماتت فايزة اللي قعدت ع بناتها اللي ع قد ماجوها خطاب رفضت وربت بناتها بروحها وماصارلها شي..
اريج؛مش الكل يقدروا ياآلاء..
الاء:لاكلهم يقدروا اهي ماما قدرت..
اريج سكتت وهي مضايقه..
واميمه قالت:خلاص سكروا ع الموضوع..
فجأة..
سمعوا وحده من موظفات الصاله تقول..
اللي عندها صغار تشدهم العروسه بتخش..
وناضت اللي عندها صغار قعمزتهم حداها..
وشويه..
وشغلوا اغنيه "على النبي صلوا"
اللي خشت عليها نبيله صاحبه الطله الراقيه المناسبه لعمرها..
فستان ابيض "جوبير" كم تلاته ارباع..وطوله للركبه..
ولأن جسمها كان رشيق طلعها بصورة جدا جذابه..
شعرها مرفوعه رفعه بسيطه..ومكياجها ناعم وغير مبالغ فيه..
مزين رقبتها ووذانها عقد واقراط لؤلؤ...وفي رسغ يدها اليمين خاتم وانسيال لؤلؤ وشاده بيها الباقه باقه بسطه لون وردها كله احمر..
كانت المصورة تاخدلها في الصور وهي مبتسمه ابتسامه صغيره باديه ع وجهها..
الكل عجبتهم طلتها لأنها كانت مناسبه جدا وراقيه..
آلاء:محلاها المراة هادي محلاها راقيه هلبه..
اريج:توقعت طلتها تكون هكي الراقي يقعد راقي..
واميمه تشوفلها بإبتسامه اعجاب..
اما طوبى وهي تشوف لنبيله..
خطرت عليها سدرة..وتخيلت لوكان اليوم عرسها هي وإياد تخيلتها تطلع اجمل واكثر جاذبيه من نبيله..
تخيلت فرحتها بيها كيف حتكون..
سدرة كانت حتعيش فرحة العمر لأول مرة زي ماقاعده تعيشها توا نبيله..
لكن توا هي عايشه ع حافة العمر....
محسوبه عليها الأيام اللي قاعده تعدي من هالعمر وهي ماعاشتش منهم لحظه وحده..
ابتسمت وين شافت غرفه واقفه جنب نبيله وهي تبوس فيها والمصورة تاخدلهم في صورة..
وقعدت تتأمل في السعاده اللي ع وجه اختها ودعت في نفسها..
"يارب ماتوريها اللي ريناه يارب وحده فينا بس تقعد عايشه مرتاحه"
🍃🍃🍃
وبدت الحفله..
وبنت عمة نبيله كانت اول من شارك..
وكان قصدها بس انها تغيض غرفه...
وغرفه لأنها ماتحملتش..
ناضت وهي تقول؛هاتي وشاحك آلاء..
طوبى فنصت وهي تقول:شن بديري..
غرفه وهي معصبه؛مانبي حد يكلمني اسكتوا كلكم..
وخدت وشاح الاء وحزمت ومشت للمسرح..
وكلهم يشبحولها..
وقفت ع المسرح وبدت ترقص..
ولفتت انتباه الجميع..
مطيره:خير بلاها هادي!!؟
فردوس:بالله نوضيلها عمتي اجبديها مش شعرها..
ناضتلها مطيره..
شافوها وهي ماشيتلها..
طوبى؛جتها اللي تقدرها..
ضحكوا البنات..
☘وغرفه في عز انسجامها شدتها مطيره من مرفقها وهي تقوللها في وذنها..
تبيهم يطرشقوك يامتخلفه..
وقفت غرفه وقالت؛حي عليا والله مافكرت فيها..
وفكت الوشاح ومشي مع عمتها اللي نزلتها وهي تقول..
ربي يثبت علينا عقولنا ياربي..
🍃ونبيله تشوفلهم وهي تضحك..
☘☘☘☘
وعند العريس..
كان في قاعة خاصه بالرجاله..
والحاضرين شخصيات مهمه وبارزة..
لهدا جو الحفله كان جدا رسمي...
بس المحجوب اللي كان ديما يتقن اخفاء شخصية الطفل اللي في داخله فرحان فرحه لاتوصف وكان يلقى توا يتخطى هدا كله وياخد نبيله ويسافر بيها بعيد ومعاش يشوف من البشر حد غيرها هي...
لكن فرحة خوها عبد الرؤوف بيها تقعد الأغلى...واخيرا طمن ع اخته الوحيده...
🍀🍀🍀
ومرت الساعات..
ووصلت الحفله لمشارف الختام..
وكان ختامها رقصة لنبيله مع البنات ع اغنية لفيروز شبيهتها.."سهر الليالي"..
فرحوا بيها وفرحوها...
وبعد حياة عزوبيه دامت لسنين طويله..
عاشت نبيله احلى فرحة عمر...
☘☘☘☘☘
في الطريق..
في السيارة عاليه مظلمه..
يسوق فيها سواق..ووراها زوز سيارات مرافقه..
كانت متوجهه للمطار...
☘نبيله؛مفروض قتلي بنسافروا في نفس الليله بش نسلم ع مبروك.
المحجوب:هييه بنت مافيش عروس تشوف خوتها الابعد العرس بعام..
هي بضحكه:نحكي جد..
المحجوب؛واني مانبيش جد..جدودي الزوز دافنهم من30عام..
نبيله بضحكه:محجوب..
هو بإبتسامه خبيثه؛ناديني جوبا احلى..
شبحتله بربع عين وهي تقول:محجوب..
بضحكه قال:نتفكر في الحركات اللي ديري فيها لما كنتي تسمعي في وصال المنمشه تنادي فيا بيه..
نبيله بإزدراء:ماتقرفنيش..
هو قال؛كنت مغيار هلبه ياحلو..
ابتسم وشافت للروشن..
المحجوب:هني هني..
شبحتله..
اشر ع نفسه وقال:اشبحيلي اني وبس..مش سادني السنين اللي فاتت عليا واني متحسر عليك..
ابتسمت بتعاطف وعيونها تعبوا دموع..
ضحك وقال؛تعرفي مرات نتخيل اللي حني فيه احلام قايله..
قعدت تضحك..
وهو يتأمل في ضحكتها بإبتسامه حب...
وكملوا باقي الطريق وهما يهدرزوا ويضحكوا لين وصلوا للمطار..
كان قاعد ع رحلتهم عشرة دقايق بس..
وبعد عشرة دقايق طلعت رحلتهم في وقتهم..وتوجهوا لإيطاليا...البلاد اللي كانت نبيله زمان تتمنى تسافرلها مع المحجوب..
☘اجمل الأحلام هي التي تتحول إلى واقع في آوانها☘
🍃🍃🍃🍃🍃
حط المفتاح ع الزيانه وتنهد من وسط قلبه..
هي قعمزت ع السرير وشافتله بإبتسامه وقالت..
روفا..
شبحلها..
غمزتله وهي تتسائل..
بمعنى "شني!؟"
ابتسم ومشي قعمز جنبها وقال..
تعرفي..هو صح اني كنت نراجي في اليوم هدا..بس لما جي مش عارف كيف حسيت..زي اللي ندمت اني عطتيها مافي حد يقدر يرد باله عليها اكثر مني ولافي حد يقدر يحبها اكثر مني..اني خوها وهي اختي..دمي ولحمي مايقدر حد يحس اكثر مني..
غرفه؛ع هكي بابا مفروض يقول كلامك هدا..
شبحلها وضحك نص ضحكه بعدين قال..
عمي لطفي مش حيلقى راجل يرضى بيك ع بلاويك غيري اني..
غرفه بزعل: باهي..وجت بتنوض من حداه..
شد يدها وهو يضحك قال..الحمل هدا مشكله والله خلاك حساسه بعد ماكنتي حيط..
هو قعدت تجبد في يدها وتقول:حول يده رؤوف حول..
شدها من يدها التانيه وقال بضحكه:خلاص والله خلاص..نحبك..
قعدت مبوزه..
هوقال..نموت فيك..
ابتسمت ابتسامه خفيفه..
هو قال..حياتي..
توسعت ابتسامتها..
هو قال..عيوني..وروحي وقلبي وكبيدتي..
ضحكت بخجل..
ضحك وقال...وعجيلتي..
فنصت وشبحتله وهي تقول..
عجيلتي!؟
هو قال..ايه..بنت البقرة مش يقولولها عجيله..
تبدلت ملامح وجهها للغضب..وقعدت تضرب فيه..
وهو طاح ع السرير وقعدت يتلقى في الضرب وهو يضحك ويقول..
عجيله..ثويره..ديناصورة..
وصلها عندها حدها..
شد يده وبغل غلها عضتها..
وهو قال بصدمه ووجع..
ااه..يامتوحشه...
☘وكملوا ليلتهم وهما يتناقروا بعدين هدرزوا ع اللي صار في الحفله لين جاهم النوم ورقدوا..
🍃🍃🍃🍃
وفي نفس الوقت..
في حوش لطفي..
بعد ماروحوا وبدلوا حوايجهم وصلوا صلاتهم..
خشوا بيرقدوا..
ماعدا طوبى اللي ناداها بوها..
🍃طوبى:نعم بابا؟
لطفي:ينعم عليك بابا..بنسألك علاش الجالي ماجاش للفاتحه؟
طوبى وهي تحاول تخفي ارتباكها..
جاته خدمه مفاجئة برا طرابلس...
لطفي هز راسه وقال:اها..باهي ربي يعاونه..خلاص بنتي خشي ارقدي..
طوبى:ماتبي نديرلك شي قبل لترقد..
هو ابتسم وقال؛لاصحيتي بنتي خشي ارتاحي..
يدوب ابتسمت وهي تقول؛حاضر..تصبح ع خير..
هولف ومشي للمربوعه وقال؛قدامك كل خير..
هي بعد مااختفي من قدامها..
بدت ع وجهها ملامح الضيق..
بعدين مشت خشت للحوش..
تلاقت مع عمتها اللي قالت..
يبي حاجه بوك؟
طوبى:لا مايبي شي..
مطيره؛باهي خشي ارقدي..
طوبى؛حاضر..
ومشت مطيره خشت لدار المعيشه وسكرت الباب..
وطوبى حست روحها ماتبيش تخش للدار..
غير طريقها ومشت خشت للصاله..
طفت ضيها ومشت قعمزت تحت الروشن متاعها وهي تشوف للسمي المظلمه والمليانه نجوم..
غمضت عيونها ونزلوا منهم دموعها..
وقالت بنبره ألم..وبهمس..وتعب...
"يارب..."
🍃🍃🍃🍃🍃
وفي مكان بعيد عن طرابلس..
تحديدا مصراته..في شاليه من شاليهاتها..
كان الجالي مقعمز قدام البحر...
وهو يشوف للتليفونه اللي موجهه لوجهه..
كان يفكر ويفكر ويفكر..
وبعد تفكير..حسم امره..
واتصل بيها...
🍃هي كانت مقعمزه في دارها..
حاطه السماعات في وذانها وتسمع في اغنيه طليانيه يحبوها هي وياه..
كانت تغني معاها بصوت منخفض ودموعها ينزلوا..
وهي تتفكر في كانوا يرقصوا عليها ويغنوا مع بعض وهما في تونس..
قطع الاغنيه..الاتصال..
استغرب وقامت التليفون..
لما شافت المتصل لقاته رقم غريب..
قلبها دق بقوة...كانت متأكده انه هو...
وماقدرتش تمنع نفسها انها تفتح الخط..
بمجرد مافتحاته..
سمعاته يغني في اغنيه طليانيه تانيه هي تعرفها وتحبها..
كان يغني بصوت حرك مشاعرها بقوة..
خلاها قلبها بيفر وبيطلع من مكانه لدرجة انها حطت يدها عليه وقعدت طبطب بخفه وكأنها تحاول تهديه..
وهو قاعد يلعب بيه بكلمات الاغنيه ونبرة صوته..
وتنهيداته اللي تطلع بين المقطع والتاني..
وقف غني بعدين قال بنفس نبرة الصوت وهو يترجم في كلمات الأغنيه...
كم اتمنى..كم اتمنى..حبي
كم اتمنى ان تكوني احببتني بطريقتي..
هذه الليله حزينه جدا للغايه...من دونك...
وهي ساكته ولاكلمه مش قادره تنطق..
دموعها ينزلوا وبس..وقلبها قاعد ينعصر عصر..
تكلم وقال بنفس النبره...
خلاص..بطلعيني من حياتك..بتنسيني
بتنسي حب حياتك..بتنسي الجالي...
وحب الجالي..وايامه اللي كانوا احلى ايام حياتك..
مش انتي كنتي هكي تقولي..
مش اني هواك اللي تتنفسي فيه..
مش اني الراجل الوحيد اللي عشقتيه..
مش اني الراجل الوحيد اللي قدر يملكك بكل مافيك..
مش هدا كلامك يانجاه...
قصدك اللي قلتيه كله كان كذب!؟
هي حطت يدها ع فمها وهي تبكي..
كانت تمنع في نفسها من الكلام وتمنع في صوتها انه يطلع..
تنهد تنهيده..ذبحت قلبها...
بعدين قال..
لو تعرفي شن نحس في صدري..
بارد...تقول فيه جبال ثلج...
الدنيا كلها نشوف فيها فاضيه..
اليوم انتي حسستيني اني ولا حاجه..
حسستيني اني من غير قيمه..
شفتي القيمه عطوهالي كل اللي حواليا..
ماتسوى شي لو ماشفتهاش في عيونك انتي..
العيون اللي ذبحتني ذبح..
وهي تسمع وقاعده تتقطع...وماتبيش ترد..
هوقال..
نجاه..خيرك ساكته..سمعيني صوتك..حتى لو كنتي تبي تهزبيني..المهم خليني نسمعك..
هي معاش تحملت..طول سكرت الخط في وجهه..
وسكرت تليفونها..
وجبدت السماعات ورمتهم..ودفنت وجهها في المخده وقعدت انهارت بالبكي..
🍃اما هو بعد ماسكرت..
حول التليفون..ع وجهه مرسومه ابتسامه جانبيه..
بعدين ناض ومشي توجه للشاليه اللي قاعد فيه...
🍃🍃🍃🍃🍃🍃
وتعدي هالليله..
ويجي اليوم اللي بعده...
وكان يوم خميس...
فهاليوم كان عند طوبى امتحان في الكليه..
مش عارفه شن حطت في ورقة الاجابه..
دماغها كان مشوش من كثر التفكير.
والقلق والتوتر..
لما كملت جت بتطلع طول للمدرسه...
بس قبل لتطلع شدتها عبير..
🍃عبير بضيق؛شفتيني كيف سكتت المده هادي كلها وماسألتكش وراجيت لين نتلاقوا اليوم ونحكوا ولاحظتك كيف تتهرب مني ياطوبى..بالله عليك قوليلي كلمتيها..
تنهدت طوبى بضيق وقالت؛ايه..
هي بلهفه قالت؛شن قالتلك؟!
طوبى:عبير طلعي الموضوع هدا من دماغك وانسيه..
هي بضيق:علاش شن قالتلك بنت عمته؟
طوبى؛قالت مافيش امل..عبير الراجل فاهم كويس علاش رفضتوه ولأنه عنده عزة نفس وكرامه اكيد مش حيرضاها ع روحه..
امتلوا عيون عبير بالدموع وهي تقول؛باهي اني غلطت كنت غبيه وغلطت ونبي نصلح الغلطه متاعي..مش هو يحبني مفروض ينسى..
عقدت طوبى حواجبها بإستغراب وقالت..
عبير..انتي تحبيه؟.
عبير بحزن؛ايه ياطوبى حبيته..عقلي وقلبي مشغولين بيه طول الوقت مش قادره نفكر في غيره ومعاش بديت نشوف في حد معاه..نشوف فيهم زي بعض الا هو بروحه مايشبه حد اني مش مصدقه لتوا كيف واحد زيه هو حبني اني..
طوبى:وعلاش شن ناقصك!؟ بعدين معاش تبالغي هو صح كويس ومحترم بس مش لهالدرجه وفي هلبه زيه واحسن منه..
عبير بتهكم؛وينهم ترا!؟
طوبى؛حتلقي صدقيني..كان خليت خربت..
عبير بعدم اهتمام لكلام طوبى وبإصرار منها:باهي انتي عطيني رقم بنت عمته..
طوبى بتعجب؛عبير خيرك!؟
عبير:انتي غير عطيني رقمها ومالكش علاقه بالباقي..
طوبى استسلمت لإصرارها وقالت؛باهي..لكن لازم ناخد اذنها قبل..
عبير تأففت بضجر بعدين قالت؛باهي لكن ردي عليا بسرعه ماتشحطنيش..
طوبى بإستعجال؛حاضر والله حاضر...يللا سلام..
ومشت بسرعه طلعت لسيارتها...
وصلت فيها..فتحتها وركبت..
وسكرت الباب....وين جت بتحط الشنطه جنبها..
عقدت حواجبها بآستغراب لما شافت حاجه غريبه..
هالحاجه ماكانتش غريبه عليها..بس الغريب هو وجودها في سيارتها..
رفعت عيونها لروشن الباب اللي مقابلها لقاته نازل شويه..
رجعت نزلت عيونها للحاجه الغريبه..
اللي كانت عباره عن ظرف رساله ابيض..
وقلبها يدق بقوة من الخوف..
مدت يدها وخدت الظرف..
قعدت تشوفله والخوف سيطر عليها..
فتحاته بإيديها المرتعشه...
وطلعت منه ورقه بنفس حجم ورقه الرساله الاولى..
خدت نفس عميق..بعدين زفرت..
وفتحت الورقه..
(المغفل مش زي المستغفل..خليك التانيه وردي بالك تكوني الاولى)
طوبى بخوف؛ياربي من هدا من اللي قاعد يدير فيا هكي!؟ ناقصه خوف وحرق اعصاب!!..
غمضت عيونها وقالت...استغفر الله..استغفر الله العظيم..
فتحت عيونها وهي تقول..مغفل ومستغفل..خليك التانيه وماتكونيش الاولى..وقبلها قال..اللي صنتيه يخونك!؟
سكتت وهي تفكر..وتفكر..والف فكرة وفكره غزوا عقلها..
بعد تفكير قالت..
في حد يبي قاصد يدير فيا هكي...
سكتت فجأه وكأنها وصلت لنتيجه في تفكيرها بعدين قالت..
هو مافيش غيره..مايحسابش روحه ولى مفضوح وواضح وحركاته مكشوفه..تنهدت بحسره..الكف اللي عطتهولي سدره يومها بسببه كنت نستاهله...فعلا هو زي ماقالت عليه مايجينا من وراه كان الهم..
ومزقت الرساله بغل بعدين نزلت المرش ولوحتها برا..
ورجعت خدت نفس عميق بعدين شغلت السيارة وتحركت طول...
🍃🍃🍃🍃🍃
واقف في مبنى قاعدة ماتمتش مراحل بنائه..
كان يشرف ع الشغل ويشوف فيه وين وصل..
ع جية صاحب مشروع..
تلاقوا وتصافحوا وسألوا عن احوال بعض بعدين قاله..
:الباش مهندسه نجاة اللي كانت معاك في المشروع وين؟
هو قال بشي من الضيق:سيبت الشغل في الشركه وولت تخدم في مكتب خاص..
:نكون معاك صريح المعلومه هادي عارفها بس كنت نستفسر منك اكثر هل مازال تخدم في الشركه ولاسيبت..
الجالي وهو يحاول يخفي ضيقه..
ايه سيبت..
هز صاحب المشروع راسه بعدين قال:باهي تو بنسألك بخصوص الوضع هني الامور كلها تمام ماعندكش ملاحظات..
ابتسم الجالي مجامله وقال:نهائيا..
وزع نظره ع المكان والعمال وهو يقول:تمام كويس...
والجالي جنبه قاعد يكبت في غضبه لما حس ان الراجل وكأنه حاط عينه عليها وقاعد يسأل عنها لهالسبب..
🍃🍃🍃🍃🍃
الساعه 2:30بعد الظهر..
كانوا متجمعين ع سفرة الغدي في حوش لطفي..
بناته وحفيداته واخته..
وهما يهدرزوا عن الخنبه اللي صارت لواحد من حياش الشارع..
مطيره:في الجديد البيبان كلهم بنطربقهم ولطفي معاش يرقد في المربوعه الخارجيه..
فردوس:ايه صح..
آلاء:لكن تعرفوا حاسه الخنبه من الشارع نفسه..
اريج؛حتى اني هكي حاسه..مفروض في كل حوش في كاميرا مراقبه تنحط في تركينه ماتكونش واضح بش مايشوفوهاش زي اللي مركبتها جارتك بيبو..
شافت طوبى لأريج وقالت؛من هي؟
اريج؛جارتك جميله ام االدكتورة منيه..
طوبى بآستغراب:دايره كاميرات!؟
ضحكت اريج وقالت..
قلتلكم مش واضحات اني لين جت عيني عليهم صدفه وركزت كويس بش شفتهم..
فردوس؛تكلف لكن..
مطيره؛ايه صح..
وكملوا كلامهم عن الموضوع..
وطوبى وسطهم ساكته وهي سرحانه وتفكر في كاميرا الجارة الجميله..
فجأة رن تليفونها..
استاقظت وشبحتله..
بعدين ناضت ومشتله..
وعيون فردوس يراقبوا فيها بدقه..
خدت التليفون وشافت المتصل..
كانت نسرين...
فتحت الخط وردت..
طوبى؛السلام عليكم..
"وعليكم السلام طوبى كيف حالك"
طوبى:الحمد لله..كيف حالكم انتم..
"تمام الحمد لله..طوبى بنقولك حاجه اليوم بنديروا حفله صغيره لسدرة لأنها لبست الحجاب.."
ابتسمت بفرح وقالت؛الحمد لله..
"المهم بعدين تعالي باهي..حتى خالاتي جايات يهدرزوا ع امي"
بدت ع وجهها ملامح الضيق وقالت:باهي ان شاء الله بعد العصر نكون غادي..
"ان شاء الله...نتلاقوا"
طوبى؛سلام..
"سلام"
سكرت بعدين التفتتلهم ومشت قعمزت ع السفره..
فردوس؛خيرها؟
طوبى:قالت دايرين حفله صغيره لسدره ع خاطر لبست الحجاب تبيني نحضر..
مطيره بإبتسامه:الله يبارك الله يبارك..
اريج بإبتسامه:حلوة الحركه هادي تجبر بخاطر البنيه وتفرحها..
مطيره وهي مبتسمه؛ايه..
وطوبى وهي راسمه ع وجهها ابتسامه خفيفه..
ولت تاكل...تاكل في روحها وتفكر من جديد..
🍃🍃🍃🍃🍃
بعد العصر..
طلعت من حوش بوها متوجهه لحوش شيابينها..
ع طلعة محي من الحوش..
شبحتله بنظرة عابرة..هو ارتبك وغير عيونه عنها ومشي طول لسيارته..
قصت الطريق..
وهي ماشيه..
جي عبد القيوم بسيارته مروح من الخدمه..
درسها قدام حوش المهدي..
شافها كيف ماشيه وكالعاده غير عيونه عنها بسرعه..
ونزل من السيارة.. ومشي طول خش للحوش..
وماقعدوش غير عيون محمد ولد المهدي اللي مرافقتها وهي تشوفله بحزن لين خشت للحوش..
☘وين خشت سلمت ع الكل..
لكن سلامها ع سدرة كان خاص..بالأحضان فرحا بيها..
🍃في الكوجينه..
نسرين؛بعد ماحكيتلهة الحلم اتصلت بيا تاني وسألتني كان بلغت ولالا..قلتلها بلغت..قالت خلاص معناها امها تبيها تلبس الحجاب واللون الازرق علامه ع ان امها حترتاح بعد ماتلبسه..
طوبى ودموعها في عيونها؛لحمي ناض شوك شوك..
نسرين؛حتى اني اثر فيا هلبه..المهظ الحمد لله اهي لبساته..
طوبى:الحمد لله..
نسرين؛هي ارفعي المترد والحقيني..
رفعاته طوبى وطلعت قبلها نسرين بسفرة القهوة..
وين خشوا للصاله..
لقوهم يتناقشوا نقاش محتدم بعض الشي..
خديجه:لما تتصل وطول في لسانها وتدعي ع بنتي ماحسبتش حساب هاليوم ولا؟
طوبى وهي تسمع استغربت..
قعدت تفرق..
ع الخالات اللي وحده منهم قالت..
خلي قلبك كبير ياخديج وخلي وليد ولابنية وخيك يتربوا بين بوهم وامهم..
طوبى شبه فهمت ان الكلام ع دنيا..
وقالت في نفسها..
"دنيا حامل!"
مغليه؛ياوخيتي قبل ليطلعوا من حوشنا ياما ترجيناهم بش مايخربوش ع بنتهم لكن هما اللي سكروا روسهم وخوكم كلامه قاعد في وذاني لتوا ماني ناسياته..
:يعني كيف توا يامغليه خوك قال...كان جاباته بنعطيهولهم..
خديجه؛ويجيبوه مكانه عيونا وليد وخيي..لكن امه خلاص هي وعيلتها رصيدهم عندنا تم..
مغليه؛وهدا اخر كلام عندنا..
كملوا التفريق وطوبى طلعت بالسفره وهي مصدومه ومش فاهمه اغلب اللي قالوه لعند ماطلعت وراها..
لقتها واقفه فم الكوجينه قالتلها:خيرك واقفه هكي طوبى؟
شبحتلها وقالت؛عمر طلق دنيا؟
نسرين بضيق:للأسف ايه..
سألتها وهي تقول:وهي حامل؟
نسرين:ايه..هي خشي..
مشت طوبى خشت وهي تفكر بخوف..
كلامهم كان مخيف..بالذات كلام خديجه...
ويوم عن يوم..تزيد هالعيلة سقوط من عين طوبى بعد ماتعروا تماما وطلعوا ع حقيقتهم السودا...
🍃🍃🍃🍃🍃
الساعه 8:30 ليلا..
في الشارع اللي يعج بالحياة في وقت زي هدا..
بالمحلات اللي فيه..المقهى..المطعم..
ناس ماشيه وجايه..
وناس مروحه من الجامع..
ومنهم علي ولطفي معاهم عبد الرؤوف وعبد القيوم والمهدي..
لطفي؛مازال ع رمضان شهر تقريبا لازم نبدوا من توا..
عبد الرؤوف:تم عمي..خلي الموضوع عليا..
المهدي:العام هدا الحاله صعبه بزياده..
علي:مزبوط...
عبد القيوم؛ربك يسهلها ويرزق من عنده قولوا ياكريم..
كلهم بأصوات متقطعه قالوا..
ياكريم..
بعدين علي قال؛شن صار في حكاية خنبة حوش الجعفري..
عبد الرؤوف؛فيها إن ياحاج..
المهدي:تبي تقول ان اللي دارها من الشارع نفسه..
هز عبد الرؤوف راسه وهو ساكت..
لطفي بقلق:مشكله كبيره كان حق هالكلام..
عبد الرؤوف؛طمن بالك ياعمي قريب نعرفوا مني ان شاء الله...
وفجأه.. وبدون سابق انذار...وع عيون الجميع..
يخشوا سيارات مصفحه تابعه لكتيبه تتبع للدوله..
الكل لما شافهم خاشين..
بين الخايف..والمتفاجئ..والمستغرب..
درسوا السيارات..
ونزلوا منهم مجموعه ملثمه بأسلحتهم..
ومشوا طول...
لعبد الرؤوف...
وشدوه..
انصدموا اللي حداه..
وصدمته هو كانت اكبر قعد يحاول يفك روحه وهويقول..
شن في..خيركم!!... تي شن دير انت وياه حولوا..حولوا..
وجبدوه بالقوة وركبوه وحده السيارة عنوة..
وتحركوا بسرعه وهما يحرقوا في العجل..
وخلوا سكان الشارع في حالة دهشه وعدم استيعاب.
وصدمه كبيره..وجديده...للطفى...
🍃🍃🍃🍃🍃🍃
مقعمز وسط صالونه الكبير وهو حاط رجل ع رجل..
وفي واحد مقعمز قريب عليه وهو يقول..
:تمام تمام..مستعد نمشيلك الموضوع لكن بشرط تسلمني التسجيلات اللي عندك..
مختار وهو مبتسم بتهكم قال..
وتبي التسليم باليد ولافي مسدج؟
الراجل غمض عيونه بأسف ولف بوجهه عنه..
تبدلت ملامح وجهه للأمتعاض وهو يقول..
اللي طلبته منك تنفده بالمقابل اللي عندي عليك يقعد مدسوس في الحفظ والصون..شن قلت؟
شبحتله شويه بعدين قال..تمام خلاص اعتبر موضوعك تم..
ابتسم وقال:انت هكي عيني وحني سمن ع عسل..
:مختار رد بالك تغدر بيا.
هو قال؛مستحيل...
:واثق فيك راهو..
حرك راسه بملل وقال..إيييااااح..
:خلاص..خلال يومين نجيبلك الورقه..
ابتسم ابتسامه واسعه مستفزة وهو يقول..
حلو..
:باهي نقدر نروح..
رفع حواجبه وقال..
ومن شادك!؟
ناض الراجل وقال..
تصبح ع خير..
مختار:خير..خير..
ومشي الراجل طلع من الصالون..
ويخش بعد واحد من رجاله وقاله..
تم...
بدت ع وجهه ملامح بارده مخيفه..
واشرله بيده بيطلع..
طلع...
وهو ناض..مشي طول للمنظومه..
قعد يشوفلها للحظات...بعدين شغلها..
ع سينفونيه "القدر" لبيتهوفن..
بعدين لف ومشي للطاوله اللي عليها رقعة الشطرنج..
ووقف عليها وطبس..
وخدي واحد الجنود وحركه كم خطوة للوزير..وحوله...
#رسالة_أخيره
#طوبى
...يتبع....
