# طوبى "شارع القهوة" #جمان_فريد #الجزء_الثامن_والعشرين" قبل العاصفه" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ ••••بعد مرور ثلاثه أيام•••• في مربوعة حوش شنيبه.. خديجه وهي تشوفله برفعة حاجب:لامش ساهله كلمته يابوي انتم عيله تتمسح للقذافي محمد وهو يشوفله:هو كلمته هادي مش حتعدي بالساهل المهدي:اكيد مش حتعدي بالساهل..اني ليا تلاته ايام شاد روحي عليك بالغصب..حني بنتمسحوا لحد حني ناس بنينا روحنا بروحنا رزقنا كله حلال والمفضل علينا ربي بس..وانت عارف زي ماكل الناس تعرف في البلاد اللي عنده فلوس المسؤولين في الدوله هما اللي يتقربوله ويبوا يكسبوه ويديروا معاه مشاريع وحني اكيد مش حنردوا اي حد يبي يخدم معانا من كان يكون..وكونهم هما يخدموا في مصالحنا فهدا اقل من ربع حقنا كمواطنين وهادي بلادنا.... نحمدوا ربي اللي خلانا مانمشوش في غير طريق الحلال..غيرنا انجبر يخش الحرام بش يبني روحه لأن هادي القوانين المفروضه علينا من اللي قلت قاعدين نتمسحوله.. خديجه عجبها كلام خوها.. بس محمد خاف وقال:مهدي.. المهدي:خليه يمشي يطلع اللي سمعه اقسم بالله ماني خايف من واحد..اهو ع الاقل الواحد يموت بشرفه.. محي الدين في عقله"الله ياخد صابرين وفية صابرين كامله وياخدني اني معاه اللي مانشعفش":لايامهدي شي زي هدا مانديراش لنسيبي وولد شارعي واني اسف جدا وحقكم ع راسي..وناض باس راس محمد وقال..سامحني ياعمي.. ومشي لخديجه وباس راسها وقال:وحتى انتي ياخديجه سامحيني وولى قعمز وهو يقول..هي روحي لحوشك وتعوذي من الشيطان.. المهدي قعد يشبح لخديجه وركز ع نظراتها لراجلها حس ان الموضوع مش زي ماهي قالت... نظرات الحقد في عيونها هكي تقول.. محمد؛هو اكيد حتى انتي اشبح شن قايله ومستفزة الراجل نعرفه لسانك طويل وهو مايبيش يقول بش ماتجيش ع راسك وهادي تحسبله..هيا نوضي لمي حاجاتك انتي وصغارك وروحي مع راجلك..ومرة تانيه مشاكل بسيطه زي هادي حلوها بين بعضكم..ولاكلمي حد خوتك يجيك وتتفاهموا في حوشكم.. خديجه ابتسمت وقالت؛حاضر بوي... ☘وولت خديجه لحوشها بعد تلاته ايام عيشت فيهم محي ع اعصابه خلاته لايرقد لاليل ولانهار.. لكن الصور والحاجات اللي عندها عليه دستهم في دولابها في دارهم هي واختها في حوش اهلها... ومن بعد اللي صار محي فعلا قاعد ماشي مستقيم وين يشبح اي شي ليه علاقه بجنس حواء يركبه الرعب ويتخيل في خديجه قدامه... ☘اما صابرين..نجاة ورتها نجوم الليل في عز الظهر.. بعد ماعطتها طريحه بيها بعتتها تقعد في حوش جدها من امها مع حناها وخوالها وخالاتها اللي كانوا عايشين في ضاحية من ضواحي وغادو كانوا متشددين هلبه .. فردوا عليها تلبس حجاب كامل وخلوها زي الخدامه في الحوش..لكن ماحرموهاش من القرايه... وصابرين ذاقت الامرين معاهم بس مجبورة تسكت وتتحمل بعد العمله اللي دارتها.. ونجاة شدت رجلها عن حوش شنيبه.. حتى وين يجي يمشي طاهر غادي هي تتسبل بتعب الحمل بش ماتمشيش... وكان خلاها في الحوش بروحها يسكر عليها الحوش كله والباب بالمفتاح... وكان عارف روحه بيسهر يحطها عند امه... ووقتها كان بادي كاس العالم.. والمهدي ماداير اشتراك فقناة الجزيرة الرياضيه ومخلي خوته يتفرجوا معاه ومنهم طاهر... بس هو والجالي كان كل واحد فيهم في حاله وولا واحد فيهم احتك بالتاني.. •••عائشه في الكوجينه وهي توتي في العشي:علاش كل يوم اني تبهدل في الغدي والعشي علاش اللا هديكا ماطيبش وتبعت من حوشها ولامغليه علاش ماطيبش وتخليهم يركبوه قداش مني اني.. "كان خوتك راك ديري في كل شي وانتي تضحكي" هي انصدمت والتفتت شبحتله:لاوالله ماقصدي بس..يامهدي والله تعبت شبه كل يوم راهو واني في للكوجينه.. المهدي وهو عاقد حواجبه:خلاص اطلعي اطلعي..تو نجيب من برا.. عائشه بضيق:خلاص خليني نديره توا بديت فيه.. المهدي بصرامه:قلت اطلعي اني . هي لمت كل شي بعدين غسلت ايديها وطلعت.. وهو استأذن من خوته ومشي طلع يجيب عشي من مطعم قريب.. 🌻اما في حوش الواعر.. يوسف كان شاري كرت الجزيرة حتى هو ولام الشباب صحابه ومعاهم يوسف في مربوعه حوش عمه . واخته وعمته مايخلوا مايديروا ويطلعوا.. وصفيه حتى هي طيب وتبعت مع اميمه.. وهما طبعا كانوا يلتموا في الصاله ويتفرجوا ع المباريات.. غرفه وطوبى واميمه وفايزة وحتى مطيرة تشجع في هولندا.. والوحيدة اللي مش مدوره سدرة ماكانتش تحب الكورة بكل.. ومرت ايام كأس العالم.. وجي يوم المباراة النهائيه.. ويومها مشت اميمه الكليه كانت ماشيه تقرا لأن الامتحانات النهائيه قربت... وبعد الامتحانات النهائيه بتمشي العمرة مع جدها.. :الله ياحظك يااميمه بعد الامتحانات طول للعمره.. اميمه بإبتسامه؛ربي يوصلكم ان شاء الله... فهالوقت خش عمر للكليه.. كان جايب معاه هديه ومعاها بشارة ليه كان واثق ان لو اميمه عرفت بيها حتغير موقفها كله من ناحيته.. هو لما قرب يوصل في مكانها المفضل.. شافها مدايرة دايرة مع زميلاتها دائرة وفي وسطهم الشيتات.. وهي تهدرز وع وجهها ابتسامه مشرقه.. قدملها وقلبه يدق بقوة وكان متحمس ع الاخر.. بس وقف في مكانه لما شاف اسامه جايها وفيده شي .. اسامه وين وصل فيهم حطه في النص.. كلهم اتفاجئوا واميمه قعدت تشبحله وهي متفاجئه.. بعدت ضحكت وقالت:الله محلاه! داليا بضحكه:راسمين عليه من جيهتين علم هولندا وعلم اسبانيا.. شافت اميمه القفص من الجيهتين ماكانش كله مشبك ع ايمينه وع ايساره في غلاف بلاستيك لونه ازرق.. اسامه:عجبك الكناري. اميمه شبحتله وقالت:يهبل يهبل..ليك؟ اسامه بإبتسامه:تس متاعك انتي.. البنات كلهم شبحوا لأميمه بآبتسامه.. بس هي شافت للقفص وقعدت تتأمل في طير الكناري.. داليا؛باهي من تبي يفوز اسامه؟ اسامه:ع خاطرها هي اول مرة تشجع بنضامن معاها.. ضحكت وقالت:تخليت ع المنتخب اللي تحبه وتشجع فيه من صغرك! اسامه بإبتسامه؛ونتخلى ع اكثر من هكي.. البنات حسوا ان اسامه يبي يعترف لأميمه بحقيقة مشاعره اللي كانت واضحه.. وهي حست لهذا خفت ابتسامتها وضايقت.. وفي لحظه..ماحستش الا وفي حد جابدها من يدها ومنوضها بسرعه.. كلهم انصدموا.. اسامه :شن دير انت!؟ عمر بغضب:انت تسكر فمك احسنلك.. اميمه بغضب؛حول يدك..وجت بتجبدها وهو شدها بقوة.. وقعد يمشي فيها بالغصب.. اسامه جي بيمشيلهم اميمه التفتت وشافاته اشرتله بيدها يقعد في مكانه.. وقف غصب عنه. وهي عدلت مشيتها وقعدت تمشي مع عمر عادي بش ماتلفتش الانتباه.. وصل بيها للكرسي اللي كان حاط عليه الهديه.. عمر:شن يبي منك هدا!؟ جبدت يدها بقوة وقالت بحده؛مادخلكش.. عمر:اسمعي اميمه اني شاد روحي بالسيف ماتخلنيش نرتكب جريمه معاش تكلميه ولاتخليه يكلمك ولايجي جيهتك.. اميمه بحده:مش من حقك تأمرني وتدخل فيها.. عمر بغضب:لامن حقي ونص..من حقي يااميمه راك والله ماحتكوني لغير عمر.. اميمه ودموعها في عيونها:وعمر لمني..لبنت عيلة******* اللي من مستواه اللي ماتجي شي جنبها اميمه بنت عبد المطلب الشلافطيه!؟ عمر بإستغراب شديد؛شن تقولي انتي!؟ اميمه؛هدا كلامك.. عمر حط ع صدره وقال بصدمه؛كلامي!!؟ اميمه:طبعا بتنكره واخد ع الكذب انت... عمر:اميمه تكلمي كويس.. اميمه:اني اصلا مانبيش نتكلم معاك ولو سمحت معاش تجي في طريق مرة تانيه.. جت بتمشي بسرعه جي قدامه وقال:منين سمعتيه الكلام هدا من قالهولك!؟ اميمه ودموعها ينزلوا سيل:الشارع كله يدوي بيه ومن فترة طويله تحساب الدوة مش حتوصلني..تحساب بتقعد مكمل ضحك عليا واني نتجاوب معاك وترجع دير معاي نفس الشي وتقولي زي توا..وقعدت تقلد فيه في حركاته كيف تكلم يومها.. ....بجديات اميمه انتي يعني..مسكينه..من يومك ومش عارف لامتي بتقعدي هكي.. كيف صدقتي ان اني عمر..ممكن يشوفلك انتي اميمه العبيطه اللي ماتعرفش راسها من رجليها..يابنتي من جدك انتي يعني تموا البنات من الدنيا بش نشوفلك انتي! وحقارة لذلك بنقولكsorry...كل مافي الموضوع ان اللي صار كله مقلب درناه فيك اني وغرفه بنت عمك قالتلي اميمه تحبك ماتحبك واني عاد عجبني الوضع وقلتلها خليني ندير فيها مقلب وخليه بيني وبينك.. بس امس كلمتني وقالت معاش طول معاها بش ماتنصدمش فيك صدمة قويه..والحق بعد شفت شن درتي اليوم قلت لا عندها حق غرفه لازم ننهيها.. وبعبرتها كملت تقول... ع العموم خليه يقعد درس ليك معاش تخلي حد يضحك عليك..احمدي ربك اللي جاتك مع ولد جيرانكم مش مع حد ماتعرفيشي كان هدا الله اعلم وين وصل بيك...لبس نظاراته وقال..اسف مرة تانيه بنت شارعي.. حطت صبعها ع راسها وقالت..كله قاعد هني كلامك مش قادرة ننساه..اشرت ع المكان اللي صار فيه الموقف وهي تقول..وين نشوف لمكان هداكا نشوف في نفس الموقف نشوف كيف هنتني وهزيت عليا كيف كسرت قلبي وخاطري واني اللي كانت نتعامل بنيه صافيه وبياض قلب كيف لوحت في وجهي الهديه اللي سهرت عليها لين عيوني وجعني بس كنت فرحانه واني نتخيل في ردت فعلك كيف تكون..وانت وقتها تضحك عليا اني الهبله اللي ديما كنت هازي عليها ودايرها مضحكه..معاش عندي ثقة فيا لو تحلف ع مصحف مش حنصدقك لو شن دير ياعمر لو شن دير... عمر كان يسمع فيها وصوت بكاها ودموعها كانوا يقطعوا في قلبه.. كلامه الجارح كانت حافظته بالحرف..حتى حركاته.. ماتوقعش ان الموقف قاعد مأثر فيها لهالحد.. توا بس فهم مدى قوة الجرح اللي تسببلها فيه وحس انه مادار شي يخليها تنسى اللي داره فيها.. بلع ريقه وقال والدموع في عيونه:شوفي..تنحنح وكمل يقول..شوفي اني في كل اللي قلتيه عاذرك باهي..الا في انك تكذبي حبي ليك..مش حنحلفلك تاني خلاص سادني ربي شايف قلبي وعارف اللي فيه وعارف اني شن قاعد ندير بش نبدا مناسب ليك ونليق بيك ونستاهلك..مانيش قايلك نخليك تسمعي وتعرفي من الناس..تعرفي هالمرة الحق مش الكذب.. واني من اليوم وبرا غادي معاش تشوفي وجهي يااميمه .. ومشي وخلاها... وخلا الهديه متاعه ع الكرسي.. هي قعدت تشبحله بنظرات ألم..وحب ودموعها مابطلوش نزول.. والبنات واسامه يشبحولها... اسامه اللي كان حاس روحه خلاص حيوصل في اميمه بس بعد اللي صار حس بالعكس تماما.. بالذات لما شافتها كيف شبحت لبوكس الهديه اللي جابه.. بعدين قربتله وخداته وهي تشوفله بحزن وتبكي بصمت.. اعتذرت بعدين اميمه لأسامه عن قبول هديته.. وطول طلعت من الجامعه.. وقفت بسيارتها في مكان وفتحت بوكس الهديه .. لقت فيه قماش وازرار وجرارات سلك صغيره ولوازم خياطه.. وورقه مطبقه..فتحتها لقت فيها ارقام...كانواقياساته.. وماعرفتش علاش هداها هديه زي هادي..الحاجه اللي يبيها منها حتكون ليه يعني ماتعتبرش هديه ليها..! ☘☘☘☘ وهو فهالوقت.. قام في حوشهم عاصفة.... وعائشه اللي كانت طيب في الغدي للعيله شاهده عليها... ••في الصاله•• مغليه بعصبيه؛مافيش منها الدوة هادي قتلك.. عمر بغضب وانفعال:لا في ونص يام وماتنكريش وبنتك طلعتها..بري قوليلها قالك عمر صحه ليك خربتي عليا ودمرتي اللي قاعد نبني فيه ليا فوق السنه صحة ليك..درتوا فيا زي مادرتوا في المهدي خليتوه عايش تعيس وقهرتوه في عمره.. مغليه فنصت فيه وقالت:اسكت! عمر:مانيش ساكت..سادكم ساد ياسر..معاش تدخلوا في حياة حد معاش ليكم علاقه بحد ياسركم خراب ياسر... ومشي طلع من حداها خبط باب الصاله اللي كان مرش ولوح بيده.. ومشي طول للدروج وركب يجري.. ومغليه قعدت تندب وتتصل بخديجه تجي تتفاهم معاه.. وهو فوق.. يلم في حوايجه...بعدين خدي جوازه ودسه واوراق مهمه حتي هي دسها سكر الشنطه ورفعها...وخدي شنطة اللاب توب متاعه ومشي طلع من الدار.. نزل يجري من الدروج.. وصل لوطا ومشي فات من قدام الصاله امه شافاته.. مغليه:حي عليا!!.. وطلعت تجري وراه لين وصلت فيه يدوب شدت شنطته وهي تقول:عمر لا ولدي بالله عليك لا..والله اليوم نمشي نعتذر منها ونخطبهالك.. هو وصل في الباب فتحه وقال:سامحيني يام...مش حنخليكم تلعبوا بحياتي زي مادرتوا لغيري.. وطلع من الحوش وسكر الباب.. وخلا امه تبكي بعبرتها.. مش هي وبس..حتى عائشه اللي كان كلامه يمسها ويحط ع جرحها ملح.. الجرح اللي مجبورة تتحمله...مش بسبب جبروت خوتها وبوها..ولابسبب كلام الناس..لا.. بل بسبب حبها للمهدي..الحب اللي خلا عمر يدير اللي داره... 🍀🍀🍀🍀🍀 ومروا يومين.. مافي حد فيهم عرف حاجه عن عمر.. وبش يطمنوا امه اللي قريب هبلت بعد طلع من الحوش كذبوا عليها وقالوا قاعد عند صاحبه.. وفي يوم... كانت مغليه طالعه للجنان تسقي في غرساتها.. دق باب الحوش..حطت الطوبو ع تركينه.. ومشت للباب.. مغليه:شكون؟ "اني خالتي وسام صاحب عمر" بخوف ولهفه فتحت الباب وقالت:اهلا ولدي. :اهلين خالتي..كيف حالك.. مغليه:الحمد لله ولدي انتي كيف حالك وحال ماليك.. :الحمد لله خالتي الحمد لله..بالله خالتي عمر قاعد.. هي استغربت وقالت؛عمر! :لينا مدة ماتلاقيناش ورقمه مسكر سألت عليه الولاد قالوا ماشي لزليطن عند واحد من الاقارب قلت اكيد روح اليوم بش يحضر حفل التخرج غدوة.. مغليه كانت مصدومه ومش مستوعبه شي من اللي يقول فيه صاحب ولدها.. :خالتي.. مغليه بلعت ريقها وقالت:مهناش.. :اها باهي هو روح من زليطن؟ مغليه؛لاماروحش.. استغرب وقال:غريبه..هز راسه وهو يقول..ع العموم اني دبرت وجبتله بدلة التخرج كان روح بيه عطوهاله.. ومشي للسيارة طلع منها بدلة التخرج اللي كانت مغلفه بنايلو.. وجي بيها لمغليه.. هي خدتها وقالت؛صحيت ولدي بارك الله فيك.. :فيك بارك الله خالتي..هي السلام عليكم.. مغليه:وعليكم السلام.. وسكرت الباب وهي تفكر وقلبها بيوقف من الخوف.. بعدين مشت بسرعه خشت داخل... ~~~~~~~ خديجه بقلق:يام ماديريش في روحك هكي عمر مش عيل صغير راهو.. مغليه وهي تبكي:اني نبي ولدي توا تجيبوه مادخليش بيكم اني توا نبي نشوف ولدي قدامي.. الجالي بتوتر؛حاضر يام حاضر اني ماشي تو ندور عليه ومش مروح الا وهو معاي.. ومشي طلع الجالي وهو متوتر ومعصب يقول:حركات المفرخ اللي يدير فيها الزفت هدا... وين وصل في الباب وفتحه.. لقي قدامه نسرين.. نسرين:جالي طالع؟ الجالي بإستعجال:مش ندور ع العيل خوك.. شداته من يده وقالت؛خش داخل خش.. شبحلها بآستغراب وخش.. وهي سكرت الباب.. نسرين؛عمر عندي في الحوش.. الجالي؛وعلاش ماقلتيش! نسرين؛هو حلفني.. الجالي:مافكرتيش في امك! نسرين؛كان قلت يطلع من عندي والله وين يمشي بعدين.. الجالي حط ايديه ع بعض وقال:علاش قلتي توا كان محلفك!؟ تنهدت وقالت:هو بعتني يبي البدله متاع التخرج.. الجالي حرك راسه يمين يسار وهو يوزع في نظره يساره بعدين قال:خشي لأمك خشي.. هزت راسها ومشت خشت للحوش.. والجالي مشي طلع وهو معصب من عمر ع الآخر.. ☘☘☘☘☘ في وحده من مقاهي العاصمه.. الجالي؛اني مش عارف كيف راجل بعقله تلعب بيه مراة وتخليه ينسى روحه ويدير تصرفات مهبله..مش هامه امه ولاهامه شعورها..كل همها البنت اللي يبيها بس.. حكيم "صديقه":ماهو انت مش مجرب ياصاحبي.. الجالي:وان شاء الله مانجرب شن هدا!!؟ اللي يجيب فرقه ويغني تحت حوشها واللي ياخد شلاتيته ويهج.. لايفكروا في العيله ولاسمعة العيله..ولايقولوا بونا وامنا..اني كل شي عندي فالدنيا يهون الا امي وبوي..والله هدوما الزوز مانفرط فيهم ع روحي..مش ع مراة! حكيم:نصيحه مادام ماجربتش ماتقول شي.. الجالي دار بوجهه حركه تبين عدم اقتناعه بكلام صاحبه وخدي طاسه ميه من ع الطاوله وشربها كلها.. ☘☘☘☘☘☘ "لايام مايبيش خلاص" مغليه ودموعها في عيونها:وعلاش باهي.. نسرين:شن علاش يام والدوة اللي وصلت للبنت وعيلتها مازال تبوهم يعطونا البنت ولاهي مازال ترضى! مغليه شبحت لخديجه.. خديجه:بالناقص منهم كلهم..تو انتي مش قلتي بيسافر خلاص صدقوني حينساها وكأنه ماعرفها في حياته.. مغليه حطت ايديها ع قلبها وقالت:ووك عليا وليدي بيخليني عامين.. نسرين:يام فيسع يمروا العامين.. خديجه:اني من رايي يقعد غادي خيرله مستقبله في قطر مضمون.. مغليه:اسكتي انتي.. نسرين:يام عندها الحق شن بيدير قاعد هني..وبعدين امس يهدرز هو وحامد قاله ان هلبه طيارين ليبين غادي في قطر عايشين احلى عيشه ومتميزين هلبه عن باقي الجنسيات.. خديجه:خلوه يكمل هالسنتين وبعدين يصير خير.. مسحت مغليه دموعها وقعدت تفكر في كلامهم... 🍀🍀🍀🍀 وجي يوم حفل تخرج عمر.. كان يظاهر بأنه سعيد بس من داخله كان متحطم ع الاخر.. ماكانتش هادي الخطه متاعه..ماكانش يبي هكي.. كان يبي في اللحظه هادي اميمه تكون خطيبته..وتفرح معاه وتشجعه ع الخطوات الجايه اللي يبيها يخطيها.. ☘المهدي:بلاش تسكير راس وتحرك قدامي للحوش.. عمر:ارجوك يامهدي خليني براحتي وماتضغطش عليا.. الجالي:امك تراجي فيك تحشم ع وجهك وروحلها. طاهر:مزبوط امك تعبت هلبه وانت بعيد عليها.. الجالي بصوت منخفض قال متهكما؛شوفوا من يتكلم. سمعه نضال وقعد يشبح لطاهر. وهما ركزوا عليه انه تمتم.. طاهر:قلت حاجه يالجالي.. الجالي بدون مايشوفله:لا..اسمع عمر والله مانك ماشي في حياتك كان قعدت مقاطع امك.. عمر:اني مش مقاطعها اني نبيها هي وخواتك معاش يخشوا في حياة حد بعد هكي..زي ماخشوا في حياتي وحياة غيرك غدوة يخشوا حتى في حياتك انت. الجالي:مش بالطريقه هادي ياعمر..تقدر توضحلهم الحاجه هادي من غير ماتقاطع امك وتخلي قلبها متقطع عليك.. عمر:جالي خلاص بالله عليك كثرث دوة.. الجالي هز راسه وقال تهكما:انقالت...من عاشر قوما ... ومشي من حداهم.. وطاهر معاه بعيونه وهو يشوفله بحده.. وخوته يشبحوله.. والمهدي ماباش يدقق توا:ع العموم براحتك بس برا اقعد في الحوش متاع بن عاشور..ماطولش في حوش نسيبك.. عمر هز راسه وقال؛حاضر.. ☘☘☘☘☘☘ "شن التخبيط هدا خيرك!؟" طاهر وهو يطلع في حوايجه من الدولاب:مافي شي كملي نومك.. نجاة قعدت تشبحله بإستغراب..بعدين تبعاته بعيونها لين طلع من الدار.. تنهدت وولت رقدت مرة تانيه.. ☘وخوه وهو يحول في ساعته قال:صابر ع تصرفاتك وعارف صبري قريب يوصل حدوده.. عائشه وهي طلعله في حوايج:نصيحه لو بتدخل ماتوقف مع حد ضد حد..حاول تقرب وجهات النظر بينهم ماتخسرش واحد فيهم.. المهدي وهو يفكر في كلامها:مزبوط.. وهي مشت بتحطله حوايجه في الحمام.. شويه وطلع من الدار..جت قدامه.. ركز فيها وقال:وجهك مش عاجبني.. عائشه؛عادي يعني ارهاق طبيعي صغار وسهر مع الصغار والتصحيح والمدرسه ودوشه.. المهدي:شن رايك نطلعوا الليله .. شبحتله شويه بعدين قالت؛مع الصغار!؟ المهدي:نخلوهم عند خديجه.. هي تنهدت وقالت:باهي.. هو مسح ع شعرها وطلع من حداها.. وهي ابتسمت تهكما وقالت في نفسها"من باب الواجب" ☘☘☘☘☘☘☘ تاني يوم.. الساعه 5:00عصرا.. عتيقه:والله الراجل ماينلام ع حاجه..شوفي منظرك كيف رايح..من بعد جيبتك في البنت هادي..وانتي لاقصيتي لاصبغتي..ضعفتي رحتي زي التل منظر وجهك نقول مجبوده من قبر..اكثر من مرة نجيك ع غفله نلقاك بمنظر نتحشم نقعد بيه قدام بوك بش مايقولش عليا وليت عزوز.. عائشه:ياما صبغت وقصيت يام ياما اهتميت بروحك وشريت لبس اشكال والوان وكل شي درته ماخليت شي يعتب عليا..ماقدرتش نخلي قلبه يلتفتلي ولو شويه.. عتيقه؛ايه ومن قلة عقلك سمتيله البنت عليها بش ماينسهاش بكل.. عائشه:يام اني ملاحظتك زي اللي ماتحبيش سدرة والله بديت نخاف نخليهالك.. عتيقه :شن تشبحي فيا قدامك مجرمه!..اني مانحبش اسمها بس ونبيلها اسم تاني ناديه بيها.. عائشه بضحكه:عتيقه.. عتيقه؛هازيه قصدك!! والله قاعد احلى من اسم سدرة هدا.. عائشه بضحكه:سمي وحده من بنات ولادك عتيقه.. عتيقه:لالاا مانبيش نظلمهم..المهم توا وفكينا من التسهويك وقوليلي..معاش جتك سلفتك هديكا.. عائشه:بكل اشبح شن صاير.. عتيقه:ان شاء الله معاش تجي.. ☘☘☘☘☘☘ في مزين" انت الاجمل".. كانت فايزة لاهيه بزبونه ليها عروسه... وطوبى كانت لاهيه بزبونه تانيه جايه مع العروسه تجبدلها في شعرها.. وزوز عاملات يساعدوا في فايزة ع شغلها ع العروسه... طوبى:شن رايك نديرلك فلو..يطلع عليك حلو.. :زعمه؟. طوبى:والله يجيك يجنن مشي مع شكل وجهك.. :تمام ديريلي.. ابتسمت طوبى ومشت خدت الماكينه شغلتها وبدت شغلها.. وبعد ساعه.. كانت فايزة مكلمه شغلها ع العروسه... قريبتها لما شافتها قعدت تزغرد.. :ياعمري طلعتي تجنني خيال الله يبارك طوبى كانت ضامه ايديها لبعض وحاطتهم تحت ذقنها وهي تتأمل في العروسه بنظرات كلها شغف بطلتها.. فايزة بإبتسامه؛ربي يهنيك ويسعدك.. العروسه:وانتي ربي يسلم يدياتك يافايزة.. فايزة بإبتسامه:تسلمي.. قريبتها شبحت لطوبى وقالت:وانتي حبيبتي ربي يحفظك عندك مستقبل كبير راهو.. ابتسمت طوبى بخجل وقالت:شكرا.. وفايزة تشوفلها بإبتسامه.. ☘☘☘☘ وهما مروحات مع بعض للحوش بعد ماسكروا المزين.. طوبى:اني نشوف ان العروسه بمكياج بسيط تطلع احلى بهلبه..وحتى لما تجي تمسح المكياج ماتتغيرش هلبه ع راجلها. فايزة بضحكه:هو كلامك صح..بس هادي قناعات الناس لازم العروسه يكون مكياجها ثقيل وتسريحتها فخمه بش تبان عروسه.. طوبى:هدا غير الميش..قداش يستفز فيا..المشكله ان منظره مايكونش الحلو الابعد الاستشوار غير هكي يكسر الشعرة ويفسدها ويطلع الوحده وهي في حوشها بمنظر يدره الكبد..اني نبيك تعلميني كل شي الا هالاستفزاز هدا... ضحكت فايزة.. بس فيسع اختفت ضحكتها وين شافت حامد واقف قدام حوش شنيبه وعيونه عليها.. طول غيرت عيونها عنه وقالت بآرتباك:تصبحي ع خير طوبى..ومشت بسرعه لحوشها وهي خايفه.. وطوبى استغربت فيها وهي ترد عليها..بعدين التفتت وشبحت لحامد..لقاته هايم في فايزة.. عقدت حواجبها وشبحت لفايزة لقتها خشت.. هي شبحت لباب حوشهم فتحاته وخشت.. ☘فايزة من خوفها سكرت الباب بأكثر من لفته.. "ماما" التفتت وهي تقول محاولة اخفاء خوفها:صفو حبيبتي.. صفاء:درت عشي ماما.. ضحكت وقالت:سلم بنتي الفالحه.. ابتسمت صفاء وجتها امها حاوطتها من كتافها وخشت بيها داخل.. 🍀🍀🍀🍀 وجي يوم المباراة النهائيه في كأس العالم.. وشبه الناس كلها تتفرج عليها... 🌻في شقة المهدي.. الجالي بضحكه:اني وين يخطر عليا كيف كنا طامعين نظموا كأس العالم نضحك. المهدي:لما بعتوا ناس يشوفوا البلاد كان تقدر تنظم الكاس ولالا قلت حشمة ع مستوى عالمي.. طاهر:تي قالك البلاد كلها تبي هد واعاده اعمار من اول وجديد.. المهدي:ايه الازاله لغرض التطوير..زالو وماطوروا شي قعد منظر الشوارع كله كسار قلت شكله هدا تطويرهم.. طاهر:تي هي شن فيها العاصمه من مناظر ولافيها من شي يستر..ماتقولش عاصمة بلاد نفطيه ياراجل.. برا شوف ***** وسنغافورة ودبي...تي هادم شن عندهم قولي ماعندهمش ربع ثرواتنا وشوف وين وصلوا في اقل من عشرين وثلاثين عام..وحني في اربعين عام مادارش كان حاجتين برجين هما نشبحولهم ونشبحوا للقمر.. ضحكوا.. نضال:هي فكونا من الدوة اللي تودي ورا الشمس وتفرجوا المباراة بتبدا.. ☘☘☘☘☘ "الحمد لله ياربي افتكينا منهم" مطيرة:ترا بالله سمعينا سكوتك.. سدرة:عمتي خيرك رابطه راسك بوشاح مشماشي.. غرفه بضحكه:ماهو تشجع في هولندا.. سدرة:ايه والمعنى.. اميمه بإبتسامه؛هدا اللون متاعهم ماهو.. سدرة؛اهااا.. طوبى:يارب يفوزوا.. سدرة؛ادعي قولي ياربي نجحني شن بديري بيهم هادم فازوا ولاخسروا.. مطيرة:خلاص سدرة خلاص ولاكلمه بنفترجوا.. مطت سدرة شورابها للأسفل وحركت راسها يمين ويسار ومشت من حداهم وخشت للكوجينه بتوتي العشي.. ☘☘☘☘☘ وفي حوش الصيد.. كانوا نجاح وعواطف مقعمزات يتفرجوا ع المباراة.. عواطف وهي تتكلم بالتليفون:كانوا فازوا الهولنديه بتعزمني ع غدي مادخليش فيك. "تم حبيبتي..وكان فازوا الاسبان نبي منك 500" عواطف:تمام واني عند كلمتي وخليك انت عند كلمتك.. "تم سلام حبي" عواطف:سلام...وسكرت.. نجاح؛ع شن راهنك.. عواطف:ع 500.. نجاح؛وتيهم من توا.. عواطف:تو نشوفوا... 🍀كانت مباراة قويه وحاميه..وشبه الكل توقع انها تنتهي بركلات الترجيح..بس انيستا في الدقيقه التسعين جاب الهدف.. كل من يشجع في اسبانيا طار من الفرحه خلاص ضمنوا الكاس.. وماهي الا دقايق وتمت المباراة.. سدرة؛معليشي عمتي معليشي مرة تانيه ان شاء الله هاك كولي..ومدتلها خبزة وهي بتضحك.. مطيرة؛قريب نوض نربط الشال هدا ع رقبتك.. قعدوا يضحكوا.. طوبى بضحكه:اول مرة تشجع ميمو وفريقها خدي الكاس.. غرفه؛لا من قال اول مرة قبل كانت تموت في الارجنتين ولا؟ اميمه شبحتلها بحده.. وغرفه تشوفلها بنظرات مستفزة.. صفيه:لاحبيبتي اميمه ماعندهاش ع الكورة ولا كانت تحبها.. سدرة:صح.. ابتسمت واشرت بعيونها ع امها وبنت عمها.. قلبت غرفه عيونها وحطت الخبزة اللي غمستها بالبازلياء في فمها.. ☘☘☘☘☘☘ عواطف بضيق:خلاص غدوة يكونوا عندك.. "كلمه طفطف راهو" عواطف:قتلك من الاول كلمه حتى اني..هي سلام.. "سلام" وانفجرت نجاح بالضحك... حدفت عليها مخده... نجاح شدتها وهي تضحك قالت:ياناري مسكينه تصخف..وقعدت تضحك.. عواطف ناضلتها وقعدت تضرب فيها وتقول:ياسر ياسر ياحيوانه.. ونجاح تقي على روحها بالمخدة ومازال تضحك... 🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀 ...قبل رمضان بأسبوع... مغليه ودموعها ينزلوا:ربي يفتحها عليك ويحفظك ويعليك وليدي ويردك ليا سالم غانم.. عمر بعد باس يدها شبحلها وقال:آمين يام..ديما ادعيلي يام في كل وقت.. مغليه بنبرة باكيه؛من غير ماتوضي يما.. باس جبينها بعدين شبح لخديجه.. خديجه جاته وضماته وقالت عند وذنه:كل شي درته لمصلحتك صدقني.. عمر:خلي كل حد يشوف مصلحته بروحه... بعد عنها ومشي حضن نسرين.. وهي تشوفله بألم.. نسرين ودموعها في عيونها:توصل سالم يارب.. عمر بعد عنها وشبحلها.. وهي ابتسمت من بين دموعها وغمضت عيونها بعدين فتحتهم.. هو يدوب ابتسم بعدين لف ومشي وهو يقول:نشوفكم ع خير.. طلع بسرعه...ومغليه انهارت بالبكي .. خدتها خديجه في حضنها ودموعها تنزل.. ونسرين قعدت تبكي بصمت.. برا.. عمر لاقى بوه سلم عليه.. ومحمد وهو يسلم كان ينصح فيه... بعدين استودعه الله... طلع عمر لسيارة خوه المهدي كان يراجي فيه ومعاه في السيارة الجالي ونضال.. هو مشي ركب جنب نضال.. نضال:جبرتوني نمشي وعارفيني حساس ونكره جو الوداع.. ضحك عمر نص ضحكه.. المهدي بإبتسامه؛نمشوا؟ عمر:توكل على الله.. المهدي:ياالله..وشغل السيارة وتحرك... 🌻فهالوقت كانت اميمه توتي في شنطتها خلاص بتسافر غدوة للسعوديه هي وجدها.. وهي تاخد في حوايجها من الدولاب جي قدام البوكس متاع عمر.. تعبوا عيونها بالدموع.. 《 شوفي اني في كل اللي قلتيه عاذرك باهي..الا في انك تكذبي حبي ليك》.. مسحت دمعتها اللي طاحت وحولت عيونها عنه وقعدت طلع في حوايجها... ☘☘☘☘ وفي المطار... ودع عمر خوته اللي غمروه بالنصائح والتوجيهات... المهدي.. واللي شجعوه ودعموه بكلمات التحفير.. الجالي... واللي خففوا عنه ثقل لحظات الوداع... نضال... ودعهم ومشي وهو حالف انه مايروحش قبل ليوصل للي يبيه...ويحقق طموحه اللي قاعد يكبر في داخله يوم عن يوم.. اختفي عن يومهم.... والثلاثه تحولت ضحكاتهم الى ابتسامات حزن وقلق عليه... 🌺وفي شارع القهوة.. طلعت نسرين من حوش بوها وتوجهت لحوش الجد الواعر.. لما قربت توصل فيه.. طلعت فايزة من حوشها.. عيونهم تلاقت..وكانت نظراتهم لبعض مختلفه.. بين اللوم..وبين الخجل.. غيروا عيونهم عن بعض.. ومشت فايزة من قدام نسرين وكأنها ماتعرفهاش.. ونسرين كملت طريقها لباب الواعر وكأنها ماتعرفش فايزة.. خدت نفس ودقت ع الباب... دقت مرتين..وفي الثالثه فتحت صفيه.. نسرين بإبتسامه:كيف حالك خالتي صفيه.. صفيه بإبتسامه:الحمد لله بنتي..تفضلي خشي تفضلي... 🌻واميمه في دارها.. مقعمزة وفيدها كتيب صغير يحكي عن العمره بالتفصيل.. قراته اكتر من عشر مرات بش ترسخ المعلومات في راسها وتأدي عمرتها بشكل صحيح.. دق باب دارها.. اميمه؛خشي امي.. انفتح الباب وخشت امها ومعاها نسرين اللي شبحتلها بإبتسامه.. صفيه:اميمه.. التفتت لأمها..بس تلقت مفاجأة وين شافت نسرين.. نسرين يإبتسامه:شن حالك اميمه.. اميمه ابتسمت مجامله وناضت مشتلها سلمت عليها وهي نقول:الحمد لله..شن حالك انتي وشن حالك صغارك.. نسرين بإبتسامه:الحمد لله الكل بخير.. اميمه اشرتلها ع المندار وقالت: تفضلي..قعمزي.. نسرين:شكرا..وقعمزت.. صفيه:خل نمشي ندير شاهي مطيبه فطيرة الله يبارك تحبي فطيرتي انتي عاد.. نسرين بضحكه:نموت فيها.. ضحكت صفيه وهي تقول؛هي شويه بس.. ومشت طلعت وسكرت وراها الباب.. كانت ان نسرين جايه تبي اميمه في موضوع ضروري ويبي الكلام فيه ع انفراد.. صفيه ام ومايغيبش عنها اي تفصيل يخص بنتها فاهمه كل وعارفه كل شي.. 🌻اميمه وفي مقعمزة مقابله نسرين؛نقول ان شاء الله اني درت اللي عليا والتوفيق من الله.. نسرين:موفقه يارب وبالنجاح.. اميمه:آمين..وشبحت لظرف في يد نسرين.. لاحظتها وتنهدت بعدين قالت:عمر اليوم سافر.. حست بوجعه في قلبها خلت عيونها يتحول لونهم للأزرق ويغرقوا بالدموع.. نسرين:بعد التخرج سافر بش يشق طريقه...لو تعرف قداش تعب وجري بش حصل هالفرصه..هو قالي ماكانش في بالي ندير هدا كله لما خشيت الكليه كنت نبي نقرا نتخرج نطلع طيار وخلاص ..بس بعدين تعلمت يكون عندي طموح..اميمه علمتني . قلبها بدت تقوى نبضاته وقاعد يوجع فيها.. نسرين:اميمه عمر حكالي كل شي بالتفصيل من الاول للآخر.. شوفي اني معاك وعاذراتك ووقفت في صفك..اللي تعرضتيله مش ساهل..عندك حق نفقدي الثقه فيه ومعاش تصدقيه...هو قالي هكي..بس...بجديات ياأميمه عمر خوي يحبك من قلبه لما قالك نحبك ماكذبش عليك بكل..نقولك هالكلام بثقة لأني نعرف خوي كويس..عمر المتكبر اللي يحب رويحته ومش شايف حد غير روحه..توا ولى همه كله انتي نسي نفسه وقعد بس يفكر ليل مع نهار...يبي يكسب ثقتك يبيك تصدقيه وتعرفيه ان كذب في كل شي معاك الاحبه ليك.. واميمه تسمع وقلبها موجوع وينبض بالحب نبضات متلاحقه سريعه.. نسرين:انتي ماعطتيشي فرصه يشرحلك عن نفسه ويوضحلك الصورة..هدا علاش كتب كل شي يبي يقولك هني.. ومدتلها الظرف.. اميمه قعدت تشبحله.. نسرين؛وقالي حلفيها بالله ماتمزقها قبل لتقراها وبعدين هي حرة دير فيها اللي تبيه...بالله عليك يااميمه اقريها وعطيه فرصه..اللي تلقى حد يحبها هكي ويحارب ع خاطرها ويصلح من نفسه وغلطه في حقها في زماننا هدا..مفروض تتمسك بيه بقوة وماتخليشي يريح من بين ايديها.. خدت اميمه الظرف ويدها ترجف.. حست قلبها بيطلع من مكانه.. نسرين:وتوا خليني نطلع نشرب مع خالتي صفيه الشاهي..وناضت.. ناضت معاها اميمه.. نسرين شبحت لشنطة السفر وقالت؛مسافرين غدوة؟ اميمه وهي شاده روحها بالسيف:امم.. ابتسمت نسرين وقالت:ع خير يارب وعمرة مقبوله مسبقا.. اميمه؛امين..شكرا.. هزت نسرين راسها وهي مبتسمه بعدين مشت طلعت من الدار وسكرت الباب وراها.. واميمه قعمزت وقعدت تشبح للظرف للحظات.. بعدين فتحاته...وطلعت منه الرساله.. وفتحتها.. ودموعها طاحوا لما قرت.. (أميمه...) كانت الرساله مكتوبه بخط حلو ع الآخر.. معروف خط عمر جميل وكأنه خطاط وهادي وحده من الحاجات اللي ميزت عمر في نظر اميمه.. قعدت تقرا في الرساله بعيونها اللي كان مع الدموع موجهم ازرق... (ان شاء الله تكون فتحتيها وقريتيها مارديتهاش ع نسرين ولامزقتيها ولوحتيها... اميمه...الكلام اللي بتقريه كله توا مكتوب من قلبي.. مش حنقولك نحبك لأني قلتها وعاودتها اكثر من مرة لأن هالكلمه فقدت مصداقيتها عندك.. بس بنقولك..اني حنقعد مديون لبنت عمك عمري كله..لولاها ماكنتش عرفتك..ماكنتش عشت معاك مشاعر حلوة عمري ماعشتها قبلك..ماكانتش نظرتي للحياة تغيرت وبديت نشوف فيها بعيونك ومن عيونك...عيونك اللي ذوبوا قلبي من نظرة وحده...ياه يااميمه قداش اني كنت اعمى ومغفل..كيف قدامي السنين هادي كلها وماشفتكش..ولاعرفتك.. مش لأنك مش ملفته للنظر لا...اني اللي كنت اعمى ومانشوفش..ولما كنت نلعب بيك ونتسلى.. عيونك..نظراتك..ابتسامتك..اسلوبك..خجلك ارتباكك..توترك..ترددك...خوفك...هما اللي لعبوا بقلبي لعب وتسلوا بيه.. انتي احلى من احلى بنت في الدنيا..من داخل قبل برا...حبيتك الداخل متاعك اللي كان احلى من الظاهر..برغم ان الظاهر ذهب شيرتي حتى هو.... اميمه... اني توا ولاكل طموحي ومنيتي في الدنيا ان ندير لنفسي اسم ومكان ونولي الراجل اللي يستاهلك ويناسبك.. اميمه اني مش متخيل تشاركني وحده حياتي غيرك.. ومش حنتنازل عن الحاجه... مش عارف اذا كنتي من نصيبي ولالا..هالشي مخوفني.. بس اللي مطمني في نفس الوقت...اني عارف مكانتي في قلبك شن شكلها...وقلبك مايقدرش ولايعرف يخون.. زي ماقلبي خدي عهد عليا وعليه..انه لايخون حب ولايشوف لغيرك... هدرزت هلبه صح؟!ههههه..اسف بس صدقيني مازال ماقلت شي.. اخر حاجه.. اللي جيته يومها كنت نبيك تفصليلي بيه دجاكه تانيه تكون واتيه ع موعد سفري..بش ناخدها معاي ونلبسها وين مانمشي..بس للأسف ماليش فيها نصيب وان شاء الله يكون هدا حد خيبتي معاك.. اميمه... لو قريتي الرساله ارجوك دسيها وارجعي اقريها اكثر من مرة لين تصدقي كل حرف فيها.. واخيرا..عارف انك غدوة مسافرة..ادعيلي مش تنسي وماتقوليش بصفتك منو..ادعيلي واكسبي دعوة الملايكه...ولك بالمثل...وربي يوصلك سالمه ياعمري انتي.. نحبك موت.... الكابتن عمر شنيبه...) ضحكت وهي تبكي لما قرتها اخر مافيها.. لقت روحها ضامه الرساله وهي تبكي بالعبرة المكتومه.. تبكي وقلبها واجعها...قلبها اللي يحبه هلبه...لكن مش قادر يسامح....
#قبل_العاصفه #طوبى
...يتبع....
(تصحيح..مواليد شخصية عمر..88...مش 89)
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
