#طوبى "جنة طوبى"
#جمان_فريد
#الجزء_التاسع_والخمسين"اسرار "
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
يوم الأحد..
الساعه 7:30صباحا..
فهاليوم من لما ناضت لصلاة الفجر معاش ولت رقدت..
طيبت الغدي ووتت الفطور..
فطرت راجلها وسقداته لخدمته..وهي بعد طاب الغدي غطاته كويس..
ومشت بسرعه جهزت نفسها..
لبست بدلة لونها اسود جاكيتها طويل للركبه وفي الثنيات اللي جهة الصدر ازرار ذهبيه كبيره..
ومن داخل بلوزة بيضه واصله للفخد..
ولبست شاربه سودا فيها خطوط ذهبيه من الحواف..
وشنطه سودا مربعه شدتها في يدها...
خدت مفتاح السيارة والتليفون ونزلت بسرعه لوطا..
قبل لتطلع لبست حذاء اسود..
وطلعت وسكرت الباب كويس..
ومشت لسيارتها..
ركبتها وهي تقول..
سبحان الذي سخر لنا هدا وماكنا له مقرنين انا الى ربنا منقلبون..
شغلت السياره وقعدت تراجي فيها تسخن وهي تردد في
#تاج_الذكر
شويه وقالت؛بسم الله توكلت على الله..
وتحركت بسيارتها وطلعت بيها من الفيلا...
🍃في الطريق..
كانت تفكر شن بدير في يومها هدا..
ومن داخل كانت حاسة بتوتر وشوية خوف...
بعد ماقطعت مسافه لاباس بيها..
وصلت لمدرسة سدرة..
درست السيارة في مكان مناسب وقعدت فيها..
زادوا التوتر والخوف..
وقعدت تسترجع في عقلها كلام نجاح في الحديث اللي دار بينهم امس..
🔺️في وقت سابق..
نجاح بإبتسامه؛صراحة عجبتيني..شوفي الموضوع مش ساهل ومش صعب..الادارة تبي شخصية قياديه بالفطره وانتي مادامك فكرتي تشدي مكان اختك معناها فيك الحاجه هادي عندك روح القياده زي مايقولوا..
ابتسمت طوبى بتوتر وقالت:مش عارفه الحق اني همي كله نحافظ ع تعب اختي بس..
نجاح؛فاهمه عليك...المهم توا ركزي في كلامي كويس بنتي..لازم تكوني جديه..وتباني قويه وتعطي فكرة اللي يخدموا عندك في المدرسه انك قويه وقادرة مستاقظه لكل شي وورا كل شي..لو جيتي تسألي اسألي بقوة مش بضعف وخوف ولاتباني قدامهم انك خاشه بعضك ومش عارفه تتصرفي..خليهم يعطوك المعلومات اللي تبيه وهما يبوا رضاك..الادارة في بلادنا بالذات هكي تمشي راهو..طبعا ماتشديش هلبه وماترخيش هلبه فهمتي عليا..
هزت طوبى راسها وقالت:ايه..
نجاح؛تبي اي شي اي خدمة كلميني ولاتعالي هني ولا في المدرسه..
ابتسمت طوبى وهزت راسها..
🔺️في الوقت الحاضر..
خدت نفس وقالت...
اللي اني أبرأ من حولي وقوتي وألجأ لحولك وقوتك..لاحول لي ولاقوة الابك..
حولت المفتاح من السيارة ونزلت منها..
سكرت كويس..ومشت خشت للمدرسه..
كانت تمشي بثبات وقوة..
هي كانت تتصنع فيهم بش تنسى التوتر والخوف اللي تحس بيهم وفي نفس الوقت طبق في نصيحة نجاح..
وين خشت شافت ابلات واساتذه متفرقين في أماكن مختلفه...
وعاملات ينظفوا..
عقدت حواجبها وهي تشوف للعاملات اللي ينظفوا..
وتشوف في اللي يمشي ويجي كيف تتعرقل حركته لما يفوت من حداهم..
من بعيد شويه..
نائبة المديره طلعت من مكتب الادارة..
عيونها جو عليها..مشتلها طول وهي تقول:استاذه طوبى صباح الخير..
كل الموجودين ركزوا وقعدوا يشوفولها..
طوبى؛صباح الخير..معليشي ابله علاش ينظفوا توا؟
شبحتلهم الابله وقالت؛ديما هكي ينظفوا الصبح وبعد نهاية الدوام..
شبحتلها وقالت؛امتى يجوا؟
:الساعه سته ونص يكونوا هني..
رفعت حواجبها وقالت؛من سته ونص وتوا ينظفوا؟
:من قبل هكي استاذه..
طوبى هزت راسها وهي تشوفلها..
والنائبه تشوفلها وهي تقول؛ابله تفضلي للمكتب بش نحكوا في تفاصيل اكثر..
طوبى شافت لساعة يدها وقالت؛الطابور قريب ونبي نحظره..
نزلت يدها جوها الابلات والاساتذة وبدوا يسلموا عليها..
"صباح الخير استاذة..صباح الخير..اخت استاذة سدره؟!"
طوبى وهي تمرر في نظرها عليهم؛صباح الخير..ايه اختها..
كلهم باصوات متقطعه..
"ان شاء الله لاباس عليها..ربي ينوضها بالسلامه"
هزت راسها وهي تقول:آمين.
🍃وهما واقفين حواليها كانت تبان قويه وجديه وواخده ع الوضع وعادي عندها..
ومن داخل الله عالم بيها..كانت خايفه هلبه..ومتوترة ولو ركزوا عليها شويه راهم شافوها وهي تبلع في ريقها🍃
دقايق...
وبدي الطابور الصباحي..
وطلعت طوبى مع النائبه والابلات والاساتذة بش يحضروا الطابور..
طوبى وقت الطابور...
لفت ع الطلبه وهي مركزه ع هلبه حاجات..
اولها الزي متاعهم..والتزامهم في الطابور..
والابلات يراقبوا فيها ويحكوا عنها..
:تبان صغيره هلبه..
؛ايه..لكن شخصية زي اختها المشيه والشبحات نفسهم..
:خاشه بقوة هادي..
:مرات غير في البدايه هكي بش تفرض احترامها وبعدين تنفش..
؛صح..ناقصها الخبره والله جماعة الادارة ياكلوها ماكله اللي ماقدروش يديروه مع استاذه سدرة يديروه معاها...
🍃وطوبى وهي وافقه في اخر الساحه وتسمع في الاذاعة المدرسيه..
كان تمرر في نظرها ع الابلات وهي تتفكر في كلام نجاح..
《لازم يكون عندك بين المدرسات او حتى الاساتذه ناس يكون ولائها ليك انتي وبس يجيبولك اي معلومه عن اي حد يفكر يلعب من وراك ..
..لهالدرجه!؟..قصدي هادي مدرسه مش مؤسسة حكم!..
..هي هي..اي مكان يكون فيه رئيس ومرؤوسين يصير فيه هكي واحرف..نجيبلك مثال..بإعتبار مدرسة اختك خاصه يعني اللي بيقري صغاره فيها يدفع..في ابلات ياخدوا مقابل مادي بش يسربوا اسئلة الامتحانات..او يكون عند صديق او قريب ليهم مدرسه منافسه او هما نفسهم بيديروا مشروع زي هدا..بش يجيبوا طلبة للمدارس هادي يشدوا اولياء الامور ويقعدوا يطلعوا في عيوب للمدرسه ياعيوب ولما يتأكدوا ان ولي الامر معاش يبي عيله يقعد فيها يدلوه ع المدارس اللي يبوهم..
...مصدومه الحق!..ماتخيلتش الوضع يكون هكي بكل..
..خفتي؟
...خفت..لكن مش حنوخر خلتيني نصر اكثر من قبل...》
🍃غيرت عيونها عنهم وركزت ع برامج الإذاعه...
~~~~~~~~~~
بعد الطابور..
خشت طوبى ومعاها النائبه..
النائبه كانت تقول؛توا استاذة..
طوبى رفعت يدها لتحت رقبتها وهي تقول؛توا نبيك تخبري اولياء الامور عن الاجتماع اللي بنديره غدوة بش يحضروا لازم يعرفوني وبعدين اني نعرفهم..
وخشت لمكتب الادارة..
وهي وراها قالت بإبتسامه خفيفه؛حاضر..
قعمزت طوبى ورا الكرسي وهي تقول؛نبي الجداول وكشف بأسماء اعضاء هيئة التدريس كلهم وكل من يخدم هني..
؛موجود عندك في المنظومه..
شافت طوبى للشاشه وقالت؛تمام...ياريت ديري اللي طلبته منك..
هزت راسها وقالت؛حاضر..نستأذن..
طوبى؛سكري وراك الباب..
؛تمام..
ومشت طلعت وهي تحاول تكتم عصبيتها..
بعد ماسكرت الباب..
طوبى غمضت عيونها..وخدت نفس عميق بعدين طلعاته..
فتحت عيونها وقالت..يارب...
☘☘☘☘☘
"الجو كئيب في الحوش وحتى برا"
حسناء وهي تشرب في القهوة:ازمة وتمر إن شاء الله..
تنهدت اميمه وقالت؛ان شاء الله..وشربت حتى من مق القهوة متاعها..
ع جية زميله ليهم..
:صباح الخير صبايا..
الزوز ردوا ؛صباح الخير..
:شن جوكم؟
اميمه؛تمام..الحمد لله..
حسناء؛جو الصقع..
؛ايه..بنجمدوا..ايه حقه اميمه اللي سمعته..اطلقتي؟
حسناء شافت لأميمه..
اميمه هزت راسها وقالت؛ايه..
؛وااك..تمنيتها تكون اشاعه قلت بنمشي نسألها وان شاء الله تقولي اشاعه..خسارتكم كنتوا طالعين ع بعض هلبه..
اميمه؛مافيش نصيب..
:تعرفي هادي عين صدقيني عين اللي اطلقتوا بسرعه هكي وانتم واخدين بعض عن حب صدقيني عين..
حسناء؛ماينفعش كلامك هدا توا كل حد مشي ع حاله خلاص..
شبحت اميمه لمق القهوة وهي تحاول تتماسك..كانت تبي تبكي بس قاومت هالرغبه بقوة..
:صدقتي..بس ماكتر ماوجعوني هكي تكلمت..باهي قوليلي اللي سمعته تاني..ان دكتور قصي السبب حقه؟..
شبحتلها وهي عاقده حواجبها وقالت:نعم!؟
حسناء بشي من الربكه؛دوة فاضيه مادوريهاش..
اميمه؛غير شويه حسناء..قولي..كيف دكتور قصي السبب؟
:غريبه مش واصلاتك الدوة المستشفى كلها تحكي فيها..اهتمام الدكتور قصي بيك سبب طلاقك..
اميمه؛شن القطاف هدا..من يقول فيها الدوة هادي!؟؟
حسناء؛قتلك فوتي اني..
شبحتلها وقالت؛معناها حتى اني انتي تعرفي!..
سكتت حسناء وهي مضايقه..
قعدت تشبحلها اميمه وهي معصبه..
؛الدوة هادي قداش ليها طالعه اميمه من قبل ماتطلقي..
شبحتلها برفعة حواجب وقال؛قبل!!؟
؛ايه..قالوا صارت بينك وبين راجلك مشاكل بسببه..
قعدت اميمه تفكر بصدمه في اللي تسمع فيه..
وتخيلت شن اللي كان ينقال عنها...
ضمت شواربها لداخل بغضب..
بعدين مشت من حداهم..
حسناء؛اميمه وين ماشيه!؟
واميمه ماشيه وهي معصبه ومابتش ترد عليها..
حسناء شبحت لزميلتهم بغضب وقالت؛تريحتي!..
؛شن دخلي اني!؟
شبحتلها من فوق لتحت بعدين مشت وهي معصبه..
🍃طلعت اميمه لباحة المستشفى..
لوحت المق في المكب وكملت طريقها وهي في قمة الغضب..
فجأة..
وقفت في مكانها..
لما تفكرت اخر لقائين جمعوها بعمر..
والكلام اللي قاله في وقتها..
قالت في نفسها وهي مصدومه..
"معناها الدوة وصلاته حتى هو !"
تبدلت ملامح الغضب ع وجهها للبكاء...
مشت خطوات متلاحقه لين بعدت هلبه وقعدت تبكي..
تبكي وقلبها موجوع..
☘للأسف..
رغم كل اللي صار قلبها مش قادر يتخلي عن حب عمر..
وصعب ع القلب يكره بعد مايحب..
القلب بعد مايحب ممكن يقسى وينسى لكن بصعوبه..
بالذات لما يكون عمر هالحب طويل..☘
بعد مابكت وطلعت اللي في قلبها..
قعمزت مع روحها وقعدت تفكر في الدوة اللي طلعت عليها
كيف تقدر تفندها وتنسي الكل فيها..
طبعا مش اميمه اللي تختار الهروب لهدا مش حتسيب المستشفى..
اختارت كعادتها المواجهه بس هالمرة بطريقة مختلفه..
🍃وبعيد عنك ياليبيا ...
لجنوب افريقيا...وين ماكان قاعد عمر...
كان مداير اتصال بالعيله..
تحديدا مع بوه...
عمر؛لازم نعقد عليها في اقرب وقت بش نكمل باقي اجراءات الاقامه..
"تعقد عليها وتسافر بيها لاهي بدير عرس ولاانت داير عرس علاش طولوا فيها"
هو تنهد بضيق وقال؛مزبوط..ماعندي علاش نطول فيها..خلاص بوي تفاهموا انت وخالي ورد عليا..نقولك كان تقدر تخليها الاسبوع هدا خير وخير..
"خلاص تو نشوف خالك ونرد عليك.."
هز راسه وع وجهه واضحه ملامح الضيق وقال؛تمام...
☘☘☘☘☘
الساعه 11:30صباحا..
في كلية التربيه..
تحديدا الباحه متاعها وين مامجتمعات طوبى وصاحباتها...
طوبى بضيق؛صعبه بكل يابنات والله طول الوقت واني متوترة وخايفه وندير في روحي عاديه..
؛ادارة مدرسة مش حاجه ساهله..
طوبى:صح..لكن مع الوقت لما نتعود تو يتحول الخوف اني اللي يهمني من هدا كله تعب اختي مايضيعيش نبيها وين تولي ان شاء الله تفرح لما تعرف انها خلت حد وراها ينعبى عليه..
شبحولها صاحباتها بإبتسامة اسف..
كلهم كانوا فاقدات الامل من ان سدرة ترجع تفيق لأن اغلب اللي سمعوا عنهم خشوا غيبوبه كان نهايتهم الموت..وحاسين ان طوبى عارفه هالشي بس كانت تعطي في روحها امل من حبها لاختها وعدم استيعابها فكرة فقدانها...
هي تنهدت وقالت؛اني شاغلتني القرايه الحق مانبيش نوقف قيدي نبي نكمل..
عبير:عادي حبيبتي الحضور مش مهم هلبه الافي بعض المحاضرات تقعدي تغيبي ساعة ساعتين عن المدرسه بش تحضريهم..الشيتات والكتب والبحوث كله نجيبهولك ونساعدوك فيه..
؛ايه بيبو مادوري شي حبيبتي..
تعبوا عيونها دموع وهي تشوفلهم وتقول؛ياعمري محلاكم ربي مايحرمني منكم..
ونزلوا دموعها..
كلهم قالوا؛لاااا..
وعبير مسحتلها دموعها وقالت:خلاص ببوشه ياسرك بكي..
خدت نفس ومسحت دموعها ورشفت..
وهما يشوفولها بحزن ع حالها...
☘عدت نص ساعه خدت فيهم طوبى المحاضرات اللي فاتوها..
ومشت طلعت من الكليه...
وهي طالعه لسيارتها...
🍃كان عبد القيوم مدرس بعيد شويه..
مش جاي يشوفها..ولايراقبها..
كان جاي يبي يعرف من هي اللي مشي خطبها في مكانها...
هو مش هلبه يعرف حاجه زي هادي..بس كان يبي يفهم اللي صار...
لكن..
وين شافها...وصارتله نفس الحاله اللي تجيه لما يشوفها..
كره نفسه هلبه..
وحس انه يتعذر بأعذار واهيه بش يشوفها لاأكثر...
طول تحرك بالسيارة ومشي من طريق عكس اللي هي مشت منها..
وهو في السيارة..
كان يهزب في روحه وهو يقول؛تسبل تسبل..كلهن سبل..بتكذب ع ربي ولابتمشيها عليه كيف مامشيتها ع روحك!؟
خبط الدومان وقعد ساكت ومن داخل مازال قاعد يهزب في روحه...
🍃وطبعا مش اي حد يلوم نفسه ع الغلط اللي ديره زي ماقاعد يدير عبد القيوم..الناس اللي تعرف ربي وتخافه..اصحاب القلوب السويه هما بس اللي مايتحملوش الذنوب اللي يرتكبوها بالذات لو كانت كبيره🍃
☘وهالكلام اكيد ماينطبقش..
ع امثال مختار..
اللي واقف بسيارته في جامعه طرابلس قاطع_ب يراجي في اريج...
ولما جت اريج وبانت عليه..
مختار؛انزل..
نزل السواق ومشي لأريج طول..
☘وهي كيف جاية بتفتح سيارتها وتخش..
"ياأبله"
شبحت لمصدر الصوت وشافتله بإستغراب وقالت؛تفضل..
:خالك في السيارة يبيك شويه..
وشبح للسيارة..وهي شبحتلها..
كانت العاليه المظلمه..ومنظرها يجيب الشبهه..
قالت؛قوله معاش نبي نشوفه ولانعرفه..
غيرت عيونها عنه وركبت سيارتها..
والسواق مشي طول لمختار.
ركب وقال؛قالت ماتبيش تجي..
مختار بحده؛قول شن قالت بالزبط..
السواق؛قالت قوله لا نبي نشوفه ولانعرفه..
وهو كان يشبح من روشن في سيارتها كيف طالعه من الجامعه..
هز راسه وقال؛تحرك..
السواق؛حاضر...
☘☘☘☘☘☘
"السلام عليكم"
؛وعليكم السلام تفضلي..
طوبى ؛اني امس حجزت عند الدكتورة اسمي طوبى لطفي الواعر..
؛لحظه شويه..
دورت الموظفه ع اسم طوبى في المنظومه وقالت؛تمام..تفضلي قعمزي شويه وتطلع الحاله اللي عند الدكتورة وانتي خشي بعدها..
طوبى هزت راسها ومشت قعمزت..
قعدت تستنى وهي تهز في رجلها بتوتر..
شويه وطلعت الحاله اللي عند الدكتورة..
؛تفضلي..
ناضت وهي مبتسمه مجامله ومشت خشت للدكتورة...
~~~~~~~
الدكتورة؛درتي تحاليل؟
طوبى:ايه امس واتصلوا بيا المعمل في الليل وبلغوني بالنتيجه بس واني جايه هني ماقدرتش نخطم عليهم خفت يفوت الموعد..
الدكتورة؛تمام مش مشكله..ترا نوضي معاي..
ناضت طوبى وحطت شنطتها..
ومشت مع الدكتوره لسرير الفحص..
بعد ماتمددت عليه ودارت الدكتورة معاها اللازم للفحص..
حطت عليها الجهاز...
ولما حطاته زاد توتر وخوف طوبى..
الدكتورة؛شوفي غادي للشاشه..
شافت طوبى للشاشه...
الدكتورة قعدت تشبح معاها وهي ساكته...
طوبى بدي قلبها يدق بقوة..
الدكتورة؛شفتيها هديكا الحاجه الصغيره اللي تبان زي حبه الفاصوليا غير كبيره شويه..
تعبوا عيون طوبى بالدموع وهي تقول؛ايه..
الدكتورة؛هو هدا..
ابتسمت طوبى من قلبها ودموعها طاحوا..
شعورها من جماله لايوفيه اي وصف حقه..
شعور يكون في جوفك قطعه منك..عيلك..مشاركك كل شي..
دمك وانفاسك..وارواحكم متصله..
ولاأحلى من هكي شعور...
☘رزقه الله لكل مشتاق☘
الدكتورة؛عمره سته اسابيع..
تفاجئت طوبى وهي تقول:سته!؟
الدكتور ايه..خاشه الشهر التاني..تقدري تسمعي نبضه توا..
قلب طوبى فر...شبحت للدكتورة وقالت بلهفه؛بالله عليك جيبي تليفونه من الشنطه نبي نسجله..
الدكتوره بإبتسامه قالت للممرضه؛جيبي شنطتها..
الممرضه وهي مبتسمه:حاضر..
🍃وجابولها الشنطه..
وعطوها التليفون وحطت التسجيل وعطاته للممرضه بش تسجل اول ما يبدا..
الدكتورة:جاهزة..
طوبى بضحكه من بين دموعها:اكيد..
شغلت الدكتورة الصوت..
وبدت طوبى تسمع في نبضات قلبها التاني..
تسمع ودموعها ينزلوا زي السيل..
حست بارتباط قوي...قوي هلبه..ربك بينها وبين هالمخلوق الغير واضح المعالم..
فهاللحظه طوبى..حست بشعور حب مختلف وفريد من نوعه...
حب مايشبهمش اي حب..
حب يخليها تهدي روحها للمحبوب من قبل ماتعرف وبدون أي مقابل مادي ولامعنوي...
ماقدرتش تتمالك نفسها..قعدت تبكي..
والدكتورة والممرضه يشوفلها بإبتسامه وردة فعلها اثرت فيهم هلبه...
☘☘☘☘
طلعت طوبى من عندهم وهي حاسه روحها وحده تانيه..
المشاعر الحلوة اللي قاعده تعيشها توا نستها كل شي..
ركبت السيارة..
وطلعت التليفون واتصلت بالجالي...
"ايوه قلبي"
هي بإبتسامه قالت؛مروح توا؟
"نبي ساعه تانيه"
طوبى؛تمام مش مشكله..
"روحتي؟"
طوبى؛في الطريق..هي مانعطلش عليك..
"سلام قلبي"
طوبى؛سلام..
وسكرت منه وحطت التليفون جنبها وشغلت سيارتها وتحركت طول لحوشها...
🍃وفي مكتب راجلها..
نجاة؛شن تبي؟
الجالي حط تليفونه ع الطاوله وقال؛تسأل فيا روحت ولامازال..ايه قوليلي عجباتك الدكتورة؟
نجاه؛كويسه هلبه وعاملتني معامله خاصه من وين تعرفها..
الجالي؛مرت صديق ليا ياما خدمتهم...حوشهم اللي ساكنين فيه اني صممت خريطته..
نجاه؛اها..تمام..وافقتلي ع الاجازة..
مدلها الورقه وقال..ايه ارقدي شهر كامل..
خدت الورقه وقالت بضحكه؛ولدك خلاني تنباله..
ابتسم وقال؛ولدي!؟
ابتسمت وقالت؛حساته بيجي ولد..
رفع حواجبه ونزلهم..
شبحتله بضيق وقالت؛مانبيشي يجي في الظلام..
شبحلها وقال؛مش حيجي في الظلام صدقيني..لو نخسر كل شي يانجاه..
تعبوا عيونها دموع وقالت؛جديات جالي..
الجالي:من غير ماتفكري فيها هادي خلاص انتي توا بتولي ام صغاري..
ابتسمت من قلبها وهي تقول؛نموت فيك موت..
ضحك ضحكه خفيفه وقال؛خلاص نوضي روحي وارتاحي واي حاجه تبيها ابعتيلي رساله مش مخلي تليفوني اليوم..
هي بضحكه قالت؛رد بالك لعبتك تكبسك..
الجالي؛لازم نعصب ونهزب ولا!..
ناضت وهي تضحك بعدين حطت يدها ع بطنها وقالت..
باي بابتي..
ضحك..
وهي قالت..سلام روحي..
الجالي بإبتسامه؛سلام..
بعتتله قبله في الهوا..ومشت طلعت من حداه...
بعد ماطلعت..
هو تنهد بضيق وقال؛يارب انت حلها..
☘☘☘☘☘
وبعد ساعة..
في الفيلا..
خشت طوبى لدار المرسم متاعها وفي يدها التحاليل وصورة الجنين من جهاز الايكو..
حطتهم في دولاب الادوات وسكراته بالمفتاح..
خدت نفس..بعدين مشت طلعت من دار المرسم..
ومشت بإتجاه دار النوم..
سمعت تليفونها يرن..
سرعت خطواتها وخشت للدار وخداته من ع الزيانه وردت..
طوبى:السلام عليكم..
"وعليكم السلام بنتي ماكانش حداي التليفون"
طوبى:ولايهمك بابا..شن حالك حبيبي وشن داير..
"الحمد لله بنتي الحمد لله..انتي شن حالك اليوم؟"
طوبى:الحمد لله كويسه..
"مشيتي للمدرسه"
طوبى:ايه مشيت..
"وشن صار معاك"
هزت راسها وقالت؛مشت الامور بابا مع الايام كل شي يبدا ساهل..
"ربي يساعدك بنتي ربي يساعدك..اهم شي ماتقصريش في حق حوشك وراجلك"
طوبى ودموعها نزلوا؛ان شاء الله..ماكلمك حد اليوم؟
"كلمني خالك قال مروح الايام الجايه"
عقد حواجبها وهي تمسح في دموعها وقالت؛بروحه؟
"ايه يوسف ومرت عمك قاعدين غادي"
طوبى؛باهي هو علاش بيروح؟
"بنتي خالك وراه مسؤوليات هني نسيتي انه بيستلم منصب مهم في البلاد"
تنهدت وقالت؛ايه صح مزبوط نسيت...
تنهد من اعماقه وقال..
"خليها على ربك يابنتي خليها على الله"
طوبى وهي تحاول تتكلم بنبرة عاديه:ونعم بالله..
"هي مانطولش عليك بنتي بري شوفي شن تبي ديري..بالسلامه"
طوبى؛بالسلامه حبيبي..وسلم ع الكل..
"يوصل..السلام عليكم"
طوبى:وعليكم السلام..
حطت التليفون ع الزيانه..
ومسحت دموعها كويس..
سمعت صوت باب الفيلا الخارجي انفتح..
طلعت من الدار ومشت نزلت للكوجينه بش توتي الغدي...
☘☘☘☘☘
"هيا انزلي"
صابرين؛وين؟
مختار:نركبوا لشقتي تشوفيها مش ديما تقولي خاطري نشوفها..
صابرين وهي مبتسمه بريبه؛ايه..بس كان كلام هكي وخلاص قلته..
ابتسم وقال؛باهي اني نبيك تشوفيها..
صابرين؛مانقدرش لازم نروح توا..
مختار:علاش شن وراك؟...
صابرين بشي من الارتباك؛مانقدرش نعطل اختي تعارك هلبه بعدين..
مختار:انتي مش طفله بش تحسابك ماليهاش حق تدخل فيك من اصله..
صابرين:لا ليها هي اكبر مني واني ساكنه معاها..
هو قال؛مش معطلين هلبه نص ساعة نشربوا فيهم فنجان قهوة ونهدرزوا بعدين تروحي..
صابرين بإرتياب؛صعب اليوم مختار...
هو قلب وجهه عنها وقال بنرفزة:روح بيها..فتح الباب وقال..رد بالك تتصلي بيا..
صابرين بصدمه:غير استنى مختار افهمني!
سكر الباب ومشي بيخش للعمارة..
والسواق تحرك..
هي قالت؛شويه استنى شويه بس!..
قربت من الروشن وهي تخبط عليه وتنادي:مختار..مختار!..
وعيونها شافوا مختار كيف خش للعمارة بدون مايلتفت..
والسواق ماشي بالسيارة لين بعد بيها عن العمارة..
بدت تبكي بخوف ليكون مختار سيبها خلاص..!
الحاجه هادي ماتتحملهاش صابرين..مختار ولى كل شي في حياتها...
معاش تقدر تعيش من غيره..
طلعت تليفونها من الشنطه زي المجنونه..
وايديها يرجفوا خشت ع اتصالات وع رقمه واتصلت بيه..
والخط يفصل تلقائي وعاودت اتصال اكثر من مرة وصارمعاها نفس الشي...
هني فهمت انه دارلها حظر..
صابرين بصدمه؛حي عليا..! شبحت للسواق وقالت..بالله عليك ردني خلاص ردني..
والسواق ماباش يرد عليها نهائي..
هي عيطت عليه وقالت؛قتلك ردني..!
ولاعبرها بنظرة من المرايه حتى..
خبطت ع الكرسي اكثر من مره وهي عاضة ع سنونها وتعيط بكتمان..بعدين خبط فخدها وقالت...حمارة..غبيه..غبيه..!
وشدت بيدها طرف بالطوها بقوة وقعدت تبكي...
☘☘☘☘☘
طلع من الحمام وهو يمسح في شعره بالفوطة..
لقاها واقفه ع طاولة المكوى وتحدد في حوايجه..
عقد حواجبه بإستغراب لما شاف اغلب حوايجه ع السرير..
قمصان..جاكيتات..وبنطلونات...
شبحلها وقال متسائل:شن ديري..
طوبى وهي لاهيه؛نحدد..
الجالي؛عارفك تحددي نشبح فيك..قصدي علاش مطلعة حوايجي كلهم..
طوبى وهي تحدد؛اخترتلك كم لبسه تكمل بيهم باقي الاسبوع بنحددهم كلهم ونعلقهم في الدولاب...
حطت المكوى ع تركينه وقلبت القميص اللي تحدد فيه بعدين وولت تحدد..
هو شبحلها شويه بعدين قال..كويس..
مشي علق الفوطه ع الشماعه..ووقف ع الزيانه خدي المشط..
وعيونه جو ع صونيه متوسطه فيها فواكه منوعه..
استغرب كذلك لكن ماباش يسألها..
مشط شعره..وبعد ماكمل..حط المشط ع الزيانه..وخدي عطره وقعد يبخ منه..
طوبى لما شمت ريحته حست بغثيان..
قعدت شاده روحها وخلاص..
هو حط عطره وقال؛ماشي للمكتب بنخدم..
وطلع من الدار..
وخلاها تحدد وهي منفعله شويه..كانت تقاوم في شعور الغثيان وحست روحها بترجع خلاص..
لكن ع قد ماقاومت بلافايده..
حطت المكوى ع تركينه وفكت خيطه من الضي..
ومشت بسرعه للحمام..
خشتله وسكرت عليها..
🍃وراجلها..
لما خش للمكتب سكره عليه..
ومشي قعمز وشد تليفونه وبدي يتراسل هو ومرته التانيه..
(شن جوك توا)
(تمام..بس بادي فيا الوحم شكله خمول وناعسه طول الوقت)
هو ابتسم..
وقعد يكتبلها...
🍃وطوبى..
طلعت من الحمام وهي تمسح في فمها بالفوطه..
مشت بيها للزيانه..
خدت ربع تفاحه وقعدت تاكل فيه وهي تقول؛امم..شني مش عاجباتك ريحة بوك!..حطت يدها ع بطنها وقالت..خليتني نكرهها زيك يانتفه..ضحكت وقالت..ياعمري..
سيبت اللي فيدها وعلقت الفوطه ع ظهر الكرسي...
بعدين مشت خدت تليفونها وعلقت فيه السماعات..
وحطتهم في ودانها..
وولت لطاولة الكوي..
علقت الخيط في الضي..وقبل لترجع تحدد..
شغلت صوت نبضات قلب جنينها..وحطت التليفون في جيب التوب متاع التوته..وولت تحدد وهي تسمع في صوت النبض اللي حرك فيها كل شعور حلو...
وخلا دموعها تنزل وسط ابتسامه حلوة مرسومه ع وجهها...
🍃وكملت طوبى كوي حوايج راجلها كلهم..
وعلقتهم وحطتهم في الدولاب..
بعد كملت ضمت الدار وحطت الفوط في الغساله..
وخدت شيتاتها وشنطتها وصونيه الفواكه ونزلت بيهم للدور الأول..
واختارت تقعمز تقرا في تركينه تحبها في الصاله..
حدا فيراندا مسكره..طل ع زهر الاقحوان اللي زرعاته في جنانها..وبدت تقرا...
🍃وعدا الوقت..
وآذن المغرب..
طلع الجالي من مكتبه ومشي لدار النوم..
لقاها فاضيه..حط في باله انها قاعده في المرسم..
خش للحمام..توضا..وطلع صلى...
وبعد كمل صلاة..استغرب فيها كيف ماجتش تصلي..!
طلع من الدار ومشي للمرسم..
فتح الباب مالقهاش..
الجالي بإستغراب؛وين مشت؟!
سكر الباب ومشي نزل لوطا...
بعد ماشاف الكوجينه ومالقهاش فيها..دور في الصاله..
جو عيونه عليها في التركينه اللي قاعده فيها..
بانت عليه راقده..
مشالها طول...
لقاها..متوسده وحده من الوسايد اللي كانوا من ضمن ديكور المكان..
وفي يدها الشيت.. وحداها صونية الفواكه شبه كملتها...وحاطه السماعات في وذانها...وراقده بالنوم..
ثبت عيونها ع شكلها وهي راقده..
ملامحها البريئة اللي طغي عليهم الحزن...
مخلي شي ينخز قلبه ويوجعه عليها...
عارف انه مايستاهلش تكون معاه..وهي ماتستاهلش اللي قاعده يصير فيها..
لكنه مش قادر يطلق سراحها..مش قادر يخليها..
مش قادر يفكر انه ممكن يجي يوم وماتكونش طوبى ليه ومعاه وفي حياته...
يبيها بأي شكل لازم تقبل بوضعه وتقعد معاه...
~~~~~~~~
حكيم؛قتلك طلقها خليها بإرادتك خير ماتنجبر طلقها غصب عنك..
الجالي؛نقولك اني مش متقبل فكرة انها ماتكونش معاي وانت تقولي طلقها!..
حكيم؛وانت تبيها تقعد معاك بعد ماتعرف اللي فيها!؟..
الجالي؛عرفت بمرضي وقعدت..
حكيم؛هدا شي وهداكا شي..المرض مش بإرداتك..لكن زواجك قبلها كان بإرادتك..انك تستمر مع المراة الاولى بعد ماتتزوجها وهي غافله كان بإرادتك..استغفلتها في قصة المرض وفوتتها من طيب اصلها..لكن استغفالها في غيرها مااعتقدتش يعدي ع خير ياصاحبي..
الجالي؛وعلاش ماتقولش انها حتفوت وتتقبل وترضى من طيب اصلها..
حكيم؛لاهكي دروشه وهبل مش طيب اصل..اللي دير هكي مغلوبه ع امرها ومسكينه وماعندها حد في الدنيا..هي مرتك وانت الادرى بيها هي هكي فعلا!؟..
الجالي قعد يشبح لحكيم بنظرات كلها انفعال وخوف
بدون مايرد بكلمه..
حكيم ابتسم بتهكم وقال؛الاجابه وصلت..نرجع ننصحك مرة تانيه ياجالي..صارحها..وطلقها بهدوء وفي اسرع وقت قبل ماتنربط فيك بعيل ويفوت الفوت..
غير الجالي عيونه عن حكيم وهو يفكر في اخر جمله من كلامه تحديدا...
🍃دقايق وانتهي لقائهم اللي كان قدام باب الفيلا..
وخش الجالي داخل...
🍃وصل لدار النوم بسرعه لقاها قاعده غارقه في النوم..
مشالها..
خش السرير قرب منها ونزل ع راسه وباسه..
بعدين مسح ع شعره وقال بصوت هادي؛طوبى..حبيبي..طوبى..
فتحت عيونها شويه..وشبحتله بدون ماتتكلم..
هو قاللها بصوت حنون؛استاحشتك ياعمري..
وهي ردت عليه بإبتسامه ناعسه...
☘☘☘☘☘
بعد مادارت لروحها كم سندويتش وخدت معاهم علبة عصير في سفره طلعت بيها من الكوجينه للصاله..
قعمزت فيها وبدت تاكل..
جوري وهي تكتب الواجب؛شن تاكلي ماما؟
نجاه وهي تاكل؛تعالي كولي معاي حبيبتي..
سيبت اللي عندها وجت لأمها مدتلها تاكل..
صابرين وهي في دارها غارقه في حالة حزن ع اللي صار بينها وبين مختار..
سمعت نجاه وهي تنادي ع صغارها يجوا ياكلوا معاها..
انقهرت منها هلبه وانتابها غضب شديد..
خلاها تنوض وتسكر باب دارها بقوة..
فجعت اختها وصغارها..
شبحت نجاه للباب شويه بعدين رجعت تاكل وهي مضايقه منها ع الآخر...
☘وكملت صابرين الليل كله في دارها ماطلعتش منها نهائي لليوم لبعده...
لما جي وقت الخدمه جهزت نفسها ومشت طلعت من الشقه...
وهي خايفه...
خايفه لما توصل للمعمل ماتلقاش ليها مكان فيه..
🍃واللي صار لما وصلت غادي..
:صباح الخير دكتورة صابرين..
صابرين وهي تحاول دير روحها عاديه؛صباح الخير..
ومشت لمكتبها..
استغربت في الوضع اللي يبان طبيعي جدا..
وفي نفس الوقت فرحت..وعرفت ان مختار زعل منها زعل..ماسيبهاش..
حاولت تتصل بيه وتشوف كان حول الحظر..لقاته قاعد حاظرها...
تأففت بضيق وقالت؛كيف بنرضيه هدا توا...؟
☘☘☘☘☘
"العصا اللي لابسة طاقيه شن نقولولها"
"ءا"
"برافوا...باهي اللي تحتها الطاقيه"
"ءي"
"برافوا..برافو..الله يبارك عليكم"
🍃هدا كان فصل الروضه الموجود في مدرسة "اجيال" الخاصه..مدرسة سدرة...اللي مسكت مكانها طوبى...
وقاعده تقوم بواجبها كمديره ع اكمل وجه من الايام الاولى..
كانت واقفه في الروشن من برا..
تتفرج ع الصغار...وع المعلمه اللي تعطي فيهم..
عيونها اللي يلمعوا بالشغف كانوا يتنقلوا بنظراتهم بين الاطفال وهي تتأمل في براءة وجوههم اللي تنسي الهم..
قعدت تتخيل في وليدها أوبنيتها في هالمكان بعد اربع سنوات..
لما تخيلت زادوا شوقها ولهفتها للحظه اللي حتجمعها بيه..
عيل منها هي قاعد يكبر في داخلها..
حطت يدها ع بطنها وقالت يانفسها..
"ياعمري..حنكون معاك وين ماتكون بالخطوة وباللحظه وانت فيا..ووانت جنبي ياعمر ماما..ماما..ياربي..اني بنولي ماما!"
شدت دموعها ومسحتهم قبل لينزلوا..
جو عيونها ع مدرسة الفصل لقتها تشبحلها وهي مبتسمه..
طوبى تماسكت ولبست قناع الجديه وردتلها الابتسامه بعدين مشت...
🍀🍀🍀🍀🍀
وتمر الأيام...
وطوبى يوم عن يوم تتعود ع الخدمه في المدرسه..وتمشي بنصايح نجاح وتنفذ فيها..
وقدرت من الايام الاول دير لروحها شخصيه مهابه والكل بدوا يديرولها في حساب زي ماكانوا دايرين لأختها بل في منهم كان يشوف في طوبى اشد واقوى..
من جهة تانيه..
كانت تحاول توفق بين حوشها وراجلها وبين قرايتها وخدمتها...
كانت مهتمه بجنينها اهتمام كبير..تاكل في احسن شي وابتعدت عن هلبه حاجات كانت ماتفوتش في يومها من غيرهم واولهم القهوة...
هدا كله اللي كانت دير فيه طوبى كان ع حسابها هي..
معاش ولت مهتمه بمظهرها الخارجي زي قبل..
وهالشي كان مخلي بريقها في عيون الجالي بادي يخفت..
ويزيد في مقابله بريق نجاه اللي زادت اهتمت بنفسها وبيه اكثر من قبل..
حتى انها في يوم مايسمى" بعيد الحب"
دارتله حفله وليلة لاتنسى..وخلاته يبيت طوبى في حوش اهلها متحجج بأن عنده خدمه برا طرابلس..
وهي فرحت بالحاجه هادي لأنها كانت مستاحشه حوش اهلها هلبه بالذات بوها اللي ديما تخمم فيه وفي حاله بعد غياب سدرة المنتهى..
🍃وغياب عائشه والمهدي..
كان يشبه غيابهم لما مشوا للحج...
الولاد كانوا عايشين حياتهم عادي بين القرايه والاصحاب والكورة..
وسدرة بين حوش جدها وحوش عمتها خديجه وحوش لطفي الواعر...
☘يوم الجمعه..
الساعه 5:30 بعد العصر..
في جنان حوش لطفي الواعر..
كانوا اميمه ومطيره مقعمزات يشربوا في القهوة في جو اقرب للربيعي معتدل وصافي...
وحداهم طوبى وسدرة المهدي مقعمزات حدا القطاطيس..
سدرة؛خلاص هدا متاعي هريرة..
طوبى بإبتسامه؛ايه خلاص تقدري تروحي بيها اليوم..
سدرة بفرحه؛يافرحتي..
ضحكوا عليها..
مطيره؛ان شاء الله جداك تخليهالك..
طوبى؛لالا عادي عندها كانت تحب بينكا..
مطيره ابتسمت وقعدت ساكته..
سدرة شبحت لأميمه كيف سرحانه بعدين شبحت لطوبى وقالت؛هما مش فاضيين؟
طوبى؛مني؟
ومطيره قعدت تراجي في اجابة سدرة..
وهي قالت؛حنينه وعماتي..ماهو غدوة فاتحة عمو عمر..
خشت الجمله في وذن اميمه زي السيف..
شبحت طول لسدره..
ومطيره وطوبى شبحولها وهما مصدومات..
اميمه ودموعها في عيونها؛بنمشي نشوف جدي اكيد يبيني نحددله سوريته الزرقا بس يمشي بيها لصلاة المغرب..
ناضت وهي تقول..نحددها ونجي..
ومشت طول من حداهم..
دموعها طاحوا طول..وعبرتها كانت شادتها بقوة..
لين طلعت من الباب الفاصل وسكرت الباب..وقعدت تبكي..
🍃سدرة بحزن؛علاش ماقعدتش معاه باهي؟
مطيره في نفسها..
"ماهو عمك كل.ب دلدول مايستاهلهاش"
طوبى وهي تحاول تشد روحها؛تجي معاي نديرولهم عشاهم..
ناضت سدرة وقالت؛باهي..
وطوبى ناضت معاها وهي تقول؛تعالي معاي..
والزوز مشوا خشوا داخل..
بعد ماخشوا.
مطيره بغضب؛ان شاء الله مايتهنى ومايعمرله دار ياربي وينقهر كيف ماقهرها...
☘وفي حوش جيران جيرانهم..
تحديدا شقة فايزة..
في الروشن..
كانت تالة واقفه تتفرج وكأنها تراجي في حد..
وين شافاته سكرت الروشن ومشت لدارهم تجري..
خشت ع اختها مروة وهي تقول؛توا توا طلع..
مروة بإستعجال؛هيا هي..
وناضت من ع سريرها ومشت خدت وشاحها وبالطوها وقعدت تلبس فيهم..
مروة؛بري البسي كبوطك لبين مااني مشيت لماما وخبرتها..
تاله؛باهي..ومشت تاله بتاخد كبوطها من عالشماعه اللي حدا المدخل..
ومروة مشت لدار امها..
خشت عليها لقتها تصور بالتليفون في هيكل وجه وهي تزين فيه..
مروة؛ماما..
وقفت وشبحتلها؛نعم؟
مروة؛طلع توا بنمشوله..
فايزة؛ماتعطلوش..
مروة؛حاضر..
ومشت بسرعه للباب لقت تاله لابسه كبوطها وكندرتها وتراجي فيها..
فتحت دولاب المدخل طلعت منه سبيدروا لبساته..
بعدين قالت؛هيا...ومشوا الزوز طلعوا من الشقه..
🍃في الشارع..
تحديدا في قهوة الزعيم..
:انت عطيني حاجه تخليني مانكونش معاه مانشوفاش هو الصح..عاجبك الوضع اللي حني فيه..عاجبك اللي صاير واللي قاعد يصير!؟..
؛مافي عاجبه ياغالي..لكن العاقل مايبدلش الغوله بسلال القلوب..
ربيع؛كلهم غوله وسلالين قلوب ياصاحبي مافي خير في ام الخير..
:فاهم ياربيع..لكن حال خير من خير حاال..دقيقه شويه ترا خل نسألوا حبيبنا هو جاي من الشرق وعارف الوضع غادي..
عبد القيوم؛شهاده نقولها ونتحساب قدام ربي عليها مافيش اختلاف كبير بين هنا وغادي..
؛لاياراجل صل ع النبي معقوله هدا كله ومافيش اختلاف كبير..في فرق بين السمي والارض..
عبد القيوم بضحكه؛والله ع راحتك ياغالي اني معاك في اي شي تقوله..
ربيع بضحكه؛ياإمعه..
عبد القيوم:عاد شن بنديرله هو بيدير روحه يعرف المكان اللي جت منه اكثر مني رغم انه ماكانش فيه تبيني ناقشنه!؟؟
قعدوا يضحكوا..
:منور تارقي..منور حبيبنا..
عبد القيوم؛سامحني فروجه حاولت نسايرك حبيبي ع قد مانقدر والله..
محمد المهدي؛غير كان تفوتوا سريب السياسه وتدووا في الكورة..
واحد من بعيد شويه قال؛خليهم في السياسه خير مايديرولك مذبحه هني..
ربيع بضحكه؛صدق...ش يروح عمك ويلقاك محافظ ع الامانه خلينا في الصراع بين هادوكا وهادوكما..
ضحك عبد القيوم..
☘وتاله ومروة قاصات الطريق ومتوجهات للقهوة..
مروة كانت تشبح لمحمد وهي مرتبكه وتفكر في ردة فعله..
قصوا الطريق..
ووقفوا بعيد شويه..
مروة؛هيا ناديه..
تاله بصوت عالي؛عمو عبد القيوم..
كلهم شبحولهم..
محمد جو عيونه ع مروة طارتله..وهي طول غير عيونها عنه..
عبد القيوم ناض وقف ومشي طلع من القهوة ومشالهم..
وصل فيهم وقال:السلام عليكم..
الزوز شبحوله وقالوا؛وعليكم السلام..
عبد القيوم؛تعالن معاي نصبوا غادي احسن..
مروة؛حاضر..
مشي..وهما الزوز وراه..
وعيون محمد معاهم وكان معصب من مروة ع الآخر..
وقفوا قريب ع الحوش متاع المهدي بعيد عن الزحمه..
وقف وهما وقفوا عليه..
عبد القيوم بإبتسامه؛شن جو ياسمحات؟
ابتسموا وقالوا؛تمام..
مروة؛كيف حالك انت؟.
عبد القيوم؛الحمد لله..
مروة؛عمو بنطلبوا منك طلب..
عبد القيوم؛ان شاء الله نقدر عليه..قولن..
مروة؛اني نقرا تاني اعدادي واختي تاله تقرا سادس..طالبين علينا كارتونيات في المدرسه..يعني زي هكي كيف بنشرحلك ياربي!؟..
ضحك وقال؛فاهم فاهم...
تاله؛كويس..بس اني في النحو وهي فالأحياء..
مروة؛نبي ندير كارتوني في شرح عن القلب رسم وبيانات..الرسم مش عليك جيرانا ابله طوبى هي اللي بترسم انت نبي منك نكتب البيانات وحاجات تانيه..
🍃آه منك يامروة..شن درتي بس..
قلبتي حاله في لحظه وبالقلب اللي تبي دير عنه عمل مدرسي يزيد درجاتك..
زدتي سرعة نبضات قلبه اللي كانت توجع فيه لانها ليها هي..
تاله لاحظت كيف ملامح وجهه تغيرت وبعفويه قالت؛يارب ماتقول لا..
مروة بشي من الاحباط:علاش!؟
هو فيسع رجع ابتسم وقال؛من قال بنقول لا..قريتيها في عيوني!؟
ضحكت تاله..
عبد القيوم بإبتسامه؛حاضر..في اي وقت تبوني نبدا فيهن...
تاله:اني غدوة نجيبلك الكارتوني ومعاه القاعده اللب نبيك تكتبها..
مروة؛اني بعد تكمل الرسمه نجيبهولك باهي..نبيه يكون احسن كارتوني بش نفوز..
عبد القيوم؛علاش مسابقه هي؟
مروة بضحكه خجوله:حاجه زي هكي..
ضحك وقال؛حاضر حاضر..اللي نقدر عليه نديره..
مروة؛شكرا عمو..
تاله؛شكرا..
عبد القيوم؛العفو..هي عدن روحن فيسع..
مروة؛باهي..السلام عليكم..
تاله:السلام عليكم..
عبد القيوم بإبتسامه؛وعليكم السلام..
وشدت يد اختها ومشوا مع بعض..
وعيون عبد القيوم..
🍃وين قصوا الطريق..
انفتح باب حوش لطفي الواعر..
وطلعت منه سدرة وفي يدها القطوسه..
وطوبى فم الباب تسقد فيها..
هو ماعطاش لعيونه فرصه انهم يشوفوها..
طول غيرهم عنها وهو عاقد حواجبه ومشي ولى للقهوة..
والقلب ياما صاير فيه..
والمشاعر قاعده تتصارع في داخله صراع رهيب..
خش للقهوة ومشي قعمز في مكانه..
وعيون ربيع عليه وهو يشبحله بطرفهم..
وحداهم محمد واقف يشوف لمروة وتاله كيف واقفات ع سدرة ويشوفوا للقطوسه..
تاله؛واني ابله طوبى؟
طوبى بإبتسامه؛امك ماتحبهمش..
تاله بضجر:وواك منها ماما هادي!..
نخصتها مروة وفنصت فيها..
تاله شبحت لطوبى لقتها تشبحلها بتضييقة عيون قالت..وواك منها ماما الحلوة العسل ..
ضحكت طوبى ضحكه خفيفه بعدين قالت؛خلاص روحوا ماتقعدوش واقفات في الشارع..
مروة؛ابله طوبى امتى تكملي الرسم..
طوبى:الاحد بإذن الله بالكثير الاثنين الصبح..
هزت راسها وقالت؛باهي..هي تاله..
تاله؛سلام..
سدرة؛سلام..
مروة؛السلام عليكم..
سدرة وطوبى:وعليكم السلام..
ومشوا لبنات للحوش..
وسدرة مشت بالقطوسه وقصت الطريق..
طوبى وهي تشوفلها جت بتسكر الباب...
بس تراجعت..
لما شافت سيارة نجاة مدرسه قدام حوش شنيبه..
وقفت قدام باب القراج..
انفتح وخشت بيها داخل..
وزاد ضاق صدرها اكثر ماهو ضايق...
🍃وهو..
حرك عيونه جيهتها لما شاف سيارة نجاة خاشه للقراج..
شافها كيف واقفه تشوفلها..
غير عيونه عنها وهو يفكر في اللي يعرفه..
وين يتفكره ويفكر فيه..يزيد ينغم..
تأفف بصوت مسموع..
شبحله ربيع وقال؛خيرك؟
شافله بعدين حرك راسه يمين ويسار وهو يقول:شي..عادي..
سمع باب حوش لطفي الواعر تسكر..
بدت ع وجهه ملامح الكدر..
ربيع؛طول المهدي..
عبد القيوم؛اها..ان شاء الله خير..
ربيع:ان شاء الله...
☘☘☘☘☘
"حنينه"
مغليه بإبتسامه؛اهلا ياحنينه اهلا وين هالغيبه..
وقعدت تسلم ع صغار طاهر وتبوس..
ونجاه واقفه تشوفلهم بإبتسامه..
🍃وخديجه ونسرين يشبحولها بصدمه..
قدمت نجاه لمغليه وقالت؛عمتي شن حالك..
وطبست باست ع راسها..
مغليه؛كان يهمك حالي راك جتيني..
نجاة بضحكه؛هاني جيتك ..
مغليه؛بعدين قتلك تعالي بش تحضري فرح عمر..
نجاة؛ايه حقه مبروك عليه وان شاء الله ربي يعوضه بيها خير..
مغليه:آمين يارب..
قعمزت حدا عزوزتها وقالت؛شن حالكم يابنات..
نسرين بس جاوبت وقالت مجامله:الحمد لله..
نجاة؛ماشاء الله بطنك زادت برزت..في اما شهر توا؟
نسرين؛خاشه السادس..
نجاة؛تحلي عويناتك ع خير..
مغليه ونسرين قالوا؛آمين..
ع خشة سدرة المهدي بالقطوسه في يدها..
مغليه؛منين جبتيها هادي؟!
سدرة؛عطتهالي طوبى حنينه..
جوري جتها تشوف فيها وهي تقول؛محلاها!..نبي زيها..
نجاه وهي تشبح للقطوسه في يد سدره..
جت بين عيونها بينكا..غيرت عيونها عنها وقالت؛تو نشريلك وحده ماما..
جوري؛نبيها زيها..
نجاة؛حاضر..
تنهدت خديجه وقالت؛غير ردي بالك تغفلي عنها وتموت ياجوجو...
شبحت نسرين لنجاه..
لقتها تبان عاديه جدا..
جوري:لالا ماتموتش نخليها معاي اني بس..
خديجه؛سلمها ياربي..
حمزة؛امي بنطلع..
نجاة:خليك مع ولاد عمك
حمزة؛حاضر..ومشي طلع..
نجاه:سلامتهم..بعدين شافت لعزوزتها وقالت..مازال عيت سلفي المهدي مش مروحين..
مغليه؛لاياحنه دهواري..
نجاة؛خلهم والله يدهوروا ساد مرض ونكد وهم..
مغليه:صدقتي..اني بعد تكمل حوسه عمر هادي بناخدوا وجوهونا اني والحاج اسبوعين للسعوديه..
نجاة؛احسن ماديروا...
شبحوا خديجه ونسرين لبعض وهما مش طايقين يقعدوا في مكان هي فيه...
وهي تزيد تقهر فيهم وكان تلقى تكمل عليهم وتفجرهم بخبر بحملها ...
🍃وفي من يراجي يسمع هالخبر بفارغ الصبر..
طلعت من الحمام وهي مبتسمه بفرح ودموعها في عيونها..
غرفه؛شوفي نبيله..
خدت نبيله اختبار الحمل وشافاته بعدين قالت بإبتسامه؛مبارك مبارك..وضمت غرفه..
غرفه؛لازم نتأكدوا بتحليل الدم...
بعدت عنها نبيله وقالت:غدوة ان شاء الله نرفعك تحللي..
غرفه؛ان شاء الله..وبعدين نقولوا لعبد الرؤوف باهي؟!..
نبيله بإبتسامه:باهي...المهم توا بري قعمزي وماتتحركيش بكل اني ندير كل شي..
غرفه وهي رافعة حاجبها اليسار وقالت:وكان جي الافندي بعدين ولقاك تتحركي بروحك..
نبيله بضحكه؛ماعليكش فيه انتي بري قعمزي بري..
غرفه ابتسمت وقالت؛باهي نبي منك طلب صغيرون هلبه..
بإبتسامه قالت؛شن هو؟
غرفه؛طاسة عصير الفواكه اللي درتيه بكري صح بكري شربت لكن خاطري في طاسة تانيه..
نبيله بضحكه؛مش انتي هادي هو..
غرفه بضحكه؛ايوه صح في الجديد بنحطها في راسه..
ضحكت نبيله ومشت وهي تقول؛باهي..غير اسمعي الكلام وبري قعمزي..
تنهدت غرفه بإبتسامه ومشت للصالون..
خدت تليفونها اللي كان ع الطاوله وقعمزت..
خشت ع قائمة جهات الاتصال..
تبددت ابتسامتها وحلت محلها ملامح الحزن لما شافت اسم..
"اختي سدرة"
تعبوا عيونها بالدموع وفاضوا..
تفكرت اللي داراته سدرة ع خاطرها لما اجهضت اول مرة..
وتخيلت انها حدير اكثر منه لما تعرف انها حامل..
ماقدرتش تتمالك نفسها..قعدت تبكي...
ع جية نبيله بطاسة العصير وين شافتها تبكي..
انفجعت وقالت؛خيرك!؟
غرفه ببكي؛شي..ومدت يدها وخدت طاسه العصير وقعدت تشرب وهي تبكي..
ونبيله تشوفلها بحزن..وشبه عرفت السبب...
🍃وفي الشارع..
درست سيارة الجالي قدام الحلاق التونسي..
وعبد القيوم اللي كان قاعد في القهوة يشبح جيهتهم..
شاف فراس كيف طلع للجالي وطبس ع الروشن متاع السياره وقعد يهدرز هو وياه..
فراس؛استلمتهم كاملات بارك الله فيك..
الجالي؛فيك بارك الله اي خدمه تانيه تفضل مايحشمك شي..
فراس؛ايعيشك..تسلم..
الجالي ابتسم وقال؛ربي يحفظك..هي السلام عليكم..
فراس؛وعليكم السلام..
ووخر عن السيارة..
والجالي مشي بسيارته لحوش لطفي الواعر..
وعيون فراس معاه لين درس قدام الحوش..
تنهد بعدين مشي خش داخل..
وعبد القيوم عيونه مازالوا مع الجالي..
وهو يشوف فيه نازل من السياره..ووقف ع الباب وقعد يدق عليه..
غير عيونه عن الباب لأنه توقع طوبى تفتح الباب..
وفعلا كانت هي فتحاته وهو خش وسكر الباب..
تنهد عبد القيوم بقهر..وشرب فنجان القهوة اللي قدامه كله في مرة..
🍃الجالي؛هي وتي روحك بش تروحي معاي لحوش العيله..
طوبى؛مانقدرش خالي جاي الليله..
هو بمفاجأة قال؛ماقلتيش؟
طوبى؛نسيت..
عقد حواجبه وقال؛خيرك تكلمي فيا زي اللي طايرتلك مني!
تنهدت وقالت:علاش ماقلتش ان فاتحه خوك غدوة؟
رفع حواجبه وقال؛اها..نزلهم وقال..اني ماعرفتش الا امس بس..
طوبى؛وتبيني نمشي معاك غادي بش نحضر غدوة؟
الجالي؛نهائي..نبيك تمشي معاي لإني مستاحشك بس هي هادي..
غيرت عيونه عنه وقعدت تمرر فيهم ع المكان..
وهو يشوفلها ويقول؛طوبى اني وياك مالناش دخل باللي يصير مع غيرنا..
شبحتله وقالت؛اكيد مالناش دخل..بس اني مستغربه فيك يعني كيف فكرت اني ممكن نحضر عادي واختي في غيبوبه واللي كانت مرت خوك اللي بيتزوج توا بنت عمي!؟
الجالي:قتلك مانبيكش تحضري..عكرش وجهه وقال..بعدين ياودي انتي حرة تروحي معاي ولاتقعدي مش جابرك ع شي..
ومشي وهو متنرفز طلع من الحوش وسكر وراه الباب بقوة..
🍃صوت الباب خلا عبد القيوم يشبحله وهو طالع من حوش لطفي ومشي ركب سيارته وتوجه لحوش بوه..
حس ان في مشكله صار بيناتهم..
"عبدو"
غير عيونه لربيع اللي كان ينادي فيه من برا القهوة اشرله ع الساعه وقال..المغرب..
هز راسه وناض..
وربيع غير عيونه عنه وشاف لسيارة الجالي وهي خاشه للحوش..
....يتبع.....
#اسرار
#طوبى
كتبت الى الآن في المذكرة 18 صفحة حنقسمهم ونزلهم ع ايام متتاليه بإذن الله..
وحيكونوا اقسام لجزء اسمه...#أسرار.
