#طوبى "جنة طوبى"
#جمان_فريد
#الجزء_الخامس_والسبعين"اقاوم2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار..
"إستغفار الإنسان اهم من جميع الأدعيه"...ابن تيميه
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 صَدِقنِي..لا أَحَد يَفهَم حٌزنك إِلا الله ، فَلا تَلجأ لِأَحد🍃
_________________________________________
نزلوا الزوز من الشقه...
وصلوا في باب الحوش..
فتحاته مروة وطلعت..ووراها مناسك اللي متحمسه وفرحانه انها واخيرا حتطلع بروحها مشي بدون مايقيدها حد..
ومن حماسها عترت في عتبه الباب لكن شدت روحها يش ماطاحتش...
مروة:بسم الله!
ومحمد وصاحبه مؤيد سمعوا الصوت وشافوا جيهتهم..
ويجوا عيون مناسك في عيون مؤيد..
تحشمت طول ونزلت عيونها وبعدين قالت..
/هيا..
مروة؛تعالي من هني..
مشت معاها مناسك وهي تقول؛قريب جيت ع وجهي..
مروة بضحكه:-انتي تفرفشي..
مناسك بضحكه؛ماهو مش مصدقه اني طالعه ع رجليا ومع صاحبتي..
مروة؛تخيلي خوك قاعد هني!؟
توسعوا عيون مناسك بخوف وقالت..
/لالاشن قاعد عادي قال بيمشي لصحابه فكيني من الرعايش فرخه مروة..
ومروة تضحك عليها بكتمان...
🍃مؤيد بإبتسامه اعجاب:البنت مش عاديه..
محمد وهو معصب؛تبي تقرا ولالا!؟
ضحك وقال:لانبي نبي..
وهو قاله بإنزعاج؛خلاص مالا فكنا من القطاف الزايد وركز معاي..
🍃🍃🍃🍃
"نبيك توصلي لطوبى اني ماكنتش راضيه يافايزة بالله عليك حتى كان مااقتنعتش المهم تقوليلها.."
هزت فايزة راسها وقالت؛باهي يانسرين حاضر..
نسرين بضيق؛ماتقطعنيش..
فايزة لبست كندرتها بعدين قالت؛هادي واقفه عليك يانسرين..بالسلامه..
وفتحت الباب وطلعت...
ونسرين سكرت وراها وهي مضايقه ع الآخر وموجوعه...
🍃🍃🍃🍃🍃
"حسيتها تلمح لشي تبي توصل حاجه من كلامها اللي قالاته"
خديجه؛واضحه يام زي عيون الشمس وراهو مش هي بس اللي بتلاحظ وتبدا تدوي وتلمح حتى الناس..
مغليه وهي تفكر:قصدك معقوله الوضع يكون فيه إن؟
خديجه؛وعلاش لا تبي تربط حبالها مع حد بش بعد ماتطلق ماتقعدش من غير راجل..وحني زمان نعرفوا ان حسين عينه عليها وصفيه كانت تبيهاله..
مغليه:نهار احرف كان هكي !دايرة خوك طرطور هادي..
خديجه؛يستاهل خوي اللي ماطلقهاش بعد اللي دارته فيه..حتى كان هو غالط لااول ولااخر راجل يغلط الغلطه هادي! بعدين هو غواته وحده شيطانه زي نجاة الكبيره عليه ومانشوفش فيها حاجه تستاهل حد يشبحلها..مفروض انتي ياطوبى مادامك صغيره وحلوة تعرفي كيف تجيبي راجلك ليك وتعمي عيونه ع النساوين..
مغليه:الدرويشه هادي فهمتها ان اللي دير ديرك هي الخاسره قتلها المراة صح هي اللي تعرف تجيب راجلها للطريق مش تخليه لغيرها..لكن خليها سيوره تجيه كلامنا وتوليلها لكن بعد مايفوت الفوت...
🍃🍃🍃🍃🍃
وطوبى في الكوجينه..
وحداها فايزة وأميمه مقعمزات يهدرزوا معاها.
وهي تحوس بحداهم ودير في الجيلاطي "ice creme"
☘فايزة:مرات توقف معاك قدام ماليها..
طوبى وهي تصب في الجيلاطي في قوالب..
/ماتقدرش نسرين ماتقدرش تطلع عن طوع امها وخوايتها..
أميمه؛صح ويخي حتوقف ضد طوبى وقولي قالتها اميمه..
فايزة بحيره؛مش عارفه حسيتها مقهورة ونادمه هلبه..
اميمه؛شن بنقول...ان شاء الله يطلع كلامك صح..
طوبى:اميمه تبي شكلاطه ولا؟
اميمه:ايه..
فايزة قعدت تشوف لطوبى وهي منهمكه في اللي دير فيه بعدين قالتلها...
/تبي تاخدي رأيي؟
طوبى:قولي..
فايزة؛هادم مش حيخلوك تطلقي بالساهل صدقيني لو تسمعي كلامي وديري زي ماقتلك قبل وتتنازلي..هكي دارت نسرين وراهو دارت هكي بعد ماشارت عليها نبيله هالشور..
طوبى وهي لاهيه بالجيلاطي قعدت تفكر في كلام فايزة...
واميمه قالت:نبيله؟
فايزة؛ايه نبيله قالتلها بش تخلصي بسرعه تنازلي عن حقوقك وارفعي دعوة طلاق استحالة العشره القضية متاعك ماتفوتش سته شهور..
اميمه وهي تفكر:زي ماجيت بندير اني بس بعدين السي السيد طلق منه ليه وقالي مش حنعطيك شي
فايزة؛ياخده ربي حقك
كملت طوبى شغلها وخدت السفره اللي فيها الطواسي متاع الجيلاطي ومشت بيهم للثلاجه..
وفايزة واميمه يشوفولها..
شويه اميمه التفتت لفايزة ودارت حركه بيدها ع راسها بمعنى..
"سكرت راسها"
فايزة غمضت عيونها وفتحهم وهي تهز في راسها بأسف
شويه تكلمت طوبى وهي تحط في الطواسي في فريز الثلاجه..
/تعرفوا..معاي ابله في المدرسه قصتها قصه تعرفيها فايزة
فايزة:من هي..
سكرت طوبى الفريز ومشت بتغسل السفره وهي تقول..
/اللي مكيجتي اختها يوم حفلتلها بسعر خاص..
فايزة وهي تتفكر؛اها ايه تفكرتهاا خيرها؟
كفت السفره والتفتت وهي جايتهم وكانت تقول..
/واخدها واحد حرام فيه كلمة راجل..
قعمزت ع الكرسي بالشويه وكملت تقول..
/خيال مئاته ع قولت المصاروة لايخدم ولايقدم وهي اللي تصرف عليه..مش هكي وبس..وقعدت تعد ع صوابعها..
هي اللي ترفع بمبله الغاز بش تعبيها..هي تلوح في الكناسه حشاكم..كان مرض حد من الصغار هي اللي تجري بيهم للمستشفيات..ورفعت سبابتها وهي تقول..وملزومه تعطيه مبلغ معين كل شهر بش يصرف ع روحه منه..
فايزة بإزدراء:سحيقه التريس اللي هكي!
اميمه:كبرتي من قيمته بكلمة تريس..
طوبى:حتى شبه راجل ماتجيش عليه..قالتلي فوق اللي ندير فيه هدا كله ومش عاجبه ديما يهين فيا ويمد في يده عليا وكان جي يوم وقال نبي فلوس نطلع اللي عندي بش مايضربنيش قدام امي وصغاري ويرعشهم..
فايزة:امها معاهم!؟
طوبى بضحكه متهكمه؛عايش معاها في حوش ماليها..
الزوز اندهشوا وفايزة قالت..
/سحيقه ومس.حق..
اميمه؛وهي شن وخدها في واحد زي هدا؟.
تنهدت طوبى وقالت..
/قالت لما جو خطبوني امه وخواته قالوا يخدم عمل حر وبيسكنها في ايجار السته شهور الاولات لين يكمل حوشه..وبعد ماتزوجت طلع عمله الحر سيارة تاكسي يخدم عليها يوم وعشرة لا لين فسدت وقعمز بكل بعدين..
فايزة؛والحوش؟
طوبى:طلع لخوه مش ليه باني دورين وبيسكنه في واحد منهم تعارك هو وياه قاله دور وين تعيش..قالت قعدوا في ايجار فتره بعدين معاش قدروا يدفعوا لزهم صاحب الحوش..ووين رفعها لحوش ماليه قالوله دبر راسك ماعندنا وين تقعدوا انجبرت مسكينه تمشي لحوش ماليها عطتها امها دار فوق الحيط...
فايزة؛نهاري! علاش فوق الحيط!؟
طوبى تنهدت وقالت؛ماهو كانت عندها اختها صبيه ماتقدرش تخليه معاهم..وطبعا بعد تزوجت اختها نزلوا لوطا هو وياها وسيطر ع الحوش كله..
اميمه بإستنكار؛شن الحقارة هادي!؟
طوبى؛قالت كرهني في عيشتي وبهدلني وبهدل حتى امي مسكينه مراة صاحبه مرض ماتتحملش الغشاش..
فايزة بضيق؛لاحول ولاقوة الا بالله!
طوبى بحزن:تخدم في خدمتين..عندنا في المدرسه تروح منها تمشي لمعمل حلويات تقعد تجري يومها كله بش تلحق مصاريف الحوش والصغار ومصاريفه هو السي البي..
اميمه بنرفزة؛شن مصبرها ع العاهه!؟
طوبى:لاخلاص تم صبرها دارتله عركه هكي كبرها ولزاته من الحوش وتوا طالبه الطلاق وبترفع عليه دعوة..
فايزة وهي تمسح ع صدرها؛هدا وين تنفست!
اميمه:باهي اللي دارت لروحها قدر..
فايزة :شن اللي خلاها تنتفض عليه هالإنتفاضه!؟
طوبى بكره؛طلع يخون فيها الوس.خ حشاكم وياخد من فلوسها حق شقاها وتعبها ويصرف فيهم ع الوس.خه متاعه
اميمه بإزدراء:ياحقير الله ياخده هو واللي زيه..
فايزة بغيظ:قالب يصرعه هالقذر...
طوبى:ماننساها ليلة اللي اتصلت بيا تحكيلي مش عارفه شن جاني وين حكتلي لقيت روحها نكشخ ونعيط ونقوللها لزي البلي لوحي عليك العفن اطلقي..نحساب روحي بنجيب ليلتها..
ضحكوا فايزة واميمه..
طوبى بضحكة عصبيه:تفكرت اللي صار معاي كله وسكرت عيوني وفتحت فمي والله في كلام قلته مانتفكره..بعدها تاني يوم في الليل اتصلت بيا وقالتلي نطيت فيه زي العميا المجنوونه ومسحت بيه الارض ولزيته من الحوش..
فايزة؛ياريته عطاته هبيكات باهيات..
طوبى بضحكه؛قالت قعدت تحدف فيه بالشباشب والكنادر...قداش خاطري نديرها حتى اني..لكن اني كيف نبيها..ضيقت عيونها وهي توصف المشهد اللي فخيالها..
نقعمزه في وسط الكياس في الشعر في عز القايله في القبلي الصرهادي تحت الشمس وهو مكتف ونعطي لصغار الشارع شلايك مهربدات ونقوللهم عليكم به وهما يحدفوا وين مايجي..
قعدوا يضحكوا اميمه وفايزة..
رفعت حاجبها وقالت؛ايه مال شنو النماذج هادي هكي يبوا..
اميمه بضحكه؛وليتي انتقاميه يابيبو..
فايزة بضحكه؛ومجرمه..
طوبى تنهدت وقال..
/الوقت هدا هكي يبي..إن لم تكن ذئبا أكلتك الذئاب..
الزوز هدوا ضحك وسرحوا في كلامها الاخير..
وهي سرحت بالتفكير معاهم....
🍃🍃🍃🍃🍃
وفي نفس الوقت..
روحوا مروة ومناسك من السوبر ماركت بعد ماشروا الحليب المحلى..
وين قربوا يوصلوا للحوش..
مناسك رفعت عيونها في الشباب اللي قدام المطحن..
شافلها مؤيد وابتسم ابتسامه خفيفه..
وهي يدوب ردتهاله..
ومحمد وفي يده الكتاب كان يشوف لمروة بطرف عيونه..
وهي ولاعبراته ولاشافت جيهتهم بكل..
خشت للحوش ومناسك وراها وهي تقول..
/شارعكم معبي طروف..
مروة ركبت الدروج وهي تقول:ايوه وانتي ماشيه تبلحقي بعيونك..
مناسك وهي تركب وراها؛مالك حارمني من شوفت كل حاجه حلوة في الحياة..
مروة؛ماهو خايف عليك ياهبله ع قولتك عنده خبره يعني عارف الاولاد في شن يفكروا لما يشوفوا بنت..
مناسك؛لكن الوليد اللي لابس تيشرت احمر يبان كيوت ومؤدب..
مروة بضحكه:قصدك مؤيد..
مناسك وعيونها يضحكوا؛اسمه مؤيد!
مروة:ايه ولد شارعنا..
مناسك بهيام؛محلاه..بعدين فنصت في مروة وقالت..لكن الطرف اللي معاه زي اللي كان يشوفلك..
مروة بضيق:فكني من الدوة الفاضيه وهي اجري وسقدي روحك معاش في وقت..
مناسك لاحظت ملامح وجه مروة كيف تغيروا لما كلمتها عن محمد وحست ان في شي..
قعدت ساكته لين وصلوا للشقه وفتحتها مروة وخشوا الزوز مع بعض...
🍃🍃🍃🍃🍃🍃
بعد المغرب..
في الطريق..
مالك وهو يسوق؛شن هدا اللي في يدك؟.
مناسك؛حافظه فيها سينابون حسبتكم فيه مروة؟
مالك بلهفه:حسبتني حتى اني!؟..وفيسع استاقظ لروحه عقد حواجبها وقالت بثقل..حسبت حتى امي؟
مناسك؛ايه انت وامي ومازن..
هز راسه وهو ساكت وع وجهه ارتسمت ملامح ابتسامه خفيفه..
مناسك؛ايه حقه تعالى جاي قولي..علاش خديت زوز بوكسات كوكيز!؟
مالك؛هكي وخلاص لقيته قدامي خديته..
مناسك بضحكه:سبحان الله!..مروة تموت في الكوكيز تصدق خدتهم الزوز دستهم في دولابها..
قعد يقاوم في ضحكته وهو يقول..
/شكلها من جماعة الرابح الاكبر..
مناسك؛لالا بكل مش هكي..
مالك بإبتسامه؛معناها مهبوله..
مناسك بضحكه؛هي مكس بين المهبوله والعاقله..بعدين قالت بأستغراب..والغامضه..تحس هكي فيها ماتحبش تكون واضحه وفي نفس الوقت نحسها ديما حزينه وخايفه..
خفت ابتسامه مالك وهو يسمع في كلامها..
تنهدت مناسك وقالت..
/لكن حوشهم ماتمنيتش نروح منه جوهم حلو مع بعض وامهم حتى هي تهبل زي فيزو...تخليني مرة تانيه نبات عندهم؟!
هز راسه وقال؛ايه عادي شن فيها اقعدي حتى اسبوع مافيها شي..
مناسك بدهشه؛حقه!؟
مالك رفع قفا يده وقال؛شن هو اللي حقه يابنت الهبله شن هو!!؟
وخرت لين لصقت في الباب من الفجعه..
نزل يده وقال:هدا علاش مانبيش نفتح هالباب..
هي قالت بخوف؛خلاص انسى اللي قلته..اصلا كنت نبصر..
ولفت وجهها للروشن..
هو قال بحده؛شن ديري غادي!؟
بسرعه قعمزت بإستقامه وركزت بنظره القدام..
هو حرك راسه يمين ويسار..بعدين شاف للطريق..
وشويه وشغل اغنية..
"نمبر ون"
🍃🍃🍃🍃🍃🍃
الساعه 2:30بعد منتصف الليل..
كانت طوبى تقاوم في النوم وهي تراجع..
في هالليله الشي الوحيد اللي محسسها بالقلق امتحانها بسبب الظروف اللي مرت بيها ماقرتش قبل والمنهج تراكم وقعدت تحاول تلم اللي تقدر تلمه من معلومات بش تخش بيهم للإمتحان..
وين تحس بعقلها وقف ومعاش قادرة تستوعب..
تاخد راحه وتقعد تحوقل لين تحس روحها نشطت شويه ونرجع تقرا مرة تانيه..
وفي عز ماهي تقرا..
طوبى بضحكه؛اي ياماما خيرك!؟..تنهدت وقالت..والله حتى اني تعبت ونبي نرقد يابنتي لكن مافيهاش كيف امتحان نهائي هدا وامك مش قاريه في الماده هادي شي....اسمعي بدال هالردس اللي تردسيلي فيه شدي معاي كم معلومه بش تسميلي في الامتحان...ضحكت بعدين قالت..حيلة غش عمرها ماصارت في التاريخ ومايقدر حد يكشفها...ضحكت تاني بعدين قالت..استغفر الله استغفر الله العظيم واتوب اليه..رشفت وهي تمسح في انفها بسبابته وابهامها وكملت قرايه..
فجأة..
قعد تليفونها يهز...
شافتله وهو جنبها..بعدين خداته..
فتحت الخط وردت..
/السلام عليكم زهرة..
"وعليكم السلام استاذة سامحيني اللي اتصلت بيك في هالوقت واني ديما مرعشاتك"
طوبى؛ولايهمك زهرة..قولي خيرك؟
"توا هداكا الحيوان حشاك بعتلي تهديد تاني"
طوبى؛شن بعتلك؟
"قالي كان قعدتي مسكرة راسك نهد عليك في الحوش بكتيبه"
طوبى:يهد بعينه..
"يديرها هدا لاعنده نخوه ولارجوليه خايفه هلبه استاذة"
طوبى قعدت ساكته شويه وهي تفكر بعدين قالت..
/تو نشوف الموضوع زهرة ماتخافيش بإذن الله مايصيرلكم شي..
"حسبي الله ونعم الوكيل فيه خلاني لا ليلي ليل ولانهاري نهار"
طوبى بضيق:لاحول ولاقوة الا بالله..زهرة اسمعي بري توا توضي وصلي ركعتين وادعي لربي ورددي في السجود حسبي الله ونعم الوكيل..وربي يتقي عليكم من عنده..واني خوديه وعد مني إن شاء الله نديرلك حل..
"حاضر استاذه..بارك الله فيك ويرحم والديك والله ماعارفه كيف نكافيك"
طوبى:الناس لبعضها يازهره..المهم توا ديري زي ماقتلك..
"ان شاء الله..تصبحي ع خير"
طوبى؛كلميني في اي وقت اني قاعده سهرانه..
"ربي يحفظك يارب ويريح قلبك."
طوبى :واياك يارب..تصبحي ع خير..
"قدامك كل خير"..
وسكرت طوبى وهي تفكر بقلق في حال زهره..
حست بضيق شديده وكأنه انكتم ع نفسها..
ناضت بالشويه عليها بالشيت ومشت طلعت من الصاله..
ومنها من الحوش بكل للجنان..
كان الجو لطيف...وهي قعدت تاخد في نفس وطلع فيه...
🍃وفي الحوش اللي مقابلهم..
تحديدا شقة نجاة..
كانت حتى هي سهرانه تتفرج ع فيلم في النت ودموعها ع خد..فيلم رومانسي يحبه الجالي وخلاها تحبه معاه..
وقعدت تتفكر لما كانوا يتفرجوا مع بعض عليه ومن بعدها خطروا عليها ايامها الحلوة معاه...
فجأه..
وصل لمسامعها لحن الأغنيه الايطاليه اللي يحبوها هما الزوز وكان يغنيلها فيها قبل فترة بسيطه من انفصالهم..
كانت تحاسب روحها تتخيل..
لين قعد الصوت يتوضح اكثر..
حطت اللاب توب ع جهه وناضت من الكنبه ومشت وهي تبع في الصوت...
🍃وطوبى اللي كانت تاخد في شهيق وزفير..
وين سمعت الاغنيه قعدت مركزه معاها وهي مستغربه..
من اللي يدور بسيارته فهالوقت وهو مشغل اغاني ومعلي الصوت!
🍃مايسمعش هالصوت الا حد ساهر الليل.
زيها هي ونجاة..وعبد القيوم..
اللي وقف في روشن شقته اللي يفتح ع الشارع وشاف سيارة الجالي مدرسة واقفه في نص الطريق..
بين حوش بوه وحوش نساباته...
عقد حواجبه وملامح وجهه تبدلت للإمتعاض والبغض...
تشبه لحد ما ملامح وجه نجاة اللي ولت كلها غيره وحقد.
والدموع ينزلوا زي السيل...
حتى اغنيتهم المفضله خدتها طوبى الواعر ماخلتلها شي..
لاهو ولا حبه ولاذكرياته...
🍃وهو في السيارة يسمع في الأغنيه ويشوف لحوش الواعر بشوق وألم..وكان متمني لو يقدر يخش وياخدها غصب عنها..
🍃وهي مازال واقفه تسمع في الأغنيه وشعور غريب بالخوف عبا قلبها...
لحظات..
وشافوا عبد القيوم ونجاة السياره وهي توخر بعدين تلف..
وتسمع طوبى صوت حرق العجل مع الأغنيه..
وبدي صوت الاغنيه يتباعد..
ونجاة وعبد القيوم اختفت من قدام عيونهم السيارة..
نجاة جبدت الستار بقوة..وخشت داخل..
وعبد القيوم خدي نفس وهو مضايق ع الآخر وقعد واقف يشوف لحوش الواعر تحسبا لرجوعه مرة تانيه...قعد واقف وكأنه يحرس فيها..
🍃وهي لفت ومشت خشت للحوش ومازال الخوف في قلبها بعدين سكرت الباب...
🍃🍃🍃🍃🍃
تاني يوم...
طلعت طوبى الصبح مع اريج...
ومجرد ماطلعوا من الشارع في سيارات طلعت وراهم بمسافه للحراسه بعتهم خالها بعد ماوصله عبد القيوم اللي صار الليله اللي فاتت...
🍃دارت طوبى امتحانها في كليتها بكري...
بعدين رفعت عبير للمدرسه بش تشوف شن صار في اول يوم امتحانات لسنوات النقل..
ومر هالنهار لين روحت طوبى للحوش بسلام...
🍃اما في مكان تاني..
تحديدا محلات شنيبة لمواد البناء كانت في مفاجأة كبيره تستنى في المهدي اللي خدي مكان بوه فهاليوم...
وهو مقعمز في أمان الله...
يسمع تحية الاسلام بنغمة مش غريبه عليه..
شبح لمصدر الصوت ويشوف اللي جي في باله لما سمع صوته...
مختار بإيتسامه واسعه:فاضي ولانجي وقت تاني؟
جاه المهدي وقال؛لا انت تجي في أي وقت وكان مش فاضي نفضالك..
وتصافحوا بعدين حضنوا بعض..
تباعد المهدي وهو حاط يده ع ظهر مختار وقاله..
/تعالى تقعمز تعالى..
وخداه معاه وقعمزه ع الكرسي قدام المكتب بعدين قال..
/شويه وجاي..
مختار؛خود راحتك..
ومشي المهدي يكمل شغله اللي يديره فيه..
ومختار قعد يدور بنظره في المكان..لين ثبت نظره ع المهدي وتجيبله ذاكرته مشهد من الماضي البعيد..
🔺️قبل اكثر من عشرين سنه..
في مربوعة حوش شنيبه...
كان المهدي مستضيف ربيع ومحي الدين وواحد من شباب الشارع وقتها ومعاهم مختار يقروا مع بعض لإمتحانات الشهاده الثانويه..
المهدي كان يشرح في ماده تخص الرياضيات..
كلهم مركزين معاه..ماعدا مختار اللي كان حاس بالضجر والملل..
ركز عليه المهدي وقال..
/مختار خليك معاي ع الاقل القط شويه معلومات تعبي بيهم الورقه..
تأفف مختار بدون مايرد..
محي بضحكه؛زي العاده بتحط الورقه فاضيه وتطلع..
ضحك ربيع..
المهدي؛اني واحل في حاجه وحده انت كيف وصلت معاها للشهاده الثانويه!؟
ربيع بضحكه؛بالبركه ياصاحبي.بالبركه اللي هي اني طبعا..
قعد مختار يشوف لربيع..
المهدي:المفروض تخليه يجرب يسقط بش يدير قلب ويقرا..
مختار؛ولاتفرق معاي صدقني اني ماليش في القرايه ولادوشة القرايه..
المهدي؛اني في شن ليك اصلا!؟
محي الدين بضحكه؛في افلام جاكشان..
مختار:تبي نوض نجرب حركاته عليك زي كل مرة تعودت شكلك..
جارهم اللي يقرا معاهم..
/خلاص ياولاد بلا ضياع الوقت كمل يامهدي.
المهدي:مختار كان ماعندكش نيه تقرا شد الفراش هداكا وارقد..
ناض وهو يقول..
/طالع بكل..اقعدوا فيها تو نشوفوا شن بيجيكم من وراها الشهاده..
ومشي طلع من حداهم...
🔺️في الوقت الحاضر..
استاقظ من سرحانه في عالم الذكريات لما سمع المهدي يقول..
/شن الامور..
وقعمز ورا مكتب بوه..
حط مختار رجل ع رجل وقال..
/ماشيه..انت شن اخبارك؟
المهدي؛زي ماهي لاجديد يذكر ولاقديم يعاد..
مختار:اممم...
المهدي قعد يشوفله وفي باله انه حيفتح معاه اخته طوبى..
شويه قال مختار..
/لافي جديد يذكر بخصوص سرقة محل الذهب..
عقد المهدي حواجبه بإستغراب وهو ساكت..
تنهد مختار وقال..
/زي ماهو معروف يامهدي..حني صحاب وجيران وبينا عشرة عمر ونسايب وبصراحه ماقدرتش نسمع باللي صارلك ونقعد نتفرج ومانحركش ساكن...مهدي اللي سرقوا الذهب متاعك شدهم البوليس التونسي..
المهدي بإستغراب اكبر..
/التونسي!؟
مختار:لما عرفت انهم دوروا هني هلبه ومالقوا شي فكرت شويه وجي في بالي ان العصابه هادي لما يسرقوا سرقة كبيره زي هادي.لازم يكونوا حاسبين حساب الطلعه من البلاد بكل ع طول..وزي ماتعرف البلاد هادي.مهبوكه من جميع النواحي الحاجات هادي.موليه ساهله جدا فيها..المهم فكرت انهم يمشوا لأقرب شي تونس..وتواصلت مع السفارة غادي عندي فيها اصدقاء وقتلهم يتكفلوا بالموضوع..وفعلا خلوا الشرطه التونسيه دور لين شدوهم...
المهدي يسمع وهو مندهش..
مختار:اممم..ولأن الذهب اللي سرقوه كان كميه كبيره قعدوا يبيعوا فيه شويه شويه ماينحطوش في دائرة الشبهة..بعني لقوا قريب نص الذهب اللي سرقوه قاعد والنص التانيه دلوهم ع المكانات اللي باعوه فيه وخدوه حتى هو..
المهدي:كيف معلومات زي هادي ماتوصلنيش اني طول؟
مختار:هي وصلتني اليوم واني وصلتهالك طول...
المهدي بضيق:باهي لشن وصلوا لما حققوا معاهم؟
رفع مختار حواجبه وقال..
/ حقيقة هي هني المصيبه...
المهدي قعد يشوفله بضيق وقلق في نفس الوقت..
مختار:الشباب اللي كانوا مدايرين تشكيل عصابي كانت عندهم سوابق سرقه قبل منهم حياش في شارع القهوة..
المهدي رفع حواجبه بتعجب..
مختار:وراهم مش كبار الكبير فيهم عمره مايفوتش 25 عام والصغير فيهم عمره ماتعداش 15سنه..
نزل المهدي حواجبه وعقدهم..
مختار:للأسف الشديد اللي ساعد او اللي خطط معاهم لكل السرقات اللي داروه..قعد يشبح لعيونه المهدي للحظات بعدين قال...ولدي محي الدين..يعني ولد اختك...
#أقاوم
#طوبى
....يتبع......
(عارفتها قصيرة سامحوني الايام مرهقه شويه إن شاء الله نعوضكم غدوة)
