# طوبى "شارع القهوة" #جمان_فريد #الجزء_التاسع_والعشرين" عاصفه فبراير3" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ "كيف يسافر من غير مايقول معقوله لين نسمعوا من برا انه مسافر يعاين!؟' محمد بقلق:اني ولدك هدا بيجيب اخرتي بأفعاله يدير مافي راسه ومايفكر في حد.. مغليه بعصبيه وعيونها يدمعوا؛قالك مسافر!؟ عائشه ودموعها ينزلوا:لالا والله العظيم ماقالي حاجه.. محمد:باهي شن قصة المرض هادي.. عائشه؛والله ماعندي علم ماقالي شي.. مغليه بإنفعال:مالا شن تعرفي قوليلي شن تعرفي..والله شبحتي فيه شبحه هاج منك انتي بكل.. محمد؛مغليه! مغليه؛بالله خليني في حالي يامحمد ترا.. ومشت من حداهم وهي نازله في عائشه.. وراجلها قعد يتعذر عنها وهو يقول:معليشي بنتي ام ومعذورة شن ماقالت. عائشه؛حتى اني عاذرتها ياعمي..بس هي الادرى بولدها وتعرفه كويس كان تكتم على حاجه مستحيل حد يعرفها لو من كان يكون.. هز محمد راسه بأسف وضيق وقال:اني اللي نعرفه اني اللي نعرفه... ☘في الدور الثاني... نضال:تو انت مصدقها حكاية ماشي يعاين هادي.. الجالي:حتى اني مامشتش عليا ليا مده ملاحظه مش مهدي الاول.. نضال؛حاقد هلبه.. الجالي:ومن فينا مش حاقد..من فينا نسي اللي صار!؟ نضال وهو يتفكر في اللي صار معاهم قال:مانسيت شي.. الجالي:ان شاء الله ربي ينصره هو واللي معاه.. نضال شبحله وقال:آمين... ☘☘☘☘☘ في احدى المدارس في العاصمه... خشت سيارة الإذاعه المرئيه وكانوا ينظموا ويصوروا مسيرة للطالبات... هالمدرسه هادي كانت مدرسة طوبى... واختاروها هي من ضمن الطالبات اللي بيطلعوا في المسيرة وهي ضايقت من هالشي ع الآخر.. نجاح؛هاك البسي طوبى.. طوبى بضيق:شن هدا!؟ نجاح :لفيه ع راسك طوبى تحركي يشبحولك.. خدت طوبى ع مضض العلم الاخضر الملفوف...ولفت بيه جبهتها.. وجتها نجاح من الخلف قعدت تربطلها فيه وهي كان تطلع من المدرسه وقتها ومعاش توليلها... المديره؛هيا انتي وياها اوقفوا ورا بعض هيا..هيا.. ردوا وراي بصوت عالي.. رفعت قبضة يدها وقعدت تحرك فيها وهي تقول.. الشعب يريد..معمر العقيد.. والصغار قعدوا يردوا وراها في الهتاف.. والكاميرا تلقط فيهم كلهم.. لين ثبت المصور ع طوبى وقعد مركز عليها لأنها كانت ملفته هلبه.. ~~~~~~~ غرفه بضحكه:ياعارك انتي واللي دايرتيه ع راسك.. طوبى بضيق؛والله ماكنت نبي هما غصبوني.. فايزة؛الله غالب مسكينه شن تبيها دير اللي بيقولولها عليه بتنفده.. سدرة؛شوفي المصور الحقير تقول ماهناك كان هي! مطيره:سلمها ياربي بنية خوي الكاميرا حبت وجهها.. ضحكوا.. وطوبى ضحكت من وسط ضيقها وهي تتفرج ع روحها في التلفزيون... ☘ومن الغرب.. لجنوب شرق البلاد.. كان عبد القيوم مقعمز مع حناه في دار المعيشه.. جدته مواصله الليل مع النهار قدام التلفزيون تتفرج ع الجماهريه.. وهو كان يساير فيها... ماكانش مركز هلبه فالتلفزيون لين سمع حناه تقول:ماشاء الله ماشاء الله.. حرك عيونه للتلفزيون.. شافها.. فتح عيونه ع وسعهم وقعد مركز عليها.. ايه هي نفسها ام العيون الحايره.. كبرت..وزادت جمال... بس شن طلعها في التلفزيون!؟ ياااه..يشوفوا فيها غيرك توا مئات ياعبد القيوم.. ويتسلل لقلبه شعور الغيرة اللي ولع فيه النار.. وحتى بعد تم الخبر..مازال قاعد يغلي من داخل.. ☘والعجب كل العجب من حب ناض في لحظه..وكبر لحظه..وتمكن في لحظه برغم بعد المسافات وشحة اللقاءات برغم انه المحب مايعرف عن المحبوب اي شي حتى اسمه☘ 🍀🍀🍀🍀🍀🍀 ومن الحب.. للحرب... واخبار المهدي مقطوعه ومافي حد عارف عنه اي معلومه... مغليه تعاني وجعين وقلقها مضاعف ع ولادها الزوز البعاد عنها..وكل واحد فيهم مش قادرة توصل فيه.. عكس صفيه اللي كانت تطمن ع حسين بالإتصالات.. حالها خير من مغليه..تسمع في صوته وعارفه مكانه.. بس قلبها مازال واكلها عليه..فالنهايه مازال في جبهة القتال ومش معروف شن حيصير فيه مستقبلا... وامثال مغليه وصفيه مثايل في هداكا الوقت.. بس في من كان عايش حياته عادي ماأثر فيه شي من اللي قاعد يصير.. ممكن لأنه مامسه شي الى الآن.. وممكن لأنه شاف ماهو اثقل من اللي قاعد يصير في البلاد... ☘في ليله من الليالي.. كان مروح اياد من المستشفى ونفسيته تاعبه من اللي شافه فيها.. جرحى..قتلى...منهم من جبهات القتال ومنهم جوهم متفحمين جراء قصف القوات الاجنبيه ع المعسكرات.. وهو يسوق صارت رزمه قويه.. وطى راسه بعدين رفعه كردة فعل ع قوة الرزمه وقعد يتخيل في من جت قال:إنا لله وإنا إليه راجعون.. وين قرب يوصل لشارع القهوة.. بانت عليه نار والعه في مكان يعرفه كويس.. كان مزين فايزة.. اياد بصدمه:لاإله إلا الله!.. درس السيارة القدام شويه.. ونزل بسرعه..وقف قدام المزين وهو يشوفله شن صار فيه.. وقعد يفكر في فايزة وبناتها وقلبه واجعه عليهم.. طول قام تليفونه واتصل بالإطفاء.. بعدين اتصل بلطفي وبلغه.. ~~~~~~~~ سدرة بتوتر وقلق؛زعمه جت فيه شظيه!؟ لطفي وهو يلبس في رجليه قال:لا يابنتي وين بتوصل فيه الشظيه القصف بعيد.. ومشي طول طلع من الحوش.. وسدرة تشوفله وقلبه واجعها ع فايزة.. ع جية مطيره وهي تقول؛كان ماطلعوش سلافها مانبداش اني.. سدرة قعدت تشبحلها وهي تفكر في كلامها... ☘وبرا.. كان شارع القهوة مقلوب بقصة حرق المزين.. علموا بيه اغلب سكان شارع القهوة هديكا الليله الا فايزة.. اللي اختاروا يعطوها علم اليوم اللي بعده.. ☘☘☘☘ واقفه قدامه تشبحله كيف ولى اثر بعد عين.. مش مستوعبه اللي صار..قاعد تشوف في مصدر رزقها هي وبناتها راح هباءا منثورا.. شدتها صاحبتها من كتافها وهي تقول:هو صح يبي وقت بس يتصلح بإذن الله ويرجع خير من قبل.. فايزة؛هما مافيش غيرهم..مافيش حد ليه مصلحة يأذيني هكي غيرهم هما..اني اصلا استغربت سكوتهم عليا المده هادي كلها.. سدرة قعدت ساكته بس دموعها كانوا حيغلبوها وجعا ع حال صاحبتها.. لكن.. فايزة تبدلت ملامح وجهها للتحدي وقالت؛مساكين..نسوا ان السر هني في امها..ورفعت ايديها شويه وقعدت تحرك في اصابعها.. وسدرة شبحتلها وبدت تبان ع وجهها ابتسامه.. نزلت فايزة ايديها وشبحت للمزين المحروق وقالت؛لطف ربي خلاني كل مانروح ناخد في المواد معاي..توا بنكلم زبوناتي اللي حاجزين عندي يجوني للحوش..شبحت لسدرة وقالت..كان طوبى فاضيه ابعتيهالي.. سدرة بإبتسامه فخر بصاحبتها قالت:حاضر تو نشوفها.. فايزة:هيا بسرعه بسرعه معاش في وقت.. ومشت وسدرة معاها وكانت متفاجئه في طريقة تعاطيها مع المصيبه اللي نزلت بيها.. وهما خاشات لشارع القهوة.. قابلوهم اياد ومهند طالعين من حوشهم.. قدم مهند وقال:ربي يعوضك خير خالتي فايزة..وكان تبي شي اي شي حني حاضرين.. فايزة بإبتسامه؛بارك الله فيكم..بس معليشي مهند بنبعتك ع حاجات.. مهند:هيا هيا تحت امرك اني.. فايزة بإبتسامه:هي شويه وجايه. ومشت بسرعه.. سدرة؛بارك الله فيكم بالذات انت يادكتور.. اياد ابتسم بإحراج وقال:غير شن درت ياحسره لحقت بعد فات الفوت.. سدرة؛انت ديما فزاع دكتور ومواقفك يشهدلك بيها الشارع كله.. كان فرحان هلبه وهو يسمع في كلام سدرة.. وولده مركز عليه.. اياد بإبتسامه احراج:هدا اللي تعلمته هني في الشارع هدا..كلنا عيله وحده..هادي اول جمله قالهالي بوك لما جيت هني.. سدرة وهي مبتسمه:ربي يديم المعروف بين ناس هالشارع.. ع جية فايزة تجري..مدت لمهند ورقه فيها طلبات ملفوفه ع فلوس وقالت..خود مهند لازم يوصلوني بكري.. خدي منها اياد حول الورقه مدها لمهند خداها وهو مبتسم. ومد اياد الفلوس لفايزة وقال:تفضلي.. فايزة:لادكتور بالله عليك لا.. هز اياد راسه وهو يقول:غير خودي خودي.. فايزة؛مالا مهند جيب الورقه معاش نبي شي.. مد اياد الفلوس لسدره..خدتهم.. فايزة شبحتلها وفنصت فيها وهي ولاعبرتها.. اياد قال:السلام عليكم..ومشي لسيارته.. ردت عليه سدرة السلام بعدين قالت لمهند؛استعجل ولدي باهي نبوهم بسرعه.. مهند حط يده ع راسه بمعنى ع راسي.. ومشي ركب مع بوه.. تحرك اياد..وهما الزوز بعيونهم معاهم.. بعدين سدرة؛قداش فيهم خير الناس هادم.. فايزة:والشر جانا من اللي من دمنا ولحمنا.. تنهدت بحسرة ومشت..وسدرة لحقتها وهي تفكر ياترى لو فعلا سلاف فايزة هما اللي حرقوا المزين هل هدا حيكون حد اذاهم ليها؟! ☘☘☘☘☘☘ الساعه 5:30عصرا.. كانت اقبال في حوش الحاج لطفي جايه بخصوص الحادثه متاع حرق المزين.. اقبال؛الله يحرق قلوبهم وينتقم منهم..قوليلها مادور شي تو خوتي يتصرفوا.. سدرة:من رايي قوليلها هالكلام بروحك بش تطمن اكثر ويرتاح بالها.. اقبال هزت راسها وقالت؛تمام.. ومشوا الزوز طلعوا مع بعض من الحوش قاصدات الحوش اللي ماشيتله فايزة.. وهما طالعات.. جي يوسف طالع من الحوش.. فالوقت نفسه.. اللي قصفوا فيه القوات الاجنبيه احد المواقع القريبه.. اقبال سكرت عيونها ووذانها وعيطت .. سدرة:خيرك يابنتي بعيد! اقبال حطت يدها ع قلبها وهي تضحك وقالت:نخاف منهم هلبه.. سدرة بضحكه:درتي العار.. قعدت اقبال تشبح حواليها لين جو عيونها ع يوسف.. لقاته راكب سيارته وهو شاد ضحكته.. تحشمت ع الآخر.. ومشت مع سدرة وراسها لوطا.. فاتت من جنبها سيارة يوسف وسدرة تضحك عليها. وصلوا في حوش فايزة.. دقت سدرة ع الباب.. شويه وفتحت صفاء ابتسمت لما شافتهم وقالت؛اهلا..تفضلوا.. خشوا الزوز..واقبال قرصت صفاء من خدها وقالت..نجيها ياربي.. وطيح رزمه تانيه.. غمضت عيونها وشدت ع سنونها وهي تقول:العزي فيكم.. وسدرة وصفاء يضحكوا عليها... 🌻بعدين خشت داخل لقت حوش فايزة مزدحم.. والكل يخدموا زي خلية النحل.. لما شافتها فايزة جتها طول سلمت عليها وبدت تتعذر وتبرر.. اقبال؛فوتي الموضوع قتلك ماتعدليش تو نتصرفوا..وتوا قوليلي نقدر نعاون بحاجه!؟ فايزة بضحكه:تعرفي ديري فلو.. اقبال:لعبتي.. فايزة:مالا بري اشتغلي ع شعر الزبونه هديكا..واشرت عليها.. اقبال بحماس:تمام...ومشتلها بسرعه وقعدت تخدم معاهم... ☘ونجحت فايزة في التحدي وكملت لزباينها وطلعتهم بأحلى طلعه.. بس الشعور اللي كسباته اليوم فرحها اكثر..شعورها بالقوة والقدرة على مواجهة الأزمات بدون ماتنهار او تحس بعجز او تضعف... 🍀🍀🍀🍀🍀 ومازالت تمر هالايام الصعبه.. وفي كل يوم كان يمر كنا قاعدين نخسروا كلنا ومافي حد فينا كاسب.. كان النسيج الاجتماعي قاعد يتآكل من داخل.. مدينه تنحط في مواجهة مدينه جارتها..وهالمواجهه حتخلف موت ودم وثار واحقاد عمرها طويل... في العيله الوحده..انقسموا افرادها بين المؤيد والمعارض.. علاقات اسريه تهدمت..صلة ارحام وانقطعت.. بل في من غدر بأقرب الناس ليه وبلغ عنه وقبضوا عليه في ليله من غير ضي قمر وقادوه لمصيره المجهول... وهدا كله كان يخلف الحقد..والكراهيه..والانتقام... ☘☘☘☘☘ "اسمعيني جاي هدا ولد خوي حتى اني نحس فيه.." صفيه بحده:كان تحسي فيه ماتناصريش عدوه ضده.. مطيره:اني ماناصر في حد على حد اني قلت كلمه الحق وانتي تعرفيني نقولها لو على نفسي.. صفيه:عندك حق يامطيره عندك حق مش مجربه الضنوة الضنوة غاليه يامطيره توقفي معاهم حتى لو كانوا مع الشيطان.. اميمه شبحت لأمها بصدمه.. مطيرة ودموعها في عيونها:ايه ماجربتهاش الضنوة لكن صدقيني لو جربتها حناخد نفس الموقف لأن صغار خوتي صغاري..لكن خلاص ياصفيه بس نريحك بكل معاش جايه هني بكل..برغم انه حوش بوي لكن معاش هاوياته مادام انتم فيه.. ولفت ومشت طلعت من حداهم ودموعها ينزلوا.. طلعت من جنانهم لجنان حوش خوها لطفي. مشت طول ورا الحوش..وقعمزت وراه وانهارت بالبكي.. كلام صفيه كان موجع لأبعد فتح جروحها وقلب عليها المواجع وخلاها تذكر في ذكريات بشعه تبي تنساها.. ☘اميمه بحده:هلبه هكي ماما هلبه حرام عليك معقولة توصل بيك لهني تعايريها! صفيه بمكابرة ودموعها في عيونها:ماعايرت حد اني..اني بس قلت الحق اللي تحكي عنه..لو عند كانت مكاني ماكانش هدا موقفها.. اميمه بقرف من كل شي؛ياودي خي علينا وع هالثورة وع هالحريه اللي خلتنا نوجعوا بعض ونقهروا بعض..خي خي علينا خي.. ومشت وسيبت امها وهي دمع.. اما امها دارت روحها ماسمعت شي ولادارت شي.. قعمزت قدام التلفزيون وحطت ع قناة الجماهيريه وعلت الصوت.. ☘وفي شقة طاهر.. كان التلفزيون ع نفس القناه.. ناقلين عرس اعلاميه تابعه للنظام من امام باب العزيزيه.. صابرين؛محلاها تهبل وحتى راجلها امور.. نجاة:طياح سعدك..وان شاء الله انتي مصدقه الشو هدا ياغبيه! صابرين؛نصدقه علاش لا ياجرذة.. نجاه؛خليك في غبائك خليك.. سكتوا شويه بعدين صابرين قالت؛جردونه معاش اخبار عم سلافك.. نجاة وهي تتفرج؛تؤ.. صابرين؛ تو اللي قاعد برا في امان..لكن يستر الله ع المهدي كان ماتصير فيه حاجه.. نجاه:طاهر يفكر في كل وقت حتى هو يقول اللي برا عارفين مكانه لكن الخوف كله ع المهدي.. صابرين:الخوف عليك انتي يامينتي.. شبحتلها بإستغراب وقالت؛عليا اني!؟ صابرين؛كان لاقدر الله صارت حاجه في المهدي..بيخلي وراه مراة وصغار واكيد حوش شيابينك بيربوا صغار ولدهم وبش يقعدوا قدام عيونهم واكيد هي مالي عيشه مش حيخلوا بنتهم تقعد معاهم الا اذا... نجاه وهي عاقده حواجبها:الا اذا شني!؟ صابرين؛الا اذا ردها واحد من سلافها..وانسب واحد فيهم راجلك ياحياتي.. توسعوا عيون نجاه وهي تقول:ع جثتي والله ماتصير..هونا يردوها الجالي ولانضال عزابه.. صابرين؛صغار هدوكا مش قد مسؤوليه مش زي طاهر هو الانسب حتى من ناحية العمر.. نجاة؛والله ماتصير لو توصل بيا للقتل نقتل ولانخلي حاجه زي هادي تصير.. صابرين؛ادعي لسلفك ليل نهار كانهدا ربي ينجيه.. سكت نجاه وهي تشوف لأختها ونار والعه فيها وخوف كبير من تحقق توقعها... ☘☘☘☘☘ "ماعنديش ليك عشي" محي الدين؛قتلك نوضي ديري عشي.. كان خديجه حاقده عليه بسبب موقفه من اهلها واللي داره فيها بعد ماصار في عيلتها اللي صار لهدا ردت عليه بإستفزاز:ماعنديش ليك عشي.. هو جاها ضربها ع راسها من الخلف وقال:انت من تحسابي روحك قوليلي بمن مازال شاده ظهرك قولي..بماليك اللي معاش ولى ليهم وزن ولاقيمه ولابالمهدي الجرذ اللي مش معروف وين جت حذفته.. ناضت وقفت وهي تقول:راك تنسى هادوا الناس اللي خلوك بنادم ودارولك اسم.. محي الدين؛هو اني نقدر ننسى البركه فيك ياهانم دايرتهولي نشيد وطني ديما تسمعي فيه قدامي..لكن تعرفي كيف اني والله مازلت مخليك توا ع خاطر الصغار بس..وكانك عليا عايفك وكارهك ومش طايق نشوف لوجهك.. خديجه:كانك راجل حق..طلقني توا.. ابتسم سخريه وقال:هدا ماتبي...حاضر..انتي طالق... هي قعدت تشبحله بقوة وعيونها معبيات دموع قالت:والله..والله يامحي..حتندم ع اللحظه هادي وتجيني تترجى وتبوس في الايادي بش نوليلك.. دفها من ذراعها بإزدراء؛بري انتلفي انتلفي معاش متحمل وجهك اكثر من هكي.. هي شدت روحها ومشت لدارها.. طلعت شنطه ولمت حوايجها ومابتش تنزل ولادمعه.. بعد ماكملت تجهيز شنطتها..خدت عبايتها ووشاحها لبستهم وخدت الشنطه ومشت طلعت من الشقه من غير صغارها.. اول مانزلت من الدروج دموعها قعدوا ينزلوا.. طلعت من الباب الفاصل..بعدين من حوش شيابينها بكل بدون مايحس بيها حد.. مشت لحوش بوها وهي تبكي بصمت وكانت خايفه حد يشوفها..وصلت في حوش بوها.. طلعت المفتاح وفتحت الباب وخشت سكرت الباب وانهارت بالبكي.. ع طلعة امها من الحوش سمعت الباب انفتح طلعت تجري وين شافتها انفجعت.. جتها بسرعه وهي تقول:خيرك خديجه! خديجه وهي تبكي؛طلقني الوسخ يام لزني وطلقني قليل الأصل الواطي.. مغليه نزلوا دموعها وهي تقول؛صغارك وين!؟ خديجه بحقد ودموعها ينزلوا:خليتهوله الحقير خل يعاني بروحه قليل الاصل.. وامها تشوفلها بحسرة..ع حسراتها الاولى.. حسرة خوتها الولاد... ومن خوفها ع راجلها لانه معاش حمل صدمات قالتله جت حرجانه بس.. اما محي وين عرفوا اهله باللي داره قاموا عليه الدنيا وقعدوها.. وامه عطاته قلة السماح كان ماردهاش لكن هو ضرب بكل شي عرض الحائط ع خاطر مصلحته.. وصغاره اللي قعدوا يعانوا فيهم عماتهم وهما بأمس الحاجه لأمهم مااهتمش لمشاعرهم نهائي.. 🍀🍀🍀🍀🍀 وتمر الايام ع خديجه.. وهي تقاوم في شوقها لصغارها نصرة لكبريائها.. قعدت حابسه روحها في الدار وماتطلعش الاالقليل النادر.. وكانت تجيها نسرين تقعد معاها في الدار بالساعات تحاول تخفف عنها اللي هي فيه.. نسرين اللي سمعت باللي صار مع فايزة وجعتها بس ماقدرتش تساندها بأي شكل خوف من اي موقف تاني يديره راجلها يقضي ع كل شي نهائي... ☘ومش عارفه ان راجلها قاعد يتبع في اخبار فايزة ويراجي امتى تجيه الفرصه المناسبه معاها... 🍃ومازالت مستمره الايام العصيبه.. ومازال هلبه قلوب خايفه تترقب والحزن معبيها.. متجهه لله سبحانه وتعالى بالدعاء والتضرع راجيه منه استجابة الدعاء..ومايخيب في الله رجاء.. ☘صفيه وهي مقعمزة ع صلايتها وتدعي وهي تبكي.. ...يارب يارب ماتوريني فولدي سو يارب احفظه يارب يارب نجيه.. فجأة سمعت صوت رزمه قويه..غمضت عيونها بشده وقالت ببكي من وسط قلبها.. يارب يارب..يارب نجي ولدي... وبين قلوب الامهات المتولعه... مغليه وهي في مصلاها تدعي.. ..ياالله طمني عليهم ياربي نبي نسمع صوتهم نبي نعرف عنهم كل خير يطمن قلبي..قلب ام ياربي وانت ادرى بيه.. 🍃يااه ياع قلوب الامهات قداش عانت قداش شافت في هديكا الايام الصعبه.. حتى اللي ماعندهاش من يحارب في جبهات القتال.. ☘صفاء:ماما امتى تم الحرب.. فايزة:قريب ان شاء الله ياماما انتم ادعوا ربي يستجيبلكم انتم قلوبكم صافيه يابنتي.. مروة؛يارب..يارب تم الحرب.. فايزة؛يارب... فجأة.. سمعوا صوت باب الحوش تقلع.. ناضوا مفجوعين التلاته ماعدا تاله اللي مازال راقده.. ضمت فايزة بناتها ليها وهما يرعشوا من الخوف.. مروة وهي ترعش:ماما خايفه.. ويخشوا عليهم زوز لابسين عسكري وفي ايديهم كلاشنات.. وين شافتهم فايزة عرفتهم.. وقفت قدام بناتها وقالت:شن مازال تبوا مني يابشر شن مازال تبوا.. :من وجهك انتي مانبوا شي نبوا بناتنا بس.. فايزة بعياط؛لالا بناتي لا..والله مانخليكم تاخدوهم.. قدم واحد فيهم ضربها كف بقوة جت مرميه ع الارض وهي تتوجع.. وهما الزوز خدوا البنات.. صفاء ومروة يعيطوا ويبكوا.. وتاله رفعها واحد فيهم.. فايزة ناضت وهي تعيط وتقول:بناتي بناتي حولوا.. دفها واحد منهم لين خبطها في الحيط راسها انخبط فيه حست بدوخه خلتها مش قادرة تقدم.. وطلعوا بالبنات يجروا فيهم جر.. صفاء تعيط وتبكي.. لكن مروة حاولت تقاوم عضت يد عمها.. ؛ايي ياعن اصل امك..وجبدها من تيشرت متاعها وقعد يجر فيها وهي تعيط.. والناس برا تسمع ومافي حد قادر يقدم.. كانوا المسلحين معبيين المكان.. حتى لطفي ماقدرش يقدم خطوه قعد يتفرج بعجز والم وخلاص.. وداخل حوشه.. اخته وبناويته يسمعوا ويبكوا.. في حوش شنيبه.. مغليه واقفه ع الباب تمنع في ولادها من الطلوع.. في حوش الصيد.. كانوا نجاح وعواطف يتفرجوا وواجعهم حال فايزة.. فهالوقت.. اياد روح مع ولده من زيارة لخالته.. مهند:شن في!؟ اياد قعد يقدم بالسيارة ويركز في اللي قاعده يصير. بانو عليه زوز يجروا في صفاء ومروة جر وهما يبكوا.. اللي شافه خلا عقله يطير من مكانه... وقف في السيارة ونزل يجري ..تخطى المسلحين كلهم وكأنهم مش موجودين.. ووصل في البنات وجبدهم بقوة من عمامهم وحطهم وراه.. :هي انت شن قاعد دير!؟ اياد بغضب:انتم اللي شن قاعدين ديروا عيب عليكم عيب هادوا بنات خوكم حتى وهو ميت مالاش خاطر عندكم! :دكتور انت اطلع منها ماتخليناش نديروا شي نندموا عليه.. اياد:مفروض اللي يندمكم افعالكم هادي..كانكم رجاله بالحق ماديروش في مرت خوكم وبناته هكي هادوا لحمكم ودمكم اتقوا الله.. ؛انت قلتها بروحك لحمنا ودمنا يعني اطلع منها.. جاهم صوت فايزة المتعب وهي جايه تقول ودموعها تنزل:بناتي!..وشدت في الباب بش ماطيحش..وقعدت تقول..مستعده نعطيكم شن ماتبوا غير خلولي بناتي..نكب ع ايديكم ورجليكم..بس بناتي.. وداخت وجت مقعمزه ع ركابها وماوال تقاوم ماتبيش تفقد الوعي.. معاش قدر يتحمل لطفي قدملهم وقال:حرام عليكم ياناس حرام شن دارتلكم هالمسكينه يالاش انها خدت حقها وحق بناتها! جايين كلكم تستنصروا ع مراة وبنيات صغار.. الشباب اللي جو مع سلاف فايزة تأثروا باللي صار ووجعهم هلبه الموقف.. لكن سلافها كان راكبهم شيطان مابوش يتنازلوا عن مافي روسهم.. ؛جيب البنات جاي خيرلك.. اياد بتحدي:اقتلني بعدين خودهم.. صفاء ببكي:لاعمو اياد لا نمشوا معاهم عادي نمشوا.. قدم واحد فيهم بياخدها..ضربه اياد براسه ع خشمه.. وجعه بقوة.. شبحله بحقد وقال:جنيت ع روحك يادكتور.. ووجه فوهة الكلاشن ع اياد.. هني نزل مهند وهو مصدوم.. وكل من واقف في الشارع يتفرج... فجأه... طلعت الرصاصه من السلاح واستقرت في مكانها... وصوت صرخة صفاء وهي شاده في اياد بقوة كادت تشق السمي.. مع صوت مهند اللي نادى بأعلى صوته... "بوي"
#عاصفة_فبراير #طوبى
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
