(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_التاسع_والأربعين "خوي1"
《معظم أحداث هذه رواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
"سامنه ومزيانه الله يبارك"
طوبى وهي في حضن سدره:سلمك عمتي..
فردوس بإبتسامه:شن جوك مع عيت شنيبه..
طوبى:لحد الآن كويسين الحمد لله..
سدره وهي تمسح بصوابعها ع شعر طوبى قالت؛خديجه شن جوها معاك؟
طوبى:كويسه الحق..تباعدت عنها وقعمزت وهي تقول:لان معاملتها لأميمه ماعجبتنيش.
مطيره عقدت حواجبها وقالت:كيف تعامل فيها؟
طوبى:زي اللي شايفه روحها عليها ومش متقبلتها..
فردوس:حقودة خديجه ماتنساش..ماعدتلهاش ردتها ليهم لما جو يخطبوا..
مطيره رفعت حاجبها وقالت:تو نديرلهم ونقعمزلها خديجه هادي...
طوبى:غير ماتبيني ان في حد معاودلك حاجه تجي ع راسي وراسها بعدين..
سدرة:خيرك خايفه هكي؟
طوبى:مش خوف بمعنى الخوف..بس يعني اني مانبيش معاهم مشاكل من بدايتها..
فردوس:عندها الحق..خليها بعيده وغاليه..
مطيرة:ماتخافيش بنتي نعرف نتصرف..
سدرة:باهي خليني منهم وقوليلي شن جو الجالي معاك..
ابتسمت وقالت:الحمد لله..ربي نعم عليا براجل مافيش منه حنين ومحترم ويعامل فيا احلى معامله..
سدرة بضحكه:ويكركر في قطاطيسك وفاكرينك وراك..
ضحكوا..
فردوس بإبتسامه؛ربي يعقد عسلكم ويدوم هناكم..
طوبى بإبتسامه:آمين..البنات في الجامعه..
فردوس هزت راسها بإيجاب..
وطوبى تنهدت بعدين شبحت لسدرة وسدرة تشوفلها..
ولت لحضنها وهي تقول:استاحشتك..
سدرة بضحكه:اني اكثر رتيلتي..
مطيره بضحكه:الله يادنيا الرتيله هديكا كبرت وتزوجت..
فردوس:وين نشوف نجي بعيوني وعمرها 6سنين بالقفطان الاحمر التوب..قداش يهبل عليها..
سدرة بإبتسامه:تفكرته..اما اني قاعده نشوف فيها بهداكا القفطان الأبيض والجناوح..
ضحكت طوبى وزادت ضمت اختها..
☘☘☘☘☘
"غير فهميني قولي خيرك"
صابرين وهي حاضنه اختها وتبكي:ااه يانجاة ااه..
نجاه نزلوا دموعها وهي تقول:سلامتك وخيتي ياعمري.
قولي خيرك حبيبتي قولي..
تباعدت صابرين عن نجاة وقالت بالعبره:اليوم مشينا للدكتورة...بعد ماكملت كورس الدوا...وهو مراد..مراد مشي معاي...خشينا للدكتورة مع بعض قالتلي قدامه الحيوانه.
مافيش امل اني مانقدرش نجيب يانجاة..
تقطع قلب نجاة ع اختها وهي تشوفلها بألم..
وصابرين متابعه تقول بنفس النبره:وهو ماصدق..ماصدق يانجاة..قالي..اختاري وحده من زوز..ياناخد عليك يانخليك تمشي في حالك..
نجاة بإحتقار:النذل!..
ضحكت بسخريه ودموعها تنزل قالت:نحساب روحي غاليه عنده نحسابه مايقدرش يعيش من غيري...قتله طلقني.
تعرفي شن دار..قالي..انتي طالق..
نجاه بصدمه؛طلقك!
صابرين بحقد:الوسخ الحقير وقالي قبل يطلع نجي مانلقاكش في الحوش..
نجاة ناضن وهي تقول:سادك بكي ونوضي..تحركي نوضي..ولمي اللي هناك واول حاجه الذهب..اي حاجه عليها القيمه ماتخليهاش..
وقفت صابرين بكي وقعدت تشوف لأختها..
نجاه:تحركي هيا..
مسحت صابرين دموعها وناضت وهي تقول:تعالي عاونيني..
نجاه؛باهي بري قدامي.
ومشت صابرين لدار النوم ونجاه وراها...
☘☘☘☘☘
"علاش ماقلتيش قبلها!؟"
اميمه؛مش بالقول عمر معروفه بنمشي نتغدا عند ماليا ونعطيهم الهدايا متاعهم..
عمر:باهي حبي خليها عشيه..
اميمه بضيق:كيف ياعمر امي عابيه بيا ع الغدي!
عمر:وحتى امي عابيه بيك ياأميمه بكري سألتني شن تحب تاكل بش نديروه غدي..اعتقد مش حلوة منك لو فتيها وتغديتي في حوش ماليك..
اميمه بتذمر:علاش هكي ياعمر انت مفروض سألتني قبل..
عمر:انتي اللي مفروض تكلمتي ياقبل يااميمه..
مسحها ع شعرها بإيديه الزوز وهو يقول:معليشي حبي ع خاطري بري العشيه وغدوة بري لماليك واقعدي من الصبح لليل..
اميمه قعدت ساكته وهي مضايقه ع الآخر..
عمر:اميمه حبيبتي..اني مانبي حد ياخد منك موقف هني مانبيكش ديري زي عيشه مرت مهدي خسرت امي وخواتي وخلت المهدي بعيد عنهم..
اميمه:بس اللي اني ملاحظاته ان عيشه ع قد ماتقدر تحاول ترضيهم..
عمر:بعد مافات الفوت ندمت وتول قاعده دور في رضاهم ومش حتحصله..
اميمه ضيقت عيونها وقالت؛كيف يعني اني مفروض ندور ع رضا مني هني انت ولاماليك..
نزل ايديه وقال:قصدك انتي هكي اميمه!؟
اميمه:اني هكي كيف!؟
حط ايديه في نصه وهو عاقد حواجبه وقال:تبي طلعني من ماليا!؟..مش ساد السنين اللي قعدت بعيد عنهم فيهم ع خاطرك انتي..تبيني توا نقطعهم واني معاهم!
اميمه بصدمه:اني!؟
عمر:باهي فسريلي معنى كلامك!؟
شبحتله بنظرة اسف وقالت:مفروض معاك انت مانحتاجش نفسر كلامي..ع العموم انسى..هاني خاشه نبدل ونازله..
ومشت حداه ودموعها طول نزلوا..
هو غمض عيونه بشده ندما بعدين فتحهم وتنهد بضيق..
☘☘☘☘☘
بعد الظهر..
البنات لاهيات في الكوجينه وماخلوش طوبى تخش معاهم..
لهدا قعدت دور وتدهور في الحوش وكأنها تسلم ع حيوطه..واثاثه...
لعند ماوصلت في الممر اللي يرفع لدار بوها..
كانت تبي نخشلها بش تشم ريحة بوها الحلوة اللي تفكر فيها بطفولتها..
فتحت الباب وخشت..
شمت الريحه ابتسمت..
بعدين فتحت الضي وقعدت تمرر في نظرها عليه..
هي نفسها دار نوم امها..ماغيرش فيها ولاحاجه من اكثر من عشرين سنه..
شويه ثبتوا عيونها ع لوحه مركونه ع الحيط..
بفضول مشت تشوفها..
وقفت قدامها..
لقت جملة"مطحن جنه"مكتوب بخط مميز وجميل للغايه..
طوبى:محلاها..زعما عند مني دارها؟
مشت سكرت الضي وطلعت من الدار وسكرتها وتوجهت للكوجينه..
خشت عليهم وقالت:توا كنت في دار بابا لقيت فيها لوحه مكتوب عليها مطحن جنه..بتعلقوها في المطحن؟
سدرة:ايه..
طوبى:وين خدمها بابا خل نطلب منه يديرلي وحده زيها مكتوب عليها آية..
¤الذين ءامنوا وعملوا الصالحات طوبى لهم وحسن مئاب¤
ونعلقها وفي حوشي..
ابتسموا خواتها وعمتها قالت..
مطيره:ياحنه لامشي هني لاهني ولاطلبها جاته هديه..
طوبى بأسف:خسارة!..
سدرة:وعلاش خسارة اللي دار هادي يديرلك غيرها.
طوبى بتعجب:كيف؟
فردوس:التارقي اللي سكن جديد في شارع القهوة..
طوبى تفكرت كلام الجالي عنه عقدت حواجبها وقالت:امتي عرفكم وعرفتوه بش يعطيكم هدايا؟
سدرة:هدا جاي من طرف عمي جبريل بوي توسطله بش خدم هني في شركة الكهرباء وهو شكره بطريقته..
ارتخت ملامح وجهها وقالت:اها..
سدرة:تو نقول لبوي يكلمه يديرلك وحده..
طوبى:ندفعله حقها..
مطيرة:زعمه يدير فيهم بالفلوس!؟
سدرة:مش عارفه الحق..بس بعدين تو نسأل بوي..
طوبى:ايه سديره راهو غدوة بنجي وبنبات يومين..
ضيقت سدره عيونها وقالت:نعمين شن قلتي!!؟
ومطيرة وفردوس يشبحولها..
طوبى بشي من الخوف:بنبات..
سدرة:لاياعيوني لاانتي عروس ياماما بيات برا حوشك قبل تسكري سته شهور ممنوع..
طوبى برجاء:سدرة بالله عليك خليني نبات استاحشتكم هلبه..
مطيره:بنتي مايجيش من توا حتى حوش عيالك يعيبوا عليك وعلينا..
فردوس:تعالي من الصبح وفي الليل روحي..
طوبى بضيق:اني نبي نبات..
سدرة؛واني قلت لا..تم..ولفت تكلم باقي شغلها..
وطوبى طلعت من حداهم وهي مضايقه..
سدرة:هدا مامازال تبي تبات من اول اسبوعين بعيده ع راجلها..تبي تجيب لروحها وتجيبلنا الدوة..
مطيره:خلاص اهدي ماصار شي..
سكتت سدره وهي معصبه..
وفردوس تشوفلها بقلق..
☘☘☘☘☘
في الطريق..
متوجهين لشقة نجاة بعد مالموا كله..
وطول الطريق وصابرين تبكي ومش قادرة تسكت..
ونجاة موجوعه عليها ع الآخر..
وصلوا للعمارة..
وطول نزلوا من السيارة بالشناطي وركبوا للشقه..
اول حاجه دارتها نجاة..اتصلت بالجالي بش تخبره..
"هيي ردي بالك هدا واحد من الشهود ماتستفزوشي بش مايطلع شي"
نجاة:اني هدا علاش كلمتك نبيك دبر كيف تشوفه وتتفاهم معاه..
سكت شويه بعدين قال..
"باهي صكري صكري تو نكلمه"
سكرت نجاه وهي مضايقه هلبه..
ع جية صابرين وهي تقول:كلمتي الجالي!؟
نجاة:ايه نبي يسكر فم هداكا بش مايطلع شي..
صابرين بكره:سحيقه تسحقه..بعدين قالت..ايه قوليلي شن صار معاك غادي!؟
ابتسمت نجاة تهكما بعدين بدت تحكيلها...
☘☘☘☘
وفي طريق..
زحمه السيارات خانقه حركه السير..
كان ربيع يتذمر ويتضجر وهويقول: غيرشن روح بيا بس..
قعد يمرر في نظره ع السيارات..
شاف لسيارة جنب سياراته بنظره عابرة..
بعدين رجع شافلها بتركيز لما فيها حد يعرفه..
السيارة كانت لحامد راجل نسرين..
كان مركب جنبه وحده من منظرها المزري معروفه شن تكون...
شافهم يضحكوا مع بعض..ويضربوا في كفوف بعض..
وضحكة اللي معاه اللي في الطريق كلهم سمعوها..
كان يشوفله بغضب واشمئزاز هو مش مصدق مدى حقارته..
خفت الزحمه وبدوا يتحركوا السيارات.
وهو لقي روحه يتبع فيهم من غير مايفكر..
وقعد وراهم طول الطريق..
لين وصلوا للفيلا اللي مسكن فيها نسرين وامه وصغاره..
وخش بالسيارة لداخل..
ربيع ماكانش عارف ان هادي فيلا نسرين..
لكن زاد تأكد ان حامد شخص وضيع ومنحرف ومايستاهلش نسرين..
تحرك وفات من قدام الفيلا وهو معصب ع الآخر..
☘وقعد باقي النهاربمزاج معكر..
مقعمز قدام المطعم متاعه ونسرين ووضعها شاغلين باله هلبه..
شويه شاف سيارة حامد جايه لحوش شنيبه درس قدامه بدون ماينزل..
لحظات وطلعت نسرين ومعاها صغارها وفي يدها شنطه..
خداها منها ولدها وحطها في الكوفني..
وهي ركبت بوجه عبوس جنب حامد..
والصغار ركبوا..
ع جية سيارة فايزة..
عيون حامد قعدوا معاها لين خشت للحوش..
ونسرين قالبه وجهها وتشبح للروشن وهي مش طايقه وجوده..
وهو بكل وقاحه تنهد وقال:خسارة..
بعدين تحرك بالسيارة..
وعيون ربيع معاهم لين درقت عنه السياره وقال:وسخ..
☘وفي جنان حوش الواعر..
كان واقف الجالي ومعاه طوبى..
الجالي:انتي روحي لحوشنا وتي روحك واني بعد المغرب
نجي نرن عليك تطلعي..
طوبى:تمام..رد بالك من روحك والبس باهي الدنيا صقع..
بإبتسامه قال:حاضر حياتي..سلام..
طوبى:سلام..في امان الله..
طلع الجالي وطوبى بعد طلع سكرت الباب وولت خشت داخل..
مشت طول لبوها ..
لقاته مقعمز في الصاله ومعاه البنات وعمتها..
طوبى:بابا نبي منك حاجه..
سدرة شبحتلها وهي تفنص فيها..
لطفي:باهي قعمزي بابا..
طوبى:لا مروحه من توا غير بنطلب طلب بس..
وسدرة مازال تفنص..
وهما يمرروا في نظرهم بينها وبين طوبى..
لطفي:شنو بنتي؟
طوبى:شفت اللوحه اللي عندك في الدار وخاطري في وحده زيها نديرها في حوشي لو تكلم اللي دارها يديرلي وحده زيها وتو ندفع حقها..
لطفي:اول شي كلمة تو ندفع حقها معاش تقوليهالي مش كان تزوجتي خلاص معاش تولي مسؤوله مني!..
ابتسمت وقالت:اسفه..
لطفي:تاني شي الراجل مايبيعش فيهم دار وحده زيها لقهوة نضال وكتبلها ع الحيط وماخداش منه قرش..
ابتسمت اريج لما سمعت اسم نضال..
طوبى:تمام..اني نبي وحده فيها الآيه المذكورة فيها شجرة طوبى...
لطفي:(الذين ءامنوا وعملوا الصالحات طوبى لهم وحسن مئاب)
طوبى بإبتسامه:نبيها في اقرب وقت نبي نخش حوشي بيها..
لطفي بإبتسامه:حاضر...
طوبى:يحضرلك الخير حبيبي..هي بالسلامه توا..
كلهم قالوا:بالسلامه..
ماعدا اريج والاء اللي لحقوها وقعدوا معاها لين لبست عبايتها ووشاحها بعدين سقدوها وهي خدت القفص وطلعت بيه..
شافها معتز اللي كان واقف مع يزن ولدي المهدي..
قص الطريق وجاها بسرعه خدي عنها القفص وقال:هيا بري..
طوبى بإبتسامه:سلمه ياربي...
ومشوا بيقصوا الطريق تجي سيارة حسين..
وقف وخلاهم يفوتوا..
حياة معتز بحركة اليوم وهو ردها بس طوبى مابتش تشوفله..
وهو معاها بعيونه لين فاتت..
قدم بالسيارة ودرس بيها قدام الحوش وهو يشوفلها كيف وصلت حوش شنيبه..
فتحت الباب وخشت ومعتز وراها..
☘ع طلعة عبد القيوم من الحوش شاف سيارة حسين مدرسه قدام حوشهم..وشافه يشبح جهة حوش شنيبه..
تنهد وقال:كان الله في عونك وعونها..
وكمل طريقه لقهوة الزعيم وخشلها داخل هالمرة وقعمز..
وحسين خش بسيارته للحوش وهو متحسر..
☘واميمه اخته في حوشهم..
مقعمزة مع امها وتعطي فيها الهدايا..
صفيه:تعبتي روحك بنتي مالاش لزوم..
ابتسمت اميمه ابتسامه باهته وهي تقول:مافيش شي من قدركم ماما..
صفيه ركزت عليها وقالت:بنتي شن وضعك في حوش شيابينك..
اميمه:عادي..
صفيه؛متأكده بنتي؟
اميمه بضحكه:اكيد ماما خيرك!.
صفيه:وجهك مش عاجبني جوك مش مزبوط..
اميمه؛ماما امس قلتي نفس الكلام واني قتلك السبب خيرك نسيتي؟
تنهدت امها وقعدت ساكته..
ع خشة حسين لما شافها ابتسم وقال:قطوسه..
وهي ناضتله طول ومشت ضماته بقوة..
هو طبطب ع ظهرها وقعد يقول:حمد لله ع سلامتك..
اميمه والعبرة خانقتها:الله يسلمك..
☘وقعدت اميمه في حوش اهلها وتعشت غادي وعمر معاها..
وهو مقعمز في المربوعه كان مضايق من معامله علي الواعر ماكانش مهتم هلبه لوجوده..
بينما عبد المطلب وحسين كانوا يعاملوا فيه معامله حلوة..
بس مااهتمش هلبه للجد..قد ماهماته الحفيده اللي يبي يرضيها..
☘فهالوقت..
كان طوبى مع الجالي في وحده من المطاعم..
مستمتعين بوقتهم وعايشين احلا اللحظات...
الجالي وهو متفاجئ:يعني ماصارلكش من البيات في حوش ماليك..
طوبى:نسيبتك عفست فيها..
الجالي بضحكه:ربي يخليهالي نسيبتي ومايحرمني منها..تمام معناها بناخدك ونهرب بيك لليونان ولامن شاف ولامن دري..
طوبى وهي متفاجئه؛اليونان!..باهي وخدمتك وقرايتي؟
الجالي بضحكه:مش قاعدين السنين غادي كلهم4ايام..ومانبي حد يعرف..
طوبى:كيف ماتبي يعرف!؟
الجالي:حني بنشدوا حوشنا الايام هادم مانبو حد يدورنا..
طوبى:لامايجيش لازم نعطوا علم لحد..
الجالي:اكيد اني بنعطي علم للمهدي بس..
طوبى:واني بنقول لسدره بير غريق اختي ماتخافش..
ابتسم الجالي وقال:خلاص..الليله نروحوا للفيلا بش توتي الحوايج واني غدوة نجري ع الحجز..
طوبى بآبتسامه؛شن خطر عليك؟
الجالي:في بالي من الاول نرفعك لتركيا ومنها لقبرص ومن قبرص لليونان بش انتي سكرتي راسك ع اسبوعين وشوفي ربك كاتبلها نمشولها..
طوبى قعدت تشبحله وهي مبتسمه..
وهو يشوفلها بإبتسامه وقلبه يدق بقوة...
☘☘☘☘☘
"من عيوني ياعمي لطفي حاضر"
لطفي:قالت نبيها في وقت قريب..
عبد القيوم:حاضر بإذن الله بكرا تكون جاهزه..
لطفي بإبتسامه:يحضرلك الخير ولدي..هي السلام عليكم..
عبد القيوم:وعليكم السلام..
ومشي لطفي قص الطريق وتوجه لحوشه..
وعبد القيوم واقف يشوفله بإبتسامة اسف بعدين تنهد وتوجه للحوش...
☘☘☘☘
"الوقت يخوف يامحي واللي بدينا نسمعوا فيه يرعش وخيي..حجب بنتك وشدلها..ومعاش تخليها تمشي لحوش جدها هلبه مليان ولده..المهدي عنده زوز راهو"
محي وهو مقتنع بكلامها؛عندك حق..
عواطف؛ماتخليش البنت لأمها مستهتره ومش مدورة شي..
محي؛عندك حق..خديجه فري شويه..
عواطف:خلاص انت رد بالك من بنتك وشدلها..
وفي الوقت اللي كانت تحرض فيه عواطف خوها ع مرته وبنته...
كانت نجاح مقعمزة في الدار تقرا في البقرة..
وقدامها كراسة التحضير مفتوحه وكراسات الطلبه فوق بعضها..
☘☘☘☘☘
الساعه 10:00ليلا..
كانت مغليه مقعمزة في الصاله ومعاها خديجه..
مغليه؛ماني عارفه شن كانت تبي..
خديجه وهي تفكر:فتشتي في حاجاتك مالقيتي شي غريب ولافي حاجه ناقصه؟
مغليه؛لا..
خديجه؛شوفي يام البنت تربت ع الفقر والقله..مرات تمد في يدها راهو..
مغليه بصدمه:معقوله! مايبانش عليها..
خديجه:ماهو اللي مايبانش عليهم هما اللي مدرقين بلاوي..ردي بالك يام دارك بالمفتاح ودارنا حني...
مغليه وهي مصدومه:غبارتك ياعمر كان تطلع هكي حق ياناري ع ولدي..
خديجه؛والله ماكنت نبيها بعد ردتها فينا عرفت انها مش ساهله وياما تحتها دواهي بس انتي وولدك سكرتوا روسكم..
☘وولد مغليه عمر خش للحوش ومعاه مرته اللي كانت واخده منه موقف.
مشت طول للدروج اللي يرفعوا لشقتها..
وقفها عمر وقال:وين ماشيه؟ خل نخشوا نسلموا ع امي قبل ..
لفت ومشت وفاتته وخشت الحوش..
هو ضحك وخش بعدها..
لما خشوا سلموا لاحظ عمر ان امه واخته كأنهم مش طايقين..
بعد ماطلعوا..
عمر:صايره حاجه اني مانعرفهاش!؟
وقفت اميمه ع الدروج وقالت:زي شني مافهمتش..
هو تنهد وقال:خلاص اركبي اركبي..
ركبت اميمه وهي مخنوقه وعمر وراها..
وصلوا في الباب فتحه وقال:خشي..
وين خشت شافت الدنيا مظلمه ماعدا من ضي الشموع...
عمر بنبرة حب:كل شي يهون عليا الا زعلك..
في لحظه..
نست كل شي..وقلبها رفرف من فرحته..
التفتت وشبحتله بإبتسامه حلوة..
وهو قابلها بإبتسامة حب ونظرات عيون كلها مشاعر..
☘هي هكي القلوب الطيبه لما تحب تسامح بسرعه..
وتعطي ألف فرصه وفرصه..بس لما يتم رصيد الفرص تعطي بظهرها وتمشي ومع ترجع حتى لو كانت معلقه في من تخلت عنه☘
☘☘☘☘☘
والجالي وطوبى..
روحوا لحوش شنيبه..بش ياخدوا حاجتهم الضروريه ويخبروا مغليه انهم مروحين لحوشهم..
لكن خديجه خدت خوها ع تركينه وخلت طوبى مع مغليه في الصاله تهدرز هي وياها..
🍃قدام دار الكوي..
خديجه:قتلك قبل طوبى مش غبيه ياجالي..
الجالي بضيق:اني الغبي اللي خليتها ..
خديجه:من الاول قتلك طلقها..حتخرب عليك حياتك كلها الشيطانه هادي..
الجالي:ندوي ع الصورة..
رفعت حواجبها وقالت:ع الصورة!..يعني انت مازال متمسك بهديكا الو..
قاطعها وهو يقول بشي من العصبيه:رجاءا خديجه..رجاءا معاش توصلي فيها قدامي..مرتي حتى هي..وقدرها من قدري..
ضمت شواربها القدام بشي من الغضب بعدين هزت راسها وقالت؛تمام..خل نمشي نقول لطوبى قصة تاكم وبالمرة نحكيلها بصفتك مني شريته لنجاه..
االجالي بإنزعاج:فكينا من جو الفروخ خديجه..
خديجه:تمام خليه جو رجاله...وبرا قوللها انت مش هديكا مرتك ومش راضي فيها يعني مش حطلقها..يعني ناوي تخليهم الزوز معاك..ع هكي حيطلع زواجك السري في العلن توا ولابعدين....
قعد يشوفلها بنظرات حاده مخالطها الخوف..
بعدين مشي وتوجه للصاله..
وقف في بابها وهو يقول:هيا طوبى..
ناضت طوبى وسلمت ع عزوزتها وباست راسها وهي تقول:تصبحي ع خير عمتي..
مغليه:قدامك كل خير بنتي..
الجالي:تصبحي ع خير يام..
مغليه بإبتسامه:قدامك كل خير ولدي..
طلعت طوبى وهو معاها..
لاقتهم خديجه وقالت بإبتسامه:عتبة خير عليكم..
طوبى بإبتسامه؛آمين..
خديجه؛تصبحوا ع خير..
ردوا الزوز :وانتي من اهله..
حط الجالي يده ع ظهر مرته ومشي هو وياها..
وخديجه لاحظت انه خايف هدا علاش محاوط طوبى وكأنه خايفها تهرب منه..
حركت راسها يمين ويسار بأسف...
بعدين مشت لأمها...
☘برا..
طوبى والجالي وهما طالعين..
لقاهم نضال...
نضال بإبتسامه:اووو العرسان..باهي لحقت عليكم قبل تطلعوا..
ابتسمت طوبى..
والجالي قال:خير ان شاء الله!.
نضال:نبي مرت خوي في كلمتين وقدامك..
طوبى خالط ابتسامتها الاستغراب..
والجالي فهم شن يبي..ابتسم..
طوبى:خير ان شاء الله!
نضال؛الله عليكم محلاكم متفقين حتى في الردود احلى كوبل لتوا في حوش شنيبه..لتوا بس جايكم اللي حياخد منكم اللقب..
ضحك الجالي وقال؛خش في الموضوع من غير مقدمات مالغه..
نضال:ok..اسمعي مرت ناوي نكمل نص ديني تمام واللي نبيها تكمله بنت اختك وانتي عارفه اساسا..المهم اني نبيك تكلمها وتقنعيها ولولزم الامر بما انك خالتها اغصبيها حتى بالضرب..
ضحكوا الجالي وطوبى وبعدين هي قالت..
بعد تنهيدة ورفعة حواجب:والله شن بنقولك..الموضوع توا معاش ينفع نفتحه معاها..
استغرب الجالي..
ونضال عقد حواجبه وقال:علاش؟!
طوبى:في من سبقك..دكتور تخدم معاه وهي حاليا تفكر في الموضوع..
الجالي زاد استغرب بعدين شبح لخوه..شاف في وجهه ملامح الغضب باديه..
نضال هز راسه وقال:تمام تمام..تصبحوا ع خير..
ومشي خش داخل..
قعد يشوفله الجالي لين خش للحوش..
بعدين شبح لطوبى وقال؛ماقلتيش ع الموضوع هدا لما حكينا عن نضال وبنت اختك..
طوبى:هدا كان قبل لنعرف بالموضوع اللي جاها..في النهايه القصه قصة نصيب..
هز الجالي راسه وقال:مزبوط..هي بري قلبي..
مشوا الزوز وطلعوا من الحوش..
وطوبى تفكر في ردة فعل نضال..قصدا دارت هكي تبي تشوفه هل حيتمسك بأريج ولايفوتها..!؟
☘ونضال قعد طول الليل سهران.
قلبه محروق ويراجي امتى امتى يطلع الصبح...
☘زي ماكان التارقي سهران..
يرسم في الآيه بخط النسخ بإتقان شديد..
وين وصل في كلمة طوبى..
وقف...وقعد يقول:والله ماتستاهلي اللي صاير فيك..بس لربك حكمه اكيد وحده كيفك مش حيخليها واللي انتي فيه اختبار لكي...يارب تطلعي ناجحه..واهم شي تكوني كويسه..
وبدي يكتب في كلمة طوبى وهويقول..اللهم اجعلنا من الذين طوبى لهم وحسن مئاب...
☘☘☘
وخشت طوبى لحوشها...خشت وهي تقول بسم بالله...
بس..
اول ماخشت وكأنها في شي جي مسرع زي الريح..وخش لصدرها...
ماكانش لاسحر ولاعين ولاعمل شيطاني...
بل كان شعور خوف...
وعدم ارتياح..
كانت الفيلا كبيره واثاثها فخم..ونظامها حديث.
بس في عيونها مازهي شي من اللي شافاته..
ومش عارفه السبب..
الجالي بإبتسامه:ها شن رايك بعد شفتيها ع الطبيعه..
بلعت ريقها ورسمت ع وجهها ابتسامه مصطنعه وقالت:حلوة هلبه..
خدي يدها وقال:تعالي نوريهالك بالمكان..
وخداها ولف بيها الفيلا كلها وهو يحكيلها ع اللي فيها بالتفصيل وهي كانت تساير فيه مسايره..
بعدين ركب بيها للدور الثاني..
اللي كان فيه..
جناحهم..ودار الصغار..
وحجرة المرسم..وحجرة المكتب متاعه...
الجالي؛وهادي دار الرسم متاعك..لما صممت الخريطه متاع الفيلا كنت ناوي نديرها دار العاب للصغار..
طوبى:دارهم كبيره نقسموها نصين..
الجالي:ممكن...
ابتسمت طوبى وقالت؛شكلك تبيهم هلبه..
االجالي بضحكه:نحب الصغار زيك ياعسل..
طوبى بضحكه:باهي انت من النوعيه اللي يبي صغار ولاد بس؟
الجالي:طبعا لا..اللي يجي من ربي مرحبتين بيه..
طوبى:باهي بنقولك اني حالمه حلم قبل العرس ولما سألت علي تفسيره قالولي بعد تتزوجي اول عيل حيجيك بنيه..
الجالي بإبتسامه؛والله ياريت..وان شاء الله تجي نسخه امها ماتخلي من امها حاجه..
طوبى بضحكه؛ان شاء الله..وتجيني حنونه زي بوها..
ضحك وقال:نبي نسميها من توا..
طوبى:ترا شن في بالك اسم..
الجالي؛جنه...
ابتسمت طوبى لما سمعت الاسم..
الجالي:زيكم انتي وخواتك..فردوس سدرة غرفه وانتي طوبى..نبيها هي جنه..
طوبى بإبتسامه:لامتنا كلنا..
الجالي ضحك وقالت:نبي بنتي تكون الكل في الكل..
ضحكت طوبى وهي تشوفله بنظرات ود حلوة...
☘الحديث هدا نسى طوبى الشعور اللي حست بيه اول ماخشت للفيلا..
بس رجع هالشعور راودها اول مارقد الجالي..
بش تشغل نفسها عنه قعمزت ع الفيس..
وقعدت تقلب في صفحات..
وكل مرة يطلع قدامها منشور تكرر في اكثر من صفحه...
فيه آية من القرآن...
(¤هنالك ابتلي المؤمنون وزلزلوا زلزالا شديدا¤
ماانت فيه من شده وان عظمت ابتلاء...
يمحص مافي قلبك..يطهرك..يقربك..
مهما كنت ناسكا متعبدا صالحا لن تسثنى...
وتذكر ان اشد الخلق ابتلاءا الانبياء..
ثم الامثل فالأمثل...)
تمعنت هلبه في المنشور اللي خلا شعور الخوف في صدرها يكبر..
دارتله مشاركه ع صفحتها...
☘شافاته سدرة اللي تعودت تسهر وماترقدش الليل بسبب الحالة اللي تجيها..
قراته بالكلمه نزلوا دموعها..
كان خاطرها تنوض تصلي او تقرا قرآن بس مش قادره..
الخوف الرهيب اللي في داخلها مانعها..
بس ماقدرش يمنعها عن مناجاتها لله ب..
"يارب" اللي من وسط قلب مهتري مسن آكلت عليه الاوجاع وشربت..
🍃واختها..
قبل لتطلع من الفيس..
غيرت اسمها ع البروفايل..
ل...طوبى الواعر.. باللغة الانجليزيه..
والكنيه خلتها(جنة شنيبه)
قعدت تتأمل في الاسم وهي مبتسم بحب وعيونها معبيات دموع...
تنهدت..وطلعت من الفيس..
وحطت التليفون ع الكامدينو...
بعدين رقدت..وهي تشوف للجالي كيف راقد..
《 والله ياريت..وان شاء الله تجي نسخه امها ماتخلي من امها حاجه..》
ابتسمت لما تفكرت كلامه اللي حباته هلبه..
بعدين غمضت عيونها وبدت تردد في تاج الذكر لين راحت في النوم...
☘☘☘☘☘
تاني يوم..
الساعه 7:30صباحا..
"راما استني"
وقفت راما ع الباب وهي تشوف لبوها اللي كان جاي ناحيتها..
وقالت:نعم بابا..
خداها من يدها وقال:تعالي..
ومشي بيها للدار النوم...
وقف قدامها وقال:خديجه طلعي لبنتك وشاح تلبسه..
شبحتله خديجه وهي ضم في شعرها بنظرات مفاجأة..
نفس نظرات راما لبوها..
بعد ضمت شعرها جتهم وهي تقول:علاش!؟
محي:شن علاش!..نبي بنتي تلبس حجاب خلاص كبرت معاش تطلع هكي..
خديجه:شن خطر عليك توا؟
محي:خاطر عليا من وقت..الدنيا ولت تخوف وبنتك كبرت خلاص معاش تطلع لا بحجاب ولبس مستور..
راما:عندك حق بابا وكلامك صح..لكن المدرسه فارضه اللون الابيض والازرق كحلي مانعرفش كان ماما عندها هاللونين..
خديجه؛عندي ازرق كحلي بنتي..شبحت لمحي وقالت..ياريت مرة تانيه تخبرنا بقرارتك بكري بش نديروا حسابنا..
محي:هيا بسرعه طلعي للبنت وشاح وقت عليها..
شبحتله ع جنب بعدين مشت للدولاب...
☘نزلت راما بالحجاب وهي لابسه بالطو فوق بدلتها الاعداديه..
تلاقت مع عمتها عواطف اللي لما شافتها انصدمت..
البنت بالحجاب بعد البالطو بانت اكبر من عمرها..
راما:صباح الخير عمتي..
عواطف وهي وتبوي في حذائها وتمرر في نظرها عليها يصدمه:صباح النور..
ع طلعة نجاح وهي شاده مفتاح السيارة في يدها وين شافت راما ابتسمت ببهجه وقالت:اشيه اشيه..مبارك الحجاب..
راما بإبتسامه:الله يبارك فيك عمتي..
نجاح بآبتسامه:هي اركبي السيارة..
مشت راما ركبت السيارة ونجاح معاها..
بعدين شغلت السيارة وتحركت طلعت من الحوش.
وعيون عواطف معاهم..
بعد طلعوا..ضمت شواربها بعصبيه..
حطت الكندرة ولبستها..
خدت مفاتيحها وشنطتها من ع الركابه ومشت ركبت سيارتها وهي معصبه..
☘برا..
فاتت سيارة نجاح من قدام حوش شنيبه اللي طلع منه محمد..
شاف بنت عمته في السيارة بالحجاب ابتسم بفرح..
بعدين شاف لحوش سدرة اللي طلعوا منه بنات فايزة..
مرة كانت لابسه طاقيه صوف ودايره ضفرتين طوال حاطتهم القدام..
وكالعاده طالعه لطيفه وحلوة..
طارتله منها..
ومشي قص الطريق وجي وراهم..
محمد؛صباح الخير..
البنات؛صباح النور..
محمد:راما تحجبت ريتها استاذه مروة..
تعجبت مروة والتفتت شافتله..
محمد وهو مبتسم بعصبيه:انتي اكبر منها كانك ناسيه..
شبحت مروة لصفاء وقالت:خيره يكلم فيا هكي!.
صفاء بضحكه:مش عارفه..
محمد بهدوء:مروة البسي حجاب غلط تقعد هكي معاش صغيره راهو..
مروة سكتت شويه..بعدين التفتت وقالت بإبتسامه:ان شاء الله...
ورجعت شافت القدام..
هو وقف في مكانه وابتسم وهو عاض ع شاربه..
وهي واختها سرعوا خطواتهم..
فاتت من حداهم سيارة عواطف اللي شافتهم وقالت بغضب:خزي جيل معفن....
☘☘☘☘
جامعة طرابلس قاطع ب..
كلية الاقتصاد..
في قاعة من القاعات..
اللي تاخد فيها اريج محاضرة لمادة استاذها نضال اللي كان يحاضر وهو معصب ومش طايق روحه..
والطلبه كلهم مستغربين فيه..
صاحبة اريج:خيره اليوم قارنهم..
اريج بإستغراب:مش عارفه اول مرة نشوفه هكي..
شبحلهم لقاهم يتهامسوا قال:تبوا تهدرزوا اطلعوا برا..
الطلبه قعدوا يشبحولهم..
هما الزوز انحرجوا وقعدوا ساكتات..
نضال وهو يشوف للاب توب؛اللي مش عاجباته المحاضرة ومش عاجبه اللي يعطي فيها يسقط الماده يريح ويرتاح..
وقف ع حيله وقال..بالنسبه للجداول وكيف ينداروا..ركزوا معاي...
وبدي يشرح..
واريج مركزة فيه ومستغربه في حالته هو..
وهو مستغرب فيها اكثر اللي مادارتش ردة فعل...
وقعد يشرح وهو يتجنب يشوفلها وهي تشبحله..
بعد تمت المحاضرة..
والطلبه ناضوا بيطلعوا..
هو اللي كان يدس في اللاب توب وسط الشنطه قال:اريج اقعدي..
وقفت اريج في مكانها وصاحبتها تشوفلها..
بعدين مشت وخلتها وانصرفت مع باقي الطلبه..
نضال وقف الشنطه ع الطاوله وهوشادها..
وحط يده في جيبه وقال:تعالي ترا..
قدمتله وهي مستغربه ووقفت قدام الطاوله وقالت:نعم استاذ..
قعد يشبحلها بحده وهو عاقد حواجبه وقال:طلع كلامي صح ولا..في بينك وبين الدكتور حاجه..
اريج؛اما دكتور!
نضال؛اريج فوتي الاستعباط...
اريج؛مانستعبطش..جديات مش فاهمه شي..
نضال:نحكي عن الدكتور بو عيون ملونه وجسم رياضي اللي خطبك..
اريج فهمت انه متكلم مع طوبى وهي اللي قالتله بس شن قالتله..
نضال:تعرفي انك اكبر هبله ودرويشه عرفتها في حياتي احمدي ربك اللي حطني في طريقك بش كالعاده نلحق عليك في اخر لحظه قبل الكارثه.. عندك علم ياابله.. ان الدكتور اللي عاجبك وطايره بيه..متزوج..
اريج بصدمه؛متزوج!
نضال؛وعنده صغار..
شهقت وقالت؛كذاب!
نضال؛تمام مستعد توا توا نرفعك لحوشه ونخليك تشوفي بعينك..
اريج؛وعلاش يقولي بنخطبك الحقير!..
نضال:اشبح لشن كان مخطط.
حطت يدها ع خدها وقالت؛حي كان مايطلع من جماعة تجارة الاعضاء..اشبح من كاذب عليهم وقايللهم اعضاء احجار كريمه اللي حطوني في رووسهم هكي..
نضال؛وانتي هبله عاد طول قلتي باهي..
اريج:توا حني برا المحاضرة ومافي حد هني تمام...انفلتت فبه بعصبيه وقالت..هبله في عين عينك..اني رديته في نفس اللحظه وقتله لا..مانبيش نتزوج..
نضال هز راسه وهو يقول بإبتسامه متهكمه؛ايوه ايوه صدقتك..
اريج:والله العظيم والله العظيم ردتيه في نفس الوقت وقتله مازال بكري عليا..
هو ضيق عيونه بإستغراب وقال؛مالا شن تقول خالتك تفكري ماتفكري!؟
رفعت حاجبها وهي مبتسمه قالت:اني قلتلها هكي بلعاني..
رفع حاجبه اليسار وقال؛ بلعاني في مني!
اريج:في سلفها المتخلف..
نضال؛وشن بتستفيدي كان حرقتي دم سلفها السموح العاقل اللي ماشاء الله عليه!؟
اريج؛اني نشوف ردة فعله هادي..واشرت عليه بإيديها بعدين ضمتهم لبعض وقالت..ع فكرة انت مش قنين ومش هديكا الشخصيه الوااو بس فيك قبول..هدا علاش غير رأيي فيك..
هو يسمع فيها ويهز فراسه مسايرة وهو مبتسم ع اللي تقول فيه بعدين قال:وشن ولى رايك توا؟
اريج تنهدت وقالت:والله كانت تبي تعرفه ابعت السلطانات لحوشنا وتو امي تقوللهم..
هو قعد يشوفلها بإبتسامه حلو ونظرات حب ممزوجه بالفرح هي بإبتسامه فيها شي من الخجل والغرور في نفس الوقت:سلام يامستر..
ومشت من قدامه وطلعت من القاعه وهي تضحك في ضحكة فرح مكتومه..
بعد طلعت..هو غمض عيونه..ورفع قبضتي ايديه وقال:Yes..Yes...Yes...وبدي يرقص مصري ويغني..دي بشرة خير.....
قوم نادي ع الصعيدي وابن خوه البورسعيدي....
سمع صوت هدرزة قاعده تقرب..
وقف وغير ملامحه ولبس وجع الجديه..
بعدين خدي شنطته ومشي بيطلع ع خشة طلبه المحاضرة اللي بعدها..
:صباح الخير استاذ..
نضال بإبتسامه جديه:صباح النور..
وطلع من القاعه....
☘☘☘☘☘
في جنانها..
مقعمز ع روس صباعها قدام سلاحفها اللي ياكلوا في اوراق الخس..
وحواليها يحوموا قطاطيسها وهي تتكلم بالتليفون..
طوبى:عارفتك بتفهميها ع الطاير يانصي.
"مالا شنو بيبيتي..بس ياريتك شفتي وجهه كيف كان اليوم"
طوبى بضحكه؛شفته امس..
ضحكت اريج وقالت..
"باهي قوليلي شن جوك انتي"
طوبى:حلو..قاعده مع عويلتي في الجنان فهالجو الحلو وعين الله علينا..
"جو حلو في عينك ريح والدنيا مسحبه وكئيبه"
طوبي بضحكه:بالعكس يهبل والله الخريف احلى فضول السنه حتى الضي مايهربش فيه ملاحظه..
"ايه في هادي عندك حق"
طوبى:سكري روجه في حد خش عليا انتظار..
"تمام..سلام"
طوبى:سلام..وشافت التليفون لقت سدرة تتصل قالت..سبقتني..وردت عليها..صباح الورد سوسو..
"صباح الخيرات شن جو"
طوبى:الحمد لله تمام التمام..
"وينك؟"
طوبى:في حوشي امس بس جينا..
"كويس كويس..هاه شن عجبك"
طوبى وهي تمرر في نظرها عليه من برا قالت:ايه حلو..
"قاعده بروحك شكلك"
طوبى:ايه الجالي ماشي يتم في إجراءات السفر..
"سفر!؟"
ضحكت وقالت؛ضربت في دماغه نسافروا تاني ..
"وين؟"
طوبى:لليونان..
"وقداش يتقعدوا"
طوبى:نمشوا الاثنين بإذن الله نروحوا الجمعه..
"تمشوا وتجوا بالسلامه"
طوبى؛آمين..بس هاه سدرة ماتقولي لحد بكل تمام..
"وعلاش"
طوبى:الجالي هكي يبي..في حوشهم خبر المهدي بس..واني خبرتك انتي بس..
"تمام تمام...بس كان سألوا عنكم شن نقولوا"
طوبى:عرسان بيطلعوا ويدهوروا وعزومات وهكي..
"وخوه قاله نفس الكلام"
طوبى:ايه..سوسو تكلمي فيا من الحوش؟
"لاقاعده في المدرسه"
طوبى:تمام..
"بالسلامه توا.."
طوبى:بالسلامه..
نزلت تليفونها بعد ماسكرت سدرة ..
شافت للسلاحف وقال:خل نمشي ندير قهيوه ونشربها حداكم..
وناضت ومشت خشت للحوش..
☘وراجلها كان قدام حوش مراد بسيارته..
كان مراد راكب معاه وهما الزوز يهدرزوا..
مراد:مادخليش بموضوعك انت واختها مايخصنيش اللي يهمني توا انها ترد الذهب..
الجالي:لهالدرجه مالهاش قدر حتى حقها تبي ناخده منها..
مراد؛مؤخرها تاخده مقابل الذهب..
الجالي:الباين ماصدقت..
مراد؛بيني وبينك ايه ونادم اللي خديتها قصصهم ودوشتهم هلبه واني عييت الحق..
شبحله شويه وقال:تمام الذهب متاعك تو يوصلك..
مراد :خلاص عابي عليك..
ونزل من السيارة..
والجالي لبس نظاراته وتحرك طول بإتجاه المنطقه اللي تسكن فيها نجاة...
~~~~~~
تحت العمارة..
نجاة:ذهبها هدا من حقها!؟
الجالي:ياستي اني نجيبلها في مكانه قوليلها تلوحه في وجهه وتفكنا من الصداع..
نجاة وهي تشوفله من فوق لتحت قالت:مقعمز ع بنك!..
الجالي تأفف بضجر..
نجاة بسخريه:ماهو حتى لعبتك تبيك تشري تاكم لأختها عيد ميلادها قريب..
تجاهل كلامها وقال:ايه ع فكره مش حيصير من موعدنا خليك مع اختك في ظرفها هدا خير..
نجاة:هي قالتلي خلي الصغار معاي ومادوري شي..
الجالي:واني قلت خليك مع اختك الايام هادي ماتندريش شن شكل حالتها النفسيه توا..اختك اولى بوقتك..
قعدت تشبحله بنظرات عدم ثقه..
وهو شبح القدام وقال:هي انزلي مش فاضي عندي ماندير..
هزت راسها وبلعت ريقها وقالت:اممم..تمام...مش مشكله اخرتك حدورني وتتصل بيا وتجيني بروحك..
تنهد بملل من غير مايتكلم..
هي ابتسمت تهكما بعدين فتحت باب السيارة ونزلت وسكراته بقوة..
وهو تحرك بسيارته وطلع من العمارة...
☘☘☘☘☘
"وخيرها اللا مانزلت وخدت بخاطر عمها"
المهدي:ديروا حفلتكم بالمنظومه وتبوها تحضر!
مغليه:دير زي مادارت في العرس تقعد في الكوجينه..
المهدي رفع حواجبه وقال:خدامه يعني!..
مغليه قعدت تشبحله بحده وهي ساكته..
المهدي:اسمعي يام من الاخير مرتي كان مالقتش احترامها في حوش ماليا معاش يلزمها..اني الملزوم بيكم بس...
مغليه بحمق ودموعها في عيونها:باهي باهي يامهدي اجري ورا مرتك ودور ع رضاها...بالك يوم غدوة دخلك الجنه..!
ومشت خشت داخل ودموعها نزلوا..
وهو حرك راسه يمين ويسار بقلة حيله.
بعدين مشي طلع من الحوش....
وهو يسكر في الباب شاف سيارة سدرة جايه..
قعد معاها بعيونه وشافها وهي نازله منها وماشيه تفتح في الباب..
لاحظ انها ضاعفه..وباين فيها الاجهاد..
واللي عندها من مرض مفروض يزيد وزنها مش ينقصه!..
خشت بالسيارة بعدين نزلت وسكرت الباب..
تنهد بقلق بعدين مشي ركب سيارته وتوجه للمنطقه اللي فيها محلات مواد البناء اللي يملكوها..
☘☘☘☘☘
الساعه 5:00عصرا..
"سهرت عليها امس في الليل لين كملتها"
لطفي بإبتسامه:سامحنا تعبناك..
عبد القيوم بإبتسامه؛تعبكم راحه..ان شاء الله تجي كيف مايبوا..
لطفي:لا انت ماديرش الا الحاجه المليحه..
ضحك عبد القيوم وقال:ربي يحفظك ويطول في عمرك ياعمي لطفي..ماتبي شي .
لطفي:خش اشرب قهوة..
عبد القيوم؛مرة تانيه ان شاء الله..لازم نعدي للعمل عندي خدمة ضروريه..
لطفي بضحكه؛باهي قوللنا بيهرب الضي اليوم؟
جاوبه وهو يضحك:لالا الفترة هذي الوضع مستقر..
لطفي:دوم ان شاء الله..
عبد القيوم؛نقولوا ان شاء الله..
لطفي:هي مانعطلش عليك برا شوف حالك..
عبد القيوم بإبتسامه؛هي السلام عليكم..
لطفي:وعليكم السلام..
مشي عبد القيوم..
ولطفي خش باللوحه وسكر الباب..
خداها خش بيها للحوش وهو ينادي:سدرة..ياسدرة.
طلعت سدرة من الدار وجاته وهي تقول:نعم!..
لطفي:التارقي جاب اللوحه اللي تبيها طوبى كان تكلميها تقول لراجلها يخطم هني وياخدها..
سدرة جاته وخدت منه اللوحه وقالت؛كلمتها بكري وقالت معزومين...خليها عندي في الدار امتى تجينا تو تاخدها..
هز راسه وقال؛ديري معرفتك..
ومشي وهو يقول:ماشي لجدك..
سدرة؛باهي..
ومشت باللوحه وحطتها في الدار ورا الباب..
شافت لمية الرقيه وزيت الزيتون اللي جابهم عبد الرؤوف .
اللي ماخدتش منهم الا مرة وحده بعدها معاش قدرت..
شافتلهم بضيق بعدين مشت طلعت من الدار وسكرت الباب..
🍀🍀🍀🍀🍀
وجي اليوم اللي بعده..
وسافروا الجالي وطوبى لتركيا واللي منها حيمشوا لقبرص ومن قبرص لليونان..بدون مايعرف حد اخطا المهدي وسدرة..
بس سدرة ماكانتش تعرف حقيقة المشوار اللي حيمشوله فردوس وغرفه اليوم اللي بعده..
المشوار اللي كانت ملهوفه عليه غرفه..
ومترددة فيه فردوس ومضايقها..
🍀🍀🍀
وجي يوم الثلاثاء..
وجت ساعة الموعد..
فردوس:مش مطولين قبل المغرب نكونوا هني..
سدرة؛باهي بروا..بروا..
غرفه؛بالسلامه توا..
فردوس:بالسلامه..
سدرة؛بالسلامه..بالسلامه..
طلعوا من الحوش وهي سكرت الباب وخشت تجري وهي تقول:هي بسرعه ابدوا وتوا المغرب بعد ساعه ونص..
اريج؛خزي ع الجالي خدي طوبى بكل معاش يبي يجيبها..
سدرة؛عرسان هادم ماعندهم مايديروا بوجوهنا..هي بسرعه تحركوا..
وقعدوا يجهزوا في الزينه ع خشة مطيرة جايه من برا..
مطيره:ووك ووك اليوم اني انهديت..
شافتهم شن يديروا ضحكت وقالت:الله عليك جو..
لوحت شنطتها وقالت؛خل نبدل ونجيكم..
ومشت من حداهم بسرعه..
وهما لاهيات يجهزوا في الصاله..
والتلفزيون حداهم مفتوح ع قناة مسلسلات .
جابت مسلسل قديم من 95..
اريج:لن اعيش في جلباب ابي قداش نحبه..
آلاء بضحكه:يتم ونعاود حتى ع اليوتيوب ندور في مقاطعه..
هما يهدرزوا..
وسدرة تشوف للمسلسل اللي ليها معاه ذكريات مش قادرة تنساها..
🎥في وقت سابق..
سنه 1995...
مقعمزين قدام التليفزيون يتفرجوا ع المسلسل..
هي وامها وبوها وفردوس ومختار..
وغرفه راقده حداهم..
وردة؛ماشيط ريق امه وتعبها معاه مش عارفه علاش مايبيش يفهم انه الولد الوحيد ع بنات وهما عابيين عليه..
مختار:وكان الولد الوحيد يام يدفن روحه ع خاطرهم..خواته سيورهم يجيهم نصيب وكل وحده تعيش حياتها تنساه..
لطفي قعد يشبحله بأسف وهو يتكلم..
وسدرة وفردوس يشوفوا لبوهم..
وردة بضيق:كيف يعني يخلي خواته وصنعة بوه للغرب وهو يمشي بعيش حياته اناني هدا..
مختار:وبوه مش اناني اللي بيبيه بالسيف يدفن احلامه تحت رجليه!؟ وكان هو مش لاقي روحه في صنعة بوه وجده واختار طريق تاني يعاديه..
فردوس؛خلاص بالله عليكم خلونا نتفرجوا فاتوا هلبه مشاهد .
ناض مختار وهو يقول بعصبيه:تفرجي..
ومشي طلع من حداهم..
سدرة شافت لبوها بضيق..
لقاته يشبح لأمها..
شافت لأمها لقتها تشوفله بحزن وعيونها معبيات دموع..
وشاده صوابع يدها اليمين بيدها اليسار وتضغط عليهم بقوة..
الوقت الحاضر📽
"سدرة"
استاقظت وشبحت لعمتها وقالت:نعم..
مطيره:فوتيه التلفزيون توا وقيمي معاي الطاوله..
هزت راسها ودموعها في عيونها وقالت:حاضر..
☘وفردوس وغرفه في الطريق هما وعبد الرؤوف..
فردوس:خليك قريب علينا ياعبدالرؤوف..
غرفه؛حسستني اننا ماشيين نشوفوا سفاح..
فردوس؛مش هدا قصدي بس مرات ننفعلوا هلبه وتصير لوحده فينا حاجه..
عبد الرؤوف:مادوري شي وخيتي فردوس بندرس قريب عليكم...
وشويه..
ووصلوا في المكان اللي بيوشفوا فيه مختار..
كان منتزه كبيره..
عبد الرؤوف درس في مكان مستخطي وقال:انزلوا..
نزلوا الزوز وهما يرعشوا..
عبد الرؤوف نزل من السيارة وقال:تعالوا معاي..
ومشي وهما معاهم..
وصلهم وين مافي مقعد طويل وقاللهم؛قعمزوا..
قعمزوا الزوز وقعدوا يدوروا بعيونهم عليه..
عبد الرؤوف:خل نشوفه وينه..
تباعد عليهم واتصل بيه..
مدت غرفه ايديها لأختها وهي تقول:شوفي كيف يرعشوا!..
شدتهم فردوس بيد وحده وقالت:متوتره اكثر منك...
قعدوا يشبحوا الزوز لعبد الرؤوف وهو يتكلم بالتليفون..
شافوا سكر وشبح يمين وثبت نظره..
شبحوا الزوز وين مايشبح..
شافوا واحد جاي من بعيد..
لابس معطف ازرق كحلي..
ع سروال جينز لونه قهوي هافت محشي فيه قميص ابيض..
كل مايقرب قلوبهم تزيد سرعة دقاتها..
انفاسهم تتسارع...وتزيد رجفتهم اكثر..
يزيد توتر...وتزيد اللهفه ويزيد معاها الخوف..
خلاص وصل فيهم..
كانت نظرات عيونه واضحه..
نظرات شوق ولهفه غارقات بالدموع..
فردوس شافت كيف شعره ولحيته مصفيهم الشيب وجعها..
بس لما مررت نظرها ع لبسه شعرت اتجاهه بشعور نفور..
عكس غرفه اللي ناضت وقفت وهي في قمة اللهفه..
قالت ودموعهاينزلوا:مختار..
هو وصل فيهم وقال بإبتسامه ودموعه طول طاحوا؛غرفه..
لما سمعت اسمها طالع من فمه..
لقت روحها ماشيتله طول وراميه روحها في حضنه..
وهو ضمها بقوة وبدون مايقول كلمه قعد يبكي..
وهي تبكي معاه وتقول:علاش شوقتنا عليك علاش..علاش حرمتنا منك يامختار علاش حرمتنا من قولة خوي..
فردوس حطت يدها ع فمها وهي تبكي بالصوت ومازالت مقعمزة في مكانها..
وعبد الرؤوف واقف من بعيد يشوفلهم وهو متأثر ع الآخر...
#خوي
#طوبى
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
