#طوبى "جنة طوبى"
#جمان_فريد
#الجزء_الخامس_والسبعين"اقاوم"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار..
"إستغفار الإنسان اهم من جميع الأدعيه"...ابن تيميه
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 مَهمَا صَعُبتْ الحيَاة سَنستطيعُ المُقاوَمَة لأنْ الله لا يُكلَف نفسَاً إلا وِسعُهَا.🍃
__________________________________________
🔺️قبل اكثر من شهر🔺️
في جنان حوش المحجوب..
حوالين طاوله..كانوا مقعمزين..
المحجوب ولطفي...ومعاهم طوبى..
والكلام كان للطفي..
لطفي؛بوي وع حياة عينه وفي عز شبابه وصحته سلمنا اني وعبد المطلب المطحن علاش بش يرتاح ويخلينا حني نعتمدوا ع ارواحنا ونتحملوا المسؤوليه..
طوبى بعدم استيعاب:هادي حاجه عاديه بابا..لكن اللي بديرهولي توا مش عادي..كيف تبي تعطيني الحوش وتملكهولي!؟..كيف تبيني نكون وكيله ع حصص خواتي في المطحن!؟ انت هكي تخوف فيا هلبه..
لطفي بهدوء:اهدي بنتي اهدي وحاولب تفهميني اني نبي نكون عندك شي تملكيه زيك زي خواتك فردوس عندها حوش في تاجورا كان صار ماصار تولي عليه..سدرة وان شاء الله ربي يردها صحيحه عندها حوش كبير تولي عليه..غرفه حتى هي عندها حوش مخليه راجلها ليها ولصغارها القدام ان شاء الله..لكن انتي بنتي شن عندك ماعندك شي..الدنيا يابابا فيها موت وحياة واني كان درقت عيني مانعرفش انتي شن يصير فيك فوق اللي صاير فيك لازم يكون عندك شي تولي وتلقيه لعازة الزمان..
دموعها بدوا ينزلوا وهي تشوفله وتسمع فيه..
وهو كمل يقول؛خواتك راضيات وتنازلوا ع خاطرك ورضوا يوكلوك ع ادارة حصصهم في المطحن والمحل..
طوبى رشفت وقالت؛باهي الحوش وفهمت قصته..لكن المطحن والمحل شني!؟
لطفي تنهد وقال:يوم اللي سكرت المطحن شفت اللي درتيه بش تخليني نرجع نفتحه مرة تانيه تزعمتي خواتك وعارضتوا وتمردتوا ولانسبتي..
ابتسم المحجوب وهو يشوفلها بنظرات حزن..
هي نزلت عيونها ويدوب ابتسمت وتمسح في دموعها اللي قاعده تنزل..
لطفي بإبتسامه:فكرتيني بأختك سدرة هكي كانت خلتني نتكا عليها وانشد العضد متاعي بيها وانتي في غيابها درتي زيها بالزبط..
قعدت تشوف لبوها بحزن ودموعها زي السيل..
لطفي بضيق:خلاص يابنتي بالله سادك بكي اني نبي نشوفك قويه وشاده حيلك نبي قلبي يطمن عليك..
طوبى بالم وخوف:كلامك هدا يخوف فيا هلبه..
هني المحجوب تكلم وقال؛بنتي طوبى بوك كلامه يقوله اي اب في مكانه بنته تمر بالمحنه اللي قاعده تمري بيها..
لطفي قعد يشوفله وملامح ووجهه كلها بؤس..
المحجوب:يبي الجالي وأي حد يتشددله يديرلك الف حساب قبل ليفكر يوصل فيك لان امثالهم ديما يستغلوا في ضعف الطرف اللي قدامهم اسوأ استغلال بش يخلوه يدير مايبوا فاهمه عليا بنتي..يعني لما يعرفوا انك مستغنيه وقويه مايقدروش يديروا فيك مايبوا..
هزت طوبى راسها بإبجاب وهي تفكر في كلام خالها..
وبوها يشوفلها..
رشفت بعدين شبحتله وقالت؛كان هدا اللي يريحك حاضر..
ابتسم لطفي بحب وقال؛ربي يرضى عليك دنيا وآخره..
المحجوب:مدام رضيتي توا اسمعيني كويس..حيندارلك عقد بيع للحوش وبهكي تكوني الشاريه وبوك اللي بايع..ومن ضمن شروط عقد البيع ان يكون في ثمن متفق عليه..
رفعه شنطه سوا كانت جنب كرسيه وحطها الطاوله ودفها بيده لطوبى وقال..الفلوس هادم حلال عليك ليك انتي..
طوبى قعدت تشبح للشنطه وهي متفاجئه..
المحجوب؛تو لما بنمشوا لمحرر العقود حتعطي لبوك الفلوس هادم ثمن الحوش تمام..الطريقه هادي اضمن طريقه..وحنكون اني شاهد ومعاي شخص تاني هو وجود الشهود من عدمه مش مهم لكن زي ماقلتلك للضمان والإطمئنان..
طوبى وهي مازال مش مستوعبه اللي قاعد يدور حواليها هزت راسها بالموافقه..
المحجوب؛خلاص خودي الشنطه الفلوس هادوا فلوسك حلالك ليك انتي..
مدت يدها للشنطه وخدتها وبوها يشوفلها بضيق ع الحاله اللي كانت فيها..
مازال صغيره..صغيره هلبه اللي قاعده تمر بيه..
ساعدها بش نزلت الشنطه وحطتها جنبها..
وهي تشوفلها بنظرات حب وحزن في نفس الوقت..
هو ابتسم وقاللها؛قعدت حاجه لازم تعرفيها..
طوبى قعدت تشبحله وهي تراجي فيع يكمل كلامه..
في الوقت اللي جي فيه اتصال للمحجوب..
رد عليه وهو يقول..
/ايوه وصلت؟.....باهي لحظه..وسكر بعدين اتصل برقم تاني وقال..بيجي ضيف توا خلوه يجي وين ماحني مقعمزين..بعدين سكر..
وطوبى ولطفي يشبحوله..
لطفي:جي؟
المحجوب هز راسه بإيجاب..
طوبى بتساؤل:مني!؟
تنهد بوها وقال:شريكنا ف المطحن..
طوبى بعدم فهم:شريك شني!؟ مش ع اساس خالي المحجوب طلع هو شريكنا في المطحن؟
لطفي؛لا مش خالك..الكلام هدا تمويه بس..
طوبى:تمويه!؟..علاش!؟
لطفي:شويه وتعرفي علاش..
طوبى:باهي من يكون !؟ حد تعرفه كويس وعندك فيه امان!؟.
لطفي؛لدرجة اني مأمنه عليكم مش مشاركه بس..
طوبى بإستغراب شديد؛من هو هدا اللي عندك فيه هالثقه هادي كلها؟!
المحجوب وهو يشوف يساره القدام قال..
/اهو جاي..
التفتت طوبى بتشوف عن من يحكوا بوها وخالها..
وتكون ليها المفاجأه الغير المتوقعه..
🍃بس هو لما كان جاي..برغم ظاهره اللي كله ثبات وثقه..
كان متوتر ومرتبك وكأنه بيخش امتحان واقف عليه مستقبله...
كان حريص هلبه ان عيونه مايجوش عليها فوق خوفه من الفتنه..كان خايف ثباته المزيف يتلاشى...
وصل فيهم وقال..
/السلام عليكم..
ردوا عليه المحجوب ولطفي السلام..
والمحجوب قاله؛تفضل..
قعمز ع الكرسي اللي ماكانش في غيره مقابلها هي بالزبط..
بس مارفعش عيونه فيها نهائي..
وهي مازال تشوفله بعدم استيعاب..
لطفي:تعرفيه جارنا عبد القيوم التارقي ومش جارنا بس يابنتي اني عندي ولدي واعز.
عبد القيوم؛بارك الله فيك..
لطفي:هو جي وعرض عليا الشراكه وماكانش عنده شروط كبيره..طلع من جيبه ورقه وقال..هادي صورة من عقد الشراكه...حقك تشوفيها..
عبد القيوم قام عيونه وشاف الورقه ولطفي يمد لطوبى وهي خدتها وفتحتها وقعدت تقرا فيها..
لطفي شاف للمحجوب..والمحجوب بادله النظرات..
وعبد القيوم رجع نظره للطاوله اللي حاط ايديه عليها..
طوبى بعد ماقرت العقد عقدت حواجبها بعدين قامت عيونها وشافت لبوها وقالت..
/معليشي بوي نسأله كم سؤال؟
قعد قلب التارقي وكأنه يضرب ضرب مش بس يدق بقوة..لدرجه حس انهم يسمعوا فيه..
لطفي:حقك اسألي..
طوبى شافتله وقالت..
/علاش ماخطرتلكش من قبل فكرة الشراكه!؟..
عبد القيوم؛لأنها ماخطرتليش من قبل ولافكرت فيها...
طوبى:علاش خطرتلك بعدين!؟
عبد القيوم:لأني بعدين فكرت ندير شغل لروحي ..
طوبى:تحط مبلغ وقدره في مشروع مش مضمون نجاحه ومش حيدخل عليك نص اللي حطيته فيه!؟
المحجوب قعد يشوف لطوبى وهو متفاجئ فيها..
وبوها يشوفلها بإبتسامه فخر..
عبد القيوم؛من قال مشروع المطحن نجاحه مش مضمون!؟ هل تعلمي ان اكثر المشاريع الناجحه حاليا هي مطاحن القهوة !؟ صح ماعنديش خبره فيها لكن شاركت ناس ان صح التعبير مخضرمين فيها واصحاب خبره وفلوسي مع خبرتهم حيخلوا المشروع ناجح ميه في الميه..هو حني قبل نخشوا رمضان وحركة البيع لاقوة الابالله كل يوم احسن من اللي قبله كيف في رمضان!؟
المحجوب؛مزبوط المطحن قاعد يربح الله يبارك..
لطفي قعد يشوفلها ويراجي في ردها..
هي شافت للورقه وقالت؛باهي مش غريب النسبه متاعك ماتفوتش20في الميه انت تعتبر الشريك الاكبر..
شبحوا لعبد القيوم وهما يراجوا في اجابته..
عبد القيوم؛انا حددت النسبه..ع قدي..يعني ع قيس حاجتي..
طوبى:القدام معناها تقدر تغيرها...
ابتسم المحجوب وهو يمسح ع ذقنه..
ولطفي ربع ايديه وهو يشوف لبنته وكان فرحان بيها هلبه..
اما عبد القيوم ع قد ماكانت تستفز فيه اسئلتها اللي بينتله انها مش مأمنه فيه ولامرتاحتله ع قد ماحس بمشاعره اتجاهها ولت اكبر من قبل..
رد عليها وهو يقول:ممكن نقصها اكثر من هك..
طوبى:انت شاركت مساعده بس..
عبد القيوم قام عيونه وشافلها وهو يقول..
/ومستفيد..
هزت راسها وهي تشوفله بنظرات فيها شي من الشك بعدين غيرت عيونها لخالها وقالت؛علاش التمويه خالي؟
عبد القيوم نزل عيونه للطاوله وهو يسمع فيهم..
المحجوب:احتراس من اي حد ممكن يفكر يدير شي يضر الجميع بعدين...
طوبى وهي تشوف لخالها قعدت تفكر في كلامه وبسرعه فهمت قصده..
لطفي؛عندك حاجه تانيه تبي تسألي عنها..
حركت طوبى راسها بالنفي ومدت لبوها الورقه..
المحجوب؛خلاص توا بنطلعوا لمكتب محرر العقود بش نتموا الإجراءات..جاهزه طوبى..
طوبى هزت راسها بضيق وهي ساكته..
المحجوب ناض وهو يقول؛معناها توكلنا على الله...
🍃ومشوا مع بعض كملوا الاجراءات اللي كانت قانونيه تماما بحضور المحجوب الضليع في هالمجال وكان عليه يكمل باقي الآجراءات التانيه بكل حرص وحذر...
••••••••••••الوقت الحاضر••••••••••••
🍃المحجوب:كل شي مشي بطريقه قانونيه سليمه ميه في الميه مايقدر حد يطلع منها ولاثغره..
غرفه؛وحني راضيات وبكامل ارادتنا تنازلنا..
طوبى:والحوش قاعد حوشكم زي قبل زي تالي..
مختار وهو مركز بنظره ع طوبى قال..
/صغيرتنا كبرت لهالدرجه؟!
طوبى بنظرات فيها اعتزاز وثقه بنفسها قالت..
/ومش حنبيعه لو عرضت عليا عشرة اضعاف حقه مش حنبيعه ونخلي ريحة بوي وامي للبراني..
هو قعد يشبحلها بحده وعيونه لمعوا بالدموع..
طوبى لما شافتهم غصب عنها قلبها رق بغض الشي وقالت بنبرةلطيفه...
/اقتنع خلاص انك معاش وليت من هالعيله حتى لو كنت قاعد متسمي عليها...كلامي اللي بنقوله توا مش قاصده نجرحك بيه لكن نبيك تسلم للأمر الواقع وتقتنع ان مالكش مكان هني ومافي حد فينا يقدر يقبلك بعد اللي صار...برا كمل حياتك كيف ماكنت عايشها زمان وخلينا حني نكملوا حياتنا كيف ماتكون ربي يتولانا..وانت ان شاء الله يسعدك ويبعدك..ماتخليش قلوبنا سودا عليك ارجوك..
خواته وخاله قعدوا يشوفله وهما يراجوا في رده..
اما هو اللي كان مركز بنظره ع طوبى..ناض وقف وقال بتهكم..
/هدا كله ومازال قلوبكم مش سودا مالا كان سودا كيف!!؟ لكن اني الغالط اني..نستاهل مايجيني..
ومشي طول طلع من الباب الخارجي...
والمحجوب ناض وراه طول..
فردوس بقلق؛ان شاء الله يخلينا في حالنا..
طوبى بشي من القلق:إن شاء الله...
🍃برا..
المحجوب وقف مختار وهو ماشي وقاله..
/ماتفكرش ضرها يامختار..
قعد يشوفله بعجرفه..
المحجوب:طوبى بالذات رد بالك تجي جيهتها..
ضيق عيونه وهو يشوفله بعدين رخاهم ومشي طلع من الحوش...
ركب سيارته المرسيدس السودا وشغلها وتحرك والغضب والحقد مسيطرين عليه...
وعيون عبد القيوم وهو مقعمز في قهوة نضال معاها لين ادرقت بعدين غير نظره لحوش لطفي الواعر وهو يفكر بقلق..
وحواليه في القهوة الموجودين شغلهم الشاغل مباريات كاس العالم يحللوا ويتناقشوا ويتعاركوا..
ونضال شاغل روحه معاهم اللي يشوفه يقول شكله ماصدق طلق وافتك..
بس عيون البشر ليها الظاهر..وعين الله تشوف مافي القلوب..
🍃وبعيد عنهم بشويه في حوش الصيد..
تحديدا في دار نجمه وراجلها..
نجمه بصدمه:معاش لقيتي يابنتي!؟
عواطف بسخريه:ايه يام من العشرين اللي جوني اخر اسبوعين هدا اللي خش راسي..
نجمه بضيق:يابنتي كيف ترضيها ع روحك تنزلي ضرة ع مراة تانيه وتحرقي قلبها!؟
عواطف:هي راضيه يام راضيه وبعدين هدا شرع ربي بنعرفوا اكثر من ربي!.
نجمه:والله ماهي ساهله حتى عليك انتي راجلك مشاركتك فيه مراة تانيه..
عواطف؛لاني اول ولااخر وحده يام...
نجمه بضيق:حرام عليك اللي بديريه في روحك تصيمي تصيمي وتفطري ع بصلة..
عواطف ودموعها في عيونها..
/ماصمتش يام اني ماصمتش..اني بختي بالهون مافي حد دق بابي ولاعبرني وحتى المرة الوحيده اللي اندق فيها بابي طلعت ضحكه وكذبه يام..يام افهمي اني ماعنديش خيارات ولاعاد عندي وقت نبي نلحق روحي ونجيب عيل نلقاه وين نكبر يام..ودموعها نزلوا..
نجمه بحزن؛خلاص بنتي خلاص كان انتي مرتاحه وراضيه خلاص تو نفتح الموضوع مع بوك ونرد عليك..
هزت عواطف راسها وناضت وطلعت من الدار وهي ترشف وتمسح في دموعها..
نجمه بألم؛لاحول ولاقوة إلا بالله العظيم..
🍃ومن عندهم لحوش جيرانهم...
وين ماقاعده كنتهم مع امها...
مغليه؛قاعده في حوش عمك مع كامله خلاص توا ولت كامله عندها خير من حناها..
خديجه؛مش منها يام..
مغليه بنرفزة:ياما يديروا الجدات جت غير عليا..طيب فيا اللي ماضربتهاش كان هدا قمتوا عليا الحد..
خديجه:يام ماتخليش المهدي يجافيك ويميل لغيرك..
مغليه بضيق:مش مني خوك هدا ديما هكي مخالفني عمره مادور رضاي..
خديجه:سايسي يام وسايري..وبعدين ماتخافيش منه خوي ونعرفه مايدير شي يضر ماليه..
تنهدت بعدين قالت:هالعمله السودا اللي دارها خوك..معقوله ياربي الجالي العاقل في خوته يدير هدا كله!؟ لاومع مني مع نجاة! تي كان كارهها في الدم مش طايقها لما تجي للحوش يهج شن اللي قلبه هالقلبه لدرجة ياخدها من ورانا!؟
خديجه؛هديكا العقربانه مش ساهله يام تمسكنت لين تمكنت وطياحته في شباكها لكن في الأخير جت ع راسها..
مغليه بغيظ؛وخلاها تشد علينا حاجه توا مايقدر حد يدبرلها دبارة يتلفها بيها من هني بعدين تقول عليا وعلى أعدائي..
خديجه؛لايام ردي بالك نجاة الفترة هادي لازم نقعدوا كاسبينها ردي بالك تفكري ديري حاجه تخليها تقلب علينا نبوها تقعد تحتنا وخليها تحس ان مصيرها هي بإيدينا مش العكس..
مغليه؛من غير ماتقولي..ورفعت فنجان القهوة ورشفت منه..
🍃ومن حوشهم...لحوش بنتهم نسرين..
كانت مقعمزه تتفرج ع التلفزيون وولدها جنبها في القعماز فايق يلعب بإيديه ومنسجم..
خش عليهم ربيع وقال:السلام عليكم..
التفتت شبحتله وردت عليه السلام..
وهو جي قعمز جنب يحيى وقعد يلعب فيه..
نسرين؛شن جو..
هو تنهد وشبحلها وقال بضيق..
/والله يانسريتي الجو ملخبط شويه..
نسرين بقلق:علاش؟
ربيع بضيق:مش عارف شن صار الفتره الاخيره ارباح المطاعم برا كل يوم في الناقص شريكي غادي قالي في شي مش طبيعي..
نسرين بقلق:لاحول ولاقوة الابالله..باهي كيف في شي مش طبيعي قصدك مدبره؟
ربيع:اللي فهمته ان في حد قاعد يحارب فينا..
نسرين؛باهي شن بدير توا؟
ربيع قعد يشوف ليحيى وهو يقول؛مش عارف يانسرين مرات نقول نسافر نوقف ع اللي صاير بروحي وفي نفس الوقت مانبيش نخليكم ونمشي..
نسرين؛ماهو متفاهمين قبل نسافروا معاك لما تسافر..
شافلها وقال:ايه لما يكون الوضع رايق والامور تمام لكن توا الدنيا ملخبطه يعني وقتي كله مش معاكم..
نسرين سكتت شويه وهي تفكر بعدين قالت..
/معليشي سافر بروحك المرة هادي واقعد غادي لين تصفي امورك..
غير نظره ليحيى وهو يشوفله بضيق..
حطت نسرين يدها ع يده وشدت عليها وهي تقول..
/ربك يحلها ان شاء الله خليها على الله...
قعد يشوفلها بإبتسامه بعدين جبد يده من تحت يدها ورفعها وهو يقول؛تعالي تعالي..
ابتسمت ومشتله..
وهو خداها لقلبه وقال:مازال ماتبيش تحكي ع اللي مكدرك..
نسرين؛مافي شي مكدرني واني معاك..
ضحك وقال:ياعمري ..
ضحكت ضحكه خفيفه..
وهو شاف ليحيى وقال؛نحب امك ياولد انت..
نسرين بصوت طفولي؛وحتى ماما تحبك ياراجل انت..
ضحك ربيع بعدين باس راسها وحط راسه عليه وهو يشوف ليحيى بإبتسامه مخالطها الضيق...
🍃وفي حوش لطفي الواعر..
جت فايزة مع بناتها وكانوا ناويين يتعشوا غادي..
ومعاهم صفيه واميمه..
الاجواء كانت عاديه يهدرزوا ويتنقلوا في كلامهم من حكايه لحكايه ويسلوا في بعض بش ينسوا الحزن شويه وجية مختار اللي زادت ع الهم هم..
☘فايزة؛خل نمشي شويه للحمام وجايه..
ومشت طلعت من الصاله..
وهما قاعدين يهدرزوا مع بعضهم ماعدا صفيه اللي كانت ساكته وهي تفكر..
شويه ناضت وهي تقول:ماشيه نشرب ميه..
مطيره:بالله كان الميه في الطرمس سخنت طلعي شيشة مثلجه من الفريز وحطيها فيه..
صفيه وهي ماشيه بتطلع قالت:باهي..
وطلعت من حداهم وتوجهت للكوجينه..ومنها للجنان..
قعدت دور بعيونها ع طوبى..
لقتها مقعمزه تحت شجرة الياسمين وشاده في يدها شيت وتقرا فيه..
خدت نفس بعدين مشتلها..
وصلت فيها وقالت؛طوبى..
قامت طوبى عيونها فيها وقالت..
/نعم خالتي..
صفيه:نبيك في كلمتين تعالي معاي..
طوبى وهي مستغربه ناضت حطت الشيت ع الكرسي ومشت مع صفيه للجنان من الخلف..
وقفت صفيه وطوبى وقفت قدامها وقالت..
/إن شاء الله خير خالتي!
صفيه بضيق:اللي بنقولهولك مانبيكش تفهميه غلط بنتي بالله عليك..بنتي اني تعرفي اللي صار ليوسف قبل وتعرفي شن كانت اخرته،عشم بنت الناس وحشمنا معاهم واللي داره ولى عليه وعلينا مرت مشت وخلاته يطلقها واخته انتي ادرى باللي صار فيها...
طوبى وهي تسمع في صفيه فهمت عليها وقعدت تشوفلها بإبتسامه اسف خفيفه جدا..ومابتش تقاطعها خلت تقول اللي عندها كله..
صفيه تنهدت وقالت بتوتر وضيق:اللي نبي نوصلهولك بنتي ان حسين توا..يعني من بعد ماعرف اللي صار فيك حسيته تلخبط هلبه وانتي تعرفي كويس حسين شن في فقلبه جيهتك..وزي ماتعرفي يابنتي هو توا خاطب واني خايفه يعاود اللي داره خوه..بلعت ريقها وقالت..عشم الولايا ياطوبى مش ساهل يابنتي واني عندي بنت وفي نفس الوقت نبي واحد من صغاري يستقر في حياته ساد ماصار في خوته مانبيشي ينتكب حتى هو..
طوبى هزت راسها وقالت:فاهمه عليه وعرفت شن تبي مني..حاضر من هاللحظه معاش نجي في طريق ولانخليه يشوفني حتى بالغلط..اني اصلا مطلعاته من موضوعي وحرصت عليه مايدخلش فيه طمني بالك خالتي ان شاء الله حتشوفي حسين عريس وتفرحي بيه مع حسنا.
صفيه ودموعها في عيونها:بالله ياطوبى ماتحرجي مني..
طوبى؛علاش بنحرج منك خالتي ماقلتي شي غلط عندك حق في كل كلمه قلتيها..
صفيه معاش قدرت تتمالك نفسها ضمت طوبى وقالت..
/سامحيني بنتي والله ماقصدي نزيدك على مابيك..
حطت طوبى ايديها علي ظهرها وقعدت تمسح عليها وهي تقول..
/ماتقوليش سامحيني مستحيل نزعل منك راك امي بعد امي وسدره ولانسيتي..
باستها من خدها وشدت وجهها وقالت ودموعها ينزلوا..
/ربي يفرج عليك ياماما ويعوضك خير يارب..
مسحت طوبى دموع صفيه وقالت..
/ان شاء الله..معاش تحطي في بالك شي ولاعاد تخممي في شي باهي..
هزت صفيه راسها وهي تشوفلها بحب بعدين شدت يدها وباستها وطوبى باست يدها حتى هي..
ابتسمت صفيه وسط دموعها وقالت:خلاص بري كملي قرايتك ربي يفتحها عليك..
طوبى بإبتسامه:امين..
وطلعوا الزوز من الجنان الخلفي..
خشت صفيه للكوجينه وهي تمسح في دموعها..
وطوبى ولت وقعمزت تحت الشجره..
وكانت مضايقه لأبعد حد..غمضت عيونها وقالت..
/ياربي..يارب..
بعدين خدت نفس عميق وطلعاته..وفتحت عيونها ونزلتهم للشيت وحاول تجمع تركيزها كله وتحطه في قرايتها...
🍃🍃🍃🍃🍃
وفي بلاد بعيده..
في منطقه في هالبلاد ليها فيها ذكريات معاه..
كان هو يمشي وسطها..وسط ذكرياته معاها..
وسط ايام تمنى من قلبه لو ترجع مرة تانيه...
يمشي وهو يشوف للطريق ويتفكر كيف كانت تمشي معاه في نفس الطريق وهي متعنقه ذراعه..
ابتسامتها الحلوة..هدرزتها الاحلى...بصارتها وضحكتها..
كانت احلى حاجه خشت حياته...
وتوا تبي تطلع منها!...
وقف وهو يمرر في نظره حواليه وصوتها وهي تهدرز وتغني في وذانه..
شافها..وهي راكبه معاه الدراجه وصوت ضحكتها معبي المكان..
شافها وهي مقعمزه تحت شجره حاطه راسها ع كتفه وتسمعله وهو يغني...
كله سراب ذكريات..لايمكن تتجدد او ترجع..
لأن هديكا اللي عاش معاها هالذكريات الحلوة راحت لغير رجعه...وجت في مكانها انسانه تانيه هو اللي صنعها بإيديه..
انسانه محطمه..ومكسورة..وقاسيه..وفي قلبها لايمكن يكون ليه مكان بعد اللي داره فيها...
بس هو يقدر يقبل خسارتها!؟
الجالي بغضب؛حتقعدي مرتي وليا اني بس...حنردك ياطوبى حنردك بالغصب بالطيب حنردك وبعدين نموت ولانفرط فيك...
🍃🍃🍃🍃🍃
"آلاء"
الاء وهي تحدد حوايجها؛نعم..
طوبى:غدوة امتى امتحانك؟.
الاء:9الصبح..
هزت طوبى راسها وهي ساكته..
الاء:علاش تسألي بيبو؟
طوبى:هكي وخلاص..
ومشت طلعت من الدار للكوجينه..
خشتلها لقت فيها اريج وفايزة ومطيره يوتوا في العشي..
طوبى:اريج..
اريج:نعم؟
طوبى؛امتى امتحانك غدوة؟
اريج؛9...
هزت طوبى راسها وهي ساكته..
مطيره؛وانتي امتى امتحانك؟
طوبى:11..
اريج:من بيرفعك؟
طوبى؛تو نقول لعبير تجيني..
مطيره؛وعلاش تحيري في البنت نرفعوك اني وحسين..
طوبى:لالا عمتي ارتاحي اصلا عبير ياما رفعتني وروحت بيا..
اريج بضيق؛اني وقت امتحاني من 9 ل11 مانقدرش نلحق نجيك ونرفعك بيريح عليك الوقت..
فايزة؛اني نرفعك حبيبتي..
طوبى:صحيتي فايزة تو تجيني صاحبتي ..
مطيره؛معقوله تراجي صاحبتك ترفعك وولد عمك قاعد..
فايزة؛طوبى حبيبتي ماتحيري حد اني نرفعك وبعدين كان بتروحي مع صاحبتك روحي ومانبيش نقاش زايد..
طوبى تنهدت وقالت؛باهي خلاص..صحيتي فايزة..
فايزة؛شن صحيتي ماصحيتي هادي برانيه اني ياطوبى!
طوبى بآبتسامه؛اعز من الاخت..
مطيره؛ايه والله كسباتك سدره وكسبتنا فيك..
فايزة بإبتسامه حزن؛الله يردها عاجلا غير آجل..
كلهم بأصوات متقطعه قالوا من قلوبهم..
"آمين"
🍃🍃🍃🍃🍃
"والله كان هي مقتنعه مانقدرش نقول لا لاتخليني نسأل عليه قبل"
نجمه؛حتى اني جيت بنقولك هكي..خلاص تو ناخد منها اسمه ونقولك عليه ودوروا وراه كويس كويس...
الصيد خش للسرير وهو يقول...
/ربي يجيب اللي فيه الخير..
هي قالت؛آمين..وخدت حوايجه ومشت طلعت بيهم وهي تحس في رجليها موليات ثقال ويوجعوا فيها...
🍃🍃🍃🍃🍃
تاني يوم..
23يونيو..سنة 2018..
الساعه 10:15صباحا..
في الطريق..رافعه فايزه طوبى للكليه بش دير امتحانها..
طوبى:كان مش السواقه خطر ع الحامل راني خديت سيارة سدرة..
فايزة؛ايه حقه علاش مافي حد حرك سيارتها ليها وقت واقفه ومدرسه ورا الحوش..
طوبى بحزن؛ماقدر حد يركبها بعدها..الله يرحمه بوي بعد باع سيارته خدي سيارة جدي رغم انها قديمه هلبه لكن مادورش المهم حاجه ترفع وتجيب وماباش يجي جهة سيارة سدرة بكل..
فايزة بحزن؛الله يرحمه..
طوبى وهي تشوف للطريق..
/تعرفي يافايزة لتوا مش مستوعبه..نحس فيه قاعد معناها وعايش وسطنا نتخيل فيه في كل مكان في الحوش يافايزة..شبحتلها وقالت..فايزة كيف قدرتي تصدقي وفاة بوك زمان كيف قدرتي تتخطي قوليلي..
تنهدت فايزة من قلبها وقالت..
/لما تتعودي ع غيابه تو تصدقي..اما انك تتخطي وجعك عليه هادي شبه مستحيله..بوي رحمة الله عليه ليه 19 سنة متوفي ياطوبى وكأني فاقداته توا بس...
طوبى قعدت ساكته ودموعها ينزلوا..
فايزة؛لكن تعرفي قعدت عايشه بعدين واني نتخيل فيه يعرف كيف عشت من بعده..كيف تحملت وواجهت وقويت روحي بش قدرت نعيش..نتخيل فيه ديما فرحانه بيا نتخيل فيه يقول..مش خساره فيها حني ودلالي..
ومسحت الدمعه اللي نزلت من عينها وهي تقول..
/ماهو هما تعبوا علينا وربونا احسن تربيه بش نعرفوا نعيشوا في هالدنيا من بعدهم ياطوبى..
طوبى ودموعها ينزلوا زي السيل قالت..
/الله يرحمهم...
🍃🍃🍃🍃🍃🍃
وفي قاعة الامتحانات..
وين ماكانت تمتحن اريج..
كان نضال مراقب مع استاذ الماده..
طول الوقت كان يظاهر بإن جوه عادي ولاكأنه في شي صاير ..
تعامل مع اريج زي مايتعامل مع باقي الطلاب..
وهي كذلك تعاملت معاه زي ماتتعامل مع باقي اساتذتها..
وفي عز الامتحان..
وحده من زميلاتها بسبب التوتر الزايد قعدت تبكي..
ولهت الطلاب عن امتحانهم بيها..
جاها نضال وقعد يكلم فيها..
نضال؛امتحان عادي راهو زيه باقي الامتحانات وحتى الاسئله متاعه مازال اسهل ولا دكتور؟
:بسيطه وساهله ويقدروا عليها غير هي تهدي روحها شويه..
فتح نضال شيشة ميه وحطها جنبها وقال..
/صلي ع النبي واشربي الميه وخدي نفس وطلعيه وادعي دعاء الامتحانات كلكم عارفينه وارجعي حلي..
خدت الشيشه وقالت:شكرا استاذ..
نضال؛في الخدمه ياعيت حنه..
ضحكوا الطلبه..
وهو بضحكه؛في حد شرقاوي معانا هني يقوللنا شن معناها عيت حنه؟
مرر نظره عليهم وقال:شكله مافيش..
الدكتور:اسأل استاذة امال بعدين..
هو قال:ايه صح أمال نسيتها بكل..
شاف للبنت وقال..هاه شن الامور تمام توا؟
ابتسمت البنت وقالت؛ايه..شكرا استاذ..
هو قال؛ولايهمك..هي سمي بالله وجاوبي..
ومشي ولى وين ماكان واقف..
وعيون الطلبه كانت دور بينه وبين اريج..
صاحبتها كانت تراقب فيها طول الوقت..
وهي دايره روحها ولامهتمه غاطسه في ورقة الاجابه وكأنها بروحها في القاعه مامعاها حد..
غيرت عيونها عنها ليه هو..لقاته يهدرز مع استاذ الماده ع مباريات كأس عالم بحماس..
استعجبت امرهم هلبه..وفي شكت ان هادم الزوز كانوا يحبوا بعض يوم من الأيام...
بس قلنا قبل...
للناس الظاهر..وللخالق القلوب...
🍃🍃🍃🍃🍃🍃
ورا رخامة البار متاع الكوجينه كانت مقعمزه.
ومرت بوها داخل الكوجينه واقفه ع الرخامه حتى هي وهما يهدرزوا..
مناسك:هي جت اخر السنه وهلبه حاجات ماتعرفهاش اني نبيها تجيني بش نساعدها لكن صعب..
فوزيه:حق الطريق طويله شويه وهيي كان جت العيشه بتروح المغرب صعبه ع نساوين برواحهم..
مناسك بنرفزة؛كان النكد اللي عندنا يهديه ربي ويرفعني..
فوزيه:تو نحاول فيه..
مناسك:بالله فيزو حاولي وتختيه قوليله اعزم صحابك ينغدوا ولايتعشوا..
فوزيه؛باهي باهي..
سمعوا صوت باب داره انفتح وتسكر..
فوزيه:حسه ناض خل نسخنله القهوة..
ومناسك تراجي فيه يخش عليهم..
شويه بان عليها وهو لابس تيشرت ابيض وشورب للركبه لونه بيج وشعره منكوش..وملامح وجهه متجهمه..
جبد كرسي وقعمز وهو يقول..
/قهوتي وين..
فوزيه:هي شويه بس..
صبتها وجبتهاله..
هو خداها ورشف منها بعدين قال..
/صباحكم..
فوزيه:صباحك مبروك وعدوك مهلوك ياأقدع ملوك..
مالك:-يستر الله..
فوزيه:خيرك!
مالك؛قبل تغني في موشح ع الفيقه ماخر كله هزايب!
فوزيه؛عندك حق..لكن قلت هالمرة نكسر الروتين..
مالك:تكسري الروتين ولابتفتحي موضوع..
فوزيه بضحكه:الله يبارك الله يبارك ديما تلقط فيها وهي طير..خوك من يومه نبيه وذكي ومرات يلقط الفكرة قبل لطير اصلا..
مناسك بإبتسامه؛معروف مالك اذكى واحد في الحوش..دماغه نظيف ناصع البياض..
هو قال؛عطوني السطر الاخير عطوني..
فوزيه؛وليدي..تعرفها البنيه هديكا صاحبة نسوكه الجديده مسكينه ياناري جت في نهاية السنه للمدرسه و ماتعرفش هلبه عن طريقه الابلات في الامتحانات فاهم عليا..ونسوكه شاطره زي ماتعرفها وهي اللي تبي تساعدها فاهم عليا..
هو قاعد يشوفلها بملامح متجهمه..
وهي كملت تقول..المهم البنت صعب عليها تجي هني الطريق الطويله شويه بينا وبينهم وكان جت العشيه بتروح بعد المغرب وانت عارف زحمه الطريق وليل فاهم عليا..
رشف من القهوة وهو يشوفلها بتجهم..
مناسك برجاء؛بالله عليك ملوكي ارفعني نقرا عندها..
فوزيه؛ان شاء الله ربي يفتحها عليك ويعطيك مافي بالك ملوكه..
حط فنجان القهوة وقال..
/تبي تمشي اليوم؟
هي قالت بلهفه؛ايه العشيه..
نزل عيونه لفنجان القهوة وهو يفكر..
ومناسك وفوزيه شافوا لبعض بتوتر بعدين قعدوا يشوفوله ويراجو في رده..
تنهد..وهما الزوز زادوا تلهفوا يراجوا فيه يتكلم..
شويه قال:ال..أ....وخدي فنجان القهوة ورشف منه..
فوزيه؛مبردك ومثقل دمك تي هيا قول باهي..
نزل الفنجان وقال:مافيش خيار تاني!؟
فوزيه؛في كرنب..
هو بقرف قال؛مانحباش..
مناسك بضجر:مالك خلاص عاد قول باهي..
تنهد تاني بالصوت وقال:باهي..
مناسك بفرحه؛وخيتي نجيه ياربي..وبدت تصفق وتغني.
خويا ياخويا ياخويا...
وفوزيه تزغرد بصوت واطي.
مالك؛اسمعي هييه..الوضع هدا مع البنت هادي بس غيرها لا فاهمه؟..
هزت راسها وهي مبتسمه بفرح وقالت؛حاضر حاضر..
ونزلت من الكرسي ومشت تجري وهي تقول..
خل نمشي نقوللها..
مالك:مش عارف شن دارت فيها البنت هادي تقول عمرها مادارت صاحبات قبلها!
فوزيه:الحق صحابتها الاولات شكل والبنيه هادي شكلها تاني حتى عيلتها الله يبارك عليهم يبانوا ناس محترمين وكويسين..وهي ووخياتها واضح عليهم متربيات كويس..
عقد حواجبه وقال؛اوفر شويه فوزيشن امتى عرفتي عنهم هدا كله تي هي مشيه وحده وفي عزي وماطيقتيش ساعه عندهم..
فوزيه؛ان شاء الله خمسة دقايق امك تعرف الناس من نظره شن توا معاش تعرف فراستي!؟
ضحك وقال؛لا نعرفها كويس فراسة تقازات ياحنه..
فوزيه بضحكه؛باهي نوض نوض غير هالمنظر لين نديرلك فطور..
ناض وهو مبتسم وقعد يمشي بإتجاه داره وهو يكر في رجليه ويغني..
"نمبر ون...انا..نمبر ون"
🍃🍃🍃🍃🍃
طلعت من القاعه بعد ماكملت امتحانها..
وكانت متوجهه بطريقها لسيارتها بش تروح..وهي ماشيه
شافاته..
واقف ع وحده ويهدرز عليها وابتسامته ع وجهه..
وقلبها زاد انحرق من نار الغيره اللي والعه فيه..
لكن تجاهلت..تصنعت البرود ولامبالاة..
فاتت من جنبهم عادي جدا..وكأنه مجرد شخص عادي مايعنيها في شي..
هو قعد يلحق فيها بعيونه ويشوف فيها كيف باردة ومش مهتمه..يزيد ينقهر وقلبه يتوجع...
🍃ركبت اريج سيارتها وقالت..
/ياربي ساعدني ننساه ونكمل قرايتي ع خير يارب..
تنهدت بضيق..بعدين شغلت سيارتها وتحركت..
🍃وخالتها طوبى..
دارت امتحانها...بعدين طلعت بيها صاحبتها عبير من الكليه للمدرسه بش تحضر الحفل الختامي للعام الدراسي..
لما وصلت للمدرسة وخشت استقبلوها الابلات والاساتذة وهما يعزوا فيها...
وبعدين مشت هي وبعض منهم للمسرح اللي مدايرين فيه حفل الختام...
☘خشت للمسرح وقعمزت في اول صف وعبير صاحبتها جنبها من جهة ومن الجهة التانيه ابلة زينب..
وبعيد عنهم..كانت في عيون ع طوبى حاقده قالت صاحبتها في نفسها وهي تشوفلها..
"ان شاء الله هادي اخر حفلة ختام تندار في هالمدرسه"
🍃وفي مدرسة تانيه..
كانت حتى هي مدايرة حفل ختام للعام الدراسي..
وبحضور اولياء امور الطلبه اللي كانت نجاة وحده منهم..
بفرح قعدت تشوف لجوري بنتها بعد سمو اسمها راكبه للمسرح وهما يعطوا فيها الشهاده كوحده من الطالبات المتفوقات..رفعت يدها وحيتها..
وجوري ردتهالها وهي دور بعيونها في غيرها لين شافتها جايه..
خالتها صابرين..فرحت فرحه كبيره وقعدت تحي فيها..
وصابرين تعبتلها في القبل..
التفتت نجاه شافت صابرين جايه وخشت في الصف اللي هي فيه وقعمزت جنبها..
صابرين؛شن جو؟
نجاة؛تمام شن جوك انتي..
صابرين؛تمام..
شويه المراة اللي جنب نجاه سألتها..
/معليشي وخيتي من فيكم ام جوري شنيبه؟
نجاة:اني امها..وهادي خالتها..
هي بإبتسامه؛فرصة سعيده..اني ام ندى صاحبة جوري ديما تقولي ياماما تعرفي ع ام جوري بش تولوا صاحبات زينا..
ابتسمت نجاة وقالت؛وخيتي سلمها ربي يحفظهالك..
؛تسلمي ويحفظلك جوري..معاك ابتسام..
نجاة؛عاشت الاسامي..اني نجاة وهادي اختي صابرين..
هي قالت:اهلا بيكم..عندك غير جوري زوز ولاد..
نجاه بإبتسامه؛ايه الكبير حمزة والصغير معاذ..
هي قالت؛ربي يحفظهم..اني عندي ندى وامير ورنيم..
نجاة؛ربي يحفظهم ويفرحك بيهم..
هي قالت؛تفرحي بصغويرتك ان شاء الله..
شويه نادوا ع اسم بنت ابتسام..
"ندى عبد الفتاح الصيد"
امها قالت بإبتسامة حماس:بنتي..
قعدوا يشوفوا للبنت وهي راكبه تستلم شهادتها..
ونجاة تشوف للبنت وهي تتفكر في اسمها وحست انه مار عليها...
شافت البنت كيف تحي في امها وامها ترد عليها وهي فرحانه بيها..
نجاة؛الله يبارك عليها ربي يحفظها..
هي بإبتسامه؛تسلمي يارب..
وجنبهم صابرين تسمع فيهم وهي تشوف للصغار وكانت حاسة بشي واجع قلبها...
🍃الأمومه اعظم نعمه كرم بيها ربي المراة..واكبر منصب..واعلى مستوى..
هالشي اللي قاعده تسعاله عواطف وتراجي ربي يكرمها وتوصل فيه قبل فوات الأوان..
بوها ادريس الصيد..سأل ع الراجل اللي يبي يخطبها وبعت من يسأل عليه من خوتها واصدقاء ليه هو وقعد يراجي في خبر..وفي نفسه متمني يكون نصيب بنته فيه وتتزوج حتى هي ويتهنى عليها زي مايتهنى على اختها...
🍃بس مش ديما يكون استقرار بناتنا وهناهم في الزواج..
في من ربي اختارلها تعيش عزبا طول عمرها لأنها هكي بس حتكون متهنيه ومستقرة..
والامثله ع ارض الواقع هلبه..
حياة اميمه الحاليه خيرلها الف مرة من حياتها مع عمر..
مستقرة ومستقله عايشه حريتها المحدده بضوابط معينه ماشيه ورا احلامها خطوة ورا خطوة تحقق فيهم..
دافنه اوجاع الخيبه اللي تعرضتلها ومافي شي شاغل بالها قد حلمها اللي تبي توصللها..
في الوقت اللي فيه صاحبتها حسناء اختصرت حياتها كلها في رضا راجل..حسين...
🍃في باحة المستشفى..
كانت تكلم فيه مكالمة هاتفيه..
حسناء:شن جو الخدمه؟
"المده الجايه بيبعتونا لسرت ومش عارف كيف بندير"
حسناء:في شنو؟
"شن في شنو في وضع العيله مانقدر نخليهم بروحهم "
حسناء؛قداش بتقعد كان مشيت؟
"تقريبا اسبوع"
حسناء:عادي تمشي امورهم في اسبوع هما كلهم ماشاء الله يسوقوا ويقدروا يعتمدوا ع ارواحهم..
"في حالات مفاجئة تصير في وقت مش مناسب وهما نساوين برواحهم"
حسناء:بنت عمك اللي قربت ولادتها عندها راجلها..
"كلامي مش عليها هي اني ندوي ع اللي عابيين عليا زي عمتي زي بنت عمي فردوس وبناتها زي طوبى هادم ماعندهم حد غيري اني"
حسناء:باهي كيف بدير توا بتعتذر عن المهمه؟
"مانقدرش لكن نفكر ندير حل قبل لنمشي"
حسناء؛راجل بنت عمك تو يتحمل مسؤوليتهم نسيبهم وزي ولدهم..
"هو هدا..هي توا ماتبي شي عندي ماندير"
حسناء؛لا سلامتك بس بعدين بنكلمك رد عليا باهي..
"كان فاضي حاضر..سلام"
وسكر عليها طول..
هي تنهدت بضيق بعدين نزلت تليفونها وقعدت تفكر...
بعدين مشت خشت للمبنى وهي مضايقه..
🍃🍃🍃🍃🍃🍃
وسط حوش كبير..
قاعد ع الزليز"البلاط"..إلا من بساط صغير خفيف مطروح عليه فراشات خفاف..
مقعمزات عليهم العمه كامله اخت محمد شنيبه ومرت خوها وببنت خوها..وحداهم سدرة المهدي وهما يهدرزوا..
والمروحه تلف عليهم..
مرت خوها كانت تقول..
/لا والله ياكامله مش هدا قصدي مانبي حد يخدمني لكن نبيهم يتلاقوا عندي من الجمعه للجمعه زي كناين الناس ويلموا رجالتهم وصغارهم حداي اني وعمهم ويونسونا..
بنتها قالت؛ماعندك ماديري بخلطتهم يام كان تلاقوا يتلاقوا ع العراك والمشاكل وما يروحوا الا وهما مرعيشنك..
كامله؛عندها حق بنتك..
بحسرة قالت؛ياعليك بخت بختي نحساب روحي جبت بنيات مع بنياتي ناضوا خودوا ولادي مني بكل..
بنتها قالت؛بخوت يما..تحكي صاحبتي ع كنتهم الجديده صغيره هي لكن دارت اللي ماداروشي سلفاتها الكبار قالت تخدم في العيله برموش عيونها ضم وتغسل وطيب وتونس في امي لين فضلتها علينا..قالت حتى من صغارنا وصغار سلفاتنا راده بالها منهم وتقري فيهم حتى القرايه..
كامله؛والله مظنها الا تبلعط عليك وينها الكنة اللي هكي توا!؟
سدرة تكلمت وقالت؛ابله طوبى هكي..
شبحولها ومرت عم بوها قالت
/مرت عمك الجالي؟
سدرة:ايه..لما تجي لحوش جدو ضم وتكنس وطيب وتغسل في الماعين ودير في كل شي..لما ماما الله يرحمها سافرت مع بابا كانت تقري فيا وترقد فيا معاها في الدار.
كامله؛لاباين عليها مراة ماشاء الله عليها تخدم من فم ساكت..
مرت خوها قالت:ايه شفتها في اكثر من مناسبه وعجبتني..
سدرة:طيبه هلبه ابلة طوبى قطوستي عمتي هي عطتهالي وعطت وحده تانيه زيها لبنت عمي..
كامله؛طاهر؟
سدرة؛ايه..اصلا هي تحب الصغار زمان عمتي نسرين ماكانتش تحب ولدها يحيى هي خلتها تحبه..
بنت عم بوها قالت..
/حي! قصدك نسرين ماكانتش تبي ولدها الاخير ؟
سدرة؛ايه وخلاته عند عمتي خديجه وعمتي خديجه عطاته لأبله طوبى ردت بالها منه وخلت عمتي نسرين تحبه..وبزعل كملت تقول..لكن خلاص معاش ولت تجينا بكل..
هما شبحولها بإستغراب..
ماعدا كامله اللي قالت؛-سديرة ماما بري جيبيلي طاسة ميه..
سدرة فهمت ان كامله توزع فيها..ناضت وهي تقول...
/حاضر..
ومشت طلعت من حداهم..
كامله:في حاجه صايره حسيتها من جية المهدي بصغاره في رمضان..
مرت خوها؛اني لاحظتها من وضع مغليه في العيد تحسيها متكدره..
كامله؛سدرة حكتلي ع عركة صارت غادي وقالت مغليه لزتهم..
شهقوا بصدمه وبنت خوها قالت..
/علاش!؟
كامله؛سدرة مش عارفه علاش لكن واضح الموضوع الكبير وليه علاقه بالجالي ومرته مش قالت توا معاش تجينا..
مرت خوها قالت؛عيلة خوك هادم سرهم غارق ياكبدي مايخلوك تعرفي عنهم كان اللي هما يبوا يطلعوه..
كامله:حتى هي مغليه الشوومه..الله يسامحك يامحمد ياوخيي ع هالوخده السودا..
🍃🍃🍃🍃🍃
الساعه 3:30بعد الظهر..
خشت عبير بسيارتها للشارع وهي تحكي مع طوبى وتقول..
عبير:تمنيت لو تكوني حاضرة..
طوبى:اعتبريني حضرت..ربي يكملك ع خير...
عبير بإبتسامه؛ آمين...تسلميلي يارب..
شبحت يمينها وقالت؛وينه التارقي زعمه
طوبى بإبتسامة استغراب؛شن بديري بيه؟!
عبير:نبي نقوله اني انخطبت بش يعرف انها مش واقفه عليه هالمتكبر..
ضحكت طوبى ضحكه خفيفه...
سرعان مااختفت لما شافت سيارة نجاة جايه من الجهة التانيه..
درست عبير قدام حوش لطفي وقالت..
/تبيني نخطم عليك غدوة؟
غيرت طوبى عيونها لعبير وقالت..
/لالا تو ترفعني وحده من البنات..صحيتي عبورة..
عبير؛سلمك بيبو..سلام قلبي..
فتحت طوبى الباب وقالت:سلام..
نزلت من السيارة وسكرت الباب وهي تشوف لسيارة نجاة..
نزل مرش باب السواق وبانت عليها وهي تشوفلها من ورا نظاراتها بإبتسامه مكر خفيفه..
وطوبى تشوفلها بكره..
ع جية سيارة حسين..شاف عبير وهي ماشيه من قدام حوش امه...
درس السيارة قدام حوش جده ونزل منها..
ومشي لطوبى..
ونجاة تبع فيه بعيونها..
حسين وين وصل في طوبى قال..
/من اللي روحت بيك هادي؟
طوبى ؛صاحبتي..
ولفت ومشت للباب بسرعه تهرب منه..
فتحاته وهو وراها قال:ماتسكريشي..
خشت وهو خش وراها وسكره..
نجاه؛ياسلام سلم..!
بعدين ضحكت بسخريه وحركت سيارتها وخشت بيها للقراج...
🍃في جنان حوش لطفي الواعر..
حسين؛لاصاحبتك لاغيرها في الجديد يروحوا بيك بنات اختك ولااختي..
طوبى بشي من الحزم؛حسين بالله معاش تدخل في اي حاجه تخصني معليشي..
حسين وهو متفاجئ:كيف!؟
طوبى وهي عاقده حواجبها:اللي سمعته ارجوك اني بالذات معاش دخلك بيا..
ومشت وخلاته وهو يتبع فيها بعيونه وهو مش فاهم شي وقال..
/خيرها هادي!؟
🍃في الوقت اللي خشت فيه نجاه لجنان حوش محمد شنيبه..
قالت لبنتها؛تعالي نخشوا نسلموا ع حنينه..
جوري:باهي..
ومشوا الزوز للحوش وخشوا...
وين قربوا للصاله سمعوا صوت التلفزيون..
خشولها..
نجاة؛كيف حالك عمتي..
فنصت فيها مغليه..
هي جتها طول باست ع راسها وقالت..
/تعالي جوري بوسي يد حناك..
جت جوري لمغليه خدت يدها وباستها..
ومغليه تفنص في نجاه..
نجاة؛اليوم كرموا جوري وعطوها شهاده...
ع خشة محمد شنيبه وين شافهم قال..
/اهلا اهلا اهلا..واخيرا ريناك هني يانجاة..
هي مشتله خدت يده وباستها بعدين قالت..
/كيف حالك عمي؟
مغليه قعدت تشوفلها بغضب..
محمد شنيبه؛تكبي ع الكعبه..حالي باهي الحمد لله..
جاته جوري مدتله شهادتها اللي طلعتها من الشنطه وهي تقول..
/شوف جدي؟
خدي الشهاده وقراها بعدين قال..
/الله يبارك الله يبارك ع بنتي..هادي تبي زرده كبيره..
وطبس باسها ع راسها..
نجاة؛طول الطريق وهي تقول نبي نوريها لجدي..
قعمز محمد وحط بنت ولده ع رجلها وقال..
/يسلمها لجدها..
نجاة:آمين...ايه حقه توا وحني مروحين شفنا طوبى مع ولد عمها..
اختفت ابتسامة محمد شنيبه..
ومغليه رفعت حاجبها وهي تشوف لنجاه..
نجاة: قصدي مروح بيها مش عارفه من وين قلت في بالي مرات تكون مريضه ولاصايرتلها حاجه مدام مروح بيها ولد عمها..
غير محمد شنيبه نظره لمغليه..
ومغليه شافتله..
نجاة:ان شاء الله مايكون فيها شي نخليكم ترتاحوا..هيا جوري ماما نزلت جوري من حجر جدها اللي قعد سارح في كلام امها..
نجاه:السلام عليكم..
وخدت بنتها ومشوا طلعوا من حداهم وع وجه نجاة ابتسامة مكر واضحه..
🍃محمد شنيبه بغضب؛الوضع هدا معاش عاجبني بكل..
مغليه تنهدت بضيق وقعدت ساكته..
وهو كمل يقول:لما يروح ولدك لازم يحزها يايردها يايطلقها..
🍃🍃🍃🍃🍃
الساعه 6:00عصرا..
في الطريق..
مشغل في سيارته اغنية"نمبر ون" ويغني معاها..
واخته جنبه زي التمثال عيونها القدام وبس...
مالك؛الفتحه هادي ولا..
وخش منها...
🍃في نفس الوقت..
قدام المطحن..
كان صاحب محمد المهدي...مؤيد مقعمز وشاد كتاب..
ومحمد واقف يبخبخ في الشارع..
مؤيد:دماغي واقف ياراجل معاش خشت فيه ولا معلومه..
محمد؛راجي شويه نكمل ونجيك..
مؤيد بإنبهار:اوبا الرانج روفر..
قام محمد عيونه وشاف السيارة قعد يتبع فيها بعيونه لين شافها درست قدام حوش سدرة...
شويه ونزلت مناسك ومعاها كياس..
وخوها راجاها لين خشت للحوش..
بعدين دار لفة بالسياره وجي بيطلع من الشارع..
شاف محمد يشبحله بإزدراء..
هو شغل اغنيه "نمبر ون" بعدين نزل مرش السيارة وفات جنب وهو يشوف القدام بتكبر...
ومحمد معاه بعيونه وهو يقول في نفسه..
"ويقولوا ظالمها!"
التفت لصاحبه وقاله..
/طفي الميه بالله عليك..
صاحبه وهو يشوف لجوه كيف تغير في لحظة قاله..
/باهي..
🍃🍃🍃🍃🍃
"حي عليك شن هدا كله اللي جايتيه!؟"
مناسك بضحكه؛مش اني خوي قالي اول مرة تمشيلها ماتخشيش عليها هكي..
مروة بضحكه:اما واحد فيهم!؟
مناسك وهي ترقص في حواجبها..
/البارد..
ضحكت مروة وقالت:تعالي معاي..
مشوا مع بعض ومناسك تقول..
/امك قاعده؟
مروة؛لالا ماشيه لصاحبتها..
وخشوا للكوجينه..
لقوا فيها صفاء دير في سينابون..
مروة؛صفاء..مناسك..
ابتسمت صفاء وقالت؛-اهلا مناسك..
مناسك؛اهلا ليك..وجتها وسلمت عليها..
مروة حطت الكياس ع الطاوله وهي تشوفلهم قالت.
/زوز بوكسات كوكيز!
مناسك:تفاجئت حتى اني تصدقي ماقتلاش يجيب كوكيز لقيته جايبه..
قعدت مروة تشوف للكوكيز وهي ساكته..
صفاء:بدسيهم في دولابك طول..
مناسك بضحكه؛حقه؟
صفاء وهي ماشيه بتفتح الثلاجه:هدا حالها مع الكوكيز لما يخش الحوش..
وفتحت الثلاجه وقعدت دور فيها..
مروة؛خلاص هيا نمشوا نبدوا قرايه معاش في وقت..
صفاء؛حي!!
شبحولها ومروة قالت: خيرك؟
صفاء:مافيش حليب محلى باش بنسقيه توا..مانحباشي ناشف هكي!..
مروة؛مفروض شفتي شن في قبل..
صفاء برجاء؛باهي بالله عليك مروشه تمشي ع السريع للسوبر ماركت تجيبي حليب محلى وتجي..
مناسك بحماس:الله! خلاص هيا مروة نمشوا ناخدوا الحليب ونروحوا خت فت..
مروة:خيرك تحمستي هكي!
مناسك؛خاطري نطلع نتمشى نتنفس شويه بالله عليك مروشه هيا..
صفاء؛هيا خودي بخاطر صاحبتك..
تأففت مروة وقالت؛باهي ماشيه نلبش عبايتي وانتي وتي الفلوس..
مشت مروة طلعت ومناسك لحقتها وهي مبتسمه بحماس..
وصفاء حدت الطاجين في الكوشه بعدين طلعت لدارها...
🍃🍃🍃🍃🍃
"شن هو عذرك قوليلي!؟ ماعندكش عذر بكل يانسرين"
نسرين بدموع الم؛واني مانبررش لروحي لفايزة اني نبي تفهمي اني ماكنتش قابله شي من اللي صار..
فايزة:وشن هي الفايده اللي درتيها هكي!؟
قعدت نسرين ساكته وهي متضايقه لأبعد حد ماعرفش ترد..
فايزة؛تعرفي يانسرين..اني تخيلت اللي درتوه لطوبر اندارلي في وحده من بناتي..تخيلت اللي درتيه في سدره اندارلي..تعرفي بعدين يانسرين لو اطلعي الروح قدامي مش حنسامحك..انتم مش عارفين شن درتوا..
انتم دمرتوا مستقبل بنيه صغيره كيف خاشة العشرين..قهرتوها في عمرها..خليتوها تعيش شي مانتمنى لعدوي يعيشه..تعرفي امس الليل كله واني نبكي عليها لما سمعت مرت عمها تقوللها بعدي عن ولدي خايفه ولدها يفوت خطيبته بسببها..
نسرين؛حسين!
فايزة بألم؛ايه حسين اللي معاش عندهم حد غيره يعتمدوا عليه..ياريتك ريتيها امس وهي دور من يرفعها لكليتها..اللي شفته في وجهها وقتها شفته في وجهي من زمان ولتوا مرات ومرات..بس الفرق بيني وبينها ان هي شافاته بكري..بكري هلبه..
نسرين نزلت عيونها وهي تبكي بصمت وألم..
فايزة بحزن؛حرام عليكم يانسرين والله حرام اللي درتوه فيها حرام..كيف كانت قبلكم وكيف ولت توا كبرتوها قبل عمرها سنين وسنين وسنين..الصدمه والقهرة يانسرين يخلوا البنادم يشيب قبل وقته وانتم شيبتوها قبل وقتها..
نسرين ببكي:والله ماكنت نبي..
فايزة؛خلاص يانسرين معاش تعاودي نفس الكلام مافيشي منه فايده..ادعي ربي يسامحك ويخليها تسامحك وترفعيش ذنبها معاك ليوم القيامه..ولو صار ماصار يانسرين حتى لو ماكنتيش معاها ردي بالك تكوني عليها..ماتقوليش ماليا بوم غدوة مانفعك حد...
ونسرين تسمع في كلامها وهي تشوفلها وقلبها مع الالم تعبا خوف كبير...
#أقاوم
#طوبى
...يتبع...
