(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الأربعين"كشف المستور2" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 ☕☕☕☕☕☕☕☕☕☕☕☕☕☕☕☕☕ طلع من داره كان ناوي يمشي يتعشى عند واحد من صحابه.. بس قبلها كان يبي يشوف أميمه ويهدرز عليها ويعرف أخبارها مع عمر.. مشي لدارها..وين قرب يوصل فيها سمع صوت وحده تحكي وهي تبكي..عرفها.. ☘غرفه ببكي:ماعرفتش كيف نرضيه ماعرفتش..صعب هلبه هلبه ياأميمه وتوا زادت عليا أخته حسيت روحي مش قادرة نتحمل..طلعت وسيبتها.. حسين من قبل مش متقبل عبد الرؤوف يابال يسمع بنت عمه اللي واخدها تشكي من العيشه معاه.. ماتحملش فيها.. ومشي طول طلع من الحوش ناوي يمشيله.. ☘في نفس الوقت.. عبد الرؤوف وصل لوطا قال بصوت عالي غاضب:نبيله.. نبيله كانت كيف مكمله صلاة سمعاته ينادي بنبرة مخيفه طلعت تجري.. نبيله بخوف:خيرك شن صاير؟ عبد الرؤوف بغضب:غرفه وين!؟ نبيله قعدت تشبحله وهي تتفكر في الحوار اللي صار بينها وبين غرفه.. ماعرفتش بشن ترد.. وهو يزيد غضبه:شن معاش تسمعي!؟ غرفه وين؟!! نبيله بضيق وندم ؛صار بيني وبينها نقاش حاد شويه وشكلها زعلت منه... هو شبح لأخته بنظرة تقدح شرار من الغضب.. بعدين مشي بسرعه اتجاه الباب.. لوح الكاترو..وفتح باب الحوش وطلع.. ومنه للباب الخارجي.. نبيله اللي قعدت داخل.. غمضت عيونها بندم وقالت:لبزتي يانبيله لبزتي.. ☘مشي عبد الرؤوف طول لحوش نسيبه.. رن الجرس..بدل المرة تنين وتلاته لكن مافتح حد.. دق الباب بقوة..ومافتح حد.. ونضال من القهوة يتفرج..وماكان في حد وقتها من عيت شنيبه موجود برا غيره.. اما ربيع فكان موجود في مكان مشروعه ومعاه مهندس ديكور بيتفاهم معاه ع شكل ديكور المطعم... وعبد الرؤوف يدق ومافي حد فتحله.. طلع حسين من حوشهم وشافه.. وهو عاقد حواجبه جبد الباب وقال:مافي حد.. شبحله عبد الرؤوف ورفع حاجبه. قدمله حسين ووصل فيه وقال:وكان دور ع بنت غرفه عندنا.. فتح عيونه ع وسعهم وقلبه ولعت فيه النار.. ضيق حسين عيونه وقال:انتم شن دايرين فيها اللي خليتوها تجينا تبكي وصايرة فيها حاله وتشكي منك ومن اختك!.. قدمله خطوة تانيه واشر عليه وهو يقول:لو كنت حاط في راسك انهم بنات بس ومافيش من وراهم خل ناخد فيها غايتي..نقولك...قعد يحرك في يد من الاسفل للأعلى حركة سريعه وهو يقول..اصحى اصحى..وافتح عيونك كويس...اللي يمس شعره من شعر بنات لطفي الواعر..نغزوه غز.. عبد الرؤوف قعد يشبحله.. ودرجة حرارة الغضب كل مالها تزيد ترتفع اكثر لين وصلت اقصى شي ليها.. وبدون أي مقدمات مد يده بيضرب حسين بقبضة يده.. حسين تلقاها بساعده وشد يد عبد الرؤوف وحطها ورا ظهره.. نضال وهو يتفرج:حي ع امها..!! حسين وهو شاد عبد الرؤوف:مانبيش الوضع يوصل لهني هما كلمتين وقلتهم ونبيهم يقعدوا في عقلك بس.. بغضب الدنيا كلها ضرب عبد الرؤوف وجه حسين من الخلف بيده التانيه.. حسين طلقه ووخر وهو حاط يده جنب عينه ويشوف لعبد الرؤوف ويقول:مازال مانبيش نتهور معاك.. وكل ماله يزيد يستفز في عبد الرؤوف.. قدمله وضربه بقبضة يده ع وجهه مرة..وخر.. وضربه التانيه وخر..وحسين لارد.. الزباين اللي فالقهوة يتفرجوا.. نضال:موضوع عائلي ياجماعه مالناش علاقه..من الاخير الزوز عسكريه مالناش فيهم.. والناس سمعت كلامه شدت مكانها.. مش زي زمان اخطر سلاح يكون متواجد عند الناس"الكميه" أو "البوخوصه" الموت بالرصاص الطايش ولى اكبر مسببات الموت في البلاد.. وزي مايقولوا..ياروح مابعدك روح.. عبد الرؤوف وقف ضرب وهو داهش:خيرك هاه..وين راحت العنترة متاع بكري..والتهديدات والاستعراض اللي درته.. مسح حسين فمه وقال ببرود وهو مضيق عيونه:يجي عمي وتتفاهم انت وياه..احسن ليا وليك.. ومازال مستمر استفزاز حسين.. جاه وشده من رقبة قميصه وهو يقول:الجو هو ماديراش معاي فاهم..ندفنك في مكانك.. ابتسم حسين ع جنب تهكما وقال:شن تراجي طلع سلاحك.. غمض عبد الرؤوف عيونه بنفاذ صبر بعدين فتحهم وجي بيضرب حسين مرة تانيه.. حسين شد يده وكأنه شاد طفل مافاتش عمره العشر سنوات.. وقلبه وجابه ع الارض.. نبيله وهي تتفرج من الروشن وبتموت من الخوف خبطت بيدها ع وجهها وقالت:مبروك!.. والناس الحاضرة كلهم انذهلوا في الحركه اللي دارها حسين اللي مقعمز ع نص ركبه وهو يشوف لعبد الرؤوف كيف طايح قاله:قتلك حلها مع عمي احسنلك... وعبد الرؤوف كان يسمع فيه وهو مقهور قهر مازيه قهر... من غير شي هو متحسس من حسين ويغير منه لأنه كان فارس احلام البنت اللي حبها.. وزاد الموقف اللي صار قدام الملأ الطين بله.. حسين:اسف..بس انت جبرتني.. ساوا قميصه ومشي بيخش للحوش بش يطلع سيارته.. فيسع ينوض عبد الرؤوف ويجيه يجبده من قفاه ويطيح فيه ضرب.. وحسين رافض يرد.. نبيله وهي تبكي:ياربي ياربي..كله مني كله مني اني.. ع طلعة ربيع من مكان المشروع هو والمهندس.. المهندس قال:ياساتر شن صاير؟ وربيع لما شافهم قال:لحظه بس.. ومشالهم طول قص الطريق...وجي لعبد الرؤوف وشده من الخلف وهو يقول:صل ع النبي ياعبروف وتعوذ من الشيطان.. وقدر يباعد عبد الرؤوف عن حسين اللي كان وجهه مليان كدمات.. ومازال يشوف لعبد الرؤوف بنفس النظرات البارده المستفزة وهو رافع حاجبه اليسار شويه.. عبد الرؤوف بغضب:تي حول قتلك حول...خل نقتله المهزوم هدا.. ابتسم تهكما.. بقوة عبد الرؤوف دف عنه ربيع وجي لحسين بيضربه وحسين رجع رد عليه بالفنون القتاليه اللي متعلمها.. وماكانش يقدر عبد الرؤوف يدير معاها شي.. مش زي الضرب العشوائي..زي الضرب اللي يتعلمه الواحد من رياضة ما.. والشارع يتفرج... وربيع يشوف فيهم وماكانش عنده جهد يخش بيناتهم.. ونبيله اللي حاطه ايديها ع وجهها وهي تبكي مش هاين عليها تشوف خوها فهالحاله.. والعركه سمعوا بيها الحياش القريبه عليهم.. واكيد بيسمعوا بيها عيت عبد المطلب الواعر.. صفيه وهي واقفه في الجنان:ياغبارتي غبارة تو بيحطه في راسه يانهاري الاسود.. وخشت تجري داخل وهي تنادي:اميمه..اميمه.. انفتحت دار اميمه وطلعت منها ووراها غرفه.. لما شافتها صفيه انصدمت وقالت:انتي هني!؟ ☘وفي الدور التاني... لحوش سدرة.. كانوا مطيره وفايزة واقفات في الروشن يتفرجوا.. مطيره:غبارة سودا غرفه راحت في القص.. فايزة بقلق:غير شن صار بيناتهم بس!؟ ☘ومن حوش شنيبه.. طلعوا محمد شنيبه ومعاه الجالي.. شافهم كيف يضاربوا...بدون تردد.. مشالهم يجري.. وين وصل فيهم قعد يخلص فيهم من بعض وهو يقول:شن جاكم انت وياه..خير اصلكم.. ودفهم عن بعض بقوة ووقف بيناتهم.. الجالي:راكم عيله ياهوو شن جاكم.. حسين:احترمت القرابه لأخر لحظه.. عبد الرؤوف:ايه هدا علاش طايح تهدد وتتوعد.. حسين :اني حذرتك بس..لكن انت متحسس.. عبد الرؤوف قدمله بيضربه شده الجالي وهو يقوله:خلاص صل ع النبي..منظرك قدام الناس ولى مش مزبوط يارؤوف.. عبد الرؤوف سمع كلام الجالي وقعد يفكر فيه.. بعدين التفت لحسين وهو شاد عبد الرؤوف:خلاص توكل ياحسين انت توا.. حسين شبح لعبد الرؤوف بنظرة حاده بعدين مشي خش للحوش.. عبد الرؤوف تفكر ان غرفه داخل غمض عيونه ورفع ايديه وقال:خلاص ياجالي.. طلقه الجالي.. هو فتح عيونه وطلع تليفونه من جيبه ومشي لحوشهم.. الجالي وهو يتبع في بعيونه قال بأسف:لاحول ولاقوة الابالله.. المشهد الاخير شافه الحاج علي الواعر كله.. اللي كان مروح من حوش واحد صاحبه وفيده شكارة خبزة الشعير.. بعد انتهت العركه.. سرع مشيته وهو يخبط بعكوزه ع الارض لين وصل في ربيع اللي جي قدامه.. علي:حول من قدامي. التفت ربيع وشافه من الرهبه قعد متجمد في مكانه.. الحاج الواعر بنفاد صبر دفه بيده وهو يقول:حول.. ومشي كمل طريقه لحوشه.. ربيع وهو مصدوم:شن جابني هني اني؟ الجالي وهو مولي للحوش سمعه شن قال ضحك نص ضحكه وحرك راسه يمين ويسار.. كمل طريقه لين وصل في بوه ونضال خوه وقعدوا يهدرزوا شويه.. بعدين نضال ولى للقهوة.. والجالي خش هو وبوه للحوش.. اما ربيع ولى للمهندس اللي كان مستمتع وهو يتفرج.. وصل فيه وقاله:سامحنا.. ضحك المهندس وقال:ع شني راك في ليبيا... ضحك ربيع ضحكه خفيفه متهكمه.. ☘☘☘☘☘ وفي حوش عبد الرؤوف.. في الجنان.. كان يمسح في انفه من الدم وهو يتصل بلطفي الواعر.. رد عليه.. "ايوه السلام عليكم" عبد الرؤوف بإنفعال:وعليكم السلام..اسمع عمي اني نقدرك ونحترمك وانت ع راسي من فوق لكن معاش تلزمني المراة اللي تطلع برا حوشها من غير ماتاخد شور راجلها مانبيهاش.. ~~~~~~~~ غرفه ببكي وصدمه:علاش ياحسين علاش! حسين بغضب:شن علاش متاعك هادي سمعتك شن قلتي ومن الاول الزواج هدا ماكنتش راضي عنه.. وهي تبكي قالت:انت علاش تتصرف من غير ماتكلمني قبل وتفهم مني..صح في بيني وبينه مشاكل بس هدا شي يخصنا..واني غلطت غلطه كبيره وطلعت من غير ماناخد اذنه.. اميمه بإستياء:خربتها ياحسين خربتها.. حسين ضحك سخريه وقال؛طبعا حسين وين بيلقاه الحظ معاكم يجي بيدير خير يلقى الشر.. صفيه بضيق:معليشي يابنتي انتي اللي خربتي ع روحك..علاش قعدتي هني مامشتيش لحوش ماليك!؟ اميمه وحسين؛ماما..يام!؟ غرفه وهي معصبه ودموعها تنزل:عندك حق هدا مش حوش ماليا. ومشت طلعت لبست في رجليها ومشت لحوشهم.. اميمه:ماما انتي احرف من ولدك.. حسين:اميمه! سكتت اميمه وهي متنرفزة.. ع خشة علي الواعر للحوش وهو ينادي:حسين..انت ياحسين.. صفيه:غبارة وخلاص..برا اطلعله بسرعه.. تنهدت حسين بملل ومشي طلع لجده.. اميمه؛غير كان سأل وفهم قبل خرب عليها مسكينه وهي مش ناقصه.. صفيه عكرشت وجهها وقالت:من الاول عارفتها مش حتعمر البنت هادي شكالها مش شكال زواج.. اميمه:امي معاش تدوي هكي بالله عليك.. صفيه:انتي اللي اسكتي من يومها ماتحبلك وجه وياما دارت فيك وتوا جايه توقفي معاها ودافعي عليها درويشه.. حركت راسها يمين ويسار وقالت :لاحول ولاقوة الا بالله.. ومشت لدارها خشتلها وسكرت ع روحها.. اما امها مشت طلعت للجد وحفيده وهي تقول:ياحليلي هيه.. ☘وغرفه في حوش بوها.. قاعده لابسه الملايه وماتبيش تحولها حابسه روحها في دارهم زمان وهي تبكي بالعبره وتقول.. "وينك ياماما وينك.." ☘☘☘☘ وبابا ياغرفه.. مروح في الطريق ومعاه سدرة وطوبى.. من الرعشه اللي حصلها ماقدرش يسوق وعطي لسدرة تسوق عنه.. وهو يخبط في رجله ويمسح عليها قال:والله عطيتها واني خايف..ماخفتش من الراجل قد ماخفت منها هي البنت هادي..مستهتره ومش قد المسؤوليه وماتتصلحش بكل تقعد طول عمرها عوجه.. سدرة؛معليشي بوي سامحني بس حني مازال مش عارفين شن صار بالزبط.. لطفي بنفاد صبر:شن تقولي انتي..الراجل يقول طالعه من غير ماتاخد شوري..الغلط راكبها بروحها من ساسها لراسها حتى لو كان الحق معاها.. سكتت سدرة مالقتش بشن ترد ع بوها.. اما طوبى فكانت مقعمزة تسمع فيهم وهي في قمة القلق.. ☘وصلوا في الشارع.. وخشوله.. شاف نضال سيارتهم وقال؛يستر الله.. نزلت طوبى فتحت باب الحوش.. وخشت سدرة بالسيارة..وطوبى سكرت الباب.. طول لطفي نزل وخش للحوش وهو ينادي.. "غرفه" هي رعشت من الخوف.. ناضت وحولت ملايتها ومشت طلعت لبوها... غرفه بصوت مبحوح من البكي؛بوي! لطفي:بوك اللي ديما محشمتيه.. بدت تبكي غرفه وماقدرتش تتكلم.. لطفي بغضب:كيف تطلعي من حوشك من غير اذن راجلك كيف!..مش متربيه انتي..اني ماعرفتش نربيك!؟ والبنات يشبحوا لغرفه بضيق.. ع خشة مطيره تجري شافتهم وقفت في مكانها.. لطفي:من يومك تصرفاتك وافعالك كلها زي خوك مختار انانيه مستهتره عديمه مسؤوليه اسلوبك مع الناس زفت..قلت تو تكبر وتتصلح...لكن ذيل الكلب حطوه في قصبايه ميه عام وطلع اعوج اعوج.. غرفه ببكي:بابا.. قاطعها وقال:تسكري فمك وتسكتي حسك مانبيش نسمعه..مهما قلتي مش حنقتنع ان العيب من الراجل مش منك لأني عرفه قعمزت معاه كليت اني وياه واني نزبط الناس نظرة نظرة..لكن اني الغالط اني..وحده زيك مش ليها الزواج اللي زيك لو يعطوهم مايديروا شي غير انهم يحشموا ماليهم ويخلوا كل من هب دب ينزل فيهم.. مطيرة؛بناتك مربيات احسن تربيه وخيي.. لطفي؛واضح هلبه..الكبيره فيهم ياما قصرت رقبتي قدام راجلها..والتانيه اللي نقولوا عليها..طالعه نصافات الليل دور بالسيارة ومش دايرة اعتبار لحد.. نزلت سدرة راسها لوطا وهي مضايقه لأبعد حد.. وهادي قدامك من زمان معروفه بعمايلها.. بعدين التفت لطوبى وشبحلها.. وهي تشبحله بقلق ودموعها ينزلوا.. هرب بعيونه عنها وشبح لمطيره وقال:شكلي اني اللي ماعرفتش اما المرحومه الله يغفرلها كانت احسن زوجه وام في الدنيا مرات لوكانت عايشه لتوا ماصارش هدا كله.. قعدت تشبح مطيره لخوها بحزن.. وغرفه تبكي.. وسدرة دمع بصمت.. اما طوبى قالت:واني شن رايك فيا بابا.. التفت وشبحلها..وكلهم قعدوا يشبحولها.. طوبى وهي ترشف:اني مانتفكرش في شكل امي وممكن لولا الصور ماكنتش عرفته..ماتت وخلتني صغيره هلبه حتى الدوة ماندويش..ربيتوني كلكم..انت وسدره وفردوس وحتى غرفه.. اللي يعلم واللي يوري..واللي يود واللي يونس لين وصلتوني لعمر العشرين سنه..والناس.. كلها تشكر وتمدح في تربيتي..ويقولوا الله يرحم من رباك.. بابا انت اب مافيش منك هلبه في الدنيا هادي..ولو طلعنا عوج وعيوبنا كبيره انت مالكش ذنب في شي انت درت اللي عليك وزياده قعدت السنين هادي كلها ع خاطرنا من غير زواج تشقى وتتعب علينا تغيب بش تخلينا مانحتاجوا شي..تشقى علينا وع فردوس وصغارها بعد غاب راجلها..ولولا اللي صار اليوم راك بروحك فرحت الاء بالسيارة ومعتز باللاب توب اللي كلي كبد امه وهو يطلب فيه..انت من احسن اب بس..لاانت احسن جد..واحسن عم..واحسن جار..واحسن من يناسبوا الناس ويتشرفوا..بالله عليك معاش تقول ع روحك هكي بالله يابابا.. سدرة وهي تسمع في كلام طوبى ربعت يدها اليسار وحطت عليها مرفق اليمين..ويدها ع فمها وهي تبكي بكتمان.. ومطيرة تشوف لطوبى ودموعها تنزل وهي متأثرة ع الآخر.. بينما غرفه مازال تبكي وكلام طوبى آلمها بقوة.. لطفي غير عيونه عن طوبى وهو حاس بشعور واجعله قلبه من داخل..بعدين شبح لغرفه وقال:الراجل قال معاش تلزمني ومعاش نبيها.. سكتت غرفه وهي تشوف لبوها بصدمه.. وهما يشبحولها بنظرات بين الصدمه والحزن.. لطفي تنهدت بحزن من قلبه وقال:استغفر الله العظيم..ماعندي مانقول اكثر ماقلت.. ومشي طلع من حداهم وهو متألم ع الآخر.. وغرفه ماتحملتش اللي سمعاته.. حست كل شي فيها هبط..داخت وكانت حطيح بس جتها سدرة وشدتها وقعدت تقول؛جيبي ريحه طوبى بسرعه.. طوبى مشت تجري للدار بخوف.. ومطيره جت لغرفه وقعدت تخبط ع وجهها وهي تقول: غرفه ياغرفه..ربي يسامحك يابنتي وخلاص.. وسدرة تشوف لأختها بألم... ☘☘☘☘☘ "منتهي الموضوع عندي خلاص معاش نبيها" نبيله:اني الغالطه ياعبد الرؤوف اني والله اني قلتلها كلام حار المسكينه ماتحملتاش.. عبد الرؤوف بغضب:ماتبرريلهاش فاهمه مانبي نسمع حد يبررلها اللي داراته..توا تركبي تلمي دبشها كله مانبي شي ليها يقعد في الحوش.. نبيله:يعني من جدك بطلقها!.. هو الكلمه كانت زي السيف اللي قسم قلبه نصين.. بعد ماسكت شويه قال:لا..بنخليها معلقه..لاطول سمي لاأرض.. نبيله:عبد الرؤوف شن تقول انت!.. هو رد يقول:اللي سمعتيه.. ولف ومشي طول بيطلع من الحوش.. نبيله بألم:شن درتي في خوك يانبيله!؟... ☘☘☘☘ وهو طلع برا.. مشي ركب سيارته وشبح لحوش لطفي الواعر.. نظرته كانت نظرة ألم ممزوجه بالغضب.. بعدين شبح القدام وشغل سيارته وتحرك طول وهو يحرق في العجل.. فات من قدام قهوة عيت شنيبه.. والمهدي وربيع شافوه.. المهدي:اكيد ع حكاية مؤيد ومعارض..زي ماقتلك عبد الرؤوف هو اللي جي هني وحقق مع حسين.. ربيع:لكن تعرف..حسين هدا طلع حكايه ياراجل..كان تشوفه كيف يضرب متعلم فنون قتال واضح.. المهدي:لاحسين شخصيته قويه وجلف وخبطة ايده نعرفها كويس..الشارع من قبل وتوا يهابوا فيه.. ربيع:حق ولى من جماعة الجيش متاع الدوله؟ هز المهدي راسه وهو ساكت.. ربيع:غريبه رغم ان كان في جماعة اللواء وهادم مستحيل يتزحزحوا عن مبداهم.. المهدي:وهو قاعد ع مبداه ومتشبث بيه بش ظروف الحياة تجبر الواحد يتنازل مرات.. ربيع رشف من القهوة وقال:مزبوط... ☘☘☘☘☘ تنازلات... التنازل...نتنازل...كلمات مش قاموس آلاء نهائي.. آلاء اللي برغم حبها لولد عمها رفضت تتنازل عن كرامتها وكرامة امها بش تحافظ عليه.. زي مارفضت تتنازل عن رد الضربه بأقوى منها... قعدوا في الحوش هي واريج يستنوا في اتصال من وحده من بنات العيله.. وجي هالاتصال.. آلاء:ايوه.. "عشرة دقايق ويوصلوا" آلاء؛Thanks... وسكرت عليها وهي تقول لأختها؛هيا.. اريج رفعت كندرتها الكعب ومشت طلعت برا الدار.. والاء وراها.. اريج:عزو هيا... فردوس من الكوجينه؛ردوا بالكم ع ارواحكم.. اريج؛ماتخافيش ماما الصاله هني خطوة.. فردوس... "في امان الله" ومشوا كلهم للمدخل.. لبسوا البنات كنادر حاطيه وخوهم سبيدروا وطلعوا الثلاثه.. ركبوا سيارة اريج.. بس معتز القدام وآلاء لتالي.. وشغلت اريج السيارة وتحركت.. ☘☘☘☘ وفي الصاله.. كانوا واصلين اهل وليد وخالاته بسوابيت البيان.. وبنت عمته فرحانه بطير.. المسكينه ماكانتش جميله ولافيها حاجه تخليها منافسه لآلاء.. غير انها بنت العيله وحتقعد قدام وجهها ديمه بش تقهرها بدون ماتحس.. هكي يبي وليد مجروح القلب والكرامه من حبيبته.. اما ثريا فكانت فرحانه اللي ناسبت حماتها راجلها فوق الريح ومن الناس الواصله..نسبه غنيمه ماتفرطش فيها ثريا لاهي ولاراجلها... شويه.. وخدوا البنت دخلوها داخل ولبسوها قفطانهم اللي كانت صاحبة تصميمه مصممه لبنانيه مشهورة.. بعد لبسوها.. خش عليها وليد بش بيطلع هو وياها.. ☘طبيعة حياة الطبقه المخمليه المنفتحه اللي مالهاش في دين ولاعادات الا من رحم ربي...☘ وليد كان مبتسم ابتسامةمجامله واضحه مش باينه فيه الفرحه.. عكس بنت عمته اللي سنونها كلهم باينات... قعدوا يدرجوا الزوز ...لعند ماوصلوا للكوشه.. وامه وام العروسه مش عارفين وين يحطوا فرحتهم.. بس هو كان مخنوق ومش طايق روحه.. لحظه غضب قرر فيها قرر وندم عليه.. ايييه..وياكثرهم اللي زي وليد!!!... فهالوقت.. وصلوا صغار مصطفى وفردوس... خشوا للصاله.. شافوا عامله سألتها اريج؛خش العريس!؟ :ايه توا هو وخطيبته.. اريج التفتت وقالت:تمام عزو بر اقعد مع الولاد.. معتز؛تم..ومشي طلع.. واريج شبحت لآلاء وقالت؛مش تهبلي وتحولي العبايه.. الاء:شن تشبحي فيا!.. اريج؛باهي هي تعالى.. ومشوا الزوز وخشوا للقاعه.. وين خشوا داخل.. وقفت الاء وهي تشوف لوليد كيف مقعمز مع خطيبته.. وركزت ع قفطان خطيبته انقهرت هلبه.. بس تمالكت نفسها.. اريج:هيا.. الاء هزت راسها ومشت معاها... قعمزوا ع وحده من الطاولات بدون مايسلموا ع حد... والاء تشوف للعرسان... كانت المصورة تاخدلهم في لقطات.. وآلاء تشوف فيهم... لين جابولهم الضيافه . خدت آلاء عصير الهافانا وقعدت تشرب.. واختها تراقب فيها.. وهو كان يصور ومش طايق روحه... مرر نظره ع الصاله.. جو عيونه ع الاء.. هي ابتسمت..وحياته بحركة اليد..كانت تبان عاديه جدا جدا.. وهو ماتوقعش وجودها نهائي..وجودها كان صفعه قويه تلقاها... وهي غيرت عيونها عنه وقعدت تشرب في العصير عادي... هو معاش تحمل حرق دم اكثر من هكي.. ناض... جاته امه تجري.. اريج؛قول من اول دقيقه.. ابتسمت الاء بنصر وهي تشرب في العصير.. شويه ومشي وليد طلع.. وهو طالع جي فايت من جنبها شبحلها بحده.. وهي تشرب في العصير وعيونها ع العروسه.. طلع من الصاله وهو محروق تماما.. اما هي حطت الطاسه..وناضت حولت عبايتها.. ووشاحها وحطتهم ع الكرسي.. شبحت لأختها وقالت؛شن رايك.. صفرت اريج وقالت؛توماهوك.. ضحكت آلاء..ومشت ركبت ع المسرح وتوجهت للعروسه. والانظار كلها توجهت ليها..واولهم مرت عمها ثريا اللي انصدمت لما شافتها... وصلت الاء في العروس وباركتلها.. والعروس تسلم عادي ماتعرف شي عن قصتهم.. بعد ماسلمت عليها صورت معاها... والحاضرات منبهرات بآلاء وكلهم يمدحوا في طلتها وجمالها.. بل في منهم تسائل كيف فرط فيها ولد عمها.. بعد ماصورت..نزلت من الكوشه.. ومشت لعمتها ومرت عمها تسلم عليهم.. الاء بإبتسامه؛مبروك عمتو وان شاء الله ربي يكمل ع خير.. :الله يبارك فيك آلو والفال ليك.. الاء؛تسلمي عمتو..شبحت لثريا وقالت..مبروك مرت عمو طالعين ع بعض هلبه العرسان.. ثريا:من عند غادي..وان شاء الله حتى انتي ربي يعطيك اللي يناسبك . الاء بإبتسامه؛تسلمي مرت عمو..ربي يكمل ع خير.. ومشت وخلتهم وهي توخر في شعرها اللي جي ع كتفها للخلف وتمشي بغرور.. عمتها قالت:خسارة كان عندي ولاد كبار والله مافوتتها.. وثريا تشبح لآلاء من فوق لتحت بنظرات كره.. وصلت آلاء في الطاوله متاع اختها وقعمزت واختها تقول:سحنتيهم سحن.. آلاء ضحكت وخدت طاسة العصير وقعدت تشرب وهي تبرد ع روحها.... ☘☘☘☘☘ الساعه11:00ليلا.. نجاة وفي غمرها ولدها وجودي وحمزة حداها:هي تصبحوا ع خير... مغليه ونسرين؛قدامك كل خير.. ومشت وهي تقول؛هيا ماما.. وتوجهت لجناحها.. ع جية نضال اللي كان يشوفلها وهي ماشيه بنظرات عدم تقبل . بعدين مشي خش للكوجينه بيشرب.. شاف خديجه تنشف فيها.. قعد يشبحلها هلبه بعدين قال:دجدج.. وقفت ع حيلها وقالت؛راك تقولي تبي تاكل اخدم ع لقمة عيشك بروحك.. نضال؛لا..نبيك في موضوع مهم.. استغربت وقالت:انت وموضوع مهم!؟..وضحكت.. نضال بجديه:ندوي جديات خديجه. خفت ضحكتها وقالت؛شن في.. هو شبح برا...بعدين سكر الباب..
#كشف_المستور #طوبى
....يتبع.... جمان فريد
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
