# طوبى "شارع القهوة"
#جمان_فريد
#الجزء_الحادي_والعشرين"غاب سندي"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
درست بسيارتها قدام العمارة وقالت..
سدرة بعد مافتحت باب السيارة؛هي انزلوا ياحلوات..
ونرلت...
فتحت الباب صفاء بنت فايزة ونزلت وراها اختها مروة..
اما تاله خدتها سدرة في حضنها وسكرت الباب..
بعدين مشت هي والبنات خشوا للعمارة...
اول ماخشوا قعدوا يسمعوا في عياط..
كان صوت عياط تعرفه سدرة بس من الخوف نكراته..
لين قالت صفاء:صوت ماما..
بلعت سدرة ريقها وهي خايفه هلبه...
واللي صار بعدين كان مفجع للغايه ليها هي والبنات..
رجاله من الجيران قايمين احمد ونازلين بيه من الدروج...
بعدت سدرة وقعدت درق في البنات وراها..
ويجوا الرجاله ناولين مم حداهم..
شافت يد من ايدين احمد سودا لعند المرفق..
ومنظر احمد منظر واحد ميت..
استاقظت لما سمعت تاله قالت"بابا"
طول حطت يدها ع عيون البنت وهي تقول:لالا مش بابا مش بابا..
وقعدت دس في البنات الصغار وراها بش مايشوفوش..
لين نزلوا الرجاله خلاص..
هي ركبت تجري والبنات وراها..
وكل ماله صوت عياط فايزة يقرب...
سدرة ودموعها بدوا ينزلوا:لاإله إلاالله..لاإله إلا الله!
وصلت في الشقة لقت بابها مفتوح..
خشت داخل بسرعه..
لقتها زحمه...
وشافت النساوين يشدوا في فايزة اللي كانت بطير بكل معنى الكلمه من النار اللي فيها...
وهي تعيط وتقول...
احمد..احمد ليش خليتني ليش..ليش!!..كيف ندير توا اني كيف نعيش ياناس قولولي...ووه عليا ووه..ووه عليا راجلي..ووه عليا بوي...ووه عليا امي..ووه عليا خوي...كيف بنعيش بعده كيف...رفعت راسها وحطت ايديها ع صدرها وهي تقول...علاش ياربي مارفعتنيش معاه علاش..علاش ياربي..عارفه هو شن عندي...كيف بنعيش بعده كيف..
وقعدت تعيط في عياط هستيري وهي تقول كيف..
والنساوين اللي يشدوا فيها ويحاولوا يصبروها قعدوا يبكوا معاها .
بناتها الصغار قعدوا يبكوا وهما يشوفوا فيها حتى من الصغيره..
سدرة كانت حاسه بقلبها يتمزق تمزيق...
شبحت لمراة جنبها وقالت:بالله عليك شديها شويه..
خدت المراة تاله وقعدت تسكت فيها..
وسدرة جت لفايزة وهي تبكي وتقول:فايزة..
فايزة لما سمعت صوتها قالت:سدرة!..انكسر ظهري ياوخيتي..انهد حيلي ياوخيتي...
سدره ضمتها وهي تبكي..
وفايزة مازال تقول:ياطيحتي القويه...غاب سندي ياسدرة..راح احمد..راح دنيتي كلها...راح.احمد...احمد راح..
ورجعت تنقز وتعيط وهي تقول..احمد...
وسدرة قعدت تحاول تهديها هي والنساوين اللي معاها .
وفايزة من النار اللي فيها كانت بتجنح بطير...
مش مستوعبه..مش قادرة تستوعب حياة ليها احمد مش موجود فيها!
ويحاولوا يهدوها ولابت تهدى...
الا لما جسمها اجهد تماما..وفقدت وعيها بين ايديهم....
☘☘☘☘☘☘☘
ضم في صاله حوشهم وهي تقول..
غرفة:سلامتهم فوضتهم هلبه..
طوبى:كلهم هكي الصغار..
غرفة:عارفتهم يافالحه..لكن والله الواحد جهده طاح وهي قريب كل يوم مخليتهم عندنا..
طوبى:الله غالب مجبوره تخدم خدمتين بش يلايموا حالهم..
غرفه تأففت وقعدت ساكته...
وطوبى ضم معاها وتشبحلها بضيق...
شويه ورن تليفون غرفه..
سيبت اللي في يدها ومشتله تجري..
خداته من فوق التليفزيون وشافت المتصل لقتها سدرة..
ردت وهي تقول:ايوه...
سمعتها تتكلم بنبرة باكيه..
"غرفه...راجل فايزة توفى"
انصدمت غرفه وهي تقول:شنو!؟
"لما يروح خبريه وخليه يجيبكم وجيبي معاك شنطه ليا فيها حوايج"
غرفه وهي مصدومه:حاضر حاضر.
سكرت سدرة..
وغرفة نزلت التليفون ومازالت في حالة صدمه..
طوبى بقلق:شن في!؟
غرفه شبحتلها وقالت؛احمد راجل فايزة توفى..
شهقت طوبى وحطت يدها ع فمها من الصدمه..
وغرفه تنهدت وقالت:لاحول ولاقوة الابالله...
~~~~~~~~~
"بالله عليك يامهدي بسرعه بالله عليك"
المهدي طلع بمفاتيح السيارة وقال:هي بري..
مشت عائشه بسرعه وبنتها في حضنها وهي تبكي..
وطلعت من الشقه..
ونزلوا هي والمهدي يجروا...
وصلوا لوطا في الجنان..
كانوا صغار يلعبوا مع صغار عمتهم..
عائشه:محمد يزن هي قدامي للسيارة...
الصغار طول سمعوا كلام امهم وطلعوا من الحوش..
هي وراهم..
ع جية مغلية تجري وهي تلف في وشاح ع راسها:بنمشي معاكم..
المهدي؛اطلعي يام..
طلعت مغليه بسرعه..
وخديجه جت وراها وهي تقول ببكي؛لاحقتكم..
المهدي ماعلقش..
طلع طول وسكر الباب..
المهدي ركب السيارة..
وتحركوا لحوش اهل عائشه..
حطت صغارها كلهم عند امها...وبعدين تحرك بيهم طول للحي اللي تسكن فيه فايزة..
وطول الطريق وعائشه تبكي..
ومغليه دموعها ينزلوا..
والمهدي كان مصدوم وقلبه موجوع ع احمد..
جيران وعشرة عمر...
☘بعد طول مسافه وصلوا قدام العمارة..
نزلوا عائشه ومغليه يجروا..
والمهدي نزل وراهم..
وخشوا للعمارة..
بعدهم طول وصلت سيارة راجل نسرين..
اللي اصر يجيبها ويكون معاها..
نزلوا من السيارة..
ونسرين تبكي بعبرتها..
وحامد وراها وعقله يفكر في هلبه حاجات...
وين جو خاشي للعمارة..
شافوا المهدي واقف مع رجاله..جيران احمد..
مشالهم حامد..ونسرين خشت داخل تجري..
ركبت الدروج...
ووصلت في شقة صاحبتها..
حولت من رجليها وخشت تجري وهي تقول؛فايزة!
لقت قدامها عائشه..
ناضتلها وحضنوا بعض وقعدوا يبكوا بالعبرة..
والحاضرات متأثرات عليه..
نسرين ببكي:فايزة وين؟!
عائشه بعدت وقالت ببكي:اغمى عليها قالوا ورفعوها للمستشفى..
نسرين بألم؛ياروحي عليك يافايزة ياروحي عليك ياصاحبتي.
☘☘☘☘☘
"قلبي تقطع تقطيع"
الفاندي وهو يطبطب ع ظهر مرته:امر الله ياقلبي امر الله..ربي يلهمها الصبر مسكينه...
سدرة وهي تبكي:يارب يارب..اني توا نفكر كيف بيصير فيها..
اهل احمد الله يرحمها لايحبوها ولايحبوا بناتهم..خوتها خوت العازة والقهره..خايفه عليها هي وبناتها هلبه..
الفاندي؛مرات توا يتغير الحال ماتندريش..مالي احمد مااعتقدش يخلوا بنات ولدهم مهما كان بينهم مشاكل...
وحتى خوتها مايرضوش لأختهم البهدله..
ابتسمت سدرة تهكما وقالت؛تحساب الناس كلها زيك ياإيهاب .
الفاندي؛مهما كان هادم ماليهم مستحيل يهونوا عليهم..
رشفت سدرة وقعدت ساكته.
هو حط يده ع راسها وقال:ماشي نجيبلك ميه وجاي..
هي هزت راسها وقعدت ساكته..
وهو ناض ومشي من حداها وعقله عندها...
وسدرة تشوف للغرفه اللي قاعده في صاحبتها والدكتورة والممرضات عندها داخل...
شويه وجاها الفاندي وعنده شيشتين ميه..
جاها قعمز جنبها فتح شيشه ومدلها وقال؛اشربي..
هي خدتها وبدت تشرب..
بعدين نزلتها ومدتهالها..
هو خداها وسكرها وحطهم جنبه..
وشد يد سدرة ...
وسدرة حست بشي من الراحه تسلسل لنفسها..
تلقائيا..حطت راسها ع كتفه..
وهو قعد يمسح ع يدها...
ع جية المهدي ووراه عائشة ونسرين..
جت عيونهم عليهم..
حس وكأنه موس خش لقلبه ..
وقف في مكانه بعدين لف ومشي..
عائشه انتبهت للموقف بس ماكانش عندها بال توقف عنده بالها كله مع صاحبتها..
نسرين؛سدرة..
بعدت سدرة عن الفاندي وهما الزوز ناضوا..
الفاندي مشي من حداهم..
وهي جوها صاحباتها حضنوها الزوز مع بعض وقعدوا يبكوا...
سدرة ببكي؛كيف خليتوا البنات..
تباعدوا عنها ونسرين قالت؛مع امي مدخلتهم لدارهم ومسكرة عليهم..شن حالها فايزة؟
سدرة؛من بكري الدكتورة معاها داخل ماطلعتش..
عائشه:شن صار بالزبط؟
سدرة تنهدت بألم وقالت؛هي كانت مخليه البنات عندنا ع خار الخدمه وزي ماتعرفوا اني نروحلها بيهم..
وبكري وين روحت بيهم خشيت العمارة سمعت صوت عياطها..كذبت وذاني..لين..غمضت عيونها بشدة بعدين فتحتهم وقالت..لين جو رجاله منزلين احمد من فوق وهو ميت..شفت ايديه لقيتهم سود زي الفحم لعندي مرافقه..
ونسرين وعائشه يسمعوا وهما متوجعات ودموعهم تنزل..
سدرة؛بعد نزلوا بيه ركبت نجري وخشت الشقه لقيتها بطير بتهبل..خنقتها العبرة وكملت تقول...قلبي تفتفت عليها..
ونسرين وعائشه قعدوا يبكوا..
سدرة:لين طاحت مغمى عليها بين ايديا...لبسناها اني والنساوين..وانجبر واحد من جيرانهم يرفعها وينزلها لسيارتي..
وجبتها هني...
نسرين بألم:ياروحي..
عائشه ببكي؛باهي هو كيف مات!؟
سدرة:ضاربه الضي هدا اللي فهمته من الجيران..
نسرين ببكي:ياناري عليها ياناري مات قدامها واضح..
عائشه حطت يدها ع راسها وهي تقول:لاإله إلا الله..لاإله إلاالله..
ع طلعة الدكتورة..
جت لسدرة وهي تقول:كان الله في عونها..
سدرة؛خيرها دكتورة..
الدكتورة:انهيار عصبي..
التلاته انفجعوا عليها..
الدكتورة؛درنا معاها اللازم..وطبعا لازم تقعد في المستشفى..
سدرة وهي تبكي هزت راسها بإيجاب..
الدكتورة تنهدت وقالت:ربي يصبرها..
ومشت...
وخلت البنات يبكوا ع حال صاحبتهم...
☘☘☘☘☘☘☘
واهل احمد وين وصلهم خبر ولدهم..
امه وخواته قلبوا الدنيا عياطات وبكي....
يعني شي غريب...
وهو حي كانوا مكرهينه في حياته...كارهين ضنوته ويعاملوا فيهم اسوأ معامله..
هاين عليهم زعله..ولاداروله قدر ولاقيمه...
ولما سمعوا بيه مات قعدوا يعيطوا ويندبوا!
هلبه ناس هكي....
وبكاهم وعياطهم ع ولدهم مايكونش ندم ولاحسرة...
اكيد بيوجعهم وبيحزنوا لكن غير هكي...
فتحيه وهي تعيط؛الله لايربحها كله منها...فرقت بينا وبينه الله لايربحها..
اخته:ياريتها جت فيها هاللفعة شيطانة الرجيم اللي فرقت بينا وبينه..
اخته التانيه:خونا الحنين الغالي من بعد خداته غيراته علينا قلباته ع امه وخواته خلاته يموت وهو مقاطعنا..جعنها تلقاه هالشيطانه...
☘وطبعا الناس بتصدق..
اكيد..ماهو الصورة المرسومه ع الكنه في مجتماعتنا ان الكنه هي السوسه..والساحرة..والشيطان الرجيم...واهل الزوج هم المساكين المغلوبين ع امرهم...!
....ومن جهة تانيه....
لما سمعوا اهلها الخبر..
انصدمت امها صدمة عمرها..رعشت وانفجعت ع بنتها..
خافت هلبه ع مصيرها خافت هلبه هلبه..
ووجعها أحمد اللي كان يعامله زي امه واحسن..
اما خوتها ونساوين فحتى هما انفجعوا..
لكن لسبب واحد..ان فايزة توا بعد ترملت من بيها!؟
من بيتحمل مسؤوليتها هي وبناتها..!!
وخوها الكبير فكر في نصيبها في الورث اللي قعد عنده وفايزة ماطالبتش بيه قبل لأن امها كانت تمنع فيها..
وتقول..خليه مدسوس لوقت العازة..واهو جي وقت العازة..
وواضح ان فايزة عاجلا او آجلا حطالب بيه...
وين مشوا للشقه...عرفوا انها في راقده في مصحه...
خوتها اللي هدا وخر..خافوا من دفع تكاليف قعادها غادي..
وامها قعدت تبكي بقهر ع حال بنتها وخلاص..
☘☘☘☘☘
"تو ندفع اني"
سدرة:لا نسرين الفاندي دفع....
نسرين:مش معرف لامتى بتقعد ع قداش ليله دفع..
سدرة؛ع تلاته ليالي..
عائشه:مبلغ كبير..
سدرة؛سحيقة الفلوس ع خاطر بيقعدوا هما ولابنرفعوهم معانا..وين تجي الموت في لحظه نمشوا ونخلوا كل شي..
وعائشه سرحوا في كلامها وهما يسمعوا فيه...
☘☘☘☘☘
فهالوقت..
درس لطفي سيارته قدام العمارة..
ووراه سيارة يوسف ولد خوه..
نزلوا غرفه وطوبى...
ومن سيارة يوسف نزلوا صفيه واميمه..
واميمه وطوبى كانوا يبكوا بالعبرة..
وصفية تبكي بصمت..
اما غرفه فكان باين ع وجهها ملامح التأثر..
مشوا بسرعه وخشوا للعمارة..
ولطفي ويوسف مشوا للرجاله اللي واقفين ع الشباب اللي ينصبوا في خيمة عزي..احمد....
☘واهله في شارع القهوة..
نصبوا خيمتهم وبيديروا عزاهم بروحهم...
وهادي ماكانتش علامة خير ابدا وتنبأ بالقادم اللي مايبشرش بالخير...
☘☘☘☘☘
ركبوا السيارة وهو مرر نظره عليهم وقال...
المهدي؛شن حالها؟
نسرين ودموعها في عيونها؛مسكينه جاها انهيار عصبي عاطينها منوم راقده ماتندري على حاجه..
المهدي بأسف:لاحول ولاقوة الابالله...
رشفت عائشه وقالت؛ارفعنا للشقه..
المهدي؛مافي بيقعد معاها!؟
نسرين؛لاسدرة بتبات عندها..
عائشه كانت متجاهله اللي تسمع فيه تفكيرها كله في فايزة بس..
والمهدي بعد سمع جواب اخته تحرك بالسيارة من سكات...
☘☘☘☘☘☘
وتعدي هالليله ع فايزة وهي راقده وخلاص وكأنها تبي تهرب بالنوم..
وسدرة حداها ماغمضتلها عين تشبحلها ودموعها زي السيل .
وحامله همها هي وبناتها هلبه...
سدرة بصوت مخنوق:شن مازال بتشوفي ياشرادة بس!..
ربي يكون معاك...
☘☘☘☘
ويجي اليوم اللي بعده...
يوم جنازة احمد...
اللي كانت كبيرة ومزدحمه..
احمد طيب القلب والخلق..كان محبوب من الناس لهذا كان شهود جنازته كثير...
وكلهم يحكوا عنه بالخير ويدعوله..
بس المهدي ولطفي لاحظوا ان خوت احمد كانوا مش طايقين خوت فايزة..وخوت فايزة كانوا يتوددولهم ولما حسوا منهم عدم القبول تباعدوا عنهم...
وشبه الصورة بدت تتوضح للي حيصير لفايزة عند لطفي والمهدي...
☘وفي وقت الجنازة كانت فايزة فايقه في المستشفى..
وجايتها نوبه عياط وبكي..واضطروا يعطوها مهدئ...
وقعدت بعده زي الجثه الهامده..
عيونها مفتوحه..ينسكبوا منها الدموع وهي تشبح في الفراغ..
وصاحباتها حداها...
هني عائشه كانت تبي تقوي صاحبتها...
قربت ليها بالكرسي..خدت يدها وشدتها وهي تقول..
عائشه ودموعها ينزلوا: إنا لله وإنا اليه راجعون..مافي حد قاعد في الدنيا هادي كلنا اخرتنا للموت يافايزة...كلنا لربي واخرتنا حنرجعوله سوا توا ولابعدين...اعمارنا قصيرة مهما طالت وهالدنيا كلها الحياة فيها لحظه..هدا علاش مفروض تهون علينا..ونفكروا في الحياة الصح..الحياة اللي تبدا بعد الموت يافايزة..هديكا هي الحياة..اللي احمد توا محتاج فيها الدعاء بش يونسه..الصدقه الجاريه بش تقعد تنكتبله الحسنات..انك تربي بناتك احسن تربيه ويطلعوا صالحات وفي كل يدعوا لبوهم ودعواتهم توصله وتونسه...
غيرت فايزة عيونها لعائشه والدموع تنهمر منهم...
عائشه ابتسمت من وسط دموعها وقالت؛ربي مايخلي حد..وين يغيب عنك السند فالدنيا ربك يسندك بقوته..ويكون معاك بش تكملي حياتك..كلنا مالينا الا ربي سوا عندنا من ساندنا ولالا....هذا علاش ماتفكريش هلبه في اللي حيصير القدام..توكلي ع الله وقولي..
وافوض أمري إلى الله إن الله بصير بالعباد..
قالتها عائشه بنبرة استغاثه مؤثرة..
خلت صاحباتها يتأثروا..
وفايزة غمضت عيونها وقعدت تبكي..
عائشه وهي تمسح في دموعها:تعرفي ويقال في الاثر وان شاء الله يطلع صح..وحاسه ان صح...ان الرسول وهو ماشي للجنه بش يفتح بابها في يوم القيامه..
يلقى مراة تحاول تسبقه...سألها انتي مني؟...قالتله اني ارمله عندي صغار صبرت عليهم لين ربتهم وكبرتهم وطلعتهم احسن ناس...
شدت فايزة ع يد عائشه بقوة وهي تبكي..
عائشه:ربي مايخلي حد..مايخلي حد...
☘وفهالوقت...
كانوا بناتها مع اميمه وطوبى رداين بالهم منهم..
وشن مايبوا يديرولهم..ويحاولوا ع قد مايقدروا يلهوهم...
المشكله ان صفاء كبيرة وتفهم وبدت تعرف ان بوها مات خلاص..
☘بعد المغرب..
كانت طوبى دور عليها في الشقه مالقتهاش خافت عليها هلبه...
لين عترت عليها مقعمزة في البالكونه مقعمزة بروحها تبكي..
وجعها قلبها عليها ومشت قعمزت مقابلتها وقالت..
طوبى:صفو..
صفاء ببكي؛خلاص بابا معاش نشوفوه مرة تانيه لأنه مات..
طوبى ودموعها عبوا عيونها:حتى اني ماما ماتت واني صغيرة زي تاله او اصغر..
قعدت صفاء تسمعله ودموعها تنزل..
طوبى:ماعرفتش الا لما كبرت شويه وبديت نفهم..
بكيت هلبه هلبه لان البنات كلهم عندهم ام الا اني..بس في مرة ابله قالتلي تو تشوفي امك مرة تانيه وتعيشي معاها في الجنه..وانتم تو تشوفوا بوكم مرة تانيه في الجنه وتعيشوا معاه..
صفاء:امتى...
ابتسمت طوبى وقالت؛لما يجي الوقت المناسب .
البنت مافهمتش هلبه كلام طوبى لذلك سألتها سؤال بعيد عن هالموضوع:امتى ماما بتجي؟
طوبى:قريب حبيبتي..
صفاء:امتى باهي؟
طوبى:لما تصح حبيبتي ماطولش تو تروح..
صفاء سكتت والحزن بادي ع وجهها..
وطوبى تشبحلها بحزن..
داخل الشقه..
كانت اميمه تفرق ع ناس جايه تعزي في القهوة..ولت للكوجينه بش تاخد سفرة تانيه..
وين جت خاشه سمعت نساوين خوت فايزة يقولوا..
:حني يللا نصرفوا ع ارواحنا بنحصلوا فيها وبناتها!
:لاحبيبتي عندها خدمه ومرتب تصرف عليهم هيا..وماتنسيش السوبر ماركت اللي خلاه راجلها..
:ضحكي حتى انتي..ماتعرفيش اللي صاير بينها وبين متاعينها..كان مانقزوش عليه دوقهالي وشمه هني..
واشرت ع ذقنها..
:حي!! على هكي حتى الشقه مش حتسلم..غبارة وخلاص..
اميمه وخرت عن الباب بعد سمعت كلامهم وقعدت تمشي وهي تفكر فيه..
بانو عليها بنات فايزة مروة وتاله وهما مع يلعبوا مع بنت نسرين..
وجعوها هلبه...
تفكرت طفولتها اللي كانت برغم وجود بوها تعاني من الحرمان في كل شي...
لكنها شافت حالها اهون من حالهم...وحست انهم حيتبهدلوا اكثر منها بهلبه...
نزلوا دموعها وحطت يدها ع فمها وقعد تشد بكاها ع قد ماتقدر..
بعدين هدت روحها ومسحت دموعها..
ولفت ومشت للكوجينه..
خشت وهي تشوف لنساوين خوت فايزة بحده..
حط السفرة بقوة ع الرخامه وخدت غيرها...
ومشت طلعت...
هما الزوز قالوا بتعجب:خيرها هادي!!
☘☘☘☘☘
"جنازة كبيرة احبابه هلبه"
الجالي بأسف:والله غير انشغلت هلبه كان هدا مافاتتني قداش كان يعز عليا احمد...
نضال:لكن سبحان الله احمد يبان عادي مش عارف كيف..الناس اللي شفتهم في الجنازة تقول أمة..وياراجل اغلبهم مش اقاربه..وكلهم يحكوا عليه في كلام يخليك تتحشم من روحك
الجالي:كيف يعني!؟
نضال:تي ياراجل مداير خير هلبه وواقف مع هلبه ناس ويساعد في هلبه ناس..مش باين عليه بكل
طاهر:بالعكس احمد طيب باين في وجهه..
نضال:لا مافهمتنيش انت..اني نقصد ان عمره ماشفناه ولاسمعنا عليه انه يدير في الحاجات هادي..
طاهر ابتسم وقال:فهمتك..النوعيه هادي تعرف كيف تخدم لربي ومش همها الناس بكل..وشكله احمد كان يبي ربي بس يعرف الخير اللي يدير فيه..
الجالي:واهو الناس كلها عرفت توا..
طاهر:بعد مامات...وهدا مكافئة من ربي ليه..وين الناس تحكي عليه بالخير بعد موته وتشهدله بيه..توجب له الجنه بإذن الله..زي ماقال الرسول انتم شهود الله في ارضه..
الجالي قعد ساكت وهو يفكر في كلام نضال اكثر من كلام طاهر...وكان حاس بشعور تحرك داخله..
اقبح شعور يحسه أي مخلوق خلقه الله سبحانه وتعالى..
شعور اول من حس بيه....إبليس...
ع خشة عمر للصاله..
شافهم مقعمزين قال:السلام عليكم...
ومشي قعمز..
ردوا عليه:وعليكم السلام..
الجالي:مشيت لجنازة احمد..
طاهر:مشينا مع بعض..
شبحله عمر وابتسم ع جنب..
رفع الجالي حواجبه وهو يشوف لعمر..
بمعنى.."تطورات"
عمر تجاهل نظرة الجالي وجاوبه ع سؤاله:عمري ماحضرت جنازة زي هالجنازة..نحس فيها ليبيا كلها جت تعزي..
الجالى هز راسه وقال:ايه قالولي...
☘☘☘☘☘☘
فتحت وحده من جارات فايزة باب الشقه بعد ماسمعت الجرس..
خشوا نسرين وسدرة وهما يقولوا:السلام عليكم..
الجارة:شن حالها فايزة..
سدرة:اهو اليوم احسن شويه..
وين خشوا لداخل الحوش لقوه معبي..
سلموا ع النساوين..
بعدين خشوا داخل..
لقوا في دار المعيشه نساوين حتى هي..
منهم مشتدة ام فايزة..
وعتيقه ام عائشه..ومغليه وصفيه ونجمه وبناتها وخديجه..
خشوا الزوز سلموا...
وين وصلت سدرة في مشتده شدتها وهي تقول:شن حالها؟
سدرة:باهي باهي خير من امس..
امها سكتت وملامح الألم والحزن مسيطرات ع وجهها..
طلقتها سدرة ومشت سلمت ع باقي..
وين وصلت في عتيقه سمعت نسرين تقوللها..
نسرين:بتبات معاها اليوم.
عتيقه:وعلاش تبات معاها ماعندهاش عيل تبي معانا..ولاتحسابني مازال نقدر نعاني اني..
سدرة عصبت ومشت طول طلعت من الدار من غير ماتسلم عليها..
نسرين:خليها عندي الليله..
عتيقه:سامحيني يابنتي بس والله مانقدر هلبه عليا هي وخوتها.
ابتسمت نسرين بضيق وخدت سدرة ومشت طلعت من الدار..
وعيون مغليه وخديجه معاهم...
اما مشتده فكانت تسمع لنجمه اللي تهدرز عليها وهي تقول:كله قطاف فارغ..حني عارفين رباية فايزة وعارفين طباع فتحيه وبناتها..
عواطف:لكن والله كلامهم ماينسكت عنه..داروها لفعه وفتانه وكلام تاني مانقدرش نعاوده والناس عاد تسمع وتصدق..
نجاح:ع العموم مش ناويين ع خير ياخالتي مشتده..
وامهم تفنص فيهم تبيهم يسكتوا وهما ولامعبرينها..
وخلوا مشتده تزيد تخمم في بنتها وتخاف عليها هي وبناويتها...
☘اللي خشت عليهم سدرة لقتهم حدا طوبى وبنات فردوس..
وين شافوا سدرة جوها طول ضمتهم في حضنها..
سدرة:ان شاء الله يومين تانيات وتروح صفو..
نسرين:ماتخافوش عليها كويسه ماما..
قعدوا يشبحولها البنات وهما ساكتات..
سدرة تنهدت وشبحت لأريج وقالت:وينها امك..
اريج؛في الكوجينه ماشفتيهاش. سدرة:لاماخشيناش للكوجينه..
اميمه:عائشه قعدت مع فايزة؟
سدرة هزت راسها وهي ساكته..
نسرين؛خالتي عتيقه مش طايب عليها قالت مفروض ماتباتش وعندها عيل تبي معاناة..
سدرة وهي معصبه:ع خاطر فايزة ماسيبتش صغار وباتت ليلتين مع عيشه وين كانت راقده في المستشفى!! خليني ساكته مانبيش نقول كلام اخي توا..
نسرين:ربي يهدي....
ع خشة فردوس وهي تقول؛سدرة..
ومشت لأختها سلمت عليها بعدين قعمزت حداها وقعدت تسأل فيها عن حال فايزة...
🍀وتعدي الساعات..
ويجي وقت النوم...
والكل في فراشاتهم..بس مش الكل راقد..
زي سدرة اللي كانت تسمع في بكي سميتها وعمتها حداها راقدة في سابع حلمه ماتندري عليها..
ناضت من مكانها ومشتلها..وخدتها ورفعتها من جنب نسرين وقعدت دور بيها وتحاول تسكتها..
"شكلها تبي رضاعه"
شبحت سدرة لطوبى وقالت؛قاعدة تفنصي..
طوبى بإبتسامه:تبي رضاعه..
سدرة:باهي وينها..
طوبى ناضت من مكانها وقالت:نسرين حاطتها حداها هي والحليب والميه بش كان ناضت ماتقعدش ماشيه جايه..
سدرة تهكما:ايوااه!
ضحكت طوبى وقعمزت حدا نسرين وبدت دير المرضعه لسدرة المهدي..
بعد ماكملت خضتها كويس..وناضت لأختها وعطتهالها..
خدتها سدرة وولت لمكانها وقعمزت وقعدت ترضع فيها..
وطوبى ولت رقدت في فراشها وقعدت تتفرج ع سدرة وهي مبتسمه لين خداها النوم ورقدت..
☘فهالوقت..
كان المهدي متكي في سيارته قدام العياده ومشغل قرآن..
يسمع وهو مغمض عيونه والنوم بدي يداعب فيهم..
وعند مرته وصاحبتها..
كانت عائشه مقعمزة تقرا في قرآن جنب فايزة..
وفايزة مغمضه عيونها وتسمع فيها بهدوء..
☘الهدوء اللي حل ع شقتها اول مارقدت سدرة في حضن سدرة..
وقعدت تتأمل في وجهها البريء وهي راقده..
سدرة بإبتسامه قالت همسا:ربي يحفظك..
بعدين حطتها جنبها ورقدت حداها وهي مازال تتأمل في وجهها لين خداها النوم ورقدت...
🍀🍀🍀🍀
ويمروا ثلاته ايام تانيه...
واندار يوم فرق السو..
ومن هداكا اليوم معاش باتوا نساوين خوت فايزة..قعدوا يجوا من العشيه للعشيه ويروحوا..
واللي يعول وقايم الدنيا الصحاب والجيران...
بعد ماعدوا هالتلاته ايام..
جي يوم طلوع فايزة من المصحه..
كانت عايشه تلبس فيها في لبس الحداد..
وتسمع فيها تبكي وتقول..
فايزة ببكي؛اااه يادنيا ااه لبست رباط عليك يااحمد..نربط عليك ياأحمد ااه يارب كابوس يارب كابوس.
عائشه وهي تلبس فيها في شاربه كبيره:قولي لاإله إلا الله...لاإله الا الله..
فايزة وهي تبكي قعدت تقول:لاإله الاالله..
ساوتلها عائشه الشاربه كويس..
بعدين مشت خدت القفازات ومدتهملها..
خدتها وهي تبكي وقعدت تلبس فيهم وقلبها يتقطع تقطيع..
بعد كملت..
خدت عائشه الخمار ولبستهولها..
وين جو طالعين..
عائشه:هي نزليه..
نزلاته فايزة ع وجهها وهي تبكي..
ومشوا هما الزوز بيطلعوا من المصحه..
وفايزة تبكي..وعائشه تقوللها..
قولي لاإله الا الله...
ركبوا الاصنصير ونزلهم لوطا..
ومشوا طلعوا الزوز من المصحه..
كانت سدرة برا تراجي فيهم ومعاها نسرين..
وصلوها للسياره..
ركبت من الخلف وعائشه معاها..
ونسرين مع سدرة من القدام..
وتوجهت بيها للعمارة..
طول الطريق وفايزة متكيه براسها ع الروشن ومن ورا الخمار تشبح في الفراغ وهي تبكي بصمت..
وصلت سدرة للعمارة..
ودرست..
ونزلت هي ونسرين وعائشه قبل.
بعدين نزلوا فايزة..
قعدوا محاوطاتها ويمشوا فيها بإتجاه مدخل العمارة..
المهدي كان واقف قدام الخيمه ومعاه يوسف والجالي..
شبحوها وكلهم وجعهم الموقف...
ع طلعة راجل نسرين من الخيمه ناوي يروح..
وين شافهم خاشين بيها..
برغم انها مغطيه كلها مع بعضها..بس عيونه قعدوا يتبعوا فيها لين درقت من قدامهم...
ركبت مع صاحباتها الدروج وبدت فايزة تبكي بالعبرة...
سدرة بحزن؛فايزة..
فايزة ببكي:مش قادرة..
عائشه:بناتك يراجو في الساعه بالدقيقه يافايزة.
نسرين؛ايه ياناري قلنالهم امكم بتروح اليوم ردت فيهم الروح..
سكتت..وتنهدت من وسط قلبها تنهيده هم تقطع القلب..
بعدين قعدت تركب وصاحباتها معاها..
لين وصلت لباب الشقه..
قدمت سدرة فتحت الباب..
وفايزة حست بقلبها ينعصر عصر...
دخلوها للشقه...
قامت عنها عائشه الخمار..
ونسرين سكرت الباب...
عائشه؛خشي هيا..
خدت نفس..بعدين مشت خشت داخل..
كانت الشقه زحمه لأنهم سمعوا بيها مروحه..
عيونهم كلهم عليها وين خشت.
وهي عيونها دور في المكان وتتفكر فيوم الحادثه...
اكثر شي وين تتفكره تنقهر..
هو اللحظه اللي نزلت فيهم كل مفاتيح التاكو بإيديها الزوز..
وبعدها سمعة طيحة احمد ع الأرض..
تقول لنفسها لو من البدايه درت هكي ماكانش راح من بين ايديا...
حست انها مذنبه..حست ان هي قتلاته..
حطت يدها ع فمها وانهارت بالبكي..
جتها امها وهي تقول:بنيتي..
وصلت فيها وضمتها وقعدت تبكي معاها بقهر..
وفايزة تبكي بعبرتها...
وكل الموجودات تأثروا وقعدوا يبكوا معاهم..
الا نساوين خوتها اللي كانوا تقول مقعمزات ع شوك..كان يلقوا يروحوا...
مطيرة وهي تبكي:خلاص وحدوا ربي ماتعذبوش في قبره ادعوله بالرحمه توا بس..
شويه وتباعدت مشتده عن بنتها وهي تمسح في دموعها وتقول:الله يرحمه كان اعز من ولدي..
وفايزة تبكي مش قادرة تسكت..
ناضولها الموجودات وقعدوا يسلموا عليها ويعزوا فيها..
ونساوين خوتها كانت تعزيتهم باردة..
لاحظوهم سدرة وعائشه ونسرين...
بعد ماعزوها النساوين اللي في الصاله..
فايزة وهي ترشف وبصوت باكي:بناتي وين؟
سدرة؛مع البنات داخل..تعالي..
مشت ومعاها صاحباتها..
خشوا للدار متاع المعيشه..
شافوها اميمه وغرفه وطوبى...
اما بناتها كانوا منشغلات باللعب مع اريج والاء..
ناضولها اميمه وغرفه وعزوها..
بناتها استاقظوا شبحولها..
وصفاء قالت؛ماما!
فايزة بنبرة باكيه:ياعيوني..
ناضولها يجروا.
وهي قعمزت ع ركابها وفتحت ايديها خشوا التلاته لحضنها.
وضمتهم وهي تبكي بالعبره..
والكل يشوف للموقف بتأثر بالذات طوبى..
قعدت تبكي بعبرتها لين سدرة جتها حضنتها وقعدت تهدي فيها..
حستها خطرت عليها أمها لأن فترة العزي كلها وهي تنشد فيها عنها..
شويه..
ودخلوا فايزة دار النوم مع بناتها...
رمت لبس الحداد..
ومشت للسرير هي وبناتها ورقدوا معاها وهما في حضنها..
بس هي قعدت معلقه عيونها في السقف وتفكر..
شن بيصير فيها القدام شن مازال مدرقلها فهالدنيا...!؟
☘في الصاله..
مرت خو فايزة؛سمعت ان الارمله لازم تكمل عدتها في حوشها ماتطلعش منه...
سلفتها؛ع خاطر مسكينه عندها وين بتمشي هيا هدا حوشها..
مغليه:ومن قاللكم بتطلع من حوشها؟
:ماقاللنا حد شي خالتي مغليه حني نهدرزوا وخلاص..
خديجه؛عليك هدرزة!
شبحولها وهما متعجبات..
وخديجه قلبت عيونها وغيرتهم عنهم..
ومشتده ساكته وهي تشبح في الفراغ..
:بالله ياوخيتي كلمي راجلك قولليله هيا واضح مش مرغوب فينا..
مافي حد رد عليهم ولاعبرهم..
وبعد اتصلت وحده فيهم براجلها طول طلعوا الزوز طيران..
مطيرة وهي واقفه فم الكوجينه:مشية الحصان لفزان..
صفيه بإزدراء؛مش كويسات بكل كان قعدت عندهم فايزة بتتعب معاهم..
مطيره؛وين ياماما تقعد عندهم تي هما من توا يعطوا في العلم مايبوهاش..
صفيه تنهدت بضيق وقالت:لاحول ولاقوة الا بالله العلي العظيم...
☘☘☘☘☘
وعدا باقي هاليوم..
وفايزة ماطلعتش من دار النوم بكل وبناتها مايتحركوش من حداها الا للحمام..
وصاحباتها يخشوا عليها ويطلعوا بالماكله والشراب..
هي كانت مش قادرة تقبل شي كان الميه..
اما بناتها فكانت توكل فيهم وتخلي فيهم يكملوا في الماكله...
وعدت ليلة هدا اليوم..
اللي كانوا بايتين معاها في الشقه جنب امها..
صاحباتها..ومغليه وصفيه وغرفه واميمه وطوبى...
واليوم اللي بعده العشيه..
كلهم روحوا ماعدا سدرة..
اللي كانت تسقد في طوبى وهي توصي فيها:شدي في قرايتك كويس امتحانات نهائيه هادم مش لعبه..
طوبى:حاضر..
سدرة؛هديكا نزلت تجري بس مانكلمهاش ع القرايه ولا!؟
يدوب ضحكت طوبى..
سدرة؛نصبروا لين تطلع نتيجتها..
طوبى لبست الشنطه ع كتافها وقالت؛بالسلامه..
سدرة؛في امان الله..
مشت طوبى نزلت من الدروج..
وسدرة خشت وسكرت الباب...
☘وصلت طوبى لوطا...
وهي طالعه من العمارة...
جت عينها في عين حسين اللي شبحلها حتى هو صدفه...
طوبى من داخلها سامحاته ع اللي داره..
بس حست روحها مش قادره تتقبله زي زمان..
غيرت عيونه عنه وكملت طريقها...
وهو بعيونه يلحق فيها ونظرات الحزن معبيتهم..
وغرفه وهي في السيارة كانت تشوفله كيف يشبح في اختها وبدت تسحن..
وصلت طوبى في السيارة ركبت من الخلف...
لطفي؛نمشوا..
طوبى:امشي بابا..
وتحرك لطفي طول...
#غاب_سندي
#طوبى
.....يتبع.....
