#طوبى "جنة طوبى"
#جمان_فريد
#الجزء_الثامن_والستين"رقعة شطرنج 1"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن أنس بن مالك رضي الله عنه قال: قال رسول الله ﷺ: قَالَ اللهُ تَعَالَى: {يَا ابْنَ آَدَمَ إِنَّكَ مَا دَعَوتَنِيْ وَرَجَوتَنِيْ غَفَرْتُ لَكَ عَلَى مَا كَانَ مِنْكَ وَلا أُبَالِيْ، يَا ابْنَ آَدَمَ لَو بَلَغَتْ ذُنُوبُكَ عَنَانَ السَّمَاءِ ثُمَّ استَغْفَرْتَنِيْ غَفَرْتُ لَكَ، يَا ابْنَ آَدَمَ إِنَّكَ لَو أَتَيْتَنِيْ بِقِرَابِ الأَرْضِ خَطَايَا ثُمَّ لقِيْتَنِيْ لاَتُشْرِك بِيْ شَيْئَاً لأَتَيْتُكَ بِقِرَابِهَا مَغفِرَةً}.
رَوَاهُ التِّرْمِذِيُّ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 " يا سِرًّا لستُ أحكِيهِ
إلّا إلى اللَّيلِ، إنّ اللَّيلَ يُخفِيهِ "🍃
------------------------------------------------------------------------
"محل خالك ياراس"
دب فيه الرعب لما سمع الجمله هادي وقال مذعور..
لاحجي فوت الموضوع..
:خيرك خفت زيه زي اللي قبله بنخططوله كويس راهو هادي ضربة العمر اخر ضربه بعدها بنعتزل وبنليخ من البلاد..
محمد؛ونقعد اني في وجه المدفع!؟
واحد تاني قاله؛خيرك حمود رنبت !؟
محمد بخوف؛هدا محل خالي خالي مانديرهاش في خالي..
شبحوا لبعض..
بعدين كبيرهم شافله وحط يده ع كتفه وشد عليه بقوة وقال..
لابديرها حبيبي بديرها خير ماندير حاجه تانيه تزعلك مني هلبه هلبه..واني مانبيش نزعلك..
وقعد يشد ع كتف محمد بقوة..
ومحمد مرعوب منهم ومن الفكرة اللي خطرت عليهم..
مرر نظره عليهم وهما كانوا يشوفوله بنظرات مخيفه كلها تهديد..
تكلم ولد صاحب الورشه وقال:نقولك حاجه خلي.محمد برا الموضوع هدا..
وجهوا نظرهم ليه..
هو كمل يقول:خليه هو يوصلنا لمحل خاله وحني نكملوا الباقي..
كبيرهم شاف لمحمد وقال:حتى هدا راي...شني حمود؟
محمد اللي كان مازال الخوف مسيطر عليه رضخ لرغبتهم وقال..باهي..
طلقه كبيرهم وقال؛هكي تعجبني....
محمد بنظرات خوف؛شن تبيني ندير؟
:نبي نخش للمحل من غير تعب..
محمد:كيف؟!
:كيف هادي نبيك انت تفكر فيها مش متحرك من هني لين تعطيني فكرة...
محمد هز راسه بالموافقه وهو مازال خايف ومتوتر....
🍃🍃🍃🍃🍃
الساعه 9:00ليلا...
في الوقت اللي فيه كل من فالحوش لاهيين..
بين خدمة هريسه وطعميه..وصوت الفرامات يصدح في الحوش كله..
كانت طوبى مقعمزة في الجنان تحت شجرة الياسمين..
وهي تسمع في القرآن وتشوف في الفراغ..
مرات تسرح مع الآيات..ومرات مع همومها...
لعند ماوقفت السورة اللي كانت تسمع فيها لما جاها اتصال..
استاقظت وشافت للشاشه..
وين شافت المتصل غمضت عيونها بغضب وألم...
كل ماتنسى وجوده وصلته بيها..يرجع هو يفكرها ويخليها تسأل نفسها..
امتى بتخلص منه؟
فصل الاتصال...
رجعت اشتغلت السورة..
وتسمع آية...
{فَاصْبِرْ صَبْرًا جَمِيلًا إِنَّهُمْ يَرَوْنَهُ بَعِيدًا وَنَرَاهُ قَرِيبًا}
بعد ماسمعتها خدت نفس عميق وطلعاته..بعدين قالت من وسط قلبها..
يارب..
فتحت عيونها اللي كانت نظراتهم مليانه حزن..
حطت يدها ع بطنها وقعدت تسمح عليها وهي تسمع في السورة...
شويه ورجع اتصل بيها مرة تانيه..
تأففت بعدين قالت..استغفر الله العظيم..
فتحت الخط وقالت..
شن تبي!؟
"السلام عليكم"
هي من فوق نفسها...
وعليكم السلام شن تبي!؟
"كيف حالك وحال بنتنا"
حطت يدها ع فمها وشداته وغمضت عيونها وهي تحاول تكبت غضبها..
"طوبى..ماتبيش تردي انتي حره..المهم اني كلمتك نسأل عليك ونعرف شن قصة تصكيرة المطحن متاعكم"
فتحت عيونها وحولت يدها وقالت..
مايخصكش..
سكت شويه بعدين تنهد وقال..
"مش طالع عليك اللي ديري فيه انتي مش هكي..انتي طيبه وحنونه ولسانك مايقولش غير الكلام الحلو"
بعدت التليفون ونزلاته وسكرت عليه..بعدين دارت التليفون ع وضع الطيران..
وشغلت السوره من جديد..
وغمضت عيونها واتكت ع الكرسي وتحاول تسمع الآيات..
بس للأسف صوته وكلامه كان طاغي لأن استفزها وخلاها تعصب..
فتحت عيونها ووقفت السورة وقعدت تقول بكره..
واطي،حق..ير،نج..س..
وبعد ماقالت اللي في خاطرها رجعت شغلت السورة وقعدت تسمع فيها..
🍃🍃🍃🍃
هو في شقة خوه..
حدف التليفون ع الطاوله وقعد يشوفله بعصبيه وهو يهز في رجله..
جاه عمر وقعمز قدامه وهو يقول..
خيرك ماتسمعش في الكلام؟!
شبحله..
عمر:طريقتك هادي بتزيد تكرهها فيك..تعاملك ببرود مع اللي صار استفزاز واستهزاء بالنسبه ليها..
هو غمض عيونه..بعدين مسح بإيديه ع وجهه ونزلهم..
شبح لخوه وقاله..مانبيهاش تاخد ع قلتي مانبيهاش تفهم اني خلاص بنخليها..
عمر:هي قاعده ع ذمتك وحيكون في بينكم عيل..
الجالي:ياعمر اني كل خوفي يطلع الموضوع لماليها وماليك متخيل اللي بيصير بعدين!!!
كل شي حيطلع عن سيطرتي مش حنقدر نردها بالساهل...
عمر سكت وهو يفكر في كلام خوه..
الجالي بضيق:ياريتني طلقت هديكا نهار طلب الطلاق اول مرة..
عمر:كلمة ياريت ماتعمر بيت خلاص توا اللي صار صار ولازم تتقبل كل شي درتها بإيدك..
الجالي بإنزعاج:عمر نوض ارقد نوض..
بتهكم قال؛حتى اني نايض..
وناض ومشي لداره..
وخلا الجالي مع مخاوفه وندمه...
🍃🍃🍃🍃🍃
طلعت من الكوجينه وفي يدها تفاحه تاكل فيها..
خشت الصاله لقت اختها تنهي في مكالمه هاتفيه..
قعمزت حداها وقالت..
خيره وجهك هي تقول واكله ليمه قارصه!؟
نجاه بقرف:يدره الكبد ياصابرين متخلف جاهل يدوي بأسلوب يقرف..شكاره كناسه معبيه فلوس..
صابرين بضحكه؛المهم معبيه فلوس..
نجاة:تو انتي لو جاك واحد ترضي بيه؟
صابرين: عندي ياكبدي الزين والفلوس شن بندير بشكارة الكناسه..
نجاة بتهكم؛وامتى الزين متاعك بينوى؟
صابرين:على شني!؟
نجاه؛يتزوجك ياعيوني..
وجهه صابرين تبدل لونه وقالت بشي من الربكه؛مش توا مازال مش وقته..المهم توا خلينا فيك انتي فكري في مصلحتك وانسيه هداكا..
نجاه دمعوا عيونها وهي تقول:ننسى مني!!؟ والله مانقدر وين نقارنه بالرجاله نلقاه بروحه مافي حد زيه..
صابرين بتعجب؛ولله في خلقه شؤون..!
نجاة تجاهلت تعليقها وقالت؛اني اللي نموت ونعرفه بعد كلمتها شن صار شن دارت..نشوف فيها ع الفيس تنزل في منشورات وتتفاعل عادي..معاش فهمت هالمخلوقه شني..بليده..بلهاء..هبله..!
صابرين بضحكه:مرات مسحورة..
نجاه؛بالله عليك احكي جد والله دمي محروق ومش ناقصه.
صابرين بلعت لقمتها وقالت؛امم..شوفي اني نتوقع ان طوبى تشبه في شخصيتها العقربانه خديجه تشد راجلها يخون فيها اكثر من مرة وقاعده معاه عادي المهم ماتطلقش..
نجاة قعدت تفكر في كلام اختها وهي منغاظه..
صابرين:هو هدا التفسير الوحيد..
نجاة بغيظ؛معناها مااستفدت شي..
صابرين؛اسمعي مني ولوحي ورا ظهرك وعيشي حياتك نبوس ايديك نبوس رجليك اسمعي مني..شن تبي في راجل فكر يقتلك حتى القتل..
نجاه:الف مرة قتلك قبل الجالي مايديرهاش مالاش علاقه بكل..
صابرين؛باهي قوليلي من ليه مصلحه يفتك ومن اللي في بطنك وقتها؟!
نجاة برفض لكلام اختها:مستحيل والله مايديرها...
فجأه سمعوا صوت معاذ نايض يعيط وينادي فيها..
"ماما"
نجاه بإنزعاج:نوضيله شوفيه ماعنديش ليه راس..
صابرين شبحتلها بعدم رضا بعدين ناضت حطت ماقعد من التفاحه ع الطاوله ومشت لدار الصغار..
وخلت نجاة وهي تاكل في اظافرها من الغيظ والقهر...
🍃🍃🍃🍃🍃
تاني يوم...
الخميس...19ابريل سنة2018...
في مدرسة البنات للتعليم الاساسي..
كانت اسماء غايبه عن المدرسه الايام اللي فاتت..
واليوم جت..
قبل ليبدا الطابور..
خدت راما ع انفراد وقالتلها...
اسماء؛راما اني وياك مفروض معاش نقعدوا مع بعض هلبه..
راما بإستغراب؛علاش؟
اسماء:في المدرسه بس باهي ونقعدوا نتصلوا ببعض ونتراسلوا عادي ولانتلاقوا عند وحده من البنات..
راما؛باهي فهميني علاش!
اسماء بضيق مصطنع؛مانبيش مشاكل مع عمتك..
رامه:عمتي!؟ علاش شن قالتلك؟
اسماء؛مش هي اللي كلمتني.
راما بنرفزة؛اسماء تكلمي طول..
تأففت اسماء وقالت؛هديكا اللي اسمها مروة!؟
راما بتعجب:مروة!؟
اسماء:ايه يومها جت هزبتني وقالتلي كلام يوجع وقالت فوتي راما ومعاش تكلميها ولانحرش ابله نجاح وجعتني هلبه بكلامها..
انتاب راما الغضب من تصرف مروة..
دورت بعيونها عليها في الساحه لين لقتها وقالت..
كترت على ماوصوها..
ومشت بآتجاهها بعصبيه..
واسماء معاها بعيونها اللي كانت نظراتها كلها مكر..
🍃مروة كانت واقفه ع وحده من البنات توري فيها حاجه في كتاب دراسي..
ماتندريش الا ويد راما تدفع فيها من ذراعها وهي تقول..
هييه انتي..خليك في حالك احسنلك ومعاش تدخلي فيا مانيش بيبي بش تتحكمي فيا من نكلم ومن مانكلمش..
البنات كانوا مصدومات فيها وفي اسلوبها..
ومروة اكثر وهي تشوفلها بعيون معبيات دموع..
راما بغضب؛معاش دخلك بيا.معاش دخلك طلعيني من راسك معاش نبيك صاحبتي معاش نبي نعرفك افهمي...افهمي..
مشت وخلتها وهي تقول..شن اللصقه هادي....
مروة دموعها طول طاحوا..
مسحتهم صاحبتها اللي جنبها وقالتلها:ماتستاهلش حيو.انه زي هادي..
:فرخه قابله للضياع هادي ولت نسخه من اسما وقروبها..
مروة بنبرة باكيه قالت:خلاص من اليوم معاش نعرفها البنت هادي وسكرت كتابها ومشت حطاته في الشنطه والبنات يشبحولها بضيق..
شويه رن جرس الطابور....
وبدوا الطالبات يصطفوا في طوابيرهم..
واسماء وهي متوجهه لطابورها مع راما قالت..
صحه ليك..ماتبي الا هكي..
راما بإزدراء:درهتلي كبدي بتصرفاتها تحساب روحها امي..امي ماتدخلش فيا هكي..!
اسماء؛خلاص حطيتلها حد معاش تجي جيهتك بكل..
هي اوقفي قدامي...
ووصلوا في طابورهم وقفوا فيه...
اسماء حركت نظرها بإتجاه طابور مروة..
وقعدت تشوفلها لين مروة انتبهت عليها..
ابتسمتلها بمكر..
ومروة بادتلها بنظرة ازدراء بعدين غيرت عيونها عنها..
اسماء في نفسها قالت وهي تشوفلها..
"مازال ماريتي شي"
🍃🍃🍃🍃🍃
ومن اسماء لأكابر..
اللي كانت بعد العصر موجوده في احد فنادق العاصمه..
الفندق اللي فيه القناه اللي يخدم فيها مهند..
اليوم كانوا مدايرين حفله بمناسبة الذكرى السنويه لإفتتاح القناة...
وهالاحتفال كان بحضور رعاة القناة وبرامجها..
واللي من ضمنهم بوتيك امها..
وهي جت حضرت مكان امها وجابت صاحبتها..
اكابر؛هديكا هي آرام..
؛حلوة بس آلاء احلى
اكابر:ضروري تجيبي سيرتها يعني!
ضحكت صاحبتها..
شويه ويخش مهند للمطعم الفندق اللي كانوا دايرين فيه الآحتفال...
شافوه وهو ماشي يسلم ع زملائه ومدير القناة من ضمنهم..
شويه قالت صاحبة اكابر؛غبيه الاء مش عارفه كيف ضيعاته..
اكابر بإبتسامه متهكمه:وجه فقر...
:باهي خلينا منهم وتعالي نشوفوا شن دايرين في البوفيه..
اكابر:ديما بطنك خالعتك..
ومشوا الزوز للبوفيه..
وقعدوا يشوفوا في انواع الاكل ويعلقوا عليه ومافي شي عاجبهم..
لين وصلوا في الحلو..
؛حي!! مش هدا الشيز كيك اللي دير فيه آلاء..اللقطه اللي دير فيها متاع اسم "ليلو" علي الحلو متاعها اهيا شوفيها!..
زادت ركزت أكابر وقالت بتعجب؛ايه صح متاعها!؟
شبحت لصاحبتها وقالت:شن معناه هدا؟..
وقعدوا الزوز محتارات وهما يفكروا..
لين تكلمت اكابر وقالت؛تونمشي نسأله..
:لاتعالي وين ماشيه..
ومشت اكابر لمهند ووراها صاحبتها..
بس قبل لتوصل فيه وقفت جامدة في مكانها..
وين شافت نفس الشاب الحليوه اللي جي لآلاء في الكليه خاش لمطعم الفندق ومعاه واحد يبان خمسيني...
وشافوا واحد مشالهم طول واستقبلهم ورفعهم لطاولة منفصله عن ركن احتفال القناة..
اكابر بدهشه:شفتي اللي شفته!؟
:ايه...زعمه هو؟
اكابر حركت عيونها لمهند اللي كان عاطي بالظهر وهو واقف ع تلاته من زملائه..
رفعت حاجبها بمكر وعلت صوتها لدرجه تخليه يسمعه وقعدت تقول..
مش هدا نفسه اللي جي لآلاء يومها؟
مهند سمع اسم آلاء..التفت طول لمصدر الصوت اللي قاله..
صاحبتها فهمت عليها طول وقالت..
ايه هو نفسه...
وهو مستغرب..شاف وين يشبحوا..
جو عيونه ع الشاب..
اكابر؛شكله ليه علاقه بحلو متاع الاء اللي شفناه في البوفيه..
:اكيد من غير كلام..من غيره يعني!؟
مهند ركبت فيه نار من اسفل قدمه لأعلى راسه..
غير عيونه عن الشاب والتفت للبوفيه وشافله..بعدين مشاله..
هما بعد مامشي شبحوله وقعدوا يتبعوا فيها بعيونهم..
صاحبتها قالت؛يرزيها في عمرها قاعد يحبها ياهمي!؟؟
واكابر تشوف لمهند كيف وقف ع الحلو..
وقعد واقف يشوفله دقايق ودقايق...
اكابر بقهر:كان نعرف شن ديرلهم شن يشوفوا فيها بش يطيحوا فيها.هكي!؟..
:علمي علمك..
والتفتت شافت للشاب وقالت؛كان نعرف من يكون وشن وضعه..
شافتله اكابر وقالت؛زعما راعي للقناة ولاصاحبها!؟
:مااعتقدش صاحبها ولاليه بيها علاقه كان هدا راهو مقعمز هني مش غادي..
اكابر هزت راسها وقالت؛صح...
🍃ومهند سيب البوفيه وولى لمكانه وهو مش على بعضه...
رجع وقف ع زملائه ومكانش معاهم..
عيونه ع الشاب اللي شافه وقف هو واللي معاه وسلموا ع الراجل اللي معاهم بعدين مشوا طلعوا من المطعم...
اكابر؛صح مالاش علاقه بالقناة..
؛لكن ليه علاقه بآلاء..
ارتسمت ملامح الامتعاض ع وجه اكابر بعدين خدت صاحبتها ومشت هي وياها لمكان تاني في المطعم..
🍃🍃🍃🍃
وفهالوقت..
كانت آلاء في محل خاص بلبس المحجبات..
تاخد لطوبى في عبايات وشاربات بألوان مختلفه غير ملفته...
بعد ماخدت لخالتها شن تبي روحت طول للحوش..
🍃🍃🍃🍃🍃
"حلوات حلوات عجبوني"
طوبى بإبتسامه؛حتى اني..
غرفه:تعرفوا لما شفتهم تفكرت حلمه حلمتها والحق مخوفاني شويه..
طوبى:ان شاء الله خير شن حلمتي؟
غرفه:حلمت بروحي حولت الخمار والملايه..
قلب طوبى انقبض لما سمعت بداية الحلم..
وغرفه مكمله تقول..وبعد حولتهم لبست عباية زي هادي وعليها شاربه طويله وفي يدي كنت لابسه زوز خواتم لولو..شن تفسيرها؟
الاء:نحس فيها حلمه كويسه..
غرفه؛طوبى خيرك ساكته؟
طوبى:زي ماقالتلك تبان حلمه كويسه بس مانعرفش نفسرهالك..
غرفه بقلق؛الحق شغلتني ونبي نعرف تفسيرها..
طوبى:ماتشغليش روحك بيها وتقعدي دوري ع تفسيرها ..
غرفه بضيق؛صدقتي مش ناقصني..نبيله وخالي مروحين غدوة في الليل..مش عارفه كيف بدير لما تعرف عارفتها حتحرج مني لأني درقت عليها بس خوفي عليها هي اكثر...
طوبى بقلق؛ربي يستر وخلاص..
والاء قعدت ساكته وهي تسمع فيهم وتتفكر في كلام خالها مختار عن عبد الرؤوف..
🍃عبد الرؤوف..
اللي فهالوقت جوه وطلعوه من من العنبر المحبوس فيه...
ورفعوه لواحد من المكاتب..
فتحوا الباب ودخلوه وطلعوا وسكروه وراهم..
"بونسيب ليك وحشه"
ابتسم عبد الرؤوف تهكما وقال..
خيرك عطلت بيها الجيه؟!
حط مختار رجل ع رجل وقال؛تعالى قعمز قبل..
مشي عبد الرؤوف للكرسي اللي كان مقابل مختار وقعمز عليه وهو يشوف لمختار بنظرات كبر االقصد منها التصغير من شأن مختار...
مختار؛عطيتك اسبوعين..اسبوعين تقعمز فيهم مع روحك تفكر انت وياها وتهدرز عليها وهي تهدرز عليه لين توصلوا الزوز للطريقه الوحيده اللي تخليك تطلع من هني
عبدالرؤوف؛اللي وصلتله بعد المده اللي قعدت فيها حاجه وحده بس..الندم..الج.يفه ريت الج.يفه كان يجيبوهالي ناكلها..
مختار غمض عيونه وقال..رؤوف..يارؤوف..
فتح عيونه وكمل يقوله..عندك عيله..مراة وصغار جايين في الطريق..يهونوا عليك يكبروا وانت مش معاهم ووين يقروا في المدرسه يقعدوا الصغار يعايروا فيهم ياولاد الخانب..اللي مشط من رزق الدوله..!
عبد الرؤوف بكره؛اللي تحكي عليهم هادم اختك وصغار اختك يامريض..
مختار؛ايه والله نعرف مش معلومه جديده..اختي اللي مال بختها وخداتك ودارت منك صغار مالهمش الاذنب واحد انك بوهم..وابتسم ابتسامه استفزاز واسعه..
عبد الرؤوف عقد حواجبه وقال بشي من الانفعال:انت شن تبي بالزبط؟
نزل رجله واشر عليه وقاله..
هدا السؤال..ياعيني عليك..
ياسيدي الطلب الاول بكل اكيد متفكره..
انت ياعزيزي لما بتطلع من هني بتولي للمكان اللي كنت فيه قبل 2016 وبترجع لعهدك السابق وبتبدا تمشيلنا امورنا بطريقه ماتخليكش في الصورة بكل ولو صار شي القدام غيرك ياخدها عنك انت مايمسك شي..وبعد مانتموا امورنا تقدر تسيب وتطلع منها ولاكأنك كنت فيها ماعليك شي..
عبد الرؤوف:مدام قدرت دير فيا اللي درته معناها تقدر تمشي امورك من غيري..
مختار؛بعد مادفعت دم قلبي..لكن بمساعدتك انت بونسيب نقدر نمشي شغلي من غير ماندفع قرش راجل اختي كيف عاد!
عبد الرؤوف؛لاعاد معليشي هادي اسمها صحة وجه..تبيني نمشيلك امورك ومانستفيدش!!؟
مختار ابتسم وقال؛حقك..بس بتراعيني شويه عاد..
عبد الرؤوف شبحله شويه بعدين قال..
لا...لا..لا..لا...دسهم عندك التلاته التانيات بش كان فكرت تحاول معاي مرة تانيه طلع وحده منهم منك ليك غادي وماتخلنيش نشوف وجهك..
نظرات مختار كانت جدا مخيفه رغم البرود االلي بدي ع ملامح وجهه..
بعدين قال..اني عطيتك فرصة ذهبيه وانت ضيعتها..كمل عشره 15سنه هني ومش حتلقى من يطلعك قبلهم..ورد بالك تعبا ع جماعتك..اقصى حاجه يقدروا يديروها..يمنعوا عليك التعذيب ويسمحوا بالزيارة..
وناض وقف وهو يقول..اقامة ممتعه..
ومشي طلع من المكتب..
عبد الرؤوف..
مريض..
ع خشة الزوز اللي جابوه..
ناضلهم وهو يقول...ردوني داخل ردوني مافيش فرق...
ورفعوه وطلعوه من المكتب متوجهين بيه لمكان حبسه...
🍃🍃🍃🍃🍃
الساعه 8:00مساءا
في حوش محمد شنيبه...
كانت خديجه مع امها واختها وهما يحكوا عن موعد عقد قران نسرين اللي تحدد يوم...
3 من شهر مايو🍃
مغليه:اقل من اسبوعين..
نسرين؛نوتي فيهم روحي..
مغليه:نبي نديرلك عشي ماتطلعيش هكي..
نسرين بشي من الحده والانفعال؛باهي يام..لكن غني لا زغاريط لا مانبيش حس الدربوكه بكل ماتخلنيش نحشمك قدام الناس ايوه..
خديجه؛اهدي والعبي ارضي..حني بروحنا مانديروهاش ع خاطر صغار خوك..
مغليه؛ناقص عليا تنوضي تمديني كفين ياكبدي!..
نسرين بإحراج؛خفت منك يام ..
مغليه بشي من الزعل؛ماعندك من شني تخافي هاك بتتزوجي وبتفتكي مني..
نسرين؛موغي عاد فكينا من الجرح..
وقعمزت حدا امها وقعدت تحضن فيها وتبوس في خدها..
مغليه؛بري عليا غادي بري..
نسرين:لااا..
وخديجه تشوفلهم وهي تضحك..
فجأه سمعوا باب الحوش تسكر..
خديجه التفتت لباب الصاله وقالت..
مني جي؟
"أني"
خديجه؛تعالى مهدي تعالى..
"شن تبي"
هي قالت؛غير تعالى..
مغليه؛شن تبي فيه!؟
ونسرين تشوف لخديجه بريبه..
ع خشة المهدي وهو يقول..
السلام عليكم..
ردوا عليه السلام..
وقف قريب ع خديجه حط ايديه في جيوبه وقال:شن في؟
خديجه بإبتسامه:محمد ولدي يبي يقلد ولدك..
مغليه بتهكم؛ ايوااه..وشن يبي يخدم هو تاني سنفاز!؟
المهدي تجاهل كلامها..
وخديجه عقدت حواجبها والتفتت لأمها وهي تقول بضحكه..
يام!..بعدين رجعت شافت لخوها وقالت..
قالي نبي خالي يخدمني عنده..
المهدي؛يقدر ع خدمة المطحن؟
نسرين؛اصغر منه يخدموا فيه..
خديجه؛ لالا مانبيش المطحن وكان تشوفله محل الذهب..
المهدي:نعم!!؟..
خديجه؛حطه مع اللي عندك يعلمه بالك بعدين وين يكبر يولي تاجر ذهب حتى هو؟
المهدي:الحكايه مش ساهله هكي ياخديجه محمد مازال صغير ع الخدمه في محل الذهب..
خديجه؛لا وين ولدي اني! الله يبارك اللي يشوفه يحسابه يقرا في الثانوي سابق سنه في كل شي..
المهدي؛ماعدا القرايه..
خديجه بضيق؛باهي هو مش شاطر في قرايته وينجح بالدف نبيه ياخد الشهاده الاعداديه وهو متعلم صنعه يخدم بيها ويدير لروحه مستقبل..
مغليه: وليدي عندها حق وخيتك..
المهدي تنهد ومسح عينه اليسار بعدين قال..
نفكر ونرد عليك..
خديجه؛ماطولش سلم وخيي..
المهدي؛ان شاء الله ان شاء الله..شن عشانا..
مغليه؛شويتلك دجاجه..
المهدي؛يعطيك الصحه جيبولي العشي للمربوعه..
ومشي طلع من حداهم..
مغليه بحزن؛مقطع قلبي حاله..حرام يقعد هكي من غير مراة
خديجه؛راجيه هو يجي يقولك يام..
مغليه؛امتى باهي..
خديجه؛كان كثر بعد العيد الصغيره الرجاله كلهم هكي في اللي بعد يدفن مرته يخطب طول..وفي اللي بالكثير يطق اربعه شهور ويقول دورولي مراة..
نسرين ناضت وهي تقول؛ماشيه نشوف يحيى..
ومشت طلعت من حداهم..
مغليه؛مش عاجبها الكلام..
خديجه بلامبالاة:فوتيها...
🍃🍃🍃🍃🍃
"بإذن الله غدوة نديرولك تحاليل وبعدين تطلعي"
:وعلاش بديرولي تحاليل دكتورة..
اميمه بإبتسامه؛نطمنوا عليك يانعيمه بس ريحي بالك حالك باهي..
:الحمد لله..
وهي مبتسمه قالت:ان شاء الله لاباس عليك يانعيمه تصبحي ع خير..
:قدامك كل خير دكتورة..
ولفت اميمه ومشت طلعت من الحجره بعد ماشافت الحالات..
وتوجهت لحجرة الاطباء بش تجهز نفسها للمرواح..
🍃وهي في الحجره..
خش عليها الدكتور قصي وهو يقول..
مساء الخير..
التفتت شبحتله وهي تلبس في شنطتها خافت بس مابينتش وردت عليه تقول..
مساء الخير..
قصي:ماشفتيش دكتور خالد؟
اميمه؛ماجاش اليوم عنده عمليات برا..
قصي رفع حواجبه وقال تهكما:اها..ماشاء الله عارفه كل شي!
اميمه عقدت حواجبها وقالت..
مافهمتش!
قدملها قصي وقال؛نفهمك..يعني وليتي مقربه منه هلبه..
اميمه؛قصدك معلومه زي هادي لازم نكون مقربه منه بش نعرفها!؟القروب كله يعرف وحتى انت دكتور معلومات زي هادي تخبر في قروبك بيها طبيعي يعني..
قصي ضيق عيونه وقال..امم..باهي نبي نعطيك معلومه تانيه ع الماشي وفي نفس الوقت نصيحه..خالد مطلق وعنده ولد..وسبب انفصاله عن طليقته شكه الزايد وغيرته المريضه..وع فكرة طليقته دكتورة وتخدم في مصحة القدس اسمها..هناء..
اميمه مااهتمتش للكلام اللي قاله لأنه مايعنيها في شي..
وتجنبت تكثر معاه نقاش..
كل اللي دارته هزت راسها وقالت:باهي تمام شكرا ع النصيحه..
ومشت بسرعه طلعت من الحجره..
وهو بعد ماطلعت بدت ع وجهه ملامح المكر..
بعدين طلع من الحجره...
🍂🍂🍂🍂
وصلت للموقف السيارات ..
مشت لسيارتها وركبتها..
وين جت بتحط شنطتها..
انفجعت لما شافت باقه فيها بضع وردات ومعاهم زوز اصابع شكولاته.."سنكرس"
قعدت تشوفلها لحظات..
بعدين نزلت من السيارات وشافت حواليها..
مالقتش اللي توقعت تلقاه..
رجعت نظرها لسياراتها وقالت..
كيف اني ماكنتش مسكرتها !؟
وقعدت تراجع في نفسها وتفكرت انها ركبت السيارة طول من غير ماتفتحها بالجهاز..
غمضت عيونها وتأففت..بعدين فتحتهم وولت ركبت للسيارة..
قعدت تشوف للباقه..
حست بشعور مؤلم وجع قلبها..
خلاها ماتقدرش تاخد الباقي وترميها او تتخلص منها...
شغلت السياره وهي مضايقه هلبه..
وبعدين تحركت وطلعت من المستشفى..
🍃🍃🍃🍃🍃
وفي مربوعه حوش شنيبه..
كان المهدي مقعمز مع بوه فيها وهما الزوز بتفرجوا ع برنامج سياسي في التلفزيون..
ع خشة عمر قال..
السلام عليكم..
وهما ردوا..
وعليكم السلام..
عمر وهو يشوف للمهدي قال:مهدي..
التفت شبحله..
عمر اشرله يلحقه..
هز المهدي راسه بالموافقه..
مشي عمر طلع..بعدين المهدي ناض ولحقه...
🍃وفي الحوش المهدي..
تحديدا في جنانه..
جي في خاطر التارقي يدير خبزة فرن"تنور"..
ليه مده عليها..
ومعاه حسين اللي كان يكسرله في اغصان الشجر ويحط في الفرن بش تولع النار..
وهو لاهي باللي يدير فيه..
جاه اتصال من يوسف...
فتح المايك وحط التليفون ع الكرسي وقعد يكلم فيه..
"شن جدي وبوي والعيله كلها"
حسين:الحمد لله..كلنا كويسين..
"متأكد؟!"
حسين:قول قول شن سامع..
ابتسم عبد القيوم وهو يشوف في نار الفرن..
"قالوا سكرتوا المطحن"
حسين حط ايديه في جيوبه وقال.
اكيد الدكتورة خبراتك..
"لامش هي..طوبى"
الزوز لما سمعوا الاسم تسارعت ضربات قلوبهم..
حسين مشي طول للتليفون خداه وسكر المايك وكمل مكالمته مع خوه وهو يقول..
قعدنا نخسروا من وراه سكرناه..
"وبتفتحوا في مكانه دكان!؟"
حسين؛محل مواد غذائيه مش دكان وفي شارع تاني مش شارعنا..
"وعلاش ماتعطوش علم؟!"
حسين؛وشن في يدك ديرله!؟
"اسمع طوبى كلمتني وحكتلي كل شي تمام نبيك توصلي لعمي وجدي اني مش راضي واني مع بنات عمك في اللي يبوا يديروه..وتيت مبلغ وبنحوله ع حسابك نبيك تعطيه للبنات"
حسين شبح للفرن وقعد يتأمل في النار اللي طالع منه بعدين قال...
تمام تمام..بس المهم توا عمك يرضى ..
"قالتلي طوبى..هو شن مشكلته بالزبط علاش يبي يتصكر زايد ناقص!؟"
حسين؛بش يرجع المطحن زي ماكان وترجع القهوة متاعه تنافس يبي تمويل كويس واللي بينحط فيه توا يعتبر مجازفه لأنه مرات مايجيبش همه وتطلعوا بخساره..وهدا اللي مايبيشي عمك..
سكت يوسف شويه بعدين قال..
"ومع وضع البلاد توا الموضوع مولي صعب هلبه"
حسين؛ايوه هو هدا اللي نحكي عليه..هما تحرك فيهم العاطفه متاعهم مش حاسبينها بالعقل...
"لاحول ولاقوة الابالله..باهي شن مايجد عليكم خبرني طول ماتخلنيش اخر من يعلم"
حسين هز راسه وقال؛حاضر..
"سلم ع الجميع..السلام عليكم"
حسين؛يوصل وعليكم السلام..
وسكر وهو يتنهد بعمق..
بعدين شبح لعبد القيوم لقاه يقرب في صونيه العجينه للفرن..
حسين؛ياريت نعرف نديرها راهو ساعدتك..
عبد القيوم؛قعمز قعمز ماراك حد..
قعد يضحك حسين بعدين قعمز ع الكرسي...
🍃🍃🍃🍃🍃
"اني الملزوم بيها الفترة هادي مانبي حد يتجمل عليا وع عيلي يامهدي"
المهدي:باهي حقك ماقلنا شي لكن فكرة انك تمشيلهم هادي حولها من راسك..
عمر؛مش بروحي نبيك تمشي معاي..
المهدي:ماتمشيش بكل ولاتخطم من الجهة اللي هما ساكنين فيها..شن ماتبي تبعتلها ابعته معاي
عمر هز راسه بالموافقه وقال؛تمام..خلاص غدوة بإذن الله نعطيك مبلغ ترفعهولها..
المهدي:بإذن الله..
عمر ؛سامحني بنتعبك معاي..
المهدي ناض وهو يقول:برا ارقد..
ومشي طلع من غرفة الكوي..
ضحك عمر ضحكه خفيفه بعدين ناض ومشي طلع حتى هو...
🍃🍃🍃🍃🍃
طلعت من الدار وهي تجري من فرحتها..
خشت عليهم للصاله وهي تقول..
كان نقوللكم شن صار كان نقوللكم!
عمتها وامها واختها وخالتها انفجعوا..
فردوس:شن صار !؟؟
الاء وهي تضحك بفرح؛ياربي..حاسه روحي بندوخ مش مصدقه..
مطيره بنرفزة؛تي تكلمي يامدعيه يبستي ريقي!..
الاء بنبرة فرح..
توا صاحب مطعم في فندق ******* كان يكلم فيا..شورهم واخدين طلبيه من المحل اللي نتعامل معاه عجبهم هلبه التشيز كيك اللي درته وطلبوا مني نتعامل معاهم هما...
اريج بفرح:قولي والله!
الاء بضحكه؛والله العظيم...
وجت قعمزت حدا اريج وحضنتها بقوة...
غرفه بأبتسامه فرح؛مبارك للوشه..
الاء شبحتلها وهي مبتسمه قالت؛الله يبارك فيك روفتي..
فردوس وهي تمرر في نظرها عليهم بتعجب:والله مافهمت حاجه !..
مطيرة بضحكه؛ولا اني تصدقي!..
غرفه؛المطعم هدا لفندق كبير هلبه ومعروف من مايعرفاش هي بتبدا ديرلهم طلبيات الحلو متاعهم يعني الزباين متاع الفندق من كل مكان حتى من برا البلاد بياكلوا حلو للوشه..
فردوس بفرح؛حيي حقه!
مطيره؛كان هكي معناها بتاخد منهم مبلغ باهي..اسمعي ردي بالك تخليهم يضحكوا عليك افرضي شخصيتك من الاول..
الاء:تي صقع عليهم اني ياميرو عطيتهم السعر اللي اني نبيه وهما قبلوا طول..
فردوس بامتنان:الحمد لله ياربي الحمد لله..
اريج؛واخيرا درتي ثمرة في حياتك..
فردوس؛خلي اختك في حالها..
الاء؛مو..تي
اريج وهي مصدومه؛هادي اخرتها يام!!!. ستندمون يوم لاينفع الندم...
قعدوا يضحكوا..
الاء وهي تستفز فيها قعد ترقص في حواجبها وهي تقول..
مو..تي قهر...
اريج شبحتلها بإزدراء من فوق لتحت وقالت..
من انتم!!..
الاء:الاء مصطفى حسن التاجوري..بنت فردوس الواعر..
مطيره؛كفك يافرخه كفك وليتي حفيده الواعر الحق..
وضربت مطيره كفها بكف الاء..
واصوات ضحكات الجميع تصدح في الحوش كله...
🍃 معظمنا يكافح في هذه الحياة ليس حُبّاً فيها.. وإنّما حُبّاً فيمن نُحبُّهُم".🍃
🍃🍃🍃🍃
وهو برا يسمع في صوت ضحكاتهم..
من وسط ضيقه ابتسم..
كانت هاللحظه زي النسمه الباردة اللي تهب في عز حر الصيف بالنسبة ليه..
وهو ماشي للباب اللي يفتح ع المطحن...
بدت ع وجهه ملامح الاستغراب وين شافه مردود..
والضي متاع والع..
وقف ع الباب..وفتحه بعدين خش...
شافها مقعمز فيه..في النص...
كانت حاطه يدها تحت خدها..وسرحانه...
قدملها وقال؛خيرك مقعمزه هني؟!
نزلت يدها وشبحتله وهي تقول بأسف..
صوتك دار صدى...
وصل فيها وقال؛نوضي بنتي نوضي نوضي خشي للحوش..
ناضت وقفت وهي تشوفله بعدين قالت بوجع..
بابا علاش مصر ؟
لطفي مرر نظره ع المكان الفاضي حواليه وقال..
هكي خير يابنتي صدقيني..
شبحلها وقال...مافي شي يدوم ولكل حاجه في هالدنيا عمر وهدا حد عمر هالمطحن..
طوبى نزلت عيونها وهي في قمة الحزن..
هو قاللها؛اني نتمنى يابنتي والله نتمنى نفتحه مرة تانيه بس مافيش ضمان انه يستمر ويرجع زي قبل..الحكايه ياما تبي يابنتي بش نرجعوا كيف ماكنا زمان..مانبيكمش تخسروا ماعندكم على مافيش...
هزت راسها وهي مضايقه هلبه بعدين شبحتله وقالت..
باهي وانت شن تحس توا؟
هو تنهد وقال بإبتسامه؛حاس روحي في نعمه كبيره من ربي اللي عطاني حناين زيكم قلوبهم ع بوهم..
رمت طوبى نفسها في حضنه وهي تقول..
عايشات بحسك ومتقويات بوجودك ربي مايحرمنا منك..يارب..
وهو قعد يطبطت ع ظهرها وهو يقول..
ولامنكم ياحنايني...
باس راسها وبعدها وهو شادها من ايديها وقال؛بري خشي داخل بنتي وتريحي ومعاش تخممي في شي...
طوبى هزت راسها وهي تمسح في دموعها بعدين قالت..
ماتبي نديرلك شي؟
هو ابتسم وقال؛طاسه فليه وابعتيها مع وحده من بنات اختك..
ابتسمت ابتسامه خفيفه وقالت؛حاضر...
ومشت طلعت من المكان بقلب موجوع..
مش اكثر من وجع قلبه هو..
هو ينتمي لهالمكان اكثر من اي شي تاني حياته كلها كانت فيه..بس انجبر يهجره..وهادي الحياة...
طلع منه وسكر بابه..بعدين مشي بطريقه للمربوعه الخارجيه..
🍃🍃🍃🍃🍃
وتعدي هالليله..
ويطل فجر يوم الجمعه...
ومسجد المنطقه يجمع اهلها على صلاة الفجر...
فهاليوم بالذات..
كان لطفي قليل الكلام بس الابتسامه البشوشه مافارقتش وجهه مايبي يبين لحد حزنه وكسرته...
بس الناس اللي تعرفه كويس وتحبه..عارفه هو شن قاعد يحس من اللي مر بيه..
من بعد اهله..كان التارقي حاس بيه هلبه..
ويراقب في حركاته وسكناته...
لطفي بالنسبه لعبدالقيوم كان الأب اللي فقده من قبل مايشوفه..
عامل بعطف اب..بحنان اب..احتواه في غربته وخلاه يحس ان قاعد بين اهله وناسه...
كان جدا متأسف ع حال اللي وصله وموجوع عليه...
زي ماكان قلبه واجعه ع بلال اللي انسرقت منه فرحته سرقه..
وين وجه نظره ليه..شافه مقعمز في ركن بعيد من الجامع ويدعي في سره وهو يتضرع ويتوسل..
الحاجه الوحيده اللي تريح في اللي صار مع بلال انه قعد متمسك بالدين وزاد تقرب لله اكثر..بالذات وانه مسلم جديد يعني الاختبارات هادي تكون صعبه هلبه ع اللي زيه..
وهو اجتاز هالآختبار بنجاح...
🍃🍃🍃🍃
بعد صلاة الفجر...
روحوا المصلين لحياشهم ...
بس لطفي وبوه قبل ليخشوا للحوش..
وقفهم عبد القيوم وقال بضحكه..
عادي نعزم روحي عندكم ع الغدا؟
لطفي ابتسم وقال؛انت تجي من غير عزومه قتلك هالكلام قبل..
هو بإبتسامه قال:بارك الله فيك..
علي الواعر:تاكل بازين؟
عبد القيوم؛اللي بديروه باهي..
لطفي؛خلاص مادام الحاج يبي بازين معناها بازين..
عبد القيوم بضحكه قال؛خلاص نتلاقوا بعدين ان شاء الله..
لطفي وعلي:ان شاء الله..
عبد القيوم؛هي السلام عليكم..
ومشي..
وهما ردوا عليه السلام..
بعدين علي قال؛الشاب هدا جاي من ايامنا حني..
لطفي؛صدقت اللي زيه قليل منهم توا..
وفتح الباب وقال؛هي تفضل ياحاج..
خش علي وهو يقول..بسم الله..
ولطفي خش بعده وسكر الباب..
🍃🍃🍃🍃🍃
بعد صلاة الجمعه...
كانت مطيره تعصد في البازين..
وحداها اريج توتي في السفر..
خشت عليهم طوبى وهي تقول..
الله ع ريحة الطبيخه..قداش متسهفه عليه..
اريج؛قصدك لتوا قاعده تتوحمي!؟
طوبى بضحكه؛كل حاجه بنقول خاطري فيها معناها نتوحم!
مطيره؛شكلها جنيوه جي خاطرها في بازين عمتها مطيره..
حطت طوبى يدها ع بطنها وقالت بصوت طفولي..
وخاطري في سفنزاتك ياعميمه..
مطيره؛من عيوناتي الزوز..
طوبى بإبتسامه؛يسلمولي هما وصاحبتهم..
فجأه..
سمعوا صوت باب الخارجي انفتح..
مطيره؛شكلهم جو...قربولي القعاد قربوا..
اريج؛هيا هي..
🍃ودارت مطيره قعد للمربوعه..
وقعد ليهم هما..وصونيه صغيره لفراس...
بعتتها اول شي مع حسين..وبعد روح...
خدي سفرة جماعة المربوعه...
مطيره؛هيا اريج ارفعي السفره اني تو نجيب المفرش..
اريج؛هيا هي..
ورفعت اريج السفره وطلعت وراها مطيره بالمفرش..
🍀ع الغدي كانت طوبى تاكل بشهيه مفتوحه اليوم عكس الايام اللي فاتوا كانت تاكل بالغصب..
لكن غرفه يدوب تغدت من كثر ماتفكر في مرواح نبيله واللي بيصير بعده...
فردوس؛غرفه كولي..
غرفه؛ماخاطريش فيه رزين عليا..
مطيره؛كان قلتيلي راني بكبكتلك مكرونه..
غرفه؛لالا مش لازم تو بعدين ناكل..
ووخرت عن السفره..
وهما تبادلوا نظرات الاسف والضيق بيناتهم...
🍃🍃🍃🍃
في المربوعه..
علي؛توا نبوا نمسحوا بطويسه خضرا..
لطفي بآبتسامه؛شويه وجايه..
حسين؛وكان تشرب شاهي التارقي ياجدي..
ابتسم عبد القيوم..
علي:ماتخلنيش توا نبدا فيه الراجل ضيف عندنا..
عبد القيوم شبحله بإستغراب..
لطفي بضحكه؛علاش ياحاج!؟
علي؛مافيش نهار قال يعزمني حتى بالكذب ع طاسة شاهي عزم الشارع كله حتى المدوشن ربيع بات عنده بيات..
ضحكوا..
وعبد القيوم بضحكه قال:عليا حق والله نعترف سامحني وفي الجديد مانعزم حد غيرك سادهم ماشربوا شاهي المدوشنين هذوم..وشبح لحسين..
علي:كان العزي بالطلبه لاترحم اللي مات..
قعدوا يضحكوا..
وعبد القيوم يضحك معاهم عادي خدي ع طبع علي الواعر ومزحه..
وشويه وجت سفرة الشاهي الاخضر..
بعد ماشرب عبد القيوم طاسته ناض حطها في السفره..
ومرر نظره عليهم لقاهم كملوا حتى هما..
ولى قعمز وهو يرد عليهم لما قالوله صحه..
سلمكم..
تنهد وقال..صلوا على النبي..
هما قعدوا يشبحوله واستجابوا لطلبه..
اللهم صل وسلم عليك يانبي..
عبد القيوم:اول شي بارك الله فيكم اللي قبلتوا عزومتي لروحي ع الغدا..
حسين؛وفيك بارك الله ع صحة وجهك..
عبد القيوم؛مش راد عليك..
ضحك لطفي..
وعلي قال؛ماتعدلش عليه..قول شن تبي تقول..
ضحك عبد القيوم ع حسين اللي ضحك حتى هو بعدين قال..
المهم..العزومه هذي ليها سبب عندي..
علي:قصدك تقول لجيتك اليوم بالذات سبب..
هز عبد القيوم راسه وهو مبتسم..
لطفي بجديه؛ان شاء الله خير صايره معاك حاجه في الخدمه؟
عبد القيوم؛لا الحمد لله الامور غادي كلها تمام..بس انا جايكم بخصوص خدمه..
حسين استغرب وهو يشوف لعبد القيوم..
لطفي؛كان نقدروا عليها مانقصروش..
عبد القيوم؛لاتقدروا عليها بإذن الله..
حسين؛شن هي؟
عبد القيوم وهو يشوف للطفي..
هو عرض..وطلب...ومصلحتي فيه كبيره وليا وقت نفكر فيه..
"نبي نخش معاكم شراكه في المطحن"
🍃🍃🍃🍃🍃
"وصلني توا الفلاش نشوف العروض وندرسها ونرد عليك"
هذا مختار وهو خاش للمكتب متاعه ويتكلم بالتليفون..
ركز بنظره ع الطاوله اللي فيها رقعة الشطرنج ومشالها وهو يقول..
اني مستعجل اكثر منكم صدقني في الوقت محدد يكون كل شي واتي..
وجي بيحط الفلاش ع الطاوله بدون مايشوفلها وهو لاهي مع الراجل اللي يكلم فيه..
ناش الصف متاعه ع الرقعه..طاحوا اغلب البيادق بما فيهم الفيل والوزير..
شبحلهم بإستياء بعدين قال..
باهي باهي..نشوفك قريب ونحكوا اكثر..
ونزل تليفونه وسكر المكالمه..
ورجع يشوف للصف متاعه ع رقعة الشطرنج بنفس نظرات الاستياء...
#رقعة_شطرنج
#طوبى
....يتبع....
