#تكمله_الجزء_التاسع_عشر "كسروا قلبي"
#طوبى "شارع القهوة"
#جمان_فريد
وهي كانت ضم في صالة حوشهم...
وهي تسمع في شيخ في برنامج ديني يتفرج عليه جدها كل جمعه..
"والله اني اريد ان اقدم نصيحه لكل من يسمعني الآن..
نصيحه غاليه...لاتقدر بثمن..
الزموا سورة البقرة..
ستجدون البركه في كل شي..
في ارزاقكم واوقاتكم في ذريتكم ..وصحكتم النفسيه والجسديه
بل والله في ناس غيرت سورة البقرة في شخصياتهم..
اللي يقول انه كان منطوي ع نفسه بعد لزمها اصبح منطلق مع الناس واجتماعي ومحبوب..
هناك من كان يعاني من مشكلة الثقه بالنفس كانت ثقته بنفسه مهزوزه وبعد مالزم سورة البقرة..صار اقوى وثقته بنفسه جدا عاليه.."
اميمه كانت واقفه تسمعله بإنتباه شديد..
"وازيدك من الشعر بيت...في ناس لزموها..كشفت لهم مكائد ومؤمرات..وكشفت لهم حقائق بعض من البشر اللي في حياتهم..بعدت عنهم ناس فيهم شر لهم...وقربت منهم ناس فيها كل الخير لهم..
السر وين السر...في سورة البقرة نفسها..
اخذها بركه...وتركها حسرة...ومايوصي رسول الله الذي لاينطق عن الهوى ان هو الا وحي يوحى...الا بشي عظيم جدا..عميق في نفعه وفائدته للمسلم..عليكم بيها عليكم بيها ياكل من يسمعني عليكم بيها"
اميمه تأثرت هلبه بالكلام...وتولدت في داخلها رغبه كبيرة انها تنفد النصيحه..
علي:ترا بنتي تعالي علي صوت الصلاة بدت في مكه..
قربت اميمه من التلفزيون وعلاته..ابتسمت وقالت..
اميمه؛ماخاطركش تولي غادي جدي؟
علي؛وهلبه..ان شاء الله رمضان الجاي نمشي عمره ونرفعك معاي..
اميمه بدهشه:بالله حق!؟
علي؛بإذن الواحد الأحد..
اميمه وعيونها دمعوا من الفرحه جاته باست راسه وقالت؛ياعمري ياجدي والله نحبك هلبه..
علي قعد يضحك ويطبطب ع يدها...
شويه وخلاته يسمع الخطبه في الحرم..
ومشت وهي بطير من الفرحه كملت مع امها باقي حوسة الحوش..
بعدين حددت لخوتها سواريهم العربيه..
وبعدها مشت توضت وخشت لدارها..
لبست الملايه..وخدت المصحف وقعمزت قرت سورة الكهف..
بعد ماكملتها جت بتسكر المصحف وتنوض تقرا..
بس خطر في بالها كلام الشيخ عن سورة البقرة..
قعدت تراجع فيه وتفكر
وفي الاخير قررت تقراها فتحت عليها وبدت تقرا...
🌻🌻🌻🌻🌻
الساعه 3:30بعد الظهر..
الجالي:حولي الموضوع من راسك وماتحاوليش الزواج مأجل التفكير فيه لبعد عشرة سنين..
خديجه:اللطف!..
الجالي:السن المناسب للزواج في نظري نص تلاتينات وقتها نكون مكون نفسي ومداير لروحي مستقبل كويس.
خديجه؛ياودي باهي هي البنيه تقرا طب من هني لهداكا الوقت تكون متخرجه..
الجالي:لالا اميمه حتى هي حوليها من راسك واي بنت في شارع القهوة..اني ناوي ناخد من بعيد وبإذن الله بنطلع من شارع القهوة كله..
خديجه:تخليك امي!
الجالي:ترضى ترضى من هني لهداكا الوقت ترضى ان شاء الله..
خديجه:والله اميمه زي العسل وتناسبك هلبه ياريتك شايفها..
الجالي؛عارف والله عارف بنيه خلوقه وقنينه ربي يعطيها خير مني ماليش فيها نصيب..
تنهدت خديجه بإستسلام وقالت؛خلاص ماعندي مانقولك مش بالسيف في النهايه..
الجالي بإبتسامه؛ايوه هدا الصح...
🌻🌻🌻🌻🌻🌻
"القلب الطيب..قلب حنين قلب كبير"
دقت ع الباب وهي تغني...
انفتح...
اميمه بإبتسامه؛خشي..
خشت طوبى وفي يدها مجلات:هادم كلهم اللي عندنا..
خدتهم اميمه وقالت:صحيتي بيبو..
طوبى:سلمك ميمو..تبي حاجه تانيه..
اميمه؛نبيك ماتقولي شي لغرفه..
شبحتلها طوبى شويه وبعدين ابتسمت وقالت:ماتخافيش مش حنقول شي لحد..سلام..
ومشت طلعت..
واميمه سكرت الباب ومشت تجري خشت بالمجلات للحوش..
وصلت في دارها وسكرت عليها الباب..
وقعمزت وقعدت دور في المجلات ع شي معين..
تعبت وهي دور لين لقاته..
صورة لجاكيت عجبها ورسخ في مخيلتها لما شافاته مره في نفس المجله في حوش عمها..
قعد تتأمل فيه هلبه..
بعدين خدت كراسه وقلم..وبدت دير في حسابات معينه وهي تفكر..
اميمه:يارب يطلعوا صح...بعدين تأففت بضيق وقالت..غير امتى يجي يوم الأحد بس!
🌻🌻🌻🌻🌻🌻
وجي يوم الأحد..
اللي كان يراجي فيه عمر بفارغ الصبر بش يشوف اميمه...
قعد يمشي في الكليه ويدور فيها لكن مالقهاش..
ضايق هلبه..وحس بشي كاتم ع انفاسه..
قعمز في مكان وقعد يدور بعيونه بالك تجي هني هدا مكانها المفضل..
شويه وجي الشخص الغلط..
اخر شخص يبي يشوفه عمر حاليا...
داليا:عموري خيرك ماقلتش بتجي
عمر:شن جو..
داليا قعمزت جنبه وقالت:تمام...شن جوك انت حبيبي مش عاجبني الفترة الاخيره حاسه في شي صاير معاك..
عمر:مافي شي عادي زي قبل..
داليا:تؤ..في شي وتوا بتحكيلي كان ماحكتليش اني لمن تحكي..!..وشدت يده...
فهالحظه.
جت اميمه...
كانت حاضنه شيتاتها وهي تمشي..
وتمرر في نظرها ع المكان..
لين جو عيونها عليهم..
شافتهم..وشافت يد عمر في يدها..
قلبها ولى جمرة والعه..
عيونها تعبوا دموع..مشت قعمزت بدون ماتلفت النظر..
وهي تشوفلهم بعيونها الزرق اللي غارقات في بحر دموعها..
ماحولش عمر يده من يدها قعد يهدرز معاها وهو شادها..
اميمه لتوا ماشكت في شي..بس مش متحمله علاقته بداليا اللي مالهاش حدود وفيها جرأة غير مقبوله..
عمر:ماتشغليش بالك مافيا شي صدقيني بس هكي شاغلتني القرايه..وغير عيونه عنها وقعد يدور بيهم لين طاحوا ع اميمه..
وبدت دقات قلبه بتسارع..طول جبد يده من يد داليا..
اميمه شبحت القدام ومعاش شبحتلهم..
داليا ركزت وقالت:شن قصتها بنت جيرانكم هادي علاش متحططه عليك شن تبي منك!؟
عمر شبحلها وقال:ماتبي شي عادي.
داليا:لافي خايفتها تكون شادة عليك حاجه..
عمر عصب وقال:شن بتشد عليا!! اعرفي كيف تدوي..
خافت داليا وقالت:اسفه..بس راهو معاش متحملتها نبي نوض نمسح بيها الارض..
عمربحده:ياويلك تفوتي حتى من ركنها!؟
داليا رفعت حواجبها تعجبا.
هو استاقظ لروحه وقال:تبي ديريلي مشكله مع ماليا ومع الشارع!؟
داليا:لهالدرجه!؟
عمر:مالا شنو..نقولك فوتيها ومعاش دوريها وخلاص..
تنفست بعصبيه وقالت؛نحاول..بعدين ناضت وقالت..هي نوضوا من هني..
هو بالغصب ناض..
شدت داليا يده ومشوا مع بعض..
عمر مش قادر يسرق النظر لأميمه..
وهي قعدت معاهم بعيونها..وهي تفرك في ايديها ببعض وعيونها يدمعوا..
عمر ماقدرش يتحمل يقعد مع داليا اكثر ماقعد يبي يمشي لأميمه..
عرف كيف يوزعها..
بعدين ولى بسرعه لأميمه..
لقاها قاعده في مكانها بس تقرا..
قدملها خطوة ورا التانيه..
وخطواته كانت متردده..
وصل فيها وقال:اميمه..
اميمه بدون ماتشوفله:قعمز..
قعمز جنبها بمسافه وهو يشوفلها ويقول:شن جو.
اميمه؛عادي..
عمر:مش فاضيه نجيك في وقت تاني..
شبحتله..شاف عيونها لونهم ازرق ومدمعات وزادت عليهم بسؤالها اللي طرحاته..
اميمه:متأكد ان البنت هادي مجرد صديقه عمر؟
عمر:اكيد..
اميمه:مش عارفه شن هالصداقه اللي مافيش فيها اي حدود..
عمر:عادي يعني صداقه وطبيعي يكون الجو اريحي بين الصحاب..
اميمه:يعني عادي اني ندير اصدقاء ونقعد نشد في ايديهم بعدين!
فنص عمر وهو يشوفلها..
اميمه:صداقه بريئه شن فيها!
عمر حس انه ضعيف قدامها هلبه مش قادر يرد عليها ولايقول شي..حتى بوح بمشاعره مش قادر يبوح..
هني غروره ناض ووقظه انه قاعد يغرق ومش حيلقى شن يطلعه بعدين..
ابتسم وقال فوق من قلبه:عادي وين المشكله..
انصدمت اميمه..
عمر:قتلك قبل ماتعقديش روحك..
اميمه شبحتله شويه بعدين قالت:حتى لو كان عادي عندك انت مش عادي عندي اني..
قعد يشوف لعيونها وهو يسمع فيها شن تقول..
والقلب بيفر فران..
اميمه تنحنحت وقالت:ع العموم براحتك اللي يعجبك ديره..
عمر ابتسم وقال:باهي خلاص فكي العقده وغيري جوك وخلينا نهدرزوا هدرزة حلوة..
ابتسمت مجامله وقالت؛هدرز...
وبدي عمر يهدرز عليها وغير جوها وخلاها تضحك..
كان يحكيلها في حاجات عن نفسه ومواقف صارت معاه منها المدهش ومنها المضحك..
واميمه بين الاندهاش والضحك واحيانا الانتقاد.
وهو ياااه ياهو..يركز ع كل ردات فعلها تعابير وجهها...
اختلاف نبرات صوتها بين التفاعل والتاني..
اميمه كانت جميله جدا بكل تفاصيلها..
حلوة للغايه بأسلوبها وتصرفاتها..
كانت فريده..مختلفه هلبه..
في جيلها معاش في زيها..
وعمر ياما شاف وعرف..ماقبلتاش بنت زي أميمه..
اكتشف عمر..انها مش عبيطه ولاهبله..
اميمه بنت خجوله..عاقله..احيانا تكون بحكمة عجائز في عمر التسعين فاهمه الدنيا كويس...واحيانا تكون طفله بسيطه ماتفقه في اقل امورها شي..
وهالتناقض هو اللي زاد شد عمر ليها...
بس مع هذا كله قاعد مع نفسه في صراع رهيب بين المشاعر اللي عايشها وبين تكبره وغروره اللي يذكروا فيه ببدايه هالقصه اللي كانت لعبه لغرض التسليه لاأكثر...
وتمر الايام ع عمر وهو عايش في دوامه مش عارف كيف يطلع روحه منها...
🌻لكن كانت تمر ع اميمه احلى ايام..
مليانه شغف...
شغف بشي حلو دير فيه لشخص تحبه...
اميمه فهالأيام كانت تجهز لهدية عيد ميلاد عمر...
وماكانتش اي هديه...
شرت بالفلوس اللي داستهم قماش وازرار..وخيوط...
وشرت كماليات تانيه بش تخيط بإيديها جاكيت لعمر....
قياساتها خدتهم بنظر العين..وهي تشوف لكل جاكيت يلبس فيه...وفي مرة رمي جاكيته وعطاهولها وهي استغلت الفرصه وتأكدت من القياسات اكثر...
وطلعت مزبوطه ميه في الميه وكانت فرحانه لابعد حد...
ويمروا يوم ورا يوم..
واميمه مقسمه وقتها بين الخياطه..والقرايه...
وسورة البقرة اللي اثرت فيها هلبه وحست معاها بتغيير واضح في شخصيتها...
🍀🍀🍀🍀🍀🍀
يوم 16 النوار....شهر2..سنة2009
في وحده من المنتزهات..
ع وحده من طاولات اللوح...
مقعمزات..
عائشه وفايزة ونسرين وسدرة يهدرزوا..
سدرة:كملت كل شي خلاص..
نسرين:صحة ليك..كان اني نقعد نجري ليوم الميلود..
فايزة؛هديكا انتي ياتنباله..
ضحكوا..
عائشه بضحكه؛بيخش يلبسك الدبله؟
سدرة:هو يبي بس مش قدام النساوين البرانيات قالي نخشوا في دار ومعانا قريباته هو بس ويلبسني..
فايزة بضحكه؛جو عليه..
سدرة:اسمعي انتي خلي راجلي في حاله خيرلك وانتي حاطه راسك من راسه..
ضحكوا ونسرين قالت؛والله جنتل وحليو ويهبل وطالع عليك هلبه..
سدرة بإبتسامه؛تسلمي نانسي..
وقعدوا يهدرزوا مع بعضهم عن البيان..
بعدين كل وحده فيهم قعدت تحكي عن حياتها وشن صاير معاها..
•••فايزة:امي من يومها هكي الاولاد عندها خير من البنات ديما مفضلتهم عليا ومعاملتها ليا جافه..ماعندي ماندير تقعد امي في النهايه لازم نواصلها ونشوفها .
سدرة بحزن؛ربي يهديها...
•••نسرين؛راجل عينه زايغه مش محترمني بكل حتى نبدا معاه في السيارة عيونه في غيري..تصدقوا اني شديته اكثر من مرة يكلم في بنات..
كلهم بصوت واحد قالوا:غبر فيه!
ضحكت تهكما وقالت؛ولاهمني والله ولاحرك فيا شعره عايشه معاه غير هكي وخلاص..الميزة الوحيده في العيشه معاه انه يحب يصرف ويسفر ويطلعني يعني معيشني في رفاهيه..
فايزة بضحكه:مش قلتلكم باردة..
ضحكوا..
•••عائشه:ياوخيتي تهبل ولت وزادت وكبرت موليه تهبل..
سدرة بإبتسامه:وخيتي نجيها سميتي..
نسرين؛حتى سميتك تانيه تهبل راهو.
سدرة؛وخيتي نجيهم بنياتي اسمعوا هادوا حصتي اني راهو..
نسرين؛هدا اللي نبيه نبيك تربيها انتي بش تطلع زي طوبى..
عائشه:ماشاء الله عليها هالطوبى فايته سنها بعقلها ونباهتها..
سدرة بإبتسامه:من لما كانت صغيره..
فايزة؛بس سدرة واعرة معاها هلبه ومقيدتها ماكنتيش هكي مع غرفه..
سدرة:هادي وصية امي يافايزة...والوصيه امانه..
عائشه:ربي يقدرك عليها...
سدرة؛آمين...
سكتوا شويه وهما يفكروا بعدين فايزة قالت..
فايزة بضحكه:سدرة التفتي التفتي..
التفتت والبنات معاها..
لقوا الفاندي جاي مع احمد والزوز يهدرزوا بعدين قعمزوا مع بعض ع واحد من المقاعد..
ابتسمت سدرة وقالت؛ديما يقولي فيها بنقعد وراك وين ماتمشي زي الحارس..
عائشه شبحتلها..لاحظت ع ملامح وجهها سعاده واضحه..
بس نظرات عيونها ماكانوش يشبهوا نظرات عيونها للمهدي..
حستهم عاديات..
عكس نظراتها للمهدي زمان اللي كانوا ينطقوا بكلمة نحبك..
تأكدت عائشه من اللي في بالها...
وجعتها روحها..ووجعتها صاحبتها..وحتى المهدي وجعها...
كلهم كانوا ضحايا لحظة غضب وتهور...
دفعتهم كلهم الثمن غالي...
🌻🌻🌻🌻🌻🌻
واقفه في المخزن وهي حاطه التليفون ع وذنها..
كانت دايرة اتصال بشخص ما..
بعد فترة رد..
"ايوه"
رفعت حاجبها وقالت؛كابتن عمر..
"غرفه"
غرفه؛ايه غرفة ياكابيتانو شن جو..
"تمام شن جوك انت"
غرفه:الجو كله عندك انت..شكلها اللعبه قلبت جد ووقعت في الفخ اللي نصبته ياكابتن..
"شن قصدك مافهمتش"
غرفه؛لافاهم ياعمر..طحت في العبيطه ياعمر ياحيف وخلاص..
هو قعد ساكت وماردش..
ضحكت وقالت؛لكن والله شي يضحك زي النكته عمر بجلالة قدره اطيحه اميمه العبيطه..
وقعدت تضحك سخريه واستفزاز..
"والله مافي عبيط كان انتي..يعني مش عارفتني انتي ولاكيف "
غرفه رفعت حاجبها وقالت:شن نعرف!؟
"ياهبله عجبني الجو هدا علاش طولت بيه بس.."
غرفه فرحت وقالت؛لكن طولت هلبه حرام..يعني لو جيت تنهيها هي مسكينه حتكون صدمتها اقوى..
"توا درتي قلب ووجعاتك!"
غرفه؛مهما كان تقعد بنت عمي..
"بنت عمك!"
غرفه؛اممم..
"خلاص غدوة الموضوع منتهي خلاص اصلا بديت نمل"
غرفه:توقعت اصلا مستحيل تتحمل اكثر من هكي..
"تمام بنسكر توا مشغول..سلام"
غرفه؛سلام...
وسكرت عليه وقالت؛نراجو لغدوة كانت مانهيتهاش انت اني ننهيها ياكابيتانو...
ومشت فتحت باب المخزن وطلعت منه....
🍀🍀🍀🍀🍀
وتعدي الساعات..
ويلحق النهار ليل..والليل يلحقه نهار....
ويطلع الصبح...
بعد ماصلت اميمه الفجر..وقرت سورة البقرة كامله..
جهزت نفسها للجامعه..
وبعدين مشت خدت الكيسه اللي كانت فيها هدية عيد ميلاد عمر وهي مبتسمه بحماس طفولي وفرح..
بعدين خدت شنطتها وشيتاتها وطلعت..
☘☘☘☘☘
ركبت سيارة يوسف..
يوسف لاحظ الكيسه وقال:شن فيها..
اميمه بشي من الربكه:طلب لوحده تقرا معاي في الجامعه..
يوسف:قصدك بديتي تخيطي وتبيعي!
اميمه ابتسمت بإرتباك وقالت:لالا..خدمه تبيها مني بنيه وخدمتها فيها..
يوسف:اها..وهز راسه وشغل السيارة وتحرك..
واميمه حست بتوتر وارتباك...
لين وصلت للجامعه..
نزلت من السيارة..
وخشتلها بسرعه..لين وصلت لكليتها ..
خشتلها وهي تجري لين وصلت في المدرج...
خشتله وقعدت تشوف للكراسي..شافت واحد فاضي مشتله تجري وقعمزت فيه...
وعيون اسامه عليها...
شاف للكيسه بانت حاجه لونها ازرق غامق بعدين شافلها هي كيف تحط في شيتاتها قدامها...
☘وفي نفس المدرج في مقعد تاني...
:شن خديتيله..
داليا؛ساعه امس طلعت ع السريع خديتها..وحجزت مكان في المطعم هداكا اللي مشيناله اول مرة اني وياه وخديتله طورطه..
:حلو..
ابتسمت داليا...
☘☘☘☘☘
وحضروا محاضرتهم..
وبعد تمت وطلع الدكتور...بدوا يطلعوا..
داليا مشت بتطلع من الكليه بش تسبق عمر للمطعم وتكمل التجهيزات..
بينما اميمه مشت للمكان اللي تعودت تشوف عمر فيه وقعدت تراجي فيه بفارغ الصبر..
واسامه كان لاحقها ومقعمز بعيد عنها بمسافه ويراقب فيها..
☘وعمر خش فهاللحظه للكليه وهو متمني تصير اي حاجه ترده ع اللي ناوي يديره..
مابعده عمر من الصراع اللي عايشه داخليا.
مشاعره مع طباعه...
وكلام غرفه ليه استفز غروره وتكبره هلبه وخلاه يبديهم علي هالمشاعر الحلوة اللي عاشها..
قعد يمشي لين وصل لهداكا المكان..
شافها مقعمزة..وواضح انها تراجي فيه..
حس بقلبه يوجع فيه...مش عارف كيف بيديرها كيف!؟
مشي ناحيتها..
واسامه شافه وقعد يشبحله وهو ماشي لين قرب منها..
هي لما شافاته اشرق وجهها الجميل والبريء بإبتسامه حلوة .
عمر حسها تمزق في قلبه...
بس مع هذا عفس عليه..
ووقف قدامها وقال:شن جو..
اميمه:تمام..قعمز..
عمر وهو يوزع في نظره حواليه:لامستعجل الولاد يراجو فيا..
بان ع وجهها الضيق وقالت:خسارة..
عمر شبحلها وقعد ساكت..
هي بدلت ملامحها بإبتسامه وقالت؛مش مشكله..
ناضت وقفت وفي يدها الكيسه وقالت؛كل عام وانت بخير وبطول عمرك ان شاء الله..
لأول مرة عمر في حياته ينسى يوم ميلاده..
لما سمعها شن قالت تفكره..
اميمه مدتله الكيسه وقالت: هديه بسيطه مش من قيمتك بس حاولت نديرلك حاجه حلوة..
هو خدي الكيسه وطلع منها اللي فيها..
كان جاكيت حلو بالمرة لونه ازرق غامق..
بس اكثر شي يميزه العلامه الموجوده ع ياقته..
علامه تخص كابتن الطيارة تكون موجوده في بدلته..
اميمه؛اني فصلتها وخيطتها والقياسات خديتها بنظر العين يارب تجي عليك..والاهم تعجبك...
عمر مش قادر يتحمل...هالانسانه مش طبيعيه..مش زي الناس بكل..هي شي وهما شي تاني...
مايستاهلهاش بكل مايستحقهاش...مش ليه وهو مش ليها...
《 لكن والله شي يضحك زي النكته عمر بجلالة قدره اطيحه اميمه العبيطه..》
قام عيونه فيها وشبحلها..
وهي بإبتسامه قالت:عجباتك؟
بدون سابق انذار بدي يضحك..
تبدلت ملامح وجهها للإستغراب..
مدلها الكيسه وهو يضحك ويقول:لالا خلاص معاش نقدر نتحمل خلاص..خودي بالله عليك خودي..
هي مش فاهمه شي ومستغربه هلبه..
حست بضيق في صدرها وهي تشوفله كيف يضحك..
عمر بضحكه؛بجديات اميمه انتي يعني..مسكينه..من يومك ومش عارف لامتي بتقعدي هكي..
تعبوا عيونها دموع ومازال تشوفله وهي مستغربه ومش فاهمه..
عمر:كيف صدقتي ان اني عمر..ممكن يشوفلك انتي اميمه العبيطه اللي ماتعرفش راسها من رجليها..يابنتي من جدك انتي يعني تموا البنات من الدنيا بش نشوفلك انتي!
اميمه حست فجأة انها في مكان فاضي فاضي..
اسود...غارق....وتسمع في كلام عمر بصدى يتردد اكثر من مرة..
عمر بضحكه:شوفي اني عارف انها نذاله وحقارة لذلك بنقولكsorry...كل مافي الموضوع ان اللي صار كله مقلب درناه فيك اني وغرفه بنت عمك قالتلي اميمه تحبك ماتحبك واني عاد عجبني الوضع وقلتلها خليني ندير فيها مقلب وخليه بيني وبينك..
بس امس كلمتني وقالت معاش طول معاها بش ماتنصدمش فيك صدمة قويه..والحق بعد شفت شن درتي اليوم قلت لا عندها حق غرفه لازم ننهيها..
حدف الكيسه ع الكرسي وقال..ع العموم خليه يقعد درس ليك معاش تخلي حد يضحك عليك..احمدي ربك اللي جاتك مع ولد جيرانكم مش مع حد ماتعرفيشي كان هدا الله اعلم وين وصل بيك...لبس نظاراته وقال..اسف مرة تانيه بنت شارعي..وهي في امان الله...
ولف ومشي..وهو حاس بالموت جاته حاس بروحه واصله لحلقه بس ماتبيش تطلع..
مايبيش يلتفت ويشوفها ولايشوف شن صار فيها..
وهي..
مازال واقفه في مكانها..
في حالة صدمه..وتوهان..
كلامه قاعد يتردد بالصدى في وذنها..
وهي تقول في نفسها..
يارب يكون كابوس فيقني منه يارب..
يارب اضغاث احلام فيقني منها يارب..
يارب تكون جثامه..خلصني منها يارب..
بس للأسف..كان واقع وحقيقه...
حقيقه قاتله ومؤلمه للموت...
رجعت لهالواقع والتفتت شبحت للكيسه اللي فيها الجاكيت..
طاحوا دموعها وهي تتفكر في الليالي اللي سهرت فيهم تخيط فيها..
خدتها وقعمزت بهده وهي تشوفلها ودموعها ينهمروا ورا بعض..
ومازالت في حالة صدمه وهي تسمع في كلام عمر كأنه قاعد يتكلم قدامها..
التفتت ع شنطتها خدتها وهي ترعش..
طلعت التليفون منها وحطت ع رقم خوها يوسف واتصلت بيه..
طول رد..
كلماته بنبرة مرتعشه وهي تقول:يوسف تعال روح بيا..
"علاش خيرك..خيره صوتك هكي!"
اميمه وهي تمسح في دموعها؛حاسه روحي مريضه شويه..
"باهي عشرة دقايق ونكون عندك"
وسكر يوسف..
وهي نزلت التليفون وقعدت تشبح للفراغ وهي سرحانه..
ومازال..مازال..كلام عمر يرن في وذنها...
والدموع مابطلوش نزول..
وعيون اسامه عليها..كان يبي يعرف شن صار بينهم وشن قاللها عمر....
فاتوا العشرة دقايق واتصل يوسف..
هي طول ناضت ومشت بسرعه بدون ماتركز..
عترت وطاحت ع ركابها..
غمضت عيونها ونزلت راسها وقعدت تبكي..
والكل يشبحولها..
جاها اسامه يجري..شدها من ذراعها وقال:اميمه نوضي..
هي ناضت بصعوبه..
بخجل..بألم...
ناضت واسامه قال:معليشي ماصار شي..
وطبس وقعد ينفض في عبايتها..
هي قالت:لالا..شكرا..
وبعدت عنه ومشت بسرعه وهي حامله معاها خيبتها وقلبها المكسور..
وعيون اسامه عليها وهي ماشيه لين درقت من قدامهم..
تنهد بحزن...والتفت شبح لكرسيها..لقاها ناسيه شيتاتها...
طول مشي خداهم ولحقها بيهم يجري...
لحق عليها وهي بتطلع من الكليه خلاص..
اسامه وهو داهش:اميمه شيتاتك..
وقفت وشبحتلهم..بعدين خدتهم منه ومشت بسرعه بدون ماتشكره..
وهو يتبع فيها ويمشي وراها بمسافه وعيونه يشوفولها بحزن..
لما قربت اميمه توصل في سيارة خوها..
مسحت دموعها كويس..ومشت ركبت السيارة...
يوسف:خيرك اميمه..
اميمه وهي تحاول تتمالك نفسها:حسيت روحي هكي دايخه..
يوسف:فطرتي الصبح..
اميمه:لاخديت قهوة بس..
يوسف:ربي يهديك يااميمه خل نرفعك نقيسلك ضغطك..
اميمه:لالا روح بيا نبي نروح نرقد..
يوسف:باهي ناخدلك حاجه تقيمي بيها روحك..
اميمه هزت راسها وقالت:باهي..
وقعدت ساكته وهي تبلع في ريقها اللي ينزل في جوفها سم..
قعد يوسف ينصح فيها ترد بالها من صحتها..
وهي ماتسمعش فيه شن يقول بكل..
مازالت تسمع في كلام عمر بس..
وجهت وجهها للروشن ودموعها يصبوا وهي تمسح فيهم..
نزل يوسف في نص الطريق خدالها عصير وبريوش..
خدتهم وقعدت تشرب في العصير بالسيف مسايرة لخوها..
كانت مجبورة تكبت شعورها تكبت اللي تحس بيه كله لين توصل للحوش...
وبعد طول مسافه..
حطها يوسف ومشي..
هي نزلت بحاجاتها..
شبحت لحوش شنيبه...
《 كيف صدقتي ان اني عمر..ممكن يشوفلك انتي اميمه العبيطه اللي ماتعرفش راسها من رجليها..يابنتي من جدك انتي يعني تموا البنات من الدنيا بش نشوفلك انتي!》
شدت ع قبضة يدها بقوة وارتسمت ع وجهها ملامح البكاء..
التفتت وشبحت لباب حوشهم بنظره مكسورة..
قدمتله ودقت الباب..
شويه وانفتح الباب..وامها فتحاته..
بإستغراب قالت؛اميمه!
خشت تجري وهي تبكي.
امها انفجعت ولحقتها تجري..
خشت داخل للحوش فاتت من قدام جدها شافها كيف تبكي انفجع حتى هو وقال:اميمه خيرك!
واميمه تجري بإتجاه دارها خشتلها وسكرت عليها
وقعمزت ع الارض وهي تبكي بإنهيار..
وجدها وامها يدقوا عليها في الباب.
"اميمه خيرك يااميمه!..اميمه افتحي يابنتي"
واميمه تبكي بالعبرة..تبكي بقوة من وسط قلبها المكسور...
فتحت امها الباب وخشت وهي مفجوعه وتقول:خيرك يابنتي خيرك شن جاك!؟
جدها:في حد درالك حاجه!!؟
اميمه وهي حاطه ايديها ع قلبها قعدت تقول ببكي وصوت عالي وبكل ألم..
"كسروا قلبي..كسروا قلبي"
امها قعدت تشد فيها وتحاول تحضنها وهي تبكي معاها..
لين استسلمت اميمه وخشت حضن امها وقعدت تبكي بألم شديد..
وجدها يشوفلها وهو معصب ومقهور عليها..
يحبها ومايتحمل فيها شي وحالتها هادي قهراته هلبه..
مشي قعمز ع كرسي في دارها..وهو يشوفلها بصمت.
وامها تحضن فيها وتقول:خلاص بنتي خلاص خلاص يما..
وهي تبكي وعبراتها تتلاحق..
لين هدت بكي وقعدوا بس عيونها يدمعوا..
صفيه:هاه بنتي شني توا..
بعدت اميمه عن امها وقالت بصوت مخنوق:بنمشي للحمام..
وناضت بتمشي..
علي:بالشويه عليك بنتي بالشويه..
قعدت تمشي وهما يشبحولها..
وما إن وصلت لباب الدار..
الا وشافوها تهاوت ع الأرض وارتطمت بيها بقوة...
وجدها وامها قالوا بفجعه وصوت عالي..
"اميمه...بنتي!"
#كسروا_قلبي
#طوبى
...يتبع.....
