#طوبى "جنة طوبى"
#جمان_فريد
#الجزء_السابع_والسبعين "إفك مفترى"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الصلاة_الابراهيميه
أكمل وأجمل وأفضل وأشمل صيغة للصلاة على النبي ﷺ🤎
اللهم صلَّ على محمد وعلى آل محمد
كما صليت على إبراهيم وعلى آل إبراهيم
إنك حميد مجيد،
اللهم بارك على محمد وعلى آل محمد
كما باركت على إبراهيم وعلى آل إبراهيم
إنك حميد مجيد.
🤎صلوا عليه وسلّموا تسليما ﷺ🤎
اللَّهُمَّ صَلِّ وسَلِّمْ وَبَارِكْ عَلَى سَيِّدِنَا مُحَمَّدٍﷺ وَعَلَى آلِهِ وصَحْبِهِ وَسَلِّمْﷺ
#رزقنا_اللــــــــــه_واياكم
شفاعته ومرافقته في الجنة..{ﷺ} ❤️
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 تَجَاوَزْ أَثَرَ الفأس
أَنْبِِتْ من جديد! 💚🍃
__________________________________________
حس مولد كبير قالب الدنيا..
وهما في حوشهم متنعمين ببروده المكيف اللي خلا حيوط الصاله متاعهم مصقعه من قوته..
خديجه وامها اللي حاطين غداهم ع النار ولاهيين بالهدرزة..
🍃مغليه؛عمك ياحنه شار عليه بيها بعد ماولى لخوك الذهب المسروق وعارفه انتي عمك طه كان قال لبوك يحدف روحه في البحر يمشي يحدف روحه
خديجه بإنزعاج:ربي يهديه بوي مش عارف انهم شركيات ومعاش يدير فيهم حد!
مغليه؛اني همي توا في عيلة بوك اللي بيجوا يقعمزوا ع قلوبنا وخودلك ياقصقصه وتلقيح
خديجه؛طنشيهم وخلاص..
مغليه؛مانقدرش مانقدرش كلامهم يحرق الدم ساد اللي سمعهولي في العيد اني مانبيهمش يعرفوا مشكله خوك الجالي مانبيش نشمتهم فيا اكثر ماهما شامتين
تنهدت خديجه بضيق وقعدت ساكته..
🍃برا..
وصلت مطيرة في باب الحوش وقعدت تخبط عليه بقوة..
وفي من كان خاطم في الشارع شافها وقعد مركز عليها..
رجالة وصغار ونساوين..
ومحمود طلع من المطحن وهو يشوفلها بإستغراب..
انفتح باب الحوش..
واللي فتحه يزن ولد المهدي..
مطيره بحده؛جداك قاعده!.
هو هز راسه بإيجاب..بعدين تبعها بعيونه وهو مستغرب فيها كيف خشت طول وهي مندفعه..
وسكر الباب وقعد يشوفلها كيف واقفه دق في الباب الدخلاني بقوة..
🍃داخل..
خديجه بفجعه:هدا شني!؟
ومغليه تشوف لباب الصاله بخوف وهي تقول..
/من اللي نسي مفتاحه؟
شافت راما وهي فايته تجري بش تفتح الباب..
وصلت فيه وفتحاته..
وتخش مطيره هاده وهي تنادي..
/مغليه..انتي يامغليه!..
ناضوا وقفوا الزوز وهما يسمعوا فيها بصدمه..
خشت عليهم..
وقعدت تشوفلهم بنظرات كلها غضب..
وخديجه وامها يشوفلها بحده..
مطيره قدمت وهي تقول..
/باهي اللي لقيتك مع امك..
مغليه بتعالي وازدراء..
/ انتي كيف تخشي للحوش من اصله!؟
مطيره؛ماتشرفني السكنه قدامه لكن الله غالب!..
خديجه اشرت ع الباب وقالت..
/امشي اطلعي برا بروحك خير ماتطلعي بطياح القدر..
مطيره؛طياح القدر ليكم مش لينا..
مغليه بغضب؛قولي علاش جايه بسرعه وانتلفي..
مطيره؛التلفه ليكم ياالله ياربي..ياللي ماتخافوا ربي وصلت بيكم تتبلوا ع بنت خوي وتترصدولها في الرواشن وتصوروا ياشيطانات!..اشرت ع خديجه... والله ماتطلع الا منك انتي يالفعه!
انصدموا الزوز..
ومغليه قالت؛شن تفتفتي انتي صور شني!..
مطيره بحرقه:فوتيهم الطروح هادوا يامغليه مايمشوش عليا..تي يامراة اتقي الله حرام عليك راك حاجه بيت الله ماتعرفيش ان الطعن في الاعراض من الكباير!.فوق اللي درتوه فيها قعدتوا تشوهوا في سمعتها !!! ياويلكم من ربي ياويلكم...
"ظلم الوليه والعشم والنيه..تشوفه في الدنيا وعينك حية"
🍃الكلام اللي طلع من مطيرة لو تسمعه قلوب فيها شوية انسانيه وخوف من المنتقم الجبار..
كانوا صحابها استاقظوا لرواحهم ورجعوا عن ظلمهم وبسرعه صلحوا اللي فسدوه..
لكن..في قلوب لاتسمع ولاتفقه ولاتحس..مختوم عليها ومنتهي امرها...
الناس الظالمه اللي يمر عليها هالكلام مرور الكرام ومايحركش فيها شعره لازم تعرف انها قاعده تمشي بثبات نحو الهاويه وهي مش حاسه...
قاعده تستدرج "بضم التاء" شويه شويه لين فجأه وبدون سابق انذار طيح في هاويه سحيقه وتنتهي...
☘كل حد يراجع نفسه ويشوف لروحه لعل وعسى يكون مازال في امل☘
ومع خديجه ومغليه مافيش بصيص امل..
🍃خديجه بمكابرة وهجوم؛تبي تقلبي الطاوله وتركبينا الغلط جايه تقولي توقفوا في الرواشن وتصوروا ومش عارفه شني!
راهو الدوة اللي طالعه ع بنت الناس منكم فيكم اللي طلعها اللي داره ولد خوك لخوي مالاش الا تفسير واحد عيل صغير يقولهولك..
مغليه؛تحسابي روحك بتغطي الشمس بالغربال يامطيره!..
العركه اللي دارها ولد خوك مع ولدي بعد مالزه من حدا مرته وهي المصحه في ناس شهدوا عليها وقعدوا يقولوا بأي حق يلز راجل من حدا مرته!!؟
خديجه؛راك تنسي كلنا نعرفوا ان حسين زمان كان حاط عليها العين وفي من يحسابها محجورة ليه قبل يامطيره..الناس مش عميه يامطيره الناس تشوف وتفهم..
مغليه؛جايه تهجمي وتتبلي وتعطي في محاضرات عيلتك اولى بيها!..
مطيره وهي تمرر في نظرها عليهم وهي تسمع فيهم بإبتسامه قالت بعد ماكملوا كلامهم..
/والله..والله ماخطتكم الدوة اللي طلعت واني نعرفكم كويس تبوا تغطوا ع عفنكم وقلب الطاوله صنعتكم مش لينا..وحده تانيه غير بنت خوي بشعت بيكم عند القاصي والداني لكن بنتنا بنت ناس متربيه ع الخوف من ربي متربيه ع اصول ماتفضحش بالراجل اللي بيولي بو بنتها ولاطلعت عار جدودها..وهدا الفرق بين ولاد الاصل وبين اللي ماعنداش اصل
خديجه بصوت عالي:احترمي نفسك يامراة انتي راهو قاعده محترماتك لأنك في عمر امي ماطلعنيش عن طوري..
مطيره بسخريه؛اطلعي من طورك وتعاليلي ياماما تعاليلي..تعالي بش نحطك تحت رجلي تعالي..
خديجه قعدت تشوف لمطيره بغيظ وغضب..
مطيره:انتي بالذات كبدي عليك دم والصورة اللي صورتيها لبنت خوي نواجهوك بيها في المحاكم وتو تشوفي شن يصير فيك وفي ماليك..وتفكروا كويس يامغليه انتم اللي وصلتوها لهني..
ولفت ومشت بسرعه وطلعت من حداهم..
مغليه بصوت هامس..
/يعطيك مايرفعك يانجاه..
سمعت باب الحوش تسكر بقوة شافت لبنتها وقالت..
/الكلبه هادي عارفه روحها شن دايره هدا علاش طارت بصغارها لحوش اختها من الصبح..
قعدت تشوف لبنتها كيف ساكته وباين عليها تفكر..
مغليه:خديجه..
وجهت نظرها لأمها وقعدت تشوفلها شويه..
بعدين جتها وقفت قدامها وقالت..
/يام عطيني كف بكل قوتك..
انصدمت مغليه..
خديجه بنفاذ صبر؛هيا يام..
مغليه بصدمه؛خيرك شن جاك!..
خديجه شدت يد امها وقالت..
/اضربيني وماتسأليش اضربي..
مغليه قعدت جامده في مكانها مش قادره تتحمل ..
خديجه بعصبيه صاحت في وجهها وقالت..
/اضربيني..
فجعتها وخلتها تلقائيا تنفد امرها وضربتها كف من قوته خديجه قريب داخت..
مغليه بخوف شدتها وهي تقول..
/يانهاري الاحرف!
خديجه بلعت ريقها وشدت روحها وهي تقول..
/ماتخافيش يام مافيا شي..
وخرت عن امها وفكت شعرها شويه ونكشاته..
بعدين شقت فستانها من الصدر..
وامها تشوفلها وهي مصدومه لأبعد حد..
وزادت صدمتها لما شافتها تخبش في صدرها وذراعها..
مغليه بصدمه؛شن ديري انتي!
خديجه وهي تشوف لأمها قالت بطريقه مخيفه...
/نسبق البلي قبل مايصير يام هادي صنعة خديجه يام هادي صنعة خديجه معاكم..خودي تليفونك واتصلي بعزوزتي وقوليلها مطيره هجمت علينا وضربت خديجه..
مغليه فهمت على بنتها واخيرا هزت راسها ومشت تجري لتليفونها اللي كان ع الطاوله..
خداته بش تتصل بنجمه..
وخديجه مشت ارتمت ع الكرسي وقعدت تنادي بصوت عالي..
/راما...يابنتي..راما...تعالي..
🍃وراما في دار المعيشه اللي كانت تتفرج فيها ع مسلسل وبعد خشت مطيره ولت قعدت فيها تسمع في عراكهم وهي خايفه
لعند مانادتها امها..
مشت تجري وخشت للصاله
لما شافت حالته انفجعت وقالت..
/ماما!!!
وحناهامغليه تكلم في حناها نجمه وهي تقول برجفه حقيقيه من الخوف..
/هجمت زي الغوله يانجمه زي الغوله..خايفه خديجه ترمي يانجمه زوديلي!..
"ووك عليا ياوخيتي..اسمعي خل نكلم محي يجي يتصرف..
مغليه وهي مرعوبه؛كلميه وتعالي تربحي..
"باهي باهي جايه ومعاي عواطف ع اقل تشوفها بالك تقدر دير حاجه..ووك عليا كبدي ركابي فشلوا"
وسكرت عليها...
وهي تشوف لراما كيف طالعه تجري من الدار بش تجيب لأمها الميه..
"يام"
شافت مغليه لخديجه..
خديجه:خليك معاي يام اللي ندير فيه لصالحنا راهو..
هزت مغليه راسها وهي متوترة وتقول..
/عارفه..عارفه..
🍃وفي نفس الوقت..
في حوش لطفي الواعر..
طلعت طوبى من دار بوها بعد ماهدت واستجمعت قوتها..
بعد ماسكرت الباب..
سمعت اصوات عمتها واختها جايه من برا وهما يقولوا..
"عليك حق.راء"
"مايعرفوش ربي هادوا"
عقدت حواجبها بإستغراب وقدمت القدام..
شافتهم خاشين من الباب..
مطيره وهي شافتها قالت..
/ماعليكش فيهم بنتي كل من غلط فيك تو يشوف حسابه..
طوبى بتساؤل وقلق..
/عمتي وين كنتي!؟
فردوس قعدت تشوف لطوبى بضيق.
ومطيره قالت..
/كنت عند عيلة كلاب وريتهم يومهم..
غمضت طوبى عيونها بشده من الأسف..
مطيره وين شافت ردة فعلها قالت..
/ماتخافيش ماصار شي سمعتهم اللي لازم يسمعوه وطلعت ..
فتحت طوبى عيونها وقالت بنبرة عتب..
/الله يسامحك ياعمتي مفروض مامشيتيش..
مطيره بإنفعال..
/نعم نعم! تبيني نعرفهم واصلين في عرض بناويت خوي الله يرحمه ونسكت!
طوبى بضيق؛ماقلتش تسكتي ياعمتي لكن مفروض مامشتيش اني نعرفهم الناس هادم اني عشت فوسطهم ياعمتي نعرف كيف يفكروا وشن يديروا..
مطيره بنرفزة؛ياسركم خوف وتكبير رووس والله مايسووا حاجه والخوف الزايد متاعكم هو اللي كبر رووسهم..
طوبى بضيق:ياعمتي مش خوف هدا حذر الناس هادم مستعدين يديروا كل شي بش يخلوا الحق معاهم ويخلوا المواقف تجي في صالحهم...
فردوس بقلق:حتى اني فكرت هكي وماكنتش نبيك تمشي الحق..
مطيره وهي تحاول تبعد الخوف قالت..
/والله مايقدروا يديروا حاجه بعد هددتهم..
طوبى:بشني!
مطيره:بصورة اللي خدوهالك انتي وحسين كان نشكوا فيهم تشوفوا شن يصير..
طوبى بفجعه وانفعال؛لا لا مستحيل ندير حاجه زي هادي..تعرفي ياعمتي لو وصلت للمحاكم يقلبوها عليا بعدين ويطلعوا منها هما..اني وياكم متأكدين ان اللي خداها حد في هداكا الحوش لكن ماتنسيش في اكثر من تركينه ياخدوا منها صورة زي هادي..زي حوش الصيد لاصق لصوق في حوش شنيبه..ساهل يتنصلوا منها ياعمتي ويستخدموها ضدي..
فردوس؛صح عندها حق..
مطيره بشي من الخوف..
/خيركم تحسسوا فيا ان الناس هادي مايقدر عليهم حد!..
قدمتلها طوبى وهي تقول..
/ينقدر عليهم ياعمتي ينقدر لكن بالعقل لما تعاديك ناس ماتخافش ربي لازم الواحد يتصرف معاهم صح بالعقل..
مطيره بقهر:هما خلوا فيها عقل بعمايلهم السود!
طوبى بألم؛الله ياخد فيهم الحق..مش بس يبوا يقلبوا كل شي علينا..ويستفزوا فينا بش نديروا حاجه غلط تثبت كلامهم..
ع طلعة غرفه وهي شاده مكان العمليه وتقول بضيق..
/باهي شن الكلام اللي صار بينك وبينهم عمتي!..
مطيره بغيظ؛شيطانات رجيم هادي تعطي والتانيه تكمل عليها ولاتشوفي عليهم خوف ولايغلطوا حتى في كلمه..
ابتسمت طوبى بتهكم..
مطيره؛نكروا ان الدوة طالعه منهم ..
فردوس؛بينكروا بالك بيقولوا حني كلنا..
مطيره وهي تهز في راسها قالت بكره..
/هالشيطانه خديجه حاشا اسمها كله من تحت راسها هي اللي مصورتكم..
شافت غرفه لطوبى..
وطوبى شافت لفردوس اللي كانت تشوفلها والثلاته يفكروا لو عرفت مطيره قبل من تكون اللي خان الجالي طوبى معاها شن حتكون ردة فعلها...!
🍃وردة الفعل اللي هما خايفين منها خلوها خديجه وامها كأنها واقع صار..
عواطف؛هو مايبانش في اجهاض لكن كان يجي محي يرفعك للمصحه تطمني اكثر..
خديجه ودموعها ينزلوا؛اني مانفكر كان فيه هو ياروحي ياربي ع خاطره مايصير شي للعيل ياربي..
نجمه بحزن؛يارب..والله فرحته بيه فرحة واحد اول مرة يدير صغار..
مغليه بغضب؛والله كان صارت حاجه للعيل مطيره هادي لما نبيتها في الحبس..
عواطف؛لاقدر الله كان تسببتلك في مصيبة ياخديجه حملك في العمر هدا خطر والاجهاض يدير مضاعفات..
خديجه في خاطرها "تحسابيني عزوز زيك "
نجمه بأسف وضيق: والله الواحد ماعارف شن يقول..لاحول ولاقوة الا بالله لاحول ولاقوة إلا بالله..
ع خشة راما وهي تقول؛بابا جي ومعاه جدي محمد..
"خديجه"
مغليه؛خش يامحي خش...
خش محي الدين وباين عليه الخوف قال بلهفه..
/السلام عليكم..خديجه خيرك شن في!؟
خديجه وهي تشوفله قالت بتعب مصطنع؛ماترعشش روحك كويسه..
قعد مركز ع اللي صاير فيها قال..
/خيرك هكي انتي تقول مضروبه !؟
مغليه بقهر مصطنع:ااه ياولدي شن بنقولك هجمت علينا بنت علي الواعر وضربتها..
انصدم محي..
ومحمد قال من برا..
"كيف ضربتها!؟"
مغليه؛ايه يامحمد ايه..
"كيف خشت للحوش بكل هادي!'
مغليه؛خشت هجمت زي الغوله وماخلت ماحطت ولما ردت عليها خديجه قعدت تضرب فيها وين جيت بنحز ع بنتي دفتني دفه قريب جي راسي ع حافة الطاوله..
"كيف تفتحولها الباب كيف!"
مغليه؛وين نندري يامحمد شورهم الصغار فتحولها..
راما بخوف؛اني مانندريش عليها نحسابها واحد من خوالي ناسي مفتاحه..
محي الدين بضيق وقلق؛نوضي استري روحك خل نرفعك تعايني..
نجمه؛ايه هكي خير..
ناضت خديجه وهي تتصنع في التعب..
مغليه جت ساندتها وهي تقول..
/مفروض نشكوا فيهم ياحاج..
محي الدين:لاعمتي لانبي نخش مراكز ولاندخل جيراني..
مغليه؛تبينا نسكتوا عن حقها قريب قتلتها راهو..
محي الدين:نتفاهموا بيناتنا عمتي خشوش المراكز والفضايح مانبيشي.
"محي عنده حق يامغليه غير توا نطمنوا ع بنتك وبعدين يصير خير"
مغليه سكتت وهي معصبه..
وخديجه في نفسها قالت.."حتى هكي باهي"..بعدين شافت لبنتها وقالت؛بري جيبي عبايتي ووشاحي ع الشماعه..
راما؛حاضر..
ومشت طلعت من حداهم..
وبوها يشوف لأمها وكله خوف عليه الجنين..
🍃🍃🍃🍃🍃
في معمل الحلويات اللي تخدم فيه آلاء..
كانت لاهيه مع بنات المعمل اللي يتغدوا مع بعض وقت الراحه وهما يسمعوا في زميلتهم الشرقاويه تحكي عن..
:يهبل بكل..هو صح مش سمح واجد لكن انيق وحانط وكريم..وضحكت..
:مش مهم الشكل المهم روحه حلوة وبصايري يضحكك وماينكدش عليك ويقصر عمرك..
:وهو هك يابنات..والله مانمل من هدريزه تعرفن وانا نحكي معاكن عليه استاحشته..
آلاء:كان حستيه جدي معاك حافظي عليه ردي بالك ضيعيه من يدك..
؛مستحيل..ناعليا يابنات ننقاتي كبدت خلاص..
ضحكوا...
فجأة رن تليفونها..
طلعاته من جيب البالطو وشافت المتصل ضحكت وقالت..
/نجك ليا..هو يابنات..نستأذن ياسمحات..
ومشت من حداهم..
والاء تبع فيها بعيونها وهي مبتسمه..
بعدين رجعت تهدرز مع باقي البنات..
لين ولت زمليتهم وقالت وهي ترمش في عيونها...
/بنات تبن تشوفن السموح اللي نحكي معاه..
كلهم بحماس..
"ايه..وينه!"
هي اشرتلهم وقالت:عدن بحتن من القزاز هذكي.
ومشت بسرعه بتطلع..
وهما طول مشوا وقفوا ع الروشن اللي اشرت عليه..
شافوها وهي طالعه من غير بالطو وحاطه يدها فوق جبهتها عن الشمس..
وشويه وشافوا اللي تحكي عليه جاي ناحيتها..
وتبان ع وجه آلاء ملامح الصدمه لما شافاته..
شككت في نظرها..ماصدقتش عيونها..
قعدت دقق بالنظر اكثر ..ايه هو نفسه..طليق اختها..
نضال...
تسمع في البنات كيف يعلقوا عليه ويمدحوا فيه لما خداها ووقفها في الظل..
بعدين عطاها حاجه..ويضحك ويهدرز وجوه مافيش احلى منه هكي يبان...
آلاء وقتها قلبها وجعها ع اختها..
وفي نفس الوقت كرهت نضال هلبه...
معاش تحملت وخرت ع الروشن ومشت ولت لمكانها ودموعها في عيونها..
🍃واريج في المركز..
تغير توقيت دوامها بعد تمت القرايه..
كان مشغوله بخدمتها مع منيه لعند ماطلعت اخر حاله..
☘منيه؛عطشانه وجعانه هيا نمشوا للكافتيريا..
اريج :شويه خل نعاود نغسل ايديا ونعقهم..
ضحكت منيه وقالت؛سابقاتك..
ومشت طلعت..
ووراها اريج للحمام..
غسلت ايديها زين وعقمتهم...بعدين مشت بطريقها للكافتيريا..
وهي ماشيه جي في طريقها شخص وين تشوفه ترتبك هلبه..
هو لما جت قدامه قال..
/مساء الخير..الدكتورة موجوده؟
اريج؛اسأل الاستعلامات..
هو ابتسم وقال:سألتهم وقالوا موجوده لكن لما شفتك طالعه قلت نتأكد..
اريج؛ايه توا واخد راحه برا وتعالى بعد ساعه..
ومشت وخلاته...
هو تبعها بعيونه وحواجبه مرفوعات بعدين ابتسم..
ومشي لصالة الانتظار متاع المركز..
🍃🍃🍃🍃🍃
"ديري العمله بعدين خافي"
نجاة بنرفزة:مش ناقصانك فرخه صابرين خليك في عرسك..
صابرين بتهكم؛عرسي! اللي يسمعك يصدق..
نجاة شافتلها شويه بعدين قالت..
/بنديرولك حفله مش طالعه هكي..
صابرين؛حفله في خيمه في جنان حوش اختك مانقدرش نعزم عليها حد اصلا مانبي حد يشوفه..
نجاة:انتي اخترتيه بروحك صابرين..
صابرين بضيق:هو جي احسن منه واني قلت لا!؟ بعدين نبي نطلع من حوش اختك قيدت الراجل وتقيدت..
نجاة سكتت وهي تشوفلها بتعاطف..
وصابرين قعدت تضم في بتاتها في الشناطي والدموع محبوسات في عيونها..
🍃🍃🍃🍃🍃
وفي اللي دموعها ينزلوا منها زي السيل ندما ع غلطه مش عارفه كيف ارتكبتها..
اميمه..
شكل طوبى ونظراتها ليها قاعد بين عيونها...
اميمه وهديكا فهالحاله تفكرت كيف بدت علاقة الصداقه بيناتهم..
تفكرت مواقف طوبى معاها من لما كانت صغيره..
طوبى كانت اول من دعمها معنويا ووقف جنبها وساندها لما محطمه ومهزوزة وقلبها مجروح..
وتوا طوبى هي المحطمه والمهزوزه وقلبها مكسور ومتوقعه منها تكون ليها سند من بعد الله...
وبدل ماتنسدها..اوقعتها ارضا والوقعه كانت مدويه...
🍃تليفونها جنبها يرن ولاكأنها تسمع فيه...
غامه راسها بالمخده وتبكي بقهر وحسرة...
اما امها كانت راقده حد المروحه في دارها وهي رابطه راسها وتبكي بصمت وحسرة ع حال صغارها...
🍃🍃🍃🍃
"شن في يوسف تبي تفقد الامل فهالوقت الحساس!؟"
يوسف بحزن:جهينه راهو ليها توا 5شهور في غيبوبه مافيش اشارة مافي شي يدل ع انها ممكن يصير منها وتفيق..
د.جهينه:يوسف لو نحكيلك ع الحالات اللي مرت علينا ماتصدقش في ناس انفقد منهم الامل بكل الدكاترة قالوا معاش في منهم امل لكن اهلهم قعدوا متمسكين بالأمل لاخر لحظه وفعلا والله فاقوا فاقوا بعد اكثر من سنة في غيبوبه..
يوسف؛هادي حالات نادرة ياجهينه..
جهينه؛وعلاش ماتكونش سدرة وحده منهم؟
يوسف؛قصدك بنقعدوا نراجو اكثر من سنه!
هي قالت؛مليت !؟.
يوسف بانفعال وحزن:شن تقولي انتي! اختي هادي اللي داخل التوأم متاعي مش متحمل نشوفها هكي ياجهينه..
جهينه بتحفيز؛خلاص قوي ايمانك بربي وخلي عندك امل خليك مصر ع انها حتفيق عن قريب كمل اللي كنت دير فيه وماتوقفش هدرز عليها احكيلها حاجات حلوة خليها تتخيل مواقف حلوة حتى لو ماصارتش قبل..اقرا قرآن لو مالقيتش شن تحكيلها اقرا قرآن..وخليها على الله ماتعرفش بشن يفاجئك وامتى..
تشجع يوسف من كلام الطبيبه اللي تخدم في المركز اللي قاعده فيه سدرة..
جهينه تعرف عليها غادي وصدفه تلاقى وياها وعرف انها ليبيه وحكالها قصة اخته تعاطفت معاها هلبه وفوق هكي بنت بلادها..
قعدت تزور فيها يوميا وايام سفر يوسف كانت
تقعد عندها لفترات طويله....
🍃🍃🍃🍃🍃
قبل العصر بلحظات..
طلعوا علي الواعر وولده عبد المطلب من الحوش تلاقوا مع التارقي ومشوا مع بعض للجامع..
وفي الجامع..
كانوا اهل الشارع منقسمين بين ..
اللي خلا علاقته سطحيه بعيلة الواعر...
ولين اللي قعد محايد يتعامل مع الطرفين زي قبل وماتغير ع حد فيهم..
ومن الصيد..بس بعد اللي صار اليوم لكنته خدي موقف لاحظه عبد المطلب بس تجاهل وماباش يحسس بوه بشي..
اما التارقي ماسمع شي من الدوة اللي طالعه ع طوبى بس كان حاس ان في شي من تعامل الناس مع عيت الواعر..
🍃صلوا صلاتهم...
ومشوا طلعوا من الجامع..
وهما طالعين..
شدوهم الصيد وولده محي الدين...
🍃🍃🍃🍃🍃
"ولي بعد تلاته اسابيع"
اسكندر هز راسه وقال بإبتسامه؛ان شاء الله...غير في حاجه بنقولك عليها دكتوره عندي اختي تبي دير تشيك ع سنونها نجيبهالك تشوفيها..
هي بإبتسامه قالت؛مرحبتين بيها..
هو ابتسم وقال:بارك الله فيك..شاف لأريج وقال..تعرفيها انتي
اريج وهي تحاول تكون جاده:ايه ابله سميره..
اسكندر بإبتسامه؛شاده بتجي الايام الجايه..
منيه:جيبها في اي وقت ايام الدوام طبعا..وضحكت..
هو ضحك وقال..
/اني نقصد حوشهم..
منيه ابتسمت بإحراج وقالت؛اها ..
اريج شدت ضحكتها..
هو شافها ابتسم وقال..
/مافيش مرحبتين بيها بأي وقت حتى انتي!.
حمحمت اريج وقالت؛ اكيدالحوش حوشها .
هو تنهد بإبتسامه بعدين قال:مشكوره..شاف لمنيه وقال..
مشكورة دكتورة..السلام عليكم..
ومشي طلع وهما ردوا عليه السلام..
منيه؛تعرفي روجه يشبحلك في شبحات واحد ذايب فيك مايندريش بيك متزوجه ولاشنو!؟
اريج بإبتسامة الم قالت..
/لايندري بيا اطلقت..
استغربت منيه وماصدقتش...
اريج بضحكه؛والله اطلقت مانبصرش...
منيه بإستياء وحزن..
/اسفه والله ماكنت نعرف..الحق لاحظت الدبله متاعك ليها فترة مختفيه لكن والله ماجي في بالي انكم انفصلتوا..ربي يعوضك خير..
اريج وهي شاده دموعها بقوة قالت..
/تسلمي يارب..
منيه؛بس بنسألك مش هو نفس سلف طوبى!؟
اريج؛ايه..
منيه؛هي حتى طوبى اختفت مرة وحده ومعاش جت للفيلا متاعها بكل نشوف في راجلها قاعد مع واحد هكي قنين وشخصيته حلوة مرة شفته لابس لبس كابتن الطايرة طيار يعني..
قاطعتها اريج وقالت..
/خوه حتى هو..
هي بدهشه؛الله! في اختلاف بيناتهم راجل طوبى نقشه زي الهنود لكن هدا شكله زي الاجانب فيه رفعة خشمهم..وابتسمت..
اريج؛ايه هو هكي حق مغرور ومتعجرف هلبه..
منيه بضحكه؛صراحه يطلع عليه..
سكتت اريج ومابتش تعلق ولاتكمل الحديث عنهم غيرت الموضوع وقالت..
/خلاص شكله معاش في حاله بعده..
منيه في نفسها.."متفهني حتى اني نشكر خوت طليقها قدامها"...
/ ايه صح خلاص اصلا تم وقتنا اليوم خدمنا ساعات اضافيه ع خاطر التخفيضات..سادنا خل نروحوا نرتاحوا..
اريج هزت راسها ومشت طلعت للحجره اللي بتبدل فيها ملابسها..
بعد ماطلعت..
منيه بحزن؛خسارة كانوا حلوين مع بعض..بس زعمه خالتها شن قصتها مع راجلها حتى هي!؟..فوتي الحشريه يامنيه مايجيش من وراها خير بكل..
وناضت وقعدت توتي في روحها للمرواح...
🍃🍃🍃🍃🍃
"والله سكتنا ع اللي صار ع خاطر العشرة وحق الجيره ياحاج علي"
محي الدين:حاج علي اي موضوع او مشاكل صايرة بينكم خلوا النساوين يطلعوا منها خلوها بين الرجاله..
الصيد:مزبوط بيزيدوا يكبروها يعقدوها ومعاش تلقالها حل بعدين..
علي هز راسه وهو شاد راس عكازة بشده وقال..
/صح..صح..امسحوه فب وجهي اللي صار وان شاء الله مايتكررش بكل..
الصيد:مدام الموضوع وصلك معناها خلاص معا يتكرر..المهم سامحنا كان ريت منا عيب ولاسمعت كلمة وجعاتك...
علي:لاعداكم العيب..بارك الله فيكم...
وولده واقف حداهم وهو ملتزم الصمت..
🍃وعبد القيوم اللي سبقهم لشارع القهوة كان مقعمز في مقهى نضال ويفكر في اللي يبوه محي وبوه من الحاج علي...
~~~~~~~~~
علي بغضب؛مش جايبه من برا السي حسين..
مطيره بارتباك وحزن؛والله يابوي بالله مامسيتها حتى المس هما حدهم كلمتين قلتهم وروحت..
خبط بعكازة ع الارض وقال بصوت عالي..
/وعلاش تمشي..
هي انتفضت من الفجعه..
🍃وبنات خوها اللي واقفات ورا الباب زادوا خافوا ووجعتهم عمتهم..
علي بغضب:انتي توا عطيتهم حق وركبتينا حق فوق الحق اللي راكبنا قدام الناس في جرة هدا المتخلف ولد خوك..تعرفوا المصيبه وين..اللي درتوه كله بيجي ع راس هديكا المسكينه هي صاحبه حق وخليتوها بأفعالكم محقوقه قدام الناس..
🍃فردوس وغرفه قعدوا يشوفوا لطوبى بحزن..
وهي تسمع في كلام جدها وع وجهها ملامح الضيق والحزن..
مطيره بنبرة باكيه وقهر:كيف يعني يابوي كيف راهم وصلوا في العرض كيف تبوا الواحد يسكت عنهم..شي يبغدد راهو..وخنقتها العبرة..
هو قال بصرامه يخفي فيها الوجع المعنوي اللي يحس بيه :معاش ليكم بيه علاقه الموضوع هدا مانبيش وحده فيكم تخش فيه دوة زايده لا مانبيش يطلع منكم شي ويقولوا بنات الواعر قالوا وحطوا..
هي هزت راسها بإيجاب وقعدت تمسح في دموعها..
علي لف ومشي طلع من المربوعه..
وهي مشت بتطلع منها من الجهة التانيه
وين طلعت لاقت بنات خوها قدامها..
قالت بألم لطوبى:والله يابنتي ماقاصده نضرك..
طوبى قلبها وجعها ع عمتها ضمتها وقالت..
/عارفاتك والله عارفه..ماتبكيش بالله عليك..
لكن مطيره في هديكا اللحظه كانت حاسه روحها ضعيفه هلبه لأنها ماقدرت دير شي لبنت خوها اللي مقطع قلبها فراقه..
انهارت بالبكي وهي ضم فيها..
وطوبى تمسح ع ظهرها ودموعها ينزلوا..
وخواتها حداهم يشوفلهم ويبكوا معاهم..
🍃🍃🍃🍃🍃
"هو هكي خلاص بيفسخ ولما يفسخ وين ينسأل ع السبب يقولوا ع خاطر طوبى..هكي ياديجا لو جت وقالت قدام الناس اي شي مافى حد يصدقها وكلهم بيفهموها انها تردلكم فيها"
خديجه بسخريه وهي تقلد في طريقة كلامها..
/وكان داروها ورفعوا عليك قضية تشهير ياحلوة!
ضحكت وقالت.
"خليها ديرها وتثبت انها غبيه كان تبي تشهر بروحها حق خليها ديرها"
خديجه:اسمعي جاي اخر مرة ديري حاجه في الموضوع هدا من وراي يانجاه..
"اوكي اوكي..خلاص اخر مرة..المهم توا راكم معزومين ع حفلة صابرينا حتى عزوزتك وحماتك راهو.."
خديجه؛ حماتي!!تبيها تمشي تحضر عرس طليقة طليقها..
قعدت تضحك نجاة..
خديجه بضحكه؛تعرفي كبدي عليها دم نبي نقهرها بأي طريقه تو نعطيك رقم عمتي وخلي اختك الكبيره تعزمها باهي..
"من عيوني يانور عيوني"
خديجه بإزدراء؛مثقل دمك..
ونجاة تضحك بإستفزاز...
🍃🍃🍃🍃🍃🍃
وفي كوجينة شقة المهدي..
كان مع ولاده يتعشوا في دلاع وخبزة وهما يهدرزوا..
يزن؛الحق يابوي خشت هاده وباين عليها طايرتلها..
المهدي قعد ياكل وهو يهز في راسه..
ومحمدولده يسمع بصمت وهو ياكل..
شويه المهدي قال..
/في بالي نسافروا اسبوعين شهر شن رايكم؟
يزن:ياريت نبي نطلع من الجو اللي عايشين فيه معاش قادر نتحمل..
محمد المهدي:حتى اني..
المهدي:خلاص اليومين الجايات نحجز ونتم الاجراءات ونسافروا طول..
🍃وفي حوش اخته نسرين اللي رفضت تقعد في حوش اماليها وقعد يجيها نضال يبات عندها..
نسرين؛اختك اشبح شن قالت للمراة وطلعتها عن طورها..
نضال بإنزعاج؛بكل انتي جايه في صفهم تقول عقاب واليك!؟
نسرين؛اني جايه مع الحق وانت عارف كويس الحق مع مني غير قاعد موجوع من اريج..
نضال بعصبيه:معاش تجيبيلي سيرتها..اسمها معاش نبي نسمعه..
نسرين بإمتعاض:باهي براحتك..
وناضت طلعت من المربوعه...
وخلاته بروحه يعاني في آلام جروحه...
🍃🍃🍃🍃🍃
والاء من بعد ماروحت من عملها وهي مطفية ومضايقه ع خاطر اختها سمعت منها ان نضال ولى زي قبل لكن ماصدقتش لين شافت بعينها..
حست روحها لازم تقوللها..
بس ليش لازم هو شني نضال بالنسبه ليها!؟ ولى راجل غريب ماتربطهاش بيه اي علاقه ماعندها علاش تقوللها وتزيد عليها وجع قلبها..لهذا اختارت تسكت..
🍃"وعلاش ماقلتيش يافايزة!؟"
فايزة بضيق:شن تبيني نقول! اني مريت بحاجه زي هادي ونعرف قداش صعبه ولاانتم ولاهي ناقصين هم..
فردوس؛وهانا عرفنا يافايزة..
فايزة بحزن؛باهي وينها هي!؟
فردوس:من بكري وهي مقعمزه في الجنان وتقرا في قرآن..
فايزة؛وعمتي مطيره!..
بضيق قالت؛راقده في دار المعيشه من بعد النقاش اللي صار بينها وبين بوي..وبحقد كملت تقول..اما خديجه هادي مش عارفه بشن معجونه هالمخلوقه..
فايزة بإزدراء:هدا هي من يوم يومها ابليسه ماتنقدر وماسلم منها حد..بس زعمه هي اللي صورت طوبى وحسين ولاالخبيثه التانيه!؟
فردوس؛لاا الوسخه نجاة هي اللي دارتها واضح شاده الروشن وتراقب في الحوش..
فايزة بكره:حقيره..
فردوس:ونسرين شن تقول؟
فايزة؛لا والله ليا عليها هلبه وهي معاش اتصلت بكل..
فردوس:كلميها وشوفيها شن تقول...
فايزة هزت راسها وقالت؛تو نشوفها..
بعدين ناضت وهي تقول..
/خل نمشي نروح هداكا هو..
فردوس ناضت معاها وقالت؛وكان جبتي البنات وتعشيتوا معانا..
فايزة؛غدوة ان شاء الله نجوا تتغدوا..هي تصبحوا ع خير..
فردوس؛قدامك كل خير..
وطلعت معاها تسقد فيها...
🍃🍃🍃🍃🍃
مقعمزه قريبه ع شباك دارها فارده عليه الستار وهي تشوف جهة فيلا جيرانهم..
كل ليله كانت تستنى طلته من الشباك ليها 4ليالي وماطلش..
في كل مرة تسمع فيها صوت فتح الشباك تتلهف ووين تشوف تلقى خوه اللي فتحه مش هو...
🍃منيه وهي تغني..
بستناك، وبتمنى أعيش العمر كلو حبيبي معاك...
مش ناسياك، وفي بعادك ليالي حلمت اني بعيش وياك..
وينفتح الشباك..
تسكت وتشوفله من ورا الستار بلهفه..
وهالمرة يطلع هو...
لما شافاته تلقائيا ارتسمت الابتسامه ع وجهها..
وقلبها زادت دقاته...
حط ايديه ع حافة الشباك وقعد يتفرج....
وهي تراقب فيه بفرحه ولهفه وانبهار من اعجابها الشديد بيه...
وفي عز انسجامها..
ينفتح باب دارها التفتت وهي مفجوعه..
لقت مرت خوها خاشه وتسكر في الباب..
هي بهمس؛خلعتيني.
قدمتلها وهي تقول بنفس الصوت..
/شكله جي واخيرا..
هزت راسها وهي مبتسمه..
وصلت فيها وهي تقول..
/ترا نشوف..
وقعدت تشوف فيه...
ضربتها منيه ع يدها بخفه...
وخرت وقعمزت ع الطاوله وهي تقول..
/عطيه دعوة شخصيه..
منيه:يجنن ولا..
رفعت حواجبها وقالت؛هلبه..
تنهدت منيه وقالت؛مش عارفه كيف ندير بش نلفت انتباهه هو شايف روحه هلبه واني مانبيش نبان خفيفه قدامه.
:ديري جو حركات..شن رايك ديري محابس غرس في الروشن تتسبلي بيهم..
منيه وهي تشوفله وتفكر..
/هي فكرة قديمه صح بس تأدي الغرض..
:خير من الافكار الجديده متاع توا..دوري ايميله وتخشيله خاص تكلميه..
منيه بدت ع وجهها ملامح القرف..
وينفتح الباب مرة تانيه..
الزوز شبحوله بفجعه..
وتخش مرت خوها التانيه وهي شاده القطوسه متاعها..
سكرت الباب وقالت..
/شن ديرين!..
الزوز حطوا سبابتهم ع فامهم وهما يسكتوا فيها..
هي بهمس قالت؛جي!
هزت منيه راسها وهي مبتسمه..
قدمت بسرعه وقعدت تشوف..
ومنيه تندب..
شدتها سلفتها من ذراعها وجبدتها..
:المنجوه يهبل عطيه نقطه..
منيه تنهدت..
:سلامة قلبك ياحماتي ..تلحلحي ياحنه وياسرك خياب وديري حاجه..
منيه؛شن تبيني نمشي نخطبه!..
سلفتها قالت؛اقترحت عليها دير محابس غرس في الروشن..
:مقدم جدك عطيها افكار كريتف تمشي مع الوقت هدا..
:نورينا ياكريتف!
رفعت حاجبها وهي تشوف للروشن وتفكر.
بعدين ابتسمت بمكر وحدفت القطوسه للشباك..
شهقت سلفتها..
وهي قالت بفجعه؛وووه ياماما..
ولحقت ع قطوستها اللي قاعده تتعارك مع الستار..
فكتها منه وهي تحول في الستار بدون ماتركز ..
بعدين ضمت قطوستها وهي تقول..
/ياقلبي ياقلبي بعيد السو عليك ياروحي..
وهي منسجمه مع القطوسه حست بالنسمه بارده تضرب فيها..
رفعت عيونها..جو عليه لقاته واقفه يتفرج عليها وهو عاقد حواجبه بإبتسامه..
هي وجهها ولى الوان وحست روحها بتفقد الوعي..
يدوب ابتسمت بعدين سكرت الشباك بعشوائيه والستار حصل فيه..
التفتت ع نساوين خوتها لقتهم يضحكوا بدموعهم وهما يكتموا في الضحكه..
عصبت منهم وقعدت دور ع حاجه تضربهم بيها ومالقتش غير مشط الشعر ع الزيانه..
خداته وجتهم بيه..
هما لما شافوها طلعوا يجروا من الدار..
وهي طلعت تجري وراهم وتقول بوعيد..
/والله ماكم مروحينها قبل لتنضربوا..
🍃🍃🍃🍃🍃
"سمعت ببوك شن ناوي يدير"
التفت عمر وشاف خوه وهو خاش بمق النسكافيه وقاله..
/ايه سمعت شور عمك..
وخر الجالي الكرسي وقعمز وهو يقول..
/هالتخلف هدا مانحساب في حد مازال يدير فيه..
عمر؛علاش ماحسبتنيش معاك..
الجالي فتح اللاب توب وهو يقول..
/الكوجينه لوطا انزل ودير لروحك..
عمر شبحله بإمتعاض ومشي طلع من الدار..
حط الجالي مق النسكافيه ع طاوله المكتب.
وقعد يستعمل في اللاب توب..
حط ع الملفات..جو عيونه ع ملف مسميه..
"اليونان"
بدت ع وجهه ملامح الضيق..
فتحه..وطلعوا صور وفيديوهات سفرتهم لليونان..
حط ع اول صورة...
كانت ليه وهو طوبى..واخدها سيلفي...
وتمر قدامه تفاصيل هالذكرى..
《طوبى بإبتسامه انبهار؛محلاه المنظر من هني الله يبارك
وقعد تصور فيه بتليفونها..
هو قعد يتأمل فيها كيف تصور..بعدين قام الكاميرا متاعه وخدالها صوره..
ضحكت..
هو قال بإبتسامه؛تعالي ناخدوا سيلفي من هني..تعالي جنبي تعالي..
جاته وهي تضحك ضمها بذراعها وقال..
زليز...
قعدت تضحك...وهو خدي الصورة..بعدين باس راسها》
غمض عيونه وتنهد بحسرة بعدين فتحهم وهو يتأمل في الصورة والدموع في عيونه..
غير عيونه عنها لفيديو..حط عليه وفتحه...
كانوا راكبين مع بعض قارب كبير في البحر وطوبى تصور..
《طوبى:سبحان المبدع..
الجالي:تتمني ترسميه صح!
طوبى بضحكه؛خديتها من لساني..
ابتسم وقال؛خلاص نولوا غدوة وترسميه براحتك.
حطت عليه الكاميرا وقالت...
/والله!
ضحك وقال:والله العظيم..مانخلي شي يقعد في خاطرك..
طوبى:تهبل عندك علم》
بعدين وقف الفيديو..وتفكر انها جاته وضماته من فرحتها...
فرك جبهته برووس اصابعه ودموعه نزلوا...
ع جية عمر..
شاف حالته...وخر وطلع وضاق صدره ع خاطره..
ولى نزل مرة تانيه وقعد في الصالون وخلا خوه يعيش حزنه بروحه...
🍃🍃🍃🍃
وتمر ساعات الليل الأولى..
وكالعاده يسكن الحوش..وتقعد هي مع روحها في الصاله تحت الروشن اللي كان مدخل ضي القمر..
بصمت تبكي وقلبها مقهور...
ماتوقعتش يجي يوم وتعيش هالابتلاء..
يتشكك في اخلاقها..وينطعن في عرضها..وتتهم بالخيانه...
والمصيبه الأكبر ان اقرب الناس اللي تعرفها زي ماتعرف نفسها ليها شكت فيها وصدقت..
كيف الناس التانيه!؟
قعدت تتخيل في اللي يحكوا فيه الناس..
وقلبها ينعصر عصر من الألم..
حطت يدها ع صدرها اللي حست بشي تجمع فيه وكتم ع نفسها لما تخيلت لو كان بوها قاعد حي وحضر اللي صار..
بنبرة ألم قالت..
/رحمك ربي يابابا رحمك ربي وخداك قبل هاليوم....
ااه ياربي..اني مقهوره هلبه مدمرة ياربي اللي صار اليوم واللي عرفته دمر ماقعد فيا ياربي..كيف بندير ياربي..الناس تسمعه اللي تصدقه ياربي واني عايشه وسط الناس كيف بنقدر نكمل حياتي معاهم وهما يشوفوا فيا...
غمضت عيونها بشده وشدت رقبة فستانها بقوة وهي تكتم في بكاها...
بعدين قالت...ياربي..انت شايف وعارف يارب انت شايف وعارف...
ومعاش تتكلم..قعدت تبكي وبس واستمرت تذرف في الدموع..
لين دموعها جفوا...قعدت ساكته وهي سرحانه...
وماقطعش سرحانها غير حركة الانسة جنة...
ارتسمت ع وجهها التعيس ملامح ابتسامه..
حطت يدها ع بطنها وقعدت تمسح عليها وهي تقول بصوتها المبحوح..
/عمري...بنوتي..اسفه ياماما اللي مخلياتك تعيشي معاي الهم قبل لتجي..مش مني يابنتي غصب عني..والله ماكنت نبي هكي ولاتمنيت يصير فيا هكي..ماتخيلتش ياماما نعيش هدا كله..تعرفي جنونتي..مانبيكش تطلعي..نبيك تقعدي داخل مانبيكش تتعبي معاي ياماما..رشفت ودموعها رجعوا نزلوا وهي تقول..لكن نقولك حاجه بنتي..ربي معانا يابنتي مايخليناش..اصلا اني حاسه انه خلاك تتحركي بش تواسيني بش يفكرني ان في حاجات حلوة في حياتي المرة هادي وانتي اولهم...نقولك حاجه..ضحكت وهي تمسح في انفها بعدين قالت..خلاص غيرت رأيي نبيك تطلعي بسرعه بش نحلي حياة امك المرة وتهوني عليها...ااي ياماما بالشويه شورك ماصدقتي..
وقعدت تضحك بدون صوت وهي تمسح ع بطنها..بعدين رفعت عيونها فوق وابتسمت بإمتنان من وسط دموعها..
ممتنه للرحيم اللي طبطب عليها وهون من حزنها...
🍃 يارب وأنت الكبير في عليائك وانا الهباءة في كونك
كن انت الصاحب في سفر الحياة🍃
