#طوبى "جنة طوبى"
#جمان_فريد
#الجزء_الحادي_والستين"رسايل_انتقام☆☆☆"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
"عواطف بالله عليك تكلمي ماتقعديش ساكته"
عواطف ودموعها في عيونها:علاش ماقلتيش من الاول؟
نجاح ودموعها ينزلوا:وعلاش نقولك اني اصلا رافضه الموضوع ومسكراته..
عواطف:علاش..خايفتيني نزعل؟
سكتت نجاح وهو تشوفلها بحزن..
عواطف:بالعكس والله كنت نفرحلك!..
نجاح؛عارفاتك عارفه..بس ياعواطف صعبه هلبه..
عواطف مسحت دمعتها قبل لتنزل وقالت؛لاصعبه ولاشي..القصه فاتت عليها سنين ونسيتها بكل..
نجاح؛ماتكذبيش وتكابري..
عواطف هزت راسها وقالت؛ايه نكذب ونكابر لكن يانجاح تو نتعود ويمشي الحال..
نجاح؛عواطف ماتقوليش كلام انتي مش قده..
ضربتها ع رجلها وقالت؛اني ياحماره نبي وحده فينا تتزوج وحده فينا تسكر فام الناس وتقلع عيونهم..كلهم يقولوا بنات نجمه باروا في حوش ماليهم ..كلهم وين يشوفونا يديروا في رواحهم ساخفين علينا وواجعينهم ويقولوا ياناري ع نجمه بناتها قعدولها في الرقبه..مسكينات سعدهم بالهون..
نزلت نجاح راسها ودموعها ينزلوا..
عواطف وهي شاده دموعها؛وافقي يانجاح وافقي الراجل بايت عليه يبيك وشاريك بجديات حرام ضيعيه من ايدك..وافقي بالك تفتحيلي طريق ونلحقك..
قامت نجاح عيونها في عواطف..
ضحكت وضربتها ع ركبتها وقالت:وافقي ياهبله خلي وحده فينا تلبس فيلو..
ضحكت من بين دموعها وقالت؛فيلو شني!! بعد ماشاب..
عواطف؛بعد عينك..قاعدات في عز شبابنا ومايطلع الفيلو كان علينا وانتي بالذات تو تشوفي كيف يطلع عليك..
ابتسمت نجاح بعدين اختفت ابتسامتها وقالت؛عواطف..من جدك انتي!؟
ضربتها ع ركبتها تاني وقالت؛مالا من كذبي..! وبعدين اللي قالاته امي صح راهو..لو كنت مكانك فرصه زي هادي مانضيعهاش..
نجاح:متأكده!
عواطف بنفاد صبر:تي خلاص عاد درهتيلي كبدي قتلك والله فرحانه ومتأمله نلحقك..
قربتلها نجاح وضمتها وهي تقول؛يارب ياعواطف يارب..
لفت عواطف ايديها حوالين اختها وقالت وهي كاتمه دموعها وبكاها...
يارب...
🍃🍃🍃🍃🍃🍃
وفي الحوش اللي جنبهم..
في دار نبيله اللي قاعده فيها غرفه..
خش رؤوف للسرير وغرفه تشبحله وهي تقول؛يوم السبت عندي موعد راهو..
شبحلها وهو رافع حاجبه اليسار وقال:مش قلتيلي بكري!؟
غرفه بإبتسامه؛نفكر فيك شن فيها..
هو قال؛بعد غدوة السبت تفكري فيا توا؟
غرفه؛لالا حنفكرك من هني ليوم السبت..
عبد الرؤوف؛شن في من ورا هالبراده عقاب الليل؟
ضحكت وقالت؛حركات وجهك يهبلوا لمانتبرد عليك في القطعه دير فيها بحواجبك ضحك فيا..
شبحلها شويه وقال؛هدا من اعراض الوحم..
هي قالت بضحكه؛ايه..نبيه يطلع نسختك بش نحبك مرتين..
دار بيده حركه فم ينفتح ويتسكر..
بمعنى "ماعندك كان الدوة"
غرفه؛عينك..والله نحبك وهلبه غير انت مرات تنرفز فيا..
عبد الرؤوف اشر ع روحه وهو رافع حواجبه..
هي غمضت عيونها وهزت راسها بآيجاب..
نزل يده وحواجبه وقال؛ارقدي ارقدي..نوم الظالم عباده..
ورقد وعطاها بظهره..
هي قالت؛صح هدا علاش رقدت طول..
التفت وشبحلها بحده..
هي ضحكت ورقدت وعطاته بالظهر..
تنهد ورجع عطاها بالظهر وهو يقول..
الصبر...وشدد ع الراء..
وهي قالت..رررررر...
هو عقد حواجبه وشد ضحكته وهو يقول؛ارقدي خيرلك..
غرفه قعدت تضحك وغمضت عيونها ..
سكتوا هما الزوز...
وكل واحد فيهم يحساب التاني رقد..
شويه هي قالت؛روفا..
هو؛هممم..
هي بإبتسامه قالت؛نحبك..
هو ابتسم وقال؛باهي ارقدي..
ضحكت..وتنهدت من قلبها..
وهو فتح عيونه وقعد مبتسم ابتسامه طالعه من القلب..
🍃🍃🍃🍃
وفي من فات عليه الليل بطوله وهو يذرف في الدموع..
آلاء..
اللي قلبها قاعد يتعذب بنار حبيب فرطت فيه تفريط..
حبيب وشريك صعب يتعوض..
اللي يرضى بيك بعيوبك اللي يحب عيوبك زي مايحبك..
هدا وين تلقى زيه...!؟
والاء اللي عرفت معنى الحب مع مهند حست ليلتها انها حتكمل عمرها وهي متحسفه عليه..
🍃وهي تبكي ع حبها الضايع..
في من ساهر ليله وهو يفكر فيها..
مختلي بنفسه في براح المزرعه الواسع..وضي القمر اللي مازال ماكملش محاوطه من كل جانب...
شافها مرة وحده بس وقلبت كيانه قلب..
خلاته غير يسهى شويه ويقعد مع روحه يفكر فيها..
وفي الليل النوم جفي وهرب..والعيون ساهره تتخيل في طيفها...
شويه رفعهم وشاف للقمر...وابتسم..
ولسان حاله يقوله...
🍃 "يا أيها القَمَرُ المُنِيرُ السّاحِرُ
الأمْلَحُ العَالي الرّفِيعُ البَاهرُ
