#طوبى "جنة طوبى"
#جمان_فريد
#الجزء_السبعون"فوق الطاوله3"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الحوقله
وقال ابن القيم عن الحوقلة : ” تحمل بها الأثقال ، وتقتحم بها الأهوال ويدخل بها على من تخافه ”
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃اللي ظلمك ربنا يمده بتأخير الحقوق فيحس انه على حق🍃
_________________________________________
مقعمزة مقابلتها وهي تشوفلها كيف حاطه رجل ع رجل وقاعده بالحذاء متاعها ماحولتاش..
قالت بحده متهكمه؛نسيتي ترمي كندرتك!
خديجه بإبتسامه ساخره:لا مانسيتش..
نجاة رفعت حاجبها وهي تشوفلها بحده قالت:ارميها لوسمحتي..
خديجه بسخريه؛علاش!؟ ماتبيش البساطات اللي تصلوا عليهم يدنسوا؟
نجاه قعدت تشوفلها بإمتعاض..
خديجه:خلينا توا في المهم اللي جايه ع خاطره وفوتي الدوة الفاضيه..
نجاه برفعه حاجب قالت تهكما..
/شن هو المهم اللي بيني وبينك؟
خديجه بجديه:توا نبيك تقوليلي شن اللي خلا الجالي يطلقك؟
نجاه:اسأليه..
خديجه بنظرة حاده مخيفه؛نجاه..تكلمي..
نزلت نجاه حاجبها وقالت:اللي صار صار من فتره خوك جاني لمكان عملي وخداني من غادي بالغصب ورفعني للفيلا متاعه..بإبتسامه مستفزة كملت تقول..وطبعا غادي صار بينا اللي يصير بين الراجل ومرته..بس فجأه..اتصلت اللعبه هديكا وقالت جايه في الطريق..
عقدت خديجه حواجبها..
ونجاة متابعه تقول:وخوك عاد ولى زي الخروف اللي المن.حور من الخوف طلعني وهو يكر فيا كران وحطني قدام العماره ومن بعد هالموقف الحقير اني طلبت الطلاق وهو طلق طول...
خديجه؛طوبى عرفت اللي بينكم هداكا اليوم وطبعا هدا اللي كنتي تبيه حضرتك من المشيه للفيلا..
نجاة؛قتلك خوك هو اللي جي وخداني..
خديجه هزت راسها وهي تقول بتهكم..
/ ع اللي مايعرفكش..خليني من القرف متاعك..اني توا نبي نعرف طوبى كيف عرفت اللي بينكم؟
نجاه؛من بعد هداكا اليوم قاعد جوها مليح هي وياه هدايا واشعار غزل يعني ماعرفت شي وقتها وخوك ضحك عليها بكلمتين..
خديجه؛كيف عرفتي!؟ ضايفتيها انتي؟
نجاه:امم قبل ضفنا بعض ع الفيس..
بدت ع وجه خديجه ابتسامه قهر وهي تقول..
/غبيه..انتي وحده غبيه للمليون..كانت قاصده هكي دير بش تحرقك وطلعك عن طورك وتخليك ديري عمله تجي ع راسك انتي وياه
سكتت نجاه وهي تفكر في كلام خديجه..
خديجه وهي تفكر بذهول:واني نقول شن هالحب اللي نزل! مادارتهاش قبل ونزلت شن يجيبلها ولافي مرة ريتها متغزله فيه ع الفيس مش حركاتها اصلا..طلعت مش ساهله بكل..
ورجعت نظرها لنجاه لقتها سرحانه وتبان مصدومه
رفعت حاجبها وقالت..
/شن درتي!؟
شبحتلها نجاه بريبه..
خديجه :درتي حركه غبيه ولا؟
نجاه حركت راسها بالنفي وقالت..
/لا..لكن حرقتيلي دمي باللي قلتيه..
خديجه ابتسمت تهكما وقالت..
/مازال ياما بتنحرقي لو صار وطلعت اللي بينك وبين الجالي قالت في من يعرف باللي بينكم وهو اللي فتحلها عيونها..
نجاه طول جي في بالها مختار..
خديجه ركزت عليها وقالت؛تعرفي مني!؟
نجاه حركت راسها بالنفي وقالت..
/لا..
خديجه:لو في شي تعرفيه قوليه خليني نعرف نتصرف ونمسح البلي اللي درتوه..
نجاه؛لو نعرف نقول علاش بندرق يعني اكيد مانبيش ننفضح في جرة خوك..
خديجه:فاضحه روحك بروحك..لو كان فدماغك ذرة عقل مافكرتيش تاخديه بالسر..
نجاه قعدت تشوفلها بإمتعاض وهي ساكته..
حكت فوق شفها العلوي بعدين قالت..
/المهم توا..لو صار وطلعت القصه لازم نخلوها تطلع كذابه وتفتري عليكم
نجاه ركزت معاها..
خديجه؛بعد الانكار طبعا في حاجه وحده لازم ديريها انتي وياه بش تبعدوا الشبهه عليكم بكل..
نجاه:حاجة شني؟
خديجه شبحتلها شويه بعدين قالت..
/بوي مش عارفه شن جاه فجأة وخلاها زنت في باله يدخلك العيله مرة تانيه..
نجاه بإستغراب؛مافهمتش..
خديجه؛بوي يبي المهدي يردك..
اللي سمعاته نجاه خلاها تبدا تضحك شويه شويه لين هسترت ضحك ودموعها نزلوا..
وخديجه تشوفلها بإمتعاض وازدراء..
هدت نجاة ومسحت دموعها وهي تقول..
/ووه عليا ياربي..قريب هرب عليا النفس..
خديجه؛ياريته..
نجاه بضحكه؛جديات مش قادره ياربي جنابي..
خديجه بإزدراء:شن اللي يضحك فيك هكي ياتافهه!
نجاه حمحمت وهي طلع في ضحكات صغيره منها بعدين ركزت بنظرها ع خديجه وقالت بإبتسامه مستفزة..
/تخيلت ناخد المهدي..والله بعدين نفلق عيلتكم ع 16 ونخليك انتي وخوك الجالي تلهدوا في الشوارع...
خديجه قعدت تشوفلها من فوق لتحت بإزدراء..
نجاه بضحكه:خلاص خلينا في الجد..اكيد انتي مش جايه تقنعيني نوافق عليه ولا..
خديجه؛حتى في احلامك مانديرهاش..اساسا انتي ماتبيش من يقنعك تاخديه لوفيها كيف راك عارضه روحك عليه قداش ليك..
نجاه تجاهلت كلامها وقالت بإبتسامه مستفزة؛مالاشن تبي؟
خديجه:نبيك تخلي العيله تعرف ان ماعندكش مانع يردك المهدي بالذات بوي..
نجاة:طبعا ماتجيش ناخد خو طليقي ولاانتم لو كنتوا تعرفوا ان في بينا شي ترضوا الحاجه هادي..
خديجه بتهمكم؛زعميته هكي كلا انتي ديري اكبر..
نجاة:وباه..اني شن بنستفيد؟
رفعت خديجه حاجبها وقالت..
/كيف شن بتسفيدي؟!
نجاه؛شوفي اني وياك نعرفوا ان اللي تبيني نديره ينفعكم انتم اكثر ماينفعني اني لهدا نبي نستفيد من اللي بيصير اكثر من هكي..
خديجه؛شن تبي!؟
نجاة بإبتسامه مستفزة؛اكيد مش حنقولك خلينا نولوا صحاب..لكن الاحترام يكون متبادل تصرفاتك الزفته معاي كلامك المسموم معاش نبي نسمعه..
خديجه بتهكم:ماتبنيش تقيمك فوق ظهري ونقعد نمشي بيك؟
نجاة؛ندوي جديات ياخديجه ع الاقل قدام ماليك..
خديجه قعدت تشبحله شويه وهي تفكر بعدين هزت راسها وقالت..
/ok..مش مشكله مادام نقدر نحصل فيك ع انفراد..
ابتسمت نجاه بإزدراء وهي تشوفلها وقالت..
/اممم..
خديجه شبحتلها من فوق لتحت بعدين غيرت عيونها عنها ومررتها ع الشقه وقالت..
/متفاهمين..ورجعت نظرها ليها..
نجاه وهي مبتسمه بإستفزاز قالت
/متفاهمين ديجا..
ناضت خديجه وقفت ومشت وهي تقول..
/اي جديد يصير معاك في الموضوع هدا بلغيني بيه طول..
نجاة ناضت وراها وهي تشوف بإزدراء لكعبها كيف يخط ع الارض وتقول..
/تمام..
وصلت خديجه في الباب فتحاته وطلعت..
ونجاه سكرت وراها الباب بعدين قالت..
/صحة ليها الفرخه هديكا اللي خلاتك تخافي..
🍃🍃🍃🍃🍃
جامعة طرابلس قاطع_ب
كلية اللغات..
كانت آلاء مقعمزه بروحها تراجي اخر محاضره وهي تاكل ..
حاطه السماعات في وذانها وتسمع في الاغاني وتمرر في نظرها قدامها ع الماشي والجاي..
فجأه..وقفت عليه صديقة اكابر المقربه اللي كانت صديقتها حتى هي يوم من الأيام..
كلمتها اكثر من مرة ماسمعتهاش لين ضربت ع كتفها بخفه بش انتبهت لوجودها..
حطت يدها تحت وشاحها وجبدت السماعات وهي تقول..
/شن تبي!؟
:جيت نهدرز عليك ونعرف اخر اخبارك..
الاء بتهكم؛اكابر غايبه اليوم شكلها!
قعمزت جنبها وهي تقول..
/No..عندها موعد..
ابتسمت آلاء بسخريه..
:قالتلي عليك حاجات استغربتهم هلبه؟
الاء بملل؛شن قالت تاني؟
:قالت صارت عركه ع خاطرك الخميس اللي فات في******
بدت ع وجه آلاء ملامح الضيق وقعدت ساكته..
:العركه بين مهند وواحد اسمه عزيز***** جاك قبل هني..في بينكم شي انتم؟
الاء شبحتلها بطرف عينها وقالت..
/هادي اللي تبوا تعرفوها انتم..اطمنوا مافي بينا شي..
:غريبه!..يعني يساعد فيك هكي لله في الله!؟
الاء بإستغراب؛يساعد فيا!؟
:كيف قصدك مش عارفه ان هو ورا الخدمه اللي بينك وبين مطعم ******!؟
سكت الاء وهي متفاجئه هلبه..
من البدايه حاسه ان شغلها مع مطعم الفندق فيه وراه حد وقعدت شاكه في خالها مختار رغم نفيه..بس توا وضحت الصورة قدامها..
وفهمت ان مهند كان عارف شي وهدا كان سبب انفعاله الشديد معاها يومها..
اللي استنتجاته آلاء وقتها ان هدف عزيز من هدا كله يتهي اي امل قعد في رجعتهم هي ومهند لبعض وفي نفس الوقت يستجدي حبها ويخلي قلبها يميله..
:ألو..للوشه وين سافرتي..
استاقضت من سرحانها وناضت وهي معصبه لمت فطورها وحاجاتها ومشت خلت البنت بروحها وهي مستغربه ردة فعلها..
🍃آلاء وهي ماشيه كانت معصبه ع الاخر..
قامت تليفونها ودورت ع رقم خالها واتصلت بيه..
لقت رقمه مقفل...
بإستياء قالت؛شكله مسافر..
وقعدت تمشي بإتجاه القاعات وهي تفكر في التصرف الصحيح اللي لازم ديره كرد فعل ع اللي عرفاته..
🍃رد فعل..
رد فعل نضال اللي خيب امل اريج فيه وخلاها عايشه في حالة صدمه..
تتفكر في كلامه تتفكر كيف كان يقول فيه وكأنه مش نضال اللي تعرفه..
خلاها تخاف منه هلبه وتتأكد ان القرار اللي خداته كان صائب ميه في الميه..
بس القلب مايفهمش في الحاجات هادي..
القلب كان حب بقوة وبصدق ماتقنعاش حسابات العقل..
يقعد يبرر في افعال المحبوب ويبررله ويزيد في عذاب في صاحبه..
☘خشت بسيارتها لحوش جدها وهي تبكي بصمت..
وقبل لتنزل منها اتصلت بالدكتوره منيه اللي تخدم عندها وخدت منها إذن حتى اليوم وهي تفهمت ان عندها ظرف قوي يمنعها حتى لو ماعرفتاش وواقفت ع طلب الاجازة..
🍃🍃🍃🍃
نزلت من السيارة ومشت خشت للحوش وطول توجهت للدار وسكرت عليها الباب بالمفتاح وانهارت بالبكي.
امها شافتها لما خشت لحقتها طول وقعدت دق في الباب وهي تقول بحزن وقلق..
/اريج..اريج بنتي افتحي الباب..افتحي خليني نخشلك..
ع طلعة طوبى من الحمام كانت تتوضا للظهر..
سمعت الدوشه ومشت بإتجاه فردوس وهي تقول..
/سكراته بالمفتاح؟
فردوس بقلق:ايه سلم وخيتي شوفيها..
وقفت طوبى ورا الباب وقعدت دق وهي تقول بهدوء..
/اريج افتحي الباب..
"خلوني ياطوبى بالله عليكم خلوني"
فردوس:باهي فهمينا شن صار ع الاقل!..
ماسمعوش منها غير صوت بكاها..
طوبى بضيق ودموعها في عيونها..
/خليها يافردوس براحتها تو تهدا وتجي بروحها تحكي..
تنهدت فردوس بألم وقالت..
/حسبي الله ونعم الوكيل..ومشت للكوجينه..
وطوبى وهي تسمع في صوت بكي اريج كان قلبها يتقطع عليها..
مشت بإتجاه دار المعيشه ودموعها ينزلوا..
خشت ع غرفه اللي كانت مضايقه ع الاخر وقالت..
/هي هكي في الاول..تتوجع شويه ومع الوقت تنسى..
طوبى:هدا راجلها ياغرفه الخلاص منه مش ساهل بتتسمى مطلقه بعدين..
غرفه:نفس الشي بيصير معاك..
ردت عليها تقول..
/مطلقه قبل لتتزوج..
غرفه:كله واحد..
طوبى بألم؛الطلاق كسر للمراة ياغرفه بالذات لو كانت تحب راجلها..
غرفه؛تنكسر مرة ولا تنكسر ألف مرة بعدين..
هزت طوبى راسها وهي تفكر في كلام غرفه وقالت..
/صح تنكسر مرة ولاتنكسر الف مرة...
🍃🍃🍃🍃
الساعه 2:30بعد الظهر..
في الكوجينه وحده تغسل في الماعين وهي تحكي والتانيه مقعمزة حداها تسمعلها..
نجاة:هي عطتني فرصه واني بنستغلها..
صابرين بضيق:اني نبيك تطلعي من هالعيله مش تزيدي تخشي فيها..
نجاه سكرت الميه وقالت..
/كبير العيله مايبنيش نطلع منها..
صابرين بإستغراب..
/ماسألتيش روحك علاش توا خطرله يردك؟
نجاه؛سألت ولقيت اجابه قبل ماكانش في عنده حد من ولاده مناسب اللي متزوج واللي عزابي بس توا خلاص..
صابرين: نجاه خيرك نسيتي! شيبانيك كان رافض فكرة الرده بكل..
نجاة وهي تفكر..
/بالك توا شاف وضع ولده وقال نزوجه بش يتريح عليه..
صابرين:يقدر ياخدله اي وحده..
نجاه؛اكيد بش شاف ان اني اولى..
صابرين سكتت شويه وهي تفكر بعدين حركت راسها بالنفي وهي تقول..
/لالا مش هكي في حاجه تانيه..
نجاه؛زي شني؟
صابرين؛حاسه ان في حد موصله شي عنك.
سكتت نجاه وهي تفكر في كلامها بعدين قالت..
/مافيش الا عزوز النحس لطفيه..
صابرين اشرت عليها وهي تقول؛ايوه عليك نور..
بدت ملامح الغضب ع وجه نجاة وهي تقول..
/عطيها مايزرفها هالشي..طانه..
صابرين:يللا مش مشكله جت لصالحك..
التفتت نجاه للحوش وفتحت الميه وولت تغسل في الماعين وهي معصبه..
وصابرين تشوفلها وهي تفكر...
🍃🍃🍃🍃🍃
"يعطيك الصحه شيف بمعنى الكلمه"
ربيع وهو يلاعب في يحيى:صحتين حبيبتي..
ورفعت نسرين السفره وهي تشوفله كيف يلاعب في يحيى وهي مبتسمه بحب..
خشت بيها للكوجينه وبدت تغسل في الماعين..
شوية سمعت ربيع يغني..
"كويست بنبينو بنبينو كويستا سي"
قعدت تضحك..
شويه رن تليفونها بنغمة رساله ماسنجر..
شبحتلها وقالت..
/اكيد خديجه..
مسحت ايديها في المريله ومشت حولاته من الشحن...
وشافت الرساله..
بدت ع وجهها ملامح المفاجأة وعيونها تعبوا دموع..
فتحت الرساله طول..
(شن جو امي)
بدت تكتب وهي ملهوفه لخبطت اكثر من مرة لين كتبتها صح وبعتتها..
(تو تفكرت ان عندك ام!؟)
قعد يكتب..
وهي تمسح في دموعها اللي قعدوا ينزلوا وترشف..
جتها منه رساله..
(عندك حق تزعلي وتلومي سامحيني بالله عليك)
ردت عليه..
(شن حالك انت وخواتك)
(تمام امي ماشي الحال حقه مبروك)
(شن فكرك بيا توا؟)
(قداش ليا نفكر فيك ومستاحشك نبي نروح الحياة هني مش عاجبتني بكل)
(ماهو كنت تبيها العيشه برا)
(ونادم ونبي نروح)
(شن داير معاكم بوك؟)
(مانشوفوش فيه)
(توقعت والله توقعته ملوحكم ومايندريش عليكم)
(فوتي..المهم اني كلمتك بش نباركلك ونسألك ع خوي مع مني قعد)
(معاي الراجل اللي خديته قالي ماناخدكش من غيره)
(ريحتيني..باهي امي باي توا نكلمك مرة تانيه)
(باي)
ونزلت تليفونها وحطت يدها ع فمها وقعدت تبكي بكتمان..
خش عليها ربيع وفي يده "لهاية" يحيى بش يغسلها وهو يقول..
/نحاول نرقده لين تجيه..وشافها كيف تبكي..
بخوف مشالها وهو يقول؛نسرين خيرك..
نسرين شبحتله وهي حاطه يدها ع فمها ونظراته كلها ألم وفجأه ارتمت في حضنه وقعدت تبكي..
حط ايديه عليها وقعد يطبطب ع ظهرها وهو يشوفلها بقلق..
🍃🍃🍃🍃🍃
"لالا مش في القهوة"
مغليه بقلق:ياحليلي الولد وينه..
يزن؛مرات قاعد في الجامعه..
مغليه:اليوم يروح من الجامعه بكري ياوليدي..
سدرة بقلق؛بالك عند واحد من صحابه..
هي قالت:يقولي يابنتي مايخلنيش هكي..
شويه سمعوا باب الحوش تسكر..
مغليه قالت بصوت عالي..
/نضال..
"عمر"
مغليه:تعالى ياعمر تعالى..
شويه وخش عليهم عمر وهو يقول..
/السلام عليكم..
مغليه؛وعليكم السلام..ماكلمكش نضال؟
عمر:لاكلمني وقالي مش مروح الحوش اليوم..
مغليه بإستغراب:وين ماشي!؟
عمر؛ماشي لواحد يعرفه بعد طرابلس بش يعزيه..
مغليه؛تعرفه صاحبه هدا؟
عمر:ضروري نعرفه!؟ بعدين يام نضال مش عيل..
مغليه تنهدت بضيق وقالت..
/ليه يومين جوه مش عاجبني شكله صايرة معاه حاجه..
عمر:عادي يام تصير المشاكل مش ديما يقعد جوه رايق..
هزت راسها وقالت..
/نحطلك تتغدا..
عمر:ياريت جعان بنطيح اني بنمشي للمربوعه لما يوتى ابعتيه مع يزن..
مغليه؛باهي..
ومشي عمر طلع من الصاله..
ناضت مغليه وهي تقول..
/يارب..
سدرة؛نعاونك حنينه
مغليه وهي ماشيه؛تعالي بنتي تعالي..
ناضت سدره لحقت حناها..
ويزن رجع يشوف لكتاباته ولهي بقرايته...
🍃🍃🍃🍃🍃
الساعه 6:00مساءا..
درست بسيارتها قدام مكتب لمحاميه مشهوره..
نزلت منها ومشت خشت للمكتب..
بعد ماعطت للسكرتيره اسمها دخلتها ع المحاميه..
وهي استقبلتها بإبتسامه جاده..
/اهلا وسهلا خديجه..
خديجه بإبتسامه؛اهلا بيك..
تصافحوا بعدين خلتها تقعمز وهي قعمزت مقابلتها قالت..
/شن تبي نضيفوك قهوة..شاهي..عصير..
خديجه؛ميه بس لوسمحتي..
:تمام..
وبعتت المحاميه مه السكرتيره تجيب ميه بعد ماجابتها وشربت منها خديجه قالت..
/نخش في المهم طول استاذه..
:نسمع فيك..
خديجه؛اني جايه ناخد استشارة..
:بخصوص...
🍃🍃🍃🍃🍃
"صراحة اللي سمعته صدمني هلبه"
غرفه بحزن؛ تخيلي عاشت هدا كله في 5شهور زواج بس ..
نبيله؛مروا بيا حالات هلبه حالات زي هادي..بس هالمرة انصدمت لأني نعرف طوبى كويس ماتستاهلش اللي صار فيها بكل..
غرفه بنبرة حزن..
/قدر الله وماشاء فعل نصيبها..
هزت نبيله راسها وهي مضايقه ع الاخر..
غرفه؛اني نبي نسألك عن حالتها قصدي..لو مثلا هو سكر راسه ومايبيش يطلق ومالقتش قدامها غير انها ترفع عليها دعوة طلاق شن يكون موقفها؟
نبيله؛ع حسب الدعوة اللي تبي ترفعها..طلاق ضرر..او استحالة عشره..
~~~~~~~
خديجه؛يعني لازم تثبت الضرر بش تطلق وتاخد حقوقها كامله..
:ايه..
خديجه؛امم..باهي الخيانه الزوجيه تعتبر ضرر؟
؛اكيد..في حال قدرت تثبت ان زوجها عنده علاقه غير شرعيه تطلق وتاخد حقوقها لكن لوماقدرتش تسقط كل حقوقها بما فيهم الحضانه لو عندها صغار..
خديجه؛اها..باهي لو كان متزوج قبلها وماخبرهاش؟
؛هدا مايعتبرش ضرر لأنه متزوج شرعا وقانونا مايتحاسبش ولاهي من حقها تحاسبه..
خديجه؛ولو قالت انها اكتشفت بعدين ان زوجها مريض نفسي..
؛ زي ماقتلك لازم يكون في اثبات قوي اما مجرد الادعاء يخليها خاسره وماتكسب شي..
~~~~~~~
نبيله:لازم يكون في شهود ياغرفه..
غرفه:يعني الفيديوهات مايديروا شي..
نبيله؛للأسف القضاء الليبي ماياخدش بالحاجات هادي ..اخته نسرين بش قدرت تثبت علي طليقها الخيانه حضرت معاها شهود في المحكمه شافوا كل شي بعينهم واللي قوا شهادتهم اكثر انهم كانوا من اقارب الزوج..
غرفه بإحباط؛معناها موقف طوبى صعب هلبه..
نبيله:للأسف..لهدا لو فكرت ترفع قضيه طلاق ننصحها بإستحاله العشرة..
غرفه؛يعني تتنازل عن كل حقوقها مقابل حريتها..
هزت نبيله راسها بأسف..
غرفه؛القهرة بعينها..القانون هدا مدايرينه بش يخلي الرجاله يطغوا..
بدت ع وجه نبيله ملامح الاسف وقعدت ساكته...
ع خشة فردوس بسفرة الضيافه..
/هي تفضلي نبيله..
نبيله:علاش تعبي في روحك..
فردوس؛تعبك راحه..
وحطت السفره بينها وبين غرفه وقعمزت وهي تقول..
/حكتلك غرفه؟
نبيله بأسف:وجعتني هلبه وفوقهاحامل منه..
فردوس بقلق:هادي اكثر حاجه شاغلتني..
غرفه ودموعها في عيونها..
/قاعده صغيره ع الهم قاعده صغيره..حسبي الله ونعم الوكيل فيهم
فردوس نزلوا دموعها...
نبيله بضيق؛ لو نحكيلكم ع اللي مر عليا وع اللي عاشوه بنات في عمر طوبى واصغر تقولوا معاش في ناس تخاف ربي ولاعاد في رجاله يسووا..
فردوس رشفت وقعد تدعي من وسط قلبها بألم:الله لايسامحهم الله ينتقم منهم شر انتقام..
غرفه؛يارب..باهي نبيله بنسألك عن وضع اريج..
نبيله ضيقت عيونها بألم؛نسيتها بكل..
فردوس بحزن؛هي طلبت الطلاق منه اليوم وهو بيدير دواير خوه وبيسكر راسه..
نبيله؛مافيش كلام نزيده ع اللي قلته بكري لغرفه وان شاء الله يصير الطلاق بالتراضي وبعيد المحاكم..
فردوس؛اكبر غلطه درتها اني وافقت ع قرايه الفاتحه..
غرفه:مجازفه بالذات لما تكون المده طويله..
فردوس بقهر:اااه..ياربي رحمتك بينا فرجها علينا ياربي..
نبيله شافت لغرفه بحزن وهي تفكر تقوللها عن موعد محاكمه عبد الرؤوف اللي حيكون يوم 10 مايو..وفي الاخير قررت انها ماتخبرهاش وتزيدها على مابيها...
🍃🍃🍃🍃🍃
"نكون معاك صريح استاذ محجوب موقف نسيبك ضعيف جدا في القضيه"
المحجوب؛متوقع الشي هدا واضح من البدايه
المحامي؛بسبب احترامي للأستاذه نبيله وقفت معاها ولا ماكنتش خديت قضية خاسره زي هادي ضر سمعتي المهنيه..
المحجوب:تقدر تنهي الوكاله ماعندكش مشكله حقك
؛مادام خديتها مش حنخليها وحنحاول جهدي فيها..
المحجوب؛الحكم اللي حياخده يخليه سنين في الحبس..
:مع الاسف..بس تعرف القضيه كلها ع بعضها تبان مؤامرة واضحه وفي ناس من فوق خاشه فيها..
المحجوب قعد ساكت وهو يفكر في شخص واحد جي في باله..
🍃🍃🍃🍃🍃
الساعه 10:36 ليلا..
في جنان حوش علي الواعر..
كان مقعمز فيه هو وولاده ونسمة ليالي الصيف تهب عليهم وهما يهدرزوا..
لطفي:عاد اليوم هيجت في ترهونه..
عبد المطلب:هياجة..شني..ماشي نشوف..الرزق
علي:هادي الهياجه متاعك انت
ضحك لطفي..
عبد المطلب؛لكن والله..حسين طلع..فالح السعي في احسن حال وزاد عليه
لطفي؛ولادك الزوز فالحين المحجوب قال في الشركه اللي يخدم فيها يوسف يشكروا فيه هلبه
هز عبد المطلب راسه وهو ساكت..
علي:ربي يفتحها عليهم كلهم زي هما زي اختهم زي صغار عمهم..
لطفي:آمين..بنقولك عبد المطلب اني والحاج ماشيين عمرة ان شاء الله يوم عشرة رمضان ماتبيش تغير رايك وتلحقنا..
عبد المطلب:نفكر في..الموضوع..
علي:مافيش خيرلك من العمرة في الشهر المبارك..
هز راسه وقال:يصير خير..يصير خير..
ولطفي يشوفله بإبتسامة يأس..
☘البخل مرض لاشفاء منه☘
🍃🍃🍃🍃🍃
"زي ماتوقعنا بالزبط"
طوبى ببغض؛وقاحه وصحة وجه وقوة عين ماريتش زيهم وتوا شوفي كيف مسكتين..
اميمه؛هداكا ماروحش؟
طوبى بإزدراء:لا..لما يسافر ويروح لازم ينزل جو متاع مسافر لكذا ومروح من كذا ولتوا مانزلش انه مروح..
اميمه بتفكير:معناها هادي تراجي فيه يروح...
طوبى:حتى اني فكرت فيها...
قطع حديثهم الاتصال اللي جي لطوبى..
رفعت تليفونها ولما شافت المتصل قالت..
/عبير..ان شاء الله خير!
فتحت الخط وردت..
/السلام عليكم عبوره ..
"وعليكم السلام ياحنه شن هدا ياحنه شن هدا"
طوبى بإستغراب..
/شني اللي شن هدا!؟
"نحكي ع المنشور اللي يهبل اللي راجلك دايرلك فيه تاق ع الفيس."
طوبى وهي متفاجئه؛توا؟
"قصدك ماتندريش عليه"
طوبى:لالا..
اميمه قعدت تشوفلها بإستغراب..
"مالا افتحي توا شوفي واقري ياحليلي"
طوبى:باهي بنسكر سلام..
"سلام"..
نزلت طوبى التليفون وخشت ع الفيس وهي تقول..
/قالت هداكا منزل منشور توا دايرلي بيه تاق..
اميمه:منشور شني!؟
ويقابل طوبى لمنشور..
كانت فيه صورة للجالي وهو واقف ع مجسم مشروعه..
وكاتب فوقها..
(يقال ان وراء كل رجل عظيم امرأة..
وامرأتي كانت امامي وخلفي...
كنت ادور حولها كما تدور الكواكب حول الشمس ولازلت..
هي اول من آمن بي..وآمن بهذا المشروع وتنبأت له بالنجاح
وحقق الله لها ماتوقعت..
احبك..واهديك نجاحي الجديد وقد اعتبرته الوحيد لأنك اول من تفائل به..
وطوبى لمن كانت هديته من السماء طوبى)
طوبى وهي تشوف للصورة..
/هذا تصميم الملعب وراهولي زمان وماكانش عاجبه..
اميمه؛شفتي الكلام اللي كاتبه..
طوبى:قطاف عارفاته شن يبي من وراه..
اميمه:ترا خشى شوفي التعليقات..
خشت طوبى ع التعليقات لقتهم من اصدقائه واصدقائها هي وكلهم مباركات ليه ودعوات ليهم هما الزوز...
اميمه؛نسرين معلقه ربي يخليكم لبعض..
طوبى:المهدي علقله خير متاع الدنيا الزوجه الصالحه ادام الله الموده والرحمه وحسن العشره بينكم ومن نجاح لنجاح..
اميمه:المهدي بعيد ع هالمعمعه هادي كلها زي بوه..
طوبى:عقرب الريح علقت..
اقري اقري بالله اقري..
اميمه..
/ الحوش الي مليـان صقـوره
ان شاء الله مانبكيش ف صوره
معاهـم مانشعـر بالخـوف
الي مشيتهـم هـز كتـوف
طوبى:يامرارتي وخلاص..
اميمه؛شوفي الملصقات اللي نزلتهم..
ضحكت طوبى وهي تقول..
/شر البلية مايضحك..
اميمه ضيقت عيونها وقالت..
/من ام العيله هادي؟
طوبى تقرا:ربي يعليكم وينصركم ع من يعاديكم وليداتي..مغليه ياحنه..
اميمه بضحكه:ماناقصها الا الفيس..
خشت طوبى ع صورة البروفايل وقالت:شوفي صورة البروفايل متاعها..
اميمه؛ام العيله نجيها عمار الحوش اللي بيها..عطيك شن بيقول فمي بس..
طوبى:قعد محمد شنيبه يدير ايميل حتى هو ويسمي روحه بو العيله ويحط صورة بروفايل مكتوب فيها...
نحنا عيله وهدا بونا..
قعدت تضحك اميمه بعدين قالت..
/تو كان داروا قروب شن يسموه..
طوبى:عيلة ثمانيه نجوم..
ضحكت اميمه وقالت؛ولاعيلة دردنو..
قعدوا يضحكوا هما الزوز لين حطوا رووسهم ع بعض..
اميمه بضحكه:وواك ياربي شر البليه مايضحك حق..
وطوبى بعد هدت ضحك قالت..
/هم يضحك وهم يبكي..
🍃ومنهم لخديجه اللي بعد ماعلقت ع المنشور خشتله خاص وبعتت..
(جالي في اقرب فرصه روح )
شاف رسالتهاوبدي يكتب بعدين بعتلها..
(علاش شن في)
(في مصيبه بتنزل ع راسك )
(شن تقولي انتي)
(عارفني شن نقصد كويس روح في اقرب فرصه يالجالي بنت الواعر مش ناويه ع خير)
اتصل بيها ماسنجر..
هي سكرت الصوت بسرعه وقالت بهمس..
/كان نقدر نكلمك راني اتصلت بيه..
فصل وهي بدت تكتب..
(مانقدرش نرد عليك)
(تمام تمام.. اساسا اني مروح غدوة العشيه)
(كويس بكل)
(باهي قولي شن قالتلك شن صار بينكم)
(غدوة تعرف كل شي اني بنسكر توا)
وطلعت من الماسنجر وسكرت النت وحطت تليفونها جنبها..
بعدين تمددت ع السرير ودارت روحها راقده هربا من اسئلة محي الدين الفضوليه..
🍃🍃🍃🍃🍃
تاني يوم...
الثلاثاء..8مايو سنة 2018
الساعه 3:30بعد لظهر..
في محل الذهب اللي يملكه المهدي شنيبه في طرابلس.
كان كل شي ماشي على مايرام..
ومحمد مع الراجل المشرف ع المحل يخدموا في خدمتهم بشكل روتيني زي كل يوم..
☘:تفضل استاذي..
خدي الزبون الحاجه اللي شراها ومشي طلع من المحل..
وجه نظره لمحمد وقال:بنمشي نجيب غدي ونجي هنيني محمد..
محمد:كون هاني..
مشي الراجل طلع بإتجاه مطعم للوجبات السريعه..
وهو ماشي في امان الله تعترض طريقه سياره ينزلوا منها زوز ملتمين ياخدوه ويحطوه في السيارة ومافلحش في محاولة مقاومتهم...
🍃وفي محل الذهب..
يخشوا زوز ملتمين يسكروا المحل ..
واحد منهم يجي لمحمد طول..
:سامحنا حجي..
محمد:تي هيا..
سقد روحك..
ويخبطه من الخلف خبطه تخلي محمد يفقد وعيه..
وبعدين يبدوا هو وصاحبه بسرقه كل شي في المحل بسرعه..
بعدين طلعوا منه يجروا لسياره كانت تراجي فيهم خدتهم طول...
بعد ماهي مشت ولت السيارة اللي خدت الراجل العامل في المهدي رموه برا السياره وطلعوا يجروا..
هو ناض وقعدت ينفض في حوايجه..
شويه جوه جيرانه في المحلات القريبه وهما يقولوا..
"محلكم خشوله..خنبوه المحل"
الراجل انصدم وطلع يجري للمحل..
وين خشله وشاف حالته كاد ينشل من الصدمه..
بعدين قعد ينادي..
/محمد..محمد..
ومشي يدور عليه وهو ينادي لين شاف طايح في التركينه ومغمى عليه...
#فوق_الطاوله
#طوبى
...يتبع...
