#طوبى "جنة طوبى"
#جمان_فريد
#الجزء_الثاني_والسبعين"فنجان قهوة"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#التسبيح
عن أبي هريرة رضي الله عنه قال :
قال رسول الله ﷺ :
" كلمتان خفيفتان على اللسان، ثقيلتان في الميزان، حبيبتان إلى الرحمن ؛ سبحان الله وبحمده، سبحان الله العظيم ".
------•
📚رواه البخاري 6682
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃أحب وصف العمر ..
بأنَّهُ يتساقط لا أنَّهُ يمضي،
نحن نموت كل يوم بالتدريج؛
ندفن دهشة في مقبرة الاعتياد..
نفقد وهج الأشياء في زحام التمنّي،
نودّع معنى لطالما رافقنا؛
حتى تأتي لحظة الرحيل الأخير ..
لتجعل الأمر رسميَّاً وعلنيَّاً للمرّة الأولى.
__________________________________________
يوم الموسم..
اخر يوم في شعبان..
برغم غلاء الأسعار والوضع المعيشي الصعب..
نلقوا المحلات والاسواق مزحومه بالناس..
ياخدوا من كل شي ومايخلوا شي...
بس في ناس ظروفهم كانت اصعب من انهم يزاحموا مع غيرهم في الاسواق وياخدوا اللي يحتاجوه...
وهني تكون وظيفه مكاتب الصدقات التابعه لوزارة الأوقاف واللي تكون موجوده في كل بلديه...
وزي ماهو معروف لطفي الواعر من عادته في كل مناسبه يجمع من اهل الشارع ويحط عليه ومايخلوا حد محتاج في شارعهم..
بس هالعام..
🍃المسؤول في مكتب الزكاة؛والله ياحاج لطفي الحاج محمد شنيبه تكفل بكل شي وزاد عنده فايض بفرقوه عليا واعتقد مازال يزيد الله يبارك..
لطفي هز راسه وقال؛ربي يعوضه ويكتب اجره..باهي ماتعرفش مكان تاني محتاجين فيه لتبرعات؟
:فيه اكيد تو نعطيك عنوان مكتب في ******* في هلبه محتاجين غادي..
لطفي؛وين بالزبط..
وعطي الراجل عنوان المكتب بالتفصيل للطفي..
بعدين طلع لطفي من عنده ودار اتصالاته بالجيران اللي ساهموا معاه وخدي اذنهم في اللي بيديره وهما عطوه الإذن..
وبعدها توجه طول لمقر المكتب اللي دلوه عليه...
🍃وفي الشارع..
كانت مغليه دير في الجوله متاعها ع الجيران وفي كل حوش تزوره تفتح شنطتها السوداء المعبيه ظروف فلوس بيضا
وتعطي للي تعرف بطريقه اوبأخري ان ظروفهم صعبه لكنهم مستعففين..
وماتطلعش من عندهم الا وهما يدعولها...
🍃🍃🍃🍃🍃🍃
"عقلي وقف..مش قادرة نستوعب حاجه من اللي قولتيها!"
فردوس بحسرة؛هدا اللي صارلنا كلنا في البدايه..
فايزة بصدمه ودموعها في عيونها...
/اني مش مصدقه ان نسرين دارت هكي في سدرة!
فردوس؛نسرين هكي من يوم يومها مصلحة خوتها فوق كل شي..
نزلوا دموع فايزة وهي تقول..
/لكن مش في حاجه زي هادي..هادي اسمها خيانه يافردوس!
تنهدت فردوس بحرقه وقعدت ساكته..
قعدت فايزة ساكته للحظات وهي مصدومه وتفكر تحاول تستوعب اللي عرفاته بعدين قالت..
/اني نعرف ان في بينهم مشاكل وهي قبل حكتلي ع حكاية حملها لكن مانحسابش هكي صاير فيها!!..
فردوس:يعني حكتلك قبل!
فايزة ودموعها في عيونها؛ايه حكتلي حاجات بسيطه ووقتها نصحتها تقوله ع حملها وتوقعت تصيرلها من وراه مشاكل لكن مش حاطه في بالي ان هدا اللي صاير فيها..!
فردوس بحزن:كلنا لاحظنا حالها كيف تبدل لكن نحسابوه ع خاطر اللي صار لسدرة بس..طلعت ياما كامده وداسه ومتحمله بروحها..هدا كله ع خاطر بوي ماكانتش تبي تزيده على مابيه...
فايزة بألم؛ياعمري...تعرفي حاسه قلبي معصور عصر تقول وحده بناويتي اللي صار فيها هكي..اصلا طوبى زي بنتي ربيتها مع سدره كانت تحب تقعد معاي بالذات واني نخدم وتقعد تتعلم كبرت وهي تحب تهتم بروحها تحب ديما تطلع حلوة وشكلها حلو وشعرها حلو....اخر مرة جتني فيها للمركز في عرس نبيله شفتها كيف موليه الوجه تاعب العيون محلقات الشعر خفيف ومتقصف تمسحي عليه بيدك يجي فيها..مليان شيب اني اللي بنخش الاربعين شعري مافيشي الشيب اللي في شعرها..
فردوس تسمع فيها وهي تبكي بصمت..
وفايزة مكمله تقول بنبرة ألم:الله ياربي عمري ماتخيلت يصير فيها هكي!!...ااه ياسديره لو تنوضي وتعرفي شن صار في بنتك..مش عارفه كان تقدر تتحمل مش عارفه..تعرفي ع قد ماكنت نراجي فيها تفيق وتولي ع قد ماتوا مانبيهاش تفيق..
فردوس بنبرة باكيه؛حتى اني....
عقدت فايزة حواجبها بغضب وقالت..
/هدا اللي بيني وبينها ونسرين خلاص هادي عمرها ماكانت صاحبه اللي دير في صاحبتها هكي وتوجعها في اقرب الناس ليها..
فردوس هزت راسها وقالت بحسرة:صاحبتها وجارتها..جيران عشرة عمر..لادارو قدر للجيره ولاالعشره القبايح كلها داروها معانا حنس تقول في بينا وبينهم ثار..
فايزة بحزن؛حتى عيشه ماكانتش مرتاحه معاهم يافردوس صدقيني الخبيث ماجاها الا من السحن والضغط النفسي اللي عاشاته معاهم..
فردوس؛مالقاته فيهم اللي ليهم..ياويلهم من ربي ذنب قداش وحده حطوه في رقابهم...
🍃وهما يهدرزوا في الصاله طوبى كانت في الدار تقرا في القرآن..
بعد كملت طلعت من الدار ومشت للصاله...
خشت عليهم وهي تقول:السلام عليكم..
فايزة مررت عليها نظراتها اللي كلها ألم..
بفستان حمل صيفي واصل لنص الساق لامه شعرها فوق بطريقه عشوائيه..ملامح الوجه كلها ذابله..
ومع ذلك االابتسامه كانت حاضره ع وجهها..
سمعتها قالت..
/شن جو فايزة..
ماقدرتش تشد روحها ناضتلها طول ومشتلها وضمتها وقعدت تبكي..
طوبى وهي مستغربه شافت لفردوس لقتها تشوفلها ودموعها في عيونها..
فايزة ببكي:علاش ماحكتيش من الاول علاش ماقلتيش كل شي يومها..
حطت طوبى يدها ع ذراع فايزة وهي تقول..
/خلاص فايزة بطلي بكي..
بعدت فايزة عن طوبى وهي تشوفلها بحزن مسحت ع خدها وقال:ياقلبي الله لاتربحهم ع اللي داروه فيك..
تنهدت طوبى وقالت:ربي ياخد الحق..خلاص معاش تبكي مانبي حد يبكي ع خاطري ساد..رمضانيات راهو..
مسحت دموع فايزة وقالت..
/ساد بكي ودموع ساد..
فايزة هزت راسها وقالت؛باهي تعالي قعمزي..
خدتها من يدها وقعمزتها جنبها وقعدت شاده يدها وهي تقول..
/باهي شن بديري توا؟
طوبى:ع قولت عمتي في رمضان مافي كان الصلاة على النبي..
الزوز بأصوات متقطعه قالوا..
"اللهم صل وسلم على النبي"
طوبى:محاكم مانبيهاش لأن حبالها طويله والناس هادوا عاشرتهم وعرفتهم كويس يديروا أي شي بش يكون الحق معاهم..شفتهم شن داروا في اميمه وبعدين بنت خوها مغليه هادي بنت خوها ماسلمتش منهم وين جوها خواتها يبوا يصلحوا بينها وبين خوها ويحاولوا يردوا بنته لعمر حصلوها فيهم فرصه وذلوهم ذل والله من يومها واني غاسله ايديا منهم..
فردوس بإزدراء:قليلين اصل..
طوبى لفايزة:حكتلك فردوس شن دار هداكا لما جي اخر مرة..
فايزة بكره:ايه حكتلي..خزي الحقير طلع شيطان رجيم..
طوبى بشي من الانفعال؛وكان تشوفيه كيف يتكلم يافايزة تصدقيه وتجي معاه..كذب وافتري عليا بدون لايرتبك ولايتوتر ولايخاف.يتكلم وهو حارق دمه تقول صاحب حق فعلا واني اللي ظالماته..تي اني يافايزة للحظات صدقته وحسيت بالذنب تصدقي!..
فايزة بإستياء؛من قال الجالي يطلع هكي..قداش كانت سدرة تعزه تقول عيت شنيبه كلهم في كفه والجالي في كفه بروحه..
فردوس:كلنا يافايزة والله كلنا حتى جدي كان يشوف فيه حاجه كبيره..
طوبى:سبحان الله..ربك رايد يفضحهم ويطلع اللي في النفوس..
فايزة:صدقتي..باهي كان سكر راسه وقال مش مطلق؟
طوبى:حيطلق صدقيني حيطلق غصب عنه..
فايزة؛وكان تاخديها من قصيرها وديري زي مادارت اميمه تنازلي وخودي حريتك وان شاء الله يقعدوا بعده..
طوبى:لو نقعد لاخر يوم في عمري معلقه حقي ماني متنازله عنه..فوق الضحكه والاستغفال تبيني نسلم في حقي..حق القهرة والظلم اللي ريته منهم..تبي نولي مضحكه رسمي يافايزه..!
فايزة بضيق؛اني نبيك تفتكي منهم وترتاحي ناس زي هادوا تدفعي بش ترتاحي منهم..
طوبى بقوة:ناس زي هادوا لو مالقوش من يوقفهم عند حدهم يافايزة يتمادوا ويطغوا اكثر يديروا مايبوا ويطلعوا منها بالساهل..اللي فات ع اللي قبلي مش حيفوت عليا وربي يخليني اني العذاب المسلط عليهم...
ابتسمت فايزة وقالت بتشجيع؛صحه ليك..
فردوس بضحكه من بين دموعها؛وين نشوفها تتكلم هكي نخاف عليهم هما..
ضحكوا...
بعدين طوبى قالت؛خلاص فكونا من سيرتهم غيروا الموضوع..
فايزة؛احسن..ايه حقه سمعتوا ببنت الجعفري شن صار فيها..
فردوس:ايه ياروحي عمتي قالت بعد تطلع نمشولها..
فايزة؛تطلع غدوة هي كان هدا نفوتوا غدوة ونمشوا تاني يوم..
فردوس:هو هدا..
طوبى؛ربي يشفيها مسكينه وجعتني..
فردوس:ايه والله توجع...
فايزة؛ربي يشفيها ويردها لصغويرتها...
🍃🍃🍃🍃🍃🍃
الساعه 5:00عصرا...
قدام مطحن الزعيم..
كان المهدي واقف ع محمود ويوصي فيه..
/ليك حرية التصرف في كل شي يخص المطحن واني تو نكلمك بين الفتره والتانيه..
محمود؛تمام كوني هاني يامهدي..
المهدي؛ربي يعاونك..
محمود؛اجمعين..كل سنه وانت طيب..
المهدي؛كل عام وانت بخير..السلام عليكم..
محمود؛وعليكم السلام..
ومشي المهدي طول لسيارته ركب وقال..
/مانسيتوا شي؟
محمد:لا الامور طيبه..
شغل المهدي السيارة وتحرك طول...
🍃وامه وهي واقفه في روشن دار خوته قعدت تبع في السيارة بعيونها اللي كانت تذرف منهم في دموع حزن..
بعدين قالت..
/الله لايسامحك ياطوبى الله لايسامحك ولايسامح ماليك..
شافت لحوش الواعر بغل بعدين سكرت الروشن بقوة..
🍃🍃🍃🍃🍃🍃
وفي حوش لطفي الواعر..
كانوا كلهم ملتمين في الجنان ويتعاونوا ع العصبان وهما يهدرزوا ويشربوا في الشاهي..
غرفه؛مرات نخط فيه..
الاء:لالا علاش تخطي فيه نرفعوك غادي ونمشوا نديروا دورة بالسيارة الليله ليلة رمضان...
مطيره:تحطينا في البحر نبلوا رجيلاتنا شويه..
غرفه؛بحر شني تبيني نجيب اليوم؟
مطيره:ياهبله مش حامل في شهرك انتي..
فردوس؛حتى اني خاطري نشم هوا البحر ليا هلبه عليه..
الاء:باهي من بيمشي معانا تاني غير امي وعميمه..
اميمه:في جرتكم..
اريج اللي كانت تظاهر انها عاديه وجوها عادي..
/معاكم..
صفيه:اني مانقدرش يوسف صحابه جايين الليله ن
من بيقعدله؟
مطيره؛صح يبوا من يعول عليهم..شافت لفايزة وقالت..تمشوا معانا؟
فايزة؛نهار تاني ان شاء الله..
تاله:نبي نمشي ماما..
فنصت فيها فايزة..
مطيره؛علاش تفنصي فيها خلي البنت تمشي معانا مريوه وصفاء حتى انتم تعالوا..
مروة بإبتسامه؛باهي..
ابتسمت فايزة وهي تقرض..
مطيره؛وانتي صفاء؟
صفاء:لالا بنقعد مع ماما..
مطيره؛بتقعدي ع ماما ولاسي اشرف مايباش..
ضحكوا..
وهي انحرجت ع الاخر..
مطيره؛خزي مسكسكه ماعندكش شخصيه من توا حاكم فيك..
صفاء:مش هكي عمتي..بس احترام..
فردوس:ايااه..
طوبى:ماتخربوش البنت مادام مرتاحه خلوها في حالها..
مطيره:اسكتي انتي من حطك محامية دفاع!؟
طوبى بضحكه؛هي حطتني بعيونها..
ضحكت صفاء وهي تشوف لطوبى..
غرفه؛يعني خلاص نطلعوا التسعه؟
الاء:خلاص..
مطيره:تي هي اصبري انتي وياها ناخدوا شور لطفي ونشوفوا حسين..
غرفه؛باهي كلموهم من توا..طوبى انتي فاضيه كلمي بوي وخبريه..
طوبى:باهي..وقامت تليفونها بتتصل ببوها..
وهما حواليها كل وحده لاهيه بحاجه دير فيها...
🍃خدت اذن بوها وقالتله يعطي حسين وقال حسين انه بيطلع معاهم رجله ع رجلهم..
مطيره؛وبالك تبيهم يطلق قوم اناثي بروحهم فهالليل!
فردوس؛الله يبارك الله يبارك ..
مطيره؛اسكتي اسكتي خيرلك..
ضحكوا..
بعدين قعدوا يشتغلوا بصمت..
وطوبى تتفرج عليهم..قعدت دور بعيونها فيهم عليها..
اول موسم رمضان ماتكونش معاهم فيه..
قبل هي كانت رايسة قعده زي هادي وفي وسطها..
تتخيل فيها وهي تخلط في الخلطه وتحشي في العصبان بسرعتها المعروفه.سرعه مع اتقان وحاجتها ديما احسن حاجه..
لفت وجهها عنهم وهي تشوف للياسمينه وقعدوا دموعها ينزلوا بألم..
شويه بدت تسمع في رشفات..
التفتت لقت كل وحده دير في حاجتها وهي تبكي بصمت..
🍃غيابك يملأ المكان..اشتقت لوجهك الغائب ولصوتك المفقود🍃
🍃🍃🍃🍃🍃🍃🍃
"وينك يابنتي من بكري نتصل"
هادي مناسك مقعمزه قدام البار متاع المطبخ وهي تكلم في مروة..
"كنت مع العيله ملتمين نديروا في عصبان فطور اول يوم"
مناسك:الله سعدودكم نحب اللمات وجو العيله الكبيره..
"صح يهبل..انتم شن ديروا؟"
مناسك؛شي مقعمزه حدا فيزو دير في النسكافيه..
"سلميلي عليها"
مناسك؛فيزو مروة صاحبتي الجديده تسلم عليك..
فوزيه بإبتسامه؛نجيها ياربي سلميلي عليها..
مناسك؛تسلم عليك..
"سلمها..شن نظامكم انتم ليلة اول يوم"
مناسك؛شي عادي مافيش حاجه مهمه نديروا فيها نوضوا قبل الفجر نتسحروا بابا وخوتي يمشوا للجامع وحني هني نصلوا الفجر ونوم..
"بتمشوا لأمك غدوة ولا"
مناسك بملل؛ايه بنمشوا ياستي..
"كلكم؟"
مناسك:ايه حتى خويا البارد..
ع جية مالك وهو يمسح في نظاراته سمع كلمة خويا البارد وقف وقعد يسمع فيها
وفوزيه لاهيه بالنسكافيه..
"قاعد ع نيته؟"
مناسك بضحكه:لالا شكله ربي هداه..هو هكي اصلا لما يجي رمضان يولي مسلم يصيم ويصلي في الجامع ويقرا في قرآن طبعا هدا وهو صايم اما في الليل يشدها اسواق وجرادين في جرة البنات..وعاد بعد رمضان يولي من كفار قريش بكل..
فوزيه تسمع فيها وهي تضحك
"لكن حاجه كويسه انه محترم الصيام نسمع بناس توا مايصيموش استغفر الله بالك هو ربي يهديه بعدين ماتعرفيش"
مناسك؛بالك..
التفتت فوزيه بترفع السفره لمناسك شافت مالك واقف انصدمت
مناسك؛اهو جتني النسكافيه مروشه بعدين نعاودلك حبي ردي طول..
وهي تضحك قالت..
"باهي..سلام"
مناسك؛سلام..وسكرت..
شافت لفوزيه وقالت؛خيرك واقفه هكي!
جتها وهي تفنص وتقول؛شن حكتلك..
مناسك؛قالت ملتمين يديروا في العصبان سعدودهم كان جونا كناين باهيات رانا ملتمين نديروا في عصبان..
ضحكت فوزيه بسخريه وقالت..
/البرينسيسات هدوكا ينقرفوا منه..
مناسك؛بالذات مرت وليد..
الزوز دارو حركه معينه بملامح وجوههم وقالوا مع بعض..
/تاكلوا في احشاء الخروف يععع..
هو جاهم وهو يقول بضحكه ساخره..
/ ياوالله عليك زكيه زكريا مالا الشحم هدا كله منين جاها!؟
مناسك بضحكه؛رباني قالت..
هو خدي فنجان مناسك وقال:كذابه تاكل في الاخضر واليابس ومش بعيد تولي ع وليد كان مالقت ماتاكل
ضحكوا .
وهو كمل يقول..
/تماري في عقاب المعيز بس..
فوزيه بضحكه؛ماسلم منك حد تو نشوفوك شن تجيبلنا..
هو قال:ماني جايب شي بنقعد بروحي بطولي هكي لانقيق لامشاكل لادراه كبد..
فوزيه؛تو نشوفوك..
مناسك وهي تضحك جت بتاخد المق استاقظت ان هو خداه قالت بعياط؛لامتاعي جيبه..
وهو يشرب ببرود ومش معدل عليها..
فوزيه؛خلاص اسكتي تو ندير واحد تاني..
مناسك بغيظ؛يابارد..
مالك؛في من كنتي تكلمي؟
مناسك؛دخلكش..
مالك؛نصبها ع راسك؟
مناسك بنرفزة؛صاحبتي..
مالك؛من هي؟
مناسك:ووااك مروة..
مالك:من مروة؟
مناسك؛افف..البنيه اللي صاحبتها جديد..
مالك؛من جديد..ضحك وقال..نبصر نبصر..شويه فنص وحط المق وقال..نهار امك اللي جاباتك احرف قصدك الدوة اللي قلتيهالها بكري عليا اني!؟
مناسك شافت لفوزيه وهي تفنص بخوف.
فوزيه؛لالا مش عليك مش عليك
شد مناسك من شعرها وهو يقول..
/ماتعرفيش حاجه اسمها البيوت اسرار مش كل شي ينقال يامتخلفه..
مناسك وهي تتوجع؛ااي شعري..والله عادي عادي يامالك..
فوزيه:مالك تطلقها ولا نجيك بساقم اللوح..
مالك؛علميها ان البيوت الاسرار..
فوزيه؛البيوت اسرار البيوت اسرار..علاش هي شن حكتلها..حكتلها عليك انت بس.
مالك؛لاوالله حق عليا اني بس.. غمض عيونه وهز راسه وهو يقول...باهي شكرا شكرا ع المشاركه..
مناسك وهي تساوي في شعرها؛اصلا هي شكرت فيك وقالت كويس اللي يدير فيه ومرات ربي يهديه..
هو عقد حواجبه ورمش عيونه بعدين قال:هي هكي قالت؟
مناسك؛ايه ياهمجي..
غير عيونه عنها وخدي المق وقال؛باهي سلام..
ومشي طول من حداهم..
مناسك؛متخلف..
فوزيه جتها بالمق وهي تضحك قالت؛هاكي وشدي لسانك شويه عنده حق..
مناسك شبحتلها بعدم رضا وخدت المق وقعدت تشرب..
🍃🍃🍃🍃🍃
وفي المنطقه الموجود فيها شارع القهوة..
افتتحوا لطفي وبوه مع شريكهم محل المواد الغذائيه وع كل البضاعه كانوا دايرين تخفيضات وبسرعه زحم السوبر ماركت بالناس..
🍃في هالوقت..
مشي عبد القيوم يجيب عمه وعمته من المكان اللي وصلهم ليه صاحب سيارة الاجره..
وطول توجه بيهم لشقته...
🍃والمهدي كيف وصل لحوش عمته كامله اللي قاعده بروحها بعد مازوجت صغارها كلهم واستقبلتهم وهي فرحانه بيهم...
🍃وطارت الطيارة اللي فيها الجالي بعيد عن ليبيا لفترة مؤقته
ولفترة دائمه..حتعيش نجاه في شقتها الجديده اللي خشتها مع صغارها وهي متأمله في هلبه حاجات..
بعد وصولها بشويه ركبتلها خديجه..
🍃خديجه؛جو سهونك متاعك فوتيه..البسي محتشم شعرك غطيه..فوتي صحة الوجه وشدي شقتك وماتنزليش الا اذا امي ناداتك..
نجاه؛قصدك تبيني نخليها تعول بروحها في رمضان؟
خديجه؛لاياصاحبة الواجب امي ماتبيكش تنزلي قبل لهي تقولك..
برفعة حواجب قالت:اممم..
خديجه؛واخيرا ردي بالك تلعبي من وراي بش ماندمكش ع اليوم اللي خشيتي فيه عيلتنا من اصله..
نجاة؛ريحي روحك وارتاحي..
خديجه؛معاك انتي مستحيل..المهم توا ماتطلعيش من الشقه لين امي تكلمك فاهمه..
نجاه بملل:فهمنا..
شبحتلها خديجه من فوق لتحت بعدين مشت طلعت من الشقه...
نجاه برفعة حاجب:كان حاجتك عند الكلب قوله ياسيدي..
🍃🍃🍃🍃🍃
الساعه 9:00ليلا..
حوش لطفي الواعر كان فاضي الا من طوبى اللي كانت تلهي في روحها بضمات الحوش وحده وحده عليها..
وفي حوش جدها..
كانوا يوسف وصحابه في المربوعه الخارجيه..
وامه في الحوش توتي في العشي..
وقدام جنان الكوجينه الحاج علي مقعز مع ولاده وهما يهدرزوا..
🍃اما الباقي طلعوا بمرافقه حسين لمشوارهم..
حطوا غرفه في العيادع لقت نبيله تراجي فيها مشوا مع بعض لحجرة الدكتورة..
وفردوس ومطيرع وباقي البنات توجهوا للبحر...
🍃الساعه 9:40ليلا...
طالعات الزوز من العياده وغرفه تقول..
/نبي نروح للحوش ماعندي خلوق لشي..
نبيله؛باهي تو نقول لخالك نمشوا لحوشكم طول نبي نشوف طوبى...
طلعوا ن العيادة وقعدوا واقفات يراجو في محجوب..
جت سيارته التابعه للخدمه..
نزل السواق وفتحلهم الباب السحاب..
نبيله؛هي تعالي..
وقعدت تمشي بيها لين وصلوا للسياره..
ركبت غرفه قبل بعدين ركبت هي وفجأه شهقت بصدمه..
قامت غرفه خمارها وقالت؛خيرك!..
"شافتني"
فتحت غرفه عيونها ع وسعهم لما سمعت الصوت..
شافت جنبها لقاته هو...
عبد الرؤوف..
غرفه بصدمه؛حي عليا..قعدت نتخيل فيه يانبيله..
نبيله وهي تضحك ودموعها ينزلوا..
/والله حتى اني مامصدقه..
غرفه وهي تتأمل في ملامحه قالت..
/قصدك حقه هو قدامي رؤوف!..
عبد الرؤوف؛امتى يتم المشهد الهندي هدا..اها ها...وخدي يدها وحول القفاز وشدها بقوة وهوويشوف لعيونهاقال..
/صدقتي يابطريقه..
غرفه من هول المفاجأه ماتحملتش داخت طول..
🍃ع البحر
كانوا كلهم مستمتعين وعايشين احلى جو وكل شويه ياخدوا في الصور..
آلاء؛روجه بنقولك حاجه..
اريج ودموعها في عيونها؛عارفاته هني عارفاته شفت سرافته هالسرافه البشعه كرهته..
الاء بشفقه؛حرام عليك شوفي كيف مولي ضاعف وشعره كبر ووجهه كله لحيه..افف لو منك نتزوجه ونسافر والقلب اللي تقلب..د
اربج؛هديكا انتي مش اني..
ومشت وخلتها..
تنهدت الاء بضيق..بعدين رجعت تصور وكأن شيئا لم يكن..
شويه شافت اريج تأشرلها تجيها..
مشتلهم طول وقفت عليهم وقالت..
/خيركم تضحكوا!؟
فردوس وهي تضحك بفرح ودموعها في عيونها..
/رؤوف راجل خالتك طلع..
🍃🍃🍃🍃🍃
طلعت برا ضم في حوسه فم الباب ماكانتش هلبه..
شويه سمعت الباب الفاصل بينهم وبين حوش جدها انفتح..
شبحت جيهته لقت بوها جاي..
لطفي بإبتسامه؛طوبى..
ابتسمت وقالت؛تعشيت..
هو توجه للكرسي متاعه وقال؛ايه..
لحقاته وقالت؛تبي نديرلك حاجه؟
قعمز ع الكرسي وشافلها بابتسامه حنونه وقال..
/علاش مامشتيش معاهم؟
طوبى:ماخاطريش..
لطفي:مشيتي غيرتي جوك شويه شميت هوا البحر يرد الروح..
طوبى:جايه ليالي رمضان ان شاء الله وتو نمشي..
هز راسه وقال؛ان شاء الله..بنتي..
قعدت تشوفله بإنتباه..
لطفي؛ماتخلي شي يكسرك ويحبسك في داخله..انتي لانك اول ولااخر وحده يصير معاها هكي هلبه ناس تعرضوا هالابتلاءات واقوى منها..نبيك تتفكري حاجه مهمه..
ان الله يعطي اصعب المعارك لأقوى جنوده..ابتلاك باللي تقدري عليه وبإذنه وعونه حتتخطيه..
طوبى بإبتسامة حب:ان شاء الله..
لطفي:حاجه تانيه..طول حياتك تعلمي تتكي ع الله ثم نفسك البشر هادم ماتعبيش عليهم مافي حد دايم كان ربك شدي فيه هو بس..وبعدين في نفسك لأنك انتي الادرى بيها ولو يابنتي انتي ماقدرتيش تساعد نفسك لو اجتمعت الدنيا كلها بش تساعدك مايقدروا يديرولك شي..
هزت راسها موافقه ع كلامه..
هو قال؛ونبيك تسامحيني..
دمعوا عيونها وقالت؛علي شني!؟
هو قال:ماقدرتش..
هي قالت:مافهمتش؟
لطفي تنهد وقالت؛ماقدرتش نعطيك لراجل يستحقك قدرت وأخطأت التقدير وانتي كنتي الضحيه..سامحيني يابنتي..
جاته وهي تقول؛ماتقولش هكي بابا..باست راسه بعدين قالت..
هدا مقدر ومكتوب عليا نصيبي ماحد ليه علاقه بيه..انت بارك الله فيك. ربيت وكبرت وتعبت وضحيت هلبه ع خاطرنا انت اللي سامحنا بابا مش حني..
تنهد بإبتسامه وقال:الله يسامحكم دنيا واخره بناتي..
هي مسحت دموعها ورسمت ع وجهها ابتسامه بهجه وهي تقول..
/خلاص رمضان رمضان نبوا نفرحوا بجيته مانبوش دموع..
ابتسم وقال؛صح..قلتيلي بكري كان نبيك ديريلي حاجه..نبي فنجان قهوة معدل من ايديك
طوبى؛عيوني ليك..شويه بس..
ومشت طول خشت للحوش..
هو شبك اصابع ايديه في بعض بعدين تنهد ومرر نظره ع المكان..
ثبت عيونه للجهة اللي كانت فيها الدرجيحه زمان..
وتفكر نفس الموقف وقعد يشوف قدامك في سدرة ومختار...
شويه تخيلهم وهما كبار..
سدرة تدرجح والضحكه ع وجهها ومختار يدف بيها وهو يضحك..
ابتسم لااراديا وهو يتخيل فيهم...
🍃وطوبى داخل بعد ماطيبت القهوة وصبتها في فنجان..
رشت ع السفرة زهر الياسمين..
وخدتها ومشت وطلعت بيها للجنان..
طوبى؛وهادي احلى قهوة معدله لأحلى لطفي..
ناض وهو يقول؛ومن ايدين احلى بنيه..
خدي السفره وحطها ع الطاوله..
ومشي قعمز ع كرسيه..
طوبى:مالا اني خل نخش نعصر الفراوله..
هز راسه ورشف من القهوة..
وهي مشت خشت داخل..
تنهد وشاف للياسمين..
اتكى بمرفقه ع يد الكرسي وحط يده ع خده وعيونه ع الياسمين...
🍃🍃🍃🍃🍃🍃
في الطريق..
في سيارة حسين..
اللي كانوا فيها مطيره وفردوس ومروة وتاله...
حسين؛والله ماعندي علم قاعد متفاجئ لتوا..
مطيره؛الحمد لله رب العالمين الحمد لله..
فردوس:متشوقه نخبر بوي وطوبى..
حسين؛اهو خلاص خشينا الشارع..
شاف للمرايه لقي اميمه خاشه وراه..
وصل لحوش عمه ودرس..
حسين؛هي انزلوا..
نزلوا كلهم...
واميمه درست وراه..ونزلوا كلهم من السيارة..
حسين قدم لحوش جده وخش بالسيارة للحوش...
🍃ومطيره فتحت الباب وخشت وهي تقول..
/بسم الله..
مروة بأبتسامه:اهو جدي لطفي مقعمز هني..
مشوله طول وفردوس تقول بلهفه فرحه..
/بوي بوي...
مطيره ركزت فيه وقالت:شوره رقد..عنده الحق البروده هني ترقد..لطفي..يالطفي نوض مش وقت نوم نوض اسمع..
والبنات حواليهم يشبحولهم بإبتسامه..
فردوس؛بوي...بوي..
بدت تخفت الابتسامات شويه شويه..
مطيره بخوف:لطفي هدا كله نوم!؟
فردوس مررت نظرها عليه شافت سرواله مبقع بالقهوة والفنجان طايح عند رجليه..
توسعوا عيونها بصدمه..مدت يدها ليده المتكي عليها شدتها وحولتها...
نزل راسه طول...
شهقت بقوة..
ومطيره بصوت عالي قالت..
"لا"
والبنات وراهم جمدوا في مكانهم..
فردوس بذعر وهي تهز فيه..
/بوي..بوي..بالله عليك نوض بالله عليك نوض ماديرهاش فينا ماتكسرش ظهورها اكثر ماهي مكسورة بصرخه عاليه قالت..
"نوض"
🍃وتطفي طوبى الخلاط وتسمع صرخه فردوس..
انفجعت..
قعدت واقفه في مكانها لحظات تسمع..
صوت عياط..قاعد يتصاعد وبكي...
حطت يدها ع قلبها وعيونها جاحظات بخوف شديد..
وقعدت تمشي خطوه ورا خطوة خطوات خايفه..
وكل ماتقدم الصوت يزيد يوضح..
لين طلعت برا وسمعت..
"اااه يابوي شن درت فينا"
قدمت خطوتين وبانوا عليها كلهم..
فردوس حاطه راسها ع صدر لطفي وتعيط..
ومطيره مقعمزه عند كرسيه وهي تبكي بالعبره..
الاء تبكي وهي مصدومه..
اميمه تبكي بألم...اريج تذرف في الدموع وهي واقفه تشوف فمشهد مش قادرة تستوعبه
وتاله ومروة شادات في بعض ويبكوا هما زوز..
شويه خشوا يجروا يوسف وحسين..
انصدموا من اللي شافوه..وبوهم لحقهم وكان مش مصدق عيونه شن قاعده تشوف...
وصفيه جتهم وهي تبكي وضمت مطيره وقعدت تبكي هي وياها..
🍃وورا السور الفاصل..
الحاج علي كان واقف وهو شاد عكازه وحاط جبهته على حيط السور..
يسمع فيهم يبكوا ويعيطوا..
يسمع في مطيره تقول..
"ياناري ياوخيي ياناري عليك يالطوفه كسرت ظهورنا ياوخيي كسرت ظهورنا ياغالي...اااه ياربي الصبر الصبر"
يسمع وقلبه قاعد يتفتت من الألم وماعنداش الشجاعه اللي تخليه يتخطى هالسور ويشوف اقرب بني آدم ليه ع وجه ارض...
جثه هامده من غير روح...
🍃🍃🍃🍃🍃🍃🍃🍃🍃🍃🍃🍃🍃
(بوي لطفي الواعر..تاج راسي وبياض جبهتي واعز ماعندي في الدنيا كلها..اللي ضحى ع خاطرنا وتعب وتعذب وعطي عمره كله من غير مايراجي كلمة شكر وحده...
ربي مايذوقني حزنك ياغالي ويخلي يومي قبل يوم)
مقطع من مذكرات سدرة المنتهى
#فنجان_قهوة
#طوبى
....يتبع
