#طوبى "جنة طوبى"
#جمان_فريد
#الجزء_الرابع_والسبعين"تحول1"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
¤رب اشرح لي صدري○ويسر لي أمري○واحلل عقدة من لساني¤
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 أنا الذي اعتقدتُ أن خطواتي لا تكفي لهذا الطريق المُتعب تدهشني قوة تحمّلي..🍃
________________________________________
وقت الغروب...
لحظات وآذن المغرب..
وفطروا الصايمين..وعدا اول يوم في رمضان سنه 2018..
رمضان هديكا السنه يمر ع بعض الناس زي كل رمضان بسلام وهدوء..
وفي ناس تانيه بألم وغصة..
ماكان في حد حاضر عزي لطفي حس بنكهة رمضان..
مطيره والبنات كانوا دايرين برنامج معين لهالشهر وكانوا متحمسين لتنفيذه..لكن قدر الله وماشاء فعل...
فطروا والغصه في حلوقهم..وفي من دموعه غلبوه وهو ياكل..وفي اللي ماقدرش يحط في فمه اكثر من حبة تمر وحده بس بش يحل صيامه...
🍃وفي المصحه...
اميمه حلت صيامها وهي جنب طوبى اللي كان معلق جنبها كيس التغذيه..
فايقه وعيونها يشوفوا للفراغ والدموع زي الشلال يصبوا ع الوساده اللي راقده عليها...
"طوبى"
غيرت عيونها لأميمه..
اميمه بنبرة حنونه؛طلعي اللي في قلبك قولي شن تحسي..
بنبرة مخنوقه وصوت مبحوح قالت..
/اللي نحس فيه ماينقالش..
اميمه تنهدت بحزن وقعدت ساكته..
طوبى:شن يحكوا ع الجنازه..
اميمه؛قالي يوسف زحمة لاتوصف تعرفي حتى خوت الفاندي جو..
طوبى رفعت حواجبها تعجبا والتعب مسيطر ع ملامحها بعدين قالت؛والبنات؟
اميمه؛مش عارفه مرات يجوا في الليل..
هزت طوبى راسها وغيرتهم للروشن..
واميمه تشوفلها..
شويه طوبى قالت..
/هداكا حضر الجنازة؟
اميمه؛لا قال يوسف جي قبل المغرب وسأل عليك..
طوبى؛قصدي مختار..
سكتت اميمه..
شافتلها طوبى وقالت..
/خيرك سكتي؟
اميمه؛جي..
طوبى؛شن صار؟
اميمه؛طلعوه من الجنازة غصب عنه..
طوبى بتهكم؛ماشي يتشمت..دار زي هدوكا المنحطين يقتلوا القتيل ويمشوا في جنازته..
اميمه بضيق:خلاص فكينا من سيرتهم..
طوبى؛ع قولتك...
اميمه؛طوبى لما تشدي حيلك وتردي بالك من صحتك ماتنسيش بنتك..
حطت يدها ع بطنها وقالت بألم:
/ياعمري..مازال ماجيتي للدنيا وعشتي معاي هدا كله..
اميمه؛مايدوم حال وان شاء الله يواتيها الوقت الطيب..
طوبى:آمين..حمحمت بعدين قالت..اميمه شغليلي قرآن..
اميمه وهي طلع في تليفونها من شنطتها..
/حاضر..
وحطت السماعات فيه وشغلت الراديو ع قناة قرآن.
فتحت السبيكر وناضت حطاته قريب عليها وولت قعمزت..
كانت السورة المسموعه وقتها..طه..
كيف بدي القارئ يتلى فيها...
﴿ طه، مَاأَنزَلْناَ عَلَيْكَ الْقُرْآنَ لِتَشْقَىٰ ﴾
غمضت طوبى عيونها وقعدت تسمع..
واميمه تشوفلها بحزن..
🍃🍃🍃🍃🍃🍃
فهالوقت..
ربيع ونسرين في مطار معتيقه جايين من مصر عن طريق تونس..
نسرين كانت ملامح البكاء باديه ع وجهها..
وملامح الحزن ع وجه ربيع...
طلعوا من المطار وسيارة اخ ربيع تراجي فيهم..
ركبوها وتحرك بيهم طول لشارع القهوة..
🍃في حوش لطفي الواعر..
كانوا يعولوا ويضموا بعد الفطور وفي نساوين بدوا يخشوا...
فايزة بوجهها الباهت وصوتها المبحوح قالت لبنتها..
/تاله..ارفعي المكنسه حطيها في الجنان..
خدت تاله من امها المكنسه ومشت طول..
وهي كيف جت بتكمل ضمان..
شافت لباب الحوش لقت نسرين جايه..
بسرعه مشت طلعتلها..
نسرين وين شافتها بدت تبكي وهي تقول..
/ياناري ع عمي لطفي..
وجت بتحضنها تباعدت فايزة..
هي استغربت..
فايزة بحده؛بري روحي لحوشك مافي حد هني يقبل عزاك..
نسرين بصدمه؛شن تقولي انتي!؟
فايزة؛اللي سمعتيه..اطلعي بكرامتك خير ماتنلزي زي امك واختك .
نسرين معاش استوعبت شي قالت لفايزة..
/فايزة خيرك شن جاك شن اللي قاعده تقولي فيه؟
فايزة بتهكم؛اسألي روحك وتو تعرفي اني شن قاعده نقول..اطلعي روحي نسرين..اطلعي هيا..
قعدت نسرين تشوفلها وهي مصدومه وحاسه بشي تجمع في صدرها كتم ع انفاسها..
مابتش تناقش اكثر..مشت طول وطلعت من الحوش..
وفايزة خشت داخل وهي مضايقه ع الآخر..
🍃وفي خيمة الرجاله..
عزا ربيع رجال عيلة الواعر كلهم..
ولما وصل في علي الواعر طبس كب ع راسه وقاله..
/عظم الله اجرك ياحاج..
رفع علي الواعر نظره في ربيع وهو يشوفله بحده وماباش يرد عليه..
هو خاف من نظرته..
وعبد القيوم وعبد الرؤوف اللي كانوا مقعمزين قراب عليهم ويشبحولهم استغربوا تصرف الحاج علي..
ربيع وخر خطوه وهو مضايق بعدين هز راسه ومشي قعمز جنب عبد القيوم..
قعد بعيونه مع الحاج علي اللي رجع يسبح بالسبحه..
وعبد الرؤوف والتارقي يمرروا في نظراتهم بيناتهم...
🍃🍃🍃🍃🍃🍃
وفوق السطح..
تحديدا في دار الخزين..
كانت آلاء دير في اتصال بشخص ما وتراجي فيه يرد عليها..
شويه رد..
"ايوه"
الاء بحزن؛خالو..
"حبيبة خالو "
الآء بألم؛شن حالك توا خالو؟
"سمعتي باللي صار صح؟:
الاء ودموعها في عيونها..
/كلمتك بش بنقولك راهو جدو يحبك وراضي عليك تعرف كيف عرفت؟
"كيف؟"
الاء:صورتك قاعده عنده في دولابه..
سكت مختار ..
آلاء؛والله العظيم خالو..
" مش مهم اللي قلتيه بكل مادام حرم عليا نحضر جنازته ونوقف ع قبره خلاص يابنتي"
آلاء بألم؛خالو ماتزعلش روحك..
"ااه يابنتي اااه..شن بنقولك..خلاص حبيبتي خلاص بابا ماتشغليش نفسك بيا وبري شوفي شن بديري"
آلاء ودموعها ينزلوا؛حاضر..لكن رد بالك ع روحك باهي..خالو اني ماقعدلي حد غيرك..
🍃حط يده ع فمه وهو يسمع فيها شن تقول..
بعدين مسح دمعه بتنزل من عينه اليمين براس سبابته وقال..
/حاضر بنتي حاضر..تصبحي ع خير..
"وانت من أهله"..
سكر وحط تليفونه جنبه..وخدي فنجان القهوة وقعد يشرب وبين عيونه الموقف اللي عاشاه في المقبره..
موقف كان فيه كسر وفضيحه قدام الناس كلها..
حط روس صوابعه في فمه وعضهم ندم والغضب اللي حسه وقتها كان شديد ..
🍃🍃🍃🍃🍃
خشت للصاله وسكرت الباب..
شافتها اختها وقالت وهي متفاجئه..
/نسرين!
نسرين وهي مازال مصدومه..
/شن صار واني مهناش.
خديجه تنهدت بضيق وقعدت ساكته..
نسرين؛خديجه ندوي معاك!
خديجه؛طوبى عرفت كل شي ودارت مشكله كبيرة وطلبت الطلاق..
نسرين بذهول؛هدا كله صار في اليومين اللي سافرت فيهم!؟
خديجه قعدت تشبحلها وهي ساكته..
نسرين؛اها..معناها قبلها واني اخر من يعلم!
خديجه؛وهاك عرفتي شن بديري!
نسرين حطت ايديها في نصها وهي معصبه وقالت..
/شن صار معاكم لما مشيتوا تعزوا؟
خديجه؛كنتي غادي انتي!..
نسرين بعصبيه؛ايه كنت غادي وفايزة لزتني وهي لوجهي مش طايقه تشوف..
خديجه؛بالناقص منها خطافة الرجاله ع اقل تهني ع راجلك..
خدت من ع الطاوله تحفه خشبيه وحدفتها ع الأرض بعدين قالت..
/من غير قطاف زايد احكي اللي صار كله..
خديجه برفعة حاجب؛قعمزي
نسرين مشت قعمزت وهي معصبه..
وخديجه بدت تحكيلها..
🍃وامهم في دارها تصلي في التراويح وتقرا في القرآن...
وراما في الكوجينه لاهيه دير في حلو وهي متأمله ان محمد يجي للحوش بش تعطيه منه...
بعد ماكملت خداته ومشت بيه للجنان وقعمزت تستنى...
وبعيد عنها بشويه ...
فوق في الدور الثالث..
نجاه مقعمزه مع صغارها ع التلفزيون وهما ياكلوا في الكيكة المثلجه ومروقين ع الآخر...
🍃نسرين بصدمه:وحطيتوها في راس بنات العيله حطيتوها في راس حد تاني مالاش ذنب..
خديجه؛اهدي وريحي روحك مافيش اسم انقال وبوي ماشدش في الموضوع..
نسرين:وتحسابيه مش حيولي يدوي فيه مرة تانيه ولا!؟
خديجه؛وقتها لكل حادث حديث
نسرين ودموعها ينزلوا:علاش شن مازال بديروا اكثر مادرتوا شن مازال!..اني توا حاسه ان عمي لطفي مات من قهرته ع بنته..
خديجه بإزدراء:بلا دارما..هدا حد عمره مافي حد يموت قبل اجله..
نسرين بتهكم؛طبعا بالك انتي بتحسي ولاتفهمي..
بحده قالت ؛نسرين!
نسرين:نسرين حقيره زيها زيكم اللي سكتت ع العبيتر اللي درتوه من الاول شاركتكم فيه وخنت اعز صاحباتي ع خاطركم لكن لعند هني وخلاص..
وناضت..
خديجه بفجعه؛وين ماشيه..
مابتش نسرين ترد عليها ومشت بتفتح باب الصاله..
وخديجه تجري في جرتها بتلحق عليها وهي تقول..
/تعالي هني ياكلبه!
وينفتح باب الصاله وتخش مغليه..
شافت نسرين تفاجئت وهي تقول..
/امتى روحتي..
نسرين:خشي يام..
خديجه بغضب:نسرين..
نسرين غمضت عيونها بعصبيه وقالت..
/خشي يام..
خشت مغليه وهي خايفه..
سكرت نسرين الباب وقالت..
/في حاجه يام لازم تعرفيها..
خديجه ؛نسرين ماطلعنيش عن طوري..
بتهكم قالت؛علاش..بديرلي زي مادرتي لبنت عبد المطلب!..
جت خديجه بتضربها امها شدتها عنها وهي تقول..
/ارزينا في عيت الواعر الله لايسامح هداكا اليوم الأسود اللي لم بينا وبينهم..
نسرين؛فوتي الدوة هادي واسمعيني يام..اللي قاله محمد ولد المهدي يومها ماكذبش فيه..
مغليه:عارفاته مايكذبش لكن مفروض جي قالي اني مش يقولها لجده..
نسرين وهي متفاجئه؛قصدك تعرفي انتي يام!؟
مغليه؛لا ماعرفتش الا منه هداكا اليوم..وشبحت لخديجه وشكلها حتى خديجه عارفه وماتبيش تقول..
خديجه بتوتر وغضب:مانعرف شي يام..وقعدت تشوف لنسرين بنظرات وعيد..
نسرين بتحدي؛لاتعرفي واني نعرف وعمر يعرف ونضال يعرف..
شبحت مغليه لبنتها بتوتر واستغراب..
نسرين؛محمد المهدي كان يحكي عن نجاة يام..
مغليه بصدمه:شن تقولي انتي! نجاه هججها من الحوش يومها وواصله بيهم لوين وين..
نسرين:ماسألتيش روحك علاش!؟
خديجه تفنص فيها وتتوعد بعيونها وهي متجاهلتها
ومغليه زاد توترها وخوفها..
نسرين:اني نقولك علاش يام..ولدك الجالي يام كان متزوج نجاه من قبل ماياخد طوبى..
غمضت خديجة عيونها بشده..
وامها بذهول:شنو!؟؟ شن تقولي انتي!؟
نسرين :اللي سمعتيه يام..
مغليه حست روحها وكأنها طاحت من فوق جرف عالي..
شدت راسها بيدها وقالت..
/ووك عليا راسي..
شدوها بناتها وهما يقول..
"يام..يما خيرك"
مغليه بصوت متعب:بندوخ بندوخ..
خديجه بخوف:تعالي يام تعالي..
وخدوها وقعمزوها ع الكرسي..
خديجه؛تو نجيبلك كصبر..
ومشت تجري طلعت من الصاله..
مغليه وهي متكيه ع الكرسي قالت..
/شن اللي قلتيه يابنتي هدا شني!؟
نسرين بقلق ع امها؛فوتي توا يام فوتي..
ع جية خديجه..
وقفت عليها ومدت يدها لفم امها وهي تقول؛غزي يام غزي..
وكلت مغليه الكصبر وقعدت تغز فيه بتعب..
وخديجه تشوف لنسرين بغضب..
🍃وقدام حوش لطفي الواعر..
كانوا حسين ويوسف جايبين بضاعه يدخلوا فيها..
درست قريب عليهم سيارة..
حسين شافها وقال؛يوسف تعالى شويه..
وقف يوسف ع حيله التفت شاف السياره بعدين وخر عن الباب مع خوها..
شويه نزل واحد من ولاد الفاندي ونزلت امه من جنبه..
ومن الخلف نزلوا خواته سعاد وإقبال..
وصل ولد الفاندي امه وخواته للباب..
وتبان ع يوسف اقبال..
اقبال اللي كانت خطيبته زمان سنين ورخي بيها ع قرب عرسهم ع خاطر حبه الخادع اللي ضيعه وضيع شقا بوه وسمعة امه بسببه..
لما شافها كان حاس بشعور فضيع بالحسرة..
اقبال كانت لابسه فستان واسع متاع حوامل..ركز بنظره ع بطنها بعدين غير عيونها عنها وهو مخنوق ع الآخر..
وماكانش عارف ان خوه حسين مركز معاه..
خشوا النساوين وجاهم ولد الفاندي كان متجاهل يوسف تماما سلم ع حسين بعدين مشي للخيمه..
حسين تنهد وقال؛هيا..
هز يوسف راسه وهو مضايق ومشي كمل مع خوه اللي كانوا يديروا فيه...
🍃وداخل..
كان اللقاء بعد غياب مؤلم جدا رجعوا اجتمعوا بعد قطيعه في مناسبه تعيسه..
ام الفاندي ومطيره انهاروا بالبكي..
واقبال وسعاد مع غرفه وفردوس كانوا يبكوا بألم..
وسط هاللقاءالموجع..
كانت صفيه تشوف لإقبال وهي متحسره عليها بالذات لما لاحظت عليها الحمل...
🍃🍃🍃🍃🍃
قاعده مقعمزة في مكانها وهي سرحانه في الفراغ...
شويه..مسحت ع وجهها بيدها بعدين ناضت وقفت..
نسرين تشوفلها بخوف..
وخديجه قالت بقلق:يام.
مغليه:مانبيش وحده فيكم اتبعني..
ومشت طلعت من حداهم..
رفعت وشاحها ع راسها ولفاته حوالين رقبتها ..
وصلت في الباب لبست شبشبها وطلعت..
شافتها راما اللي كانت مقعمزة في الجنان وقعدت معاها بعيونها وهي تشوف فيها كيف ماشيه جهة شقة نجاة لين درقت..
طلعوا امها وخالتها ووقفوا الزوز قراب عليها وهما يشوفوا للجهة اللي مشت منها امهم..
بعدين التفتت خديجه ع نسرين وقالت بغضب..
/ارتحتي توا!؟
نسرين بتحدي هزت راسها وقالت؛ايه وهلبه..
ومشت لباب الحوش فتحاته وطلعت وجبدت الباب يقوة..
وخلت خديجه وهي تغلي من الغضب ماشيه جهة الشقه وبنتها بعيونها تبع فيها..
🍃في الشقه..
رن الجرس..
فيق نجاة من غفوتها...شافت حواليها لقت صغارها غارقين في النوم..
سمعت الجرس رن مرة تانيه..تأففت..
وناضت نزلت من الكنبه..
خدت نفس بعدين لمت شعرها وناضت متوجهه للباب..
وصلت فيه وقالت..
/مني؟
"افتحي"
ضيقت عيونها بإستغراب لما سمعت صوت مغليه بعدين فتحت الباب وقالت بإبتسامه مصطنعه..
/اهلا عمتي..
خشت مغليه وهي ساكته وعيونها في نجاة ونظراتها وترتها..
بعدين سكرت الباب..
نجاة بتوتر:شن في عمتي!؟
مغليه حطت ايديها ورا ظهرها ورفعت حاجبها وقالت بنبره هاديه لكن مخيفه..
/تعرفي في شن خاطري توا!؟..خاطري نشدك من شعرك ونمسح بيك الشقه والدروج والجنان ونلوحك برا الحوش زي الكل.به..
نجاه قعدت تشوفلها بخوف وصدمه..
مغليه؛لكن حظك قوي..حاجه زي هادي مانقدرش نديرها توا..
نجاه بإرتباك؛عمتي مافهمت شي راهو شن درت اني بش تقولي هكي!؟
مغليه؛عارفه روحك شن دايره كويس..اسمعيني جاي كان تبي تقعدي هني معززه مكرمه تشدي صغارك وتقعمزي في الشقه وماتتحركيش منها بكل الا بعد ماتشاوريني..وردي بالك طلعي شي لحد..ردي بالك خير ماوالله العظيم يانجاة نحرمك شوفة صغارك طول عمرك..
بلعت نجاه ريقها بخوف وهي تشوفلها ..
مغليه؛فاهمه الكلام لامش فاهمه!؟
هزت راسها بإيجاب وقالت بصوت يدوب طالع..
/فاهمه..
مررت نظرها عليها بإزدراء وقالت..
/اللي تحسابه موسى يطلع فرعون..
ولفت ومشت فتحت باب الشقه وجبدت الباب وراها بقوة..
تبدلت نظرات نجاة الخايفه لنظرات كلها حقد وباين فيها الوعيد...
🍃نزلت مغليه وهي شاده دموعها بالسيف..
لقت خديجة قدامها..
وقفت وقالت؛انتي لاعاد تجيني ولاتكلميني لين يصفى قلبي جهيتك..
ومشت وخلتها...
خديجه بغيظ؛ياحقيره يانسرين..
🍃ونسرين في حوشها مقعمزة بروحها وتبكي بالعبرة..
يخطر عليها كل شي صار من لما تزوج المهدي بعائشه لعند اللي صار اليوم..الندم والحسره ياكلوا في قلبها..وفوق هدا كله شعورها بالذنب...
🍃وقعدت راما تستنى في محمد لين ملت من الانتظار بعدين خدت الحلو اللي داراته وطلعت بتروح بيه لحوشهم...
وهي طالعه..
شافت مروة جايه مع اختها تاله من حوشهم لحوش الواعر..
ومحمد مع صاحبه واقفين حدا الخيمه وكان باين ع محمد انه يسرقلها في النظر..
ومروة في عالم تاني مش مهتمه لشي ولاتفكر في شي غير في حزنها ع جدها لطفي...
انغاظت راما هلبه وين شافت محمد لاحقها بعيونه بعدين مشت طول لحوشهم خشت وسكرت الباب بقوة..
التفتوا هو وصاحبه وشافوا جهة حوش الصيد بعدين غيروا عيونهم عنه وكملوا هدرزتهم..
🍃🍃🍃🍃
في حجرة المكتب..
كان عمر متكي ع الشباك المفتوح وهو مربع ايديه ويسمع في الجالي اللي كان مقعمز ورا مكتبه شن يقول..
الجالي؛هدا خالها مافيش غيره..لكن شن يحساب روحه دار..بالك بيخوفني ويمنعني عن مرتي..مرتي بإذن الله رادها رادها غصب عنه هو والأكبر منه..
عمر؛خودها مني نصيحه توا هدي اللعب وخليك بعيد وخلي الكبار يحلوا الموضوع..
الجالي؛كيف ان شاء الله!؟ نسيت ان بوك يبيني نطلقها..
عمر:تمام خليه حتى هو لين يهدا بعدين ارجع افتح معاه الموضوع وقوله يدخل ويصلح بينكم..
الجالي سكت وهو يفكر..
عمر:صدقني كثرة التصادم ماتخليش مجال للصلح ابعد فترة وخلي الموضوع يهدا شويه وبعدين اعرف كيف تتصرف..
شبحله الجالي..
عمر؛في النهايه حيكون في بينكم عيل يعني مازال في رابط قوي..يعني في أمل..
تنهد الجالي وهز راسه بالمواقفه بعدين ناض وقال؛بنمشي ندير قهوة نحسبك؟
عمر:تمام..
مشي الجالي طلع من الحجره..
بعد ماطلع عمر التفت وشاف من الروشن للإطلاله كانت من بعيد حلوة وتخلي اللي يشوفها يسرح...
🍃وهي وقفت ع روشن دارها وفتحاته..
شافاته تفاجئت بس بعدين سرحت فيه..
حاسه اتجاهه بإعجاب وانجذاب..وسامته وشخصيته الظاهريه كانوا مميزات هلبه ويلفتوا الأنظار..
هو فاق من سرحانه وجي بيخش جو عيونه ع روشنها لمح حاجه درقت..
استغرب شويه..بعدين سكر الروشن ومشي..
هي بينت راسها شويه بعدين ضحكت وقالت..
/فضيع..
🍃وتحت في الكوجينه..
كان الجالي وهو يدير في القهوة يتخيل في طوبى لما كانت دير فيها..قعد يقلد في الخطوات متاعها وهي بين عيونه...
خلطها بن وسكر مع بعض..بعدين صب شويه ميه وخلطهم تاني..بعدين زاد ميه بارده وخلطهم تاني وحطها ع النار..
ومشي قعمز ع الكرسي وركز بنظره ع البكرج...
تخيلها ضم في الحوسه اللي دارها وتغني...
🍃عندي ثقة فيك..عندي أمل فيك🍃
بدي يغني معاها تلقائيا...
بيكفي شو بدك يعني أكتر بعد فيك
عندي حلم فيك عندي ولع فيك
بيكفي شو بدك أنو يعني موت فيك
☘خش عليه وشافه كيف يشبح لجهة وحدة ويغني استغرب لوضعه وللأغنيه اللي يغني فيها..
بعدين شاف للبكرج لقاه بيفوج مشاله بسرعه وطفا عليه..
الجالي فز.وقال:لا..مش هكي..
مشي شغل الغار..وخدي الكاشيك وقعد يحرك وكل ماتجي تغلي يرفع..
وعمر يشوفله بقلق..
بعدين وخر ومشي قعمز ع الكرسي وقلبه موجوع ع حال خوه...
🍃🍃🍃🍃🍃🍃
درست التندرا قدام الخيمه مباشره...
هي لما شافتها حطت يدها ع قلبها وقالت..
/ياحليلي والله ماعارفه شن بيصير فيا داخل..عارفه بنجي سايخه..
اسكندر بنفاد صبر:تي خلاص انزلي نفختي قلبي
سميره بوجع؛ياربي ساعدني ياربي..ايه حقه تعالى هني كان قالولي من انتي شن نقوللهم؟
اسكندر:من جدك تسألي هما في بالهم يعرفوا من تكوني!
سميره؛باهي كيف نخش هكي هاده ع الناس ومانعرفش بروحي..
اسكندر:لاإله إلا الله..بعد ماتعزي قولي اني اخت اسكندر صاحب عبد الرؤوف بن موسى..
هزت راسها وقالت:ايه صح..صح صح..وفتحت الباب ونزلت..
وهو نزل وسكر السياره..
جاها وقال؛خشي من غادي..
هي قالت؛باهي باهي ومشت طول للباب خشت منه.. وهو خش للخيمه...
🍃خشت سميره وهي مرتبكه..ولما شافت الوجوه عرفت من هما اصحاب العزي مشت عزتهم..
لعند ماوصلت في وحده ركزت في وجهها وقالت..
/مطيره!
مطيره قعدت تشوفلها كويس بعدين قالت..
/سميرة السايح!
سميره بنبرة باكيه؛خوي قالي عيلة الواعر لكن ماجاش في بالي تكون نفس العيله عيلتك يامطيره..
وضمتها بقوة وهي تبكي وتقول...15سنه فاتت ياوخيتي.
مطيره بصوت باكي مبحوح؛وفوق ياسميره فوق...
سميره ببكي:عظم الله اجرك في وخيك وسلامة راسك..
مطيره ببكي:فرقه سلامتي ياسميره معاش فيا شي سالم بعد راح وخي خلاص...
وسميره قعدت تبكي وهي ساكته..
واللي حواليهم يشوفولهم وهما متأثرين...
شويه قعمزت سميره جنب مطيره وقعدوا شادات في ايدين بعض وهما يهدرزوا ويسألوا عن بعض..
ومرة مرة يبكوا مع بعض وكانت باينه في وجوههم ملامح التعاسه مع الحزن..
~~~~~~~~
اسكندر:وصلتني معلومات ع طلعتك لكن ماكنتش متأكد ومابيت نخبر حد بيها..
عبد الرؤوف بضيق؛ياريتك قلت يااسكندر..
اسكندر؛خفت نأملهم ع الفاضي ياخالي..
عبد الرؤوف تنهد بحزن وقعد ساكت..
اسكندر:قضاء الله وقدره يارؤوف الله غالب..
عبد الرؤوف:الله يرحمه ويغفرله الله يرحمه ويغفرله..
اسكندر؛آمين..
🍃بعيد عنهم شويه..
كان نضال مقعمز يشوف لإسكندر بإمتعاض وكان يلقى ينوض يضربه ويطلع غله كله فيه
☘حداه بمسافه بسيطه..
عبد القيوم:الناس كلها شافت الموقف وسمعاته وهو يقول فيها مش مفهوم لوكان قصده ان هو اللي دارها اوانه هو اللي طلعه بطلب من الحاج لطفي الله يرحمه..انت تعرفه كويس تتوقع يديرها؟
ربيع بحيرة؛الحق.مش عارف..كل اللي نعرفه ان مختار زمان مش نفسه مختار اللي توا..
غير عبد القيوم عيونه عن ربيع للفراغ وهو يفكر..
🍃🍃🍃🍃🍃
وتعدي الساعات..
والمعزين قبل السحور بدوا يروحوا وخف جيان غيرهم...
واللي قاعدين في الحوش قعدوا يعولوا ع وجبة السحور..
الجارات المقربات زي نجمة وبنتها عواطف وغيرهم..القريبات زي نبيله وحموات فردوس
والاصدقاء زي سالمين وفايزة وبناتها..واللي تشرف ع كل شي صفيه...
اما مطيره وبنات لطفي معروف حالهم لتوا قاعدات مش مستوعبات شي...
🍃وطوبى اللي راقدة في المصحه..
كانت تذرف في الدموع بصمت وهي تمسح ع بطنها...
بين ضلوعها في حزن يتوزع ع العالم ويفيض...
حاسه الدنيا فضيت عليها..وولت وكأنها في فضاء اسود خالي مافي شي غير السواد ...
شمس وغربت ليوم الدين...والحياة من بعدها ولت ظلام في ظلام....
🍃بعد السحور..
كانت اريج وهي لابسه ملاية الصلاة مقعمزة تقرا في القرآن وتبكي..
لعند ماغلبها البكي..ضمت المصحف لقلبها وقعدت تبكي بحرقه..
ع طلعة غرفه وين شافتها مشت قعمزت ع الكرسي اللي مقابلها وهي تذرف في الدموع..
اريج وهي تبكي:نسمع في صوته يقرا في القرآن..محلاه كيف يقرا فيه..ماسمعتش احلى من تلاوته في حياتي..
غرفه بألم:اني نسمع فيه وهو يدعي دعواته كانوا ديما ع القافيه..
اريج برجفه؛ياهادي الحايرين..يامجيب السائلين..
غرفه:ياخير الراحمين...يااكرم الاكرمين..
طلعت فردوس وقالت..
ياساتر ياحليم..يارؤوف يارحيم..
وقعدت تبكي..
اريج ببكي:ياربي مش مصدقه ياربي ياربي كيف بنتحمل كيف..نحس في روحي مهدوده معاش نقدر ندير شي في حياتي..
قعمزت امها جنبها وقالت..
/مالا اني شن نقول يابنتي..
غرفه بألم؛مرار..نتبنن في المرار..ااه ياربي مانحساب يجي يوم ونقول بوي الله يرحمه..
فردوس مسحت ع وجهها وقالت..
/استغفر الله ياربي كنت نحساب اللي زي بوي مايموتوش..
سكتوا التلاته وهما يبكوا بصمت...
🍃وفي دار لطفي..
كانت الاء راقده بالنوم ع سريره وهي ضامه سوريه كان يحب يلبسها..كانوا دموعها ينزلوا من عيونها وهي راقده...
🍃🍃🍃🍃🍃
جي وقت صلاة الفجر ..
والحاج علي يبي يمشي يصلي في الجامع..
وهو ماشي بعكازه وقف عند فراش عبد القيوم اللي كان مقعمز يلبس في ساعته..
وين وقف عليه الحاج علي رفع عيونه فيه وقال..
/تبي حاجه؟
علي؛ترافقني للجامع!؟
🍃وترافقوا التارقي والحاج علي للجامع تحت صمت تام..
كل واحد فيهم كان يذكر في مرافقة لطفي للجامع..
شويه قال علي؛ من اليوم مانبي نمشي مع حد لصلاة الفجر غيرك انت..قبل كنت نحب نمشيلها بروحي وهو من بعد ماجيت انت للشارع تونس بيك في طريق الفجر..
كان يقولي رفقه التارقي للجامع تريح النفسيه..
عبد القيوم يسمع وهو يبكي من داخل بس دموع عيونه حالفين ماينزلوا باكيات لو شن يصير معاه..
علي:الله يرحمه ويغفرله ولدي ماكانش عارف ان رفقته هو اللي تريح النفسيه..
شاف عبد القيوم للحاج علي ولاحظ الدموع اللي في عيونه برغم من ملامح وجهه القاسيه...
غير عيونه عنه وشبح القدام وقال في نفسه
"لاحول ولاقوة إلا بالله"
🍃🍃🍃🍃🍃
بعد صلاة الفجر..
خش ربيع للحوش وهو رافع بايديه شنطه فيها يحيى وشنطة حوايج يحيى..
توجه لدار النوم لقي نسرين تقرا في القرآن ودموعها تنزل..
مشي حط الشناطي ع السرير بعدين طلع يحيى من شنطته وحطه في سريره وهو يقول..
/محي عطاهولي بالسيف..
هي سكرت المصحف وقالت:راقد؟
هو شافلها وقال؛ايه..
نسرين:احسن خل نرقد حتى اني..
وناضت حطت المصحف في مكانه وحولت الملايه.
بعدين مشت للسرير وخشتله..
وربيع معاها بعيونه حس ان فيها شي تاني غير حزنها ع لطفي الواعر...
خلاها ترقد وترتاح..وخدي شنطة يحيى حطها جنب السرير بعدين مشي بيغير حوايجه..
🍃🍃🍃🍃🍃🍃
الساعه12:00قبل الظهر..
في مصحة القدس..
الدكتورة في الحجرة اللي فيها طوبى تشرحلها عن وضعها..
:طوبى ماتعرضيش روحك للولاده المبكره..اني متفهمه ومقدره الوضع اللي تمري بيه لكن لازم ماتنسيش انك حامل وفي بطنك جنين ليه عليك حق..
طوبى هزت راسها وهي ساكته ماعندهاش حيل تتكلم ولاتناقش..
:اليومين هادم ماتصيميش،انتي عندك رخصه ياطوبى كولي كويس..واشربي كويس..اشربي كويس..الميه ياطوبى والالتزام بالعلاج تسمعي فيا..
هزت راسها تاني بصمت..
تنهدت الدكتورة وقالت؛تمام..مرة تانيه عظم الله اجرك وغفر لميتك والهمك الصبر..
قالت بصوت مبحوح:آمين..
الدكتورة عطت نظره لأميمه بعدين مشت طلعت واميمه فهمت عليها وقالت لطوبى:شويه وجايه..
ومشت طلعت..
🍃برا.
الدكتورة؛اميمه لو فيها كيف ماتروحش لحوشهم الفترة هادي..
اميمه بقلق:لهالدرجه في خطر عليها؟
الدكتورة؛مانبيش نبالغ ونقول خطر بس عارفة في وضع زي هدا مش حتهتم بنفسها وممكن نفسيتها تزيد تتعب اكثر وانتي تعرفي وضع زي هدا مش كويس بكل لمراة حامل في الشهر السادس..
هزت اميمه راسها موافقه لكلام الدكتورة وهي قلقه..
:التهاب المسالك عندها عالي واضح انها مش مهتمه بكل الفترة اللي فاتت...
اميمه؛مرت بشوية ظروف قبل وفاة عمي الله يرحمه..
الدكتورة؛ربي يفرج..ع العموم زي ماقتلك لازم تبعد عن جو الحوش والعزي ويقعد معاها حد يهتم بيها.
اميمه هزت راسها وقالت:تو نشوف..
الدكتورة؛تمام..ربي يكون معاكم ويصبركم..
اميمه؛آمين بارك الله فيك..
الدكتورة؛واجبي..ومشت من قدامها...
خدت اميمه نفس بعدي طلعاته وولت خشت للحجره وقالت..
/العشيه تطلعي..
طوبى؛مانبيش نروح لحوشنا..
تفاجئت اميمه..
طوبى بإستياء:مانبيش نشوف في عزي بوي اللي شفته في اللي قبله مش حنتحمل..
اميمه:الدكتورة طلبت نفس الطلب..بس يعني وين بتقعدي؟
طوبى:-حوش خالي..
🍃🍃🍃🍃🍃
"والله هدا اللي داراته كنتك المحترمه قدام الناس"
محمد شنيبه بغضب؛العيب مش عليها العيب ع الكبار اللي مانهوهاش..
مغليه؛كبار مني!؟ اذا كان مطيره العايبه قريب جت لخديجه وضربتها..
محمد شنيبه بأسف:ياخسارة والله ياخسارة وكان نحسابهم هكي ماناسبتهم بكل..
مغليه؛ من بختنا الاحرف..
تنهد وقال:خلاص انتم اللي عليكم درتوه وهما سيتهم بتقعد في وجوههم..
مغليه؛هي هادي الناس عندهم عيون تشوف وعقول تفكر يعرفوا بيها الباهي من العايب...
هو قال؛صدقتي..
مغليه؛خلينا من سيرتهم وقولي شن تبي فطور؟
هو قال:اللي يجي..
مغليه؛ولدك الكبير بيفطر عندهم زي امس؟
هو قال؛المهدي بعد الفجر ولى لزليطن..
ابتسمت تهكما وقعدت ساكته..
ناض من حداها وقال؛بنمشي للجامع ماتبي شي؟
مغليه:سلامتك..
مشي طلع من حداها..
وهي شدت السبحه بإيديها وقعدت تسبح..
🍃🍃🍃🍃🍃🍃🍃
بعد العصر..
كان حسين في جنان حوش جده يعاند في سيارته اللي مابتش تتحرك من الصبح..
حسين بعصبيه:اقعدي في امها.. وسكرها بقوة..
بعدين مشي غسل ايديه وهو يفكر بياخد سيارة مني بش يقضي مشاويره..
شويه طلع برا الحوش..ع جية التارقي بسيارته من الخدمه..
مشاله طول وقف عليه قبل لينزل قاله..
حسين؛قبل لتنزل ياغالي في حاجات وصوني نجيبهم والسيارة مش عارف شن خطر عليها قالت بوي باعني..
عبد القيوم؛اركب اركب..
مشي حسين ركب جنبه وقال:سامحنا بالله..
عبد القيوم:مش بينا الكلام هذى...
وتحرك بالسيارة...
🍃ورفع عبد القيوم حسين اللي خدي الحاجات اللي وصوه عليهم..
بعد ماحط صندوق اللبن في السيارة من الخلف..
جاه اتصال...طلع التليفون من جيبه وشاف المتصل..
فتح الخط ورد طول..
حسين؛ايوه..
"ايوه حسين وينك انت؟"
حسين؛علاش شن تبي؟
"كيف شن نبي مش بكري قتلك تعالى روح بينا من المصحه!"
خبط بيده ع جبهته بعدين قال..
/باهي باهي شويه ونوصل فيكم..
وسكر وهو يشوف لعبد القيوم وقاله..
/بنزيد نصحح وجهي ونقولك ترفعني للمصحه نروح بالعيله من غادي لحوش المحجوب تو ننعتك في الطريق..
عبد القيوم:عدي اركب عدي..
حسين؛سامحني بالله..
عبد القيوم دار روحه ماسمعاش وقعد يسكر في باب السيارة الخلفي..
بعدين مشي بيركب وهو يفكر علاش طوبى بتروح لحوش المحجوب؟
🍃🍃🍃🍃
في المصحه...
طوبى بتذمر:وينه لتوا!؟
اميمه؛قالي قريب يوصل اكيد زحمه في الطريق..
تأففت طوبى بعدين استغفرت وقعدت ساكته..
شويه رن تليفون اميمه شافاته وقالت..
/هو..
فتحت الخط وردت؛وصلت؟
"ايه انزلوا هيا"
اميمه؛هيا هي..
وسكرت وقالت؛هي نوضي طوبى..
وناضت طوبى واميمه شادتها ومشوا طلعوا مع بعض..
🍃وصلوا برا..
لما شافهم عبد القيوم طالعات زاد قدم بالسيارة لين وصل فيهم...
طوبى لما شافت السيارة حست بضيق شديد..
بعدين مشت ومعاها اميمه ساعدتها تركب...بعد ماركبتها ركبت هي من الجهة التانيه..
وتحرك عبد القيوم..
حسين: حوش المحجوب يجي ف....
قاطعه عبد القيوم وهويقول؛-عارف..
طوبى شافتله من مراية السيارة بضيق وهو يشوف للطريق وبس..غيرت عيونها عنه ورجعت تشوف للروشن والدموع في عيونها...
حسين:كيف ماشيله قبل؟
هو قال؛ايه كان في عندي موضوع بنديره هو ساعدني فيه.
حسين:اها..ايه حقه حصلت شقه ؟
عبد القيوم؛لاالموضوع هذى سكرت عليه حاليا..
حسين؛علاش مالقيتش اللي تبيه؟
عبد القيوم هز راسه وقال؛ايه..
حسين؛كان تبي نكلملك واحد يجيبلك زي ماتبي واحسن..
عبد القيوم حرك راسه بالنفي وقال..
/لاخلاص لغيتها الفكرة من راسي..
حسين: الصراحه هكي احسن شي شن دير قاعد بروحك في مكان مايعرفك فيه حد..خليك بين ناسك متونس بيهم الوحده مكروهه..
عبد القيوم هز راسه وقال:عندك حق..
حسين؛ايه حقه في عقلي سؤال من فتره وكل مانجي بنسألهولك ننسى..انت في بنغازي قعدت في حوش جبريل؟.
عبد القيوم؛في البدايه سكنت في حوش ايجار مشترك بيني وبين شباب جو يقروا في قاريونس واحد منهم يقرب لعمك جبريل اكثر من مرة الراجل عزمنا لحوشه وتعرفنا عليه وتمينا صحاب واجد..المهم السنه قبل الاخيره لسبب ما طلعنا من الحوش اللي كنا فيه وكل واحد عدا ع حاله وانا ماكانش في قدامي غير اني نأجر وحدي لعند التخرج..شوي صاحبي هذى قالي ع شقه لعمي جبريل يأجر فيها كانت فوف حوشه..عديت سكنت فيها وتميت عندهم لعند مانقلت لطرابلس...
🍃هو يحكي وطوبى كانت تسمع فيه..
اللكنه متاعه مش بنغازيه تماما فيها اختلاف كان يستخدم في عبارات بالفصحى شدت انتباهها..وقصته مع عيلة جبريل شدتها اكثر..
حسين:علاقتك بيهم قويه هلبه الحاجه سالمين سألت عليك امس..
هو قال؛الله يبارك في عمرها مراة طيبه واجد وعاملتني معاملة الام لولدها..
حسين:السر فيك انت ياصاحبي المكان اللي تعيش فيه ناسه يحبوك بسرعه
ابتسم عبد القيوم وقال؛ربك اللي يجيب فيا للناس الطيبه دعوة جدتي الله يرحمها يحطك الله بين المؤمنين دوم ياولد ولدي
حركت طوبى عيونها للمرايه وقعدت تشوفله وتقول في نفسها..
"اللي زيك انت معاش نرتاحلهم"
غيرت عيونها عنه وشافت للروشن وهي تدعي في نفسها وتقول..
"يارب اصرف عنا شره وماديرلاش علينا سلطان"
بعدين تنهدت وقالت بهمس..
/الله يرحمك يابوي..
اتكت براسها ع الروشن ودموعها نزلوا..
اميمه وهي في جنبها كان مستمعه بالحديث بين خوها والتارقي..ومرة مرة تراقب في طوبى..
شافتها وهي تبكي بصمت دمعوا عيونها بحزن..
حسين وعبد القيوم انهوا حديثهم وقعدوا ساكتين..
وقعد التارقي مركز في الطريق..شويه شاف من المرايه للطريق من الخلف جو عيونه عليها..
ماكانش عارف انها مقعمزة وراه مباشرة..لما شافها حس بقشعريرة سرت في جسده وقلبه قعد يدق بقوه خاف يسمعوها..
فيسع غير عيونه عنها وهو حاس بشعور مزعج للغايه شعور حاك في صدره ماتحملاش..
نظرة زي هادي ذنبها مضاعف..وتوا زاد ضاعف اكثر..
من اللي قاعد بحس بيه وقتها كان متمني لو ينزل من السيارة ويخليها..
كان يبي مهرب من الشعور البشع اللي كان يحس بيه..
لقي روحه يشغل في منظومة السيارة ع الراديو وكان محطوط ع قناة للقرآن الكريم..
ويسمع آية...
﴿ يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ ﴾.
ضيق شديد حس بيه في صدره بعد سمع الآيه وقعد في نفسه يستغفر ويستغفر ويستغفر...
☘مش أي حد تجيه رسائل مباشرة زي هادي وتأثر فيه في من تمر عليهم مرور الكرام وماتحركش فيهم شعره..وفي اللي ماتجيهمش اصلا لأنهم مايستحقوهاش..
وكل مالعبد يكون قريب من الله بسريرته النظيفه قبل ظاهره الله مايرضلاش بالإثم يقعد ينبه فيه ويردع فيه ونفسه المؤمنه اللوامه ماتقصرش معاه بش ترده للطريق..
امتحان صعب انحط فيه عبد القيوم صعب جدا..هالامتحان لقلبه..امتحان لقوة ايمانه واستعانته بالله...وعبد القيوم قاعد يحاول بكل جهده ينجح فيه☘
🍃🍃🍃🍃🍃🍃
خش لشقته فاحت في انفه ريحة القلي..
سكر الباب ومشي للكوجينه خش عليها ولقاها تقلي في "لقمة القاضي"..
ابتسم بتهكم بعدين قال..
/حق لزتكم طوبى الواعر من عزي بوها امس؟
هي التفتت شبحتله وحواجبها مرفوعات..
بضحكه متهكمه قال؛قالوا طردتكم شر طردة..
نزلت حواجبها ولفت بوجهها عنه وقعدت تقلب في لقمة القاضي وهي غضبانه..
محي الدين؛اممم..معناها عرفت اللي هناك وقلبتها ع روسكم..صحة لإيدها طلعت بنت الواعر حق واني اللي كنت صاخف عليها ونقول صغيره مسكينه ضحكوا عليها وشربوها المقلب وهي بتقعد تبلغ وتغص..تنهد بسخريه بعدين قال..
احسن حاجه صارت انها افتكت من خوك..
ومشي طلع من الكوجينه وخلاها تغلي من الغضب زي الزيت اللي قاعده تشوفله..
🍃وتحت عند اهله..
كانت عواطف تحط في الحاجات اللي طيبتهم في حافظات كبار بيرفعوهم هي وامها لحوش الواعر..
نجمه:في حاجه كبيره صايره بيناتهم اللي توصل بيها تلزهم هاللزه من عزي بوها..
عواطف؛اكيد..لكن انتي سمعتي خديجه شن قالت يام..قالتلها انتي من قبل بالهون شن قصدها؟
نجمه؛حتى اني سمعتها ووقفت عندها هلبه..ويخي سمعت نساوين من الجيران يقولوا نفس الموقف اللي داراته مرة في عزي عيشه لما هاجت في عتيقه وماخلت ماقالتلها..
عواطف؛قصدك فيها الطقه يام!؟.
نجمه؛لايابنتي مانقدر نقول هكي اللي نقدر نقوله ان البنادم نفسيته تتعب من غير شي يابال لو مر عليه اللي مر بعيلة الواعر وهي عاد مسكينه مابعدها سدرة كانت ميميتها واهي قاعده بين الحياة والموت وفي من قال معاش يصير منها بكل..وعمك لطفي بوها وتوفى الله يرحمه معذورة مسكينه شن مايطلع منها..
عواطف تنهدت باسف وقالت..
/الفجي فيهم وخلاص...
🍃🍃🍃🍃🍃
ووصل عبد القيوم بطوبى لحوش المحجوب..
نزلت اميمه ومشت لطوبى نزلتها..
ونزل معاهم حسين كلم الحراس اللي ع البوابه..
شويه وفتحولهم الباب وخشوا الزوز..
وهو ولى ركب مع عبد القيوم للسيارة..
عبد القيوم وهو يتفحص في سور الحوش ومدخله لاحظ ان الحراسه زادت حوالين حوشه زاد ارتاح لوجود طوبى فيه..
🍃داخل..
استقبلت نبيله طوبى واميمه...
طوبى بإحراج؛سامحيني بنقلق راحتك..
نبيله:ماتقوليش هكي بنتي الحوش حوشك وتقعدي فيه لأمتى ماتحبي..
هزت طوبى راسها وقالت؛بارك الله فيك..
اميمه مدت كيسه لنبيله وهي تقول:هادم دواها والفيتامينات متاعها الوقت مكتوب ع الدوا..
خدت نبيله الكيسه وهي تقول؛تمام..
اميمه:خلاص خلينا طوبى في امانتك ابله نبيله..
نبيله؛في عيوني..
يدوب ابتسمت طوبى بمجامله..
اميمه؛تسلمي يارب..نتلاقوا السلام عليكم..
طوبى ونبيله؛وعليكم السلام..
ومشت اميمه بتطلع ونبيله وراها تسقد فيها..
بعد ماسقدتها ولت لقت طوبى واقفه في مكانها وسرحانه ودموعها تنزل..
ارتسمت ع وجهها ملامح الحزن ومشتلها وهي تقول..
/طوبى..
شافتلها طوبى بعيونها الحزينه الغارقه بالدموع..
ضمتها نبيله وقعدت طبطب عليها..وهي شدتها وقعدت تبكي في حضنها...
🍃بعد ماهدت طوبى شويه..خدتها نبيله ورفعتها للدار بتقعد فيها..
نبيله:شنطتك هادي وتتها فردوس كان تبي ديري دوش الحمام جنبك ع وطول...
طوبى؛صحيتي ابله نبيله..
حطت يدها ع خدها وقالت؛مش بجميلي.بنتي..نزلت يدها وقالت خودي راحتك حبيبتي...
وابتسمتلها ابتسامه مطمئنه بعدين طلعت من حداها...
خدت طوبى نفس وقالت..
/لاحول ولاقوة الا بالله..
بعدين لفت ومشت للشنطه فتحتها..
لقت في وجهها المصحف متاعه والمسبحه وتحتهم الصلايه والملايه..
ارتاحت قلبها لما شافتهم...طلعتهم وحطتهم ع السرير..
بعدين طلعت ملابس حوش ومنظفات ومشت طلعت للحمام...
🍃🍃🍃🍃🍃
"عزوز النار شكلها عرفت كل شي امس في الليل جتني رعشتني ونزلت نازله"
صابرين:مانبيش نقول مايعجبكش..
"اسكتي مانبيك تقوليلي شي اني بنهدرز وخلاص"
صابرين؛مبااهي.وهداكا المتخلف ريتيه؟
"لالا..لما جيت كان مسافر ومانعرفش كان روح حضر العزي.ولالا.."
صابرين؛باهي انتي شن دايره توا؟
"درت الفطور وكملت وقاعده نراجي في المغرب مع الصغار..وانتي شن جوك في حوش مروة"
صابرين؛الحق مريحيني هلبه.والله يخلف عليه راجل مروة مخليني ع راحتي بدي يبات في المربوعه اللي برا لين خلاني نتحشم في قعادي معاهم..
"لولا راسك المسكر راك في حوشك توا"
صابرين؛لازم تختميها بنكد..
"لاياحنه لانكد عليك ولاتنكدي عليا برا عاوني.اختك بري.."
وسكرت عليها..
نزلت صابرين التليفون وقالت؛صدق اللي قال عنك معتوهه..
مروة جتها وهي تقول:من هي هادي!؟
صابرين:من غيرها اختك المتخلفه اللي فرحانه بسكنتها غادي..
قعمزت مروة وهي تقول بضيق؛-ولااني راضيه بيها بس شن بنقول ع خاطر هالصغويره..
صابرين:الحمد لله مانجيبش في صغار فكني ربي من المرمده..
مروة شبحتلها بعدم رضا بعدين غيرت عيونها للتلفزيون وقالت..
/مقنينته المسلسل عجبني من اول حلقه..
صابرين؛ خالد امين دوره مستفز..شن اسمه المسلسل حقة؟
مروة؛عزوتي..
🍃🍃🍃🍃🍃🍃
الساعه 11:00ليلا..
في الطريق..
رافع اخته للعزي وهو يسمع فيها تحكيله في قصة صداقتها ببنت علي الواعر..
سميرة:كانت تخدم معاي في االمصنع وكنا صحبة الروح بالروح..لين بطلت خدمه في المصنع وحولت هي وراجلها من المنطقه اللي كانوا يسكنوا فيها بعدها معاش نندري عليها بكل لأمس..تصدق..الايام اللي فاتو خطرت عليا وتفكرت ايامها ماكنتش نحساب ربي بيجمعني بيها عن قريب..
اسكندر بإبتسامه؛سبحان الله..
خشوا للشارع..ودرس السياره قريبه للباب..
ونزلوا هو واخته ونزل بضاعة وحافظات موالح دايرتهم سميره..
وقعدت دخل فيهم بالحاجه لين جوها البنات الصغار وساعدوها...
🍃في عزي لطفي الواعر الناس تفكرت اللي كان يديروا فيه ايام زمان..لما كانوا يتكفلوا بماكلة العزي وكل شي يخصه..
يوم الفرق اجتمعوا الجيران وداروا كل شي في حوش الجعفري ورفعوه بعدين لحوش الواعر مابوش يديرولهم حوسه...
كان الاحترام واضح جدا لعزي لطفي الواعر ..
لكن..
غياب طوبى كان مداير علامة استفهام كبيره..
قالولهم انها تعبانه...لكن الناس وين يخطر عليها اللي صار اول يوم عزي وحالة طوبى وقتها وردخديجه عليها تبدأ عقولهم تفسر في التفسيرات اللي هما يبوها واللي نفوسهم تميللها...
🍃في نفس الليله اللي حضرها المهدي وولده محمد..
جنب الخيمه..
محمد المهدي:بالله عليك!
:زي مانحكيلك..امس خشوا على عمي الكوشه لم منه خبزة بلاش وطلع..
محمد بأسف؛ماتوقعتاش توصل بيه لهني..
:تي بكل ياراجل يفوت من جنبي يدير روحه ماشافنيش..
محمد؛يحساب اخر اللي يدير فيه خير..ان شاء الله يفيق ع عمره قبل مايفوت الفوت..
:إن شاء الله...شويه غير عيونه لما سمع صوت سيارة جاية..حي ع امها رانج روفر اول مرة نشوفها قريبه مني هكي..
محمد قعد يشوف للسيارة اللي كان شكلها مألوف بالنسبه ليه..
نزلوا منها مراة وبنيه في عمر مروة..ومشوا طول خشوا للحوش..
بعدين نزل صاحب السيارة..
لما شافه محمد انصدم..
وهو بعد سكر سيارته..تجاهل وجود محمد وقعد يمشي بتكبر مقصود وفات من حداهم وخش للخيمه..
:عيلة جكتورة لكن البنت طرف اطلع طول..
محمد شاف لصاحبه وقال بعصبيه..
/ادوي باهي ..
ضحك صاحبه وقال:انبصروا يابرو خيرك!..
محمد فاته ومشي خش للخيمه..
وشاف مالك مقعمز جنب واحد من المعزين اللي في بينهم سابق معرفه...
قعمز وهو يشوفله بغيظ وغيرة..
زي ماصاير مع عمه اللي طول ايام العزي والغيره واكله قلبه ووالعه في صدره نار ماتبيش تنطفى...
🍃🍃🍃🍃🍃
وتعدي ايام العزي يوم ورا يوم...
وطوبى في حوش خالها حبيسة دارها مع المصحف والصلاة ماكانتش تجتمع بحد من اهل الحوش الا لما تجيبلها نبيله ماكلتها وادويتها...
وخالها يخش عليها يسأل عن حالها ويطلع..
لاهو ولامرته كانوا يبوا يفتحوا معاها اي موضوع لأنها في وضع مايتحملش الانفعال فوق الحزن...
🍃وبعد مامروا 10ايام بالزبط..
سافر الحاج علي مرافق واحد من اصدقائه للعمره اللي اصر اصرار شديد انه يديرها عنه وعن ولده واضطر يوسف يأجل رجعته لسويسرا ع خاطر جده اللي قرر يلحقه بعد يومين..
🍃بعد هالعشرة ايام اللي مروا..
استجمعوا بنات الواعر قوتهم وتمسكوا بالصبر بش يقدروا يكملوا هالحياة المليانه مصاعب وابتلاءات..
☘اما حوش شنيبه..
فقاعد حظر التجول قائم ع نجاة..والمقاطعه مستمرة
لخديجه من مغليه..اللي صارت بينها وبين ولدها اول مواجهه بعد اللي عرفاته لما جي بيسلم عليها قبل ليسافر..
🍃خش عليها وقال:امي..
ومشالها..ووين وصل فيها وطبس بيسلم عليها.
تجيه صفعه من حيث لايعلم من قوتها لين دارت في وذنه صوت..
هو قعد يشوفلها بصدمه وفال:خيرك يام!..
وقفت قدامه وقالت بغضب..
/ضاقت عليك معاش لقيت لمن تشبح كان لهادي لا وفوقها تتزوجها وطلقها من ورانا مخلينا غافلين ومضحكه للي يسوا واللي مايسواش..
الجالي بغضب ودموعه؛حتى انتي يام..حتى انتي!!
بعصبيه:اسكت خيرلك اسكت الكركينطي هدا معاش يمشي عليا..
قعد يشوف لأمه بنظرات صدمه وحزن وخوف..
مغليه؛احمد ربك اللي جاتك في طوبى كان اني في مكانها نشهدر بيك في كل تركينه يانذل..لكن الله غالب جيت ولدي مفروض نستر عليك ومانخلي حد يوصل فيك ولايفضح بينا وتوا امشي اطلع اقلب وجهك والحوش هدا معاش تخشله في غياب بوك زي في حضوره....
هو كان يشوف لأمه بغضب مع صدمة والدموع معبيات عيونه..بعدين هز راسه وقال..
/تمام يام..تمام..
ولف ومشي طلع من حداها..
هي قعدت واقفه تشوف للباب لين سمعت باب الحوش..
تبدلت ملامح الغضب ع وجهها لملامح بكاء..قعمزت بهده ع الكرسي وضمت ايديها لبعض بقوة وقعدت تبكي بحسرة...
🍃🍃🍃🍃🍃🍃
وفي الحوش اللي في جنبهم بمسافه بسيطه..
تحديدا شقة عبد القيوم..
كانوا عمه وعمته في دار المعيشه يهدرزوا..
عبد الله؛ننصحك للمرة الاخيره ياسليمه ماتدخليش في حياته وماتفرضي عليه شي..
سليمه؛عبد الله عبد القيوم ولدي خليني انا وياه نتفاهموا..
عبد الله:تفاهموا ياستي خلي نشوفوا اخرتها..
ع جية عبد القيوم من الكوجينه وفي يده سفرة فيها براد شاهي اخضر وطواسي..
حطها قدامهم وقعمز وبدي يصبلهم..
سليمه:تسلم ياغالي..
مدلها طاسة الشاهي وهو يقول:ويسلمك..
خدتها وهي تشوفلها بشي من التوتر..
مد لعمه طاسة الشاهي خداها منه وقال:احسنت..
بعدين صب لروحه وقال؛كان تكملوا معاي عقاب الشهر..
عبد الله؛ياريت بس تعرف العيله يطالبوا بينا بالذات عمتك..
سليمه:ليش ماترد معانا وتكمل الشهر غادي..
عبد القيوم؛صعب..وشرب من طاسة الشاهي..
سليمه؛شن اللي مصعبها؟! عملك قصدك!؟.
عبد القيوم هز راسه بإيجاب..
سليمه؛باهي تعال قرب العيد..
عبد القيوم؛ممكن ثاني يوم ان شاء الله نكون غادي..
سليمه؛وحط في بالك راك بطول..
عبد القيوم؛يومين زياده عليهن مانقدرش..
سليمه؛وليش!؟مش صعب تاخد اجازة اسبوع..
عبد القيوم:لاواجد اسبوع..
عبد الله قاعد يسمع وهو يرشف في الشاهي ويمرر في نظره بيناتهم..
سليمه تنهدت وقالت؛نبيك في موضوع من الاخير..
هو عقد حواجبه وقال؛موضوع شنو؟
حط سليمه طاسة الشاهي في السفره وقالت..
/اساس جيتنا هنا الموضوع هذ بس صادفت حالة الوفاة..ومانقدرش نروح قبل لنحكي معاك فيه..
عبد القيوم؛اللي هو؟
سليمه؛نبي نخطبلك..
حط طاسة الشاهي في السفره وقال؛معليشي عمتي وماتاخذنيش يعني نا قتلك نبي نخطب؟
سليمه؛لاماقلتش انا اللي قلت..انا في عوض امك ياعبد القيوم وتهمني مصلحتك كيفك كيف عيالي كلهم..
عبد القيوم؛ ع عيني وراسي في كل شي الا الحاجه هذي امي نفسها لو كانت حيه مانخليهاش تقرر عني قرار مش من حق اي حد ياخده غيري..
سليمه بشي من الحده؛لما تكون مش عارف مصلحتك وين تحتاج حد كبير يوريها لكي وانت مانكش مقطوع من شجره..
عبد الله؛سليمه العيل عنده حق موضوع كيف هذى يخصه وحده ماحد ليه علاقه بيه..
سليمه؛اني الادرى بمصلحته ياعبد الله انا اللي مربياته مع امي وتاعبه عليه ووين نشوفه يتصرف غلط من حقي نوجهه ونوريه..
عبد الله؛يتصرف غلط في شنو بالضبط!؟
سكتت سليمه وشافت لولد خوها..
وعبد القيوم يشوفلها بضيق...
عبد الله:سليمه نسأل فيك؟.
سليمه بشي من الانفعال:ماهوش صغير ياعبد الله عمره31عام مفروض يجوز خلاص نداده واصغر منه بعيالهم وهو قاعدلي هنا بروحه ماعنده من يونس ولايرد باله منه وانا نقعد مشغوله عليه حتى الليل مانرقده كيف الناس ياعبدالله..
غير عبد الله نظره لعبدالقيوم..
وعبد القيوم وهو يشوف لعمته قال بهدوء..
/سامحيني كان شقيتك وتعبتك معايا انتي درتي معاي واجبك والزايد ربيتي وكبرتي وكنتيلي ام مع جدتي الله يرحمها تعبتوا عليا لين خليتوني راجل واعي يقدر يتحمل مسؤولية نفسه..
دمعوا عيونها وهي تسمع فيه شن يقول..
وهو مكمل يقول:توا انا مسؤول من نفسي بس؛نعيش حياتي بالطريقه اللي تريحني نزوج نقعد عازب عمري كله هذى شي يرجعلي وسامحيني ع كلمتي هذي..مانبي حد يدخل في حياتي ولايقولي شن ندير وشن مانديرش لأني تعديتها المرحله هذي خلاص..
سليمه هزت راسها وقالت:خلاص انت حر وسامحيني اللي نشغل في روحي بيك..وناضت ومشت طلعت للدار التانيه..
تنهد عبد القيوم بضيق وعمه قال...
/ماتزعلش عمتك عارفها قديش تحبك وتعزك وهمها كله مصلحتك..
عبد القيوم؛عارف الله عارف..لكن نبيها هي ماتزعلش مني وتحاول تفهمني بس..
عبد الله:ماعليك ياولدي تو نزيد نحكي معاها وان شاء الله ماتطلع من هنا بكرا الا وهي راضيه..
تنهد عبد القيوم وهز راسه بإيجاب مسايره
لعمه بعدين خدي طاسة الشاهي وشربها كلها في مرة..
🍃🍃🍃🍃🍃
وفي مكان بعيد..
منطقه مشهوره في العاصمه في احد احيائها اللي يعيشوا فيها اصحاب النفوذ والسلطه في البلاد..
كان احدهم مداير "ليلة رمضانيه" عازم عليها شخصيات مهمه..
منهم المحجوب...واحد رجال الاعمال اللي يكون صديق لمختار ووالد زوجته السابقه..
المحجوب يعرفه وعنده عليه معلومات وبعد ماعرف امه حيحضر قبل العزومه للدعوة هادي..
واللي صار بعدين انه مشاله وتعرف عليه وعرفه بنفسه..
:فرصه سعيده سيادة المستشار..
المحجوب:اني اسعد..بس في معلومه مش عارف كان مهم تعرفها ولالا..اني نكون خال مختار علي الواعر..
تفاجئ وقال؛معقوله!؟.
ابتسم وقال؛توقعت مايكونش عندك علم..
مدله يده وصافحه بحرارة وهو يقول بتزلف؛
/صدقا فرحتني جدا المعلومه عادي طلعت فعلا فرصه سعيده..
المحجوب بإبتسامه:مشكور جدا..
طلق يده وقال؛بعيد عن كل شي نبي نتعرف ع حضرتك اكثر مرات يكون في بينا شغل مستقبلا..
بضحكه قال:وعلاش لا...
ضحك المحجوب ضحكة خفيفه بعدين قال...
/نقعمزوا غادي..
؛نقعمزوا ليش لا..
ومشوا هما الزوز قعمزوا ع وحده من الكنبات وقعدوا يهدرزوا...
🍃🍃🍃🍃🍃🍃
"بتقنعني انك مش عارف شي!؟"
ربيع:يام لو كنت نعرف راهو قتلك نعرف ومش حاكي شي..
ام ربيع؛عارفاتك ياسيدي..لكن الحق خاطري نعرف شن هو اللي دايرينه مع المراة بش لزتهم من عزي بوها تي دعت عليهم دعي يرعش العظام دعي وحده مقهورة..
ربيع تنهد بضيق وقال:ربي يفرج وخلاص..
:ايه والله ربي يفرج عليهم مساكين..باهي قولي خيرها ماجتش معاك ليلة شربت فنجان قهوة اللطف؟
ربيع:يام كان بتقعدي ديريلي هكي كل مانجي خل نشد حوشي ونقعمز احسن..
:واني شن قلت سألت سؤال عادي..نساوين خوتك وخواتك ينشدوا عليها ويبوا يعزموكم الزوز وكل مايكلموها ماتردش عليهم..حركاتها هادم غلط لكن سكتنا عليهم ولولا كلامك اللي قلته توا راني ماطلعتاش..
~~~~~~~~
نسرين بضيق؛نفسيتي تاعبه ياربيع ومش طايقه حتى روحي تشوف فيا حتى حوش ماليا اللي حداي مانمشيلهم..
مسح ع شعرها وقال؛باهي احكيلي طلعيلي اللي فقلبك راجلك اني يامراة انتي..
هي احتمت بيه وشدت فيه وقالت؛توا مانبي ندوي في شي ربيع نبي نرتاح وبس..
احتواها بحنان وهو يقول:حاضر من عيوني..هي تعالي..
ومشي بيها وخشوا للدار...
🍃ومن نسرين لأختها خديجه اللي كان في الحمام ترجع بقوة ليها وقت وماكان في حد معاها في الشقه..
شويه وطلعت وهي حاسه بدوخه وتعب وقعدت تمشي بالشويه عليها لين خشت لدار النوم..
قعمزت ع السرير وهي تمسح بيدها ع جبهتها وهي تقول..
/واضحه ياخديجه..وحمي مابنغبا فيه..
نزلت يدها وقعدت دور بعيونها ع التليفون لين لقاته وناضت بتاخده بش تتصل براجلها..
🍃وتحت في الدور الأول..
كانت حماتها عواطف تراسل في الشارف..
(الراجل ليه 15يوم بس متوفي وبوي قاعد متأثر عليه هلبه خليها لبعد العيد وخلاص)
(امري لله..خلاص بعد العيد نبي نتم فيك ياعواطف اخر كلام راهو)
ابتسمت وهي فرحانه بعدين بعتتله..
(بإذن الله)
🍃وبرا من الدار في الصاله تحديدا..
راما كانت تراسل في اسماء وهي فحالة صدمه..
(شن دارولهم)
(شن بيديرولهم اكيد قتلوهم)
(وتقولي فيها عادي هكي!؟)
(من قاللهم يحفرولي يارموشه هما اللي شروا شري يستاهلوا مايجيهم)
وراما تقرا وهي خايفه..
شويه بعتتلها..
(شويه راما منجوهي يتصل)
🍃اسماء ردت ع مالك وهي تقول..
/هلا بيبي..
"شن دايرة انتي"
اسماء:خيرني شن دايرة؟
"فكيني من جو الاستعباط اسما"
اسماء؛من الاول قتلك مالك اني مانخليش حقي اللي يحفرلي نردمه في حفرته
"خلاص حتى اني حفرتلك وردمتك وقريت عليك الفاتحه انسيني بكل يااسما"
اسماء بإنفعال؛بالناقص ياحبي بالناقص ياما منهم يستنوا في اشارة مني واحسن منك مليون مرة اكيد مش حنوقف حياتي عليك..
"في ستين الف داهيه"
وسكر عليها..
هي نزلت التليفون وقعدت تشوفله بعصبيه ودموعها في عيونها..بعدين حدفاته ع الأرض وكسراته وقعدت تبكي..
🍃🍃🍃🍃
تاني يوم..
الخميس..
1يونيو من سنة2018...
الساعه 10:40ليلا..
سيارة كبيره سودا زجاجها معتهم ووراها سيارة مرافقه كانت متوجه بطوبى ونبيله لشارع القهوة..
بعد خفت زحمة العزي ومعاش بدي يجي حد اخطا الجيران المقربين قررت طوبى تروح..
لكن قلبها طول الطريق كان مقبوض..
مش عارفه كيف بتخش الحوش وبوها معاش ليه وجود فيه..
ماقعد منه كان الذكريات اللي سيبها في الأماكن...
🍃وصلت السيارة قدام الحوش...
ومن روشن شقة نجاة اللي كان مطل ع الشارع كانت واقفه تشوف فيهم..
شافت طوبى وهي نازله مع نبيله..
بعدين شافت حسين وهو طالع من حوشهم جاهم طول وقف عليهم وكلمهم بعدين خدي شنطة طوبى وخش للحوش ونبيله وطوبى خشوا وراه..
قالت بتعجب وتهكم في نفس الوقت..
/ولد عم الفروح ياحنه كان يلقى مايخليهاش تمشي ع الوطا...!
🍃وطوبى..
اول ماحطت رجلها داخل الحوش...
حست بشي تجمع في صدرها ووجعها هلبه...
تشوف في الجنان وكأنه خرابه رغم انه في الواقع ماكانش هكي...
ثبتت نظرها ع الكرسي اللي قاعد في مكانه..
الدموع طاحوا من عيونها..غيرتهم عنه وكملت طريقها بش تخش داخل ونبيله وراها وهي تشوفلها بحزن..
اما حسين وصل للشنطه لفم الباب الدخلاني ووخر عنه وقعد واقف في الجنان..
🍃طوبى وين خشت داخل الحوش..
حست بخنقه..كأن الحوش مكتوم مافيشي هوا تتنفسه..
معاش فيه حياة...معاش فيه الوان كل شي باهت..
طلعت قدامها سالمين اللي كانت طالعه من الكوجينه..
وين شافتها قالت بألم..
/بنتي طوبى..
طوبى مشتلها بخطواتها المتثاقله وضمتها وانهارت بالبكي..
وسالمين قعدت تبكي معاها..
ع طلعة فردوس من الكوجينه وطلعة بناتها من الديار..
وين شافوا طوبى وحالتها قعدوا يبكوا..
بعد ماطلقتها سالمين ضمت فردوس وبكوا الزوز لين طاح جهدهم...
ونبيله تفك فيهم من بعض وقعدت تحاول في طوبى بش تهديها...
طلعتلها غرفه من دار المعيشه وهي تبكي وقالت..
/الله يرحمه يا طوبى الله يرحمه ويغفرله قوي عزمك ياوخيتي ع خاطر اللي في بطنك..
طوبى وهي تبكي؛كيف قدرتوا تعيشوا فيه الحوش ترقدوا وتنوضوا وتاكلوا وتشربوا فيها!؟
فردوس بألم؛نومنا نوم المريض اللي يشكي..وماكلتنا وشرابنا فيه بالغصه حتى النفس نتنفسوا فيه بالسيف..
طوبى ببكي:ااه ياربي..مش طالبه شي غير الصبر الصبر بس ياربي..
غرفه بنبرة باكيه؛ربي يصبرنا ويقوي عزومنا...
سالمين وهي تمسح في دموعها؛لازم تصبرن وتكونن قويات مادام ربي مازال ماد في عماركن لازم تتخطن كل شي وتعيشن..اكيد باتكن الله يرحمه يبيكن ديما تقعدن قويات مايهدكن شي لاموته ولاغيره..
طوبى تفكرت وصيته ليها...
وفردوس قالت وهي تمسح في دموعها..
/صدقتي خالتي سالمين كان ديما يقوللنا في نفس الكلام الله يغفرله ويرحمه..
سكتوا شويه بعدين طوبى قالت..
/عمتي وين؟
غرفه؛راقده في الدار..
هزت طوبى راسها ..بعدين غيرت نظرها لدار بوها وامها..
حركت رجليها ومشتلها تحت انظارهم..
فتحت الباب وخشت وسكراته عليه...
مررت نظرها ع الدار وهي تشم في ريحته فيها..
ثبتت عيونها ع مشبك الشعر اللي قاعد في مكانه بس هالمرة كان في جنبها حاجات تانيه..
قدمتلهم وهي تشوف فيهم..
نظاراته الطبيه والمصحف متاعه..
وقفت ع الكمادينو..خدت النظاره وقعدت تتلمس فيها بيدها وهي تبكي بصمت...
بعدين مدت يدها للمصحف خداته ومشت قعمزت ع السرير قعدت تشوفلهم وهي تتفكر فيه كيف كان يقرا القرآن..
ضمتهم الزوز لقلبها وقعدت تبكي بحرقه...
🍃🍃🍃🍃🍃
"راهو هادي اخر مرة ياحسنا هو هكي قال"
حسناء؛ياوخيتي اخر مرة من غير مايقول خلاص التوبه..
اميمه:ربي يهدي سركم..
حسناء بضيق:آمين..
وفاتوا الزوز وهما يمشوا من جنب وسام وصديقه..
قعدوا معاهم بعيونهم بعدين صاحبه قال..
/مش معدله عليك بكل ياراجل..
شبحله وقال:واني شن اللي مهبلني فيها غير تكبر متاعها نموت في نوعيتها..
:خايف تقلب معاك جديات ياصاحبي..
وسام:حولها من راسك الحاجه هادي مانحطش في ذمتي فضلة غيري...غير هادي عاجبتني ونبيها..
:عمرك ماحطولها..
وسام بإبتسامة خبث؛وراسك ياغالي لما نطولها وغدوة نفكرك...
🍃🍃🍃🍃🍃
"اخر كلام اريج مافيش تراجع"
هادي نبيله تكلم في اريج وهي واقفه عليها في الجنان الخلفي.
اريج بحزم؛مافيش تراجع خلاص تم الكلام..
تنهدت نبيله وقالت:إن شاء الله خير..
اريج:إن شاء الله...
🍃🍃🍃🍃
بعد مرور يوم...
السبت...
3يونيو...سنة 2018...
الساعه 11:00صباحا...
في حوش شنيبه...
كانول صغار نجاة يلعبوا في الجنان تحت الضليله..
شويه دق باب الحوش...
مشي حمزة يشوفه..
وصل فيه وفتحه لقي واحد واقف شاده في يده شي يشبه الملف قاله؛اهلا بابا..
حمزة؛اهلا..
الراجل قاله؛ولدي شن يكونلك نضال شنيبه؟
حمزة؛عمي؟
الراجل:باهي برا ناديلي عمك ولدي..
ع طلعة عمر وهو لابس لبس الخدمه عنده رحلة بعد ساعة..
شاف الراجل استغرب وقال؛تفضل خوي؟!
الراجل؛انت نضال شنيبه..
عمر:لاخوه..خير شن تبي فيه؟
الراجل طلع ورقه وقال:نبيه يستلم الورقه هادي ويوقع انه استلمها..
خدي عمر الورقه وقعد يقرا فيها انصدم...
والراجل يشوفله..
شافله عمر وقال؛هو حاليا مش موجود نوقعلك اني عادي؟
الراجل؛مش مشكله..
ووقع عمر واستلم الورقه من المحضر..
بعد ماشي المحضر..سكر عمر الباب وهو يقرا في الورقه للمرة التانيه ويقول..
"ربي يعدي هاليوم على خير"
#تحول
#طوبى
....يتبع....
