#طوبى "جنة طوبى"
#جمان_فريد
#الجزء_الرابع_والستين"رسالة أخيرة2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 «وهَممْتُ أنْ أشْكو الهُمومَ لصَاحبِي
فذكرتُ أنَّك مِن وَريدِي أقربُ
عَبدٌ أنا والحُزن يَعصِرُ خَافقِي
ضمِّد جِراحِي إنَّني لكَ أهربُ.»🍃
_________________________________________
وصلهم نضال للصاله..
خشولها...وكانت في استقبالهم نجمه ومعاها عواطف وخديجه...
سلموا عليهم...ولما جت خديجه دلهم ع طاولتهم..
طوبى:نبي الحمامات؟
عواطف:اني تونرفعك تعالي..
ومشت خديجه بنجاة ومغليه..
وطوبى مشت مع عواطف...
لين وصلتها للحمام...
طوبى بإبتسامه:صحيتي..
عواطف وهي مبتسمه:سلمك..
ومشت...
وطوبى خشت للحمام وهي تفكر في عواطف..
اللي كان باين في عيونها الحزن برغم الابتسامه المرسومه ع وجهها..
سكرت الباب..
ومشت للمرايه..حطت شنطتها ع المرمرة اللي قدامها.
وحولت عبايتها..وهي تساوي في شعرها..
كانت تمرر في نظرها ع شكلها في الملايه..
انصدمت..لما شافت روحها من غير خراص "اقراط"
شافت ليدها اليمين لقتها فاضيه مافيهاشي غير الدبله العمليه..
رجعت شافت للمرايه لقت في رقبتها عقد"طوبى"..
ارتفعت دقات قلبها من الخوف...
وبدوا ايديها يرجفوا...
خدت الشنطه فتحتها مالقت فيها شي غير التليفون..
غمضت عيونها بأسف وقالت...
شن درتي ياطوبى!..
فتحت عيونها وهي تشوف لروحها في المرايه ..
كانت انفاسها متسارعه ودموعها عبوا عيونها..
وقالت..
كيف بندير توا..كيف بندير!؟..
رفعت يدها لجبينها حكاته..بعدين نزلتها لحاجبها مسحت عليه ونزلتها وحطتها ع المرمره..
بلعت ريقها وقالت..
خلاص اللي صار صار..ماعندي ندير..
خدت الشنطه والعبايه..
شافت لروحها في المرايه..
خدت نفس عميق...وطلعاته..
بعدين مشت طلعت من الحمام..
🍃وهي تمشي كانت تفكر في ردة فعل عزوزتها اللي تحب تتباهى بيها قدام الناس..
اللي تبيها ديما في احسن صورة وتبان زي الأميرات بش توري الناس كنتها الجميله اللي معيشينها في خيار خيرها وهالشي طبعا لازم يبان في مظهرها لأن الناس ليهم الظاهر
بس...
خشت للقاعه..
ولأول مرة طوبى..تتخيل في الناس كلها تشوفلها بنظرات استنكار وعدم رضا..
فقدت ثقتها بنفسها لهالدرجه...!
السقوط مدوي من اعلى القمه للقاع..يقتل..
وطوبى حست ان ثقتها بنفسها ماتت خلاص..
وصلت للطاوله..
عيونها جو ع نجاه اللي كانت واقفه ع خديجه بعيد شويه عنهم..
قعمزت وهي تشوفلهم...ومركزه علي خديجه كيف تكلم فيها..
🍃خديجه:يابرودك مسيبه ولدك وجايه تهيجي؟!
نجاه بإبتسامه مستفزة:ولدك خالاته حاطاته في عيونهم زي ماانتي حاطه ولد نسرين في عيونك..
رفعت خديجه حاجبها وقالت؛لاهو مكانه ولاهو وقته لكن لازم نسأله هالسؤال..شن صار بينك وبين الجالي؟
نجاه وهي مبتسمه نفس الابتسامه:اللي تبيه واخيرا صار..اني وخوك خلاص كل شي بينا انتهي وهو يراجي امتى يجي الوقت المناسب للطلاق بش يطلع تعرفي الطلاق توا مايصيرش..
خديجه قعدت تشبحلها بشك..
شاكه في برودها..وتسليمها في الجالي بالذات بعد اللي صار فيها...
نجاه:يللا..ربي يهنيه مع لعبته الحلوة واني ان شاء الله نلقى سيد سيده..
ولفت ومشت بغرور..
وخديجه معاها بعيونها وهي تشوفلها بشك..
وطوبى عيونها مع نظرات خديجه..
لين جت نجاه وقعمزت..
طوبى شبحتلها وقالت؛وين عمتي؟
نجاه وهي تلعب بالقرط متاع وذنها اليسار:واقفه مع ام العروسه..
شبحت طوبى لنجمه لقت مغليه جايه من عندها حست بالتوتر..
اما نجاه..طلعت تليفونها وقعدت تصور في روحها..
وصلت فيهم مغليه وقعمزت وهي تقول..
قنينه الصاله..
نزلت نجاة تليفونها وقالت..
ماشي حالها..
مغليه شبحت لطوبى..وركزت عليها..
ضيقت عيونها وقالت..
طوبى خيرك مش لابسه ذهب!؟
شبحتلها نجاه برفعة حاجب..
طوبى وهي تحاول تخفي توترها..
جيت بنلبس معاه طاكم فضه حطيته ع الزيانه وطلعت بسرعه ونسيته..
مغليه شبحتلها بنظره خوفتها..
وغيرت عيونها عنها وقعدت تشوف الناس..
صمت مغليه وعدم تعقيبها خوف طوبى اكثر..
ونجاه كانت مستمتعه ع الآخر..
شويه وجت خديجه ومعاها سلفاتها بش يسلموا..
قالوا..
السلام عليكم..
ردوا عليهم السلام..
وبدوا السلفات يسلموا..
وخديجه تشوفلهم بإبتسامه لعند ماوصلوا في طوبى بيسلموا عليها..
وين وقفت..
مررت خديجه نظرها عليها بدقه..واختفت ابتسامتها..
قعدت تشوفلها بنظرات حاده لين قعمزت..
شبحتلها طوبى وهي مقعمزة..
شافت نظراتها..
غيرت خديجه عيونها عنها..وشبحت لسلفاتها وكان باين عليها انها معصبه..
طوبى بلعت ريقها وغيرت نظرها لراما..
شافتها شن لابسه...
فستان مش لعمرها عاري ومش مناسب نهائي لاليها ولالغيرها..
استهجنت المنظر برغم حبها لراما..
خديجه:جاياتك يام شويه بس..
ومشت خديجه مع سلفاتها...
نجاة:الجو ممل خيرهم مش جايبين منشطه؟
مغليه شبحتلها وقالت؛قالوا بيجيوا منشطه لكن شورها مازال ماجتش..
هزت نجاه راسها وهي ساكته..
وطوبى تشوف لعزوزتها اللي ماتبيش تشبح لوجهها نهائي..
تنهدت تنهيده مكتومه..وقعدت تمرر في نظرها ع الحاضرات..
☘وشويه وخشت المنشطه..
ونشطت الاجواء..وبدت الحفله فعلا..
وطبعا كانت خديجه تحب تكون الأبرز..
استعرضت لما رقصت هي الاولى ع المسرح..
بعدين اللي هادي ركبت ع المسرح وقعدت ترقص..
🍃مغليه:تقدري ترقصي نجيوه..
ابتسمت وقالت؛اني اللي نقدر..
وناضت ومشت للمسرح وطوبى تشوفلها وهي متفاجئه فيها..
كيف قاعده لتوا ماسكرتش شهر وهي طالعه من حادث ومدايره عملية استئصال رحم وعندها حيل لهدا كله!؟
🍃ونجاة اللي كانت محط انظار الجميع..
وقفت ع المسرح وبدت ترقص..ماكانتش تجهد في نفسها هلبه..بس رقصها كان حلو وخلا نظرات الاعجاب محاوطتها..
طوبى نفسها اعجبت بيها هلبه..
ومغليه تسرق في نظرات حاده لطوبى وهي تقارن فيها بنجاة..
نفسها نظرات خديجه اللي كانت معصبه من طوبى لأبعد حد...
🍃🍃🍃🍃
وبعيد عنهم..
في حوش شنيبه..
كان الجالي متكي في دار المعيشه يتفرج ع قناة رياضيه..
ع خشة نسرين وهي تقول؛رقد..
الجالي؛مادام رقد ديريلنا عشي..
مشت قعمزت حداه وقالت؛قبلها في حاجه نبي نعرفها..
شبحلها وقال:حاجة شني؟
نسرين:حقه نجاة سيبت الخدمه في الشركه..
شبح للتلفزيون وعقد حواجبه وهز راسه بإيجاب..
نسرين وهي متفاجئه؛لما قالتها ماصدقتش..
هو قال:شن قالت؟
نسرين؛قالت استقلت وتوا بنفتح مكتب مع مهندسين تانيين
ضيق عيونه وقال؛بتفتح مكتب؟
نسرين:ايه هي هكي قالت..
ابتسم تهكما لما فكر ان نجاه قالت هكي بش تغيظه مش أكثر..
وغير نظره للتلفزيون وقال:نوضي ديري عشي نوضي..
حست نسرين انه مايبيش يدوي في موضوع نجاة..
ناضت وهي تقول؛باهي..
ومشت طلعت وخلاته..
هو رجع فكر في كلامها..بعدين ابتسم سخرية قال..
والله ماتقدر..
🍃🍃🍃🍃🍃
نزلت نجاة من ع المسرح ومشت ولت قعمزت حدا عزوزتها..
مغليه:يعطيك الصحه..
نجاة بإبتسامه:سلمك عمتي..
ومغليه ولابت تعبر طوبى ولا كأنها مقعمزه اصلا..
نجاه شبحتلها وقالت؛خيرك مانضتيش؟
طوبى حركت راسها بالرفض وقالت؛ماخاطريش..
رفعت نجاة حواجبها وقالت:اها..بعدين نزلتهم..
وينطفى ضي الصاله ومايقعدش الا الضي المخفي بس..
يعني العروسه بتخش..
كلهم شافوا لفم القاعه ومغليه قالت..
اشبح كيف بتطلع..
☘وفم القاعه..
نجاح وهي لابسه فستان الزفاف اللي كان بموديله الحلو المحتشم مطلعها احلى طلعه..
وزينتها وتسريحه شعرها اللي خلوها متألقه في ليلة عمرها..
كانت متوتره وهي شاده بإيديها الزوز الباقه وتقول..
رجلي يرعشوا..
وحده من نساوين خوتها؛طبيعي كلنا صار فينا هكي..
وضحكوا..
وعواطف تسمع فيهم وهي حاسه روحها مخنوقه برغم الابتسامه المرسومه ع وجهها..
خديجه وهي تكلم في المصورة؛هيا خلاص بعدوا شويه..ابدي هي..
شافت لنجاح وقالت؛هيا نجوحه وحده وحده عليك..
ابتسمت نجاح..وبدت تمشي..
والمصورة تصور فيها بالكاميرا وهي تمشي للخلف..
والمنشطه شغلت زفه كويتيه مشهوره..
☘كل من في القاعه كانوا متشوقين يشوفوا نجاح كيف طلعت...
ولما بانت عليهم..
نظرات الاعجاب احاطت بيها من جميع الحاضرات..
طوبى وهي مبتسمه من قلبها..
الله يبارك عليها تهبل..
نجاه؛صح..حلوة..
ومغليه تشوف بدون ماتعلق...
☘وعيون نجمه وهي تشوف لبنتها كانت غارقه بالدموع..
ودقات القلب متسارعه من الفرح..
ومتسارعه دقات قلب نجاح..من الفرح والتوتر في نفس الوقت..
مافيش حاضرة ماشكرتش في جمال طلتها..
ماتوقعوهاش تطلع بهالجاذبيه..
وهي لما كانت تمشي توزع في نظرها ع الحاضرات وتبتسملهم..
لكن لما جو عيونها طوبى..
رفعت يدها وحيتها بحراره..
وطوبى ضحكت..ورفعت يدها وحيتها..
ونجاة تشوف لطوبى بطرف عينها...
🍃ووسط هاللحظات الحلوة بالنسبه لنجاح..
كانت عواطف تتوجع هلبه..وهي تتفكر في عقد قرانها ووخطوبتها..وكيف اطلقت وشن صار فيها بعد الطلاق..
الشعور اللي حساته وقتها كان مؤلم..وواعر هلبه..
بس تماسكت قدام الناس..ماتبي حد يشفق عليها..ولايتشمت فيها..
وصلت اختها للكوشه وساعدتها بش قعمزت..
والمنشطه تقول..
الله يبارك ياعروسه شمعه منوره..
ضحكت نجاح بخجل..
وهما حواليها مبتسمات..
وقعمزت نجاح ع الكوشه واخيرا..
عواطف جت عند وذنها وقالت؛واخيرا..
ضحكت وشبحتلها وقالت بنظرات حب:الفال ليك ياربي..
عواطف وهي مبتسمه ودموعها في عيونها:ان شاء الله..
نجاح شافت للمصورة وقالت؛خودلينا صور..
:تمام..
وبعدت الموجودات..
وبدت تاخد في لقطات لنجاح وعواطف...
☘☘☘☘☘
"ماشيات للعراس وبنتي مازال ماطقت شهر"
جويده:بتبدي في الجهل..الحداد ع الميت تلاته ايام بس وبنت الله يرحمها ويغفرلها بروحها وصت مايحزن عليها فوق تلاته ايام ولايمتنعوا عن الافراح..
عتيقه وهي تبكي:الله يرحمها وهي حية مسلمه ومستسلمه وهي ميته مسلمه ومستسلمه..
جويده؛بنتك كانت مراة ع دين وتعرف ربي كويس انتي لو تشوفي حزن راجلها عليها تفهمي كلامي..
بتهكم قالت؛راجلها هدا توتشوفه بعدين كان فاقت بنت لطفي ماضال الا واخدها..
جويده؛بنت لطفي ولاغيرها اخرته بيتزوج وهدا حقه..وارجوك وقفي كلام في الموضوع هدا نبي نرقد من غير نشاف..
وعطاها بالظهر ورقد..
وهي مشت طلعت من حداها وتقول بهمس..
من امتى كنت تحبها ولاتحس بيها..
وسكرت الباب..
🍃🍃🍃🍃
"مش عارفه يابابا حستيها مضايقه مني"
المهدي وهو يفكر في كلام بنته عن حناها؛لالا اكيد مش منك بابا..خلاص فوتي..بري توا اشربي طاسة الحليب وارقدي..
سدرة:حاضر..
ومشت للكوجينه..
وهو قعد يفكر في كلام سدره..
ع جية يزن..
قعمز قدام بوه وقاله؛بوي معاش بنمشي لحوش جدي..
المهدي؛حوش جدك مني؟
يزن؛حوش جدي جويده..
المهدي:علاش؟
يزن بضيق:حناي تعامل في سدرة معامله خي..
ع جية سدره..
المهدي؛اسكت..
سدرة:تصبحوا ع خير..
المهدي:وانتي من اهله بابا..
ومشت سدرة لدارها...
والمهدي بعد مشت قال ليزن؛كيف تعامل فيها؟
يزن؛ماتبيش تكلمها ولما تكلمها سدرة ماتردش عليها..
المهدي قعد ساكت..
يزن؛وجعتني اختي بوي..وحتى محمد راهو غير مايبيش يقولك..
هز المهدي راسه وهي معصب بعدين قال:برا ناديلي خوك..
يزن ناض ومشي لدارهم...
شويه وجي ومحمد معاه..
محمد:نعم ؟
المهدي؛خلاص يزن برا ارقد..
يزن هز راسه وقال:تصبح ع خير..
ومشي لدارهم..
المهدي شاف لمحمد وقال:شن قصه حناك عتيقه مع اختك؟.*
محمد؛واخده منها موقف..
المهدي:شن واخده منها!؟..
ابتسم محمد ابتسامه جانبيه وقال:هكي حسيت..
المهدي وهو عاقد حواجبه:وعلاش شن دارت اختك؟
محمد؛مش عارف...مرات مادارت شي..
وقف المهدي وقاله؛محمد تكلم من غير الغاز..
ابتسم تاني وقال:ممكن ع خاطر اسمها..
ارتخوا ملامح المهدي ولون وجهه تغير
ومحمد وهو مبتسم قال؛تصبح ع خير
