(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الرابع_والأربعين"حق مشروع1" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 ☕☕☕☕☕☕☕☕☕☕☕☕☕☕☕☕☕ الساعه 10:30ليلا... ضم في الكوجينه وهي تتكلم بالتليفون عن طريق السماعات.. طوبى:والله لتوا كل مانذكر الموقف نرعش ونحس في روحي بنبكي.. "الناس ماليهم الاسيرتك انتي وبلال اليوم..تبي الصراحه طارتلي هلبه" طوبى بإستغراب:علاش!؟ "طوبى بلال..بلال طوبى...مش متحمل يذكروا اسمك ولايقرنوا اسمك براجل تاني" طوبى وقفت حدا الطاوله وهي تقول:شكلك غيور هلبه.. "فوق الهلبه كان تبي..من توا نبيك تحطي الحاجه هادي في راسك" طوبى وهي توزع في نظرها قدامها:يعني اني مفروض نخاف توا!؟ "علاش تخافي..بالعكس مفروض تفرحي" طوبى:هو الغيره تفرح صح بس لما تكون زايده عن حدها تخوف.. هو ضحك وقال.. "خيرك قلبتيها فيلم رعب انتي..عادي يابنتي طبيعي نغير عليك طوبى..كان مانغيرش عليك انتي على منو نغير!؟: ضحكت وقالت؛اممم..عندك حق.. "تمام نغيروا الموضوع قوليلي شن مهمتك في العيد" طوبى:مافيش مهمه محدده اللي يجي قدامي نديره.. "فالحه في العصبان؟!" طوبى:تو لما نبعتلك منه في العيد تحكم بروحك.. ضحك بصوت عالي وقال.. "يؤبرني ربه اللي بدي يفهم فيا ع الطاير" وطوبى تسمع فيه كيف يتكلم وتضحك... ☘وهو منسجم بالهدرزة مع طوبى في جناحه.. كان تليفون التاني يرن... احمد حميدا يتصل بيه...اونجاة.. ☘في جناحها.. نزلت التليفون وقالت:هو اللي جبرني.. ناضت ومشت طلعت من الجناح.. وقعدت تمشي بهدوء ..وين قربت من الصاله سمعتهم يهدرزوا...وشيبانها لاهي مع ولدها الصغير يلاعب فيه.. بعدين سمعت صوت هدرزة نضال وعمر اطمنت انهم لوطا.. طول ركبت الدروج لما وصلت في اخره.. شافها محمد المهدي وهو جاي من برا وماشي للصاله. استغرب هلبه... ☘في دار الجالي.. الجالي:جديات قصدك عادي ماعندكش مشكله؟ دق باب الدار.. الجالي:خش.. انفتح الباب وخشت نجاه وسكرت الباب وراها... لما شافها من سريره اللي كان متكي عليها جي واقف وهو مفجوع.. الجالي بإرتباك؛نكلمك بعدين نكلمك بعدين سلام.. وسكر عليها.. ومشي لنجاه بسرعه شدها من ذراعها وقال بصوت هامس:خير بلاك انتي خير بلاك..لشن تبي توصلي.. نجاة:مداير تليفون تاني بش تكلمها منه براحتك.. بغضب جي بيدفها وبيطلعها وهو يقول:اطلعي اطلعي.. هي شدت روحها بقوة وجبدت ذراعها من يده.. وشدت ياقة سوريته بإيديه الزوز وهي تقول بغضب ودموعها ينزلوا؛مش نجاة اللي ترخيها يالجالي مش نجاة..مش نجاة اللي طيحها وتعطيها ظهرك وتهرب..اني مرتك فاهم اني اقربلك من هادي اللعبه الجديده اللي عجباتك وقعدت تتسلى بيها..البنت هادي ماتمشيش معاك وعمرها ماحتكون ليك ولاحتكون ليها..انت لنجاة بس..لنجاة تسمع فيا.. هو شد ايديها وقال:نجاه ماتخليش هبالي يطلع عليك.. نجاة:وريني كيف بطلعه وريني خليني نشوف... نزل ايديها وقال:نجاة قاعد نقولك اطلعي بالحسنى.. هي قعدت تشبحله هلبه..بعدين شدت فيه بقوة وقعدت تقول بنبرة مرتجفه باكيه..اني نحبك..انتي ليا اني بس..مش حتكون لوحده غيري.. هو غمض عيونه وتنهد..بعدين رفع ايديه وحطهم عليها وقال:باهي بعدين ننزلك تمام.. بعدت عنه وقالت:احلف.. حط ايديه ع شعرها وقال:والله العظيم نوجا..غير اطلعي توا ماتتسبيلناش في مصيبه تخليك تخسريني نهائي.. بعدت عنه ومسحت دموعها وقالت؛باهي اني نازله وفي الليل متأخر نستناك ماتنزلش نركبلك.. هو هز راسه وقال:تمام تمام..غير انزلي توا بس.. نجاة رشفت وقالت:باهي.. وكيف جت بتلف تفتح الباب.. هو وقفها وقال:استني شويه.. فتح الباب وطلع وقعد يشوف في الوضع برا لين مشي وقف في الدروج وقعد يراقب.. وهي في الدار.. تمرر في نظرها عليها..شافت لعقد الفل... نظراتها تبدلت لنظرات حقد مخيفه.. قدمتله جبداته وقعدت تقطع فيه تقطيع..بعدين لوحاته وقعدت تمرس فيه مرس برجليها.. ع جيته هو شافها شن دارت انصدم.. الجالي:نجااة! التفتت وشبحتله بنفس النظرات.. خاف منها...خاف تنجن ع الآخر وتفضحه وتنهي زواجه من طوبى.. جاها..وباس راسها بعدين قال:هيا عيوني انزلي..والساعه 2نكون عندك.. نجاة:2ودقيقه تلقاني قدام وجهك.. ضحك بخوف وقال:حتلقيني قدام بابك 2الا خمسه.. ضحكت ومشت طلعت.. وهو وراه شافها نزلت بأمان.. ولى رجع لداره خشلها وشاف لمكان عقد الفل المرمي ع الأرض قال:هادي هبلت بكل ياجالي..سايسها توا ماعندك مادير بعد ناخد طوبى تو ندورلها صرفه... وسكر ع روحه الباب..ومشي خدي تليفونه وقال:سكرت عليها بطريقه خي بكل.. كان اتصلت بيها مش حترد.. تنهد وبدي يكتبلها في رساله..بعدين بعتها.. 🌸هي كانت كيف خاشه للدار وقتها.. جتها الرساله طلعت التليفون من جيبها..وفتحتها (نضال خش عليا مداهمه سكرت عليك اسف) هي ابتسمت وبدت تكتبله بعدين بعتتها ☘وصلاته وقراها.. (توقعت حد خش عليك فجأة مش مشكله المهم كل عام وانت بخير) ابتسم وكتبلها وبعتها.. (كل سنة وانتي طيبه والعيد الجاي معاي إن شاء الله ) 🌸هي قرتها ووجهها مبتسم لكن ناعس لهدا ماردتش.. ومشت طول للسرير وانطرحت عليه وفيسع مارقدت... ☘وتمر الساعات... وتجي الساعه تنين بعد نص الليل.. وحوش شنيبه كله غارق في النوم.. ماعدا هي اللي تراجي فيه.. فاتت الساعه تنين بدقيقتين فتحت الباب بتطلع لقاته قدامها.. ابتسمت ع جنب بعدين دخلاته وسكراته.. ☘☘☘☘☘ تاني يوم... كان يوم العيد.. اول عيد لبلال يحضره وهو مسلم.. حضر صلاة العيد.. بعدين ساعد سكان الشارع في ذبح اضاحيهم وكان ليه نصيب في الخروف خداه من كل جار ساعده... ☘وفي مكان تاني.. كان العيد هدا بالنسبه لآلاء اسوء عيد لأنها مجبورة تكون موجوده في مكان ماتبيشي.. وتشوف قهرتها بعيونها.. وليد وخطيبته... وليد كان متفنن في استغلال خطيبته كان يدير في كل حركة تقهر آلاء... واريج لاحظاته وحتى هي تعكر مزاجها وماحستش بالعيد بكل.. فوق منه امه اللي ماتبيش تشد شرها عن فردوس اللي ضيعوا الهم والحزن جمالها وقاعده متبهدله في هالحياة بش تكفي الصغار حاجتهم.. كرهها ليها وغيرتها منها مازالوا عايشين معاها رغم كل شي صار... وفردوس مسكينه ساده فمها وكافيه خيرها شرها وتقول في نفسها.... "هو يوم ويعدي ماعندي علاش نعديه بالمشاكل" وولدها معتز هايم مع صغار عمه وعايش في عالمهم اللي يبي يولي جزء منه بأي طريقه... ☘☘☘☘☘ بينما في حوش عبد المطلب.. تغيرت شويه معامله صفيه لريمه وبدت تتقبل فيها شويه شويه.. وريمه فرحانه لهالتغيير... اميمه:امتى تولي الخدمه؟ ريمه؛تالث يوم العيد.. اميمه:اني بعد اسبوع ان شاء الله.. ريمه:مش مفكرة تخدمي في الخاص.. اميمه:اكيد في بالي الفكره..بس بعد الزواج ان شاء الله.. ريمه:ان شاء الله.. شويه فات عبد المطلب وهو يتنحنح..تبعاته ريمه بعيونها لين اختفي.. وقعدت تشبح للجهة اللي هو ماشي منها لين سمعت باب الدار تسكر.. شبحت لأميمه وقالت:نحس في عمي يحب يقعد في داره هلبه.. اميمه وهي مبتسمه مجامله:امم.. ريمه:انطوائي هو؟. اميمه:لابالعكس اجتماعي بس الدار يحب يقعد فيها غالبا.. ريمه رفعت حواجبها وهي تقول..اممم... ☘وبرا يوسف كان يشوي ومعاه جده وعمه لطفي يهدرزوا.. وفي حوش شنيبه.. الجالي هو اللي شاد الشوا كانت نجاه واقفه حداه وهي شاده ولدها في غمرها وتهدرز معاه.. وهو يهدرز معاها عادي... امه كانت مقعمزه في الجنان ع اعصابها مش قادره تتصرف بش ماتلفتش انتباه راجلها.. ونجاة مستغله الشي هدا..والجالي كان مكمل في مسلسل المسايرة اللي مش عارف وين بيرفعه.. وهو مش عارف ان حكايته مع نجاة ولت شبه مفضوحه في العيله كلها...اللي كان اخر من عرف فيهم.. محمد ولد المهدي اللي قاعده عيونه تراقب فيهم... 🍀🍀🍀🍀🍀 ومازالت تعدي الأيام.. وتطلع نتيجه صفاء ومحمد والزوز نجحوا نجاح باهر... واهاليهم احتفلوا بيهم.. صفاء امها دارتلها حفله بسيطه.. اما محمد بوه دارله عشي كبير لدرجة انه دار خيمه كبيره قدام الحوش... وتوا محمد وصفاء بيخشوا لأهم مرحله في حياتهم.. مرحلة الثانويه..مرحلة بناء الشخصيه اللي بيخشوا بيها بعدين للجامعه.... ☘☘☘☘☘ الجامعه... بدت القرايه في الجامعه... وفي اول يوم.. كانت آلاء تراجي في جية مهند بفارغ الصبر بش ترد عليه... وجي مهند وهو متأمل ان ردها يكون زي ماهو يبي... آلاء:موافقه... مهند ابتسم وقال؛متأكده من قرارك.. آلاء:اكيد..بس عندي طلب.. مهند:اللي هو؟ آلاء:نبي الخطبه تكون بعد عرس طوبى واميمه.. مهند:مازال شهر وشويه ع العرس صح.. آلاء:ايه.. هو مرر نظره قدامه وهو يفكر.. وهي تشوفله وتراجي في رده.. شبحلها وابتسم بعدين قال:حاضر.. وهي ردتله الابتسامه بصمت.... ☘☘☘☘☘ "ااه يارجليا من التنزيل وايامه السود ادقدقت يابيني هيييه" ؛عزوز شارفه يااختي.. اريج:ووك عزوز وبس والله في عزايز اصح واشب مني.. :ماهو ماتشربيش في الحليب.. اريج بقرف:اععع.. فجأة.. يفوت قدامهم نضال ماشي ومعاه وحده وهما يهدرزوا ويضحكوا... اريج كانت تشوفله بصدمه . وصاحبتها تشبحلها بضيق.. ارتخوا ملامح وجه اريج وهي تقول بنبرة عصبيه ممزوجه بالزعل:عادته ولا بيشريها هدا حاله من نهار عرفته وهو متاع بنوت..خزي بصطاردي ع قولة جدي علي.. :مش عارفه اني كنت نحسابه يبيك بجديات اسفه اريج اني اللي حطيته في راسك.. اريج؛اني حطاته تحت رجليا هدا وهلبه عليه هلبه..قالتلي حطيته في راسك.. شويه وجي واحد من حيث لايعلمون وقف وقال.. :السلام عليكم.. اريج لما شافاته انصدمت.. وصاحبتها قعدت متنحه فيه وخلاص.. وقفت اريج وقالت بإبتسامه:اهلا دكتور شن هالمفاجأة ولاجاي صدفه..!؟. :لامش صدفه تقدري تقولي مفاجأة.. ضحكت وقالت:صار جاي دايرلي كبسه تشوفني حق في الجامعه ولاندير في الجو.. هو ضحك وقال؛اما انتي...مش عارف كيف تخطر ع بالك ها الافكار ع فوتت نضال ومعاه نفس البنت وهني كانت الصدمه لما شاف الدكتور نفسه واقف ع اريج ويهدرزوا مع بعض.. وبدال مايولع في اريج النار...ولعت فيه هو... البنت اللي معاه تكلم فيه وهو مش معاها بكل.. وقف قريب عليهم وقعد يشوفلهم وهو شاد روحه بقوة.. ☘اريج بضحكه:تسلم دكتور.. :نشوفك بعدين...سلام... اريج:سلام.. مشي الدكتور واريج معاه بعيونها لين جي فايت من جنب نضال.. جو عيون اريج في عيون نضال.. شبجتله بنظرة مكر وابتسمت بمكر ولفت وجهها عنه بعدين ولت قعمزت.. صاحبتها:من ده يابنتي!؟ اريج بضحكه:دكتور نخدم معاه في المصحه.. :اسمعي خطي في نضال بكل ماعندك ماديري بيه هالمنسرف..خليك مع الدكتور الله يبارك عليه طول بعرض وزي الغزال مايجي شي حداه نضال هدا.. اريج:مش بالشكل راهو ع فكره.. :ايه بالرزانه والاخلاق والدكتور الباين عليه رزين مش زي هدا متاع البنوت.. اريج:لا نضال راجل ماشاء الله عليه لولا هالعيب الاحرف.. :انتي شن قصتك شن تبي بالزبط.. اريج بضيق:مانبي شي..هي نوضي خل ننتلفوا من هني مانبيش نشوف وجهه.. ناضت وصاحبتها ناضت معاها ومشوا مع بعض وعيون نضال معاهم لين درقوا من قدامه... ☘☘☘☘☘ وفي كلية التربيه... كانت طوبى مقعمزة مع صاحباتها ياكلوا ويهدرزوا.. في يدها ساندوتش شاروما تاكل فيه ومنسجمه معاهم في الهدرزة وتتناقش معاهم بحماس... هو فهالوقت... خش للكليه وقعد يدور ويسأل عن قسمها. لين وصل فيه... قعد يمشي ويدور لين لقاها... بين صاحبتها...مقعمزة ع طرف المقعد.. طلع في قطع الدجاج الصغيره من السندويتش متاعها وتعطي للقطوسه اللي جايتها وهي تهدرز مع البنات.. طوبى:لالا جسمها مش حلو وقفاطينها مايمشوش معاها.. :حتى اني مع بيبو في الحاجه هادي.. :الناس اذواق اني نشوفها شن ماتلبس يطلع عليها.. طوبى بضحكه:لانك تحبيها هي هادي.. وشبحت للقطوسه وزادتها من الدجاج.. ؛طوبى.. طوبى:نعم.. :في واحد من بكري واقف يشبحلك.. :ايه حتى اني ركزت عليه.. طوبى بقلق:نشبح عادي.. :اشبحي توا.. طوبى شبحت وين يشوفوا.. غمضت عيونها وضحكت.. :تعرفيه!؟. فتحت عيونها وقالت بضحكه:خطيبي.. البنات مع بعض:الجالي!؟. طوبى بإبتسامه؛ايه هو.. :تبي الحق بيبو من اسمه تخيلته يلبس في هركه بطاطيه وشعره طويل وملوي وداهنه بزوز حكاك كريمه ولحيته محدده ع ذقنه وفي نقطه شناب من النص.. وحده تانيه قالت بضحكه:ولابس نظارات رقاق ع عيونه وفي رجليه لابس سباط مخنفر طوبى بصدمه:حي عليكم شن هدا..هدا كله تخيلتوه من اسمه!؟ قعدوا يضحكوا.. :بس جديات بيبو طلع حاجه وااو وااو.. ناضت وقالت بغرور مصطنع؛طبعا بيبو ماتعرف كان الواااو.. البنات:العب...اقوى عليهم! وهي حطت الشاورما وقالت:بالله ربى وكليها.. :باهي يامامت القطاطيس المشردين.. مشت وهي مبتسمه وتمسح في ايديها بكلينكس مبلل..كملت بيه حطاته في الحاويه.. بعدين قدمت للجالي ووصلت فيه وقالت :السلام عليكم.. الجالي بإبتسامه؛وعليكم السلام..شن جو. طوبى بإبتسامه؛تمام...شن هالمفاجأة!؟ الجالي:حلوة ولانص نص... طوبى بإبتسامه:حلوة...تمشي نقعمزوا غادي.. شبح وين ماتشوف وقال:تعالي.. مشوا الزوز للمقعد.. وصلوا وقعمزوا جنب بعض بمسافه.. الجالي:شن جوك ياحلو.. ابتسمت بخجلل وقالت:تمام..شن جوك انت.. الجالي حول نظاراته وقال:اهو حال الخدمه والجري.. طوبى شبحتله وقالت:ربي يعاونك.. الجالي بإبتسامه؛امين..في شن كنتي تهدرزي مع صاحباتك النقاش كان محتدم.. ضحكت وقالت؛هدرزة بنات.. الجالي ضحك وقال:باهي بعدين قعدوا يتكلموا عليا شن قالولك.. طوبى بضحكه؛هما مايعرفوكش وين شافوك واقف تشبحلي خافوا... الجالي:باهي شن قالولك..ماقالوش مثلا كبير عليك ومش ليك ومن هالكلام؟ طوبى:نهائي..وبعدين جالي انت مش باين كبير عليا بالعكس اللي يشوفنا مع بعض يقول طالعين ع بعض.. الجالي:يعني مش حيجي يوم وتندمي طوبى:من ناحية العمر اكيد لا..في تقارب بيني وبينك مش حاسه ان في فجوة نهائي الجالي بإبتسامه:باهي قولي تكلمي...عاجبك ولالا.. قعدت تضحك طوبى.. الجالي بضحكه:هدا اللي عندك وين ندوي في الموضوع هدا تقعدي تضحكي.. هدت ضحك وقالت؛تو بعدين ان شاء الله نحكوا فهالموضوع.. الجالي:يعني ضروري نديروا عرسنا مع عمر واميمه! طوبى ضحكت مرة تانيه بدون ماتعلق.. هو ابتسم وطلع تليفونه وقال:قريب نسيت علاش جاي.. هي هدت ضحك وقعدت تشوفله.. الجالي مدلها التليفون وقال:شوفي وعطيني رايك.. خدت التليفون وقعدت تتفرج ع نقطع فيديو وهو يتأمل في ردة فعلها من ملامحها.. طوبى:الفيلا متاعك هادي؟ الجالي:متاعنا . ابتسمت وقالت:حلو حلو.. الجالي:عجبك يعني.. طوبى:ايه حلو هلبه ذوقك؟ الجالي:ذوقي ع ذوق خديجه ونسرين شويه.. طوبى:حلو.. الجالي:متأكده!؟كان مش عاجبك شي من توا قولي نغيرها مانبيش بعد نسكنوا نبدا نغير ونحول مش حنفضى بعدين.. طوبى بإبتسامه؛لالا كله حلو عجبني..ومدتله التليفون.. الجالي خداه وقال:جديات! نحس فيك تسايري.. طوبى بضحكه؛لا والله مانسايرك في الحوش اللي بنسكنه كان شفت حاجه ماعجبتنيش نقعد نزن عليك لين تحولها ولاتقولي فاضي ولامش فاضي ايوه.. الجالي قعد يضحك... طوبى بإبتسامه؛اهم حاجه عندي دويرة الرسم متاعي.. الجالي:لاهادي خليها بروحها مش حنوريهالك لين تخشي تشوفيها بروحك.. طوبى بضحكه حماس:شوقتني.. هو قعد يشوفلها بإبتسامه ونظرات عيون حلوة اربكوها.. نزلت عيونها وهي مبتسمه بخجل.. هو ضحك بعدين قال:راهو حتى اني عندي دار تخصني وبنبهك ع حاجه وين نجي نخدم ردي بالك تكلميني .. طوبى:تي اني لما نخش المرسم ونسكر ع روحي ردبالك تفكر تخش عليا.. قعد يضحك بعدين قال:كويس معناها لما نخش المكتب نخدم انتي خشي المرسم.. طوبى بضحكه:ايوه صح.. الجالي:وفي حاجه تانيه لولقتيني راقد رد بالك تجي تنوضيني خليني نوض بروحي.. طوبى رفعت حواجبها وقالت:حتى في اوقات الصلاة؟ هو حط يده ع جبهته وبدي يفرك فيها بشي من التوتر ويقول:تمام نوضيني بهدوء وماتكلمنيش بكل..ضحك وقال..لما نفيق من النوم نولي نخوف شويه.. طوبى بضحكه:زي سدرة ردبالك تجي جيهتها وهي كيف نايضه.. ضحك بشي من الإرتباك وغير عيونه عنها وقعد يفرك في يده ع فخده.. هدا كله طوبى ماركزتش عليه ومالاحظت منه شي ماشيه بحسن النيه... ابتسمت وقالت..باهي بنسألك النظام في حوش اهلك كيف شكله.. ارتاح لما غيرت الموضوع وشبحلها وقال:كيف مافهمتش؟ طوبى:يعني..تحبوا اللمه ولا كل حد ع حاله عادي..؟ ضحك وقال:لامغليه تحب اللمه وتحب كناينها يكونوا حداها ويونسوها..بيني وبينك كانت طيرلها هلبه من مرت المهدي اللي ماتنزلش الا من الجمعه للجمعه..ع العموم انتي حتكوني بعيده وحتجيهم وقت خدمتي وطبعا مش حنفرض عليك شي انتي حره.. طوبى؛خلاص نخلوها يوم في حوش اهلك ويوم في حوش اهلي..واليوم اللي نقعد فيه مع عمتي مغليه نقيمها بيها وبيك ونخليها تقول..والله مرت الجالي الله يبارك عليها ناشطه..مرت الجالي هدرازة..مرت الجالي تطييبها زي العسل اليوم دارتلي وحطتلي وجابتلي. والجالي يشوف في طوبى كيف تتكلم كانت حلوة..لطيفه..مضحكه... ماكانش عارف قداش دق قلبه دقه في الدقيقه الوحده وهو يشوفلها... كان يحس معاها انه في عالم مايشبهش العالم اللي حني فيه.. كان يحس انها مش زي البشر اللي عرفهم بكل مختلفه مختلفه هلبه عن عالم..تعبا بالشر والأشرار..والخبيث فيه ولى اكثر من الطيب..واللي زي طوبى هادم معاش ولوا موجودين فيه.. هي شبحتله وقالت بضحكه:المهم ترضى علينا عمتي مغليه.. الجالي: تعرفي.. ابتسمت وهي تشوفله.. شبح ليدها اليمين للصبع اللي فيه الدبله وقال:لما نشوف ليدك اليمين..للدبله اللي لابستيها ونقول لروحي هادي منك يالجالي..وطوبى ليك يالجالي...نحس في روحي عبد محبوب عند ربي اللي خلاك من نصيبي ليا اني.. طوبى تسمع فيه وهي تشوف للدبله..والشعور اللي كانت تحس فيه حلو بالمرة... بدت تحس انها حبت الجالي..وولى مهم عندها هلبه وحتى هي فرحانه اللي كان من نصيبها.. الجالي:مش عارف كيف بيعدوا عليا هالشهر ونص مانقول غير الصبر ياخالق الصبر وخلاص.. ضحكت وقالت:بنسافر بعد غدوة.. الجالي ابتسم وقال:اليوم بنعطي الفلوس لبوك..واي حاجه تنقصك غادي قوليلي طول نزعل منك ياطوبى لو تاخدي من بوك نزعل هلبه واني زعلي خيي ماتجربيشي.. طوبى بضحكه:باهي ياسيدي وتي روحك للفلس معناها.. قعد يضحك وهو يحرك في راسه يمين ويسار ويقول:والله ماليك حل... وهي تشوفله وتضحك... 🍀🍀🍀🍀🍀 وسافرت طوبى لتركيا مع بوها وسدرة... وتلاقوا غادي مع غرفه وعبد الرؤوف وقعدوا في عمارة وحده عبد الرؤوف اجرلهم شقه فيها.. اول يوم مشي فسحه وهياجه زي مانقولوا.. اما تاني يوم.. طول مشوا للخياطه اللي وحده من صديقات سدرة دلتهم عليها.. خدت قياسات طوبى..والتصميمات والموديلات اللي تبيهم... وخلوها هيا تاخد الأقمشه لأنها ادرى بالأماكن اللي تبيع احسن شي في البلاد... وكملت طوبى مع سدرة رحلتهم في تركيا مع غرفه.. مشوا لهلبه اماكن واستمتعوا بالأجواء الخريفيه الحلوة غادي.. حتى من لطفي اللي حس ان السفرة غيرتله نفسيته... طبعا عبد الرؤوف ماخلاهم يدفعوا شي كل شي ع حسابه.. وكان يسبق في لطفي بالحلفان ومايخليشي يحط قرش.. واللي قعد عند لطفي عطاه لطوبى شرت بيه دبش عادي ليها..وتفكرت صغار اختها بحاجات.. وخدوا لأميمه اللي وصتهم ياخدولها حاجات حتى هي... ☘وخلال فترة سفرهم.. الجالي كان يكلم في طوبي اكثر من 5مرات في اليوم.. مش قادر ع فراقها وبعدها المده هادي كلها... وكان بش ينسى حاجته لوجودها يمشي لنجاة اللي كانت حاسه ان الجالي معاها جثه بس..والعقل والقلب ابعد مايكون عنها..وكل مالها تزيد تحقد ع طوبى... ☘واريج..كانت مطنشه نضال بالمرة بعد ماكشفت حركاته اماهو فكان يشوف تجاهلها ليه..ميول للدكتور اللي كان ينطلها كل اسبوع في الكليه بحجة ان عنده صاحبه يقري هني وكل اسبوع ضروري يتلاقوا في الكليه.. وهي لأنها مش متخيله ان واحد بزين الدكتور ممكن يحط عينه عليها كانت تصدق فيه وتتعامل معاه بحسن نيه عادي..وتحرق في قلب نضال حرق... ☘اما اختها آلاء اللي كان قلبها محروق من ولدها عمها حتى هي دارت زيه...وبدت تستغل في مهند.. اللي ضافاته ع الفيس بوك..وقعدت تتفاعل مع منشوراته وهو كذلك يتفاعل معاها وهي مخليه حسابها مفتوح قصدا لأنها عارفه ان وليد يخش يشوف فيه.... ☘من جهة تانيه.. كانت نسرين عايشه في حالة نفسيه من ورا حملها... اللي قاعد يربط فيها بحامد اللي معاش ولت طايقه تشبح في وجهه... قد يسأل سائل ويقول...مادام مش طايقاته كيف مازال تحمل منه!؟ وهل المراة لما يجيها زوجها ويطلب حقه الشرعي تقدر تمنعه!؟؟ تولي آثمه وملعونه بعدين.... يعني لما تشوفوا مراة مش مرتاحه مع راجلها وجايبه منه عرم صغار...هدا مايعنيش انها كذابه.... المراة مادام مستمره في حياتها الزوجيه مجبرة تأدي كل اللي عليها... وقعادها اكيد مش حبا فيه... اكيد ماعندهاش وين تمشي.. او انها عارفه بصغارها مش حتلقى حد يستقبلها ويتحمل مسؤوليتهم... الحكم على وضع اي حد من بعيد وبتفكير سطحي للغايه اكبر غلط.... مافي حد عارف شن مدسوسله في هالدنيا... ممكن القدر يخليك تعيشي نفس الحاله بش تعرفي الحكم الصحيح ع هالحاله... ☘واختها خديجه.. كانت لاهيه مع امها يوتوا لعرس خوتها اللي كانوا ناووين يديروه عرس كبير زي اعراس ايام زمان.. سبعه ايام وسبعه ليالي... 🍀🍀🍀🍀🍀 ويعدي يوم وراه يوم.... واسبوع وراه اسبوع... لين يعدوا الشهر ونص....ويخش شهر نوفمبر... ☘2نوفمبر2017... في جنان حوش لطفي.. كانت طوبى واقفه تتكلم في التليفون وتعزم في وحده من صحباتها ايام الثانويه ع عرسها. طوبى:الكسوة في صالة الشرق........ايه اللي غادي......والحفله في صالة الفراشه.........ايوه هي هادي...........تفرحيني هلبه كان جيتي...ضحكت وقالت..تسلمي حبيبتي تسلمي...الله يبارك فيك....سلام.....وسكرت... رن تليفونها ابتسمت بعدين ردت.. طوبى بإبتسامه:ايوه جالي.. "افتحي الباب ضروري" طوبى:هي لحظه بس.. قدمت طوبى للباب فتحاته لقاته واقف قدامها.. كان داير شيانه عجبتها ابتسمت وقالت؛باهلا.. الجالي بإيتسامه:شن جو..مدلها التليفون وقال..شوفي واختاري بسرعه.. هي خدت التليفون شافت صور سيارات.. شبحتله وقالت:جالي شن قلت ع السواقه.. الجالي:ياودي غير اختاري بسرعه ليا اني مش ليك انتي.. طوبى ضيقت عيونها بشك وقالت؛ولا وحده منهم كان في عندهم سودا احلى تمشي معاك.. ضحك وخدي التليفون وقال:تمام يازقايطي انت.. ☘فهاللحظه... جت سيارة اجرة.. درست قدام حوش عبد المطلب.. كان فيها حسين اللي روح من دورة كانت مدتها اربعه شهور... شاف الجالي واقف قدام حوش عمه ع طوبى والزوز واخدين راحتهم هدرزة وضحك... عطي للراجل اجرته.. ونزل ونزل حاجاته وهو مصدوم ومش فاهم شي... مشت سيارة الاجرة... وهو قعد واقف قدام حوشهم وعيونه تشوفلهم بنظرات عدم استيعاب... شويه ومشي الجالي وطوبى ودعاته بإبتسامه قداش تمناها تكون ليه هو... سكرت الباب..هو غير عيونه للجالي لقاه ركب سيارته وتحرك... وهو قعد واقف في مكانه... من الصدمه نسي روحه هو وين.. يفكر في اللي شافه ويحاول يفسره تفسير مايكونش قاتل بالنسبه ليه.. لكن مافيش غير هالتفسير ياحسين.. كان هدا شن هالجراة اللي تخلي الجالي يوقف ع طوبى قدام حوشهم وياخد راحته هكي!؟.. طوبى بنت عمه.. المحافظه اللي ماعندهاش ع الدوة مع الشباب ولا الاختلاط هو نفسه كانت تتجنب فيه...! كيف ترضى توقف مع الجالي وقفه زي هادي!؟ هو مش حيتجرأ يدير هكي.. ولاهي حترضي بالشي هدا...وتكون مش مدورة لابوها ولارجالة عيلتها كلهم... الااذا......! إلا اذا.....!؟ شبح لباب حوشهم... بنظرات عيون حاده مليانه دموع.. بدي يدق ع الباب بقوة وهو يقول:حسيت بيهم مدرقين عليا حاجه حسيت..والله حسيت.. وانفتح الباب وكانت امه اللي فتحت.. لما شافاته تفاجئت وقالت:حسين! خش وسكر الباب حتى شناطيه برا خلاهم.. حسين ودموعه في عيونه وبنظرة غضب ونبرة غضب قال:قولي شن اللي صاير اني مانعرفاش!؟ ع طلعة اميمه من الحوش ووراها ريما مرت يوسف.. اميمه بقلق ودموعها في عيونها:حسين! شبحلها وقال وهو يرجف من الغضب:اميمه..اميمه توا شفت الجالي واقف ع باب حوش عمي واقف ع طوبى يهدرز ويضحك هو وياها..الكلب هدا كيف يدير هكي مش حاسب حساب الرجاله اللي هني ولاكيف!؟ وهي شن جاها مش كانت ملتزمه كيف دير هكي تكلموا!؟؟ تكلموا قبل لنمشي نكسر راسها ونقتله الكلب هدا! صفيه ودموعها ينزلوا؛اهدا ولدي بالله عليك.. هو بغضب شديد وصوت عالي قال:تكلموا...! اميمه بألم:عرس طوبى مع عرسي ياحسين! الراجل جمد في مكانه..زي اللي نزلت عليه صاعقه يبساته في مكانه...تبدلت ملامح وجهه بسرعه.. من الغضب الشديد لملامح صدمه وعدم استيعاب.. صفيه وهي تبكي:مش نصيبك يما..مش نصيبك ولدي ارضى بقسمة ربي الله غالب ولدي... نزلوا الدموع من عيونه.. اميمه لما شافتهم قلبها انشق.. حسين دمعته واعره ماتنزلش بالساهل.. واللي هو فيه مش ساهل بكل.. عاش عمر يحبها..بل يعشقها ويراجي فيها امتى تكبر بالريق اليابس زي مانقولوا.. وبرغم ابتعادها عنه ونفورها منه..قعد متمسك بأمل عاش عليه المدة الاخيرة وهو يحلم بموافقتها عليه.. في سفرته هادي جابلها دبله معاه.. بعد مالبسها في صغرها خاتم نايلو.. وفي في سن الصبا خاتم ذهب... كان هالمرة مروح ومعاه خاتم الخطبه اللي ياما تخيله وهو يزين صبعها البنصر.. بس للأسف بنصر طوبى اليمين زينه خاتم غيرك ياحسين.. وعن قريب يزين حتى اليسار.. مالكش نصيب فيها ياحسين.. مش حتكون لطوبى في حياتها اكثر من ولد عمها... شبح لأميمه وقال بصدمه:مش قلتي هي ماتفكرش تتزوج توا..مش قلتي انك ضامنتيها ياأميمه! اني صدقت كلامك وتعشمت هلبه..هلبه ياأميمه.. حطت اميمه ايديها ع صدرها وقالت بنبرة الم باكيه:سامحني بالله عليك!.. حرك راسه بالنفي رفضا.. بعدين مشي طول من قدامهم للباب الفاصل بينهم وبين حوش عمه.. صفيه:حسين!.. ولحقاته تجري واميمه وراها... ونسوا ريما بكل.. اللي بعد مامشوا.. لفت طول وخشت للحوش.. وتوجهت بسرعه لدار نوم عزوزها وشيبانها.. فتحت الباب وخشت... وقعدت تمرر في نظرها عليها.. بعدين بدت دور فيها ودور...بدون مادير فوضى.. لعند ماوصلت في الدولاب.. فتحت وحده من الفرادي لقت حوايج عزوزتها سكراته طول.. بعدين جربت تفتح التاني ماباش ينفتح كان مسكر بالمفتاح... هزت راسها..بعدين شبحت لباب الدار.. ومشت طول طلعت منها وسكرت الباب...
#حق_مشروع #طوبى
....يتبع.....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
