#طوبى "جنة طوبى"
#جمان_فريد
#الجزء_السبعون"فوق الطاوله الأخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الحوقله
وقال ابن القيم عن الحوقلة : ” تحمل بها الأثقال ، وتقتحم بها الأهوال ويدخل بها على من تخافه ”
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 تماماً " الأمرُ أشبهُ بأنّ أحدهم أمسك قلبك كطرفِ خيطٍ فرَّ من كنزةٍ صوفيةٍ، وسـحبهُ حتى اهترأ ..! حتى تقطعت كُل أوصالهِ ثم قال:
أصبحت بشِعاً، هيا نستبدلك🍃
__________________________________________
في احدى المستشفيات العامه..
داخل حجرة الاسعاف..
كان راقد محمد الصيد بعد مااسعفه الراجل اللي يخدم معاه في محل الذهب...
الراجل كان برا واقف مع المهدي ومحي وضابط شرطه يسرد في اللي صار معاه بالتفصيل..
بعد ماخدي الضابط اقواله..خش لمحمد اللي كان فايق وقتها وقعد يسأل فيه..
محمد بصوت متعب:كانوا ملتمين خشوا ع غفله وقعدوا يعيطوا عليا وواحد منهم جي يجري ضربني من لتالي طول وبعدين معاش نندري ع شي..
الضابط:باهي يامحمد قبل هكي مالاحظتش شي غريب ماشفتش حد يحوم ع المحل حد دار تصرفات غريبه؟
محمد:لا..لا..الوضع كان عادي مافي شي غريب..
هز الضابط راسه وقال؛تمام..غير نظره للمهدي وقال..خوي مهدي تعالى معاي شويه..
طلع الضابط ووراه المهدي اللي كان في حالة لايحسد عليها..
بعد ماطلعوا..
محي الدين وهو يشوف لولده بضيق ع حالته:انت شن تحس
توا؟
محمد:كويس بوي كويس..ماتخافش..
🍃وبعد العصر طلعوا بمحمد لمصح خاص عاودوله الفحوصات وتأكدوا ان وضعه كويس ومافيه شي يدعو للخوف..
روحوا بيه ع حوش جده محمد شنيبه...
وعادي امه استقبلاته بالأحضان ومناحه طويله عريضه..
محمد وهو في حضن امه؛يام مافيا شي خلاص..
خديجه وهي تبكي:معاش في لاخدمه لاخدمات الهى بقرايتك وفكني من الرعايش..
مغليه بضيق؛خلاص عاد ياخديجه ولدك حاله باهي مافي شي ماكلاها كان المسكين خوك اللي راح عليه رزقه..
نسرين بحزن؛ ايه والله وجهها منسود من الفجعه خايفه عليه هلبه..
مغليه قعدت تشوف لنسرين بقلق..
خديجه رشفت وقعدت تمسح في دموعها وهي تقول..
/إن شاء الله يشدوهم الكلاب اللي داروها ويرجعله اللي سرقوه..
محمد يسمع فيها وفي داخله كان في خوف كبير..
مغليه بقهر: عين والله الا العين الناس فاتحه عيونها فينا..
خديجه:صدقتي يام والله بعد نزلوا ع عمر يومها والجالي نزل ع مشروعه حطيت ايدي ع قلبي..
مغليه بإنفعال:معاش تنزلوا شي خلاص حتى انتي يانسرين معاش تنزلي..
هزت نسرين راسها بصمت وهي مضايقه..
محمد ناض وهو يقول:بنمشي للمربوعه..
خديجه؛لاالا قاعد تاعب قعمز هني وريح روحك..
محمد؛لالا مافيا شي بنمشي نشوف خالي..
ومشي طلع من حداهم بسرعه..
مغليه:ياروحي واجعه خاله..
خديجه بحسره؛حتى هو ماعنده بخت ولدي..
نسرين:معاش تقولي هكي ربي يزين حظه دنيا واخره..
خديجه:يارب..
🍃وهو في طريقه للمربوعه شاف حواليه مالقي حد..
مشي بسرعه للدروج اللي ينزلوا للريفودجي..
نزل منه بعدبن خشله وسكر الباب عليه..
طلع تليفونه من جيبه واتصل بواحد من جماعته..
نادى مرة وانفتح الخط..
"هاه حموده"
محمد بصوت منخفض بعض الشي..
/شن صار فيهم..
"تلقاهم بيوصلوا لتونس خلاص"
محمد:ماليين ايديهم من جماعة الحدود؟
"ايه ايه الامور تمام حموده ماتخافش"
محمد؛باهي لما يوصلوا خبرني طول..
"تمام تمام...تشاو"..
وسكر محمد بعدين رد تليفونه لجيبه..
ومشي طلع من الريفودجي وركب الدروج بهدوء وحذر لما وصل فوق شاف الطريق امان مشي للمربوعه الخارجيه طول..
🍃وقدام المربوعه الخارجيه اللي كانت مزحومه بالرجاله..
كان واقف المهدي وحداه ولده محمد..
داير مكالمه هاتفيه مع صديق ليه آمر في إحدى الكتائب
المهدي:الشرطه شافت الموضوع لكن انت عارف وضعهم نبيكم انتم تشوفوه ياخالي..
"حاضر يامهدي بإذن الله بعد ساعه نكون عندك ونفهم منك اللي صار بالزبط"
المهدي؛في الانتظار خالي..السلام عليكم..
"وعليكم السلام"
سكر المهدي وهو مضايق ع الآخر..
محمد ولده:قول الحمد لله جت في حاجه تتعوض..
المهدي تنهد بضيق وقال..
/الحمد لله ع كل حال..
محمد بقلق؛بوي صحتك اهم من وسخ الدنيا ماتقهرش روحك ارجوك..
هز المهدي راسه بعدين قال:تعالى نخشوا داخل..
ع جية محمد ولد خديجه وقفهم لما نادى خاله ..
محمد بضيق مصطنع؛سامحني خالي ماقدرت ندير شي..
حط المهدي يده ع راس ولد اخته وقعد يمسح ع شعره وهو يقول..
/المهم عندي انت سالم وماصارلك شي..
محمد هز راسه بأسف مصطنع
المهدي؛امورك تمام معاش تحس في شي..
قاله:شوية وجع في راسه من لتالي بس..
المهدي؛تو يخف شويه شويه ويختفي..هي تعالوا خشوا داخل..
ومشي المهدي خش ووراه ولد اخته وولده محمد وراهم وقلبه ماليه الخوف على بوه..
🍃🍃🍃🍃🍃
وطبعا خبر السرقه انتشر في الشارع كله وولى حديث ساعه..
🍃مطيره؛لطفي قال ماخلوله شي في المحل..
صفيه:خساره كبيره...
فايزة؛يتعوض اللي يجي في المال ولد خديجه قريب راح فيها..
مطيره؛ايه والله ياكبدي..البلاد موليه غابه يخنبوك في عز القايله والناس تتفرج..
صفيه؛خلاص ولت كلها بسلاحتها واحد يفنص للتاني في الطريق ينزله يفرغ فيه..
فايزة بحسره:اي والله ساد اللي صارلي اني خشوا عليا في عز النهار كسروا وضربوا وطلعوا..
مطيره؛ايه حقه يافايزة معاش بتفتحيه المزين؟
فايزة بضيق:الناس شوبوا منه بعد اللي صار..
غرفه قعدت تشبحلها وهي تفكر...
صفيه:فترة وتو ينسوا وترجعي تفتحيه مرة تانيه..
فايزة بضيق:زعمه؟
صفيه:ماتسمعيش بالمحلات اللي يسكروا فيهم الحرس البلدي بعد مايطلعوا منهم البلي المبلي بعد فترة يحصلوا كيف يفتحوهم مرة تانيه وامورهم تمشي..الناس تنسى..
فايزة:في فرق ياخالتي..
صفيه؛مافيش فرق بكل وتو تجي لكلامي وتقول خالتي صفيه قالت..
تنهدت فايزة وقالت؛إن شاء الله..
غرفه؛شن صار في موضوع صفاء رديتوا ع عيت الصيد؟
فايزة: اليومين هادم نرد عليهم إن شاء الله..
صفيه؛موافقه صفاء؟
هزت فايزة راسها بإيجاب..
صفيه؛ع خير ان شاء الله..
مطيره؛يجعل خيرتها فيه ان شاء الله..
فايزة؛إن شاء الله يارب إن شاء الله...
🍃وبرا من دار المعيشه لدار البنات..
كانت فردوس مقعمز جنب اريج تشوف في حرارتها..
فردوس بقلق؛حرارتك راقيه..
اريج تشوف لأمها بتعب وحزن ومش قادره تتكلم..
ناضت فردوس وهي شاده دموعها قالت..
/خل نمشي نديرلها كمادات عينك ع اختك..
ومشت طلعت ودموعها ينزلوا..
وخلت آلاء شاده يد اختها وهي تقول بحزن..
/روجتي..صار فيك هكي ع خاطر نضال؟
نزلوا دموع اريج وقعدت محتفظه بصمتها.
آلاء:اريج حبيبتي ماتقطعيش قلب ماما عليك..
ودموع اريج ينزلوا ورا بعض زي السيل تبكي بصمت وألم...
ع خشة فردوس بالدوا وصونيه فيها ميه بالخل وكمادات..
حطتهم ع الطاوله وقالت..
/ارميلها التيشرت..
آلاء ؛حاضر..وجت لأختها قعمزتها وهي تقول..
/ساعديني روجه..
وفردوس عيونها ع بنتها وتفكرت ايام ياما دعت فردوس انها ماترجعش تعيشهامرة تانيه..
ايام ذاقت فيهم الامرين وهي تشوف في أريج كيف كانت ذوب زي الشمعه من شوقها لبوها وحزنها علي غيابه..
ويقدر الله ترجع تعيش هالأيام الصعبه وهي مش عارفه كيف حتطلع منها بنتها...
قويه زي قبل..ولا منهارة ومحطمه...
🍃لكن برا الحوش.
تحديدا فوق السطوح في دار الخزين المسكره كانت طوبى خايضه في نقاش انجبرت انها تخش فيه..
🍃طوبى بإنفعال:ضحكه يانضال ضحكه واعيلها انت واعي للوضع اللي حطيتوني فيه...خوك خداني بش يعيش ع راحته مع المراة اللي يبيها..دارني غطا لعلاقته معاها واني الغافله اللي عايشه معاه واني نخدم فيه وحاطته في عيوني تي اني كنت نضايق ونلوم في روحي لما نقصر في حقه حتى شويه اكتشفت انه مريض وسترته وحاولت نساعده ونوقف معاه بش يتعالج ويشفى..قدرته وعزيته وعمري ماحسسته بالنقص ولاوجعته بنظرة مااكنتش عارفه اني لما نكون معاه بنت اصل هو حيفهم اني ضعيفه ومغلوبه ع امري...وقالت بحرقه وهي تضرب في رجلها بالأرض... ويقعد يعفس ويعفس عليا ويعفس عليا ويخليني مداس ليه وليها وليكم كلكم...وسكتت ودموع من عيونها ينزلوا حارات بحرارة النار اللي كانت تاكل فيها من داخل وهي تتفكر في اللي عاشاته كله...
سمعت تنهيده حرقه طلعت منه بعدين قاللها بنبرة ندم..
"لاحول ولاقوة إلا بالله...بالله عليك ياطوبى سامحيني اقسم بالله ماكنت نبي يصير في هكي بالله..والله شن ماقلتي معذورة شن ماقلتي..لاحول ولاقوة الابالله..والله ماعارف شن نقول"
وطوبى تبكي بصمت...
"باهي ياطوبى انتي عندك حق واني راكبني حق وشن ماتبي اني حاضر لكن بالله عليك ماتخليناش اني وبنت اختك ضحيه..يشهد ربي ع مكانتها عندي والله مانرضا فيها حاجه بالله..انتم خايفين عليها من ماليا اني مش قاعدلهم بكل ناخدها ونسافر فيها ونعيش اني وياها احلا عيشه ونحطها في عيوني"
هي بعد ماهدت شويه قالتله..
/نضال اسمعني كويس وحاول تفهمني..وضعكم انت واريج صعب هلبه مافي حد حيقبل لأريج تكمل معاك واولهم امها..اريج نفسها يانضال معاش تقدر خلاص وفكرة انك تاخدها وتسافروا حولها من راسك مستحيل ترضى بيها..
"ماتسكريهاش طول بالله عليك ما توقفيش في نصيب بنت اختك"
سكتت شويه وهي تمرر في نظرها وتحاول تستوعب شن قال..بعدين ردت..
/اني نوقف في نصيب بنت اختي؟!
"مش قصدي ياطوبى افهميني بالله عليك اني نبيها وهي تبيني حرام عليكم اللي بيصير فينا بعدين لو خليتونا بالسيف علينا نسيبوا بعض"
طوبى:نضال انت طلبت تكلمني وتشرحلي موقفك واني عطيتك فرصه لعند هني وخلاص..
وسكرت في وجهه الخط وطول حطاته في الحظر..
بعدين مسحت دموعها زين...وخدت نفس عميق وطلعاته..
وناضت ومشت طلعت من دار الدروج..
🍃وهي تنزل من هني..
وسيارة راجلها تخش الشارع من هني...
وصل لحوش اهله دخل السيارة للقراج..ومشي طول للمربوعه الخارجيه..
خشلها وهو يقول..
/السلام عليكم..
كلهم وجهوا نظرهم ليه وع راسهم التارقي اللي كان يتبع فيه بنظراته المبغضه وهو ماشي يسلم ع بوه وخوته وصغار خوته ونساباته بعدين قعمز وقعد يهدرز معاهم ع اللي صار لمحل المهدي..
🍃داخل..
في الصاله اللي تعبت نساوين...
كلهم استغراب غياب بنت الواعر ونساوين عيلتها وزاد شكهم ان في شي كبير صاير بيناتهم وقعدوا يتهامسوا بين بعضهم بتوقعاتهم...
☘☘☘☘
"اتصلت بمغليه وبنتها ماحصلتهمش كلمت نجمه"
طوبى كانت توتي في كوباية بابونج وهي تسمع في عمتها شن تقول بدون ماتعلق..
مطيره؛مانكش متصله بحماتك مهما كان ولدها قريب راح فيها راهو..
طوبى فتحت "كاتل" الميه وقعدت تتفرج عليه وهي تشوف في الميه وتسمع في صوته..
مطيره؛طوبى اللي صاير بينكم اكبر من اللي حكيتهولي راهو مامشاش عليا واضحه علاقتك براجلك شن شكلها واللي صاير لأريج مع راجلها حتى هي لنفس السبب اللي درقي فيه..
وطوبى تسمع بصمت وعيونها تراقب في الميه كيف بدت تغلي..
مطيره: وواضح كلهم عارفين شن صاير الا اني..علاش ماتبيش تحكيلي علاش ماتبنيش نعرف..
ومازال تسمع فيها وهي مركزه بنظرها ع الميه اللي قعدت تغلي..
مطيره بدت تعصب قالتلها :طوبى ماتخلنيش ننبح بروحي..
غيرت طوبى نظرها ع الميه وهي تسمع في صوت غليانها وقعدت تشوف للبخار اللي طالع من "الكاتل"
مطيره بعصبيه؛طوبى..!
انطفي الكاتل تلقائيا وطوبى التفتت لعمتها وهي تقول..
/حتى اني مش عارفه علاش ماحكيتلكش لتوا..
مطيره عقدت حواجبها وقالت..
/باهي احكي خليني نفهم ومانقعدش زي الاطرش في الزفه..
طوبى:اني طالبه ااطلاق..
انصدمت مطيره وهي تقول..
/علاش!؟
طوبى؛معاش نقدر نعيش معاه خلاص..
مطيره؛علاش شن دارلك؟
طوبى بملامح وجه حزينه ومتجهمه في الوقت قالت..
/يخون فيا..
حست مطيره بوجع في قلبها لما انجابت سيرة الخيانه بس سألتها..
/متأكده؟
هي ردت بنبرة مؤلمه..
/شفتهم بعيوني
عبوا الدموع عيون مطيره وهي تسأل فيها..
/شن شفتي!؟
نزلوا دموع طوبى وهي تقول..
/في حوشي..وفي دار نومي..وع سريري..
غمضت مطيره عيونها ونزلوا منهم الدموع..
حطت يدها ع قلبها وجبدت قفطانها وقعدت تعصر فيه بقوة زي ماقاعد الألم يعصر قلبها..
نزلت طوبى عيونها للأرض وهي تتفكر في هداكا اليوم..
بعدين لفت وخدت الكوبايه و"الكاتل" وصبت الميه فوق البابونج ودموعها مابطلوش نزول..
فتحت مطيره عيونها ومشت بسرعه طلعت من الكوجينه..
وطوبى عارفتها وين ماشيه..
ماشيه دور ع مكان تبكي فيه بروحها...
ردت الكاتل في مكانه ومسحت دموعها..بعدين خدت كوباية البابونج ومشت طلعت بيها من الكوجينه للجنان..
واستقرت في مكانها اللي تعودت عليه وهو توالف معاها...
تحت شجره الياسمين..قعمزت وقعدت تشرب...
🍃🍃🍃🍃🍃
الساعه 9:46 ليلا..
في حوش الصيد..
الصيد:طلع صدقه يامحي الدين..
محي الدين؛حاضر..
نجمه وهي واخده حفيدها في حضنها..
/الله يبعد عليك كل مكروه وليدي ربي مايوريني فيك سو..
محمد؛ربي يطول في عمرك حناي.
عواطف:كان مازال شاد في حكايه الخدمه اخدم هني فالشارع تحت عيونا ولا مع جدك..
اشرف؛رايي من راي عواطف اساسا الخدمه في محل ذهب مش لسنك بكل..
خديجه علقت في نفسها..
"بدي في الفلسفه"
محمد:والله الخدمه كانت ماشيه تمام وتريحت غادي هلبه مش عارف علاش صار هكي..
خديجه:معليشي ولدي معليشي نوض حبيبي بش تركب ترتاح في دارك..
نجمه؛ايه ولدي برا مع امك..
ناض محمد وهو يقول؛تصبحوا ع خير..
خديجه؛هيا راما..
راما ناضت وهي تقول:هيا..تصبحوا ع خير..
ردوا عليهم ..
"قدامكم كل خير"
ومشوا الزوز مع امهم اللي طلقت السلام بعدين طلعت هي وياهم..
محي الدين؛حتى اني اسمحولي حاس روحي تاعب هلبه..
الصيد؛مسموح..
محي الدين؛تصبحوا ع خير..
ومشي لحق عيلته وطلع من الحوش..
الصيد؛ضربه كبيره حصلها المهدي ..
نجمه؛ان شاء الله ماتوليش عليه مسكين..
اشرف:هادم مخططين لكل شي كويس لامخليين بصماتهم لامبينين وجوهم والسيارات اللي راكبينها من غير طارقات..
الصيد؛بلاد سايبه كان هدا تصير السرقه في عز النهار والسيارات يدوروا في الشوارع من غير طارقات..
عواطف؛صدقت يابوي ربي يجيرنا وخلاص..
كلهم آمنوا ورا دعائها..بعدين ناض بوها وهو يقول..
/ماشي نرقد...
ومشي من حداهم....
بعد مامش اشرف قال..
/شن صار في موضوعي يام..
نجمه؛لتوا ماردوش عليا..
اشرف:كلميهم وشوفيهم..
عواطف:لالا شن تكلمهم هادي اثقل ماتبانش ميت عليها هكي..
اشرف:شن تقول بنتك هادي يام؟!
نجمه؛عندها حق ارزن شويه سلم ولدي..وبش يريح بالك حاضر غدوة تو نكلمها..
اشرف:تمام لكن بنوضح حاجه ان نبي نعطي في البنت كلمه قبل لنولي عملي الاسبوع الجاي..
نجمه؛حاضر ولدي حاضر ان شاء الله مايصير الا تبيه حاضر..
ناضت عواطف وهي منغاظه بدون ماتبين ومشت قاصده دارهم بدون ماتقول كلمه..
اشرف؛اسمعي امي اني حاس ان عواطف بتبدا بالجو..
شبحتله وقالت؛جو شني؟
اشرف:الجو اللي دارته لنساوين ولادك قبل..يام انتي تعرفيني مانتحملش وعارفه لساني وقت طيرلي يولي زفت وهي اختي الكبيره و ومانبيش نغلط فيها..
نجمه وجعتها بنتها هي فاهمه وعارفه اللي تحس بيه وماتحملتش كلام اشرف عنها..
نجمه بحمق:تريح يابابا تريح اختك قداش ليها في حالها وكافيه خيرها شرها ومعاد تدخل في حد..اطمن ع مستقبلك
اشرف:يام خيرك حرجتي!؟ مش قاصد شي..اني مانبيش المشاكل وخلاص..
ناضت وهي تقول:ان شاء الله ربي مايجيب مشاكل برا ارقد ولاشوف شن بدير اني ماشيه بنرقد..
ومشت من حداه وهو قعد معاها بعيونه بعدين قالت..
/ان شاء الله عقابها خير وخلاص..
🍃🍃🍃🍃🍃
"هاه دريه شن صار"
هدا محمد يكلم في صاحبه يبي يطمن منه ع باقي جماعتهم اللي هربوا بالذهب..
"ميه ميه حموده وصلوا لتونس بخير وسلامه.."
محمد ابتسم براحه وقال:باهي وانت امتى لاحقهم؟
"الخميس نكون غادي"
محمد:يللا صحتين عليكم ونشوفوا بعض ع خير..
"ان شاء الله ياصحيبي تشاوات"
محمد:تشاو..وسكر بعدين تنفس براحه...
🍃وفي دار امه وبوه..
محي كان غارق في النوم وخديجه مقعمزة جنبه تتراسل هي وخوها..
(غدوة ان شاءالله جايه الصبح )
(معناها مش ماشي للعمل )
(يكون احسن..تصبح ع خير)
(وانتي من اهله)
سكرت النت وحطت تليفونها ع الصامت ورداته للكامدينو وحطت راسها ع المخده بترقد..
🍃وخوها المهدي مجافيه النوم..
ومنين بيجي النوم لواحد صاير فيه ماصايرله..
لكنه قاعد متأمل انهم يلقوا العصابه ويرجعوا المسروقات ويتفادى خسارة كبيره..
ويالا الأسف الامل ميت من قبل ان يولد...🍃
🍃🍃🍃🍃
"وبتمشي غدوة قصدك"
نجاة وهي مقعمزه ع سريرها..
/اكيد..
صابرين؛قصدك بتبدي هكي انتي ماشيه في طوع العقرب هديكا!
نجاة؛صابرين فكيني من غبائك ع الليل..
صابرين؛فهمتك انك تبي تستغلي الفرصه اللي عطتهالك لكن مش لهالدرجه شن ماتقولك ديري زي المضروبه ع راسك..
نجاة:والله مافي وحده مضروبه ع راسها غيرك..المثل يقول لو حاجتك عند الكلب قوله ياسيدي واني حنقعد نقوللها حاضر في اللي تطلبه لين نوصل للي نبيه..
صابرين عارفه اللي تبي توصله اختها الجالي وبس..مابتش تناقشها في الموضوع اكثر وقالت..
/باهي موعدك مع المغربيه كيف يصير فيه..
نجاة:فوتيها توا مش وقتها..
صابرين تنهدت وقالت؛براحتك..
نجاة؛وانتي؟
صابرين بإستغراب؛خيرني؟
نجاة؛ماتبيش تردي ع مروة ف الموضوع اللي جايبتهولك؟
ناضت صابرين وهي تقول..
/قلتها مليون مرة قبل مانبيش تنزوج اطلعوا من راسي..
ومشت بسرعه طلعت من دار اختها وهي هاربه منها..
ونجاه عارفه..وعارفه سبب رفضها ...
🍃🍃🍃🍃🍃🍃
تاني يوم..
الاربعاء..
9مايو..سنة 2018..
الساعه 11:00صباحا..
في حوش شنيبه..
خديجه بعد ماسقدت صغارها وراجلها مشت لحوش بوها فطرت مع امها وهدرزت عليها شويه عن خوها المهدي ووضعه...بعدين خلتها تكسد ع التلفزيون وركبت لجناح خوها الجالي..
~~~~~~~~
خديجه بحده:غبائك اللي وصلك لهني..
الجالي بإنزعاج؛اللي هو..المهم توا نعرف مني اللي قالت عليه انه مخبرها وحني مانعرفوشي!؟نحس فيها قالت هكي بش تخوفك بس...
خديجه؛كانت تتكلم وهي واثقه من روحها وعارفه شن تقول ماتكذبش..
الجالي بشي من الانفعال؛باهي مني!؟
خديجه؛اسأل روحك يابابا اللي ماارتحتش لين فضحت بينا..
الجالي قعد ساكت وهو مستاء ومعصب وقعد يفكر..
وخديجه تشوفله..
شويه قاللها؛تمام..قوليلها كان في عندك دليل طلعيه..
خديجه؛وكان طلعاته..
الجالي؛وقتها لكل حادث حديث انتي تأكدي منها قبل استفزيها وطلعي منها اللي عندها كله..
خديجه هزت راسها وقالت..
/باهي..
الجالي؛راهو حتى الزفته هديكا اشبح شن دايره..
خديجه؛نجاه!؟
الجالي؛ايه..يوم اللي طلقتها طوبى تعبت ورقدت في المصحه..
خديجه بإبتسامه متهكه..
/عارفتها والله عارفتها قدرت طوبى تستفزها وطلع عن طورها..
الجالي:كارثه لو تطلع مسجلتلها مكالمه!
خديجه:والله وقتها ياغالي تنسى ماعندي مانديرلك..
الجالي بدي يتوتر وقاللها..
/غير انتي ديري اللي قتلك عليه كلميها واستفزيها وطلعي منها الدوة..
خديجه؛باهي خلينا نحطوا الحكايه هادي ع جنب..غيرها؟
الجالي فهم عليها وقال بشي من الضيق..
/عطتني وعد تحافظ ع سري وماطلعاش مهما صار..
خديجه؛ترا فكني من العبط متاعك..هادي كان تلقى تزيدك مصايب ع مصايبك بش ديرلك فضيحه بشهودها تبيها تحافظ ع وعد وقطاف روايات زايد..
الجالي بضيق:اني بو بنتها وطوبى توا تفكر فيها وفي مستقبلها عارفها مش طلع الحاجه هادي صدقيني..
خديجه؛ياودي باهي خودني ع قد عقلي وسايرني..كان صار وطلعت اللي هناك وحطت كل شي فوق الطاوله شن دير انت؟
بدت ع وجهه ملامح الشر وهو يقول..
/نقلب عليها الطاوله باللي فوقها....
🍃وفي الوقت اللي هما يهدرزوا فيه..
كانوا مطيره وآلاء وفردوس يتساعدوا بش ينزلوا بساطات الصيف الخفاف لوطا..
فردوس:الاء ارفعي كويس..
آلاء:نرفع كويس خيرك!
غيرت فردوس عيونها لعمتها لقتها رافعه معاهم البساط وهي تشوف جهة حوش محمد شنيبه وتتفكر في الكلام قالتهولها طوبى..
شويه وتجي سيارة نجاه درس قدام الحوش..
وينزلوا منها هي وصغارها ويمشوا بإتجاه الباب ويخشوا..
فردوس همسا قالت بإشمئزاز..
/مسخين
مطيره سمعتها وشافلتها طول..
آلاء:خيركم وقفتوا!؟..
شبحولها الزوز بعدين مطيره قالت..
/بري بري..
وتمشي الاء للدروج وتنزل وهما معاها..
فردوس:بالشويه بالشويه راك طيحي..
🍃🍃🍃
بعد ماخشت نجاة بصغارها للحوش..
تقابلت هي وعمها محمد طالع مع المهدي من المربوعه الخارجيه..
سلموا الصغار ع جدهم وعمهم بحرارة..
بعدين سلمت عليهم نجاه..
نجاه:الحمد لله عمي شن حالك انت؟
محمد شنيبه؛الحمد لله ع كل حال..
نجاه شافت للمهدي وقالت..
/سمعت باللي صار لمحل الذهب ان شاء الله يلقوهم بسرعه ويرجعوا الذهب..
المهدي هز راسه وقال..
/إن شاء الله..
نجاة:ماتغششش روحك مافيش اغلى من الصحه..
محمد؛صدقتي يابنتي مافيش اغلى من الصحه كان راحت شن يردها..
نجاه؛ربي يطول في عمركم ويعطيكم الصحه..
محمد وولده المهدي..
"آمين..بارك الله فيك"
نجاة:هيا ماما خشوا داخل نو..
حمزة؛نبي نقعد مع عمي وجدي..
المهدي:بنطلعوا توا حمزة بعد نروحوا نقعمزوا ونهدرزوا لين تمل..
ابتسمت نجاه وهي تشوف لولدها..
حمزة هز راسه بالموافقه وهو ساكت..
محمد شنيبه بإبتسامه؛هي بروا خشوا مع امهم..
جوري:حاضر..
وخدتهم نجاه وخشت بيهم كلهم داخل..
محمد:تحس حمزة خدي عليك هلبه..
المهدي ابتسم وقال:حتى اني يوميا نكلم فيه..
ومشي فتح الباب وطلع وبوه وراه وهو مبتسم...
🍃وفوق..
في جناح الجالي...
كانت خديجه واقفه حدا السرير دير في اتصال..
والجالي مقعمز ع الكرسي ورا المكتب وهو يشوفلها بترقب وتوتر..
خديجه؛ينادي وماتردش..
الجالي:وراها لين ترد..
وقبل ليفصل الاتصال انفتح الخط..
فنصت خديجه في الجالي وقالت بحركه الشفايف..
"ردت"
هو زفر بالتوتر وقعد يسمع في اخته..
/وعليكم السلام
"شن عندك"
خديجه؛االلي عندي ان راجلك روح امس وقعمزت هدرزت اني وياه وحلفته حتى التحليف واقسم بالله ان كلامك مافيش منه وكله اوهام من الغيره..
سمعت صوتها وهي تضحك رفعت حاجبها..
هو اشرلها تفتح المايك وتقرب منه..
قربت منه خديجه وفتحت المايك ونقصت الصوت شويه وهي تقول..
/شن يضحك فيك..
"قالوا للحرامي احلف قاللهم جاني الفرج"
خديجه..
/قصدك خوي كذاب..
"كذاب مناطح"
رفع الجالي حاجبه وهو يشوف للتليفون بحده..
خديجه..
/اول شي احترمي نفسك واعرفي شن تقولي..تاني شي خوي عمرنا ماجربنا عليه كذب انتي راجعي روحك وتو تعرفي من الكذاب فيكم..
"الكذاب انتي اكثر وحده تعرفيه مني لهدا ماديريش عليا الجو متاعك..اني قتلك من المرة اللي فاتت عمايل خوك وبلي خوك بنستره كله ع خاطر بنتي بختها خلاه بوها مجبوره نحافظ ع سمعته ع خاطرها"
شد الجالي ع يده بقوة من الغضب وبانت في عيونه لمعة الدموع...
واخته تشوفله وقلبها انحرق عليه..
وطوبى متابعه تقول..
"مانبيش نخش معاه محاكم ونشهدر بيه..قوليله يسرح بإحسان وهكي هو اللي كاسب ع فكرة ومش حيخسر شي.."
خديجه وهي تشوف للجالي..
/باهي بنجي معاك وبنسايرك ونقولك باهي تو نقنعه لكن قوليلي كيف..
"شنو اللي كيف مافهمتش!؟"
خديجه..
/انتي طلعتينا غشيناك وطلعتيه هو خاين وعنده علاقه بغيرك تمام؟..جيبلي اثبات واحد وواجهيني بيه بش اني نقتنع ونقنعه يطلقك..
الجالي قعد يراجي في اجابة طوبى..
وهي قالت..
"قتلك قبل ان في حد عارف باللي دايره خوك "
خديجه..
/الحد هدا من وعنده دليل ولا غير دوة وخلاص!؟
"لا في دليل وقوي هلبه.."
خديجه.
/خلاص نبي نعرفه شن هو بش نصدق كلامك..
"خديجه انتي اكثر وحده تعرف اني صادقه خليك من المراوغه واللف والدوران.."
خديجه..
/معناها ماعندك شي واتهاماتك كلها كذب وعندك علم انتي هكي خشيتي في الطعن في الاعراض..
قاطعتها طوبى بإنفعال وهي تقول..
"شن تقولي انتي شن تفتفتي..هديكا نجاه بروحها اتصلت بيا وهرتلي الشكاره كلها"
غمض الجالي عيونه بشده وغطى وجهه بيده..
وخديجه توترت بس حاولت دير روحها عاديه وهي تقول..
/امتى صار هدا؟
"في اليوم اللي مرضت فيه ورقدت فيه في المصحه..مرضت لما عرفت اني معاشره راجل نجس فاجر يدير في الكبائر وهو محصن وياويله من ربي..قالتلي ان خوك في ليلة دخول خلاني راقده بروحي في الفندق ومشالها هي وقعد عندها للصبح وصح صار الشي هدا وهو قالي وقتها انه كان ماشي لصاحبه داير حادث"
خديجه قعدت تشبح لخوها بنظرات صدمه..
وطوبى مكمله تقول..
"وقالتلي ع يوم المحضر كيف ركبتله الجناح والباقي عندك..وقالتلي انهم ديما يتلاقوا وعندك علم حتى السفر مسافره معاه"
قعدت خديجه تفرك في جبهتها بتوتر وهي تشوف لخوها بحده
وهو مركز بنظره ع الباب وملامح وجهها كلها ضيق واحراج..
وطوبى متابعه تقول
"هدا كله نجاه قالتهولي بروحها من فمها لوذني والحمد لله رقمها موجود وتاريخ المكالمه واليوم اللي اتصلت فيه"
خديجه
/لو مسجله المكالمه ابعتيهالي نبي نسمعها
"مش مسجله ياريتني مسجلتها...لكن مش مشكله اللي عندي عليها هي وخوك اكبر من مكالمه مسجله"
خديجه
/شن اللي يخليني نصدق كلامك..
"وعلاش نحاول نخليك تصدقي حاجه انتي مصدقتيها اصلا"
خديجه..
/كلامك كله بلا دليل واحتمال كبير يكون في حد معبيلك راسك وضاحك عليك وانتي ماشيه بودانك ومصدقتيه..
"اسمعي ياخديجه اسمعيني كويس..اني عرفت ع خوك شي اخطر من الخيانه في نظر الناس وعرفت انكم غشيتوني في حاجه في نظر الشرع والقانون والعرف جريمه ومع هذا سكتت ومشيت لسبب واحد بس..ماكنتش نبي نظلمه بشي مالاش ذنب فيه"
رجع نظره للتليفون وعيونه غرقوا بالدموع..
وقلبه قعد يدق بقوة..
وخديجه مركزة عليه وهي تسمع في طوبى..
"كنت نشوف فيه بني آدم كويس دفع ثمن شهامته لما وقف مع بنات جيرانه زي مادار معاي اني قبل..خفت لو سيبته نجني عليه خفت ربي يحاسبني ويبليني لو كسرته فوق ماهو مكسور..قلت ياطوبى خليك معاه المرض هدا لو ماكانش فيه قبل مرات يجيه بعد خداك شن بتخليه وتستغني عنه!؟
لاتربيتي ولااصلي خلوني ندير هكي بالعكس وقفت معاه وساندته وعمري ماحسسته ان فيه شي مش طبيعي وياما مريت بحاجات معاه خلتني مانرقدش الليل من خوفي منه مع هذا مابيتش نحسسه بشي وتحملت في روحي وسكتت..
وياريتني كنت نعرف وقتها ان كليت اكبر مقلب تاكله مراة في حياتها..والله ليوم القيامه ماني مسامحتكم الله..
خديجه تنهدت وقالت..
/ومرات حني مانسامحوكش ع افترائك علينا ياطوبى خلي اللي لعب بدماغك ينفعك خربتي ع روحك وضيعتي حوشك وراجل مايتقدرش بثمن غيرك مستعدات يدفعوا الفلوس بش ياخدهم ويناسبوا عيله محترمه زي عيلتنا...
وسكرت عليها...
🍃وجت لخوها وقعدت تمسح في دموعه وهي تقوله..
/ماتبكيش ماتبكيش..اللي زيك انت ينرفع بيه الراس والحمد لله مادرتش حرام ولاتعديت حدود الله..
ناض وقف وهو يقول..
/حولي..ومشي من قدامها لباب الدار..
هي لحقاته وقعدت تنادي بخوف..
/جالي وين ماشي تعالى هني!..
طلع وطلعت وراه..
نزل من الدروج وهي تلحق فيه وتقول..
/جالي بالله عليك اوقف بالله عليك..
وصل لوطا وتوجه للباب بس وقف فجأه..
لما سمع صوتها اللي سمعاته خديجه..
التفت للصاله ومشالها..
خديجه بصدمه وخوف..
/جالي وين ماشي!..
ولحقاته طول..
🍃وهو خش عليهم زي الغول المرعب وبغضب قال..
/شن جاب امك هني انتي!؟
انفجعوا نجاه وصغارها وامه معاهم..
جاها طول شدها من ذراعها وجبدها وهو يقول..
/امشي اطلعي اقلبي وجهك الحوش هدا معاش تخشيله بكل..
جت امه بيناتهم وهي تقول بصدمه..
/خيرك شن جاك ياولدي شن جاك!..
خديجه وهي شاداته من ذراعه قالتله بخوف..
/جالي تعالى معاي..
جبد ذراعه منها وهو يقول..
/مش طالع لين تطلع الحيوانه هادي..
ونجاه تبكي وهي مفجوعه..
زي ماقعدوا يبكوا جوري ومعاذ..
وحمزة يشوف لعمه وهو مصدوم..
مغليه بصدمه..
/ياولدي خيرك مع المراة شن دارتلك قولي..
الجالي وهو يشوف لنجاه بحقد.
/خربت حياتي يام خربت حياتي..
وجاها شدها مرة تانيه وقعد يكر فيها وهي تعيط..
وامه واخته يحاولوا يبعدوها عنه وهما يترجوا فيه..
والصغار صايره فيهم حاله..
مذعورين..ومصدومين..ويبكوا بالعبره..
🍃ع خشة عمر ومعاه نضال اللي روح اليوم بس للحوش..
وين خشوا سمعوا الدوشه والعياط..
نضال بفجعه:شن هدا!؟
وعمر طول مشي للصاله..
لحقه نضال وخشوا ورا بعض وشافوا اللي صاير..
جو لخوهم جبدوه..
عمر بصدمه؛جالي شن دير ياراجل..
الجالي بغضب وانفعال شديدين..
/طلعوها من الحوش الكلبه طلعوها..
خديجه وهي ترعش قالتلهم:طلعوه برا طلعوه..
خوته جبدوه وهو يصيح بصوت عالي..
/اطلعي ياحيوانه اطلعي..اطلعي ياعن فيتك مرة وحده..
ورفعوه خوته برا الصاله وخديجه وراهم..
بعد ماطلعوه الصغار جو لأمهم وضموها وهما يبكوا بخوف..
ومغليه تشوفلهم وهي تقول بنفس متقطع..
/اعوذ بالله من الشيطان الرجيم..شن جاه..شن جاه الولد..شن جاه..
نجاه انتبهت ان مغليه وضعها من مزبوط..
وفي هديكا اللحظه برغم اللي صار فيها فكرت تستغل الموقف اللي صار لصالحها...
بعدت صغارها وجت لمغليه شدتها وهي تقوللها..
/عمتي تعالي قعمزي..
مغليه مشت معاها وهي تقول بتعب..
/خيره يابنتي خيرك انتي وياه شن صاير بينكم..
نجاه قعمزتها وهي تقول .
/مشكله في الخدمه عمتي..دواك وين؟
مغليه حطت يدها ع راسها وهي تقول..
/جيبلي كصبر كصبر..تلقيه حدا حافظه الخبزة..
مشت بسرعه نجاه وطلعت من الصاله وهي تسمع في صوت الجالي يعارك..
🍃الجالي بإنفعال شديد..
/الله يلعن اليوم اللي خديتها فيه اللي يلعني اني..
عمر:ياراجل وطي صوتك ولااسكت بكل تو تسمعك امك وتصير مصيبه..
الجالي:طلعوها من هني طلعوها مانبيهاش تقعد في مكان اني فيه..
نضال بحده؛مش حوشك بش تحكم فيه..
خديجه؛نضال!..
عمر: اسكت انت..
الجالي قدمله وهو يقوله..
/خيرك تتكلم هكي انت..
عمر جي بيناتهم وهو يقول..
/خلاص عاد خلاص ريحوا امنا الزفت!..
نضال:اما راحه تحكي عنها!! في جرة خوك ومراهقته المتأخرة حياتي دمرت..
الجالي بغضب:بضم فمك ولانجي نخربلك وجهك..
نضال:مازال تفتح في فمك وتدوي انت تي تحشم شويه تحشم خلي عندك دم..
الجالي:ياعن اصلك بكل..
ودف عمر عنه وخدي كاس ميه محطوط الطاوله وحدفه ع نضال..
عمر بصوت عالي:لا..
وخديجه صرخت بأعلى صوتها..
اما نضال تجنب الكاس وخلاه يصطدم بالحيط ويتكسر..
عمر جي لنضال قعد يدف ويطلع فيه وهو يقول..
برا اقلب وجهك اطلع..
وطلعه ونضال يشوف للجالي بنظرات حقد لين اختفي من قدام عيونه..
سكرت خديجه وراهم الباب وهي تبكي وتقول...
/ياربي شن هدا ياربي..!
الجالي بغضب؛اطلعي طلعيها توا ولانطلع اني..
خديجه التفتت عليه وقالت..
/علاش هدا كله علاش ع خاطر هالفرخه الحرفه ! لاجعلها ولت عطيها كلمتها وخليها تلحق بنت عمها.
الجالي وهو يحرك في راسه بالرفض ويقول..
/لا..مانطلقهاش..لو يطيحوا فيها رقاب ياخديجه طوبى ماتطلعش من ذمتي طوبى مرتي ولين تموت تقعد مرتي..
ومشي دفها من قدام الباب..
فتحه وطلع وخلاها منهاره..قعمزت ع المندار وقعدت تبكي..
🍃وهو مشي طول طلع من الحوش..
في الجنان كانوا واقفين عمر ونضال..
فات من قدامهم وتوجه للقراج..
نضال ضرب ع ذراع عمر وقاله..
/الحقه ماتخليشي بروحه..
عمر خاف حتى هو ومشي لحق عليه..
لقاه ركب سيارته وشغلها..
شد الباب وقاله؛انزل خليني اني نسوق
الجالي:فوتني..
عمر:قسما بالله كان مانزلت نوقف ورا السيارة..
قعد الجالي مركز بنظره ع الدومان وهو يتنفس بعصبيه..
بعدين فتح الباب ونزل ومشي ركب في الكرسي اللي جنب السواق..
وعمر ركب في كرسي السواق وطلع بالسيارة من القراج...
🍃داخل..
في الصاله تحديدا...
مغليه ودموعها في عيونها..
/هدا علاش سيبتي الشركه انتي؟
نجاه هزت راسها وهي ساكته..
خشت عليهم خديجه وهي تشوفلهم بعيونها المتورمات من البكي..
مغليه بلهفة وخوف؛خوتك وين؟
خديجه بصوت مبحوح؛طلعوا..
مغليه بنبرة باكيه؛ع خاطر مشكله في العمل يحط راسه براس مرت خوه..
شبحت خديجه لنجاه..
نجاه:صار بينا مشكله ع خاطر تصميم كان يبيه مني بش الشركه تنفده واني رفضت تعاركنا واني استقلت بعدين سمع ان التصميم خداته شركه من المكتب اللي نخدم فيه كبرت المشكله اكثر بينا..
خديجه؛ضيعتي عليه فرصة كبيره..
مغليه:ماهو متاع المراة يابنتي..
خديجه:كان واعد ناس كبار بالتصميم متاعه ولما رخت بيه صارتله معاهم مشاكل وخسراته علاقته بيهم..
نجاة قعدت ساكته وهي تتصنع في ملامح الكدر والضيق..
وخديجه تشوفلها ومن داخلها تشتم فيها وتسب..
مغليه نزلت بظهرها ع ظهر الكنبه وهي تقول..
/ربي يسامحك ويسامحه زدتوا رعشتونا وحني بروحنا راعشين..
قعمزت خديجه وقعدت تشوف للصغار بنظرات تعب واضحه..
وهما مقعمزين يشوفوا لأمهم وأثر الدموع باينه في عيونهم..
🍃🍃🍃🍃
وفي نفس الوقت.
في حوش لطفي الواعر..
طوبى ردت ع خديجه قدام اريج..
واريج اللي كانت حالتها الصحيه متحسنه بعض الشي سمعت شن ترد خالتها..
التفاصيل اللي قالتهم طوبى اول مرة تحكيهم وصدموها لدرجة كبيره..
زادت انقهرت ع خالتها..
وزادت كرهت عيلة شنيبه..
وهالمرة حست بالنفور اتجاه نضال..
☘امها واختها ومطيرة لما نزلوا بالبساط لوطا سمعوا صوت طوبى العالي وهو جاي من الدار..
حطوه ومشوا للدار طول..
ع طلعة غرفه من الحمام كانت دير في دوش وصوت طوبى وهي تعارك كان واصلها..
خشوا عليها لما قالت..
" وياريتني كنت نعرف وقتها اني كليت اكبر مقلب تاكله مراة في حياتها..والله ليوم القيامه ماني مسامحتكم الله.."
وقعدوا يشوفولها وكيف ملامح الازدراء ارتسمت ع وجهها وهي تسمع..
بعدين نزلت التليفون وشافت للشاشه وقالت..
/مريضه..
مطيره وهي عاقده حواجبها..
/من كان يكلم فيك؟
طوبى:الشيطانه خديجه..
فردوس:شن تبي الحق.يره؟
طوبى ابتسمت بتهكم وقالت..
/تجبد مني فالدوة تبي تعرف من اللي يعرف بعملة خوها وخبرني عليها..
مطيره؛كيف قصدك انتي ماكبستيشي ع غفله!؟
طوبى تنهدت بضيق وبدت تسرد ع عمتها تفاصيل اللي صار هداكا اليوم..وحكتلها حتى عن الرسائل لكن مابتش تقول لعمتها عن هوية الطرف الثالث ولابت تخليها تفهم ان الموضوع فيه استغفال وغش..
تعرف عمتها كويس انفعاليه جدا وماتقدرش تضبط نفسها عند الغضب وعندها قصه مريرة مع الاستغفال والخيانه هدا كله حيخلي عندها ردة فعل عنيفه عواقبها غير محموده..
فردوس حتى هي عارفه الشي هدا كويس لهدا مااستغربتش..
مطيره؛باهي مني اللي بعتلك الرسايل هادم؟
طوبى:مش عارفه..جربت نعاود ع الرقم مرة تانيه طلع خارج الخدمه حطيته في الكاشف طلعلي من غير اسم...
مطيره:بالك نفسها جارتك غير ماتبيش تبان في الصورة..
طوبى حركت سبابتها بالنفي وقالت..
/لالا..المراة هداكا اليوم كانت تبان مصدومه اكثر مني..
غرفه..
/لازم يطلع الشخص هدا..بعدين كان اضطريتي ترفعي دعوة الطلاق يكون شاهد لصالحك..
فردوس:حتى اني فكرت فيها..
طوبى بضيق:ان شاء الله مافيش قضايا ولامحاكم ان شاء الله يطلق طول ويفكنا من الشوشرة ووجع الراس..
اريج؛اني بنرفعها الدعوة لو هداكا عاند وسكر راسه..
كلهم وجهوا نظرهم ليها..
اريج بكره:كرهته وكرهتهم ومعاش نبي شي يربطني بيهم خلاص..
🍃وعيلة زي هالعيله مافي حد يتمنى يكون في بينه وبينهم اي رابط من أي نوع...
بس في من عائلات نسبهم ينشرى بالذهب...
☘نجمه بإبتسامه؛ع خير ان شاء الله ع خير..مدام في قبول نبوا نديروا الفضانيه قبل ليولي اشرف للصحرا الاسبوع الجاي..
"المشكله معاش في وقت رمضان بيخش خلاص"
نجمه بضحكه؛الله يبعد علينا المشاكل يابنتي شن رايك نديروها يوم الجمعه العشيه طاسه شاهي وحلوات خير وبركه..
"نديروها الجمعه ان شاء الله عشي خالتي نجمه"
نجمه هزت راسها وقالت وهي مبتسمه:خلاص نبلغ عمك الصيد والولاد..
🍃وهدا كله قاعد يصير وخديجه ماعندهاش بيه علم..
خديجه اللي قاعده تستجمع في نفسها بش تكمل محاولتها انقاذ عيلتها وسمعة عيلتها من وجهة نظرها..
بعد الزوبعه اللي صارت خلت نجاه تروح بصغارها قبل ليروح بوها ونبهت عليها ماتجيش لين هي تقوللها..
واتفقت مع امها انها ماتجيبش سيره باللي صار لبوها نهائي..
قعدت مع أمها شويه لين طمنت عليها..بعدين مشت روحت لشقتها...
🍃ومع العصر روحوا المهدي ومحمد شنيبه بعد ماكانوا يجروا طول النهار ع قصة سرقة الذهب ويحاولوا يديروا حلول تخلي المهدي يقلل من حجم الخسارة اللي حتلحقه في حالة مارجعش الذهب المسروق..
ولأنهم قعدوا مشغولين البال بالقصه مافي حد منهم تفكر صغار طاهر..
🍃من جهة تانيه نجاه حرصت ع صغارها مايعاودوا شي من اللي صار لخالتهم صابرين لأنها عارفتها حتعيد وتزيد في نفس الكلام اللي تقوللها فيه قبل عن الجالي وعيلة شنيبه وهي من بعد الفجعه اللي حصلتها اليوم ماعندهاش جهد تناقش حد في أي شي..
🍃 والجالي..
بعد مادار بيه عمر دورة في العاصمه خلت اعصابه تهدا شويه..
روح معاه للفيلا متاعه...خلاه ياخد دواه ويخش يرقد وهو قعد فايق حداه يمشي في وقته ع النت..
🍃🍃🍃🍃🍃
الساعه 2:30ليلا..
زي ماتعودت من مده تسهر مع نفسها والقرآن والذكر...وين ماتحس بالراحه..والقوة في نفس الوقت..
اقتحمت عليها خلوتها اريج للمرة التانيه..
وهالمرة سألتها طول..
"علاش ماتبيش تقولي انه مريض نفسي"
طوبى:بش الناس كلها تعرف وينفضح ويقعدوا يعايروا بنتي بعدين ببوها!؟
اريج:سيوره ينفضح والناس كلها تعرف..
طوبى:ع الاقل مانكونش اني اللي فضحته..
اريج:قصة مرضه تخدمك هلبه تقدري تضغطي عليه بيها وتخليه يطلقك..
طوبى بضيق..
/يكذبني فيها عادي جدا ماعندي شي يثبت حدا الدوا اللي ياخد فيه مانحفظش اسمه..
اريج:شن هو مرضه بالزبط؟
طوبى:سامحيني اريج مانقدرش نقول تفاصيل..
اريج قعدت تشوفلها بإبتسامه حسره وهي تقول..
/خسارة في خليقته الواطي هدا مراة زيك انتي فوق اللي داره فيك قاعده تستري عليه وماتبيلاش الفضيحه
طوبى ودموعها في عيونها..
/بو بنتي ياأريج..
اريج بحسرة ودموعها في عيونها:ياريته ماصار هداكا اليوم..
طوبى برضا وحزن:قدر الله وماشاء فعل هو نزل الابتلاء وحينزل معاه الصبر وبعده الفرج..
ركزت اريج بنظرها في الفراغ وقالت :إن الله اذا احب عبدا ابتلاه..
هزت طوبى راسها وقالت:الحمد لله..بعدين شبحتلها وقالت..
مافيش داعي نوصيك دسي اللي عرفتيه..
اريج:مادام انتي ماتبيشي يطلع مش حيطلع..غيرت نظرها لخاتم التسبيح اللي في سبابتها والمصحف اللي شداته في يدها...ناضت وهي تقول..ماشيه الحمام..
ومشت طلعت من حداها..
وطوبى معاها بعيونها لين طلعت..
بعدين تنهدت وولت فتحت المصحف وقعدت تقرا...
شويه وخشت اريج للصاله بملاية الصلاة..
وقفت مقابله للقبله..
لبست الملايه..وكبرت..وبدت تصلي..
🍃🍃🍃🍃🍃
فتح عيونه فجأة...نظره جي ع شي فاجئه وخلا دقات قلبه تتسارع..
شافها هي..راقده جنبه..وتشوفله بعيونها الحايره ونظراتها كلها حنان..وابتسامه حلوة مرسومه ع وجهها..
دمعوا عيونه وهو يقوللها..
/حلمت حلم..مش حلم..كابوس..شفتك فيه خليتيني ومشيتي واني قعدت بروحي من غيرك خايف..خايف هلبه وعاجز مش قادر ندير شي..
سكت وهو يشوف فيها قاعده بنفس الملامح وهي تسمع فيه..
قاللها:ماتخلنيش..انتي عطيتني وعد طوبى ماتخلنيش...
هزت راسها بصمت وهي مبتسمه..
حط يدها ع مكان قلبه وهو يقول..
/حطي يدك عليه بش يهدا..زي ماكنتي ديري قبل..
مدت يدها وحطتها ع مكان قلبه وقعدت تمسح عليه وبدت تهمس بسورة الفاتحه..
غمض عيونه..وحس براحه عجيبه...
كان يحس بلمسة يدها ومسحتها ع قلبه..ويسمع في همساتها..
لحظات...واختفي كل شي..
لاعاد حس بلمسه يدها ولاسمع صوت همسها..
فتح عيونها...لقي مكانها فاضي...
ناض بنص جسمه وحط يده ع مكانها وهو يتحسس فيه..
خيال...كله كان خيال..ووهم...
طوبى معاش مازال تشوفها جنبك ومعاك الا في خيالك وأوهامك يالجالي...
نزلوا دموع وانهد براسه ع المخده وبدي يبكي بدون صوت..
يبكي بحسرة وقهر..
هذا اللي مايقدرش قيمة النعمه الغاليه الابعد فقدها..
رجع عقله يصورله في سيناريوهات سودا...
يطلق طوبى..ومعاش يولي في بينها وبينه رابط يخليها ملكيه خاصه ليه..
وبعد وقت ياخدها غيره وتكون ملكه وكل شي حلو عاشه معاها يكون من نصيب غيره...
خدي المخدة متاعها وغم بيها وجهها..وطلع منه صرخه غيظ وغيره مكتومه...
لون وجهها مال للبنفسجي وعروقه برزوا من قوتها..
بعد مافش غله كله..بعد عنه المخده وقعد ياخد في انفاسه بصعوبه..بعدين تبدلت ملامح وجهه للحده وقعد يمسح في دموعه وهو يقول..
/مش حتكوني لغيري ياطوبى..ياتقعدي ليا اني ياإما مش حتكوني لحد بعدي لين تموتي...
🍃وهدا كله وعمر راقد في لوطا في الصاله مايجيب خبر شي...
🍃🍃🍃🍃
تاني يوم..
الخميس..10 مايو...سنة 2018..
الساعه 11:30صباحا..
في مطار معتيقه..
كان مختار احد الواصلين من رحلة سفر طويله دامت لساعات وقف فيها في اكثر من مطار قبل ليستقر في مطار البلاد..
المسؤولين عن امن المطار كعادتهم سهلوا عليه كل الاجراءات وخلوا اموره تمشي بسلاسه..
"ديما حاضرين استاذي"
مختار بإبتسامه جاده..
/شكرا..شكرا..
وكمل طريقه بشنطته لين لاقاه رضا..
خدي منه الشنطه وقال..
/حمد لله ع سلامتك استاذ..
مختار:الله يسلمك يارضا..
طلعوا برا المطار للسيارة..
حط رضا الشنطه في الخلف..بعدين فتح الباب السحاب لمختار..
ركب مختار وهو سكر الباب بعدين مشي ركب السيارة شغلها وتحرك..
🍃في الطريق..
طلع مختار تليفونه وين شاف للشاشه لقي اشارة النت طالعه..واي فاي..
بإستغراب قال..
/صارت تطورات في البلاد واني مهناش!؟
رضا؛تطورات شني!؟
مختار وهو يشوف للتليفون:في نت فالطريق..
رضا:استاذ..
قام مختار عيونه..
شاف رضا يشبحله من مراية السياره وهو رافع يده اللي شاد بيها جهاز نت..
ضحك مختار وقال:شيرة مذهوبه..
نزل رضا يده وحط الجهاز في مكانه..
ومختار رجع يشوف لتليفونه وهو يقول..
/هدا حال اللي يسافر من بلاد لبلاد وكل وحده احسن من التانيه وفي نهاية المطاف يحط رحاله في هالبلاد المتكوبزة..
ورضا يسمع بدون مايعلق..
خش مختار ع اخبار اسعار العملات بعدين شاف البورصه..
اخر شي خش ع الفيس يشوف اخر الأخبار..
وبالصدفه يقابله منشور ممول لصحيفه اسمها..
(الرائدات) المنشور كان فيه اعلان عن العدد الجديد اللي نزل الصبح..
والاعلان كان فيه مقتطف لحوار بعنوان..
(عند سدرة المنتهى)
وفيه صور للطفي الواعر..ولطوبى ..
وصورة لسدرة المنتهى...
صورة لطفي في المطحن..
وصورة طوبى وهي مقعمزة ورا المكتب وتشوف لملف قدامها...
وصورة لسدره واخدينها من حفل تكريم دايراته وزارة التعليم لمدراء المدارس...
خش ع التعليقات طول..
وشاف كلام المعلقين ومدحهم وشكرهم في سدرة وطوبى..
وناس متأثرة بكلام لطفي عنهم..
التعليقات كانت لناس تعرفهم وناس ماتعرفهمش.
هو بعدين خش ع رابط المقال..
وبدي يقرا فيه..
ورضا يراقب فيه من المرايه وعارف هو في شن مشغول...
🍃🍃🍃🍃🍃
"كلام عمي لطفي بكاني"
مطيره؛مالا كان تشوفينا شن صار فينا ع الصبح ياغردنا غريد..
فايزة وهي تمسح في دموعها:لتوا في بالي دايرتها مسافره وسيورها مروحه..
فردوس بصوت مبحوح واثار البكي باينه ع وجهها..
/كلنا ياشراده..
فايزة بحزن؛عز عليا الفرح..
مطيره:كلنا عاز علينا لكن املنا في ربي كبير يردهالنا سالمه مافيها سو.
فردوس وفايزة آمنوا ع دعائها..
بعدين تنهدت فردوس وقالت..
/أشبح شن يصير في محكمه رؤوف اليوم..
فايزة؛قاعدة ماعندهاش علم؟
هزت مطيره راسها بإيجاب..
فردوس؛قالوا وضعه صعب يستر الله وخلاص..
فايزة بضيق:شكلي بنكلمهم وبنلغيها الفضانيه وخلاص..
مطيره:لا بنتي ردي بالك عمك لطفي والله مايطيب عليه خلي بنيتك تفرح زي هالبنات..
فايزة بضيق؛عيب عليا ياعمتي ندخلكم فرح وانتم في هم مايعلم بيه الا ربي..
مطيره؛همنا واحد ووفرحنا واحد وان شاء الله زي مابنفرحوا بنياتك اللي هما بنياتنا ربي يفرحنا..
فايزة ودموعها ينزلوا..
/مش عارفه لولاكم شن صار فيا..
فردوس بإبتسامه وسط دموعها..
/فايزة راك اختنا ومحسوبه مايجيش كلامك هدا بين بنت وعيلتها ولا..
فايزة بإبتسامه امتنان؛ربي مايحرمني منكم..
🍃🍃🍃🍃🍃
ومن فايزة لبنتها مروة..
اللي كانت قاعده منطويه ع نفسها في المدرسه الجديده لاتبي تكلم حد ولاتخالط حد..
وهي مقعمزه بروحها في الاستراحه تتفرج ع الطالبات في الساحه كانت تشوف لأختها تاله كيف بسرعه خشت في بنات فصلها ودارت صحبه معاهم..
كانت حاسدتها ع الثقه والامان اللي قاعدات عندها تجاه الناس..
وهي تفكر وسرحانه..
جتها بنوته لابسه بدله اعداديه طويله ومحتشمه وبدل الوشاح لابسه شاربه رافعه طرف منها ع صدرها ببروش بسيط..
شكلها لطيف جدا..
وقفت عليها وقالت..
/عادي نقعمز جنبك..
مروة قعدت تشوفلها بريبه وهي عاقده حواجبها من غير ماترد..
البنت قالت؛السكوت علامة الرضا..وقعمزت جنبها وهي تضحك..
مروة غيرت عيونها عنها وقعدت تشوف القدام بعدم اهتمام..
البنت قالت؛شكلك حقه متكبرة وشايفه روحك وماعاجبك حد..
شافتلها طول وهي متعجبه..
البنت بضحكه؛ماتبيش تتعرفي علينا ولاتاخدي منا تأشير الامتحانات اللي قالولك عليه الابلات..شاطرات ونعجبوك راهو..وغمزت بعينها وابتسمت..
مروة بضيق؛لامش قصدي..لكن مانحب نخالط حد مانعرفاش..
البنت قالت؛نحس فيك عندك رهاب اجتماعي..
مروة بصدمه؛لالا والله لا..
قعدت تضحك البنت بعدين قالت؛نبصر عليك..المهم اسمعي اني نبي نتعرف عليك اسمي مناسك شطورة هلبه وديما من الاوائل راهو..
قعدت تشوفلها مروة بشك..
هي بضحكه قالت؛والله من الأوائل اسألي البنات عليا بعد نركبوا من الاستراحه نعطيك تاشير الامتحانات باهي..
مروة تنهدت وقالت؛باهي..
هي قالت:مانبيش نسألك علاش حولتي اخر السنه باهي لكن نحس فيك صايره معاك قصه..
مروة؛ماصاير معاي شي غير استاحشت مدرستي الاولى وصحباتي..
مناسك؛عندك حق مجربه شعورك السنه هادي حولت من مدرسه اللي قريت فيها من الابتدائي للأولى اعدادي وبكيت هلبه وصارت فيا حاله..لكن توا حبيت المدرسه هادي هلبه ودرت قروب مجننه لكن طيبات والله..
ابتسمت مروة...
مناسك بإنفعال مبالغ فيه زغردت بعدين قالت..
/واخيرا ابتسمت يابنات..
وقعدت تصفق وهي تغني..
هاالنهار تمينته طلبت العالي ولقيته..
بنات المرحله اللي هما يقروا فيها قعدوا يشوفوا لمناسك وهما يضحكوا..
ومروة تضحك عليها بعدين قالت..
/زعيمة المجانين..
مناسك بضحكه؛انا عاقله ومجنونه انا كل الالوان..
مروة قعدت تضحك وهي وتقول..
/يعطيك السلامه..
مناسك بإبتسامه:مقنينتك كيف تضحكي مشناك وانتي مكزمه..
ومن بعيد شويه كانت تاله مع زميلاتها الجدد تشوف لمروة وهي تضحك وع وجهها ابتسامه راحه...
🍃🍃🍃🍃🍃
🌿مايؤلم الشجرة ليس ضربة الفأس بل أن يد الفأس من خشبها🌿
ولما تجي الضربه من ضناك اللي مفروض يكون عزوتك..ولا من خوك اللي مفروض يكون عضيد وسند..
تكون قاتلة مش بس مؤلمه...
🍃بعد الظهر...
كان مختار في شقته في غرفة الصالون..
متمدد ع كرسي الجلد الأسود..يسمع في معزوفة الحرب وهو مركز بنظره في الفراغ وسرحان...
يفيقه من سرحانه رضا وهو يقول..
/استاذ مختار..
ساوا جلسته وخدي الريموت نقص الصوت..بعدين وجه نظره لرضا..
رضا:حكموا عليه خمسة سنين..
رفع حاجبه اليسار:مش مهم حكم الحبس..المهم الفضيحه..
الفضيحه..جاب ايديه لبعض ولصق رووس في بعض وهو يقول..السمعه السيئة تحبسك عمر كامل..
نزل ايديه وقال...كلم اصحاب الصفحات اللي اتفقنا معاهم في وقت واحد ينزلوا المنشور...
رضا هز راسه وقال؛حاضر..
ومشي طلع من حداه طول...
وهو خدي الريموت وعلى الصوت ورجع تمدد ع الكرسي...
🍃🍃🍃🍃🍃
"متأسف جدا استاذة نبيله صدقيني حاولت بكل جهدي ندير حل لكن ماقدرتش،قلت لسيادة المستشار القضيه خاسره والتهمه لابسه السيد المبروك لبس واني خديتها لأني عطيتك وعد قبل مانردكش لما تحتاجي مني خدمه"
نبيله هزت راسها وملامح الألم مسيطره ع وجهها ماقدرتش ترد عليه بكلمة..
المحجوب وهو يشوفلها بأسف:بارك الله فيك استاذ عطيه وباقي اتعابك توصلك اليوم..
:القضايل الخاسره ماناخدش عليها في اتعابي كامله ماتبعت شي سيادة المستشار..نكرر اسفي مرة تانيه استاذة نبيله..عن إذنكم...
ومشي طول من قدامهم وهو مستاء ومحرج..
نبيله بصوت مخنوق؛روح بيا..
حاوطها المحجوب ومشي بيها للسيارة..
كان موجوع لحالها وحال بنت اخته وحتى راجل اخته اللي
قاعد يستنى ع نار بش يعرف شن صار في راجل بنته.
🍃والخبر وصل لطفي..
خاب أمله بقوة...وحس بغمه زاد كبر اكثر...
وماكانش هدا حاله هو بس..
حال العيله كلها..ماعدا غرفه اللي قاعده ماتندري على شي ومش عارفين كيف يخبروها من خوفهم عليها..
وهني الضغط النفسي زاد ع طوبى..
زاد خوفها..زاد قلقها...وزاد همها كبر اكثر...
🍃🍃🍃🍃
وع صفحات الفيس..
ينزل منشور واحد ممول بنفس الصيغه..
وبصور...
منشور كله تشويه في شخص "مبروك بن موسى" لبسوه تهم تانيه فوق تهمة الاختلاس ونعتوه بأشبع الصفات...
واغلب الناس قروا المنشور..
وكانت الفضيحه اللي يبيها مختار تأسر عبد الرؤوف وكل حد يخصة طول العمر..
🍃" حسبي الله ونعم الوكيل فيه حسبي الله ونعم الوكيل..الله لاتسامحه لاتربحه الله لايوجهله الخير"
طوبى ودموعها ينزلوا وهي حاضنه اختها..
/خلاص بالله عليك خلاص..مش باهي ليك ياغرفه ضري روحك هكي..
غرفه وهي منهاره:ضريت روحي من زمان لما ماسمعتش منها الله لايسامحني حتى اني فضلت عليها واحد حقير زي هدا قهرتها وربي قهرني.
وطوبى تبكي بصمت وقلبها يتقطع وهي تسمع فيها شن تقول..
وحداها فردوس وبناتها وحتى هما يبكوا بألم ع حالها..
وبرا في الجنان..
جدها وعمها وولده وولد عمها وبوها ومعاهم مطيره..
يسمعوا في بكاها ويسمعوا فيها شن تقول وبشن تدعي..
كلهم كان الضيق عظيم في صدورهم..
بس بوها الوجع اللي يحس بيه وقتها لايوصف..
🍃🍃🍃🍃🍃
"عيلة متاعين فضايح وخلطوا ع اللي زيهم"
مغليه؛ويقولوا فلوس وعز من يومهم طيح سعدهم..وبشماته قالت..وكان نشوف وجه اخته اللي خشمها ديما مطنقر في السمي..
خديجه؛توا غاطس في اللبز..
نسرين بضيق؛فكونا من الشماته راهو ربي يبلينا..
مغليه:اللهم جيرنا بعيد وبر علينا ماهو لينا هالخبر..
نسرين غيرت الموضوع وقالت؛شن صار في المهدي؟
مغليه بحسره:ماصار شي بوك قال بنحاول نساعده بش تخف عليه الخساره..
نسرين بضيق:ربي يعوضه خير وخيي..
خديجه ومغليه:آمين..
نسرين؛ايه حقه خديجه مبروك عليك السلفه الجديده ياحنه..
مغليه شبحتلها بإستفهام..
وهي قالت بإستغراب؛شن تقولي؟
نسرين:تي نحكي ع سلفك اشرف مش خطب صفاء بنت فايزة..
عدلت خديجه جلستها وهي تقول..
/من قالك؟
نسرين:شن مالا قالولك دسي..ناسيه ان فايزة صاحبتي !؟
خديجه قعدت مستوهه للحظات..
وامها قالت؛شكلك ماتعرفيش انتي؟
غيرت نظرها لأمها وقالت؛شويه بس يام..
رفعت تليفونها وهي دور ع رقم سلفتها الكبيره..
ونسرين ومغليه يشبحولها..
لقت الرقم واتصلت بيها طول وحطت رجل ع رجل وقعدت تهز في وحده منهم بعصبيه وهي تراجي فيها تفتح الخط..
وردت عليها..
خديجه؛ايوه سميره شن حالك؟
"اهلا خديج حالي باهي الحمد لله شن حالك انتي؟"
خديجه؛الحمد لله..
"شن حال محمد"
خديجه؛حاله باهي الحمد لله..
"باهي الحمد لله ووخيك شن صار فيه"
خديجه:مافيش جديد مالقوا شي لتوا..
"لاحول ولاقوة بالله ربي يعوضه خير وخلاص"
خديجه:آمين..مبروك علينا السلفه الجديده ياسمورة ..
"خبروك العيله"
وجه خديجه تغير لونه وزاد غضبها بس حاولت تكتمها وهي تكلم في المراة..
/ايه سمعت..
"مواليد 2001 ياكبدي ولدي الكبير اكبر منها'
خديجه؛ايه فرق كبير في العمر بينها وبين اشرف..
"لكن اشرف مش باين عليه سلامته"
خديجه؛ستي ربي يكمل ع خير ويهنيهم..
"آمين غدوة ان شاء الله بنمشي مع عمتي والبنات بش نلبسوها الدبله"
شدت خديجه ع يدها بقوة من الغيظ وهي تقول..
/ايه قالولي..خلاص نتلاقوا غدوة سمورة ونهدرزوا..
"إن شاء الله..بالسلامه توا"
خديجه؛بالسلامه..وسكرت عليها وهي تقول بغضب وتهكم..
/ياعيني بيرفعوها غدوة معاهم تلبس الدبله واني كنتهم فوق منهم الحكايه كلها ماعنديش بيها علم..توا ولت سميرة اقربلهم مني..ناسيين شن درتلهم..ناسيين قداش مرة سترتهم في مناسبتهم ودفعت عليهم..ناسين قداش مرة وقفت معاهم وشن درتلهم..جمايلي مغرقتهم لوذانهم هالعيله النكارة لكن باهي باهي كان فوتت الاول هادي والله ماني مفوتتها..
وناضت..
نسرين بقلق:صلي ع النبي وقعمزي خديجه فكينا من النكد..
خديجه وهي ماشيه بتطلع قالت بنرفزة..
/فوتيني ترا..
شافت نسرين لأمها وقالت..
/يام خيرك ساكته نوضي الحقيها ورديها..
مغليه برفعة حاجب؛وعلاش بنردها عندها حق ولازم تمشي تاخده..
نسرين؛وكان دير مشكله وتجي راسها..
مغليه بكبر؛يقدروا هما !
نسرين بضيق:عطيني بكشه حتى اني..
مغليه؛بعيد السو عليك..بعدين انتي كيف بتعرفي انهم ماقالولهاش..وهما علاش يدسوا عليها شن قصدهم بيها!؟
~~~~~~~~
نجمه؛يومها نازله في المراة وربايتها لبناتها كيف تبيني نقولك ماشيه بنخطب منهم؟
خديجه؛واللي قلته ياعمتي جبته من راسي!؟ ماهو بنتك حكتلك اللي صار المدرسه يومها..
عواطف:ناسيه روحك بعد ماطلعت براءة البنت شن قلتي..
مافيش دخان من غير نار..
خديجه وهي رافعه يدها؛رجاءا مانكلمش فيك كلامي مع عمتي...
نجمه؛اسكتي انتي ياعواطف وخليني اني نتفاهم معاها..
خديجه؛بطلعيني غالطه ياعمتي بالسيف..لامش غالطه بكل وجعتني منكم هلبه وحزت في نفسي كيف اني كنتكم فوقكم اخر من يعلم وسلفاتي كلهم عارفين..
نجمه؛مافي حد يعرف غير سميره وسميره الكنه الكبيره مفروض تعرف..
خديجه؛وناسيه شن دارتلكم ياخديجه ياعمتي اللي درته اني معاكم مادارتش سميره ربعه..
نجمه خافت من خديجه تسبب في مشكله كبيره يخشوا فيها وولادها فاختارت تهدي الوضع لما قالت..
/خلاص غدوة بري معانا..
خديجه؛والله ماني قاصتها خطوه مش بالطلبه هي..وع العموم باهي اللي صار هكي بس عرفت قدري عندكم..
ومشت وخلتهم وعزوزتها تنادي فيها..
"ياخديجه غيرتعالي قاعده ندوي معاك اني ياخديجه"
وسمعوا صوت باب الحوش انخبط بقوة..
عواطف بكره وازدراء؛تمشي سح.يقه تس.حق جرتها..
نجمه بضيق؛تو تشحن خوك ويجينا زي الغوله المهبوله..
عواطف بعدم اهتمام؛ينفلقوا..
🍃واللي توقعاته نجمه صار..
وجاهم محي الدين ودار مشكله ع خاطر مرته وقعد يعاود في كلامها وهي تعدد في جمايلها مع ماليه..
ولأن جمايل بوها مغرقه الصيد خلوه يركبلها للشقه بش يطيب خاطرها ويطلب منها تمشي معاهم..
خديجه:جيتك ع عيني وراسي عمي لكن سامحني المشيه بعد اللي صار مالهاش طعمة ولاعاد تهمني ولانبيها..
الصيد بضيق:لاحول ولاقوة الابالله خلاص امسحيها في وجهي..
محي وخديجه..
"حشاك بوي..حشاك عمي"
وكملت خديجه وهي تقول:خلاص توا صار اللي صار عمي وسامحيني اللي حطيتك في هالموقف..
الصيد؛انتي اللي سامحينا يابنتي دوة النساوين مانحبش نخش فيها لكن هالمرة الحكايه كبيره وانتي عندك واني خديتلك حقك ومافي حد ماشي غدوة اخطا عمتك نجمه..
~~~~~~~
عواطف بغيظ؛آااه ياقهايري وخلاص..
نجمه بضيق:الله غالب وخلاص ماعندي ماندير..
عواطف:الحق..يره الله يكدرها كيف ماكدرتنا
🍃🍃🍃🍃🍃
"والمنشورات انحدفوا كلهم"
المهدي:شكله المحجوب خش في الموضوع..
عبد القيوم بأسف:بعد مافات الفوت..
ربيع:صدقت..في القهوة مافيش دوة كان ع عبد الرؤوف مافيش واحد قال كلمة خير..
المهدي:شويه ودرت طحنه في القهوة انت..
ربيع بنرفزة:مستفزين ياراجل يستشرفوا ويزايدوا ع مافيش..
عبد القيوم؛البشر هذى حالهم مايصدقوا يطيحوا الباهي بس يرقوا عليه..
المهدي بضيق؛لاحول ولاقوة الا بالله..
عبد القيوم شاف للمهدي شويه بعدين قال..
/مهدي بنطلع من الشقه..
وجهوا ربيع والمهدي نظرهم ليه وهما متفاجئين..
وهو مكمل يقول..
/ندور ع شقه قريبه من مكان عملي بش نشريها..
المهدي:علاش ماتشريش الشقه هادي ولانبيعهالك ماعنديش مشكله..
عبد القيوم؛قتلك ندور ع سكن قريب من مكان عملي
المسافه من هنا لغادي مع زحمه الطريق تاخد وقت ونوصل متأخر واجد والوضع هدا بدا يسببلي في مشاكل..
المهدي وهومتفاجئ:والله ماعارف شن نقولك كانك عليا مانخليك تطلع بكل لكن في النهايه اللي يريحك ديره..
عبد القيوم؛بارك الله فيك..
ربيع قعد ساكت وماباش يعلق حاس ان في سبب تاني خلا عبد القيوم قرر هالقرار وفي نفس الوقت ضايقه هلبه...
🍃🍃🍃🍃🍃
وتعدي الساعات
اللي قاعده تمر بثقل ع عيلة الواعر..
وع نبيله وع راجلها وع كل من يعز عبد الرؤوف"المبروك"
غرفه هديكا الليله قعدت متشبثه بطوبى مابتش تخليها..
وطوبى تقرا عليها وتهدي فيها وتحاول تقوللها كلام يخفف ألمها ويقوي إيمانها ويحسسها بالمسؤوليه اتجاه صغارها بش تخاف عليهم..
طوبى:ربك يبتلي البنادم بش يزيد يتقرب منه ياغرفه وين تلقيها زادت ضاقت عليك تمسكي بربي اكثر من قبل..
تمسكي بالدعاء..تمسكي بالصلاة ع النبي تكفي الهم..
تمسكي بالاستغفار يقويك ويخلي همك ينزاح..وشدي في الصلاة اكثر واكثر ربي قال..واستعينوا بالصبر والصلاة إن الله مع الصابرين..تشوفي فيا كيف قاعده واقفه ع رجليا ونتحمل ونقاوم هدا كله لإني شاده في ربي..
غرفه ودموعها ينزلوا:ونعم بالله..
طوبى مسحت دموعها وقالت؛خودي هدا..ومدتلها خاتم التسبيح..خليه عندك الليله واقعدي صلي ع النبي الليله ليه جمعه..صدقيني نفسيتك حترتاح هلبه وماتعرفيش ربك شن يدير بعدين..وبين طرفة عين وانتباهتها يغير الله من حال الى حال..يعني مرات في لمح البصر ربك يغير كل شي..
خدت غرفه الخاتم ولبساته..وبدت تقول..
اللهم صل وسلم على محمد..
وطوبى تشوفلها بحزن وهي تتفكر في الكلام اللي قالتهولها..
كالعاده هي بأمس الحاجه لسماعه..ولما شافت تأثيره ع غرفه زادت تأثرت بيه..
وخدت تليفونها اتكت حدا اختها وحطت ع تطبيق
"مليونيه الصلاة على النبي"
وبدت تصلي عليه💙
🍃🍃🍃🍃🍃🍃
وتعدي هالليله ويجي يوم الجمعه..
كانت نفسيه غرفه احسن بشويه..وماخلتش لسانها يفتر من الصلاة على محمد صلى الله عليه وسلم لإنها ارتاحت بيها هلبه..
واريج شافتها شن دير تأثرث بيها...ودارت زيها...
اما لطفي..
فأجبر نفسه اليوم يكون في حالة كويس ع خاطر فايزة واليتيمات اللي تربي فيهم..
مكسورات جناح وماعندهم حد غيرهم ولاقيين فيهم العزوة والسند ماباش يكسر بخاطرهم..ومخلي اجره ع الله لعله زي ماجبر خواطرهم يجبر خاطره في الدنيا ولو مانجبرش في الدنيا حتى في الآخره حيلقاه والآخره خير وابقى...
☘طيبوا عشي في الفضانيه في الدور الأول لحوش سدرة...
والفضانيه اندارت في مربوعه الحاج علي الواعر بحضور رجال الواعر والصيد وولاده ونسيبه عبد الحفيظ..
بعد ماتموا الفضانيه ولبست نجمه لصفاء الدبله..
شتولها..وزغردولها وخلوها تفرح من قلبها..
وياقداش انجبر بخاطرها هي وامها في هاليوم...
☘عبادة جبر الخواطر عظيمه..ومش أي حد يقدر يديرها..
يابال بناس صاير فيهم ماصاير لعيلة الواعر..
خواطرهم مكسورة..وهمومهم ثقيله ومع هذا مافي شي منعهم يجبروا بخاطر فايزة وبناويتها...
يابختهم ويابخت اللي زيهم ☘
🌿مارأيت عبادة يتقرب بيها العبد إلى ربه مثل جبر خاطر اخيه المسلم..سفيان الثوري🌿
🍃🍃🍃🍃🍃🍃🍃
السبت...
12 من مايو سنة 2018...
الساعه 5:25 عصرا..
مختار مقعمز في مكتبه يتكلم في التليفون..
مختار بإبتسامه:كان نحصلوا معاك يوم نكسبوا شوفتك والهدرزة معاك..ضحك بعدين قال..حدد انت الموعد والمكان......تمام تمام ليلة الموسم نتسحروا جميع...وانت طيب......تحياتي تحياتي...
ونهي المكالمه وناض بتليفونه....
بعدين مشي خدي جاكيته اللي كان معلق حطه ع يده..
ومشي طول بيطلع من المكتب..
وين وصل في الباب وفتحه...
يجمد في مكانه لما يشوف الشخص اللي واقف جنب السكرتيره اللي كانت ناويه دق الباب ودخله عليه...
#فوق_الطاوله
#طوبى
...يتبع....
