#طوبى "جنة طوبى"
#جمان_فريد
#الجزء_الستون"فلاش باك5"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
الروايه طويله للقراء اصحاب النفس الطويل واللي يعيشوا مع الأحداث وبس....
☕☕☕☕☕☕☕☕☕☕☕☕☕☕☕☕☕
"انتبهوا معاي"
هادي ابلة مادة العلوم اللي درس في مروة وهي توري في الوسيلة متاعها لباقي بنات فصلها..
قعدت تشرح عنها وتشكر فيها...
ومروة كانت فرحانه ع الآخر..
☘اما تاله فكان الموجه حاضر في حصة اللغة العربيه وشاف العمل متاعها..
:عندي ليك سؤالين ياتاله..
الاول..من اختارلك الموضوع؟
تاله وهي مبتسمه بتوتر؛اني استاذ..
هو قال؛كويس كويس..السؤال التاني في حد من العيله كتبها ولا رفعتيها لخطاط؟
تاله؛جارنا استاذ هو اللي كتبها..
:اها..
هي قالت؛تارقي راهو..
رفع الاستاذ حواجبه وهو متفاجئ..
والابله رجعت شافت للوحه وهي مبتسمه بمفاجأة...
☘☘☘
وتعلق عمل مروة مع اعمال زميلاتها في معمل يخص ماده العلوم..
وكان مميز جدا...مافيش عمل تاني ينافسه..
الأبله:طبعا كل طالبة دارت عمل خدت درجات..
بس زي ماقلت قبل درجات التلاته الأوائل هي الأعلى..
وهما..
الثالثه..ميار علي وحيده..
الثانيه..امل مروان خلف الله..
والأولى...ابتسمت وقالت...اظني واضحه..
مروة احمد محجوب..
ابتسمت مروة بفرح..
الابله:موفقين ديما..هي اطلعوا للفصل...
☘☘☘☘
في نهاية الدوام..
راما؛خشينا للمعمل اليوم وشفتها الوسيله متاعك تهبل..
مروة:بري عليا غادي..
راما بضيق:مروة خلاص عاد درهتيلي كبدي..
مروة:باهي قوليلي الحق شن السر اللي بينك وبين صفاء؟
تأففت راما..
مروة هزت راسها وقالت؛باهي ماتقوليش ومعاش تكلميني بكل..
راما ودموعها في عيونها؛احسن..
ومشت وهي معصبه ودموعها ينزلوا..
مروة في نفسها" حي عليا مبردني كترتها عليها"
ومشتلها بسرعه وهي تنادي فيها:راما...راما راجي.
شدتها من يدها وقالت؛راما خلاص اسفه..شافت وجهها كويس قالت..حي تبكي!..اسفه رموشة اسفه هلبه..
راما مسحت دموعها وهي تقول؛قتلك الف مرة مانقدرش نقول يامروة قولي لاختك هي تقولك اني معاش تسأليني..
مسحتلها دموعها وقال بحزن:خلاص حبيبتي معاش نسألك بكل..
سكتت راما وهي مضايقه..
مروة ؛خلاص عاد رموشي غلطنا ومنك السماح..مايبقاش قلبك اسود ياعسل.
ضحكت راما غصب عنها..
"راما"
مروة وهي مبتسمه:ابله نجاح تنادي سلام توا..نشوفك الاحد..
راما؛سلام..
مشت راما لعمتها..
ومروة مشت طلعت من المدرسه..
🍃ولمدرسة اجيال..
كانت طوبى ماشيه بطريقها لمكتب وحده من الاداريات..
وين وصلت فيه....
وقفت لما سمعت وحده من ابلات الروضه تهدرز ع الاداريه..
:مش عارفه كيف بندير والله ماعارفه..ويلي مصاريف علاج امي..ويلي مصاريف عرس اختي تصوري بعد شهربس ولتوا مادارتش بتات..هدا غير قصة المزين..المزينات اسعارهم كارثه ع ليلة وحده ندفع مرتب تلاته شهور.!!
:تلقي مزينات اسعارهم كويسه نعرف وحده كويسه تاخد ع العرايس في 800..
:وين هادي؟
:في *********
:لا وخيتي هادي بعيده هلبه كان حصلت من يرفعها ماتحصلش من يجيبها..
:وراجلك شن يدير ولاغير قاعد في حوش ماليك ياكل ويشرب ويرقد..
:طياح سعد ورقاد ريح وخلاص..والله لولا خوفي ع امي مسكينه راني قداش ليا مطلقه ومفتكيه من وجهه..هي ماصدقت جي لأختي نصيبها بش تتريح علينا..
:ربي يشفيها ويعافيها..
تنهدت بألم وقالت:آمين..
"السلام عليكم"..
الزوز شبحولها بإنتباه..
وهي قالت؛ابله عاتكه بري لأبله نجوى في المكتب ساعديها..
ناضت وهي تقول:توا كيف جيت بنمشيلها استاذه..
وخدت ملف من ع الطاوله ومشت طلعت..
راجتها طوبى لين تطلع ورجعت نظرها للأبله..
لقتها ناضت وهي تلبس في شنطتها وتقول بشي من الربكه:استاذة بنقولك حاجه..
طوبى:قولي..
هي قالت والاحراج باين ع وجهها:استاذه نقدر ناخد سلفه؟
شبجتلها طوبى شويه بعدين قالت؛معليشي زهرة سمعتك كلامك وانتي تحكي لأبله عاتكه...
وجه الابله تبدل للون الاحمر من الخجل والدمعه عبت عينها..
طوبى:وماعنديش مشكله نعطيك لكن مش سلفه مكافآه نشوف من اول ماجيت للمدرسه تخدمي بضمير وحاطه الصغار في عيونك تعلمي فيهم دينهم بطريقه مبسطه عجبتني هلبه وكذا ولي امر شكر فيك..تستاهلي المكافآة زهره..
هي يدوب ابتسمت ودموعها ع حافة عيونه..
وطوبى كملت تقول؛وبتات اختك هديه مني..
هي اتفاجئت وقالت:لالا استاذة صحيتي..
طوبى:قتلك هديه والهديه ماتنردش..والحق الحق ندور في سبله بش تعزميني خاطري نحضر عرس قداش ليا عليهم..
هي نزلت راسها ودموعها نزلوا..
طوبى؛زهره علاش البكي!؟
قربت منها وحطت يدها تحت وجه زهره ورفعاته وقعدت تمسحلها في دموعها وهي تقول :حبيبتي والله خاطري نحضر عرس..ونزلت يدها..
زهره قعدت تمسح في دموعها بعدين ابتسمت وقالت؛نفرح بجيتك استاذة..
طوبى بإبتسامه:تسلمي حبيبتي..وحاجه اخيره ع المزين..نبي نعرف انتي وين تسكني بالزبط..
هي قالت؛في *******
طوبى بضحكه:حلو هلبه جنب مركز اميراتي متاع فايزة الخويلدي..
:لا وين فايزة الخويلدي غاليه هلبه ولو تبي تخليها عليك حتى هي سامحيني مش حنقبل منك شي بكل..
ضحكت طوبى وقالت؛لالا مش عليا..بس نقدر نخليها ديرلك سعر خاص..
:في حدود كم هكي؟
طوبى:انتي شن تقدري تدفعي؟
:800..
طوبى؛تمام بكل..انتي عطيني رقمك واني نشوفها ونرد عليك..
:سألتك بالله استاذه ماتدفعي حاجه من عندك ع المزين..
ابتسمت وقالت؛حاضر حاضر..وكان ماحصلناش عندها هي نشوفوا غيرها مع بعض باهي..
هزت راسها وهي مبتسمه بإمتنان وقالت؛ربي يفرج عليك زي مافرجتي عليا ويفرحك بنوضة استاذة سدرة..
طوبى وهي مبتسمه ودموعها في عيونها؛يارب..طبعا الموضوع بيناتنا اني مش مطلعه شي..
زهره:صحيتي هلبه هلبه بارك الله فيك..
🍃وطلعت زهره روحت وهي فرحانه والضيقه اللي كانت كاتمه ع نفسها انفرجت وارتاحت من هم كبير..
بس اللي فرح طوبى اكثر دعاء زهرة ليها..بالذات الدعاء اللي اختصت بيه حبيبة قلبها سدره...
وهي ماشيه بطريقها لمكتبها..
تلاقت هي وحده من الابلات طالعه بتروح..
وقفتها لما نادتها...
"ابله جميله"
الابله في نفسها قالت"ايييه عليا شن تبي المصيبه هادي"..
التفتت لطوبى وابتسمت ابتسامه صفراء بعدين مشتلها..
وصلت فيها وقال:نعم استاذه..
رفعت طوبى حواجبها وقالت؛يحكوا هلبه ع القلايه اللي ديري فيها..
هي غيرت عيونها عنها وماعرفتش شن ترد..
طوبى:مش هي بس..الكفته والطعميه والكمونيه حتى الكومنيه درتيها في حجرة المدرسات..!
شبحت لطوبى وقالت بالغصب:خلاص استاذة معاش نعاودوها تعلمنا درسنا..
حست طوبى ان في كلامها نبرة تهكم ردت عليها وهي تقول:اني نبيك تعاوديها ونبيك تحسبيني..
عقدت حواجبها بآستغراب..
طوبى:شوفي اني سألت عليك والكل شكرلي عطائك في هلبه طالبات قالولي ان حصتك جوها مليح ويفهموا منك كويس..
رفعت حواجبها شويه بتعجب..
طوبى؛هدا علاش قلت في بالي ليش مانديروش مطبخ في المدرسه للأبلات..يتلاقوا فيه يطيبوا وياكلوا ويديروا قهوتهم!؟
هي بصدمه قالت؛تدوي منك جد استاذه ولاتتسهوكي عليا!..
طوبى:وجهي وجه تسهويك!؟
ضحكت بدهشه وقالت؛لامش قصدي فاجئتيني الحق..
طوبى:المهم..في دار برا المبنى متاع المدرسه جهة الساحه اللي كان فصل اضافي زمان بعدين حطوا فيه المقاعد المكسرة وسكروه غادي بنديروه.
بضحكه قالت؛احسن مكان..
طوبى:ايه ع برا.. بش ريحة التطييب تطلع ع برا مش زي قبل تغبق المبنى اللي يخشه يحساب روحه خاش معمل ماكله...
ضحكت بإحراج..
طوبى:لكن راهو لو شفت تقصير والوضع ماعجبنيش بنسكره..
:لالا ان شاء الله..اصلا احني نتلاقوا لما نكونوا فاضيات وماعندنا مانديروا نبدوا جيعانات ولاخاطرنا في قهيوه نطيبوا بأرواحنا عارفه انتي وضع البلاد كان بناخدوا من برا كل يوم المرتب يتم في نهارين..
طوبى بإبتسامه جديه:صح..تمام قولي لقروبك وتفاهموا مع بعض شن بديروا فيه..
ضحكت وقالت؛ان شاء الله..صحيتي استاذة..
طوبى هزت راسها وهي مبتسمه بدون ماتتكلم..
هي قالت؛بالسلامه..
طوبى؛في امان الله..
مشت الأبله..
وهي تنهدت وكملت طريقها لمكتبها..
☘☘☘☘☘
وبعيد عنها..في قارة تانيه...
في احدى فنادق البلاد اللي قاعد فيها راجلها وضرتها..
هو كان في الحمام يدوش..
وضربتها..مقعمزه ع كرسي في الجناح اللي هما فيه..
فيدها تليفونها اللي كانت خاشه منه ع الفيس ودير في حاجه خطيرة بعض الشي..
اخترقت حسابات راجلها وقعدت تفتش فيهم...
وين شافت الرسايل مالقتش محادثات بينه وبين مرته التانيه..
ابتسمت بتهكم وقالت:وفي الجديد كان جوه منها رسايل..Delet...
سمعت صوت باب الحمام ينفتح..
سكرت الشاشه وحطت تليفونها ع الطاوله..
وهو طلع ينشف في شعره بالمنشف ويغني..
بإيدي امشطلك حبيبي وامسح دموعك بإيديا..
ابتسمت وهي تشوفلع..
جاها وخدي المشط وبدي يمشط في شعرها وهو يغني..
اه منك من جمالك حتى دمعك جاذبيه..
ضحكت..
هو قال؛تعرفي تقصيه مرة تانيه نقص صوابعك..
قالت بإبتسامه؛توبه ياقلبي والله معاد نمد عليه يد..
شبحلها من المرايه وقال:ايوه..حاجتي معاش تقربيها..
ضحكت..
هو تنهد وقال؛تطلعي توا ولانرقدوا والعشيه نطلعوا..
هي قالت؛لالالا هما كلهم اربعه ايام مانيش مضيعه منهم دقيقه وحده..نوتوا ارواحنا ونطلعوا..
هو رد المشط للزيانه وقال؛تمام هي نوضي..
ناضت ومشت لشنطتها..
وهو مشي لشنطته..
حطها ع السرير وفتحها..
لما فتحها..فاحت عليه ريحة طوبى..
قعدت يشوف لحوايجه وحاجاته اللي حطتهم بيدها كلهم حاجه حاجه..
حس بشعور مش قادر يفهمه وين يكون بعيد عليها ومع نجاة بالذات يحس بيه..
غريب..بس واعر...
هي طلعت لبسه من الشنطه وقالت؛جالي..
ماسمعهاش لانه قاعد سرحان..
يتفكر في اللي صار يوم شافت عنده المسدس كيف تغيرت من بعد هداكا اليوم وبدت تخاف وتتهرب منه...
كانت دمعته بتهرب من عينه..
لولا انه سمع صوت نجاة عالي وهي تنادي فيه..
"جالي"
استاقظ وشبحلها..
هي بإستغراب قالت؛خيرك!..
هو قال؛مش عارف شن نلبس خفيف وثقيل شن حسيتي الجو انتي..
هي قالت؛عادي ماثقلش..شن رايك اني نختارك..
هو قال؛لالالا نختار بروحي نختار بروحي..
هي رفعت حاجبها.
هو عقد حواجبه وحاول يخفي توتره لما قال؛ انتي شن تبي؟
هي تغاظت غصب عنها ودارت روحها عاديه وقالت؛شن رايك نلبس هكي عادي؟!
شاف للبستها وقال:كويسه البسيها..
ورجع شاف لشنطه..
هي في نفسها قالت..
"كان ماخليتكش تروح وانت مش طايق تشوف وجهها مانبداش بنت امي"
☘☘☘☘☘☘
وفي شارع القهوة..
مع الجو الربيعي المعتدل الدافي بعض الشي...
قعمزت نجمه في جنان حوشها وهي تشرب في القهوة وتكلم في وحده من جاراتها في التليفون..
نجمه بعدم تصديق؛بري بري..
"والله العظيم زي مانحكيلك يانجمه امس في حوش منجيه الجارات كلهم يدووا بيها.."
نجمه؛شن جاه هدا وكانا في الصيف نقول ضرباته الشمس ع راسه!
"والله حتى اني استغربت كلنا نعرفوا كيف مخلياته يمشي ع الصراط المستقيم بعد عملته مع الطرابلسيه"
نجمه؛تعرفي شكلها كانت كاتبتله والسحار اللي دار السحر مات..
"زعمه ياوخيتي"
نجمه؛مافيش غيرها... كان هدا شن اللي يخلي محمد شنيبه توا يولي راجل ويخطب عليها وحده من الجيران والدنيا كلها عرفت قبل ليصير الموضوع!.. ياودي لالا نحس فيها اشاعه اشبح من مطلعها يافطيطيمه..
"نقولك حاجه اني جايتك نهدرز عندك العشيه وانتي قولي لكنتك تنزل وتو نعرف كيف نجبد منها الدوة بطريقتي.."
نجمه؛ضحكي حتى انتي خديجه تطلع منها حاجه ع ماليها..!
"قتلك خليها عليا اطلعي منها انتي"
تنهدت وقالت؛باهي ياحنه تعالي العشيه وتو نشوفوا شن يطلع معاك..
☘☘☘☘☘
"عبدو..تارقي"
كان مقعمز في مكتبه يخدم بطريقه استغربلها زميله..
:ياهووو نكلم فيك..
هو قال؛نعم..نعم..كنك شن تبي.!؟
؛انت اللي خيرك من لما جيت من المدرسه وانت مش طبيعي..صارت حاجه؟
هو قال؛تهيالك..انا طبيعي جدا وماصار معاي شي..
:باهي ياسيدي زي ماتبي..المهم بنقولك شن رايك نعطيك مفتاح المزرعه تزرد غادي انت وماليك..
وقف خدمه وشبحله..
:شويه من اللي دير فيه عبدو..
هو قال؛مانديرلك في شي نبي مقابله حاجه..بس تبي الحق لنقانك قاعد في قلبي ...انحرجت نطلبها منك..
هوقال؛مصح وجهك..اني ببراده نجي نطلب منك في اكثر من هكي..وانت متحشم مني في حاجه زي هادي..
هو قال؛مش كيف بعضهن ياعيسى هذي مزرعتك وفيها حوشك نحسها بايخه شوي..
قاطعه وهو يقول؛بالله عليك فوته جو الرسميات متاعك ومعاش تكسرلي رقبتي بالأدب الزايد خليك صحيح وجه زيي بش نولوا اصحاب صح..
هو بضحكه قال؛ماناقص كان نولي زيك عدي محور يشفطك..
قعد يضحك زميله..
وهو يحرك في راسه يمين ويسار وهو يقول:متخلف..
هدا ضحك وقال؛نعطيك المفتاح..
شبحله وقال بنفاد صبر؛اها نبيه عندي هنا توا حطه قدامي..واشر ع مكان في الطاوله..
بضحكه قال؛ايوه هكي نبيك..بإذن الله قبل لتسكر سنه هني نخليك احتراف في صحة الوجه والبراده...
هو ضحك غصب عنه وقال؛هبل...
☘☘☘☘☘☘
الساعه 2:00بعد الظهر..
في الحجره الخاصه بالاطباء في القسم اللي تخدم فيه اميمه..
كانت واقفه معاهم وهي تقول:لا والله ماشفت منكم كان كل خير لكن هكي احسنلي نكسب خبرة اكثر مع الدكتور خالد..
:واعر هلبه وجدي لين خلاص الدكتور خالد ان شاء الله تقدري تتأقلمي معاه..
اميمه بإبتسامه؛لازم تتأقلم ونتعلم نكون مرنه اكيد القدام حنقابل احرف منه..
ع خشة قصي وكان باين عليه انه معصب قال؛لو سمحتوا اطلعوا شويه..
هما شافوا لبعض..
وحسناء شافت لأميمه اللي كانت تهيأ في نفسها لهالمواجهه..
قصي بعصبيه:ندوي رقريقي!...اطلعوا..
هما خافوا وطلعوا..واميمه جت بتطلع حتى هي قصدا هو قاللها؛انتي خليك...اميمه..
وقفت اميمه في مكانها وحسناء طلعت وهي قلقه عليها..
بعد ماطلعوا وقف قدام اميمه وقال؛علاش ؟
هي قالت:هكي احسن دكتور..
هو قال؛واني سألت علاش!؟
هي قالت؛انت عارف دكتور..
قصي ؛شن نعرف!؟
تنهدت وقالت:دكتور قصي اني لتوا قاعده نحترم فيك مانبيش الاحترام يطيح بيني وبينك لو سمحت..
هو قعد يشوفلها ويفكر..
لو ناقشها وصارت بينهم مشكله كبيره حيفقد كل فرصه معاها..فقرر يستغل الموقف لصالحه..
هدا نفسه وقال:تمام ع راحتك لكن لازم تعرفي انك وقت تحتاجيني تلقيني تمام...
ابتسمت مجامله وقالت:تمام..نستأذن دكتور..
هو قال؛موقفه..
وهي قالت:السلام عليكم ومشت طلعت من حداه..
لقت حسناء في انتظارها..
مشوا الزوز مع بعض..
وهو وقف في باب الحجره وقعد يشوفلها بضيق وغضب في نفس الوقت..
🍃حسناء؛توقعت تصير مشكله كبيره ويقلب القسم قلب..
اميمه؛مايديرهاش مايضرش روحه..
حسناء؛مع هدا انتي عارفتيه قداش حاسب في رويحته مش ساهله عليه طبيب يسيب مجموعته ويمشي لغيره..
اميمه؛يللا..الحمد لله مشت ع خير..
هي قالت:انتي سبحان الله ديما امورك متيسره كل شي يمشيلك ساهل..
شبحتلها برفعة حواجب..
حسناء بضحكه؛الله يبارك طبعا..
شبحت القدام وهي مبتسمه
حسناء؛لكن الحق الحق حظك حلو ربي يحبك هلبه.
اميمه؛مانبيش نزكي روحي ونقول ربي يحبني..لكن في حاجه ليا سنين شادتها وماسيبتهاش بكل هي السبب..
حسناء بفضول؛شن هي؟
اميمه؛سورة البقره..زي الميه في حياتي مايفوتش عليا مانقراهاش فيه ان شاء الله نقسمها ع الايام المهم نقراها..
حسناء؛ايه نعرف هلبه مداومين وتسهلت عليهم هلبه امور..
اميمه:وخيرك ماتبديش فيها؟
حسناء؛تو نجربها..
اميمه:لا فوتي من توا كان بتجربي ربي مايتجربش ياحسنا..ياخوديها من الاول وانتي واثقه ومتأكده ان حتكسبي بركتها يابلاش..
حسناء بضحكه؛تمام تمام..
اميمه؛تو بعدين نبعتلك فيديوات عليها تقتنعي اكثر..
حسناء بإبتسامه؛باهي..بتروحي طول؟
اميمه؛اكيد..اليوم عندنا عزومه ناس جايين من الكفره..
حسناء:عندكم اقارب غادي؟
اميمه:لالا هادم اقارب التارقي اللي يسكن في شارعنا جايين لطرابلس اول مرة عمي عزمهم..
حسناء:اها..
وطلعوا الزوز من مبنى المستشفى...
☘☘☘☘☘
وفي حوش لطفي الواعر..
كان طوبى مع عمتها واختها الكبيره في الكوجينه يوتوا للعزومه..
فردوس؛سبحان الله الصدف!..
مطيره:صار هدا اللي رفعت خشيمها عليه صاحبتك..
طوبى:ايه هو ياحنه..ريتي..تعرفوا وجعني الحق..
مطيره:لايوجعك لاشي بالعكس افرحيله وحده زي هادي ماتستاهلاش ربي يطيحه في خير منها..
طوبى؛لكن كان زي مايحكوا عمتي ماظنيش يشوف لغيرها بكل الراجل سيب بلاده وجي لطرابلس ع خاطرها..مش قال بابا جي بسيب طرابلس ويروح لكن ماصارلاش وولى واضح ماأيسش وهي كان تشوفيها اليوم كيف تنشد فيا عليه تحسي في امل..
فردوس:خلاص زبطت النعته بدير فيها ام زكي وتوفقي راسين بالحلال..
ضحكت طوبى وقالت:وعلاش لا...يابختي بعدين..
ابتسمت مطيره بعدين قالت:ريحة العصبان فاحت..
طوبى شماته بلعت ريقها..حست بالغثيان..
حطت طرف المبطن اللي كان تلبس فيه وقالت؛تونجي..
مشت طلعت من حداهم للحمام طول..
خشتله وسكرت عليها..
فتحت الشيشمه..
وقعدت واقفه وهي حاطه يدها ع صدرها ومنقرفه.فجأة..
طبست وبدت ترجع..
ولأن الحمام كان بعيد وصوت المركاب والقلي معبيين الكوجينه ماسمعوش الصوت..
بعد مارجعت غسلت ايديها كويس ونظفت الحمام زين ودارتله مطهرات..بعدين مشت طلعت منه.
وقفت قدامه وهي تقول:ياربي كيف ندير مانقدرش نتحمل الريحه..!
مشت للكوجينه وخشت عليهم وهي تقول:فردوس تكملي عليا..
شبحولها؟
طوبى بضيق؛واكله حاجه فيها هريسا هلبه تعبت معدتي..
مطيره:شن جاك علاش تاكلي فيها مش عارفه روحك مانقدريهاش..
وهي تحاول تخفي ارتباكها قالت:سهفتني هلبه واني قداش ليا ع الحار..
فردوس؛باهي بري ارتاحي تو نديرلك كمون..
طوبى:باهي..
ومشت من حداهم ..
غمضت عيونها بشده وقالت في نفسها..
"ياربي سامحني "
بعدين فتحت عيونها ومشت خشت لدارهم وهي مضايقه...
☘☘☘☘☘
العزومه في هداكا اليوم ماكانتش مقتصرة ع الضيوف اللي جايين من مكان بعيد..
لطفي عز نسيبه عبد الرؤوف ونسيبه المحجوب حتى هما..
ونبيله كذلك كانت بتمشي مع غرفه..
🍃في وقت صلاة العصر..
كان عبد الرؤوف واقف مع اخته قدام الباب..
عبد الرؤوف؛ماتخليهاش تتحرك بكل ..
نبيله؛حاضر من عيوني..
عبد الرؤوف؛ماتخليهاش تاكل دهان هلبه..
نبيله هزت راسها وقالت؛حاضر..حاضر..
عبد الرؤوف:معليشي تحميلني شويه..
نبيله؛راهو حتى الزعل مش باهي ليها..
عبد الرؤوف؛مايصيرلها شي هادي وحده بارده..
ع طلعة غرفه..
هو لما شافها مشي ركب السيارة..
غرفه وفي عينها الدمعه؛شن كان يقول..
نبيله؛يوصي فيا عليك..
غرفه بزعل وتهكم؛بارك الله فيه!..
نبيله بضحكه؛خلاص فوتي خلي جوك رايق اليوم بس..
تنهدت ومشت للسياره ونبيله وراها وهي تضحك وتحرك في راسها يمين ويسار...
☘وبعد ماحطهم عبد الرؤوف في حوش لطفي..
بسرعه توجه للجامع بس يلحق ع الصلاه..
وفي هداكا الوقت..
خشوا لطفي والمحجوب للجامع..
المحجوب:بعد الصلاة نبيك في موضوع..
لطفي بقلق:موضوع شني؟
هو قال بإبتسامه؛ماتخافش موضوع عادي يخصني
تبدد قلق لطفي وهو يقول؛باهي..
وبعد ماخشوا..
خش محمد شنيبه ووراه عبد الرؤوف..
فات من جنبه وقال؛السلام عليكم..
رد عليه محمد وهو مبتسم..بعدين شبح للطفي..
تنهد ومشي وقف في الصف لإقامة صلاة الجماعه...
☘☘☘☘☘☘
"معاش اتصل ولاكلمك بكل"
الاء بقلق؛بكل..واني خايفه نكلمه يطلع مدايرلي حظر..
غرفه بإزدراء؛وشن يعني المركب اللي تودي..والله الا هلبه فيه وفي اشكاله غدوة يجيك اللي يسواه هو ومية منه ومن وليد وتضحكي ع روحك وين تتفكري حالك توا..
آلاء سكتت وهي مضايقه..
غرفه؛خلاص للوشه بالله عليك ننقهر وين نشوفك هكي.
الاء؛باهي انتي خيرك من منظر عيونك تباني باكيه..
غرفه بضيق:رؤوف قلب عليا ع خاطر الهدايا..
الاء؛والله عرفتها..
هي بضيق قالت:قطعت علاقتي بيه غصب عني مانقدر نقطعي روحي منكم ونخلي بوي مقاطعني..
آلاء بحزن؛جدو مش عاجبني بكل خويله بالذات بعد اللي صار معانا..حتى هو قطعني ومعاش يكلم فيا..وقعدت تبكي..
تنهدت غرفه بحزن وقعدت طبطب ع كتفها..
☘☘☘☘☘
بعد صلاة العصر..
طلع عبد القيوم من الجامع بسرعه وهو يقول لربيع:ماشي نجيبهم..
ربيع بإبتسامه؛حمد لله ع سلامتهم..
عبد القيوم؛الله يسلمك.
وركب سيارته وتحرك طول..
وربيع كمل طريقه للشارع ع رجليه..
فم الجامع..
طلع محمد شنيبه بلطفي الواعر وهو يقول:ليا قداش نراجي شن صار معاك كلمت نسيبك؟
لطفي:والله الطلب وصل لصاحبة الشأن بروحها..
محمد شنيبه واللهفه باينه في عيونه؛وشن قالت؟
لطفي:مافيش نصيب..
عقد حواجبه وقال؛ليش؟
لطفي؛اللي نعرفه انها رفضت وخلاص ياحاج..
محمد قال:ان شاء الله خير..بارك الله فيك ع كل حال..
لطفي؛فيك بارك الله..
ومشي محمد..
ولطفي قعد معاه بعيونه..لين جاه نسيبه المحجوب وقال..
خيره؟
ضحك محمد وقال؛كان بيدير مشروع زواج وفشل..
رفع حواجبه وقال؛قاعد ع هباله الاول!؟
ضحك لطفي..
المحجوب؛راك تقولي خطب اختك؟
لطفي؛لا..اخت نسيبي عبد الرؤوف..
المحجوب عكرش وجهه بإزدراء وقال بصوت عالي بعض الشيء؛نعم !
استغرب لطفي ردة فعله..
المحجوب بشي من الانفعال والازدراء:خلاص ضاقت معاش لقي من يخطب!؟
لطفي:خيرك طارتلك انت!؟
المحجوب سكت شويه وهو يحاول يهدي نفسه بعدين قال؛تعالى شويه..
ومشوا طلعوا برا الجامع بكل..
وقفوا ع الرصيف والمحجوب قال..
الموضوع اللي كنت نبي ندوي بيه معاك يخص اخت نسيبك نبي نخطبها بس لازم نعرف رايها الاول..
لطفي وهو متفاجئ:فاجئتني الحق..بس حاضر تو نشوف وحده من بنات اختك تفتح معاها الموضوع وتعرفلك رايها..
المحجوب؛اليوم ضروري اليوم..
لطفي بضحكه استغراب؛ياودي باهي اليوم اليوم هي تفضل قدامي..
ع جية عبد الرؤوف وهو يقول:السلام عليكم..
ابتسم المحجوب ابتسامه عريضه وقال؛وعليكم السلام وعليكم السلام..وصافحه وهو يقول..شن اخبارك شن امورك..
عبد الرؤوف بإبتسامه:الحمد لله..شن امورك انت شن جو المنصب الجديد..
المحجوب:اهوا ندعوا ربي يعطينا خيره ويكفينا شره..
ولطفي يمرر في نظره عليهم وهو مبتسم..
☘☘☘☘☘☘
درست عبد القيوم سيارته جنب سيارة باصات..
كانت جايبه اهله من الكفره..
عمه عبد الله اصغر اعمامه..
عمته سليمه..اكبر عماته ورباته مع حناه فاطمه.
وبنتها صفيه وراجلها وولدهم اللي عمره عامين..
نزل عبد القيوم من السياره..
وحتى هما نزلوا..
سلموا عليه رجاله وهو طول قاللهم اركبوا مايبيش عمته وبنتها يقعدوا واقفات في الطريق..
🍃اول ماتحرك بالسياره..
قالت بنت عمته بنبرة مرحه؛عبدو ننغ..تجوضيم..
"عبدو متاعنا...كيف الحال"
هو بضحكه قال: الخير غاس "بخير الحمد لله "مايجندم كم "كيف حالك انتي"
صفيه:الحمد لله في خيار خيري..خداتك طرابلس يابن خالي..
سليمه؛هي غير طرابلس اللي خداته..بنغازي سبقتها..
عبد الله؛خلن العيل في حاله استلمتوه من اول نفس..
معمر "راجل صفيه":شن يسلكك ياعبدو..
ضحك وقال؛مانيش قاعدلهن..
صفيه؛لحقتك بالتليفون..
عبد القيوم؛نحسابك عقلتي بعد جوزتي..
معمر:كان مازادت في الهبال..
هي بضحكه قالت؛خلوني نقعد ديما بهبالي ماعندي ماندير بيه العقل مايجي من وراه كان النكد والوسواس..
تنهد عبد القيوم وقعد ساكت..
عبد الله؛قولي عبدو الجو هنا مصقع ولاتعدل..
عبد القيوم؛الايام الاخيره تعدل..لاهو مصقع واجد ولادافي واجد..
صفيه بضحكه؛قالوا جايه قرة العنز جبنا معانا بطاطين..
عبد القيوم؛باهي اللي جبتوا معاكم ماعنديش كان تلاته..
صفيه؛وكان ماجبنا معانا كيف صار!؟
عبد القيوم؛هاكم جبتوا ريحينا ترا..
قعدوا يضحكوا..
سكتوا شويه بعدين سليمه قالت لبنتها وهي تشوف لحفيدها اللي راقد في حجره؛عدلي راسه..
عبد القيوم شاف للولد من المرايه وقال:كبر وقعد سمح كيف خاله عبدو..
معمر؛عليك اللي واثق من روحه والله ياغالي مايشبه كان باته..
ضحكت صفيه..
عبد القيوم:معناها راحت عليه مسكين مش حيلقى كيف صفيه ترضى بيه..
سليمه؛لاعاد الا نسيبي ياعبدو مانتحمل فيه حاجه..
عبد القيوم؛الله يادنيا..! قعد عندك اغلى مني ياعمتي!..
عبد الله؛مادورش كلامها والله ماتحكي كان عنك وماتفكر كان فيك وديما تقول كان ربي يهديه ويرد لبلاده ياسره مرمده ووحده..
شاف لعمته من المرايه وابتسملها..
وهي ردتله بإبتسامه حب..
صفيه؛راني جعانه بنموت بالشر خودلنا شي حاجه ناكلوها الله يربحك..
هو قال؛صبري روحك لين نوصلوا الناس ليهم ايام يوتوا لجيتكم عيب تعدوا وانتم شبعانين وماتاكلوا شي..
معمر:مادورهاش راهي واكله لين طالع من عيونها لكن عارفها انت ماتشبع..
سليمه؛راك تاخدها بالعين..
صفيه :خل ياخدني بالعين نبي نضعف شويه..
ضحكوا..
عبد القيوم بضحكه؛هبله...
☘ووصل بيهم لشارع القهوة..
وين خش بيهم..
قعدوا يتفرجوا ع معالم الشارع وعجبهم هلبه..
خش بالسيارة لجنان حوش المهدي..
ونزلوا كلهم من السيارة وركبوا الشقه..
☘☘☘☘☘
صفيه وهي تدهور في الشقه..
إينان هوسي "الشقه حلوة"
امها طلعت من الكوجينه وهي تقول..
تليد افلا نينان؟"عندك بالكونه"
وهو واقف وسط الحوش ابتسم مجامله وقال؛اها..لكن مصكرها لانها تفتح ع الجيران.
سليمه:هك احسن..وين الدار اللي ترقد فيها؟
هو قال:نرقد في اي مكان في الشقه مافش مكان محدد
☘قال هكي قصدا مايبيهمش يعرفوا انه سيبلهم الدار اللي تعود يرقد فيها يعرف عمته مش حترضى☘
هي مشت للدار متاعه وقال؛مفرشه حتى هذي؟
هو قال:ايه..
بعد ماخشتلها شبحتله صفيه وقال؛شن جوك وجهك ماعجبنيش..
تنهد بضيق وقال؛بعدين نحكيلك..
ع طلعة عمه من الدار بعد ماكان يصلي فيها..
عبد الله؛وين ولدك ياصفيه؟
صفيه؛مازال راقد ياخالي..
طلع راجلها من نفس الدار بعد ماكمل صلاة حتى هو..
هو قال؛هي خل نحطكم في حوش الواعر ونعدي لعملي..
سليمه؛هياهي...مشت للكوجينه بش تاخد الحاجات اللي بتخش بيهم ع حوش الواعر...
وصفيه مشت تجيب ولدها..
وبعد ماولوا واتيين كلهم..
نزلوا من الشقه...
وطلعوا من الحوش..وتلاقوا مع لطفي الواعر اللي كان يراجي فيهم بش يستقبلهم بروحه ويرفعهم لحوشه..
وكان استقباله حار..رحب بيهم احلى ترحيب..
وهالاستقبال خلاهم مرتاحين وخفف عليهم ارتباك اول لقاء..
☘دخلهم حوشه..
ورفع الرجاله للمربوعه..
والنساوين استقبلوهم فردوس ومطيره وصفيه بإعتبارهم الكبار..
رحبوا بيهم ترحيب مايقلش حلاوة عن ترحيب لطفي بيهم..
وين جو خاشات الصاله استقبلتهم طوبى..
صفيه ركزت معاها ومع مواصفاتها هلبه وحبت اسلوبها وطريقة كلامها...
طوبى بإبتسامه؛آنستوا تفضلوا..تفضلوا..
ناضت اريج وقدمتلهم وسلمت عليهم...وبعدين ناضت آلاء وسلمت حتى هي بس كان سلامها بارد عكس الباقي..
ووين وصلوا في نبيله..ناضتلهم حتى هي وسلمت عليهم ورحبت...
بس مرت خوها قعدت مقعمزه ومابتش تنوض من مكانها..
مدت رووس صوابعها وهي مبتسمه من فوق نفسها..
صفيه بإبتسامه؛شن حالك وحال صحتك..
غرفه بإبتسامه فوق النفس:الحمد لله..
حست بيها صفيه بس ماوقفتش عندها هلبه...
وكان سلامها نفسه ع سليمه امها..
سليمه ضايقت شويه بس حاولت ماتخليش هالشعور يبان عليها..
مطيره بإبتسامه وهي تدارك في الموقف؛يامرحبتين مرحبتين..تفضلوا هني هني..
وقعمزتهم في صدر الصاله
ام اميمه؛انستونا
وقعمزوا كلهم..
سليمه قالت:الله يأنسك..
مطيره؛شن تقربوا لعبد القيوم؟
سليمه بإبتسامه؛انا عمته..وهذي بنتي صفيه..
مطيره بإبتسامه؛ واضح فيها منك هلبه..
صفيه ابتسمت وغيرت عيونها لطوبى..
شافتها مركزه مع ولدها تناشب فيه بحركات وجهها..
والولد وهوخاش في امه وشاد فيها كان يتفاعل مع حركات طوبى بإبتسامه حلوة وبريئة..
فردوس:شن جو الطريق اكيد تعبتوا..
صفيه؛والله مانحكيلك عاد من الكفره لطرابلس وفي سيارة..
أم اميمه:اول مرة تجوا لطرابلس؟
سليمه؛ايه اول مرة لكن الرجاله جوها قبل واجد اشغال ولايسافروا من مطاراتها برا وهكذا..
طوبى بإبتسامه؛ومن حظنا اول جية ليكم هني تكونوا ضيوفنا..
صفيه بمزح؛حظكم السمح ولا الشين؟
ضحكت امها..
طوبى ابتسمت بمفاجأة وقالت بإرتباك؛السمح اكيد..
سليمه بضحكه:صفيه تحب تشفط واجد ..
اريج:تشفط معناها تبصر..
صفيه؛بالعربي مش بالتارقي راهو..
ضحكوا..
اريج بضحكه:واني اللي نحسابها تارقيه..
سليمه بإبتسامه وهي تشوف لمطيره؛بنتك؟
مطيره بإبتسامه؛لا بنية بنت خوي ماعنديش صغار..
سليمه ابتسمت بإحراج وقالت؛ربي يحفظها..
فردوس؛تسلمي ويحفظلنا عميمتي امي بعد امي..
ابتسمتلها مطيره ودموعها في عيونها..
طوبى:وعيت ع الدنيا وهي فوق راسي مانحسش عمتي مرات نحسها امي ومرات نحسها اختي..
مطيره:تي خير دعوتكم انتي وياه اسكتوا خلاص..
ضحكوا..
سليمه اثر فيها الكلام لين دمعوا عيونها ومسحت دمعه في طرف العين كان حتنزل..
شافتها بنتها وقالت:كيف امي لعبد القيوم رباته مع جدتي الله يرحمها..
سليمه ابتسمت وهي متأثرة بعدين قالت؛عبدو عاش يتيم باته توفى وهي صغير واجد وامه توفت وعمره ست سنين ربيناه انا وامي حاولنا ع قد مانقدروا نملوا الفراغ اللي خلوه امه وباته الله يرحمهم..مش غير نحنا بس..خواله وعمامه عيلته من الجيهتين..
طوبى كانت تسمع فيها وهي متأثره..
مررت سليمه نظرها عليهم وقالت:لكن ع قد ماحاولت نخليه يناديني امي ماقدرتش..
صفيه بإبتسامه اسف؛كان يقول ماحد ياخد مكان حد انتي عمتي واللي عدت امي..
طوبى نزلت راسها ودموعها نزلوا ماقدرتش تتمالك نفسها..
كلهم شبحولها..
مطيره؛طوبى بنتي!..
فردوس بضيق:طوبى..
اريج حطت يدها ع ظهر طوبى وقالت؛بيبو حبيبتي..
غرفه بنرفزة:بالله غيروا السيرة..
شبحتلها نبيله وهي تفنص فيها..
وغرفه تجاهلتها..
سليمه:سامحيني بنتي والله ماقصدي..
مسحت طوبى دموعها وهي تقول؛لالا ع شني..اني الفترة هادي موليه حساسه ابصر كيف..
وقعدت تمسح في دموعها وهي ترشف..
صفيه ناضت وصبتلها ميه من الكاس المحطوط ع الطاوله في نص الصاله ومشتلها مدت الطاسه وهي تقول؛خل نغيروا الموضوع..امسكي..
خدت طوبى الطاسه وقالت؛صحيتي..
وغرفه تشوف للطاسه اللي في يد طوبى بقرف..
ولت صفيه قعمزت وهي تقول؛عرفونا عليكن..
فردوس بإبتسامه؛اني بنت لطفي الواعر الكبيره..واشرت ع خواتها وهي تقول..وطوبى وغرفه خواتي..طوبى اصغرنا..
صفيه؛باين عليكن خوات من لون عيونكن ونقشتكن..بس السمحه هذي عيونها غريبات شوي..
طوبى وهي مبتسمه بإستغراب؛كيف؟
صفيه؛لما تلاقيت معاك في الاول بانن خضر..وتوا نشوف فيهن كيف الرصاصيات لونهن مش مفهوم..
ضحكت وقالت؛يقولولي فيها..
صفيه؛اها لونهن حاير..
ابتسمت طوبى..
مطيره؛مازال بنت خوي التاني هديكا عيونها مرة زرق ومر خضر ومرة شهب..
سليمه؛سبحان الله..
ع خشة اميمه وهي تقول:السلام عليكم..
اريج؛سجلناك تأخير..
ضحكت بإحراج وقالت؛راحت عليا النوم حتى العصر فاتني..
وجت لسليمه وطبست سلمت عليها وهي تقول:حمد لله ع سلامتكم..
سليمه:الله يسلمك
بعدين سلمت ع صفيه..ومنها لنبيله وغرفه..وقعمزت جنب آلاء..
مطيره؛هادي بنت خوي الكبير..الدكتورة اميمه..
صفيه؛اها اللي كنتن تحكن عليها ..
اميمه بضحكه؛شن كنتوا تقولوا..
امها قالت؛يحكوا ع لون عيونك..
ابتسمت اميمه بخجل..
صفيه:الله يبارك عليكن..والسمحات هدين بناتك انتي؟
قالت كلامها وهي تشوف لفردوس..
وهي ردت عليها تقول:ايه..
صفيه؛ربي يحفظهن..
مطيره؛وهادي مرت خوي الكبير اسمها صفيه زي اسمك..
صفيه بضحكه: الصفيات كلهم سمحات ويجيبن في العسل..كيف هالسمح هذى..وقعدت تبوس في ولدها..
ضحكوا..
وقعدوا يقولوا بأصوات متقطعه؛ربي يحفظه..ربي يفرحك بيه..
هي مررت نظرها عليهم وقالت؛يسلمكن ويطول في عماركن.
طوبى تنهدت من قلبها بعدين قالت:وقعدت سدرة المنتهى اختي وامي اللي ربتني..
فردوس بحزن؛اكيد سمعتوا بيها اللي قاعده في غيبوبه توا..
هزت صفيه راسها بأسف..
وسليمه؛قالت ايه سمعنا بيها وياما دعينالها..
صفيه؛خلوا املكم بالله كبير نعرفوا واحد قعد في غيبوبه قريب سته سنين وبعدين وعى وتوا عايش حياته كيف البشر الطبيعين..
سليمه؛والله اللي يشوفه يقول عمره ماقربه مرض..
غرفه؛لا شن سته سنين هادي..ان شاء الله قريب تفيق ياربي..
صفيه شافت لغرفه برفعة حواجب..
وسليمه بهدوء ردت عليها؛قصدي من قصة الراجل هذى ان ربك ع كل شي قدير ماتفقدوش الامل مهما طولت في الغيبوبه..
مطيره؛قصدك واضح..يسمع منك ربي..
سليمه؛آمين..
رفعت غرفه حواجبها وغيرت عيونها عنهم وهي مش طايقه القعده معاهم..
والاء حاسه بيها حتى هي مقعمزه بالسيف..
اما الباقي وبما فيهم نبيله كانوا طايرتلهم من غرفه هلبه ويحاولوا ع قد مايقدروا يضبطوا اعصابهم ويتجاهلوها بس كانوا خايفين منها تحط كلمه ولادير موقف يحرجهم ويجرح الضيوف...
☘☘☘☘☘☘
وفي حوش جيرانهم..
عيلة الصيد..
في الصاله..
مقعمزة نجمه مع جارتها فطيطمه وحداهم خديجه ونجاح.
الهدرزة بيناتهم كانت عاديه..والوضع طبيعي..
لبعد ماجت عواطف بسفرة الضيافه وفرقت عليهم..
بعدين مشت قعمزت جنب نجاح
فطيطيمه سرقت نظرة لنجمه..
ونجمه اشرتلها بحواجبها وهي تشرب في القهوة..
الجاره شافت لخديجه وقالت؛قولي خديجه..
خديجه؛نعم خالتي..
:امس كنت في حوش مربوحه دايره لمة للجيران عزمت ع امك ونجمه وماجوش..
نجمه؛قلتلها عندي جلسة علاج طبيعي..
خديجه؛امي امس كانت في حوش خالي..
:ع العموم مش هدا المهم..المهم اللي سمعته غادي في حوش مربوحه..
عقدت حواجبها بإستغراب وقالت:خير شن سمعتي؟..
ونجاح وعواطف ركزوا..
رفعت الجارة حواجبها وقالت؛يقولوا يابنتي يقولوا..بوك خطب المحاميه نبيله..
هي بصدمه؛شن هي!؟؟؟
نجاح وعواطف شافوا لبعض بدهشه..
الجاره قالت؛اللي سمعتيه واللي جاب المعلومه قال من مصادر موثوقه..
خديجه بإنفعال:مني ترا!
؛لالا بنتي مانقدرش نقولك اني سألتك ونبي نتأكد منك..
حاولت خديجه تتمالك اعصابها وهي تقول؛كذاب وبنت ستين كذابه اللي مطلعه الدوة هادي واضح مطلعتها من حسدها وغيظها حساد امي مش شويه..
نجمه في نفسها..
"ع شني ياحسرة"
:صدقتي امك عندها هلبه ناس تكرهها..
خديجه؛مايكرهها كان اللي قلبه مريض بالحسد ويتمنى يكون مكانها..توصلك وتتعداك بوي حاط امي تاج ع راسه ولايمكن يبدلها وكلكم تعرفوا باللي صار للطفيه وين خيراته بينه وبينها اختار امي وطلقها طول وقعد قريب 40سنه مايشوفش لغيرها لليوم ولاخر يوم في حياته بعد عمر طويل..
؛عصابك عصابك..اني وصلتلك اللي سمعته بس..
نجمه؛اشبح مني مطلعها الاشاعه هادي..
عواطف؛وعلاش اختار نبيله بن موسى جارتنا يطلع عليها هالاشاعه مع الحاجه شنيبه؟
الجارة؛حتى اني هادي محيرتني..
خديجه؛مافيش غيرها عزبا في الشارع..
:في غيرها هلبه..
هي قالت؛اللي طلع هالاشاعه يبيها تتصدق وسيورنا نعرفوه ونوروه شن معناه تشويه سمعة الناس الباهيه..
عواطف ضمت شواربها القدام وحركتهم يمين ويسار..
ونجمه وجارتها رجعوا يشربوا في القهوة وهما يشوفوا لخديجه...
🍃اللي قعدت ع اعصابها لين روحت جارتهم..
ولبست عبايتها ووشاحها ومشت طول لحوش ماليها..
☘في حوش بوها..
كان نضال من الدروج وهو يغني..
دمعك ما جاب ياعيني دمعك ماجاب
دمعك ماجاب..
ومكتوبك في الصوب عذاب ياعيني
وين وصل في المستراح قعمز ع السياج ونزل زحلقه..
شاف خديجه جايه عيط وهو يقول؛لالالا خديجه لا..
هي انفجعت وقالت بعياط؛خيرك خيرك..
وهربت تجري للحيط ولصقت عليه..
وهو جي منقز لوطا واقف ع رجليها..
وقعد يرقص بإيديه وهو يغني..
دمعك ما جاب ياعيني دمعك ماجاب
دمعك ماجاب..
ومكتوبك في الصوب عذاب ياعيني..
تبدل فزعها للغضب..
وجاته ضرباته ع ذراعه وكتفه بمفاتيحها وهي تقول:امتى تكبر..امتى تكبر..
هو هرب منها وكان يضحك..
ولما وصل في باب الحوش قعد يعني.
انا مهما كبرت صغير...
انا مهما عليت مش فوق..
ومشي طلع من الحوش..
خديجه بغضب:مدقوق..
ع جية نسرين وهي مفجوعه قالت؛خيرك تعيطي..
التفتت عليها بعدين شدتها من ذراعها وقالت؛تعالي معاي..
ومشت بيها لدارهم ونسرين زادت انفجعت..
خشوا للدار وسكروا الباب..
وامهم طلعت من دارها بعد ماكانت تصلي في المغرب..وشافت جهة دارهم وهي تقول؛خيرهم هادم!؟..
🍃في الدار..
خديجه؛حاولي تتفكري كويس في مرة بوي مشي لمكتب المحاميه نبيله؟
نسرين؛ايه مشالها مرة هو قالي..
خديجه غمضت عيونها بغضب..
نسرين؛شن في خديجه!؟.
فتحت عيونها وقالت؛طالعه دوة في الشارع ان بوك خطبها..
نسرين بصدمه؛كيف!!؟
خديجه؛مافيش دخان من غير نار ماطلعت الدوة هادي عليه هو وياها بالذات من فراغ..
نسرين وهي تفكر؛معناها نضال كان يلمح مايبصرش..
خديجه؛شني!؟
نسرين؛نضال شكله ياشايف حاجه ياعارف..لكن نبيله مستحيل ترضى بوي..
خديجه تهكما؛وعلاش ياحنه!؟
نسرين؛المراة راقيه ومثقفه هكي تحسيها طالعه من مسلسل تركي مستحيل ترضى ببوك..
خديجه؛ع اللي عنده حبيبتي ترضى بيه وهي تزغرط..
نسرين؛مش ناقصه فلوس ربي عاطيها..
خديجه:البحر يحب الزياده قالوا المصاروة..
نسرين سكتت وهي تفكر ومازال مش مستوعبه..
وخديجه حتى تفكر والغضب مسيطر عليها..
وفجأة وبدون سابق انذار..
انفتح عليهم باب الدار..
هما الزوز انفجعوا..وقعدوا يشبحوا لأمهم بخوف..
وهي تشبحلهم بنظرات امتعاض بعدين قالت بصوت هادي مخيف..
...ردوا بالكم تبينوا لبوكم لحاجه وسكروا ع الموضوع...
🍃🍃🍃🍃🍃
بعد ماكلمت الصلاة..
طلعت من دار المعيشه لدارهم..
خدت تليفونها من ع الزيانه..
خشت ع الماسنجر.
لقت حساب راجلها نشط..
استغربت كيف ماردش رسايلها وهو شايفهم..
جربت تتصل بيه فيديو..
☘تليفونه وقتها كان عند نجاه..
وهي مقعمزه في تركينه فوق يخت كبير معبي سياح..
والجالي واقف يهدرز ع واحد تركي معرفه قديمه..
لما جي الاتصال..
شافاته نجاه وطول سكرت الصوت..
وقعدت تراجي فيه لين يفصل..
وبعد فصل..نزلت الستار وسكرت الواي فاي...
بعدين مشت خشت ع الحساب متاعه من تليفونها ومسحت المكالمه...
شافتله لقاته جايها حطت تليفونه وتليفونها في شنطتها..
قعمز جنبها وقال:هدا تعرفت عليه زمان لما جو جماعة الشركات التركيه لليبيا..
هي ابتسمت وقالت؛اها..
شويه وشغلوا اغنيه ليبيه في اليخت..
دمعك ماجاب اللي انشهرت غادي هلبه هديكا الفتره..
نجاه قالت؛تهبل..
وقعدت ترقص في مكانها وهي مقعمزه..
وهو يتفرج عليها بآبتسامه..بعدين خداها من يدها وناض وهو يقول؛مايشوف فينا..
هي قعدت تضحك بعدين ناضت وبدت ترقص..
وهو يرقص والزوز يغنوا مع بعض..
🍃وطوبى انشغلت عليه..
وقالت لروحها وهي تشوف في الماسنجر؛سكر..شكله مشغول هلبه..لكن غريبه اول مرة يسافر ومايكلمنيش..
ع جية اميمه؛بيبو توتي معانا العشي!؟.
شبحتلها وقالت؛هي جايه..وردت التليفون لمكانه ومشت طلعت ورا اميمه..
وهما ماشيات للكوجينه..
طلعت صفيه من دار المعيشه بعد ماكانت تصلي فيها..
شافتهم وقالت بإيتسامه مرحه؛نبي نخش نوتي معاكم..
طوبى؛لالانهاري..بري تريحي..
صفيه؛مانحبش نقعمز نكره التقعميز في مكان واحد نحب نتحرك ونحوس عندي فرط حركه..
ضحكوا عليها..
هي بضحكه قالت؛هي خششني معاكن..
خدتها طوبى من يدها وقالت بضحكه؛تعالي..
مشت اميمه قبلهم وهي تضحك..
وهما وراها..
خشوا..
لقوا فردوس ومعاها مطيره يسخنوا في الماكله..
فردوس وين شافت صفيه تفاجئت..
هي قالت؛ماتبحتيش هك..عادي والله.
مطيره التفتت وقالت؛خير حبيبتي تبي حاجه..
صفيه:نبي نساعدكن..
فردوس؛حي نهاري..لامايجيش حبيبي بري تريحي في الصاله..
صفيه؛نفس الكلام تقولن فيه كلكن..
ضحكت طوبى وقالت؛عندها فرط حركه خليها تتحرك..
صفيه:اهي قالتلك..
مطيره بإبتسامه؛باهي..خفوا ارواحكم..
صفيه؛ورني مواعينكم بس..
اميمه؛هونا غادي..
هي قالت؛تمام..
وتعاونت معاهم صفيه في تجهيز العشي وهي تهدرز وتنكت وهما انطلقوا معاها..
روحها الحلوه ودمها الخفيف خلوهم يرتاحولها وينطلقوا معاها في الدوة كأنهم يعرفوها من زمان..
مطيره بضحكه؛ماشاء الله عليك ياصفيه تخشي الخاطر طول..
صفيه:سلمك ياخالتي..انا المكان اللي نرتاح فيه ناخد فيه راحتي..خطرتي عليا اول ماجوزت صبياتي قالن مانحسابوك تخشيني فينا طول وتحولي الحواجز من اول يوم..قتلهن ماهو غنولي في فرحي..
ديري كيف عرب بنغازي
خشي في العيله درازي...
واني طبقت النصيحه في حياتي كلها..
قعدوا يضحكوا واميمه قالت؛عطيك الهني...
🍃ومقابلهم بمسافه..
في دار بنات الواعر..
كانوا مقعمزات آلاء وغرفه..
غرفه؛مانزلوليش من زور ماقدرتش نتقبلهم..
الاء:حتى اني ماهضمتهمش..
غرفه؛شوفي هما كيف فرحانين بيهم تقولي عيلة ملكة بريطانيا اللي جونا..
آلاء:ديما هكي دايرين قدر لكل من هب ودب هدا اللي مهزي علينا الناس..
غرفه؛صدقتي..وزياده هادي البارده خشت تعاون فيهم في الكوجينه ع اساس وهي خاشه تقصقص..ماشفتيهمش كيف مفنجلين عيونها في الحوش..
الاء؛لاحظت تقول عمرهم ماشافوا خير..
غرفه بقرف؛مستحيل ناكل منهم بعد عفن البنات اللي جابتهم نبيله بش ينظفولي الشقه..
الاء:تارقيات؟
غرفه؛ايه..والله خمجهم قاعد بين عيوني مستحيل نتعشى مستحيل...
🍃وبعد ماوتوا العشي..
طلعوا للرجاله..
وبعدين للنساوين..
زوز سفر..للبنات الصغار..وللكبار...
غرفه كانت تنقش تنقيش منقرفه..
والاء تشرب في المشروب وبس..
اما طوبى كانت تحرك في الكاشيك متاعها وخلاص..ريحة العصبان سدت نفسها ع الماكله كلها..
سليمه وهي تتعشى في السفره تانيه شافت لسفرتهم..
ولاحظت طوبى وقعدت مركزة عليها..
شافتلهم مطيره حتى هي وقالت؛بنات تعشوا..تعشي غرفه..
غرفه؛كبدي زاهقه..
فردوس بإبتسامه؛حامل..
ابتسمت سليمه مجامله..
مطيره؛تو نجيبلك فاكهه تاكليها..
ناضت وهي تقول؛تو نوض بروحي تريحي عمتي..
ومشت طلعت من حداهم..وناضت وراها الاء بتلحقها..
مطيره؛خيرك حتى انتي؟
الاء:ماخاطريش..ومشت طلعت..
واريج تشوفلها بإمتعاض..
نبيله؛هي اكثر ماكلتها من لما حملت خضرا وفواكه ولحم ودجاج مشوي الحاجات هادي معاش تقدرها..
مطيره؛حتى طوبى شكلها..
شافولها..
وهي بفجعه شبحت لعمتها وقالت:نعم؟
مطيره؛معدتك قاعده توجع فيك؟
طوبى بشي من الارتباك؛ايه..
استغربت سليمه..
طوبى:بس عادي تو ناكل..
وخدت طرف مبطن وقعدت تاكل فيه..
واميمه وصفيه مركزين عليها ومعاهم سليمه...
🍃🍃🍃🍃
اما عند الرجاله فكانت الاجواء حلوة بالمرة..
يطلعوا من موضوع ويخشوا في موضوع ويهدرزوا وكأنهم يعرفوا بعض من سنين..
عبد القيوم الوحيد اللي كان يجامل مجامله بس وع وجهها مرسومه ابتسامه مصطنعه طول الوقت..
☘☘☘☘☘
بعد العشي..
خشت صفيه مع البنات للكوجينه وغسلوا الماعين مع بعض..
ومع الهدرزة الحلوة لقوا ارواحهم مكملات بسرعه..
اميمه قعدت دير في النسكافيه..
وصفيه خدت علبه هما جابوها معاهم..
فتحتها وقالت؛هذى اطعم من اي كيكه وحلو..
شافت طوبى نوع حلو غريب بس شكله كان مغري تسهفتله..
اريج بفضول:شن هو؟
صفيه؛اغجيرا ولا تاركيت..وفي من يقوله تكضورين..
اميمه وهي تشوفله قالت:من شني مدايرينه..
صفيه:ياحنه...مقاديرها
تمر جاف
أوليس "حليب ماعز جاف"
ماء
قصب
اريج؛وكيف ديروا فيها؟
صفيه:ركزن معاي...
تخلطوا التمر الجاف والمجفف عن طريق الشمس
طبعابعد تنظيفه من النواة مع اوليس اللي هو حليب المعيز ا ومعاهم ميه في تنيدي اللي هو المهراس التقليدي من الخشب كبير الحجم، تخلطيهن مع بعضهن لين يتماسك الخليط...
وبعدها تاخدي العجينة، وفي هالحالة نسموها تاركيت اديريها كرات زي هك، وفي النهاية ترشي ولاتغطسي الكرات في القصب كويس، طبعا القصب مهمته في التخزين في حالة انك بتخزني بيش ميفسدش وحتى يقعدلك لشهور والأكلة هذه محببة ومن الأكلات المميزة في شهر رمضان عندنا..
طوبى :ترا عطيني وحده..
مدتلها صفيه وهي مبتسمه..
خدتها طوبى وكلت منها وبعد ماتبننتها قالت:تهبل..
اميمه؛ترا نذوق حتى اني..
عطتها صفيه وشبحت لاريج وقالت؛ماتسهفتيش..
اريج؛اني والحليب مش صحاب يابال الحليب المعيز سوري مانقدرش..
ضحكت صفيه وقالت؛انا متأكده انك مش حتقدري تقاومي هذي..
ومشت خدت طاسه وصبت فيها شويه ميه..بعدين حطتها ع الطاوله وفتت فيها تاركيت..
وخلطتها كويس...
وهما يشبحولها..بعد كملت ورتهم كلهم وبعدين بدت تشرب..
اريج؛لااا هادي بنجربها..
ضحكت صفيه وهي تشرب..
ومشت اريج خدت طاسه تانيه ودارت زيها بالزبط..وشربت منها بعدين قالت؛يمييي..تجنن يابنات..
اميمه؛خل نجرب حتى اني..
وجربوها كلهم وشربوها وعجبتهم هلبه..
وطوبى سألت صفيه عن المشروب وقالت؛شن اسمه؟
صفيه؛اغجيرا..وفي من يقوله كوه..
اميمه؛رووعه...
شبحت صفيه لاميمه وقالت؛مانكش مخطوبه ولافي مشروع زواج في الطريق..اكيد بعد كملتي الطب بتفتحي بابك للزواج..
طوبى واريج شافوا لأميمه بضيق..
واميمه ابتسمت وقالت؛اني مطلقه..
انصدمت صفيه وانحرجت ..
اميمه؛نصيبات..
صفيه؛ايه كيف ماقلتي ربي يعوضك خير واسفه جدا..
اميمه بإبتسامه؛،ولايهمك اصلا سؤالك عادي جدا..
هزت صفيه راسها ونزلاته للطاسه اللي قدامها وهي منحرجه ع الآخر..
وطوبى بش تحول عنها الاحراج قالت؛كم ليك سنه متزوجه..
شبحتلها بإبتسامه وقالت؛عامين ونص..
اميمه؛طول العمر مع بعض ان شاء الله..
صفيه بإبتسامه؛آمين..
اريج؛زمان تفرجت ع برنامج وثائقي عن الطوارق في ليبيا اكثر حاجه متفكرتها منه عراسكم مميزة هلبه..
صفيه؛اها عندنا عادات واجده في اعراسنا تختلف عن غيرنا..حتى في اللبس..
طلعت تليفونها من جيب قونتها وقالت؛تو نوريكن صور فرحي..
وحطت عليهم ومدت التليفون لأريج وقالت؛مرريه..
اريج؛محلاك تهبلي تهبلي طالعه..
صفيه بإبتسامه؛تسلمي يارب..
اريج؛اللي جنبك راجلك؟
صفيه؛ايه..
اريج؛واااو بصراحه..
طوبى:هيا هاتي...
مدتلها التليفون..
خدانه وجت جنبها اميمه تتفرج..
اميمه بإعجاب:حلوين هلبه...
اما طوبى سرحت وهي تشوف للبس صفيه..
عجبوها هلبه..الفستان الطرحه ع الراس الاكسسوارات..
للحظه تخيلت روحها لابسه زيها..
جي في خاطرها هلبه..هلبه..
شافت لصفيه وقالت:حلو هلبه لبس العروسه عندكم جي في خاطري نلبس زيه..
صفيه بضحكه؛خيطت منه زوز وجبتهن معايا قلت نوريهن لعبدو اللي تعجبه فيهن ندسوها لعروسه اصله يبي وحده من هنا..
ابتسمت طوبى وقالت؛سمعنا..
صفيه بإبتسامه؛خلاص اللي يخليها نجيبها لك تلبسيها المهم مايقعدش فخاطرك..
طوبى بإبتسامه؛ياريت...
🍃وكملوا تجهيزة سفرة النسكافيه والحلو ومشوا بيها للصاله..
وكملوا هدرزتهم وسط اجواء حلوة تمنوا معاها الوقت يطول اكثر واكثر..
بس بعد الساعه عشره الرجاله قالوا هيا.
☘مطيره:توا خوي قالي عزم التريس ع البازين تم الكلام..
سليمه؛ياوخيتي واجد عليكم الليله عشا وبكرا غدا..
مطيره؛لا واجد لاشي.اني نلقى تباتوا معانا الليله..
اريج؛ياريت والله..
ضحكت صفيه..
سليمه بضحكه،خلاص نتلاقوا بكرا ان شاء الله...صحيتوا وسامحونا في تعبكم..
مطيره؛تعبكم راحه وبعدين اكيد مردود لما نجوكم الكفره..
ضحكوا..
وسليمه وبنتها قالوا؛مرحبتين بيكم..
ورفعت صفيه ولدها اللي كان راقد في حضنها..ومشت طلعت مع امها ومطيره سقدتهم..
شويه وطلعوا نبيله وغرفه..
وقبل يروحوا شددت عليهم مطيره يجوا غدوة ع الغدي..
🍃🍃🍃🍃
بعد ماروحوا الضيوف..
ضموا الحوسه..وخشوا رقدوا...
☘في دار المعيشه..
هدرزوا مطيره وطوبى وفردوس ع الضيوف وكلهم رأيهم فيهم كان واحد..
"ناس طيبه تخش الخاطر"
اما بنات فردوس...
اريج مقعمزه في الصاله تكلم في نضال..
وآلاء في الدار..
مقعمزه ع سرير سدرة وحاطه في وذانها السماعات وتسمع في الراديو...وهي مصدومه...
🌟العلاقه السامه..
انهيها..
اللي تكون في انت الطرف الوحيد يعطي..
انهيها..
لما تلقى روحها تستنزف في مشاعر ع الفاضي ..
انهيها..
لما تلقى الطرف التاني مايقدرش اللي دير فيه خاطره..
انهيها..
العلاقه اللي تخليك مع الوقت تضعف وتولي مجرد اداه في يد الطرف يستغلها بش يحقق مصالحه بس انهيها..اقطعها..
لانك لو مانهيتهاش حتنهيك..
وممكن بعدين تحولك للشخص تاني انت ماتعرفاش..
تحولك من انسان حيوي ومرح..لإنسان سوداوي وكئيب..
من انسان طيب وماشي بحسن النيه..لوحش يدمر كل شي قدامه لأن فقد الثقه في كل اللي حواليه وتحول حسن النيه عنده لشك وسوء ظن..
الطرف التاني في اي علاقه كنتوا فيها..
ازواج..علاقة حب خطوبه..
علاقة صداقه..حتى الاخوه..
ايه في خوت تكون العلاقه بيهم علاقه سامه وقاتله...
العلاقه السامه لما يكتشفها صاحبها لازم ينيها قبل تنهيه..
ومعاش تقولوا اني نتعامل مع الناس بحسن نيه..
لالالا..حسن النيه بروحه غباء..سذاجه..حسن النيه لازم ديما يتبعه الحذر ضروري بش ماتكونش ضحيه يوم من الايام..
وتخسر اهم شي..اللي هو نفسك..تخسر نفسك..
والبني آدم كان خسر نفسه ينتهي...
🍃كانت طوبى حتى هي تسمع في الحلقه..
تأكدت ان مهند عرف كل شي..ووجعها هلبه لأنه كان مستغفل تعامل مع آلاء بحب وحسن نيه وهي استغفلاته وغدرت بيه..
وماكانتش عارفه ان حالها من حال مهند...
بس الفرق بيناتهم..
ان مهند عرف كل شي بكري بالقرائن والادله وماكذبش ع روحه ولا كذبها واختار ينهي كل شي..
عكس طوبى اللي كانت تشوف في حاجات مش واضحه..ومش لاقيه لاقرائن ولاادله قويه..
وفي نفس الوقت كانت تهرب من البحث عن الحقيقه خوفا منها....
🍃ونهي مهند الحلقه متاعه الليله بكري ع غير العاده .
وخاتمه هالحلقه كانت قاسيه ع قلبه قبل ماتكون قاسيه ع قلب آلاء اللي كان يتقطع من الم العذاب..
🌟وفي الختام..
ولأخر مرة نهديها..ونقوللها..
اسف..اسفه هلبه لاني عطيتك قيمه مش ليك..
اسف هلبه لأني عطيتك من وقتي ومشاعري..
اسف لأني كنت معاك راجل لاخر لحظه...
واشر للمخرج..
حط اغنيه الختام اللي كان اسمها..
صفحة وطويتا...
وآلاء لما سمعتها انهارت بالبكي..
واريج تشوفلها بحزن ودموعها ينزلوا..
انفتح باب الدار وخشت عليها طوبى وشافت حالة الاء..
الاء ببكي؛والله العظيم حبيته..والله حبيته واول مرة في حياتي نحب من قلبي..
طوبى مشتلها وقعمزت حداها وخدتها في حضنها بدون ماتتكلم بس دموعها كانت تنزل وهي تسمع في عبرات الاء..
اللي كانت طالعه من وسط قلب موجوع بقوة..
☘ومن قلب آلاء الموجوع..
لقلب التارقي المجروح واللي قاعد يتعذب بشتى اصناف العذاب من حبه لأم العيون الحايره..
في وسط الشقه..
كان مقعمز مع عمته وبنتها...
وعمته تقول؛ماصدقت رقدوا عبد الله ومعمر بش نحكي معاك براحتي..
صفيه؛حتى اني..من بدري سألتك كنك قتلي نحكيلك بعدين..
تنهد بضيق وقعد ساكت..
سليمه؛عبدو ولدي احكي..قولي شن اللي خلاك نويت ردة للكفره وبعدين رديت في كلامك وتميت هنا؟
صفيه؛انا قلت أيس انه يلقى البنيه..
هو قال؛لقيتها..
هما الزوز بلهفه؛وبعدين؟
هو بنبره حسرة؛متزوجه..
صفيه؛ياغبينتي غبينه!
ابتسم تعجبا وبملامح حزن قال؛الغبينه مش هنا ياصفيه..
سليمه وهي مصدومه؛ناعليا مال في شني!؟
تنهد وقال؛وين جيت لطرابلس سكنت عنها وتعرفوا كيف جيت..ومن اول يوم وانا نبرم في طرابلس وندور عليها..ندور عليها وقالب عليها الدنيا وهي حداي..
غمضت صفيه عيونها بشده وقالت؛يارب ماتطلع اللي في بالي!..
سليمه؛من اللي في بالك!..
صفيه فتحت عيونها وقالت؛الله يربحك ماتقولش طوبى بنت الواعر..
ضحك بقهر وهو ساكت..
صفيه؛عليك غبينه ياربي لاحول ولاقوة الا بالله.
وسليمه قعدت تشوف لولد خوها بحزن وقلبها موجوع عليه وع حالها..
صفيه؛سبحان الله من اول طاحت عيني عليها حسيت وصفك للبنيه اللي تبيها نفس مواصفاتها..بالذات عيونها الحايره..
هو بضيق؛ماتوصفيهاش ليا بالله..
سليمه حطت يدها جنب راسها وقالت؛حسيت ضغطي رقي..
هو بخوف؛عمتي بتندميني اللي حكيتلك..
هي شافتله وقالت؛لازم ترد معانا للكفره ماعندك ليش قاعد غير تقهر في روحك وخلاص..
هو بضيق؛ياريت نقدر ياعمتي..
صفيه؛حيه عليك الوليه مجوزة..
هو سكت وملامح الضيق باديه ع وجهه..
سليمه؛يمي عبد القيوم حط عقلك في راسك ولدي ورد معانا..ماعندك ليش قاعد الوليه مجوزة وفي عيل جايها في الطريق سلم ولدي طلعها من راسك..
موس وخش لقلبه الخبر اللي عرفه من عمته..
قهره هلبه وزاده على مابيه..لكن خوفها عليها اكثر من قبل..
حرك راسه بالرفض وقال؛لالا مانقدرش مستحيل بالذات بعد اللي عرفته توا..
سليمه؛انا قلتها لك بش طلعها من عقلك بكل مش تزيد دخلها فيه..!..
هو بضيق شديد:انا لايمكن نفكر فيها غلط وهي ع ذمة راجل غيري...انا توا تهمني لأنها مظلومه واجد وطايحه بين ايدين ناس ماتخاف من ربي..
هما الزوز شبحوله بخوف واستغراب ويراجو منه في توضيح للكلام اللي قاله...
🍃🍃🍃🍃
وفي مكان بعيد عنهم..
في مدينة تانيه في طرابلس...
مكالمه دور في نص الليل تلقتها صاحبتها بفزع..
وبعد ماخدت وعطت مع المتصل..
بإنفعال قالت..
:اسمعي ردبالك من كلامك راهو مش ساهل بكل مهما كان اللي بيني وبينها مانسمحلكش توصلي في شرفها تقعد ام صغار ولدي..
"باهي كان مش مصدقه كلامي..بريلها غدوة جمعه عطله واعرفي بروحك كاني كذابه ولاصادقه"
سكتت وقعدت تفكر لو سمعاته صح..وقتها اكيد مش حتخلي صغار ولدها دقيقه زياده مع امهم...
☘وفي من ناوي ينتقم من ام تانيه بصغارها...
وطريقة انتقامه كانت قاسيه بشده..
🍃خش ع امه في دارها وقال؛يام..
سكرت االمصحف وشبحتله..
حامد:كل شي واتي؟
وهي تشوف لآثار الضرب اللي قاعده معلمه ع وجهه ولدها قالت:ايه ولدي كله واتي والصغار يراجو امتى يسافروا..
هو قال؛غدوة الساعه 4 نكونوا في المطار الطيارة متاعنا تطلع 6..
تنهدت وقالت؛باهي..
هو شبح لامه شويه بعدين قال:نحس فيك تبي تقولي حاجه يام من بكري ملاحظك..
هي قالت؛عيلك اللي قاعده حامل بيه شن بيصير فيه؟
هو قال بغل؛يقعدلها..يقعد في رقبتها خانقها لين تموت..
هي قالت؛يقعد عيلك ياولدي معقوله تخليه لوحده مهمله زيها ماتجيش مراة ولاتنفع ام!
هو قال؛لاناخده منها ونخليها تعيش حياتها بطول والعرض!.لا يما والله ماصايره..والله لنخليها تقعد متحسره ع روحها طول عمرها ونخلي بوها وامها ينقهروا قهر...
هي تنهدت بضيق وقعدت ساكته..
وهو شاف لأمه بعصبيه..بعدين مشي طلع من حداها..
#فلاش_باك
#طوبى
....يتبع.....
