#طوبى "جنة طوبى"
#جمان_فريد
#الجزء_السادس_والسبعين "تحالف"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الصلاة_على_النبي
¤إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا (56)¤
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ذراعي التّي تحاول الصِعاب لَويها .. رفعتها إلى الله فلنرى مَن سينتصر🍃
_________________________________________
"وعليكم السلام"
قالها وهو يحاول اخفاء مشاعر الخوف والتوتر...
رد عليه وقاله..
/سامحني جيت من غير موعد..بس يعني حني نسابه وهدا حوش اختي نجي امتى ندف الباب...
خش من الباب وهو يقول..ونخش..
الجالي مرر نظره عليه من رجليه لراسه وهو يشوفله بريبه ويقول..
/اكيد اهلا بيك في أي وقت..
سكر الباب وهو يقوله..
/تفضل..تفضل..
مختار وهو يمرر في نظره ع الفيلا من برا قال..
/حلو تصميمها من برا يبان مليح..بس المهم من داخل كيف تكون..شافله وقال..ماهو حتى الحاجات هادي مانحكموش عليها بالظاهر متاعها..مرات تكون من برا وتبرق وتزهى في العين ومن داخل ولاتسوى حاجه..مقيوله..يامزوق من برا..شن حالك من داخل..
الجالي قعد يشوفله وهو يفكر في كلامه..
بدوا التوتر والخوف يبانوا عليه ومختار لاحظ هالشي ابتسم ابتسامه واسعه وقال..
/خل نخشوا الشمس قويه والجو سخون..
ومشي قبل الجالي..
والجالي لحقه وهو معصب وخايف في نفس الوقت..
وصل مختار في باب الفيلا الدخلاني ووقف..
وقف وراه الجالي وقال..
/كمل خش..تفضل..
خش مختار...
وقعد يتفحص بنظرة في الزوايا واركان وديكورات المكان..
مشي وهو يدور بعيونه..
والجالي وراه وهو ساكت..
وصل مختار في الدروج وقال..
/لا شغل حلو عكس المتوقع..حلو حلو..
التفت وقاله..حتى هو منزل العمر زي مايقولوا..
الجالي هز راسه وهو ساكت..
ابتسم وقاله..نركبوا فوق..
قعد يشبحله بريبه وهو ساكت..
مختار:اه نسيت..هدا حوش اختي ندور فيه زي مانبي.
وركب الدروج..
والجالي مشي طول وركب وراه..
وقعد مختار يصول ويجول بعيونه وهو يتفحص في كل شي..
لين وصل فوق..
مرر نظره ع المكان بعدين قال..
/الديار هني؟
الجالي وهو يوري فيه..
/ايه..هديكا دار النوم..وهادي حجرة المكتب متاعي..وهاديكا دار الصغار..
مختار مشي طول لدار الصغار.
والجالي وراه...
وصل فيها وفتح الباب ..
والجالي يحاول يسيطر ع اعصابه اللي قاعده تستفز..
مختار بإبتسامه..
/حلوة..حلوة هلبه..
تنهد وسكرها وقال..
/ذوقك ولاذوق اختي؟
الجالى:اني اخترتها..
مختار:اها...غير عيونه لحجرة مسكره وقال..
/هديكا شنو؟
الجالي زاد توتر وقال..
/هديكا..مرسم..
مختار شبحله وقال..لطوبى؟
الجالي:ايه..
مختار؛افتحه خل نشوفه..
الجالي:مفتاحها عندها..
رفع مختار حاجبه وهو مركز في ملامحه وزاد وتره اكثر..
بعدين ابتسم وقال..
/اممم..خلينا ننزلوا لوطا..
ومشي طول نزل من الدروج...
خدي الجالي نفس من الخوف...ومشي لحقه...
🍃🍃🍃🍃🍃
"مفروض ترقد وترتاح علاش تزيد تهلك في روحها"
مطيره وهي تمروح ع روحها بكاغط صندوق زيت وتقول بأسف..
/فرقة راحتها ماظني بعد اللي صار لمدرسة اختها مازال ترتاح..
تنهدت فردوس بقهر وقعدت ساكته..
وحداهم غرفه متكيه حدا المروحه وتسمع فيهم وملامح الحزن مسيطرة ع وجهها..
🍃ومن دار المعيشه..
لدار البنات..
كانت طوبى واقفه قدام المرايه تمشط في شعرها اللي غزاه الشيب وولى خفيف هلبه..
كملت وحطت المشط ع الطاوله بعد لمت شعرها فوق..
بعد لماته قعدت تشوف لشكلها في المرايه وهي تقول في نفسها..
"مش وقت انهيار بكل مش وقت خوف مش وقت بكي..قدر ربي شي ويبيه يصير وصار ارضي وقولي لعله خير..معاش تضعفي معاش ذلي معاش تخلي حد يشوفك مهزومه"
خدت نفس عميق وطلعاته..
بعدين غمضت عيونها وقالت..
/ياالله..
فتحت عيونها ومشت للباب بتفتحه..
جي نظرها ع رسغ يدها اللي كان اثر حقد راجلها عليه..
تفكرت كيف كانت حالتها وقتها..
بدت ع وجهها ملامح الألم..وكانوا دموعها حينزلوا..
بس شدت روحها وقالت..
/قلنا خلاص ياطوبى خلاص..
وفتحت الباب ومشت طلعت وهي تمشي مشيه فيها شي من التآني بسبب ثقل حملها..لكن كانت تبان قويه..او تحاول تكون قويه وتخلي اللي حواليها يشوفوا هالقوة فيها..
وصلت للصاله وخشت وهي تقول..
/السلام عليكم..
اميمه وهي تشوفلها تفاجئت بحالتها المختلفه تماما عما كانت عليه قبل ساعه..
تبعتها بعيونها وهي ماشيه لأبله زينب..
سلمت عليها..بعدين قعمزت جنبها..
طوبى:قولي كل شي مستعده نسمع اي شي مهما كان صعب.
تنهدت زينب وقالت..
/شوفي بنتي هو الواضح ان من فتره مش بعيده في من كان يكيد في مكيده للمدرسه ويبيها تتسكر..وللاسف الحادثه اللي صارت ساهمت في انجاح مكيدتهم هادي..الموضوع اكبر من مكتب المراقبه متاع المنطقه..
قعدت طوبى تشوف للفراغ بنظرات حزن واسف وهي تسمع في كلام ابله زينب..
واميمه تشوفلها بحزن..
زينب؛بنتي طوبى اشبحيلي..
غيرت طوبى نظرها ليها..
زينب؛كله تقدير من رب العالمين ينكاد للمؤمن ويمكروا فيه ويتلاقوا عليه شياطين الانس والجن بش يأذوه ويطيحوه ومش حيقدروا يديروله ولا حاجه لو رب العالمين ما أذنش..ولو اجتمعوا على أن يضروك بشي لن يضروك إلا بشي كتبه الله عليك رفعت الأقلام وجفت الصحف..خلاه يصير صح بش حيقلبه خير ليكم صدقيني وحيجي اليوم اللي تقولي فيه الحمد لله اللي صار هكي..
دمعوا عيون طوبى..
زينب حطت يدها ع ذراعها وقالت..
/اني عارفه انتي في شني تفكري..ابله سدرة بإذن الله تعالى لما يرجعولها وعيها وعافيتها وتعرف اللي درتيه ع خاطر المدرسه صدقيني حتفرح بيك وترفع راسها اللي درتيه يابنتي شي ماسمعتش بحد داره قبلك وبصدق ومن قلبي نتمنى بناويتي يكونوا زيك وين يوصلوا سنك..
ابتسمت طوبى وسط دموعها وقالت..
/ربي يجبر بخاطرك ويعطيهم الوقت الطيب وماتشوفي فيهم اللي يكدرك..
نزلت من اميمه دمعه مسحتها وهي تشوفلهم وتسمع فيهم..
زينب بإبتسامه؛ويقويك ويفرج عليك ويكتب اجرك..
خدت طوبى نفس وشدت روحها وقالت..
/شن صار بالزبط؟
زينب حطت ايديها ع بعض وقعدت تحكي لطوبى اللي صار امس واليوم..
وطوبى تسمع فيها وهي تحس بشعور احباط كبير وقلبها موجوع..
من الظلم..الظلم اللي قاعد يحاوط فيها من كل اتجاه..
للظلم سطوة..وللظالم جرأة كبيره..يوصل المظلوم لأضعف حالاته يخليه هين ع نفسه وع الناس..
ابشع شعور ممكن ينعاش في هالحياة شعور الظلم..
وطعمه مر..مرار الحنضل...
زينب بأسف؛قرروا يكملوا امتحانات النقل للطلبه الاسبوع الجاي في المدرسه وبعدين خلاص بيطلعوها من قائمة المدارس الخاصه التابعه للدوله...
برغم انها كانت متوقعه تسمع هالشي بس وقعه عليها لما سمعاته كان قوي هلبه..
جت بين عيونها اختها وزاد وجع قلبها..
وبرغم هدا كله قالت بنبرة تسليم مختلطه بالألم..
"قدر الله وماشاء الله فعل"
🍃🍃🍃🍃🍃
"عندي خلفيه ع اللي صاير بينك وبين اختي"
الجالي قعد يفرك في ايديه ببعض من التوتر وهو يشوفله..
مختار اللي كان حاط رجل ع رجل ويتكلم بتكبر تابع يقول..
/هو صح انت غلطت وغلطك كبير..بس يعني من فينا مايغلطش..
بدت ع وجه الجالي ملامح تعجب خفيفه..
مختار:99في الميه من حني الرجاله نغلطوا في الغلطه هادي حاجه في طبيعتنا مانقدروش نغلبوها..غلط زي هادي المفروض اي مراة عاقله مهما زعلت تتجاوزه...
وقف فرك ايديه ببعض وخف توتره شويه وهو يسمع فيه..
مختار ضيق عيونه وقال..
/صراحة انت عندك ايجابيات هلبه درتهم مع اختي..خليتها تكمل قرايتها..خليتها تخدم..حتى السواقه تعلمتها عندك السيارة ودرتلها وعاطيها حريتها بصدق المعروف اللي درته معاها حرام تمسحه بغلطه راحت وعدت ع حالها وانت تحاول تصلحها..
الجالي؛حاولت بدال المرة مرات بس للأسف هي ماسودت قلبها ع الآخر من ناحيتي..
مختار:مش منها..من الناس اللي واقفه بينك وبينها..
الجالي ببغض:ماوصلنا لهني الا الناس هادي شياطين الإنس..
مختار:مزبوط..شوف ياجالي..اني مش راضي نهائي ع اللي قاعد يصير ولاهو عاجبني..وقلبي واجعني ع الطفل اللي جاي في الطريق..بنت هي ولا؟
الجالي هز راسه بإيجاب..
مختار:وهدا الهم هو بنت والبنت لازم تتربي حوش مستقر بين امها وبوها ف بيئه مشتته مرة هني ومرة غادي ولاقدر الله نتجر للضياع مستقبلا..
شد الجالي ع قبضه يده بقوة..
مختار:اللي حواليها مايفكروش في الحاجات هادي يشجعوا فيها ع الخراب والغلط وهي قاعده صغيره وتتأثر هلبه بكلام الكبار..
الجالي تنهد بضيق وهو ساكت..
مختار:ماتخممش تو نساعدك..
شافله وهو متفاجئ..
مختار:ع خاطر العيل اللي بينكم حرام يكون مصيرها التشتت التشرد قبل لتجي للدنيا...بس قبل كل شي انت ناوي تصلح اللي فسدته ومعاش تولي لصنعتك هادي مرة تانيه؟
الجالي وهو محرج ومضايق قال..
/أكيد..
مختار:تمام...مشكلتك مع مرتك ساهل تنحل لو تحولت العواقب اللي بيناتكم واني تو نحولها...بعدين ياجالي الأمر بيقعد واقف عليك انت وذكائك تحاول تلقى طريقه ترد بيها مرتك..اجبار مستحيل نجبرها قرارها المنفرد اللي من غير تأثير خارجي مستحيل ندخل فيه لو سكرت راسها بعدين ع الطلاق معناها خلاص انتهي الموضوع..
الجالي؛حترجع صدقني حترجع غير يطلعوا منها شياطين الانس بس..
مختار؛الموضوع هدا عليا..رفع سبابته وكمل يقول..
لكن..لو صار وولتلك ياجالي وعاودت درت نفس الغلطه تحمل مايجيك مني..
الجالي تلقائيا قال بخوف؛مستحيل..
رفع مختار حاجبه وهز راسه بعدين ناض وقال..
/كويس..كويس..الشاطر اللي يتعلم من اخطائه ومعاش يعاودها..حاجه تانيه غير هالموضوع جيت ع خاطرها..
ناض الجالي وحط ايديه في جيوبه وقال..
/شن هي!؟
مختار:انت قبل حكيتلي ع لوحه راسمتهالي طوبى قاعده هني..
الجالي وهو يفكر قال:ايه قاعده هني قاعده..
مختار؛نبيها..
شبحله الجالي شويه بعدين قال..
/استنى..
ومشي بيركب الدور التاني..
وعيون مختار معاه لين درق من قدامه..
🍃مشي الجالي لدار المرسم فتحها وخشلها..
كانت الدار محطمه تماما مافيها شي سليم اخطا الدولاب اللي قعد واقف ع حيله رغم ان بيبانه مخلعات..
خدي كرسي وركب فوقه..
كانت اللوحه وهي مغطيه محطوطه فوق الدولاب..
خداها ونزلها..ومشي طلع بيها من الدار وسكرها وراه..
🍃تحت..
ومختار واقف يتفرج من ورا مرش الفيرندا ع الجنان ويشوف لأزهار الأقحوانه مقطعه والمدهوسه...
جاه الجالي باللوحه وقال..
/اهي اللوحه..
التفت مختار وشافها بعدين قال..
/قيم الغطا..
الجالي ع مضض نفد امره و وقام الغطا..
وتشوف عيون مختار لوحه مرسومه بإتقان وفن عالي...
انبهر بيها..وحس بشعور غريب وهو يشوفلها..
وقعد يتخيل في طوبى وهي ترسم فيها..
اللوحه كانت حلوة ع الآخر..
سيطر مختار ع نفسه ومابينش للجالي مدى تأثره باللوحه.
قال ببرود مصطنع..
/غطيها..
غطاها الجالي..
مختار:الحقني بيها للسياره..
ومشي طلع بيطلع..
الجالي بغضب مكبوت مشي طلع وراه...
🍃🍃🍃🍃🍃
"ماتكترليش"
:لابنكثر خلي الراجل يشوفك بوجه قنين ساد الغمه اللي لابستيها تقول منظمة لداعش..
عواطف:هادي سترة..
:فكيني من محاضراتك توا..اشبحيلي ترا...حلوات عيونك..
عواطف بإبتسامه؛عيونك الحلوة..صحيتي حبيبتي..
فجأه جي لعواطف اتصال..
ناضت طول وهي تقول بإرتباك..
/جي جي!..شن منظري؟
:تهبلي..هيا بري ماتعطليش عليه..
ضحكت عواطف ومشت طول...
🍃نزلت للكافتيريا مكان اللقاء..
وصلت فيها وخشتلها وقعدت دور بعيونها ع واحد لابس سوريه سماويه وسروال جينز ازرق..
واخيرا لقاته..
كان يبان عليه عمره..شكله مقبول ويبان شخصية راكزة..
عجبها وجذبها..وقعدت تمشيله وهي متوتره..
قعمزه ع الطاوله اللي مقابلاته بالزبط.
هو شافها..ركز عليها وع لبسها عرفها هي..
ابتسملها..وردتله الابتسامه..
بعدين قام تليفونه..
وخش ع الماسنجر وقعد يكتب وهي تشوفله..
شويه وصلتها رسالته..
رفعت تليفونها وفتحتها..
(اجمل من الخيال)
قلبها فر من الفرحه رفعت عيونها فيه وشافتله وهي مبتسمه بخجل..
لقاته مازال يكتب بعدين شافلها وهو مبتسم..
وصلتها الرساله..
نزلت عيونها للتليفون وقرتها..
(بنجيب الوالده وعمتي الاسبوع الجاي ان شاء الله)
وعواطف من داخل كانت تزغرد من الفرح..
بدت تكتب في ردها بعدين بعتاته..
(مرحبتين بيكم)
رفعت عيونها وشافتله..
لقاته ناض وهو يشوفلها بإبتسامه بعدين مشي طلع من الكافتيريا وهي تسرقله في نظرات خجوله..
بعد ماطلع..
هي ناضت ومشت طلعت من الكافتيريا والفرحه مش سايعتها..
كانت حاسه روحها طير ماتمشيش..
حاسه انها تحلم في حلم حلو متمنيه ماتفيقش منه..
وصلت في الحجره اللي فيها صاحبتها بسرعه..
خشت عليها وهي تقول..
/مشت الأمور يابنت مشت..
صاحبتها بفرحه..
/هاه شن طلع..
عواطف بحماس:شكله مقبول لكن شخصيه لما شافني قالي بنجيب امي وعمتي الاسبوع الجاي..
ناضت صاحبتها وضمتها وهي تقول..
/مبروك عطوفه مبروك عقبالي يارب عقبالي..
عواطف وهي تضحك قالت..
"آمين"
🍃🍃🍃🍃🍃🍃
"قالت العرس بعد الامتحانات"
مروة:ايه بعد الامتحانات ع طول..
فايزة بحيره:مش عارفه حاسه روحي غلطت لما قلت باهي..
صفاء:علاش!؟
فايزة بضيق:مش هاين عليا نخدم لمناسبات وعمي لطفي يدوب سكر الاربعين هدا بوي التاني..
مروة؛ماما انتي مش ماشيه تحضري العرس ماشيه تخدمي..
تنهدت فايزة بضيق وقعدت ساكته...
🍃🍃🍃🍃🍃
الساعه 6:15عصرا..
الجو قاعد حامي ...
وحوش لطفي الواعر كان شبه فاضي من الاثاث ماعدا الصاله بش يخففوا من السخونيه في الحوش..
ومع هدا ماتعدلتش حرارة الحوش قعدت زي ماهي..
☘في دار المعيشه..
كانوا مقعمزات والمروحة تلف عليهم...
غرفه وهي مضايقه؛مافيش فايده ياربي مافيش فايده..
مطيره:بلي روحك بالميه بلي..
فتحت غرفه الشيشه وهي مضايقه ع الأخر..
وصبت منها في يدها وغسلت وجهها وشعرها ورقبتها وذراعتها..
وغمضت عيونها لما حست بشوية بروده جتها..
ع خشة الاء اللي كانت مدايرة "دوش" وهي تقول..
/ياربي خودني من هالبلاد وريحني ياربي شن هدا عيشة معاش تنطاق..
فردوس ؛في طاعة الله يابنتي..
قعمزت آلاء وقالت..
/لاماما مش ربي هادوا البشر كانا في بلاد مقومه راهو مش هدا حالنا..
مطيره؛صدقتي يابنتي الضي من الفجر هارب لتوا!
غرفه؛مش بعيد بلاك أوت..
مطيره؛يجعل حياته كلها بلاك اوت اللي تسببلنا في هالحال.
ع خشة طوبى وهي لابسه لبس خفيف هلبه وتقول..
/ياربي رحمتك مش قادره نتحمل جو اليوم استغفر الله العظيم..
مطيره؛تعالي حدا خودي شويشة ها الميه واغسلي ليها وجهك واطرافك..
مشت قعمزت جنب عمتها ..عطتها شيشى الميه ودارت زي مادارت اختها..
غرفه بضيق؛نفسي غام عليا حاسه روحي بندوخ..
وهما يشوفولها بضيق..
خشت عليهم اريج وهي مروحه من الخدمه وجهها احمر وعرقانه وتاخد في االنفس بالسيف وتقول..
/مش قادره نتنفس.مش قادره..
كلهم قعدوا يشوفولها بقلق..
وغرفه قالت؛علاش طالعه يابنتي علاش وقت طلوع..
فردوس ناضتلها وهي تقول بعصبيه..
/تسكير راس ياهمي تسكير راس ..
وقعدت تفكلها في وشاحها..
فجأه نزل الدم من انفها..
فردوس بفجعه..
/حي عليا!!..
حطت اريج يدها ع الشي اللي طالع منها وشافاته انصدمت..
ناضوا الاء ومطيره شافوها شهقوا بفجعه..
غرفه:خيرها!!
الاء بخوف؛ينزل من خشمها دم..!
غرفه؛حي غبارة..!
طوبى ناضت بشويه صعوبه ومشتلها وهي تقول بقلق..
/شويه بس انتي عندك جيوب اريج تصير عادي ماتخافوش..بري الاء جيبي جهاز قياس الضغط من دار جدك..
مشت الاء تجري..
فردوس بدت تبكي وهي تقول؛.
/ياحليلي اني بابنتي علاش تعاندي قتلك مش وقت طول..
طلعت مطيره كلينكس من شنطة اريج وسدت بيها انفها وجت بترفع راسها فوق..
طوبى قالت؛لاعمتي لا..طبسي شويه القدام اريج بش مايوليش الدم وتبلعه..
دارت اريج زي ماقالتلها خالتها وكانت خايفه..
فردوس وهي تبكي..
/والله في جو زي هدا معاد قاصتها خطوه برا الحوش تمشي ديري امتحانك وتروحي فاهمه!..
ع خشة آلاء بجهاز القياس وهي تشوف لاختها بقلق وتقول..
/اهو جبته..
مطيره قعدت تتأكد من النزيف لقاته وقف..
طوبى:قيسيلها ضغطها عمتي..
عمتي:شويه بس..
☘وقاست مطيره الضغط لأريج لقاته مرتفع ارتفاع بسيط..
طوبى:الجيوب يديروا هكي راهو ماتخافيش روجه..
آلاء بخوف:وكان تمشي تعاين بش تطمن..
فردوس:ترفعيها انتي..
اريج:لالا خلاص حاسه روحي باهيه..
فردوس بعصبيه؛سكري فمك انتي..
شافتلها اريج بربع غين..
الاء:باهي ع السريع نبدل حوايجي ونطلعوا..
☘وطلعوا اريج وآلاء من الحوش قاصدين مصحة القدس...
🍃اللي كان فيها اسكندر مع عبد الرؤوف وهما طالعين بعبد القيوم من المصحه..
كانوا ماشيين في الممر ويهدرزوا ع اللي صار الظهر في المصحه..
عبد الرؤوف بعصبيه؛الشكالات اللي زيه ماينفعش معاهم الاحترام..
اسكندر:عطيني الضي الاخضر نخزرطهولكم..
عبد القيوم اللي كان مضايق لأبعد حد قال..
/لالا ردوا بالكم ديروها تجي في صالحهم بعدين..
عبد الرؤوف وهو يفكر:صح مزبوط..
عبد القيوم؛كان عندهم عقال مفروض يدخلوهم في الموضوع..
عبد الرؤوف:ع قولتك كبرت معاش تصغر مادام وصلت لهني..
اسكندر:دخلوا ولادخلوا مجانين صدقني مش حيطلقها الا بعد مايتخزرط وتو تولوا لكلامي..
وساد الصمن بينهم وعبد القيوم يتخيل في حال طوبى بعد اللي صار فيها وقلبه قاعد يتقطع عليها...
طلعوا من الممر...
ويجوا قدامهم اريج وآلاء..
استغربوا لما شافوهم واسكندر قعد مركز مع اريج..
وهي خدت يد اختها وكملوا طريقهم..
عبد الرؤوف:شويه بس..
ومشي لحقهم..
عبد القيوم بقلق:يستر الله..
واسكندر يشوف جيهتهم وع وجهه باديه ملامح القلق..
🍃أريج:نزف خشمي من النو..
عبد الرؤوف:باهي تعالوا معاي..
التفت لصاحباته اشرلهم يمشوا..
هما فهموا عليه..اشرله عبد القيوم يسأل شن فيه؟
رفع ابهامه وهو يهز في راسه بمعنى "الامور تمام"
فهم عليه وهز راسه بعدين قال..
/هيا..
اسكندر اشر بيده لعبد الرؤوف بمعنى..
"كان تبي حاجه كلمنا"
هز عبد الرؤوف راسه..
ومشوا اسكندر وعبد القيوم..
وعبد الرؤوف شاف لآلاء واريج وقال..
/هي تعالوا..
ومشي وهما مشوا وراه...
🍃وبعد مادارت اريج الفحوصات اللازمه واطمنت ان ما فيها شي يستدعي الخوف..
روحوا هي وآلاء وعبد الرؤوف وراهم...
ووين وصلوا في الحوش..
كان نضال مقعمز برا في القهوة متاعه يتفرج مع الزباين ع المباراة..
سمع صوت السيارات شاف جيهتهم..
جو عيونها عليها وهي متكيه ع كرسي السيارة..
حس انها تعبانه القلق سيطر ع قلبه في لحظه..
تبعها بنظره لين ادرقت عليه لما خشت سيارة اختها للحوش..
بعدين درس نسيبهم ونزل من السياره وخش داخل وسكر البوابه...
☘☘☘☘☘
حد الدروج..
كانت غرفه لابسه حجاب وواقفه ع راجلها تسمع فيه شن يقول..
عبد الرؤوف:في الجديد صارت حاجه زي هادي كلميني طول معاش تبعتوهم بروحهم..
غرفه؛حاضر..
عبد الرؤوف:خيرك انتي اليوم وجهك مش عاجبني..
غرفه بضيق:من الجو مرمدني الحمو والله بكري لين النفس هرب عليا.
عبد الرؤوف:الجو توا ولى باهي نوعا ما بري
وتي روحك نرفعك للبحر..
غرفه بضيق:والله حتى اني خاطري فيه نبي نتنفس...
عبد الرؤوف:تمام بري وتي روحك واني طالع نراجي فيك برا..
غرفه؛باهي شويه قولي شن بديروا لهالمصيبه اللي ينقاله الجالي..
عبد الرؤوف:تو نهدرزوا بري سقدي روحك..
غرفه؛حاضر..
مشت غرفه خشت داخل وهو طلع...
☘وفي دار المعيشه..
خشت مطيره وقالت:مش لازم منهم التلفزيونات نبوا ضي المولد للمكيف بس..
فردوس:ماعندنا مانديروا بيهم..
ع خشة غرفه وهي تقول..
/يابنات من لقيتوا مع عبد الرؤوف في المصحه؟
آلاء:التارقي واسكندر صاحبه شكلهم جو يروحوا بيه..
مطيره بشفقه:ياروحي مسكين لطف بيه ربي ..
طوبى بإستغراب:علاش شن صارله؟
آلاء:انصاب في اليوم نفسه متاع مشكله المدرسه..
مطيره؛قال حسين جي بيخش للمدرسه زايد ناقص وين شافوه جماعه هداكا المجرم ضربوا عليه..
فردوس بإمتنان:ربي يحفظه ونعم الجار...
طوبى بضيق؛وعلاش يدير هكي!؟
شبحولها بإستغراب...
آلاء:شن علاش يدير هكي يبي يساعد!
طوبى بحده؛في شن بيساعد عارف روحه بيقدر جماعة مسلحه!؟ولا غير يستعرض في بطولاته ويبي يركبنا جميل!
فاجئهم كلامها وردة فعلها غريبه عليهم ومبالغ فيها..
غرفه وهي مستغربه؛مش قصة يركبنا جميل بس تعرفيه طوبى قداش كان يعز بوي الله يرحمه وحني حاسبينه واحد من العيله..
طوبى؛لامش واحد من العيله يقعد براني مهما كانت قوة علاقته برجالة العيله..
قعدوا ساكتين وهما يشوفولها مش مستوعبين ردة فعلها اللي قعدت تبررلهم فيها..
طوبى:اللي ريناه من ناس نعرفوهم وعاشرناهم عمر لازم يعلمنا معاش ندخلوا بيناتنا غريب ماعرفناشي الا من شهور ونعطوه الثقه ونأمنوا فيه..
آلاء:معليشي خالتي بس صوابع ايديك مش زي بعض!
طوبى:لا زي بعض ياآلاء زي بعض..رفعت يدها وقالت يختلفوا في الطول بس..لكن في اشكالهم زي بعض..
مطيره:لابنتي معليشي مابتساوي عبد الرؤوف بالجالي!؟
طوبى نزلت يدها وقالت..
/اني نحكي ع اللي مانعرفوشي كويس ياعمتي رؤوف رينا منه اللي خلانا نعتبروه ولدنا مش نسيبنا؛في وقت الشده كان اول من مد يده واللي تربينا حني وياه في شارع واحد وخر وعطي بظهره وكأنه الامر مايعنيشي؛هني بان الفرق ياعمتي..وهدا عبد القيوم شن دارلنا وشن رينا منه لتوا؟ حتى لو دار شي شن درانا انه مايراجيش من وراه فمقابل!
اريج:وشن المقابل اللي يراجي فيه وقت اللي تلقى الرصاص ياخالتي!؟
ابتسمت طوبى تهكما وقالت..
/حتى الجالي دار زيه يوم من الايام يااريج..!
غرفه ومطيره قعدوا يشوفولها بحزن..
وفردوس وبناتها مرروا نظرات الحسرة بين بعض..
هي شدت روحها بقوة بش ماتبكيش شافت لشيشة المية..
خدتها وفتحتها وقعدت تشرب.
تنهدت غرفه وقالت..
/طالعه مع رؤوف..
ومشت طلعت من حداهم...
مطيره وهي تغير في الموضوع..
/الدار صقعت ولا؟
آلاء؛ايه..بالله ماما احدفي مخده نبي نرقد..
حدفت فردوس لبنتها مخده..
وطوبى ناضت وقالت؛المغرب قريب خل نمشي نتوضا..
ومشت طلعت من حداهم..
بعد ماطلعت..
رفعت مطيره ايديها وهي تدعي..
/ارزيك في الجالي يامغليه..
كلهم بصوت واحد قالوا وراها..
"آمين"
🍃🍃🍃🍃🍃
متكيه حدا المكيف تتفرج ع التلفزيون..
ع خشة راجلها عليها وهو يغني..
"يادنيا يادوارة طبعك دوم غدارة"
شافتله بعدين قالت..
/نوض نلبس عبايتي ترفعني للبحر..
ضحك وقال..
/لارايقه جديات انتي! شكلك ماعندكش علم..
قعمزت وهي خايفه وقالت..
/ان شاء الله خير! شن في!؟
محي الدين؛خوك الجالي كلي طريحه في المصحه من حسين الواعر..
خديجه بصدمه؛كيف!؟
محي:حكهالي جارنا الجفايري كان رافع عياله للمصحه اليوم شاف خوك عالق مع حسين وطايح فيه ضرب وكان مش حزهم الامن راهو قتله..
ناضت خديجه وهي معصبه ومشت طول لدار النوم..
ضحك محي الدين بشماته ضحكه خفيفه..
بعدين رجع يغني وهو يرقص.
"يادنيا نورتي"
🍃وفي دار النوم..
خديجه تتصل بخوها والخط ينادي وماردش الا في الاخير..
"ايوه"
خديجه؛شن اللي سمعته هدا حق ضاربك حسين؟
"يضرب امه..تي كان مش فكوه مني جماعة الامن راني درت رقبه"
خديجه:باهي خيره المتخلف هدا شن يبي!؟
"الكلب خش علينا الحجرة اللي كانت راقده فيها طوبى وين شافني تهجم وطلعني برا"
خديجه:كيف كيف..كيف كيف!!؟ انت كنت مع مرتك يصفته مني يطلعك من حداها!؟
"الوسخ هدا!؟ والله لولا حالة طوبى وخوفي عليها راني مادفنته في مكانه قدامها.."
خديجه سكتت وهي تفكر..
"امي عرفت؟"
خديجه:كان عرفت راني عرفت منها..المهم توا رد بالك تسكتله المتخلف هدا ع اللي داره فيك قدام الناس..
"من قالك بنسكتله!تي كان ماخليتاش وين يشوفني ينزل عيونه مانبداش اني الجالي ولد شنيبه"
🍃🍃🍃🍃🍃
الساعه 10:00ليلا..
ركبت اميمه فوق السطوح..
وين ماكان حسين مفرش وحاط قدامه تلفزيون ويتفرج عليه..
قعمزت جنبه وهي تقول..
/تمت المباراة؟
حسين؛قداش ليها..
تنهدت وقالت؛امتى بتمشي المطار غدوة!؟.
حسين؛الصبح بكري ان شاء الله جدي يوصل 11..
هزت اميمه راسها وقعدت ساكته وهي تشوف للتلفزيون..
حسين؛هاتي اللي عندك هاتي..
شافتله وقالت..
/شن صار بينك وبين حسناء اول امس.
تنهد بعدين قعمز كويس وقال..
/اسمعي اميمه من الاخير من الاخير خلاص معاش نبيها وبنمشي ننهيها مع اماليها..
وتجيهم امه وهي تمشي بعصبيه لين فجعاته وهي تقول.
/شن حسك قلت!؟بنتهيها مع مني!؟
قعمزت وهي نقول:والله والله ياحسين لو ديرها نغضب ليك لين نموت..
اميمه بخوف؛بعيد السو ماما..
حسين وهو منزعج؛ربي يهديك يام المواضيع هادي مايمشيش حالها بالغصب..
صفيه بعصبيه؛ومن ضربت ع يدك وقالك اخطبها مش انت اللي قلت اخطبوهالي !؟ وبعدين علاش توا تبي تسيبها علاش توا بالذات!؟.
هو بنرفزة؛يام اللي في بالك حوليه من دماغك مافيش منه..
صفيه؛عليا اني!؟ عليا اني ياحسين راني امك ونعرفك كويس..وبرجاء قعدت تقوله..بالله عليك ولدي ماتعاود عملة خوك شفت عشم بنت الفاندي شن دار فينا..ماتقصرش عمري سلم ولدي وتقتلني بحسرتي عليكم..
اميمه غيرت عيونها اللي كانوا مليانات دموع وحزن للتلفزيون..
حسين:تعوذي من الشيطان يام شن الدوة اللي تقولي فيها هادي والله مافي بالي حاجه من اللي تفكري فيها طوبى بنت عمي وزي اميمه عندي بالزبط..
صفيه بتهكم؛ايه صدقتك هدا علاش عطيت راجلها طريحه اليوم!؟
اميمه شافتلها وقالت؛حكيتلك ماما قتلك شن كان دايرلها..
صفيه بنرفزة:راجل ومرته شن دخله فيهم!
الزوز انصدموا وهما يشبحولها..
صفيه بعصبيه؛مادخلكش بيهم هي وياه شن مادارله ماتخشش بيناتهم لأن الحق كله بينحط عليك..هونا عندهم خوهم هو بس اللي ليه الحق يخش بيناتهم امتى انت اطلع من مواضيعهم مالكش علاقه بيهم..
حسين بصدمه؛تدوي من جدك يام!؟
صفيه بحده؛ومن جد جدي..سادنا ماعندنا من مشاكل مانبيش نجيبوا لرواحنا غيرها...
🍃وهي تقول الكلمه هادي من هني..
وتخش سيارات الشرطه وصوت صفاراتها قلب الشارع كله وطلع الناس من الرواشن ومن فوق السطوح ومن الحياش..
والناس اللي في القهوة والمطعم حتى هما يتفرجوا..
🍃في حوش الواعر..
ماصدقوا حصلوا بروده يرقدوا تحتها بعد ماتعبهم جو اليوم شديد الحرارة...
في اللي غفيت وفي اللي باديه تغفى وهما يسمعوا في غرفه تحكي عن طلعتها..
غرفه:في شوارع ظلام دامس وطول الطريق وحني نسمعوا في طرطير المولدات..
مطيره؛قالوا في هديكا الاغنيه في الصبح طوابير وفي الليل مواطير..
فردوس:والبلاد معبيه طراطير ساكتين ع هالوضع وراضيين بيه..
مطيره:الناس عيت يافردوس من الحروب والتشريد والموت معاش في حد عنده جهد خلاص..
فردوس:حسبنا الله ونعم الوكيل في اللي كان السبب..
طوبى وع وجهها ملامح الاستغراب:صوت سيارات شرطه ولا؟
قعدوا ساكتات وهما يسمعوا اصوات المولدات مشوشات ع باقي الاصوات..
مطيره بخوف:ايه والله صح وهني تقول فم باب الحوش..
ناضت طوبى قعمزت وهي مفجوعه..
غرفه قعمزت بشي من الصعوبه وهي تقول..
/ماتخافيش والله مايقدر يدير حاجه..
بلعت طوبى ريقها وقالت..
/حسبي الله ونعم الوكيل..
قعدوا مقعمزات وهما في حالة خوف..
وطوبى طول الوقت تردد
"حسبي الله ونعم الوكيل"
لين سمعوا صوت السيارات تباعد..
مطيره:مش لينا شكلهم اشبح لمن جايين..
غمضت طوبى عيونها وزفرت براحه..
فجأه..
انفتحوا عيونها ع وسعهم من الفجعه..
لما سمعت صوت تخبيط ع باب الحوش..
من قوته فيق الاء واريج من نومهم وهما مفجوعات..
فردوس:يالطيف ياربي هدا شني!
ناضت مطيره ومشت بتطلغ..
طوبى وهي تبع فيها بعيونها بخوف قالت .
/عمتي وين ماشيه؟!.
طلعت مطيره وسكرت الباب بالمفتاح..
ومشت طول لدار خوها...
مشت للصندوق دفاته شويه وطلعت من وراه الهراوة متاع سدره..
ومشت طلعت للباب ومازال صوت التخبيط مسموع..
خدت ملايه لبستها..
وجت للباب وفتحاته..
وتخش صفيه بغضبها كأنها كتلة نار محذوفه بمنجنيق وهي تقول..
/تريحتي توا تريحتي ياطوبى!
اميمه وهي تبكي:يام شن تقولي ربي يهديك!
مطيره وهي مصدومه:شن في!؟
صفيه بغضب ودموعها تنزل..
/الشرطه جت رفعت حسين من تحت راسها..
سمعوا صوت تخبيط ع باب الدار..
مشت مطيره اللي مازال مصدومه للباب وفتحاته..
طلعت طوبى وهي تقول بصدمه ودموعها زي السيل..
/رفعوا حسين!؟
طلعوا وراها غرفه وفردوس وبناتها اللي كان صادمهم الخبر حتى هما بس رد فعل صفيه صدمهم اكثر..
قدمت لطوبى وهي تقول بغضب..
/ايه رفعوه من جرايرك وجراير مشاكلك وايامك السود سنين عمره ضيعهم عليك ونهار جيتي بتتزوجي فضلتي البراني عليه..ولما جي بيستقر ويشوف حياته طلعتيله بهمك مرة تانيه واهو قاعد يعاني فيه..لأمتى هالحال لأمتى لأمتى بتقعدي زي الغمة السودا في حياته لأمتى.!
الصدمه اخرست لسان طوبى..وخلتها بشعور بشع قاعد ينخر في قلبها ويقطع في نياطه..
عمتها وفردوس وبناتها وحتى اميمه انعقدت لساناتهم قدام الكلام اللي سمعوه من صفيه..
ماكانش كلام..كان سهوم مسمومه متوجه لقلب طوبى..
لكن غرفه اللي كانت تشوف لوجه اختها وصفيه تتكلم..
قدمت وقفت جنبها وبصوت غاضب قعدت تقول..
/بري قولي الكلام هدا لولدك مش اختي..ولدك هو اللي يجري في جرتها هو اللي مضيع بإرداته عمره عليها ع قولتك هو اللي قعد يجري ورا وهم عمره كله..اولى بيك شديتي ولدك وعقلتيه مش تجي تفشي غلك في هالمسكينه لأنك مش قادره عليه..ماطلع قلبك اسود يامرت عمي مافيش فرق بينك وبين مغليه في شي..
اميمه:غرفه مش لهالدرجه!؟
غرفه:هدا وين تكلمتي هادي اللي وجعاتك! ماوجعكش كلام امك اللي كله سم تسمعي وانتي ساكته شكله راضيك وعاجبك!؟
اميمه:غرفه ماتخلنيش نغلط فيك!
قدمت غرفه وهي تقول بغضب..
/لاتغلطي فيا ولانغلط فيك خودي امك وروحي لحوشكم وكفوا بلاكم علينا لأنها والله ماناقصتكم حتى انتم سادنا اللي فينا..سادها ماجاها هالمنكوبه اللي تعانوا في الزمان عليها...
شدت اميمه يدها امها وهي تقول بعصبيه..
/هيا يام..
صفيه قعدت تشوف لغرفه بغل من فوق لتحت ومشت طلعت مع بنتها وهي تبكي وتتحسب..
التفتت غرفه وشافت لطوبى لقتها قاعده مصدومه..
فردوس بصدمه:اني مش مستوعبه اللي سمعته توا!؟
مطيره بتهكم؛لااستوعبي ياحنه ع قولت طوبى توقعي من كل حد كل شي..
اريج:عليك حقد ياربي شن هدا!؟
الاء:ولا اميمه كيف سكتت لأمها وماقالتش كلمه ولما خالتي غرفه تكلمت نطت فيها!؟
خرجت طوبى عن صمتها وقالت..
/هداكا الحقير شكي في حسين..
قعدوا يشوفولها..
شافت لغرفه وقالت..
/اكيد رؤوف عارف شن صار!
حطت غرفه يدها اسفل بطنها لما حست بمغص وقالت..
/ايه صح..
فجأة رن تليفون غرفه..
غرفه وهي تحاول تخفي الالم؛في الشحن في الكوجينه يابنات جيبوه..
مشت آلاء بسرعه بش تجيبه..
زاد المغص ع غرفه وبدي يبان ع وجهها..
طوبى لاحظتها وقالت..
/خيرك غرفه!؟
غرفه بعصبيه ووجع:مرت عمك التافهه طيرتهالي..
طوبى بقلق:شن تحسي..
غرفه:مغص عادي مافي شي..
ع جية آلاء بالتليفون قالت..
/رؤوف..
خداته غرفه وفتحت الخط وردت..
/ايوه رؤوف شن صار؟!
~~~~~~~~~
اميمه بغضب:غلط كلامك غلط يام شن ذنبها طوبى شن علاقتها وبعدين حكيتلك بكري شن صار فيها معقوله فوق ماانها راعشه تزيدي ترعشيها وهي حامل يام!
صفيه وهي تبكي كانت ردت بغضب..
/واني خيرني مش ام وراعشه ع ولدها!!؟ خوك تعرفي شن كان زمان مش ناسيه ولا!!؟شفتي من هما اللي جو طلعوه من هني ولا تندري عليهم شن يديروا فيه!؟
"مايديروله شي"
شبحوله وهو جاي يمشي بالقيلا ويقول..
/مايديرولا شي اتصلت بواحد من صحاب الحاج ولده يخدم معاهم تو يدبرله ويطلعه..
شافتله صفيه بهزوة بعدين مشت طلعت للجنان وقعمزت فيه وقعدت تبكي..
اميمه شافت لبوها بحزن..
وهو قال..
/تبيه يسيب بنات خوي للبرانيه يخدمهم النسيب والخال وعمهم وصغار عمهم حداهم!
ولت خشتله وهي تقول بسخريه..
/ياعمهم انت ياصاحب الواجب..طيح سعدك مايحسابوكش حتى خالق..
اميمه بصدمه:يام!
عبد المطلب:هادوا صغار لطفي اللي عمره ماخلاني اللي كسر كلمة بوي ع خاطري يوم من الايام...مانيش مخليهم ع قد جهدي بنوقف معاهم كيف ماكان دايرلي بوهم..
عجبك باهي..ماعجبكش توكلي..
ولف ومشي لداره..
صفيه وهي تبكي:الحق مش فيك الحق فيا اني الكلبه اللي قعدت معاك بعد اللي درته فيا..
وولت طلعت للجنان..
اميمه بألم ويأس..
/ لاحول ولاقوة إلا بالله...
🍃🍃🍃🍃🍃
"قال شكي فيه هداكا المعفن وقال متجهم عليا واني مع مرتي ومانعني نجيها ونشوفها.."
طوبى بتهكم؛مش بعيد يديره خاطفني بكل!..
مطيره؛شيطان هدا شيطان..
فردوس:باهي شن بصير في حسين توا!؟
غرفه بضيق:قال بيبات غادي الليله ع قد مادار معاهم ماقدرش يتفاهم معاهم اصلا الجماعه عادي هما اللي شدوا رؤوف قبل مش صافيين ناحيته..
فردوس:باهي شوفوا خالي محجوب..
طوبى بضيق:خالي محجوب حسيته زي اللي بدي يخاف..
مطيره؛والله حتى اني حسيتها وخفت نقولها الحق..
طوبى بضيق شديد؛كان حارت وبارت اني او نكلم هداكا بروحي..
اريج؛وكان ساومك نطلعه وفي المقابل تولي!؟
سكتت طوبى وهي تفكر بخوف في كلام اريج وتتفكر شن دار فيها الجالي اليوم..وقعدت تتخيل لو صار ورجعتله شن ممكن يدير فيها!؟
بس حسين كيف بيصير فيه!؟ معقوله تخليه يتبهدل بسببها!؟
قطع عليها تفكير صوت غرفه وهي تقول..
غرفه بوجع؛اااه..زادت الليه..ااه..
جبدت مطيره كرسي وقالت..
/قعمزي..
وهما يشوفولها بقلق..
قعمزت وهي تقول بألم..
/من وحني في البحر حسيت بشي..
مطيره:لكن مازال بكري يابنت كيف خاشه اسبوع التاني في شهرك..
ناضت وهي تقول بألم.
/اااه..ووك عليا شن هدا!!..
مطيره شدتها وهي تقول
/ماتخافيش..ماتخافيش لية عادي وتمشي..
طوبى وهي تشوف لحالتها حست بالخوف ومع هدا شدتها من يدها وقعدت طمن فيها وهي تقول .
خودي نفس وطلعيه حبيبتي.....ايوه حبيبتي..غير تشنجتي شويه من العصبيه بس..
غرفه بوجع شديد غمضت عيونها وقالت بصوت عالي..
/وووك علياا!..
فردوس بذعر؛اتصلوا براجلها بسرعه...
☘واتصلوا بعبد الرؤوف اللي جي بسرعه رفعها ومعاها اختها فردوس..والباقي قعدوا يستنوا ع نار في اخبار طمنهم عليها وسط قلقهم ع وضع حسين..بالذات طوبى اللي حست روحها حتنحط بين نارين...
#تحالف
#طوبى
...يتبع....
