# طوبى "شارع القهوة"
#جمان_فريد
#الجزء_الثاني_والعشرين"استغلال فرص"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
بعد يومين..
جامعة الفاتح..
كلية الطب
كانوا طلبة سنة اولى اعداد يستعدوا للإمتحانات...
واللي دايرين مجموعات ويقروا مع بعض...
واللي مسجلين في كورسات لبعض المواد..
واللي يدوروا في طالب او طالبه متوفقين ويبوا يقروا معاهم...
اميمه كانت كعادتها في مكانها اللي تحب تقعمز فيه
ماكرهتاش ولاتغيرت عليه..
بل قعدت محافظه على معزته في قلبها
تقرا..
وعيون اسامه عليها
اسامه كان مايحبش يجيها ويكلمها هلبه..
بش مايبانش ثقيل دم..او متطفل وتنفر منه...
لهدا كان يكتفي احيانا بمراقبتها بدون ماتشوفه...
وهو يراقب فيها شاف شي استغربله..
حد جاي ناحيتها ويبي يكلمها..وخاف منه يجرحها او يضرها بالكلام..
"السلام عليكم "
قامت اميمه عيونهاوشبحت لمصدر الصوت بعدين ابتسمت بعقدة حواجب وقالت؛وعليكم السلام..
داليا تنهدت ومررت نظرها ع المكان بعدين شبحتلها وقالت:اول شي..اني اسفه ع اللي صار قبل..
اميمه بإبتسامه؛مافيش داعي تتأسفي ...اني وياك حالنا من بعضه ضحايا...
ابتسمت داليا بأسف وقالت؛صدقتي..يعني انتي توا صافيه من ناحيتي..
هزت اميمه راسها وهي مبتسمه..
ضحكت داليا وقالت؛باهي توا نجوا للمهم نعرف انك شاطرة في الكيميات وقالولي انك تشرحي كويس خير من الدكاترة..
نبيك تقريني..
اميمه بضحكه؛مصلحجية انتي؟
داليا ضحكت وقالت؛هيك شي..
ضحكت اميمه بعدين قالت؛باهي امتى نبدوا؟
داليا بإبتسامه:من اليوم..
اميمه بإبتسامه؛باهي تعالي قعمزي..
قعمزت داليا وحطت شنطتها جنبها..
اميمه:خلينا نبدوا بالبايو شن مش فاهمه فيه؟
وبدوا الزوز يقروا مع بعض.
واسامه يشبحلهم وهو متعجب ويضحك..
🌻فهالوقت..
جي عمر للكليه..
وكان جاي طيران من كليته لكلية الطب..
وين خش مشي طول لمكان اميمه..
وين وصل فيه لقاها مقعمزة مع داليا..انصدم..
حط ايديه في نصه وقال متعجبا..
عمر:تو هادي لشن تبي توصل بالجو اللي دير فيه!؟
بعدين مشي قعمز في مكان بعيد عليهم وقعد يراقب حتى هو..
واسامه يشبحله بإزدراء..
☘☘☘☘☘
"نبي نفتح الموضوع مع صفيه قبل تريح منا البنت كل يومين جاينها خطابه واكيد بوها مش حيقعد مسايرها هلبه"
خديجه؛راجي يومين تانيات ونمشولهم.
تنهدت مغليه وقالت:باهي..
سكتوا شويه بعدين خديجه قالت:علاقة نجاة بلطفية ولت سمن ع عسل..
مغليه:ايه نعرف ونجاة مشتلها واستسمحت منها وكبت ع راسها حكالي طاهر..قداش عجبتني الحركة متاعها بنت اصل حق تبي تكسب عزوزتها وطاهر مش زي اللي عندي يالاش اني قلتلها كلام ماجاش ع مزاجها قعدت طنفر عليا وترفع في خشمها
رفعت خديجه حواجبها وحطت فنجان قهوتها ع الطاوله اللي
حداها وقالت:نعم نعم!؟
مغليه:من هداكا الموقف اللي حكيتهولك
خديجه؛وخيرك ماقلتيش لولدك راهو قرصها من وذنها بنت جويده..
مغليه حركت يدها للخلف وقالت:فكيني من المشاكل
خديجه:لامعليشي يام هكي غلط اكبر غلط...
وناضت من حداها ومشت طلعت من الصاله وهي تقول:لازم تعرف حدودها بنت جويده..
مغليه:ماتربيها الا خديجه..خلها...
وخديجه وصلت للدروج..
وركبت تجري..لين وصلت في شقة خوها..ودقت الباب بقوة...
شويه وانفتح الباب..واللي فتحاته عائشه..
خشت خديجه ومشت طول للصاله..
عائشه رفعت حواجبها..بعدين التفتت للباب وسكراته..
"تعالي ياعيشه"
عائشه كانت تضبط في نفسها بقوة..وتحاول تحافظ ع هدوئها ع قد ماتقدر..
مشتلها وخشت عليها الصاله.
وقعمزت قدامها وحطت رجل ع رجل..
خديجه وهي تشوف في حركتها رفعت حاجبها وقالت؛متغيره هلبه عويشة خانم..موليه متمردة ومعاش تحترمي في حد حتى عزوزتك..
عائشه:علاش شن درتلها امتى غلطت فيها!.
خديجه:ع النقاش اللي صار بينك وبينها شكله حضرتك ماتحملتيش عزوزتك تكشخ عليك...!؟ راهو هادي زي امك تكشخ وتعارك وتوري الصح من الغلط..
عائشة:تمام..وهي ورتني الصح من الغلط وورتني حدودي وقالتلي انتي مجرد كنه ماتعطيش نفسك اكبر من حجمك..
خديجه:ماشاء الله حافظه الكلام حفظ
عائشه:طبعا..اوامر عمتي هادم..
قعدت تشبحلها خديجه هلبه وهي ساكته..
وعائشه تشوفلها ببرود
بعدين ناضت خديجه وهي تقول:ردي بالك من تصرفاتك ياعيشه حترفعك للهاويه..وهاني نبهتك..
ولفت ومشت طلعت من الشقه..
سمعت عائشه تسكير الباب قالت:وحده مريضه..
وناضت ومشت للكوجينه بطيب الغدي..
☘☘☘☘☘☘
"تمام هكي"
داليا؛تمام بكل بكل..صدقوا في اللي قالوه عليك..
ابتسمت اميمه وقالت:خلاص غدوة ان شاء الله يكون عندنا وقت اوسع ونكملوا الباقي .
داليا:تمام..بس نبي منك رقمك والارضي متاعكم بش كان في حاجه مافهمتهاش نكلمك تشرحيلي.
اميمه:ارضي ماعندناش..بس حنعطيك ارضي حوش عمي ونعطيك وقت محدد تكلميني فيه..
داليا:تمام..وطلعت تليفونها وقالت..هي عطيني..
وعطت اميمه ارقامها لداليا..وهي خدت ارقامها..
بعدين داليا ناضت ومشت لصاحباتها..
:شن لم الشامي ع المغربي دلو..
داليا:تقري فيا شاطرة هلبه البنت قلت خل نستفيد منها..بس جديات يابنات عمر هدا حقير حقراء..يقولي فيها طقه ومش عارفه شنو..والبنت عقلها يوزن بلاد..
:واضح كذاب من الجري اللي يجري فيه في جرتها..
وشبحوا وين هو مقعمز..
التفتت داليا شبحتله ابتسمت تهكما وقالت:مسكين...
:انتم ركزوا ع اسامه نحس فيه طاح فيها..
:قولي طايح وفات...
قعدوا يشبحوا لأميمه وهي ماشيه..
واسامه جاها ووقفها...
🌻اميمه بإبتسامه:اهلا اسامه وينك اليوم مختفي..
فر قلب اسامه من الفرحه لأنها فقداته بس دار روحه عادي لما قال:قاعد والله غير نقرا...
اميمه:ايه الامتحانات خلاص الاسبوع الجاي متوترة من توا..
اسامه:اللي زيك مايتوترش..
اميمه بإبتسامه قلق؛لا والله اني اكثر من يتوتر في الدنيا هادي..ومش تقول جو سوس والله حق..
ضحك اسامه..
وعمر خلاص معاش تحمل..
ناض ومشي جيهتهم...
وصل فيهم وقال؛معليشي ياابله انتي نبيك في كلمتين..
اسامه شبحله وهو رافع حاجه..
اميمه اللي كانت مقهورة من قلبها اللي لازم يرجف وين يشوفه اويسمع صوته..تمالكت نفسها وتصنعت التجاهل بإتقان وابتسمت وهي تقول:سلام اسامه توا مروحه..
اسامه شبحلها وابتسم وقال:في امان الله..
ومشت من حداهم..
عمر وهو يشبح لأسامه رفع سبابته وحركها في وجهه تهديدا.
بعدين مشي لحق اميمه..
هي كانت تمشي بقوة وثقه وكانت تتعارك مع قلبها في عركة تبي تغلبه فيها..
"اميمه"
غمضت عيونها بشده بعدين فتحتهم
عمر:اميمه..ملاحظه ان ليا فوق الشهرين نجري وراك وذليت روحي ليك هلبه..
اميمه مابتش تعبره ومكمله طريقها عادي..
وعمر عصب وبدي يهتري:شن تحسابي روحك قوليلي من تحسابي روحك وليتي..قسما بالله من غدوة نجيب اللي احلى منك وخير منك مية مرة ونقعد نمشي بيها ونجي قدام عيونك..
اميمه في نفسها"ايه زيد زيد..خليني نكرهك زيد"
هو سرع خطواته وجي قدامها وقفها..
رفعت عيونها فيه وقعدت تشبحله بحده..
ليه وقت ماشافهاش عن قرب..
محلوة بزياده..وفيها شي متغير رغم انها مش حاطه اي شي ليه علاقه بالمكياج ع وجهها..
وهو جمرة وطاحت في ميه..
عمر :اميمه خيرك ماتبيش تعطيني فرصه نوضحلك..
اميمه قعدت تشبحله وخلاص..
عمر:اميمه...اقسم بالله..
"نحبك"
اميمه:كذاب..
عمر:والله العظيم والله يااميمه نحبك..ومش حب عادي راهو..حب المجانين هداكا تعرفيه..اللي يخليني توا نمشي للفرخ اللي اسمه اسامه نجبده من رقبته ونحطه تحت سيارته ونمشي عليه ونجي..
اميمه ابتسمت تهكما وقالت:دير مكبر..
ومشت فاتت من جنبه .
هو غمض عيونه بإحباط وحط يده ع نص وجهه..
بعدين نزلها وفتح عيونه ولف ولحقها..
قرب منها وقال..
عمر:نبي نخطبك..
ضحكت اميمه ضحكه ساخره طلع منها صوت حلو..
عمر بضحكه:تهبل اقسم بالله ترا عاوديها
اميمه زادت سرعت خطواتها
عمر:وراك وراك ان شاء الله نديروا سباق مية متر..ضحك وقال..ع الجري اللي جريته فجرتك وتجري فيه انتي مني مفروض نسجلوا في الأولمبياد العام هدا..ونمشوا وحني متزوجين لان ماليك مستحيل يطلقوك تسافري بروحك...
اميمه كانت تسرع في خطواتها اكثر وهي تسمع في كلامه..
برغم ان قلبها متأثر بيه هلبه..لكن مش قادرة تصدقه تاني ولاتحط فيه الثقه
في بالها ان عمر شخص اناني همه نفسه ورغباتها بس..
هو توا قاعد يجري وراها مش لأنه يحبها
بل لأنه مازال خاطره يكمل لعبه عليها...
ضحك بعدين قال:تعرفي اميمه...والله ماكنت متوقع يجي ونحب بجديات..ومني انتي!!؟
هي وقفت وهو وقف..
التفتت شبحتله وهي رافعه حواجبها...
عمر بإبتسامه ماكرة:هاه شفتي كيف خليتك توقفي..وتوا بتسمعيني غصب عنك..
"كذاب"
هو خفتت ابتسامه..
اميمه بحده:مهما قلت ومهما حلفت مش حنصدقك ونطيح في حفرتك مرة تانيه...
ولفت ومشت وخلاته وهي ماشيه بإتجاه سيارة خوها يوسف.
ركبت السيارة وقالت:السلام عليكم..
يوسف؛وعليكم السلام..بتبدي بدروس السواقه بعد امتحاناتك..
ابتسمت اميمه بفرح وقالت:والله!..
يوسف بضحكه:والله...سجلتك زي ماتبي وان شاء الله نديرولك سيارة زي سدرة بنت عمك وتقعدي حتى انتي تفني بيها..
ضحكت اميمه بفرح..
ويوسف تحرك بالسيارة...
وعمر كان مقعمز في سيارته وهو يفكر في كلامها..
بعدين شد الدومان بقوة وقال؛تو تشوفي كيف نخليك تصدقي..
وشغل السيارة وتحرك..
☘مش حتصدق ياعمر مهما كنت صادق مش حتصدقك..
وكله من عمايل يدك ياعمر..
انت اللي خليتها تشوفك كذاب..
انت اللي زرعت فيها انعدام الثقه ناحيتك..
انت اللي خليتها تشوفك أسوأ انسان ع وجه الارض..
بعد هدا كله مازال طامع انها تصدقك مرة تانيه!؟
اميمه طيبه مش هبله ياعمر...
وهذا اللي انت وبنت عمك ماكنتوش عارفينه لما خططتوا تلعبوا بمشاعرها...
☘اللعب بالمشاعر..
او استغلال المشاعر..
اي نوع من انواع المشاعر..
مشاعر الحاجه..مشاعر الفقد...مشاعر الحرمان..
زي ان بنت عمرها عدا الثلاتين...
نديداتها كلهم متزوجات وبصغارهم مش نديداتها بس حتى الاصغر منها..
تحضر في اعراسهم ولمات صغارهم..
وتغار من هادي ومن هديكا...وتتمنى تكون مكانهم وتقول..
"اه ياربي امتى يجيني يوم ونفرح زيهم"
وتشوف روحها كل ماتكبر سنه وتعدي عليها من غير مايصير شي معاها..ان خلاص فرصها قلت..وتبدا تفقد الامل..
وممكن تبدا تتعايش مع وضعها ومعاش تهتم زي قبل..
بس لما يجي حدويحرك هالمشاعر حتلقى نفسها طول مندفعه اتجاهه من غير تفكير..بش تلحق القطار قبل مايفوتها...
☘قدام وحده من المستشفيات العامه..
كان في زوز شباب مقعمزين مع بعض
يحكوا بتذمر عن وضع البلاد..
:تي والله بلاد زي هادي ماينعاش فيها ولافيها مستقبل..ولافيها من يقدر يحقق طموحه ولايقدر يوصل لشي..تي ياراجل شباب بلاد تعوم ع بحيرة بترول اقصى طموحهم يحصلوا شقة يتزوجوا فيها.
:وكان تبي تبني ولادير لروحك حل خش الحرام وخود قرض ربوي...
:وكان ماعندكش خدمه فهالدوله المقربعه من بيكفلك!؟
تنهد وقال؛اقسم بالله شي يخليك تهاجر في فرقاطه..
:حسبنا الله ونعم الوكيل..الواحد عمره يجري وماعنداش بلوكه يقعمز.عليها..
:ملفاتنا ليهم سنين ملوحات هني وغادي وماحصلنا شي..
:ياصاحبي البلاد هادي مش لينا للصحاح للكابوات اللي فوق اما حني عايشين ع الهامش...سعي في زريبه..
:صدقت..ضحك وقال..لكن ماتعرفش مرات العيد يبشبشوا علينا حتى هما 40 يابابا
:كان ريت حاجه تعالى ادفل ع وجهي عرمه دفال..
ع جية وحده وقفت عليهم وقالت؛واخيرا حصلنا سرير ورقدناها بارك الله فيها الممرضه..والتفتت شافت عواطف واقفه من بعيد اشرتلها تجي..
قربت منهم عواطف وقالت:السلام عليكم...
الزوز ردوا عليها؛وعليكم السلام...
البنت؛هدا خوي عبد الحفيظ..وهدا ولد خالتي مراد..شبحتلهم وقالت...الممرضه عواطف...
عواطف؛تمام اطمنوا..الحاجه في عيونا كونوا هانيين..
مراد بإستغراب؛-هكي لله في لله!؟
عواطف عقدت حواجبها وقالت؛شن قصدك مافهمتش!؟
مراد؛يعني الخدمه هادي من غير مقابل..
عصبت عواطف وقالت:ايه من غير مقابل وجعتني البنيه وساعدتها لكن الايام هادي الواحد مفروض مايدير خير في حد
ولفت ومشت خشت للمستشفى
بنت خالته؛علاش هكي يامراد!
ولفت ومشت تجري لحقتها..
:علاش يامراد ياراجل ماصدقنا حني!
مراد؛قلت اكيد تبي فلوس مافي خدمه في البلاد هادي تمشي بلاش..
:كان خليت خربت اكيد في ناس باهيه مازال ان شاء الله توا ماتغيرش رايها بس..
سكت مراد ومعاش تكلم وهو مضايق لأنه تسرع...ولخبط وضع صغار خالته وامهم..
شويه وطلعت البنت تجري وقالت:هي نوض انت وياه روحوا بيا بش نجيب حوايج ليا ولأمي..
:ماصارتش مشاكل؟
:لالا البنيه طيبه وقلبها رهيف..
مراد بتعجب:بنيه!
:ايه بنيه مش متزوجه مسكينه لكن كلهم يحكوا عليها ممرضة خبرة وليها سنين وتخدم في عياده لدكتور كبير هو طلبها بالإسم..
ومراد يسمع..وعقله اتوماتكيا قعد يفكر في هلبه حاجات...
البنت؛تي هيا نوضوا..
خوها؛هيا مراد..
مراد ناض وقال؛هيا...
☘واحيانا يكون ماهو اسوأ من الاستغلال...
الانتهازيه...
انسان ينتهز في اي فرصه شن ماكانت هالفرصه بش يوصل لمآربه..ويرضي غروره...
☘"هيا هي هاني جايه"
انفتح باب شقة فايزة واللي فتحاته سدرة..
سدرة وهي متفاجئة:الجالي!
ابتسم الجالي وقال:عارفك هني هدا ليش جيت..شن الاخبار..
سدرة نزلت عيونها لوطا وشبحت للحاجات اللي ع الارض..
شكاير خضرة ع فواكه..ع بضاعه..
زيت وطماطم ومكرونه ورز وكسكسي..
وفخده خروف...
وشكارة فيها شكولاته وشيبش وشكارة فيها جيلاطي..
سدرة؛هدا شني!!؟
ضحك الجالي وقال:حاجه بسيطه جايبها ومتحشم فيها..
شبحتله سدرة وابتسمت وهي تقول:-هدا كله ومتحشم بيه..
الجالي:والله الواحد مهما يدير مايقدر يعوضهم عن اللي راح..اهو يحاول وخلاص..والله اول امس شفت البنات قلبي وجعني عليهم..شن يعوضهم هادم عن بوهم اللي فقدوه بكري.
سدرة بحزن:صدقت...
الجالي:اهو الواحد يحاول يدير اللي يقدر عليه..
سدرة ابتسمت بحزن وقالت:بارك الله فيك يالجالي..
الجالي ابتسم وقال:ماعنديش فيه جميل..وبالله كان فيها كيف طلعيلي البنات نشوفهم شويه..
سدرة بإبتسامه؛باهي..
وبدت سدرة دخل في الحاجات..
الجالي بضحكه:سامحينا ياسدرة..
سدرة؛ولايهمك..
هو نزل كم درجه واتكى ع الحيط وفتح تليفونه..
وخش ع برنامج جديد كيف باديين الليبين يتعرفوا عليه..
والجالي ممكن من أوائل اللي خشوا عليه في ليبيا..
الفيس بوك..
وسدرة داخل تحط في الحاجات في الكوجينه..
خشت عليها فايزة اللي كانت لابسه قفطان حوش لونه بني صادا..ولامه شعرها فوق بفوضويه.
وملامح وجهها كانت تعبانه هلبه..
شافت الحاجات قالت:من جابهم هادم؟
سدرة:الجالي شنيبه..
فايزة:علاش هدا كله علاش!؟
سدرة:الجالي من يومه هكي..اللي في يده مش ليه يود القريب والغريب..سبحان الله عيت شنيبه كان فيهم حد هالولد..
ابتسمت فايزة بحزن وقالت:حتى احمد الله يرحمه كان يشكر فيه هلبه ويحبه..
سدرة؛اللي زي الجالي يخشوا الخاطر..في طيابته وكرمه وحبه للصغار يخطر عليا في طوبى حتى هي هكي..ايه حقه قال يبي يشوف البنات عادي..
فايزة؛تاله راقدة حدا امي طلعيله صفاء ومروة..
سدرة:باهي
وطلعت من حداها سدرة ونادت ع مروة وصفاء وطلعتهم للجالي..
سدرة؛جالي.
التفت وشبح للبنات وقال؛اهلا..
ركبلهم وحط ايديه ع روسهم ومسح عليها وقال:شن جو ياحلوات.
الزوز قالوا:الحمد لله..
وقعد يهدرز عليهم ويبصر معاهم وسدرة تشوف للبنات كيف يضحكوا وهي مبتسمه..
وفي الاخير عطي لكل وحده منهم خمسه..
سدرة:جالي هلبه هكي راهو.
الجالي:خشي انتي وياهم خشي.
ضحكت سدرة وهي تحرك في راسها يمين ويسار.
الجالي بإبتسامه:هي ماتبوا شي..
سدرة؛كفيت ووفيت..
الجالي؛حني جيران ياسدرة ماعنديش فيه جميل
سدرة:ربي يحفظك
الجالي؛ويحفظكم..هي السلام عليكم
سدرة:وعليكم السلام..
وخشت سدرة بالبنات للشقه..
والجالي نزل من الشقه وهو حاس بشعور نشوة عجيب بعد اللي داره..طلع من العمارة وهو يتخيل في كلمات الشكر اللي حتنقال عنه..
ابتسم بروحه بروحه..
ووصل لسيارته فتحها وركب..
وشغلها وتحرك طول..
🌻🌻🌻🌻🌻🌻
واقفه قدام باب داره تبي تخش..
ورجل تقدم ورجل توخر..
مغليه:يارب يرضى بيها يارب..
دقت الباب..
"خشي يام"
فتحت مغليه الباب وخشت وهي تقول بضحكه؛كيف تزبط فيا مش عارفه..
عمر بإبتسامه؛طقتك مميزة..
جبدت كرسي وقعمزت وهي تقول:اها..
عمر؛شكله عندك موضوع طويل..
مغليه :وقنين..
حط اللاب توب ع تركينه وقال:ان شاء الله خير..
مغليه:خير خير..بلعت ريقها وقالت...شوف ولدي الزواج سنة الحياة..وانت اخرتك بتتزوج توا ولابعدين..واني الحق مستعجله عليك لأني نبيلك بنيه الله يبارك عليها خطفت قلبي خطف ونبيها كنتي بأي طريقه..
عمر:عجب يام..تو ع خاطر عجباتك وحده وتبيها تولي كنتك بأي طريقه دبسيني فيها!؟
مغليه؛ريتها والله تدبيسة كل حبيب..البنيه الخطاب عليها بالعشرات..كل يومين جايهم واحد..
عمر:ان شاء الله كل ساعتين..حولي الموضوع من راسك يام وفوتيني ترا..
مغليه:والله لو خديتهالك تقعد تدعيلي ليل نهار ياريتك شايفها زي مااني شايفتها..ريت الاميرة ديانا..هادي زيها تقول اميرة..وفي جمالها ملكه..
عمر؛وفي الاخير تطلع تشبح عواصف..
ضحكت امه وقال؛تفي عليك..شن جاب لجاب..
عمر:من الاخير يام اني نبي وحده تانيه وقبل بندويلك عليها..
مغليه:فكني من الخملج ترا..والله مافي وحده من فرخات هالوقت زي البنيه اللي في بالي..
عمر:تي غير من هي هادي اللي فلقتيلي راسي بيها.
مغليه:هو انت تعرفها باهي بس راهو مش زي ماانت تشوف فيها اني شايفتها عن قرب وزين وعارفتها كويس.
زين وفلاحه..واهم شي قمة في الادب والاخلاق..
عمر بملل:اختصري يام..
بلعت مغليه ريقها وقالت..
"أميمه الواعر"
وبدي هداكا القلب يدق بقوة وكأنه مدفع..
والعيون انفتحوا ع وسعهم.....
والانفاس تسارعت..
عمر:اميمه نفسها بنت جيرانا!؟
مغليه:ايه..
ناض وجي لأمه وباس ع راسهاوقال:ربي يحفظك ياغاليه ويطول في عمرك ومايحرمني منك يام..
مغليه معاش فهمت شي:انت توا شن بالزبط موافق ولالا ولاشنو؟
عمر بضحكه:يام اميمه نفسها البنت اللي نبيها..
مغليه بفرحه:الله!! لولا العيب راني طلقتها زغروطه..
عمر ضحك ورجع باس راسها وقال:توا يجي وقتها وتزغرطي لين رقبتك توجعك..
هي بضحكه قالت:يارب..خلاص بعد يومين نمشولهم اني واختك خديجه..
عمر؛علاش مش العشيه خير البر عاجله يام.
ضرباته ع ذراعه وقالت:تحشم..وارزن..
عمر رفع حاجه اليسار وهو يشوفلها بآحراج..
وهي بعدين ضحكت وقالت؛واخيرا ربي بيعوضني خير وبندير كنه مقومه..
ومشت طلعت من حداه..
هو بإستغراب:شكلها عيشه مغضوب عليها..!
نزلت مغليه من فوق..
وين جت بتمشي لدار المعيشه ناداها نضال..
نضال:يام.
مغليه التفتت وقالت؛شنو..
نضال:جاينك مجلس الختايرة..
مغليه:منو منهم..
نضال:نجمه وفتحيه وفطيمه...
مغليه:ان شاء الله خير..ومشت طلعتهم.
ونضال يتبع فيها بعيونه.
ع نزلة عمر من فوق..
نضال:ولي اركب.
عمر:شن في!؟
نضال:الختايرة جايين لأمي.
عمر بإنزعاج:مش وقتهم بكل..
ولف وركب ونضال ركب وراه..
🍀🍀🍀🍀🍀🍀
بعد يومين..
الساعه 5:30عصرا..
خشت سيارة سدرة لشارع القهوة وهي مروحه من حوش فايزة ..
في نفس الوقت اللي كان فيه المهدي واقف قدام المطحن يهدرز هو وواحد يعرفه..
شاف امه واخته خديجه متوجهين لحوش عبد المطلب الواعر..
استغرب وفي عز استغرابه كح كحه قويه..
مغليه:ووك عليا ياكبدي كحته نحسها في وسط قلبي..
خديجه:واخد برده من المكيف..
مغليه؛يزريه فيهم وهو مغلى عليه المكيفات كان يلقى يولعهم حتى في الشتي..
وصلوا في باب الحوش..ودقت خديجه الباب.
درست فهاللحظه سدرة قدام حوشهم..
حس بيها المهدي لكن ماباش يشبح جيهتها..
هي نزلت من السيارة وتشوف في مغليه وخديجه خاشات حوش عمها استغربت..
ومشت فتحت باب الحوش..
بعدين ولت ركبت سيارتها ودخلتها..
بعدها نزلت منها وولت تسكر في الباب..
وهي تسكر فيه من برا..
كح المهدي مرة تانيه..
هي طول التفتت..
وهو شبحلها ..
وعيونهم جت في بعض...
فيسع غيرت عيونها عنه وهربت وخشت للحوش وسكرت الباب وهي تقول:استغفر الله..استغفر الله..استغفر الله..ياربي سامحني يارب..من دون ارادتي يارب..استغفر الله..اعوذ بالله منك ياشيطان..
ع جبة طوبى اللي كانت تقرا في الجنان..
طوبى"خيرك سدرة شفتي كلاب!؟"
سدرة خطم قدامها اللي داره فيها المهدي كله..
بإمتعاض قالت:ايه كلاب..
ومشت من قدامها وخلتها متعجبه..
🌻🌻🌻🌻🌻🌻🌻
وفي حوش عمهم..
كانت اميمه مقعمزة في دارها تقرا..
وغارقه في عالم القرايه..وماعندهاش علم ان في ضيوف في الحوش..
بعد مامرت ع جيتهم ساعه االاربع..
خشت عليها امها الدار وقالت؛البسي حاجه قنينه ..
قاطعتها وهي تقول بتذمر:راك تقولي خطابه..كبدي درهت ياماما..
صفيه:خالتك مغليه وبنتها خديجه هني.
دق قلب اميمه بتوتر وهي تقول:علاش!؟
صفيه؛غير نوضي البسي واطلعي سلمي..
ومشت طلعت وسكرت الباب..
قعدت اميمه تفكر..وذاكرتها جابتلها حاجه مهمه...
"نبي نخطبك"
عقدت حواجبها بعدين هزت راسها وناضت..
طلعت احلى شي عندها...لبساته..
وطلقت شعرها ..وحطت لمسات مكياج بسيطه..
بعدين مشت طلعت..
وصلت في وسط الحوش..
وين شافوها خديجه ومغليه ابتسموا من قلوبهم..
وهي جتهم وع وجهها المشرق ابتسامه حلوة..
سلمت عليهم ومغليه سلمت عليها بحرارة..
بعدين مشت قعمزت حدا امها..
مغليه:الله يبارك عليك يااميمه يعلم الله اني نعزك من قلبي..
اميمه بإبتسامه:تسلمي خالتي.
خديجه:طبعا خالتك مغليه ماتعزك هالمعزة الا وتحاول تخليك قريبه عليها واليوم جايه تبيك كنتها..
اميمه قعدت تشبحلهم وهي ساكته..
مغليه:زي ماقالت خديجه..اميمه بنتي نبيك لولدي عمر.
صفيه قعدت تشبح لأميمه..
اميمه قعدت ساكته لحظات بعدين قالت؛انتم عيله تشرف اي حد يناسبها ومافيش بنت ماتتمناش تكون كنتكم.. زيدوا دوروا وحتلقوا خير مني..
خفتت ابتسامات خديجه ومغليه..
وصفيه تسمع في بنتها..
مغليه:علاش!؟ كانك ع قرايتك كمليها عادي ماعندناش مشكله..
اميمه:مش هدا السبب..بصراحه ونتمنى تكون صدوركم رحبه وين تسمعوا في كلامي هدا..
نبي نسألك خالتي..عمر شن عنده؟
خديجه:كيف شن عنده..
اميمه؛نقصد مكون نفسه مداير لروحه شي..حتى الشهاده مازال ماخداهاش صح..
خديجه؛سيوره ياخدها ويولي كابتن طيار اهل السمي والارض يشهدوله..
مغليه:والشقه عنده فوق مقابله شقة خوه الجالي..
اميمه:دايرها عمي محمد يعني..
مغليه وخديجه بدت طيرلهم منها..
اميمه:اني اسفه بس مانشوفش في عمر يناسبني واعذروني ع صراحتي..
ناضت مغليه وهي تقول:ماحد يموت ع حد.
ناضت صفيه وهي تقول:كله نصيب يامغليه..
خديجه اللي ناضت مع أمها قالت بحده:اكيد كله نصيب
وقعدوا يلبسوا في عباياتهم وهما ماشيات في الباب..
لحقهم صفيه..
بينما ناضت وهي مضايقه ومشت لدارها...
وهما طلعوا من الحوش معصبات..
ع قد ماكلمتهم صفيه مابوش يردوا عليها..
وهما ماشيات للحوش..
مغليه:بنات الواعر كلهم هكي حاسبات روحهم وياريته ع حاجه تستاهل..
خديجه: الله غدوة ناخدوله اللي تسواهم كلهم..
مغليه:احلى منها وبنت عيلة متسميه تسوا فيتها كامله..
وفتحوا الباب وخشوا للحوش..
والمهدي اللي لاحظ وضعهم وهو في المطحن..
المهدي:ماشي شويه وجاي..
ومشي طلع من المطحن لحوشهم..
فتح الباب وخشله..وسكره وراه..
#استغلال_فرص
#طوبى
...يتبع....
