(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الأربعين"كشف المستور1" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 ☕☕☕☕☕☕☕☕☕☕☕☕☕☕☕☕☕ كل وحده تشبح لجهه من السيارة ويدوروا عليها.. وفايزة تبكي وتقول:حي عليا وين مشت وين..اني اللي غفلت عنها..اني.. سدرة:اسكتي خلاص معاش تحملي نفسك ذنب حالة امك صعبه يافايزة مهما تحاولي تردي بالك منها حتخاوتك ودير في روحها شي زي الصغار الصغيرين راهو.. وفايزة تبكي ومش قادرة ترد ع سدرة.. ~~~~~~~ ربيع:شفتها يومها كيف مطلعتها معاها ماتقولش خالتي مشتده بكل زمان كانت جهامه وتبان قويه حتى من نظرة عينها.. المهدي:ياريتها ربت رجاله راهو ماوصلش بيها الحال لهني.. ربيع:خسارة والله مانحسابهم هكي كانوا يبانوا كل واحد جدع اكثر من التاني.. المهدي بتهكم؛ياريتك شفتهم هالجدعان شن داروا في اختهم الوحيده لما احتاجتهم...وبغضب قال..تفي.. ربيع حرك راسه يمين ويسار وهو ساكت.. والزوز يدوروا بعيونهم في الطريق.. اللي كانت اغلبها مظلمه بسبب انقطاع الكهرباء.. ☘☘☘☘ ومطيرة فهالوقت.. اتصلت بغرفه وخبرتها..وقالتلها تقول لراجلها بالك يدير حل.. عبد الرؤوف:عندك ليها صورة؟ غرفه:لا بس تونقول لعمتي كان عندها تبعتلي.. عبد الرؤوف:بسرعه.. غرفه اتصلت بعمتها اللي ردت طول.. "هاه غرفه" غرفه:عمتي كان عندك صورة لخالتي مشتده ابعتيهالي.. "ايه ايه عندي سكري ترا" سكرت غرفه وقالت:توا بتبعتها.. عبد الرؤوف حط ايديه في جيبوه وقعد يراجي وهو يهز في رجله.. غرفه:اها وصلت.. طلع تليفونه من جيبه وقال:ابعتيهالي.. غرفه:تمام افتح البلوثوث.. عبد الرؤوف وهو لاهي بتليفونه:فتحته.. غرفه:متاعي اسمه برنسس سويت.. شبحلها برفعة حاجب.. شافها لاهيه بالتليفون وحطت شعرها ورا وذنها:وصلاتك.. ماردش عليها.. قامت عيونها فيه لقاته كان يشبحلها وفيسع غير عيونه وعقد حواجبه وقال:ايه وصلت..حولي من قدامي.. بعدت غرفه..وهو مشي وهي لحقاته.. عبد الرؤوف وهو ماشي:وين ماشيه.. غرفه:بننزل نقعد مع نبيله.. سكت..فتح باب الشقه وطلع.. وهي وراه..سكرت الباب ونزلت بعده.. ☘☘☘☘☘ وقفت سدرة السيارة وقالت:انزلي.. فايزة:علاش! سدرة:خل نادوا بالك تسمعنا.. وفتحت الدرج متاع السيارة وطلعت منه بيلا وقالت..انزلي هيا.. نزلت فايزة طول.. ونزلت بعدها سدرة وسكرت السيارة.. فتحت ضي البيلا.. وبدت فايزة تنادي:يما.. سدرة:خالتي مشتده.. فايزة بأعلى صوتها:يما... وسدرة تمشي ودور بالبيلا وهي تقول:زعمه متفكرة اسمها؟ فايزة:ايه.. سدرة:بس ناسيه انك بنتها.. كلام سدرة وجع قلب فايزة ع الآخر بس هادي هي الحقيقه.. هي في مرحله من المرض ردتها لأيام الطفوله..يعني الماضي القريب كله ولى في طي النسيان... غمضت فايزة عيونها بشده وهما يقطروا دموع ونادت بأعلى حسها.. "مشتده" غيرت سدرة عيونها عن صاحبتها وهي شاده دموعها.. وفايزة بعد نادتها بإسمها معاش قدرت تشد روحها.. انهارت وهي تبكي.. وسدرة تشوفلها بألم وهي تقول:فايزة.. فايزة ببكي:واجعتني ياسدرة واجعتني..صح ماكانتش حنينه فيها بس متحسرة عليها على معاملتها لخوتي وبشن قابلوها..الدكتور قالي امك متعرضة لصدمة نفسيه خلت المرض يطور بسرعه..وصدمتها جتها منهم لما لوحوها في دار العجزة..تخيلي تقعدي تربي وتكبري وتتعبي وتحني وتودي وتعطي عمرك كله وهدا يكون جزاك ياسدرة تخيلي.. سدرة تسمع فيها ودموعها ينزلوا دمعه ورا تانيه.. فايزة وهي تبكي:الله لايربحهم..الله اللي داروه في أمهم يرده ربي كله من صغارهم.. جتها سدرة وحضنتها وقعدت تمسح ع ظهرها من غير ماتقول كلمه.. ومن بعيد سيارة المهدي واقفه.. والزوز يشبحولهم.. ربيع بضيق:شكلها فايزة ياما عانت.. المهدي:عانت هلبه وسدرة ديما واقفه في ظهرها..اساسا سدرة ماخلت حد احتاجها الا ووقفت معاه مهما دار فيها.. ربيع:فزاعة من يومها.. ابتسم المهدي وهو يشبح لسدرة.. كيف خدت فايزة ركبتها السيارة.. بعدين تحركت وهو تحرك وراها.. ☘☘☘☘☘ "نزلتي" غرفه:ايه في اغلب القروبات وبعتت رسائل للصفحات المشهورة.. نبيله هزت راسها وقالت:هكي حيلقوها بسرعه.. غرفه:إن شاء الله.. سكتوا الزوز شويه بعدين نبيله قالت.. وهي تفرك في صوابعها ببعض وتشبحلهم:غرفه.. شبحتلها وقالت:نعم! شافتلها وقالت:غرفه..في حاجه اني مانعرفهاش تخصك انتي وعبدالرؤوف؟ صدم غرفه السؤال ومعاش عرفت شن تقول قعدت تشبحلها وخلاص.. نبيله:هو اني نعرف خوي..كانت عنده قصة قديمه مع بنيه ضحكت عليه ومن بعد هالقصه هو تغير هلبه.. قلبها غرفه وجعها..وبلعت ريقها من التوتر.. نبيله:اني في الاول كنت نقول انه قاعد يخلص في ثاره من هديكا البنت فيك انتي..بس بعدين..لما قعدت نشوف في ردة فعلك استغربت..ولامرة شكيتي وحسيت زي اللي راضيه عن اللي يدير فيه.. سكتت نبيله شويه وهي تشوف لغرفه.. وغرفه تشوفلها بقلق ومش قادرة تتكلم.. ونبيله كملت تقول.. "وكأنك هي نفسها البنت اللي صارتله معاها القصه" فتحت غرفه عيونها ع وسعهم..وعيونها تعبوا بالدموع وفاضوا.. نبيله لما شافت ردة فعلها..رفعت حواجبها بعدم استيعاب وقالت:انتي؟! رمشت غرفه عيونها بسرعه وكيف جت بتتكلم.. رن تليفونها.. طول شبحتله وهي في قمة التوتر.. لقت.. رؤوف..يتصل بك... فتحت الخط وردت بسرعه.. غرفه:أيوه رؤوف.. "كلمي عمتك قوليلها لقيناها" غرفه تنفست براحه وقالت:الحمد لله..تمام سكر خل نقوللها.. سكر عبد الرؤوف.. وهي ناضت اتصلت بعمتها بش تبلغها.. ☘في حوش لطفي.. كان مروح وعرف باللي صار.. وبنات فايزة كانوا عندهم وهما خايفات ع امهم.. لطفي بغضب:شن يطلعها في الليل كيف تطلع في وقت زي هدا وين تحساب روحها عايشه هادي!؟ طوبى بقلق:بابا بالشويه عليك تو يرقى ضغطك.. لطفي:من اختك وعمايلها..اني مش عارف البنت هادي كيف تمشي باهيه باهيه..وبعدين تغلط غلطه لاقبلها ولابعدها.. مطيرة كيف جت بتتكلم رن تليفونها.. لقت غرفه تتصل بيها.. ردت طول . مطيرة:هاه غرفه... "الحمد لله ياعمتي لقوها" مطيره بفرحه:الحمد لله..الحمد لله ياربي.. طوبى:شني عمتي لقوها.. هزت مطيرة راسها بإيجاب.. لطفي بعصبيه:والهانم هديكا وينها وين مشت.. وطوبى ومطيرة وبنات فايزة يشبحوله بخوف.. ☘برا في الشارع.. وصلت سيارة سدرة قدام الحوش.. وسيارة المهدي قدام المطحن متاعهم.. ونضال ومحمد واقفين يشبحلوهم.. نزلت سدرة بعدين مشت نزلت فايزة..ومشت بيها لباب الحوش فتحاته وخشوا الزوز.. والمهدي وربيع نزلوا من السيارة وهما يشبحولهم.. نضال ومحمد قدموا للمعدي وربيع.. نضال:شن صار؟ المهدي:مالقينهاش.. محمد المهدي:لاحول ولاقوة الا بالله... ☘☘☘☘☘ وفي حوش الواعر.. كانت فايزة حاضنه مطيره وهي تبكي بفرح وتقول:الحمد لله ياربي.. وسدرة تشبحلهم وهي مبتسمه بفرح وتمسح في دموعها.. وكذلك البنات كانوا يشبحوا لأمهم بفرح.. فرحانين لفرحتها.. اما طوبى فكانت تشوف في نظرات بوها لسدره اللي كان باين فيها الغضب وخايفه من تصادمهم.. ☘وفي الطريق.. كان عبد الرؤوف يسوق وفي جنبه مشتده اللي كانت في عالم تاني.. كان يسرقلها في النظر وقلبه موجوع عليها... وقعد في نفسه يسب ويشتم في ولادها.. درس قدام حوش الواعر.. واتصل بعمه لطفي... لحظات وطلعله لطفي.. والمهدي وربيع وباقي الشباب يشوفولهم من قدام القهوة.. لطفي وقف ع روشن سيارة عبد الرؤوف وقال:معاك هي.. عبد الرؤوف:كلم عمتي مطيره تجي تاخدها.. لطفي:بنتها هني تو تجي تاخدها.. هز راسه وقال:تمام.. لطفي مشي خش داخل.. وعبد الرؤوف قعد يستنى..شاف لمشتده لقاها ع حالها.. تنهد وقال:لاحول ولاقوة الا بالله.. ع طلعة مطيرة ومعاها فايزة.. نزل عبد الرؤوف من السيارة وتباعد.. وفايزة جت للباب من جهة امها.. فتحاته وهي تقول ببكي:يما..وين مشيتي يام.. لما جت بضمها.. مشتده بخوف:بري غادي بري..بري..وقعدت تضرب فيها.. وفايزة تبكي.. ع جية مطيره وهي تقول:بنتي فايزة حولي شويه.. بعدت فايزة وهي تبكي.. مشتده لما شافت مطيرة قعدت تقول:يما يما تعالي خودني منها تبي تهرب هادي.. مطيرة:باهي باهي..غير انزلي.. ونزلت مطيره مشتده.. وقعدت تمشي فيها ومشتده شاده فيها بقوة.. رفعتها لحوش سدرة.. وعبد الرؤوف يشوفلهم وهو متأثر ع الآخر.. وكل من كان واقف يشوف في الموقف اثر فيه هلبه.. فايزة مشت لحقتهم وهي تبكي.. وعبد الرؤوف مشي ركب سيارته ونفسيته تعبت هلبه من الموقف.. سلم ع عمه لطفي..بعدين ولى لحوشه.. اما لطفي خبط الباب وخش داخل.. لطفي بغضب:سدرة..سدرة.. في الصاله.. طوبى:شن ماقال ماترديش.. هزت سدرة راسها وهي تبلع في ريقها من الخوف.. ناضت طوبى وقالت لبنات فايزة:تعالوا معاي.. ناضوا معاها التلاته ومشوا طلعوا من الصاله.. ع خشة لطفي وهو يقول:انتي خيرك فهميني خيرك..يغيب عقلك مرات وديري في تصرفات مش عارف شن نقول عليها.. سدرة هزت راسها وقالت:عندك حق والله عندك حق عقلي غاب ونسيت كل شي..سامحني بس وضع فايزة وكيف قالت امها طلعت من الحوش وهي مريضة زهايمر خلاني مانفكر في شي.. لطفي:اسمعي جاي ياسدرة راك بالغه راشده يابنتي ماتجيش نقعد نهزب فيك ونحاسبك.. لكن الغلطه اللي درتيها هادي تخليني نحاسبك غصب عني..مد يده وقال:جيبي مفتاح السيارة.. سدرة:بوي! لطفي بعصبيه:قلت جيبي المفتاح.. سدرة خافت وقدمت لبوها ومدتله المفتاح.. خداه بعنف وقال:اني نوصلك ونروح بيك..ولو كنت مش فاضي نبعتلك خوتك..ركوب تاكسيات لا..فاهمه.. سدرة وهي مضايقه ع الاخر:فاهمه. لطفي:انتي اللي جبرتيني..ومشي طلع من الحوش بطريقه لحوش بوه.. جت طوبى بسرعه لسدرة وقالت؛معليشي حبيبتي اعذريه من خوفه عليك.. هي غمضت عيونها وخدت نفس بعدين زفرت وفتحتهم تاني وقال:عارفه عارفه..بري روحي بالبنات لحوشهم.. طوبى :حاضر.. مشت سدرة بطريقها للحمام.. اما طوبى ولت خشت للدار وقالت؛هيا يابنات.. خدت عبايتها ووشاحها من الشماعه.. صفاء:جدي لطفي تعارك مع خالتي سدرة ع خاطر ماما.. طوبى وهي تلبس في عبايتها وقالت:لالا حبيبتي ع خاطر حاجه تانيه هي اطلعوا قدامي بش تروحوا.. ولبست وشاحها والبنات طلعوا قدامها... ☘☘☘☘☘ "والله مافي فايته هكي" نبيله:شن تبي دير.. عبد الرؤوف:ماتوجعيش راسك انتي.. وجاي بيمشي لشقته بس هي وقفاته لما قالت.. "ديما اني اخر من يعلم" التفت وشبحلها وقال:شن قصدك.. نبيله وهي طايرتلها منه:سلامتك.. ومشت طول لدارها.. هو استغرب هلبه.. بعدين مشي بسرعه بإتجاه الباب الفاصل.. خش وركب يجري.. وصل في الشقه فتح بابها بقوة..سكره وراه بقوة.. وقعد يقول بعصبيه:هيي انتي..وينك.. طلعت غرفه من دارها وهي خايفه.. وقف قدامها وقال:شن قلتي لنبيله.. غرفه بتوتر:شي.. هو بصوت عالي:كذابه.. غرفه بخوف:اقسم بالله ماقلتلها حاجه لقيتها عارفه كل شي بروحها.. هو انصدم وقال:كيف!؟ غرفه وهي خايفه:اختك تركز هلبه مايفوتها شي وانت بتصرفاتك خليتها تشك وتعرف.. عبد الرؤوف:كذابه اكبر كذابه لكن بنقولك حاجه جنيتي ع روحك لأن اكثر بنادم في الدنيا..تكرهه نبيله..انتي.. ودفها من قدامه ومشي خش لدار النوم وخبط الباب وراه.. هي دمعوا عيونها من الخوف.. خوف من اللي حتشوفه القدام..خوف انها تنجبر تعلن استسلامها وتخلي كل شي وراها.. ومش هامها شن حيصير بعدين..قد ماهامها بعدها عنه شن ممكن يدير فيها... خشت لدراها وهي تبكي بصمت وسكرت الباب... ☘☘☘☘☘☘ وفي من قاعد يعاني بصمت.. وفي الخفاء.. عنده قدرة عجيبه في إخفاء الجانب المظلم من حياته.. يطلع للناس في احسن صورة بمظهر يحسد عليه.. وماوراء الكواليس يعيش حالات يرثى لها.. الجالي.. اللي راقد في داره فوق سرير ع رجل امه اللي تمسح ع راسه وهي تقرا عليه ودموعها ينزلوا.. انفتح باب داره.. وخش بوه وسكر وراه الباب.. جي لولده وهو يشوفله بأسف قال:خيره تعب مرة تانيه؟ رشفت مغليه وهي تهز في راسها.. محمد بحسرة:حسبنا الله ونعم الوكيل.. لف ومشي طلع من الدار وهو يردد:حسبنا الله ونعم الوكيل.. ☘☘☘☘☘ الساعه 12:00منتصف الليل.. في دار المعيشه.. البنت وعمتها راقدات حدا بعض ويهدرزوا.. سدرة:لاحول ولاقوة إلا بالله..من قال خالتي مشتده يصير فيها هكي.. مطيره:هادي الدنيا يابنتي مافي حد عارفه وين بترفعه ايامه.. سدرة:تعرفي اني نقول لو تحطها في مستشفى خيرلها جالتها صعبه هلبه.. ناضت قعمزت مطيرة وهي تقول:نهارك احرف..انتي تقولي هكي.. سدرة؛المرض هدا صعب هلبه ياعمتي وهي بروحها ناسيه انها بنتها.. مطيره:لكن فايزة قاعده متفكرة ان مشتده امها..انتي لو كنت مكانها وصار في المرحومه ورده هكي ترفعيها لمستشفى؟! سكتت سدرة وهي مضايقه.. مطيره:هاه ريتي مستحيل ديريها..وبعدين اني معاها مشتده نبي نكسب اجرها..صح ربي حرمني من نعمة الذريه..لكن فتحلي باب تاني للأجر مستحيل نخليه.. سدرة؛باهي وخدمتك؟ مطيره:مش بروحي فيها معانا فردوس وصفيه وهي اغلب وقتها راقدة مسكينه... سدرة ابتسمت وقالت:ربي يكتب اجرك عميمتي.. ولت رقدت مطيره وقالت:يارب..شبحتلها شويه بعدين قالت..معليشي تو يرضى بوك وتعرفيه معاك انتي ماعنداش الروح.. سدرة:اني مضايقه من روح ياعمتي لما ندير حاجه تزعله وتعبه..مايستاهلش بوي.. مطيره:مرة تانيه فكري قبل لتتصرفي حكمي عقلك.. سدرة تنهدت وقالت:ان شاء الله.. ☘وفي الدار التانيه.. طوبى كانت مقعمزة ع الصلايه وهي لابسه المصليه وفي يده المصحف وتقرا في الختمه متاعها... 🌸زي أميمه بنت عمها اللي ماترقدش قبل لتقرا سورة البقرة.. لما كملت رن تليفونها.. ناضت حطت المصحف في مكانه ومشت لتليفونه وقاماته.. لما شافت المتصل ابتسمت من قلبها وردت.. اميمه:عموري.. "ياعيون وقلب وروح عموري استاحشتك ياقلب قلبي" اميمه بضحكه:واني اكثر حبيبي..شن الجو غادي. "يدره الكبد بلاد انتي مش فيها ماعندي ليها جو" ضحكت اميمه... وكملوا هدرزتهم كانت كلها حب وضحك..ومواضيع تانيه ليها علاقه بالحياة العامه..وتخطيط للمستقبل.. ☘في الوقت اللي فيه بنت عمها.. غرفه..مقعمزة ومنسنده ع الحيط اللي يفصل بينه وبين اللي عقلها وقلبها عنده.. وهو كان يفكر شن بيصير بعد مانبيله ولى عندها علم بكل شي.. الوضع تعقد اكثر من قبل... ☘☘☘☘ وتاني يوم الصبح.. نزلت غرفه وهو وراها.. مشت طول للكوجينه وهو وراها.. لقت نبيله تجهز في القهوة.. غرفه بإبتسامه؛صباح الخير.. نبيله بدون ماتشبحلها خدت سفرتها وطلعت وهي تقول من غير نفس:صباح الخير. عبد الرؤوف:صباح الخير.. مابتش ترد عليه بكل..وفاتت من حداه وكأنها ماشافاته.. شبحلها شبحتله.. قدملها وقال بصوت منخفض محاولة منه كتم غضبه:كله منك..كله منك انتي.. غرفه؛تو نمشي نكلمها.. شد ذراعها وقال:خليك في مكانك اسلملك.. غرفه قعدت تشبحله ودموعها في عيونها.. هو غير عيونه عنها وقال:بري اركبي للشقة بري.. نزلت عيونها وهزت راسها.. هو طلقها وهي مشت طلعت من حداها.. وعيونه معاها وشافوها لما دمعت.. تنهد بضيق بعدين قال:لاحول ولاقوة إلا بالله.. ومش طلع من الكوجينه ومنها من الحوش بكل.. ☘☘☘☘☘ وفي حوش جيرانهم... تحديدا الدور التاني.. الدار اللي تجي ع اليسار.. طلع منها الجالي وهو بكامل اناقاته كعادته.. شاد شنطة اللاب توب متاعه.. وفي يده التانيه نظاراته.. نزل من الدروج لين وصل لوطا.. وهو ماشي..التفت للكوجينه شاف امه.. رجع وخشلها وجي عندها باس راسها وقال:صباح الورد.. التفتت مغليه وقالت:صباح الخيرات..راجي شويه ولدي.. ومشت للثلاجه طلعت شيشه ميه مرقيه بورق السدر ومشتله بيها وهي تقول:اشرب منها هي بس.. ابتسم وخداها منها وقال:حاضر..ماتبي شي؟ مغليه:سلامتك بس ياغالي.. الجالي:سلام..ولف ومشي طلع.. وهي تقوله:في أمان الله..بعدين تنهدت وقالت..ياالله انك تفرج ع ولدي وتشفيه ياالله.. ☘☘☘☘ هو طلع من الحوش... ع طلعة طوبى من الحوش.. كانت لابسه عبايه اشبه بالفستان لونها موف هادي.. وشاربه لونها موف غامق.. شبحو لبعض.. طوبى لما شافاته خطر عليها كلام امه تحشمت..ومشت طول.. وهو قعد معاها بعيونه من ورا النظارات لين ادرقت.. بعدين مشي ركب سيارته.. شغلها وتحرك.. قعد يمشي وراها بمسافه لين شافها وصلت لمكان معبي افيكوهات..ركبت واحد منهم.. بعدين مشي تحرك بإتجاه الشركه... وبعد طول مسافه... وصل للشركه.. بعد مادرس السيارة في البركيدجو.. مشي خش لمبنى الشركه بنفس الآنفه وقوة الحضور.. حول النظارات لاقاته السكرتيره وقعدت تبلغ فيه ع المهام اللي بيديرها اليوم.. وهو يسمع فيها ويهز في راسه.. لعند ماقرب يوصل مكتبه.. شاف نجاة مقعمزة تراجي فيه عند السكرتيره.. :ايه باش مهندس المهندسه نجاه طالبه تشوفك ضروري لشي يخص خريطه المنتجع السياحي.. هو شبح لنجاة شويه بعدين قال:يتأجل الكلام فيه لوقت تاني مش فاضي.. بعدين مشي لمكتبه خشله وسكره عليه.. السكرتيره:اليوم مزاجه مش رايق.. شبحت للسكرتيرة من فوق لتحت بعدين مشت طلعت... السكرتيره بإستغراب:هادي خيرها!؟ ☘وهي وصلت لمكتبها..خشتله سكرت عليها.. وقامت تليفونها وقعدت تكتب في رساله.. بعتتها..وصلاته.. (جالي علاش تهرب مني ماعندك شي تهرب منه اني عندي علم بكل شي) راجت رده وماجي منه شي.. بعتتله تاني.. (جالي اني نحبك بكل شي فيك كل شي..اساسا اني مليانه عيوب مازال ماتعرفهاش) كذلك لارد.. غمضت عيونها وحطت يدها ع جبهتها وهي محروقه من جفاه ليها.. نزلت يدها وفتحت عيونها . بعدين بعتتلها رساله اخيره.. (تمام بنخليك براحتك المده هادي ولازم تعرف اني مش حنخليك..نعشقك) بعدين لوحت تليفونها ع الطاوله ومشت قعمزت ع الكرسي وهي شاده نفسها عن البكي بقوة.. 🍀🍀🍀🍀🍀 واستمر بعد الجالي عن نجاة ايام.. وهي صابرة ومتحمله ظاهريا بس من داخلها قاعده تنحرق بنار حبه وشوقها الشديد ليه.. وهو قاعد يهرب منها ع قد مايقدر... 🌸ومن جهة تانيه... استعدت آلاء لبيان ولد عمها استعداد تام.. شرت اغلى واحلى قفطان..جتها كندره حلوة وغاليه من اريج.. وفي يوم البيان.. جت طوبى وهي جايبه معاها قفطان لأريج من قفاطينها وكانت تبي تمكيج البنات.. سدرة:وعلاش ماتمشيش امشي وحطي صوابعك في عيونهم. فردوس:والله ماعندي جهد ياوخيتي لحرق الدم خليني شاده حوشي احسنلي.. سدرة تنهدت وقالت:اللي يريحك ديريه.. فردوس:باهي وانتي قاعد بوي مقاطعك؟ تنهدت سدرة بضيق:اسكتي معاش تفكريني وهو جايبنا ركب طوبى القدام واني لتالي.. قعدت تضحك فردوس.. ☘في دار البنات.. طوبى وهي تمكيج في آلاء:احسن حاجه طلعيه من حياتك بكل.. آلاء:اليوم ان شاء الله حنطلعه ونسكره وراه الباب ونبني عليه بومشي.. ضحكت طوبى وقالت؛هدا الصح.. فجأه.. شهقت اريج شهقه طويله.. هما الزوز انفجعوا وقالوا:خيرك!؟ اريج وهي بتنجن:شوفوا شوفوا..شوفوا الاستاذ المحترم شن داير!.. وورتهم مقطع فيديو ليها وهي تاكل بشراهه.. الاء بضحكه:حي تفكرتي اليوم هداكا بيبو.. طوبى بضحكه:ايه..اول السمستر اللي فات.. اريج وهي واصله لأقصى مراحل الغضب:الصعلوك هدا بعتلي الشمطاء الهامعه.. قعدوا يضحكوا الزوز.. اريج:مبردك انتي وياها تضحكوا ياباردات.. مشت قعمزت ع الكرسي وهي دايره في شعرها اللوايات وتقول بنرفزة؛كيف يتجرأ ويصورني كيف.. طوبى:هدا بلعاني يبيك تكيها معاه بش يسقطك.. آلاء:حتى اني نقول هكي.. واريج تفكر في كلامهم..وتفكر كذلك في طريقه للإنتقام.. شويه وارتسمت ع وجهها ابتسامه ماكره وقالت:بنات..يوم فاتحه عمر واميمه صوروا جو النوبه فيديو ولا؟ طوبى:ايه عندي خديته من يوسف يومها.. ناضت اريج وقالت:حلو بكل.. ومشت تجري خدت تليفون خالتها وقالت:تو تنشوف يااستاذ يامحترم.. طوبى:حي عليك شن بديري؟!.. اريج وهي لاهيه:تو تعرفي بعدين.. آلاء:طوبى هيا كملي معاش في وقت.. تنهدت طوبى وقالت؛يستر الله منها اختك هادي.. واريج خدت المقطع.. وقعدت تقص فيه وتساوي لين دارت مقطع لنضال وهو يرقص.. بعدين خشت ع ايميل وهمي ليها..وخشت منه ع قروب يخص كليتهم ونزلت المقطع.. ضحكت ضحكه شريرة مصطنعه.. والاء وطوبى شبحولها بريبه.. ☘☘☘☘☘☘ نزلت من شقتها.. في بالها مبادرة منها تبي ديرها بش تكسر الحاجز اللي انبني بينها وبين حماتها اللي كانت تشوف فيها بمكانة فردوس وسدرة.. مشت طيبت قهوة..ونثرت حوالين حوالين الفنجان ع السفرة زهر الفل.. ومشت بيها لدار نبيله...وصلت فيها دقت الباب.. "تفضل" فتحاته وخشت وهي تقول:السلام عليكم.. نبيله وهي تشوف في كتابها ردت من فوق نفسها:وعليك السلام.. مشت غرفه حطت السفرة ع الطاوله وقالت:تفضلي.. مابتش ترد عليها نبيله.. خدت غرفه نفس وقالت:عارفه..انك فهمتي كل شي..وبجديات اني مش عارفه شن نقولك..مانقدرش ندافع عن نفسي ولانقدر نبرر شي..بس كل اللي نقدر نقوله.. اني.."نحبه" رفعت عيونها وقالت؛بعد ماولى عبد الرؤوف حبيتيه بعد ماولى انسان تاني مش خوي اللي نعرفه..خلتينا اني وامي الله يرحمها متشوقين ع يوم من ايام مبروك...ماتت امي وهي مستاحشه خوي اللي رباته ع ايديها..ع بياض النيه وطيبة القلب..والود والضحكه الحلوة..انتي لو ماكنتيش تحبيه وكنتي هازيه عليه وعلى شكله..حني كنا نموتوا فيها بكل خصايله حتى اللي اني مش راضيه عنهم.. غرفه كانت تسمع ودموعها تنزل.. نبيله ودموعها في عيونها:انتي كسرتي خوي وكسرة الراجل واعرة..هزيتي عليه وقللتي منه وطيحتي قيمته قدام نفسه.. انتي ماتستاهليش لاتكوني معاه ولامع عبد الرؤوف لأنك حدمريه مرة تانيه.. غرفه بدت تبكي بالصوت.. نبيله وهي تمسح في دموعها اللي نزلوا:اني مش طايقتك ولامتحمله شوفتك..فأرجوك..بري اركبي لشقتك شديها وياريت معاش تنزلي هني مرة تانيه.. طلعت غرفه من الدار وهي تبكي.. ونبيله حطت راسها بين ايديها وقعدت تبكي.. ☘ركبت غرفه تجري للشقه وهي تبكي.. وصلت فيها وخشت.. مشت طول لدار النوم.. فتحت الدولاب وشافت الملايه طلعتها.. وهي طلع فيها سمعت صوت حاجه تتحرك.. كانت صورة المبروك.. طبست وخدتها وقعدت تشوف للصورة وهي تتفكر في كلام نبيله وتبكي.. 《انتي كسرتي خوي وكسرة الراجل واعرة..هزيتي عليه وقللتي منه وطيحتي قيمته قدام نفسه.. انتي ماتستاهليش لاتكوني معاه ولامع عبد الرؤوف لأنك حدمريه مرة تانيه..》 بدون ماتحس حضنت الصورة وبكت من قلبها... بعدين بعدتها ومشت حطتها ع الكامدينو.. لبست الملايه.. وخدت الكاترو..طلعت منه الصورة وهي تبكي بالعبرة.. لفتها ودستها داخل العبايه.. ومشت طول طلعت وتوجهت للمدخل طلعت كندرة حاطيه لبستها.. ومشت طلعت من الشقه.. نزلت من الدروج وين وصلت لوطا طلعت من الحوش كله.. ومشت لحوش بوها.. رنت الجرس اكثر من مرة ماحد فتحلها.. مشت لحوش جدها..دقت الباب اكثر من مرة.. فتحتلها اميمه.. لما شافتها باكيه قالت:خيرك غرفه!؟ خشت غرفه..واميمه سكرت الباب.. وبدون مقدمات غرفه ضمت اميمه وهي تبكي.. واميمه وهي مصدومه قعدت طبطب ع ظهرها... ☘☘☘☘☘ وفي حوش محمد شنيبه.. كانوا كلهم مفرشين ومقعمزين في الجنان.. عاد يوم الخميس..يوم اللمه.. مغليه وبناتها والكناين والصغار... في القعده كان الكل موجوده ماعدا نجاة اللي كانت ماشيه لجناحها بش ترقد ولدها.. خديجه في وقتهت لهت بموضوع تهدرز فيه نسرين ونست كل شي.. ☘وداخل.. الجالي كان ماشي في الممر اللي فيه دار المكوى واخرته يرفع للريفودجي.. وهو يتكلم بالتليفون... الجالي:خلاص قبل رمضان بإذن الله نتلاقوا ونزيدوا نتفاهموا غير انت روح بالسلامه..ابتسم وقال..ان شاء الله ان شاءالله.. ع خشة نضال للحوش وهو يتفرج ع الفيديو اللي نزلاته اريج وقال بصوت غير مسموع:منزلاته من ايميل وهمي ع اساس مش حنعرفك ياشمطاء..لكن باهي تو نوريك.. ........... الجالي:يللا مع السلامه تحياتي.. سكر وهو ماشي من قدام دار المكوى.. مجرد ماجي قدامها.. ماحسش الابيد ساحبه يده..وهو طول خش للدار.. والباب تسكر.. هالللي صار جي قدام عيون نضال.. اللي كان واثق ومتأكد من تكون صاحبة اليد اللي جبدت الجالي لدار الكوي.. ☘في الدار.. الحديث كان بصوت منخفض يكاد يكون هامس.. الجالي:خيرك هبلتي!؟ نجاة وهي شاده ايديه الزوز:انت اللي هبلتني..دمعوا عيونها وهي تقول..علاش درت فيا هكي..ساهل عليك تجافيني جالي!؟ هو لف وجهه عنها وكانت باديه ع وجهه ملامح الضيق.. لقت وجهه ليها ورجعت شدت ايديه وهي تقول:قتلك اني عارفه كل شي.. الجالي وهو عاقد حواجبه:طاهر حكالك؟ نجاة:نهائي وربي شاهد ماكانش يحكي قدامي اي شي يخصكم..بس مرة سمعته يتكلم بالتليفون مع دكتور نفسي وجي اسمك انت في الكلام وفهمت كل شي.. الجالي ولمعة الدموع بانت في عيونه:اكيد تشمتي وقتها.. شدت ع ايديه بقوة ودموعها ينزلوا وهي تقول:وقتها ماكانش محسوب من عمري حبيبي..عمري بدي لما حبيتك ووليت مرتك وراضيه بيك حتى بعيوبك..اصلا اني قدامك وانت تعرفني معبيه وياما مر عليا في حياتي واللي ريته اثر فيا هلبه..مافيش فرق بيني وبينك بكل . ضحك وقال:قصدك بتقولي الزوز حالة زي بعض.. ضحكت من بين دموعها وهي تقول:ايه..ونحبك ونموت فيك بكل حالاتك.. ابتسم وقال:هدا علاش ماحبيتش غيرك في حياتي.. ☘☘☘☘ لحظات.. وطلع الجالي وجوه رايق ع الآخر.. ومشي ركبت لداره.. وشويه وطلعت وراه نجاه وهي بطير من الفرح وطلعت طول للجنان.. ونضال طلع من تحت الدروج.. كانت باديه ع وجهه ملامح الأسف وهو يقول:خسارة ياجالي.. ☘☘☘☘☘☘ الساعه 8:30مساءا.. درست سيارة عبد الرؤوف قدام الباب.. نزل منها..ومشي خش للحوش.. ☘خش داخل ومشي دار طلة ع نبيله لقاها تصلي في دارها.. مشي وهو يلعب بالمفتاح في يده.. خش للباب الفاصل وركب الدروج.. وصل للشقه لقي بابها مفتوح استغرب.. خش وسكره.. بانت ع وجهه ملامح عدم التقبل.. حس وكأن الشقه فيها شي مخليه مايبيش يكمل.. استغرب في نفسه.. وقدم وهو يشوف حواليه وكأن الشقه فاضيه.. وصل في دارها لقاها مفتوحه ع وسعها استغرب.. شبح للحمام..بعدين مشاله قعد يدق عليه اكثر من مرة..بعدين فتحه..لقاه فاضي مظلم.. بدي القلق يدب في قلبه.. مشي للكوجينه فاضيه.. توجه لدار المعيشه..فاضيه.. وصل في دار النوم خشتلها.. لقي باب الدولاب مفتوح.. مشاله طول شاف الملايه مهناش..انصدم.. شبح حواليه جو عيونه ع الكاترو.. جاه طول وقامه..قعد يشبحله للحظات.. بعدين مشي بسرعه طلع من الشقه ونزل لوطا يجري...
#كشف_المستور #طوبى
....يتبع.... الجمان الفريد
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
